\id 2TH
\h Oosa Teꞌtesaronika Iyotepawa
\mt2 Paoro Oosa Simiyame
\mt1 Teꞌtesaronika
\mt2 Iyotepawa
\c 1
\s Teepotari
\p
\v 1 Kúíra, Tesaronika tiopachi mochikame. Kaꞌkaruma mochisaa eemea kaawe enemiipua. Teemea iꞌwao, kaꞌkaruma mochikamepua. Neee Paoroa Siriwano ahjamao Timoteo tiameo, iꞌka aamowichio iyoteria uhjuriamepua, yooma aamo Tesaronika tiopachi mochikame, taamo Noono Riosichi teꞌteriameo, Apoe taamo Paamira Riosie Weratiamechi teꞌteriameo.
\v 2 Neeea yooma aamo taamo Noono teꞌpa kahtiame Riosio, taamo Paamira Eesusio tiameo, teꞌta kaawerumari amochi teerejeraninia, teꞌta taꞌiria mochiwa amochi teeretetoka.
\s Paoro kaaweruma teꞌterewata Tesaronika Eesusichi paparame
\p
\v 3 Teemea senepi taamo Noonochi naewaio, tísia kaawe tiio erakoamepua cheriwema kiapuao, tísia kaawe aamo teetopa taamo Noonochio, teꞌta utewaeme teetoka Eesusichi aamo paparao, amochi nakiraopua tiameo, tísia kaawe teꞌteretopa.
\v 4 Teemea ahkaoi tiꞌtiopachi asiyaio, kaaweruma aamo nayewame teemea, aamo Eesusichi paparaopua, kiisi seꞌwika teetoamekopua aamoopua pukachio, ki ookapi aꞌchi tiiame naꞌarari yoraniame aiwaio, anachaka nokisiaio.
\v 5 Nape Riosia yooma aamo ehpiami Eesusiwichio aiwaka mochitoao, kajuyachi taawechi ahpo katewiachiopua waꞌasio, tísia kaawe aamo erapatemeripua, tísia kaawe iintoka aamowichioo, ahpo yeꞌkarichi mochipatekao. Waꞌa iintoka Riosia, tísia kaawe ahpo iintuameko, tetewitemapua.
\v 6 Nape aamo naꞌareka aiwatekameo, ki ahpo yeꞌkarichi reesisemapua ohjoremichioo, ohsotia puuua, tísia kokosarichi aiwaniachikamera uhjurameripua puꞌkao. Waꞌa iintokao Riosia, teꞌta ahpo kaaweruma tiia tetewitemeripua, waꞌa yoraniame nakiriamekopua nanaarameo.
\v 7 Waꞌa iintosoopua Riosi waanamio, kiteremeri eemea ihtaoi aamo aiwaniameo, waꞌachitia tiame taamooi. Waꞌa teeremeripua, teꞌta Riosie Weratiame enasoopua, ahpo tewekachi kuꞌkuiwa ahjama eenoiopua, Apoe teꞌta ahpo utewari teetoka eenoiopua.
\v 8 Puꞌka taawechi eenaio Eesusia, tahpitika teetoka enameripua naꞌietoka, pukae naꞌie maꞌchitamiaopua kiisi kaawe nokitiameopua. Waꞌa iintosaapua kiisi kaawe noonoikameopua, yooma ki Riosichi paparanarekameo, taamo Paamira Eesusichi simiyame tuuyewari ki nakiriameoiopua, ki nuꞌuti kokosameripua puꞌkao.
\v 9 Ihji kokosaria, ki nuꞌuti teeremeripua, ahkasi ki seenampasi tiiame. Puuua, kai waapi mehka ihpapapuamepua Riosichio, ki Riosi teꞌta peenia tiiachikamera, Riosi utewarioi kihta teewewiachi. Puuu ki kaꞌkarumaa waꞌa itipimeripua waꞌasi, ahkasi ki wahjiamesi seenampa.
\v 10 Nape eemea puꞌka taawechi Eesusi enasoopua, yooma wahjachi tiame Eesusichi paparakame ahjamao, tísia kaawe erakowa wiikemapua Eesusio. Waꞌa noonoimeri eemea wiikekao, yooma eeme Eesusichi paparakamea, taamo Eesusichi simiyame aamo nayewaturia pichikeka inamukamea.
\v 11 Pukaepa teemea, ehpe taawechiamio, Riosichi itasiame teemea aamo kuꞌipuaichioo, Riosichi teꞌta aamo kaawe teꞌteretopuawichio, puꞌkawichio apochi aamo paaekamekopapua. Teemea Riosichio itaniamepua tiameo, aamo kuꞌisimichiopua ahpo utewarieo, yooma aamo itapiti Riosichi paparawa nokisinarekewachiopua.
\v 12 Puꞌka waꞌa aamo nokisisoo, yooma aaata aamo Eesusichi simiyame aamo masiteria pichikekamea, puꞌka aamo noonowiriae, ki nuꞌuti iyoriwa chaachapameripua Eesusichio. Aamoo kaawe noonowiriopa tiameo, Eesusia puꞌkawichioo, ki nuꞌuti kaawe aamo iintomeripua. Waꞌa iintokaopua Riosia Riosie Weratiamea tiamea, ki nuꞌuti aamo nakiya tetewitemapua.
\c 2
\s Ki pichiwa masitiame eenechi enaniame Eesusichi simiyameo
\p
\v 1 Ehpeo aamo noꞌo Riosichi tetejimao, Eesusi enamerichi simiyame aamo nayewemania, aachin teeremerikopua wahka ihtoriachiopua, Eesusi ahjama taamo mochipamioiopua, Eesusi enasoopua, ahpo yeꞌkarichi iꞌtomiao.
\v 2 Nee, kaꞌte ikanati aamo sewina erapamitia aaataeoiopua, taamo Paamira Eesusi enamiachio asikameko waꞌasi, aamo chaachapanioiopua, peꞌyachi ahpo masitiao, Riosi Riosiwarie ahpo masitiameko tuuyoio, peꞌyachi taamo masitia iyojurachi uhjureria masitiameko tuuyoiopua. Kiisi pichikepuapua waꞌa chaachapoio.
\v 3 Aꞌchikoitia yoraniao kaꞌte aamo toimitia eemea aamo wisikuepawichioo. Yooma waꞌa aamo chaachapamea, aamo wihkuame enemeripua. Keꞌchu Apoe Eesusi eenoio iꞌka weeechi yawichitumiao, aaata Teꞌta Tatakori Ihsiamera machenameripua tiꞌtijoechio, ki teesa tiiame naꞌarari iintomia.\fig |197-OK.statue.people copy.tif|col|||Aaata Riosika teerenariame, yomatiame wehjoarichi.|2:3\fig*
\v 4 Puuu Naꞌararia machenasacheopua iꞌwa weeechio, ki nuꞌnuti mehtanameripua tiꞌtijoechio, yooma ihta eerina teereniame Riosichi simiyameo, Riosichi paparaniameopua. Puuua yooma uꞌyemapua ihtaoi Riosichi iyoriniameo, ahkasioi Eerusarenio, Riosi teꞌta tioparachioi yasipamapua, apoekamerako tuuka teꞌta Riosio.
\v 5 Neeea iꞌka waꞌa tiame ikipuameo, aamo tuuyekame neeeapa aamo mochikachi ihsiriaio. Pukaepa naneꞌriame eemeapa wahka ihtoriachi waꞌa ikipuameopua.
\v 6 Pukaepa naneꞌriame eemeapa tiameo, ihtana eerina tiiopua pehjio, puꞌka naꞌarari tijoe ki machenamichioo, puꞌka aamo nayewekame neeea, Eesusichi paparakame apechunapuame aamo nayewiaio. Puuu teꞌta naꞌarari tijoe ki machenameri puuua keꞌchu reesiseri kianioiopua Riosieo.
\v 7 Puuu naꞌarari tijoea ki machenaiopua pehjio, oꞌinekame puuuapa ahpo naꞌarari ihsiaeopua iꞌka wehjoarichio, ahkasi yooma apechunaniachisi iꞌka wehjoarichi ahpo Riosie eina teereweniao.
\v 8 Puꞌka ahpo eina teerewa apechunatiaapapua, waika machenameripua teꞌta naꞌarari tijoeturia, tiꞌtijoerichi naꞌara iintomiao. Nape Eesusi Riosie Weratiamea tepepi neipamiopua, apoe ki nuꞌuti utewari teetoka enasaopua, kiisi tehki eꞌraka newitomapua puꞌka tísia naꞌarameo, itapiti puupuchekamechitia. Waꞌa iintokaopua, yooma uꞌyemapua puꞌka tísia utewarirao.
\v 9 Nape keꞌchu Eesusie newitoniaiopua naꞌararia, ihji machejenasaapua tiꞌtijoerichio, yooma ihta utewari peenia ihsiwa inisimapua, Satanasie ahpo kiatia, pukae wihkuesimapua tiꞌtijoeo ooweruopua tiame, ki Riosi teꞌta pichiwari tuuyewarikamera, pichikemichiopua.
\v 10 Yomatiame tiꞌtijoerio, puꞌka peenia ihsiwa wihkuaeopua, apochikamera paparapatemapua, apochikamera iyoritekaopua puꞌkao. Nape Riosia, puꞌka Satanasie wihkuetiameopua, tísia kokosamapua puꞌkao, kai waapi uhjurakaopua ki apochíi, ki ahpokamera pichikeriopa ahpo pichiwari chiiao, ahpo Taana Eesusichi simiyameopua ahpo ahjae newipatepuao.
\v 11 Riosia ki ahpo Taanachi simiyame pichikenareriopao, naꞌararichi toimeripua, wihkuarichi.
\v 12 Riosia ki ahpo pichiwarikamera pichikeriopao, puꞌka naꞌarari wihtukikamera pichikeriopao, ki reesisemeripua puꞌkao, ahpo Taana Eesusi yeꞌkarichi mochimichioopua, puꞌkao tísia puꞌsereriopaopua kiisi kaawe ahpo nokiwao.
\s Riosie newipamichio paaeniame
\p
\v 13 Teemea senepi Riosichi nayewaio, aamowichio cheriwema kiꞌyame teemea Riosio, eemekamerakopua pahcha Eesusichi paparakameopua waꞌao, taamo aamo mochikachi nokayoiopua Eesusichi simiyame nayewatukao, Riosio ahpo Riosiwarieo, apochi aamo paajutioiopua newipatemiao. Riosia ahpo ijinuwa iintapakamepua, ki aamo aiwamichiopua ahpo kokosario.
\v 14 Riosia ahpo kaaweruma tuuyewari taamoe aamo nayewioiopua, ahpo Taana Eesusi tísia peeniatiame yeꞌkarichi, mochimichio aamo paaekamepua.
\v 15 Waꞌa tiiachipa eemea, waꞌapi teꞌteretopuapua aamo Riosichi paparaka nokisiao, kaawe inatatoka waꞌa taamo masiteriaopua, neipami taamo aamo masiteriaopua tiame iyojurae.
\v 16 Ehpeo taamo Riosichi tetejimao, aamo inatepajerani neeea, taamo Noono tewekachi kahtiameo, tísia taamo nakika yasitoamekopua puꞌkao, Apoe Eesusi tiameopua, taamo Noonoe Weratiamea. Waꞌa tiiame yasitoamekapa puuua tamochio, ki wahjiamesi taamo kiꞌyakamepua kaawe erapario, ki nuꞌuti kaawe eꞌraka taamo puuyeka mochitomichiopua, ahpo ki teesa peenia tiiamechi taamo mochipuame, Riosi taamo mochiwamio tuuriachi.
\v 17 Neeea taamo Noono Riosio, taamo Paamira Eesusi tewekamepua tiameo, aamo utewaeme kuꞌimichio itaniamenia puꞌkao, aamo pewatiame mochitomichiopua Riosichi paparao, kiisi seꞌwi nokaka ki kaawerumachio, ihtaoi seꞌwi ki kaaweruma nayewaniamechio.
\c 3
\s Taamowichio itamitia Riosichio
\p
\v 1 Iꞌka iyojura kuwatewachio, noꞌo Riosichi tetejimao, taamowichio Riosichi itajerani teemea, taamo kuꞌisimichiopua puꞌkao, ikanati yomachiami iꞌtopuawichiopua, iꞌka Eesusichi simiyame kaꞌkaruma tuuyewario. Riosichi itamitiapua tiameo, yomachiami tiꞌtijoe ooweru tiameo, iꞌka Riosi tuuyewari inamukameo, kaawe eꞌraka apochi uumichiopua puꞌkao, amochitia puꞌsereka uuriachitia.
\v 2 Taamo Noono teꞌpa kahtiamechio, taamo neesetowa itapuapua tiameo, taamo kaawe inatemichio tísia nanaarame tiꞌtijoechio, kiisi taamo keepunariameopua iꞌka kaꞌkaruma tuuyewari Eesusichi simiyameo, taamoo nayewesiao.
\v 3 Nape waꞌatiaoi ki ookapi nanaarameo ki Eesusichi paparanariamekoipua, ahjachi erakoame teemea taamo Noonochio, Apoe inisimerikopua, aamo Riosichi paparakame inatetokao, aamo Eesusichi paparakameo pewatiame mochitomichiopua.
\v 4 Riosichio teemea kaawe erakoamepua, aamoo kaawe teetoamekopua taamo masiteria nokisikao, ahjachi erakoame teemea Riosio, aamo kuꞌisimerikopua puꞌka aamo nokisiwachi masitekao.
\v 5 Neee Paoroa taamo Noonoo, aamo kuꞌijeraninia pahtemichioo, ihtana keenakosi tísia aamo nakiyamekoopua, tewekachi taamo Noonoo. Neeea taamo Noonoo aamo kuꞌijeramenia tiameo, Riosie Weratiamee aamo anachasimichiopua, yooma ihta aiwari aamo ikisiaopua.
\s Ki nanasiname enepuame
\p
\v 6 Ehpeo taamo teꞌpa Noonochi poponiwao pipiniwaopua tiameo, neeea Eesusie weratiamechitiao, iꞌka aamo utewa chaaniamepua. Poanatumitia eemea waꞌa mochikame nanasinamechio, kiisi tekipanaka mochinariamechio, kiisi iꞌyaka mochikamechiopua ahpo koꞌkometio. Puuu waꞌa nokayamea, kihta yooraka mochitoamepua Riosi nuurario, Riosioio, kiisi iyoriamepua.
\v 7 Eemea naneꞌriamepua taamoo, teꞌta taamo teeretomechitia teetoriopua, kihta nanasinaka taamo nokisiriopua waꞌao, taamo ihtaoi nakiwiao tekipanaka iꞌyasiriopua.
\v 8 Teemea waꞌa mochikaio, tekipanakache iꞌyakamepua taamo koꞌkomiao. Teemea aaataoi ki koꞌkonekamepua ki tarakao, ohsotia teemea tarakache koꞌkakamepua, ki peterenariapa amochio, tekipanakache koaka.\fig |198-CN01997B.TIF|col|||Paoroa weemera wisasokari netepuawichio sukani.|3:8\fig*
\v 9 Aamo ihkorewa itaka koaka mochitokame enesaoi teemea, kaꞌchi teeremii teemea, Eesusie ajawatiamekapa teemea, ahpo tehkiwachio. Nape ki waꞌa teerekame teemea aamoekamera taamo koꞌkotepuaoi, aamoo taamo ki nanasiname tetewapa, tamochitia ki nanasiname enemichioopua.
\v 10 Waꞌa mochikaio teemea, utewaeme eee aamo chaanekamenia: “Aaata ki tekipananariameo, kiisi kianurekamenia kooameo.”
\v 11 Waꞌa aamo chaaniamenia iꞌkao, waꞌa aamo mochikachio aaata tiꞌtijoe ooweruopua tiame, oowera ki tekipanaka koꞌkonariameko tuuwamekopa, oowera taꞌpechimiache ohjokache ihkorikache konariamekopua.
\v 12 Puꞌka nanasiname tiꞌtijoeo ooweruoiopua tiameo, utewaeme chaaneka tekipananuriamenia, Riosie Weratiame tuuyachitia puꞌkao, tekipanaka yowika koꞌkonuriachitia puꞌkao, ki aaata kichiwa nokaka waꞌami ahkao, aaata taꞌpechiamio.
\v 13 Eeme wahjachi noꞌo Riosichi tetejimao, ki nanasinapaka mochitojeraninia, ihtaoi teꞌta kaꞌkaruma aamo aaata yorasikiaopua.
\v 14 Waꞌa aamo tiopachio, kaawe neꞌnepuapua waꞌao, aatanakamerakopua, ki yooreka mochitonariameo iꞌka iyojurachi noꞌo chaaniao. Kaꞌte ahjama teeremitiapua puꞌkao, ohso kaawe ipaka teteipuapua puꞌkao, suuwe erapamichiopua puꞌkao, ahpo ki kaawe nokayao.
\v 15 Nape waꞌa teꞌtioi puꞌka nanasinameo, kaꞌte aamo seepurawachitia tetewimitiapua, ohso kaawe aamo Riosichi tetejimachitia uupuapua, kaawe eꞌraka utewaeme tuuyeka, puꞌka ahpo ki kaawe nokayao, kiisi kaawe eꞌraka tetewamekopua Riosio.
\s Kajuyachi teepotari
\p
\v 16 Ehpeonia Apoe taamo Paamiraonia, yooma ihta aamo taꞌiria yasitia, amochi teerepajeraninia puꞌkao, ahkasi aamo weritoachi taawechisi, aamo ahjama oijeraninia taamo Paamirao.
\p
\v 17 Kajukamenia neeeapa noꞌo chanimiao. Iꞌwa iyopumane noꞌo teewa, aamo naneꞌremichiopua iꞌka iyojurao, noochi oꞌinia eenamekopua. Waꞌa teeka noꞌo teewa iyopusa uhjuramenia, yooma noꞌo iyojura uhjurasiopua.
\v 18 Ehpeo Apoe Paamira Eesusi Apoe Riosie Weratiameo, yooma amochi Tesaronika tiopachi mochikamechio, teꞌta taꞌiria mochiniame teewejeraninia amochio.
\p Waꞌasi ihjia. Waꞌa aamo teewesaa Riosia, tísia kaawe enemapua.