\id 2TI
\h Oosa Timoteo Iyotepawa
\mt2 Paoro Oosa Simiyame
\mt1 Timoteo
\mt2 Iyotepawa
\c 1
\s Teepotari
\p
\v 1 Neee Paoro Riosie Weratiame weratiamea, iꞌka weemera ahjarichi simiyame nayewemichio Riosi eꞌrarie uhjuratiamenia, yomatiame ahkaoi tiꞌtijoeri noꞌo nayewemichiopua, iꞌka weemera ahjario aaataoi ahpo Taanachi Eesusi paparasoo kiamo tuuyame.
\v 2 Iꞌka iyojura iyotiamenia aamowichio Timoteoo, noꞌo taanachitia Riosichi tiiameo. Aamoo neeea, taamo Noono tewekachi kahtiameo, Apoe Eesusi Riosie Weratiameopua tiameo, ahpo aamo tesiwa eꞌrewaeo, aamo iikachio taꞌiria yasirewa kiajeraninia.
\s Riosie Weratiame chiia pichiwataniame
\p
\v 3 Neee Paoroa, senepi taawechi aamowichio nayewiainia Riosio, cheriwema kiꞌyamenia puꞌkao, aamoo kaawe teetotiamekopua, aamo Riosichi teetowa tehkiwachiopua. Neeea Riosieo ahsieme cheriwetiameko noꞌo tatakoririao eꞌraka yorakiamenia, noꞌo ehkoriami noonoriwa teꞌta Riosi iyoririachitia inisitoka.
\v 4 Senepi aamo iijinatepaio, aamo nanararia iijinatepamenia aamo mochikachi oꞌinia machenarioio. Waꞌa tiiame iijinatepakaopua, eenechi tísia aamo tetewinariapame neeea, eenechi aamo ahjama tísia kaawe eranarekaopua.
\v 5 Neeea aamo tetewinareka yasitoamepua tiameo, tísia aamo iijinatepapaopua, Eesusi Riosie Weratiamechi aamo paparamekoo, kiꞌyami Roira tewaniame aamo suꞌsu Eesusichi paparariachitiaopua, aamo yeeye Eunise tewaniame Eesusichi paparariachitiaopua tiame. Ehpeo neeea aamooi, waꞌachitia tetewamepua, tísia Eesusi Riosie Weratiamechi paparáme.
\p
\v 6 Pukaepa neeea, amochi oijenatejeraninia tahjewachitia amochi teetomichiopua, Riosi yeꞌkari amochi yahchariaopua, noꞌo amochi seekarepaka uhjurioiopua Riosi kaaweruma tuuyewari kihta seeweka nayewatumichioo,
\v 7 Riosio taamoo, kihta majawewa kiꞌyakamekopapua, aaataoi kihta seewewa. Riosia apoeekamera taamo utewataniame erakotiamepua. Riosia tamochi yahchakamepua tiameo, taamo ahpo nakika mochitopua erakoniame, puꞌka nakiwarie taamo nokisimichiopua aaatachioi, kihta ki kaawe teerepuame aamo teerepuawichio aaata aamo masitiachio.
\v 8 Waꞌa teeka kuꞌitoniamekapamua Riosieo, kaꞌte suuwe eꞌraka nayewamitiamua aaataoiomua, iꞌka Eesusi taamo Paamirachi simiyame nayewaiopua; peereso aamo yachapo tuuwai, noochitia Eesusi taamo Paamirachi simiyame nayewatuapaopua. Ohsotiamua, tísia waꞌa chaaneniaiopua, tísia aiwatoaimua taamo Paamira Eesusichi simiyame nayewatuapao, erasika anachatopuapua puꞌkao, noꞌoo teꞌta teetoriachitia.
\v 9 Riosia kihta yoorarie natetewachi taamo newipatekamepua, taamo apochiche teetoka taamo ahjatomichiopua, Riosia waꞌa tiiame inatakamekapapua, naayachisi oꞌinia, ahpo tísia taamo nakiwari, taamo neꞌnetenariapapua, yooma ihta Eesusi taamowichio iintoriaeopua. Waꞌa iintokame Riosia tamochio, yooma ahpo Taana Eesusichi paparakamewichio inatakao. Waꞌa tiiame inatakame Riosia, keꞌchu kihta iꞌka wehjoarikoio.
\v 10 Puꞌka keꞌchu naayachi ahpo eꞌraria taamo tetewitiamepua ehpe taawechiamio, ahpo Taana Eesusi naawateriachi tetewitekamepua. Puuu ahpo naawateria iintokamekopua taamo newipatekao, wahjipari utewarira newitosaapapua. Puuu Riosi naawateria iintokamepua tiameo, taamo maꞌchiame pahtetekaopua, ahpo kaaweruma tuuyewarichi simiyameo, aachin teeka taamo teimeri weemera ahjariopua, ahkasi ki wahjiamesi ahjaniameo.
\p
\v 11 Riosia noꞌoo, apoe waꞌapi weerakamepua ki iꞌisaeri nayewatumichioopua, ahpo naawateria Eesusi tewaniame taamowichio iintoria nayewemichioopua, yooma tiꞌtijoeopua ooweruoiopua tiame.
\v 12 Puꞌka yoorapa iꞌwa kahtiamenia peereso aiwakao. Nape waꞌa teereniainia iꞌwao, kiisi tesiwa erapame neeea, ki teesa ahjachi oowe eꞌriamekapaopua, aatanachi noꞌo paparariao, pukachi teꞌta ahjachi erapame neeea. Pukaepa kiisiki seꞌwi erapamenia, apoeopua tísia ahpo utewarie noꞌo kuꞌisiamekopaopua, iꞌka tehki ki teeweka noꞌo simitemichio noꞌo kiꞌyariachiopua, teꞌta utewaeme kaawe neesetokaopua, ahkasi yomatiame noꞌo yoorachisi iꞌka tehki noꞌo nuureriaopua, ahkasi Eesusi eenechi eenachisi teeretopuameo.
\p
\v 13 Waꞌa tiiachio muuu Timoteoa, teꞌta noꞌo masiteria inamuriachitia masitepuapua, aaataoi aamo masitiaopua, puꞌka teꞌta kaaweruma Eesusie tuuyewario, kiisi seꞌwi ikika masiteka. Muuua tiameo, kiisi seꞌwi teetopuapua Riosie Weratiamechi aamo paparaopua, Riosie Weratiame nakirewarachi yasitokaopua.
\v 14 Teꞌta Kaaweruma Riosiwari kuꞌiwarie tamochi yasitoameopua, teꞌta kaawe neesetopuapua, iꞌka pichiwarichi simiyameo, Riosio aamo teꞌta masitemichio kiꞌyariao.
\p
\v 15 Naneꞌriame muuuapa, yooma Aasia weeechiami noꞌo kahtiachi eꞌenakameopua, yooma eenechi nonowakamekopapua; ooka puuua waꞌasi Aasia nonowakamea, Iijero tewaniame, piirea Eremojene tewaniame enekamepua.
\v 16 Onesijoro tewaniame taꞌperachio, Riosio teꞌta kaawe teewejeraninia puꞌkao, puꞌka Onesijorokamera tísia kaawe iintoriopua weesa noꞌo kuꞌiwa uꞌyepakao, iꞌwa peereso noꞌo yachatiachio, kihta suuwe erapaka, noꞌo peereso yachatioiopua.
\v 17 Ohsotia puuua iꞌwa Rooma weruma muuwarichi asisaopua, noꞌo yaapi eꞌraka iꞌyariapua ahkasi noꞌo tewayachisi.
\v 18 Tísia kaawe enemiipua puꞌkao, Apoe taamo Paamira Eesusi eenechi enasaa, itapiti tísia kaaweruma tiiame ikitesaa. Muuu Timoteoa naneꞌriame muuuapa, Eejesio aamo ahjama taamo mochikoio, tísia kaawe taamo kuꞌiriopua Onesijoroa.
\c 2
\s Riosie Weratiame kaaweruma soontarowara eneniame
\p
\v 1 Pukaepa muuu Timoteo noꞌo Riosichi taanachitia yasitoamea, kaꞌte wirorepamitiamua aamo Riosichi teetowao; ohsotia utewaeme teetopuapua aamo Riosi tehkiwachio, yooma Riosie Weratiame utewari aamo kiasiaeo.
\v 2 Muuua noꞌoo muuwaeme tiꞌtijoeri noꞌo masiteria tetewiriachitia inamuriachitia tiame, puꞌka masitenurapuapua aamo ajawasiao, ahkaoi mochiwachiami enapaio.
\p
\v 3 Puꞌka aamo tehkiwachi ahkaoi aamo ihtoachio, teꞌta Riosie Weratiame soontarowachitia teeretopuapua, ihtaoi aamo aiwasiaio muuua, anachatopuapua.
\v 4 Muuu Timoteoa kaꞌte papakimitiamua itapiti ki Eesusi Riosie Weratiamee aamo nuuretiachio, aaataai kaaweruma soontarochitia enenariaa, kiisi seꞌwi ihsiamepua ahpo teꞌta kapitai nuureretiao, seesenu nokiwachi papakikaopua, ahpoche nuureretia iyorika teeretoamechepua.
\v 5 Waꞌachitia newitowa teꞌewa nokayameai, teꞌta kaawe teꞌepua yachatiameche naꞌnaritomerichepua; ki puꞌka kaawe teꞌepua ki naꞌnaritosaa, kiisi newitomeripua. Pukaepa muuuai Timoteoa, tísia kaawe teetoka iꞌtomerichemua, Riosichi aamo tehkiwao; waꞌa aamo teetoame enesoopua Riosia, tísia kaawe aamo iintorio tuumapua.
\v 6 Aaata ahpo echaria tísia kaawe neesetokamea, tísia paarasatemeripua ahpo echariao. Waꞌachitia muuu Timoteoai, tísia paarasatemeri muuua Riosiwichio aamo ihsika teeretoriao.
\v 7 Naakoo, kaawe neꞌnemitiakoomua iꞌka noꞌo aamo chiiao, Apoe tewekachi kahtiame taamo Noono, ihsisimeripua aamo teꞌta pahtetekao, aachin tiiamekoopua noꞌo aamo chiiao.
\p
\v 8 Kaꞌte natakepamitiamua aamo masitia tuuyemiao, yooma Eesusichi simiyame eee teereriame: Eesusia ehkoriami Raawitaru tetejimarisiwachi oꞌinia tijoetutetiamepua Riosieo, Riosi Taanarachitia naawakao; neipami taamo tatakoriria choꞌweka mukisaapua, eenechi oijenasaapua, tewekachi mooenakamepua ahpo Noono kahtiachi. Puuupua noꞌo teꞌta kaaweruma tuuyetoaa, aachin teeka taamo tatakorireka mochitowachi newipatetiamea.
\v 9 Puꞌka Riosie Weratiame tuuyewarira tuuyesika yasitoapao, káátisia aiwari anachaka yositoamenia, ahkasi kaarenaeoi oꞌoyaekaopua iꞌwao, káátisia aaata koꞌyamechitia.\fig |202-CN02068B.TIF|col|||Paoroa perekarichio, tarachi kaarenae oꞌyeraeka yasitenia.|2:9\fig* Nape neeea kaarenae oꞌyaeka yachanioio, Riosi kaaweruma tuuyewaria, kihta oꞌyetiamepua, aaataai kaawe ahjachi pichikeme tiiamepua.
\v 10 Neeea waꞌa tiiachipao, kiisi toaka simitiamenia Riosi kaaweruma tuuyewario nayewatukao, tísia aiwaka yasitoai iꞌwao. Neeea ihtaoi kokosa yoraniaio anachaka yasitonariamenia, Riosio yomatiame ahpo Taanachi paparakameopua, ahpowichio uumichiopua, ahpo tatanachitia iintapaka, puꞌkao ahpo tatakoriria newipateriaopua, ki wahjiamesi ahjari kiamichiopua.
\p
\v 11 Ihji noꞌo chanimia Riosie Weratiamechi simiyamea, pichiwari puuua:
\q Teeme Riosie Weratiame ahjama mukukameka erakoame enesaa,
\q2 puꞌka ahjamakamera mochimia eenechi oijenakameko erakometepua,
\q2 tewekachi Riosie Weratiame yeꞌkarichi.
\q
\v 12 Eesusiwichio kokosari anachaka mochitokamekai teemea iꞌwa weeechio,
\q2 Riosie Weratiamee apochi uupuamepua,
\q2 ahpo ahjamakamera mochipuawichiopua,
\q2 ahpo tewekachi yeꞌkarichío.
\q Taamo Eesusi ahjama teꞌterewa kaꞌitasoo,
\q2 Apoe Eesusia tiameo, waꞌachitia taamo kaꞌitamapua,
\q2 ahpo taamo ahjama teerewao,
\q2 wahka ihtoriachi teꞌta kateweri taawechio.
\q
\v 13 Teemea Eesusichi paparai ki kaawe noonoikoio,
\q2 Apoeo kiisi taamo toayamepua ahpo nakiraeo;
\q1 kaꞌchitia waꞌa iintomeri tiiamekapaopua,
\q2 ahpo Riosi nakiwariwae tisiwa taamo nakiyamekapaopua.
\s Piiripi Eesusiwichio tekipaname kaawe iintoria nayewaniame
\p
\v 14 Muuu Timoteoa, puꞌka aamo ajawaria masitemichioo, yooma iꞌka aamo noꞌo iyoteparia, inatepateka masitenurapuapua puꞌkao. Puꞌka aamo ajawaria masitemia keepumeriopua tiameo, Riosi tetewachi chaanenurapuapua, kihta naawesari chaachapanurepuapua puꞌkao, kihtawichio kaawekameopua, nekakome chaachapaniame nayewaniameoi, kihtawichio kaawekameopua; waꞌa tiiame naawesaria, kaawe erakoka keepuamekaiopua Riosi kaaweruma tuuyewario, nahsinapatemeripua keepuameoi.
\v 15 Muuu Timoteoa Riosi tetewachio, utewaeme tekipaname enepuapua Riosi tehkiwachio, tísia kaawe teetoame Riosi kaaweruma tuuyewari masiteniamechio. Waꞌa teetoka masitiame enesaamua, kihta suuwe erapamerimua itachioi itapitichi aamo yoorao. Kihta nekakome cheeka masitiame enesaamua, kihta Riosie teripuame teeremerimua aamo masitewachio, teꞌta kaawe tiiame teetoka masitiamekapaomua, teꞌta pichiwarichi simiyameopua, Riosi naera.
\v 16 Itapiti Riosichi simiyame aamo nayeoiopua aaatao, kaꞌte aaatae aamo seꞌwi ikimitiamua, aaata peyachí ki Riosichi simiyame nayewanariameeopua; waꞌa tiiame peyachi papakiwachiopua nayewamiao, oowera seꞌwi ikiniame ikitiamepua.
\v 17 Puuu waꞌa teꞌtiame naawesari kihtawichio kaawekamea, taamo waꞌapi soopamapua, koꞌkoame kaꞌchi iika yachapaniame ikiniamechitia ikiwamepua. Waꞌa ikikameka teꞌteriame Iimeneoa, Iireto tewaniameopua tiameo,
\v 18 Riosi pichiwari masitewaopua, seꞌwi masitiamekapa waꞌa ijikikame puuua. Puuu waꞌa iikame tiꞌtijoea, puꞌka tiꞌtijoeri mukukoi eenechi oijenaniameo, ikikamekopa chaachapaka masitiamekapa. Puuu aapoea puꞌka eenechi oijenaniameo, taamo iikachiche waꞌa erakoniameko tuuyamepua, Riosio ki taamo oijenatemerikopua, eenechi weemera weerewa taamo kiꞌyakaopua. Yooma iꞌka inamukamea, wekamupakamepua ookapiopa, Riosichi paparameo.
\v 19 Nape Riosia, seꞌwi masitiameopua ahpo pichiwarichi simiyame tuuyewario, tetewaka yasitoamepua aatanakamerakoopua ki ahpo ijinuwao. Riosi pichiwariraa, kaari nawateraka tiiamepua, pukachi nawaterachi eee cheeka iyotetiame: “Apoe taamo tewekachi kahtiame Noonoa, teꞌta machika tetewamerapua ahpo ijinuwao.” Piirechi Riosi pichiwari waꞌachi nawaterachi iyoteriaapua tiameo, eee chiiámepua: “Yooma Riosie Weratiamechi teꞌteriamea, teꞌta Riosi pichiwarira masitiamerapua, puuua teꞌta pichiwa poanatukame enemetepua, ihtaoi ki kaꞌkaruma nokiwamechio.”
\p
\v 20 Aaata tísia paarasatiame taꞌperawachio, ki ookapi itapiti iinuemepua tísia nateyame, itapiti pehtori oꞌroe netetiame, tataparasi meetarieoi netetiame, puuu oropetoria, tataparasi pehtoria tiame teꞌta pahkotaniachiche ahjachi koiꞌwamepua. Nape waꞌachi taꞌpechioi iinueniamepua tiameo, senepi koꞌkomia ahjachi koiꞌwame, puuua wehchorie pehtoritatiamepua, kuuu oowarae netetiamekoio.
\v 21 Muuu Timoteoa, oꞌro pehtorika tiiame enemitia muuua, Riosi ahjae tekipananaria enenariaa ahpo tehkiwachio. Waꞌa tiiame ahjaera enenariaa Riosiwichioo, yomatiame aamo seꞌwimetechemua ki kaꞌkaruma nokiwameopua. Waꞌa teeresaamua, yooma ihta Riosiwichio yoraniamewichio, ahsepari kaawe tiiame enemerimua.
\p
\v 22 Ikicha enepamitiamua puꞌka tehtemari ki kaaweruma erakoka mochitoaopua, ihtaoi ki kaaweruma ikotuwaoi, Riosichiche paparame ahjama teeremitiamua, kaawerumache inatatoka, iꞌka eee tiiamechitia: Riosichi paparaniame teetowa, nakirewa teetowa, taꞌiria yasirewa teetoka tiame.
\v 23 Kaꞌte nehjiamitiamua, ki inatari tiiame iinatukewao. Puuu ki inatari iinatukewaa, oowera nekakowa chaachapaniameche mehtachamepua, ahkasioi nasiwaniame.
\v 24 Aaata Riosi yorakiamea, kiisi papakimetepua nekakowa chaachapaniachio; ohso kaawe muuua, kaawerumakamera enemitiamua aaatachioi, ki ikanati nekayame; yeꞌkame enemitiamua aamo masitiachio; kaawe eꞌreka nayewepuapua aaataoi, kihta yaapi eꞌraka nahsinepaka.
\v 25 Aaata aamo masitia naꞌara chaachapasoo, kaꞌte nekamitiapua pukachio, ohso kaawe teꞌta kaawe erapua tiiame nayewepuapua, tísia maꞌchiame tuuyeka aamo masitiao, ihtana achini tiiamekopua aamo masitiao. Waꞌa tiiame aamo masitesoopua puꞌkao, seenekachioi puuua, aamo chiiao oowe erapamapua, aamo masitiao tísia pichiwariko naneꞌrekapa.
\v 26 Waꞌa iikapaopua teꞌta aamo kaawe chiiame pahtepaopua, riaorósi wisikuewachi ahpo ruhjikameko erapamapua, riaorósikamera masitia pichikeka mochitoriamekopua.
\c 3
\s Achini teeremeri tiꞌtijoeri, kajuyachi taawechi
\p
\v 1 Waꞌa tiiachipao muuu Timoteoo, aamo naneꞌrejeraninia ehpiami kiisi kaawe nokiwamea, tísia epeche epecheche teetomerikopua, ahkasi kajuyachi taawechiopua, eee teꞌtereniame:
\v 2 waika taawechiamio tiꞌtijoeria, ahpochewichio erakoame enemeripua; toomichiche weemuame; ahpo oijerame ihta ahpo iinuekae; ahpo tiiao ki nuꞌnuntiko erakoame; ihtaoi Riosichi simiyameo tísia naꞌariame; kiisi ewakoame ahpo yayawao; kihta kaawe eꞌreka itipiame, itapiti tísia kaawe ikitetiaipua; puuua kiisi kaꞌkaruma tiꞌtijoeri enemeripua;
\v 3 kihta ahpo katewenariame apochio aaataoi ahjamao, kiisi aaata tesiwa eꞌriame enemapua; tiꞌtijoea ooweruapua tiameo, kaꞌchi iika ahpo teeweteme erakoame, ahpo ki kaaweruma nokiwa ikotuwao; tísia naꞌara chaachapame aaataoi; tísia naꞌra yoorame ahpo naꞌara chaachapae; aaataoi oorichitia niꞌepanarewa erakoame; yooma ihta kaaweruma nokiwameo, seepurawaeme;
\v 4 aaataoi ahpo kaawe uuyameo, pukamina naꞌara nokayame; aaataoi eeyowachi werapame; ki nuꞌuti ahpo erakoame; ahpo puꞌserewache iꞌyaka mochitoamea, Riosikamera puꞌserewa iꞌyaka mochitometepua;
\v 5 Riosi iyoriameka nokayamea kiisi waꞌa erakoaiopua, Riosi utewari kaꞌkaruma enepatiameo, wehchi ipaka tetewamepua puꞌkao.
\p Yooma puꞌka waꞌa teꞌteriame ahjamao, kiisi ahjama teeremitiamua.
\v 6 Puuu waꞌa teꞌteriame tiꞌtijoea, ahpo wihkuari naꞌararieopua taꞌpechiami asikokaopua ooweru piineri mochikachio, suwepori nokayamepua puꞌka ahjamao, kiisi ahpo waꞌinameopua waꞌa nokiwao, waꞌa puꞌseriamekapa. Puuu waꞌa nokiwame puꞌseriame oowerua, Riosi pichiwari eepi keepuka yasitoamekaio, kiisi iyorika inamuamepua,
\v 7 ahpo ki kaꞌkaruma ikotuwa puꞌserewae, panisutoniamekapa.
\v 8 Puuu wihkuari tiꞌtijoea, ehkoriami Aanesika teꞌteriamepua Amperesi tewaniamekoopua tiame, puuu ookaa ehkoriamio, Moiseo ahpo kaaweruma Riosichi simiyame masitenarioiopua, ahpo waꞌínekame. Puuu tiꞌtijoe aamo masitia naꞌarekamea, teꞌta wewekakamepua ahpo kaaweruma inatariwao, pukaepa kiisikoi inatamepua Riosi kaaweruma pichiwari chiiao. Puuua ahsieme naꞌarachi wewekakamepua, Riosichi paparawachi simiyameo.
\v 9 Nape puuua, kiisi mehkasi mehtamitepua ahpo wistuki masitiaeo, yooma tiꞌtijoerie naneꞌriamekopua puꞌkao, kiisi ijinatamekopua. Waꞌachi teꞌtereriame puuu ookaai ehkoriamio, Moisee ahpo waꞌinekameopua ahpo masitepuawichioo.
\s Paoro Timoteo tuuyewari kiꞌya
\p
\v 10 Muuu Timoteoa, kaawe machikamepua noꞌo masitewao, noꞌo aachin teeka yasitoriaopua tiameo, ihtana neꞌnetoka noꞌo teetoamekopua noꞌo masitewaeo. Naneꞌriame muuuapa tiameo, noꞌoo Riosichi teꞌta oowe eꞌreka yasitoamekopua, aachin teeka ki yaapi eꞌraka itapiti aiwaka anachaio, aachin teeka noꞌo nakika teetoriopua Riosichio, yooma ihta tiꞌtijoerichiopua tiame, kiisi toaka masiteka yasitokaopua, Riosi tehkiwachio.
\v 11 Naneꞌriamemua aachin teeka noꞌo naꞌara yoraretioopua tiameo, aachin teeka noꞌo aiwariopua Antiokía kahtiaiopua weruma mochiwachio, Iikonio muuwari mochiwachiopua tiame, waꞌa ikisa Rihtirá tewaniachi weruma muuwari mochiwachiopua tiame, aachin teeka noꞌo anachaka yasitorio, tísia noꞌo naꞌara yoranioiopua tiꞌtijoeri nanaarameeo. Nape teꞌta taamo Paamira tewekachi kahtiamea, yooma iꞌka noꞌo naꞌara yoranioio, noꞌo newipatekamepua waꞌa naꞌara noꞌo yoraniachio.
\v 12 Waꞌatepua, aaata Riosi nakiyachitia yasitonariamea, Riosie Weratiamechi teꞌteriamewichioo, waꞌa ahpo yoraniame naꞌara yoraniame aiwameripua, nanaarameeo.
\v 13 Waꞌa teerenioipua, puuu ki kaꞌkarumaa, epeche epecheche teetomeripua ahpo naꞌara nokiwao, puuu wistuki maꞌmasitiamea tiamea, epeche epechechi teetomeripua ahpo wisikueka masitiaeo, epeche muuwepateka ahpo wihkuarieo.
\p
\v 14 Nape aamo Timoteoo neeea, aamo penipariakamera teꞌta yorajeraninia, aamo teꞌta kaawe tiio eꞌriamera, kiisi seꞌwika teetoka naneꞌriamekapa muuua, aatanakamera iintoriopua aamo masitekao,
\v 15 pukeri oꞌinia aamo nuꞌutikoi masitenioio. Aamo suꞌsuwa aamo yeeyewa tiame masitekamepua Ehkoriami Iyoterichi chiiao. Puꞌka Ehkoriami Iyoterichi naneꞌrekame Eesusichi simiyame, waꞌa iika Eesusichi paparakamemua Eesusichi newipamiapa, yooma ihta aamo tatakoririao.
\v 16 Yomatiame Tumipirichi Iyoteriaa, taamo Noono tewekachi kahtiamee eratesiwae iyotetiamepua, ehkoriami Riosi naꞌnayewaturaeo. \fig |203-AP-14-04.tif|col|||Aaata tijoea ehkoriami Riosi Tumipirichi Iyoteri neꞌnena, Apoe tewekachi taamo Noono eꞌrariae iyotesiwatiame.|3:16\fig*Pukaepa tísia kaaweruma tiiame puuua, taamo ahjae masitepuawichioo; taamo kaawe iintosoo, pukae Iyoterichi Riosi chiiae, kaawe taamo iintorio tuupuame teemea; ki kaawe taamo iintosoo, pukae ahpo Iyotaperichi chiiae, taamo terimapua; tísia kaawe ihsiamepua tiameo, teꞌta kaaweruma teeretoka taamo ohjoremichioopua, yooma ihta Riosie kaawerumachi simiyameo,
\v 17 ahsepari taamo yeꞌkari penipatiamepua enepatiamepua, yooma ihtaoi kaawerumachi simiyame yorapuamewichioo.
\c 4
\p
\v 1 Pukaepa neeea aamo Timoteoo, taamo Noono tewekachi kahtiame tetewachi, taamo Paamira Eesusi tetewachiopua tiameo, ahsieme Riosi kaaweruma tuuyewari aamo nayewatumichio weeramenia. Muuua aamo tuuyewarichio, Yooma aaata tiꞌtijoeri tuuyepuapua iꞌka Eesusi ihta wahka ihtoriachi taawechio, eenechi enamerikopua yomatiame tiꞌtijoe ooweruopua tiame katewemia, yomatiame ihta ahpo ki kaawe nokariao, ahjaka mochitoameopua pehjio, wahjipakameopua tiameo eenechi oijenatesaopua. Neipa tiꞌtijoeri katewesaapapua, yawichi yasipameripua, ahpo yeꞌkarichio yasipamiaopua yawichitumia.
\v 2 Muuu Timoteoa utewaeme aamo nayewatujeraninia iꞌka Riosi kaaweruma tuuyewario, nape aꞌchitia keenako aamo nayewatumia tiioio, ki tiioioi. Aaata ki oowe eꞌriameopua pehjio Riosi kaaweruma tuuyewarichio, oowe erapatepuapua puꞌkao. Aaata ki kaawe tiiame iintosoo, terika tuuyepuapua puꞌkao. Aaata ki ikanati pepenipame masitiaomua, kaꞌte nahsinepamitiamua, ohso kaawe kaawe tuuyeka pahtetepuapua puꞌkao.
\v 3 Waꞌa yooraka aamo masitejeraninia, ehpe waanami taawechiopua, epeche epecheche kihta inamunareka mochitomerikopua tiꞌtijoerio, Riosichi simiyameo. Oowera ahpo inamunariache keepumapua, ahpoche puꞌseria keepuka mochitonaremapua. Waꞌa teꞌteriapapua, ahpo puꞌseria masitiame maꞌmasitarikamera, iꞌyaka mochitonaremapua.
\v 4 Waꞌa teꞌteriapaopua, ipaka tetewaka mochitoame enemeripua, puꞌka teꞌta Riosi kaaweruma tuuyewario ahpo keepuka mochitoriao. Naatikamera inamunareka mochitomapua, oowera maaewarichi simiyame ehkoriami ahka nayewatiame, puꞌkao kihtawichio kaawekame.
\v 5 Nape waꞌa teeremioi muuu Timoteoa, pewatiame teetomitiapua amochio, kiisi sewina erapakaopua, peꞌyachi waꞌa teeremerikoio, kaꞌte sewina erapamitiamua. Waꞌapi teetoka masitepuapua, Riosichi eename newipatewaopua, ahkasi aamo ahsepatiachisi aamo yoramichio weratiao.
\p
\v 6 Noꞌo Riosiwichio tehkiwa iꞌwa weeechio, amori kajuyamenia, ki tehpe noꞌo yasitomeriko eꞌrame neeeapa; noꞌo ahjario neeea Riosiwichioo, noꞌo Noono tewekachi kahtiamewichio, noꞌo oowewariameko eꞌramenia.
\v 7 Neeea Riosiwichio kaaweruma nasiwari iintokameka eꞌramenia, noꞌoo ahsepari noꞌo iintokamekoopua puꞌkao. Neeea uꞌmasiwa teꞌetiame newitokameka eꞌramenia. Neeea Eesusichi noꞌo paparariasichi waꞌanaopua, kiisi toaka yasitoamenia Eesusichi noꞌo paparao.
\v 8 Pukaepa puꞌka teꞌta kateweri taawechi enasoopua, Apoe teꞌta Paamira Eesusia teꞌta kaawe katewiamekapaopua peereichitiao, noꞌoo teꞌta kaaweruma tetewikapaopua noꞌo kaaweruma iintoriawichioo, noꞌo teꞌta kaaweruma tiiari moꞌkoritemapua, yawichi oꞌro moꞌkori noꞌo moꞌkoritiamechítia, oꞌroe cheenkeritetiame, noꞌoo teꞌta Paamirachio, kiisi seꞌwika noꞌo ahjachi teꞌta paparaka yasitóriopa. Nape Eesusia ki noꞌochekamera waꞌa yorameripua, yomatiame aaata apochi tísia inataka puuyetoka mochitokameopua tiaméo, ahkasi ahpo eenechi eenariachisiopua, waꞌa iintomeripua.
\s Paoro Timoteo nuurewa iintojerawa waꞌasi
\p
\v 9 Timoteo, kúꞌwe enapuapua noꞌo neꞌnemiao, amori neeeche itipiame iꞌwaopua waꞌasio, amori kiꞌtiamepua aaata noꞌo kuꞌimeri iꞌwao.
\v 10 Reema tewaniamea, noꞌo toaka Tesaronika muuwarichi akipakamepua, epeche puꞌserekamekapapua iꞌka wehjoarichi iintuameo. Keresente tewaniamea, Kaarasia weeechi akiparupua, Tiitoa Raamasia weeerachi akipakapua.
\v 11 Ruukache itipiamepua iꞌwao, noꞌo ahjamao. Muuua waꞌana enamiao, Marako iꞌyasa noꞌo uꞌyepapuapua, puꞌkao noꞌo kuꞌimichioo, tísia nakiyamekane iꞌwao.
\v 12 Tikikoo neeea, Eejesio uhjurakamenia puꞌkao weruma muuwárichi, itapiti noꞌowichio yoramichiopua waꞌao.
\v 13 Muuua waꞌana eenaio, noꞌo kemajipora uꞌyepamitiapua, Karapo tewaniame taꞌperachi noꞌo towaria. Waꞌa noꞌo toakamenia tiame ookapi iyoteri piꞌpirinatiame, ookapi iyosi iyotetiame ahjama, paapiroe iyosi netetiamechi; puꞌkakamera epeche ki natakepaka noꞌo uꞌyepamitiapua, puꞌkao tísia noꞌo nakiyamekopapua.
\p
\v 14 Arejanto tewaniamea, sisioki tahtame chonaka tekipanamea, kiisi kaaweruma iintokamepua iꞌwa noochio. Nape puꞌkao, Apoe taamo Paamirakamera naneꞌriamepua puꞌkao, aachin teeka ahpo katewemiaopua puꞌkao.
\v 15 Enasaapa muuua, kaawe aamo inatepuapua puꞌkao, ki nuꞌuti noꞌo waꞌinekamekapu puuua, iꞌka Eesusichi simiyame taamo iꞌtoa nayewatukao.
\p
\v 16 Pukeri peereichi noꞌo iꞌtotioi noꞌo nehpupaka ihsioio, aaataai Riosichi paparame, ki noꞌo kuꞌika nehpupakapua. Nape waꞌa teꞌterekoi puꞌkao, kihta nekajeraninia Riosio pukachio.
\v 17 Nape Apoe Eesusi noꞌo Paamirache noꞌo ahjama ihsikapua waꞌa peereirachio, noochi yasitoamekapapua, noꞌo kuꞌika simitetotekapua puꞌka Riosi newiparichi simiyame tuuyewario, ahkasi yomatiame ki isaeri tiꞌtijoeri noꞌo nayewatumichioopua. Apoe Eesusi iintokapua noꞌo kuꞌika newitotekáo, puꞌka tahpitika erakoamechi noꞌo wenejikao, maꞌmawiyachitia noꞌo konariamechio.
\v 18 Pukaepa tísia teꞌta noꞌo Paamirachi paparamepua, tísia oowe eꞌriamenia puꞌkao, noꞌo newipatesimerikopua ihtaoi kiisi kaawe tiiame noꞌo natepasiachio, Apoeo ahpo tewekachi yeꞌkarichi ahpo ahjama yasimichio neesetomeriko tísia ahjachi eꞌramenia. Pukaepa ki wahjiamesi cheriwema kiꞌyaka yasitoamenia. Waꞌa ikijeraninia Eesusio, tewekachi kahtiameopua.
\s Kajuyachi teepotari; kaawe ikijera tiame
\p
\v 19 Neeea yooma Riosichi teꞌteriame noꞌochitiao, teepotari uhjurenania: Pirihkawichioo, Aakirawichioo, yooma Onesijoro ohjoerachi mochikamewichioopua tiame.
\v 20 Eerahto teepotepuapua tiame tetewisaa, puuua Koorintio muuwarichi itipikameo, waꞌami taamo uꞌmatoiopua. Tójimo tewaniameoi noꞌo teepotio tuuyepuapua puꞌkaoi, tetewisaa, Meerito muuwari mochiwachi noꞌo toariaopua, kokoriopao.
\v 21 Muuu Timoteoa, keꞌchu tuuroi iꞌyapuapua aamo enamiao. Yooma ihjia aamo teepotiamepua tiame: Euwuro tewaniame, Puurente, Riino, Kauria, yooma wahjachi Riosichi poponiwachitia mochitoame pipiniwachitia tiamé.
\p
\v 22 Iꞌwasi kajunane iꞌka iyojurachi nayewakaopua. Aamo ahjama yasitojera eꞌriamenia, Apoe taamo Paamira Eesusio. Yooma Riosichi poponiwa pipiniwa tiameo, amochi tísia kaawe teewejeraninia Riosio.
\p Waꞌasi ihjia. Kaawe ikisa naaju.