\id 1TI
\h Pahcha Timoteo Iyotepawa
\mt2 Paoro Pahcha Simiyame
\mt1 Timoteo
\mt2 Iyotepawa
\c 1
\s Paoroe Timoteowichio iyotepawa
\p
\v 1 Kúíraa Timoteo. Neee Paoro Riosie eꞌrariaeo, Riosie Weratiamee weratiamea, iꞌka iyojura aamo uhjurenania. Puꞌka Eesusi Riosie Weratiame enamio puuyeka mochitoame teemea, puuu iintomichiopua taamo kiꞌyakao, itapiti Riosie taamo kiapo tuutiameo.
\v 2 Neeea aamo Timoteo Riosichi noꞌo taanachitia tetewao, Apoe taamo Noono tewekachi kahtiameo, Apoe Eesusi Riosie Weratiameopua tiameo, aamo taꞌiria yasira kiajeraninia puꞌkao aamo iikachio, teꞌta kaawerumari amochi teeréwari.
\s Paoroe inatenura ki pichiwaka masitiamechi
\p
\v 3 Neeea aamo Timoteoo, Maseronia simiyaionia, waꞌa Eejesio aamo itipinurakamenia, ki kaꞌkaruma maꞌmasitariopua terimíchio, puꞌkao kiisi pichiwaka masitiamekopa waꞌao.
\v 4 Puꞌkao teripuapua, kiisi masitenuraka ihtaoi ehkoriami ki pichiwarichi simiyame naawesario, ki mehkasi mehtanamichiopua puꞌkao, oowera puꞌserepuawichio nayewaniameo. Kaꞌte tehpe wekatenuremitiapua tiameo, ehkoriami oꞌinia ahpo tijoetusiriachi nayewaniame nayewakao, puuua puꞌkakamera aamo naneꞌrejerekao, sewinatamepua teꞌta nateyamera Riosichi simiyameo. Puuu waꞌa tiiamea, itapiti nekakoniameche mehtachamepua, kihta taamo kuꞌyame Riosichi taamo paparamiaopua, taamo Riosi nakiyachitiaopua.
\p
\v 5 Iꞌka noꞌo aamo terinuriaa waꞌa Eejesio mochikameo, aamoo neeea, teꞌta Riosichi eꞌenaniame aamo masitenuramichio cheekamenia, puꞌka Riosichi eꞌenaniame puꞌsereka keepukekameo, kaawe eꞌraka Riosichi eꞌenamichiopua. Waꞌa tiiao Riosi nakirewa uukamea, puꞌka nakirewae waꞌachitia ahpo kaawe nakika mochitomichiopua, teꞌta pichiwa Riosie ahpo piipatetiameko erakoka, teꞌta ahpo Noono tewekachi kahtiamechi paparakamekapa.
\v 6 Ookapi waꞌa mochikame maꞌmasitaria, kihta pichiwari teꞌteriamepua Riosichi simiyame ahpo masitiao, tisiwa seꞌwi wewekakamepua, Riosikamera teꞌta ahpo nokijeratowaopua.
\v 7 Puuua Riosi nuurarichi simiyame masitari enenariamepua enenariaa, nape oowera ahpo pichiwariko erakoa, maaewache masitiamepua, kiisi naneꞌriamepua Riosi pichiwarirachi simiyameo, teꞌta Riosi pichiwari masitio tuuyai.
\p
\v 8 Riosi nuurari ehkoriami Moise kiaretiaa kaawerumapua kaawerumao, nape ki aampachi pehji epeche nuurarieme yahchetiamea taamo Noono tewekachi kahtiameche yahcharia, nuurarira naꞌnaritoniameche enesaa.
\v 9 Ihtaoi yoorewa nuuraria, ki aaata kaꞌkaruma nokayamerawichio kokosapuawichio yachatiamepua, ki kaꞌkaruma nokayamechewichio yachatiamepua. Waꞌachitia Riosi nuurari yahchariai, ki Riosi nuurari yooreka mochitoakamera, kokosamichio yachatiamepua, iꞌka noonoikamechitia: tewekachi taamo Noono ki iyorikamechitia; aaataoi tewekachi taamo Noonochi paparameo kiisi yooreka tetewikamechitia; tiꞌtijoeri koꞌyamechitia; aaata ahkasi ahpo yayawaoi koꞌyamechitia;
\v 10 yooma aaata suwepori nokayamechitia, tiꞌtijoe ooweruchitia ahpo uuyamechitia, ooweru tiꞌtijoechitia ahpo uuyamechitia; aaata tiꞌtijoeri ichikoka chapisa toomichi nehjame; wistuka mochitoniame puꞌserewa tiiamechitia; kihta iintokoi wenejiamechitia; wistuki teꞌta ahpo pichiwarichitia tuuyamechitia. Yooma ihta waꞌa tiiame nokiwamea, ki Riosi nuurarikamera eꞌweniamepua, ihtaoi kaawerumachi simiyame masitewachio.
\v 11 Ihji kaaweruma noꞌo masitiaa, Riosi kaaweruma masiterachi oꞌinia eenamepua, Riosi kaaweruma tuuyewari noꞌo kiꞌyaria, yomatiame tiꞌtijoerichi noꞌo masitemichiopua. Ihji teꞌta tísia nateyame tuuyewaria, Riosi kokosarichi simiyame newipapuamepua.
\s Paoro cheriwema kiꞌya, Riosie ahpo tesiwetiamewichio
\p
\v 12 Neeea Riosie Weratiame noꞌo Paamirao, tísia kaawe eꞌraka cheriwema kiꞌyamenia puꞌkao, noꞌoo ki noꞌokamera werame tiioio, noꞌoo oowe eꞌreka weerariopua puꞌkao, apochi simiyame noꞌo nayewatumichioopua.
\v 13 Riosia waꞌa iintoriopua noochio, noꞌoo pukerio kiisi kaaweruma inatakamekoipua Riosie Weratiamechio, tísia aꞌchikoi chaanekamekoipua ki kaawerumao, noꞌoo Eesusichi paparameo tísia naꞌara yoorakamekoipua koꞌinareka naanarikáo, waꞌa noꞌo iintokamepua. Riosia tísia kaaweruma iintokamepua noochio, tísia noꞌo cheriwekaopua noꞌo pukerio kiisi kaawe noꞌo iintoriao, noꞌoo pukerio ki naneꞌriapa, waꞌa iintokamekopua, Eesusi Riosi Taanarao aatanakoopua.
\v 14 Pukaepa neeea, ki nuꞌuti noochi kaawe iintowa tetewamenia, iꞌka tehki apochi simiyame kaaweruma nayewamichio noꞌo weerariopua, yomatiame tiꞌtijoeri Eesusichi paparamichiopua, teꞌta Riosi Taanarakamera nakika mochitomichiopua, Eesusi tewaniameopua.
\p
\v 15 Eesusi Riosie Weratiamea, teꞌta tatakorikame newipatemiawichio naawariaa, teꞌta tísia pichiwa puuua, puꞌkawichio naawakameo, yomatiame teeme tiꞌtijoeri, teꞌta pichikemetepua puꞌkao, tiꞌtijoea, ooweru tiame. Yoomahka Eesusie newipatetiamea, neeepua teꞌta tísia tatakoririo eꞌramea.
\v 16 Nape Riosia tísia noꞌo naꞌara ihsioio pukerio, waꞌa noꞌo teewetorepua ahkasi ahpo Taana Eesusichi noꞌo paparasichi, ki nuꞌuti noꞌo tatakoririao, ki nuꞌuti cheriweniame tetewitenariapua noochio, puꞌka waꞌatiame noochi tetewikameo, ki nuꞌuti tatakoritiameoiopua, cheriweniamekopua Riosieo, waꞌa iintosaapua, ki wahjiamesi ahjari kiamiapa.
\v 17 Pukaepa waꞌa iintoriopa Riosio, ahpo Taana Eesusieo, ki nuꞌuti teꞌta iyoriwa teewemete teemea, Teꞌta Yawichi ki wahjiamesi yasitoamekopua puꞌkao, apoechekopua ki wahjiamesi ahjamekopua Riosio, apoekai Riosikai tiiopa puꞌkao, ki pusie tetewiniame, kiisi teteipua tiiamekopapua, puuu Apoechepua, teꞌta peenewari tiiameraa. Waꞌa teeresa naaju.
\p
\v 18 Pukaepa neeea aamo Timoteo noꞌo taanachitia tetewao, iꞌka aamo chaaniamenia: Utewaeme aamo teetomitiamua Riosi tehkíwachio, teꞌta ahjachi erasika Riosichio, Riosi Riosiwari amochi chiiae eꞌwekache teetoka, teꞌta aamoo nuureretiachitia, iꞌka tehki yoramichio weratioio.\fig |199-cn02124b.tif|col|||Paoroa Timoteo yoranura tuuyena.|1:18\fig*
\v 19 Aaata ki apochi teetokamea Riosi Riosiwari chiiao, ahpo naꞌituamepua, Riosichi ahpo kaawe teꞌteriao, ipakame puuua ahpo Riosichi paparariao.
\v 20 Ihji Iimeneo tewaniamea, Arejanto tewaniamea tiamea, waꞌa noonoika ipakamepua ahpo Riosichi paparariao. Waꞌa noonoikopania puꞌkao, Satanasi aiwarichi toakamenia, waꞌa ahpo inatapamichiopua Riosi naꞌareriao, waꞌa inatapasaopua, Riosichikamera eenepamichiopua eenechio.
\c 2
\s Aachin teeka nayewapuame Riosichi paparaka
\p
\v 1 Neeea aamo Timoteoo, iꞌka aamo chaanejeramenia waꞌa Eejesio mochikameo, Riosichi iyorimia nanapawiameopua, puꞌkaonia Riosichi kuꞌiwa itanejeraninia, yomatiame weeechi mochikame tiꞌtijoeriwichioo, Riosichi eꞌenamichiopua paparamiao. Puꞌka waꞌa Eejesio nanapawiameopua tiameo, aamoo chaanenuriamenia puꞌkao, aaataoi ahkaoi Riosichi paparakameo, Riosichi kuꞌiwa itanemichiopua puꞌkaoi, ihtaoi ahpo tesiwa teꞌteria nakiweka mochitoao, iinuemichiopua. Kaꞌte natekepanuremitiapua puꞌkaoio, ahpo cheriwema kiamiaopua Riosio, itapiti ahpo tesiweretiawichioopua.
\v 2 Waꞌachitia yooma yaꞌyawichiwichiooi, kaaweruma yawichituniame itanenurapuapua Riosichio, ahkaoi yawichitutere mochitoameo, taꞌiria mochitomichiopua puꞌkao, kihta eeyowa erakoka. Waꞌa teꞌtereka mochitosaapua, taꞌiria yooreka mochitomapua Riosio, waꞌachitia ahpo waꞌapioi puuua, kaawe erakoka ahpo yooreka mochitomapua.
\v 3 Waꞌa tiiame Riosichi itayamea, kaawe eꞌreka tetewipuamepua tewekachi kahtiame Riosieo, Apoe teꞌta taamo Newipatiameéo.
\v 4 Puuu Riosi Apoe Newipatiameraa, yooma aaataoi ahpo pichiwari tuuyewari pichikekameo, yoomahka apochi eꞌenaka newipajeramepua.
\v 5 Yomatiame teꞌta utewari Noonoraa, piiripi waꞌapiche puuua. Aaata pukachi kaawe taamo teerepatiameai, piiripiche puuuai, puuua, Riosi tiiari iꞌka wehjoarichi eenaka tijoetukamepua, Apoe teꞌta Eesusi Riosie Weratiame.
\v 6 Puuu Eesusia, taamo pejana ahpo ahjari mukiwachi nehjakamepua, kurusichi mukuka taamo tatakoriria wikiria natetekao. Waꞌa iintokame Eesusia, teꞌta Riosi yahcharia taawechi iintopuawichioo.
\v 7 Neee Paoroa Apoe Eesusi waꞌapie weratiamepua, apoe waꞌapi iintoria pichiwataka tuuyepamichiopua, yomachiami oika, ki iꞌisaeri tiꞌtijoerichío. Ihji noꞌo tuuyesika oiyaa, teꞌta pichiwari puuua, kiisi wihtuki.
\p
\v 8 Eeme ehpe taawechiami Riosichi paparamea, kaawe erakoka ahpo nayewejeraninia, kihta siinto weeru chaachapaka ahpo nayeweka, kihta nekakome chaachápaniame. Ohso kaawe eemea Riosichi teꞌteriamechitia teꞌterepuapua, itapiti ki kaawe tiiame amochi teeresoo, Riosichi itapuapua kuꞌiwao, kaawe teerepamichiopua amochio.
\v 9 Eeme ooweru Riosichi paparamea, ehpe taawechiamio pehjio, Riosichi teꞌteriamechitia sipichatajeriamenia, ki siintoka peeniatatiame, ki aaatae ikotupua teerepuawichiopua; itapiti oꞌroe netetiame tísia nateyameo, ki siintoka chuchatopuapua puꞌkao, aamo peeniataniachitiao; aamo kuupaoi ki siintoka peeniatatiame itichitiame tetewiteréjaninia.
\v 10 Ohso kaawe eeme oowerua, aamo Riosiwawichio peenia teꞌterewaa, aamo kaꞌkaruma nokiwakamera puuua, aamo wahjachi tetewachio; waꞌa teꞌteremete oowerua, teꞌta Riosichikamera teꞌte iyorika mochitoamea.
\v 11 Eeme oowerua tiameo, tiopachi Riosichi simiyame masitioi tijoeo, ihchi mochika kaawe keepupuapua puꞌkao, teꞌta iyorika Riosichi simiyame aamo keepuao.
\v 12 Neeea ooweruo ehpe taawechimio tiameo, ki masitemeriko eꞌramenia tiopachio, tiꞌtijoechioi ki aaata paamiratuame enejeramenia, tijoekamera ahpo paamiratuamechitia tetewijeramenia.
\v 13 Waꞌa tiiame eꞌramenia ooweruchio, Riosio, tijoekamera neteriopa pahchao, Aarani tewaniame, ki oowitiamekamera pahcha, Eewa tewaniáme.
\v 14 Aarania tiameo, ki puuukamera wihkuetiamepua Satanasieo, Eewakamerapua Satanasie wihkuetiamepua, waꞌa iika tatakorikamepua pukeri oꞌiniachiopua naayachio.
\v 15 Nape pahcha netetiame ooitiame tísia tatakorikamekaipua Riosichio, yooma oowitiame Eewa tewaniame Riosi neteriachisi waꞌanao, Riosie cheriwepuamepua tatakoririao, kokosapuamechi newipatekao, Riosi Taanarachi paparasoo, oowitiamechi naawakameo. Puuu oowitiame Riosi Taanarachi paparamea, eee tiiame enepamapua: kaawerumachi ihsiwa inatame; ki siintoka ahpo tísia peeniatapua eꞌrame.
\c 3
\s Riosichi paparame paꞌpamiratuame, aachin teꞌteretomeri
\p
\v 1 Aaata Riosichi paparame paamiratuame enenariamea, tísia kaawe waꞌa tiiame inataniamea.
\v 2 Nape puuua iꞌkache tísia kaawe teeremerichepua: Kihta ahpo teripuame teerewaeme; ahpo uupiche ahjama ohjoeka yasitomeripua; kaaweruma teetoameche enemeripua tijoe; tísia kaawe inatasa iintoame; ki aꞌchikoi ihsiame ki inataniameo; kaawerumache nayewaniame aaataeoi; ahpo taꞌpechi enapameoiopua, kaawe uuka tetewame; masiteniamechio, kaawe peeneka masitiame enemeripua;
\v 3 ki nawajiame enemeripua; tesiwe eꞌreka tetewame enemeripua aaataoi, ki eꞌraka ihsiwa yoorame; sosopatiame ihsiwaeme eneméripua, aaatachioi; ki nasiwame enemeripua, naawesarichioi; toomichioi, ki weemuame enemeripua.
\v 4 Aaata Riosichi paparame paamiratuamea, ahpo taꞌpechio, kaaweruma yooretewa masitiame enemeripua ahpo tatanao;
\v 5 puuu ki peeneka yoorewatiameopua ahpo taꞌpechio, kaꞌchi iika paamiratumeripua, kaꞌchi iika neesetomerikapa Riosichi paparameo.
\v 6 Puuu paamiratumeria, ki pukeri weemera Riosichi paparakame enemeri puuua, weemera paparakamea, riaorósi wichichairachi wichitepuamekoi puuua, riaorósia puꞌkao, weruma ahpo erakotemakoipua.
\v 7 Puuua tiameo, kaawe teteiwame enemeripua ki Riosichi paparameeopua, kihta ki kaawe tiiame ahpo nayewapuawichioo. Ki kaawe teeretoame enesoopua ki Riosichi paparameo, riaorósia tiꞌtijoerio, naꞌara chaanetemapua puꞌka paamiratuameo.
\s Tiopachi neesetoka tiꞌtijoe kuꞌkuyameopua, ooweru kuꞌkuyameopua tiame, aachin teeretopuame
\p
\v 8 Tiopachi kuꞌkuyame tiꞌtijoe ooweruopua tiameo, kihta ahpo teripua tiiame enemeri puuua; piiripi tiiame cheesaa, ki eenechi sewina cheesiame enemeripua; nawajikaoi ki puꞌseriame enemeripua; toomichioi ki tahpitika siinto eꞌrame enemeripua.
\v 9 Puuua yooma puꞌka Riosie Weratiamechi simiyameo, teꞌta pichikiame enemeripua, puꞌkao taamoo, teꞌta nateyamechitia taamo neesetoa. Kihta itapiti aꞌchitiame apochi noriwi tiiame inatame enemeripua; puuua, itapiti ki ahpo Riosichi tuuka katewiaopua pehjio, ahpo katewekame enemeripua; ahpo inatarichio, itapiti ki kaawe ahpo iintoriopua aaatachio, ahpo katewekame enemeripua Riosichio.
\v 10 Keꞌchu weraniaiopua, aatiatatiame enemeripua; tiꞌtijoeeo, kaawe tiiame tetewiniame enemeripua. Yooma ahpo aatiatawachio, kihta ki kaaweruma tiiame machenakame enesoo, oowe eꞌreka werapuamepua puꞌkao.
\v 11 Ooweruai tiopachi kuꞌkuyameai, waꞌachitia yooreka tetewipuame enemeri puuuai; kaawe inataka ihsiame ihtaoi ahpo yoorao aaatawichioo; ki tísia naꞌarari naawesarieme enemeripua; yoorakache itipiame ahpo iintomo tuuriao; oowe eꞌrepua tiiame enemeripua apochio.
\v 12 Puuu tiꞌtijoe tiopachi kuꞌkuyameai, ahpoche uupiche ahjama mochitoame enemeri puuuai; ahpo taꞌpechioi, kaaweruma yooretewa masitiame enemeripua ahpo tatanao, ki ahpo tatanaoipua tiamé.
\v 13 Puuu kuꞌkuyame waꞌa teꞌteriamea ahpo taꞌpechio, puuukamera kaawe neesetoame enemeripua tiopachio. Puꞌkao wahjachia, teꞌta kaꞌkaweruma teꞌteriame tetewapa puꞌkao waꞌa tiopachio, puuua tísia oowe eꞌremapua puꞌka waꞌa tiopachi kuꞌkuyameo, puuua waꞌa iikao epeche ahjachi erapamapua, Riosie Weratiamechi ahpo paparao, Eesusi tewaniamechio.
\s Taamo Eesusichi paparawa pichiwari
\p
\v 14 Kuꞌwe waꞌa enamo oꞌrane aamo kahtiachi, nape keꞌchu waꞌa noꞌo eenoio, iꞌka tuuyewari aamo uhjuremo erapakane pahchao.
\v 15 Ihji aamo noꞌo uhjuriaa, aachin teeka aamo mochitojerapua waꞌa tiopachio, seenekachi noꞌo tehpe enepamio eꞌrapa. Eeme Riosichi paparame waꞌa tiopachi nanapawiamea, Riosi tioparachi ki pusie teteiwamechi teꞌteriamepua, puꞌka tiopa ki pusie teteiwame tewekachio, Apoe Riosi waꞌa kahtiamepua neesetokao, ahpo teꞌta pichiwarie nehpupakao.
\v 16 Ihji Riosi pichiwarira taamo pichikeka mochitoaa, ki nuꞌuti tísia teꞌta kaawe tiiame iintatiamepua, taamo Noono tewekachi kahtiameeopua. Puuu tísia pichiwari taamo pichikeka mochitoaa, ihjipua:
\q1 Apoe taamo Noonoo,
\q2 apoe tijoetuka tamochi eenakamepua;
\q1 puuu Riosi Riosiwariraa tamochio,
\q2 teꞌta tísia Kaawerumako taamo tuuyamepua Riosio;
\q1 Apoe Riosi Tijoetumioio,
\q2 ki ookapi Riosi tewekachi kuꞌiwarie tetewitiamepua,
\q2 aapoe chaachapakamepua akana naawario Eesusio kohjakoio.
\q1 Yomatiame wehjoarichi ahjachi pichiketiamepua,
\q2 Apoe waꞌapi Riosichi simiyame aachin tiiameko apochio Eesusi nayewatuka oirioio;
\q1 Puuua weeechi oisoopua,
\q2 ahpo teꞌta Noonoe apechunatiamepua tewekachio,
\q2 ahpo Noono teꞌta Riosi kahtiachiopua.
\c 4
\s Eesusichi ahpo papara toimeri wahka ihtoriachio
\p
\v 1 Riosi Riosiwaria maꞌchiame noꞌo tetewitiamepua, iꞌka weee kajuyachi teetowachi ikimeriopua, muuwaeme tiꞌtijoeri Riosichi ahpo paparao, toaka mochitomerikopua. Puuu tiꞌtijoea oowerua tiame, ohsokamera reemoni naꞌararichikamera uumpamapua Satanasi riaorósi, tisiwa wihtuka masitiamerakachi, naꞌnaritoka.
\v 2 Puuu ahpo Riosichi paparawa toakamea, wihkuame maꞌmasitarikamera naꞌnaritomapua, maꞌmasitari kiisi suuwe erapamechi wistuki masitiai, puuu maꞌmasitaria ahpo inatarichio naꞌie tajaka choochokamekatepua, puuu inatarichio wewekakamekapao. Puuua, pichiwaka chaachapameka nayewamepua Riosichi simiyameo, nape kiisi pahtiaiopua ahpo inatarichio.
\v 3 Puuu tiꞌtijoeri wistuki masitiamea, nenewiwao kiisi kaawe tiiameko chaachapamepua, nape Riosia ki waꞌa chiiamepua. Puuu waꞌa chaachapamea tiameo, ihta kooameoi taamo waꞌinamepua koꞌkopuawichioo iyoripua tuukao. Nape teeme Riosi chiia machiyamea, naneꞌriame teemea kihta iyoripuamekopua ihta kooamekoio, yooma kooameo Riosi apoe iintoriopua taamo kiꞌyakao, yooma kaaweruma kooame, yooma ihta kooame pukeri naayachi enepatiaio. Pukaepa teemea, ihta kooame Riosie kiatiameo, kihta iyorika koayamepua, cheriwema kiasache Riosio, kaawe koꞌkopuamepua.
\v 4 Riosia yooma ihta ahpo enepateriao, kaawe tiiameko tetewikamepua. Pukaepa Riosi iintoria kooame taamo koꞌkomiawichioo, kaaweruma puuua, aaataai ki ahpo waꞌinametepua koꞌkopuao. Pukaepa Riosi taamo kiꞌyaria kooameo, taꞌiria koꞌkometepua puꞌkao, cheriwema kiꞌyakache Riosio.
\v 5 Riosi cheriwema kiasaa teeme, ihta kooame koꞌkomiaoio, Riosi apoe kaawerutamepua aamo koꞌkomiao.
\s Paoro Timoteo kaawe tuuyewa, Riosie Weratiame tehkiwachi kaawe teetowa
\p
\v 6 Yooma waꞌa tiiame aamo masitesoo waꞌa tiopachi Riosichi paparameo, kaaweruma ihsiame enemamua Eesusi Riosie Weratiamewichioo. Muuua tiameo piirechi masiteka ihsiaio, aamo waꞌapi penitamamua, aamo Riosie Weratiamechi paparariachitia, aaatae aamo masitetiaio Eesusi Riosie Weratiamechi simiyameo.
\v 7 Nape Riosie Weratiamechi simiyame masitiaio, kaꞌte naꞌroemitiapua kihta nateyame ehkoriami nayewaniame puꞌserewaeo; ohso kaawe muuua, teꞌta aamo Riosichi kaawe teeretoniameche, pewatiame teetopuachepua masitekao. Muuua tiameo, teꞌta aamo Riosichi simiyame penipawa iꞌyasipuapua.
\v 8 Taamo weerewa wiꞌrochaniamea, kaawe wichiyamepua weerewawichioo, nape Riosichi epeche kaawe teerepuawichio iꞌyasiamea, puꞌka aaatawichio epeche nateyamepua, ki ehpechewichio natemerikapa, ahkasi wahka ihtoriachisi natemerikapapua, teꞌta Riosi taamo ahjama mochikoiopua.
\v 9 Yooma ihjia tuuyewari noꞌo aamo chaaniaa, teꞌta pichiwari puuua, iꞌkao yomatiame tiꞌtijoeri pichikémetepua, tiꞌtijoe ooweru tiame waꞌáchitia.
\v 10 Puꞌkakamera Eesusi pichiwarirakachi simiyame, pichikémichiopua taamo keepuameo, utewaeme tekipanakame teemea, tísia taamo naꞌara chaanewa aiwatoriaopua. Waꞌa teꞌteretoame teemea masitekao, taamo tatakoriria newipatewa oowe eꞌriapa, puꞌka Riosi Ahjamechiopua, puuu Riosi ahjamea yooma newipatiamepua, nape ahpo Taana Eesusichi paparakameo.
\p
\v 11 Muuu Timoteoa, yooma iꞌka aamo noꞌo masitenuriao, yooma waꞌa tiiame masitemitiamua aamo masitiao, kaawe pepenipanurekapua puꞌkao, ahkaoi aamo oiyachiamio.
\v 12 Aamoo temarikapa aꞌchi chaaneniao, kaꞌte aꞌchi eramitiamua; ohso kaawe muuua, aamo Riosichiche kaawe teetoame enepuapua, puꞌka aamo kaawe teetowao amochi tetewiteka, aamo wahjachi Riosichi poponiwao pipiniwaopua tiame, aamo ihsiwa naꞌnaritoka waꞌachi nokisimichiopua, yoomá iꞌkáchitia: kaawe eꞌreka nayeweniame; kaaweruma ihsiwa teereniame; kaawe eꞌraka yorakeniame aaatawichioo; teꞌta paparawa tetewitewa Riosichio; tiꞌtijoe ooweruchio, yooreka ahpo tetewitewa, kihta suwepori ahpo nokiwa; ooweruai tiꞌtijoechio, yooreka ahpo tetewitewa, ihtaoi suwepori ki kaawe nokiwá.
\v 13 Nape keꞌchu ki waꞌa noꞌo simioio pehjio, iiweta simitepuapua iyonakao, Riosi Iyotaperichi chiia, yooma inamuachi waꞌa tiopachio, puꞌka chiia masiteka. Puꞌkao kaawe tuuyepuapua kiisi nahsinepaka teetowaopua Riosi chiiá.
\v 14 Muuu Timoteoa, kaꞌte natakepamitiamua amochi seekarepaka weraretiao, waꞌa tiopachi paꞌpamiratuameeo, Riosi Riosiwarie erapateretia aamo werapuawichioo. Muuua paikapieoi Riosi yeꞌkari aamo kiatiameeo, kuꞌika yasitopuapua waꞌa Eejesio tiopachi mochikameo, ihtaoi kuꞌiwa yorakekaopua puꞌkao, ihtaoi Riosichi simiyame kaawe masitekaopua puꞌkao.
\p
\v 15 Kaawe teeremio iintasa inisipuapua aamo tehkiwa, kaaweruma epechetoame tetewipuawichiopua amochio, aamo paamiratuachi yooraopua.
\v 16 Kaawe aamo neesetomitiapua pewatiame yasitoka, waꞌa tiopachi aamo masiteka ihsiachiopua. Waꞌa teetosaamua Timoteoa, waꞌachitia Riosie aamo tatakoriria cheriweka newipateretiachitia, waꞌa tiiao ki ookapi aamo keepunariamea tiame, Riosie newipatemapua puꞌkao, ahpo Taana Eesusichi paparasoo.
\c 5
\s Paoro tuuyerewa Timoteoo, Riosichi paparamechi simiyameo
\p
\v 1 Neee Paoroa aamo Timoteoo, aamo chaanenania, yooreka aamo tuuyenurenania oꞌochetiameo, kihta teꞌya cheeka, kaawe eꞌreka tuuyepuapua ohso kaawe, aamo noono itapiti naneꞌremichio tuuyamechitia.
\v 2 Ooweru paꞌpamiraopua, aamo yeeye yooreka nayewiamechitia, tuuyepuapua puꞌkao. Ooweru kuteweopua pehjio, aamo pipinichitia yooreka tuuyepuapua puꞌkao, kihta ahjama kochiwa erakoka.
\p
\v 3 Aaata ooweru ahpo kuuna mukipatekameopua, kaawe eꞌraka kuꞌipuapua puꞌkao, itapitichi tísia tesiwa teeresoopua puꞌkao.\fig |200-cn01894B.tif|col|||Aaata ooka tiꞌtijoe kunamukukame ihkokena.|5:3\fig*
\v 4 Nape tatanaesoopua ahpo kuꞌime teꞌteriame, puꞌka tatanarao, kaawe kuꞌinurepuapua ahpo yeeyeo. Iinuesoopua susuwarao, kakawarao tiameo, kaawe kuꞌinurepuapua puꞌkaoi ahpo suꞌsuo ahpo kaꞌkaoi. Riosia waꞌa teꞌtereka mochitoniameo, tísia kaawe eꞌreka tetewamepua, neeeai waꞌachi eꞌraka tetewamepua.
\v 5 Aaata kunamukukamea, teꞌta Riosichi paparame enesaa, Riosichiche paparaka yasitoamepua ahpo kuꞌipuao, senepi taawechi Riosichi paparaka itaka, ihtaoi itapiti ahpo nakiwiao.
\v 6 Nape aaata kunamukukame ki Riosichi paparaka yasitoamea, oowera ahpochewichio taꞌirewa yooraka yasitoamepua. Puuu kunamukukamea, mukukamekatepua Riosiwichioo, ahjáka yasitoamekai.
\v 7 Iꞌka aamo kaaweruma teerenurewa, masitepuapua tiame waꞌa tiopachi mochikameo, kihta ki kaawe ihsio tuupuaichiopua, aaataeoi.
\v 8 Aaata kaꞌchi erakoamea ahpo tetejima tísia tesiwa teꞌtereka mochikoio, ihtaoi itapiti nakiwekao, ahpo taꞌpechioi epeche teꞌta tesiwa teewenioio kiisi kuꞌyamea, kiisi Riosichi teerepuame inataka yasitoamepua; waꞌa tiiamea, ohso kiisi kaawe tiiamepua Riosichio, ki aaatachitia ki Riosichi paparamechitiao.
\p
\v 9 Puuu ooweru kunamukukamea, ahpo kuꞌipua teerepuawichioo tiopachi mochitoameeo, eee tiiame enemetepua: paika weerewa oosa mariki uꞌmatoame paamuame; piiripi waꞌapi kuunaeka yasitokame, ahpo kuuna ahjaka yasitoiopua.
\v 10 Puuua tiameo, ahpo yooraka yasitoriao, kaꞌkaruma yooraka yasitokame, tetewitiame enemeripua; ahpo tatanaopua tiameo, kaꞌkarumache tuuyewa tuuyeka yasitokame; ahpo taꞌpechi asikoameoiopua, kaawe uuka asipukame; aaata Riosichi paparameo, ki weruma ahpo uuka yorakekame enemeripua; aaata itapiti aiwaka mochitoameo, kuꞌikache yasitokame enemeripua; ihta itapitioi, kaaweruma ihsika yasitokame.
\p
\v 11 Puuu ooweruo ki ahsepame paamuameopua paika weerewa oosa mariki paaumpario, ki iyopupuapua puꞌkao kuꞌiwa kiapuawichoo, seenekachioi neewinaremerikopua pehjio.
\v 12 Neewisaapua, kaꞌchi iika tekipanamaoipua tiopachio, ahpo yooraka yasitomia chaachapatiameopua.
\v 13 Puuua tiameo kuꞌiwa kiatiaopua, nanasiname enepamaoipua, oowera waꞌami ahka ohjonaremapua taꞌpechiamikoio, ki kaꞌkaruma iꞌtopakaopua naawesari, itapiti naawesaniachiopua peyachi papakika, itapiti kichiweme tiiame chanika, puꞌka waꞌa tiiameche nokaka mochitomapua, kihta yooraka wekateka.
\v 14 Pukaepania puꞌkao, nenewijeraninia ohso kaawe, tatanatasaopua mooena yasimichiopua, ahpo tatanakamera inateka. Puꞌka waꞌa teeka yasitosoopua puꞌkao, Naꞌarari Noonoraa, kaꞌchi iika aaata naꞌaretemapua puꞌkao.
\v 15 Nape ookapi ooweru kunamukukame ki teꞌta paamuame ki nenewikameopua, seewiamenia puꞌkao, seꞌwikamekopua Riosi kaaweruma pooerachio, Satanasikamera ahpo eratiakamera nokisikamepua, ahkaoi taꞌpechiami taꞌratoka, kiisi kaawe teꞌtereniame nokisíka.
\p
\v 16 Aaata Riosichi paparame kunamukukame tetejimaeme enesaa, puꞌka tetejimarao, kuꞌinurepuapua puꞌkao, kihta pehtiame teeremichiopua tiopachi mochikamewichioo, puꞌka kunamukukame kuꞌipuao. Puꞌka ahpo tejima kunamukukame kuꞌika yasitosoopua, yooma tiopachi kuꞌiwaa, ahsepamapua waikao, tiopachi kunamukukame mochikame kuꞌiwaa, teꞌta tesiwa teꞌtiamerawichioo.
\p
\v 17 Ehpeo neeea aamo Timoteoo, tiopachi paꞌpamiratuame ajawaniame aamo nayewemane. Yooma tiopachi paꞌpamiratuame kaawe yoorameopua ahpo tekipanao, epeche kaawe eꞌreka teteipuamepua puꞌkao, Riosi tuuyewa masitiame enesoo osopena, tuumika kiꞌyaka itapiti kianiame kuꞌiwao.
\v 18 Waꞌa tiiame aamo chaaniamenia, Riosia Ehkoriami Iyoterichio, eee cheeka iyoteteriamekopua: “Kaꞌte yakajipuremitiamua oisio, aamo tiirikoa tekejokiteka oitioiopua.” Sewinachi Iyoterichioiopua tiameo, eee chiiamepua: “Tekipanamea nateténiamepua.”
\p
\v 19 Aaata tiopachi paamiratuame aamo weerariao, aaata ki kaawe ihsiameko tuusoopua puꞌkao, nape ki uꞌpakame enesoo aaata tetewikame ookao paikaoiopua, kaꞌte pichikemitiamua puꞌkao, apoe piineri chiiao, kihta nateyamekopua.
\v 20 Aaata tiopachi paamiratuame ki kaawe iintokame tewitiameopua, ooka paikaoi tetewikame enesoopua pichiwatame, yooma tetewachi weeraka tísia teripuapua puꞌkao, waꞌa yoratioopua puꞌkao, yooma tetewikameo seewepakaopua, ki waꞌachi nokinaremichiopua.
\v 21 Iꞌka noꞌo aamo paꞌpamiratuame ajawanureriao, neeea Riosi tetewachio, Riosie Weratiame tetewachio, Riosi tewekachi kuꞌiwari tetewachio, tísia kaawe aamo neesetojeraninia puꞌkao, napati aamo tetewikapua aaataoi, ki aaata epeche teereweka.
\v 22 Kaꞌte aaata ajawamitiapua, ki neꞌnesaopua pahchao, ihtana tiiameopua puꞌkao, ki aaata aamo ki kaawe iintorio tuumichiopua, ki kaaweruma machenasoopua aamo weerariao.
\p
\v 23 Ihji noꞌo chiiaa, aaata tiꞌtijoeri chaachapamechitia tiiamepua: “Kaꞌte neeroiche nerojimitiamua, aamo eepi topachi kokoresaa, wiino iijipuapua kuꞌita.” Pukaepa muuua, keꞌchu aaata weeraiomua waꞌa tiopachio, kaawe neꞌnesa ihtana kaawe ihsiameko tijoe, werapuapua.
\p
\v 24 Aaata ki kaꞌkaruma nokiwaa, maꞌchiame tetewiniamepua keꞌchu ahjachi iꞌyaiopua itapiti ki kaawe iintoriao, nape iintuamepua tiameo, itapiti ki kaawe iintotiameo ki ikanati maꞌchiame tetewiniameo, ahkasi teꞌta iꞌyawesaape ahjachio. Pukaepa teꞌta kaawe tiia ahjachi iꞌyewesa werapuapua, aaata tiopachi paamiratumerio, seenekachi neipa ki kaawe ihsiamera enemaoipua weratiameo.
\v 25 Seenekachioiopua aaata kaawe ihsiwaa, ki ikanati tetewiniamepua, puuyeniame nakiyamepua aaata kuꞌwe naneꞌrepua kaawe ihsiamekoo, puꞌkao kaaweruma tiiao.
\c 6
\p
\v 1 Ehpeo aaata ahpo teekorachi teꞌtereniame nayewamane. Aaata teekoemea Riosichi paparame enesaa, yooreka tetewame enepuapua ahpo teekoo, kihta ki iyoriwa masitio tuupuaichiopua Riosio ahpo paparawiao, aaataeo wahjachi tiꞌtijoerieopua, ki naꞌarepuawichiopua tiaméo, taamoo aamo teekoeka mochikameo, Riosichi paparaniame aamo masitiao.
\p
\v 2 Aaata Riosichi paparame teekoemea, waꞌapitia teekochitia yooreka tetewimetepua puꞌkao, Riosichi paparamekoipua puꞌkao ahpochitia. Riosichi paparamekopua ahpo teekoo, epeche teꞌta yooreka tetewimeripua puꞌkao, puꞌkao Riosichio, ahpo paꞌchichitia tiiamekoopua puꞌkao. Puꞌkawichioo epeche kaawe yorakeka yorametepua puꞌka tekipanakiao, naꞌpa Riosichi teꞌteriamekapaopua. Yooma iꞌka noꞌo aamo masitenuriao, utewaeme waꞌa tiiame masitepuapua, yooma waꞌami ahkaoi aamo asiyachio.
\s Teꞌta pichiwari paarasari
\p
\v 3 Aaata seenu teꞌterewa masitiamea, iꞌka Eesusi Riosie Weratiamechi simiyame kaꞌkarumara tuuyewario, puꞌka tuuyewarichi taamo paparaka mochitoao,
\v 4 ahpokamera tísia weruma uukao, ahpokamera tísia machiyame maaekoamepua. Puuua ahpo Riosichi simiyame seesenu teꞌterepuame masitiamechio, tísia ahpo weruma erakoniame tiiamechipua waꞌao, tísia ahpo machiyamera erakoniamechi, tísia nekakoniame mehtáchaniachi, tísia nasiwaniame mehtachaniachi, tísia aaata naꞌarewachi, tísia nekamucheniachi aaata, tísia aaata ikotukewachi.
\v 5 Senepi taawechi waꞌapitia nekakoka maꞌchirepaniachipua waꞌao, ki ijinatarichi wewekaniachikapapua waꞌao, kiisi machiniamekapa waꞌao, Riosichi eename pichiwario. Puuua, kihta machiyamepua, teꞌta Riosi pichiwariraopua, teꞌta Riosi iintoriaopua ahpo Taanaeo. Puuua oowera seenu Riosichi simiyame masiteka, tomiwaremio erakoamepua. Nape muuu Timoteoa, kaꞌte puꞌka teꞌteria ahjama, teeremitiamua.
\v 6 Teemea Riosichi teꞌta paparamea, paarasatiamepua paarasatiao, nape taamo Riosichi paarasatiaa ki toomipua. Ihji paarasaria, teꞌta Riosie teꞌta taamo taꞌiria mochitowa puuua, Apoe teꞌta taamo Riosi kiasiaeo, ihtaoi taamo nakiwiao.
\v 7 Iꞌwa weeechi naawaio, kihta iinueka naawakame teemea; waꞌachitia mukisaoi, kihta iꞌtomeripua.
\v 8 Waꞌa teeremeri enesoo mukiniamechio, kihta teꞌta weemumete teemea iꞌka wehjoarichi iintuameo, kooameche wisasoriche iinuekaio, kaawe erakomete teemea.
\v 9 Yooma uꞌmatoka ohso eꞌrameopua paarasarichio, puꞌka ki kaaweruma tísia weemuwa paarasari ihsumarachi, wichiyamepua. Puuu ki kaꞌkaruma weemuniamea, taamo ki kaꞌkaruma nokiwa ihsitiamepua, kiisi ijinata nokiwame, naꞌara nokiwame aaata tiame. Yooma ihji ki kaꞌkaruma nokiwamea, kominarichi simiwamepua, ahkasi yooma siꞌriwachi ki kaꞌkarumachi wichiwachi, ahpoo pihtuka kajuyachisi.
\v 10 Siintoka weemuniame toomichio, yooma ihta ki kaꞌkaruma naawarapua. Muuwaeme siintoka uꞌmatoka toomichi weemupakamea, poanatukamepua Riosichio, Riosichi ahpo paparao; waꞌa iikapa puuua, tísia yuuwesi mochitoamepua, epeche tísia tomiwaereka mochinarewae aiwaka.
\s Aachin teeka ahpo inateniame Riosichi paparaniamewichioo
\p
\v 11 Nape muuu Timoteo Riosiwichio tekipanamekapao, yooma waꞌa tiiame weemuwachio, ikicha enepapuapua, kaawe aamo neesetoka, ki waꞌa tiamechi aamo wichipuawichiopua. Ohso kaawe muuua, kaawerumache ihsiame enepuapua, pewatiame yasitoame Riosichio, aamo Riosichi paparawa yasitoao, aamo tesiwa tiiame uuyame iikachio, kihta nahsinepaka tetewame aamo Riosichi poponíwao, pipiniwa tiaméo.
\v 12 Utewaeme teetopuapua aamo Riosichi paparaniame nehpuwarichio; pewatiame chapika yasitomitiamua, aamo ki wahjiame ahjari Riosie aamo kiaretiao, Riosie aamo uumichio paajutetiao. Muuua puꞌka ki wahjiame ahjari aamo Riosie kiaretiao, ki ookapi tuuyekame muuua, Eesusi Riosi Taanarachi paparakapa kiatiameko tuuka.
\v 13 Iꞌka noꞌo aamo tísia neesetotiao, kiisi toaka aamo teetojeraninia puꞌkao, kaawe teetokache kihta seꞌwikao, Riosi yooma ihta ahjari kiꞌyamera tetewachio, Eesusi Riosie Weratiame tetewachiopua tiameo, puuua Poonsio Piiratochio, ahpo maꞌchitakame aatanakoo, Piiratoe ahpo iinatukenioio.
\v 14 Neeea iꞌka noꞌo aamo neesetotiao, tísia aamo neesetojeraninia, ahkasi Eesusi Riosie Weratiame taamo Paamira eenachisi, kihta aamo ki kaawe chaachapapuaichiopua, aaataeo.
\v 15 Ihji Eesusi enameria, Riosi teꞌta yomari aampa tiiamera eꞌrariapua, ihta taawechi yachatiamechio, tekitepuame; ihji Eesusi Riosie tekimichio eratiamea, teꞌta weeweruma yaꞌyawichio, teꞌta yomatiame aampa werumara tiiamepua, teꞌta paꞌpamiratuameopua, teꞌta aampa Paamiratuamepua tiameo.
\v 16 Puuu Eesusi Noonoraa, apoe eenechi tekitemeria Eesusio kaꞌchitia taawechi mukuyamepua; puuua teꞌta ki teesa taajenachi kahtiamerapua; aaataai puꞌkao, kiisi ahseme tiiachi kahtiachio; puꞌkao aaataeoi ki teteiwamepua ahpo pusieo, kaꞌchi iika tetewime tiiameopua puꞌkao.
\p ¡Puꞌkakamera teꞌta weruma iyoriwa kiapuamepua taamoeo, teꞌta weruma utewari iinuewa eꞌrewa tiame! Waꞌa tiiame eꞌrejeremitiapua naajúu.
\p
\v 17 Puꞌka tiꞌtijoe ooweru tiame tísia paarasateka mochitoameo, chaanepuapua puꞌkao, puꞌka ahpo iinueka mochikao, Riosi waꞌa tiiame teewewiopa, waꞌa teꞌterio tuuyepuapua puꞌkao, pukaeo waꞌa tiiae taꞌiria mochitomichiopua, nape kihta weruma ahpo erakoka, tísia paarasatiapao. Puꞌkao chaanepuapua tiameo, puꞌka weeechi iintuame ahpo paarasatiao, kihtawichio kaaweko tuuyepuapua, Riosichi kaawe teꞌterepuao, puꞌka paarasario kihta tehpe eꞌramekopapua. Waꞌa tiiachipao, ohso kaawe Riosichikamera paparaka mochitonurepuapua puꞌkao, apoe teꞌta Riosi ahjamerakamerachi, pukachikamera teꞌta oowe erakoka, taamoo chuurame wiꞌsuame taamo nakiwia kiꞌyamechi.
\v 18 Puꞌka paarasatiameo chaanepuapua tiameo, puꞌka paarasario, ahpo iinuekaeopua paarasatiao, ihkokewa erakoka mochitojerepuapua puꞌkao, tísia tesiwa teꞌtereka tooremuachiopua. Waꞌa nokaka mochitosoopua ihkokekao, teꞌta pichiwari paarasari iinuemio tuuyepuapua puꞌkao, Riosi ahjama mochiwachiopua, Riosi yeꞌkarichi.
\v 19 Puuu waꞌa teꞌtereka mochitosaapua ahpo paarasari tooremuame ihkokeka mochitokamea, teꞌpa tewekachikamera paarasari muuwepatiame enemapua waikao, teꞌta Riosi ahjama ahpo mochimiachiopua tewekachio, ahkasi ki wahjiamesio.
\s Paoro kajuyachi Timoteo neesetotewa
\p
\v 20 Muuu Timoteoa noꞌo aamo uhjurariao, yoorakache itipipuapua waꞌa tiꞌtiopachiamio. Kaꞌte eꞌwaka keepumitia ki ijinatame nayewao. Puuu tiꞌtijoea tamochio, ki ookapi itapiti, tísia Riosichi simiyame peenewari machiwari teewaka masitiamepua, nape oowera waꞌa chaachapaka nayewamepua, kihta machiyai Riosichi simiyameo.
\v 21 Ookapi Riosichi paparame tiꞌtijoea ooweru tiamea, puꞌka tiꞌtijoe wihkuari masitiakamera naꞌnaritoamepua waꞌasi, ikicha simiyamera ki Riosichi paparaniamera, ipaka tetewamepua Eesusichi ahpo paparao, Riosie Weratiameo. Yooma aamo kahtiachi mochikamewichioo, Riosichi itayamenia puꞌkao, ahpo teꞌta kaawerumari kiasimichioo.
\p Iꞌwasi ihjia, kaawe erakoka ehpeo. Waꞌa ikisaa tísia kaawe enemapua.