\id ROM
\h Roꞌroma Iyotepawa
\mt2 Paoro
\mt1 Roꞌroma
\mt2 Iyotepawa
\c 1
\s Teepotari
\p
\v 1 Kúíra Rooma muuwarichi mochikame. Kaꞌkaruma mochikame enesaa eemea, kaawe enemiipua, yooma eeme Riosichi poponiwao pipiniwaopua tiame. Teemea iꞌwao, kaꞌkaruma mochikamepua. Neee Paoroa, Eesusi Riosie Weratiamechi tekipanamea iꞌwa yasakaoinia iꞌka aamowichio iyotemo erapakania, itapiti Riosichi simiyame naawesari. \fig |177-CN02061B.TIF|col|||Paoroa Rooma muuwarichi mochikamewichio iyotena.|1:1\fig*Neee Paoroa Riosie Weratiamee poanataka uutiamenia, iꞌka Riosichi simiyame yomatiami weeechi nayewatumichiopua, iꞌka kaꞌkaruma tuuyewari Riosi kokosarichi newipapuame.
\p
\v 2 Ihji Riosi tuuyewaria, ehkoriami Riosi naꞌnayewatura chaachapariapua, Ehkoriami Iyoterichio, Riosi taamo newipamio tuuriapua.
\v 3 Puuu Riosi kaꞌkaruma tuuyewaria, Eesusi Riosie Weratiame nayewamepua Ehkoriami Iyoterichio. Ihji Eesusia tijoechitiao, Raawitaru tetejimarisiwachi naawakamepua.
\v 4 Nape ihji Eesusi tiiariraa, ahpo Noono Riosi tiiarira naawakamepua, waꞌa tiiame ahpo maꞌchitarepua ahpo Noono tiiari Riosiwarie mukukai oijenatetiapa, waꞌa ikisao, ahpo Noono Taanachitia, ahpo Noono tiiariwachi eenechi mooenakapa.
\v 5 Puuu Eesusi oijenatetiamee ajawatiame teemea, ahpo waꞌapi nayewatumichiopua, yomachi weeechiopua ahkaoi mochikameo, apochi eꞌenaka paparamichiopua.
\v 6 Eemea Rooma mochikamea, muuwaeme waꞌaopua uukame puuuapa, taamo Noono teꞌpa kahtiame kaꞌkaruma tuuyewario, Riosie paajutetiao, ahpo Taanachi paparaka mochitomichiopua, puꞌka Taanao apoe weerariamechio.
\p
\v 7 Pukaepa Riosia yooma ahpo kaaweruma tuuyewari uukameopua, ahpo mochiwari iintaparepua tísia ahpo nakiya. Apoe Riosionia, apoe Paamira Riosie Weratiameopua tiameo, aamo tísia kaaweruma cherirewa kiajeraninia, aamo iikachiopua tiameo, taꞌiria aamo mochitomichiopua kihta aꞌchitiame eina erakoka.
\s Rooma weeechi siminare Paoro
\p
\v 8 Neeea cheriwema kiꞌyamenia Riosio, ahpo ijinuwa mochiwari iintapariopa, ahpo Taana Eesusichi tísia ahjachi paparariopa, yomatiame weeechiopua tiameo, tísia Eesusichi paparaniame inamuapa tiame.
\v 9 Neeea ki teesa tiame weemupakamenia, iꞌka Riosi Taanarachi simiyame nayewatukao. Apoe Riosia noꞌo tetewamepua inisiao, ki noꞌo naanatakepopua senepi taawechi aamowichio itakao, Riosichi kaawe teꞌteretowaopua.
\v 10 Riosio itaniamenia tiameo, aꞌchitia teekaoi noꞌo aamo tetewitemichiopua, aamo mochikachi eenakao, taamo Noono tewekachi kahtiame waꞌa erasoo.
\v 11 Ki ahjame eꞌranine waꞌasi aamo tetewinariaa, puꞌka aamo Eesusi Riosie Weratiamechi paparao, epeche utewaeme ahjachi peewapariopua waꞌasi.
\v 12 Waꞌachitia eemeai aamo mochikachi noꞌo enasoopua, napatika ahpo waꞌachitia oisa erapatema teemea, waꞌachitia Eesusichi paparamekapa.
\p
\v 13 Noꞌo Riosichi poponiwa pipiniwa tiame, aamo naneꞌrejeraninia noꞌoo, ki ehpesi oꞌinia aamo neꞌnemia siisiminarerioopua, nape ahkasi ehpesio kaꞌchi iika siime teeteriamenia. Noꞌo waꞌa Rooma muuwari siinarewaa, Riosiwichio echimia siminariamenia waꞌao, epeche iꞌipari teerepuawichio Riosiwichioo, epeche Eesusichi paparame, wahjachi weeechiami noꞌo iintoriachitia.
\v 14 Wikirieka eꞌramenia noochio, ki yomachi naewamekapa pehjio, Riosi kaaweruma tuuyewariopua yooma ihta tiꞌtijoeriopua, weeweruma tiiameoi ki weeweruma tiiameoi, teꞌta pepenipakameoi, ki teꞌta pepenipakameoi.
\v 15 Waꞌa eꞌrapa neeea, tísia siminariame neeea, waꞌa Rooma aamo mochikachio, nooe aamo naewatunariapa Riosi aamowichio kaꞌkaruma tuuyewariopua.
\s Kaaweruma Riosi tuuyewari utewarira
\p
\v 16 Neeea kiisi suuwe eꞌramenia iꞌka Riosi kaaweruma tuuyewari nayewatukao, Riosia iꞌka ahpo tuuyewarieo yooma ahpo Taanachi paparakameo, ahpoe kokosapuameo, newipatiamekopua, Riosio apoe waꞌapi iinuekapaopua, aaataoi tatakoriria cheriwepuaopua.
\v 17 Riosia, ikachi kaaweruma tuuyewarichi taamo neꞌnetiamepua, achini teeka taamo kaꞌkaruma teꞌteremiaopua apochio, ahpo Taanachiche paparasache. Ihji Ehkoriami Iyoteria waꞌachi chiiamepua eee cheekao: “Taamo teꞌpa kahtiame Noonoa, yooma aaata ahpo Taana iintoriachiche paparakameo, teꞌta ki wahjiame ahjarikamera kiamerapua.”
\s Tísia tatakorikamewichioo, Riosie kokosapuame
\p
\v 18 Nape yooma aaata kiꞌtio erakoamea Riosichi paparaniameo, apoche ki kaꞌkaruma yoranariamea, ki nuꞌuti kokosari enameriitepua pukachio, teꞌpa tewekachi kahtiameeopua taamo Noonoo. Puuu ki kaꞌkarumache yooraka mochitonariamea, ki Riosi pichiwarichi simiyame inataka mochitoamepua.
\v 19 Nape taamo Noono tewekachi kahtiamea, apoe yahchakame tiꞌtijoe inatarichiopua ooweru tiame, teꞌta apochi tiiame naneꞌretewao, teꞌta pichiwari apochi tiiameopua, ahpoo teꞌta pichiwa yasitoamekoopua.
\v 20 Taamo teꞌpa kahtiame Noonoa tiameo, pukeri naayachisi oꞌiniao, aaataeoi ki tetewiniameaipua pusieo, apoe iintokamepua yooma ihtaoi enepatekao, pukae chiiamepua ahpoo, aaata kahtiamekoopua. Pukaepa aaataai teemea, naneꞌriametepua ki ehpesi yasitoame, tisiwa ki teesa tiiame utewarieka. Waꞌa tiiachipao, aaataai kihta chaachapamete Riosio, kiꞌtio tuukao.
\v 21 Nape aaataa, naneꞌriamekaipua taamo Noonoo kahtiamekoo, ki nuꞌuti iintokamekoipua ahpowichioo, kiisi iyorika tetewikamepua taamo Noono Riosio, kiisioi ihta cheriwema kiꞌyamepua puꞌkao, teꞌta kaawe iintokameoipua ahpowichioo. Ohsotia puuua, ahpo inatari tukaparichi itipikamepua, oowera ihtaoi itapitichi Riosiepaka, waꞌa erakoapaopua.
\v 22 Yooma waꞌa tiame erakoamea, tísia teꞌta ahpo machiwarieme maayameai, ohsotia puuua, teꞌta ki ijinatamera puuua.
\v 23 Pukaepa waꞌa teꞌtiamekapa puuua, ihtaoi riositaka ahjachi paparare puuua, ki itapiti ahjamechi, tijoeka teꞌtiame netetiamechi, ihtaoi animarika tiiame neteka, tuchikika tiiamechioipua netesa, waꞌa ikisaopua tiameo, yooma ihta wehchi rusuwaka ohjoameka tiiame, aapoe waꞌapi ahpo neteriamechi ahpo Riosiwachitia paparaweka.
\p
\v 24 Pukaepa Riosia waꞌatia toarepua puꞌkao, ahpo ki kaꞌkaruma yooraka mochitoamechi, ahpo suwepori nokiwamechi tiame, ahpo weerewa kihta nateyamechitia tetewamechi.
\v 25 Riosia toarepua tiame puꞌkao, puꞌkao toaka tetewariopa ahpo pichiwari chiiao, wisturikamera pichikeriopa, Riosio kiꞌtiameko tuuwamekamera pichikeriopa, naatikamera iyoririopua, yooma ihta itapiti Riosie enepatetiameka tiiamerachi paparakamekopuaa, ki Riosikamera apoe yooma ihta enepatekamechio.
\p
\v 26 Pukaepa Riosia toarepua puꞌkao tiameo, ahpo ki kaꞌkaruma nokiwarichi weemupariopa, ahpo tísia suwepori nokiwamechi ruhjikamekopa, ahkasi ooweruai ahpo ahjama kuunachitia nokayamekopa.
\v 27 Waꞌachi noonoikame tiꞌtijoeai, toaka ahpo ujupio ahjama nokiwao, ahpochitia tiꞌtijoe ahjama uupichitia nokinariapaopua, aapoe waꞌapi ahpo ikotupakamekopapua. Aapoe waꞌapi suwepori nokakaopua, ahpo waꞌapi kokosarichi teꞌterepatemepua. Yooma puuua waꞌa tiiame tísia suwepori nokayapao, aapoe waꞌapi, Riosie tísia kokosapuame enepakamepua.
\p
\v 28 Pukaepa Riosia ki ahpo nakika tetewinariopao, waꞌatia toarepua puꞌka ahpo wewekakame nokiwachio, ahpo kajuka nokimichiopua, ahpo ki ijinata nokinariachio.
\v 29 Pochipakame puuuapa yooma ihta itapiti naꞌararieo, ihtaoi ikotuwachio, teꞌta naꞌarari wewekamepua waꞌasi, yokipakame puuuapa pukachio. Muꞌipakame puuuapa, piirechi ikotuwa uukamepua: aaata iinuekachitia yasitoa ikotuwa, aaata merinarewa, nasiwanarewa, wihkuenarewa ikotuwa, aaata ki kaaweruma nayewaniame ikotuwa.
\v 30 Ki kaawe chaachapamepua aaataoi; Riosioio, nekumeka mochikamepua; ahpoche machiyo erakoamepua; aapoeopua, ahpo oijeramepua; weꞌwemera ki kaꞌkaruma naꞌarariche mehtachamepua; ki ahpo yayawa yooreniamechitia; ki inatamechitia inatamepua;
\v 31 ki saayamepua ahpo inatarichio, aachintiamerakoopua kaꞌkarumao, ki kaꞌkarumaooipua; ki ahjachi erapoa teꞌteriamepua; ki nakiyamepua aaataoi; ki tesiwa eꞌriameoipua aaataoi; ki eenechi kaawe erapamepua aaata ahjamao.
\v 32 Maꞌchiame tetewaipua ki kaawe ahpo nokayao, ahpoo ki teesa kokosapuamekopua Riosieo, waꞌapi nokisirepua ki kaaweruma nokakao, puuua ahpo ki kaawe nokayakamera puꞌsereka tetewarepua.
\c 2
\s Riosia pichiwarichitia teeka taamo kokosa chaaniame puuua
\p
\v 1 Pukaepa aaataai eemea wahjachi naꞌara nokaya maꞌmajoamea, ki newimeripua Riosi kokosarichio, aamoe waꞌapi aamo maꞌmajoeka nokayamekopaopua, eeme waꞌapiai naꞌara nokayamekapaopua.
\v 2 Nape Riosia, ki wihtuka taamo maꞌmajoamepua, pichiwa ki kaawe taamo noonowiriopa, taamo maꞌmajoamepua.
\v 3 Ehsoo aamoo, aaata naꞌara ihsio tuusoo, waꞌachi ihsiai muuuai, ¿ki aamo kokosamio maayamemua Riosio?
\v 4 ¿Kikosa pahtiame eemea Riosio, aamo ki nahsinepaka anachaka tetewamekopua puꞌka aamo puuyetokaopua, apochi kaaweruma enepamichioo aamo ki kaꞌkaruma toaka?
\v 5 Nape eemea peewamekapa iikachio, ki aamo tuunare eemea Riosio, aamo ki kaꞌkaruma nokayao. Waꞌa teꞌtiapa eemea, epeche epecheche chuurapame eemea amochio, Riosie aamo kokosapuameopua, teꞌta Riosi nekamiachiopua, tiꞌtijoeri katewekaopua, kiisi kaawe nokariao.
\v 6 Waika kateweri taawechio, Riosia yomatiame tiꞌtijoe ooweru tiameo, yooma pipiripi aꞌchi tiame ahpo noonowiria yorapuamepua, Riosieo.
\v 7 Yooma ki nahsinapakamea kaꞌkaruma yoorakao, ki nahsinepaka puuyekamea, Riosie kiapuamepua reesiserio, ahpo tísia peeniatiachi ohjoremichiopua, ki wahjiamesi.
\v 8 Nape yooma aaata ahpochewichio iꞌyakameo ahpo ki kaꞌkaruma nokiwa, Riosia ahpo kiꞌtiameko maaekameopua puꞌkao, ki nuꞌuti nekarewa teeremeripua pukachio, nape tahpitika tiiame.
\v 9 Yomatiame tiꞌtijoeria ooweruria tiame, ki kaꞌkaruma yooraka mochitoamea, waika taawechio ki nuꞌuti aiwari saaemeripua, ki nuꞌuti yuuwesiri tiame. Ihji teꞌta aiwaria, iꞌisaeri tiꞌtijoerikameraa teꞌta, ahkasi ki iꞌisaeri tiꞌtijoerichioi.
\v 10 Sewina tiiachiopua, kaꞌkaruma yooraka mochikameopua, Riosia kiamapua puꞌkao, teꞌta peeniatiamera mochira, teꞌta nateyame teteiwamera mochira, teꞌta taꞌiria mochira iikachiopua tiameo. Ihji kaꞌkaruma enepakame kiapuamea, isaeri tiꞌtijoerichi oꞌinepuamepua, ahkasi ki iꞌisaeri tiꞌtijoerichisi tiamé.
\v 11 Waꞌa iintomeri Riosia, aaataoi ki epeche weruma tiiame, tetewamekapa Riosia.
\p
\v 12 Yooma ki kaꞌkaruma yoorakamea, ki Riosi nuurari machikaio, Riosi nuurari chiiae kokosapuamepua. Yooma Riosi nuurari machikamekai tatakorikamea, puꞌka waꞌapi Riosi nuurari chiiae, kokosapuamepua tiame.
\v 13 Riosi nuurari machiniamechea, kihta nateyamepua, ki yooreka yasitoniame enesaa. Riosia kaawe tetewamepua aaatao, ahpo nuurariche eꞌweka mochitoame.
\v 14 Nape aaata ki machiyai Riosi nuurario, nape kaawe iintokamea puꞌka nuurari chiiachitiao, ahpo iikachi teetoapa Riosi nuurario, waꞌa teetokamepua.
\v 15 Puuu tijoe ooweru tiame waꞌa iintokamea, taamoe waꞌapi naneꞌreme tiiameko maꞌchitamepua, ihtanakoopua teꞌta kaawerumao, ihtanakoopua ki kaawerumaoi.
\v 16 Pukaepa iikachi iꞌtoniame nahkipu Riosi nuurari eꞌwewaa, yooma aaatao Eesusi Riosie Weratiame katewiachio, yooma aaata iikachi neꞌneka maꞌchitapuakopua. Neeea, waꞌa tiiame tuuyetuamepua.
\s Iꞌisaeri tiꞌtijoeri, Moise nuurarirachi ahjachi erakoa
\p
\v 17 Aaata eeme iꞌisaeri tiꞌtijoeria, Riosio aamo pahcha kiꞌyariopa ahpo nuurario, aamochewichio weruma erakoamepua.
\v 18 Eemea amochi iinuekapa Riosi nuurario, tísia aamo pepeniame maayamepua Riosi nuurari chiiao, naneꞌriapa eemea, aachin teeka ohjoremiaopua puꞌka nuurariopua yooreka, yooma maꞌchiame tetewika kaꞌkaruma nokipuameopua, ki kaꞌkaruma nokiwameoipua.
\v 19 Waꞌa teꞌtiamekapa eemea, kaawe masitemerika erakoamepua aaata tukapachi mochitoameopua, aaata ki maꞌchiriamechitia ki tetewaka mochitoameopua Riosio, ki machiyapa puꞌkao.
\v 20 Eemea Riosi nuurari iinuekapao, machiyamekapa Riosi pichiwa chiiao, teꞌta maꞌmasitari erakoamepua, puꞌka kihta machiyameopua Riosichi simiyameo, nuꞌunti kukuchichitia teꞌtiameo, ahpoo kaawe masitemeriko teꞌtiame.
\v 21 Eemea yooma waꞌa tiiame teꞌta masitari aamo erakoame enesaa, ¿achini iikai ki yoorame eeme waꞌapia, puꞌka aamo wahjachi masitiao? ¿Achini iikai ki ichikopo tuuyai, ichikoame eemea?
\v 22 Aamoe waꞌapi ki suwepori nokipo tuuyameai, ¿eemekamera waꞌa nokayamepua? Nekumiameko tuuyai eemea riꞌriosi netetiameo, ¿achini iikai ichikoame eemea naaju, ki Riosichi paparame tiꞌtiopachi ajawatiameopua riꞌriosi?
\v 23 Eemea tísia oijeramepua, Riosi nuurari teꞌta machiyapa, nape waꞌa teꞌtiai eemea, kiisi iyoriamepua Riosi nuurario, ki Riosi nuurari yoorame enesa.
\v 24 Waꞌapenatio waꞌa chaanipu Ehkoriami Iyoteria: “Yooma ki iꞌisaeri tiꞌtijoeria Riosi naꞌariamepua, aamokamera ki kaawe nokayopa.” Ehpe taawechioi waꞌachi nooka eemeai, ehkoriami nokariachitia.
\p
\v 25 Ehpeo siichitepuwachi simiyame nayewamane.\f + \fr 2.25 \ft Siichitepuwaa, “circuncisión” cheeka chaniwame yoori naewachio.\f* Aamo siichitepuniamea, nateyamepua Riosichi kaawe teetoawichioo, nape yoorame ahsepari yoorame enetiaa, yomatiame pipiripi Riosi nuurario. Nape piiripioi ki nuurai chiia iintosaamua, yomatiame nuurari ki iyorikame enemapua. Waꞌa aamo iintosoo, aamo siichiteputiamea kihta nateka itipimeripua. Waꞌa tiiachio muuua, kihta siichiteputiameka ikiyamemua.
\v 26 Nape ki siichiteputiameai, yooreka mochitoamea Riosi nuurario, Riosia kaawe uuka tetewimeripua puꞌkao, kihta apochi siichiteputiameoipua.
\v 27 Waꞌa tiiachiopua, aaata ki siichiteputiameaipua, nape eꞌwaka mochitoameapua Riosi nuurario, puuukamera teꞌta kaawe uuka tetewipuamepua Riosieo, eemea, amochi iinuekaipua Riosi nuurario, kiisi yooreka mochitokamekapa apoe Riosi waꞌapi aamo kiꞌyariaopua nuurari.
\v 28 Waꞌa teeresoo Riosiwichioo, teꞌta isaeri tijoe eneniamea, ki isaeri tijoe naawakamechekaitepua, aamo weerewa siichiteputiameoipua,
\v 29 naatikamera puuua, ahpo iikachiche teetoniame Riosi iyoriwao. Waꞌa tiiachipa puuu teꞌta siichitepuwa tiiaa, ki weerewachi ihsiniamepua, Riosikamera taamo iikachi ihsiamerapua, ahpo ijinuwa eenepatesaapua, apoe taamo iikachi yasitoka ahpo Riosiwarieo. Riosi ihsiwae taamo iikachi kaaweruma iꞌyamea, Riosichikamera teꞌterenariame puuua, ki tiꞌtijoerichi.
\c 3
\p
\v 1 ¿Ihtanawichio kaawe tiiamepu, isaeri tiꞌtijoeri eneniamewichioo? ¿Teꞌta nateyamerakosajoarepu siichitepuniamea?
\v 2 Ejeꞌe puuua, isaeri tijoeri eneniamewichioo, tísia nateyamepua, Riosio, taamokamera iꞌisaeri tiꞌtijoeriwichioo, Riosia yomatiame ahpo Ehkoriami Iyoteterichi cheeriaa, taamokamera neesetopuawichio cheeriamekapa, taamopua tiameo, puꞌka iyoterichi cheeriao, wahjachitia neipami tiꞌtijoeturisiamewichio, kaawe neesetomichiopua puꞌkao, tumitaperichi iyotesikao, katewesika.\fig |178-HK00153B.TIF|col|||Ehkoriami tumitaperi Riosi tuuyewari cheeria ahjachi iyoteretia.|3:2\fig*
\v 3 ¿Ihtana iintotare Riosia, puꞌka muuwaeme iꞌisaeri ki ahpo iyoteteria yooraka mochitoriopaopua? Riosia puꞌkao ki noonowiriawichioopua wahjachi nayewatukao, ¿ki iintomerijoarepua waꞌa tiiachiopua, yomatiame taamo iꞌisaeriwichioo iintomo tuuriao?
\v 4 ¡Kaꞌi, ki waꞌatia itipimeri puuua kii iintokao! Riosia yomatiame tiꞌtijoerio tísia wistuamekoipua, iintokache itipimeri puuua ahpo cheeriao, kiisi wistuamekapa puuua. Ehkoriami Iyoterichi Raawiaa, eee cheerepua Riosio:
\q Muuua pichiwa ihsiamemua aamo chiiao;
\q ahkaoi peereitaniachi ki pichiwari aamo tewaniaiopua,
\q2 muuua newitokache machenamepua.
\p
\v 5 Aaata waꞌami ahka chaachapaniarepua: “Riosia kaawe eꞌraka tetewiniame enesaa taamo tatakoriria cheriwesaa, ¿achini iikai taamo kokosamepua?” ¿Ihtana chaachapatare teemea puꞌka waꞌa tiiameo? ¿Ki kaawe tiiamekosajuarepua tiiarepua taamo kokosapao?
\v 6 ¡Kaꞌi, ki waꞌatepua! Riosia, ki kokosame enesaa tatakorikameo, Riosia kihta katewemeri enemiipua, kajuyachi taawechio, ki kokosamekapa puuua, tatakorikameo.
\p
\v 7 Nape iiweta aaata ahka iinueme enesaapua ahpo chaachapamiao, ¿achini iikai noꞌo kokosameri Riosia noꞌo tatakorisoo, kaawe teeka itipiame teteiwameaipua, noꞌo ki kaaweruma iintoriao, ki kaawe iintotiameko tuuyoiopua?
\v 8 Nape puuu waꞌa chaachapamea, seꞌwi chaachapamepua. Puꞌka chaachapa taamo naꞌnaritoame enesaa, epeche epecheche tatakorimia kaawe enemiipua, epeche epecheche kaawe teeremerikopua Riosio. Ihjia waꞌa tiame chaachapao, ki teesa Riosi kokosarichi ruhjimeripua. Iintuamepua tiꞌtijoeri, puꞌka waꞌa chaachapame tiꞌtijoeri inatachitia, noꞌo masitiameko tuuyamekoo.
\s Yooma ki kaawe noonowikame teeme
\p
\v 9 Teeme iꞌisaeri tiꞌtijoeria, Riosie iyotetiame taamokamera neesetowetiamekapao, ¿epeche kaꞌkarumachitia tetewipuamekosa erakotare teemea? Kaꞌi puuua. Yomatiame tiꞌtijoe ooweru tiame tatakorikame puuua, iꞌisaeri tiꞌtijoerikaio, yooma ihta ki iꞌisaeri tiꞌtijoerikaio. Yomatiame tiꞌtijoeri tatakorikamepua, waꞌa tiiameko aamo tuuyekamenia waꞌasi.
\v 10 Iꞌkao ahkasi Ehkoriami Iyoteriai waꞌachi chiiamepua eee cheekao:
\q Kiꞌte aaataai kaawerumaa, aaataai piiripioi;
\q2
\v 11 kiꞌte aaataai teꞌta machinariame Riosi;
\q2 aaataai Riosiche naꞌnaritoniame iꞌyamea.
\q
\v 12 Yooma ki kaꞌkaruma pooechi uumparepua,
\q2 yooma waꞌachitia wewekakamepua;
\q kiꞌte aaata kaꞌkarumache yooramea, piiripioi.
\q
\v 13 Yooma ki kaꞌkaruma tiꞌtijoeri chuꞌwaraa,
\q2 wahjipame toaniachi wahjoramekatepua chaachapaeo;
\q Ihjia yeenieo tisiwa wistuamepua.
\q Puuua ahpo chuꞌwachio,
\q2 sayawe yerowa piꞌkara kimutuamepua.
\q
\v 14 Puꞌka chuꞌwachiopua, pochikame kahtiamepua naꞌarario;
\q ihji chaachapaa,
\q2 chihpuame wichiyamepua aaatachio.
\q
\v 15 Tísia yeꞌkamepua tarachio,
\q2 ikanatioi ahkaoi eenaka meꞌyamepua, eerasuteka;
\q
\v 16 ahkaoi ahpo uꞌmatosiachi naꞌatakao,
\q2 tesiwe erakori toisiamepua.
\q
\v 17 Puuu tiꞌtijoeria, ki machiyamepua taꞌiria yasitoniame pooeo.
\q
\v 18 Kiisi seewiamepua Riosio, ki iyoriaipua.
\p
\v 19 Kaawe inataka mochitojerani neeea ikachio, Riosi iyoriwa nuurariao yoomahka wehjoarichi ohjoemeo iyorimichio kiatiamekopua, aawataai ki ahpo tatakoririo chanimichiopua.
\v 20 Nape puuu nuurari yomatiame taamo tatakorikame chewipatiamea, ki ahsepame tiiame puuua, taamo tatakoriria piipatewawichioo, aaataoi ki ahsepame tiiapua puꞌkao, ki ahsieme iyorikamea. Puuu nuurari yomatiame taamo chewipatiamea, taamo ki kaawe nokario erakomichio yachatiamepu puuu nuuraria, taamo machika tetewimichiopua, aachin tiamerakoopua kaawerumao, ki kaawerumaraooio.
\s Newiparia Riosichi papararie eenamepua
\p
\v 21 Nape ehpe taawechiami Eesusi taamowichio pejana nehpupaka mukuriopao, Riosia, kihta itapiti oowewawichioo taamo kaawe teeretiamepua apochio. Riosia iꞌka waꞌa teerepuame weemera simiyamechi paparaniameo, ki ehpesi oꞌinia waꞌa tiiame nayewakamepua, ehkoriamisi oꞌinia ahpo naꞌnayewatura waꞌa chiiame iyoteteka.
\v 22 Ihji weemera teetoniamechio, Eesusi Riosie Weratiamechi paparaniamepua, yomatiame tiꞌtijoewichio ooweruwichio tiameo, yooma aaataai Riosichi kaawe teereka yasitonariamewichioo tiameo, aaataai Eesusichi paparaka yasitonariamekooi, aaataoi ihta tiꞌtijoeriwichokoikopua, iꞌisaerikoio ki iꞌisaérikoioopua.
\v 23 Riosia waꞌa tiiame iintokamepua, yomatiame wehjoarichi mochikame tatakoririamekopapua, aaataai yomatiame iꞌka wehjoarichio, ki ahsepari eꞌwewa teereriapapua Riosi nuurari yahchariao, tísia iyoriwa nuurario.
\v 24 Nape ehpeo Eesusichiche paparakakopao, Riosia taamo tatakoririao, teꞌta piipakame taamo tetewamepua, kihta oowewari kianiaipua, oowera kihta natekachi.
\v 25 Riosia apoe waꞌapi, ahpo Taanachi teerepakamepua, yomatiame taamo tatakoriria ahsieme chꞌowepakamepua, pukachi paparakameo. Riosia, Eesusi tatakoriwichio mukumia neꞌnepaka, cheriwekamepua tatakoririao ehkoriamisi oꞌiniaopua, nape ki ahsieme choꞌweka pehji, ahkasi ahpo Taana Eesusi eenachisi tatakoriwichio mukimiachisi, waꞌa teeremichiopua. Pukaepa Riosia aaataeoi kihta wenejime tiiamepua, Riosio ahpo ehkoriami iintoriao tísia kaawe iintoriopua.
\v 26 Ehpe taawechiamioi waꞌapi tísia kaaweruma ihsiamepua, taamoo ahpo Taana mukuka iintoriachi neꞌnepaka, taamo apochi teꞌta kaawe teꞌterepatemekopa, yooma aaata Eesusichi paparapameopua.
\p
\v 27 Waikao waꞌa tiiachio, ¿achini teeremeripua aaata tatakoriria cheriwepuawichio itapiti Riosi ooweniamea? Puuua kiꞌtiamepua waꞌasi yorapuameo, kajukamepua waꞌasi. Pukaepa teemea ehpeo, kihta taamo oijeramete teemea, itapiti teꞌta kaawe taamo iintorio erakoniameo, Riosie taamo tatakoriria cheriwepuawichioo, Eesusi Weratiamechiche paparakapa, piipatetiame itipitiamekapa Riosieo, taamo tatakoririao.
\v 28 Waꞌa tiiachiopua teemea, Eesusichi paparakache piipakame tetewiniame teemea, Apoe teꞌta taamo Noono tewekachi kahtiameo, kihta oowewari oowekaipua.
\p
\v 29 ¿Riosia, iꞌisaeri tiꞌtijoeche Riosiwara ohjoarepua? ¿Kikosa Riosiwara ohjoarepua, ki iꞌisaeri tiꞌtijoerio? Ejeꞌe, puꞌka Riosiwarapua tiameo,
\v 30 piiripi waꞌapi Riosikapapua, yomatiame wehjoarichi mochikamewichioo, ihta tiꞌtijoerioipua, seesenu nayewameoipua.
\v 31 Waꞌa teesoo, ¿Riosi nuuraria, kihta nateyamejoarepua? Kaꞌi, ki waꞌa tiiamepua. Ohsotia Riosi nuuraria, kaawe tiiamepua tamochio, taamo ki kaawe iintoria tetewitekamepapua, Riosi cheriwewao, Riosi itamichiopua.
\c 4
\s Aurani teereria Riosichi paparaka
\p
\v 1 Taamo ehkoriami Aurania, ¿ihtana iintoriare Aurania Riosichi ahpo kaawe teeremiaopua?
\v 2 ¿Itapiti ahpo iintoriawichio, Riosie kaawe ahpo tetewiniame maaeriarepua? Waꞌa teereniame enesoo Auranitaruai, ahpo weruma tiiame eramiipua, nape ki Riosie ahpo weruma tetewiwae.
\v 3 Nape ¿ihtana chiiame Ehkoriami Iyoteria? Ehkoriami Iyoteria chaanipua: “Aurania Riosichi paparakapa, Riosieo kaaweruma tetewitiamepua, apoe Riosi waꞌapi piipateriapapua puꞌkao.”
\v 4 Aaata piire tekipanasaa, ki oowera kianiamepua natetewao, yowikapa kianiamepua natetewao.
\v 5 Nape taamo teꞌterewa Riosichio, ki waꞌatepua. Taamo kaawe teꞌteremichio Riosichio, kihta tekipanakekai, oowera Riosichi paparakaiopua.
\v 6 Ehkoriami Raawitaruai ahpo Iyoterichio cheeriaipua, aaata tísia kaawe erakomio tuukamekopua Riosio, Riosichi paparakapa, teꞌta ahpo piipakame tetewapa tatakorio.
\v 7 Eee cheeriai Raawitarua:
\q Yooma aaata ki kaawe ahpo noonowiria cheriwetiamea,
\q2 tísia kaawe erakoame puuua, choꞌwetiapa puuua tatakoririao.
\q
\v 8 Riosio natakepariaopa aaata tatakoririaopa,
\q2 ki teesa kaawe erakoame puuua.
\p
\v 9 Ihji Riosio tísia kaawe erapuame iintoriao, ¿iꞌisaeri siichiteputiamewichioche ohjoarekosapua? ¿Ki yoomawichiokosa enere puuua? ¿Ehkoriami Iyoterichi chiio chiiamepua Aurani nayewakao, Auranio Riosichi paparakapa kaaweruma tetewitiamekopapua Riosieo?
\v 10 Nape ¿achinitio teꞌta kaaweruma tetewikame Riosia Auranio, keꞌchu Aurani ahpo siichitepuwanioio, neipakosakooipua? Kaꞌi, pahcha enerepua, keꞌchu siichitepuniaiopua.
\v 11 Keꞌchu yahcheniai siichitepuwao, Aurania uutiame eneriame waꞌasio Riosieo, Riosichi paparakamekapapua. Neipao Riosia, Auranio ahpo paparakopa kaawerumachitia uusaopua, siichitepuwa iintonurerepua Auranio, ahpo teꞌta piipatetiameo, naania teeremichiopua. Ehpeo Aurania, waika oꞌinia yooma ki siichitepuwa nokayameoi, noonoraka tiiame puuua, Riosichi paparameo.
\v 12 Aurania teꞌta noonoraka tiiamepua tiameo, ehpiami iꞌisaeri tiꞌtijoeri siichitepuwa nokayamekoiopua, nape Riosichi paparameopua, Aurani Riosichi paparariachitiao, keꞌchu ahpo siichitepuwa nuuretioio.
\s Ahpo cheeria Riosia, ahjachi paparatiapa ikiyamepua
\p
\v 13 Riosia Aurani weemera wehjoari kiamo tuuriaa, yomatiame apochi paparakame naewaka cheerepua, yooma aaata teꞌta Auranichi tetejimarichi tetejimarisiwakame, ki Aurani tetejimarichi, tetejimarisiwakame tiame, Riosichi paparakameo. Nape iꞌka waꞌa tiiame nayewioiopua Auranio, kihta nuurari eꞌwepuame Riosi yahchoi enerepua, oowera Riosichi paparanioi enerepua pehjio.
\v 14 Aaata Riosi nuurari eꞌweka Riosie ahpo kiapua uunariamea, nuurarikamera epeche nateyame tetewamepua ki Riosichi paparaniamekamera, ipaka tetewamepua puꞌkao. Waꞌa tiiachio, kihta enemii Riosie kiapo tuutiamea, aaataai ki ahsieme eꞌwekame eneriopa Riosi nuurario.
\v 15 Aaata ki ahsieme eꞌweka Riosi nuurario, kokosapuamepua Riosieo, kihta kiapuame Riosieo, Riosie kiapo tuutiameo. Kiteresoo nuurario, kiꞌtiame kokosaniamea.
\p
\v 16 Pukaepa puꞌka nuurari eꞌwewaeo kaꞌchi iika uupamekopua Riosie kiapuameo, pukaepa Riosia, apochi paparaniachikamerae taamo kiꞌyamepua taamo kiamo tuuriao, kihta natekachi kihta itapiti yoorariwae. Waꞌa tiiachipao, ki iꞌisaeriche Riosi oowewari nokiwamechiche, uumeripua puꞌka Riosie kiapo tuutiameopua, yomatiame tiꞌtijoeri Riosichi paparame kiapuamepua, ihtaoi yeenieme naera. Waꞌa tiiachipa Aurania, yomatiame wehjoarichi Riosichi paparameo, noonoraka tiiamepua.
\v 17 Ehkoriami Iyoteria eee chiiamepua, Aurani naewakao: “Ehpe oꞌinia neeea, ki ookapi tijoeturi aamo noonoepatenania.” Waꞌa cheeka naewarepu Riosia puꞌka ahjama nayewaiopua, puꞌka Aurani apochi paparakameopua Riosia. Puuu Aurani naewekamea, Riosi apoe enerepua, wahjipakameopua oijenatiame, kihta iintuameoipua, iintuame enepatiame.
\p
\v 18 Aurania, kihta maaepori tiiaipua, ki ookapi noonora enemiao, pichikerepua Riosio, eee ahpo chaaneretiopa Riosieo: “Neꞌnepao tewekachio, waꞌa kehki enemerapu aamo tatanaa, aamo tatanasiwachi muuwekamea tetejimari.”
\v 19 Aurania piie siento paamuamekaipua waꞌasio, Saaraoi ki tanayamekoipua puꞌkao, ki sewina erapaka inamurepua Riosio, ahjachi ahpo paparaopua, amori mukuyaipa Aurania waꞌasi oochetupakao.
\v 20 Aurania ahpo oowe eꞌriao, kiisi wekaterepua Riosichio, ohsotia epeche ahjachi eraparepua Riosichio; Riosichiopua, pukaepa epeche kaawerumache nayewaka ohjoerepua Riosio,
\v 21 oowera kiisi seꞌwi eꞌraka Riosi cheeriaopua, yorameche tiiamekopa Riosio, ahpo cheeriao.
\v 22 Waꞌa tiiopa Riosia Auranio, teꞌta piipakame tetewarepua puꞌkao, kihta tatakorieme, oowera apochi papararioche.
\p
\v 23 Nape puuu Aurani kaaweruma tetewitiame ehkoriami iyotetiame chiiaa, ki Auraniche nayewaka cheeriamepua;
\v 24 yooma taamo tiame teeremia naewaka cheeriamepua. Waꞌachitia teemeai, Riosichi paparakachepa, piipakame tetewiniame teemeai, taamo tatakoririao apoe Riosie, taamo Paamira Eesusio oijenatekame.
\v 25 Puuu Eesusipua, Apoe Riosio taamo pejana mukiwarichi nehjaria, taamo tatakoriwa cheriwetiame itipimichiopua. Riosia Eesusio, eenechi oijenateriaa, taamo apochi kaawe teꞌteremichio waꞌa iintorepua.
\c 5
\s Teꞌta taꞌiria yasitoniame iikachi
\p
\v 1 Teemea, Eesusi Riosie Weratiameo taamowichio iintoria pichikekapao, teꞌta piipatetiame tetewiniame teemea Riosieo, pukaepa teemea taamo iikachio, taꞌiria mochitoamepua.
\v 2 Riosia, Riosie Weratiamechi taamo paparariopao, apochi taamo enepatekamepua ahpo ijinuwa iintapaka. Pukaepa teemea, tísia kaawe erakoka puuyame teemea Riosio, kiisi seꞌwika taamo ahjachi eꞌrao, ahkasi Riosio ahpo tísia peeniatiachi mochipuachi, iꞌtomichio.
\v 3 Aiwaka puuyai teemea kaawe erakoame teeme Riosichio, puꞌka taamo aiwao, apoe taamo kuꞌisiamekopua, taamo anachaka machenasimichiopua ihta itapiti tiiame aiwai.
\v 4 Puuu anachaniamea taamo kuꞌyamepua, taamo epeche kaaweruma enepatekaopua Riosichio. Puuu kaaweruma teꞌterewa iinuekapa iikachio, tísia oowe eꞌreka puuyetoame teemea Riosio, ahkasi Riosio taamo ahsieme kiꞌyachisiopua taamo newipatewao.
\v 5 Naneꞌrena teemea Riosi taamo kiamiao, tísia peenia erakopuame tiiamekopua, kiisi sewina taamo erapatemioopua, itapiti ki taꞌiria erakorio. Teemea ki waꞌa erakomeripua, Riosio tísia taamo nakiyamekopua, ahpo Riosiwarieo tamochi yasitokao, waꞌa teeka tamochio, tísia pichiwatakaopua taamo ahpo nakiyao.
\p
\v 6 Riosie Weratiamea, teꞌta taamo kaꞌchi ikime eꞌroi tatakorieo, taamowichio mukurepua, teꞌta Riosi yahchariachitia taamo nehpupamichiopua mukukao.
\v 7 Iꞌka weeechio aaataai ki mukinariamepua aaata nehpupariwichioo; seenekachi waꞌa iintotare aaataa, nape ki teesa teꞌta nakiyame enesaa; aaata waꞌachi iintotariamepua tiameo, nape aaata tísia kaaweruma enesooipua apochio.
\v 8 Nape Riosia, kiisi kaꞌkarumakoi taamoopua, tisiwa taamo nakiyamekapaopua, ahpo Taana mukiwae taamo nehpuparepua apoe Eesusi Riosie Weratiamee, teꞌta natetetiame itipimichiopua taamo tatakoririao, Riosie kokosapoiopua.
\v 9 Waikao teemea, ahpo weratiame Eesusi mukuriae nehpupatiamekapa tatakorichio, apoe eerara wiꞌsuriopa Eesusi merinioio, newipakame itipikame teemeapa, Riosi nekarewachio.
\v 10 Riosio ahpo Taana taamowichio mukiriae apochi kaawe teꞌterepakame enesaa, epeche ki nuꞌuti kaawe taamo nakika tetewimeripua taamo weemera ahjari kiasaopua, ahpo Taana eenechi oijenaka iintoriaeopua, ahpo ahjama mochipuachio ki wahjiamesi, Riosi kokosamiao puhjetiameopua waꞌasi.
\v 11 Epeche kaawe erakoame teemea Riosichio, saꞌrukapa teemea ki kaawe tiiao Riosichio, tísia taꞌiria teꞌteretoapa Riosi ahjamao, yooma ihta taamowichioo kaawe iintoriaepua Riosio, Eesusie ahpo Weerariae iintoria, Apoe taamo Paamira.
\s Aarani tewaniame tijoe, Riosie Weratiamechitia tetewiniame
\p
\v 12 Tatakorichi simiyame nayewamane, aachin teeka mehtakame. Tatakoria ehkoriamio, piiripi tijoechi oꞌineriaipua iꞌka weeechio. Waꞌa oꞌinia yomachi weeechi mehtakame tatakoriniamea, yooma tiꞌtijoe ooweru tiame weeechio tatakorisipakapa. Puꞌka tatakori noonoitiamee, pukeri naayachi oꞌinia, oꞌinekamepua weerewachi wahjipaniamea, Riosichi teꞌterewa poanatuniameapua tiameo, ahjakame oiyai, mukukameka teereniamechitia.
\v 13 Tatakoria, keꞌchu Riosi nuurari yahchoi iintupakamepua, nape ki aaata wenejime teereriaipua puꞌkao, kihta Riosie nuurari yachatiamekopua pehjio, yooreka mochitopuawichioo.
\v 14 Nape kiꞌtioi aaata nuurari iyoripuao, wahjipaniamea waꞌapi teeerepua, Aaranichi oꞌinekaopua, ahkasi Moise yasariachisi. Puuu puꞌka taawechiami tiꞌtijoeria, tatakorikapa wahjipatiame enerepua, kihta nuurari ki iyorikai. Nape Aarania, Riosi ki eꞌwekapa mukukamepua, ki Riosi nuurari iyotetiame, ki eꞌwekapa. Ehpeo, neneku simiyame neꞌnepuapua, Aaranichi simiyame ikiria, Eesusi Riosie Weratiamechi simiyame ikiria tiame.
\p
\v 15 Riosi kihta natekachi cheriwewaa, tatakorichi simiyamea tiameo, ki ahpo waꞌachi teꞌtiamepua ikiniamea. Riosi kihta natekachi cheriwewaa, epeche utewaemepua ki tatakorichitia, yooma ihta tatakorio choapamekopa, ahkasi ki wahjiame tiiachisi. Ihji Riosi kihta natekachi cheriwewaa, yooma tatakori natatekamepua, pahcha piiripi tijoe oꞌinia tatakorisiwachiopua ahkasi Eesusi eenasichi, yooma Riosichi itakameopua ahpo cheriwepuawichioo.
\v 16 Riosi kihta natekachi cheriwewaa kihta waꞌachi tiiamepua tatakorio, tatakoria tatakoritiaa Riosie taamo kokosatiamepua, nape Riosi kihta natekachi cheriwewaa, taamo nehpupamepua Riosi kokosarichio, teꞌta kaꞌkaruma taamo enepateka.
\v 17 Yooma Aarani oꞌinia tatakorikamea, tatakorichi wahjipakame enerepua, piiripi tijoechi waꞌapi oꞌineriachi tatakorikao. Nape piiripi aaata waꞌapi tijoe iintoriaechio Riosia, apechunekamepua tatakorichi wahjipaniameo, yooma aaata apochi paparakameopua. Riosia waꞌa iintokamepua ahpo Taanachi Eesusio, oowera kihta natekachi choꞌwekaopua tatakoritiameo, weemera ahjarikamera kiꞌyakaopua.
\p
\v 18 Waꞌa teererepua, piiripi waꞌapi Aarani tatakori ihsiriae, oꞌinia oꞌinekame tatakoria. Waꞌa oꞌinia waꞌanao, yooma aaata tatakorikamea, Riosi kokosaripuametere teꞌteriamepua. Nape seenepi waꞌapi Eesusi iintoriae, Riosia puhjerepua ahpo paparameo, puꞌka kokosapuame teeweriaopua, naꞌsokame itipitekaopua waꞌasi.
\v 19 Pukeri tijoe ki Riosichi eꞌwekame oꞌiniaopua, yooma ahkasi neipami tiꞌtijoeri ki Riosi eꞌwakameapua tiameo, tatakoriame eneparepua, yooma ihta tatakoriniame nokisikaopua. Nape Eesusia Riosi Taanaraa, ahpo Noonoo eꞌwesoopua, ki ookapi teꞌta ahpo piipatewachi toaparepua. Riosia waꞌa iintoketiameo Eesusieo, ki tatakoriwaeme tetewamepua puꞌkao, teꞌta piipatetiame waꞌasi Riosieo.
\p
\v 20 Riosia ahpo nuurari iyoripuame tiꞌtijoeri kiꞌyariaa, ahpo tísia ki kaawe nokayo erakomichio kiꞌyariaipua. Nape tatakorio epeche teetoiopua, tiꞌtijoerio epeche teetoamekopua tatakorikao, Riosiai aaata apochi paparasiameo, epeche teetonioiopua tiameo, cheriwesikao.
\v 21 Taamo tatakoririao wahjiparichi taamo iꞌtomia utewarerioopua, epeche utewarieme enere Riosia, ahpo taamo tísia nakiyaeo, taamoo weemera ahjarichi taamo teerepakaopua, ahpo teꞌta utewarieopua. Waꞌa iintokame Riosia, taamo Paamira Eesusie ahpo Weerariaeo.
\c 6
\s Teeme Eesusichi paparakamea, wahjipakameka tiiamepua tatakoriwichio
\p
\v 1 ¿Ihtana inatata teemea Riosio teꞌta taamo nakiyao? ¿Epeche nokisitariare naaju tatakorikao, tísia taamo nakiyopao?
\v 2 ¡Kaꞌi! Wahjipakamechitia enesaa teeme tatakoriwichio, ¿achini iika eenechi tatakorita teeme?
\v 3 ¿Ki naneꞌriame eemea aamo papatonioio Eesusichi paparakapao, Riosie Weratiame ahjama mukukame enepariopua, Eesusi mukurioio?
\v 4 Teemea taamo paatotiachio neerochi moropiaio, Riosie Weratiame ahjama mukukameka ikikame teemea. Nape moropisa machenaio, Riosie Weratiame ahjama oijenakameka ikikame teemea, weemera ahjarichi enepakame teemea, Eesusichitia.
\p
\v 5 Riosie Weratiame ahjama wahjipakameka erasaa teemea, ahjamachi oijenakame eremete teemea. Riosia waꞌa iikame taamo tetewamepua, Eesusi ahjamao.
\v 6 Waꞌa tiiachipa taamo oochetiame teeeriao, mukukame tetewimete teemeapa puꞌkao, ki tamochi teeremichiopua waꞌasio, taamo ki kaaweruma iintonaretewaopua, waꞌa teekaopu tatakorio, ki taamo teekorachitia teeremichiopua.
\v 7 Aaata mukukameapa, kihta tatakoriame puuupa.
\v 8 Riosie Weratiame ahjama mukukameka erasaa, ahjama weemera ahjarichi mochimerikoche, erakomete teemea, taamoo, ahjama oijenakameka tiiamekapa.
\v 9 Pahteka tetewimete teemea, Riosie Weratiame mukukaio, ki oosa mukimia oijenariopua, mukiniamea kaꞌchi iika mukitemerikopua waꞌasio.
\v 10 Riosie Weratiamea, newitokamepua mukiwameo, taamo tatakoririao ahpoe natetekao. Ehpeo eenechi oijenasaapa, ahpo Noonochi kahtiamepua, ahpo Noono tewekachi kahtiame taamowichio iintomo eꞌraria yoratoka.
\v 11 Waꞌachitia eemeai, Riosie Weratiame ahjama mukukameka eꞌramea, waꞌachitia mukukameka erakopuapua tatakoriwichioo, Riosi Weratiame aamowichio iintoriaeopua, Apoe taamo Paamirao.
\p
\v 12 Pukaepa eemea tatakorio mukukamekopa aamowichioo, kaꞌte amochi reesisemitiapua pakimichiopu, itapiti ki kaꞌkaruma eraniameeopua, kiisi aamo newitomichiopua.
\v 13 Yomatiame eeme Riosichi aamo nehjipuapua, weemera ahjarichi oijenakamechitia. Kaꞌte chiꞌwapame nehja aamo weerewao, pukae aamo tatakorimichioo. Ohsokamera Riosikamera kiapuapua aamo weerewao, nape yomatiame aamo weerewao, pukaeo Riosiwichioo, kaꞌkarumache nokiwa aamo yoramichiopua.
\v 14 Eemea Eesusi paparakameapa, kaꞌte seeweka mochitomitia eemea Riosi nuurari yahchario kokosariopua, puꞌka nuurari kokosario yooma puhjetiame eemeapa, Eesusie newitepatiapua. Eemea ehpeo, Riosi kaaweruma cherirewa nakiratere mochitoamepua, Riosikamera tísia teꞌpa kahtiamera, yorakeka.
\s Riosi nakiyache yoratiame
\p
\v 15 Wee ehpeo, ¿ihtana erakotariare teeme iꞌka waꞌa tiiamekopao? ¿Simitenaretariare tatakorikao, puhjetiamekai teemeapa, nuurari kokosario tatakoriwichioo? Kaꞌi puuua.
\v 16 Eenechi ki kaawe noonowisaa eemea, aamo ki kaawe nokaya teekorepamapua eenechio. Aaata aamo teekorepakameo, puꞌka yooreka yasitomerimua. Puꞌka tatakori teekorepasaamua, puꞌkakamera yorakeka yasitomeripua; muuua waikao puꞌka tatakori aamo teekorepakamea, teꞌta wahjipaniachi iꞌtomeripua, nape ki teesa seꞌwi Riosi kahtiachiopua, ki seenampasi. Nape Riosikamera teekorepasoo, teꞌta kaawerumachi Riosi kaawe eꞌrewachi mochitomeripua, teꞌta kaawerumachi.
\v 17 Neeea aamowichioo, cheriwema kiꞌyaninia Riosio, pukerio ki kaꞌkaruma yooraio, kaꞌkaruma enepariopa ehpeo, Eesusi iintoria teꞌta pichikeriopa.
\v 18 Waꞌa aamo ijikiriachiopua, Teꞌta Kaꞌkaruma Teekorachi enepare eemea, ki tatakorikamera teekorepaka.
\v 19 Teeko cheekao, tijoe chaachapachitia naewaka chaaninia, epeche kaawe aamo kuꞌinariapa pahtewachio. Eemea, pukeri simiyachi ki kaꞌkarumachi mochikaio, yooma ihta ki kaꞌkaruma yooraka mochitoriaipua, eiwepuame tiiameche yooraka, waꞌa nokayapao, kominache kominachiche aamo ikiteka. Nape ehpeo, Riosi kaawerumachi teꞌterepakemekapao, Riosi kaaweruma piipari teꞌterewachiche nokisimeri eemea aamo weerewachio, epeche epecheche aamo kaawe piipasiwekao.
\p
\v 20 Eemea tatakorie chapitiameka mochikaiopua pehjio, kaꞌchi iika kaꞌkaruma mochitome teꞌtereriapua.
\v 21 Waꞌa aamo tatakoriwa nokayaio, ¿ihtanana kaaweruma tewikamena eemea waꞌao? Nape ehpeo eemea puꞌka tatakoriniameo, suuwe eꞌriamepua. Yooma puuua, teꞌta wahjiparichi kajuniamepua, Riosi tísia poanachikamera.
\v 22 Nape ehpeo eemea, naꞌsokamekapapua tatakoriniamechio, Riosikamera yorakeka mochitoamepua, teꞌta Riosiekamera aamo kaawe yorapuamewichio; iꞌka wehjoari kajusoopua eemea, Riosi ahjama mochimeripua, ahkasi ki wahjiamesi.
\v 23 Tatakoriniame natetewaa, teꞌta mukiwamepua, Riosichi teꞌta poanatuniame, ahkasi ki seena aampasi. Nape Riosi taamo kiꞌyaa, ki wahjiame ahjaripua kihta natetewachi, apoeche Eesusi Riosie Weratiameche, apoe iintokamepua tatakori natetekao, apoekapapua teꞌta taamo Paamiraa.
\c 7
\s Nenewikamechitia tiiame teꞌterewa
\p
\v 1 Eemea Riosi nuurari yahchari yooraka mochitoamea, ¿ki pahtiame eemea aaata mukukameopa, puuu nuurario, kihta utewaemekopua waꞌasio, ahpo yoorepuameo?
\v 2 Nuurari yoorewaa aaata oowitiame neewikameo, puꞌkache ahjama yasitonurenapua, ahpo kuuna ahjaka yasitoopua pehjio, nape ahpo kuuna mukisoopua, saꞌrukame itipio tuuyamepua, ahpo kuunachio.
\v 3 Piirechi ahjama ihsisaapua ahpo kuunama kahtiaio, suwepori ihsiameko tuuyamepua puꞌkao. Nape ihji kuunara mukisoopa, naꞌsokame itipio tuunapua ahpo neewiriao. Waikapa saꞌrukame enesaapua ahpo kuuna neewiriao, kaꞌchi teeremeripua aaata ahjama neewikaio.
\p
\v 4 Waꞌa tiiachiopua eemea, Riosie Weratiame ahjama mukukamekapaopua, aamo oochetiame teꞌteretoriaopua, saꞌrukame eemea Riosi nuurarie kokosapuaopua. Waꞌa iikapa eemea kihta kokosari teeremeripua Riosieo, aamo tatakoririawichioo. Aamo tatakoririao, aaata neewikame kuunara mukukamechitia waꞌasi, tatakorichi saꞌrukame itipikame eemea puꞌka kuunara mukuriamechitiao, ehpeo, taamo Paamira Eesusikamera, taamo Paamirachi enepakamekapa, apoe taamo Noono Riosio eenechi ahjateriamechi. Ehpeo eemea, aamo oijenatekame ahjama mochipakapao, kaꞌkarumache yooraka mochimeri eemea Riosiwichioo.
\p
\v 5 Taamo tatakorinareka mochikoio pehjio, puuu Riosi nuurari yahchariaa, epeche tatakori nokisinarewa mehtanakamepua. Pukaepa waꞌa teeeriopa nuurario, epeche epecheche teetokame teemea, taamo kokosapuameopua tatakoriwichio.
\v 6 Nape ehpeo teemeapa, saꞌrukame teemea puꞌka nuurari kokosarichiopa, taamoo chapika teeeriamechitiaopua teꞌta wahjiparichio. Puꞌka saꞌrukapaopua teemea, Riosi nookeka mochitoame teemea weemera ahjarichio, taamo iikachi teetokaopua Riosi Riosiwario, puꞌka Riosiwarieo, Riosi nakiya yorasika mochitoame teemea, ki pukerichitia Riosi yahcharia nuuraritere mochitoriachitia.
\s Paorochi kahtia tatakorinarewa
\p
\v 7 Waikao, ¿ihtana erakota teemea puꞌka Riosi nuurario? ¿Ki kaawerumako erakotariarepua puꞌkao? Kaꞌi puuua. ¿Ki puuu nuurari taamo masitekamekosapua, ihtanakoopua Riosio tatakoriko tuuyao? ¿Ki puꞌka nuurarie machikamekosa teemea ki kaawerumako Riosiwichioo, ikotuniameo? Ki puꞌka nuurari cheesoo: “Kaꞌte ikotumitia aaata iinuwarao”, ¿machitamare teemea puꞌkao, Riosiwichioo ki kaawerumakoo?
\v 8 Waꞌa chiiame inamukapa nuurario, naneꞌrekamenia noochioi, ki ehpesi oꞌinia noꞌo tatakoriamekopua, weeka aꞌchi tiiame ikotuwa eꞌrakamekooipua. Kiteresoo nuurario, kiꞌtiameka teeremiipu tatakoria, Riosiwichioo.
\v 9 Pukeri keꞌchu nuurari machiaio, ki naneꞌriainia tatakoriameo ki teesa kokosapuamekoopua Riosieo. Nape puꞌka waꞌapi nuurarichio, noꞌo waꞌapi ihsika tatakorika yasitosoo, ahkasi teꞌta mukiwachi noꞌo uhjurapuame naneꞌrekame neeea, oosa simiyame mukiwamechi, ki wahjiamesi Riosi poanachi teeremiachi.
\v 10 Neeea pukerio, Riosi nuurari yahchariaeche yoorekai, taamo teꞌta kaawe teeremio maayainia Riosichio, Riosiapua waikao waꞌa tiiopa noꞌoo, noꞌo kiameriko maayainia weemera ahjario. Nape puuu nuuraria ki noꞌo ahsepari eꞌwekopaopua puꞌka nuurario, ohsotia ki wahjiamesi mukiniachi noꞌo ikitekapua, noꞌo Riosiwachio poanachi.
\v 11 Noꞌo waꞌapi tatakorinarewae noꞌo wihkuekamenia, nooe waꞌapi iintonariapa puꞌka Riosi nuurari, ki yorajerao. Nooe waꞌapi Riosi nuurari ki yorajera noꞌo iintosoo, noꞌoo ki wahjiamesi poanachi noꞌo uhjuramekapua, ki nuꞌuti poanachi ki Riosi kahtiachio.
\p
\v 12 Waꞌa tiiachio Riosi nuuraria, ki nuꞌuti kaawerumakaitepua, noꞌo ki kaawerumachi wichimichio neesetoamepua.
\v 13 Waꞌa tiiachio, ¿Riosi teꞌta kaaweruma nuurarikamerakosapu, noꞌo teꞌta mukiwarichi uhjurakamea? Kaꞌipua. Riosi nuuraria kihta iintokamepua taamo tatakoriwachi ipakao. Noꞌokamera teꞌta ki kaawe iintoriakamera, noꞌo teꞌta mukiwarichi uꞌpakamepua. Ohso kaawe puuu nuuraria, noꞌo tatakori iintoriao, kiisi kaaweruma noꞌo iintoriachitia, tetewiriopa.
\p
\v 14 Nuuraria kaawerumapua, noꞌo Riosichi kaawe yasitomia tuuyamekopua. Nape noochio, itapiti oochetiame noꞌo teeeria nasiwamepua noꞌo weemera kaaweruma tiia ahjama, noꞌo newitonariameopua eenechio.
\v 15 Neeea noochi ikiyao ki pahtiamenia, aatia tiiachipa waꞌa noꞌo ikiyao. Seenekachio neeea, Riosichi kaawe teeretoamekainia ehpeo itapiti kaaweruma yoranariainia, ki yooramenia; seenekachioinia tiameo, itapiti ki kaawerumao, ki yoranariamekainia puꞌkao, yoyoramenia.
\v 16 Nape puꞌka ki kaaweruma ki noꞌo yoranaria yorasaania, machika tetewamenia Riosi nuurari noochi yachatiame eꞌwepuameo, teꞌta kaawerumakopua Riosi nuurario.
\v 17 Waꞌa teesoo ki noꞌo yoranariakamera ihsinarewaa, ki weemera neeekamera puuua, noꞌo oochetiame teeeriakamera puuua, noꞌo tatakorika oioiopua riaorósie paꞌpasuwaeo.
\v 18 Pukachi oochetiame neee tatakoriamechio, kihta iinuemenia kaaweruma ihsiwao. Kaawerumakamera yoranarenia yoranariao, nape ki utewaemenia puꞌka kaaweruma yoranariaio.
\v 19 Pukaepa ki utewaekapania noochio, ki yooramenia puꞌka kaꞌkaruma noꞌo weemera tiiao yoranarewa, puuu noꞌo oochetiame teeeriaopua nakiya, yooramenia.
\v 20 Waꞌatiachio neeea, ki kaaweruma noꞌo yooraopua, ki noꞌo weemera neee ihsiamepua puꞌkao; piire neeekamera ihsiamepua, pukeri simiyachio noꞌo tatakorika yasitoaio eneria.
\p
\v 21 Waꞌa tiiapa neeea noochi, ooka noꞌo eratiame iinuemenia. Noꞌo kaaweruma yoranarioiopua, waꞌachi mamachenamenia, noꞌo ki kaaweruma yoranarewaai.
\v 22 Neee weemera yooreminao, Riosi eꞌrari ihsiwakamera, tísia puꞌseriamenia,
\v 23 nape noꞌo piirechi yooreminao, noꞌo weemera yooreminawa ahjama nasiwamepua. Puuu piire yooremina kahtiamea, noꞌo kaaweruma yooremina eꞌrario chapisa, noꞌo tatakorichi panisunariamepua.
\p
\v 24 ¡Ai neee! ¿Aatana noꞌo newipatetapua, iꞌka ki kaaweruma eꞌrari noochi yasipakame ihsiao, teꞌta mukiwarichi noꞌo iꞌtonariameopua?
\v 25 Neeea naneꞌriapa aaatakamera noꞌo newipatemerikoo, kaawe eꞌraka cheriwema kiꞌyamenia Riosio, Eesusi Riosie Weratiamerakamera iintomerikopua noꞌo newipatekao. Neeea, iiweta pehjio iꞌka weerewa kahtiaio, waꞌapi teetomania iꞌka ooka noꞌo yooremina, nasiwaniameo, nape noꞌo Paamira Eesusi kuꞌiwae, newitosika.
\c 8
\s Riosiwari tamochi teetoae yasitoniame
\p
\v 1 Yooma Riosie Weratiamechi paparakamea, kaꞌchitia taawechi kokosapuamepua Riosieopua waꞌasi.
\v 2 Yooma aaata weemera ahjari iinuemea Riosie Weratiamechiopua paparaka, pukachi yasitoame Riosi Riosiwaria, tatakorio chapika panisunarioopua, newipatesika, teꞌta mukiwachi iꞌtonariopa.
\v 3 Pukaepa Riosia, kaꞌchi iika teeweme tiiopa tatakori nokinarewao, nuurari yoorewaeoi kaꞌchi iika taamo newipateme tiiopaopua puꞌkao, ahpo Taanakamera uhjurakamepua weeechio, taamo pejana mukimichio nehpupakao. Riosia ahpo Taanao, tamochitia tijoe naawaterepua puꞌkao, tijoe weerewaeka natetemichiopua, taamo tatakoririaopua wikiria, Riosie kokosapuame.\fig |179-LB00324B.TIF|col|||Eesusia ahpo weerewae naawaria, taamo tatakoriria natetena.|8:3\fig*
\v 4 Waꞌa yoorare Riosia yooma aaata ahpo Riosiwarichi enepakameo, ahpo Riosi eꞌrachitia nokisinariameopua, yooma toinareka ahpo ki kaꞌkaruma nokayao.
\p
\v 5 Oowera tijoechitia mochitoamea, ahpo tijoeche kaawe wichiyameche inatamepua, nape Riosi Riosiwarichi mochitoamea, Riosi nakiyache ahpo yoramia inatamepua.
\v 6 Weeechiche nokiwa inataka mochitoniamea, teꞌta mukiwarichi iꞌtopuamepua, Riosichioo teꞌta poanachi. Nape Riosi Riosiwari nakiya inataka mochitoamea, taamo taꞌiria mochitoamepua, teꞌta kaawerumachi teꞌteretoka.
\v 7 Weeechiche nokiwa inataka mochitoamea, ki nakiyapa Riosi chiiao, Riosi seepurawapua. Waꞌa teꞌteriamea, kaꞌchi iika yorameripua Riosi eꞌrao.
\v 8 Waikao, aaata ki kaawerumache ahpo eꞌrari eꞌweka mochitoamea, kaꞌchi iika kaawe eratemapua Riosio.
\p
\v 9 Nape eemea, pichiwa Riosi Riosiwari amochi yahchaka mochitoamea, ki iꞌka weeechiche nokiwa inatamepua. Nape aaata ki apochi yachatoamea, Riosie Weratiame Riosiwarirao, kiisi Riosie Weratiame ijinuwarapua.
\v 10 Nape Riosie Weratiameo, amochi kahtiame enesoopua, aamo weerewa yasitoachio, mukukamepua tatakorieo, nape aamo iikaa ahjamepua pehjio, yooma aamo weerewa tatakoririao, piipatetiamekopa.
\v 11 Puuu Riosie Weratiame oijenatekameo, amochi yasitoame enesoopua Riosiwarirao, puuu waꞌapi aamo oijenatemeripua eenechio, aamo weerewao, weemera kiꞌyaka.
\p
\v 12 Teemea iꞌka taamo weerewa ihtaoi ikotuwao, kihtawichio yooraka mochitomete teemea puꞌkao, ki kaaweruma ikotuwa enesoo, aaataoi taamo utewaeme yeetoio, ki kaaweruma ikotuwa yoramichioo.
\v 13 Aaata ahpo weerewa ikotuwa ki kaaweruma ihsiwa yooramea, teꞌta wahjiparichi akipameripua. Nape Riosi Riosiwarie toisa eemea puꞌka ki kaꞌkaruma ikotuwao, Riosi ahjama ohjoemeri eemea, ahkasi ki wahjiamesi.
\p
\v 14 Yooma puuu Riosi Riosiwari ahpo neesetoniameo, Riosia ahpo tatanachitia tetewamepua puꞌkao.
\v 15 Pukaepa Riosio, ki majaweme teeremete eemea, puhku tiꞌtijoerio ahpo teekoekao majawiachitia. Ohso kaawe Riosia taamoo, ahpo tatanachitia tetewamepua, apoeo tamochi yasitoapa Riosiwarirao, taamo Noonoo teꞌpa kahtiamea: “¡Noonola!”, cheeka ahpo nayewejeranipua, ahpo nayewetioo.
\v 16 Puuu waꞌapi Riosi Riosiwari tamochi yahchariaa, taamo kuꞌika pichiwatamepua, teemea Riosi tatanarakoo.
\v 17 Waikao teemea, Riosi tatanarakapao, uumeri teemea, Riosi taamo nuutekiao. Riosio, yomatiame kiasoopua ahpo Taana kiamiao, taamo naachutemapua taamo Riosie taamo nuutekiao. Nape puꞌka nuutewari puuyeka mochitoaapua pehjio, aiwaka mochitoiopua puꞌka Riosi iintomerichi inataka kaawe erakomete teemea.
\p
\v 18 Yooma ehpe taamo aiwaka mochitoaa, kihtakaitepua Riosie taamo kiapuamechiopua, teꞌta tísia peeniatiachi mochipuachio, teꞌta Riosi ahjamaopua.
\v 19 Yomatiame itapiti Riosi enepateriaa, tahpitika eꞌraka tetewinareka puuyewamepua, ihtatia iintopuamejoarepua Riosi tatanarawichioo, puꞌka ahpo nuutekia kiꞌyoiopua.
\v 20 Riosia yooma ahpo enepateriao, aiwaritere teeeriamepua puꞌkao pehjio, kaꞌchi ikime ahpo erakotere, waꞌa teewiamepua puꞌkao ahkasi ahpo aiwaniameo, uꞌyemiachisi.
\v 21 Puꞌka taawechi asisoopua, yooma puuu Riosie enepatetiamea, waꞌachitia puuuai Riosi tatanarachitia weemerachi enepatepuamepua, yooma ihta aiwaniameopua, apechuneka.
\v 22 Naneꞌriame teemea yooma Riosi enepateriao, aiwaka naarakoamekopua puꞌkao, oowitiame sauyamechitia, ahkasi ehpe taawechiopua pehjio.
\v 23 Waꞌachitia teemeai kai waapisi aiwaka mochitoamepua, Riosi Riosiwari kiatiameai, puuyetoka mochitoame teemea, ahkasi ahsepari taamo kianiachisiopua, Riosie taamo kiapuameopua, teemea Riosi tatanarakapa.
\v 24 Yooma Riosichi paparaka newipatetiamea, puuyeka mochitoame teemea, ki yomatiame taamo kiania pehji. Yooma kiatiame enesaa, ki puuyetoka mochitomii teemea.
\v 25 Taamo kiapua puuyemeri enesaa teeme, mooena eꞌraka puuyemeri teemea, kiisi nahsinepaka.
\p
\v 26 Waꞌachitia tamochi kahtiame Riosi Riosiwariai, ki nahsinepaka taamo kuꞌyachitia anachamichioo, itapiti taamo ki nuꞌuti aiwaio Riosichi nayewanarioio, ki kakajuame enesoo Riosichi nayewakao, puuu Riosiwari tamochi yasitoame, taamo kuꞌipasiamepua. Puuu Riosiwari tamochi yasitoaa, taamo pejana Riosichi nayewamepua taamo Riosichi chaninariao, nape apoe waꞌapi Riosiwari pahteniamechi.
\v 27 Riosi Riosiwaria kaawe waꞌa iintosiame puuua, taamo eꞌrarichi kahtiamekapa puuua, naneꞌriamepua taamo saayao. Puuu Riosiwaria naneꞌriamekapa Riosi inatao, peeneka itayamepua Riosichio, ihtana yoranariaopua taamowichioo.
\s Riosi eꞌraria taamo newitomichio, iꞌka wehjoari naayachi oꞌinia
\p
\v 28 Naneꞌriame teemea Riosikamerakopua tamochi kaawe ihsiao, yooma taamo Riosi nakika mochikameo, yooma ahpo nakiyachitia mochimichio, paaekamepua.
\v 29 Pukeri naayachi oꞌinia Riosia, naneꞌriame enerepua aatanakamera ahpo Taanachi paparamerikoo, puꞌka ahpo Taanachi paparakameo, ahpo Taanachitia teꞌta piipatemo eꞌrariapaopua. Riosia ahpo Taana Eesusio, yooma paꞌchirachitia teeretemo eꞌrakamepua, ki ookapi poponiwa pipiniwa tiame enemichiopua.
\v 30 Waikao Riosia waꞌa tiame iintomo eꞌrakamekapao, yooma oꞌinerepua apochi paajutesikao. Waꞌa iintosaapua Riosia, yooma apochi paparakameopua, yooma pipiripi apochi enapameo, piipatesikamepua puꞌkao; waꞌa ikisaopua, puꞌka ahpo piipateria tatakoririaopua, ahpo tísia peenia ohjoerachi, iꞌtomeripua.
\p
\v 31 Waꞌa tiame inataria Riosia, ¿ki tísia peenia tiiamekosapua? Riosio waꞌa tiame inatakame enesoo taamowichioo, ¿iintunare aaatapua, ki taamo Riosie kiapo tuume tiiamea?
\v 32 Kaꞌii. Riosia ahkasi ahpo Taanaoi taamowichio mukiwachi nehjakame enesoo, ¿ki pichiwa taamo kiatarepua, puꞌka yooma ahpo cheeriao, taamo kiamia tuuriao?
\v 33 ¿Aatana chaachapame taamo Riosi apochi uuriao, ki teꞌta piipatetiamekoopua Riosieo? Riosia ki waꞌa taamo chaanemapua, apoe waꞌapi taamo piipatekamekapapua.
\v 34 ¿Aatana taamo Riosie kokosapuameko tuutapua kajuyachi taawechio, taamo tatakoriria ki cheriwetiameko tuukao? Apoe Eesusi Riosie Weratiamea ki waꞌa cheemapua, apoekamerakapapua, taamo tatakoririawichio mukukamea. Puuua ehpeche epeche pehji iintokamepua taamowichioo, iꞌwa weeechi eenechi oijenakaopua. Puuua eenechi oijenasaapua, tewekachi kahtiamepua taamo Noono ahjama; waꞌa oꞌiniaopua, simitiamepua pehji taamo nehpusikao, yooma ihta taamo aiwapuachi teeresipaniachio.
\v 35 ¿Ihtanakamera taamo toitetamarepua, taamo Riosie Weratiame taamo nakika mochitoao? ¿Tísia aiwaniame puꞌkawichioo? ¿Aꞌchi tiameoi kokosa ikiniame aiwaniameoi? ¿Taamo aꞌchi yoraniokosaoi wepakao? ¿Tooreoi amori mukuyapaoi puꞌkawichioo? ¿Ki wisasoriekapakosaoi taamo chuchamiao? ¿Maapori ikiyakosapaoi? ¿Taamo meripo tuuniokosaoi? Kaꞌi puuua.
\v 36 Teemea, Ehkoriami Iyoteri chiiachitia, aiwamepua. Iꞌka eee tiiame chiiameopua:
\q Aamowichio tísia aiwame teemea.
\q1 Itapiti poꞌwa koꞌipuachi iꞌtoniamechitia.
\p
\v 37 Nape teemea yooma puꞌkao, teꞌta newitoka puuyakame teemeapa, Eesusi tísia taamo nakiya kuꞌiwae.
\v 38 Neeea noochio tísia oowe erapakamepua, Riosio taamo teꞌta nakika yasitoao, kiisi aaata ki taamo uꞌyeme tiiamekopapua, ihtaoi taamo eerina ikiwaoi, ihjichitiaopua: mukiwaoi, ihtaoi taamo ahjatoka mochitoachi ikiwaoi; tewekachi ohjoemeai Riosi kuꞌiwari; aaataoi itapiti tewekachi naꞌarariai; ihtaoi ehpiami seeweniameai; ihtaai, meeriamahkao ikipo eraniameai;
\v 39 kai waapisi teꞌpa taamo mochiniameai, kai waapisi teeresi mochiniameai, ihtaoi itapiti, Riosi enepateriaai. Ihtaoi yooma ihjia, kiisi taamo uꞌyemeri Riosi taamo teꞌta nakika yasitoao, apoe Riosi waꞌapi taamo tetewiteriao ahpo Taana Eesusi taamowichio mukuriaeo.
\c 9
\s Riosi iꞌisaerio ahpo tehkiwawichio uuria
\p
\v 1 Neeea teꞌta Riosie Weratiamechi tiiamekapao, kihta wistuame puꞌka Riosi Riosiwari noochi yahchapao, noꞌo iikachi kokosa eꞌraka yasitoaa, teꞌta pichiwa puuua.
\v 2 Neeea noꞌo iikachi ki nuꞌuti kokosa saayaa, noꞌo tetejimari iꞌisaerio, kiisi kaawe teꞌteriamekopa Riosichio. Puuu noꞌo iikachi saayaa, ki nuꞌuti yuuwesiri puuua, kiisi noꞌo toaka iikachi kokoretiame.
\v 3 Neeea noꞌo eꞌrao, ahkasioi Riosie Weratiamee noꞌo ipatiaio poanatakao, kaꞌchi eramii neeea, pukae waꞌa iintotiamee, noꞌo iꞌisaeri tetejimari kaꞌkaruma enepameriwichio enesoo.
\v 4 Riosia, puꞌka noꞌo iꞌisaeri tetejimariopua, ahpowichio tekipanawichio uukamepua. Riosia teꞌta apochi paparakameopua ahpo tatana iintaparepua. Waꞌa iintosapao Riosia, ahjama yaajatorepua, ahpo teꞌta tisiwari peeniatiame tetewiteka, ahpo ki nuꞌuti utewarie ihsia tetewiteka tiame. Riosia puꞌkakamerao, ahpo ahjama kateweri yahcharepua, puꞌka iꞌisaeri tiꞌtijoechiopua, itapiti tísia kaaweruma tiiame iintokemo tuuka. Puꞌkakameraopua tiameo, ahpo nuurari iyoriwa kiꞌyarepua tiameo. Riosia puꞌkakamera kiꞌyarepua tiameo, neꞌneseriosi ajawapuameo, itapiti Riosi ijinuwara kateweka neesetomichiopua. Pukaepa waꞌa tiiachipa, teꞌta iꞌisaeri tiꞌtijoeria, Riosi iintokemo tuuria uumeripua.
\v 5 Pukachi iꞌisaeri tetejimarichi tiame, puuyakamepu taamo ehkoriami noonoriai, Auranichitia. Pukachi waꞌapi iꞌisaeri tetejimarichio, naawakame Riosie Weratiameai, teꞌta apoe Riosi yooma aampa tiiamea, puꞌkawichio yooma teemea, teꞌta iyoriwa teꞌterepuamepua, ahkasi ki seena aampasi tiiame.
\p
\v 6 Ehpe taawechiamio Riosia Auranio, ahpo iintokemo ki ookapi muuwepari tuuria iꞌisaerio, ki ahsepari muuwepamekatepua pehjio. Nape Riosia waꞌa ahpo cheeria muuwepario, ki isaeri tiꞌtijoeriche nayewaka cheekai cheekamepua, aaataai ki iꞌisaeri tiꞌtijoerio, Riosichi paparasacheopua, teꞌta pichiwa iꞌisaeri enepamekopua puꞌkao. Waꞌa tiiachio, teꞌta isaeri tiꞌtijoeria, aaataai teꞌta Riosi chiia pichikekame puuua.
\v 7 Ehkoriami Auranichi tatanaraai, ki yooma teꞌta Aurani tatanarakaitepua, teꞌta Aurani tatanaraa, teꞌta Riosichi paparakamera puuua, teꞌta Aurani paparariachitia, Riosio eee chaaneriopua Auranio: “Aamo teꞌta tatana enemeria, teꞌta noochi paparakamera enemeripua, aamochitia noochi teꞌta paparariachitia, Ihsa aamo taana naawamioiopua.”
\v 8 Riosia waꞌa cheeriachio, Riosi teꞌta tatanaraa, teꞌta Riosi chiia pichikiamerapua, ki Auranichi tiꞌtijoetusiwachiche naawakame.
\v 9 Riosia eee cheeriaipua pukeri Aurani taanaemeriko tuuyaio: “Piie paaumparichi eenechi noꞌo eenoio, taanaeme enemeri Saaraapa, piiripi temari.” Aurania puꞌka Riosi cheeriao, teꞌta pichikeka inamukamepua.
\p
\v 10 Riosia Auranichi oꞌinesaapua tatanatesikao, Ihsa Aurani taanarachi waꞌapi simiterepua iꞌisaeri muuwetesiwao, Reeweka tewaniame Ihsa ahjama neewiriachiopua. Ihji Reewekaa, ooka pirena naawakame tatanaerepua.
\v 11 Riosia iꞌka ooka naawakameo, keꞌchu saunioio, keꞌchu noonowioiopua kaawerumao ki kaawerumaoipua, piiripi puꞌkao uukame eneriame Riosia, iꞌisaeri tiꞌtijoeri simitemichioo, muuwepasiwao.
\v 12 Puꞌka waꞌa teeremio nayewakao Riosia, eee teeremio chaanerioi Reewekao: “Ihji aamo tatanaa, paꞌchiraa ahpo poonikamera itapiti yooreka yasitomeripua, iꞌisaeri teꞌta paamirachitia tetewika.” Riosia, Aakowokamera uurepua poonirakai, paꞌchirachitia teeremichioopua iꞌisaeri paamirachitiao.
\v 13 Riosia waꞌachi cheekamepua Ehkoriami Iyoterichio, ahpo nayewaturachi eee chiiame iyotetekamepua, eureo nayewaniachio: “Aakowookamera uukamenia, Esauo ki uukamenia.” Waꞌa cheekao Riosia, Aakowokamera uuyo tuurepua, ki Esaukamera, iꞌisaeri paamira enemichioopua.
\p
\v 14 ¿Ihtana chaachapatare teemea, Riosi waꞌa iintoriaopua, poonirakamera uukamekapao? ¿Kiisi kaawe iintokamejoarepua? Kaꞌi. Riosia, ahpo eꞌra ihsiamekapa, waꞌa iintokamepua.
\v 15 Ihjia Riosi Moise cheeriachitia tiamepua, eee cheeria: “Neeea, aaata noꞌo kaawe yoranaria kaawe yoramania. Neeea aaata noꞌowichio yoratenaresaa, waꞌa iintoamenia.”
\v 16 Waꞌa tiiachio Riosia, ahpo eꞌra ihsiamepua, ki aaata ahpo utewa yorawae, ihtaoi utewa chaachapaka itaniameoi.
\v 17 Pukaepa Ehkoriami Iyoterichio, Riosia chaanerepua Araonio: “Neee ihsikame aamo yawichi yahchakao, amochi tetewitenariapa noꞌo utewario, yomatiame weeechiopua, naneꞌremichiopua noꞌoo, aatanakoopua.”
\v 18 Waꞌa teesoo Riosia, aaata ahpo weranaria itapitiwichioo, apoe waꞌapi waꞌa erasaa weeramepua; aaata newitokache kiisi Riosi nakiya ihsinariameo, Riosia ahpo ki kaaweruma eꞌra ihsinariachi toayamepua.
\p
\v 19 Aaataa noꞌo iinatuketarepua: “¿Achini iikai Riosia, ki noꞌo eꞌrarioi itapitiwichio noꞌo weerakamepua, ki kaawe noꞌo iintosoopua, noꞌo teꞌyamepua pehjio?”
\v 20 Nape ¿aatanana muuua, aamo waꞌa chanimiaopua Riosio? Sikori netetiamekosaoipua, kaawe iinatuketarepua ahpo neteriaopua cheeka: “¿Achinikai eee tiame noꞌo netekamua?”, cheeka.
\v 21 ¿Naakonakosa sikoritamea, ki ahpo iintonaria iintotarepua? ¿Ki ihta ahpo eꞌra iintonaria iintotarepua wehchorieo, itapiti sikori tísia peeniatiame iintonaresaopua, ki teꞌta peeniatiameoi iintonaresakoiopua, piiripiopua, ahpo petechi ahjaepuameopua, piireo, teꞌta pahkotanioi ahjaepuamewichioopua?\fig |180-LB00138B.TIF|col|||Sikoritamea, ihta itapiti ahpo netenaria netena wehchorie.|9:21\fig* Waꞌa tiiachio Riosiai, apoe ahpo eramia iinuekapaopua, Aakowokamera uukamepua iꞌisaeri paamiratumichioopua, ki Esaukamera.
\p
\v 22 Riosiai iinuemepua tiameo, ahpo ki nahsinepaka puuemiao, ki kaꞌkaruma nokayame tiꞌtijoeo ooweruopua tiameo, ahkasi apochi eꞌenaka kaꞌkaruma enepachisio, nape ki apochi paparamia eꞌenanarekameopua, Riosia puꞌkao iinuemepua tiameo, kokosamiaoiopua.
\v 23 Riosia, ahpo ki nahsineka puuyeriaa, teꞌta tísia ahpo tesiwewa eꞌria tetewitenariapa waꞌa teereriaipua. Puuu ki kaꞌkaruma nokayame puuyetiamea, teeme puuua tiameo, Riosia pukeri ahpo iintomia inatariachi oꞌiniao, taamo ahpo tesiwewa uupuame inatakamepua, taamo kaꞌkaruma enepatesaapa, ahpo ahjama mochipuachi iꞌtonariapa.
\v 24 Puuu kakupachi iꞌtopuamea, teemepua teꞌta iꞌisaeri tiꞌtijoeri, yooma ki iꞌisaeri tiꞌtijoeriai, Riosie paajutetiame.
\v 25 Oosea tewaniamea ehkoriami ahpo iyotaperi chiiao, Riosi nayewaria puuua Iyoterichio. Riosia puꞌka Oosea tewaniame iyotaperichio, eee cheerepua:
\q Ki iꞌisaeri tiꞌtijoekoipua, noꞌo tiꞌtijoeriwa tewamania;
\q1 ki nakiwame tiꞌtijoerio, nakiwame tewamania puꞌkao.
\q
\v 26 Waꞌapi puꞌkao Riosio eee cheeriachio:
\q2 “Eemea ki noꞌo tiꞌtijoeriwapua”,
\q1 Riosi teꞌta ahjamea,
\q2 ahpo tatana tewameripua.
\p
\v 27 Isaeri tiꞌtijoeri nayewaniachio, Isaiaa weeru naewakao chaacharepua:
\q1 Isaeri tiꞌtijoeria seete paꞌwechi kehki muuwepakaipua,
\q2 Riosi teꞌta kokosarichio,
\q2 ookapi waꞌapi newipameripua;
\q
\v 28 muuwaeme puuu ki Riosichi paparakamea,
\q2 Riosi kaꞌkarumara uuka katewiachiopua kajuyachi taawechiopua,
\q2 kokosapuamepua Riosieo,
\q2 poanachi ki wahjiamesi poanatakaopua ki ahpo kahtiachi.
\p
\v 29 Isaiaa cheeriaipua tiameo ahpo iyoterichio:
\p Riosi yomatiame teꞌta tiiameo, ki taamo tooweriame enesoo tetejimarisiwao,
\p Sooroma muuwarika ijikimeriai teemea, ooruchi itipiriamechitia ki tiꞌtijoerie;
\p Oomora muuwari mochiriamechitia, ikiriamechitia.
\s Isaeri tiꞌtijoe ki nakiyame puꞌka Riosi kaaweruma tuuyewari
\p
\v 30 ¿Ihtana erakotariare teemea Isaeri cheeriao? Ehpe taawechiamio, seesenu ki isaeri tiꞌtijoeria, kiisi iꞌyaka mochikai ahpo kaawe Riosichi teꞌterewao, tewakame puuua aachin teeka ahpo teꞌta kaawe teꞌterepuaopua Riosichio. ¿Aachin nokaka tewariarepua teꞌta kaawe teꞌterepuao Riosichio? ¿Ki Riosichi teꞌta paparakapa, waꞌa teꞌterepakamepua, ahpo tatakoriria cheriwepuawichioopua?
\v 31 Nape ehkoriamisi iꞌisaeri tiꞌtijoeria, tísia Riosi oowewari mochitoamekaipua ahpo tatakoriria cheriwepuawichioopua, kaꞌchitia kaawe teꞌtereme teereriamepua Riosichio.
\v 32 ¿Aatia waꞌa teereriarepua? Puuua kihta Riosichi paparakapa, waꞌa teꞌtereriamepua, oowera nuurari chiia oowewarika nateteriamekapa. Pukaepa motochikamepua, Riosi yahcharia tehtechiopua. Puuu tehtea, Riosie Weratiamekai teererepua.
\v 33 Isaiaa eee cheeka iyoteriaipua Riosieo:
\q Neeea Siioni mochiwachio, Tehte yachamania waꞌao.
\q1 Pukachi tehtechio,
\q2 muuwaeme motochika ruhjimapua.
\q Nape pukachi paparakamea,
\q2 kiisi kitachi itipirio erakomapua
\q2 ahpo paparariao.
\c 10
\p
\v 1 Pukaepa Riosichi poponi pipini tiame Rooma mochikameo, iꞌka aamo tuuyeka iyotiamenia, neeea senepi taawechi noꞌo tetejima iꞌisaeriwichioo, tísia Riosichi itayame neeea, Riosio kuꞌimichiopua puꞌkao, ki puꞌka tehtechi motochimichiopua, apoe Eesusichio, ohso kaawe neeea pukachio, tísia ahjachi paparajeraninia, Eesusie newipatepuawichiopua puꞌkao, Riosie teꞌta kokosapuameo.
\v 2 Naneꞌriamenia puꞌkao, tísia Riosikamera yooreka mochitonariopua, nape puꞌkachepa, ki Riosi teꞌta nakiyachitia nookapua.
\v 3 Ki machiyapa pehjio aaatana Riosi yahcharia, ahjachi pichikiachi ahpo tatakoriria cheriwepuameopua, aapoe ahpo iꞌyamepua aachin teeka kaawe teerepuameopua Riosichio. Pukaepa ki paparamepua Riosie Weratiamechio, ahpo newipatepuawichio weratiameo.
\v 4 Puꞌka Riosie Weratiameopua, ehkoriami Moise nuurari nokisiniameopua waꞌasi werapatiamepua, Eesusio yooma tatakoritiame nateteka mukuriapa taamowichioo, yooma pukachi paparameo, ahsieme choꞌwetiame itipimichiopua tatakoririao waꞌasi.
\p
\v 5 Aaata Riosi nuurari eꞌwekache kaawe teerenariameopua Riosichio, Moisea chiiamepua puꞌkao: “Aaata Riosi nuurari eꞌwewache kaawe teerenariamea Riosichio, senepi taawechi ahsepari yooraka, yasitomeripua nuurari chiiao.”
\v 6 Nape papararichi simiyame kaawe teereniame Riosichio, neee Paoroa eee yorajera eꞌramenia aamoo: “Kaꞌte eramitiamua aamo ikachio: ¿Aatanana mooenamepua tewekachio mukusao? —waꞌa eraniamea, Eesusio mukukaio ki tewekachi mooenario eraniamepua—;
\v 7 kaꞌte eramitiamua tiameo aamo iikachio: ¿Aatanana mukukatewechi tekitiaio machenatapua eenechio? —waꞌa eraniamea Eesusi mukurioioopua, kiisiki oijenario eraniamepua. Nape Eesusia mukukai oijenasaapapua, teꞌta pichiwa tewekachi mooenakamepua.”
\v 8 Moisea simiteka nayewaka ahpo Iyoterichio, eee cheeriamepua tiameo: “Riosichi aamo kaawe teerepuaa, kiisi tehki tiiáitepua. Aamoe chuwae waꞌapi itapuapua Riosichio, nape teꞌta aamo iikachi machenamee Riosichi oowe eꞌráe, aamo tatakoririao cheriwepuawichioo. Waꞌa eꞌraka Riosichi itasaamua, kiisi tehkikai teereriopua Riosichi kaawe teereniameo, aamo chokichi waꞌapi kahtiamekai tiiamekopua.” Teemea waꞌa tiiame masitesiamepua, Moise cheeriachitia, aachin teeka Riosichi paparaniame.
\v 9 Aamoe chuwae waꞌapi cheekame enesaamua, Eesusio apoe aamo Paamirako tuuyame enesaamua, teꞌta aamowichio tatakoriria cheriwepuawichio mukuriopa puꞌkao, puꞌkao Riosie oijenatetiamekopua aamo weemera ahjari kiapuawichioo, newipameri muuua Riosie kokosapuamechio.
\v 10 Teemea taamo iikachio, Eesusi taamowichio iintoria erakoniae, taamo kaawe teꞌteriame tetewame Riosia apochio; teemea tiameo, taamo chuwae chaachapame teemea, Riosie taamo cheriwepua uunarewao, Eesusi taamowichio iintoria nateyaraeo, taamowichio mukuriaeo.
\p
\v 11 Ehkoriami Iyoterichio, chaanipua tiame: “Aaataai Eesusi Riosie Weratiamechiche paparamea, kiisi sewina erapameripua ahpo Riosichi paparariao, kihtawichio kaawe enerio eraniameo.”
\v 12 Riosia ki seenu tetewamepua aaataoi, iꞌisaeri tiꞌtijoerioi, ki iꞌisaeri tiꞌtijoerioi; yooma puꞌkao napati waꞌachitia Riosiwarakapaopua, ki nuꞌuti cheriwewa eꞌrarie cheriwiamepua, yooma apochi eꞌenaka paparaka ahpo cheriwewa itayameopua.
\v 13 Waꞌachi chiiame ehkoriami Ooeriai ahpo iyoterioipua, eee cheerioiopua: “Yoomahka taamo Noono tewekachi kahtiamechi paparakamea, newipatemeripua, apochi enapameopua, ahpo tatakoriria cheriwepuawichio itakao.”
\v 14 Nape ¿aatana paparatapua pukachio, ki naneꞌriame enesaapua aatanakoopua puꞌkao? ¿Aachin teeka naneꞌretapua, ki aaatae tuuyetiame enesaapua aatanakoo? ¿Aatana tuuyetapua puꞌkao aatanakoo, kiteresoopua tuuyemerio?
\v 15 ¿Aachin teeka simitapu aaata tuuyemeria, kiteresoopua aaata ahpo itapitie kuꞌika uhjuramerio? Puuu ehkoriami Isaiaa ahpo Iyoterichio, iꞌka nayewatupuamechi simiyame, nayewaka cheeriamepua, eee cheeriaopua: “Tísia peenia tiame iintokame aaataa, Riosi kaaweruma tuuyewari uꞌpakaopua.”
\p
\v 16 Nape iꞌka Riosi kaꞌkaruma tuuyewario, ki yoomahka pichikerepua. Isaiaai, Ehkoriami Iyoterichio, waꞌachi cheeriaipua cheekao: “Paamira, nape amochi simiyame nayewatuwao, ¿aatanana taamo pichikiamepua?”
\v 17 Waꞌa teesoo teꞌta paparaniamea, Eesusi Riosie Weratiamechi simiyame pichikeka keepukapa, ikiniamepua.
\p
\v 18 Nape isaeri tiꞌtijoeria, ¿ki inamukamekosapua pehjio puꞌkao? Ejeꞌe, puuuapa puꞌkao, inamukame puuuapa waꞌasi, ahpo waꞌapi Ehkoriami Iyoterichioi, eeechi chiiopa:
\q Riosi naꞌnayewatuame Riosi chiia tuuyesika mochitoriaa,
\q2 ahkasi yomachi weeechi naneꞌretiamepua,
\q2 ahkaoipua sihkochiamioiopua.
\p
\v 19 Nape chaanine eenechi: ¿Ki pahteka inamukamekosajuarepua puꞌkao, puuu iꞌisaeri tiꞌtijoeria? Riosio Ehkoriami Iyoterichio Moise iyotaperichio cheerioipua:
\q Aamo isaeri tiꞌtijoerio, waꞌina erakotemania,
\q2 noꞌo kaꞌkaruma naawesario seesenu tiꞌtijoeri iꞌyetoretiopa,
\q2 aamoo ipaka tetewiria.
\q Aamoo nekumechetemania pukachio,
\q2 puꞌka aamo ki ijinatame teewarioiopua,
\q2 noꞌo kaꞌkaruma tuuyewario,
\q2 kaawe eꞌraka uukamekopua apochio,
\q2 aamoo ki nakika uukamekopa.
\p
\v 20 Riosia Isaiachio iyotetekao, waꞌachi cheerepua, eee cheekao:
\q Ki noꞌo iꞌyamekameraa,
\q2 noꞌo tewakamepua;
\q ki noꞌo tetewai iinatukekameo,
\q2 noꞌo tetewitekamenia.
\p
\v 21 Iꞌisaeri tiꞌtijoeri nayewaniachio, Riosia cheekamepua Isaia iyoterichio:
\q1 Neeea senepi taawechi oowekamenia,
\q2 ahpo waꞌinameoipua noochi eꞌenapuao,
\q2 ki noꞌo eꞌweka mochitopuameo.
\c 11
\s Isaeri tiꞌtijoe teꞌta uutiamera
\p
\v 1 Waikao iinatukenania: ¿Aatia waꞌa iintoriare Riosia iꞌisaerio? ¿Ihpapakamejoare naaju Riosia iꞌisaeri tiꞌtijoerio? ¿Ki ahpowichio tekipanamichio uukamekosapua naaju? Kaꞌchitia waꞌa tiiame puuua. Ohsotia puuua, ki ehpesi oꞌinia uukamekopua puꞌkao ahpowichio tekipanamichioo. Neeeai isaeri tijoekapao, ipatiame enemii neeeai waikao, ki ahpowichio tekipanamichioopua tiameo. Nape neeea Riosiwichio tekipanamenia, isaeri tijoenia tiameo, Aurani tetejimari neeea, Chaamini tiꞌtijoeturi neeea.
\v 2 Waꞌa tiame tetewapa neeea taamo iꞌisaerio, ki ihpapatiame maaena neeea, Riosio iꞌisaerio, ki ehpesi oꞌinia ahpo tekipanemichioopua uuriamekopua. ¿Ki naneꞌriame eemea, Eeriaai waꞌa chaanerio Riosi ahjama nayewaio, iꞌisaeri wenejikao? Puuua chaaneriaipua Riosio:
\v 3 “Noꞌo Noono Paamiraa, yoomá koꞌiretupa aamo naꞌnayewaturao, puuu aamo oorona oowewari kokoseretiachioi, yooma ruꞌminaretupua waꞌasi, tepawetetiamea. Neeeche itipiamepa ahjamea, neeeai waꞌasio, merinareniamepua tiame.”
\v 4 Nape Riosia, Eeria waꞌa chiiopao, ¿ihtana nehjiarepua? Riosia chaanerepua puꞌkao: “Iiweta iinuenia oowisani miiri iꞌisaeri tiꞌtijoeri ooweruri tiame, ki chopokorieka ajapameopua pehjio, Waaari riositawaopua. Puꞌkaonia noochikamera paparaka mochitopao, noꞌowichio poanatakamenia, noochi simiyame tehki yoramichiopua.”
\v 5 Riosia waꞌachitia teetoamepua ehpe taawechiamioi, ki weeka ahpowichio poanatakaoi, ehkoriami koꞌitiochitia seesenueo, ahpo kaawe eꞌrachi nehpupaka newiteriachitiao.
\v 6 Waꞌa tiiachi ahpo kaawe eꞌrachi enesoopua Riosio, tiꞌtijoeria kihta yoorakamepua ahpo newipapuawichioo. Itapiti yoorakame enesoopua ahpo newipatewawichioo, Riosia ki ahpo kaawe eꞌrachi iintokame enemiipua. Waꞌa teerekame enesoo, ahpo kaawe eꞌrachi iintotiamea, ki ahpo kaawe eꞌrachi iintotiame enemiipua.
\p
\v 7 ¿Aachin tiamepu iꞌisaerichi simiyamea naaju? Isaeri tiꞌtijoeria, ki tewakamepua ahpo iꞌyao, Riosichi kaawe teꞌterewao, nape Riosie uutiamea, Riosichi paparakapa tewakamepua puꞌka ahpo kaawe mochiwaopua Riosichio. Wahjachi ki Riosichi paparakamea, waꞌapitia toiretupua, ahpo ki kaꞌkaruma nokiwachi.
\v 8 Puuu wahjachi toitiamea, Ehkoriami Iyoteri chiiachitia teꞌteriamepua, eee cheeka chanitiamea:
\q1 Riosia ahpo kokochiwachi toarepua puꞌkao,
\q2 waꞌatia ahpo pusieo ki tetewimichiopua,
\q2 ahpo nahkaeoi ki inamumichiopua.
\q1 Ahkasi ehpe taawechiamioi waꞌa teꞌteriame puuua.
\p
\v 9 Ehkoriami Raawiai, waꞌachitia cheeriaipua tiameo, ki nakika mochikameopua Riosio, eee chanitiame eee cheekao:
\q Puuu ki kaꞌkaruma nokaka mochinariamea,
\q2 oowera mochika pahkotaka puꞌserenariamepua.
\q Ahpo nokayae waꞌapi ruhjisaa,
\q2 kaawe enemiipua.
\q Puꞌka ahpo ki kaꞌkaruma nokayae,
\q2 motochitesaa kaawe enemiipua,
\q2 puꞌkao kokosatiaa kaawe enemiipua.
\q
\v 10 Puuua puichi tukapasipasoopua,
\q2 kaawe enemiipua,
\q2 ki maꞌchiremichioopua puꞌkao.
\q Puuua koomorasitepatetiaa,
\q2 kaawe enemiipua.
\s Ki iꞌisaeri tiꞌtijoeri newipateniame
\p
\v 11 Waikaonia noochio, eꞌraninia: “¿Ki oosa werisimeri ohjoarepua ahpo motochiria teꞌterewachiopua? ¿Ki oosa Riosi nookemeri ohjoarepua waꞌasio? ¿Kííkosa ahpowichio nokimichio uukame Riosia puꞌkao?” Ejeꞌe. Puꞌkawichio uukamepua. Nape ehpeo pehji Riosia, ahpo pukeri oꞌinia uuriao ahpowichio tekipanamichioo, ki kaawe teꞌtiopa apochi puꞌkao, ki isaeri tiꞌtijoerichi ihsiamepua kuꞌikao, ahpo tehkiwachiopua. Waꞌa iintotioopua Riosio iꞌisaeri tiꞌtijoeria, seenekachi Riosichi eꞌenanaretareoipua eenechi.
\v 12 Riosia iꞌisaeri tiꞌtijoerio kihta yooraka mochitoriopua ahpo tehkiwachio, ki iꞌisaeri tiꞌtijoeri ajawarepua ahpo tehkiwachio, aapoekamera nakiriopa Riosi kaaweruma tuuyewari. Waꞌa iika tísia muuwere Riosichi paparakame ki isaeri tiꞌtijoeri. Nape iꞌisaeria eenechi Riosichi eꞌenasoopua Riosichi paparaka kaꞌkaruma enepakaopua, kaawe tekipananaria enesoo puꞌkawichioo, ¿kehkisa epeche muuwepatarepua Riosichi paparamea, tísia muuweeka Riosichi tekipanatoopua, pirena nokisika ki isaeri tiꞌtijoeri ahjamao?
\p
\v 13 Iꞌka aamo chaanenania ki iꞌisaeri tiꞌtijoerio, neeea aamoo, uhjuratiamekapa amochi nayewatumichio Riosi tuuyewario, iꞌka noꞌo tehkiwa amochiopua, tísia nateyame tetewaninia.
\v 14 Iꞌka noꞌo inisia amochio, Riosie Weratiamechi naewatukao, noꞌo tetejima iꞌisaerio eenechi Riosiche eꞌenanarewa erapatesoo, tísia kaawe enemiipua, amochitia Riosie newipatetiame enemichiopua.
\v 15 Iꞌisaeri tiꞌtijoerio ki nakika tetewariopa teꞌta kaaweruma tuuyewariopua Eesusichi simiyame Riosi Taanarachio, seesenu ki isaeri tiꞌtijoe ooweru tiame ajaware Riosia, kaaweruma ahpo tehkiwachi nokisimichioo. Nape puꞌka iꞌisaeri tiꞌtijoerio ki nakiriai ahpo tehkichio, eenechi Riosi tehkichi ajawatiame enesoopua Riosieo, ¿ki teꞌta kaawe erakoame enetare iꞌisaeria, eenechi oijenatetiameka teꞌteriapa iꞌisaeria?
\v 16 Riosio pukeri oꞌinia Aurani ahpo tehkiwachi ihsimia iꞌka weeechi kaaweruma machenakame enesoopua, yomatiame ahpo inataria neipami iintomeriai, ahpo inataria kuuwepakaoi, kaaweruma machenameripua eneriamepua tiameo. Puuu Riosi inataria iꞌka weeechi ahpo iintomiaa, paatusika tiiamepua. Paatusia pahcha takaritatiameo, taꞌyame machenakame enesoo, yomatiame kaaweruma paatusia. Puuu Riosi inataria iꞌka weeechi ahpo iintomiaa, kuuuka tiiamepua tiame. Itapiti kuuuai naawara ahjame enesaapua, yomatiame ahjamepua, atowara, saawara tiame.
\p
\v 17 Riosia iꞌisaeri tiꞌtijoerio, ooriwo kuuuka tiiame tetewanipua puꞌkao, iꞌisaeri ahpowichio tekipanameo Riosia, puꞌka ooriwo kuuu atowarachitia tetewamepua. Ookapi iꞌka atowa iꞌisaeri tiꞌtijoerio Riosia, ki apochi paparamekopaopua, tehpunarepua puꞌka atowao. Waꞌa ikisaopua Riosia, seesenu kuuu atowara atowatere puuua ahpo ooriwo kuuuo, ahpo ooriwo naawae ahjaka mochitomichiopua; waꞌa teꞌtereka mochitoame ahpo ooriwochio, ahpokamerawichio, yooraka mochitomichiopua. Puuu seesenu atowaa, eeme puuua, ki isaeri tiꞌtijoeri Eesusichi paparakame.
\v 18 Nape eemea puꞌka Riosi ooriwochi atowatetiamekapao, ki epeche erakometepua iꞌisaerichio, Riosi ooriwo teꞌta atowarawachio. Waꞌa eꞌrame enesaa eemea, puꞌka kuuu naawarao eemekamera ahjatio erakomiipua, nape ki eemekamerapua, Riosi ooriwo ahjatiameráa.
\p
\v 19 Ehpeo eemea chaachapaniarepua: “¿Ki epeche tiiame ohjoare teemea naaju, puꞌka iꞌisaeri uꞌyesaopua taamokamera atowatetiameopua?”
\v 20 Kaꞌi puuua. Iꞌisaeri tiꞌtijoeria tehpunatiamepua atowachitiao, ki Riosichi paparakapa; eemekamera atowachitia ajawatetiamea, Riosichi paparakapakamera eemea, ki epeche kaꞌkarumakapa. Waꞌa teꞌtiapa eemea, kihta weruma epeche erakometepua iꞌisaserichio, Riosie aamo kaawe yoraretiao. Ohso kaawe eemea, Riosichikamera aamo pewatiame teꞌterio erakopuapua.
\v 21 Riosia iꞌisaerio ki nakiyapa ahpowichio tekipanamichioo, puꞌkao tehpunakame enesoopua, ki apochi paparakopaopua, ¿ki waꞌachi iintotarepua amochioi, ahpo oowarachi ihchiamekoipua, aamo toisoopua apochi paparao?
\v 22 Riosia kaawerumapua kaawerumao, nape aaata apochi seꞌwika paparakameopua, ki teesa kokosamepua, ki ahpo tehkiwachi tekipanamichio. Riosia aamowichioo, tísia tesiwekamepua; ahpo tehkiwachi mochitomichiopua itapiti ahpowichio nokisikao. Waꞌa tiiachipao eemea, iyorika mochitopuapua puꞌkao, ki tehpunapuame eemea Riosi atowarachitiao.
\v 23 Nape iꞌisaeri atowara tehpunatiameopua, kaꞌkaruma enepasoopua Riosichio, Riosia iinuemepua utewari apochio, eenechi waꞌapi kuuuchi ahpo atowatemiaopua, iꞌisaeri ahpowichio nokisimichioopua eenechi.
\v 24 Riosia aamo ki iꞌisaeri tiꞌtijoeri atowarao, seenu kuuu atowara tehpunatiame, ahpo ooriwo kuuuchi atowaterioo, ¿epeche ki tehkina eramerinapua, ahpo waꞌapi ooriwo kuuu atowara tehpunariao, puꞌka waꞌapichi ooriwo kuuuchi atowatekao?
\s Waꞌasi kajuyachi newipateniame iꞌisaeri tiꞌtijoeri
\p
\v 25 Eeme ki iꞌisaeri tiꞌtijoeria, ki aamoeche itipimeri teꞌta atowarachitiao. Iꞌka aamo naneꞌreka mochitojeraninia, ki aamo teꞌta oijerawa erakomichiopua, iꞌka Riosiche apoeche naneꞌriaopua: Puuu isaeri tiꞌtijoeri ehpe taawechiami ki nakikame Riosi tuuyewari ahpo Taana Eesusichi simiyameo, ki yooma taawechi waꞌa teeremiite puuua, iꞌisaeri tiꞌtijoeria. Puuu iꞌisaeri waꞌa teꞌteremeripua ahkasi yooma ahseparichisi Riosichi paparameriopua, ki isaeri tiꞌtijoeeopua.
\v 26 Riosi naneꞌria kehki ahsepasoopua ki iꞌisaeri Eesusichi paparakameeo, yomatiame teꞌta iꞌisaeri Riosi kuuurachi atowatepuamepua tiame, yooma pirena Riosie teꞌta newipatetiame itipimeripua waꞌasi, Riosie newipatetiame pirenatupakaopua. Puꞌka nayewaka cheere Riosia, Ehkoriami Iyoterichio, eee cheekao:
\q Apoe Newipatemeria, Siioni tewaniachi oꞌinia enameripua,
\q2 Riosi kahtiachi oꞌinia, yooma Aakowo iꞌisaeri tiꞌtijoeri ki kaꞌkaruma teꞌtiao,
\q yooma puhjenekemapua puꞌkao.
\q1
\v 27 Waꞌa tiiachio yooma teꞌta iꞌisaeri tiꞌtijoeri ahjama noꞌo katewerio,
\q2 ki iꞌisaeri tiꞌtijoeri naꞌpepaka ahjamaopua,
\q2 ahsieme kuuwepakame enamania puꞌka ahjama noꞌo kateweri yahchariao,
\q2 puꞌka tatakoririao teꞌta ahsieme choꞌwekamekapaonia waꞌasio.
\p
\v 28 Nape iiweta iꞌisaeri tiꞌtijoeri ki Eesusi Riosi Taanarachi paparaka mochitoiopua pehjio, Riosia ahpo tuuyewari newipatiameo, seepurawachitia tetewamepua. Waꞌa teꞌteriopua puꞌkao Riosia, aamokamera ajawarepua puꞌka ahpo newipatiame tuuyewari tehkiwa nokisimichiopua. Aamokamera waꞌa yoorakamepua, tísia ahpo Taana Eesusichi paparariopao, eemepechi simitemichiopua puꞌka ahpo Taana Eesusichi simiyame nayewatukao. Nape Riosia ahpo tehki kiꞌyaria uꞌyekameaiopua, ki toaka tetewamekaitepua puꞌkao, ki natakepamekapao, iꞌisaeri noonoriwa ahjama ahpo kateweri yahchariaopua. Pukaepa Riosia waꞌa tiiamepua pukachio, nakiyamekapapua puꞌkao.
\v 29 Riosia kiisi waꞌatia itipiamepua ki iintokao, ahpo iintomo tuuriao, yooma aaataoi ahpo ijinuwa paajutiaopua.
\v 30 Eeme ki iꞌisaeri tiꞌtijoeria, aamo ehkoriami noonoria pukerio, ki Riosie uutiame eneriaipua ahpo tehkiwa nokimichioopua, ki Riosichi paparaka mochitoriamekapapua pehjio; nape ehpe Eesusi taawechiamio, iꞌisaeri tiꞌtijoerio ki Riosi eꞌweka mochitonareriopao, eeme ki iꞌisaeri tiꞌtijoeri ajawatiamepua, ahpo Taana Eesusichi simiyame nayewatumichiopua.
\v 31 Waꞌachitia puuu iꞌisaeria ehpe taawechiamioi, ki pichikiamepua Riosi chiiao, Riosi weeraria Taanachi simiyameoi. Nape Riosia iꞌisaerio, aamochitia ahpo Taana Eesusichi eꞌenaka paparakameo, ahpo tehkiwachi enepatemapua eenechio, puꞌka yooraka nokisimichiopua.
\v 32 Riosia yoomatiame tiꞌtijoe ooweru tiame wehjoarichi mochikameo, napati waꞌachitia tatakorikame tetewamepua, pukaepa Riosia, ahpo Taana Eesusichi paparaka eꞌenasoopua, ahpo tatakoriria cheriwepuawichio itakao, napatika waꞌachitia cheriwemeripua puꞌkao.
\p
\v 33 ¡Teesana tahpitika tiiamepu Riosi inatariraa! ¡Ki nuꞌuti peeneka inatamepua, ki nuꞌutipua tiameo, pahteniamechiopua! Riosi iintonariaa aaataai ki naneꞌreporitepua, ihtaoi peeneka inataopua.
\v 34 ¿Aatana ahsepaka inatata Apoe Paamiraopua, inatao? ¿Aatana tuuyeme tiiarepua Riosi inatao?
\v 35 ¿Aatana itapiti rewetare Riosio, Riosio ahpo wikirieko tuupuaichiopua?
\v 36 Aaataaiopua. Yooma ihta itapiti iintuameo, apoekamerache iinuwarakopapua. Waꞌa teesoo, apoe iinuwaraa, apoewichiopua. Teemea, kihta iinuekaitepua, itapiti kiapuaiopua Riosio, yooma itapitio Riosi iinuwarao, apoe enepateriamekopua. Yooma Riosi enepateriaa, apoe ahjaemichiopua. Pukaepa neeea Riosiwichioo, teꞌta weruma nayewajeraninia, ahkasi ki wahjiame taawechisi. Waꞌa teeresaa kaawe enemapua.
\c 12
\s Riosiwichioche yasitoniame
\p
\v 1 Pukaepa eeme noꞌo Riosichi tetejimao, Riosichi aamo oowewachitia teꞌterejeraninia, Riosichio aamoo, kaawe eraniamechitia. Puuu waꞌa teeka mochitoniamea, Riosi ki nuꞌuti iyoriniamekaitepua.
\v 2 Kaꞌte iꞌka weeechi mochikamechitia inatamitia eemea, ohso kaawe kaawerumara inataka mochitopuapua, Riosikamera kaaweche wichiya. Waꞌa teeka mochitosaa eemea, Riosi eꞌrachitia mochitomapua. Waꞌa teeka mochitosaa tiameo, teꞌta kaaweruma enemeri aamo mochitowaa.
\p
\v 3 Riosio ahpo noꞌo tesiweka weerariopao, aamo kaawe eꞌraka chaaninia, ki aaata epeche erakoka mochitomichioopua. Napati aamo tetewika mochitopuapua, iꞌka Riosi tehkiwa nokisikaopua, yooma eeme pipiripi ahkao.
\v 4 Yooma eemea, piiripi weerewachitia teꞌtiamepua Riosichio, iꞌka Riosi weerewachio muuwaeme teemea. Yooma pipiripi teemea Riosieo, itapiti yeꞌkari pepenewa kiatiamepua, taamo ihta yeꞌkari kiatiameopua pepenewa, pukae taamo nokisimichioopua, ihtaoi Riosichi tehkiwao.
\v 5 Muuwaemekai teemea, Riosie Weratiame weerewachio, piiripi waꞌapi weerewakaite teemea. Piiripi weerewakapa teemea, yooma apochi ihcheka mochitoamekate teemea, teemea waꞌatiao, napati waꞌachitia ahpo kuꞌwipuawichioopua.
\p
\v 6 Waꞌa teesoo, yoomahka Riosie kiatiamekapaopua, yooma ihta yeꞌkari taamo nokisimichioo, puꞌkakamera yooraka mochitotariapua naaju. Riosi tuuyewarichi simiyame yeꞌkame enesaamua, peeneka nayewapuamua Riosichi aamo paparae oowe eꞌraka, ahkaoi aamo masitiachio.
\v 7 Wahjachi kuꞌiwa yeꞌkame enesaamua, kaawe eꞌraka kuꞌipuapua puꞌkao; masiteniame yeꞌkame enesaamua, peeneka masitepuapua;
\v 8 oowe erapatewa yeꞌkame enesaamua, oowe erapatewa tekipanapuapua. Ihkokeka puꞌseriame enesaamua, kaawe eꞌraka ihkokepuapua. Tesiwe eꞌreniame yeꞌkame enesaamua, kaawe eꞌraka tesiwa eꞌraka kuꞌipuapua.
\s Riosie Weratiamechi, teꞌteriamechitia mochitoniame
\p
\v 9 Pichiwaka aamo nakimitia ahpoo. Naꞌarario, nekuchemitiapua, kaawerumache chapitoka mochitopuapua.
\v 10 Yooma aamo teꞌta nakika mochitópuapua, Riosichi poponichitia, pipinichitia tiamé. Teꞌta yoorewie teteipuapua ahpoo, epeche kaaweruma eꞌraka ahpo piirechio, napati ahpoo waꞌachitia.
\p
\v 11 Ihta aamo yoorachioi utewaeme tiiame teetopuapua. Amochioi tiameo, amochi kahtiame tetewitepuapua Riosi Riosiwari. Riosiche ihsiweka mochitopuapua, ki aaata waꞌasi.
\p
\v 12 Peenia erakoka mochitopuapua, piie taawechi ahkao, teꞌta Paamira ahjama mochimiapa. Aiwaka mochikaio, kaꞌte yaapi erakomitiapua. Riosichi aamo paparaoi, senepi yooraka mochitopuapua puꞌkao, ahjachi itaka.
\p
\v 13 Aaata Riosie piipatetiameo, tesiwa tiiame enesoopua itapiti nakiwachio, kuꞌipuapua puꞌkao. Aamo taꞌpechi asiyameoi, kaawe eꞌraka asipupuapua.
\p
\v 14 Aamo ki kaawe yoorameo, kaꞌchi chaanepuapua, kaawe yorapuapua ohso kaawe.
\p
\v 15 Aaata teꞌta peenia erasoo, ahjama peenia erakopuapua; aaata yuuwesisoo, yuuwesipuapua tiame amochioi.
\p
\v 16 Eemea amochio, kaawe aamo ahpo erakoka uumitiapua. Kaꞌte weruma aamo uumitiapua aaatachioi, tesiwa teꞌtiameo kaawe uuka nayewepuapua, kihta epeche eꞌraka.
\p
\v 17 Naꞌaretiai muuua, kaꞌte waꞌachitia naꞌare muuuai. Itapiti yoorai, kaawe aamo neesetoka ihsipuapua, aamoo, kaawe ihsiame teteipuawichiopua.
\v 18 Aamo wahjachi kaawe teerewao, kihta aꞌchi tiame ihsika yasitopuapua, aaataoi.
\v 19 Kaꞌte aamo ki kaawe iintotiameo, waꞌachi yooraka natetetemua, ohso kaawe Riosikamera tooepuapua puꞌkao, apoe Teꞌpa Kahtiame taamo Noono ihsimichiopua puꞌkao, teꞌyakao. Waꞌa teeremeri eemea, Ehkoriami Iyoterichi Riosio chiiamekopua: “Aaata aamo naꞌara iintokameo, neee natetetemapua iintoriao; waꞌa chaani Teꞌta Paamiraa.”
\v 20 Pirenachi Iyoterichio chaanipua: “Aaata aamo seepurawaoi chorowasoo, koꞌkotepuapua; aaataoi paramusoopua, nerojitepuapua. Waꞌa aamo iintosoopua, suuwe erapatemamua puꞌkao, ki nuꞌuti tataretemamua pukachio.”
\v 21 Kaꞌte aamo tooa naꞌarari aamo yuumpamichioo, ohso kaawe muuukamera newitopuapua naꞌarario, aamo kaawerumachee ihsia.
\c 13
\p
\v 1 Ihta yaꞌyawichituniameo, ihta paꞌpamiratuniameopua tiameo, yooreka mochitoniamepua puꞌkao, puꞌka yawichituniameo paamiratuniaopua tiameo, Riosie waꞌa teewetiamekopua puꞌkao. Yooma yaꞌyawichi ajawatiameo, paꞌpamiratuameopua tiameo, Riosie reesisetiame puuua, eꞌwewari teereniameopua tiameo.
\v 2 Pukaepa puꞌka eꞌwawari ki yoorekamea, Riosikamera ki eꞌwekai noonoikamepua, waꞌa tiiame eꞌwewa yahcharia Riosia, puꞌka paꞌpamiratuame eꞌwepuawichio eꞌraria puuua. Waꞌa tiiachiopua yooma aaata ki yoorekamea puꞌka paꞌpamira eꞌwewario, puꞌka waꞌapi eꞌwewari kokosarira saaemeripua.
\v 3 Aaata kihta ki kaaweruma nokaka mochikamea, kihta seewemetepua iꞌka nuurari neesetoameopua, aaataoipua, paꞌpamiratuameo, yaꞌyawichituameoipua. Nape ki kaawe nokaka mochikamea, seewemete puuua iꞌka eꞌwewa iinuemeo, puꞌkaoi iinuemekopapua puꞌka nuurarie kokosamio. Pukaepa aaata ki majaka yasitonariamea iꞌka paꞌpamiratuame eꞌwewario, eꞌwekache yasitometepua iꞌka eꞌwewari iinueme paꞌpamiratuameo, kihta ki kaaweruma ihsikaopua. Waꞌa teeka yasitosaamua, kaawerumachitia tetewipuamemua, yaꞌyawichieopua.
\v 4 Aaata yoorewi yachatiamea, aamo taꞌiria yasimichio yachatiame puuua, Riosi nakiyachitia yooreka. Aaata ki yooreka mochitoameapua puꞌka yoorewa neesetoameo, seeweka tetewimetepua puꞌkao, puꞌka aaata yachatiameopua yoorepuawichioo, ki oowera kusiwaeka yachatiamekopua puꞌkao. Ihji aaata yoorepuawichio yachatiamea, Riosi seekaerachitia ihsiamekopua, ki kaaweruma iintokameo, wepimichio yachatiamepua.
\v 5 Pukaepa teemea puꞌka eꞌwewari neesetoao, yooreka mochitometepua, nape ki taamo kokosapuameche seewekao, taamoe waꞌapioi naneꞌriapa Riosio, puꞌka eꞌwewari eꞌweka mochitojeriopa.
\v 6 Pukaepa teemea tiameo, yawichi koparoari nateteka mochitoamepua, pukae natetepuaichiopua yoorewa inatiameo.
\p
\v 7 Yooma ihtawichio yawichi koparoawaa, natetepuamepua, teꞌta yaꞌyawichiwichio, ki teꞌta yawichiwichooi, nuꞌnunti teesa yaꞌyawichiopua tiame. Waꞌachitia weruma yooreka tetewipuamepua tiameo, yooma pipiripi puꞌkao.
\v 8 Kaꞌte ihta aaata wikirieka yasitomitiamua, naaticheape, aaata aamo nakirewache. Waꞌa teereka yasitoame enesaamua, yooma Riosi nuurari yorajera ihsiame enemerimua.
\v 9 Riosi nuurari nokipuamea, eee chiiamepua: “Kaꞌte suwepori nokimitiapua, kaꞌte merimitiapua, kaꞌte ichikomitia, kaꞌte ikotu.” Iintusoo pehji ihta yoorepuameo, ihji noꞌo aamo chaanemiaa, yooma ahsepari iyoriwa iintoniamepua: “Aamo piirechio, aamochitia nakimitiapua.”
\v 10 Aaata ahpo piirechi kaaweruma nakika yasitoamea, kihta naꞌara ihsiamepua aaataoi. Waꞌa teeka yasitoniamea, kaawe yooreka yasitoamepua Riosi nuurario.
\p
\v 11 Yooma iꞌka noꞌo cheeriaeo, taamo newipuapuachiche inatapuapua, ehpe taawechiamiopua waꞌasio, puꞌka taamo newipatepuao, epeche waapi teetoamekopua puꞌkao, ki pukeri taamo paparariachitiaopua, Riosie Weratiamechio.
\v 12 Iꞌka weeechi tukaparia, uꞌmatona puuuapa, weemera taajenari asinapua. Pukaepa teꞌta toaka mochitomete teemea, ki kaawe nokiwao, yooma puꞌka tukapachi ki kaaweruma nokisiniameo. Ohso kaawe kaꞌkarumachikamera mochitoniachi kaawe enemiipua, Riosi uutaparichi, taamo Riosi neesetorae wakiraetoka.
\v 13 Iꞌka Riosi taajenarichio eemea, kaꞌkarumache yooraka mochitopuapua, kihta naꞌarari, kihta nawajika, kihta pahkotawa nawajika, kihta suwepori nokaka, kihta nekumewa erakoka aaatachioi, kihta ikotuwa aaata iinueka.
\v 14 Ohso kaawe eemea, Riosie Weratiame eꞌrache wakiraeka teetopuapua, ki aamo newitopuawichiopua naꞌarari taꞌirewaeo.
\c 14
\s Kaꞌte ki kaawe chaanemitia aamo Riosichi poponiwao, pipiniwao tiameo
\p
\v 1 Aaata weemera Eesusichi paparakameo pehjio, aamo taꞌpechi asisoo, kaawe eꞌraka uuka tetewipuapua puꞌkao. Kaꞌkaruma Riosichi puꞌserewa nayewepuapua puꞌka ahjamao, kihta nayewepuapua itapiti iyoriwachi simiyameo, Riosichi kaawe teꞌterepuawichio nokiwamechitia, itapiti kooame aaata Riosichi paparameo, ki koꞌiniamechitia.
\v 2 Iintuame teemea Riosichi paparamea, saꞌpa koayame ki saꞌpa koayame tiame. Iintuamepua tiameo, yooma ihta kooame puꞌseriame koaka.
\v 3 Yooma ihta kooame koayamea, kihta chaanemetepua ki saꞌpa koayameo. Ki yooma ihta kooame koayameai, kihta chaanemetepua puꞌka yooma kooame koayameoi, Riosio puꞌkao, waꞌa teꞌtereoi puꞌkao, napati uukamekopua.
\v 4 Teeme Riosichi paparamea, kihta naꞌara chaanemetepua aaata tamochitia Riosichi paparameo. Taamo Noono tewekachi teꞌta Paamirakamera chanimetepua aaatao, kaawe ihsiame enesoo, ki kaawe ihsiame enesoooi.
\p
\v 5 Iintuame aaata Riosichi paparamea erakoame, iintuamekopua taawe, Riosiwichio iyoripuachi yachatiame. Iinuamepua tiame, ki yahchame piiripioipua taawe Riosiwichio iyoripuachio, ihta taaweoi napati tetewamepua waꞌachi tiiamekopua. Yooma pipiripi Riosichi paparamea, iinuemepua ahpo iintome tiiao, ihta taawechi Riosi iyoripuachi ahpo yachamiao.
\v 6 Aaata piie taawe poanatakamea, Riosichi iyorinariapa waꞌa iintokamepua; aaata ki ihta taawe poanatakameai, Riosichi iyoriwa ihsiame puuuai. Waꞌachitia aaata yooma kooame koayameai, Riosi cheriwema kiꞌyaka koayame enesaapua, Riosi iyoriwa ihsiame puuuai. Piire Aaata ki saꞌpa koayamea, Riosi iyoriwa waꞌa tiiame enesaa, kaawe tiiamepua puuuai, Riosichio, senepi koꞌkomiaoi, Riosi cheriwema kiꞌyamekapapua.
\p
\v 7 Waꞌa tiiachipao yooma teeme Riosichi paparamea, ki aaata aꞌchi chaaneka mochitometepua, ohso kaawe kaawe eꞌreka taamo kuꞌimete teemea, aaatawichio tiame inataka, ki taamochewichio. Waꞌa teꞌteremeri teemea, iꞌwa weeechi ahjaka mochikaio, wahjipakaiopua, teꞌpa taamo Noono tewekachi kahtiame, teꞌta ijinuwarakapa.
\v 8 Pukaepa teemea, iiweta ahjaka mochikaapua pehjio, yooma taamo ihsiwaa, taamo Paamira Eesusiwichio enemeripua. Teemea wahjipakaio, Riosi ahjama mochimeripua. Waꞌa tiiachiopua, yooma teeme Riosichi teꞌteriameo, mukukaio, ahjaka mochitoaiopua pehjio, taamo Paamirakamera ijinuwara teemea.
\v 9 Apoe Eesusi Riosie Weratiame mukukai eenechi oijenakamekapapua, taamo tewekachi teꞌta Paamirawa enepakamepua, yooma ahjaka mochitoameopua pukachi paparaka, yooma wahjipakameopua tiameo, pukachi Paamira paparakameo.
\p
\v 10 Waꞌa teeresoo taamo Paamirao, ¿achini iikai teꞌyamemua aamo poponio aamo pipinioiopua tiameo? ¿Ki naneꞌriamekosa eemea, taamo nekakoka mochitosoo Apoe taamo Paamirakamerakopua taamo terimeriopua, kajuyachi taawechio Riosi katewiachio, Eesusichi taamo ki kaawe noonowiria taamo iinatukenioiopua?
\v 11 Ehkoriami Iyoterichio, Apoe taamo Paamiraa eee chiiamepua:
\q Noꞌo teꞌta ahjachitia pichiwario chiiamenia,
\q2 yomatiame tiꞌtijoea ooweru tiamea,
\q2 noꞌo chopokorieka ajapamerikopua,
\q2 yooma noochi tuukaopua, ahpoo kiisi kaawe nokariao.
\q1 Waꞌa noonoikaopua ki nuꞌuti iyoriwa noonoimapua Riosichio,
\q2 teꞌta naneꞌrekapa aatanakoopua noꞌoo.
\p
\v 12 Waika taawechio teemea, yooma taamo ki kaꞌkaruma nokaka mochitoriao, yooma tuumeripua puꞌkao, taamo Paamira Riosio. \fig |181-cn01886B.tiF|col|||Eesusia, Riosi teꞌta kateweri taawechio, yomatiame tiꞌtijoeri taamo ketewemeripua.|14:12\fig*
\s Kaꞌte ki kaꞌkarumachi motochite aamo Riosichi poponio aamo Riosichi pipinioi
\p
\v 13 Waꞌa tiachipao, kihta chaachapamete teemea waꞌasi taamo piirechio, ihta ki kaawe ihsio tuukaopua. Ohso kaawe aamokamera kaawe aamo neesetopuapua, ki aaata aamo Riosichi pooniwao piiniwaoi aamo sewina erapatemichiopua ki Riosichio. Kaꞌte sewina erapateme tiame iintomitiamua, waꞌachi iintonaremakoipua, waꞌa ihsiame aamo tetewapaopua.
\v 14 Naneꞌriamenia noochio, ihta kooameoi kaꞌchi tiiamekopua Riosiwichioo, puuu kooame Riosiwichio iyoriniamea, apoe waꞌa erakoapa nokayamepua. Nape puuu Riosi iyorika, ki koꞌkopuame eꞌrameopua ihta kooameo, apoeche ki koꞌkome waꞌa eꞌramepua.
\v 15 Aaata poponiwa ki saꞌpa ki koayame ahjama yasipasaa koꞌkomia, kaꞌchi eramichiopua puꞌkao, muuuai ki koꞌkometepua saꞌpao. Koꞌkosaamua saꞌpao waikao, ki Riosi nakiwari iinuemapua. Ohso kaawe kihta yorapuapua waꞌa tiameo, aaata Riosie Weratiamechi paparario saꞌrume tiiameo, puꞌka waꞌa tiiame Riosichi pooni piinioi newipatepuawichio, mukukame Riosie Weratiamea.
\v 16 Pukaepa kaawe aamo neesetomitiapua, ki aaata aamo Riosichi poponi pipinioi, ki kaawe aamo ihsio erakomichiopua, aamoopua seenekachio, kaawe ihsio eꞌroio.
\v 17 Taamo Riosi yeꞌkarichi mochipuamea, ki kooame iyoriwae puuua, ihtaoi iijiwaai. Teemea Riosi yeꞌkarichi taamo mochimiaawichio, Riosi Riosiwarie teꞌta piipari teꞌtereniamepua, taamo iikachio Riosie taꞌiria yasitowa tiame, pukaepa tísia kaawe erakoame teemea.
\v 18 Waꞌa teeka ohjoresaa Eesusichio, kaawe tetewipuame teemea Riosieo, tiꞌtijoeeopua tiame.
\p
\v 19 Waꞌa teeresoo pirena nokisitariapua naaju, teꞌta taꞌiria mochitowa iꞌyasikache, epeche Eesusichi oowe erapasikaopua.
\v 20 Ki naꞌatamete teemea taamo kaawe uuka Riosichi pirenaturiao, oowera kooamechi simiyame, nekakome chaachapakao. Yooma kooamea kaawerumapua, naatiche ki kaawerumapua, aaata koaya kooame, puꞌka tetewachi koiꞌwame. Waꞌa aamo ihsisoo, naꞌatamerikoimua aamo Riosichi pooniwa Riosichi teerewaopua, aamo pipiniwaoipua Riosichi kaawe teerewaopua tiame.
\v 21 Ohso kaawe kihta koiꞌwa kaawepua, Eesusichi paparaniameo, saꞌruname tiiameo, ihtoiopua itapiti iijiwaoi, itapiti ihsiwaoi, Riosichi kaawe teerewa einatameopua.
\v 22 Aamo kaawe ihsio eꞌraopua Riosichio, aamo Riosimache naneꞌreka yasitometepua puꞌkao. Kaawe teetoka ohjoemea, ahpo inatario kaawe yasito tuuyoo, taꞌiria yasitomeripua.
\v 23 Nape ki kaawe ahpo ihsio eꞌraka koayamea, Riosi Riosiwari waꞌa eratiamepua puꞌkao, waꞌa eꞌraka koayamea, ahpo eꞌrae tatakoriamepua. Yooma aaata ki eꞌwiamea, Riosi Riosiwarie ahpo inatarichi tuuyeniao, tatakoriniamepua.
\c 15
\s Aamo piirechikamera kaawe eratemitiamua, ki aamo waꞌapikamera
\p
\v 1 Teemea, pewatiame mochikameapa Riosichi paparakao, ki ikanati taamochitia tiiame, enepatejeramete teemea, puꞌka weemera Eesusichi paparakameopua. Teesa tiame masitepuapua puꞌkao muuenati, ki ikanati tamochi tiiame enepatenareka.
\v 2 Yooma teemea taamo wahjachikamerao, aachin teeka kuꞌimichio ahpo kaawe teerewa Riosichio, iꞌyameri teemea.
\v 3 Riosie Weratiameai, ki ahpo taꞌiria wichiya iꞌyakamepua, Ehkoriami Iyoterichio waꞌa chiiamekopa: “Yooma aamo naꞌaretiameo, noochikamera saaetekamenia.”
\v 4 Yooma puuu Ehkoriami chaachapatiame Iyoterichio, taamowichio iyotetiamepua, pukachi neꞌnetoka teetopuawichiopua, pewatiame nokisika Riosichi. Puꞌka Ehkoriami Iyoterichi chiiai, taamo kaawe erapasimichiopua, ahkasi asiyachisi Riosie Weratiameo, taamo puuyeka mochitoao.
\v 5 Aamoonia, puꞌka Riosie aamo utewa kiꞌyaeo, aamo weemuwaeopua tiameo, aamo kuꞌijeraninia aamoo, kaawe ahpo nakika mochitomichiopua, piiripichitia mochitoka Riosie Weratiamechiopua, Eesusikamera naꞌnaritokaopua.
\v 6 Waꞌatia piiripichitia mochitosaa eemea Riosichio, yoomahka piiripichitia, peenia tiiame nayewame enema eemea Riosichio, taamo Paamira Eesusi Noonorachiopua.
\s Riosi kaaweruma tuuwewari ki iꞌisaeri tiꞌtijoechi nayewatunia
\p
\v 7 Pukaepa kaawe aamo uuka tetewipuapua, Riosie Weratiame aamo uuka tetewachitia. Waꞌa teeka aamo mochitosoopua, tísia kaawe eratema eemea Riosio.
\v 8 Eesusi Riosie Weratiamea, iꞌisaeri tiꞌtijoeri tuuyemia eenakamepua, Riosi iintomo tuuria pichiwatamia, Riosi iꞌisaeri ehkoriami noonoriwara, iintokemo tuuria.
\v 9 Ihji Riosie Weratiamea ki isaeri tiꞌtijoerichi eenakamepua tiameo, naneꞌremichiopua puꞌkaopua tiameo, ahpo tatakoririao choꞌwepuamekopua, Eesusichi paparasoo. Waꞌa iintoketiaapua Eesusie Riosi eꞌrariaeo ki iꞌisaeri tiꞌtijoeria, weruma kaawe eꞌrewa nayewamapua Riosio. Pukaepa Eesusia ki iꞌisaeri tiꞌtijoeri eenakamepua, ahpo tewekachi kahtiame Noonochi nayewemiapua, teꞌta Ehkoriami Iyoterichio, chiiachitia:
\q Neeea aamo noꞌo Noonoo tewekachi kahtiameo,
\q2 ki iꞌisaeri tiꞌtijoerichio,
\q2 tísia kaaweruma aamo nayewamania;
\q2 weruma teꞌta kaaweruma aamo wikatamania,
\q2 ki iꞌisaeri tiꞌtijoerichio.
\p
\v 10 Pirenachia Iyoterichio ki iꞌisaeri naewakaopua tiameo, chaanipua tiame:
\q Eemea ki iꞌisaeri tiꞌtijoeria tiamea,
\q2 iꞌisaeri teꞌta Riosichi paparakame ahjamao, peenia erakomeripua.
\p
\v 11 Pirenachi Iyoterichiopua tiameo, ki iꞌisaeri nayewakao, chaanipua tiame:
\q Yomatiame tiꞌtijoeturi wehjoarichi mochikamea,
\q2 kaawerumako tuuka nayewamitiapua Riosio;
\q2 yoomachi weeechi mochikameapua Riosio,
\q2 teꞌta weruma tiiame nayewamitiapua puꞌkao.
\p
\v 12 Sewinachi ihji Ehkoriami Iyoterichiopua tiameo, Isaiatarua waꞌachi cheeriamepua, eee cheekao:
\q Isai naawaraa uuyameripua,
\q2 Isai tewaniame tetejimarisiwachio,
\q2 aaata naawameripua,
\q2 yomatiame wehjoarichio,
\q2 teꞌta weruma yawichichitia yasipameri.
\q Waikao yomatiame weeechi mochikamea,
\q2 pukachi paparaka ahpo newipatepuame inatameripua,
\q2 ahpo tatakoriria cheriweka choꞌwepuawichioopua.
\p
\v 13 Puuu Riosi aamo puuyetoka mochitoame kiꞌyamisi, aamo peenia eratejeraninia iikachio, taꞌiria yasimichiopua, aamo Eesusichi ahjachi paparaka mochitoiopua. Riosi Riosiwaria iꞌwa weeechi aamo mochikoiopua pehjio aamo kuꞌisiamepua, aamo ahjachi erakoka puuyetomichiopua ahkasi aamo Noono tewekachi kahtiame ahjama, aamo ohjoepachisiopua, ahkasi ki wahjiamesi.
\p
\v 14 Neee Paoroa waꞌa mochikame noꞌo poponiwario pipiniwari tiameo, ahsieme amochi eꞌramenia, kaꞌkarumache erakoamekoopa, tísia machiyamekopua Riosichi simiyameo; eemea aamo waꞌapi pepeniame ahpo tuuyeka mochitopuameopua kaawe teꞌteretopuameopua Riosichio, teꞌta Riosi nakiyachitiao.
\v 15 Nape neeea aamoo, waꞌa aamo teꞌteriameko eꞌraiopua waꞌasio, nape ki natakepamichiopua aamoo, epeche maꞌchiame iyotekamenia iꞌka iyojurachio.
\v 16 Neeea aamo ki iꞌisaeri tiꞌtijoewichio, Eesusie weratiamenia amochi uꞌyepamichiopua Riosie kaaweruma tuuyewari aamo tuuyemichiopua. Neeea puꞌka tuuyewari yooraka amochi yasitoamepua, puꞌka tuuyewarichi aamo pichikeriaopua, taamo Noono tewekachi kahtiamechi maꞌchitasimichiopua, itapiti Riosiwichio kaawe eꞌrewa oowewarichitia, taamo Noono Riosiwarie waꞌapi piipatetiame.
\p
\v 17 Aamoo Riosie Weratiamechi aamo eꞌenariopao, tísia kaawe eꞌrame neeea, noꞌo tekipanaka ihsiriaopua amochio, tísia kaawe teereka itipimerikopua Riosichio.
\v 18 Ki noꞌo yoorariakamera oijerawanariamenia, ohso kaawe Riosie Weratiame iintoriakamera noꞌoe, oijerawamenia, yooma puꞌka ki iꞌisaeri tiꞌtijoechio noꞌo iintoriaopua, nayeweriaopua tiameo, Riosikamera eꞌwepuawichioo.
\v 19 Neeea Eerusareni oꞌinia ahkasi Iiririko weeechisi oikamepua, yooma ahsieme nayewesika Riosie Weratiamechi simiyameo, yooma waꞌamio Riosi Riosiwarie Eesusichi oowe erapatekao, yooma Riosi chiiao ki maaenarie pichiwatakao, yooma ihta kokoriame sautesiwae.
\v 20 Waꞌa siimo orapakania, ki aaata naewaturiachi, Eesusichi naewaniameopua pehjio. Neeea ki siminarekapua Eesusichi simiyame machitiachiopua waꞌasio, ki piirechi tekipanariachi ihsinariapa, eenechi aampachio.
\v 21 Noꞌo waꞌa nayewariaa, Ehkoriami Iyoterichio, eee chiiapua:
\q Puꞌka aaata ki naneꞌretiame pehjio, nayewapuamepua;
\q Puꞌkao, kaꞌchitia taawechi ahpo nayeweretia pukachi simiyameo,
\q pahtepuamepua pukachi simiyame ahpo nayeweretio.
\s Paoroa Rooma muuwarichi siimo oꞌrani
\p
\v 22 Neeea puꞌka aaata Eesusi tewaniame ki machiwachi pehji oiyapa nayewatukao, kaꞌchi iika siime teerekamenia aamo neꞌnemiao, ki ehpesi oꞌinia waꞌa siimo eꞌraka weritoai.
\v 23 Nape ehpeo yooma kajukapania noꞌo tehkio, ki nakiwiamekapa waꞌasi wahjachi ohjoriachi naewatupuao, ehpeope siimo oꞌrane aamo neꞌnemiao.
\v 24 Waꞌami uꞌmatosimo oꞌrane Ehpanya simiyaio. Waꞌa aamo mochikachi noꞌo asisoopua, taꞌiria naewapuawichiopua paikapi taaweoi, waꞌa ikisao Ehpanyami uꞌmatomo eꞌramenia, itapiti aamo kuꞌiwae.
\v 25 Nape ehpeonia pehjio, Eerusareni simiyamenia, itapiti kuꞌiwa iꞌyetoka Eerusareni mochikame tísia tooremuame, Riosichi poponiwao, pipiniwaopua tiamé, noꞌo oiriachi Riosichi poponiwa, toomi naꞌpoaria iꞌyetoka.
\v 26 Ihji kuꞌiwa noꞌo iꞌtoaa, yooma Eerusareni Eesusichi paparamewichiopua, poponiwa pipiniwaopua tiame, waꞌa Maseroniami Aakayaami tiame mochikameo, ahpo kaawe eꞌrachi naꞌpoasa uhjureria.
\v 27 Puuua, ahpo kaawe eꞌrachi ihkokekamepua puꞌkao, kaawe noonoikamekopua Eerusareni mochikameo, iꞌisaeri naewaturaeo, Riosi kaaweruma tuuyewari ahpo kipoteriopa, ahpo mochikachiami uꞌyepakao.
\v 28 Neeea Eerusareni toowesapa iꞌka noꞌo iꞌyetoa kuꞌiwao, waꞌa oꞌiniao Ehpanyami siimania. Waꞌami simiyaio aamo ohjoekachi asisimania.
\v 29 Noꞌo waꞌa Rooma aamo ohjoekachi asisoopa, tísia ahjachi eꞌramenia Riosie Weratiamechio, noꞌo kuꞌimerikopua apoeo, aachin cheeka noꞌo nayewamichioopua Eerusareni Riosichi paparameo, aamo tísia kaawe erakoka cheriwema kiꞌyao, yooma tísia kaawe noonoikamewichioopua, ahpo kuꞌiwa uhjuretiao.
\p
\v 30 Riosichi poponiwao pipiniraopua tiameo, noꞌo neesetowa itajerenania Riosichio. Aamoo itanenania tiameo, noꞌo ahjama enepamichio Riosi tehkiwachio, Riosie Weratiamechi mochitopuawichiopua, Riosi Riosiwari nakiwarie taamo kiꞌyae.
\v 31 Noꞌowichioo, Riosichi itapuapua tiame, puꞌka Uurea mochikame iꞌisaerio, ki Riosie Weratiame paparameopua, kaꞌchi noꞌo yoramichiopua. Itapuapua Riosichio tiameo, puꞌka kuꞌiwa noꞌo iꞌtoao kaawe eꞌraka uupuaichiopua, Eerusareni mochikameeo, poponiwao pipiniwaopua tiameo, Eesusichi paparaka mochitoameo.
\v 32 Itamitia tiame Riosio, kaawe eꞌraka noꞌo asimichio aamo mochikachioi, kaawe eꞌraka noꞌo resipumichiopua waꞌao, waꞌa noꞌo enasoopua, kaawe erakoka puꞌseriapuaichiopua waꞌao.
\v 33 Taꞌiria mochijeraninia aamo iikachio, Riosichi kaawe erakokaopua aamo tatakoriria cheriwekamekoopua. Waꞌa teeresa naaju.
\c 16
\s Pipiripi tuuwika teepoteniame
\p
\v 1 Aaata ooitiame Eewe tewaniamea, kuꞌwe siminariamepua waꞌa aamo mochikachio. Puuu oowitiamea, kaaweruma piinirapua Riosichio, tísia kaawe teeka tekipanakame, Senkeréa tiopachio.
\v 2 Kaawe uuka asitepuapua puꞌkao, aamo mochikachi asisoo, teꞌta Riosie Weratiamechi paparamechitia. Kaawe kuꞌipuapua puꞌkao yooma ihta nakiyae, ki ookapi kuꞌikamekopua puꞌkao, ahkasi noꞌooiopua tiame.
\p
\v 3 Noꞌo teepotekemitia waꞌa mochikameo, Aakira, Pirihkaopua tiame Aakira uupira waꞌapi, puuu naꞌpaa, noꞌo ahjama tekipanakamepua, noꞌoo Eesusi Riosie Weratiamechi simiyame masitioio.
\v 4 Puuu ookaa, tísia ahpo maaporichi teꞌteretokamepua noꞌowichioo. Puꞌka noonoiria noꞌowichioo, cheriwema kiꞌyaninia puꞌkao, yooma waꞌami ki iꞌisaeri tiꞌtiopachi mochikameopua tiame, cheriwema kiꞌyamenia tiame puꞌkao.
\v 5 Noꞌo teepotekemitia tiame, Aakira, Pirihka taꞌperachi nanapawiame, Eesusichi paparame. Epeneto tewaniame teepotemitia tiame, Aasia weeechi ohjoeme, puuupua pahchakamera paparakame Eesusichio.
\v 6 Maaria teepotemitia tiame, aamowichioo tísia tekipanakame.
\v 7 Teepotemitia tiame Aanroniko, Uunia tewaniame tiame, puuu naꞌpa noꞌo perekarichi kahtioio, noꞌo ahjama mochiriame. Puuua, weeweruma tiꞌtijoepua Riosie Weratiamechio, keꞌchu noꞌo Eesusichi paparoio, Eesusichi paparakame.
\p
\v 8 Naati teepotemitiapua tiameo, Aampiasi tewaniame, noꞌo Paamira Eesusichio, ki teesa nakiwame.
\v 9 Uruwano teepotemitia tiame, puuua taamo ahjamao, Eesusi Riosie Weratiamechi tekipanakame. Ehtaki tewaniame teepotemitia tiamée, noꞌo aaata tísia kaawe eꞌria.
\v 10 Aapere teepotemitia tiame, tísia oowe eꞌriame tetewiniame Riosie Weratiamechio. Teepotepuapua tiameo, Arihtóuro taꞌperachi mochikame.
\v 11 Noꞌo teepotekemitia Erorioni tiame, noꞌo weewachi ohjoeme tijoe. Teepotepuapua tiameo, Naasiso taꞌperachi tetejimara, Eesusi Paamirachi paparame tiame.
\v 12 Naati teepotemitia tiame, Tirijena tewaniame, waꞌa ikisa Tirijosa, naꞌpa puuua, Riosie Weratiamechi tekipanakame. Teepotemitia tiame Peresira, piirechi ooitiame tísia tekipanakame Eesusi Riosie Weratiame Paamirachio.
\v 13 Teepotemitia tiame Ruujo, weruma paparame Riosie Weratiamechi. Puꞌka Ruujo yeeyeraoi teepotemitia tiame, puꞌkaonia noꞌo yeeyechitia tetewa.
\v 14 Yooma iꞌka teepotepuapua tiame: Asinkirito, Perekoni, Erema, Paratowa, Ereme, yooma Eesusichi poponiwa tiame, waꞌa ahjama mochikame.
\v 15 Yooma iꞌka teepotemitia tiame: Iiroroko, Uuria, Neereo tiame piinirama, waꞌa ikisa Oorimpa, yooma waꞌa mochikame tiame ahjama, Eesusichi paparakame.
\p
\v 16 Teepotaio, kaawe ahpo uuka teepotepuapua. Yoomahka iꞌwa tiopachi Eesusichi paparameai, yooma aamo teepotenapua tiame.
\p
\v 17 Kaawe aamo inatepuapua, ki aaata sewina aamo erapatemichiopua noꞌo aamo masiteriao. Kaꞌte keepumitia puꞌkao, seesenu masitiamepua ki kaꞌkaruma.
\v 18 Puuua ahpoche ikotua nokayamepua, ki Riosie Weratiamechi nayewaniame. Ki teꞌta pepeniameopua Eesusichi simiyameo, peenia chaachapaka masiteka wihkuiamepua.
\v 19 Aamo Riosichi kaawe teꞌtereka mochitoao, ahkaoi yomachiami naneꞌreniame eemea. Waꞌa aamo teꞌteriopa neeea tísia kaawe eꞌramepua. Neeea aamoo, waꞌapi aamo teꞌteretojerame neeea, tísia aamo kaawe inatetoka ki aamo ruhjipuawichiopua ki kaꞌkarumachio.
\v 20 Waꞌa aamo teꞌteretosoopua Riosichio, Riosia Satanasio, aamo taarae tekeka weripateka, newitotemapua. Yooma aamoo, Apoe Riosie Weratiame aamo kuꞌijeraninia, aamo taꞌiria mochitomichiopua.
\p
\v 21 Waꞌami teepotenapua tiameo, Timoteo noꞌo ahjama tekipaname. Aamo teepotenapua tiameo, wahjachi noꞌo weewachi tiꞌtijoe: Ruusio, Aasoni, Sosipate tewaniame tiame.
\p
\v 22 Teresio tewaniameai, iꞌka iyojura noꞌo iyoteteriaai, taamo Paamira Eesusie aamo teepotenapua.
\p
\v 23 Aamo teepotenachi Aakayoai, puꞌka taꞌperachi kahtiamekane ehpeo, ahpo taꞌperachi asikoame cheꞌrepatiamekapu puuua, aaata Riosichi paparame iꞌwa asipuameo. Aamo teepotena tiame Eerahto, iꞌwa mochiwachi toomi koparoari katewetoame. Aamo teepotenapua tiame Kuarató, Riosichiopua, taamo pooniwachitia tiiáme.
\p
\v 24 Ehpeonia taamo Paamira Eesusi Riosie Weratiameoo, ki nuꞌuti kaawerumari aamo teewejeraninia.
\s Riosi kaawerumataka nayeweniame
\p
\v 25 Neeea taamo Noono tewekachi kahtiameo, tísia kaawe eꞌriamepua, aamoo utewaeme aamo teetotiopua Eesusi Riosie Weratiamechi simiyame masiteniamechio; puꞌka Eesusichi simiyameo, ehkoriami mochiriameopua, ki tetewiriaopua pehjio,
\v 26 puꞌka ehkoriami mochiriame ki tetewiriao, taamoo ehpiami taawechi tetewika mochitoao, Riosie taamo tetewitetiapa. Ehpeo puuu Riosi ki wahjika kahtiamea, ahpo Taanachi paparamichio paajutenapua, yomatiame wehjoarichi mochikameopua. Waꞌa cheekame taamo Noono tewekachi kahtiamea ahpo ehkoriami naꞌnayewaturachi nayewaka iyotetekao ahpo Ehkoriami Iyotaperichio.
\p
\v 27 Puꞌka taamo Noono tewekachi kahtiameo, ahpoche teꞌta peenewariekameo, yomatiame iꞌka waꞌa iintokamekopapua ahpo Taana Eesusi Riosie Weratiamechio, ki nuꞌuti iyoriwa teerepuamepua, ahkasi ki wahjiamesi waꞌa teꞌteretoka.
\p Waꞌasi kajuyamenia iꞌka iyotaperio. Cheriwema ehpeo noꞌo keepuriawichioo.