\id EPH
\h Eꞌejesio Iyotepawa
\mt2 Paoro
\mt1 Eꞌejesio
\mt2 Iyotepawa
\c 1
\s Teepotari
\p
\v 1 Kúíra Eejesio tiopachi mochikame. Neee Paoroa Riosie Weratiame Eesusie weratiamepua, Riosi eꞌrarieo. Neeea iꞌka iyojura aamo uhjuriaa, Eejesio mochikame tiꞌtijoewichiopua ooweru tiame, Riosie piipatetiamechitia mochikamewichioo, aamo Eesusi Riosie Weratiamechio, ki seꞌwika paparaka mochitoamewichio.
\v 2 Neeea, Apoe taamo Noonoo, Apoe Eesusi Riosie Weratiameopua tiameo, waꞌapi teetojeraninia aamo kiasikaopua ahpo cherirewao, aamo iikachiopua taꞌiria mochitomichiopua pukaeo.
\s Riosi Riosiwarieo kaawe ikiwame
\p
\v 3 Teemea taamo Noono tewekachi kahtiameo, kaaweruma nayewataria naaju, Apoe Eesusi Riosie Weratiame taamo Paamiraopua, Noonora. Teemea tewekachi kahtiame taamo Noonoo, kaaweruma nayewemepua, taamowichio ki teesa kaaweruma tiiame iintoriopua, taamoo ahpo Taana Eesusichi paparariopa. Puuu Eesusi Noonoraa, ahpo yeꞌkarichi tewekachi oꞌiniao, tísia kaawe ihsiamepua, yooma ihta itapiti tísia kaawe taamo ikiwa kiasikaopua, iꞌka wehjoarichi apochi paparakameopua.
\v 4 Ihji Noonoraa, ahpo Taana Eesusichi tísia paparame taamo tetewikapa naayachisi oꞌiniao, taamo ahpowichio poanatakame, kihta tatakorieme enepamichiopua apochio, ahpo tetewachio.
\v 5 Tewekachi taamo Noonoa, tísia taamo nakiyapa puuua, keꞌchu naayachikoiopua pehjio, paa puuuapa taamoo, ahpo tatanachitia tetewiriamepua, ahpo Taana Eesusichi paparamerikoo. Waꞌa tiiame inatakame taamo Noonoa, tewekachi kahtiamea. \fig |188-KV-001.tif|col|||Keꞌchu Riosi yooma iꞌka teteiwa neteriaiopua, tísia tamochi inatariame puuuapa.|1:5\fig* Keꞌchu Riosi yooma ihtaoi itapiti neteyoiopua naatichitiao: taaao, meechao, yomatiame muuwari soꞌporioio, wehjoarioiopua, Riosiapa taamo tetewame eneriamepua, aatanakamera apochi paparamerio.
\v 6 Pukachipa waꞌa tiiachipa kaaweruma naewame teemea Riosio, ahpo tísia peeniatiwari kaawerumari tamochi iintoriopa, taamoo ahpo Taana, tísia nakiyamerachi iintapariopa.
\v 7 Ahpo Taanachi iintokame puuua, yooma taamo tatakoriria nateteniameo, ahpo Taana eerara wiꞌsuwarie, puꞌka mukiwaeo. Puuua waꞌa iintokao, ki nuꞌuti taamo tesiwewa iintokamepua.
\v 8 Puuua waꞌa iintokaopua, ahpo ki nuꞌuti nakirewa taamo neꞌnetekamepua, taamoo kiꞌyakaopua tiameo, yooma ihta peenewariopua, yooma ihta pahtewariopua tiame, puꞌka naayachisi oꞌinia taamowichio inatariaopua,
\v 9 yooma ihta ahpo noriwi teereriaopua pehjio, ehpiami wahka ihtoriachi ahpo iintomiaopua.
\v 10 Riosia iꞌka ihta taawechi asisoopa ahpo ikitemiachio, yooma ihta iintuameo pirenatumeripua, Riosie Weratiame yeꞌkaritereopua, tewekachi iintuameopua, weeechi iintuameopua tiame.
\v 11 Apoe Riosia ahpo Taana Eesusichi taamo paparamio neꞌnetokao, pukachi inataka ahpo ijinuwa iintaparepua, waika oꞌinia. Pukaepa waꞌa iintokame Riosia, waꞌa iintonareriamekapa, puuua, ahpo iintonariaa ki waꞌatia itipiamepua ahpo iintonareriao.
\v 12 Puꞌka ahpo iintonareriaa Riosia, tamochi iintokamepua pahchao, iꞌisaerichio, teeme pukeri pahcha Riosie Weratiamechi paparakameopua, Riosi teꞌta weruma nakirewara tamochi teꞌtereka mochitomichio.
\v 13 Ehpeo eemea ki iꞌisaeri tiꞌtijoea oowerua tiame, Riosie newipatewa pichikekamekapao, ahpo Taana Weeraria ahjama enepatekamepua, tamochítia. Waꞌa iintokaopua Riosia, teꞌta ahpo ijinuwa iintapakamepua, ahpo Riosiwarie ahjachi yasipateka, apoe Riosia, iintomo cheeriachitia.
\v 14 Ihji Riosi Riosiwari teꞌta kaawerumariaa, puuua teꞌta Riosie taamo nuutewa kiapua, pichiwatamepua, wahka ihtoriachi Eesusi ahpo Taana tamochi enasoopua, iintopuame. Iꞌka Riosie Weratiameo taamo apechunamia enasoopua, iꞌka weeechi nanaarame mochikameo, taamo puhjekaopua waꞌasi, tewekachi ahpo kahtiachi apechunakao. Teemea waikao, waꞌa iintoriokamepua puꞌkao, ki nuꞌunti tísia kaaweruma nayewame teemea, taamo tewekachi kahtiame Noonóo, ki nuꞌuti cheriwema kiꞌyaka.
\s Paoroa peenewari itaniame Riosio, Eesusichi paparakamewichioo
\p
\v 15 Pukaepa neeea, Apoe Paamira Eesusichi aamo ahjachi erakoame inamukapao, aamoo yooma Riosichi piipakameo, kaawe ahpo nakika mochiko tuuopao,
\v 16 senepi Riosichi nayewaio, tísia cheriwema kiꞌyamenia puꞌkao, amochi kaawe teetoachiopua, amochi yasitoamekopua Riosio.
\v 17 Neeea tewekachi taamo Noono tísia tisiwariemeopua, taamo Paamira Eesusi Noonoraoo, puꞌka peenewari tísia pahtewari tiame itaniamenia, puꞌka ahpo Taanachi simiyame aamo maꞌchiteria, tísia kaawe peeneka pahtemichiopua.
\v 18 Neeea Riosio itaniamepua tiameo, maꞌchiame aamo pahtetemichiopua, ihtanakoopua Riosichi aamo puuyetoka mochitoao, puꞌka naneꞌremichio aamo paajuteriao, yooma ahpo ijinuwa iintapariao.
\v 19 Riosio itaniamenia tiameo, aamo kuꞌimichiopua pahtetekao, aachin tiiame ki nuꞌutikopua ahpo utewario, puꞌka ahpo utewari ahjae taamo newipaterio, yooma taamoo, Riosichi paparakameo.
\v 20 Riosia pukae waꞌapi tísia weruma utewarie, oijenatekamepua ahpo Taana Eesusioiopua, waꞌa iintosaopua tewekachio, teꞌta weruma tiiamera yasira kiꞌyakamepua Eesusio, puꞌkao ahpo ahjamina yasimichioopua.
\v 21 Ihji Eesusi yawichituniamea, yomatiame wehjoarichi yaꞌyawichi aampa tiiamepua, yooma ihta teꞌta tiiame utewari yoorewiniameeopua, yomatiame aampa tiiameopua, ahkaoi weeechio, ahkaoi tewekachioiopua tiameo, ihta taawechioi ehpe taawechiamiopua tiameo, ahkasi wahka ihtoriachi taawechiopua tiame.
\v 22 Riosia yooma ihta iintuameopua, yooma ahpo Taana Weerariatere iintapakamepua, puuua ahpo Taana Weerariao, moꞌorawa iintapakamepua yomatiame ihta iintuameopua. Riosia ahpo pirenatura ijinuwaopua, ahpo Taana weerarepua moꞌoratumichioo, yomatiame ahpo tiopa ki pusie teteiwameoipua.
\v 23 Puuu Riosi tiopawa ki pusie teteiwamea, Eesusi Riosie Weratiame weerewarakaitepua, Eesusi Riosie Weratiame Riosiwario, pukachi pochikame kahtiamekopua. Puuu Riosie Weratiame Riosiwari tisiwa tiiariraeopua, yomatiame ihta itapitichioiopua, pochikame kahtiaitepua.
\c 2
\s Riosi nakiwae newipateniame taamo tatakoririao
\p
\v 1 Pukerio eemea mukukameka teꞌtereriaipua, tatakorika mochitoamekapa pehjio,
\v 2 ki kaꞌkaruma nokiwame naꞌnaritoamekapa, iꞌka weeechi nokiwame, naꞌarari noonora eꞌrárira, eekachi oiyame Satanasi tewaniame, kiisi pusie tetewiniame. Puuua tiꞌtijoe iikarachio ooweru iikarachiopua tiameo, ahpo eꞌrakamera nokitiame, kiisi Riosichi paparanariameopua.
\v 3 Yooma teemeai pukeri ki Riosichi paparariaiopua pehjio, waꞌachi nokaka mochitokamepua, taamo waꞌapi eraniamera nokaka, ki Riosikamera eꞌrarira nokaka. Waꞌa teꞌteriapa teemea, Riosi kokosarichikamera uhjurapo teereriai teemea, yooma aaataai, tiꞌtijoeo ooweruopua tiameo, kiisi Riosi eꞌweka mochitonariameo.
\v 4 Nape Riosia puꞌkao, ki ahpo ahjama mochime teꞌtererioipua, puꞌkao tísia tatakorikamekoiopua, ki nuꞌuti nakiwari iinuemekapapua taamo tiꞌtijoerichio, ki nuꞌuti taamo tesiwa eꞌrekamepua, tiꞌtijoeo ooweruopua tiameo.
\v 5 Riosia, waꞌa tiiame ki nuꞌuti taamo nakiyamekapao, taamo apochi uukamepua, Eesusi Riosie Weratiame taamowichio iintoria pichikeriopua. Tatakorichi ohjoapa teemea pehjio, mukukamekate teemea, nape taamoo cheriwesoopua Riosio, eenechi ahjakameka enepame teemea, Riosio weemera ahjari taamo kiꞌyamekopa, Apoe Riosie Weratiameo taamo tewiteria, eenechi oijenaka. Waꞌa teesoo Riosi cherirewachiche newipateniame eemea aamo tatakoririao.
\v 6 Riosia taamoo ahpo Taanachi paparakame enepakopao, puꞌka ahjama mukuka oijenakame taamo tetewame puuua, Eesusi oijenateriaiopua. Waika oꞌinia Riosia, Riosie Weratiame ahjama taamo mochikame tetewamepua, teꞌpa tewekáchio.
\v 7 Riosia waꞌa tiiame tetewimeripua tiameo, yooma aaata tiꞌtijoe ooweru tiameo, ahpo Taana Eesusichi paparasiameopua, ahpo tísia nakiya naneꞌrepatesinariapapua, ahpo kaaweruma tuuyewari pichikesiameopua, puꞌka tiꞌtijoeri tatakoriria cheriwesiwachiopua.
\v 8 Waꞌa tiiachipa yooma tamochitia Riosie cherirewachiche newipatiamepua, yooma aaata ahpo Taana Eesusichiche paparariaecheopua, kihta natekachi, kihta yoorariawichiooi.
\v 9 Waꞌa tiiame inatakame Riosia, kihta taamo iintoriae newipatekáo, ki aaata ahpo oisa eramichiopua, ahpo iintoriae newipatetiameko eꞌrakao.
\v 10 Riosia enepatiame teemea, itapiti tísia nateyame netetiamechitia. Waꞌa tiiame taamo netekamepua, taamoo ahpo tísia nateyame kaꞌkaruma yoratoka ohjoretomichiopua, taamo wahjachio, Riosichi eename tísia kaꞌkarumari tetewitemichiopua, ahpoo pukeri naayachi oꞌinia ahpo inatária.
\s Riosie Weratiamechi paparapa, taꞌiria mochiwame iikachi
\p
\v 11 Naneꞌriame eemea keꞌchu Riosie Weratiamechi paparaio, kihta eneriai eemea Riosichio, oowera seesenuchitia teꞌtereriaipua Riosichio, kihta machiyamekapa Riosi tiiao. Eemea ki iꞌisaerioi eneriamepua, pukaepa iꞌisaeria aamo seesenuchitia tetewariaipua. Aamoo iꞌisaeria ki aamo siichitepuwaka ohjoekopao, ki siichitepuwatiame aamo teewariaipua.
\v 12 Eemea puꞌka taawechiamio, kihta teꞌtereriaiopua tiameo, Riosie Weratiamechio, iꞌisaeri tiꞌtijoechioi, kihta teꞌtereriai eemea. Waꞌa teꞌteriapa eemea, kihta machika ohjoeriaipua Riosichi simiyameo, Riosi kateweria iꞌisaeri tiꞌtijoeri ahjamaopua, Riosioi iꞌisaeri iintokemo tuuriao. Pukaepa eemea, kihta puuyetoka mochitoriaipua Riosio, yomatiame wehjoarichi tiꞌtijoeri iintokemo tuuriao.
\v 13 Nape ehpeo eemea, Riosi ahpo Taanachi aamowichio iintoria pichikekapao, Riosichi kaawe teꞌteriamepua; eemea pukerio, mehka mochikameka teereriaiopua Riosichio, Riosichi teꞌterepatetiamepua, Riosie Weratiame iintoria, pichikekapa.
\v 14 Apoe Riosie Weratiamea, apoe iintokamepua puhjekao, aamo seesenuchitia mochitowa tetewiwao, yooma ihta aamo pejana teereriaopua, iꞌisaeri tiꞌtijoechiopua ki iꞌisaeri tiꞌtijoechiopua, yooma aamo ihta, Riosichi kaawe teꞌterepua, eerina teereriaopua. Waꞌa iintoka Riosia, iꞌisaerio eeme ki iꞌisaeriopua tiameo, piipiri waꞌapi ahpo mochiwari iintapakamepua, naꞌpa eeme aamo seesenu mochiwari, ahpo Taanachi paparariopa.
\v 15 Waꞌa iintoka Riosia ahpo Taana mukiwaeeo, waꞌasi werapakamepua, ehkoriami oꞌinia Moise nuurari, Riosie kiaretiatere mochitoniameo, ki ookapi eꞌwewa ki ahsepame tiiametere mochitoniameo, ahpo tatakoriria cheriwepuawichioo; nape puꞌka Moise nokiwao ki ahsieme nateteniame ahpo Riosie kokosapuame wikiriao. Nape Riosie Weratiamea, ahpo mukiwae teꞌta ahsieme natetekopa taamo tatakoriria Riosie kokosapuameo, iꞌisaeri ki iꞌisaeri waꞌachitia, aaataai tiꞌtijoeri tatakoririao, ahsieme choꞌweniamepua Riosieo, ahpo Taanarachiche paparasoche. Waꞌa tiiachipao Riosia, apoe waꞌapi iintokamepua ahpo Taanaeo, puꞌka ooka tiꞌtijoeturi mochitowao, piiripi waꞌapi weemera Riosi mochiwari iintapakao.
\v 16 Riosie Weratiamea apoe mukuka waꞌasi weraparepua, naꞌpa mochiwari ahpo seesenu eneniameopua, Riosichikamera kaawe teꞌterepuawichiopua. Waꞌa tiiachipao Eesusia, isaeri tiꞌtijoerio ki isaeri tiꞌtijoerikooiopua tiameo, ahpo iintoriaeopua kurusichi mukukao, kaaweruma teꞌterewari enepaterepua Riosichi pirenapatakao, piiripi waꞌapi ahpo weerewachi pirenatukame enepatekao, ahpo weerewa ki pusie teteiwamechiopua.
\v 17 Riosie Weratiame eenakao, amochi nayewaturepua Riosi kaaweruma tuuyewario, aamo kaaweruma teꞌteremichiopua Riosichio, ki isaeri tiꞌtijoeriopua, aamoopua, mehka teꞌtereriameopua Riosichio pehji, iꞌisaeri tiꞌtijoerio ki Riosichi mehka teꞌtereriameopua tiame.
\v 18 Ehpeo tamochi iinuekapa teemea puꞌka Riosi kaaweruma tuuyewario, yooma teeme iꞌisaeria ki iꞌisaeria tiameo, kaawe teꞌteriame teemea puꞌka Riosi kaaweruma tuuyewarichi taamo paparasoopua, Riosi ahpo Riosiwarie tamochi yasitoniameopua.
\v 19 Waꞌa tiiachiopua ehpeo eemea, ki seesenu eemea Riosi ijinuwara mochiwarichio, eemea ehpeo Riosi ohjirachikamera ohjoemepua.
\v 20 Ehpeo eemea tiameo, Riosi ahjae karitaniamepua, Riosio ahpo kariwa ahjae karita, itapitichi tísia pewatiame nawateka. Puuu tísia pewatiame nawateka karitaniamea, Riosie Weratiame ajawariapua, ehkoriami Riosi naꞌnayewatura tiame, waika oꞌinia masitesiria Riosichi simiyameo, ahkasi ehpesiami tiame, Eesusi ajawaria masitesia. Nape Apoe Riosie Weratiamea, teꞌta nateyamera tehtepua, kaari teꞌta pewatiame nawaterachi yachatiame, pukeri kaari nawatera oꞌicharichi teꞌta yachatiame.
\v 21 Pukachi teꞌta nateyamera tehtechio Riosia, ahpo kariwa werisipuamepua, taamoo yoomahkae puꞌka Riosi kaari ki teteiwame, saꞌmitewarachi toꞌwesiamechitia, ahkasi ahsepari kajuyachisi Riosi kaarira weraniameo, yooma taamo Riosiwichio piipatetiameeo.
\v 22 Eeme ki iꞌisaeri tiꞌtijoea ooweruaiopua tiame, Riosi kaarira enepakame eemea, amochi yasitoamekopa Riosi Riosiwario.
\c 3
\s Paoro weraretia, Riosi kaaweruma tuuyewari, ki iꞌisaeri mochikachiami nayewatumichio
\p
\v 1 Neee Paoro Riosie weratiamea, iꞌwa perekarichi noꞌo kahtiaa, Eesusi Riosie Weratiame kaaweruma nayewari, nayewatuapa iꞌwa yachatiamenia, yooma aamo ki iꞌisaerio, Riosichi kaawe teꞌteremichiopua.
\v 2 Naneꞌriame eemeapa Riosio, aachin teeka noꞌo tesiweriopua weerakao, aamo ahpo kaaweruma tuuyewari nayewatumichioo, yooma aamo ki iꞌisaeri tiꞌtijoeo, ooweru tiame.
\v 3 Puuu Riosi kaaweruma tuuyewario, ahkasi ehpiamisio noriwi teereriaipua pehjio, puuupua apoe Riosia, noochi maꞌchitaka, pahteteriao, puꞌka teesa maꞌchiteka aamowichio iyotiamenia.
\v 4 Iꞌka aamowichio noꞌo iyotia aamo uhjurewesoopua, naneꞌremapua eemea noꞌo aamowichio iyoteria iyonasaapa, Eesusi Riosie Weratiamechi simiyameo, aachin tiiame noꞌo pahteria Riosio.
\v 5 Ihji Eesusichi simiyamea noriwi Riosie teereretiaopua pehjio, pukeri ehkoriami Riosi naꞌnayewaturachisi oꞌiniao, Riosia Eesusi ajawaria maꞌchitekamepua noꞌoeo, yooma Eesusichi simiyame naꞌnayewaturaopua tiameo, Riosi Riosiwari pukachi yasitoka kuꞌisikaopua.
\v 6 Puuu ehkoriami mochiriame ki pahteteka mochitetiamea, ahkasi ehpiamisio ihji puuua: Riosia ahpo Taana Eesusichi iintoriaeo, Eesusichi piiripi pirenaturi iintaparepua, yooma ihta tiꞌtijoeriopua, pukachi paparakameo, iꞌisaeri tiꞌtijoerio ki iꞌisaeriopua tiamé. Naꞌpa puuu ooka tiꞌtijoeturi Eesusichi Riosie piiripi pirenaturi iintapatiamea, Riosie Weratiame ki pusie tetewiniame weerewarachi teꞌtereniamepua, waꞌa teꞌteriame enepakapaopua, kiapuamepua Riosie nuutewa kiamo tuuriao, yomatiame ahpo Taana Eesusichi paparakameo.
\v 7 Neeea, kihta kaaweruma enekamekaio, Riosia noꞌo tesiwekamepua, ahpo kaaweruma tuuyewari nayewatumichio weerakao, noꞌoo ahpo teꞌta utewarie noochi yahchaka, noꞌo kuꞌitomichioopua.
\v 8 Neeea Riosichi teꞌta teꞌteriamechio, ki epeche noꞌo tiiameko eꞌramenia, ohsotia neeea noochio noꞌoo, epeche nuꞌutirako noꞌo eꞌramenia pukachio; nape waꞌa noꞌo eꞌroipua noochio, Riosia noꞌokamera uukamepua, ki iꞌisaeri mochikachiami nayewatumichioo, iꞌka ki nuꞌuti nateyame ahpo kaaweruma tuuyewari nayewatumichio, ahpo Taana Eesusichi simiyameopua.
\v 9 Riosie weratiamenia tiameo, yooma tiꞌtijoe ooweru tiame maꞌchitemichiopua, iꞌka Riosi iintomo eꞌrariaopua, ahkasi naayachi oꞌiniaopua, ahpo noriwi iinueriaopua pehjio ki maꞌchitaka. Waꞌasa iintomo eꞌrariaopua, yooma ihta itapiti enepatekamea iꞌka wehjoarichio.
\v 10 Yooma Riosie iintomo eꞌrariaa, tewekachi ahpo teꞌta peenewari tetewipuawichio iintokamepua, tewekachio yooma ihta yawichituwa teꞌterewachiopua. Puuu tewekachi ohjoemea, aapoe tetewamepua Riosio, achini ihsiamepua iꞌka wehjoarichio, ahpo teꞌta peenewarieopua, ahpo ki ookapi iintomo eꞌrariaopua. Piiripi tísia peenewari Riosi iintoriaa, ooka iꞌka wehjoarichi tiꞌtijoeturi pirenatutiame puuua, iꞌisaeri tiꞌtíjoeri ki iꞌisaeri tiꞌtijoeri, puꞌkao Riosia, naꞌpa tiꞌtijoeturi mochitowario, ahpo tiopa ki pusie teteiwame netetiame.
\v 11 Yooma iꞌka Riosi iintomo eꞌrariaa, naayachisi oꞌinia inatariamepua, iintonarewaa, taamo Paamira Riosie Weratiamechi, Eesusi ahpo Taanachi.
\v 12 Pukaepa teemea ehpeo, taamoe waꞌapi iinueme teemea Riosi ahjama taamo nayewamiao, ahjachi oowe erakoka, kihta seeweka tiame, Riosi ahpo Taanarachi iintoriopa, Riosi Taanarao ki nuꞌuti taamowichio iintoriopua puꞌkao, taamowichio mukuriopa taamo tatakoriria ahsieme choꞌwepuawichioo, taamo apochi paparasoopua.
\v 13 Waꞌa tiachipa itaniame neeea aamoo, kaꞌchi erakomichiopua, aamo mochikachi Eesusichi simiyame nayewatukapa, noꞌo peereso yachatiamekoopua. Ohso kaawe eemea kaawe erakopuapua, Riosie noꞌo waꞌa uhjuratiamekopua, ahpo kaaweruma tuuyewari aamo nayewemichio, ahpo Taana Eesusichi simiyame.
\s Riosie Weratiame, yomatiame tiꞌtijoeturi nakiya
\p
\v 14 Pukaepa neeea, yooma Riosi ahpo teꞌta machiwarie iintomo eꞌraria inatapasaapa, chopokorieka weweripamenia Riosie Weratiame Noonora teꞌta iyoriwa kiꞌyakao,
\v 15 apoeopua yooma ahpo Taanachi paparame enepakopao, taamo ahpo tatana iintapariopua, iꞌka wehjoari taamo mochikameopua pehjio, teꞌpa tewekachi ahpo iꞌtoriaopua tiameo, puꞌka wahjipakameopua waꞌasi.
\v 16 Neeea Riosio, ahpo tísia peeniatiame paarasarichi uuka, utewari anachaniame aamo kiajeraninia, aamo iikachi teeretomichiopua ahpo Riosiwarie kuꞌikao.
\v 17 Neeea Riosio itaniamenia tiameo, Riosie Weratiameopua epeche epecheche amochi aamo ahjama teeretomichiopua, aamoo Riosie Weratiamechio, teꞌta aamo oowe erapachisi pukachio. Neeea aamo Riosi nakirawachio, ki eꞌnekuma teeresi nawatajeramenia,
\v 18 aamo kajume eramichiopua pahtekao, yooma wahjachi Riosie piipatetiame ahjama, Riosie Weratiame nakirao, ki nuꞌuti tiiamekopua aamochio: ahkasi tewekachi keenako nakirao, ahkasi kawiyanako ki wahjiamesi, ahkasi tetuyanasio ki wahjiamesi, ahkasi cherayachisi ki wahjiamesi, ahkasi ariyachisiopua tiame ki wahjiamesi tiame.
\v 19 Ki nuꞌuti pichiwa amochi teerejeraninia, puꞌka Riosie Weratiameo, ki nuꞌuti tiiamekopua amochi nakirao, kiisi ahsepame tiiamekopua chanikao, kiisi ahsepame tiiame pahtekaoi; waꞌa teerejeraninia amochio, wahjachi aamo tetewameo, Riosie amochi pochikame yasitoame tetewimichiopua.
\v 20 Ehpeo neeea Riosio, tisiwa peenia tiiame chaachapajeraninia puꞌkao, puꞌka Riosio ahpo utewarieo, epeche iintome tiiamekopua, ahkasi epeche ki nuꞌuti taamo itayachitia, ahkasioi taamoo ki ahsepame tiiame inatakao.
\v 21 Ehpeo teemea, taamo tewekachi Noono ki pusie teteiwame tioparachi mochitoamea, teꞌta pichiwari Eesusi Riosie Weratiamechi paparakamea, ahkasi tewekachi asiyame ki nuꞌuti iyoriwa kiꞌyame teemea, ahkasi ki wahjiamesi teetowame.
\c 4
\s Riosi Riosiwarie pirena nokisiniame
\p
\v 1 Neee Riosie Weratiamechi simiyame nayewatuapao, karichi yachatiamenia, aamoo neeea, Riosi teꞌta mochiwarichitia mochitojerapa, Riosio aamoo, ahpo ijinuwa teewariopa.
\v 2 Eemea aamoo, kaꞌte weruma aamo uuka mochitomitiapua; ohso kaawe kaawe aamo uuka kuꞌika mochitopuapua. Kaꞌte ikanati ki kaawe chaachanimitiapua aaataoi; ohso kaawe eemea, kaawe aamo nakika kuꞌipapuapua.
\v 3 Kaawe aamo neesetoka mochitopuapua, ki aꞌchi tiame teeremichiopua aamo apochio, aamoo Riosi Riosiwarie, aamo pirenatutiameo.
\v 4 Teemea piiripi waꞌapi weerewachi pirenatutiamepua; teemeai tamochio, piiripi waꞌapi Riosiwari iinuemepua; teemea tiameo, piiripi waꞌapi paajutetiamepua, itapiti tísia peenia tiiame uumichiopua, taamo Noono tewekachi kahtiamee, taamo nuutekeniameo.
\v 5 Teeme piiripi waꞌapi Paamira iinuemepua, tewekachi oꞌinia taamo neꞌneka yasitoame; teemea piiripi waꞌapichi paparamepua, apoe Paamira Riosie Weratiamechi; teemea piiripi waꞌapi paatoniame iinuemepua, Riosi Riosiwariche taamo iikachi paatoniameche, Riosi Taanara Eesusichi taamo paparasoo.
\v 6 Teemea piiripi waꞌapi Riosiemepua, puuupua apoe teꞌta taamo Noonoa, yooma taamo Riosi Taanarachi paparakameo. Puuupua tamochi tiiameo, yooma tamochi neesetowao. Puuua apoepua tamochi noonosiamea, ahpo erasia iintonariaa, taamo weerewachi yasitoamekapa puuua.
\v 7 Taamo Noono tewekachi kahtiamea tiameo, taamoo muuwaeme itapiti yeꞌkari taamo kiꞌyakamepua pipiripichio, yoomahka teeme pipiripio, ahjae taamo nokisimichiopua puꞌka ahpo ijinuwachio, yooma ihta itapiti Riosie Weratiame yorajerasichiopua.
\v 8 Riosia ahpo Taana Riosie Weratiamechi simiyame nayewakao, ehkoriami Raawi ahpo nayewatura iyotetiaio, eee cheerepua:
\q1 Puuu Riosie Weratiamea,
\q2 muuwaeme tatakorie chapitiame,
\q2 naꞌsonatiame iꞌtoka eenechi tewekachi mooenasaopua;
\q1 yooma weeechi mochikame pehji ahpo ijinuwa piipateriao,
\q2 muuwaeme yeꞌkari ihkokewa kiꞌyakamepua,
\q2 ahpo ijinuwa tiꞌtijoe ooweruopua tiameo,
\q2 ahpo weerewa tiopachi ki pusie teteiwamechi teꞌteriameo,
\q2 pukae kuꞌisimichiopua wahjachi apochitia piipatetiameo.
\p
\v 9 “Eenechi tewekachi mooenasaopua”, chanitiamea, “tewekachi oꞌinia tekisa eenechi mooenario”, tuuniamea, iꞌka wehjoari kiisi weruma tiiariemechi.
\v 10 Puuu tewekachi oꞌinia tekikamea, puuu waꞌapi eenechi mooenakamepua tewekachio, waꞌa mooenasaopua waꞌa yasipakamepua yawichitumiao, yomatiame ahpo enepateria yawichitumia, pusie teteiwame ahkasi yomatiame ki wahjiamesi ki puusie teteiwamesi, yooma ihta ahpo enepateriachisi pochikame yasaka.
\v 11 Ihji waꞌapi Eesusi mooenakame iintokamepua weeechi mochikame kiꞌyakao, aachin teeka ahpo kuꞌika mochitomichiopua apochi paparakameo, iꞌka pepeniwari yeꞌkaniamechitia: Riosie Weratiame aaata ajawariachitia; wahjachi pepeniwarichitia, Riosi tuuyewari maꞌmasitari; wahjachi pepeniwari kiatiamea, ahkaoi mochiwachiami Riosi kaaweruma tuuyewari tuusimichio; wahjachi pepenewari kiatiamea, tiꞌtiopachi paamiratumichio; wahjachi tiameo pepenewari kiatiamea, nanapawiniame kaawe maꞌchiame tuuyeka masitemeri, Riosichi simiyame tuuyewario.
\v 12 Riosie Weratiamea, waꞌa teeka katewekamepua ahpo ijinuwao, ihta ahpo tehkiwao, kaawe pepeneka yooraka mochitopuawichiopua, waꞌa teekao, epeche epeche kaawe teꞌteretopuawichiopua taamo Noono Riosichio, Riosie Weratiame weerewarachio, yoomahka teeme pirena nokisika.
\v 13 Waꞌa teꞌteretomete teemea, taamo pirena waꞌachitia erakowa teeremichiopua, taamo Noono Riosi Taanarachi paparaniameo. Waꞌachi erakoame teꞌterepasaapa teemea Eesusichi paparaniameo, iwapakame enema teemeapa, Riosie Weratiame tiiarichi simiyameo.
\v 14 Riosie Weratiame tiiarichi iwapakame enesaapua teemea, kaꞌchi iika ikanati sewina erapatepuame teemea, ihtaoi sewina weemera tiiame masitewarieopua, aaata taamo wihkuemia enakameeopua. Teemea Riosie Weratiame tiiarichi iwapakamekapao, ki kukuchi nuꞌnuntichitia ikanati pichiketepuamepua, aaatae itapiti ahpo chaanetiaeo; ki aaatae iꞌka wehjoarichi ohjoeme taamo apochi eejepume tiiame teemeapa.
\v 15 Puꞌka waꞌa nokayame taamo wihkuenarioo, ohso kaawe Riosi pichiwari inatakache itipipuapua, kihta nekamuwa chaaneka. Epeche epecheche pepenipaka mochitomete teemea Riosie Weratiamechi teꞌteretowaopua, Riosie Weratiame weerewarachi itapitirachitiaopua, Eesusio taamo moꞌorachitia teꞌteretoeka.
\v 16 Riosie Weratiame taamo moꞌorachitia teꞌteretoame enesaa teeme, kaawe teꞌteretoame enema teemea Eesusichio, Eesusi weerewarachi itapitirachitia teꞌteretokao, yooma pipiripi teeme ahpo yoramia kaawe teeretowa yorasika. Yooma teeme pipiripi Eesusi weerewarachi itapitira kaawe nokisiame enesaa, kaawe ahpo waꞌachitia kuꞌitoka nokisiame enema teemea, kaawe ahpo waꞌachitia nakitoka.
\s Weemera teꞌtereka ohjoeniame Riosie Weratiamechi
\p
\v 17 Pukaepa iꞌka aamo chaaniamenia Eesusi Apoe Paamirae weratiamechitia, kaꞌte ki Riosichi paparamechitia nokimitia eemea, aapoe waꞌapi ahpo erakoa nokayamechitia, puꞌkao kihtawichio kaawekame.
\v 18 Puuu ahpo waꞌapi erakoakamera nokayamea, tukapachi teꞌteriamepua ahpo inatario, ki Riosi uutapari inatarichi. Puuua, kiisi uunareka mochitoamepua, Riosi weemera ahjario ahpo kianarewao, peewamekapapua ahpo iikachio, kiisi sewina erapanariamepua kaꞌkarumachio, kiisi toinariapa ahpo ki kaꞌkaruma nokiwao.
\v 19 Puuua kihta suuwe erakoamepua ahpo ki kaꞌkaruma nokiwachi yokipakamekapapua, yooma ihta eiwepua tiiame, puꞌserewa nokiwachi.
\v 20 Eemea Eesusi Riosie Weratiame tuuyewari pepenipaio, puꞌka waꞌa nokiwameo, kiisi kaaweko tiiame pepenipakamepua.
\v 21 Waꞌa tiiachiopua eemea, Riosie Weratiamechi pepenipakapa, kiisi kaawe tiiamekopua waꞌa nokiwao,
\v 22 yomatiame puꞌka ki kaawe nokiwao, toipuapua waꞌasi. Puuu keꞌchu Riosie Weratiamechi paparai nokariaa, ahsieme ki kaꞌkaruma nokiwamechi wekaniamepua, aamo iinya tiiame yooraka mochitonareriaa.
\v 23 Eemea ehpeo yomatiame aamo weemera teꞌterewachi enemetepua, ahsieme kaawerumachiche inatatoame, kihta inatapuawichio waꞌasi aamo ki kaawe nokinarewao.
\v 24 Eemea, aamo weemera ahjariwa tiia tetewitepuapua, weemera Riosi tiiariwa enepatetiamekapa Riosieo, aamo weemera Riosi tiiariwa teꞌteriame tetewimichiopua wahjachio, teꞌta Riosi kaꞌkarumari aamo nokayame tetewiteka, kihta suwepori ihsiwa tetewitiame.
\v 25 Waꞌa teꞌtiamekapa eemea, kihta wistuame enemitiapua; ohso kaawekamera aamo ahpoo teꞌta pichiwaka nayewepuapua, yoomahka teeme pirenao, piiripikai tiiamekapa, Riosie Weratiame weerewachio, ki pusie teteiwame weerewachio.
\v 26 Kaꞌte aamo newitote nekarewaeo, aaata aamo naꞌra iintokoio, itapiti aamo nekame tiiame chaanekoio, nekarewae aamo newitotesaamua, tatakori iintoame muuua. Aaata ahjama nekasaamu, ikanati aamo katewepuapua puꞌka ahjamao, puꞌka waꞌapi taawechioio,
\v 27 riaorósio ki amochi iintomichio nasiwatekao.
\p
\v 28 Pukerio ichikoame enekaio, kihta inatepuapua aamo ichikomiao; ohso kaawe tekipanaka yowipuapua aamo nakiwiao, soparame iinuemichiopua aamo koꞌkomiao, ahkasi aamo aaata ihkokemiaoi, tesiwa teꞌtiamekoopua kihta koꞌkometieo.
\p
\v 29 Eemea aamo chuꞌwachio, kaꞌte chiiame enemitiapua, itapiti nekame tiiameo, ihtaoi ki kaaweruma chaniwao; ohso kaawe kaawe eꞌreka nayewiame enepuapua aamo wahjachio, kaawe wichiyame inamuniame teerewaeme.
\p
\v 30 Kaꞌte yuuwesitemitia eemea Riosi Riosiwario, ki kaaweruma aamo noonowisoo tísia yuuwesiamepua, tewekachi taamo Noonoa, ahpo Riosiwari amochi yasitopatekamepua, aamo tuuyesimichiopua aamo eeyowa teeresoopua ki kaawerumachi aamo wichipuao. Riosia ahpo Riosiwario, ahpo ijinuwa iintapariache kiꞌyamepua, pukae kakupachiche aamo teetomichiopua, ahkasi wahjiame taawechisi Eesusi Riosie Weratiameo, eenechi tekiyachisi tamochio, ahsepari taamo newipatemiaopua.
\p
\v 31 Eemea ihpapamitia waꞌasio, puꞌka aamo chipurewa tiiameo, aaata aamo nekamuchewa erakoao, aaata ahjama nekakoniameo, siinto eꞌraka chaniwame nayewakao, aaata naꞌarewa nokiwame, waꞌa ikisa yooma ihta kiisi kaawe nokiwameo.
\v 32 Kaaweruma enemitia muuua naaju amochio, tesiwe eꞌreka nayewiame enepuapua aaatao, tesiwe eꞌriame enepuapua aaatao. Eemea aamo ahpo waꞌachitia cheriwiame enepuapua, aamo ki kaawe yooraretiaio, Riosi iintoriachitia aamo cheriwekao, aamoo, Riosie Weratiamechi aamo paparariopa.
\c 5
\s Achini teeka ohjoeme tiia Riosi tatanaraa
\p
\v 1 Waꞌapenatio Riosi nakiya tatanarakapa eemea, kaawe aamo nakika ohjoepuapua, Riosi aamo nakika yasitoachitia.
\v 2 Waꞌa teeka ohjoremitia eemea, Riosie Weratiame taamo teꞌta nakiriachitia, Apoeopua taamo teꞌta nakiyapao, ahpokamera kiꞌyariopua meripuawichioo, ahpo pejana poꞌwachitia Riosi oowepakao, taamo tatakoriria Riosie piipatepuawichioo, Riosia ahpo Taana meritiameo, peeniakame saaekamepua.\fig |189-LB00253B.TIF|col|||Eesusia taamo tatakoriria natetewawichioo, ahpo waꞌapi taamo pejana Riosi poꞌwa oowewarichitia nehjarepua ahpo meriwachio.|5:2\fig*
\v 3 Riosi tatanara enepatetiamekapa eemea, kihta suwepori nokiwame amochi tetewitemeripua, aꞌchi tiiamekoiopua, suwepori nokiwameo, ihtaoi ki kaaweruma simiyame aamo weemuwario.
\v 4 Kaꞌte nayewamitia eemea, iinya tiiame chaachapaniameopua, itapiti kiisi inatari nayewaniameo. Kaꞌte tamojeramitia eemea, aaata iinya tiame chaanekaoi. Kiisi kihta nayewamete eemea waꞌa tiiameo. Ohso kaawe eemea, cheriwema kiapuapua Riosio, apoe iintokamekopua, kaaweruma aamo iintapakao, aamoo ki iinya tiiame nayewamichiopuao.
\v 5 Iꞌka noꞌo cheemiao, inataka inamumitiapua: Aawataai ki ahpo uupimache uupitaniame nokiwamea, ooweruai ki ahpo kuunamache kuunaniameaio, ki reesisepuamepua Riosie Weratiame yeꞌkarichi mochipuawichioopua, Riosi waꞌapi yeꞌkariwachio; aawataai puuua, ahpo weerewa ikotuwache iꞌyamea, eiwepua tiiameche nokayamepua. Aaata tahpitika eꞌramea toomichioio, ihtaoi itapitichi ki kaawerumachi weemuameo, ki reesisemeri Riosia ahpo ahjama ohjoemichiopua puꞌkao ahpo yeꞌkarichio, puꞌkao, ahpo toomichiche riosiwakamekopa.
\v 6 Kaꞌte aamo tooa aaata aamo wihkuemichio ahpo wistukieo, puuu aamo wihkueniamea, oowera aamo wistukiamepua. Puuu waꞌa tiiame nokayamea, apochi wichitemiitepua, Riosi kokosari nekarewao, ki Riosi chiiamekamera, maꞌmasitiamekopua puꞌkao.
\v 7 Waꞌa tiiachipa eemea puꞌkao, kaꞌte pichikemitia puꞌkao. Puꞌka masitia pichikesaa eemea, ahjama teꞌteriame enema eemea; waꞌa aamo teꞌteresoo Riosia, aamo kokosamapua.
\v 8 Pukerio eemea tukapachi ohjoereriaipua, ki machiyapa Riosichi teꞌtereniameo, nape ehpeo eemea Apoe Riosie Weratiamechi teꞌterepakamekapao, Riosi uutaparichi ohjoemepua, Riosi teꞌta kaaweruma tuuyewari taajenarichi. Eemea teꞌta Riosi uutaparichi mochitoamechitia, aamo tetewitepuapua.
\v 9 Puꞌka Riosi kaaweruma taajenarichi ohjoetoamea, kaaweruma eꞌrarie ihsiame enemapua ahpo piirechio, ki seꞌwika Riosi nakiyachitia, puuua pichiwakache nayewamapua.
\v 10 Eemea teꞌta Riosi puꞌseriachitia, mochitonareka ohjoepuapua.
\v 11 Eemea tukapachi simiyameo, kaꞌte waꞌachi nokisimitiapua, puuu tukapachi nokiwamea, kihta kaaweruma machenamepua; ohso kaawe eemea puꞌkao, terika tuuyepuapua puꞌkao, ahpo tukapachi nokayao, kiisi kaaweruma nokiwameko tuukaopua puꞌkao.
\v 12 Utewaeme teripuapua puꞌkao, puꞌka noriwi nokayao, ki nuꞌuti suwepori nokayameko tuuyeka, kiisi chanime tiiame iinya tiiame.
\v 13 Nape yooma itapiti taamo nokiwao, Riosi tuuyewari taajenarichi maꞌchipa tiiaapa, maꞌchiame tetewipuamepua, kaawerumakoo ki kaawerumakooiopua.
\v 14 Pukaepa chaachapaniamepua: Pusasa muuuapa, kochika tiiamea. Werisisa muuuapa, wahjiparichi tiiamea, Riosie Weratiameo, aamo tahjepamichiopua.
\v 15 Eemea amochio, kaawe amochi neꞌnemitiamua aamo nokayao. Aamo pusakame yasitopuapua inatarichio. Kaꞌte kihta peenewari machiyame enemitiamua; ohso kaawe eemea, teꞌta peenewari tiiame enemitiapua, Riosi nakiyamera kaaweruma teetowara.
\v 16 Senepi taawechi aamo teetoachio, kaaweruma pooe neꞌneteka mochitopuapua aamo wahjachio, tísia tehki tiiame teetoamekopua ehpe taawechiamio, iꞌka wehjoarichio tísia muuwaemekopa nanaarameo.
\v 17 Kaꞌte natakepaka mochitomitiapua, Riosikamera kaawe eratepua nokipuameo.
\v 18 Aamo kaaweruma Riosichi tetewipuawichioo, kaꞌte nawajimitia ihtaoi paatarieo, puuu paatario taamo ki inatepame enepatiamekopao, ihtaoi aꞌchi tiiame ikiniameo; ohso kaawe ihtaoi itapiti aꞌchi tiiame amochi ikisaa, aamo Noono tewekachi kahtiame paparaka, itanepuapua aamo kuꞌika katewepuawichioo, waikao apoeopua, aamo kuꞌika katewemapua ahpo Riosiwarieo.
\v 19 Eeme Riosie Weratiamerachi paparamea, waꞌamahka taꞌpechi napawisaa, aꞌchitiaoi aamo peeniachitia nayewepuapua tewekachi Noonoo, Apoe Eesusiopua tiameo, ihtaoi Riosi iyotaperichi chiia iyonaio tiameo, ihtaoi Riosiwichio kaawe eꞌrewa wikatapuapua, nape teꞌta aamo iikachi machename eꞌrewae.
\v 20 Senepi Riosichi nayewaio, ihtaoi itapiti nayewiaio, kaꞌte natekepamitia eemea, cheriwema kiamiao, Eesusi Riosie Weratiameo, puꞌka aamowichio iintoriopa.
\s Aachin teeka mochiniame nenewikameo
\p
\v 21 Eeme nenewikamea, nenekuti ahpo yoorewatere teꞌtereka mochitopuapua, waꞌa tiiame yachatiamekopua Riosie Weratiameo.
\v 22 Eeme ujupiraa aamo kuunao, moꞌorachitia teetoame tetewimitiapua, aamo kuuna neesetowatere mochitoka,
\v 23 taamo Paamira Eesusio, yooma ahpo weerewa ki pusie teteiwamechi taamo teꞌteretoameo, apoe moꞌorachitia teetoamekopa tamochio. Puuu Eesusi weerewa ki pusie teteiwamea, Riosi tioparakaitepua tiameo, puꞌka tiopa ki pusie teteiwamechi mochikamewichioo, Riosie Weratiamea ahpo ahjari nehjakamepua, puꞌka newipamichio, puꞌka tatakoriria ahsieme choꞌwepuawichioo.
\v 24 Waꞌachitia teemeai Riosie Weratiame ki pusie teteiwame tioparachi enepakamea, taamo Paamira Eesusio taamo moꞌoratuamechitia tetewachitiao, waꞌachitia eeme uupiraai aamo kuunao, waꞌachitia aamo moꞌoratuamechitia tetewimetepua, yooma itachioi, yooretoka.
\v 25 Eeme kuunaraai, tísia kaawe nakika mochitomitiapua aamo uupio, Riosie Weratiamechitiao yooma ahpo tiopa ki pusie teteiwameo, nakika yasitoamechitia, puꞌkao teꞌta taamo nakiyapao, taamowichio ahpo mukiwarichi kiꞌyariopa.
\v 26 Waꞌa iintokame puuua ahpo mukiwachisi kiꞌyakao, taamo teꞌta papakotiame itipimichiopua taamo tatakoririao, teꞌta ahsieme piipakame, ahpowichio taamo poanatakamekapapua. Waꞌa iintokame Eesusi Riosie Weratiamea, taamo tatakoriria cheriwepuawichio itanetiapao, taamoo neeroie paatonioiopua.
\v 27 Waꞌa tiiame iintokame Eesusi Riosie Weratiamea tamochio, teꞌta ahsieme piipakame neꞌnetenariapapua, ahpo waꞌapiopua. Puuu teꞌta taamo piipateriaapua, ki teesa tiiame tatapara tiiamepua piipario, teesaoi ki ohchoparieme, teesaoi kihta chuꞌruame.
\v 28 Eeme aamo uupi kuunaraa, aamo tísia weerewa nakiyachitia, waꞌachitia nakipuapua aamo uupioi. Aaataai ahpo uupi teꞌta tísia nakiyamea, ahpo waꞌapi nakiyamekai teereniamepua,
\v 29 aaataai ahpo weerewao, kiꞌtiamekopua ahpo weerewa waꞌapi nekamuchiameo, waꞌa tiiamekapa puuua ahpo weerewao, tísia kaawe ahpo neesetoamepua, tísia kaawe koiꞌteka. Riosie Weratiamea waꞌachi ihsika taamo neesetoamepua ahpo tiopawao, puuu tiopa ki pusie teteiwamea, apoe waꞌapi weerewakapapua, weerewa ki pusie teteiwame.
\v 30 Teemea puꞌka weerewa ki pusie tetewiniamechi teꞌteriamepua, puꞌka weerewachi piiripikame teemea, piiripi waꞌapi pirenaturichi.
\v 31 Waꞌachitia Riosiai nenewikameo, piiripi weerewachitia pirenatukame tetewamepua, Ehkoriami Iyoterio, teꞌta eee chiiachitiao: “Aaata tijoea toimeripua ahpo noonoo yeeyeopua tiame, ahpo uupimao piiripichitia enepamiapa pirenatukao.”
\v 32 Ihji pirenatuniame piiripi weerewachitiao, tísia tehki tiiamepua pahtepuawichioo, puuu piiripi weerewachitia pirenaturi enepaniameo, ki pusie teteiwamekapa. Waꞌa teꞌteriame teemea, piiripi pirenaturi enepakamekapa, Eesusi Riosie Weratiamechío, ki pusie tetewíniamechi.
\v 33 Iꞌkao cheeriamekainia waꞌasio, eenechi aamo chaaniamenia: Eeme kuunaraa, aamo waꞌapi aamo nakiyachitia, nakika yasitopuapua aamo uupio; eeme uupiraa, yooreka yasitopuapua aamo kuunao.
\c 6
\s Tatanara nayewaniame, yayawara tiame
\p
\v 1 Eeme kukuchia, yooreka mochitomitia aamo yayawao. Puuu aamo yayawa yooreniamea, kaawerumapua, waꞌa tiiame nakiyame taamo Noono tewekachi kahtiamea.
\v 2 Iintuame piiripi nuurari Moisetaru Riosie kiatiame, tiꞌtijoeo ooweruopua tiameo, eꞌweka mochitomichiopua. Riosia ahpo nuurari Moise kiꞌyaiopua tiameo, puꞌka nuurari yooreka yasitokameo, tísia kaawe ikitemo tuukamepua. Puuu nuuraria eee chiiamepua: “Yooremitia aamo noonoo, aamo yeeyeopua tiame.”
\v 3 Puuu Riosie iintomo tuuriaa, eee cheeriopao: “Aamo noonoo aamo yeeyeo tiame yooreka yasitosaa, tehpe weritomerimua ahjatokao.”
\p
\v 4 Eeme noonoraa, kaꞌte nekaka tuuyemitia aamo tatanao; ohso kaawe kaawe eꞌreka tuuyepuapua masitekao, kaaweruma weripamichiopua puꞌkao, yooreka yasitoame. Ki aamo eꞌwenaresoopua aamo tatanao, utewachi yooretepuapua puꞌkao, aꞌchitiaoi aamo yeꞌkachitia masiteka, nape tísia nakika, kiisi nekaka; waꞌa tiiame nakiyame taamo Noono tewekachi kahtiamea.
\p
\v 5 Eeme aaata aamo teeko tekipanakiamea, yooreka tekipanapuapua aamo teekochio, iyorika yorapuapua aamo tehkio, kihta inasoame enepuapua, tijoeai oowitiameai, aamoo Riosie Weratiame tekipanakiamechitia iyorika.
\v 6 Aamo teekoe ki tetewiniachi ihsiaio, waꞌapi tiiame enepuapua, ki aamo teekochiche kaawe aamo itipinarewaeoi, Riosie Weratiamechiopua tiamé, waꞌa tiiame kaawe eꞌriame Riosia.
\v 7 Waꞌa tiiachio aamo teekochi tekipanaio, Riosie Weratiamewichio, tekipanameka erapuapua, ki aaata tiꞌtijoe teekowichio, ooweruoi teekowichiooi.
\v 8 Naneꞌremitia eemea, puhku tekipanameo ki puhkuchitia tekipanameopua tiameo, waꞌachitia kaawe yorapuamekopua Riosieo, yooma aaata ahkasi kaawe ahpo tekipanariachitiao.
\p
\v 9 Eeme tekipaname teekoraai, aamo tekipanamechitia teꞌterepuapua, aamo yooreka tekipanakiamechitia, kaꞌte eꞌraka yooraka tetewimitiapua puꞌkao, kaawe naneꞌriamekapa eemeapa, tewekachi kahtiamekopua teꞌta aamo Teekorao, aamoopua aamo tekipanateka iintuamea. Puuu aamo teꞌta Teekoa, apoe Eesusi Riosie Weratiame puuua. Puuu Eesusi Riosie Weratiame aamo Teekoa, ki epeche weruma tiiame tetewamepua aamoo, aamo tekipanakiamechio.
\s Ihtanae taamo nehpupameriko riaorósi naꞌararichio
\p
\v 10 Ehpeo neeea, noꞌo iyotewachi kajuyachiopua, aamo riaorósichio, ihtanae aamo nehpupamia, nayewemane. Eemea, riaorósi wihkuarichi aamo nehpupapuawichioo, Riosie Weratiame itanepuapua aamo teꞌta ahpo utewarie kuꞌimichioo.
\v 11 Eemea Riosie aawewiame enepuapua, ahjae aamo neesepuame riaorósi wihkuario.
\v 12 Apoe Riosi enemeri taamo ahjae nehpupameria, ki aaata tiꞌtijoechi nasiwaniamekopua, apoe teꞌta Satanasikoopua taamo seepurawao, kihta saꞌpaeme ki eeraemeoipua tiame. Taamo ahjachi nasiwaa, eekachi ohjoame ahjaripua, Satanasi kuꞌyamera ahjari, tísia nanaarame tiꞌtijoerichio. Puuu Satanasi kuꞌyamea, iꞌka wehjoari tukaparichi tekipanamepua, teꞌta Satanasie kiatiame, teꞌta utewari kiatiame iꞌka wehjoarichi nokisimichioo.
\v 13 Pukachipa Satanasi ki pusie teteiwamechi nasiwaniamekopao, yomatiame Riosie aamo nehpupari amochi teeretopuapua, ahjae aamo aawemichiopua, Satanasi aamo wihkuewarichiopua. Waꞌatiaomua kiisi yuumpatiame enesaamua Satanasi wihkuarie nanaarameeopua, maꞌchiame teteipuame enemamua Riosie Weratiamechi teꞌta tiiamekopua aamo paparao.
\v 14 Pukaepa eemea, pusakame mochitopuapua, kaawe aamo inateka. Satanasi aamo wihkuenaresoo, teꞌta pichiwari Riosi chiiae, nehjiaka aamo nehpupapuapua, pukae aamo nehpupamichio kiꞌyakame Riosia. Satanasia aamo chaanenaresoo: “Kiisi kaawe tiiame muuua Riosichio, tísia wihtuka chiiame muuua”, chaanepuapua puꞌkao, “noꞌoo tísia kaawe tiiamekopua Riosichio, noꞌo Riosichi paparakopa noꞌo cheriwekopa.”
\v 15 Kaawe katewetiame mochipuapua, aamo wahjachi nayewemia Riosi kaaweruma tuuyewario, Riosie aamo iikachi taꞌiria yasitowa eraniameo, Riosie taamo kianiameopua.
\v 16 Riaorósio aamo sewina erapatenarioo, ki aamo ahjama tiiopa Riosio aamo kuꞌikao, aamo Riosichi paparae aamo nehpupapuapua, pukae aamo pejanaweka, choipatepuapua riaorósi ataporirao, taamo ki kaaweruma iintojeraopua, tajenarieme.
\v 17 Puꞌka Riaorósio aamo sewina erapatenarioo: “Ki Riosie aamo newipatetiameko”, chaanesoo, peeneka aamo nehpupapuapua, tísia wihtuameko tuuka puꞌkao. Puuu tísia peeneka aamo inatawae nehpupawaa, soontaro kajewa moꞌkoritoniameka tiiamepua. Riaorósi waꞌa mahka amochi eenaka itapiti ki kaaweruma Riosiwichio, aamo weemupanaresoo iintojerakao, Riosi Iyoterichi chiiae aamo nehpupapuapua, Riosi Riosiwarie kuꞌiwao.
\v 18 Senepi kukuwe Riosichi itaka mochitopuapua aamo kuꞌiwao, apoe aamo chaanesimichiopua, pukae aachin teeka aamo nehpupasimichiopua, Satanasi naꞌararichio. Waꞌachi cheeka nehpupapuapua yooma aamo wahjachiwichio itakao, Riosi Riosiwarichio.
\v 19 Noꞌowichioopua tiame itapuapua Riosio, maꞌchiame ki seeweka noꞌo masitemichiopua, ahpo Taana Eesusi simiyameo, yooma puꞌka kaaweruma Riosi tuuyewario, ki maꞌchitaniame pehji, ehpe taawechiamio noriwi teereniame pehjí.
\v 20 Neeea puꞌka tuuyewari nayewatuapa, iꞌwa yachatiamenia peereso, Riosi noꞌo chaanesiwa nayewatuamekapa. Teꞌta itaka mochitomitiapua noꞌowichio ehpe iꞌwa noꞌo kahtioiopua peereso, Riosio noꞌo kuꞌimichiopua, noꞌo oisatia nayewamichiopua, teꞌta kaawe noꞌo teetomichiopua, Riosi nakiyachitia.
\s Kajuyachi teepotari
\p
\v 21 Ehpeo neee Paoroa waꞌa Eejesio tiopachi mochikameo, waꞌa aamo uhjurenane Tikikoo, taamoo Riosichio pooniwaka tiiame, puuua tísia yokipakame puuuapa Riosie Weratiamechio, puuua tísia kaawe noꞌo kuꞌikamepua tiameo, Riosi tehkiwa nokiwachio. Tikikoeo neeea, waꞌa aamo iꞌtochenania, yooma aachin teetoa tamochio iꞌwa, puuua aamo mochikachi asisaapa, puuu ihsimapua yooma aamo tuuyekao, aachin teeka taamo mochikaopua iꞌwa,
\v 22 aamoo kaawe erakomichiopua, taamo kaawe teꞌterio tuuyetiopa Tikikoeo.
\v 23 Yooma eeme Riosichi poponiwa pipiniwaopua tiame, Riosi ihsijeraninia amochio, taꞌiria mochitekaopua aamo iikachio, Riosio amochi teerejeraninia tiameo, teꞌta aamo ahpo nakika mochitoniame; aamo kuꞌimichiopua tiameo, ki seꞌwika aamo teetowetekao, aamo teꞌta paparawaopua, ahpo Taana Eesusichío.
\v 24 Yooma aamo taamo Paamira Eesusichi tísia ki wahjiamesi nakika ahjachi paparaka mochitoameo, Riosio neeea, teꞌta kaaweruma ikiwame amochi teewejeraninia, ahkasi ki wahjiamesi.
\p Waꞌasi kajuyamenia iꞌka noꞌo aamo uhjuriaa, iꞌka tuuyewari aamowichio iyotiao. Kaawe erakosa naajúu, cheriwema waꞌasi.