\id 2CO
\h Oosa Koꞌkorintio Iyotepawa
\mt2 Paoroe Oosa Simiyame
\mt1 Koꞌkorintio
\imt2 Iyotepawa
\c 1
\s Teepotari
\p
\v 1 Kúíra. Paoro neeea, Riosi eꞌrarie Eesusie weratiame, Apoe Riosie Weratiamee. Neeea Timoteo iyotetekao, iꞌka iyojura iyotesa uhjurenania, Koorintio mochikameopua tiopachi, yooma Aakaya weewarachiami mochikameopua tiameo, yooma waꞌami mochikameopua, Riosie piipatetiameo.
\v 2 Neeea taamo Noono Riosio, Apoe Eesusi Riosie Weratiameopua tiameo, aamo iikachio, taꞌiria mochijera kiajerenania.
\s Paoro kokosa tiiame aiwaka yasitoa
\p
\v 3 Apoe Eesusi Noonora Riosio, taamo Paamira Weerakameopua, kaawe eꞌrewa chaachapapuamepua puꞌkao, apoekopua taamoo, taamo tesiwe eꞌreka kaawe erapatesiameo.
\v 4 Riosia, taamo kaawe erapatesiamepua, itapiti taamo aꞌchitiame aiwasiameopua. Waꞌa tiachipa teemeai, waꞌachitia kaawe erapatesimeripua tiame, aaata itapiti aiwaka mochitoameopua.
\v 5 Teemea, Riosie Weratiamechi paparapa, aiwame teemea. Taamoo, Riosie Weratiame aiwaria tamochi pochiwisusiamechitia, waꞌachitia Eesusichi machenamepua taamo kaawe erapatesiwaai, puuu waꞌapi Eesusi kaawe erapatesiwaa, wahjachi Eesusichi paparamechi inisiamepua tiameo, yooma ihta kokosa aiwaniamechiopua.
\v 6 Waꞌa teesoo puuu aꞌchitiame taamo aiwariaa, aamo kaawe erapatesipuaichio puuua, puꞌka aamo Eesusiwichio aamo aiwaopua, aamo iika yachapasimichiopua amochio. Pukaechi tiameo, pukae kaawe erapasiwae anachasimeri eemea, ihtaoi aamo kokosa tiiame aiwasiao, waꞌachitia taamooi, kokosa tiiame aiwasiachitia.
\v 7 Aamo oowe erakona teemea, ki sewina erapamerikopua Eesusichio, tísia aiwaiopua puꞌkawichioo, tamochitia aiwaiopua puꞌkawichioo, puꞌka waꞌapi taamo kaawe erapatesiwae, kaawe erapatesipuame eemeai, Eesusi taamo kiꞌyae.
\p
\v 8 Riosichi poponiwa pipiniwa tiameo, ki waꞌatia aamo itipijerani teemea ki naneꞌrekao, puꞌka itapiti tísia taamo aiwariaopua, Aasia weeechi ohjoaiopua. Tahpitika iikame teeme waꞌao, itapiti maapori tiame, oowera mukime iikame teemea waꞌao, teemea taamoo, ahkasi ki ahjameri maayaipua, kiisi anachai teemeapa waꞌasio.
\v 9 Waꞌasa iika teemea waꞌao, mukiwachi uhjurawatiameka erakoai teemeapa. Waꞌa taamo ahjakame puuyariaa, Riosi apoe iintokamepua, ki teeme. Waꞌa pepenipakame teemea, Riosiche taamo newipatemiao, ki taamo waꞌapi uꞌwarie, Riosikamera ihsiamepua, ahkasi wahjipakameoi oijenatiamepua.
\v 10 Apoe iintokamepua taamo newipatekaopua, puꞌka taamo wahjipamia teereriachio. Puuua, ki nuꞌuti taamo eeyowachi maꞌchipakamepua. Teemea pukachio, teꞌta oowe eꞌrewa enepakamepua, yooma taamo maapori teeretoachio, Apoe Eesusi taamo maꞌchipasimerikopao.
\v 11 Aamoo aamo napawitiachio, senepi Riosichi aamo papasoopua taamowichio, epeche enema eeme cheriwema kiꞌyameopua Riosichio, Riosio taamoo, tísia kaawe iintorio tuuopua.
\s Paoro aatia tiiachipa ki simiyopa Koorintio muuwari
\p
\v 12 Teemea tamochio kaawe erakoamepua, taamoo kihta aꞌchi tiame taamo nokario erakoamekapa, kihtaoipua ki kaꞌkarumao, ki kaawe tiame inataniameo, epeche waꞌa aamo mochikachi ohjoaio, tísia suwepori nokiwachio. Nape yooma puuu waꞌa taamo kaawe teꞌteretoriaa, apoe Riosichi eenakame puuua, ki taamoechi waꞌapi.
\v 13 Taamo iyotiaa, ki wihtuki puuua taamo nokisiao. Kaawe enemii eemea taamo pichikesaa.
\v 14 Aaata waꞌa ki oowe eꞌriame enesaapua pehjio, tamochi oowe eꞌrepaka ahjachi erapasaapua, kaawe enemiipua. Waꞌa ikisaa eemea, ki nuꞌuti kaawe eꞌremeripua taamoo, iꞌka taamo amochi nokayaopua. Teemeai, tísia kaawe erakomapua, Eesusi eenechi eenoiopua ahka taawechio, aamoopua tiameo, Eesusichi paparariopa.
\p
\v 15 Waꞌa tiame taamo nokaya oowe eꞌrepameri erapakaopua, oosa waꞌa uꞌmatosimo oꞌraninia, waꞌa aamo mochikachi, waꞌatiaopua oosa epeche pepenipamichiopua noꞌo masitiao. Maseronia siinyaio, eenechi noꞌraionia, eenechi asisimo oꞌrainia aamo mochikachi, waꞌatiaopua, oosa enemichiopua noꞌoo, waꞌami noꞌo uꞌmatoachiopua masiteka, neipaopua waikao, noꞌo kuꞌimichiopua aamoo, Uurea weeechi simiwachiwichioopua.
\v 16 Waꞌa tiame inataka neeea, Maseronia simiyaio, aamo mochikachi asisika tetewisinariapa. Maseronia noꞌrasaapua, eenechi waꞌami uꞌmatoka tetewinariapa. Aamo mochikachi oꞌiniao, Uurea weeechi siminarekamenia, aamo noꞌo kuꞌiwaeopua kuꞌinariae.
\v 17 Ihji aamo noꞌo neꞌnemia inatariaa, kaawe inatasa eratiamepua. Ki aaata chaachapameka tiiame ihjia, itapiti cheesaopua, ikanati sewina cheesiamechitiaopua eenechio.
\v 18 Taamo aamo masiteniameoi Eesusichi simiyameo, ki sewina chaachapasiame teemea, piiripi tiame cheesaa piiripi tiiame puuua, ki eenechi sewina cheesiamepua, puꞌka Riosichi simiyame taamo masitiao, taamo masitiao Riosichi eenamekopua. Taamo Noono Riosia ahpo chiiao, kiisiki eenechi sewina chiiamepua.
\v 19 Noꞌo Timoteo ahjama nayewaturiaa Siriwano ahjamaopua tiameo, yooma taamo masiteria Riosi Taanarachi simiyameopua, Riosie Weratiame Eesusi tewaniamechio, ki teesa pichiwari puuua. Ki taamo ehpe masiteriao, meereo eenechi sewina chaachapasikame teemea.
\v 20 Riosi yooma ihta taamowichio iintomo tuuyaa, Eesusichi iintoamepua ahpo Taanachi. Pukaepa teemea, Apoe Riosi ihsiamekopua Eesusichio, Eesusichi taamo paparao, ahjachi erakoame teemea, kihta seeweka. Waꞌa erakoka, cheriwema kiꞌyame teemea Riosio.
\v 21 Riosia, apoe ihsiamepua taamoo, apochi kaawe teeretekao, ahpo Taana Eesusichi paparameopua. Apoepua tiameo, taamoo, ahpo ijinuwa uuyameo ahpowichio.
\v 22 Apoe ihsiamepua tiameo, taamo iikachi yahchakao ahpo iinuwatario, tamochi erateka ahpo Riosiwarieopua, ahpokamera ijinuwarakopua taamoo. Ihji waꞌa taamo eratewaa, Riosi Riosiwaripua, taamo nuutekia Riosiopua, oꞌichari kiꞌya.
\p
\v 23 Eenechi inatepaka eenechi aamo mochikachi enamia, Riosi naneꞌrenapua noꞌoo, ki teꞌta aamo terinariapa, ki eenechi eenariopua waꞌao.
\v 24 Ki aamo paamiratuamechitia eratoame neeea. Ohso kaawe aamochitia, Riosichi tekipaname eꞌrame neeea, oowera waꞌa eenakamenia aamo mochikachio, epeche kaawe erakomichiopua Eesusichio.
\c 2
\p
\v 1 Pukachipa ki siimo orapakania waꞌa aamo mochikachio, ki taamo iiyana erapuapuawichiopua iikachio.
\v 2 Waꞌa mahka eenaka iiyana eratesaania aamoo, ki aaata noꞌo kaawe erapatemerikopua noꞌoo, eemechekopua noꞌo kaawe erapatiamea, noꞌoo iiyana erapasoopua.
\v 3 Pukaepa waꞌa cheeka iyotekamenia pukachi iyojurachio, waꞌa asisaapa, ki iiyana erapanariapa eenechio yuuwesika, eemeo, ohso kaawe noꞌo kaawe eratemerioipua. Neeea aamoo, oowe eꞌrakania, kaawe eꞌraka aamo ahpo katewemiaopua, aamo aꞌchi tiiame iiyana erapori tiiaopua, waꞌa ikitioopua, neeeai kaawe erapanariapa.
\v 4 Ki nuꞌuti iiyana eꞌrapa waꞌa tiiame aamo iyotekania puꞌka oosa iyoterichio, ahkasi naarakaoi iyotekamenia puꞌkao. Ki aamo iiyana erakomichio aamo iyotekania puꞌkao, ohso kaawe pukachi iyoterichio, noꞌo teꞌta aamo nakiyakamera, tetewimichio iyotekamenia waꞌao, noꞌo chiiao.
\s Paoroo ahpo naꞌarekame cheriweria
\p
\v 5 Aaata puuu iiyana iintokamea, ki noꞌoche iiyana eratekamepua, yooma aamo iiyana erapatekamepua tiameo. Neeea teesa tiame chaaninia puꞌkao, ki tahpitika tiiame aamo erapuapuawichiopua puꞌkao.
\v 6 Puuu yomarika aaata ki kaawe iintorio wenejiriaopua, soparani puuuapa, aamo aiwateka yahchao.
\v 7 Epeche kaawepua cheriwetiaa, kaawe erapatetiaopua tiameo, ki teꞌta pehtiame yuuwesimichiopua puꞌkao. Kaawe enemiipua puꞌka pehtiao, puhjetiaopua cheriwekao, ohso kaawe naewetia kaawepua kaawe eꞌreka, kaawe erapamichiopua puꞌkao, ki aꞌchi ikimichiopua ahpo iikachio, yuuwesikaopua teꞌta.
\v 8 Puꞌkao, ki kaawe iintorioipua puꞌkao, nakiwameko tuuyejeraninia puꞌkao.
\v 9 Puꞌka waꞌa tiiame aamo iyotekameainia, aamoo noꞌo cheeriachitia katewetariarepua eꞌrakaopua, waꞌa aamo aꞌchi teꞌtereriaopua.
\v 10 Aamo cheriwesoopua puꞌkao, noꞌoeoi cheriwetiame itipiamepua. Aaataoi aamo cheriwesiao, cheriwetiame itipitemeripua noꞌoeoi, Eesusi Riosie Weratiame tetewachio. Waꞌa iintosima neeea, kaawe teꞌtereka mochitomichiopua Eesusichio, taꞌiria mochitowa.
\v 11 Waꞌa taamo teꞌteresoopua riaorósia, kaꞌchi iika naꞌara ihsimeripua tamochio.
\s Paoro Torowa tewaniachi ki taꞌiria yasaria
\p
\v 12 Torowa muuwarichi noꞌo asisoopua, kihta eina teeeriapua waꞌao, Riosie Weratiamechi simiyame noꞌo masitiachio.
\v 13 Naatiche yuuwesika yasakania waꞌao, ki tewakapa Tiitoo, noꞌo Riosichi pooniwao. Waꞌao neeea: “Uꞌmatona neeeapa”, cheesache uꞌmatokania waꞌa oꞌiniao, Maseronia weeechiamio.
\s Riosie Weratiamee newitowa
\p
\v 14 Waꞌa eꞌraka kahtiaichenia waꞌao yuuwesikao, ki tewakapa waꞌa Tiitoo, ki piineri noꞌo kahtio erapakaopua waꞌao, Riosi noꞌo ahjama kahtiame erapakania, itapiti seewajuyame eejekayamechitia noochi. Riosia, ihta taamo aioioopua, taamo newitoka maꞌchipasiamepua taamoo, tamochi enatesika ahpo peeniajuyao, yomachi tiꞌtijoechiopua ahpo peeniajuyao, yomachi yasipasimichiopua tiameo tiꞌtijoerichio, ahkaoi taamo ohjoiopua.
\v 15 Teemepua, puꞌka Riosie Weratiame seewachitia peeniajuwa iꞌtoamea, aaatachi eꞌwamekopua puꞌkao, Riosichi eꞌenatekaopua. Puꞌka peeniajuwae Eesusichi eꞌenatetiameo, Riosie cheriweka piipatesiamepua puꞌkao, tatakoririao. Ki peenia eꞌraka saayamea puꞌka Riosie Weratiame peeniajuwao, waꞌapi itipiamepua ahpo tatakoriwachio, ki piipatetiapa puuua Riosieo.
\v 16 Aaata Riosie Weratiame peeniakame puꞌserekamea, Riosie piipatetiameaapua, puuua mukukaipua iꞌka ahjarichio, piirechi weemera ahjarichi ahjameripua. Nape puuu ki puꞌserekamea Riosie Weratiame peeniajuwao, ki Riosie piipatetiamea, iꞌka weeechi ahjari mukusaapua, ki oosa ahjameripua eenechio, piirechi weemera ahjarichiopua. Puuua poanachi mochimeripua ki Riosi ahjama, wahjipakameka teeremeripua Riosichio. Nape iꞌka Riosichi tehkichio, ¿aatanakamera ohjoarepua, iꞌka Riosichi tehki teꞌta kiapuame tiiameraa, tisiwa iyoriwaemeopua?
\v 17 Kiꞌtepua aaataai wahjachia, ki iyorika tetewamekapapua iꞌka Riosichi tehkio, kiisi kaaweruma inataka nokisiamepua, toomichiche inataka masitiame, ahpo seꞌwi masitiao toomichi nehjapa. Nape teemea kaaweruma inataka nokisiamepua iꞌka Riosi tuuyewario, iyorika teetoka iꞌka kaaweruma tuuyewario, teꞌta Riosie taamo nuureniachitia, teꞌta Eesusi Riosie Weratiame, seekarewarachitia.
\c 3
\s Weemera katewewari tuuyetowa
\p
\v 1 Nape teemea Riosie uhjuratiameko taamo chaachapaa, ki taamokamera epeche weruma tiiame tetewipuawichio, chaachapamepua. Taamo chaachapaa ki weeechi tiꞌtijoee nuuretiamepua. Pukaepa ki nakiyame teemea ihta iyosi iyotetiameo, ahkaoi taamo asiyachio kaawe eꞌraka asipupuawichioo, waꞌaoi aamo mochikachioi; aamoe taamo kiapuameoi, sewinachi taamo siimpamiawichioo.
\v 2 Taamo ahkaoi kaawe uuka tetewimeria, eeme waꞌapipua Koorintio mochikame, yoomachi naneꞌreniamekopa, Riosi amochi iintoriaopua aamo Eesusichi papararioiopua.
\v 3 Aamo Eesusichi paparariopaa, taamo Eesusichi simiyame aachin teeka pichikeria, Riosie Weratiame waꞌapi aamo iꞌikarachi iyotekapua ahpo kaaweruma ihsiao. Puuu aamochi kaaweruma iintoriaa, itapiti iyosichi iyotetiamechitia tiiamepua. Pukaepa teemea pukae ahkaoi taamo ajasiachiamio, pukae nayewatusimapua, aachin teeka aamo Riosie Weratiamechi paparariamekoopua. Waꞌa tiiame taamo nayewatuka nokisiamekopao, kaawe tetewisipuame teeme tiꞌtijoerieo.
\p
\v 4 Waꞌa tiiamepua tiiao nape teꞌta tamochi iintokamea, teꞌta teꞌpa kahtiamera puuua, teꞌta Apoe Riosi. Pukaepa teeme Eesusie ajawatiamea, Riosichi paparamepua, Apoe Riosi iintoriopua amochio, ahpo Taanaeo, yooma taamowichioo kaawe iintokaopua.
\v 5 Teeme Eesusie ajawatiamea, kihta nokayame teemea teꞌta Riosichitiao, teemea oowera Riosi tehkiwache nokisiameopua. Ki Riosi ihsiwa tamochi teetosoopua kuꞌikao, ki teꞌta kaawe teetomii teemea, iꞌka Riosi kaaweruma tuuyewario, tiꞌtijoeekachiami iꞌtokao.
\v 6 Apoe iintokamepua tiameo, iꞌka Riosi tuuyewari yahchakaopua, weemera teꞌterewa yorakeka mochitopuawichioopua, apochikamera kaawe teꞌteretokao, ki ahpo ehkoriami teꞌteretopuame, yahchariachitia. Ihji weemera teerewaa, Riosi Riosiwari yasipaniamepua tamochio, Riosi Taanarachi pichiketioopa tuuyewarirao. Piire oochetiame nuurari teꞌterepua teereriaa, taamo wahjiparichi ihpapaniame teereriaipua, ki ahsepari iyoritiaapua, puꞌka nuurario kaꞌchi iika yorame tiiamekopa ahsepario. Nape ihji weemera Riosichi teꞌterewaa, weemera ahjari taamo kianiamepua ahkasi ki wahjiamesi, Riosi Taanarachi taamo paparatioopa. Apoe Riosia ahpo Taanachi paparatioopua, tamochi yahchamepua ahpo Riosiwario.
\p
\v 7 Moiseo Sinai kaawichi ihsiai oꞌinia tekikoiopua, Riosi nuurari uꞌpakaopua tiꞌtijoeriwichioo, tiꞌtijoeria puꞌkao, kiisi neꞌneme erakorepua nanarichio, tísia utewaeme tajitopa nanarichio. Nape Moisea waꞌa teetoka tekiaiopua, puuu nanarichi tísia tajitoaa, saipatorepua. Puuu Riosi nuurari Moise kiaretiaa tísia majapori tiiame cheeka kiaretiamepua, tísia Riosi utewarieme tiiame, ki nuꞌnunti ki kuꞌkuita teꞌteoka chiiame, ki eꞌwetiaapua puꞌka ahpo tisiwa iyoriwa nuurario, wahjipaniamee kokosamerikoopua.
\v 8 Nape puuu nuuraria tísia eeyowa tiiame kiatiamekaiopua Riosieo, kihtakaitepua taamo Riosi Riosiwarie taamo tísia kaaweruma tuuyewari taamo iikachi nayewiao, puꞌkao pirenataka neꞌneniaoopua, epeche ki nuꞌuti tisiwa peenia tiiame Riosiwari taamo iikachi nayewiaa.\f + \fr 3.8 \ft Puuu ehkoriami nuurari nokiwao, ki ahsepakamekapa teemea puꞌka nuurari eꞌwekao, Riosia puꞌka nuurarichio, taamo poana tetewikame puuua ki ahpo ahjama, aaata ahpowichioo, mukukamechitia. Nape taamo ahpo Riosiwari taamo kiꞌyaeopua ahpo Taana Eesusichi paparakopao, apochi taamo uuyamepua, ki wahjiamesi ahjaka mochimichiopua, ahpo ahjamao.\f*
\v 9 Puuu ehkoriami Riosi nuurari taamo ki eꞌwetiaapua taamo Riosi kokosarichi ihpapamea, tahpitika cheeka tísia maapori tiiame kiatiamepua; nape ehpiami Riosi kaaweruma tuuyewari nayewiaa, epeche tisiwa tahpitika tiiame peenia tiiamepua, ki ehkoriami nuurari Riosie tísia eeyowaeme chanitiamechitiaopua, iꞌka ehpiami Riosi kaaweruma tuuyewario, taamo nehpupamekopua taamo Riosi kokosarichi wichipuameo, taamo Riosi Taanara papasoopua, puꞌka tuuyewari tamochi uusoopua.
\v 10 Puꞌka oochetiame nuurari tísia eeyowa tiiaeme neꞌnewachio, kihtakaite puuu eeyowaa, Riosi teꞌta kaaweruma tuuyewari teꞌta tísia tahpitika peenia tiiariwa neꞌnepatiao.
\v 11 Puuu ehkoriami nuurari Moise Riosie kiatiamea, ki tehpewichio eratiame eneriamepua Riosieo, pukaepa ki tehpesi nateyamechitia teererepua. Nape ihji weemera ahjari Riosi taamo kiꞌya ahpo Taana Eesusichi papararichio, ki wahjiamesi eꞌramerapua.
\p
\v 12 Pukaepa teemea puꞌka weemera ahjari ki wahjiamesi enemerikoopua, yomatiame ahjachi eꞌrarie nayewatiamepua, teꞌta maꞌchiame nayewatuka, tiꞌtijoeopua ooweruopua tiamé, ahkaoi taamo asisiachiamio.
\v 13 Teemea, ki Moiseka teꞌteretoamepua, Moiseo ahpo toꞌpekamechitiaopua nanarichio, ki tetewipuawichiopua apochio, Riosi tisiwarirao ahpo nanarichi teteiwameo, saipachisi. Teemea iꞌka tísia tisiwari Riosi kaꞌkaweruma tuuyewario, kihta tamochi toꞌpenaka nayewatusiamepua tiꞌtijoerio, puꞌka tiꞌtijoerio teemea, weemera ki wahjiamesi ahjari iinuejeramekapapua puꞌkao, puꞌkao Riosichi itanesoopua.
\v 14 Tiꞌtijoeria ki pahteka tetewirepua Moisechi tetewitiameopua Riosi iyoriwa tisiwariopua, puꞌka saipao, ihtana ikiwamekoopua. Riosi nuurari Moise kiaretiaa, oowera tiꞌtijoeri naꞌara iintotiame tetewipuawichio enerepua. Aaataoi ki cheriwiame Riosia tatakoririao, Riosi nuurari eꞌwekache mochitoniameeo. Ahkasi ehpe taawechiamioi waꞌapi erakoka mochitoamepua, puꞌka oochetiame nuurari eꞌweka mochitoamea. Waꞌa tiiame inataka mochitoapa puuua, Riosi nuurarichi simiyameo, itapitie toꞌpeniamekatepua inatarichio. Puꞌka inatarichi eina tiiame puhjeniamea, teꞌta Riosie Weratiame iintoria ahpowichio, teꞌta pahtetiache wichima puuua.
\v 15 Ahkasi ehpiamioi waꞌapi teꞌteriamepua, ki pahtekao, puꞌka Riosi nuurarichi simiyameo.
\v 16 Nape aaata teꞌta neꞌnepasaapua Riosi chiia ahpo Taanachi simiyameo, teꞌta pahteka tetewikamepua, ihtanawichio kiꞌyariopua Riosia, ahpo nuurario.
\v 17 Puuu taamo Noono tewekachi kahtiamea, Apoe Riosiwari ihsiamepua, taamo inatarichi pahtemichioopua. Pukaepa aaatachioi apochi pakimichio reesisetiaapua, puuu Riosi Riosiwari ihsiamepua, taamo inatarichi toꞌpiao, puhjekao.
\v 18 Pukae puhjetiapa teemea taamo inatarichi toꞌpiao, epeche maꞌchiame teerepame teemea tiꞌtijoerichio, teꞌta kaaweruma ihsiaopua Riosiopua, puꞌkawichioo. Waꞌa teꞌterepakamea Riosi Riosiwarieo, enepatesikaopua, epeche epecheche Eesusika teꞌteriame, enepame teemea. Puuu waꞌa tiiame taamo enepatiamea, Apoe teꞌta teꞌpa kahtiame taamo Noono ihsiamepua, Apoekamera teꞌta Riosiwari.
\c 4
\p
\v 1 Pukaepa Apoe teꞌta Riosiwari tamochi yasitopao, ki nahsinapame teemea iꞌka tehkichio, apoe taamo teetotiamekopapua iꞌka tehkichio.
\v 2 Itapiti aaata wihkuepuao, toakame teemea puꞌkaopua, yooma ihta Riosichi simiyame ki noriwi nokisiamekapapua puꞌkao, kihta eꞌrakaopua, noriwi yoranarewao. Teemea Riosi chiia pichiwario, maꞌchiame apoe cheeriachitia teetoame teemea, tuuyepasika Riosi neꞌniachiopua, tiꞌtijoeriopua tiame tetewachio.
\v 3 Aaata tukapame tetewame enesoo iꞌka Riosi tuuyewari taamo nayewatuao, wahjiparichi uumpameri puuua, teꞌta kominarichi teꞌteretoamekapa puuua wekaparichi.
\v 4 Puuu tiꞌtijoeria kiisi pichikenariapa Eesusichi simiyame taamo nayewatuao, iꞌwa weeechi riosirewa Satanasia, ki maꞌchiretiamepua inatarichio, kiisi pahteka tetewimichiopua Eesusichi simiyame taamo nayewatuao, Eesusio, Riosi waꞌapi nanarirakoioo. Waꞌa teereniapapua puichio, kiisi Eesusichi tetewame puuua, Riosi nanarirao.
\v 5 Teemea ki taamo weruma eꞌrepuawichio nayewatuamepua, oowera Riosichewichio yooraka mochitoame teemea, aamoo teꞌta taamo pahtemichiopua, teꞌta taamo Paamira Riosie Weratiameo, apoekopua teꞌta Riosio, apoe teꞌta Riosi, teꞌpa tewekachi kahtiame taamo Noono.
\v 6 Puuu waꞌapi Riosi naayachiopua cheekame: “Uutapasa tukapachio”, puuu waꞌapi waꞌa cheekame tamochi tajayamepua pahtewario, taamoopua Riosia, Eesusichi tetewitekaopua ahpo nanarirao, ahpoo aachin tiamekopua.
\s Eesusichiche paparaka mochitoniame
\p
\v 7 Puꞌka tísia nateyame Eesusichi simiyame pahtewariopua, tamochi iꞌtoame teemea, iꞌka weerewa sikori kahsimerika tiiamechi. Teemea iꞌka weerewa kahsime tiiamechio, tísia aiwaka nokisiame teemea Eesusichi simiyame nayewatukao. Nape teemea puꞌka aiwarichio, maꞌchiame tetewame teemea, Riosi ihsiamekopua tamochi utewatekao, teꞌta anachaka nokisimichioopua.
\v 8 Nape aꞌchi tiame aiwari anachaka mochitoaipua, ki yuumpaniame teemea kahsinakao, Riosie kuꞌiniapa utewariraeo. Seenekachio, kaꞌchi ikime erakoai teemea, kiisi soꞌmipamepua, Riosie kuꞌisiwapa taamo erakoao, nape kiisi sewina erapame teemea, taamoo, kaawe teeka puuyamiaopua.
\v 9 Tísia naꞌara yorasiwaaipua, ki taamo ooyepiko erakosiame teemea, naneꞌriamekapa teemea Riosio, taamo ahjama inisiamekopua. Teemea ahkasi puipatiaai nanaarameeo, Riosi ahpo utewarie taamo werisitesiamepua, senepi taamo waꞌa ikitioiopua.
\v 10 Teemea Eesusi inatakaopua, ahkasi mukiwachisi aiwarioopua taamowichioo, kaꞌchi erakoka nokisiame teemea taamo aiwao, tísia teetonariapa teemea, puꞌka weemera ahjari tamochi tiiao, wahjachi tuuyenarewaopua tiameo, apoe Eesusi taamo kiꞌyariao.
\v 11 Teemea, peꞌyachi Eesusiwichioo eepi meripuame ikisiameaipua, kihta kaꞌchi erasiame teeme puꞌkao, waꞌa teeka tamochi tetewitetiapapua wahjachio, apoe Eesusi weemera ahjario, tamochi yasitoamekopua puꞌkao, ahkasi ki wahjiamesiopua, taamo mukukoiopua iꞌwa weeechio.
\v 12 Waꞌa tiiachio, taamo eepi wahjipame teetowachi teetoiopua, Eesusichi simiyame aamo nayewatukao, eeme Eesusichi paparasiamea, Riosie kiasiniamepua weemera ahjario, ki seenampasi ahjapuameopua.
\p
\v 13 Ehkoriami aaataa cheerepua: “Ahjachi paparapa, naewakania.” Waꞌachitia teemeai, Eesusichi chaniwame pichikekapa, puꞌka nayewatusiame teemea taamo asiyachio.
\v 14 Puꞌka nokisiame teemea, pichiwa eenechi taamo ahjamerikopua, erakoapa, waꞌachitia Eesusichitia, eenechi oijenatiachitia, Riosieo. Eenechi taamo ahjatesaopua, yooma taamo aamo ahjamapua tiameo, Riosi tetewachi ajapuatepuaichiopua.
\v 15 Yooma Riosi ihsiaa, yooma taamo nokisiaapua tiameo, aamowichio kaawe teerewawichiopua, yooma wahjachiwichioopua tiame Eesusichi paparasiameo, Riosichio, epeche epecheche weeka enemichiopua, Riosichi cheriwema kiꞌyameopua, ki nuꞌuti kaaweruma iintorioopua ahpowichioo.
\p
\v 16 Pukachi waꞌa tiiachipa teemea, anachaka nokisiame teemea, iꞌka tehkichio. Teemea, epeche epecheche oochetupai aampamio, yooreminao teemea taamo iikachio, epeche epecheche weemera enepasiamepua.
\v 17 Pukaepa ehpe taamo aiwaka teꞌteretoao, kihtakaitepua, puꞌka epeche nateyame weemera ahjarichio, taamo mochitomerichiopua ki wahjiamesi.
\v 18 Waꞌa teeremerichiopua teemea, iꞌka weeechi taamo pusie tetewaopua, ki tehpe eꞌramekopua puꞌkao, kihtachitia tetewame teemea puꞌkao, teꞌta Riosi taamo kiamerichiopua, puꞌka taamo kiamiao, ki tamoe tetewamekoopua pehjio.
\c 5
\p
\v 1 Iꞌka weeechi weerewaa, weeechi taamo kariwaka tiiame puuua, kiisi tehpe eꞌrame. Iꞌka karichi mukisaapa teemea, weemera weerewachi akipamepua teemea, tewekachi weerewachi. Puuu weerewaa, taamo kariwa weerewa enemeripua, apoe teꞌta Riosi taamo kiameri, ki weeechi weerewachitia. Ihji weerewa kaaria, ki kuꞌwitapisi eꞌrame enemeri puuua, ki wahjiamesi.
\v 2 Teemea iꞌka weeechi mochikaiopua pehjio, ki ahjame eꞌraka mochitoame teemea pehjio, teꞌta taamo kariwachi mochinariapaopua tewekachio, teꞌta tehpe eꞌrame weerewachiopua, tewekachi weerewaeniameopua.
\v 3 Teemea, tewekachi weerewao, tisiwa iinuenariame teemea. Iꞌwa weeechi mukisaapa teemea, taamo iikara apechusaapa teemea, kihta weerewaeka apechumeri teemea. Waꞌa ikisaapa teemea iikaraa, poiyame itipimeri teemea pehjio ki weerewaeme, kihta wisasori chuhchamechitia tamochio, ahkasi taamoo, weemera weerewa uuyachisi.
\v 4 Puꞌka weerewa weemerachi inatakaopua, tahpitika erakoame teemea puꞌka puuyekao pehji, kái waapisi iwikao chaachapaka: “Ai puuua, yaapiti enesaa kaawe enemiipua.” Waꞌa erakoame teemea, iꞌka karichi weeechi weerewaeniamechi puuyeka mochitokao, yaapi erakoka puꞌka weemera weerewa karichi mochitonariapa. Puuu yaapi eraniameo, ki ikanati taamo mukinario chaachapame teemea, iꞌka weerewa oochetiame toakao, nape teemea tísia weemera weerewa mochinariamepua. Taamo weemera weerewachi mochipatioopa, taamo weerewa wahjipaniameo, ki wahjipaniame enepamepua.
\v 5 Riosia naayachi oꞌiniao, pukeri enepatiaipua tijoeo, ahjari ki wahjiame kiamo oꞌraka iintoriaipua, ki wahjiame ahjari teeremichiopua tiꞌtijoerio. Riosia ahpo Riosiwario, pukachi inataka taamochi yahchamepua puꞌkao. Puuu Riosiwaria, Riosi pichiwatamepua, taamo weemera ahjari kiamiaopua, ki wahjiamesi.
\p
\v 6 Pukaepa teemea Riosichi paparamepua, pichiwa taamo kiamerikopapua, puꞌka ki wahjiame ahjariopua, tamochi inatariaopua. Nape iꞌka weerewachi mochikaapa pehji, puꞌka puuyeka teꞌtereniamepua, yooma Riosichi pichikeka paparamea.
\v 7 Teeme Riosichi teꞌteretoamea, itapiti ki ikiya puuyeka mochitoame teemea pehji, puꞌka iintomeri puuyetoka Riosichi paparame teemea. Puꞌkaopua teemea, mehka ihtoriachi, neꞌnetoka mochitoapapua, ki ehpechi simiyame.
\v 8 Riosi iintomia puuyekao, iꞌka weerewachi mochitoaio pehji, kaawe erakona teeme erakoao, nape epeche kaawe eneriaipua toitiaa iꞌka weerewao, teꞌta Paamira kahtiachi mochipuawichiopua waꞌasi.
\v 9 Nape teemea pehjio, utewaeme kaawe teerenareka mochitomeripua, kaawe erateka Eesusiopua Apoe Paamirao, ahkaoi ohjoaio, mehka taamo taꞌpechi ohjoaio, ki mehka ohjoaio, taamo petechio.
\v 10 Waꞌa teꞌteremeri teemea, kaawe eratekao Eesusio, taamoo, Riosie Weratiamechi eꞌnamerikapa, apoe neꞌniachi ajapamia, puꞌka Eesusio, itapiti taamo kiamerikopua, yooma ihta taamo noonowiriawichioo, kaꞌkarumaoi, ki kaꞌkarumaoio.
\s Taꞌiria mochitopua tuuyewari
\p
\v 11 Naneꞌriame teemea, taamo Paamira Eesusio, ki nuꞌunti iyoriniamekopapua puꞌkao, pukaepa teemea Eesusichi simiyameo, teꞌta iyoriwa masitiamepua tiꞌtijoeo ooweruopua tiame, Eesusichi oowe erapatekaopua. Riosia naneꞌrenapua taamoo, iꞌka taamo oowe erapatewa nokayao, kaaweruma taamo erakoka nokayo, ki taamo weruma erakoka, Riosi tehkiwachi nokayapao. Puꞌka erakosaa eemea, kaawe enemiipua.
\v 12 Ki taamo waꞌapi kaawe nayewaka chaachapani teemea puꞌkao, aamoe aamokamera, kaaweruma taamo tetewachi, chaachapajerani teemea. Waꞌa teꞌteresaa eeme, kaawe taamo nehpupaka nayewama eemea, ki kaaweruma eꞌraka taamo nokayame chaachapamioopua.
\v 13 Nape peꞌyachi waꞌa chaachapamapua, taamo rooroikame teewakao, ki rooroikameoi, teꞌta taamo nokisiaa, Riosi tehkiwarapua, Riosiwichio nokiwa, eemewichioo, kaawe teeremeripua.
\v 14 Teemea tísia kaawe eꞌraka nokisiame iꞌka tehkichio, Riosie Weratiameo, ki nuꞌunti iintoriakopua taamowichioo, taamoo ki teesa nakiriopua tiameo. Iꞌka Riosie Weratiameo, taamo mukimia mukukame enesoo, puꞌka ahjama mukukamekate teemeai.
\v 15 Yooma teeme ahjachi wahjipakameka teeresaa, ki taamoechewichio piineri nokisimeri teemea, taamowichio mukukamerachiwichio teꞌteremeri teemeai, apoeopua tiameo, taamowichio kiamiapa weemera ahjario, oijenakamepua.
\v 16 Pukaepa teemea ehpeo, naneꞌriapa teeme iintuameko weemera ahjaniameo, aaataoi tiꞌtijoeopua nateyame tetewame teemea, Riosiwichioo, ki aaata piirechi wahjachitiao, taamo wahjipasao, kihta iintumeriko erakoamechitiaopua. Pukerio teemeai, keꞌchu oijenoi Eesusio, waꞌa erakoameai teemeai, puꞌka mukisoo ki eenechi ahjameri maaewao. Nape ehpeo naneꞌriame teemea puꞌkao, iintuamekopua eenechi ahjaniameo, Eesusio eenechi ahjakopa.
\v 17 Pukaepa aaata Riosie Weratiamechi enepakamea, weemera ahjari kiapuame puuua Riosieo. Puuu oochetiame ahjaria, uꞌmatokamepua waꞌasi; weemera ahjarikamera, yasitoamepua ehpeo.
\p
\v 18 Yooma iꞌka ikiniameo, Apoe Riosikamera ihsiamepua, yooma aaata ahpo Taanachi paparameopua Eesusichio, taꞌiria mochitomichiopua apochio, kihta kokosapuame Riosieo. Taamoo Riosia puꞌkawichio taamo ajawakamepua, tiꞌtijoeri kuꞌipuawichiopua apochi taꞌiria mochitomichiopua, puhjepuawichiopua puꞌkao, Riosie kokosapua tiiao.
\v 19 Waikao Riosia, ahpo Taanachi paparakameo, cheriwesiamepua, tatakoriria puhjekao, waꞌa inisika puipakame Riosia, ahpo apochi eina teereriaopua. Taamoo, puꞌkawichio kiꞌyamepua tehkio.
\v 20 Teemea, Riosie Weratiame utewaeme chiia aamo uꞌyepakame teemea. Pukaepa teemea Eesusi cheeriachitia, utewa chaachapame teemea, apoe Eesusie eee chiiame aamo uhjurekapua: Toimitapua puꞌka ki kaawe aamo nokayao, ohso kaawe aamo cheriwepua itanemetiapua Riosio, aamo puhjemichiopua aamo kokosapuao, taꞌiria mochitopuawichio Riosichio, kihta kokosapuame teꞌtereka Riosieo.
\v 21 Apoe Riosie Weratiamea, kihta iintokamepua ki kaawerumao, nape Riosia pukachi, taamo piipatekamepua tatakorirao, puꞌka taamo tatakoriwao, Eesusikamera teꞌta tatakoririamechitia. Riosia, waꞌa iintokamepua Eesusichio, taamoo, teꞌta piipakame tetewinariapa, Eesusichitiao, teꞌta piiparieme.
\c 6
\p
\v 1 Puꞌka Riosi waꞌa iintoria nayewatuame teemea. Pukaepa teemea, Riosi chiia kuꞌika chaachapakao, utewaeme aamo chaachapani teemea, ki wehchi ipanurakaopua, iꞌka Riosi chiiao.
\v 2 Riosia ehkoriami Isaia iyoteriachio, cheeriaipua:
\q Aamo cheriwewa itayoio, aamo inamukamenia;
\q aamo tatakori kokosari newipari itayoio,
\q2 aamo inamukamenia.
\m Ehpeoi Riosia, puꞌka newipari aamo kianariamepua, yooma aamo tatakoririawichio kokosapuameo, newipateka. Puꞌka newipari inatapuapua Riosichio.
\p
\v 3 Teemea puꞌka tehki taamo teetoao, kaaweruma teꞌteretoka nokisiame teemea, kaꞌkaruma inatapuawichiopua Riosichi taamo nokayao, kihta eerina teewetoka tiꞌtijoechiopua, Eesusichi paparapuaméo.
\v 4 Waꞌa teꞌteretoame teemea, ahkaoi taamo asiyachio. Teemea taamo asiyachiamio, kaꞌkaruma Riosi kuꞌiwarichitia teꞌteretonariamepua. Teemea waꞌa teetokao, tísia taamo naꞌarewa anachatoka teꞌteretoamepua; tísia taamo aꞌchi ikiya anachatoka; tísia taamo kaꞌchi ikime eꞌra, aiwatoka; yooma ihta tísia maaporichi tiiameo, anachatoka;
\v 5 naatichitia tiame anachaka, taamo wepiwa; taamo karichi yeetepawa anachasika; muuwaeme tamochi nasioio anachatoka; tísia resipaka tekipanaio, anachasika; kiisi kochika maꞌchirepasiniame, anachatoka; tísia toore aiwari, anachasika. Waꞌa tiiame aiwasiame teemea, senepi taawechio; puꞌka yooma taamo aiwariae teꞌta utewaeme taamo nokisiwa Riosi tetewiteka.
\v 6 Yooma puꞌka waꞌa tiiame aiwarieo taamo kaꞌkaruma taamo tetewiwatiame teemea, Riosi teꞌta seekaerewachitia nokiwa. Puꞌka taamo Riosi seekaerewachitiaeo, iꞌka eeetiame taamo tetewitiame teeméa: kihta ki piipariwa ikotuwa nokisika; ki yaapi eꞌrewae aaatao, aaata ki teꞌta machiyame pehjio, iꞌka Riosi kaaweruma tuuyewarichio; kaawe yoraniame aaata; Riosi Riosiwari tamochi yahchamechitia taamo tetewitewa; kaaweruma nakiwaeme tiꞌtijoeri;
\v 7 naatichitia tiame, pichiwa tiiae taamo nayewae; Riosi utewari tamochi kahtiame tetewitewae; taamo utewaeme nehpusiwaeopua, taamo Riosichi paparao;
\v 8 naatie tiame, kaawe nayewaniaio, ki kaawe nayewaniaio, waꞌapi teꞌteretowae teemea, kaawe eꞌrewaeo; aaataoi ki kaaweruma taamo wenejioiopua, kaawerumaoi taamo chaachapaoio, waꞌapi teꞌteretoka kaawe eꞌraka tetewiniamee; taamo ki pichiwa chaachapame tewaniaio, tísia aiwasiaio;
\v 9 waꞌa ikisao tiameo, ki taamo machiyamechitia teteiwa aiwaniame; amori mukuyamesi toitiai, werisisiwa; mukiwachisi kokosatiai, oijenasika;
\v 10 teemea tiameo tísia yuuwesiaio, Riosie kaawe erapatesiniame teemea; teemea iꞌwa weeechi tiꞌtijoerio, kihta paarasatiamekaio, teemea Riosieo ki ookapi tísia paarasatiamepua; teemea kihta iinuekaio iꞌwa weeechio, teemea Riosichio tísia paarasatiamekaitepua.
\p
\v 11 Teemea aamoo, taamo iikachi machenamee kaawe eꞌreka nayewekamepua.
\v 12 Taamoo yomatiame taamo kaawe eꞌrarie aamo chaanekoio, eemea tamochio, ki waꞌachi erakoamepua.
\v 13 Aamo waꞌa teꞌtiopao, noꞌo tatana tuuyemechitia, chaaninia aamoo, aamoo teemea, aamo iikachi machenamee, taamo tísia kaawe eꞌriameko tuusoo, tísia kaawe erakomii teemea.
\s Riosi ahjame tiopara teemea
\p
\v 14 Neeea ehpeo poponiwa pipiniwa tiameo, Riosichi teꞌterepua aamo nayewemania, ihtana teꞌterepuamekoopua. Kaꞌte pirena teꞌtere eemea ki Riosichi paparame ahjamaopua, kiisi kaawe teꞌteriameopua, Riosichio. Waꞌa teꞌteresaa eemea, ooka animari yoomuwame ki waꞌachi ahpo teꞌteriameka teꞌteremapua. \fig |184-cn02067b.tif|col|||Ihta animari yoomuamea, ki pirena maakuraniamepua ki ahpochitia animari ahjamao.|6:14\fig* Aaata Riosi teꞌta teeretonariamea, ¿aatia ahpo pirenatutapua, ki Riosi teꞌteretonariame ahjamao? Uutapachi oiyamea, ¿aachin teeka taꞌiria yasitotaria, tukapachi oiyame ahjamao?
\v 15 ¿Waꞌachi erakotarekosa ahpo kaawe erakowaopua, Riosie Weratiamea, Satanasi ahpo seepurawa ahjamao, Weeriari tewaniáme? ¿Ihtanachi ahpo waꞌachi teꞌtiamepua, Eesusichi paparamea, ki Eesusichi paparamechitiao?
\v 16 ¿Ihtatia kaawe teereta riꞌriosi netetiamea, Riosi tiopachio? ¿Ki naneꞌreka mochikame eemea aamoo, teꞌta Riosi ahjamekamera tioparakoo?
\v 17 Riosia cheerepua tiameo:
\q Puuyasa eemea waꞌao; poanatusa eeme pukachio;
\q kaꞌte noonote eemea waꞌao,
\q ihtaoi aamoo, ki kaaweruma iintapamechio,
\q
\v 18 puꞌka noꞌo tuuya ikisoo,
\q2 kaawe uuka aamo tetewimania waikao.
\q Aamo Noonochitia teeremania waikao,
\q2 eemea, noꞌo tatanachitia teꞌteremapua,
\q waꞌa chiiame apoe Paamiraa,
\q2 yooma ihta itapitichi utewaemea.
\c 7
\p
\v 1 Waꞌa taamo iintomo tuuyopa Riosio, puꞌkakamera inatakao, toitia kaawepua yooma ihta ki kaꞌkaruma nokiwameo, yomatiame epeche epecheche taamo piipasika, taamo weerewachio yooreminao maꞌchiopua tiame, yooma tamochio ki kaaweruma tiia. Taamo Noono iyoriwao kaawe neesetoka mochitotia kaawepua, weruma iyoripuapua naaju, taamo Noonochi tewekachi kahtiameopua.
\s Koorintio mochikame Riosichi enepaniame
\p
\v 2 Eemea taamo nokisiao, kaaweruma taamo tetewijeranipua, taamoo kihta naꞌara nokisikamekopua, aaataoi. Aaataoi ki wisikuame teemea, taamo masitiaeopua. Aaataoi kihta uꞌyekame teemea wisikuekao.
\v 3 Iꞌka noꞌo chiiao neeea, kihta nekaka aamo chaaniame neeea, ohsotia neeea, tísia aamo nakiyapa aamo kaaweruma tuuyeka chiiamenia. Teemea aamowichioo, ahkasi mukiwachisi maapori tiiachioi nokisikamepua.
\v 4 Neeea, oisa eꞌriamepua amochio, aamo kaawe teꞌteretopa Riosichio. Neeea waꞌa eꞌrapao, weeka itapiti ki kaawe tiiame simiyoiopua iꞌwao, tahpitika eꞌramenia aamo kaawe eꞌrakao, aamo kaawe teꞌteretoame inamukapao, Riosichio.
\p
\v 5 Pukeri ajasisaapua teeme iꞌwa Maseroniao, tísia taamo naꞌaraniame natepakame teemea iꞌwao, yomachi iꞌwa Maseroniao, ahkasioi, kiisi taꞌiria taamo resiputiapua, naꞌarakao. Maꞌchi tamochiopua naꞌaraai aiwatiapua, yooreminao, majawi seewewa.
\v 6 Nape Riosia, yuuwesirichi wichikame kaawe erapatiamekapao, taamo kaawe erapatekapua Tiito asiraeo.
\v 7 Nape ki Tiito asiraeche teꞌta kaawe erapakamenia, epeche tísia kaawe erapakamenia, Tiito aamo erakoa noꞌo uꞌyepariawichio, tísia noꞌo tetewinario chaachaparia, aamoopua noꞌowichioo, tísia yuuwesirio tuuyopua noꞌoo, weeka itapiti noꞌo aiwaka yasitoaopua iꞌwao.
\p
\v 8 Ehpeo neeea, puꞌka tapanarami aamo uhjureria iyojurao, aamo ki kaawe eratekainia kuꞌitapio, kaawe noꞌo iintorio eꞌraninia puꞌkao.
\v 9 Ehpeonia kaawe eꞌraninia noochio, puꞌka uhjurariae, aamo yuuwesiteriai kuꞌitapio, kaaweruma machenariopa aamo ki kaaweruma teꞌtereriaa. Puuu aamo yuuwesiteriaopua kuꞌitapio, kaawechupena noꞌo kaawe erakonapua, puꞌka aamo ki kaawe nokariaoipua, toinarepaka, iiyana eꞌrepakaopua ki kaawe nokiwao. Waꞌa tiiame nakiyame Riosia.
\v 10 Riosie ikiwa yuuwesiwaa, taamo ki kaawe ihsika yasario eraniamepua, Riosie taamo cheriwejera eraniamepua, kiisi taꞌiria kahtiapa ahpoo, ki kaawe iintoriao. Riosia waꞌa eꞌrameopua, cheriwiamepua puꞌkao, ahkasi ki wahjiamesi piipatekaopua puꞌka tatakorirao. Nape aaataa aaata ihtaoi ki kaaweruma yoorakapua puꞌkao, ahpo ki kaaweruma iintoria naneꞌretiamechi yuuwesiamea, Riosichi cheriwema itakaiopua, kiisi cheriwepuamepua Riosieo, naneꞌriamekapapua Riosieo, wistuka ahpo cheriwepua itayamekopua Riosichio. Puuu aaata waꞌa tiiamea, kiisi Riosi ahjama yasimeripua, seena aampasio, mukukame tiiapa Riosiwichioo.
\v 11 Ai, ¿tetewaru eemea aamoo eꞌwesoopua Riosio, tísia kaawe iintoriopua amochio? Puuu waꞌa aamo ikiriaa, Riosi eꞌwekapa aamo toinareka ki kaaweruma, kaawe ikitiamepua Riosieo, puuu tísia aamo yaapi eꞌrariaa. ¿Ki tísia iinyatiame tetewikapa ki kaawe nokiwa waꞌa ikitiamepua Riosieo? ¿Ki Riosichi tísia iyorinariapa toitiamewichio ki kaawe nokiwao, Riosia tísia kaawe iintorepua amochio? Waꞌa tiame aamo inatakopa Riosia, aamo cheriwerepua, yooma aamo ki kaawe iintoriao, puhjeka.
\v 12 Neeea pukeri simiyame aamowichio iyotepariaa, ki puꞌka teꞌta iinyatiame suwepori iintotiamekaipua aamo eenechi inatepamichioopua waꞌa aamo tiopawachio, ohso kaawe puuua, taamo tesiwa eꞌreria inatapamichiokakai puuua, taamo aamo katewewa iyoteri uhjurerioiopua iyojurachio.
\v 13 Pukaepa waꞌa teꞌtereka mochitoriopa tamochio, tisiwa kaawe erakoame teemea amochio.
\p Teemea tiameo, tísia kaawe erakonapua, Tiitoopua tiame waꞌachitia amochio, tísia kaawe eꞌreka kahtiamekopa iꞌwao, tísia kaawe eꞌreka inatepamepua, aamo tísia kaawe yooraka yasiteriopa aamo mochikachi ahjama kahtioio.
\v 14 Keꞌchu waꞌa teꞌterenioio, tísia aamo kaawe nayewakamekainia Tiitoo, ehpeonia pichiwa waꞌa tiiame machinariopao, ki nuꞌuti kaawe eꞌramenia noochio, kihta suuwe erapariamekapa noꞌo waꞌa cheeriao.
\v 15 Tiitoa, tísia kaawe eꞌranipua tiameo, puꞌka noꞌo aamo chaaneka iyoteka uhjureriaopua, kaawe eꞌraka aamo uuriopua puꞌkao, ahpoo, weruma kaawe yooraka tetewitiapapua waꞌao, waꞌa aamo mochikachi asikoiopua.
\v 16 Neeeai tísia kaawe eꞌranipua amochio, aamo kaawe teꞌteretopa waꞌasio, aamoe waꞌapi teꞌteretomiao.
\c 8
\s Tesiwatia ijinuekai weeka ihkoretiame
\p
\v 1 Ehpeo aamo Koorintio tiopachi mochikameo, aamo tuuyenarenia, achini teetoriokamekopua Riosio, Maseronia weeechiami mochikamechiopua tiꞌtiopachio.
\v 2 Aapoeo tísia aiwaka mochitoamekaipua, kiisi weeka tomiwaeka mochikaio, puꞌka Eerusareni Riosie Weratiamechi paparameo, tísia kaawe eꞌraka kuꞌinarekamekopua, ihtawichiooipua nakiwiamewichiooiopua toomi.
\v 3 Naneꞌriamenia Maseronia Riosichi poponiwao pipiniwaopua tiameo, ahkasi ahpo kuꞌimetiachisi, kuꞌiriamekoopua ahpo kaawe erakoariachisi.
\v 4 Aapoeo, aapoe waꞌapi yaapi noꞌo chaachapakamepua ahpooi reesisepuaichiopua kuꞌinareka kuꞌipuawichioopua, puꞌka Eerusareni mochikame ahpochitia Eesusichi paparamewichioo.
\v 5 Nape Maseronia tiꞌtiopachiami mochikamea, ehpe noonoikamepua ki maaeriachitia taamoo; puuu aapoea Riosichi paparame eenepasaapapua, tísia taamo kuꞌikame puuua, teꞌta Riosi Riosiwari ahpo erateriachitiao.
\v 6 Waikao aamo Koorintio mochikameo, waꞌa uhjuramo oꞌra teeme Tiitoo, iꞌnoramichiopua aamo kuꞌiriao, Tiito waꞌa kahtioi oꞌinetiameopua naꞌpoakao.
\v 7 Eemea, Riosie Weratiamechio, kaawe teꞌteretoamepua waꞌasio, aamo wahjachi nayewiaopua tiameo, pepeneka nayewiamepua puꞌkao, Eesusichi simiyame aamo naneꞌreka mochikaopua, taamooipua kaawe uuka tetewamepua. Waꞌa teꞌtiapa eemea, kaaweruma erakoka kajupuapua puꞌka kuꞌiwa aamo naꞌpoao.
\p
\v 8 Ki aamo nuureka chiiamenia chiiao, nape kaawe erakoka aamo kuuwepame tetewinarenia, aamo kuꞌinariao, aamo oꞌineriachitia waꞌachitia.
\v 9 Naneꞌriame teemea puꞌkao, tewekachio tísia paarasatiaio, kihta iinuemechitia iꞌwa weeechi eenakamekopua, taamoo, ahpo paarasarichi teꞌteretamia, taamoo weemera ahjari kiꞌyakaopua, ahpo ahjama mochipuameopua, ki wahjiamesi.
\p
\v 10 Ihpi kiꞌyao, eemekamerakaipua pahcha kuꞌimio erapakamea Eerusareni mochikameo, tísia tooremuka mochikamekopa Eesusichi paparameo.
\v 11 Ehpeopua puꞌka kuꞌiwao, aamo ajasepa kuꞌyae, kaawe eꞌraka kajupuapua waꞌasi, puꞌka aamoo, pukeri aamo oꞌineriachitia.
\v 12 Riosiwichioo, teꞌta kianarewakamera nateyamepua, kihta iinuekaio, paarasatiaio.
\p
\v 13 Ihji taamo wahjachi kuꞌyaa, ki taamo tooremuka itipipuawichio puuua, ohso kaawe napati taamo Eesusichi mochitoame, teerepuawichiopua.
\v 14 Ehpeo eemea, iinuekapa kuꞌyamepua aamo wahjachio, nape meeriami ahkao, aamo waꞌachi teꞌteresoopua tooremukao, aapoekamera aamo kuꞌimeripua tiameo. Waꞌa teꞌteriame enesaa eeme, napati ahpo kuꞌyame enemapua,
\v 15 Ehkoriami Iyoterichi chiiachitia: “Weeka iꞌipakamea, ki uꞌmatoame soparatiaitepua; ki weeka iꞌipakameai, ki toorewika itipimerikaitepua.”
\s Tiito ahpo ahjama nokisiame tiame
\p
\v 16 Cheriwema kiꞌyaninia Riosio, noꞌochitia erateriopua Tiitoo, puꞌka kuꞌiwa aamo naꞌpoakemeriopua, kaaweruma neesetoteka.
\v 17 Tiitoa, apoe waꞌapi siinarekapua waꞌao, puꞌka kuꞌiwa naꞌpoaniameo, waꞌachitia yaapi eꞌrapapua puꞌkao tamochitia.
\p
\v 18 Tiito ahjamao, waꞌachi uhjurena teemea piirechi Riosichi pooni, tísia machiwame tiꞌtiopachio, puuua tísia kaawe masitiame Riosi tuuyewario.
\v 19 Puuu waꞌapi uutiamepua tiameo, yooma tiꞌtiopachi mochikameea, taamo ahjama siimichiopua Eerusarenio uhjurarepua, puꞌka kuꞌiwa iꞌyetokao, taamo siimpoiopua. Puuu Eerusareni taamo iꞌtoa kuꞌiwao, taamo Noono Riosi kaawe ihsiame tetewipuawichiopua, taamoopua tiameo, kaawe eꞌraka naꞌpoariopua, taamo waꞌapi kaawe eꞌrachi.
\v 20 Ihji yooma tiꞌtiopae uutiamea, taamo ahjama siimerikapua Eerusarenio, ki aaata taamo aꞌchi chaanemichiopua, iꞌka ki ookapi toomi taamo iꞌtomeriopua, kaawe neesetokao.
\v 21 Waꞌa teeka inatesimeri teemea, puꞌka kuꞌiwa neesetokao, waꞌa teekao yooma tiꞌtijoeria taamoo, Riosi tetewachiopua tiameo, teꞌta iyoriamechitia tetewimichiopua.
\p
\v 22 Aamo Koorintio mochikameo, Tiito ahjamao piirechi uhjuraninia tiameo, taamoo puꞌkao, tísia puꞌsereka tekipaname noꞌo tetewiria Riosi tehkiwachio, ehpeo epeche puꞌserepakamepua Riosi tehkiwao, aamoopua, tísia kaaweruma teetoame inamukapa Riosichio.
\v 23 Aaata Tiito oowe eꞌrepuame iinatukesoo, oowe eꞌrepuameko tuupuapua puꞌkao, noꞌo ahjama tekipanamekopua aamowichioo. Wahjachi Riosichi poponiwa waꞌa Tiito ahjama siimpameo, yoomahka kaꞌkarumapua, Riosie Weratiame nayewatuame, ahkaoi tiopachiamiopua.
\v 24 Waꞌa ajasisoopua puꞌkao, puꞌka waꞌa weruma kuꞌiwa naꞌpoaniameopua, kuuwepapuapua puꞌkao, iꞌka Maseronia tiꞌtiopachiami eꞌenakameo, aamo tetewimichiopua puꞌka kuꞌiwao, pichiwa naꞌpoatiamekopua puꞌkao, yooma Eerusareni mochikame poponiwa pipiniwa tiameo, kuꞌipuawichiowichiokoopua. Waꞌa aamo noonowiriaopua tiameo, taamo aamo kaawe chaachapariaopua tiameo, pichiwa enemichiopua.
\c 9
\s Riosichi poponiwakame pipiniwakame tiamewichio, toomi naꞌpoaniame
\p
\v 1 Puꞌka toomi kuꞌiwa naꞌpoapuamechi simiyameo, ki nakiyame eemeapa aamo tuuyepuameo,
\v 2 naneꞌriamenia aamoo, weekaeoi aamo tísia kuꞌinariamekopua. Neeea Maseroniami ohjoemeo, eepi chiiamenia, eeme Aakaya weeechi mochikameo, kiꞌya oꞌinia tísia aaata kuꞌinareka mochikamekopua, aamo wahjachi Riosichi paparameopua. Waꞌa aamo erakoamekopua aamoo tísia kuꞌinarekao, waꞌachi erapakamepua tiameo, waꞌa Maseronia weeechiami mochikameai.
\v 3 Ki waꞌa siinariapa pehjio, puꞌka uhjurania waꞌao, puꞌka aamo kuꞌiwa naꞌpoaopua, kajumichiopua waꞌasi, puꞌka aamo kuꞌiwao, iꞌwa Maseronia mochikameo, noꞌo nayeweriaopua waꞌasi.
\v 4 Ki siminarekamenia pehjio, ki suuwe erapuapuawichiopua aamoo, puꞌka kuꞌiwa naꞌpoaniameopua, ki aamo kuuwepakame tewisoo. Waꞌa tiiame noꞌo tewisoopua aamoo, tísia suuwe erapamii eemea. Puuu iꞌwa Maseronia oꞌinia noꞌo yeetoaai, waꞌachi ijikimiipua, tísia suuwe erapakao, puꞌka aamo kuꞌiwa naꞌpoao, kajukame tewipo tuuriopa.
\v 5 Pukaepa puꞌka poponiwa pahcha uhjuramo orapakane, aamo kuꞌika kajutepuaichiopua, aamo kuꞌiwa naꞌpoao, puꞌka weruma kuꞌiwa ihkokewao, kajutiame manimichiopua waꞌasi noꞌo asioio. Waꞌa noonoisaa keꞌchu noꞌo asiyoio, aamo kaawe eꞌrachi noonowitiame enemapua, ki noꞌo aamo nuurewachi.
\p
\v 6 Naneꞌreka mochimitia iꞌkao: Aaata kuꞌichi echakamea, paikapi iꞌipamerikatepua; weere echakamea, weeka iꞌipamerika tiiamepua.
\v 7 Aaata kuꞌiwa ihkokiamea, echayamekatepua. Paikapie kuꞌikame enesaa, paikapi tooremuamewichio ahsepamapua kuꞌiriaa, weeka kuꞌiwa ihkokekamea, weeka tooremuamewichio ahsepameripua kuꞌiwaa. Yooma aaata kuꞌiwa ihkokenariamea, kehkisa ahpo ihkokenaria eꞌraria, ihkokepuapua; Riosia aamo kuꞌiwao, kaawe eꞌraka ihkokejeranipua.
\v 8 Apoe Riosia aaata tesiwa tiiame kuꞌyameo, ki nuꞌuti kuꞌimeripua puꞌkao yooma ihta nakiwiaopua, epeche kuꞌyamepua tiameo, ahjae iinuepuawichiopua aaata tooremuame kuꞌipuawichioopua, yooma ihta nakiwia tesiwa teꞌtereka mochitoao.
\v 9 Ehkoriami Iyoterichio chiiachitia:
\q Taamo Noonoa, yomachi echakamepua ahpo tesiwewao,
\q2 aaata ki apochi paparameopua pehjio,
\q2 pukae kuꞌipuaichiopua,
\q2 aaata puꞌka tesiwewa nakiyameopua,
\q2 apochi papapuawichioo,
\q aaata puꞌka Riosi tesiwewa uukameo,
\q2 ki wahjiamesi ahjameripua.
\p
\v 10 Riosia, aaata echimichioo, Riosi ihsiamepua iimori kiꞌyakao, puꞌka echisaopua tísia paarasatemichiopua taakeriao, uꞌmatoame soparame aamo iinuemichiopua koꞌkometio. Waikao puuu soparame uꞌmatoame iinuemea, soparame iinuemichiopua ahjae kuꞌipuao, aaata ahpo wahjachi tísia tooremuameo.
\v 11 Puuu Riosie aamo nokisiriawichio kuꞌinarekao, Riosia amochio, epeche epecheche aamo kuꞌitenaremapua, aaataoipua, waꞌa erapakaopua aamoo, Riosia aamo waꞌa tiiopao, epeche epecheche aamo kaawe teerepamapua apochio. Waꞌa tiiaopua eemea, iꞌka aamo kuꞌiwa iꞌtoaopua Eerusarenio, ki ookapi enemeripua, cheriwema Riosi kiameria.
\v 12 Waꞌa teekao, puꞌka kuꞌiwa iꞌtopuameo, ki kooameche iꞌtoai teerepuawichiopua.
\v 13 Puuu aamo kuꞌiriaopua wahjawichioo, maꞌchiame aamo tetewipamepua, teꞌta Riosie Weratiamechi paparamekopua, aamoopua, Riosichikamera iyorika mochitoamekopua. Puuu Eerusareni pichikiameo wahjachiopua tiameo, aamo weruma kuꞌirae kuꞌitiamea, muuwaeme weruma cheriwema kiameripua Riosio, aamo Riosichi kaꞌkaruma paparameo, aamo tísia kaawe noonowiriaopa.
\v 14 Puuu yooma aamo kuꞌiwa kiatiamea tiameo, Riosi ahjama naewaiopua, tísia aamo kaawe eꞌreka nayewemapua Riosichio, Riosio tísia kaawe iintoriopua aamoeo.
\v 15 Taamo Noono Riosio, cheriwema kiataria naaju, yooma ihta taamowichio iintorioopua, yooma aachin teeka eenariawichioopua iꞌka weeechiopua, Riosikai tamochi tiꞌtijoechi tijoetuka. Puꞌka iintoriao teemea, ahkasi kiisi ahsepari iinueme teemea, aachin teeka taamo teꞌta tísia cheriwema kiamiao, ahkasi ki nuꞌunti tiiame iintoriopaopua Riosio, taamowichioo.
\c 10
\s Paoro Riosie weratiamekapa ahpo iintomia
\p
\v 1 Ehpeo neeea, noꞌo nayewaniame chanimane. Aaata waꞌa mochikamea, noꞌoo suuwe eꞌraka nayewame teewameopua, waꞌa aamo mochikachi kahtiaiopua tiopachio, nape noꞌo iyoteka nayewachio, kiisi suuwe eꞌraka nayewamekata neeea, tísia utewaeme nayewamekata neeea. Nape ehpeo neeea, Riosie Weratiamechitia aamo nayewemania, tesiwa aamo eꞌreka nayewaka, kihta utewa yoojorawa cheeka.
\v 2 Puuu noꞌo waꞌa chaachapamea, kaawe enemiipua waꞌa noꞌo asisoo, ki noꞌo nekame tiiame noꞌo chaanesaa, seenekachio waꞌa tiiame chaanetiaania, tahpitika yoojoramaoinia chaanewaeo, puꞌka waꞌa tiame nakiyame puuua.
\v 3 Nape teemea, ki waꞌa chaachapaka katewiamepua, ki iꞌka weeechi eenamekopua taamo eratiaa.
\v 4 Teemea riaorósi utewarirao, Riosi Riosiwarie nehpupaka taamo newipuame teemea, Riosi pichiwarie nayewaka, ki iꞌka weeechi kateweniachitia.
\v 5 Teemea puꞌka Riosi pichiwari teꞌta kaawe teeremerie, puipame teemea taamo seepurawaopua, oowera ahpo ki waapisi inatame maayameopua, oowera maaewachiopua, yooma ihta Riosichi simiyameo, inatasaapua. Yooma taamo ahjae nehpupasiwaa, Riosie Weratiame taamo masitiamechee, taamo nehpupanare teemea.
\v 6 Neeea waꞌa asisaa, yooma kiatiamekapa naꞌpoatiameo, aamo Riosi eꞌweka noonowiriao, yooma katewemania waikao, yooma ihta aꞌchi teereniameopua Riosichio, ki eꞌwewa.
\p
\v 7 Aaata eemea, itapiti aampache tetewaka maayame eemea aaata tiiarao, ki aaata ahpo yooremina tiia tetewai. Aaataai teꞌta ahpo Riosie Weratiamechi kaawe teꞌterio erakoamea, waꞌachi taamo teꞌtereko erakoame enemeriipua.
\v 8 Neeea taamoo, teꞌta Riosie Weratiamee ajawatiameko tuuyaio, kihta suuwe erapame neeea puꞌka cheekao, taamoo, aamo kaawe yoramiakamera ajawatiamekapa teemea, kihta Riosichi aamo eerina teeremichio uhjuratiame teemea, wepira makotoka aamo wewemerichitiaopua.
\v 9 Neeea noꞌo iyoterichio, ki aaata ahpo mamajochaniame, eꞌrejeraninia.
\v 10 Aaata waꞌa chaachapamea, tísia noꞌo pehtiame nayewameko tuuyamea noꞌo iyoterichio, nape waꞌa kahtiapao aamo ahjamao, kihta tahpitika chiiame tuuwamekoio, noꞌo nayewiaio kihta nateyameko tuuwaio,
\v 11 nape waꞌa enasaa neeea, amochitia teerema neeeai, tahpitika yoojorawa naewakao, ki maaeniai neeea. Puuu aaata waꞌa chaachapamea naneꞌremetepua, noꞌo iyoterichi cheeriachitia, waꞌapi noꞌo teeremerikopua puꞌka ahjamao, noꞌo ahjama waꞌa eꞌenakameo, waꞌachi teꞌteremerikopua puai.
\p
\v 12 Teemea ki waꞌachi teꞌtiamepua, puuu ahpo waꞌapi kaawe nayewamechitiakoo. Puuua, epeche weruma enenariamepua ki piirechi teꞌteriachitia; puuu waꞌa eraniamea, ki ijinatame nokayapua.
\v 13 Teemea ki waꞌachi erakoamepua, aaata epeche weruma eraniameo, iꞌka Riosiwichio tehkiwachiopua, Apoe Riosi ihsiriamekopua iꞌka tehki taamo kiꞌyakaopua, ahkaoi taamo teetotekaopua, ahkasi aamo Koorintio mochikachiami iꞌyetokaopua, iꞌka teꞌta kaaweruma Riosi tuuyewariopua.
\v 14 Teemea taamo amochi eꞌenariaa, ki seꞌwi eꞌenakame teemea Riosi taamo teetojerachio, Riosikamera iintokamepua eenechi waꞌa uꞌpakao, pukeri oꞌinia pahcha simiyachi, waꞌami taamo uꞌpoiopua, iꞌka teꞌta Riosi kaaweruma tuuyewari Eesusichi simiyame, nayewatuniameopua.
\v 15 Teemea piirechi tekipanariao, ki teeme nokario chaachapanariamepua. Ohso kaawe teemea, aamo muuwepakame enesoo Eesusichi paparameo, aamo kuꞌinariame teemea aamo waapiami sewinachiami waminakaopua, iꞌka Riosie taamo teetoa Riosi teꞌta kaaweruma tuuyewario, Eesusichi simiyame nayewatuniameopua, nape oowera kuꞌikache.
\v 16 Waꞌa aamo waꞌa tiiame kuꞌisacheopua, epeche waanami siimpanariame teemea, iꞌka Eesusichi simiyameopua newipatewa, nape sewinachi ki piirechi nayewaturiachi, ki raampata teeremichiopua aaata nayewaturiachiopua pahcha.
\p
\v 17 Aaata werumatanariamea, Riosikamera werumatametepua, Riosio tísia iintoriopua ahpowichioo, ahpo Taana Eesusieo.
\v 18 Taamoe waꞌapi kaawe iintorio tuuniamea, Riosiwichioo, kiisi nateyamepua; nape apoe Riosikamera taamo kaawe iintorio tuusoo, ki teesa nateyamekaitepua.
\c 11
\s Eesusichi simiyame ki pichiwaka naꞌnayewatuame
\p
\v 1 Ehpeo, ehpeche kuꞌitapi noꞌo anachasaa kaawe enemii eemea, iꞌka ki inatachitia iiweta noꞌo nayeoiopua. Naneꞌrenania naneꞌriao, noꞌo anachaka keepuamekoo, nape ehpeche kuꞌitapioi, noꞌo anachaka keepupuapua.
\v 2 Neeea aamo waꞌina eꞌramenia, aamo waꞌapi kaawerumawichio, aaata noonora ahpo maara ki aaata tijoe ahjama neewijerachitia pehji waꞌinamechitia. Neeea aamoo, kaꞌkaruma neꞌnetenariamenia Riosie Weratiameo, kihta aꞌchitiame ki kaawe teꞌteriame.
\v 3 Neeea aamoo waꞌinamepua, aamo Eesusi Riosie Weratiamechi iyoriao, aamo sewina erapatepuame seewiapa. Neeea aamoo majawenania wiskueniameo, ehkoriami Satanasio, siinoiye wisikueriachitia ehkoriami Eewa tewaniameopua oowitiame; neeea aaata waꞌao, Eesusichi simiyame masitiameo, seꞌwi teeka aamo masitio eꞌramenia, kiisi pichiwaka chaachapame.
\v 4 Eemea wisikueeka mochitoniamepua, aaata waꞌamahka enasoopua peenia cheeka masitekao, sewina tiame masitioiopua ki noꞌo aamo masiteriachitia Eesusichi simiyameo, ikanati pichikiamekopua aaataoi peenia cheeka masitiopao. Eemea ikanati uuyamepua tiameo, seꞌwi masiteniameoipua, ki Riosi Riosiwarichi simiyame. Eemea waꞌachitia tiame ikanati uuyamepua, sewina teeka ahpo newipuapuameopua tatakorichio, ki taamo teꞌta aamo masiteriachitia.
\v 5 Neeea puꞌka seꞌwi maꞌmasitiamechio, ki noꞌo epeche nuꞌutiko eꞌramenia, ohsotia neeea epeche noꞌo eꞌramenia ki puꞌka teꞌte ahpo peenewarieme erakoachitia, teꞌta Riosichi simiyameopua.
\v 6 Neeea, ki teꞌta yeꞌkamejuarenia nayewakao, nape noꞌo Riosichi simiyame machiyao, teꞌta penipakamenia. Eemea maꞌchiame naneꞌriamepua puꞌkao, taamoo aꞌchitiaoi machenasiriopua, maꞌchiame aamo nayewesikao.
\p
\v 7 ¿Ki kaawe iintokamekosa neeea, ki uunarekapa aamo noꞌo ihkokiao, Riosie newitoniamechi simiyame aamo mochikachi nayewatuaio? ¿Ki kaawe iintokamekosa neeea, aamokamera epeche kaawe tetewika masitekapa yooma itapiti Eesusichi simiyameo, aamoo, epeche kaawe teetopamichiooiopua Riosichio?
\v 8 Neeea pirenachi tiꞌtiopachiami koꞌkometikamerae, noꞌo kuꞌitiae aamo masitekamenia.
\v 9 Waꞌa Koorintio ihsiainia masitekao, itapiti nakiyainia Riosichi tehkiwa teetopuawichioo, kihta aaata itanekamenia, Maseronia oꞌinia eꞌenakame poponiwa, ahpo kaawe eꞌrachi noꞌo kuꞌikamepua, yooma ihta noꞌo nakiyaopua, iꞌka tehkichi noꞌo teetoachio. Neeea, nooe noꞌo neesetokamepua, kihta itanariapa amochio, neeea noꞌo tiiao, waꞌapi teetomeripua.
\v 10 Neeea, puuu noꞌo waꞌa teetomia yomachi Aakaya weeechi kihta itakao, teꞌta pichiwapua, noꞌoo teꞌta pichiwa Riosie Weratiamechi teetoachitia.
\v 11 ¿Aatia waꞌa teeretotarenia, kihta kuꞌiwa itanesikao? ¿Ki aamo nakiyapa ki noꞌo kuꞌijeramenia? Ki puuupua. Naneꞌriame Riosia noꞌoo, tísia aamo nakiyamekopua.
\p
\v 12 Neeea noꞌo teetoao, waꞌapi teetonariame neeea, puꞌka taamochitia nokisiame erakoameopua Riosichio, ki ihta iinuemichiopua taamoo, ki kaawe nokayo tuukao, iꞌka Riosichi masitiao, taamo toomitunario nokayo tuukao.
\v 13 Waꞌa nokayame tiꞌtijoea, ki pichiwari Riosiwichio tekipanamepua, wiskuamepua, ki pichiwa chaachapame. Puuu tiꞌtijoea, Riosie Weratiamee ahpo ajawatiameko erakoowiamepua.
\v 14 Puuu waꞌa teꞌtiaa, ki sewina nokayamepua Satanasi ihsiao, Satanasio, waꞌa ihsiamekopua, tamochi enasaapua, kaawerumaka chiiamepua.
\v 15 Satanasiwichio tekipanameai, ki sewinatiame nokayamepua Satanasichitiao. Puuua, Riosi kaꞌkaruma chiia, masitiameka chaachapamepua. Nape kajuyachi taawechiopua, ahpo iꞌya tewimapua, Riosi kokosarieo.
\s Paoro aiwa Apoe Eesusie weratiamechitia
\p
\v 16 Neeea, Riosie Weratiamee weratiamepua, kiisi aaata ki inatame neeea. Nape noꞌo ki inatame erakonioipua, anachaka noꞌo keepupuapua kuꞌwitapioi, ki inatameka cheeka nayewachio.
\v 17 Ihji noꞌo naewamiaa, oowera ki inatamechitia nayewamane puꞌkao, Apoe noꞌo Paamiraa, ki waꞌa cheemiipua.
\v 18 Muuwaeme ahpo waꞌapi aiwamechitia, waꞌachitia noꞌo aiwiameka cheema neeeai, nape oowera ki inatamechitia.
\v 19 Eemea, ¡tísia machiyamekapao, aaataoi ki ijinatame pichikeka keepuame eemea!,
\v 20 ahkasioi tísia ki kaaweruma aamo masitioiopua puꞌkao, ahkasioi tiameo tísia yooreka keepuamepua puꞌkao. Puuu waꞌa nokayamea, ahpokamera utewachi natetepuawichio, tekipanamepua. Puuua ahkasi aamooiopua, weweka ichikokiamepua itapiti aamo iinuekao. Waꞌa nokakaopua tiameo, tísia ujuwatiame nuuramepua, aamoo ahpo ijinuwarachitia, tísia utewaeme nayewaka aamo nuuriamepua.
\v 21 ¿Teemeai, waꞌakosa teꞌteremepua, epeche kaawekosajoarepua naaju, puꞌka teꞌta naꞌara nokayamechitia? Kaꞌipua.
\p Puꞌka waꞌa nokayameo, ki suuwe eꞌrame enesoopua ahpo oisa eꞌrekao, waꞌachi ki suuwe eꞌramechitia nayewama neeeai, oowera ki inatamechitia.
\v 22 Eureo tiꞌtijoeko chaachapasoo, ¿ki eureo neeeai? Isaeri tiꞌtijoeriko chaachapasoo, ¿ki isaeri neeeai? Aurani oꞌinia tiꞌtijoesirio chaachapasoo, ¿ki Auranichi eenakame neeeai, tijoetusiwachio?
\v 23 Puuua Riosie Weratiame nookiameko tuusoo, ¿ki epeche iintokamekosania Riosie Weratiamewichioo, noꞌo oijerameka chiiamekai? Nape ki noꞌo aiwiamenia, waꞌa tiiaio. Neeea, epeche tekipanamenia Eesusichio; karichioi, epeche yachatiamenia; wepiwaoi, epeche wepitiamenia; ki ookapisa amori meritiai, ahjakamenia.
\v 24 Isaeri tiꞌtijoeeo, marikisa simiyame wepitiamenia, ooka weerewachi wewepuameo, piiripi toiteka.
\v 25 Paisa simikameo, weruma kuhsie wepitiamenia; seenepi simikameopua tiameo, tehtee papaka tísia aiwatetiamenia; paisa maapori tiiachi noꞌo tetewikamenia paꞌwechioi, pawekakera motasoopua, piwiteme ikitiameeo, waꞌa ikitioio, piie taawe piie tukawari anachamenia neerochio, paꞌwechi;
\v 26 Neeea, eepi ahkaoi oikamenia, ki ookapi maapori tiiame aiwaka, iꞌka eee tiiamechitia: aakichi paatewa maaporichi; ichikoamee maaporichi; noꞌo tetejimarichi maapori ikiwame; seesenu tiꞌtijoechioi maapori ikiniame; muuwari mochiwachi, maapori; ooruchiami oiwa maapori; paꞌwechiami oiwa maapori; ki pichiwari poponiwachi maapori.
\v 27 Tísia utewaeme tekipanakamenia, seenekachiopua, kiisi kochika maapori tiiopa; neeea tísia toorewioi, machikamenia, paramuniaoi tísia aiwakamenia; eepi chorowaio, ki teeweka tekipanakamenia; tuurawioi tísia aiwakamenia; ki wisasoriekapao, tísia aiwakamenia.
\p
\v 28 Waꞌa ikiyainia tiameo, tiꞌtiopachiami Riosichi paparakameopua, tísia utewa eꞌrakamenia aachin, noꞌo neesetomiaopua puꞌkao.
\v 29 ¿Aatanakosa epeche aiwakamepua, ki kajume tiameoipua tehkio, ki neeéche? ¿Aatanakamerapu epeche naꞌaretiameaa, aatanakamerapu epeche nekamutetiamepua ki neeé?
\v 30 Yooma ihji noꞌo nayewariaa, aaata ki inatamechitia nayewariao, kii ki inatamechitia tetewipuawichio cheekamenia, ki noꞌokamera epeche yeꞌkamechitia tetewipuawichiooi, eꞌraka nayewakamenia. Noꞌokamera kaawe nayewaniachio nooeo, ki nooekamera epeche kaawe yeꞌkameko tuukamenia. Ohso kaawe neeea, Riosi noochi inisiameko eꞌramania, noochi yeꞌkatesikaopua noꞌo masitesiao.
\v 31 Iꞌka noꞌo chiiao, yooma noꞌo tetewakame Riosia, teꞌta pichiwakopua puꞌkao. Apoe Eesusi taamo Paamirakamera Noonoraa, apoekamerapua, teꞌta kaawe nayewapuamea, ahkasi ki kajuyame taawechisi.
\v 32 Seenepi simikameo neeea, chapipuai newikamenia, nape ki noꞌo yeꞌkarie. Noꞌo Raamahko ihsioio, waꞌa muuwarichi yawichia, Aareta tewaniame teꞌta yawichie weratiamea, ahpo soontaroe noꞌo inatiaipua waꞌa mochiwachi puuyaniachio, noꞌo chapisa karichi yachamichioopua.
\v 33 Nape aaata waꞌa koꞌre saꞌmichi kariwaemea, weruma waarichi noꞌo yahchaka maꞌchipakapua, saꞌmi yeewachipo maꞌchisio, waꞌa iintoa wanamina noꞌo tekipukapua maꞌchi. \fig |185-CN02112b.TIF|col|||Paoroa saꞌmikore yeewachipo maꞌchipaka newipatena, weruma waarichi yahchaka.|11:33\fig*Waꞌasa yooraka newipatetiania waꞌao. Puuu waꞌa mochiwachi noꞌo ikitiamea, Riosikamera iintokamepua, ki nooe yeꞌkarichikamera.
\c 12
\s Itapiti teteitewa neꞌnetetiame
\p
\v 1 Simitekaonia, noꞌo kaawe nayewaniachio, kihta kaawekoi noꞌo waꞌapi kaawe nayewaniameo, itapiti Riosie noꞌo tetewiteretia kochirewachi, nayewamane.
\v 2 Neeea kiꞌyamio, oosa mariki aampa naao paaumpari iꞌtoachiopa, ahkasi paika tiiachi tewekachi iꞌtotiamekania, noꞌo weerewama iꞌtotiameo ki naneꞌriamenia, ki noꞌo weerewama iꞌtotiameoi, puꞌkao apoeche Riosikamera naneꞌriamepua puꞌkao.
\v 3 Nape pichiwa waꞌa iꞌtotiamenia, weerewamao ki weerewamaoi, ki naneꞌriamenia. Puꞌkao, Riosiche naneꞌrenapua.
\v 4 Waꞌa noꞌo iꞌtotiachio, Riosi taamowichio kateweriachikapua, ki teesa peeniatiame tiiachi, waꞌao inamukane itapiti naawesari, nape puꞌka naawesario ki aaata chaninuretiane.
\v 5 Neeea, puꞌka kochirewachi noꞌo tetewariao, kaawe nayewamania, noꞌoo ki aaatakoio, Riosio waꞌa ahpo tísia peeniatiwachi noꞌo iꞌtoriopua; nape neeea, ki noꞌo kochirewachio, noꞌo ki yeꞌkameche uuka nayewamania.
\v 6 Nape noꞌo waꞌapi kaaweruma nayewakainia, ki aaata ki inatamechitia nayewame enemiinia, noꞌo nayewaopua pichiwakopa. Nape ki noꞌo weruma uuka nayewamenia, ki aaata noꞌo werumachitia tetewijerapa.
\p
\v 7 Pukaepa neeea, ki weruma noꞌo uumichiopua, puꞌka noꞌo kochirewachi tetewitetiameo, Satanasi reesisetiamenia, itapiti ki kaawe yorapuaichiopua noꞌoo, weerewachio.
\v 8 Neeea noꞌo Paamirao, paisa simiyame itaniame neeeapa, iꞌka noꞌo weerewachi aiwaka yasitoao, noꞌo puhjemichiopua,
\v 9 nape Apoe Eesusia senepi noꞌo itanioio, chaachaniamepua: “Neeea amochio soparame teewiamenia aamo kuꞌimiao, kihta eerina teeremichiopua, aamo noochi tekipanao; waꞌa teekao amochi noꞌo tetewipuawichiopua, noꞌo teꞌta utewario, aꞌchitiaoi ki eerina teetoka simitiamekopua noꞌo tehkiwao.”
\v 10 Waꞌa teetoame enesoo noꞌo Paamirao noochi, kaawe eꞌraka teetoamenia, yooma ihta aꞌchi tiame tesiwa ikiyaio, naatichitia, noꞌo naꞌara chaanewa, kaꞌchi ikime eraniame, yooma ihta aꞌchikoi yoraniame tísia aiwatekao, yooma ihta noꞌo tehki tiiame ikiwame. Yooma puꞌka aiwari noꞌo ikiyoiopua, teꞌta Apoe Paamira utewariraa, noochi enesiamepua kuꞌipasika.
\s Paoro ki Eesusie weratiameko chaachapawa
\p
\v 11 Neeea, ki inatameka chaaninia chiiao, nape eemepua ki noꞌo kaawe chaachapaka waꞌa noꞌo chanitiamepua. Nape neeea ki nooe noꞌo kaawe nayewametepua, eemekamera puuua, noꞌo kaawe nayewame teꞌteriamea. Noꞌoo kihtakoio, neeea ki epeche nuꞌutikaitenia puꞌka teꞌta ahpo Eesusie ajawatiamekoo, chaachapameo.
\v 12 Neeea eepi naaniatiame inisikamenia noochio, noꞌoo pichiwa Riosie weratiamekoo, naati noꞌo iintoriachitiaopua: ki kuꞌitapisi noꞌo tekipanaka ihsia Eesusichio, amochiopua kaawe teꞌteremichiopua, Eesusie noꞌo kiasiwaopua, kokoriame yachapatesika ki maaenari peenia ihsiwa.
\v 13 Wahjachi tiopachiamio Riosichi paparakamea, aapoe ahpo waꞌapi kaawe erakowachi noꞌo kuꞌikamepua, nape neeea aamoo, noꞌo kuꞌinarioio ki noꞌo kuꞌijerakamenia, ki amochi petenariapa itapiti noꞌo tesiwatia ki noꞌo iinuekao. Neeea ki noꞌo kuꞌijerariawichioo, noꞌo cheriwejeraninia. Neeea aamo tiopachi mochikameo, ki epeche wichipa tetewamenia aamoo, wahjachi tiꞌtiopachi mochikamechio.
\p
\v 14 Ehpe aamo tuuyamenia, noꞌoo waꞌa siimeri kahtiamekopua waꞌasi, amori yooma katewesa. Ihji noꞌo waꞌa simiyaa, paisa enemeripua waꞌasi, neeea ki peterenariapa amochio, ki uunariamenia noꞌo kuꞌiwao, nooekamera aamo kuꞌinariamepua, itapiti Riosichi simiyameeopua. Aaata tatanaraa, ki aapoekamera iꞌyamepua koꞌkometio, ahpo noonowichioo; noonorakamera ihsiamepua ahpo tatanawichioo, koꞌkometi iꞌyanekao.
\v 15 Pukaepa neeea aamo noonochitiao, neeekamera resipanariamepua aamowichioo, ahkasioi mukiwachisio, kihta noꞌo kuꞌijerapao. Nape epeche noꞌo ihsioio aamowichioo, ¿epeche noꞌo nakiyame enetare eemea?
\p
\v 16 Nape aꞌchitioi noꞌo eranioipua, kihta kuꞌiwa petereka yasitokamenia amochio. ¡Naakonakosaoi, ki noꞌo nakiriopa aamo kuꞌiwao, noꞌo aamo wiskuiame maaena eemea?
\v 17 Kaꞌíí, ki waꞌatepua. ¡Naakonakosa noꞌo uhjurariaa waꞌa, aamo wisikuaka itanekamepua itapitikosa?
\v 18 Tiitooi piirechi ahjama noꞌo uhjurariaa, ¿wisikuekosa aamo itanekamepua kuꞌiwa?
\p
\v 19 ¿Taamo aamo wihkuekame maaenakosa eemea, neipa epeche weeka itanariapa? Kiisi waꞌa eꞌrame teemea. Yooma taamo nokariaopua, chaachapariaopua tiameo, yooma Apoe Riosi neꞌniachi ikitiamepua, teꞌta Riosie Weratiamechi, teꞌteriamechitia. Yooma taamo yoorariaa, aamokamera epeche aamo Riosichi utewarepamichio, noonowitiame puuua.
\v 20 Nape seewenania waꞌa noꞌo eenoio, seenekachioi ki yoomahka kaawe teꞌtereniaopua, noꞌo aamo teꞌterejeriachitiaopua. Seewiame neeea aamoo, tísia noꞌo aamo yoojoramia amochi eenameko, erakomiao. Seenekachio eemea waꞌa erakomapua, weeka itapiti ahpo wenejiniame teꞌteriapa, iꞌkachitia: ahpo aamo nekamucheniame aaata itapiti epeche tiiopua waꞌachi teerenarewa, ahpo nekakoniame, ahpochiche inataniame, ki kaaweruma naewaniame aaatachio, ki kaawe iintorio tuuwame, ahpo weruma uuyame, waꞌa tiopachio ki Riosi nakiyachitia tahpitika nokiwame.
\v 21 Seewenania tiame aamoo, puꞌka kiꞌyami oꞌinia kiisi kaawe aamo nokaka mochitoriao, ki yoomahka aamo katewetiame teimiaopua Riosichio. Waꞌa teꞌteriame aamo tewisaania, tísia suuwe aamo erapamania Riosichio, neeea tísia kaawe aamo nayewakamekapa noꞌo oiriachiamio. Soparame tehpe iinueme eemeapa aamo kaꞌkaruma enepamiaopua, yooma iinya aamo nokayaopua toaká, ki kaꞌkaruma pahkotaka nawajiwaopua, ihtaoi suwepori nokiwameoioopua tiamé.
\c 13
\s Paoro kajuyachi tuuyewa teepotari tiame
\p
\v 1 Ihji waꞌa noꞌo enamiachio, paisa simiyamechipua. Peerei katewiamechitia, paika nakiyame pichiwatameo, waꞌachitia teeremerikate neeeai, waꞌa asisaa.
\v 2 Waꞌa aamo cheekame neeeapa, oosa oiyaiopua waꞌao, eenechi waꞌa eenaio, ki teesa utewaeme terimeriko. Ehpeoi, eenechi waꞌa chiiamenia, yooma puꞌka pukeri oꞌinia iinya noonoikame tatakorikao, yooma puꞌka neipa tatakorikameoi tiameo, ki nuꞌuti terimania puꞌkao.
\v 3 Waikapa noochi tetewimeri eemea, noꞌoo teꞌta Eesusi Riosie Weratiamee weratiamekopua, waꞌa tiiapa neeea, Riosie Weratiamechitia, aamo utewaeme terimania, puꞌka Riosie Weratiame ahpo terimiao, noochi kahtiamekopa.
\v 4 Eesusia wiroriameka teerekameaipua meriniaio, teꞌta ki nuꞌuti utewariemeai waꞌa teerekamepua. Pukaepa pukae teꞌta utewarie eenechi ahjakame Eesusia, ahpo waꞌapi teꞌta Riosi utewarie. Waꞌachitia teeme Eesusie ajawatiamea, weeka itapiti aiwaka nokisiameai, teꞌta Riosi utewarie kuꞌisiniame teemea, anachaka nokisimichiopua Riosi Taanarachi simiyame aamo masitekao.
\p
\v 5 Kaawe neꞌnepuapua amochio, aatia tiiarepua amochio, pichiwa Eesusichi paparamekoopua aamoo. ¿Ki naneꞌriame eemea Riosie Weratiameo, amochi yasitoamekopua, teꞌta pichiwa Eesusichi paparame enetioopua?
\v 6 Taamooi eemea kaꞌkaruma taamo tetewisaa, kaawe enemiipua, teꞌta pichiwa Eesusichi paparamekoopua.
\v 7 Teemea eepi aamowichio itayamepua Riosichio, ki tatakorichi ruhjimichiopua aamoo. Teemea kiisi taamokamera kaꞌkaruma teꞌta tetewijeramepua, Riosi kaaweruma tuuyewari Eesusichi simiyame taamo aamo masitekamekapao, ohso kaawe aamokamera, teꞌta kaꞌkaruma tetewijerame teemea Riosichi teꞌteretowao, peꞌyachi aaata wahjachio taamoo, taamo wiskuameko teewamekoi.
\v 8 Waꞌa chaachapamea ki pichiwai waꞌa chaachapamepua, taamoo, teꞌta Riosi pichiwarichi chiia, mochitoamekopapua. Waꞌa teꞌtiame teemea, kaꞌchitia aaata wihkueme teꞌtiame teemea, ki teesa Riosichi iyoriamekapa.
\v 9 Waꞌa teꞌtiapa teemea kaawe erakoame tamochio, aaata wahjachio noꞌo nanarichi tiiao, tesiwe eꞌreka noꞌo tetewamekoio, teeme aamo masiteriao epeche pewatiame enepariopua Riosichio, tísia pukachi aamo paparaopua. Waꞌa aamo teꞌterepamichioopua teemea, senepi taawechi epeche epecheche Riosichi itakame teemea Riosichio.
\v 10 Pukaepa ki waꞌa kahtiaionia pehjio, utewaeme cheeka aamowichio iyotenania, waꞌatiaonia, waꞌa noꞌo enasoopua, kihta noꞌo cheemichiopua itapiti utewaemeo. Neeea noꞌo Paamira Eesusieo, aamo Riosichi teꞌterewakamera teꞌta pepenitemichio, weratiamenia, ki aaata aamo pihtunamichioopua, itapitiahka amochi eina teeretekao, aamo Eesusichi kaawe teꞌterepuao.
\p
\v 11 Noꞌo Riosichi poponiwa pipiniwa tiame, iꞌka noꞌo kajuyachiopua iyotiao, kaawe eratojeraninia aamoo, ahkasi ahsepari kaꞌkaruma enepachiopua Riosichio, epeche epecheche pewatiame enepaka. Noꞌo aamo tuuyeriachiche inatatopuapua, kaawe aamo, ahpo nakika mochitoka, napatika tiiame. Taꞌiria mochitomitia eemea, kihta aꞌchi erakoka iikachio. Waꞌa teeka mochitosaa eemea, Riosi nakiyachitia, amochi teetomeri eemea, taꞌiria yasiwa iikachiopua tiame.
\v 12 Ahkaoi aamo teepotiaio Riosichi teꞌteriamea, aamo koorepaka teepotepuapua tiꞌtijoea, ooweru enesaa ahpo chuchukaoi.
\v 13 Yooma Riosichi piipakame noꞌo ahjama mochikamea, aamo teepotenapua tiame, yooma aamoopua, Riosichi poponiwaopua pipiniwaopua tiame. Waꞌa teꞌterepuapua naaju.
\p
\v 14 Neeea amochio, Eesusi Riosie Weratiameo, ahpo teꞌta kaawerumari teerejerenania amochio. Eemeopua tiame taamo Noono Riosi nakira, amochi teetoka, ohjoejeraninia, amochi teeretokapua tiameo, Riosi Riosiwario. Waꞌa teꞌteretosa eemea, tísia kaawe enema eemea.
\p Waꞌasi kajuyamenia iꞌka noꞌo iyotiao. Weruma cheriwema naaju waꞌasio.