\id GAL
\h Kaꞌkarata Iyotepawa
\mt2 Paoro
\mt Kaꞌkarata
\mt2 Iyotepawa
\c 1
\s Teepotari
\p
\v 1 Kúíra tiꞌtijoe ooweru tiame, Karata tiꞌtiopachiami mochikame. Neee Paoroa, weratiame neeea weratio, nape ki aaata tiꞌtijoee, aaataeoi ki uhjuratiamenia tiꞌtijoeeo; aaata noꞌo weerakao Apoe Riosie Weratiame iintokamepua, Apoe Eesusi Noonora tiame, Apoe Eesusi oijenatekame.
\v 2 Neeea yooma noꞌo ahjama Riosichi poponichitia mochikameo, pipinichitia tiame, iꞌka iyosi iyotesa aamo uhjuriamenia, yooma Kaarasia weeechiami mochikameopua tiꞌtiopachi.
\v 3 Neeea taamo Noono Riosio, Apoe Riosie Weratiameopua tiameo, taꞌiria aamo erakoa mochitejeraninia iikachio.
\v 4 Apoe Riosie Weratiamea, taamowichio pejana mukukame puuua, taamo tatakoririao natetetiame itipimichiopua, yooma iꞌka weeechi ki kaꞌkaruma nokiwachio, newipapuawichiopua; waꞌa eꞌrakame taamo Noono Riosia, yooma taamowichioo.
\v 5 Riosio waꞌa eꞌrariopa taamowichioo, teꞌta ki nuꞌuti iyoriwa teꞌteremete teemea, kiisi ki wahjiamesi ki nuꞌuti tiiamee. Taamo Noonochi waꞌa teꞌteresaa teemea, tísia kaawe enemapua.
\s Kiꞌtiame piirechi tuuyewaria, taamo newipateme tiiamea
\p
\v 6 ¡Ai eeme! Kiisi pichikeme eꞌramenia puꞌka aamo teꞌteriao. ¿Kiisi tehpekosa toayame eemea, puꞌka Riosie aamo paajutetiao, aamoo Riosie Weratiamechi paparamichioo? ¿Kiisi tehpe toakamekosa eemea, teꞌta aamowichio kaawe iintokameo? ¿Eemea ki tehpe sewina iikamepua, aamo kaaweruma tuuyewarikamera naꞌnaritoaio?
\v 7 Piirechi tuuyewari newipaniamea, kiꞌtiamepua. Puuu sewina tiame aamo masitiamea, oowera pichiwameka chaachapamepua, eina nokaka Riosie Weratiame tuuyewario, sewina aamo ijikimichiopua pukachio.
\v 8 Nape aaataoi sewina tiame masitesoopua ki taamo aamo masiteriachitia, taamooio enesoo, Riosi kuꞌiwarikooi tewekachi eenakamekooipua, puꞌka seꞌwi masitiamechio neeea, teꞌta Riosi kokosari ahjachi wichisaa, tísia kaawe enemiipua.
\v 9 Waꞌa cheekamekai eenechi waꞌa aamo tuuyamenia, aaata seꞌwi masitiame enesoo, ohso kaawe Riosie kokosatiaa, kaawe enemiipua.
\v 10 ¿Aatana kaawe eramichio noꞌo ihsiame maaena eemea, tiꞌtijoeriwichio, Riosikamerawichiokosa? Tiꞌtijoeri kaawe eramichio ihsiame enesaania, ki Riosie Weratiamewichio ihsiame enemiinia.
\s Aatia tiiachipa weratiame Paoroo
\p
\v 11 Noꞌo nayewatuaa, Riosi inatarichi oꞌiniakamera ihsiamenia, ki aaata tiꞌtijoeri inatarichi eenamekamera, Riosie newipaniamechi simiyamekamera.
\v 12 Ihji noꞌo nayewatuaa, Apoe Eesusi Riosie Weratiame kiatiamenia, kiisi aaata tijoee, puuu Riosie Weratiame iꞌka waꞌa tiame noꞌo inatapatekao, kihta aaata tiꞌtijoee, masitetiamenia.
\v 13 Eemea naneꞌrekamepa noꞌoo, pukeri simiyachio achini ihsika noꞌo yasitoriopua iꞌisaerichio, neeea pariserokaio pehjío. Neeea iꞌisaeri tiꞌtijoerichio, tísia iꞌisaeri nokiwa yoorewa, iyoriamekainia. Puꞌka taawechiamio neeea, naanariamekai neeea Riosichi paparaka mochitoameo, saꞌrunanareka ahpo Riosichi paparao.\fig |186-CN01924B.TIF|col|||Paoroa Eesusichi paparameo, utewaeme cheeka chapinurani.|1:13\fig*
\v 14 Noꞌo waꞌapi isaerichiopua, epeche tiiamekai neeea, noꞌo noonorie ehkoriami iyoriwa nokariame neesetowachiopua, epeche ki noꞌo kekechuma tehtemarichitia.
\v 15 Nape neeea waꞌa tiiamekaio, keꞌchu naawai Riosie uutiame eneriamepua. Riosia noꞌo weripasoopua, ahpo Taanae noꞌo paaekamepua, apochi paparamichiopua.
\v 16 Waikao Riosia apoe waꞌapi noꞌo weerakamepua, ki isaeri tiꞌtijoerichi noꞌo nayewatumichiopua, ahpo kaaweruma tuuyewariopua, ahpo Taanachi simiyame nayewatumichiopua tiame, taamo tatakoriria newipatewa iintoriaopua. Iꞌka waꞌa tiiame noꞌo waꞌa iintotiameo, ki aaata tuuyekamenia.
\v 17 Waꞌa oꞌiniao neeea seenepi Aarawia weeechi simikania, ki aaata tuuyesaopua pehjio Eerusareni simikao Eesusi ajawariachio, keꞌchu Eesusi noꞌo weeroi Eesusie ajawatiame. Aarawia oꞌiniao waikao, Raamahko eenakania eenechio, noꞌo oꞌinia simiriachio.
\v 18 Paika paamuparichi neipao, Eerusareni mooenakania waikao Peero machimia Seepa tewaniameopua tiame, waꞌa yasakania waikao oosa mariki aampa mariki taawe, ahjama nayewaka Eesusichi simiyameo aachin teꞌtewa.
\v 19 Wahjachi Eesusi ajawatiameo, ki tetewikania puꞌkao; Saantiaoche machikania waꞌao, puꞌkao Aakowo teewaemeopua tiame, Apoe Eesusi Paamira poonira.
\v 20 Ihji noꞌo aamowichio iyotiaa, Riosi tetewachio, teꞌta pichiwa puuua.
\v 21 Eerusareni oꞌiniao, Siiria weeechi simikania waikao, waꞌa oꞌinia uꞌmatosao, Siirisia weeechiami eenaka, waꞌami oikania waikao.
\v 22 Waꞌa noꞌo oioio Uurea weeechiami mochikamea, ki noꞌo machiyamea weemera enepakame Eesusichi paparameo,
\v 23 oowera eee chaachapaniame noꞌo inamuka mochitoriaipua: “Nee, puuu pukeri taamo Eesusichi paparameo koꞌinariameaio, apoepechi oꞌineriatapua ehpeo, Eesusichi simiyame paparaniame masitekao, puꞌka Eesusichi paparaniameo pukerio, saꞌrunanariaio.”
\v 24 Waꞌa tiiame noꞌo inamukapaopua, tísia kaawe erakoka Riosichio, ki nuꞌuti cheriwema kiꞌyarepua, Riosi iintoriawichioopua noochio.
\c 2
\s Wahjachi Eesusi ajawaria Paoro uuna
\p
\v 1 Neipamionia, oosa mariki aampa naao paamupari uꞌmatosoopua, waꞌami mehka weeechiami masiteka yaajatoaio, eenechi Eerusareni eenakania, waꞌa eenaiopa neeea, Wenawe yeeka oiyamekania, Tiito tiame.
\v 2 Waꞌa Eerusareni noꞌo simiriao, Riosie waꞌa erapatetiapa waꞌa simikania. Waꞌa Eerusareni asisapaonia, waꞌa tiopachi paꞌpamiratoame neꞌnemia simikania, noꞌo ki iꞌisaeri tiꞌtijoerichi noꞌo nayewaturia tuuyemia. Puꞌka paꞌpamiratoameo yeetaeka mochiwaka tuuyekania waꞌao, aachin teeka masiterio noꞌoo, Eesusichi paparatekao, puꞌka tatakoririao, Riosie cheriwepuawichioopua newipateka. Waꞌa tiiame tuuyekania puꞌka paꞌpamiratoameo, naneꞌrenariapa neeea aatia chaachapamerikoopua, ki kaawe eꞌretiaapa, ki kihtawichio itipimichiopua ookapi ahka puꞌka paꞌpamiratuamewichioo, noꞌo nayewaturiao.
\v 3 Waꞌao neeea, utewa taamo yorapuame maaeyainia siichitepuwachi simiyame taamo masitemichioo, taamoo Riosichi kaawe teerepuawichioo. Nape puꞌka waꞌa tiiameo, kihta noꞌo chaachapakapua. Tiitoai, Rieko tijoekaiopua ki isaeri, kihta noonotetiapua puꞌkao, siichitepupuawichioo.
\v 4 Naatiche utewa chaachapakaipua Tiito siichitepupuawichioo, wahjachi ki paaetiai waꞌachi muikame noꞌo paꞌpamiratuame ahjama nayeoio. Puuua, taamo chaachapamia keepumia eꞌnakamekaipua, noꞌoo Eesusi Riosie Weratiamechi simiyame nayewamia. Puuukamera siichitepuwa simiyamekamera taamo masitemichio utewa chaachapaipua, taamo eenechi Moise nuurari nokiwaetere nokisimichiopua.
\v 5 Nape neeea noꞌo ahjama eꞌenakame tiamea, kiisi eꞌrakapua siichitepuwachi simiyameo, puꞌka Riosi tuuyewari aamo masitetiameo, waꞌapitia itipimichiopua aamo masiteretiachitia, kihta sewinatatiame, Riosichi simiyame teꞌta pichiwariraopua.
\v 6 Nape puuu Eesusichi ajawaria epeche yoorewachitia tetewiniameaipua, kihta aampachi sewina chaachapakapua noꞌo nayewaturiao. Noochio, puuu epeche yoorewa tetewiniameo, ki epeche weruma tiiame tetewikania noochio, taamoo Riosio, waꞌachitia napati taamo teꞌterio tuuyopa.
\v 7 Ohsotia puuua waꞌatia kaawetakapua noꞌo naewaturiao, aapoeo nareꞌrekapa Riosi waꞌapi iintoriopua taamo naꞌpa ajawakao, noꞌoo ki iꞌisaeri tiꞌtijoerichi simitemichio uhjurakapua naewatumichioo, Peeroo, siichiteputiame tiꞌtijoerichi uhjurakapua nayewatumichioo.
\v 8 Waꞌa tiiachipa puuu waꞌapi Riosi ihsiriopua taamo naꞌpa ajawakao, Peeroo, siichitepuwa nokiwamechi uhjurakapua puꞌkao, noꞌoo, ki siichitepuwa nokiwamechi tiꞌtijoerichi uhjuratiania.
\v 9 Waꞌa eꞌerakosaapa, puuu teꞌta paꞌpamuratuamea tiopachio, Saantiaoa, Peeroa, Waania tiame, taamo ahjamina sekachi chapika noꞌoo Wenaweo tiameo, taamoo ki iꞌisaerichi uhjurakapua waꞌami nayewatumichioo, waꞌa ikisaopua, taamo kaawe teetonurekapua. Aapoe puuu paꞌpamiratuamea, waꞌapi itipikapua waikao, iꞌisaeri tiꞌtijoerichi nayewatumia tiame.
\v 10 Naatiche taamo teꞌta ki natekepamichio chaanekapua, tísia tooremuame tiꞌtijoeri kuꞌipua, nape neeea puꞌka kuꞌinarewachi simiyameo, tísia waꞌapi tiiamekania kuꞌinarekao.
\s Paoroe Peero teriwa
\p
\v 11 Neipami Antiokía mochikaiopua, Peeroo waꞌachi enasoopua, ki kaawe iintoriopua puꞌkao, teꞌyakania puꞌkao.
\v 12 Ihji Peeroa, ki iꞌisaeri tiꞌtijoeri nokayame ahjama koayamekai pukeri eenaio, toakamepua puꞌkao, puꞌka Saantiao naꞌnaritoame waꞌa eꞌenakame seewiapapua puꞌkao, puꞌka tiꞌtijoeopua, tísia weemuamekopua puꞌkao, siichitepuwa nokiwameo.
\v 13 Waꞌa iintokopa Peeroo, waꞌachi noonowisire wahjachiai, ookapi iꞌisaeri Eesusichi paparameai, ahkasi Wenaweai waꞌachi iintosiriapua tiame, ki ahpo Eesusichi teerewakamera iintoka.
\v 14 Waꞌa noonoikaopua puꞌkao, seꞌwi ikikapua Riosi kaꞌkaruma tuuyewarichio, neeea waꞌa noonoikopua puꞌkao, yooma waꞌa inamuachio, chaanekania Peeroo: “Nee, muuúa, uurio tijoekaiomua, ki uurio tijoechitia aamo uuyamepua, puꞌka aamo siichitepuwa nokiwameo, kihta nateyamechitia tetewapao. ¿Achinikai muuua ki nateyame tetewaimua siichitepuwao, ki uurio tiꞌtijoe amochitia Eesusichi paparakameo, siichitepunuranimua uurio tiꞌtijoe nokayachitia ohjoremichioopuá?
\s Iꞌisaeri tiꞌtijoeria yoomahka waꞌachitia, newipatetiame ahpo Eesusichi paparae
\p
\v 15 ’Muuua neee tiamea, isaeri tiꞌtijoe naꞌnawakamepua, pukaepa teemea isaeri tiꞌtijoepua. Pukaepa teꞌta naneꞌreka mochitoame teemea, aachin teeka taamo Riosie cheriweniameo taamo tatakoririao, ki seesenu tiꞌtijoerichitia, ki iꞌisaeri tiꞌtijoeri.
\v 16 Teemeai waꞌa ahkasi ehpe taawechiami naneꞌrekamepua, puꞌka Moise nuurario, ki piipatiamekopua tatakorio, puꞌka nuurari yooraka mochitoniameo. Ehpeo naneꞌriame teemea, Eesusichikamera taamo paparakopa, piipatiamekopua taamo tatakoririao, kihta puuu ehkoriami Moise nuurari nokiwae. Puuu ehkoriami nokitiamea, aaataoi ki teꞌta piipatekamepua tatakoririao.
\v 17 Nape teemea Riosie Weratiamekamerachi paparawae iꞌyamekapa taamo tatakoriria teꞌta piipatetiame, ¿teꞌta piipakame itipiame ohjoare teemea taamo tatakoririao, ki siichitepuwa tiiamekapa pehjio? Waꞌa tiiame enesoo, ¿ki kaawejoare waꞌa teesoo Eesusichi taamo paparaa? Kaꞌii, kiisi waꞌa tiiame puuua.
\v 18 Neeea toakamekai oochetiame nokiwao Riosichi kaaweruma teꞌterewachi enepakao, waꞌa iintokamekai eenechi oochetiame nokiwamechi oowe erapasaonia, neeekamera ki kaawe iintokame enemiinia.
\v 19 Neeea Riosie Weratiamechi paparaeo, meꞌyakamenia oochetiame nokiwame noochi teereriao. Puuu waꞌapi Riosi nuurari chiiaa, kiisi noꞌo ahsepari eꞌwewa teerekopao apochio, noꞌo mukukamechitia ikiteka, Riosichi noꞌo poanatakamepua. Nape ehpeo neeea Riosie Weratiamechi paparapao, puꞌka oochetiame nuurari ki noꞌo ahsepari eꞌweriawichioo, kihta kokosapuame neeea Riosieo, Riosie Weratiame ahjama mukukameka tiiapao. Waꞌa tiiachio neeea, Eesusi ahjama mukukame enesaa, Eesusi ahjama oijenakamenia tiame, weemera ahjari iinuepakaopua, Riosikamera yorakeka yasitomiapaopua.
\v 20 Ehpeo neeea Eesusi ahjama mukukaio Eesusichi oijenakapao, noꞌo weemera ahjari Eesusichi ahjariaa, Eesusie teetoamenia, apoe Eesusikamera noochi yasitoamekopua. Waꞌa tiiachipa noꞌo weerewao ki nooe teetoamepua, Riosie Weratiamekamera noꞌo teetoamepua, apoeo tísia noꞌo nakiyapa, noꞌowichio mukuriopa.
\v 21 Waꞌa iintokao neeea, kiisi wehchi ipaka tetewikamenia, Riosi noꞌowichio iintoriao; aaata Riosi nuurari eꞌweka newipaniame enesoo, kihtawichio mukukame enemii, Riosie Weratiamea.”
\c 3
\s Riosichi kaawe teꞌterewa nayewaniame
\p
\v 1 ¡Ai eeme Karata tiꞌtijoeri, kiisi ijinatame eemea! ¿Aatana ihsikame aamoo waꞌa ikitekao? ¿Ki maꞌchiamekosa aamo chaachapakame teemea, Eesusi Riosie Weratiameo kurusichi meritiamekopua puꞌkao, yooma tetewachi meritiamekoo, aamokamera kaawewichio meritiamekoo?
\v 2 Ehsoo aamo iinatuketaone: ¿Achini teeka amochi uukame eemea Riosi Riosiwario, ehkoriami Riosi nuurari nokiwarichio, naatichikosaoipua, weemera Riosi kaaweruma tuuyewarichi paparakopakosa?
\v 3 ¿Rooroikamekosa eemea naaju? ¿Eemea ehkoriami nuurari nokiwa naꞌpepakosa epeche aamo kaawe teeremio maayame eemea Riosichio? ¿Ki Riosi Riosiwariekamera oꞌinekame eemea, Riosichikamera aamo kaawe aamo teꞌterepuawichioo? Waꞌa teesoo, Riosi Riosiwarie aamo oꞌineriaekamera teꞌteretomeriaipua, ohso kaawe.
\v 4 Ihtanawichio kaawe enekamepu, yooma ki ookapi itapitia, Riosi Riosiwarie aamo kuꞌiretiaa, ¿kihtawichiokosa kaawe enekamepua, seenekachio puꞌkao, kihtawichio kaawe eneka itipikame enesoo?
\v 5 ¿Naakonakosa Riosia, aamo ehkoriami yoorariokopa, aamo kiꞌyakamepua ahpo Riosiwario? ¿Ki Riosi tuuyewarichikosa pichikekopa, aamo kiꞌyakamepua, ahpo Riosiwario?
\v 6 Waꞌachitia Aurani ehkoriamiai, Riosi paparakapa, kaawerumachitia tetewitiamepua Riosieo.
\v 7 Waꞌa teesoo, teꞌta Riosichi paparaka mochikamerapua, teꞌta Aurani tatanarachitia tiiamera, maꞌchiame waꞌa tiiame puuua.
\v 8 Ehkoriamio Riosia cheeriaipua Ehkoriami Iyoterichio ki iꞌisaeri tiꞌtijoerioiopua tiameo, apochiche paparakopa, piipakame tetewimo tuurepua tatakoririao. Riosia Ehkoriami Iyoterichio eee cheeka nayewerepua Auranio: “Neeea aamo tetejimarisiwachi aaata iintomiaeo, yomatiame wehjoarichi tiꞌtijoerioopua ooweruopua tiaméo, amochitia teꞌta noochi paparakameopua, cheriwemania tatakoririao.”
\v 9 Waꞌa teeresoo yooma puuu Riosichi paparamea, Auranichitia papariaopua, kaawe yorapuame puuua Riosieo, tatakori cheriwekao.
\v 10 Yooma puuu Riosie Moise kiaretia nuurari ahsieme eꞌweka ahsepanariameapua Riosi cheriwewao, Riosi kokosaritere itipimerapua, ki yooma ahsepakapa yooraka Riosi nuurario. Waꞌatiame iyotetiamepua Ehkoriami Iyoterichio, eee cheeka naewakaopua: “Yooma ki ahsepaka yoorakame Riosi nuurariopua, Riosi kokosaritere itipimeriche puuua.”
\v 11 Maꞌchiame taamo chaaneniamepua, nuurari chiia yoorarichio, aaataai ki piipakame tetewipuakopua Riosieo. Waꞌachi chiiopa Ehkoriami Iyoterichiopua tiameo, eee cheekao: “Aaata Riosie kaaweruma enepatetiamea, teꞌta piipatetiamea ahpo tatakoririao, weemera ahjari kiapuamepua ki wahjiamesi, Riosichicheo, paparakache.”
\v 12 Nuurari chiia nokiwamea, kihta tiiamepua Riosi papararichiopua; puuu nuurari chiiaa, oowera ahseparika eꞌwepuameche nayewamepua, eee chiiapapua: “Riosi nuuraritere yasitonariamea puꞌka eꞌweka nokiwa yasitokao, waꞌapi teetomeripua piiripioi ki seꞌwiche yorasika, Riosi nuurario.”
\v 13 Riosie Weratiamea, ahpo taamowichio kurusichi mukuriae taamo newipatekamepua, puꞌka nuurari chiia taamo Riosie kokosapuameo, choꞌwepaka; iꞌka eee tiiame Eesusi ikimiao, Ehkoriami Iyoterichi, eee chiiamekopa: “Kurusichi meriwamea, tísia naꞌaramechitia meritiamepua.”
\v 14 Ihji Riosie Weratiame iintoriaa, Riosi Aurani tísia kaawe iintokemo tuuria puuua, Aurani tetejimarisiwachi naawakamee. Eesusi Riosie Weratiamea kurusichi taamowichio mukuriaa, Riosi Aurani iintokemo tuuria puuua, yomatiame weeechi mochikamewichiopua, ki iꞌisaeri tiꞌtijoerichewichio. Ehpeo yooma aaata Eesusi iintoria ahpo pejanawachitia uukamea, Riosi Riosiwarira apochi yasitoamepua, teꞌta Riosi cheeriachitia ehkoriami oꞌiniao, iintomo tuukao.
\s Riosi nuurari ki Riosi Aurani iintokemo tuuriachitia tiiame
\p
\v 15 Ehpeo neeea waꞌachitarichi aamo nayewemania, itapiti aaata toowenarewa mukusao: Wee, aaata tijoea oowitiameai, aaata tooenariame mukisaa ihtoi ahpo iinuekao, iyosichi iyotesa tooweniamepua. Puꞌka iyoterichi tooeka tooetiameo, aaataeoi, kiisi sewinatapuamepua, epechetakaoi ki epechetakaoi.
\v 16 Waꞌa iintokame Riosia, ehkoriami taawechio, tiꞌtijoeri tatakoriria ahsieme choꞌwepuo tuukao, ooka aaata iintokemo tuuriaio. Piiripi puuua Aurani enerepua, piirea aaata Aurani tetejimariwachi naawameri, neipa wahka ihtoriachio. Aurani iintokemo tuuriaeopua, aaata Aurani tetejimarasiwachi, naawameri nayewaka cheerepua. Ki muuwaeme Aurani tetejimarisimiachi naewaka cheerepua, aaata weeka maaepoiopua, piiripi waꞌapiche naewaka cheerepua puꞌkao. Puuu piiripi aaata Riosi cheeriaa, Riosie Weratiame puuua, apoe enameri eenakamepa.
\v 17 Pukachi simiyame noꞌo maꞌchitanariaa, ihjipua: Riosia Aurani ahjama katewiaio, ahpo iintokemo tuuriao, teꞌta pichiwa waꞌa iintomo tuurepua, kiisi wehchi wichiteka. Pukaepa Riosi Aurani cheeriaa, kaꞌchitia taawechi sewinatatiamepua Riosi nuurarieoi, naao siento piire weerewa aampa oosa mariki paaumpari neipami, eenakameaipua nuurari, Moise Riosie kiaretiaa.
\v 18 Waꞌa tiiachiopua, Riosi nuurari Moise kiaretiae yooreka, choꞌwepuame enesoo taamo tatakoririao, kihtawichio nateriame enemii, Riosi Aurani apochiche paparariae, tatakoriria cheriwio tuuriaa, kihta itapiti yoorari natekachiopua.
\v 19 Waꞌa teesoo, ¿ihtanawichio yachatiame enerepu Moise kiatiame nuuraria? Puuu Riosi nuurari Moise kiꞌyariaa, Riosie ahjae wenenejimichio enerepua, ki kaawe noonoitiame tiꞌtijoerieo. Nape Riosie kiatiameapua nuurari, animari kosoka ahpo cheriwepuawichio tatakoririao, aaata Aurani tetejimarisi teetowachi eenachisi waꞌa teeremeri eneriamepua. Puuu waꞌa tiiame teeretoniamea, ahkasi Aurani tetejimarisiwachi naawachisi waꞌa teeremeri eneriamepua, puꞌka Aurani tetejimarisiwachi enamerichio Riosia puꞌkao, tísia kaawe iintomeriko tuuriamepua, yooma pukachi paparariao, tatakoriria choꞌweneka. Riosia pukeri ahpo nuurari kiꞌyaiopua tiꞌtijoerio, pahchao Moise kiꞌyakamepua puꞌkao ahpo tewekachi kuꞌkuiwáeo, neipao Moisea, tiꞌtijoeri uꞌyeparepua puꞌka nuurario, yooreka mochitomichiopua.
\v 20 Nape Riosia ahpo iintomo tuuyaio, aaata Aurani tetejimarisiwachi naawamerichio, ki aaata piirechie chaanepua nakiriamepua. Riosia puꞌka aaata cheeka nayewariao, ahpo Taana iꞌka weeechi tijoe tijoetumerio, apoeko tuuka cheeriamepua; kaꞌchitia ooka tiiamekapa Riosia.
\s Aatia tiiachipa Riosi nuurari yachatiame
\p
\v 21 ¿Riosi nuurari eꞌweniamea, Riosi iintomo tuuriachitia tiame, waꞌachi tiiame ohjoarepua, Riosichi kaawe teꞌterepuamewichioo? Kaꞌi kiisi waꞌachi ahpo teꞌtiamepua. Waꞌachi tiiame enesoo, Moise nuurari eꞌweka mochitoio Riosia, taamo weemera ahjari kiamiipua, taamo apochi kaawe teꞌtereka mochitopao.
\v 22 Nape Riosia Ehkoriami Iyoterichio, yooma taamo tatakorieme teewamepua, ki ahsepari taamo eꞌwiamekopao, ahpo nuurario. Waꞌa tiiachipa Riosia, ahpo Taana taamo uhjurerepua, pukachi paparaka taamo piipamichiopua taamo tatakoririao, pukachi paparaka tiameo, taamo teimichiopua weemera ahjario, teꞌta apoe Riosio waꞌa iintokemo tuuriao.
\v 23 Keꞌchu eenoi Riosie Weratiameo taamo ahjachi paparamerio, Moise nuurari chiiaa, taamo chapika yasitoame eneriaipua pehjio, ahkasi Eesusi Riosie Weratiame eenachisi, puꞌka nuurarie taamo kokosapuameo, ahpo mukiwae taamo pejana choꞌwepuachisi.
\v 24 Puuu oosa mariki aampa ooka nuurari chiiaa, puuu animari koꞌyaka Riosichi oowewaa, ahpo tatakoriria cheriwepuawichioo, ahpo masitewatere taamo teeretokamepua, kukuchi nuꞌnunti masitiamechitia, taamo ki kaawe iintosoo puꞌka nuurari ki eꞌwesoo, Riosi taamo kokosamerikopua. Waꞌa teetokame teemea puꞌka Riosi nuurari Moise kiatiamechi teetoka mochitokame teemea, ahkasi Riosie Weratiameo tamochi eenariachisi. Ehpeo Riosia weeechi tekisaopa tijoechitia tijoetukao, ahpo Taana Eesusi weerewachi enepakaopua, pukachi iintokamepua yomatiame tiꞌtijoeri apochi paparameo, ahsieme tiꞌtijoe tatakoriria choꞌwewaopua ooweruoopua tiame. Puuua, ahpo kurusichi mukiwae natetekamepua puꞌkao, ehkoriami animari Riosi oowewarichitia koꞌyéka.\fig |189-LB00255B.TIF|col|||Ehkoriami Riosi oowewari nokiwa, Eesusia Riosi ahpokamera oowewarichitia kurusichi mukuria.|3:24\fig*
\v 25 Ehpeo teemea waꞌasio, taamo Noono ahpo Taana Eesusichi waꞌa tiiame taamowichio iintoriopao, ki Moise nuurari masitewatere mochitoamepua, Riosi masitewatere mochitoamepua, apoe teꞌta inisiamepua taamo neesetokao, apoe tewekachi kahtiame taamo Noono.
\v 26 Eesusi Riosie Weratiamechi paparopao, Riosi taamo Noono tewekachi kahtiamea ahpo tatana taamo enepatekamepua.
\v 27 Eemea Riosie Weratiamechi paparapao, Riosie Weratiame ahjama pirenatukamepua, Eesusi Riosi Riosiwarie paatotiamekapa, puꞌka Riosiwari wakiraeka aamo neesetoame eemea.
\v 28 Waꞌa taamo iintokapa Riosia, ahpo teꞌta tatanachitia taamo tetewamepua, yooma taamo apochi paparameo, waꞌachitia napati tetewaka, peꞌyachi isaeri tiꞌtijoetukamekoipua, rieko tiꞌtijoeturikooiopua, teekoemekooi, ki teekoemekooiopua, tijoekooiopua, oowitiamekooi. Yooma waꞌa teꞌtiapaopua teemea, Riosie Weratiamechi pirenatupakamekapao, piiripi waꞌapi enepakame teemea, Riosichio.
\v 29 Yooma Riosie Weratiamechi teꞌtiamea, Aurani tetejimarika tiiame enepakame teemea, Aurani tetejimari enepakapao, yoomahka iinueme teemea kiapuao, Aurani Riosie kiapo tuutiameo.
\c 4
\p
\v 1 Nape neeea, puꞌka nuutewachi simiyameo, kaawe aamo maꞌchitanarenia neeea. Aaataai pukeri weweripaio, ki sewina teꞌtiame eneriai teemea, aaataoi taꞌpechi tekipanameopua, yooma ahpo iinuwakoi, ahpo noono tooeriaopua.
\v 2 Ihjia, aaata neesetorichi yasitoamepua pehjio, ahkasi ahpo noono cheeriachisiopua, kiapuameopua ahpo iinuwa tooeretiao.
\v 3 Waꞌa teꞌtereriai teeme iꞌisaeri tiꞌtijoeria, Moise taawechisi waꞌanao, kukuchi nuꞌnuntika teꞌtereriai teemea, puꞌka oochetiame nuuraritere nokiwao, tiꞌtijoeri tatakoririao cheriwewa teewesiwachiopua, ki nateteniameopua pehjio.
\v 4 Waꞌa teꞌtereniame teemea ahkasi Riosi eꞌraria taawechisi, waika asisoopua, apoe waꞌapi oowitiamechi naawarepua weeechi tijoerichitiao, waꞌa iintosaapua ahpo waꞌapio, apoe waꞌapikaioopua, ahpo Taana teewarepua; waꞌa ikisaopua puꞌka ahpo Taana teewariao, tiꞌtijoeekachimi uhjurarepua, ahpo tísia kaaweruma tuuyewari nayewatumichioo. Riosia puꞌka taawechiami ahpo Taana tiꞌtijoeekachiami uhjuroio, teemea Moise nuurari nokaka mochitoriaipua pehjio.
\v 5 Nape Riosia ahpo Taanachitia eenakaopua, waꞌasi weraparepua, Moise nuuraritere nokiwameo. Riosia puꞌka Moise nuuraritere nokiwa waꞌasi werapasaapua, ahpo mukiwae yooma taamo tatakoriria ahsieme natetesaopua, ahpo tatana iintapakamepua taamoo.
\v 6 Ehpeo Riosia, aamoo ki iꞌisaeri tiꞌtijoerikoio, teꞌta ahpo tatana iintapakapao ahpo Taana Riosiwarira, aamo iikachi yasipaterepua. Waꞌa teꞌterepatiaapa eemea Riosieo, aamo Noono nayewiaio, Riosi kukuchiwarachitiao: “¡Noꞌno, noꞌo Noꞌnola!”, chaachapamepua Riosio.
\v 7 Waꞌa ikitiapa muuua ki seenu muuua Riosi tetejimarichio. Muuua teꞌta Riosi taanarakapao, Riosi aamo Noonoe kiapuamepua, yooma ihta ahpo taana kianiameopua, yooma ihta Riosie aamo kiapuame nuutekiao.
\s Paoroe Eesusichi paparame inataniame
\p
\v 8 Eemea, pukeri keꞌchu Riosi machiyaiopua pehjio, itapiti aamo riꞌriosiwatae, chapitiame mochitoriaipua, puꞌkakamera aamo riositewa eꞌweka.
\v 9 Nape ehpeo eemea, Riosichi mochikai eemea, ohsotiao Riosikamera amochi kahtioiopua, ¿achini iikai eenechi puꞌka aamo chapitiametere mochitonare eemea, puꞌkao kihta aamo kiꞌyamekoipua aamo Riosichi kaawe teꞌterepuao?
\v 10 Eemea pehjio, aamo kaawe teꞌteremichio Riosichio, ihtaoi taawechioi iyoriweka pahkotamepua, ihtaoi paaumpari paamuniachioipua, ihta mechachioi iyoriweka pahkotiamepua, ihta taawechioi iyoriweka pahkotamepua.
\v 11 Tísia seewenania amochio, noꞌo tehkio amochio, kihtawichio kaawe eneriameko eꞌrakao.
\v 12 Noꞌo Riosichi poponiwa pipiniwa tiameo, neeea aamoo utewaeme aamo chaanenania, eenechi noochitia utewaeme paparaka mochitomichiopua Eesusi Riosie Weratiamechio. Neeea amochitiao toakamenia noꞌo pukeri oꞌinia teereriao, Moise nuuraritere nokiwameopua. Eemea aamo noꞌo masitia toayaio, ki noꞌokamera ki kaawe ikitiamepua, eemekamera ki kaawe ikiyamepua waꞌa nokakao.
\v 13 Naneꞌriame eemea, pukeri waꞌa aamo noꞌo nayewaturioiopua Riosi tuuyewario, noꞌo kokoriame oiriopua, waika taawechiamio.
\v 14 Waꞌa tiiapa neeea, tísia tehki teeretoka aamo masitekamepua waꞌao, nape neeea amochio kaawe eꞌramenia, kiisi noꞌo nahsineka tetewikamekopua, kihta noꞌo ipaka. Ohsokamera kaawe noꞌo uuka tetewikame eemea, noꞌoo Riosie aamo tuuyemichio uhjuratiamechitia, noꞌoo Eesusichitia tetewika, apoe Riosie Weratiamechitia uuka.
\v 15 ¿Ihtana ijikikame eemea puꞌka noꞌo aamo masiteria puꞌsereriao, noꞌo Riosichi simiyame kaaweruma aamo masiteriao? Waꞌa noꞌo ihsioio noꞌo masitekao, tisiwa kaawe erakoameai eemea, ahkasioi aamo puusioi maꞌchipasa, noꞌo yahcheme erakokameai noꞌo tísia aiwame tetewapa noꞌo kokoriopao. ¿Ihtana ijikikame eemea naaju? ¿Achini iikai waꞌa noonokame eemea?
\v 16 Neeea aamoo, aamo toayame inamukame neeea, aamo kaꞌkaruma tuuyewari Eesusichi simiyame nooe aamo masiteriao. ¿Kikosa eemea noꞌo aamo masiteria ipaka tetewapao, aamo seepurawachitia noꞌo tetewamepua, noꞌoo, teꞌta pichiwari Eesusichi simiyame aamo masitekamekaiopuá?
\v 17 Puuu wihkueka aamo masitiamea, tísia kaawe aamo yorakio chaachapamepua chaachapao, nape ahpo iikachio, kiisi kaaweruma erakoai chaachapamepua. Puuua oowera waꞌa aamo chaachapamepua, taamo poanatupuawichiopua, apochikamera teꞌterepuawichioopua.
\v 18 Wahjachi kaawe nayeweniamea, kaawerumapua kaawerumao, nape kaaweruma inataka chaachapatiame enesoo. Neeea mehka kahtiaio, senepi taawechi waꞌa tiiame kaawe eꞌraka aamo nayewenariamenia nayewiao, nape kaꞌchi ikime waꞌa eꞌrio, tísia iikachi kokoreka inamuamekapa puꞌka aamo nokayao.
\v 19 Eeme noꞌo noonolawaka teꞌteriame Riosichio, tísia kokorenania waꞌa aamo nokayopao, ahkasioi saumerichitia kokosa tiiame saayamenia noochio. Ahkasi waꞌa teeremeri neeea iikachi kokorewa aiwakao, ahkasi eenechi Riosichi aamo kaawe teerepachisiopua.
\v 20 Ehpe waꞌapi aamo mochikachi yasisaa tísia kaawe eramiinia, tísia kaawe eꞌraka noꞌo aamo nayewemiaoopua; nape mehka kahtiapa neeea, kaꞌchi ikime eꞌraninia waꞌa eꞌraio.
\s Aachin teereria Aurani ooka tatanarachi
\p
\v 21 Eeme wisikuari masitiamechi uumpanariamea, ¿naneꞌriamena eemea Ehkoriami Iyoteri chiiao puꞌka masitia Moise nuuraritere mochitoniameo?
\v 22 Wee, Aurani ooka tatanarachi teerekame, puꞌka waꞌachitarichi aamo kaawe tuuyemania aachin teereriae pukachio. Ihjia eee teereriaipua: Piiripi puuu Aurani taanaraa, Aakari tewaniame oowitiamechi taanatatiame eneriaipua, puuu oowitiamea Aurani taꞌperachi puhkuchitia yasakame. Piire Aurani taanaraa, Aurani teꞌta uupirachi naawakame puuua, ki puhku oowitiamechi.
\v 23 Puuu puhkuchitia kahtiamechi naawakamea, aaataoi taanataniamechitia, tanatiamepua. Nape ki oowitiame puhkuchitia yasitoamechi naawakamea, Riosie taanaepo tuutiapa, taanaetiamepua.
\v 24 Ihji ooka Aurani tatanara teꞌteriaa, ooka Riosi kateweri iintotiamepua, Riosie tiꞌtijoerichi katewetiamechi simiyameo. Piiripi ihji ooka kateweria, Riosie sinai kaawichi Moise kiatiamepua. Puuu kateweria, Aakari oowitiamekaitepua, Aurani taꞌperachi puhkuchitia yasakame. Yooma puꞌka Moise kiaretia yooraka mochitoamea, Aakari tatanarachitia teꞌtereniamepua, puꞌka eꞌwewatere mochitoapa, pukae chapitiame.
\v 25 Ehpe taawechi Eerusareni mochiwaria, Sinai kaawika tiiamepua Aarawia weeechi weeriame. Ihji iꞌka weeechi Eerusareni iꞌisaeri mochikamea, iiweta simitiamepua pehjio, Riosie Moise kiaretia nokaka mochitopuame, puꞌka nokiwame puhkurachitia teꞌteriamepua pehjio, pukae chapitiame teꞌteriapua pehjio ehkoriami Aakarichitia. Yooma ihji iꞌisaeri puꞌka nokiwa masitiamea, yooma puuua aaata masitiao, puꞌka Moisee nokisitewa puhkuchitia enepatiamepua, apochitia teꞌteria.
\v 26 Nape Aurani uupira Saara teewaeriamea, tewekachi Eerusarenikaite puuua, teꞌta weemera Eerusareni, ki pusie tetewiniame pehjii. Puuu Saara Riosie tuutiame taanaremioo, taamo yeeyekaitepua Riosichio. Yooma puꞌka Saara Riosichi tatanaraka teꞌteriamea, tewekachi Eerusareni taamo mochiwaripua. Waꞌa tiiachio yooma teemea, puꞌka Saara tatanaraka teꞌtiame teemea, Riosie iintomo tuuria pichikekapa ahpo Taana Eesusichi iintomo tuuriao.
\v 27 Ehkoriami iyoterio puꞌka Saara ooitiame nayewakao, eee chaanekamepua puꞌkao:
\q Peenia erapa muuua, muuu ki taanatamea,
\q2 kaawe eꞌraka sisinamitiamua,
\q2 muuu ki sauka kokosa aiwakamea.
\q Muuua ki tatanatameai,
\q2 epeche tatanaemeri muuua,
\q2 ki aaata oowitiame tatanatamechitiapa.
\p
\v 28 Ehpeo noꞌo Riosichi poponiwaka teꞌtiamea pipiniwaka teꞌtiamekaapua tiame, Ihsa teereriaka teꞌteriame teemea, Ihsaa, Riosi iintomio tuurewachi naawakamekapa. Ehpeo teemea Ihsa Riosi iintomo tuurewachi naawakamechitiao, Saara tatanara teemea, Riosi taamo iintokemo tuuriachi paparakapa mochitoamekapapua, Auranichitia.
\v 29 Puuu Aakari taanara Ihmaéri tewaniamea, oowera tijoe naawachitia naawakamepua, nape Ihsaa Riosi Riosiwari taanaretewachi naawakamepua, Riosia Auranio, Saara iintokemo tuuriachitia. Waꞌachitia waika taawechiamio, Ihmaéria naꞌarerio Ihsao, waꞌachitia teemea Riosi Riosiwarie naawakamea, naꞌareniame teemea, ki apochi ijinuemeeopua Riosi Riosiwario.
\v 30 Neꞌnemitiaopua Ehkoriami Iyoterichio, aachin tiiamekopua iꞌka ooka tatanareniachiopua: “Saaraa chaanerepua Auranio: Uꞌmapumitia muuua, iꞌka oowitiame puhkuchitia taamo taꞌpechi ohjoemeo, taanara tiame. Puuu oowitiame taanaraa, kihta kipotepuamepua aamo taana tooemiameopua aamo iinuwario.”
\v 31 Waꞌa teeresoo teemea, ki puꞌka oowitiame puhkuchitia yasakame tatanaraka teꞌteriame teemea, Saarakamera tatanarakameka teꞌteriame teemea, Riosi Riosiwarie weemera naawakamekapapua, Riosichio.
\c 5
\s Puhjetiame mochiwa oochetiame nokiwao
\p
\v 1 Teemea Riosie Weratiameeo, puhjetiame teemeapa oochetiame nokiwameo, puꞌka Riosie Moise nuuretiao, utewachi ki ookapi taamo eꞌwepua nuurewaopua. Ehpeo kaawe aamo inateka mochitopuapua, kaꞌte eenechi puꞌka oochetiame nokiwatere mochitomitia eemea, aamoo itapiti utewachi nokitiameopua, itapiti oisi yoomuame kutamochi puritiame tekitoamechitia.
\v 2 Kaawe keepumitia eemea iꞌka aamo chaaneniao. Neee Paoroa, aamo tuuyeka chaaniame neeea, eenechi puꞌka siichitepuwa nokisisaa eemea, Riosie Weratiame iintoriaa, kihta nateyame enemapua aamowichioo. Riosie Weratiame aamowichio pejana iintoriaa, kitachi kaawewichio itipimapua tiameo.
\v 3 Pichiwa aamo chaanenania iꞌkachi simiyameo, aaata siichitepuwa ihsinariamea ahpo tatakoriria cheriwepuawichioo, yooma ahsepari eꞌwewa yorametepua Moise nuurari nokiwaopua.
\v 4 Eemea puꞌka Moise nokiwatere mochitonaresaa Riosichi kaawe teꞌterepuawichioo, poanatukame eemea, Riosie Weratiamechio, waꞌa teꞌteriapao eemea, kiisi uuka mochimeri eemea Riosie aamo teꞌta nakiwao.
\v 5 Nape teemea uukamekaopua Riosi taamo nakiyao, Riosi Riosiwarieo kaawe eꞌraka mochitoame teemea, yooma Riosie taamowichio iintomo tuuriao, ahjachi erakokaopua Riosie taamo kiapuamekoo.
\v 6 Riosie Weratiamechi ahjama enepatioopua taamoo, puuu siichitepuwa nokiwamea, kihtawichio nateyamepua taamowichioo, peꞌyachi ki siichitepuwa nokiwaio. Riosie Weratiamechio, paparaniakamera, teꞌta nateyamepua, Apoekamera teꞌta taamo nakika pejana mukukamekopa, teemea Eesusio ahpo taamo nakiyachitia, waꞌachitia taamo nakika mochitomichiopua iꞌka weeechio.
\v 7 ¿Achini ijikiru eemea, aamo kaawe teꞌteretoaio? ¿Aatana aamo sewina erapatekame aamoo, ki eꞌwaka mochitomichioopua, teꞌta pichiwari chiiameo?
\v 8 Ihji sewina aamo ijikiriaa, ki Riosichi eenamepua, Riosio ahpo Taanachiche paparamichio aamo paaekamekopua.
\v 9 Naneꞌreka mochitopuapua, puꞌka aamo seꞌwi erapatiamechiopua, puuu ki kaaweruma aamo erapateniamea, rewaruraka ihsiamepua amochi muipakao, tiꞌtijoerio eee chaachapawachitia: “Kuꞌita rewarurakaio, yomatiame paatusichi muꞌipamepua.” Pukaepa tísia kaawe aamo neesetomitia eemea puꞌka tiꞌtijoerichio, ki rewarurachitia amochi ikimichiopua, puꞌka ki kaaweruma masitiao ki amochi muꞌipamichiopua mehtapakao.
\v 10 Nape neeea Riosichio ahjachi eꞌramenia, ki amochi mehtamichiopua puꞌkao, aamo sewina erapatekao; puuu aamo sewina erapatiamea aaataai, ki waꞌatia itipimeripua Riosi kokosarieo, peꞌyachi aaataai enema.
\v 11 Noꞌoo siichitepuwachi simiyame noꞌo masitiame enesoopua pukeri noꞌo oꞌineriachi oꞌinia, tiꞌtijoeri Riosie kaawe tetewipuawichoo, ki noꞌo nekamuchemii iꞌisaeri tiꞌtijoeria; puꞌka siichitepuwachi simiyame noꞌo masitiame enesoo, puuu Riosie Weratiame taamowichio mukuriamechi simiyame noꞌo masitiaa, ki eina teeremiipua iꞌisaeri siichitepuwachi simiyame masitiamewichioo.
\v 12 Puuu aamo sewina erapatiameopua Riosichio, aamo siichitepuwa nokiwa nokijeramea, ¡teꞌta yomatiame ahpo tehpunasaapua, kaawe enemiipua ohso kaawe!
\v 13 Eeme Riosi ijinuwa enemichio paaetiamea, poanatupuapua puꞌka ehkoriami nokariamechiopua, Moise nuurarichio. Poanatupuapua tiameo yooma ihta ki kaꞌkaruma erakowaopua, kaꞌkarumakamera erakoka mochitopuapua ohso kaawe, kaawe aamo nakika tetewipuapua, teꞌta aamo nakirae.
\v 14 Puuu Riosi nuurari chiiaa, piiripi naawesarichi ahsieme chiiamepua nokipuao, puuua ihjipua: yomatiame Riosi yooreniamea, piiripi naawesarichi ahsieme nuurari puuua, eee chiiame: “Aamo waꞌapi aamo nakirewachitia, waꞌachitia nakipuapua aamo piirechioio.”
\v 15 Pukaepa kaawe aamo inateka mochitopuapua, aamoe waꞌapi aamo naꞌara nokaka mochitosaa eemea, aamoe waꞌapi aamo soopameripua.
\s Taamo ki kaaweruma ikotuwa
\p
\v 16 Pukaepa eemea, ohso kaawe Riosi Riosiwari nakiyachitia mochitopuapua, ki aamo aꞌchi tiame erakoa nokaka.
\v 17 Ki kaaweruma ikotuwaa, tijoeriopua oowitiamechiopua tiameo, Riosiwari kaaweruma eꞌrawachi nasiwamepua; Riosiwari kaaweruma eꞌraria, tiꞌtijoe ooweru tiame ki kaꞌkaruma erakowa ikotuachi, nasiwamepua. Puuu ki kaaweruma ikotuwaa, kaaweruma ikotuwachiche nasiwakache yasitoamepua. Pukaepa aamo inatarichio, tehki eꞌrame eemea, aamo kaaweruma uumia yorapuao.
\v 18 Eemea Riosi itanemetepua kuꞌiwao, Riosi Riosiwarie aamo maꞌchiame tetewitemichiopua, ki kaawerumakopua puꞌka ki kaꞌkaruma masitia naꞌnaritoniameo, Moise nuuraritere mochiniameopua ehkoriamisi nokiwameopua.
\v 19 Puuu tiꞌtijoeri ki kaaweruma ikotuwaa, maꞌchiame tetewiniamepua ihsiamekoo, ihjichitia: suwepori nokinarewa, ewipuame nokinarewa, ki kaawe nokinarewa siintoka,
\v 20 itapiti netetiamechi riosienaretewa, siporewa nokinarewa, nekumekache mochitonarewa, ki kaawe erakoa mehtakache mochinarewa, waꞌinakache mochinarewa, nekakokache mochinarewa, ki ihkokeka mochinarewa, seepurewatekache mochinarewa, naasipasi poanatunarewa, pirenachi pirenaturichi enepanarewa,
\v 21 piirechi iinuekachitia ikotuka yasinarewa, nawajinarewa, siinto pahkochi oinarewa, yooma ihtaoipua waꞌa teꞌtiameo. Aamo inateka mochinurakai puꞌka waꞌa tiiame ikotuwao, eenechi aamo chaaniamenia, kaawe aamo inatepuapua. Yooma waꞌa tiiame nokayamea ki reesisepuamepua, Riosi yeꞌkarichi mochipuawichioo.
\v 22 Riosi Riosiwaria, iikachikamera taamo kuꞌyamepua taakekao: nakiwari, peenia erakori, taꞌiria yasira eꞌrari, mooena tiioi kaawe eꞌrewa, kaawe eꞌraka kuꞌiwa, kaaweruma eneniame tiꞌtijoe ooweru tiame, ahpo iyorimiache ihsiame,
\v 23 tesiwe eꞌraka tetewiniame, ahpo naꞌara ihsinarewao waꞌiname. Yooma iꞌka iyorika yasitoamea, kihta tiiamepua ahpo ki kaawe iintorio chaaneniameo, ihta nuurarioi iyoriwaopua.
\v 24 Riosie Weratiame ijinuwaraa, meꞌyakamepua ahpo ki kaaweruma eratiao, teꞌta ikotuwa eratiamerao.
\v 25 Teemea taamo weemera ahjarichio, Riosi Riosiwarie kuꞌiwae mochitoame enesaa, Riosi Riosiwarie taamo neesetoka panitotomete teemea.
\v 26 Kiteremete teemea tamochio, epeche weruma ahpo erakoniameo, ihtaoi ki iintomete teemea taamo ahpochi nenekaniameo; aaataoi ki ahpo ikotukemete teemea waꞌachi teerenarekao, ihtaoi itapiti waꞌachitia iinuenarekao.
\c 6
\s Ahpo kuꞌika mochitopuame
\p
\v 1 Eeme Riosichi poponiwaa pipiniwaa tiamea, aaata pooniwa piiniwaoi eenechi ki kaawerumachi wichikame enesoo, muuu kaawe oiyameapa Riosichio, kaawe eꞌreka kuꞌipuapua puꞌkao, sosopatiame nayeweka, eenechi kaaweruma pooechi enepatepuapua. Nape puꞌka tuuyeka ihsiaio muuua, kaawe aamo inateka ihsipuapua, seenekachi waꞌachi iintotare muuuai, seꞌwi wichikaopua ki kaawerumachio.
\v 2 Pukaepa eemea, kaawe aamo neesetoka mochitopuapua, ki itapiti ki kaawerumachi aamo ruhjipuawichioopua. Kaawe aamo neesetoka mochitosaa eemea, Riosie Weratiame nakiya yoorame enemapua, aaata kuꞌipuawichioopua.
\v 3 Aaata teꞌta ki ahpo ki kaawerumachi wichimio eꞌramea, waꞌa eꞌramea, ahpo waꞌapi wisikuamepua. Aaata kihta ahpo tuuyepo maayamea, iinuekaitepua aaatae ahpo tuuyeka chaanepuao, waꞌa eꞌraka ahpo waꞌapi wihkuamekapao.
\v 4 Aaata ahpo piirechi kuꞌinariame enesaa, ahpo waꞌapi Riosichi kaawe tiiakamera neꞌnemetepua pahchao, aaata piirechi kuꞌipuawichioopua. Kaawe ahpo teeresoopua Riosichio, kaawe erametepua aaata piirechi kuꞌime tiiapao. Nape puuua aaata kuꞌikaiopua, ki ahpokamera epeche werumako erametepua aaatachio.
\v 5 Yooma aaata pipiripi teeme, ahpo Riosichi kaawe teereme tiia, yorameripua, ki aaata piirechi kuꞌiwa iintoria waꞌachi iintonareka.
\p
\v 6 Ehpeo teꞌta aamo inatepajeraninia iꞌka: Yooma aaata Riosi kaaweruma tuuyewari masitiameraa, ahpo masiterae kuꞌipuamepua, ihta kooameeo, ihta nakiwaeoi.
\p
\v 7 Piirechi tuuyewari aamo kiamania tiameo, puuua ihjipua: Kaꞌte wihkuenaremitia eemea Riosio. Riosi wihkuenariamea, ahpo waꞌapikamera wihkuiamepua. Eemea ihta aamo echaria, puꞌka echitiame iꞌipameripua.
\v 8 Ahpoche ki kaaweruma ikotuwa teerewa echakamea, ahpo ki kaaweruma ikotuwa taakeriache iꞌipamapua. Puuu echakame waikao, teꞌta poanatukame enemeripua Riosichio, mukukamechitia Riosiwichioo. Nape Riosi Riosiwari puꞌseria echakamea, kaaweruma ahpo iintoria iꞌipamapua, Riosikamera puꞌseria. Puuu Riosi puꞌseriakamera echakamea, ki wahjiamera ahjari iꞌipameripua.
\v 9 Waꞌa teeresoo, ki nahsinapamete teemea, aaata taamo kaawe yoorao. Waꞌa taamo teꞌteretosoopua, iꞌipapuame asisoopua, taamoo uumerikopua Riosie taamo kiapuameopua, Riosie taamowichio nuuteniameo.
\v 10 Waꞌa teesoo waikao, senepi aaata kuꞌime teeresaa, kuꞌipuapua, aaataoi, nape teꞌta Riosichi paparameo.
\s Kajuyachi waꞌasi tuuyewari
\p
\v 11 Nee, noꞌo cheriwepuapua noꞌo weeweruma iyoterioipua, noꞌo waꞌapi sekaeo.
\v 12 Puuu aamo eina nokayamea, aamo siichitepuwaka mochijeramea, oowera iꞌisaeri tiꞌtijoeriwachi kaawe itipinaria nokayamepua puuua, oowera Moise nuurarichi aamo kaawe teꞌteretomichio chaachapamepua, ki ahpo wepipuawichiopua iꞌisaeri ahpo siichitepuwa nokayameopua. Puuua ki masitenariamepua Eesusi Riosie Weratiamechi simiyamepua, ki ahpo kokosa tiiame aiwatepuawichiopua.
\v 13 Nape yooma puuu ahpo siichitepuwa nokayameai, ki ahsieme yooreka mochikamekaipua, Moise nuurario. Aapoea oowera aamo utewa yoorame puuua, aamoo siichitepuwa nokisisoopua, ahpo aiwenariapa aamoo utewachi ahpo nokiwa nokayame, enepateriapa.
\v 14 Nape neeea noochi waꞌapio, kihta oisa eꞌramenia ihtoiopua, Riosie Weratiame iintoriakamera oisa eꞌramenia, noꞌowichio kurusichi mukukamekopa. Yooma iꞌka wehjoarichi ki kaꞌkaruma nokinarewaa, mukukame puuuapa noochio; iꞌka weeechi ki kaꞌkaruma nokiwameonia, ki puꞌseriamenia, mukukamepua waꞌasi noꞌo puꞌserepuawichioo.
\v 15 Teemea Riosie Weratiamechi kaawe teꞌteriamea, siichitepuwa nokiwamea ki siichitepuwa nokiwameopua tiameo, kihta nateyamepua waꞌasio, taamowichioo; taamowichio teꞌta nateyameraa, weemera ahjarikamera puuua, teꞌta kaꞌkarumakamera taamo eneparia Riosichio.
\p
\v 16 Ehpeo neeea yooma noꞌo tiiachitia teꞌteriameopua Riosichio, taamo Noono tewekachi kahtiameo amochi teewejeramenia, yooma amochi taꞌiria mochiwa, tísia kaawe aamo yoorawa iintowa. Waꞌa aamoo yorajeriamenia Riosio, teꞌta pichiwa Riosi mochiwarirakopa.
\v 17 Neeea ehpe waanamio, ki aaatae aꞌchi chaaneme tiiamenia, seꞌwi noꞌo masitio tuuwaopua, Riosie Weratiamechi simiyameo, neeea noꞌo weerewachio, naania tiiamekopapua noꞌo wepiretiachio, puꞌka wepiretiae noꞌo kokosa saaeriao. Puuu teꞌta saaeriaa teꞌta noꞌo maꞌchitamepua, noꞌoo teꞌta Eesusichi simiyame pichiwari masitiamekóo.
\p
\v 18 Yooma eeme noꞌo Riosichi poponiwao pipiniwaopua tiameo, Apoe Eesusi Riosie Weratiame Paamiraopua, amochi yahchejerani neeea, ahpo kaaweruma tesiwewaopua amochio, yooma aamo pipiripi iikachiopua. Waꞌa ikisaa tísia kaawe enemapua. Cheriwema ehpeo, yooma iꞌka noꞌo iyoteria keepuameo.