\id 1TH
\h Pahcha Teꞌtesaronika Iyotepawa
\mt2 Paoro Pahcha Simiyame
\mt1 Teꞌtesaronika
\mt2 Iyotepawa
\c 1
\s Teepotari
\p
\v 1 Kúíra Tesaronika tiopachi mochikame Riosichi poponiwaa, pipiniwa tiame. Kaꞌkaruma mochikare eemea, teemea iꞌwao kaꞌkaruma mochikamepua. Kaꞌkaruma mochisaa eemea teemechitia, tísia kaawe enemiipua. Wee, iꞌwa aamo uhjurenane itapiti aamo noꞌo nayewiao. Neee Paoroa, Siriwano ahjamao Timoteo tiameo, yooma waꞌa Tesaronika tiopachi mochikameo, taamo Noonochi teꞌtereka mochitoameo, iꞌka iyosi iyotesa aamo uhjurenania, yooma waꞌa tiopachio, Eesusi Riosie Weratiamechi paparaka mochitoameo. \fig |195-GR-lllh24n.tif|col|||Siriwanoa Timoteo tiame, Paoro chiia iyojura iyotena.|1:1\fig*Yooma waꞌa Riosi tuuyewarichi teꞌteretoameo, aamo iikachio neeea, taꞌiria mochitojeraninia, amochiopua tiameo, taamo Noono tewekachi kahtiameo, taamo Paamira Eesusi Riosie Weratiameopua tiameo, tísia taꞌiria mochitojeraninia, aamo tísia kaꞌkaruma neesetori, teewetokeka.
\s Tesaronika tiopachi mochikame, tísia Riosichi paparame
\p
\v 2 Teemea aamowichioo, senepi taawechi Riosi ahjama nayewaio, tísia cheriwema kiꞌyamepua Riosio.
\v 3 Teemea Riosichi nayewaio ki natakepame teemea, aamo tísia kaawe teꞌteretoaopua, Eesusi Riosie Weratiame tehkiwachio, aamo iikachio tísia kaawe erakoamekapapua, tísia paparamekapa eemea Eesusichio, tísia puuyetoka mochitoamekopua tiame, Eesusi tewekachi oꞌinia eenechi enamiaopua weeechio.
\v 4 Aamo taamo Riosichi poponiwao, taamo pipiniwaopua tiameo, naneꞌrena teemea Riosio, tísia aamo nakiyamekopua, aamoo tísia apochi paparariopa. Naneꞌriame teemea aamoo waꞌa teꞌteriopao, ahpo ijinuwa iintapariopua Riosio.
\v 5 Teemea aamoo, Riosi kaꞌkaruma chiia aamo nayewiaio, teꞌta pichiwari Riosi chiia aamo nayewiamepua, Riosi Riosiwario tamochi yasitopa, puuua ki taamoe waꞌapi inatariaepua. Eemea amochi eꞌenarioiopua, naneꞌriame eemeapa aachin teeka taamo amochi kaawe teꞌtereka mochiriopua, kaawe teeremichiopua amochio.
\p
\v 6 Kaawechupena eemea taamo Riosi kaaweruma tuuyewari chaachaparia, peenia erakoka ahjachi pichikerepua, tísia aiwaka mochitoaiopua, Riosie Weratiamechi paparapao. Puuu aamo aiwaka mochitoaa, Eesusi aiwariaka tiiame puuua iꞌwa weeechi oiyai nayewatukao, teemeai waꞌachitia aiwaka nokisiamepua, Riosie Weratiame nayewatuaio. Nape Riosia yooma amochi aiwatoachiopua, waꞌachi ihtoame Riosiai amochi yasitoaite ahpo Riosiwarie amochi yasitoko, yooma amochi pipiripichiopua.
\v 7 Eemea waꞌa teꞌteretoaa aiwaka anachakao, yomachiami Riosichi paparakamea naneꞌrekamepua waꞌasi, yooma Maseronia weeechiami mochikame, Aakaya weeechiami mochikame tiame.
\v 8 Eemea iꞌka Riosie Weratiame naawesario, eeme waꞌapi amochi uuriaa, yomachi iꞌtoriame eemeapa, Maseronia weeechiamio, Aakaya weeechiamiopua tiame. Eemea, ki waꞌamisiche iꞌtokame eemea Riosi tuuyewario, ahkasi epeche waanamisi iꞌtokamepua puꞌkao. Pukaepa teemea, ki nayewatumeri teemea waꞌa aamo ohjoriachiopua, aamoopua waꞌamiopua waꞌasio, nayewaturiopa waꞌasi.
\v 9 Puuua aamo ahpo mehkamisi iꞌyetoriopua iꞌka Eesusi kaꞌkaruma tuuyewario, aapoeo waꞌapi tísia kaawe erakoa aamo nayewamepua Tesaronika mochikameo. Puuu mehkami tuuyewari aamo iꞌyetoriaa, aamoo kaawe nayewamepua tiameo, taamo aamo Eesusichi simiyame iꞌyetoriao, tísia kaawe aamo noonowiriopa ahjachi tísia paparakao, tísia aamo Eesusichi paparapao, ahkasioi aamo itapiti riꞌriosiwa riꞌriosiereria ki ahjameo towariopa puꞌkao, teꞌta Riosi ahjamerachi paparamiapa, puꞌkakamera yorakeka mochitonariapa, ki waapisi iꞌtoka Riosi kaaweruma tuuyewario.
\v 10 Aapoeopua tiameo amochitiao, tísia puuyeka mochitoamepua Eesusi Riosie Weratiame eenechi enamerio, waꞌa tiiame tuuyetiamenia pukaeo. Puuu eenechi enameria, apoe Eesusi puuua apoe Riosikamera Taanara iꞌwa weeechi tijoetukame, Riosio puꞌkao, mukukoi eenechi oijenateria, puuupua teꞌta apoeo, taamo newipatiamea, Riosie tísia iinya tiiame kokosariepuachio.
\c 2
\s Paoro Tesaronika mochiwachi tekipanaria
\p
\v 1 Eeme waꞌapi noꞌo Riosichi poponiwa pipiniwa tiamea, naneꞌriamepapua taamo amochi tekipanariao, ki oowera kihtachi itipiriopua.
\v 2 Eemea naneꞌriamechi taamoo, Iiripo mochiwachi ajasirioiopua pehjio, tísia taamo naꞌaretiamekopua waꞌao, keꞌchu aamo mochiwachi eꞌenoiopua. Nape teemea tísia waꞌineka naꞌaretiai Iiripo mochiwachio, Riosia taamo kuꞌikamepua kihta seeweka amochi eꞌenamichioopua, waꞌa Tesaronika mochiwachio. Waꞌa aamo mochiwachio, tísia tehkikoi Eesusichi simiyame nayewatupuawichio pukeri taamo ajasirioio, kaawe nayewatukame teemea waꞌao, Riosie kuꞌipatiapa waꞌao, oisa erapatekao.
\v 3 Teemea waikao oisa erakoka nayewatukamepua waꞌao, taamo Eesusichi simiyame nayewatuao, teꞌta pichiwari chaachapamekapapua. Teemea ki aaata wisikuiamekapaopua, teꞌta Riosi pichiwari chiia pichiwaka masitekamepua aamoo.
\v 4 Ihji Riosi newipari tuuyewaria, Riosie eꞌretiame teemea amochi upamichiopua, amochi nayewamichiopua. Teemea iꞌka taamo nayewatuao, ki tiꞌtijoeri ahpo puꞌseriakamera kaawe erakomichiopua, Riosi puꞌseriakamera taamo erakomichiopua, Apoekopua taamo tewekachi kahtiame Noonoo, taamo inata tetewaka neꞌniamea. Pukaepa puuua naneꞌriamepua, taamo masitia tiꞌtijoerikamera puꞌserewawichio enesoo, apoekamera puꞌserewawichiooio.
\v 5 Teemea aaataoi ki peenia chaaneka uꞌyekamepua toomioi; ihtaoi taamo kuꞌipuawichiooi, kiamo itanekame teemea, Apoe Riosiai, naneꞌriamepua puꞌkao, pichiwa noꞌo chiiamekoo.
\v 6 Teemea amochio aaatachioio, ki taamokamera iyoripuawichio iꞌyakamepua,
\v 7 iinuekai teemea waꞌa tiiame taamo noonoimiao, Riosie Weratiamee ajawatiamekapa. Ohsotia teemea, kaawe eꞌreka aamo neesetokamepua, kukuchi yeeyerachitia ahpo tatana inatiamechitia.
\v 8 Teemea ki nuꞌuti aamo nakika mochitoamepua, Pukaepa teemea aamo mochikachi ohjoaio, ki iꞌka Riosi kaaweruma tuuyewariche aamo kianarekamepua, epeche tiiame aamo kianarekamepua pehjio, ahkasi aamowichio mukiwameoiopua, waꞌa tiiame nakiwewiame enesoo.
\v 9 Naneꞌriame eemea waꞌa taamo mochikoio, iꞌka Riosi kaaweruma tuuyewari aamo nayewiaio, teꞌta utewaeme tekipanaka iꞌyariamekopua taamo koꞌkomiao, kihta peterenariapa teemea amochio.
\p
\v 10 Teemea waꞌa aamo mochikachi mochikaio, kaꞌkaruma enekame teemea amochio, taamo teꞌta piipakame tiꞌtijoechitia tetewitekaopua waꞌa aamo mochikachio, kihta aꞌchi tiiame taamo nayewapuawichiopua, aaataeoi. Puꞌkao eemea aamoe waꞌapi tetewikamepua.
\v 11 Naneꞌriame eemea tiameo, taamoo Riosichi tatanachitia aamo uuka tetewiriopua, aamo itapitiwichio yuuwesirioiopua, kaawe eꞌraka aamo kaawe erapatesiriopa, aamoopua Riosichio, teꞌta oisa erapatesika.
\v 12 Teemea aamoo tiameo, kaawe eꞌreka aamo tuuyekamepua, teꞌta Riosi tatanarachitia aamo mochijerawao, Apoe Riosi waꞌapi aamo paajuteriopa, ahpo ahjama mochipuawichiopua, ahpo teꞌta tísia peenia tiiame yeꞌkarichio.
\p
\v 13 Eemea Riosi aamo paajuteria nakikamekapa, ahpo tísia peenia tiiame mochiwarichi mochimeripua, Riosi teꞌta yeꞌkarichi. Riosio aamo kuꞌiriopa pahtekao taamo amochi nayewatuao apochi eenamekoopua ki taamochi waꞌapi, cheriwema kiꞌyamepua Riosio, senepi taawechi. Pukaepa ihji Riosi kaaweruma tuuyewari pichiwa Riosichi eenamekapaopua, aamo iikachio yooma itapiti kaaweruma inisiamepua, yooma aamo pipiripichio, Eesusichi paparakamechio.
\v 14 Eeme Tesaronika mochikame Eesusichi paparamea, Uurea weeechi tiopachi mochikamechitia ikitiamepua. Puuu Uurea tiopachi mochikamea, ahpo waꞌapi weeechi mochikame iꞌisaerie, tísia aiwetetiame puuua, waꞌachitia eemeai aamo waꞌapi weeechi mochikameeo, tísia aiwatetiamepua.
\v 15 Ihji ehpiami iꞌisaeri paꞌpamuratuamea, Eesusi Riosie Weratiame meꞌyakamepua, teꞌta ahpo ehkoriami mochiriamechitia noonowiriachitia, Riosi naꞌnayewatura koꞌyakamechitia. Ihji paꞌpamiratuame Riosie Weratiame meꞌyakamea, kiisi kaawe eꞌretiamepua Riosieo, taamo waꞌineriamekopua puꞌkao, tiꞌtijoeri ki taamo nayewemichioopua Eesusichi simiyameo. Pukaepa, waꞌa nokaka waꞌinamekapao, ahkasi ahkaoi taamo muioipua Eesusichi simiyame nayewatumiao, taamo maꞌchi uhjurakame puuua, ki taamo nahkeka nayewatumichio ahpo mochiwachio.
\v 16 Puuua waꞌa nokaka taamo waꞌinarewaeo, kiisi taamo toakapua, iꞌisaeri tiꞌtijoerichi taamo nayewetumichioopua, Riosie ahpo newipatepuawichioo. Waꞌa nokakaopua ahpoo, epeche epecheche tatakoripamepua. Pukaepa Riosia tísia nekakaopua pukachio, ki nuꞌuti kokosameripua puꞌkao.
\s Paoro eenechi, Tesaronika tiopachi siminarewa
\p
\v 17 Aamo taamo Riosichi poponiwao pipiniwaopua tiameo, neipami aamo mochikachi puuyasaapa teemea, aamo eenechi tetewinareka mochitokamepua, aamo ijinatepaka mochitoamekapa.
\v 18 Teemea weesa waꞌa siimpanarekamepua aamo neꞌnemiao, nape neee Paoro epeche, nape Satanasia senepi waꞌa taamo siisimpanarioiopua, eepi taamo pejana weeweripakamepua, ki siimpapuawichiopua waꞌao.
\v 19 Ehpe taawechiamioi teemea tísia aamo tetewinareka mochitoamepua, eemekamerakopapua taamo teꞌta peenia erakotiameo, ki aaata kiꞌtiamekopua waꞌasi teꞌta taamo kaawe eratemeriopua. Eemea tiameo tísia taamo kaawe eratemeripua, Eesusi eenechi enasoiopua puꞌka ahjama mochikoio.
\v 20 Ejeꞌe amochio, waꞌa erakoame teemea, teꞌta pichikekamekopapua, taamo aamo nayewaturiao, Eesusi Riosie Weratiamechi simiyameo.
\c 3
\p
\v 1 Pukaepa waꞌa tiiachipa tísia aamo tetewinariapa teemea, tísia aamo naneꞌrenariapa tiameo, achini aamo teꞌteretoaopua Eesusichi aamo paparao, ki anachapakaopua waꞌasio, Timoteo aamo uhjurekame teemea tapanaramio, teemea Aatena mochiwachi itipikapua waikao, puꞌkao waꞌa noꞌramioio.
\v 2 Timoteo aamo uhjurekame teemea, pukachi aamo naneꞌrenariapa aachin teetoamekopua aamoo, Eesusi Riosie Weratiamechi aamo paparao. Ihji Timoteoa, kaaweruma tijoe puuua, taamo ahjama tekipanakame Riosichio, Eesusichi simiyame tuuyewatukao. Timoteoo amochi uhjurekame teemea, aamo pewatiame mochitonureka kuꞌimichiopua Eesusichi aamo paparao, aamo oisa erapatemichiopua Riosichio,
\v 3 kiisi nahsinepaka, anachaka mochitomichiopua ihtaoi Riosiwichio aamo aiwaka mochitoaio. Eeme waꞌapiai naneꞌriamepua waꞌa tiiame aiwaniamekopua, Eesusichi paparameo.
\v 4 Aamo ahjama mochikaio, waꞌa tiame aamo nayewakame teemea, aamo kokosa tiiame aiwamiaopua, yooma teeme Eesusichi paparameo. Waꞌa tiiame taamo ikisipo tuuriaa, kiisi wehchi wichikamepua, pichiwa waꞌa teetoniamepua amochio.
\v 5 Puꞌkawichio aamo uhjurekamekai teemea Timoteoo, naneꞌrenariapa neeea, achini aamo teꞌteretoaopua, Eesusichi aamo paparao. Neeea keꞌchu waꞌa uhjurai Timoteoo, majawiameai neeea Satanasie, aamo sewina erapatepuameopua, aamo waꞌa Tesaronika tiopachi mochikameo, Eesusichi paparameo.
\v 6 Nape ehpe waꞌa noꞌrariopa Timoteoo, kaawe erapakame neeea, kaawe aamo teꞌtereto tuuyopa Eesusichio, kaawe aamo ahpo nakika mochito tuuopaopua tiameo. Aamoo tísia taamo ijinatepaka mochito tuuopao taamo tetewinarekao, waꞌachi erakoame teemeai aamo tetewinariao.
\v 7 Teemea iꞌwao tísia aiwaio, tísia kaawe erapakamepua, waꞌa aamo mochikachio tísia aiwaka mochitoaiopua, pewatiame aamo mochito tuuyetiapa Riosie Weratiamechio, ahjachi paparakao.
\v 8 Waꞌa tiiame inamukapa teemea aamochio, tísia oisa erapakame teemea, Riosi tehkiwarachi taamo mochitomiao, eenechi oijenakamechitia.
\v 9 ¿Teemea soparamena cheriwema kiamerina teemea Riosio, aamoo tísia kaawe yoratiamewichioo, tísia kaawe erakowa taamo eraterioopua tiameo, aamoo taamo nayewaturiachi paparakamekopao?
\v 10 Teemea Riosichi nayewaio, senepi itaniamepua puꞌkao, taamo kuꞌimichiopua eenechi ahpo tetewimichioo, aamo toitia masitepuawichio pehjio, aamo ahsepari naneꞌreka mochitomichiopua, Eesusichi simiyameo.
\p
\v 11 Pukaepa teemea, Apoe taamo Noono Riosio, Apoe Eesusi Paamiraopua tiameo, taamo kuꞌijeraninia waꞌa siimpaka aamo tetewipuawichioo.
\v 12 Apoe Paamirao aamo kuꞌijerani teemea, epeche aamo nakika mochitomichiopua ahpoo, aamo waꞌachi teꞌteremichiopua wahjachioi, teꞌta taamo aamo nakiyachitia.
\v 13 Neeea taamo Paamira Eesusio itaniamepua, aamo kuꞌika Riosichi pewatiame mochitotemichiopua, kiisi seꞌwimichiopua aamo Riosichi paparao, noꞌoo aamo teꞌta piipakame tetewitemichiopua noꞌo Noono tewekachio, noꞌo Noono teꞌta katewiachi taawechio, noꞌo eenechi iꞌka wehjoarichi tekinioiopa.
\c 4
\s Aachin nokaka kaawe eratepuame Riosi
\p
\v 1 Ehpeo utewaeme aamo chaaniame teemea, Riosi kaawe eratewache aamo nokisimichio, teꞌta taamo aamo masiteriachitia, nape utewaeme taamo teꞌta Paamira Eesusi ijinuwarachitia.
\p
\v 2 Machiyame eemeapa noꞌo aamo tuuyeriao, aachin teeka aamo mochinuraria taamo Paamira Eesusichio, Apoe noꞌo weerakamechiopua, Apochi simiyame noꞌo nayewatumichiopua.
\v 3 Riosi nakiyaa ihjipua: Riosiche nakiya yooraka mochitopuame; kiisi suwepori nokipuame,
\v 4 yoomahka eeme nenewikameaio, yoomahka pipiripi ahpo yooreka mochitomeripua; kuunaraa ahpo uupi yooremeripua, uupiraa waꞌachitia ahpo kuunachio,
\v 5 ki aaata ki Riosi machiyamechitia teꞌteretoka, ki aaataoi uupiraoi kuunaraoi ikotukeka.
\v 6 Aaataai eemea, ki waꞌa nokaka mochitometepua, yooma iꞌka waꞌa tiiame suwepori nokiwao, piiripioiopua wisikueniameo. Suwepori nokaka mochitoameopua Riosia, ki teesa kokosamapua puꞌkao. Yooma puꞌkao, aamo tuuyekame neeeapa, amochi masitiaio.
\v 7 Riosia ki iinya tiiame taamo nokimichio taamo paajutekamepua, ohso kaawe Riosia, kaawerumarache taamo nokimichio apochi paaekamepua, ahpoche peenia eꞌria nokisimichiopua.
\v 8 Waꞌa tiiachipao aaata ki eꞌwiamea iꞌka noꞌo chiiao, ki tijoekamera ki eꞌwiaitepua, Riosikamera ki eꞌwiai tiiamepua, Apoekamera ahpo Riosiwari taamo kiꞌyaa, taamo neesetomichio kiatiamepua, ki itapiti suwepori tiiamechi, taamo ruhjimichiopua.
\p
\v 9 Neeea, ahpo nakika mochipuamechi simiyameo, kihta chanimetenia waꞌasi puꞌkao, apoe Riosi waꞌapi iintokamepua puꞌkao, ahpo Riosiwarie waꞌapi waꞌa erapateka.
\v 10 Kaawe naneꞌreniamenia aamoo, Riosichi poponiwao pipiniwao tiameopua, Maseronia weeechi mochikameo, taamo teꞌpa kahtiame Noono nakiyachitia mochitoamekopua, yooma aamo ahpo kaawe eꞌreka mochitoamekopua. Nape teemea iꞌka aamo nakika mochitoniameo, epeche aamo epeche epechechi teetojeramepua.
\v 11 Eemea kaawe aamo neesetoka mochitopuapua, ki aaata aamo eina chaachapamichiopua aamo kuꞌipuawichioo; ohso kaawe, aamoe tekipanaka iꞌyapuapua aamo koꞌkomiao, teꞌta aamo noꞌo tuuyeriachitiaopua aamo masitekao.
\v 12 Eemea waꞌa teꞌtereka mochitometepua, ki Riosichi paparameo, kihta aamo chaanemichiopua. Aamoe waꞌapi iꞌyaka kuꞌyame enesaa, kihta tooremumeri eemea.
\s Eesusi Apoe Paamira eenechi enameri
\p
\v 13 Ehpeo neeea, aamo Eesusichi paparame poponiwao pipiniwaopua tiame, aaata eeme mukisoo ihtana aamo ikimio nayewamane. Maꞌchiame aamo tuuyenarenia pukachi simiyameo, ki teꞌta aamo yuuwesimichiopua aaata Riosichi paparame mukukoio, kiisi eenechi ahpo tetewipuameko maaeka. Ihji noꞌo nayewamiaa, mukukai eenechi ahjaniamepua, ki Riosichi paparamea ki pichikiamepua iꞌkao, waꞌa teꞌtiapa puuua iꞌkao, kihta inataka mochitoamepua, iꞌka mukukai eenechi ahjaniame.
\v 14 Teemea Apoe Eesusio pichiwa mukukai eenechi oijenario erakoapao, teemeai mukukaio, pichiwa eenechi taamo ahjamio erakoamepua. Waꞌachitia Riosio, Eesusi oijenateriachitia, waꞌachitia taamo oijenatemio erakoamepua, yooma taamo Eesusichi paparameopua.
\p
\v 15 Waꞌa tiiachiopua Eesusia, yooma taamo ahpo ijinuwao, apechunamia enasaapua, wahjipakame pahcha oijenatesa apechunameripua taamoo, yoomatiame tiꞌtijoe ooweru tiame apochi paparakameo.
\v 16 Puꞌka taawechi ikipuamea, tewekachi oꞌinia ki kuꞌita sisiname inamupuame Eesusia, teꞌta Riosi kuꞌiwariai, ki kuꞌita turuwachameri puuuai, ahpo turupuchaeo.\fig |196-HK00190B.TIF|col|||Riosi kuꞌiwaria ki kuꞌita turuwani ahpo turupuchawao.|4:16\fig* Puꞌka turupucharie sisinamutioopua, tewekachi oꞌinia toomarichi weritoka, enameri tekika, Eesusi Riosie Weratiamea. Puuua teꞌpa toomarichi werikao, yooma apochi paparaka wahjipakameo, waꞌa oꞌinia apechunamapua puꞌka pahcha.
\v 17 Puꞌka yooma moꞌmoenapusaopua toomarichi ahpo weeriachio, taamopechi apochi apechunameripua waikao, yooma taamo Eesusichi paparameo, ahjaka mochikameo. Kajusaapa taamo ahjakame weeechi mochikame apechunakao, ahpo oijenateria ahjama taamo enepatemeripua, pahcha ahpo apechunaria ahjama. Waꞌa oꞌiniao teemea, Eesusi ahjama mochipuachi iꞌtopuamepua, waꞌao teemea, ahkasi ki wahjiamesi mochipuamepua.
\v 18 Waꞌa ikipuamekopa taamoo, kaawe erakopuapua, aamo ahpo waꞌachi teerenarewa erapateka, Riosi yeꞌkarichi mochipuameo.
\c 5
\p
\v 1 Noꞌo Riosichi tetejima, teꞌta taawechi Eesusi enamiachio, kaꞌchi iika iyotepuamepua achini keenakoo, aaataai kiisi naneꞌriamekopua puꞌkao.
\v 2 Naneꞌriame eemeapa Eesusi enamioio, ichikoamechitia enamerikopua, tukaomi ahka senawato, waꞌa tiiame teꞌta aamo masitekame teemea.
\v 3 Puꞌka taawechiamio tiꞌtijoerio, natakia taꞌiria mochikoiopua, senawato enameripua, tiꞌtijoerio chaachapoiopua: “Ehpiamio kihta aꞌchi tiiame naanewa tiiamepua, yuuweeme poꞌyamepua iꞌwao.” Nape waꞌa chaachapaka mochikoiopua, pukachio Riosi kokosaria senawato ahjachi enamiitepua, oowitiame saumerichitia senawato kokorepamechitia.
\v 4 Nape eeme ki tukapachi mochitoamea, puꞌka taawechi Eesusi enamiachio, ki senawato natakia mochikame chapipuamepua,
\v 5 eemea uutapachi mochitoamekapapua, Riosi uutaparichi ohjoamekapapua, ki tukapachi. Pukaepa maꞌchiame tetewika mochitoame eemea, itapiti ikiniameopua enamerikopua.
\v 6 Riosi taajenarichi mochitoamekapao teemea, ki kochika mochitometepua, ki natakia mochikame, tewimichio Eesusio, eenechi eenaiopua.
\v 7 Aaata Eesusi enamia natakia mochikamea, tukao natakia kokochiamekatepua, aaata nawajika mukipakamechitia.
\v 8 Nape teemea senawato enamiopa Eesusio, ki kochika mochitoamepua, taamo Eesusie apechunapuame puuyeka mochitoamekapa. Teemea tiameo, taamo Eesusichi paparae taamo neesetoamepua, weruma nakiwarieopua tiame, Eesusichi taamo iinuekaeopua. Teemea pukae papararieo Eesusichi nakiraeopua tiameo, kajewakiraemeka teꞌteriamepua muripao, soontaro nasiwamerika tiiamechitia. Eesusi taamo newipatemia enamio inatatoka mochitoao, taamo nehpupari kajemokorikachitia teetoame teemea tamochio.
\v 9 Waꞌa teꞌteretoka taamo neesetoame teemea, Riosio taamoo, ki taamo kokosapuawichiopua ahpo kokosarieo, apochi iintapariopa, ohso kaawe taamo newipamichiopua, ahpo Taana Eesusichiopua, pukachi teꞌta paparakapa.
\v 10 Apoe Eesusia, taamowichio mukukamepua, ahpo ahjama mochipuawichiopua, taamo apechunamia enasoopua waꞌasi, taamoo ahjakame mochikameo, taamo wahjipariameoiopua waꞌasi.
\v 11 Waꞌa tiiachipa eemea, utewaeme teꞌteretopuapua, kiisi nahsinepaka puuyekaopua, ahkasi Eesusi eenachisi anachaka. Kaꞌte kochika mochitomitia, ohso kaawe, aamo kuꞌika oisa erepatepuapua, aamo utewaeme teꞌteretoachitiapa waꞌasi.
\s Paoroe tuuyewa Riosichi teꞌtereniame
\p
\v 12 Noꞌo Riosichi tetejimaa, yooreka mochitomitia eemea, aaata Riosi tuuyewari masitario, aaata aamo ki kaawerumachi weritosoopua, aamo kakupachi iintapasiameopua, puuu aaataa aamoo, kaawe aamo neesetoka mochitojeriameopua, ki aamo tatakorichi ruhjimichiopua.
\v 13 Eemea kaawe eꞌreka tetewipuapua puꞌkao, Riosi tehkiwachi yooramekopua aamowichioo, Riosichi aamo kaawe teeremichiopua. Neeea aamoo amochio taꞌiria aamo mochitojeramepua, kihta amochio nasiwaka.
\p
\v 14 Aamo noꞌo Riosichi tetejimario, aamo terijeraninia aaata nanasinameo, ki iꞌyaka mochitoame, itapiti ahpo taꞌpechi nakiwiao. Aaata ki Riosie ahpo nakiwameko eꞌraka yuuwesiameo, kaawe erapatepuapua puꞌkao, Riosieo, tísia nakiniameko tiio, tuuyeka. Aaata ki teꞌta utewaeme tiiameopua Eesusichi ahpo paparao, kaawe eꞌreka kuꞌipuapua puꞌkao, kihta nahsinapa aamo puꞌka kuꞌimiao, oisa erapaka utewapamichiopua Eesusichi ahpo paparao.
\p
\v 15 Kaawe aamo neesetopuapua, aaata aamo naꞌaraka ki kaawe iintosoo, ki waꞌachitia naꞌara yooraka natetetepuapua. Ohso kaawe kaaweruma nayewaka katewepuapua puꞌka ahjamao. Waꞌa teꞌteremete eemea amochio, Riosichi paparaka mochitoamea, aaatachioipua, ki Riosichi paparamechioi.
\p
\v 16 Eeme Eesusichi paparamea, kaꞌte yuuwesika mochitomitia, ohso kaawe kaawe erakoka mochitopuapua aamo iikachio.
\v 17 Ihta itapiti ki kaawe ikiwame aamo teetosoopua aamo pipiripichio, Riosi itapuapua aamo kuꞌipuawichioo, aꞌchitia keenakooi ki kaawe ikiyaio.
\v 18 Ihta aꞌchi tiiame ikiwachioi, cheriwema kiapuapua Riosio, kaaweruma ikiyaio ki kaaweruma ikiyaio. Itapiti ki kaaweruma aamo ikiwame enesaa, cheriwema kiapuapua aamo tewekachi kahtiame Noonoo, aamo chokichi kahtiamekopua puꞌkao, aamo kuꞌipuamewichioo. Waꞌa tiiame aamo teꞌteretojerame Riosia, yooma ahpo Taana Weerariamechi paparaka mochitoameo.
\p
\v 19 Kaꞌte choipamitia eemea Riosi aamo tuuyenariao, ihtaoi aamo tuuyenariao, ahpo Riosiwarieo.
\v 20 Kaꞌte keꞌchu aamo kaawe neꞌniai Riosi tuuyewari iyotetiameo, ipaka tetewimitiapua, aaataoi Riosie eratetiame masitiame tuuyoio.
\v 21 Yooma aamo masiteka tuuyao, kaawe waꞌachitaka neꞌnesa Riosi Iyoterichi chiiao, kaawerumarache uusa amochi teetopuapua.
\v 22 Yooma aaata seꞌwi masitiame enesoo, poanatupuapua pukachio.
\p
\v 23 Neeea Riosio, aamo teꞌta cheriweka piipatekameo, waꞌapi teꞌtiame piipatetiame aamo teꞌteretojeraninia Riosio, ahkasi Riosie Weratiame eenachisiopua, kihta ki kaaweruma aamo teꞌteretomichiopua aamo iikachio, yomatiame aamo weerewachioi, yomatiame aamo inatarichiopua tiame.
\v 24 Neeea Riosio, yooma aamowichio noꞌo itaneriao, yoorakache itipiamekopua puꞌkao, tísia ikikache itipimeriko eꞌramenia puꞌkao, puꞌkawichio aamoo, ahpo tatana iintapakamekopua puꞌkao, puꞌkawichio aamo apochi paaekamepua.
\s Kajuyachi teepotari
\p
\v 25 Iꞌwasi ihji noꞌo aamowichio iyotiaa. Taamochewichio itajeraninia Riosichio, taamo kaawe teetomichiopua Riosichio.
\p
\v 26 Teepotemitiachepua waꞌao, yooma taamo Riosichi tetejimao, kaaweruma aamo eꞌrewakaopua.
\p
\v 27 Neeea Riosie Weratiamee weratiamea, tísia aamo iyonajeraninia iꞌka aamowichio iyoteriao, yooma waꞌao, waꞌa Tesaronika tiopachi mochikameo, yooma waꞌa mochikame Riosichi tetejimao, poponiwao pipiniwaopua tiameo.
\p
\v 28 Apoe taamo Paamira Riosie Weratiameo, yooma ihta Riosi kaawerumario, amochi yachajeraninia. Waꞌa noꞌo aamo eꞌria ikisaa, tísia kaawe enema Riosia.
\p Cheriwema, kajurunia waꞌasi.