\id 1CO
\h Pahcha Koꞌkorintio Iyotepawa
\mt2 Paoro Pahcha Simiyame
\mt Koꞌkorintio
\mt2 Iyotepawa
\c 1
\s Teepotari
\p
\v 1 Kúíraa, aamo Koorintio mochikame Riosichi poponiwa pipiniwa tiame. Paoro neeea yooma aamo teepotiamea, waꞌa Koorintio tiopachi teꞌteretoameopua. Kaꞌkaruma mochikare eemea. Teemea yooma iꞌwa mochikamea, kaꞌkaruma mochiwipua. Neee Paoroa, teꞌpa kahtiame Noꞌno eꞌrarie, weratiame neeea, Eesusi ahpo Taanachi simiyame nayewamichiopua.
\v 2 Pukaepa neeea, Sohtene iyoteraeo, iꞌka iyotesa aamo uhjuramepua yooma aamo Koorintio mochikameopua waꞌa tiopachio, teꞌta Riosie Weratiame iintoriae piipakameo, Riosia aamo ahpo mochiwari iintapariao, kaꞌkaruma apochi mochimichio paaekamepua, yooma aaata wahjachi mochiwarioiopua tiame, ahpo Taana Eesusichi paparakameopua.
\v 3 Neeea yooma amochio, taamo Noono tewekachi kahtiameo, Eesusi apoe Weerariaopua tiameo, tísia teꞌta kaawerumari amochi teerejeraninia.
\s Kaꞌkaruma teꞌterewa Riosichi
\p
\v 4 Neeea tísia cheriwema kiꞌyaka yasitoamenia Riosio, Apoe taamo Noonoo tísia kaawe iintoriopua amochio, aamoo tísia paparariopa Riosi Taanachiopua, Riosie Weratiamechiopua.
\v 5 Pukaepa taamo Noono tewekachi kahtiamea, tísia pahtewa kiꞌyakamepua amochio, maꞌchiame masitemichiopua ahpo tuuyewario, muuwaeme aamo aaataopua, yeꞌkari aamo kiꞌyakamepua tiameo, aamoe waꞌapi ahjae pepenika ahpo kuꞌitopuawichiopua tiopachio, tiopachi teꞌteriameo.
\v 6 Puuu Riosie aamo kiaretia noꞌo aamo masiteria Eesusichi simiyamea, amochi ikikamepua.
\v 7 Waꞌa teꞌteretosa eemea yooma ihta aamo kuꞌisiwaopua nakiwaeo, ahsieme teeretoma eemea aamo yekiyao, Eesusi enamia puuyeka mochitokaopua, apoe Riosie Weratiameopua.
\v 8 Waꞌa teetoka aamo mochitoipua Riosia, aamo piipateka neesetomeri puuua, aamo kaꞌkaruma piipakame mochitomichiopua, ki aaata aamo ki kaawe iintorio tuumichiopua, Eesusi Riosie Weratiame enasoopua iꞌka weeechio.
\v 9 Riosia pichiwa neesetomeri puuua, Riosia kiisi waꞌatia itipiamepua ahpo chiiao, apoe iintokamekapaopua aamo paaekao, pirena mochitopuawichiopua ahpo Taanachio, Riosie Weratiame taamo Paamirachio.
\s Tiopachio poanatuniame
\p
\v 10 Neeea aamo noꞌo Riosichi poponiwa pipiniwaopua tiameo, neeea Riosie Weratiamee naewamea, pirena piiripichitia aamo inataka mochitojeraninia, kihta amochi nekakoka. Ohso kaawe pirena, Riosichiche kaawe inataka mochitopuapua, kaawe ahpo uuka, napati waꞌachitia Eesusichi paparakaopua. Kaꞌte aamo pirenatuka poanatumitiapua, ki napati aamo ahpo waꞌachitia inatakao.
\v 11 Neeea Kooe tewaniame taꞌperachi mochikameeo, aamo nekakoka mochitoameko tuuyetiamenia, ki napati waꞌachitia inataka mochitoamekoo.
\v 12 Eemea poanatunariao, chaachapatapua: “Neeea, Paoro naꞌnaritoamenia”; ookapi wahjachia chaachapatapua: “Aaporokamera naꞌnaritoamenia”; wahjachia chaachapatapua tiameo: “Seeja naꞌnaritoamenia”; aaata wahjachia chaachapatapua tiame: “Neeea Eesusi Riosie Weratiamerakamera naꞌnaritoamenia.”
\v 13 ¿Teꞌta Riosie Weratiame weerewaa, chiꞌwapamekonapua? ¿Paorokosanapu kurusichi mukukamea aamowichioo? ¿Paorochi paparakapa paatotiamekosa eemea naaju?
\v 14 Kaawechupena neeea aamoo, ki aamo paatokamepua aaataoi. Neeea naatiche paatokamepua, Kirihpo tewaniameche, waꞌa ikisa Kaayo tewaniameche tiame.
\v 15 Puꞌkache paatokame neeea, ki aaata noochi paparopa paatorio tuupuaichiopua.
\v 16 Pichiwa paatokamenia tiameo, nape Ehtejana taꞌperachiche. Waꞌasi waanamio, ki aaata naneꞌrenane noꞌo paatoriao.
\v 17 Apoe Riosie Weratiamea, ki noꞌo paatomichio uhjurakamepua. Neeea, Riosi kaꞌkarumache nayewatumiache uhjuratiamenia, nape maꞌchiame nayewaka ki teꞌta peeniamechitia, ki teꞌta machiwari iinuemechitiaopua tiame, maꞌchiame pahtemichiopua tiꞌtijoerio, Riosie Weratiame kurusichi mukuriao, ahpo newipatepuawichio mukuriamekopua.
\s Riosi teꞌta peenewari ahpo Taanachi tetewiteria
\p
\v 18 Eesusi kurusichi mukukame nayewatuwa ki pichikiamea, aꞌachepori tiame tetewamea puꞌkao, kiisi kaawe teꞌteriamepua Riosichio. Waꞌa teꞌtiamekapa puuua, Riosi teꞌta kokosarichi ruhjimeri puuua. Nape teemea taamowichio Eesusi iintorio erakoameopua, Riosi utewarie newipatepuamepua, apoeche iinuekapapua ahpo utewari waꞌa iintomiaopua.
\v 19 Riosia Ehkoriami Iyoterichio cheekamepua:
\q Pepeniwari tiꞌtijoeriopua,
\q2 kihta nateyame iintamania puꞌkao, puꞌka pepeniwarirao.
\q Tiꞌtijoeri teꞌta pahtewaopua,
\q2 kihtawichio kaawekame iintamania puꞌkao,
\q2 ki ahjae noochi kaawe teꞌterepuawichiopua.
\p
\v 20 Waꞌa teesoo tiꞌtijoeri teꞌta pepeniwariraa, ¿ihtana nateka itipitanapua? Aaata teꞌta pahtiameai, ¿ihtanana nateka itipitanapua Riosiwichioo, ahpo teꞌta pahtewarieopua? Riosia puꞌka tiꞌtijoeri teꞌta pepenewario, pahtewariopua tiameo, ki ijinatarichitia tetewamepua puꞌkao, puꞌkao kihta nateyamekopua pukaeo, puꞌka tiꞌtijoeri tatakoriria cheriwepuawichioo.
\v 21 Riosia teꞌta inatamekapaopua, ki toarepua puꞌka tiꞌtijoeri apochi kaawe teꞌterepuawichioo, ahpo erakorieopua. Ohso kaawe ahpo kaaweruma tuuyewarie kaawe teꞌterejerakamepua tiꞌtijoerio, kihta nateyachipua, apochiche pichikesochepua Riosichio. Nape ki ookapi tiꞌtijoeria, ki inatamechitia tetewarepua puꞌka Riosi eꞌrariao, Riosi Taanarachi simiyameopua, Eesusichi.
\p
\v 22 Uurio tiꞌtijoeria\f + \fr 1.22 \ft Iꞌwao Paoroa, Uurio teewaka nayewao, isaeri tiꞌtijoeri waꞌapipua.\f*, Riosi peenia ihsiwache tetewinariamepua, pukae ahpo pichiwatamichiopua Eesusio, pichiwa Riosichi eenakamekopua. Riꞌrieko tiꞌtijoeria ahpo teꞌta pepenewachi naneꞌrenariamepua Eesusio, pichiwa Riosichi oꞌinia eenakamekoopua.
\v 23 Nape teemea Eesusi Riosie Weratiameo, teꞌta Riosichi eenameko tuuyamepua, puꞌka Eesusio taamo nehpupariwichio kurusichi mukukamekoopapua puꞌkao. Muuwaeme iꞌisaeri tiꞌtijoeria, ahpo tísia naꞌaretiachitia tetewamepua Eesusi kurusichi meritiameo, ki pahteriamekapapua ehkoriami iyoterio mukimio Riosie Weratiameo. Muuwaeme riꞌrieko tiꞌtijoeria Eesusi iintoriao, itapiti ki inataka inataniamechitia tetewamepua puꞌkao.
\v 24 Nape aaata isaeri tiꞌtijoeria, rieko tiꞌtijoeria tiameo, Riosi paajutewa apochi uukamea, Eesusi iintoriae ahpo tatakoriria cheriwepuae, teꞌta utewarieme tetewakamepua Riosio, puꞌkao tiameo, teꞌta tísia peenewari iinuekamekopua puꞌkao.
\v 25 Tiꞌtijoeri ki inatarichitia tetewaniamea Riosi iintoriao, ohsotia epeche tísia peeneka iintotiame machenakame puuua, ki yomatiame tiꞌtijoeri pepenewarichitiao; Riosio ki maaewari eꞌreniame utewario, epeche tísia utewariekaitepua, ki tiꞌtijoeri utewarichitia.
\v 26 Waꞌa tiiachipao eemea, kaꞌchi erakomitiapua, kihta pepeniamekaiopua, kihta teꞌta machiwari iinuekaio, kihta weruma teerewaemekaio, ki weruma teꞌtereka tiꞌtijoetukamekai. Riosi paaewachi enaniamea, kihta nakiyamepua yooma waꞌa tiiameo.
\v 27 Riosia taamo ahjachi pichikerioiopua, ki taamo weruma teꞌterewa neꞌneka uukamepua, aꞌchi tiiameoi taamo uukamepua, kihta machiyameoi. Riosia waꞌa iintorepua taamo uukao, teꞌta machiyame tiꞌtijoeriopua suuwe erapamichiopua, puꞌka aapoe ahpo inatarieo, kihtawichio kaawe eneriopua ahpo Riosie uupuameopua. Puꞌka teꞌta weruma teꞌtiame suuwe erapamichioopua, ki weruma teꞌtiameraa uurepua, apochi ahjachi pichikekameopua, waꞌa teekaopua weeweruma teꞌtiameopua, kihta nateyame ahpo naneꞌremichiopua ahpo Riosie uupuameo.
\v 28 Riosia ihpapaka tetewiniakamera apochi uukamepua, kihta nateyamechitia tetewiniame tiꞌtijoeri, puꞌka teꞌta nateyamechitia tiꞌtijoerio, kihta nateyame enepamichio, apochi uupuameopua.
\v 29 Waꞌa tiiachio aaataai ki enamete Riosichio, ahpo kaaweruma tiiae kaawe eratemia Riosio, ahpo kaawe uupuawichioopua.
\v 30 Riosia aamoo, teꞌta ahpo peenewae ahpo Taanachi iintapakamepua, ahpo Taana Weerariachi taamo teꞌteremichiopua, pukae taamoo, teꞌta piipakame itipimichiopua tatakoririao, ahpowichio taamo poanatakapapua, taamo pejana natetekao.
\v 31 Pukaepa: “Aaata ahpo oijeranariamea, Riosichikamera aamo oijerapuapua, puꞌka Riosi iintoriawichioopua aamowichioo”, waꞌa chiiame Ehkoriami Iyoterichio.
\c 2
\s Riosie Weratiame kurusichi meritiame nayewatuwa
\p
\v 1 Pukeri amochi eenakai neeea, kihta teꞌta machiyamechitia aamo nayeweka eenakamenia Riosi tuuyewario, ki aamo eerina erakomichiopua aamo noꞌo pahtemichioo, Riosio teꞌta ahpo peenewae iintomia inatariaopua.
\v 2 Neeea ohso kaawe, tesiwa teeka aamo nayewekame neeea, kiisi tehki eꞌraka pahtemichiopua aamoo, iꞌka Riosie Weratiamechi simiyameopua. Neeea iꞌka Eesusiche aamo pejana meriretia kurusichi, nayewakame neeea, kihta seenu itapiti nayewakamenia pehjio.
\v 3 Neeea ki nuꞌuti chachapia ihsika aamo nayewekamepua, majawia eꞌraka.
\v 4 Aamo Riosichi eꞌenamichio nayewekaio, ki teꞌta peeneka machiyamechitia aamo nayewekamenia, aamo oowe erapamichioopua, Riosichi eꞌenapuao.
\v 5 Waꞌa iintokame neeea, puꞌka aamo Riosichi ahjachi erakoao, ki tiꞌtijoeri pepeniwari machiwarachi eenakame enemichiopua, puꞌka peenewario, ohso kaawe Riosi utewarichikamera eenakame enemichiopua.
\s Riosia Riosiwarie ahpo machitenapua
\p
\v 6 Nape epeche machiyameopua Riosichi simiyameo, waꞌachitia epeche machiwamee, nayewiame teemea puꞌkao, nape ki tiꞌtijoeri maꞌmachiwarichi eename, ki aaata machiwari iꞌka weeechi teꞌta yaꞌyawichichi eenameoiopua, ki yooma taawechi yawichituka mochitoamechiopua.
\v 7 Taamo teꞌta pepenewa machiwari nayewaa, Riosichi eenamepua, apoe Riosikamera taamo masiteria, apoe taamo Noono. Puuu teꞌta machiwaria, taamo Noono iintomo eꞌraria nayewame teemea, ahkasi ehpesiamiopua noriwi teereria, taamowichio iintomiaopua tisiwá peenia tiiame.
\v 8 Nape aaataai ki pahterepua Riosi iintomiao, waika taawechiami paꞌpamiratuamea, puꞌka Riosi iintomia pahtekame enesaa, ki merimiipua taamo teꞌta weruma tiiame Paamirao, teꞌta peenia tiiame teerewaemeopua.
\v 9 Ehkoriami Iyoteria chiiamepua:
\q Riosia yooma ahpokamera nakika mochikameopua,
\q2 aaataai ki naneꞌriamepua Riosio,
\q2 ihtanakoopua ahpowichio iintomia katewetiame iinuekao,
\q1 aaataeoi ki inamuniamepua,
\q2 Riosi iintomo eꞌrariao,
\q2 teesaoi ki inatamepua aaataai,
\q2 Riosi iintomo eꞌrariao.
\p
\v 10 Puꞌka Riosi noriwi teereriachi simiyame, puꞌka taamo tetewiteme Riosia ahpo Riosiwarieo, taamoo aamo masitemichiopua. Puuu Riosi Riosiwarikamera naneꞌriamekapao, ahkasi yooma Riosi inatao.
\p
\v 11 ¿Aatanakamera taamo naneꞌretapu inatao, ki teemeche waꞌapi? Waꞌachi tiame Riosiai apochio, apoeche naneꞌriamepua apochio, apoeche ahpo Riosiwarira.
\v 12 Teemea, Riosi Riosiwari kiatiamepua, ki iꞌka weeechi mochikame inatachitia. Riosia tamochi yahchakamepua ahpo Riosiwario, yooma puꞌka itapiti taamo kiꞌyariaopua pukae naneꞌremichiopua, kaawe taamo teetopuao, apoe taamo eꞌreriachitia.
\v 13 Ki taamoe waꞌapi taamo inatae aamo nayewiame teemea, Riosi Riosiwari kuꞌiwa inatarie aamo nayewiame teemea, Riosichi simiyame masiteka, Riosi Riosiwarichi machename naera.
\p
\v 14 Nape ki Riosi Riosiwari apochi yahchamea, ki teꞌta pahteka inamuamepua ihtaoi Riosichi simiyameo, ki inataniame maayamekapapua puꞌkao. Ki kajuyamepua Riosichi simiyame pahtekao, Riosi Riosiwari kuꞌiwa nakiyamekapapua, teꞌta kaawe pahtemichioopua puꞌkao.
\v 15 Riosi Riosiwari iinuemea apochio, pukae iinuemepua apochio ahjae iꞌyemiaopua pahtewario, ahkasi tísia tehkitiameoipua newitoka Riosichi simiyame; ¿aatanana ki kaawe tiio tuutarepua teꞌta Riosi Riosiwario?
\v 16 ¿“Aatanana ahsepari pahtetapua Riosi inatao? ¿Aatana masitetapua Riosio”?, waꞌa cheeka iinatukiame Ehkoriami Iyoterichio. Nape waꞌa tiioi teemea, tamochi iinueme teemea, Riosi Riosiwari inatariopua, Riosie Weratiame inatao.
\c 3
\s Paoro Riosie Weratiamechi tehkira
\p
\v 1 Neeea poponi pipini tiame, waꞌami uꞌmatoaionia, ki aamo Riosi Riosiwari iinuemechitia naewekamenia aamoo, aamoo oowera tijoechitia inatamekopua pehjio. Ohso kaawe nuꞌnuntichitia aamo masitekamenia Riosi Weratiamechi simiyameo.
\v 2 Neeea aamo masitekao, kohja koaya koiꞌtekameka iintokamenia, aamoo ki koꞌkome tiiamekopaopua, paꞌpamura koayao, weꞌwemerakapa pehjio eemea Riosichio.
\v 3 Waika taawechio aamoo ikotuwa erakoka mochikoio, aamo ahpo nekumeka mochikoiopua tiameo, ki Riosi Riosiwarira iinuemekapa waꞌa nokariame eemea, oowera ki Riosichi teꞌteriamechitia teꞌtereriai eemea.
\v 4 Iiweta aaata eemea, chaachapaka mochisaa: “Paorokamera naꞌnaritoame neeea”, piirea cheesaa: “Aaporo naꞌnaritoame neeea”, ¿ki oowera tiꞌtijoerichitia chaachapanikosa eemea?
\p
\v 5 ¿Aatanana neee Paoroa? ¿Aatanana Aaporoaio? Teemea, oowera Riosie ajawatiamepua, puꞌka aaatae Eesusichi aamo paparariachie, Apoe Paamirachi.
\v 6 Neeea Riosi naawesario, oowera echakamepua puꞌkao; Aaporoa noꞌo echariao, neerotoekamepua puꞌkao, nape weripatekao, Riosi iintokamepua puꞌkao.
\v 7 Waꞌatiachio echayamea, nerotowiamea tiameo, ki teꞌta ihsiame puuua, Riosikamera teꞌta ihsiamepua yaupatekao, weripatekaopua tiameo.
\v 8 Echayamea neerotoyamea tiame, ahpo waꞌachitia nateyatamepua Riosichio, Riosi tehkiwachi tekipanamekapa. Yooma aaata tekipanamea, yooma pipiripi natetepuamepua Riosieo, ahpo kehkisa tekipanariao.
\v 9 Teemea Riosi tekipanakiamepua, Riosi tehki yoorame; eeme Riosi keepuamea, waasapua, taamoo Riosi chiia echayachi.
\p Eeme Riosi chiia uukamea tiameo, Riosi kariwara enepakamepua, ki pusie teteiwame.
\v 10 Neeea puꞌka kaario, Riosie uhjuratiamenia, puꞌka kaari nawatera oꞌinemichiopua. Aaata wahjachi tekipanamea, puꞌka Riosi kaari nawatera noꞌo oꞌineriachi, nokayamepua werisipukao. Nape puꞌkachepa, puuu noꞌo nawateriachi simitiamea Riosi karitekewachio, teꞌta kaawe inataka simitemetepua, ki sewina tiiame iintopuawichiopua, aachin tiame Riosi weranareriaopua.
\v 11 Puuu Riosi kaari nawaterachi noꞌo yahchariaopua, aaataai ki koꞌrinametepua puꞌkao, piirechi epeche kaaweruma nawatera oꞌinemiaopua waꞌao, kiꞌtiopa epeche kaaweruma nawateraopua waꞌasio, ki Riosie Weratiamechitiaopua.
\v 12 Aaata puꞌka Riosi kaari nawaterachi karitakamea, naatieoi karitakamea, apoche oꞌroeoi, apoche tataparasieoiopua, teꞌta tehte tísia nateyameeoipua peenia tiame, yooma puuua, anachameripua ahpo kosipuachi taawechio. Nape itapiti ki tehpe eꞌramee Riosi kaarira karitekamea, itapiti maꞌreeoi, tahku saawara chuhcheka moꞌenekaoipua, oowera paaaoi chuhcheka moꞌyejoyekaoi, kiisi kaawe siimeripua Riosie ahpo kateweniachiopua taawechio, yooma tajenamerikapa puuua, Riosie katewerichio, naꞌie tajenakamechitia.
\v 13 Puuua Riosi kateweri taawechio, yoomahka chaachapameripua, aachin noonowiria ahpo tekipanariaopua Riosi tioparachio, ihtanae teetoka werasiriaepua puꞌkao. Puuu itae Riosi tiopara ahjae neteniamea, taamo Riosichi simiyame taamo masiteniamepua, tiꞌtijoeopua ooweruopua tiamé. Yooma taamo masiteriaa, Riosi katewia naꞌichi, uꞌmatokameka ikimeripua, Riosio waꞌa iintoka neꞌnemerikopua, aachin tiamera tehpe eꞌramekopua.
\v 14 Waꞌa naꞌichi uꞌmatoka ki tajakame ahpo Riosiwichio iintoriao, kaawe iintokame tewapuamepua Riosieo, teꞌta yorapuame puuua Riosieo.
\v 15 Nape ki kaaweruma machenasoopua ahpo iintoriaopua Riosiwichioo, kiisi kaawe yorapuamepua Riosieo, yooma wekatemeri puuua ahpo kaawe yorapuao. Nape puuua kihta kiatiaio ahpo kiapo tuutiameopua, Riosi ahjama yasimeripua, nape ki yooma ahpo kiapo tuutiame teereweka.
\p
\v 16 ¿Ki naneꞌriame eemea aamoo, Riosi kariwaraka teꞌteriamekopua, amochi kahtiamekoopua Riosio, ahpo Riosiwarie?
\v 17 Riosi kariwarachio, ki nuꞌuti iyoriniamepua. Pukaepa aaataoi Riosi kariwao, kiisi iyoriniame iintosoopua, tísia kokosa saaetemeri Riosia.
\p
\v 18 Kaꞌte aamo wisikuemua, noriwi aamo ki aaata tetewachi naꞌara ihsikao, ki aamo naꞌara ikimio eꞌrakaopua. Waꞌa erakoame tiꞌtijoeria, ki Riosichi ahjama teꞌtiamepua, waꞌa iintonaresaa aaataa, ahpo waꞌapi wisikuamepua. Teꞌta peenewa machiyame enenariamea, toimetepua waꞌa eraniameo.
\v 19 Puuu waꞌa eraniame machiwaria, ki inataniamepua Riosiwichioo. Waꞌa teeka inataka naewaniameo, Ehkoriami Iyoterichio chaanipua: “Riosia teꞌta ahpo pepenia erakoameo, noriwi ki kaawe nokaka Riosie ki ahpo kokosapuame erakoameo, ahpo waꞌapi wipicharichi ruhjitiai nokayamepua.”
\v 20 Pirenachi Iyoterichio, chaanipua tiameo: “Apoe teꞌta Paamiraa, naneꞌriamepua yooma tiꞌtijoeri inatao, yooma puꞌka oowera tiꞌtijoerichitia inatao, ki ijinatari tetewamekopua puꞌkao.”
\v 21 Pukachipa ki aaata ahpo oisa eꞌremetepua, aaata paikapi apochi poanataka iꞌtonarekaopua, waꞌa tiiame inataniamea, tiꞌtijoeche inata puuua, ki Riosi. Yoomahka teeme Riosichi simiyame nayewatuamea, napati teeme waꞌachitia kekechuma tiiaremichio ajawatiamepua Riosieo, napati taamo kuꞌitomichiopua aamo masitekao, yooma Riosi chiiao, kaawe pahteka inamumichiopua.
\v 22 Yooma teemea noꞌochitiao, Aaporochitiao, Peerochitiaopua tiameo, waꞌachitia iꞌka waꞌa chiiame, nayewiamepua: iꞌka wehjoarichi simiyame ikiniameo, ahjarichi simiyame nayewaniameo, wahjipaniamechi simiyame nayewaniameo, ehpe taawechi teetoamechi simiyame nayewaniame, wahka ihtoriachi ikipuamechi simiyame nayewaniame tiame. Yooma ikachi simiyame taamo aamo nayewesiaa, aamowichio kaawe teeremichio puuua.
\v 23 Puꞌka waꞌa teetoame neeea amochio, aamoo Riosie Weratiamechi enepariopa. Ehpeo eemea, Riosie Weratiame ijinuwarapua, Riosie Weratiamea, Riosichi eename.
\c 4
\s Eesusie ajawatiame tehkiwara
\p
\v 1 Pukaepa eeme Koorintio mochikamea, oowera Riosie Weratiame kuꞌyamechitia, taamo tetewimete eemea, iꞌka ehkoriami Riosi iintomo eꞌraria, taamo masiteka nokisiameo, puꞌka Riosi noriwi teereweriaopua pukeri oꞌiniao iꞌka weee yasipoio.
\v 2 Aaata ihtaoi neesetowetiamea, iyorika neesetometepua ahpo neesetoretiao, kiisi seꞌwi teetoka.
\v 3 Nape aaata noꞌo tehkiwa ki kaawe noꞌo neesetoame teewasoo, kihta aꞌchi eꞌramenia waꞌa chaanetiaio. Nooeoi ki nooe waꞌapi noꞌo kaawetame tiiapaopua, noꞌo tehki yoorariaopua Riosiwichioo.
\v 4 Neeea noꞌo tehkiwa kaawe neesetoa eꞌraio, seenekachioi ki kaawe teetokameoinia itachioo. Nape Riosi cheemapua ki kaawe noꞌo iintorioo.
\v 5 Pukaepa eemea ki ikanati naꞌara chaachapamete aaataoio, puuyepuapua pehjio ohso kaaweo, ahkasi Apoe Paamira Eesusi eenachisiopua, yooma aaata tijoe noriwi teereriaopua maꞌchitapuachiopua. Waika ihtori taawechi Eesusia, yooma tiꞌtijoeo ooweruopua tiameo, maꞌchitamapua puꞌkao, kaꞌkaruma inatari yoorarioopua ki kaꞌkaruma inatari yoorariaoiopua. Waikao Riosia puꞌka ihta inataria taamo neꞌnesapaopua, taamo pipiripichio, apoe chanimapua waikao taamoo, kaawe iintorioo ki kaawe taamo iintoriooiopua.
\p
\v 6 Pukaepa eemea noꞌo Riosichi poponiwao pipiniwaopua tiameo, puꞌka aamo noꞌo masitewakamera naꞌnaritonareriao, Aaporo masitewaoi naꞌnaritonareriao, kiisi kaaweko aamo tuuyamenia Riosiwichioo. Taamo Noono tewekachi kahtiame chiia naꞌnaritopuapua ohso kaawe, puꞌkakamera masitia pepenipasika, Apoe tewekachi taamo Noono cheeria, Ehkoriami Iyoterichio. Apoe taamo Noono tewekachi kahtiamea, aaataoi ki ipaka tetewijeranipua, aaatao teꞌta kaawerumachitia tetewikao.
\v 7 ¿Aatanana muuua ki aaatae aamo masitetiame eramichioo? ¿Ihtanakosa teꞌta penipakamemua ki aaata masitetiameeo? Aaatae kiatiame enesaamua aamo penipario, ¿achini iikai aamo oisa eꞌramemua, amoe waꞌapi ki aaatae penipakamechitia?
\p
\v 8 Muuwaeme eeme Koorintioa, yooma aamo nakiyaeopua, pochipakame eemeapa waꞌasio, paarasateka mochikame eemeapa waꞌasio. Ehpeo eemea teꞌta yawichika teꞌteriapao, kihta nakiyame eemea taamoeo, Riosichi simiyame nayewaniameopua. Puuu aamo teꞌta yawichika teꞌterewao, ¡tísia kaawe enemiipua, teꞌpa tewekachi Riosi yeꞌkarichi enesoo, waꞌachi mochimii teemeai waikao aamo ahjamao, Riosi yeꞌkarichio!
\v 9 Teeme Riosie ajawatiamea, teꞌta aiwarichi taamo toatiame maaenania, wahjiparichi uhjuratiameka teeka, ki aamochitia taꞌiria mochikamechitia. Teemea yooma tiꞌtijoerio, tamochi neꞌniame saaena teemea, ahkasioi Riosi kuꞌiwarioiopua tiame, tewekachio.
\v 10 Teemea Riosie Weratiamechi simiyame nayewatuamekapao, ki ijinatamechitia tetewiniame Koorintio mochikame ki Riosichi paparameeo, nape aamoo tísia paarasarichi inataka mochitoameo, tísia peenewari machiyamechitia tetewiniamepua pukaeo. Teemea kihta paarasariekapao, kihta pepeniamechitia tetewiniame teemea paarasari naꞌpoamichioo, nape eemea tísia pepeniamechitia tetewiniamepua puꞌkawichioo. Teemea ipaka tetewiniamepua, aamoo tísia iyorika tetewinioiopua.
\v 11 Teemea ahkasi ehpeoi waꞌapi teetoame teemea tísia aiwakao, toore aiwasikaopua, parae aiwasikaopua tiame, waꞌwakiraoi kaꞌkarame wakiraeka, taamo wepiwa aiwasikaopua tiame, kaarioi ki iinueme teemea.
\v 12 Taamo koꞌkomiao, tamoe tekipanaka koayamepua tiameo. Naꞌaretiai teemea, kaꞌkaruma nayewaka nehjiame teemea. Naꞌara yoojoratiaio, oowera anachame teemea, kihta iintoka.
\v 13 Taamo aaata ki kaawe chaanesooio, kaaweruma nayeweka nehjiame teemea puꞌkao, kaawe eꞌreka kateweka puꞌka ahjamao. Teemea, kasarachitia tetewiniamepua. Teemea, tiꞌtijoeri ohchorewachitia teeweniamepua, kihta kaawewichiokamechitia. Waꞌa teeka tetewiniame teemea, ahkasi ehpe taawechiamisio.
\p
\v 14 Neeea iꞌka aamo cheeka iyotiao, ki noꞌo tesiwe eꞌrepuawichio chaaninia, ohso kaawe aamo tuuyeka chaaninia, noꞌoo aamoo, noꞌo tatanachitia nakiyapa.
\v 15 Eemea waꞌa Koorintio mochikamea, ahkasioi piire miiri maꞌmasitari iinueme enetariareoipua, nape teꞌta aamo noonoka eꞌrame masitaria, neeechepua. Neeea, aamo noonoka iintokamepua, Riosi newiparichi uꞌpakao, Riosie Weratiamechi simiyame amochi iꞌyetokaopua aamo masitemia, Eesusichi paparame enepamichiopua.
\v 16 Pukaepa neeea aamoo, noꞌo teetoachitia mochijeraninia.
\p
\v 17 Pukaepa waꞌami aamo uhjurekania Timoteoo, taamo Paamirachi teꞌterewachiopua puꞌkao, noꞌo taanachitia tetewame, teꞌta tísia nakiyamekapania puꞌkao. Puuu ihsimapua eenechi aamo inatepatekaopua, noꞌoo aachin teetoamekopua Riosichio, Eesusichi teꞌta paparapa neeea, yooma tiꞌtiopachiami masitesikaopua.
\v 18 Aaata waꞌa aamo mochikachi mochikamea, aapoeche teꞌta masitari ahpo maayamekatapua, ahpokamera weruma erakokaopua Puuu waꞌa erakoamea, ki waꞌa noꞌo enamio maayamepua terimiao,
\v 19 nape neeea waꞌa eranioio, kuꞌwe waꞌa enamitepua, noꞌo Noono teꞌpa kahtiame waꞌa erasoo. Waika waꞌa enasaonia, iinatukemania puꞌkao, ahpo weruma erakoameopua, ihtana utewarichi waꞌa nokayamekopua, puꞌka kiisi kaawe nokiwame masitekaopua.
\v 20 Nape aaata teꞌta Riosi yeꞌkarichi teꞌteretoamea, kaꞌchitia waꞌa tiame masitemii puuua, ohso kaawe Riosi teꞌta nakiya aamo masitemii puuua, aamo teꞌteretojeraopua Riosi kuꞌiwarieopua utewarie.
\v 21 ¿Aachin teeremia noꞌo enajerame eemea waꞌao, aamo kaawe eꞌreka noꞌo asiwa, aamokosa noꞌoo, teꞌta utewaeme aamo terimia?
\c 5
\s Suwepori nokiwa peereitari
\p
\v 1 Waꞌa eemeai pichiwa ki nuꞌuti suwepori ihsiame aaata inamukame neeea, ahkasioi ahpo noono uupirao, uupiemekatapua. Puꞌka waꞌa tiameo, aaataai Riosi ki iyoriameai, ki nuꞌunti suweporika tiiame tetewamepua puꞌkao, aaataoi aapoeo waꞌa tiameo, kiisi nokiwamekopua.
\v 2 Eemea waꞌa nokiwameo, yuuwesimetepua puꞌkao, maꞌchipamete eemea puꞌkao, waꞌa tiopachio.
\v 3 Neeea, ki waꞌa kahtiameainia, waꞌa kahtiaitenia noꞌo inatarieo. Neeea waꞌa kahtiamee noꞌo inatarieo, eꞌrakame neeeapa ihtana yorapuameopua puꞌka tísia suwepori iintokameo. Noꞌo waꞌa eꞌrariaa, noꞌo Paamirae Eesusi waꞌa eꞌrakamenia.
\v 4 Neeea waꞌa aamo napawiriachio, waꞌa kahtiaitenia noꞌo inatarieo, waꞌa kahtiaitepua tiameo, Eesusi Riosi utewariraai, puꞌka suwepori iintokame katewepuawichioopua.
\v 5 Waꞌa teesoo eemea, puꞌka suwepori iintokameo, yoomahka napawinasapa waꞌa tiopachio, maꞌchipapuapua puꞌkao waꞌa aamo tiopachio, saupuaichiopua waꞌao, waꞌa tiopachi ki kaawe nokiwameopua. Satanasichi uhjurapuapua puꞌkao, kokosa aiwamichiopua ahpo iintoriawichioo.
\p
\v 6 Eemea weruma aamo erakoio kiisi waꞌa noonoimeriko chaachapaio, ¿achini iikai amochi reesiseka eemea puꞌka ki nuꞌuti suwepori noonoiwao? Puuu waꞌa aamo noonowiriaa, kiisi kaaweruma puuua. ¿Kiisi naneꞌriamekosa eemea naaju: “Rewarurao, teesa yahchetiamekoipua paatusichio, yomatiame aꞌpotiamekopua puꞌkao”?
\v 7 Waꞌa teesoo puꞌka ki kaaweruma rewarurao, maꞌchipapuapua puꞌkao, ki nuꞌuti mehtaka amochi naꞌatamerikopua. Aamo maꞌchipasoopua puꞌkao, piipakame itipima eemea waikao, weemera paatusie ki rewarurae takaritaniamechitia, Semejenato pahkochi koiꞌwameopua. Eemea takari ki rewaruraemekatepua, Riosie Weratiame aamo pejana mukuriopua aamo tatakoriria piipatekao. Puuu Eesusi Riosie Weratiame meritiamea, poꞌwa enekamepua Semejenato pahkokoiopua, puꞌka iintoria inatepasiwa nokisiame teemea, ahkasi ehpe taawechiami ihtoriwa, teetoachiopua.
\v 8 Puꞌkao teemea Semejenato pahko koꞌioio, Eesusi iintoria taamowichio inataka nokimete teemea, Eesusio teꞌta pichiwa taamo tatakoriria piipateria erakokaopua, poꞌwachitia taamo tatakoriria pejana meritiamekopua puꞌkao. Teemea Eesusi iintoriaeo takari ki rewaruraeme itipikameka tiiame teemea waikapao, yooma puhjetiapa teemea Eesusieo, ki kaaweruma rewaruraopua.
\p
\v 9 Piirechi iyojura aamo uhjureriachiopua chaaninia, ki pirena aamo teꞌteremichiopua, teꞌta suwepori ki kaꞌkaruma nokayame ahjamaopua.
\v 10 Waꞌa cheekaonia iyojurachio, ki aamo ki nayewemichio cheekamenia ki kaꞌkaruma nokayameo, pukaeeo norikame mochiniamekapa teemea, naatichitia nokiwamepua: ki kaꞌkaruma ikotuwa erakoniamechiopua, ichikoniamechioi, riꞌriosiwachi paparaniamechioiopua. Yooma puꞌka tiꞌtijoerichio poanatunariame enesaa teemea, puuyameriai teemea iꞌka wehjoarichio.
\v 11 Naatiche aamo poanatumichio chaanekamenia aamoo, aaata Riosichi poponiwako tuuyameoio pipiniwako tuuyameoiopua tiame, ki kaꞌkaruma nokayamechi, iꞌkachitia: suwepori nokayame tiꞌtijoechi ooweru tiame, teꞌta ahpochiche erakoame tiꞌtijoechi, teꞌta itapiti riꞌriosiwa paparamechi, naꞌara chaachaparichi, naꞌnawajiamechi, iꞌichikoamechi tiame. Aaataai ki ahjama teꞌterepuapua puꞌka waꞌa nokayame ahjamaopua, kiisioi ahjama koꞌkopuaoipua.
\v 12 Nape ki Riosichi paparameopua pehjio, kihta chaaninia puꞌkao, aamo napawiriachi enapoio. Puꞌkao aamo nayewesopa Eesusichi simiyameo, Riosi apoe iikachi nayewemeripua puꞌkao, kaawerumachi enepamichiopua puꞌkao.
\v 13 Aamo waꞌapi naanapawiachio, aaata ki kaawe iintosoopua waꞌao, eeme waꞌapi maꞌchipapuapua puꞌkao.
\c 6
\s Riosichi paparame, aapoe waꞌapi ahpo nekakoria
\p
\v 1 Aaata eeme aamo Riosichi poponiwaa pipiniwaa tiame, itapiti ki kaawe iintotiame katewenariaa, ¿achini iikai ki Riosichi paparaka mochitoame peereirachi uumpame eemea aamo katewemiao, aamoe Riosichi mochitoame waꞌapi, kateweme tiiai puꞌkao?
\v 2 ¿Ki naneꞌrena eemea wahka ihtoriachio, Riosie piipatetiameo, iꞌka wehjoarichi mochikame katewemerikopua? Waꞌa teeremeri enesaa eemea, ¿kiꞌtiarekosa eemea amochio, aaata aamoe waꞌapio ahpo katewemiao, teesa ki kaawe nokitiameoipua?
\v 3 ¿Ki naneꞌrena eemea taamo Riosichi paparamea, ahkasi Riosi kuꞌiwarioi ki kaawe iintorioo, katewemerikopua? Waꞌa teeresoo, ¿ki epeche tiiame ohjoare eeme waꞌapi aamo katewemiaopua, iꞌka weeechi mochikaiopua pehjio?
\v 4 Waikao, ¿aatia seesenuchi siimpata eeme aamo katewemiao, kihta katewepua iinuemeopua aamo tiopachio?
\v 5 ¿Ki suuwe erakona eemea waꞌa nokaka? ¿Kiꞌtekosa naaju amochio piiripioi, amochi ki kaawe nokakameopua katewemeri?
\v 6 Nape eemea waꞌa teꞌtiamekatepua, sewinachi iꞌtopapua aamo katewepuawichioo.
\p
\v 7 Puuu aamo waꞌapi Riosichi poponiwa pipiniwaoiopua tiameo, ahpo wenejika mochiwamea, kiisi kaawe tiiamepua Riosichio. Puuu ahpo wenejika mochikamea, teꞌta ki kaawerumachi komina teetoamepua, kihtawichio kaawekamepua. ¿Achinikai ki anachame eemea ohso kaawe: aamo ki kaawe yoratioiopua, itapiti wisikueka ichikone tiiaiopua?
\v 8 Ohsotia eemea waꞌachi iintoamepua naꞌara yoorakao, ichikuame eemeai puꞌkao, wisikuekao, aamo poponikooipua waꞌapio, aamo pipinioi.
\p
\v 9 ¿Ki naneꞌriame eemea, aaata ki toakamekoopua ahpo suwepori nokayao, kiisi Riosi ahjama mochimerikoopua puꞌkao? Riosi ki nakiyaa nokipuaichioo, ihjipua: kuunara ahpo uupio, ki piirechi oowitiame ahjama suwepori nokawa, uupiraoi ahpo kuunao ki piirechi tijoe ahjama suwepori nokiwa; itapitichioipua ahpo riosietaniameoi; aaata oowitiame ahpochitia oowitiame suwepori nokiwameoi; aaataoi tijoeai, ahpochitia tijoe ahjama suwepori nokiwameoi;
\v 10 aaata ichikoka puꞌseriameoi; ahpoche iinuepua weemuameoi; aaata nawajika puꞌseriameoi; tísia naꞌara chaachapameoi aaatao; ki ahpo wenejipuawichio nateteniameoi. Yooma iꞌka waꞌa tiiame nokayamea, ki uupuamepua Riosieo, ahpo yeꞌkarichi mochimichioopua.
\v 11 Aaata eemea, waꞌachi nokayame eneriaipua pukerio, nape Riosie Weratiame aamo tatakoririawichio pejana mukuriopao, eemea papakotiame itipikamepua tatakoririao, piipakame waꞌasi. Riosia aamoo, ahpowichio poanatakamepua. Puuu ki iyoriria amochi petereriamea, yooma choꞌwetiame itipiame eemea, Riosi Riosiwarieo.
\s Piipari eenepaniame weerewachi
\p
\v 12 Aaata eemea chaachapamepua: “Neeea noꞌo iintonariao, ahkasi noꞌo iintonaria iinueme neeea noꞌo iintomia iintonaresaa.” Waꞌa tiiamepua tiiao, nape ki yooma taamo yoranarewa, kaawerumakaite puuua. Pukaepa kaawe taamo inateka ihsimete teemea itapiti taamo iintonariao.
\v 13 Taamo weerewaa, ihtaoi taamo itaniamepua, nape ki yooma taamo weerewa itaniae, nokisimetepua. Waꞌa nokiniamea, ahpo weerewa eꞌrarie waꞌapi yeꞌkaniamepua, ki Riosi nakiyachitia teetoniame.
\v 14 Teemea mukukaio tewekachi taamo Noonoeo, Eesusi taamo Paamira ahjateriachitia, waꞌachitia taamo ahjatemapua taamooi.
\p
\v 15 ¿Ki naneꞌriame eemea aamo weerewao, Riosie Weratiame weerewarakopapua tiameo? Waꞌa tiiame enesaania Riosie Weratiamechio, ¿iinuemenane noꞌo suwepori iintomia ooweru ahjamao? Kaꞌíí, kaꞌchitia.
\v 16 ¿Ki naneꞌrena eemea, oowerua ahjama suwepori iintokamea, piiripi weerewa waꞌapi enepamekopua? Waꞌa chiiame Ehkoriami Iyoteria, eee cheekao: “Ooka weerewakaipua, piiripi weerewa waꞌapi enepamepua.”
\v 17 Waꞌachitia taamo iikaai taamo Paamirachi enepakao, waꞌachitia piiripi waꞌapi iikachi enepamepua, Riosi Riosiwarichio, Riosi Riosiwarieo waꞌapi.
\p
\v 18 Ikicha enepamitia eemea suwepori nokiwamechio. Ihta tatakoriniamea aaataeo, maꞌchi ahpo weerewachi iintoniamepua, nape suwepori iintokamea, ahpo waꞌapi weerewa naꞌatamepua, ki ahpo waꞌapi iyoriapapua, ahpo waꞌapi weerewao.
\v 19 ¿Ki naneꞌriamemua aamo weerewao, Riosi Riosiwari ohjoerachikoopua, Riosie aamo kiatiame weerewachi? Aamo weerewaa, ki aamo piineriwichio weerewara puuua,
\v 20 natekachi taritiamekapa muuua Riosi Taanaraeo. Puꞌka Riosi ahpo Taanara iintoriawichio aamowichioo, iyorika mochitomeri eemea Riosio, yomatiame aamo weerewa ihsiwae.
\c 7
\s Nenewiwachi simiyame tuuyewari
\p
\v 1 Ehpeo eeme noꞌo iinatukeria iyoteka, nehjiamane. Puꞌka aamo teꞌteria noꞌo iinatukeriao, ki nenewinia nahki eemea ohso kaawe.
\v 2 Nape tijoe ki anachame enesaa ooweruwichioo, ooweruoi tiꞌtijoewichiooi waꞌachitia, ki suwepori nokipuaichioopua, ohso kaawe nenewiwa kaawepua. Epeche kaawepua tijoea, ahpo uupiche ahjama yasiwaa, ki piirechi oowitiame ahjama tiame; oowitiameai waꞌachitiao, piiripi waꞌapi kuunaeka yasimeripua.
\v 3 Uupiraa, ki ahpo waꞌinametepua ahpo kuunachio, waꞌachitia kuunaraai ahpo kiametepua ahpo uupichio,
\v 4 uupira weerewaraa kuunara iinuwarakapa, kuunaraai ahpo weerewao, ahpo uupi iinuwarakopapua.
\v 5 Itapiti weruma simiyame Riosi ahjama nayewameri enesaa, weeka taawe ihsimeri enesaa Riosi ahjama naewakao, toipuapua pehji aamo uupichi ihsiao kuunachitia. Neipa kajusapa aamo Riosichi nayewao, eenechi nokisipuapua puꞌkao seenekachi riaorósia, ki aamo anachatekao, ki kaawe aamo iintotemaoipua.
\p
\v 6 Ihji noꞌo cheemiaa, nooe eꞌrejerapua, ki Riosie yachatiame nuurari.
\v 7 Noꞌochitia ki neewikame enesaa, kaawe enemii eemea, tísia aiwaniachi teetoniamekopapua taamoo, ehpe taawechimio. Nape Riosia ki yooma taamo waꞌachi teꞌteremichio kiꞌyamepua. Aaata teemea neewimichio kiatiamepua, aaata piireo kaꞌi.
\p
\v 8 Ki neewikameo pehjio, kunamukukameoipua tiameo, uupira mukukameoipua tiame, ki nenewisaapua epeche kaawe enemiipua noochitia.
\v 9 Nape ki anachame enesaa neewinariao, neewinia nahkipua ohso kaawe, ki neewinarewae suwepori iintomichiopua.
\p
\v 10 Nenewikameo chaanenania, nape ki nooe eꞌrachi, Paamira eꞌrachi chaanenania puꞌkao. Uupiraa ki toimetepua ahpo kuunao, kuunaraai ki toimetepua ahpo uupio.
\v 11 Ahpo kuuna toakamea, piineri yasimeripua; ki piineri yasinariaa, eenechi ahpo kuunama yasimeripua.
\p
\v 12 Wahjachi nenewikameo noꞌo chiiaa, ki taamo Paamirachi eenamepua. Aaata uupira ki Riosichi paparame enesoopua, nape taꞌiria kahtiame enesoopua ahpo ahjamao, ki toimeri kuunaraa puꞌkao.
\v 13 Uupiraai ahpo kuuna ki Riosichi paparame enesoo, nape taꞌiria kahtiame enesoopua ahpo kuuna ahjamao, ki toimetepua ahpo kuunaoi.
\v 14 Aaata nenewikaio neipao, Eesusichi pichikesoopua kuunarao ooitiameo kaꞌi, nape ooitiameo taꞌiria kahtiame enesoopua ahpo kuunamao, ki toimete kuunaraa ahpo uupio. Waꞌachitia ooitiameai, ki Riosichi paparame enesoopua ahpo kuunao, nape taꞌiria kahtiame enesoopua ahpo ahjamao, ki toimetepua tiameo ahpo kuunao.
\v 15 Nape aaata neewikame ki Riosichi paparameo ahpo nenewiwao saꞌrunanaresoopua, Riosichi paparameo, reesisepuamepua saꞌrupuawichioo ahpo nenewiretiao. Aaata Riosichi paparame ahpo reesisesoo poanatupuaichioo, kihta ki kaaweruma iintokame tetewipuamepua Riosieo. Puꞌka waꞌa tiameo, Riosia reesisiamepua puꞌkao, ki nasiwaka mochitopuawichioopua.
\v 16 Puuu uupira Riosichi paparamea, ki toimetepua ahpo kuunao ki paparamekopaopua Riosichio, puꞌkao seenekachio paparamerikooipua Riosichio, ahpo uupie kuꞌitiaopua. Waꞌachitia kuunaraai Riosichi paparame enesaa, ki toimetepua ahpo uupio ki Riosichi paparopao, seenekachi kuunarae kuꞌitiaopua ooitiamea, paparamaoipua Riosichio.
\p
\v 17 Aꞌchi tiiachioi aamo nenewikame teerewachio, kaawe teetoka mochitopuapua, Riosie kuꞌiwarieo, aꞌchi teeka kaaweruma aamo yasitoriaiopua keꞌchu aamo paaenioi Riosieo, waꞌapi teꞌteretoka mochitopuapua Riosichio. Puꞌka masiteka teetoamenia yomachi tiꞌtiopachiopua.
\v 18 Aaata siichitepuwetiame enesaa Riosie paaetiaio, kihta ki kaawe tiiame puuua Riosichio. Ki siichitepuwetiame enesaa Riosie paaetiaio, waꞌa tiiaimua kaawepua, kii siichiteputiamekai.
\v 19 Riosiwichioo, aaata siichitepuniameo, ki siichitepuniameoi, kihta nateyamepua Riosi kaawe teꞌterepuao, Riosiwichioo teꞌta nateyameraa, ahpo nuurari chiiakamera eꞌweniamerapua.
\v 20 Yooma aamo teꞌtereria keꞌchu paaeniai Riosieo, kaꞌchi tiiamepua Riosichiwichioo.
\v 21 Tijoea ooweru tiamea, puhkuchitia mochikame enesaa Riosie aamo paaetiaio, kaꞌchi tiiame puuua Riosiwichiooi. Aaata puhkuchitia mochikamekoio ki puhkuchitia mochikoio, puhkuchitia yasinaresaa Riosichio, kaawepua, nape saꞌrukame yasinaresaa ki puhkuchitia mochiwao, kaawechipua tiame.
\v 22 Puuu puhkuchitia Riosie paaetiapao, saꞌrunatiame itipiamepua tatakorio, puuua waikao, Riosie Weratiamekamera ihsika yasitomerikapaopua, waꞌapitia puhkuchitia yasitoaiopua. Puuu ki puhkuchitia yasitoaiopua, Riosie paaetiapaopua, ki puhkuchitia oiaiopua, Riosie Weratiamechi puhkuka tiiamekaitepua, Riosi yooreka yasitomerikapapua waꞌasi.
\v 23 Apoe Paamirao taamo taripariopao, apoe Paamiratere mochitomeri teemea, puꞌkachewichio yorakeka, ki tijoeekamera taritiamekapa.
\v 24 Waikao poponiwa pipiniwaa tiame waꞌa teeresoo, taꞌiria mochitopuapua Riosichio, ki seꞌwika ahjachio, puuu pukeri aamo teeeriao, kaꞌchi tiiamepua Riosichio.
\p
\v 25 Ehpeo, ki nenewiame pehjichi simiyame nayewamane. Ki nenewiamewichioopua pehjio, kihta eeetiame tuuyeniamenia noꞌo Paamirae Eesusieo, nape noꞌo eꞌrachitiao chanimania.
\v 26 Noꞌo eꞌrachitiao, yooma aaata oowerua tiꞌtijoeai, waꞌapitia ki nenewika itipisaa kaawe enemiipua, ki teesa kokosa tiiame simiyame teetoamekopa ehpe taawechiamio.
\v 27 Pukaepao uupieme enesaa, kaꞌte toimitiapua. Ki uupieme enesaa, waꞌatia itipipuapua.
\v 28 Aaata ki neewiai neewisaa, ki tatakori puuua. Nape aaata neewikame mochikamea puꞌka aiwari eenoio, tísia kokosa teeremeripua. Puꞌkao ki tísia aiwamichioo waꞌa eꞌramenia, ki nenewikame mochisaa epeche kaawe enemiopua.
\p
\v 29 Poponiwa pipiniwa tiame, kiisi mehka toio tuuka chaaninia tísia kokosa aiwapuameo. Ehpe waanamio uupiemea, ki uupiemechitia mochisaa kaawe enemiipua.
\v 30 Puuu tísia naarakomeria, ki naarakosaa kaawe enemiipua. Puuu kaawe erakoamea ehpe taawechio, ki kaawe erakoamechitia teꞌteresaa kaawe enemiipua. Puuu itapiti tarakamea, ki tarakamechitia teeresaa kaawe enemiipua.
\v 31 Aaata iꞌka weeechi paarasarika yasitoamea, kihta ahpo paarasatiachitia, ahpo tetewisaa kaawe enemiipua. Waꞌa erakoka mochitomete teemea, ehpe taawechiamio tísia aiwaniachikopaopua. Waꞌa teꞌteretoka ohjoemete teemea, yooma iꞌka wehjoarichi paarasatetiameopua, kiisi mehka teetoamekoopua kihta itipimerikopua kajuka.
\p
\v 32 Waꞌa aamo chaaniame neeea kaꞌchi teeremichiopua aamoo, waꞌa ikiwame taawechiopua. Tijoe ki neewikamea, ahpoche inateka yasitomeripua, Riosikamera kaawe eratepuawichioopua.
\v 33 Tijoe neewikamea, ahpoche ahpo uupima neesetowa teetomeripua, itapiti nakiya iꞌyesika. Riosi kaawe eratewache teetomeri puuua, ahpo uupi tiame.
\v 34 Oowitiame ki neewikamea, Eesusi Paamirachiche simiyame neesetomeri puuua, Riosikamera kaawe erateka. Nape aaata ooitiame neewisaapa, ki Eesusi Paamirache kaawe eratemeripua, ahpo kuuna tiame kaawe eratemeripua.
\p
\v 35 Ihji noꞌo chiiaa ki teesa kaawe teeremichiopua amochio, ki utewaeme aamo nuureka chiiamenia iꞌkao, ki teꞌta tehki aamo teetomichio chiiamenia aamo Riosi tehkiwachi nokisiachiopua, ahkasi tísia aiwari taawechi asiyachisiopua.
\p
\v 36 Aaata ki anachame ahpo neewimiao, aaataoi ahpo uꞌmatoame erasaoipua ahpo neewimiao, neewimeripua neewinariaa, kaꞌchitepua neewikaio, ki tatakorikopa.
\v 37 Aaata ki neewika puꞌseriame, piineriche ohjoenariamea, kaawepua waꞌa eꞌrai.
\v 38 Waꞌa teesoo taamo aiwamiachi teetoachio ehpe taawechiamio, aaata neewinaresaa kaawepua, nape ki neewinaresaa epeche kaawepua.
\p
\v 39 Nenewiniamechi tiiameo iꞌka chanimane. Uupira Riosichi paparamea, ahpo kuunachi ihcheka yasimetepua, ahkasi ahpo kuuna mukuyachisi. Ahpo kuuna mukisoopa puuua, naꞌsokame itipiamepua ahpo kuunachio, kaawe neewimeripua piirechi ahjamao neewinaresaa, nape Riosichi paparame ahjamache tijoe.
\v 40 Nape noochio eꞌramenia puꞌkao, ki eenechi neewisaapua, epeche taꞌiria yasimeripua, Riosioi waꞌachi eꞌrameko eꞌramenia noochitia.
\c 8
\s Kooame riꞌriosi oowetiame
\p
\v 1 Ehpeo itapiti riꞌriosiwati kohseka ooweniame nayewamane. Yomarika teeme teꞌta machiwarieka mochitoamepua, puꞌka riꞌriosi oowewewachi simiyameo. Nape aaata teꞌta Riosi nakira machika yasitoamea, ki ahpo weruma eꞌraka yasitometepua, puꞌka oowewarichi simiyame ahpo machiyao. Puꞌka oowewarichi simiyame nayewiaio, kaawe aamo uuka, nayewapuapua pukachi simiyameo.
\v 2 Aaata ahpo teꞌta siinto machiyame maayamea, seenekachioi kihta teꞌta machiyamekoipu puuua.
\v 3 Nape aaata ahpo kaawe eꞌreka katewiameopua itapitio, kaawe iintokame teteiwamepua, taamo Noono teꞌpa kahtiameeopua. Nape kaawe ahpo nakika mochitoamea, kaꞌkaruma nokaka mochitoame teteiwamepua Riosieo.
\p
\v 4 Puuu ahpo riosiwachitia uuka manakeniamea, oowera waꞌa nokiwame puuua kihtawichio. Nape teeme taamo Noono Riosichi paparamea, yoomahka naneꞌriame teemea, puuu riꞌriosiwaa, kihta kaaweruma iintoamekopua taamowichioo, tísia manakeniaipua puꞌkawichioo. Teemea taamowichioo, piiripi waꞌapi Riosipua, kihta muuwaemekamera riꞌriosi.
\v 5 Muuwaeme tiꞌtijoeria, ki ookapi iintuamekotipua riꞌriosio iꞌwa weeechio tewekachiopua tiameo, utewari iinuemea.
\v 6 Nape teemea ki waꞌa chaachapamepua, piiripi waꞌapikotipua taamo Noono Riosio, puuu apoea, yooma ihta itapiti iintokamepua weeechi iintuameo, tewekachi iintuameopua tiame. Weeechioi, piiripi waꞌapi teꞌta Paamiraeme teemea, Apoe Riosie Weratiame, Apoe Eesusikamera teꞌta iyoriniamera.
\p
\v 7 Nape ki yooma Eesusichi paparame naneꞌriamepua, riꞌriosi manaketiame saꞌpa koiꞌwameo, kaꞌchi tiiamekopua Riosiwichioo puꞌka saꞌpa manaketiame koꞌkotioiopua Riosichi paparameo. Weꞌwemera Eesusichi paparakamea, pukerio riꞌriosi manakeka mochitoriamea, kiisi konariamepua riꞌriosi saꞌpa manaketiameo, puꞌka koayaioopua, puꞌka riꞌriosikamera iyoriameka erakoamekapa. Pukaepa ki koꞌkome erakoamepua puꞌkao, ki naꞌatapuawichiopua ahpo Riosichi iyoriwao.
\v 8 Nape teꞌta pichiwaa ihjipua, kihta kooame koiꞌwae taamo kaawe teeretiame Riosia, apochio. Waꞌa tiiachiopua, riꞌriosi manaketiame saꞌpa koiꞌwamea, ki epeche kaawe taamo tetewiniame Riosieo, ohsooi ki kaawe taamo tetewiniame Riosieoi.
\v 9 Nape puꞌka kooameo kaꞌchi aamo ikitio eꞌraipua Riosichio, kaꞌchi eramichiopua weemera Riosichi eenakameo, ki koꞌkopuapua riꞌriosi oowetiame, aaata puꞌka tetewachiopua, ki aaata aamo ki kaawe eramichiopua.
\v 10 Aaata aamo riꞌriosi oowetiame saꞌpa koayame tetewisaa, puꞌka riꞌriosi oowetiame koꞌkomo orapasaapa tiame, koꞌkomapua koayao, nape Riosi nekamio eꞌraka.
\v 11 Waꞌa iintosaamua, tatakoritemamua aamo Riosichi pooniwao piiniwaoio, apoe Riosie Weratiame puꞌkawichio mukukameopua tiame.
\v 12 Waꞌa teesoo waꞌa iintokamea, naꞌatamepua ahpo poonio, kaaweruma inataopua Riosichio. Waꞌa teekao muuuai, kiisi kaawe itipiamemua Eesusichioi, Riosie Weratiamechio. Waꞌa iintosaamua, teꞌta tatakorieme muuua.
\v 13 Waꞌa teeresoo puꞌka kooameo, tatakorichi wichitiame enesoopua poonio, ohso kaawe neeeai kiisi koꞌkomapua puꞌkao, ki seenampa.
\c 9
\s Eesusie weratiameo ihtana ahpo iintomia reesiseri iinuewa
\p
\v 1 Noꞌo chaachapania nayewamania ehpeo, aaata waꞌamahkao chaachapatapua, ki Eesusie weratiamekopua noꞌoo. Nape neeea chaanenapua puꞌkao, pichiwa Apoe Eesusie noꞌo weratiamekopua, nooe tetewikapapua Eesusio, neipa meritioio, eenechi oijenakame mukukaio. Apoe waꞌapi noꞌo chaanekamekopapua, amochi upamichiopua ahpo noꞌo aamo tuuyenurario, puuupua noꞌoe aamoe inamuriao, noꞌo nayewatusiao. ¿Ki puꞌka Eesusichi simiyame noꞌo aamo nayeweria pichikekamekosa eemea?
\v 2 Wahjachio ki noꞌo Eesusie weratiameko erakoiopua, eemea ki waꞌachi erakometepua, wahjachitiao. Eeme waꞌapi noꞌo uꞌparia Eesusi chiia pichikekame enesaa, eeme waꞌapi noꞌo Eesusie weratiame uukamekai ikikamekapa. ¿Ki waꞌakosa erakoame eemea?
\p
\v 3 Ihji noꞌo nehpupaka chiiao, ki noꞌo Eesusie weratiameko erakoamerawichiopua, noꞌo masitiao kihta nateyo tuuyamekopua.
\v 4 Puꞌkao chaaniamenia, apoe Eesusiko tuuyamenia waꞌa tiame masitekaopua kooamechi simiyameo. Apoe Eesusia cheekamepua, ihtaoi kooame enesaa, kihta ki iyoriwa tiiamekopua Riosiwichioo, ihta iijiniameoi. Waꞌa teꞌteriame enesaa teemea Eesusichio, iinue teemea taamo kuꞌipuao, ihtaoieo taamo nakisiao, kooameeoi, neeroioi taamo ooweniame taamo paramoo.
\v 5 Teemeai Eesusichi simiyame nayewatiamea, iinuemepua tiameo, taamo yeetoka ohjomiaopua taamo uupio uupiemeraa, Peerochitiaopua, wahjachi Eesusi ajawariaopua, Eesusi ahpo yeeyechi poponiwaopua tiame.
\v 6 Neeea Wenawe tiameo, ki ujupiekapa teemea, ¿ki iinuemejuare teemea, taamo ihkokeniame koꞌkomiao?
\v 7 ¿Aatana soontaro ahpo mochiwawichio nasiwaio, ki iinuetarepua ahpo koꞌkotepuao? ¿Aatana itapiti echakai, ki koꞌkotapua taakeriao? ¿Aatana chiiwa neesetoameaio, ki iijitarepua muꞌira ihpaketiameopua?
\v 8 Iꞌka noꞌo chiiao, ki nooechi eenameche maaepuapua. Iꞌka waꞌa tiameo, waꞌachi chiiame Moiseai Ehkoriami Iyoterichio.
\v 9 Waꞌa cheekame Moisea, eee cheekao: “Oisio kaꞌte toꞌpemitiapua chuꞌwachio, tekeka okayaio, koꞌkomichioo.” ¿Oisi nayewaka cheeriamenapu waꞌa cheekao?
\v 10 Kaꞌii. Taamo nayewaka cheerepua Riosichi tekipaname. Aaata yoomoka echayamea, aaata okitiame ekasuamea tiame, naꞌpa puuua, ahpo echaria taakeria, ahpo naachutemeri puuua.
\v 11 Teemea amochi echakameai tiamea, Riosi kaaweruma tuuyewario, ¿ki kaawe eꞌraka taamo kuꞌipuame maaena eemea taamo koꞌkomiao?
\v 12 Aaata ki Riosi tekipaname nateteniame enesoo, ¿ki epeche iinueme ohjoare teemea, taamo natetepuameopua, Riosichi tekipanamekapaopua?
\p Nape waꞌa tiiai teemea, kihta koparowa inataka nokisiame teemea iꞌka Riosi tehkiwachio, ki aaata taamo koparoame tewamichiopua, Riosie Weratiame nayewatuwaopua.
\v 13 ¿Ki naneꞌrena eemea waꞌa tiopachi tekipanameo, waꞌapi tiopachi iintuame kianiamekopua kooameo? ¿Ki naneꞌrenakoi eemea, puuu tiopachi paamiratuamea, waꞌapi Riosi tepaweterachi toatiame, koayamekopua?
\v 14 Waꞌachi chiiame Riosiai Iyoterichio, aaata Riosichi newipari nayewatuamea, kiapuamekopua koꞌkometio.
\v 15 Nape neeea, seenepioi ki itakamepua noꞌo kiapua teerewiao. Ki itaka chiiamenia aamoo, iꞌka iyoterichi noꞌo chiiao. Neeea waꞌa iintonaresaa, mukimania ohso kaawe, ki waꞌatia wekamichiopua noꞌo waꞌatia kaawe eꞌrewaopua, noꞌo nooe iꞌyaka koiꞌsika tekipanakaopua.
\p
\v 16 Neeea, ki noꞌo weruma eratewawichio ihsiame neeea, Riosi tehki yoorakaopua tuuyesikao. Neeea, utewachi noꞌo yoramio eꞌraninia iꞌka tehkio, ki yorasaania ki nuꞌunti yuuwesimiinia.
\v 17 Nape iꞌka tehkio, nooe noꞌo kaawe eꞌrachie ihsiame enesaania, noꞌo natetepuame tiiame neeea. Nape iꞌka tehki noꞌo yoorao, ki nooe eꞌrachi ihsiamenia, Apoe Riosie Weratiame noꞌo nuurekamekopa iꞌkao.
\v 18 Waꞌa tiiachipao neeea iꞌka tehkio, ¿ihtanakamerajoarepu noꞌo natetewaa? Puuu noꞌo natetewaa ihjipua: Tísia noꞌo puꞌseriapua naewatukao, Eesusi noꞌo nuureria nayewatumichioopua puꞌkao, iꞌka tísia teꞌta Riosi kaaweruma tuuyewarikopapua, nape puꞌkao, kiisi kihta natekachi, aaataoi kihta itanesikaopua kuꞌiwao, ihtaoi noꞌo kuꞌiniameoipua, iinuekai neeéa, noꞌo natetepuawao, Riosichi tekipanamekapao.
\p
\v 19 Ki aaata puhkukainia, yoomawichio puhkuchitia tekipanamenia, epeche muuwaeme oowe erapatenariapa tiꞌtijoe oowerua tiameo, Eesusichi paparamichioo.
\v 20 Iꞌisaeri tiꞌtijoeriekachi enasaania, isaeri tijoechitia noꞌo uuyamenia waꞌao, epeche muuwaeme oowe erapatenariapa taamo Paamira Eesusichio, yooma napati tiꞌtijoe ooweru tiame. Moise nuurari nokiwachi enasaoio, Moise nuurari nokiwatere iijisiamenia, epeche tiꞌtijoeri oowe erapatenariapa noꞌo Paamira Eesusichioo. Neeea waꞌa oiyaio, ki Moise nokiwatere tiiamekaitenia.
\v 21 Seesenu nokiwachi eenakainia ki Moise nuurewa nokiwachio, puꞌka seesenu nokayachitia noꞌo uuyamenia, epeche tewinariapa puꞌka tiꞌtijoerichio, noꞌo Paamira Eesusichi paparamerio, tiꞌtijoe ooweruopua tiameo. Nape puꞌka ki Moise nuurarichi mochitoamechitia ihsiaio, Riosie Weratiame yasitoamenia, Riosi nuurariterechitia.
\v 22 Neeea weemera teꞌteriame Paamirachi eenakaio, pukeri oꞌiniamechitia nayewiamenia puꞌkao, Riosichi simiyameo, epeche tewinariapua pukachio, Eesusi Riosie Weratiamechi paparamichioo, tiꞌtijoe ooweruopua tiameo. Aꞌchikoitia noꞌo uuka ihsiamenia, aꞌchikoitia iintoka tewinariapa, Paamirawichioopua tiꞌtioeo.
\v 23 Yooma puꞌka ihsiamenia, epeche mehtamichiopua Riosi kaaweruma tuuyewario, epeche muuepari teerepuawichiopua Paamirachio, noꞌoo epeche tísia kaawe eꞌrewa eramichiopua tiaméo.
\p
\v 24 Naneꞌriame eemeapa, aaata uꞌmasiwa teꞌewa newitoniameo, piiripi waꞌapi newitoamepua ahpo natetepuawichioo. Ujumasa naaju, Riosichi newitoka kaawe teetokaopua, itapiti Riosi kaawe eꞌrewa aamo kiapuaichiopua aamoo.
\v 25 Yooma aaata newitoa teꞌyamea, kaawe ahpo neesetoamepua weerewachio, oowera raureri kuhsisawa mosokitewa yowitai, kiisioi tehpe eꞌrame; nape teemea Riosichi tekipanawao, kiisi wahjiame kiapuamewichio teꞌyameka nokayámepua.
\v 26 Neeea noꞌo teetoao Riosiwichio tehkio tísia noꞌo kaawe neesetoamepua, ki noꞌo seꞌwi teetowichioopua ihta itapitieopua, ki noꞌo kajuteme tiiaopua Riosichi tehkiwao. Neeea ki eekachi wepayamechitia ihsiamepua, aaatachi ahpo nasiwamiapa ahpo penitiamechitiao. Neeea noꞌo Riosie kiapuamekamera, teꞌta inatatoka teetoame neeea, iꞌka Riosichi tehkiwao.
\v 27 Puꞌkawichiokamera neeea, tísia kaawe neesetoamenia noꞌo weerewao, kiisi noꞌo soꞌmipamichiopua ki kaawerumachi wichipuao. Neeea waꞌa tiiame teetoamenia, Riosio kateweniachi taawechio, kihta noꞌo ki kiapua teerepuawichiopua Riosie nuutewa noꞌo kiapuao, weeechi kahtiaio tísia kaawe masitekamekaiopua.
\c 10
\s Riꞌriosichi paparaniame waꞌinewa
\p
\v 1 Riosichi poponiwa pipiniwa tiame ki natakepajeraninia, yooma taamo ehkoriami mochiriamekoo, Riosio toomaritere neesetotiamekopua siimpachio; yooma pirena uumatokame Riosi wahjoneriachi paꞌweo, Eejito soontarochi newipamichioo.
\v 2 Waꞌa tiiachiopua, Riosie toomaritere nokisitiamee wakiwechiami nokisiaiopua, Paꞌwe Sehtanamechi wanamika paaterepua, pukae waꞌa paatetiamee paatotiameka tiiame itipirepua Moise ahjamao, Riosi neesetowatere pirenatuka itipikaopua.\fig |182-cn02098b.tif|col|||Moisea Riosie ahpo muuwari ahjamao, wakiyachi uumatoka paonani Paꞌwe Sehtanamechio. |10:2\fig*
\v 3 Yooma puuu tiꞌtijoea oowerua tiame, wakiwechiami nokisikamea, tewekachi eename kooame koꞌkakamepua, Riosie ahpo kiaretia.
\v 4 Ehkoriami wakiwechi nokisiameapua tiameo, yoomahka eꞌpechi pajenakame nerojikamepua tiameo. Puuu eꞌpea ehpiamio, Apoe Riosie Weratiamekaitepua, pukachi nerojiame teemea, nape puuua neeroi taamo nerojiaa, ki wahjiamesi ahjari teereniamepua.
\v 5 Nape Riosia, muuwaeme ki apochi paparaai nerojikameo puꞌka eꞌpechi pajenakame neeroio, kiisi kaawe eꞌreka tetewarepua puꞌkao. Pukaepa yooma wahjiparepua, wakiwechiami nokisinioio.
\p
\v 6 Yooma puuu ehkoriami ikitiameo, puꞌka neꞌnetoka seeweka, taamo Riosichi iyorika mochitomichio ikitiame puuua, ki puꞌka teꞌtereria teerepuawichiopua.
\v 7 Pukaepa eemea, kaꞌte riꞌriosichi paparamitiapua ehkoriami nokisiriame ookapio nokisiriachitiao. Puꞌka noonowiria naewaka chiiame Ehkoriami Iyoteria, eee cheekao: “Tiꞌtijoeria weesero netetiame, pahkoterepua ahpo riosichitiao, nawajika yaawekaopua tiameo.”
\v 8 Kaꞌte waꞌa nokimitia eemea suwepori nokiwao. Waꞌa nokisaa eemea yooma wahjipamaoi eemeai, puꞌka ehkoriami piire weerewa paika miiri wahjipakamechitia, piie taawechi waꞌapiopua.
\v 9 Kaꞌte aatiatamua, teꞌta aamo Paamiraopua, ehkoriami mochiriamea waꞌa nokaka wahjipakamepua, siinoie kiꞌkiretiao.
\v 10 Kaꞌte Riosi weꞌsapapuame chanimitiamua, ehkoriami mochiriamea waꞌa chaachapaka Riosio, wahjipakamepua.
\p
\v 11 Puꞌka taawechiami ikitiame seeweka nokisimete teemea, Riosi iyorikao. Puꞌkawichio iyotetiame Ehkoriami Iyoterichi chiiao, puꞌka waꞌa ikitiame neꞌneka pepenipamichiopua taamoo, Riosio iyoriniakopua puꞌkao. Waꞌa teetomeri teemea ehpe taawechiami Riosichi mochitoamea.
\v 12 Pukaepa aamo ahpo inateka mochitopuapua, amochi pewatiame tiio eꞌroio ki tatakorichi wichitepuameo, senawato waꞌa eꞌrai tatakorichi wichimakoipua muuuai.
\v 13 Yooma ihta tatakori iintonarewaa, waꞌapi teerekamepua ehkoriami oꞌiniao. Nape piiripikoi puuua, ki iinuemepua ki newitowao. Aaata puꞌka tatakori ahpo paꞌpanisusoopua, Riosi waapi kahtiamepua, aamo kuꞌipaka newitopuawichioopua puꞌka tatakori aamo paꞌpanisuwao.
\p
\v 14 Waꞌa teesoo, kaawe aamo neesetoka mochitopuapua amochio, kihta tatakori aamo panisutomichiopua apochio, riꞌriosiwachi paparamichioo.
\v 15 Naneꞌriamenia aamoo, ahsepari ijinatamekopua, noꞌo aamo chaaniao, aamoe neꞌnemichiopua teꞌta kaawerumakoopua ki kaawerumakooiopua.
\v 16 Teemea taamo Paamira Aari Koiꞌwa koayaio, iijipasochi iijiwa iijinioiopua, yoomahka pirena Riosichi cheriwema kiꞌyame teemea, Riosie Weratiame taamo pejanawaka wiꞌsuriopua ahpo eerarao, kurusichi meritiaio. Puꞌka paani koiꞌwao, Riosie Weratiame taamo pejana mukuria inatepaka, nokayame teemea. Puꞌka Eesusi Aari Koiꞌwame paani koꞌkosaa, yoomahka piiripi inatari enepame teemea, Eesusi Riosie Weratiame weerewachio.
\v 17 Muuwaemekai teemea, piiripi waꞌapi enepame teemea, piiripi paanichi waꞌapi koayamekapa.
\p
\v 18 Waꞌachi piiripi enepaniame erakoka nokariaipua tiameo, ehkoriami iꞌisaeriai ahpo Riosi manaweria saꞌpa koayaiopua.
\v 19 Puuu ki Riosichi pichikiameai waꞌachi piiripi enepaniame erakoka koayaipua tiame, puꞌka ahpo riꞌriosiwa manakeriaopua. Nape waꞌachi nokayaiopua kihta nateyame enerepua tatakori puhjepuao, kihtaoi, itapitiwichio yoratiaio. Pukaepa Eesusi Aari Koiꞌwa piiripichitia enepaniame koꞌkakamea, toimete puuua ahpo riꞌriosiwa manakiao.
\v 20 Puꞌka riꞌriosi netetiame manakiamea, Satanasi kuꞌiwarikamera iyoriamepua, ki Riosikamera. Pukaepa neeea puꞌka ahjama, kihta ahjama teꞌterejeraninia.
\v 21 Kaꞌchi iika iyoriniame ooka teekoo, Satanasi iyorisikao taamo Paamira Eesusi iyorisikaopua tiame.
\v 22 ¿Ihtana erakoame eemea waꞌa nokayapao? ¿Nekatetariame eemea naaju taamo Paamira Eesusio? ¿Ki ehkoriami mochiriamechitia iꞌisaeri nokayamekosa eemea, waꞌa nokakaopua nekamuchepatekamepua Riosio? ¿Newitomerikosa erakoame eemea Riosio?
\s Ahpo nakika ki oꞌyaeka, teꞌterewa mochiwa Riosie Weratiamechi
\p
\v 23 Riosia yooma ihta taamo nokimiao, taamo toanipua toayao, nape ki yooma taamo nokaya kaawe tiiame, aaatachioi taamo piirechioi ki kaawe wichiyamepua, taamoo, kaawe teꞌtepuao aaata ahjamao taamo piirechichio.
\v 24 Aaataai kaꞌte aamo kaawe teerewache iꞌyapuapua, ohso kaawe wichiyame nokipuapua aamo wahjachioi.
\p
\v 25 Muuua saꞌpa tarayaio kihta ahka eename iinatukeka taripuapua. Aaata aamochitia Riosichi paparame inamusaa, puꞌka saꞌpao riꞌriosi manaketiamekoopua, ki kaawe tiio erapamaoipua amochio weemera paparame enesaa Riosichio, puuu inamukamea ki koiꞌwameko eꞌrapa riꞌriosi manaketiameo.
\v 26 Ohso kaawe puꞌka saꞌpa tarayaio, kaꞌte iinatukemitiamua ahka eenameo, ki aaata aꞌchi eꞌremichiopua aamoo, aaataai weemera Riosichi paparamea.
\p
\v 27 Aaata ki Paamirachi paparamee paajutetiaapua koꞌkomichioo, siminariaa siimpuapua. Ihta itapiti kooame weeretiaa, kihta iinatukeka koꞌkopuapua puꞌka saꞌpao, ahka eenamekoopua. Aaata aamochitia Riosichi paparakame inamukamea, riꞌriosi manaketiamekoopua puꞌka saꞌpao aamo koꞌkomiao, ki kaawe aamo ihsio erapamapua, ki koayamekapa puuua puꞌka saꞌpa riꞌriosi manaketiameo, aamoopua teꞌta Riosichi paparame naneꞌriame enesaa.
\v 28 Nape aaata riꞌriosi manawetiame tuusoopua, ohso kaawe ki koꞌkopuapua puꞌkao, ki aaata aamo ki kaawe erakomichioopua.
\v 29 Muuua naneꞌriamekai kaꞌchi tiiamekopua Riosiwichioo koꞌkotioio, ohso kaawe ki koꞌkopuapua puꞌkao, kaꞌchi eratepuawichiopua aamo piirechio.
\p Aaata ahka noꞌo iinatuketariareoipua: “¿Aatia aꞌchi chaanetariania noꞌoo aaataeo ki noochitia eꞌrameeopua?
\v 30 Noꞌoo ihta kooame koꞌkomiaio, Riosi cheriwema kiꞌyaka koayame noꞌo enesoo, ¿aatia ki kaawe ihsio tuutarepua aaataa puꞌka noꞌo koayao, ki waꞌa noꞌo chaaneme tiiaio?” Waꞌatepua tiiao, nape teemea iwapakamea Riosichi simiyameo, taamo inatemetepua ohso kaaweo, ki aaata ki kaawe erakomichiopua tamochio.
\v 31 Ohso kaawe yooma taamo nokayao, Riosikamera kaawe eratewa nokisinia kaawepua, apoeopua, taamo tetewamekopua, ihtaoi taamo nokayaopua, koiꞌwamechi simiyameo, itapiti taamo iijiaoiopua.
\v 32 Kaꞌte nokimitia eemea, aaata tatakorichi wichipuatepua tiiameo, isaeri tiꞌtijoerioi, ki isaeri tiꞌtijoerioi, aaataoiopua Riosichi paparameoio, Riosi tioparachi ki pusie teteiwamechi mochitoameo.
\v 33 Neeea waꞌa teetoamepua, yooma aaatachioi kaawe teetokaopua. Waꞌa teetoame neeea, ki noꞌowichioche inisiamekapa inatatokao; wahjachi aaataoichi inataka waꞌa inisiame neeea, puꞌkao, newipari ahsepamichiopua tiameo, taamo Noono teꞌpa kahtiamechiopua.
\c 11
\p
\v 1 Noꞌo teetoachitia teetopuapua, noꞌoo noꞌo Paamira Eesusi teetoriachitia teetoao.
\s Aachin teꞌteremia oowerua napawitiachio
\p
\v 2 Kaawechupena kaawe noonoire eemea, ki noꞌo natakepaka noꞌo aamo masiteriaopua, yooma kaawe teetokaopua, teꞌta noꞌo aamo masiteriachitiaopua.
\v 3 Ehpeo moꞌoratuamechi simiyame aamo nayewemane, ehpe taawechiami teꞌteretopuame. Aaata ahpo uupi moꞌoratuamea, kuunarapua. Aaata kuunara moꞌoratuamea, Riosie Weratiamepua. Taamo Paamira Riosie Weratiame moꞌoratuamea, Apoe taamo Noono Riosipua, tewekachi kahtiame.
\v 4 Aaata tijoe Riosichi nayewamea, aaata tiꞌtijoeri Riosie tuuyewa masiteka ihsiamea, moꞌkori pujisá ihsimetepua. Ki moꞌkori pujisa ihsiamea, ki iyoriamepua Riosie Weratiameo, ahpo moꞌorachitia teeretoameo.
\v 5 Aaata oowitiamea, mokoraeka ihsimeripua Riosichi nayewaio, aaataoi Riosichi simiyame nayewiaiopua. Ki mokoraeka ihsisaapua, ki ahpo moꞌoechitia yooriame enemapua ahpo kuunao. Ki mokoraeka ihsisaapua ooitiamea, sikika tehpunatiameka tiiamepua kuuparao, ahpo kuunachitia moꞌoratuame.
\v 6 Ki yoorenariameopua mokoraeka ihsiwao, sikinia nahkipua kuuparao. Nape suuwe eꞌrame enesaapua ahpo kuupara sikiwao, mokoratamapua Riosi nayewiaio.
\v 7 Tijoea, pujisa ihsimetepua moꞌkorio, Riosi moꞌoratuwa tetewitekapua iꞌka weeechi tiꞌtijoerio. Oowerua, tiꞌtijoe moꞌoratuwa tetewitame puuua.
\v 8 Waꞌate ihjia, pukeri oꞌicharichio tijoea, ki oowitiamechi enepatetiamekapa puuua, oowitiamekamera tijoechi maꞌchipaka netetiamekapapua.
\v 9 Ki tijoekamera, oowitiamewichio enepatetiamepua, oowitiamekamera, tijoewichio enepatetiamepua.
\v 10 Pukaepa oowerua, mokoraeka nokimeripua Riosi paparaka nayewamia napawitiachiopua. Puuu ooweru mokoraraa, ahpo kuunae neesetoniame neꞌnetiamepua, Riosi kuꞌiwari teꞌteriachitia tewekachi Riosichio.
\v 11 Nape Riosichi teꞌtereniamea, napati ahpo tetewiniamepua kuunaraai uupiraai tiame, nenekutia ahpo nakirewaemekapapua. Waꞌa tiiapa puuua, aaataai ki ohjoemepua, ki ahpo nenekuti kuꞌiwaeo, peꞌyachi ooweru kuꞌiwaeoi tiꞌtijoeo, tiꞌtijoeoi kuꞌiwaoi ooweruo, napati ahpo kuꞌiniamepua.
\v 12 Pukeri oꞌiniao oowitiameo, tijoechi oꞌinia enepatetiamekapao, waꞌa oꞌinia tiꞌtijoea, ahpo ooitiame yeeyechi naawamepua.
\p
\v 13 Puꞌka ooweru moꞌo moꞌporawachi simiyameo, ¿ihtana inatame eemea puꞌkao, Riosichi nayewamia napawitiachio?
\v 14 Wee, iꞌka noꞌo aamo chaaniao kaawe inatamitiamua: tiꞌtijoea ehpe taawechiamio, sikitiame ohjoamepua kuupao,
\v 15 oowerua tepekuma kuupaeka ohjoamepua ehpe taawechiamio; waꞌatiame kiatiamekapa oowitiame enepatetiachisi oꞌinia, puꞌka kuuparaeo ahpo mokoraeka teeremichiopua.
\v 16 Waꞌa tiiachio neeea, teꞌta iyoriwa Riosi ahjama nayewamiaopua napawitiachio, ihtaoi Riosie ahpo naneꞌretetiame napawitiachi mochikame nayewenariaoi, aaata oowitiame mokoraejeraninia itapitie pahchao. Aaata iꞌka noꞌo nokiwajera ki waꞌa eꞌramea, naneꞌremeri aaataai teeme iꞌwa mochiwachi napawiniachio, waꞌami ahka napawiniachioi, piirechi nokiwa iinueme.
\s Eesusi Aari Koꞌkaria inatepari, ki kaawe nokisiwa
\p
\v 17 Iꞌka ehpe aamo noꞌo nayewemiachio, ki peenia tiame aamo nayewamania, aamo Koorintio mochitoameopua tiopachi. Eemea waꞌa tiopachi aamo nanapawichio, epeche epecheche ki kaawerumachi teetoamekatepua.
\v 18 Pahcha simiyamechio iꞌka cheemane, ki napati yooma eeme, aamo waꞌachitia inatakamekatapua. Pichikiamenia puꞌka waꞌa tiio tuuwameo, nape ki yooma.
\v 19 Neeea puꞌka ki amochitia Eesusichi teꞌta paparameo, poanatapuapua puꞌkao amochio, kaawe aamo nokisipuawichiopua waikao puꞌka Eesusi Aari Koꞌkaria inatepariopua.
\v 20 Eemea puꞌka poanatukameo, amochi itipisoopua Eesusi Aari Koꞌkaria inateparia, ki Eesusi Aari Koꞌkari enemii puuua, ki kaawe nokimekapapua waꞌao.
\v 21 Puuu amochi poanatamiaa, pahcha koayamekatapua keꞌchu yoomahka mochipanioipua koꞌkomiao, kihta tooeka neipa eꞌenameri koꞌkomiaopua. Wahjachi puuua tiameo, tísia nawajiamekatapua waꞌao.
\v 22 Puuua waꞌa nokayamea, ahpo petechi koꞌkosa eꞌenametepua. Puuu ki koꞌkosa eꞌenakamea waꞌao, suuwe erapo nokayamepua waꞌao, puꞌka waꞌa nokayopa waꞌao, maꞌchi ki Riosichi paparamea, naꞌareka tetewimapua waꞌa tiopachi teꞌta Riosichi paparameopua. Puuu neipa eꞌenakameaipua, teꞌta Eesusichi paparameaipua, kiisi kaawe erakomaoi puuua, kihta kitereriopua koꞌkometio. ¿Kaawekosa noꞌo eramio maayame eemea, puꞌka waꞌa aamo nokayao? Kaꞌiii. Kaꞌchitia.
\s Paamira Eesusi Aari Koꞌkari
\r (Maateo 26:26-29; Marako 14:22-25; Ruuka 22:14-20)
\p
\v 23 Neeea eenechi aamo chaanemania, taamo Paamira Eesusi Aari Koꞌkarichi simiyameo. Taamo Paamira Eesusia, kooame yoranurariaipua Semejenato pahkokoi koꞌkopuameo, ahpo ajawaria ahjama koꞌkopuameopua ariwatopio, puꞌka waꞌapi tukawarichi, noriwi nehjiretiame Eesusi Uurási tewaniameeo,
\v 24 koꞌkosepatioopao Semejenato pahkokoi koiꞌwameo, Eesusia waikao, piiripi paani uusa chiꞌwanasaopua, cheriwema kiasapapua Riosio, yooma ahpo ajawaria naachuterepua cheekao: “Ihji paania noꞌo weerewapua, noꞌo aamowichio pejanaka kiamía. Koꞌkomitiapua iꞌkao. Iꞌka noꞌo iintoao, yooraka mochitopuapua, iꞌka yooraio noꞌo inatepaka mochitopuawichioo, ihjia, ehpe waꞌapi aamo tatakoriawichioo, aamo pejanaka noꞌo iintomiaopua.”
\v 25 Waꞌa cheesaopua tiameo, iijipasoo toꞌwame uusaapua cheerepua: “Ihji paasochi iijiwaa, noꞌo eerapua wiꞌsumeri, noꞌo weemera kateweri yomatiame tiꞌtijoeriwichio ooweruriwichioopua tiame, pichiwatakaopua. Iꞌka noꞌo iintoaoiopua tiameo, yooraka mochitopuapua. Senepi iꞌka yooraio eemea, noꞌo aamowichio iintoria inatepaka mochitopuapua.”
\v 26 Pukaepa puꞌka taawechi oꞌinia, senepi yooraiopua iꞌka Paamira koꞌkariaopua paani, iijiriaopua tiame, Paamira iintoria inatepaka nokayame teemea.\fig |183-cn01804B.tif|col|||Eesusia ahpo eerako tuunapua ahpo weemera kateweri pichiwatameo, yomatiame wehjoarichi tiꞌtijoeriwichioo.|11:26\fig* Ahkasi Eesusi Riosie Weratiame eenachisi, waꞌa teetoka nokisimeri teemea.
\s Achini eꞌraka uupuame, iꞌka Paamira Aari Koꞌkari inatepasiwa
\p
\v 27 Puuu ki paparamea Eesusichio, ki koꞌkomeripua iꞌka Paamira paanio, paasochi iijiwaoiopua, kaꞌi. Aaata ki Eesusichi paparai iijisaapua, ki iyoriamepua Eesusi iintoriaopua, ahpo weerewaeo.
\v 28 Puuua, keꞌchu koayaiopua iijiaiopua puꞌkao, ahpo neꞌnesa iintometepua ahpo iikachio, kaawe ohjoarepua ki kaawe ohjoarekoi.
\v 29 Taamo Paamira Aari Koꞌkari ihsiaio koaka, ki Eesusi taamowichio iintoria inataka koꞌkakamea, kokosapuame puuua Riosieo.
\v 30 Pukaepa ki Eesusi ahpowichio iintorio inataka koꞌkakamea puꞌkao, aꞌchikoi ikikamepua kokorepakao, aaataa ahkasioi wahjipakamepua.
\v 31 Nape teemea kaawe taamo neꞌnekameo yooreminao, kihta seewemetepua Riosi kokosario, kihta aꞌchi tiiamekapapua tamochio.
\v 32 Nape Riosie itapiti iintoriawichio taamo teritiaa, ahpo iyoripua pepenipamichio ihsiamepua, nape taamo ki teꞌta kokosarie, kii ki Riosichi pichikiamechitia.
\p
\v 33 Poponiwa pipiniwa tiame, Eesusi Paamira aari koiꞌra inatepari koꞌkomia napawisaa, puꞌka piiripi paani chiꞌwanasa naachutetiaio, puuyepuapua puꞌka naachutakame koꞌkomioio, yoomahka pirena koꞌkopuawichiopua.
\v 34 Yooma aaata waꞌa napawiniachi eꞌenameria, ahpo petechi koꞌkosa eꞌenapuapua, ki chorowapuawichiopua waꞌa napawitiachio. Wahjachi itapiti katewepuameo, waꞌa enasa katewemania puꞌkao.
\c 12
\s Riosi Riosiwari aachin teeka taamo kiꞌya
\p
\v 1 Ehpeo noꞌo Riosichi poponiwa pipiniwaopua tiame, Riosi Riosiwari kuꞌiwarichi simiyame aamo nayewemane, ki waꞌatia itipimichiopua aamoo, ki pahtekao, Riosi Riosiwari kuꞌyao.
\p
\v 2 Naneꞌriame eemea aamoo, keꞌchu taamo Noono Riosichi paparoio Eesusieo, Satanasia ki mamachiriamechitia aamo panisutoriopua, riꞌriosi netetiamekamera paparatekaopua, puꞌka riꞌriosi netetiameo, kiisioi nayewamechiopua.
\v 3 Puuu waꞌa iintokamea, ki Riosi Riosiwari yahchamepua, aaata Riosi Riosiwarira yahchamea, ki waꞌa iintomiipua Eesusi naꞌarekao. Ki Riosi Riosiwari yahchamea, kaꞌchitia pichiwa paparamepua Eesusio ahpo teꞌta Paamirawako tuukao.
\p
\v 4 Teemea weeka aꞌchitiame taamo yeꞌkari iinuekao, piiripi Riosi Riosiwarie waꞌapi kiatiamepua.
\v 5 Teemea tiameo, weeka kaꞌkaruma aꞌchitiame yoramichio ajawatiamepua, puuu yooma ajawatiamea, apoe Paamirawichio nookemichio ajawatiamepua.
\v 6 Teeme taamo tiꞌtiopachio, weeka tiiame tehki iinuemepua, yooma puuu tehkia, Riosiwichio taamo kaawe teerepuawichiopua.
\v 7 Riosia yooma apochi paparameo, yooma naneꞌretiamepua ahpo Riosiwarichi simiyameopua, pukachi yasitoamekapapua Riosiwarirao iikachi, Riosiwichioo kaaweruma yoranarewa erateka.
\v 8 Piiripi puuu muuwari yeꞌkari taamo kiꞌyaa ihjipua: teꞌta peeneka naewaniame Riosichi simiyameo; piirea, tísia peeneka kaaweruma tuuyeniame, yooma puꞌkao, teꞌta Riosi Riosiwari ihsiamepua, puꞌka waꞌa tiiame taamo yoratekao.
\v 9 Aaataopua tiameo, Riosichi teꞌpa kahtiamechi paparatemichio, kiatiamepua; aaata wahjachi Riosichi paparame Riosi Riosiwarie kianiamea, kokoriame yachapatewa ihsimichio kiatiamepua;
\v 10 aaata epeche wahjachiopua tiameo, Riosi peenia ihsiwa nokimichio kiatiamepua; wahjachi pehjiopua tiameo, Riosi chiia aaata chaachapamichio kiatiamepua; wahjachia, itapiti seꞌwi masitia machika tetewimichio kiatiamepua; wahjachia, seesenu nayewa pepenipamichio kiatiamepua; wahjachiopua tiameo, aaata seesenu nayewa, taamo nayewachi maꞌchitamichio, kiatiamepua.
\v 11 Yooma iꞌka yeꞌkario, piiripi waꞌapi Riosi ihsikamepua, ahpo Riosiwarie kiꞌyakao, yoomahka pipiripio, ahpo eꞌraria nokisimichiopua.
\s Riosichi paparamea, yoomahka piiripi weerewachitia teꞌtereniame teemea
\p
\v 12 Teemea Riosieo weeka itapiti chuhchetiamekaipua taamo weerewachio, piiripi waꞌapi weerewakaite teemea. Waꞌachitia teemea ki ookapikai Riosie Weratiamechi paparamea, yooma teeme Riosie Weratiamechi ihchiamepua, piiripi weerewachitia.
\v 13 Waꞌa tiiapa teemea, yooma Riosi Riosiwari yachatoameapua tamochio, Riosie Weratiamechio, piiripi weerewa waꞌapi enepakamechitia, peꞌyachi isaeri tiꞌtijoekai, aaataai Riosichi paparameopua, seesenu tiꞌtijoekai, peꞌyachi puhku tiꞌtijoekai ki puhku tiꞌtijoekai, aaata tekipanameai, ki tekipanameai.
\p
\v 14 Taamo weerewaa, ki ookapi itapitie netetiamepua, ki piiripie.
\v 15 Pukaepa taamo taaraai cheesaa: “Ki seekarakapa neeea ki weerewachi ihchiamepua”, nape waꞌa chiiaipua, ¿ki ihchiamenakosapua weerewachio?
\v 16 Nahkaai cheesaapua: “Ki puusikapa neeea, ki weerewachi ihchiamenia”, nape waꞌa chiiaipua, ¿ki ihchiamekosapua weerewachio?
\v 17 Weerewaa puusiemeche enesaapua ki nahkaeme, ¿achini iika inamutamarepua puuua? Weerewaoi, nahkache iinueme enesaa ki yahkaeme, ¿ihtanae saaetamariame teeme?
\v 18 Pukaepa Riosia taamo weerewao, muuwaeme itapitieme neterepua, naneꞌriapa Riosia, yooma puꞌka taamo nakiriameekopua.
\v 19 Piiripi waꞌapi itapitie netetiame enesaa teemea, ki weerewa ahsepari enemiipua.
\v 20 Teemea ki ookapi itapitie netetiamekaiopua, piiripi waꞌapi weerewakaitepua.
\p
\v 21 Waꞌa tiiapa taamo puusia, kihta chaanemetepua seekao: “Neeeche piineriai soparamepua”, chaachapaniameo. Taamo moꞌoai ki cheemetepua taamo taaraoi: “Neeeche piineriai soparamepua chaniwameo.”
\v 22 Ohsotia ki teꞌta ahjaepuameka tiiaio, epeche tísia ahjaeniamekaitepua.
\v 23 Teemea taamo weerewachi yooremina noriwi tiiamea, ki teꞌta natewameka tiiaipua, epeche tísia nateyai tiiamepua. Teemea kihtawichio teteipuachi teetopuameo, moꞌporaka ohjoamepua wisasorieo,
\v 24 ki wahjachia taamo weerewachi iꞌtoachitiaopua, yooma teteiwachio. Taamo tetewiniachi iꞌtoaa, naatipua: taamo nanari, taamo taaraa, taamo seekaopua tiame. Riosia taamo weerewachi iintoriaa, itapiti ki nateyameka tiiamekoio, teꞌta tísia nateyame iintoriakaitepua taamo weerewachio, tísia tehkiemekopua puꞌkao, taamo weerewachio.
\v 25 Waꞌa tiiamekapa teemea taamo weerewachio, yooma taamo itapitiwa taamo weerewachio yooma pirena ahpo tísia kuꞌisika teetoamekaitepua teemea, taamo weerewachio.
\v 26 Waꞌa tiiachipa ihtaoi taamo weerewachi kokosa ikisoo, yooma taamo weerewachi itapitiraa, kokosa ikiwame saayamepua. Ahkaoi taamo weerewachi kokosa ikiria sautetiaa, yooma taamo weerewa itapitira taꞌiria itipiamepua.
\p
\v 27 Wée, yooma teeme Riosie Weratiamechi teꞌteriamea, Riosie Weratiame weerewarachi ki teteiwamechi itapitira teemea, yooma pipiripi ahka.
\v 28 Riosia Riosie Weratiame weerewara ki teteiwame itapitirao, yooma ihta yeꞌkari kiꞌyakamepua, yoomahka pipiripi ooweru tiame. Puuu yoomahka pipiripio, yomatiame wehjoarichi tiopachi kuꞌimichio kiatiamepua, iꞌka eee tiiame nokisipuame: paikapio Eesusie ajawatiame enemichio kiatiamepua, wahjachi puuu ki teteiwame weerewachi itapitirao, Riosi kaaweruma tuuyewari tuuyemichio kiatiamepua yeꞌkari, wahjachi tiameopua, masiteri yeꞌkaniame kiatiamepua; aaata puuua tiameo, itapiti peenia ihsiwa ki maaepori yoramichio kiatiamepua; wahjachi aaata puuua tiameo, kokoriame sautemichio kiatiamepua; wahjachi puuua tiameo, aaata peeneka kuꞌimichio kiatiamepua; wahjachi puuua tiameo, peeneka nuuremichio kiatiamepua; wahjachi tiameopua, seesenu naera penipamichio, kiatiamepua.
\v 29 ¿Naakonakosa yoomahka Eesusi ajawatiame enemichio kiatiamepua? ¿Naakonakosa yoomahka, Riosi tuuyewari enemichio kiatiamepua? ¿Naakonakosa yoomahka Riosichi simiyame masitemichio, kiatiamepua? ¿Naakonakosa yoomahka Riosi ki maaepori peenia ihsimichio, kiatiamepua?
\v 30 ¿Naakonakosa yoomahka, kokoriame sautemichio kiatiamepua? ¿Naakonakosa seesenu naera penipamichio kiatiamepua? ¿Naakonakosa yoomahka aaata pejana seesenu naera maꞌchitamichio, kiatiamepua? Kaꞌipua, kiisi waꞌa teeremeripua.
\v 31 Eemea ohso kaawe enemiipua, aachin teeka aamo nokisipuame iꞌyame enesaa, itapiti Riosi yeꞌkari aamo kiꞌyariaopua.
\p Ehpeo aamo neꞌnetemania aachin teeka epeche taꞌiria amochi mochitopuameopua.
\c 13
\s Nakiwarichi simiyame nayewaniame
\p
\v 1 Neeea weeka seesenu naera nayewaka machiaio, ahkasi Riosi kuꞌiwari naera nayewamekaipua, kihta tísia nakirewaka nayewiame enesaania, kihta nateyame enemiinia noꞌo chiiao, oowera teꞌochaniameka teeremiipua, oote kaꞌrame choniwamechitia.
\v 2 Yooma peeniamekainia Riosichi simiyame nayewakao, yooma yeꞌkainia tísia tehki tiiame pahtekao, ki nuꞌuti paparainia Riosichio, ahkasi kaawioi noonoteme tiiaio, waꞌa tiiame enesaania, aaata kihta nakiyame enesaoinia, kihta nateyame enemiinia, Riosichi teꞌta paparainia.
\v 3 Noꞌo iinuekaoi yooma aaata tesiwa tiiame ihko nehjakainia, noꞌo weerewaoi Riosiwichio kosoka manarikainia, kihtawichio nateyame enemii noꞌo iintoriaa, kiisi iinueme enesaania aaata nakirewaopua noochio.
\p
\v 4 Pichiwa nakiwari tiiamea, eee tiiamepua: ki yaapi eꞌriamepua aaatao; kaawe eꞌrewaka ihsiame aaataoi; kaꞌchi eꞌrame aaata epeche tiiamekoipua ki ahpochitia; ki ikotuwa eꞌramepua aaata epeche itapiti iinuekoio; ki ahpo oijeraka yasitoamepua; ki ahpo weruma tiiameko eꞌrameoipua;
\v 5 ki iinya chaaniame aaatao; ki iinya ihsiame aaataoi; apoeche peeneka yasitonariamepua; ki nekatuame aaatachioi; ki nekumeka itipiame;
\v 6 ki peenia eꞌriame aaata wenejitiameeopua, nape wenejiwa wihtuki machenasoopua, peenia erapame.
\v 7 Aaata pichiwa nakiwari iinuemea Riosiwichioo, eee tiiamepua: kiisi weꞌsapamepua ahpo Riosichi paparao; Riosi iintomo tuuria ahpowichioo, iintokache itipimeriko eꞌramepua; ihtaoi aiwaka yasitoaio, waꞌapi teeka yasitoamepua ahpo Riosichi oowe eꞌriao.
\p
\v 8 Nakiwaria waꞌapi teeremeri puuua, kiisi wahjiamesi. Piie taawechi wahka ihtoriachio, Riosichi simiyame nayewatuwaa kajumeriitepua waꞌasi. Riosichi simiyame seesenu naewarichi nayewatuniameai, kajumeriitepua. Kiisi nakipuamepua waꞌasio, yooma Riosi iintomo tuuriao, yomatiame tetewamekapa puꞌkao, Riosi iintomo tuuriao.
\v 9 Ehpiami yooma Riosi iintomo eꞌrariao, teesa taꞌwesame naneꞌreka mochitoame teemea, pukaepa teemea ki teꞌta ahsieme machiyaiopua taamo kajuyachisi pahtekao, aamo masitesiame teemea aamo tuuyewao.
\v 10 Nape puꞌka teesa taꞌwesame naneꞌreka taamo mochitoao, uꞌmatosoopa wahka ihtoriachi kajuyachio, yooma teꞌta ahsieme naneꞌrepuaitepua, maꞌchiáme.
\p
\v 11 Neeea nuꞌutikaio, nuꞌutichitia nayewakamenia, nuꞌutichitia inatakamenia, nuꞌutichitia eꞌrakamenia tiameo. Nape weripasaapa neeea, puꞌka noꞌo nuꞌutichitia teereriao, yooma uꞌmatokamenia noochio.
\v 12 Ehpe taawechiamiopua pehjio Riosichi simiyameo, teesa taꞌwesame tetewame teemea puꞌkaopua pehjio, itapiti nanarichari ki maꞌchiame taꞌwesame taamo tetewitamechitia. Nape yooma kawiyame naneꞌrepori asisoopua, yooma maꞌchiame tetewipuaitepua, waapi taamo nanarichi neꞌniamechitia. Ehpe taawechiamio, paikapi waꞌapi naneꞌreka mochitoniamepua pehjio, nape waika taawechio, yooma ahsepari naneꞌrepuaitepua, yooma Riosi taamo naneꞌrejeriaopua.
\v 13 Iꞌwa wehjoarichi taamo mochikoiopua pehjio, paika itapiti yooraka mochitomeri teemea, puuu paikaa ihjipua: taamo Eesusichi paparapuamepua; piirea, Riosiche taamowichio iintomo tuuria, oowe eꞌreka mochitopuamepua; piirea tiameo, taamo teꞌta nakiwari iinuewapua ahpoo, Riosichi tiame. Nape teꞌta nateyamera iꞌka paikachi simiyameaa, taamo teꞌta ahpo nakiwarikamerapua, taamo Noono tewekachi kahtiame nakiniameopua tiame.
\c 14
\s Seesenu naewari nayewaniame
\p
\v 1 Waꞌa teeresoo, Riosichi ahpo kaawe teꞌterewa tetewitenariaa, kaawe aamo neesetoka ihsiwamepua kaawe nakika nayeweniame aaatao. Iꞌyaka mochitopuapua amochio, aachin teeka nokisipuameopua, puꞌka Riosie aamo kiaretia yeꞌkario; nape teꞌta Riosichi simiyamekamera tetewiteka, ahpo kaawe eꞌreka kipoteka Riosichi simiyameo nayewaniamepu napawitiame mochikachio, puꞌka napawitiachi mochikameo, waꞌapi naerachi nayeweka.
\v 2 Nape aaata waꞌa eenakame enesoo, ki waꞌapi naerachi nayewasisoo, aaataai waꞌa napawikamea kihta pahtemapua puꞌkao seenukopa ahpo nayewao. Apoeche naneꞌremapua ahpo inatarichio, ahpo chiiaopua, nape napawikamea kaꞌi.
\v 3 Nape aaata waꞌa napawitiachi naerachi nayewamea, maꞌchiame nayewiamepua napawikameo, teꞌta Riosi chaanenariaopua puꞌkao, ihtaoiwichiopua kaawe erapatepuawichiooi, oisa erapatepuameoipua Riosichi teꞌta teꞌteretoaopua.
\v 4 Aaata ahpo seenu naerachi nayewiameapua wahka napawitiachio, apoeche ahpo teꞌta teerepamepua Riosichio, nape puuua napawikame naerachi nayewesaapua, itapiti Riosichi simiyame kaawerumaopua, yooma ahpo keepuria tiame Riosichi teꞌta teꞌteriame enepatiamepua, ki ahpoche piineri.
\p
\v 5 Yooma eeme Koorintio tiopachi mochikamea, kaawe enemii seesenu mochiwachiami naera pepenipakame enesaa, puꞌka seesenu nayewameo, seesenu naewachi kipotepuawichio itapiti Riosi kaꞌkaruma tuuyewario. Nape epeche kaawe eꞌriamenia aamo waꞌapi mochikachikamera aamo teꞌta naerachi teꞌta yeꞌkaka nayewaniameopua, aamo ahpo kipotekaopua, itapiti teꞌta Riosie kaꞌkaruma tuuyewari aamo tetewiteriaopua aamo pahterichiopua, waꞌatiao yoomahka aamo napawiriachio, teꞌta maꞌchiame pahtemichiopua. Nape aaata seenu nayewame asisoopua waꞌa aamo napawiriachio, aaata waꞌa aamo napawiriachi nayewaniame machiyame uusaa, pukachi nayewama puuua ahpo seenu naerao. Waꞌatiao yoomahka pahtemeripua waꞌa napawitiachio, puꞌka seenu eenakame uꞌparia chaanenariaopua.
\v 6 Waꞌa tiiachipa tiameo, Noꞌooi piirechi mochiwachi seenu naewaniame amochi eenaka nayewesoo, kiisi noꞌo pahtemiipua. Nape noꞌo aamo waꞌapi naerachi nayewesoopua aamo napawiriachio, ihtaoi teꞌta naneꞌrepori masitemichio Riosie noꞌo kiaretia amochi upamichioopua, tísia maꞌchiame noꞌo pahtemeri eemea.
\p
\v 7 Teꞌta kawiyame nayewaniame simiyame nayewakao, iꞌka aamo chaaniamenia. Ihta itapiti cheeteniameai, machika inamupuawichio netetiamepua tiameo, ahpo iiyena ihkepariopua. Itapiti cheeteniame pakapuchera aꞌrapaoiopua, ki machipuame ihkepame netetiame enesaopua ahpo iiyenao, ki aaata pahteme teeremiipua cheeteniao.
\v 8 Soꞌsontaroai nasiwapuachio, ki maꞌchiame turupuchatioopua nasiwapuame oꞌinepuawichioo, ki naneꞌremiipua nasiwari oꞌinepuachio.
\v 9 Waꞌachitia teemeai aaatao, ki machipori tiame taamo ihkepasoopua aaataoi ahpo naerachio, ¿taamo pahtemanapu aaataa? ¡Oowera nayewatiame enemiipua eekachi!
\v 10 Iꞌka wehjoarichio, ki ookapi naera yeenieniamepua, yooma puuua pahtewari tiiaemepua.
\v 11 Nape ki pahtiame enesaania noꞌo aaatae nayeweniameo, seenu enemiinia puꞌka aaata nayewao, puuu aaataai seenu enemiipua noꞌo nayewaoi.
\v 12 Eeme tísia kuꞌinariamea aamo Riosichi teꞌteretoachio, aamo Riosie kiaretia yeꞌkarie kuꞌipuapua, aaata kuꞌiwa nakiyameo. Nape teꞌta Riosi yeꞌkari aamo kiaretiae teetopuapua, epeche Riosichi paparame enepamichiopua.
\p
\v 13 Aaata aamo napawiniachi seenu mochiwachi eename enesoo, ki aamo napawiriachi naera naewame enesoopua puꞌkao, waꞌa ohjoepaka enesoopua, waꞌapi napawiniachi nayewaniame penipanurepuapua puꞌkao, Riosichi ahpo kuꞌiwa itakao. Teesaoi penipasaopua aamo napawiniachi naerao, teesaoi maꞌchiame iiyenanariaopua ahpo chaninaria aamo naerachio, kaawe enemapua.
\v 14 Aaata waꞌa aamo napawiriachio, ahpo naerachi paparaka nayewesoopua Riosio, apoe waꞌapi ahpo pahtewachichewichio nayewame enemiipua Riosichio, ki waꞌa napawikame pahtewachiwichio.
\v 15 Waꞌa tiiachio, ¿ihtana noonowita teemea? Aaata taamo napawitiachi Riosichi nayewesaapua, ahpo naerachi eꞌraka nayewametepua Riosichio, nape waꞌapi napawikame naerachi paparaka Riosichio, yoomahka waꞌa napawikameo, maꞌchiame pahtemichiopua. Taamo nanapawiachi wikataniamea tiameo, taamo iikachi oꞌinia pajename eꞌrarie, wikatamete teemea, yooma pirena Riosichi wikataio, nape waꞌapi napawikame naerachi, yoomahka maꞌchiame pahtepuawichiopua.
\v 16 Waꞌa aamo nanapawiachio, aaata ahpo naerachiche pahtia Riosichi nayewasoo, ¿aachin teeka puꞌka ahjama Riosichi paparatapu napawikamea, ki ahpo naerachi nayewetiame enesoopua, Riosichio? Puuu napawikamea kiisi pahtemiipua puꞌka aaata chiiao, ihtaoi puꞌkao, Riosichi cheeriao.
\v 17 Puuu aaata Riosichi paparariaa, tísia kaaweruma enetarepua eneyao, nape aaata ahjama Riosichi paparamea, kihta kaawe teeremiipua Riosichi kaawe teꞌtereniameopua.
\v 18 Cheriwema kiꞌyaninia Riosio, epeche seesenu mochiwachiami naerao, epeche yeꞌkamekapa nayewakaopua ki aamochitia.
\v 19 Nape waꞌatiai neeea tiꞌtiopachiamio, ohso kaawe marikioi waꞌapi napawitiachi pahteniame nayewanariamenia, maꞌchiame pahtemichiopua napawikameo, ki oosa mariki miiri ahka noꞌo seesenu naerachi nayewaniameopua, kihta pahteme tiiamekoopua.
\p
\v 20 Eeme Riosichi poponiwaa pipiniwaa tiamea, aamo nanapawiachiopua, aamo ahjaewa iꞌka seesenu mochiwachiami nayewaniameo, paꞌpamura inatachitia kaawe inatapuapua, ki kukuchi nuꞌnunti inatari inatachitia. Nape aamo Riosichi teꞌterewachiope, kukuchi nuꞌnuntichitia teeremete eemea, ki itapiti tatakorichi inatame tiiamechitia pehji.
\v 21 Puuu seesenu mochiwachi nayewaniame ahjaeniamechi simiyameo, taamo Paamira Riosia ehkoriamio, iꞌka cheeka cheekame eneriaipua iꞌka Iyoterichio: “Neeea iꞌka tiꞌtijoerio, seesenu tiꞌtijoeri naerachie nayewemania, aaata piirechi kuꞌiwae, nape aaatae ahpo naerachi nayewetiaio, kiisi noꞌo eꞌwemeripua.”
\v 22 Waꞌa teesoo seesenu naera pepeneniamea kaawe tiiamepua, ahkaoi seesenu nayewaniachi eenakaiopua, ki Riosichi paparaniachiopua pehjio, waꞌapi mochiwachi naerachi masitepuawichiopua, itapiti Riosichi simiyameo. Neipao waꞌapi nanapawiniachi mochiwachi ohjoemea, teꞌta Eesusichi paparame enepasapaopua, aapoe waꞌapi ahpo naerachi nokisimeripua masitekao, Riosie apochi enatesiaopua masitepuao.
\v 23 Nape waꞌa aamo Koorintio tiopachio, ki ookapi Riosichi paparame seesenu nayewame aamo tiopachi enasoo, puꞌkao ahpo seesenu naerachi Riosichi simiyame naewasisoo, aaata waꞌa aamo tiopachi eenakame Riosichi simiyame penipanariamea, puꞌkao ahpo seesenu naerachi naewachaniame inamukapaopua, rooroikame maaepamapua puꞌkao.
\v 24 Nape waꞌa napawitiachio ahpo naerachi yoomahka puꞌserenioipua Riosichi paparaniameo, aaata waꞌa eenakamea ahpo naerachi naewaniame inamukamea, ki Riosichi paparamekaipua pehjio, tísia kaawe ihsiame nayewaniame inamukapaopua Riosio, Riosichi paparamo erapamaoipua tiameo, ahpoo ki kaawe ihsio, yooma toinarepakaopua.
\v 25 Waꞌa erapasaapua ahpo iikachio, chopokorieka weripaka ahpo maꞌchitamapua Riosichio, yooma ihta ahpo noriwi iintoriaopua. Waikaopua, waꞌa tiopachio, Eesusichi paparamichio paaetiai tiiamekapaopua Riosieo, chanimapua: “Pichiwa Riosia iꞌwa tiopachi ihsiamepua, aamo tiopachi napawiniachiopua.”
\s Aachin teꞌterepuame tiꞌtiopachio
\p
\v 26 Eeme Riosichi poponiwaa pipiniwaa tiame aamo tiꞌtiopachiamio, eee teꞌterejeramenia. Ahkaoi aamo tiopachiami napawiniachi enapameo, kaawe eꞌraka teepotaka asitejeraninia puꞌkao. Waꞌa napawitioopua, Riosichi simiyame nayewajeraninia waꞌao, iꞌka eee tiiamechitia: wikataka pepeniamea, Riosiwichio chaniwame wikatamapua, yoomahka pirena, oꞌokaoi Riosiwichio wikataka; aaatao waꞌa napawitiachio, itapiti Riosi ahpo pahtewari tetewiteria, masitemapua; aaata seenu mochiwachiami nayewaniame nayewanaresaa, aaata waꞌapi naeraeme uusaa, pukae nayewamapua. Waꞌatiao yoomahka pirena pahtemapua puꞌka waꞌa asikame cheeriao, maꞌchiame nayewatiopua ahpo naerachi.
\v 27 Nape seesenu naewamea waꞌa napawitiachio eꞌenasoo, ookaoi paikaoiche waꞌasi muika nayewajeraninia puꞌkao, nape aaata waꞌapi napawitiachi naera nayewame uusa, waꞌa tiiao yooma waꞌa napawikame maꞌchiame pahtepuawichioo.
\v 28 Nape ki iinuemea ahpo nayewa maꞌchitamerio, waꞌatia itipimeripua kihta naewaka waꞌa napawitiachio. Ohso kaawe teesaoi pahtiame enesaopua waꞌa napawiniachi nayewaniameo, apochiche inataka keepumapua Riosichi simiyame.
\v 29 Waꞌa mochiwachitia naeraemea, ookapioi tiꞌtijoeri Riosichi simiyame nayewamia werisika nayewakooi, kaawe enemapua. Wahjachi waꞌa napawitiachi keepuamea, oowera ahpo inatarichiche kaawetame enemapua, puꞌka muikame chaachapariaopua, kaawe tiiame enesoopua apochio.
\v 30 Aaata keepuameai, itapiti Riosie ahpo kuꞌitiame ahpo inateparia nayewanaresoo puꞌkao, reesisepuapua, nape nayewaka ihsiamea teewemapua pahchuo.
\v 31 Waꞌatiao aaataai iinuemapua itapiti ahpo chanimiao, waꞌa napawitiachio. Waꞌatiao yoomahka ahpo pirena nokisimapua Riosichi simiyame pepenipachiopua, yoomahka ahpo weemuteka.
\v 32 Yooma aaata waꞌa aamo napawitiachio nayewanariamea, kuꞌwitapi waꞌapi nayewametepua, ahsepamichiopua piirechiwichioo nayewamichioo, itapiti ahpo cheenariao.
\v 33 Waꞌa aamo teꞌteretosoo kaawe teꞌteretoma eemea aamo napawitiachio, ki wekapuwa teꞌteretoka aamo napawiwachio.
\p Ehpe taawechiami taamo teꞌterewaa taamo Riosichi teꞌteretoame nanapawiachio,
\v 34 ki reesiseniame oowerua napawitiachi naewamichioo. Oowerua ahpo kuunache neesetotere mochitomeri puuua, ehkoriami Riosi nuurario, waꞌa chiiamekopa.
\v 35 Oowitiamea itapiti epeche naneꞌrenaresaa waꞌa napawitiachi masitetiameo, petechi enasa iinatukemapua ahpo kuunao. Waꞌa nokisijeraninia, taamo Riosichi teꞌtereka mochitoniameopua napawiniachio, ki kaawe tiiamekopa, napawitiachi ooweru werisika nayewaniameo.
\p
\v 36 Eemea kaawe neesetoka mochitomitiapua, iꞌka Riosi kaꞌkaruma tuuyewari Eesusichi simiyameopua noꞌoe aamo masiteriao. Ihji Riosi kaaweruma tuuyewario, ki aaata aamoe mehtanakamekopua, ki aamoche uꞌyepatiamekopua amochi uumichioo.
\v 37 Aaata piire waꞌa aamo napawitiachio, yooma Riosichi simiyame ahpo penipakame maayamea, ahpo teꞌta Riosi ahjama yasito eꞌrameoiopua, maꞌchiame naneꞌremete puuua, iꞌka noꞌo aamowichio iyoteka chiiao, Apoe Paamira teꞌta eenamekopua puꞌkao.
\v 38 Puuu ki uuka tetewisaa iꞌka Eesusichi eename noꞌo masitiao, kaꞌte reesisemitia puꞌkao, waꞌa aamo nanapawiachio, masitemichioo.
\p
\v 39 Ehpeo neeea, iꞌka teꞌta aamo chaaneka kajunarenia. Waꞌa aamo napawiniachio, aamo waꞌapi naerachiche nayeweka masitepuapua, ihtaoi itapiti Riosie aamo penipatetiao. Kaꞌte waꞌinemitia aaata ahpo naerachi nayewamichioopua, waꞌa aamo napawiriachio,
\v 40 noꞌoeche aamo tuuyeriatiachiche teꞌteretopuapua, ki wekapuri teeretomichiopua waꞌa aamo nanapawiachio.
\c 15
\s Riosie Weratiame eenechi ahjaria
\p
\v 1 Ehpeo neeea, Riosichi simiyame eenechi aamo inatepatenarene, Riosi kaꞌkaruma tuuyewari noꞌo aamo nayeweria, puꞌkao aamo uuka mochitoameopua waꞌasi.
\v 2 Puꞌka Riosi tuuyewarichi ki seꞌwika mochitokamea, pukae newipakame eemea aamo tatakoririao, nape ki oosa aampa Riosichi paparamia toisaapua ahpo Riosichi paparao, kihtachi itipima puuua waikao, ahpo Riosichi paparariao.
\p
\v 3 Puꞌka tísia nateyamera tuuyewari aamo masitekamenia, puꞌkao Eesusie waꞌapi noꞌo masiteretia. Neeea Eesusi Riosie Weratiameo taamowichio pejana mukukamekopua, aamo masitekamenia, teꞌta Ehkoriami Iyoterichi chanitiamechitia.
\v 4 Ehkoriami Iyoteria cheeriaipua tiameo, Eesusi Riosie Weratiameo, mukukai katewetiaiopua, paika taawechi ahjamerikopua eenechio.
\v 5 Puuu Eesusi eenechi oijenasaapua neipao, Peero machejenerepua pahchao, Seeja teewataniameopua tiameo. Puꞌka meeriamio waikao, ahpo ajawaria machejenerepua tiameo, ahpo oosa mariki piiripi ajawaria.
\v 6 Epeche meeriamio, uꞌmatoame mariki siento mochikame machejenerepua tiame, ahpo Riosichio poponiwa pipiniwaopua tiame. Puuu Riosichi poponiwaa pipiniwaa tiame, uꞌmatoame naasipasi mochitoamepua pehjio, wahjachia wahjipakamepua puuuapa.
\v 7 Puꞌka meeriami neipao, Saantiao machejenerepua waikao, epeche neipao, eenechi puꞌka ajawaria machejenerepua waikao, yooma puꞌka oosa mariki aampa piiripi ahpo ajawaria.
\p
\v 8 Waꞌasi weeka taawechi neipamiopua, noꞌokamera machejenakapua waikao, waꞌasi kuwachi ahpo weeraria enemichiopua, aaata kuita ahpo naawamiachi, uꞌmatotekamechitia.
\v 9 Neeea Eesusie noꞌo weratiameo, ki teꞌta noꞌo weruma tiiamerako eꞌramenia, kiisikoi, Eesusie weratiame noꞌo tewapuame maayamenia, pukeri oꞌiniaopua neeea, naꞌara yoramia naanarika oikamekapa Eesusichi paparameo, ahkaoi tiꞌtiopachiamio.
\v 10 Nape waꞌa teerekameai neeeapa puꞌkao, Riosieo cheriwetiameniapa puꞌkao. Riosie noꞌo cheriweriaa, ki waꞌatia kihtachi itipikamepua, Riosi noꞌo tesiweria kuꞌiriaeo, noꞌoo epeche tehki yoorakamekopua, ki wahja Eesusi ajawatiame pahcha yoorariachitia.
\v 11 Riosie Weratiamechi aamo nayewetiamea, aaata enekoipua aamo nayewekameo, kaꞌchitepua, Eesusi ajawatiame enerioio, noꞌoeoi. Yooma teeme Eesusie ajawatiamea, puꞌka Eesusi chaachapame teemea, nayewatukao.
\s Wahjipakameopua eenechi kiapuamepua ahjari
\p
\v 12 Taamoo puꞌka Eesusio maꞌchiame oijenako chaachapoio, nape eemea aaatao, ki taamo pichikiamepua. ¿Achini iikai ki taamo pichikiamepua, teemea Eesusio ahjakame tetewikamekoipua? ¿Achini iikai waꞌa tiioio, kiꞌtio tuuna eemea, eenechi ahjaniameo?
\v 13 Kiteresoopua eenechi ahjaniameo, waikao Eesusiai, ki oijenakame enemiipua.
\v 14 Eesusio ki oijenakame enesoopua, kihtawichio enemii taamo nokariaa, Eesusi oijenaria nayewatutiamea. Waꞌa teeresoo, aamo Eesusichi paparariaio, kihtachi itipimiipua.
\v 15 Waikao wahjipakameo, kiteresoopua oijenaniameo, teemeai waikao wihtuki chaachapariame enemiipua, Riosi ahpo Taana Eesusio, Apoe oijenaterio tuutiameo. Waꞌa teeresoopua, Riosio ki oijenaterioopua ahpo Taanao, pichiwa kiꞌtiame enemii oijenaniamea.
\v 16 Eenechi chaaninia, eenechi ahjaniameo kiteresoo, waikao Eesusiai, kiisi oijenakamepua waꞌa teesoo.
\v 17 Riosie Weratiameo ki oijenakame enesoo, taamo ahjachi paparariaai, kihtawichio kaawe ikitiame enemeriipua; taamo tatakoririaai tiame, kihta cheriwetiame itipikame enemiipua; teemeai tamochio, ki iinuemii teemea, weemera ahjario.
\v 18 Ki teemeche ki weemera ahjari iinueka itipimiipua, waikao wahjipakameai Riosi Taanarachi paparakao, waꞌachitia itipimiipua tamochitia, kihta weemera ahjari iinueka.
\v 19 Taamo Riosie Weratiamechi paparariaa, iꞌwa wehjoarichiche nateyame enesoo, ki nuꞌuti wihtuki aiwameri teemea tesiwa iikao.
\p
\v 20 Nape Eesusi Riosie Weratiamea, teꞌta pichiwa oijenakamepua, keꞌchu aaata oijenaoi, ki wahjiamechi ahjarichio. Eesusi oijenasoo tewekachi apechunatiamea ahpo Noonoe, pukeri pahcha simiyame iꞌipari, apechunatiameka tiiamepua weemera ki wahjiame ahjarichiopua.
\v 21 Wahjipaniamea, piiripi tijoe waꞌapi ki iyoririopa, oꞌinesikamepua. Waꞌachitia eenechi ahjaniameai weemera ahjarichi ki wahjiniameo, piiripi tijoee waꞌapichi oꞌinesikamepua tiame.
\v 22 Yooma Aaranichitia tatakorikamea, wahjipameripua, ki iyorika mochitoriapapua Riosichio. Nape yooma Eesusichi paparakamea, eenechi ahjatepuamepua Riosieo, weemera ahjarichio.
\v 23 Nape puꞌkachepa puuu weemera ahjarichi ahjatepuamea, eee teerekapua: pahchao, Riosie Weratiame ahjatetiamepua ahpo tewekachi Noonoeopua tewekachi kahtiamee apechunatiapa, puuua itapiti pukeri iꞌipari apechunakameka iintokamepua; neipao teeme yooma Eesusi ijinuwaraa, weemera ahjarichi oijenatepuamepua tiameo, Eesusi teꞌta enasoopua, iꞌka wehjoari kajuyachiopua waꞌasi.
\v 24 Waika kajuyachi taawechio, Eesusi Riosie Weratiamea, waꞌa yomatiame newitosaapa ahpo seepurawaopua waꞌasio, yooma itapiti ahpo newitoriaopua, ahpo Noonochi upamapua, Apoe Teꞌta taamo Noonochi, tewekachi kahtiamechi.
\v 25 Nape keꞌchu ahpo Noonochi upatioiopua ahpo newitoriao, Eesusia yawichitumeripua pehjio, ahkasi ahpo Noonoo ahpo taaratere toapachisiopua, yooma ahpo seepurawaopua. Waꞌa teeremeri Riosie Weratiamea, waꞌa chiiopa Ehkoriami Iyoterichio.
\v 26 Waꞌa ikitioopa waꞌasio, mukiwarioopua ahpo seepurawao, kiterepatekame enemapua waꞌasio, taamoo ki wahjipame enemichiopua waꞌasio, ki seena aampasi ki wahjiamesi.
\v 27 Eesusio, ihji Ehkoriami Iyoterichi yomatiame ahpo taaratere toapapuame chanitiamea, ki Apoe Noonorakamera taaratere toapuameko tuutiamepua. Apoe Noonorakamera iintomerikopua ahpo Taana taaratere toapakao, yomatiame ahpo Taana seepurawao.
\v 28 Waikao Riosi Taanaraa waꞌapio ahpo Noonoo, neipa yooma ihtaoi ahpo taaratere eenepatesoopua newitotekao, yooma ahpo newitoriaopua ahpo Noono kiameripua, ahpo Noono Apoe Riosiopua, yomatiame aampa teereka yasitomichiopua.
\p
\v 29 Kiꞌtiame enesoo eenechi ahjaniameo, ¿achinikai aaata tijoea, aatia ahpo paatoamepua aaata mukukamewichio puꞌka mukukameo newipatepuawichioo? Kiteresoopua oijenaniameo, ¿achinikai waꞌa nokayamepua erakokao? Ki teeresoo eenechi ahjatepuameo, ¿waꞌana nokimii puuua?
\p
\v 30 Kiteresoo oijenaniameo, ¿noꞌo maaporichina teeretotamarenia senepi taawechio, yooma taamo Eesusi ajawariaa?
\v 31 Kiisi waꞌa eꞌramenia noochio, senepi taawechi mukime teetoamekaipua, Riosie Weratiame nayewatoapaopua, Riosie Weratiameopua eenechi ahjario tuuyapao. Neeea oijenaniameo, pichiwa teꞌta waꞌa teeremio eꞌrame neeea. Neeea noochio kaawe eꞌramepua aamoo tiameo waꞌachi erakoamekopa. Aamoo noochitia erakoamekoopua, Riosie Weratiamea amochi inisiamepua aamo kaaweruma teetotesikao.
\v 32 Kiteresoo oijenario noꞌo puuu oorichi noꞌo nasiwaria Eejesioo, ¿ihtana yowika machenatania, puꞌka waꞌa noꞌo iintoriao? Kihta kiteresoo eenechi weemera ahjario, ¿ohso kaawe aꞌchikoi nokitariarepua naaju, kihta inatakache koakao, oowera itapiti tísia taamo puꞌserewaoiopua nokaka, ahkasi waꞌa nokakaopua wahjipakao?
\p
\v 33 ¡Kaꞌíí! Kaꞌte aamo wisikuete eemea. Kaꞌte waꞌa erako eemea, kiꞌtio erakokaopua eenechi ahjaniameo, pukae waꞌa erakotetiame enesaa, yooma eemea waꞌachi erakotepuamepua pukaeo.
\v 34 Aamo waꞌa tiiame Koorintio tiopachi masitiame, aamoo chaaniamenia: “Teewemitia eemeapa waꞌa tiiame tatakorikao, waꞌa tiiame masiteniameopua. Waꞌa aamo chaaniame neeea, aamoo suuwe erapamichiopua. Aaata eeme waꞌa tiiame masitiamea, teesaoi kihta machiyamepua Riosichi simiyame.”
\s Achini teeka ahjameri eenechi wahjipakameo
\p
\v 35 Aaata eemea chaachapaniarepua: “¿Achini iika ahjatariapua eenechio, wahjipakamea? ¿Aachin tiame enetapu weerewaraa?”
\v 36 Puuu waꞌatiame inataniamea, ki inatame inatarirapua. Itapiti iimoria yaupamiaa, mukuyamekatepua pahchao, esorapaka aaperao.
\v 37 Pukeri echiwaa, pahchirachepua. Yaupasaopua, sewina tiame yaupamepua, ihta pahchirakai, tiirikooi, suunuooi.
\v 38 Waꞌa ikiyame puuua, Riosi ihsiamekopua weerewa kiꞌyakao, aachin tiame enemerikopua oowarao, yooma ihta echitiameopua.
\v 39 Yooma ihta weerewaa, ki ahpo waꞌachi teꞌtiamepua. Weerewaa iintunapua: tijoe weerewa, animari weerewara, tuchiki weerewara, soꞌchi weerewara tiame.
\v 40 Yooma tewekachi iintuameai, seesenu tiiame weerewaemepua, yooma itapitia, ki iꞌwa weeechio teꞌtiamechitia.
\v 41 Taaa piiripi tiiaemepua, meechaai piirechi tiiaemepua, soꞌporiai piirechi tiiaemepua; soꞌporiai, ahpo waꞌapio seesenu teꞌtiamekaitepua tiame.
\v 42 Waꞌachitia teemeai, eenechi oijenasaa, seenu weerewa teꞌteremeripua. Iꞌwa weeechi weerewa taamo mukiso wetemajiniamea, ki tehpe eꞌramepua, pikayamepua esoratupakao; nape eenechi ahjaniame weerewaa, ki wahjiamesi enemeri puuua, kiisi esoratukao.
\v 43 Taamo weerewa wetemajisa itipiniamea, yooma ihta itapiti iinyatiame taamo ikiriao, pujaka toiniamepua. Taamo eenechi ahjatiame weerewaa, kihta itapiti iinya tiiame iinuemeri puuua. Taamo weerewa mukusa wetepasa toitiamea, iꞌka weeechi echisa toitiamekate puuua, weemera ahjarichi tewekachi naawamiapa, weemera weerewakamera uuka, yooma teeme, ooweruai. Puuu weerewa wehtere toitiamea, oꞌochetupaka esoratupamepua. Nape taamo weemera weerewa eenechi taamo ahjatetiamea, kihta kaꞌchi ikiwame enemeripua, kokorepaniameo oꞌochetupaniameoi, yaꞌwatupaniameoi.
\v 44 Iꞌka weeechi weerewao echiwamechitepua, tewekachi weerewa enepamiaapapua. Waꞌa teesoo teemea, ki iꞌkache weerewa teeremerikaite teemea. Piiripi weerewaa, weeechiwichio taamo ohjoremichio weerewatetiamepua; piire taamo weerewaa, tewekachi taamo ohjoremichio weerewatepuamepua.
\p
\v 45 Ehkoriami Iyoterichio chiiamepua: “Pukeri pahchi Aaranio Riosia, iꞌwa weeechi ohjoremichio ahjari yahcherepua.” Neipa Aarani Eesusi tewaniamea, Apoe taamo Paamira Eesusi puuua. Puuu Eesusia, Riosi tiiarie tijoetutetiamekapaopua iꞌwa wehjoarichio, tewekachi ahjari tiiaeme puuua. Waꞌa tiiapa puuua, tewekachi tiiame ahjari taamo kiꞌyame puuua, ahpo Eesusi ahjama ohjorepuaichiopua.
\v 46 Nape pahchao weeechi ahjaniame kiatiame teemea, neipao tewekachi ahjaniame.
\v 47 Pukeri naayachi Aarani tijoe, weꞌee netetiamepua, iꞌka wehjoarichi ohjoemichio. Neipa simiyame Aarania Eesusi, tewekachi oꞌinia eenaka naawakamepua, tijoe enepaka, nape Riosi tiiari yahchame.
\v 48 Yooma weeechi tijoetukamea, naayachi oꞌinia netetiame weerewa iinuemepua, iꞌwa weeechiche ohjoepuame. Yooma weemera ahjari kiatiamea, tewekachi ohjorepuame ahjari kiatiamepua.
\v 49 Yooma iꞌwa weeechi ohjoemea, pukeri Aaranichitia weerewaemepua. Yooma tewekachi ohjoemeria, Riosie Weratiameka tiiame weerewaemeripua.
\p
\v 50 Noꞌo Riosichi poponiwa pipiniwaa tiame, tísia kaawe inataka noꞌo keepumitia iꞌkao, iꞌka aamo chaanemiao: Iiweta iꞌka weerewa eeraemechi ahjaapua pehjio, kaꞌchi iika ohjoremeri teemea tewekachio, Riosi ohjoekachiopua. Taamo weerewa esoratupamea, kaꞌchi iika tewekachi iꞌtopuamepua, ki tehpesi eꞌramekapapua.
\v 51 Ehpeo, kaawe keepumitia iꞌkao. Itapiti ki yoomae naneꞌreniame pehji, aamo tuuyemane. Riosichi paparakamea, ki yoomahka wahjipamerikaite puuua. Waꞌatia puuua ki mukukaio, sewina ijikimeripua weerewao.
\v 52 Puuu waꞌa ikiniamea, seenepi kupipari ikiwachi ikimeripua, turupuchari kajuyachi chaachamiachiopua. Puꞌka waꞌapi turuwari chaachachio wahjipakamea, ki wahjipakameaiopua pehjio, weemera weerewapameripua.
\v 53 Puuu weerewa naꞌituamea, ki naꞌituame weerewachi enepatepuamepua. Mukiwame weerewaa, ki mukiwame weerewachi enepatepuamepua.
\v 54 Puuu weerewa naꞌituamea, ki naꞌituame weerewachi enepatetioopua, puꞌka weerewa mukiwameo, ki mukiwame weerewachi enepatetioopua, kiteremeri waꞌasi wahjipaniamea, ehkoriami iyoterio teꞌta chiiachitia, Riosio ehkoriamio eee cheeriopa:
\q1 Mukiwamea, newitowae koꞌkotiamepua waꞌasi,
\q2 kitereparepua waꞌasi.
\q1
\v 55 Aa muuu wahjipaniamea,
\q2 ¿achini iikamemua aamo newitoriraa?
\q1 Ai muuu wahjipame toaniachio,
\q2 ¿akana akiparu muuua tísia kokosa yoorameai?
\p
\v 56 Mukiwari taamo ikitiamea, tatakori puuua. Tatakoria taamo poanatamepua Riosichio teꞌta mukukamechitia Riosiwichioo, Riosi nuurario waꞌa tiiame maꞌchitamekopapua.
\v 57 Nape Riosia, taamo newitori kiꞌyariopaopua tatakorichio, taamo cheriwemeripua yooma ihta taamo tatakoririao, ahpo Taana Eesusi iintoriaeopua, puꞌka Apoe taamo Eesusi Paamirao, apoe Riosi weerakamekapapua puꞌkao.
\p
\v 58 Pukaepa tísia noꞌo nakiya poponiwaa; pipiniwaa tiame, pewatiame mochitopuapua Riosichio, ki ikicha paparaka taamo Eesusi Paamirachio, taamo Paamira Eesusi tehkirachiche yorasika, epeche epecheche nokisika Riosi tehkiwachio. Naneꞌriame eemea aamoo, Eesusi Paamirawichio aamo nokariao, kiisi waꞌatia kihtachi itipimerikopapua puꞌkao.
\c 16
\s Riosichi paparamewichio kuꞌipua naꞌpoatiame
\p
\v 1 Ehpeo neeea aamo noꞌo Riosichi poponiwao pipiniwaopua tiame, toomi naꞌpoaniamechi simiyame aamo nayewamane, wahjachi Riosichi paparame kuꞌiwa nakiyamewichio, teꞌta Kaarasia tiopachi mochikame noꞌo masiteriachitia.
\v 2 Iꞌkao eemea, senepi pahcha weeriame oowisari taawechio, yooma pipiripi eeme naꞌpoasipuapua toomio, waꞌa noꞌo eenoio ki pukeri naꞌpoaka nokipuawichiopua.
\v 3 Waꞌa asisaapa neeea, aamoe uutiame uhjuramania Eerusarenio, iyojura iꞌtochekaopua, yooma eeme pirena uhjuro tuuka, puꞌka toomi naꞌpoatiameo.
\v 4 Noꞌo simiwa nakiwame enesoo waꞌa Eerusarenio, pirena siimpama teemea waikao.
\s Paoro asisimo eꞌrachiami nayewari
\p
\v 5 Maseronia weeechiami uꞌmatoaio, aamo mochiwachi enamania, Maseronia weeechiami oisimo oꞌranepu pahchao.
\v 6 Seenekachi aamo ahjama itipimane kuꞌitapi, seenekachi ahkasi tuurawio uꞌmatoachisi. Waꞌatiao eemea noꞌo kuꞌinaresao, noꞌo kuꞌipamapua ahka noꞌo simiyachiwichioo.
\v 7 Ki ikanati uꞌmatonarenia waꞌao, nape puꞌka noꞌo waꞌa eꞌrao, Apoe noꞌo Paamira cheemapua, tewekachi kahtiame. Itapiti noꞌo yoramia iinuesoopua waꞌao, tepepi itipimania waikao.
\v 8 Nape iꞌwa Eejesio muuwari mochiwachio, iꞌipari pahko uꞌmatoachisi itipimania iꞌwao, Peentekote pahko tewaniamechi.
\v 9 Iꞌwa itipimane pehjio, Riosio ki ookapi tehki noꞌo wahjoneriopa, iꞌwa tiꞌtijoerio puꞌsereme tiame, wahjachi muuwaeme iꞌwao, ki noꞌo nakioipua noꞌo masitewao, eerina chaachapakao.
\p
\v 10 Timoteoo waꞌamahka oiaio aamo mochikachi asisoo, kaawe uuka teteipuapua puꞌkao, kaaweruma tehki yooramekopapua, taamo Paamira Eesusiwichioopua noꞌowichioopua tiame.
\v 11 Pukaepa Timoteo waꞌa asisoo, aaataai waꞌa aamo mochikachio, ki ipaka tetewipuapua puꞌkao. Waꞌa asisoopua puꞌkao, kaawe kuꞌipuapua, noꞌo kahtiachi enamerieopua, iꞌwao neeea noꞌo ahjama mochikameapua tiameo, puuyeka mochikamepua.
\p
\v 12 Taamo pooniwa Aaporoo, utewa yoorakainia siimichioo, wahjachi poponiwa ahjamaopua aamo neꞌnemia, nape puuua ki siinarekapua pehjio, itapiti yoramerikapapua pehjio. Neipa siimotiapua waꞌao, ahpo yekiwa iinuesaapa.
\s Kajuwachi waꞌasi teepotari
\p
\v 13 Aamo Riosichi paparaka mochitoao, kaawe aamo neesetoka mochitopuapua, pewatiame mochitoka aamo teꞌta Eesusichi paparao. Oisa teꞌteretopuapua pukachio, ki ikanati aamoo, sewina erapatepuaichio.
\v 14 Aaatawichio yooraka ihsiaioo, kaawe eꞌraka ihsipuapua puꞌkao.
\p
\v 15 Ehpeo eeme noꞌo poponiwa tiiaa pipiniwa tiame, naneꞌriame eemea yooma Ehtejana taꞌpechio mochikameo Aakaya weeechio, puuukopua waꞌao oꞌinekameo, pahcha Eesusichi paparakao. Puuukopua tiameo, pahcha oꞌinekamekopua kuꞌisikao yooma waꞌa mochikame Riosie Piipatetiameopua, yooma ihta itapiti kuꞌiwa nakisiwaeopua.
\v 16 Aamoo neeea, yooreka tetewijerani neeea puꞌkao, puꞌka tiꞌtijoeri waꞌa teeka kuꞌyameo, yooma puꞌkachitia, Riosi tehkiwa nokisiameo.
\v 17 Neeea tísia kaawe erapakamepua, iꞌwa eenakopa Ehtejanasiopua Otunato yeekao, Aakaikoopua tiame. Puuua iꞌwa eꞌenakao, tísia noꞌo kuꞌikamepua, aamoo, kaꞌchi iika noꞌo kuꞌimia teereriao, ki noꞌo ahjama mochikamekapa eemea.
\v 18 Aapoe nokakapua noꞌo oisa erapatekaopua Riosichio, aamo oisa erapateriachitiaopua, aamochi Koorintio eꞌenariaiopua. Waꞌa nokayame tijoeopua, kaawe eꞌraka tetewiniamepua.
\p
\v 19 Aasia weeechi tiꞌtiopachi mochikamea, aamo uhjurenapua teepotari, ehpeo iꞌwa noꞌo ahjama mochikamea. Aakiraa, Pirisiriaapua tiamea, ahpo taꞌpechi nanapawitiamea, aamo teepotenapuapua tiame, teꞌta tísia Paamirachi tiiame teepotarie.
\v 20 Yooma Eesusichi poponiwa pipiniwa tiame noꞌo ahjama mochikamea, aamo teepotenachipua tiame. Aamoo eemea, aamo napawimiachi asikoaiopua, kaawe eꞌraka aamo teepotepuapua, Riosichi teꞌteriamechitia.
\p
\v 21 Iꞌka teepotario, nooe Paoro sekae iyotesa aamo uhjuriamepua.
\p
\v 22 Yooma aaata ki nakika tetewikame taamo Eesusi Paamirao, Riosi kokosarichi ruhjimeripua.
\p “Aa muuu taamo Paamira Eesusi, aamo eenakame tetewinare neeeapa tamochio.”
\p
\v 23 Yooma aamo Koorintio mochikame Eesusichi paparameo, yooma Eesusi kaaweruma cherirewao, amochi teerepajeraninia puꞌkao.
\v 24 Neeea yooma aamo Koorintio mochikameo, teꞌta Eesusi Riosie Weratiamechi paparameo, ki nuꞌuti noꞌo iikae aamo nakiyao, iꞌka iyosichi iyotesa, aamo uhjurenania. Iꞌkao neeea iꞌka iyojurachio, iꞌwasi kajuyamenia iyotekao. Cheriwema waꞌasi.