\id COL
\h Koꞌkorosa Iyotepawa
\mt2 Paoro
\mt1 Koꞌkorosa
\mt2 Iyotepawa
\c 1
\s Teepotari
\p
\v 1 Kúíra Koorosa tiopachi mochikame. Neee Paoroa, Riosi eꞌrarichi Eesusi Riosie Weratiamee weratiamepua, Eesusi waꞌapi taamowichio iintoria nayewamichio. Pukaepa iꞌka iyojura iyotesa aamo uhjurenania, noꞌo Riosichi pooniwa Timoteo ahjama,
\v 2 yooma aamo Koorosa mochikameo, Riosie Weratiamechi teꞌte iyorika mochikameo, yooma waꞌa Riosichi piipakameopua poponiwa pipiniwaoopua tiame. Teemea yooma aamoopua tiameo, Riosi taamo Noonoopua, tísia kaawe teeretojeranipua amochio, iika yachapari kiamichiopua, taꞌiria aamo mochiwari kiamichiopua tiame.
\s Paoro Riosichi nayewa, Eesusichi paparamewichio cheriwema kiꞌyaka
\p
\v 3 Senepi aamo kaawerumawichio itayaiopua Riosichio, cheriwema kiꞌyame teemea taamo Riosio, Riosie Weratiame Noonorao,
\v 4 aamo waꞌa Koorosa mochikameo, tísia aamo paparame inamuamekapa, Riosie Weratiamechi Eesusichio. Teemea tiameo cheriwema kiꞌyamepua Riosio, aamoo tísia nakika mochitoamekopao, Riosichi ahpo ijinuwaka mochitoameopua waꞌao.
\v 5 Waꞌa teꞌteretoame eemea, teꞌpa tewekachi nuutewa inataka mochitoamekapa, aamowichio enemerikopua, Riosie aamo kiapuameopua nuutewao. Eemea puꞌka nuutewa puuyeka mochitoamepua, pukeri aamo oꞌineriachisi Riosi pichiwari tuuyewarichi paparakapao, iꞌka Riosi Taanarachi simiyame, aamo tatakoriria newipari aamo nayewaretiachi.
\v 6 Ihji waꞌapi pichiwari kaaweruma tuuyewari amochi tuuyetiamea, ahkasi yomatiame wehjoarichi mehtakamepua, epeche epecheche muuwepari teetoka, Eesusi Riosie Weratiamechi paparasiameo. Waꞌachitia ikiyame eemeai waꞌa aamo mochikachio, Riosi pichiwari tuuyewarichi inamukapao, epeche epecheche muuwepaka Eesusichi paparasiameo, naneꞌrekapa eemea Riosio, ki nuꞌuti aamo nakiyai teereriopa, aamo tatakoriria cheriwemio erapariopa tiameo.
\v 7 Iꞌka tuuyewari aamo uꞌyetokamea, Epajarasi iintokamepua, puuu taamo ahjama tekipanakame, taamoeo tísia nakiya. Puuua aamo mochikachi kahtiaio, kiisi seꞌwika aamo masitekamepua, Riosie Weratiamechi simiyameo.
\v 8 Apoe iꞌwa enasaopua, yooma taamo tuuyekamepua, aachin teeka aamo mochikao, tísia kaawe aamo nakika mochika.
\p
\v 9 Puꞌka taamo naneꞌretewa uꞌyepatiachisi waꞌanao, ki toayame teemea Riosichi itaka aamowichioo, Riosio ahpo Riosiwarieo, ahpo eꞌra aamo naneꞌretemichiopua, yooma ihta pahtewari machiwari aamo kiamichiopua, apochi simiyameo.
\v 10 Waꞌa tiiame amochi iintosoopua Riosio, Riosi nakiyachitia mochitoame enemapua; waꞌa nokisikame eemea tiameo, kaaweruma taakeri noonowikame enemapua, Riosi kaawe eratewakamera, yooma ihta machipakamekapapua Riosichi simiyameo.
\v 11 Teemea Riosio itaniamepua tiameo, ahpo teꞌta peenia tiiame utewarieo, aamo utewatesimichiopua, aamoo puꞌsereka teꞌteretomichiopua, anachasika aamo aꞌchikoi tiame ikiyaiopua.
\v 12 Teemea taamo Noono tewekachi kahtiameo, cheriwema kiꞌyamepua puꞌkao, puꞌka itapiti aamowichio katewiamekopua tiame itapiti nuutewao, ahpo ahjama teꞌta kaaweruma mochiwarichi mochipuame, teꞌta tajayame piiparichi mochiwarichi.
\v 13 Riosia taamo tukapachi mochikoi tatakorikao, taamo puuyanakamepua, ahpo Taana teꞌta nakiya yeꞌkarirachi enepatekamepua,
\v 14 ahpo Taanao taamo pejana mukuriopa taamo tatakoriria cheriwepuawichioo, Riosia teꞌta ahsieme taamo piipatekamepua.
\s Ihtanako Riosie Weratiamea, Riosi tiiarichi
\p
\v 15 Riosie Weratiamea, tewekachi taamo Noonokaitepua ki pusie teteiwame. Puuu tewekachi taamo Noonoa, iꞌka wehjoarichi eenakamepua, ahpo Taanachitia naawaka. \fig |193-CN01657B.TIF|col|||Eesusia, ahpo Noono tewekachi tiiarirachi oꞌinia, eenameko tuuna.|1:15\fig*Pukaepa Riosie Weratiamea, keꞌchu naayachisi oꞌinia ahjaka yasitoame tuuyamepua.
\v 16 Waꞌa tiiachiopa yooma ihta tewekachi iintuameopua weeechi iintuameopua tiameo, apoe Riosie Weratiame iintoriakaitepua enepatekao, Riosie Weratiameo apoe taamo Noono tewekachi kahtiamekai tiiámekapa, apoe taamo Noono ki pusie teteíwame. Apoe waꞌapi iintokamekaitepua tiameo, yooma ihta teteiwame, yooma ihta ki teteiwame tiaméo, yooma ihta yeꞌkariwaoi, yooma ihta yaꞌyawichiwaoi, yooma ihta paꞌpamiratuwaoio, yooma puꞌkao ahpowichio enejérameo.
\v 17 Ihji Riosi Taanara Eesusi tewaniamea, keꞌchu kihta kiꞌtioi ki tetewitiame ahpo Noonochi yasitoniamekaitepapua, Apoe ihsikamepua yooma ihta itapiti iintuame enepatekao, puuua tiameo yooma ahpo enepateriao, kiisi ikicha iintokamepua kaawerumachio, yooma ahpo enepateriao teꞌta kaawerumachiche teeretomichiopua.
\v 18 Puuu Eesusi waꞌapiapua, yooma apochi paparaka pirenatukameo, ahpo kiisi pusie weerewa tetewiniameka, tiiame teꞌteriame tetewamepua, Apoeo pukachio, moꞌoraka teetowachitia tetewiniame. Puuu Eesusi ki pusie weerewarachi pirenatutiamea, Riosi tioparakaitepua, ki pusie tetewiniamera. Apoe Eesusia tiameo, apoekamera ihsiamepua mukukai eenechi ahjaniameo, kiꞌtiamepua aaataai waꞌasi waꞌa tiiamea, pukaepa puuu Eesusia, yomatiame ihtaoi ahpo enepateria, teꞌta aampa tiiamepua.
\v 19 Riosia ahpo teꞌta kaawe eꞌrachi, yomatiame ahpo Riosichitia tiiao, ahpo Taana Eesusichi yasipakamepua.
\v 20 Riosia tiameo yomatiame ahpo tewekachi iinuekaopua, weeechi iinuekaopua tiame, ahpo Taanachi taamo ahsieme piipatenarekamepua, taamo ahsieme choꞌwekaopua taamo tatakoririao, taamoo teꞌta kaawe teꞌteremichiopua apochio. Waꞌa tiiame iintore Riosia ahpo Taana taamowichio iintoriaeo, taamo tatakoria Riosie kokosapuame, pejanaka kurusichi mukuriaeo.
\p
\v 21 Eemea pukerio, seesenuka teꞌtereriaipua Riosichio seepurawarachitia, itapiti ki kaꞌkaruma yooraka ohjoekapao.
\v 22 Nape ehpeo Riosia, ahpo Taanara aamowichio ahpo weerewachi aiwariaeo, aamoo kaawe teꞌterepaterepua Riosichio. Waꞌa iintokame Riosi Taanaraa amochio, kaꞌkaruma aamo neꞌnetenariapapua ahpo Noonochio, kihta aꞌchi tiiameopua ohchopario, teꞌta piipákame, aaataeoi kihta aamo chaanepo tiiaemeopua.
\v 23 Nape ahpo Noonochio, waꞌa tiiame aamo tetewitepuamewichioopua Eesusieo, kiisi seꞌwika Eesusichi paparaniame nakiyamepua, kiisi toaka yasitomeripua Riosi kaꞌkaruma aamo tuuyewari nayewetiameopua, itapiti Riosie aamo kiapo tuuriache inataka yasitomerimua. Puuu waꞌa tiame Riosi cheeriaa, yomatiame wehjoarichi nayewatupo tuutiamepua, Riosi Taanara Eesusieo. Neee Paoroa tiameo, puꞌka nayewatuka kuꞌika yasitoamenia.
\s Paoroe Riosi tioparawichio tekipanawa, ki pusie teteiwame
\p
\v 24 Neee Paoroa, ahkaoi aamo mochiwachiami Eesusichi simiyame nayewatuka aiwakamekaio, aꞌchitiaoi aiwaka yasitoainia, taꞌiria itipiame neeea, puuu Eesusi iꞌwa weeechi oiyame enesaapua pehjio nayewatukao, iꞌka noꞌo aiwa nayewatuka aiwamii puuua, puꞌka aiwari aiwameri teereria, aiwatoka aiwame neeea, Eesusichi simiyameo. Puꞌka yooraka aiwaka yasitoame neeea, Riosi tioparawichio tekipanaka, puꞌkao ki pusie teteíwame, Eesusi weerewara tewaniame.
\v 25 Neeea puꞌka Eesusi weerewarachi teꞌteriameo, teꞌta maꞌchiame simiyame masitemichio weratiamenia, Eesusichi simiyameo.
\v 26 Iꞌka Eesusichi simiyameo Riosia, ehkoriami oꞌinia noriwi teewereriaipua pehjio, nape ehpe waanamio Riosia ahpo ijinuwa enepatesiao, maꞌchiáme tuuyesiamepua puꞌkao.
\v 27 Riosia waꞌa iintoamepua yooma ahpo piipateria ijinuwachio, teꞌta naneꞌreka mochitomichiopua iꞌka teꞌta peenia tiiame yooma ihta Eesusichi tiameopua, puꞌka taamo Noono Riosio yomatiame tiꞌtijoeriwichioopua ahpo tiia maꞌchitameo, isaeri tiꞌtijoeriopua ki isaeri tiꞌtijoeriopua tiamé. Puuu Riosi maꞌchitaa ihjipua: Eesusi Riosie Weratiame amochi yasitoamepua ahpo Riosiwarieo, puꞌka tísia peeniatiame ahpo mochiwarichi mochipuame, aamo inatapatesiamepua. Ihjipua teꞌta taamo Noonoo, teꞌta ahpo pichiwataa.
\p
\v 28 Teemea, yooma Riosi naꞌnayewaturaa, iꞌka Riosie Weratiamechi simiyame nayewatusiamepua tiꞌtijoerio, ahkaoi mochiwachiami tuuyesikao, kiisi wehchi ipaka tetewimichiopua iꞌka tewekachi kahtiame taamo Noono taamo masitetiao. Teemea iꞌkao, teꞌta peenewari machiwarichi teetoka masitiame teemea, puꞌka taamo masitiao tísia kaawe pahtepuawichiopua, yooma ihta Eesusichi simiyameo. Teeme puꞌka waꞌa tiiame masitekao, tísia kaawe teꞌteremichiopua Riosie Weratiamechio.
\v 29 Puꞌkawichio neeea utewaeme tekipanamenia Riosie Weratiamechio, yomatiame teꞌta utewarie noꞌo teeretotiao.
\c 2
\p
\v 1 Neeea noꞌoo aamo naneꞌreka mochitojeraninia, aachin teeka tísia utewaeme tekipanakamekopua waꞌa kahtiaio, aamo Koorosa mochikamewichioo, yooma waꞌa Raoriséa mochikamewichioopua tiameo, yooma wahjachi noꞌo oiyachiamio ki noꞌo tetewamewichioopua tiameo.
\v 2 Waꞌa tiiame tekipaname neeea, yooma aamowichioo, aamo iikachi oisa erapamichiopua, napati eeme aamo kaawe nakika mochitoka. Waꞌa teetoamenia tiameo, epeche ahsieme aamo pahtiame enepamichiopua, puꞌka Riosi ki ehpesi oꞌinia noriwi teereriameopua pehjio, puꞌkao yooma Apoe Riosie Weratiamechi simiyameo.
\v 3 Ikachi simiyame teꞌta naneꞌreka mochitosaa eemea, teꞌta pahtewari paarasatiame enemeripua, teꞌta peenewari machiwarie nokisika.
\v 4 Neeea iꞌka aamo chaaniamenia, iꞌka waꞌa aamo teeresoo, aaataai peenia cheeka aamo wihkuenarioio, kaꞌchi iika aamo wihkuepuawichiopua.
\v 5 Neeea, ki nooe waꞌa kahtiainia, aamo ahjama waꞌa kahtiaitenia noꞌo inatarieo. Peenia eꞌrame neeea Riosi nakiyachitia teꞌtereto tuuopa, teꞌta pewatiame mochito tuuopa Riosie Weratiamechio, pukachi ahjachi teꞌta paparameko tuuopa.
\s Weemera teerewa mochipuame Riosie Weratiamechi
\p
\v 6 Waꞌapitia pukeri oꞌinia aamo Riosie Weratiamechi paparariachitiao, Apoe Eesusi aamo Paamira uuriachitiao, puꞌkache eꞌweka mochitopuapua, pukachiche ahjachi paparatoka.
\v 7 Pukachio eemea teeresi naawaeka mochitopuapua, pewatiame naawaeka Eesusichi aamo paparario, Apoe Eesusi teꞌta aamo masiteretiachitia. Eemea aamo Noono tewekachi Riosio, cheriwema kiꞌyakache mochitopuapua, apoe iintoriopua aamowichio tísia kaawe iintokao, ahpo Taana Eesusichi iintokaopua.
\p
\v 8 Kaꞌte aamo toimitia aaata aamo koꞌkomichioo, aaata aamo ki pichiwaka nayewesoopua Eesusichi simiyameeo, aamo wihkueka nayewenaresoopua. Puuua oowera iꞌka weeechi tiꞌtijoeri nokiwameche inatamepua, ki ehpesi oꞌinia waꞌa nokiwame. Puuu chaachapaa rooroikame masitewa puuua, kiisi Riosie Weratiame masitia, uuka chaachapame.
\p
\v 9 Puuu aaata waꞌa chaachapaka aamo wihkuenariamea, ki naneꞌrekamepua ihji Riosie Weratiame weeechi oikameo, pukachi weerewachi yasitoriamekopua, teꞌta tisiwari Riosi tiiarirao.
\v 10 Eemea teꞌta Riosie Weratiamechi teꞌteriapao, amochi teerepuame eemea Riosie nehpupari kuꞌiwario, kaꞌchi iika aamo wihkuepuawichioopua. Puuu Apoe Riosie Weratiamea, puuu waꞌapi tisiwarikai tiiapaopua, yomatiame ihta ki kaꞌkaruma tiiariopua, aampa teꞌta utewari tiiaemepua, yomatiame ki kaꞌkaruma nokiwari noonoraopua, ahpotere tiiamepua puꞌkao, yomatiame aampa tiiamepua yomatiame puꞌka utewarira tiiarirao.
\v 11 Eemea Riosie Weratiameeo, iikachikamera tehpunetiamepua, yooma ihta amochi ki kaꞌkaruma teꞌtereriao, ki maꞌchikamera weerewachi siichitepuwekao.
\v 12 Eemea paatoniaio, Riosie Weratiame ahjama mukukameka ijikikamepua, ahjama wetemajitiamechitia; waꞌa tiiachio, neerochi oꞌinia puuyapaio, eenechi ahjakameka ijikikamepua weemera ahjarichi, Eesusi ahjameo. Waꞌa ijikikame aamo tetewame Riosia, Riosi teꞌta utewarirachi paparakamekapa, ahpo Taana oijenateriae, teꞌta ahpo utewarirae.
\v 13 Eemea pukerio, poanachi teꞌtereriaipua Riosichio, aaata wahjipakamechitia Riosie tetewiwachio, aamo iikachio pehjio eemea, ki Riosie tehpuneniaiopua pehjio aamo tatakoririao. Nape ehpeo eemea, yooma tehpunetiamekapaopua ki kaawe aamo teꞌtereriao, weemera ahjari kiatiamepua, yomatiame aamo cheriwekekaopua aamo ki kaawe noonowiriao.
\v 14 Riosia yooma ihta ahpo nuurari taamo wenejiao, yooma waꞌasi werapakamepua puꞌkao, taamo tatakoriria wenejiwa wikirieriaopua, kurusichi raositepakaopua puꞌkao, ahpo Taana Eesusi mukiwarieo, ahsieme kajuka netetepakao.
\v 15 Riosie Weratiamea yomatiame tamochi ki kaꞌkaruma chaachapaka wenejitiameo, ahsieme kihta nateyame enepaterepua puꞌkao, yooma tiꞌtijoeri tetewachi kurusichi meritiameo. Waꞌa iintoka Apoe Riosi Taanaraa, puꞌka Satanasi kuꞌkuiwari taamo naꞌareka Riosichi wenejika mochitokameopua, tísia suuwe erapatekamepua puꞌkao, teꞌta newitoka chapisa peꞌpereso iꞌtokaopua, yooma tiꞌtijoeri tetewáchi suuwe erapateka newitokamechitiao.
\s Ki iꞌka wehjoarichi inataka mochitoamechitia inataniame
\p
\v 16 Pukaepa eemea iꞌka wehjoarichi mochikaiopua pehjio, kaꞌte aamo tooa wenejimichioo, aaata iꞌka wehjoarichi iyoriniame nokayameeo, iꞌka eee tiiame iyoriniamechitiao: ihta kooame iyoriniameoi, ihta itapiti iijirewa iyoriniame, ihta yoorewa teeweniameoipua pahkochio, meecha weemerachi simiyame iyoriniameoi, Riosi resipuniame taawechi iyoriniameoi.
\v 17 Yooma puuu itapiti iyoriniamea, kihta nateyamepua Riosichi kaꞌkaruma teꞌterepuawichioo, seꞌwi iyoriwakapapua. Teꞌta Riosiwichio iyoriniame nateyameraa, ihjipua: Riosi ahpo Taana Weerariakamera iyoriniame.
\v 18 Kaꞌte aamo tooa aamo wenejimichio, Riosi tewekachi kuꞌkuiwari tísia yoorewari teꞌterewameeopua, aaata ahpo tísia tesiwa teꞌteriame, eꞌretiameeopua. Puꞌka waꞌa tiiame nokiwa inatamea, apoe waꞌapi ahpo oisataka chaachapamepua, ahpokamera tísia machiyameko erakoka. Yooma puuu waꞌa ahpo oisataka masitiamea, kihta Riosi pichiwari tiiamepua, teesaoi ki Riosi inatá, oowera weeechi tiꞌtijoerichitia inatamepua.
\v 19 Puuua ki nakiyamepua Riosie Weratiameo, ahpo moꞌorachitia teetomichioopua, puuua kihta Eesusi weerewara itapitira enepanariamekapapua, teꞌta taamo Noono tewekachi kahtiame eꞌrariachitiaopua, ahpo Taanakamera moꞌorachitia teetomichiopua, ahpo Taana weerewachi ki pusie teteiwamechiopu.
\p
\v 20 Nape eemea, Riosie Weratiame ahjama mukukameka ijikikamepua, ki iꞌka wehjoarichi mochikamechitia inatamiapapua waꞌasi. Nape waꞌa ijikikamekaai eemea, ¿achini iikai eemea waꞌapi teꞌteretoamepua eenechio, keꞌchu aamo Eesusichi paparoi teꞌtereriachitiao, aamo ki kaꞌkaruma yooraria yooraka mochitoao? ¿Achini iikai iꞌka wehjoarichi nokiwame yoorewatere mochitonariame eemea, iꞌka eee tiame nuurari yachatiamechitiao:
\v 21 “Kaꞌte ihchepa pukachio, kaꞌte koꞌka puꞌkao, kaꞌte ahjae ihsi puꞌkao”?
\v 22 Yooma puuu nuurari kaꞌtetaniamea, iꞌka wehjoarichi mochikameche nuurari iyoriniame puuua, puuua Riosichi kaawe teꞌterepuawichioo, kihta nateyame puuua. Puuu iꞌka wehjoarichi nuurari yachatiame waꞌinewa iyoriniamea, kajumiite puuua waꞌasi, taamoo tewekachi Riosi ahjama mochipatetiopaopua.
\v 23 Puuu iꞌka wehjoarichi itapiti iyoriwa nokayamea, tísia Riosichi iyoriameka nokayamepua, tísia ahpo weerewachi kokosa yooramekapaopua, teꞌta Riosichi iyoriame ahpo eratekaopua tiꞌtijoerio. Nape puuu weerewachi ahpo kokosaniamea, kiisi taamo kuꞌyamepua ki kaꞌkaruma nokipuawichioo, itapiti ki kaꞌkaruma nokiwa weemuniameopua.
\c 3
\p
\v 1 Eemea Riosie Weratiamechi paparakapaopua, weemera ahjarichi oijenakameka iikamepua Eesusi Riosie Weratiame ahjamao, Eesusi mukukoi eenechi oijenatetioiopua. Pukaepa eemea waꞌa ijikikamekapao, aamo tewekachi mochikameka erakópuapua waꞌasi, Riosie Weratiame yawichituachi ahjama mochikameka erakoka, Eesusi ahpo Noono yawichiturachi kahtiachi, ahjamina ahjama yaꞌyawichituka.
\v 2 Puꞌkache epeche teꞌta nateyamechi inataka mochitopuapua, tewekachi mochipuameche, ki iꞌka weeechi aamo mochikamechitia erakoka.
\v 3 Eemea ehpeo, iꞌka wehjoarichi iintuame aamo ki kaꞌkaruma weemuka mochitoriao, mukukameka ikikame puuuapa amochio, weemera ahjarikamera uukamekapa eemea, Riosie aamo kiatiamekamera, Riosie Weratiamechi paparakamekapapua.
\v 4 Riosie Weratiamea puꞌka weemera ahjari taamo kiꞌyakamepua, pukae taamo ahpo tísia peeniatiame mochiwarichi mochime teꞌteriame enemichiopua, eenechi enasaopua taamo apechunamiao, ahpo ahjama mochiwamiachiopua.
\s Keꞌchu Eesusichi paparai teꞌteretotiame; Eesusichi paparaka teꞌteretoniame tiame
\p
\v 5 Pukaepa eemea iꞌwa wehjoarichi mochikaiopua pehjio, yooma toipuapua waꞌasio, mukukamechitia tetewipuapua puꞌkao, yooma puꞌka ki Eesusichi paparaniame nokiwameopua, iꞌka eee tiaméchitia: ihtaoi suwepori nokiwame, ki kaꞌkaruma ikotuwa nokiwame, aaata iinuekopao waꞌachi teerenarewa, ihtaoi itapitichi riosiwataniameoi.
\v 6 Yooma aaata iꞌkaka tiiame ki kaawe nokayamea, Riosi nekarewae kokosapuamepua, kiisi eꞌweka mochitoamekapapua, tewekachi kahtiameopua Riosio.
\v 7 Eemeai waꞌachi nokaka mochiriaipua, keꞌchu taamo Paamira Eesusichi paparaio.
\v 8 Nape ehpeo eemea, ki oosa waꞌa nokaka mochitopuapua, iꞌka eee nokiwamechitiao: aaata tísia nekakapa merinarewa, aaata naꞌara yorapuaichio naꞌara ihsiwa, naꞌara chaachapawa aaata naꞌarepuawichio, iinyatiame suwepori nayewaniame.
\v 9 Ehpeo eemea kaꞌte aamo ahpo wistuka mochitomitiapua, yooma toakamekapa eemeapao, aamo ki kaꞌkaruma nokariaopa, keꞌchu Riosie Weratiamechi aamo paparai nokariameo.
\v 10 Ehpeo eemea Riosieo, weemera tiꞌtijoe enepakamepua, ooweru tiameo, waꞌachitia. Amochio eemea senepi epecheche teetopamepua yooma ihta Riosichi simiyame machiwari, Riosi tiiameka teerepakamekapapua amochio, weemera teꞌterewachio.
\v 11 Waꞌa tiiame iintokame Riosia aaataoi tamochio, yooma Eesusichi paparamechiopua, peꞌyachi ki iꞌisaeri tiꞌtijoerikoio, peꞌyachioi siichitepuwatiamekooi ki siichitepuwatiamekoiopua, peꞌyachioi aaata Siintiani weeechi tiꞌtijoerikooi, peꞌyachi simaroni tiꞌtijoerikooiopua, peꞌyachi teekoemekooi ki teekoemekooiopua. Teꞌta nateyameraa, Eesusi Riosie Weratiame yomatiame wehjoarichi mochikame iintoriakamerawichio puuua; puuua yooma aaata tiꞌtijoerichi apochi paparakamechio, pukachi yasitonariame eneriame puuua, ahpo Riosiwarieo.
\p
\v 12 Riosia aaata ahpo Taana Eesusichi paparakameo, ahpo ijinuwa iintapakamepua, tísia nakiyamekapapua aamoo. Pukaepa eemea amochio, kaꞌkarumache tiiame tetewitetopuapua, eee tiiamechitia: aamo ahpo tesiwe erakoniame, kaawe eꞌraka ihkokeniame, kihta aamo weruma uuniame teerewa, ki eꞌraka cheeka nayewaniame, ki aaata nahsinepaniame.
\v 13 Aamo ahpo anachiame enepuapua; aaatae aamo wenejitiaeo, cheriwepuapua puꞌkao. Eemea taamo Paamira Eesusi aamo cheriweriachitia, waꞌachitia aamo ahpo cheriweka mochitopuapua.
\v 14 Teꞌta nateyameraa amochio, teꞌta kaawe aamo nakika mochitoniamerapua. Teꞌta aamo nakika mochitosaa eemea, teꞌta kaawe nokaka mochitomeri eemea amochio, taamo nakika mochitoniamekopapua, taamo piiripi pirenaturi iintapamepua, Riosie Weratiame weerewarachiopua, Riosie Weratiame weerewara ki pusie teteiwamechio.
\v 15 Taꞌiria mochitopuapua aamo iikachio, kaawe aamo teꞌterio erakokaopua, taamo Noono tewekachi kahtiamechio, puꞌkawichio apochi aamo paajutekame Riosia, piiripichitia enepamichiopua, ahpo Taana Eesusi weerewachio, ahpo Taana Eesusi weerewara ki pusie teteiwamechio. Riosi amochi iintoriao, kaawe eꞌrekache mochitopuapua, eepi cheriwema kiꞌyakache, aamo ahpooiopua tiameo, cheriwema kiapuapua aaataeoi aamo kaawe yoratiao.
\p
\v 16 Eemea amochio, amochi pochikameche teꞌterepuapua Riosie Weratiamee aamo masiteretiao. Aamo nanapawiachi napawisaapua Riosi iyorimiao, Riosie Weratiame teꞌta machiwari masiteriachiche teetowa masitepuapua. Ahkaoi aamo nanapawiachiamio, ihtaoi Riosi nayewame wikatapuapua, yoomahka pirena kaawe chaachapaniame Riosio, pirena aamo iikachi kaawe erakoka, cheriwema kiꞌyaka Riosio.
\v 17 Ihtaoi aamo chaachapaopua, ihtaoi aamo nokayaoipua tiameo, aamo Paamira Eesusichi teꞌta aamo teꞌteria inataka nokisipuapua, ahkaoi aamo nokisiachiamiopua. Kaꞌte natakepamitia eemea tiameo, aamo cheriwema kiamia Riosichio, Eesusi teꞌta kaawe iintoriawichiopua aamowichioo.
\s Taꞌpechi mochikamewichio tuuyewari
\p
\v 18 Eeme kukunara ujupiraa, aamo kukunawa neesetowatere teꞌteretopuapua. Waꞌa teꞌtereka mochitojereniame Eesusi Apoe Paamiraa, ooweru apochi paparameopua.
\v 19 Eeme ujupira kukunaraai, kaawe nakika mochitopuapua aamo uupio. Kaꞌte eꞌraka ihsiwa ihsimitiapua aamo uupichio.
\v 20 Eeme kukuchiwaraa, kaꞌte toaka mochimitiapua aamo yayawa eꞌwewao, waꞌa aamo teꞌterejeramekopua Apoe aamo Paamira Eesusia.
\v 21 Eeme yayawaai, kaꞌte ki taisa erapatemitiapua aamo tatanao, tísia nekaweka tuuyewaeopua puꞌkao, utewaeme eꞌraka yoorawa chaanewaeo.
\v 22 Eeme ahpo teeko seekaraka teeka mochitoameai, kaawe eꞌwaka mochitopuapua aamo teekoo. Nape pichiwarie eꞌweka mochitopuapua puꞌkao, taamo Paamira Eesusio aamo kaawe nokayame eꞌremichiopua aamo waꞌa teꞌteretoopaopua. Eemea waꞌa teꞌteremeripua, ki aamo teekoe tetewiniaiopua.
\v 23 Yooma eeme Eesusichi paparamea, yooma ihta aamo yooraopua tiameo, kaawe eꞌraka kaawe yorapuapua, aamo Paamira Eesusiwichioo, kaawe eꞌraka yorakiamechitia.
\v 24 Waꞌa erakoka mochitomete eemea, aamoo Riosio itapiti aamowichio nuutia kiamerikopapua. Pukaepa yooma ihta aaatawichio aamo yooraioopua, Eesusi Riosie Weratiamewichio yoraniameko erakopuapua, puuu Eesusikamerakopua teꞌta aamo Teekorao.
\v 25 Nape aaata ki kaawe nokakamea, ahpo ki kaawe nokariawichioo, kokosari aiwatepuamepua Riosieo, ki aaata epeche weruma tiiame tetewamekopua.
\c 4
\p
\v 1 Eeme tetekoraai, kaawe uuka mochitopuapua aamo seekarewachitia mochitiao. Kaꞌkaruma eenepuapua puꞌka ahjamao, kaawe eꞌerakoka kiapuapua puꞌkao, yooma itapitio ihtaoi nakiyao, naneꞌreka mochitoamekapa eemea, teꞌta aamo Teekoo, teꞌpa tewekachi kahtiamekoopua.
\p
\v 2 Eeme Eesusichi paparamea, senepitia Riosi nayeweka mochitopuapua. Ihtawichiooi nayewiaiopua Riosio, aamo eꞌra nayewepuapua puꞌkao, ki niꞌoka nayewepuapua Riosio. Riosio eemea, kaꞌte natakepamitia aamo cheriwema kiamiao.
\v 3 Riosio itanepuapua taamowichio, kaaweruma tiiame tamochi teetomichiopua, wahjachi mochiwachiami taamo masitemichioo, ahpo kaaweruma tuuyewari taamo kiꞌyaria taamo nayewatumichio. Ihji Riosi Taanarachi simiyame noꞌo nayewatuaa, Riosi noriwi teereriapua, ehpiamio taamoeo, yomachiami mochiwachiami maꞌchitapuawichiopua. Neeea pukachi simiyame nayewatuamekapao, iꞌwa peereso yachatiamenia.
\v 4 Riosichio noꞌo kuꞌiwa itaka mochitopuapua tiameo, noꞌo ahpo kaaweruma tuuyewario, maꞌchiame noꞌo masitemichiopua, ahkaoi mochiwachiami noꞌo masitesiachio, yooma ihta Riosie Weratiamechi simiyame noꞌo nayewatuachiopua, teꞌta Riosi noꞌo yorajerachitiaopua.
\p
\v 5 Eemea Riosie Weratiamechi simiyame masitiaiopua, aaata ki Eesusichi paparakameopua pehjio, kaawe peeneka nayewepuapua puꞌkao, kaawe eꞌreweka teeka masiteka, kihta kokosa erapuaichiopua aaatachio, aaata masiteme tiioo, kaꞌte waꞌatia uꞌmatotemitiapua.
\v 6 Muuua aaata nayewiaio, kaawe eꞌraka nayewepuapua puꞌkao, kaawe eꞌraka itipimichiopua puꞌkao; itapiti aamo iinatukesoo, peeneka nehjiapuapua puꞌkao.
\s Kajurachi teepotari
\p
\v 7 Waꞌa aamo uhjurenane aaata tijoe Tikiko tewaniame, apoe aamo tuuyemichiopua teꞌta achini teeka taamo mochika iꞌwao, aachin teeka taamo simitia Riosichi tehkio. Puuua Riosi tehkiwachio, tísia kaawe taamo kuꞌikamepua, pukaepa teemea puꞌkao Riosichio, taamo poonichitia tetewamepua.
\v 8 Iꞌka Tikiko waꞌa aamo uhjurekania aamo tuuyemichioo, aachin teereka taamo mochikao, aamo taamo naneꞌresaapa waꞌao, kaawe erakomichiopua.
\v 9 Waꞌa uhjuramenia tiame Tikiko ahjamao, Oonesimo tewaniame. Puuua, waꞌa aamo mochiwachi ohjoemepua, taamoo puꞌkao, Riosichi poonichitia tetewa, puuu ooka chaachapamapua aachin teeka taamo mochikaoopua iꞌwao.
\p
\v 10 Arihtako tewaniameai noꞌo ahjama peereso kahtiamea, aamo teepotenapua tiame. Marako tewaniame tiameai, aamo teepotenapua, puuua Wenawe paꞌchira taanara. Naneꞌriame eemeapa aachin teeka noꞌo tetewamekopua Marakoo; waꞌamahka aamo mochikachi enasoopua piie taawechiami ahkao, kaawe uuka tetewipuapua puꞌkao.
\v 11 Eesusi Uhto teewataniameai, aamo teepotenapua tiame. Ihjichepua paika iꞌisaeri Eesusichi paparakamea, noꞌo ahjama tekipanamea Riosiwichioo, tiꞌtijoeri paajutekao Riosi yeꞌkarichi eꞌenamichioo. Ihji paikaa, noꞌo tísia yuuwesioio, noꞌo kaawe erapateka mochitokamepua.
\v 12 Aamo teepotena tiame Epajarasi tewaniame, aamo ohjoekachi oꞌinia eenakame tiame. Ihjiai Eesusi Riosie Weratiamewichioo, tísia tekipanaka yasitoamepua. Ihjia aamowichioo, tísia itaka yasitoamepua Riosichio, aamoopua Riosichio, epeche kaawe teꞌteretoka mochitomichiopua, yooma ihta Riosi teꞌta nakiyachitia, yooma wahjachi aamo yorakeka mochitowachio.
\v 13 Epajarasio nooe waꞌapi tetewakamepua puꞌkao, tísia utewaeme tekipanaka yasitokamekopua aamowichioo, Raoriséa mochikamewichioopua tiameo, Eerapori mochikamewichioopua waꞌachi.
\v 14 Ruuka merikoai tísia kaawe nakiwamea, piirechi tijoe Reema tewaniameapua tiame, naꞌpahka aamo teepotenapua waꞌachi, yooma aamoo.
\p
\v 15 Eemea noꞌo teepotekemitiapua, Riosichi poponiwa pipiniwa tiame Raoriséa tiopachi nanapawiame. Niinja tewaniame oowitiameopua, noꞌo teepotekepuapua tiame waꞌachitia, yooma Riosichi paparame, ahpo taꞌperachi naanapawitiame.
\v 16 Eemea yooma iꞌka iyojura chiia iyonaka naneꞌresaopua, Raoriséa tiopachi mochikame iꞌyetopuapua iꞌkao, Raoriséa tiopachi mochikame iyonamichiopua tiameo, iꞌka noꞌo iyojurao. Waꞌa iꞌyetosapa iꞌka noꞌo iyojurao, Raoriséa noꞌo uhjureria iyojura Koorosa tiopachi upapuapua, waꞌa Koorosa tiopachi iyonapuawichiopua tiameo.
\v 17 Aakipo tewaniameo chaanepuapua eee chanikao: “Ahseparika kaawe teetopuapua, aamo Paamira Eesusi kiꞌyaria tehkichio, ahpowichio aamo yoramichio kiꞌyariachio.”
\p \fig |194-AP-14-14.tif|col|||Paoroa apoe iyotena, ahpo waꞌapi sekae. |4:17\fig*
\v 18 Neee Paoroa, nooe sekae iyoteka chiiamenia iꞌka noꞌo aamo chaaniao: Kaꞌte noꞌo natakepamitia eemea Riosichi itamiao, noꞌo iꞌwa peereso kahtioio, kaawe noꞌo neesetoka yasitomichioo. Neeea iꞌka aamowichio iyotewachiopua waꞌasio, taamo Noono tewekachi kahtiameo, aamo tísia kaawe ikiniame ikijeraninia. Waꞌa ikisaa kaawe enemapua. Cheriwema waꞌasi.