\id PHP
\h Iꞌiripo Iyotepawa
\mt2 Paoro
\mt1 Iꞌiripo
\mt2 Iyotepawa
\c 1
\s Teepotari
\p
\v 1 Kúíra Iiripo tiopachi mochikame, Riosichi poponiwa pipiniwa tiame. Neee Paoro Timoteo ahjamao, Eesusi Riosie Weratiame yorakeka mochitoamea, iꞌka iyotesa aamo uhjurena teemea, yooma puꞌka Iiripo mochikameopua, Eesusi Riosie Weratiamechi teꞌteriameo, yooma waꞌa tiopachi paꞌpamuratuameopua tiameo, waꞌa ikisa waꞌa paꞌpamuratuame kuꞌkuyameopua tiamé.
\v 2 Teemea aamoo, Taamo Noono Riosiopua, Apoe Eesusi Riosie Weratiameopua tiameo, aamo tísia kaawe iintojerani teemea, aamo iikachiopua, tísia taꞌiria mochitekao.
\s Paoro Eesusichi pichikiamewichio, Riosichi itanewa
\p
\v 3 Neeea senepi amochi inatepaio, cheriwema kiꞌyamenia teꞌpa tewekachi kahtiameopua Riosio,
\v 4 tísia kaawe eꞌrapa noochio,
\v 5 puꞌka aamo noꞌo tísia kuꞌika mochitoriawichioo, yooma iꞌka kaꞌkaruma Riosi tuuyewari noꞌo nayewa tuuoiopua, pukeri oꞌinia iꞌka kaꞌkaruma naawesari aamo inamuriachisio, ahkasi ehpe taawechiamisi.
\v 6 Neeea iꞌka Riosi iintomia amochio, tísia ahjachi eꞌrame neeea: Puuu tísia kaaweruma itapiti iintokame aamo iikachio, puuu waꞌapi amochi oꞌinekame, amochi simitemeripua waꞌapitia tísia kaaweruma inisikao, ahkasi Riosie Weratiameo, eenechi eenachisio.
\v 7 Neeea Riosio amochio, tísia kaawe iintomeriko eꞌramenia, waꞌa eꞌramenia aamo tísia nakiyamekapao, aamoopua tiameo, tísia noꞌo kuꞌika mochitoriopapua, iꞌka Riosi noꞌo kiꞌyaria yoramichio tehkichio, aamoopua tiameo noochi kiatiamekopua Riosie kaaweruma teetowao, peꞌyachi noꞌo peereso yachatiaio, peꞌyachi yawichichi noꞌo weranioi Riosi kaaweruma tuuyewari nehpupakao, teꞌta pichiwako tuukaopua puꞌkao.
\v 8 Noꞌo Noono tewekachi kahtiamea, naneꞌriamepua achini eꞌraka noꞌo kahtiamekoopua iikachio, aachin teeka noꞌo tísia aamo tetewinareka yasitoo, ki nuꞌunti aamo kuchichewaka nakiyapa Apoe Riosie Weratiameo aamo kuchicheka tetewachitia.
\v 9 Neeea Riosio, napatika aamo nakika mochitomichio itaniamenia, epeche machika mochitomichioopua Riosichi tiiameo, epeche kaawe nokisikao Riosichio,
\v 10 aamo peeneka uumichiopua epeche teꞌta kaawerumara neꞌnekao. Waꞌa teꞌtereka mochitosaa eemea, kihta aꞌchi tiiame teꞌtereka mochitomeripua iꞌwa wehjoarichio, ahkasi Apoe Riosie Weratiame eenechi eenachisi, aamo tewekachi apechunamiao.
\v 11 Waꞌatiao aamo kaaweruma teerewa nokariao, kaaweruma iꞌipari enemeripua Riosie Weratiamee kuꞌitiame, waꞌa ikitiapa eemea, kaaweruma nayewaka cheriwema kiama eemea Riosio, Riosie Weratiame Noonoraopua.
\s Noꞌowichioo teꞌta nateyamea, Riosie Weratiamechiche teetoniamepua
\p
\v 12 Riosichi poponiwa pipiniwa tiamée, aamo naneꞌrejeraninia iꞌwa peereso yachatiameo, ohso kaawe teetomichio eneriopua Riosi kaaweruma tuuyewario, epeche muuwaeme machimichiopua iꞌka tuuyewari tuuyesiwaopua.
\v 13 Yooma iꞌwa yawichikarichi soꞌsontaroa, ki soꞌsontaroaapua tiame, naneꞌriamepua iꞌwa noꞌo peereso kahtiaoopua, Riosie Weratiame naewatuapa iꞌwa yachatiamekoopua.\fig |190-cn02087B.tif|col|||Paoroa yawichikarichi peereso kahti.|1:13\fig*
\v 14 Waꞌachitia ki ookapi Riosichi poponiraai pipiniraai maꞌchi mochitoamea, iꞌwa peereso kahtio tuuopa noꞌoo, aapoepechi tísia oisa erapaka, tísia oowe erapaka taamo Paamira Riosie Weratiamechiopua tiameo, tísia nayewatunareka mochitoamepua, iꞌka tuuyewari Eesusichi simiyame tísia kaꞌkarumaopua.
\p
\v 15 Aaata tiꞌtijoeria Riosie Weratiameo, naewatuamepua naewao, nape ahpokamera kaawe eꞌrepuawichio, ki aaatae ahpo iimepuawichiokamera; nape aaata wahjachia Riosie Weratiameo, kaaweruma erakoka nayewatuamepua puꞌkao.
\v 16 Ihji ki kaꞌkaruma naewatuamea Eesusi Riosie Weratiameo, noꞌo kokosa eratenariapa waꞌa nokayamepua ki pichiwarikamera aamo nayewatuka Eesusichi simiyameopua.
\v 17 Puuu pichiwaka nayewatuame Eesusichi simiyame Riosi kaꞌkaruma tuuyewario, noꞌo nakika mochitoamepua. Puuua naneꞌriamepua tiameo, Riosi chiia nehpupapa iꞌwa peereso noꞌo yachatiamekopa, noꞌo Riosi kaaweruma tuuyewari nayewatuapa.
\v 18 Nape peꞌyachi ki kaaweruma iikaeka kaaweruma iikaeka nokayoio kaꞌchi noꞌo yoramepua, aꞌchitiaoi puuua, Riosie Weratiamechi simiyame nayewatuamepua. Waꞌa teerewachio, kaawe eꞌramenia. Waꞌapitia epeche kaawe eratomania,
\v 19 Riosie neesetoniamekapa iꞌwao, kuꞌwe noꞌo maꞌchipapuameko eꞌrapa iꞌwa perekarichio, aamo Riosichi noꞌowichio itarewae kuꞌiwa, Riosie Weratiame Riosiwarie kuꞌiniapa tiameo.
\v 20 Neeea ahkaoi oiyaio, tísia kaawe nayewanariamenia Eesusichi simiyame, kihta suuwe eꞌreka aaataoi. Neeea noꞌo nayewaturaeo, Riosie Weratiameo ki nuꞌuti tiiameko naneꞌrejeramenia, puꞌka waꞌa tiiameo noochi epeche, epecheche tetewitoka, ahkasi noꞌo ahjaka yasitoachisi, ahkasi noꞌo mukuyachisio.
\v 21 Noꞌowichioo ahjaka yasitoniamea, Riosie Weratiamewichio yorakeka yasitoniame puuua, nape mukisaooinia, tísia kaawe enemeripua noochio.
\v 22 Puꞌka naꞌpa kaawe tiiame noꞌo uumia neꞌnewakao, ki tewayamenia aachin tiiamekamera noꞌo uumiao. Ahjaka yasitosaania, Riosikamera yorakeka yasitomania, Riosiwichio epeche taakiamechitia itipipuawichio.
\v 23 Mukisaania, Riosie Weratiamechi ahjama yasimerinia, puꞌkakamera uusania kaawe enemiinia.
\v 24 Nape waꞌa tiame noꞌo inatoio, amochi inataniachio, aamo ahjama itipiniakameraa, epeche kaawepua.
\v 25 Waꞌa teesoo Riosichi paparapa noꞌo ahjamiaopua pehjio, aamo kuꞌika yasitonariamenia ohso kaawe, puꞌka aamo Riosichi paparawao, aamo waminasinariapa, epeche kaawe aamo teetomichiopua Eesusichio, taꞌiria mochitoka Riosie Weratiamechio.
\v 26 Waꞌatiao eenechi amochi noꞌo iinuetare eeméa, peereso noꞌo kahtioio, maꞌchipatioiopua, waꞌa aamo ahjama noꞌo kahtioopua, tísia kaaweruma nayewapuawichiopua Riosie Weratiamechi simiyameo.
\p
\v 27 Neeea aamoo, iꞌkache aamo teꞌtereka mochitojeramepua: kaawe aamo eꞌreka mochitowa, kaawe aamo nakika mochitowa, yooma aamoo Eesusi Riosie Weratiameo, taamo mochijerachitia. Waꞌa teꞌtereka mochitopuapua, waꞌa aamo mochikachi noꞌo eenachisioio, ki noꞌo waꞌa eenakooio, eemea waꞌapi teꞌteretopuapua. Nape ki waꞌa simikaionia, kaawe aamo nayewaniame inamunariamenia, kaawe aamo uuka mochitowa tuuwame, ki seꞌwika nokisio tuuwame, Riosi tehkiwachi nokisiwao, waꞌa tiiao, muuwaeme tiꞌtijoe ooweru tiameo, Eesusichi paparamichiopua.
\v 28 Kaꞌte seewemitia eemea aamo seepurawao, aꞌchikoi aamo yoramio tuuka mamajochoio; ohsotia oisa teꞌteretopuapua, kiisi suuwe erapaka nayewasikao, Riosi kaaweruma tuuyewario. Puuu aamo seepurawaa aamo momojochamea, aapoekamera kokosapuai waꞌa chaachapamepua, ki uukamekapa puuua Riosi chiiao, Riosie Weratiamechi simiyame aamo nayewatuao. Nape eemea Riosi kaaweruma tuuyewari uukamekapao, newipameripua Riosi kokosarichio.
\v 29 Eemea Riosie newipatepuamekapaopua, kaawe eꞌraka nokisipuapua yooma aꞌchi tiame aiwasiaiopua Eesusiwichio nokisiwachio.
\v 30 Waꞌa tiiachiopua teemea, Riosi soontarora teemea, Riosi ahjama Satanasi puipanareka nasiwaniachio. Eemea tetewikamepapua noꞌoo, aachin teeka noꞌo tísia utewaeme tekipanamekopua Riosi tehkiwachio, ehpeoi waꞌapitia noꞌo utewaeme teetome, inamuamepua, neeea noꞌoo iꞌwa peereso kahtiaiopua, kiisi toaka simitekaopua, Eesusichi simiyame masitekao.
\c 2
\s Eesusi ahpo waꞌapi tesiwataria; waꞌa ikisa teꞌta weruma teeremichio weratiame
\p
\v 1 ¿Ihtana erakoame eemea Riosie Weratiameeo, oisa erapame eemea pukaeo? ¿Aamo Riosie Weratiame aamo nakiyao, kaawe aamo erapatiameko erakoame eemea iikachio itapiti ihta aiwaio? ¿Amochi kuꞌika yasitoameko erakoame eemea Riosie Weratiame Riosiwarirao? ¿Pichiwari tísia nakika tesiwewa erakoame eemea, aaataoi aamo piirechio?
\v 2 Waꞌa teꞌteriame enesaa eemea, noꞌo ahsieme kaawe eratepuapua, yooma puꞌka yooraka, yooma puꞌka waꞌa tiiame erakoka mochitoka, kaawe aamo ahpo nakika mochitoka, piiripi waꞌapi erakowari nokisika, Riosie Weratiameche yorakesikache.
\v 3 Eemea kaꞌte yoramitiapua ihtaoio, aamo epeche weruma tiiame eraniameo, aamochewichio yorapua eraniameo; ohso kaawe eemea aamo piirechio, epeche weruma tiiamechitia teteipuapua, ki amochitia.
\v 4 Aaataai eemea ki aamoche kaawe eꞌrewa iꞌyapuapua, ohso kaawe aamo piirechiopua, kaawe eꞌrewa yasitowa iꞌyepuapua, kaaweche yorakewa teetoka.
\p
\v 5 Eemea, Eesusi Riosie Weratiame teꞌta inatariachitia, inataka mochitopuapua.
\v 6 Puuu Eesusia, keꞌchu tijoe tijoetuaio, ki ahpochewichio inatariamepua, ohsotia puuua, taamowichiokamera inatariamepua tiamé.
\v 7 Pukaepa ki ahpo waꞌinarepua ahpo tisiwari Riosiwarichi itipimiao, ohsotiakamera puuua ahpo tisiwarichi kuꞌitapi poanatukao, tijoekamera tijoetumio eraparepua, iꞌwa weeechio tijoe weerewaraeme enepaka, tomochitiao puuua, tijoe naawaka. \fig |191-cn01743B.tif|col|||Riosia Eesusi tijoetukame.|2:7\fig*
\v 8 Neipao tijoetusaapa puuua, epeche nuꞌuti tiiame ahpo iintaparepua pehjio, ahkasi ahpo mukiwachisi tesiwatakao, tísia suwepori tiiame ahpo yorapuawichio ikitewakao.
\v 9 Waꞌa iintoriawichioo ahpo Taanao, apoe Eesusi Noonora tewekachi kahtiame teꞌta Riosia, yooma teꞌta weruma iyoriwa teerepaka weerarepua, yomatiame tatakoriniame newipaterachitia weeraka, puꞌkao Newipateri teewaka, puuua Eesusi cheeka chaniwame.
\v 10 Pukaepa ihji teewaraa ki nuꞌuti iyoriwa tiiamepua, yomatiame ahjakamea teꞌta yoorewa teerepuame tiiarieme, ahkasi yomatiame tewekachi ahjario, ahkasi yomatiame weeechi ohjoeme ahjariopua tiame, waꞌa ikisaopua tiameo, wehtere ohjoeme ahjariopua tiame.
\v 11 Waꞌa iintokame Riosia Eesusichio, yomatiame Riosio ahjakame enepateriao, Eesusikamera teꞌta weruma iyorimichiopua, teꞌta ahpo ki nuꞌuti Paamirachitia tetewaka. Waꞌa tiiachio puuu Eesusi teꞌta iyoriniameo, teꞌta taamo Noono Riosi, iyoriniame enemichiopua tiame.
\s Riosie Weratiamechi paparamea, tajayamechitia mochitoamepua
\p
\v 12 Waꞌa teetoachipa aamo tísia noꞌo nakika yasitoaa, eꞌwaka mochitoameraa Riosi tuuyewario, waꞌapi teetoka mochitopuapua, aamo ahjama noꞌo kahtioio, ki aamo ahjama noꞌo kahtioiopua; nape ki aamo ahjama noꞌo kahtioo, epeche iyorika mochitopuapua noꞌo eꞌwejerao. Eemea kaꞌte weruma aamo erakoka mochitomitiapua, eemea eeyowa eꞌreka aamo mochitopuapua aamo ki kaꞌkarumachi ruhjipuao, Riosia aamoo, waꞌa teeka aamo neesetomichio newipatekamepua.
\v 13 Riosio, amochi teetoamekopa ahpo Riosiwarie kuꞌisikao, puuua aꞌchitiaoi ahpo yorajera aamo yomachioopua.
\p
\v 14 Kaꞌte nekamuchiameche enemitiapua, ihtaoi aamo yoorao; kaꞌteoi aamoche kaawe tiiameche eramitiapua.
\v 15 Waꞌa teꞌtiame enesaa eemea, kaaweruma aamo teꞌteretowame tetewitemamua aamo wahjachio, waꞌa teꞌteriame aamo enesoo, ki aaata aamo ki kaawe teꞌterio chaachapamapua. Eemea soꞌpori tajayamechitia mochitomeripua, ki kaꞌkaruma mochikachi tukaparichiopua, aamo teꞌta kaꞌkaruma teꞌteriaéo.
\v 16 Riosi kaaweruma tuuyewari weemera ahjari naewae, uutapasipatepapua puꞌka ki kaꞌkaruma tiꞌtijoerichio, tukaparichi teꞌtereka ohjoemeopua pehjio, maꞌchiame tetewimichiopua, weemera ahjarichi pooeo. Waꞌa aamo teꞌteresoo, Riosie Weratiame eenoio, kihtawichio noꞌo tehkiwa amochi iintorio eramania.
\v 17 Nape iꞌka amochio kaaweruma Riosi tuuyewariwichio meripuaio iꞌwao, Riosi oowewarichitia meritiaa, kaawe eꞌramenia puꞌkawichio meritiao, naneꞌriapa aamo noꞌo nayewaturiao, kaaweruma machenariopa Riosichio, aamoopua kaꞌkaruma tekipaname eneriopa tiame Riosichio. Waꞌa aamo teꞌtereriopa aamoo, tísia kaawe eꞌramiinia amochio, puꞌka amochi noꞌo kaawe eꞌra, noonowiriopa.
\v 18 Waꞌachitia noꞌoo amochi kaawe eꞌriachitiao, waꞌachitia eemeai, kaawe erakoka teꞌteretoka mochitopuapua Riosi tehkiwachio, kaꞌkaruma aamo tekipaname erakoka amochio.
\s Timoteo, Eepajorito tiame nayewaniame
\p
\v 19 Ahjachi eꞌraninia noꞌo Paamira Eesusichio kuꞌwe noꞌo aamo mochikachi uhjuremiaopua Timoteoo. Timoteo waꞌa noꞌrasa eenechi enasoopua, tísia kaawe eramania aamo naneꞌriapa, aachin teꞌtereka aamo mochikoo.
\v 20 Ki aaata piirechi iinuemenia piiripioi, teꞌta noochitia inatameo, aaatae aamo aachin teeka mochika naneꞌretemiao.
\v 21 Aaataai wahjachia, ahpoche kaawe teerewawichio iꞌyamepua, ki Riosie Weratiamechitia erakoamepua, Eesusi Riosi Taanarachitiao.
\v 22 Nape Timoteoo naneꞌriame eemeapa noꞌoo, tísia noꞌo kuꞌika yasitoriamekopua, puꞌkao neeea noꞌo taanachitia tetewamepua, puuua teꞌta kaawerumache yooraka yasitoamekopapua.
\v 23 Waꞌa tiiachipa Timoteoo neeea, aamo uhjuremo orapakania, nape neeea pehjio, puuyemania aachin teeremio noꞌo peereso kahtiao, noꞌo kuꞌwe maꞌchipapuamekooio, tehpesi noꞌo teerepuamekooipua peeresoo.
\v 24 Aꞌchitiaoi neeea, ahjachi eꞌramenia Riosichio, kuꞌwe noꞌo maꞌchipapuamekopua iꞌwa noꞌo peereso kahtiaio, waꞌa tiiachionia, maꞌchipatiaapa neeea iꞌwa peereso kahtiaio, nooe waꞌa siimania aamo neꞌnemiao.
\p
\v 25 Nape waꞌatioi, Eepajoritoo kuꞌwe waꞌa aamo uhjurekemo oꞌrania, aamo mochikachio eenechi noꞌrapuka. Puuua teꞌta ihsikamepua noꞌo tehkiwachi kuꞌikao, puꞌkao noꞌo seekarewachitia yasitomichiopua noꞌo kuꞌikao, yooma ihta noꞌo nakiya ihsikao, puꞌkao aamoe waꞌapi noꞌo uhjureria noꞌo kuꞌika yasitomichioopua iꞌwao.
\v 26 Apoe puuu Eepajoritoa ki ahjame eꞌramepua aamo tetewinariao, yooma aamoo puꞌka tísia kokorio tuuwa inamukapao, tísia yuuwesiriopa weeka inataka.
\v 27 Pichiwa tísia kokorekamepua kokoriao ahkasi kiiya mukiwachisi, nape ehpeo yachapakamepua Riosieo, Riosie tesiwa eꞌrepariopa puꞌkao. Waꞌa iintokao Riosia, ahkasi noꞌooi yuuwesiao, kaawe noꞌo erapatekamepua tesiwekao, kihta noꞌo epeche noꞌo yuuwesimichiopua waꞌasi, iꞌwa noꞌo peereso aiwaka kahtioio.
\v 28 Pukaepa yaapiti aamo uhjuremo oꞌrania Eepajoritoo, aamoo eenechi tetewapao, kaawe erakomichiopua waꞌasi. Aamoo kaawe erakoka mochikopa saukame eenariopa Eepajoritoo, neeeai kihta yuuwesimapua waikao, aamo tísia yuuwesia eꞌrakaopua, Eepajorito kokoreriao.
\v 29 Waꞌa aamo mochikachi enasopa, kaawe eꞌreka asipupuapua puꞌkao, taamo poonichitia tetewika, kaaweruma Riosichi tekipanamekopua. Puꞌka waꞌa teꞌtiameo, aaataai tiꞌtijoeo ooweruoi tiameo, kaawe eꞌraka uuka tetewipuapua;
\v 30 ihji Eepajoritoa ahpo kokorewaeo, kiiya mukukamekopapua, Riosie Weratiamewichio tekipanakao. Ihjia noꞌowichio ihsikao, tísia tesiwa ihsikamepua noꞌo kuꞌisikao, ahpo ahjario tísia maaporichi teeretokao, eemeo kaꞌchi iika ki aamoe noꞌo kuꞌimia teereriaopua, mehka mochikamekapa eemea.
\c 3
\s Kehkisa ki nuꞌuti nateyame Eesusichi paparaniameo
\p
\v 1 Ehpeo Eesusichi simiyame aamo nayewemania, aachin teeka ki nuꞌuti nateyamekopua Eesusichi paparaniameo. Eeme noꞌo Riosichi poponiwaa pipiniwaa tiame, teꞌta taamo Teekora Eesusichio, peenia erakoka mochitomitiapua. Noꞌowichioo kaꞌchi tiio eꞌramenia eenechi waꞌapi aamo chaaneka aamo iyotepainia, noꞌoo waꞌapi cheeka iyoteriaiopua waꞌasio; ohsotiaonia iꞌkao, kaawe teeremeriko eꞌraninia amochio, ki natakepa mochitomichiopua noꞌo aamo chaaneriaopa waꞌasi, iꞌkao tísia kaawe tiiamekopua amochio.
\v 2 Kaawe aamo neesetoka mochitomitia eemea, puꞌka sapoorika erakoamekoopua aamo koꞌkonariao, puuu nanaarame seꞌwi aamo masitiamea, aamo tahpitika erakoamepua aamo koꞌkonariao, ahpo ki kaꞌkaruma seꞌwi masitiaeo. Puuua utewa aamo yooramepua aamo siichitepuwa nokimichioo, aamoo Riosichio, kaawe teꞌteriame tetewipuawichio tuukao.
\v 3 Puuu weerewachi siichitepuwa ahpo nokiwamea, ehpiamio kihta nateyamepua Riosichi kaawe teꞌterepuawichioo. Teemea ki taamo weerewachi siichitepuwaio, teemekamera teꞌta pichiwari siichitepuwatiameraka tiiamepua, puuu siichitepuwao teꞌta Riosi Riosiwarikamera taamo iikachi tehpuchaniamekamerapua taamo tatakoririao, ahpo Taana Eesusichiche taamo paparatioiche. Teemea kiisi ahjachi erakoamepua ihtaoi itapitichio, taamo tewekachi kahtiame Noonochi kaawe teꞌterepuawichioo, ki puꞌka Taanarachi paparaniameo, Riosie Weratiamechiche.
\v 4 Aaata isaeri tijoekapao, teꞌta ahpokamera epeche kaawe tetewiniame eꞌrame enesoopua Riosieo, neeea epeche tiiamekaitenia waꞌa tiiachio;
\v 5 neeea teꞌta isaerikaitenia, osanao taawe iꞌtoai noꞌo naawariachio, siichiteputetiamekapapua; neeea tiamekoo, Chaamini ojochiwarachi naawakamekapao, teꞌta isaeri tijoekaitenia tiame, isaerikopua noꞌo yayawao eureo nayewame. Neeeai Moise nuurari nokiwa yooreniawachio, tísia iyoriwa tiiame enekame neeea, ahkasi noꞌoo parisero masitari enepachisi.
\v 6 Pariserochitia enepasaapa neeea, tísia weemuka yasitokamenia nooe waꞌapioi, Eesusichi paparame tísia naꞌarewa ihsiwachio, ki kaaweruma maaeka Eesusichi simiyame masiteniameo, ki iyoriameko eꞌrapaopua Moise nuurário. Waika taawechiamio neeea, Moise nuurari eꞌwewa nokiwachio, aaataai kihta noꞌo terime tiiamekainia.
\v 7 Nape ehpeo neeea Riosie Weratiamechi paparamekapao, puꞌka Riosie Weratiameo noꞌo tatakoriria piipamichio mukuriopua puꞌkao, puꞌkakamera kaawerumako eꞌramenia ehpeo. Pukaepa ehpeo neeea, yooma puꞌka pukeri noꞌo ihsiriao, Moise nuurari nokiwachi simiyameo, puꞌka yoorewae yooraka noꞌo kaawe teeremio eꞌrariaopua Riosichio, puꞌkao neeea ehpeo, ipaka tetewamenia puꞌkao, kihta nateyamekopa puꞌkao.
\v 8 Ehpeo neeea noꞌo teꞌta Eesusi Paamirachio, ihtaoi ki epeche nateyame tetewamenia, ki Eesusichi paparaniamechio. Pukaepa neeea, yomatiame puꞌka teꞌta nateyamechitia noꞌo tetewaria pukerio, yomatiame ipakame neeeapa puꞌkao waꞌasi, kasarachitia, teꞌta Riosie Weratiamechikamera paparamiapa.
\v 9 Ehpeo neeea, Riosie Weratiamechikamera enepakapao, tewekachi kahtiamee Riosi noꞌo Noonoe, kaaweruma tetewiniamenia, ki pukerichitia noꞌo maaeria, Moise nuurari nokiwa iyoriniame yoorariwae. Waꞌa teeresoo, taamo teꞌta kaaweruma tetewiniame Riosieo, Riosie Weratiamechikamera paparaniamekamera puuua, kihta itapiti taamo waꞌapi kaawe ihsiwaepua.
\v 10 Pukaepa neeea ehpeo, teꞌta pewatiame noꞌo naawaemeko eranariamenia, noꞌo Eesusichi teꞌta paparawao, puꞌka Riosie Weratiameo noꞌowichio iintoriao, teꞌta pichiwa waꞌa iintorio eranariamenia noochio, puꞌkao kurusichi mukuria noꞌo piipamichioo, mukukai eenechi oijenariao. Neeea Riosie Weratiamechio, ahjama mukukameka eranariamenia, puꞌkao teꞌta kokosa aiwariaopua mukukao, teꞌta noꞌowichio aiwario inatakache yasitonariamenia noochio.
\v 11 Waꞌa noꞌo eꞌraeopua, ahkasi Riosi wahjipakame oijenatemiachisi puuyeka yasitonariame neeea, waika oijenatewachio, noꞌoo eenechi ahjatemichiopua tiameo.
\s Ahkasi Riosie kiapuame puuyetoka mochitowa
\p
\v 12 Waꞌa cheeka nayewaionia, ki noꞌo sewina erapateniameko cheeka chiiamenia, ki noꞌo seenekachi itapiti ki kaawe tiiameko yoorameko cheeka chiiamenia. Nape waꞌa tiiai neeea, utewaeme teetoame neeea, yooma Eesusi Riosie Weratiamee, kiatiame yoramichioo, ahkasi ahsieme noꞌo ahsepatiachisi.
\v 13 Neeea noꞌo Riosichi poponiwa pipiniwa tiamée, ki noꞌo sewina erapameko chiiamenia noꞌo Eesusichi paparaniamechio; nape yomatiame teꞌta natakepakache yasitoaonia, noꞌo pukeri oꞌiniao ki kaaweruma ihsiriao, utewaeme teetoka yasitoamenia yorasikao,
\v 14 Riosie Weratiame kiꞌyaria yoramichioo, ahkasi noꞌo ahsepachisi noꞌo Riosie kiapuao, noꞌo kiamiawichio nuuteka kahtiao, yomatiame taamo ahpo Taana Eesusichi paparaka mochitoame kiapuamewichioo.
\p
\v 15 Yomatiame teeme iwapakamea Riosie Weratiamechi paparawachio, waꞌa tiiame erakoka mochitomete teemea. Nape aaata eemea seenekachio, noochitia seꞌwi erapaka yasitoame enesaa Eesusichi aamo paparao, Riosi waꞌapi ahpo Riosiwarie amochi maꞌchiame erapatemapua, aachin teeka aamo peewanamerikopua, aamo Riosie Weratiamechi paparao, eenechi aamo kaawe teetomichiopua Riosichio.
\v 16 Pukaepa iꞌwa weeechi mochikaapa pehjio, Riosi Riosiwari taamo tuuyesiachiche, taamo seꞌwi wichiyame tuuyesoo, taamo Eesusichi pewatiame teꞌtereto paparao.
\p
\v 17 Noꞌo Riosichi poponiwa pipiniwa tiamée, noꞌochitia teetoka yasitoachitiao, waꞌachitia teetoka mochitojeraninia, wahjachi noꞌochitia teetoka mochitoameo, neꞌnetokaopua tiame.
\v 18 Neeea weesa aamo chaaniamenia waꞌasiopua aamoo, waꞌa aamo mochikachio muuwaeme waꞌa mochikamea, ki ahpowichio mukukame erakoamepua Eesusio, ahpowichio ihsiwa, kurusichi mukukamekoiopua puꞌkao. Pukaepania ehpeo, oꞌkewataka aamo chaaniamenia eenechio, Eesusi Riosie Weratiameo, ki ookapi seepurawa iinuemekopua ahkaoi.
\v 19 Neeea Eesusi seepurawaka teꞌteriameo, tesiwa eꞌriamenia puꞌkao, Riosieo ki teesa kokosa yorapuamekopua puꞌkao. Pukaepa naaraka yasitome eꞌramenia puꞌka waꞌa ikimiopao. Puuu Riosie kokosapuamea, waꞌa yorapuamepua, ahpo suwepori nokiwarichikamera ahpo riosiepariopaopua, puꞌka ahpo suwepori nokayaeopua, tísia ahpo oijeramepua, tísia ahpo teꞌta suuwe eramitioiopua. Puuua puꞌkache ki kaaweruma inataka mochitonariamepua, iꞌwa wehjoarichi nokiwameche puꞌsereka.
\v 20 Teemea ki puꞌka tiꞌtijoechitia inataka mochitoamepua, iꞌwa weeechiche puꞌsereniameo, ohsokamera teemea, tewekachi taamo ohjoremiakamera inataka mochitoamepua, waꞌa oꞌinia enameri puuyeka mochitokaopua, Apoe taamo Paamiraopua, Eesusi Riosie Weratiameo.
\v 21 Puuu Eesusia enasaapa, Apoe iintomeripua sewinatakao, iꞌka ehpe taamo weerewa mukuka pikayameopua, ahpo weerewaka tiiamekamera iintapaka, weerewa kaꞌchitia taawechi mukuyamera. Waꞌa taamo iintomeripua teꞌta ahpo utewarieo, yomatiame ahpo utewarie ahpo yeꞌkatere teerepateniameeopua, Apoeo teꞌta enasáa.
\c 4
\s Senepi taawechi peenia erakoniame taamo Paamirachi
\p
\v 1 Waꞌa taamo iintomerikopua Eesusi Riosie Weratiameo. Eeme noꞌo tísia nakiya Riosichi poponiwao pipiniwaopua tiameo, kaꞌte seꞌwika mochitomitia eemea aamo Eesusichi paparao, Apoe teꞌta taamo Paamirachio. Iꞌka aamo chaaniame neeea, tísia aamo tetewínariapa, eemekamerakopua noꞌoo, noꞌo teꞌta kaawe erapatiameo, puꞌka noꞌo amochi masiteriao, kaawe eꞌraka amochi uukamekopapua.
\p
\v 2 Neeea iꞌwa oꞌiniao, aamo Euoriao, Siintike tewaniameopua tiameopua waꞌa tiopachi mochikameopua ooka ooweruo, Riosichi kaawe erapajerani neeea, Eesusi Riosie Weratiamechi, ahpo pipiniemechitia mochitomichiopua.
\v 3 Muuu waꞌa tiopachi paamiratuamea, iꞌka Riosi tehkiwachi noꞌo ahjama anachatokameopua, aamo kuꞌijeraninia iꞌka ooka ooweruo, puuua Keremete ahjamao, yooma wahjachi Riosichi tekipaname ahjamaopua tiameo, tísia kaawe noꞌo kuꞌikamekopaopua puꞌkao, Eesusichi simiyame tuuyewari tuuyetokao; puuu yoomahkao, Riosi iyotaperichi iyopuka toatiame puuuapa teewarao, Riosi Ahjari Iyotaperichiopua.
\p
\v 4 Yooma eeme waꞌa Iiripo tiopachi mochitoamea, peenia erakomitiapua eemea, taamo Paamirachio, waꞌapiche teꞌteretoka eeméa. Eenechi waꞌapi aamo chaaniamenia, taamo Paamira Eesusichío, peenia erakokache mochitopuapua pukachio.
\v 5 Eemea aamo wahjachi kaawe eꞌreka tetewao, aamo tesiweka tetewameko tetewitepuapua puꞌkao, aamo wahjachioo, Apoe taamo Paamira tewekachi kahtiameo, maꞌchiame aamo tetewamekopapua puꞌka aamo wahjachi kaawe ihsiao, puꞌka Apoe Eesusi Riosie Weratiameo tewekakameo, waapi teetoamekoopua ahpo enamiao, epeche epecheche.
\v 6 Kaꞌte weeka inataka mochitomitia eemea, itapiti kaꞌchi ikime tiiachi, kaꞌchi iika machename tiiaio, puꞌkawichio kahtiame taamo tewekachi Noonoa, aamo kuꞌika machenatemichiopua, puꞌka tewekachi kahtiame taamo Noono, itanepuapua aamo kuꞌipapuawichioo, puꞌkao yooma ihta aamo tesiweka kuꞌiriopao, cheriwema kiapuapua puꞌkao.
\v 7 Waꞌa aamo teꞌteretosoo Riosia, taꞌiria aamo mochitowa aamo kiama Riosia iikachio, puuu taꞌiria aamo mochitowaa, ki nuꞌuti tiiame puuua, epeche tiiame ki taamo maayachitia. Puuu taamo iikachi taꞌiria mochitoniame Riosie taamo kianiamea, puuu tamochi ihsiamepua, ki taamo toitenaretekaopua Riosie Weratiameo, Apoe Eesusio. Pukae kaawe erakoame teemea taamo iikachio, Riosie Weratiamechi taamo teꞌteretoaopua, pirena kaawe eratoka pukachio.
\s Kaꞌkarumache inataka mochitoniame
\p
\v 8 Kajuyachiopa iꞌka noꞌo naewao, yooma aamo neeea, chaaniamepua: Eemea pichiwarichiche inataka mochitopuapua; ihtaoi yoorewa nakiwiameo yoorekache mochitopuapua; teꞌta ki ikicha tiiamerache, kaawerumache inataka mochitopuapua; kaꞌte suwepori tiiame inataka mochitomitiapua; teꞌta peenia tiiameche inataka mochitopuapua; eemea tiameo, kaawe wichiyamechiche inatapuapua; aaata kaawe iintokameo, kaaweruma iintorioche chaachapapuapua.
\p
\v 9 Eemea noꞌo aamo masiteriache, nokisipuapua, yooma aamo noꞌo ihsia tetewariache yooraka, yooma aamoo noꞌo cheeria inamuria. Waꞌa aamo teꞌteriame enesoo, Apoe Riosi aamo teꞌta taꞌiria yasiwa kiꞌyameraa, aamo ahjama yasitomeripua.
\s Paoro Iiripo tiopachi mochikame kuꞌiria
\p
\v 10 Neeea noꞌo Paamirachio tísia peenia eꞌramenia, aamoo eenechi noochi inatepariopa. Neeea ki noꞌo natakepatiameko cheeka chiiamenia, kaawechupena eemea noochi inatepariopa, noꞌoo, kuꞌiwa uhjurekaopua, ki ehpesi oꞌinia waꞌa eꞌraka mochitoaiopua, nape kaꞌchi iika noꞌo kuꞌime tiiapao, ki noꞌo kuꞌiriameo.
\v 11 Nape eemea, kaꞌchi erakopuapua ahkasi ehpe noꞌo kuꞌikaio, naneꞌriame neeea aamoo, kaꞌchi ikime eꞌrapa waꞌa teꞌtererioo.
\v 12 Neeea penipakamepua, kihta iinueka yasitowao, paarasateka yasitoawaoiopua. Yooma aꞌchitiaoi noꞌo yeꞌkakamenia ohjoewao: posakame yasiwao, chorowaka yasiwaoi, uꞌmatoame soparame iinueka yasitowaoi, tesiwa teereka yasitowameoi, itapiti noꞌo nakiwiaoio.
\v 13 Ihtaoi kaawe anachamenia Riosie Weratiame utewarieo, puuupua yooma ihta noꞌo nakiwia kiasiao, noꞌo ahjaka weritomichioo.
\v 14 Nape waꞌa noꞌo tiioio, tísia kaawe noonowikame eemea noꞌo kuꞌikao, noꞌoo teꞌta kihta noꞌo iinuekoio, noꞌo uhjurakaopua aamo noꞌo tesiwiao.
\p
\v 15 Neeea aamo Iiripo mochikameo, naneꞌriamenia eemeche noꞌo kuꞌiriamekopua, Maseronia oꞌinia noꞌo machenoiopua, wahjachi mochiwachiami noꞌo nayewatumia simirioio, iꞌka Riosichi simiyame kaaweruma tuuyewario. Waikami taawechio kiꞌtiainia aaata tiopae kuꞌiniameo.
\v 16 Tesaronika noꞌo kahtioio tiameo, kiisi noꞌo toakame eemea noꞌoo kuꞌipakao, weesa noꞌo uꞌyepakame eemea noꞌo kuꞌiwao, ihtaoieo noꞌo nakiya. \fig |192-CN02074B.TIF|col|||Paoroa kuꞌiwa ihkokenia, Iiripo oꞌinia Eesusichi paparamee.|4:16\fig*
\v 17 Neeea ki noꞌokamera teꞌta kaawe kuꞌijeramepua, neeea Riosieo, ohso kaawe aamokamera teꞌta kaawe kuꞌijeramepua, iꞌka noꞌowichio tísia kaawe noonowiriaopua.
\v 18 Ehpe aamo noꞌo uhjureriaeo, soparame iinuemenia noꞌo Riosi tehkiwachi teetomiao. Puuu eemea noꞌo uhjureriaa Riosiwichioo, tísia peenia tiiame puuua, itapiti peeniajuwa eꞌonichitia.
\v 19 Puuu waꞌapi Riosi noꞌo neesetoamea, ahpo teꞌta paarasarichi maꞌchipaka aamo kuꞌisimeripua, yooma ihtaoi aamo nakiwiasichioopua, napati taamoo, Eesusi Riosie Weratiamechi paparaka mochitoameo.
\v 20 Pukaepa teemea yoomahka, teꞌta kaawe nayewametepua Riosio, teꞌpa taamo Noono tewekachi kahtiameo, ahkasi ki wahjiamesi tiiameo.
\s Iyojura kajuyachi teepotari
\p
\v 21 Teepotemitia eemea, yooma puꞌka Riosie Weratiame Eesusichi, paparaka mochitoame. Iꞌwa noꞌo Riosichi poponiwachitia pipiniwachitia mochitoameapua tiamea, aamo teepotenapua tiameo.
\v 22 Waꞌachitia aamo teepotenapua tiameo, wahjachi iꞌwa Rooma mochiwachi mochikame, waꞌachitia Eesusi Riosie Weratiamechi paparame, ookapi puuua, iꞌwa Rooma yawichikarichi tekipanamea, aamo teepotenapua tiame.
\p
\v 23 Neeea nooeo, Apoe taamo Paamira Eesusi Riosie Weratiameo, teꞌta kaaweruma amochi teerejeraninia. Iꞌwasi ihji noꞌo naawesari iyotiaa. Kaawe erakoka mochitomitia.