\id TIT
\h Tiito Iyotepawa
\mt2 Paoro
\mt1 Tiito
\mt2 Iyotepawa
\c 1
\s Teepotari
\p
\v 1 Kúíra Tiitoo. Neee Paoroa Riosi yorakiamenia, apoe Eesusi Riosie Weratiamee weratiame. Neeea iꞌka iyojurachio, papararichi simiyame aamo nayewemania, yooma Riosi ahpo ijinuwa enemichio uuriao, puꞌkao ahpo Taanachi Eesusichi paparakameo. Ihji ikachi iyojurachi noꞌo aamo iyotepaa, epeche maꞌchiame chiiame aamo iyotepamania, Riosi teꞌta pichiwarichi simiyameo, yooma aaata Eesusi Riosie Weratiamechi paparamewichioo, epeche kaawe teꞌteretomichiopua Riosichio, waꞌami tiꞌtiopachiami mochikameo, puꞌkao epeche kaawe tetewipuawichiopua Riosieo.
\v 2 Aamo iyotepaninia tiameo, puꞌka Eesusi Riosie Weratiamechi paparameo naneꞌremichiopua tiameo, pichiwa enemerikopua ahpo puuyeka mochitoa ki wahjiamesi ahjapuameo, puꞌkao Riosia, keꞌchu weee yasipoi oꞌiniao aamo kiamo eꞌraria. Riosia waꞌa ahpo eꞌrariaa, kiisi wistukipua, Riosia teꞌta pichiwa waꞌa iintomeripua, kiisi wistuamekapa.
\v 3 Ihji Riosi keꞌchu naayachi oꞌinia iintomo eꞌrariaa, ehpe taawechiami maꞌchitaniamepua ahpo nayewatuameéo. Neeeai apoe taamo Newipatiame Riosie uhjuratiamenia, ahpo eꞌraria maꞌchitamichiopua ehpe taawechiamio.
\v 4 Aamo Tiitoo, noꞌo poonichitia tetewameoopua Riosichio, waꞌachitia teꞌtiamekapa teemea Riosichi paparawao, iꞌka iyojura aamo iyotiamenia aamowichioo, Riosichi taamo oowe eꞌria. Neeea taamo Noono tewekachi kahtiameo, Eesusi taamo Newipatiameopua tiameo, amochi teerepajeraninia aamo iikachi tísia taꞌiria yasirao, aamo kaaweruma tesiwewaopua.
\s Tiito tekipanaria Kereta, neronasipa weeechi ohjoewachi
\p
\v 5 Noꞌoo aamo Kereta pawenasipa weeechi toakoioo, itapiti katewemichio waꞌa aamo toakamenia, waꞌa ikisa aaata paꞌpamiratumeri ajawamichio, yooma pipiripi tiꞌtiopachiamiopua ahkaoi mochiwachiamio, teꞌta noꞌoo aamo chaaneriachitia.\fig |204-cn02017B.tif|col|||Paoroa Tiitoo Kereta pawenasipa weeechi toani.|1:5\fig*
\v 6 Puuu paꞌpamiratuame aamo ajawamiaa, kaꞌkaruma tiiaeme enemeripua, kihta aꞌchi tiiame apochio, ihta itapiti aꞌchitiame ki kaawerumaopua; piiripi waꞌapi uupieme enemeri puuua; tatanaraai, Riosichi paparame enemeripua, kihta aꞌchitiame iintowa wenejitiame, kihta iinueme enemeripua, newitokache itapiti ki kaaweruma iintonarewao.
\v 7 Tiopachi teꞌta paamiratumeria, teꞌta Riosi iyoriwa tetewiniame enemeripua, puuua Riosi itapitiwara teꞌta neesetoamerakapapua; ki eꞌraka ihsiame enemeripua ahpo kuꞌkuiwachio; ki utewachi newitoka iintomeripua ahpo eꞌrarikameraopua; kiisi nawajiame enemeripua tiameo; kiisi nasiwame enemerikoipua; itapiti yooraka yowiwameoi, kihta naꞌara ihsika yowinariame enemeripua.
\v 8 Ohso kaawe puuua, teꞌta kaaweruma tijoe enemeripua, teꞌta kaaweruma inatame; aaata ki ahka cheꞌrepame tiiameo, kiꞌyame enemeri puuua ahpo taꞌpechi cheꞌrepamichioo; puuua kaaweruma eꞌrari iinueme enemeripua Riosichio, tísia ahpo kaawe neesetoame, ki kaawerumachi ahpo wichipuameo; ki nahsiname enemerioipua, ahpo Riosiwichio ihsiwao.
\v 9 Puuu paꞌpamiratuamea, kihta seꞌwi ikiyame kaawerumachi enemeripua; puuua Riosichewichio ihsiwache, ahpo teerewaeme; kaaweruma inataniame peenewarieme, enemeripua. Ahpo masitiaopua, kaawe machiyame enemeripua ahpo masiteretiao, peeneka puꞌseretiame aaataoi ahpo wahjachio, puꞌka ahpo kaaweruma masitiaeo kipoteka. Waꞌatiaopua, kaawe ahpo nehpupamichioopua, itapiti ahpo ki kaaweruma chaanetiao,
\p
\v 10 muuwaeme mochikamekopua tiꞌtijoeri, kiisi kaawe erakoame taamo masitiao. Puuu tiꞌtijoeria wahjachio, epeche utewa erakoame siichitepuwa nokiwameo, puꞌka ki ijinatari ahpo masitewaeo, pukae seꞌwichamepua Riosie kaawerumara masitewao.
\v 11 Nape puꞌkao muuu Tiitoa, toꞌpepuapua chuꞌwaraopua puꞌkao, utewaeme terikaopua puꞌkao, waꞌineka puꞌka chaachapao, waꞌasi aamo werapamichiopua puꞌkao, puꞌka wihkuariwarao. Puuua taꞌpechiami enapaka wihkuekao, yooma petechiami mochikame seꞌwichamepua ki Riosikamera pichiwarichi masitewachio, toomi koparoaka masitekaopua. Waꞌa nokaka yowiyamepua, ki pichiwari chaachaparíe.
\p
\v 12 Piie taawechi waꞌa Kereta noꞌo kahtioiopua pehjio, aaata Kereta waꞌapi ohjoemea, waꞌa mochikameo machikamekapapua ihtana nokaka mochikamekopua puꞌkao, noꞌo tuuyekapua eee cheekao: “Iꞌwa Kereta mochikamea, kiiya yoomahka wihkuiamepua, oorika teꞌteriame puuua, tísia nanasiname, oowera uꞌmatoka koaka puꞌseriame posakamekaipua.”
\v 13 Ihji tijoe waꞌa tiiame noꞌo tuuyekamea, pichiwa cheekamepua waꞌa teꞌteriao. Pukaepa muuua Eesusichi paparameo, utewaeme tuuyepuapua puꞌkao, ki waꞌachi nokimichiopua puꞌkao, ohso kaawe pewatiame mochitonurepuapua puꞌkao, ki seꞌwi nuureka ahpo Eesusichi paparao.
\v 14 Waꞌa aamo chaanesoopua puꞌkao, kaawe chiiame aamo inamukamea, ki eꞌweka mochitomapua waikao, siichitepuwa nokiwameo, pukae ahpo wihkueniameopua, ki Riosi pichiwarichi simiyameo, ukana ajatoameopua Riosi pichiwario.
\p
\v 15 Aaata kaaweruma inatariemea, kihta inatanariamepua ki kaawerumao kihtawichio kaawekameo, oowera puꞌserewapuawichio nayewaniameo. Nape aaata kihtawichio ki kaꞌkarumache inatamea, puuua ahpo iikachio, pochikame kahtiamepua naꞌarario, ki nakika mochitoamekapapua Riosi teꞌta pichiwarirao, teꞌta kaaweruma tuuyewario.
\v 16 Puuua wihkuari maꞌmasitaripua, Riosi teꞌta maꞌmasitariko tuuyaiopua, ahpo waꞌapi wihkuari nokayaeo, ahpo waꞌapi wihkuchame tetewitamepua. Puuu tiꞌtijoeria, kichiwa nokayamepua, kiisi eꞌweka mochitoamekapaopua Riosio, newitokache ki kaꞌkarumara nokisiamepua, kihta noonoeme tiiamepua, ihtaoi kaawerumao.
\c 2
\s Kaaweruma masitewa ki seꞌwi simiyame
\p
\v 1 Muuu Tiitoa, kaawerumache nokiwame masitepuapua.
\v 2 Oꞌochetiameo, apochi neesetoka mochitonurepuapua ki kaaweruma yoraniameo, seꞌwi ahpo nokimiaopua ki kaawerumachio, ahpoo puuua, yooreka tetewipuawichiopua. Iwapakame enenurapuapua puꞌkao, ahpo Noono tewekachi kahtiamechio, teꞌpa tewekachi kahtiame Noonoo, pichiwa nakiyameko tetewiteka, ahpo wahjachioiopua tiameo, pichiwa nakika tetewameko tetewiteka, ahpo wahjachioi ki kaawe nokayoio, ki ikanati nahsinenurapuapua.
\v 3 Ooweru yayawatiameopua tiameo, tuuyepuapua, taamo Noono tewekachi kahtiamekamera pichiwa teꞌta nakika mochitoamechitia, ahpo tetewiteka mochitonurepuapua. Ki aaata naꞌaraka tísia naawesarieme enenurepuapua; paatarioi kiisi nawajiame enenurepuapua, ihtaoi wiino iijiwa nawajiwaopua. Ohso kaawe puuua wahjachi ooweru kuteweopua pehjio, teꞌta kaawerumache ahpo nokiwa tetewitenurapuapua.
\v 4 Waꞌa tiiame enesaapu ooweru yayawatiamea, wahjachi ooweruo ki yayawatiameopua pehjio, kaaweruma tiiame masitemapua puꞌkao, kaawe nakika yasitomichiopua ahpo kuunao, ahpo kukuchiwa nakiwaopua tiame.
\v 5 Puꞌka yayawatiameo masitenurapuapua tiameo, puꞌka ki yayawatiame pehjio, kaawe ahpo neesetomichio ki kaawe ahpo nokimiao, itapiti yoranariaa, kaawe inatasa iintonurepuapua. Puꞌka yayawatiameo chaanenurapuapua tiameo, puꞌka ooweru nenewikameopua waꞌasio, ki ikotuwachitia mochitonurewa, ihtaoi ahpo peeniatawaeo; kaawe ahpo neesetoka mochitonurenurepuapua aaata taꞌpechi mochikameo; ohso kaawe itapiti kaꞌkaruma teꞌteriamekamera, yooraka mochitonurenurepuapua; ahpo kukunaopua tiameo, yooreka mochitonurenurepuapua. Puꞌka yayawatiameo, waꞌa tiiame tuuyenurepuapua puꞌka nenewikameo, ki aaata naꞌara chaachapapuaichiopua puꞌkao, taamo Riosichi simiyame masiteriao.
\p
\v 6 Muuu Tiitoai waꞌachi tiiame tuuyepuapua tehtemarioi, kaawe ahpo neesetonurapuapua ahpo ikotuka eraniameo, kihta iintomichiopua waꞌa tiiameo.
\v 7 Muuu Tiitoa yomatiame aamo wahjachio, amochi tetewitiame enemitiamua, aamo kaawerumache ihsiao, aamo kaaweruma ihsiwachitia nokisimichiopua tiame; nape teꞌta pichiwa waꞌa tiiame eꞌraka, aaataeoi ki aamo wistuame maaepuawichio.
\v 8 Muuua kaawe neesetoka masitemerimua aamo chiiao, kaꞌchi aamo chaachapapuaichiopua, apochi ki kaawe erakoameopua Riosi chiia aamo nayewao. Waꞌa tiiame masitepuapua, aaata ki kaawe erakoaipua taamo Noono tewekachi kahtiame chiia aamo masitiao, suuwe erapamichiopua puꞌkao, teꞌta pichiwa kaaweruma tiiame aamo nayewamekoopua.
\p
\v 9 Puꞌka ahpo teeko seekarachitia tekipanakiameopua, eꞌweka mochitoniame teteiwa masitepuapua puꞌkao, yooma ihta ahpo teeko nuurewachio, kihta nahsinepawa nehjiakaopua.
\v 10 Kaꞌkaruma teerewa masitepuapua puꞌkao, kihta noriwi ki kaawe ihsiwa ahpo teekoo, waꞌa tiiaopua ahpo teekoeo, ahpo oowe eꞌrepua tiiame tetewipuawichioo. Waꞌa tiiame enesoopua wahjachi tiꞌtijoeriaiopua tiameo, puꞌka tísia peenia tiiame taamo Newipatiame Riosichi eename masitewae, tísia kaawe teeka ohjoemeko erakomapua.
\p
\v 11 Taamo Noono tewekachi kahtiamea, tesiwewa oowepakamepua taamoo, apoe waꞌapi ahpo Taana enepakaopua, apoe waꞌapi taamo mochikachi masitenariapa puuua, yomatiame iꞌka wehjoarichi ahpo newipatemiaopua,
\v 12 yomatiame iꞌka wehjoarichi ohjoemeo, kaaweruma inataka mochitomichiopua, puꞌkao yomatiame ahpo tatakoriniameo, ipaka mochitomichiopua, ihtaoi ki kaaweruma ikotuwa tiiameo, teꞌta taamo Noono tewekachi kahtiakamera, iyorika mochitomichiopua.
\v 13 Waꞌa teꞌtereka mochitomeri teemea iꞌka wehjoarichi mochikaapua pehjio, ahkasi tísia peenia tiiame tisiwari taawechisi, taamo Noono Newipateri Eesusi Riosie Weratiamechitia tewekachi mooenakameo, eenechi weeechi tekiyachisi, puꞌkao taamo puuyeka mochitoa.
\v 14 Puuu apoe enameria, apoe kaawe eꞌrachi iintokamepua, ahpo mukiwarichi taamo pejana nehjakaopua, yooma taamo tatakoririawichio Riosie kokosapuameo, taamo newipamichiopua, yomatiame taamo tatakoriria piipatekaopua, ahpo ijinuwakamera enepamichiopua, teꞌta kaawerumarakamera tísia nokinariame enepamichiopua.
\p
\v 15 Yooma iꞌka eee tiiame noꞌo aamo nayeweria nayewemitiapua, ahkaoi aamo oiyachiamio. Ahkaoi kahtiaiomua, kaawe eꞌraka paajutesimitiamua taamo Noono tewekachi kahtiamechio, pukachi paparaka mochitomichiopua aamo masitesiao. Nape wistuka taamo Noonochi paparameko tuuyameo, ki taamo Noono chiia yooraka mochitoameo, teripuapua puꞌkao, kiisi eꞌwaka mochitonariamekopa puꞌkao. Aaata utewaeme terisaamua, taamo Noono tewekachi kahtiame utewarirae teripuapua puꞌkao, aaataoi kihta suuwe erapakaopua, naꞌareniaiomua temarikopao.
\c 3
\s Riosichi paparaka mochikamea, ihtana yooraka mochitomeri
\p
\v 1 Muuu Tiitoa waꞌa tiꞌtiopachi naanapawiameo, eꞌwaka mochitonurepuapua puꞌkao, aaataoi waꞌa yawichichitia teꞌteriameopua, aaataoi teꞌta weruma teꞌteriameoi. Eꞌwaka mochitonurepuapua puꞌkao, ihta kaaweruma itapiti ahpo yorakejerasoopua, ahpo waꞌapi mochiwariwichio tekipananuresoo.
\v 2 Puꞌka tiopachi teꞌteretoameopua, aaataoi kihta naꞌarenurepuapua. Ohso kaawe taꞌiria mochinurepuapua puꞌkao, kihta nasiwaniame mehtachaka, kaawe ahpo eꞌreka tetewika, aaataai kihta ahpo weruma uuká.
\p
\v 3 Teemea pukerio tiameo, waꞌachitia ki ijinatamechitia nokayamekaipua, ki eꞌweka mochitoamekapa Riosio. Teemea wihkuarie chapitiame eneriaipua, ki kaꞌkaruma tiꞌtijoerie wihkuarieo, puꞌka ki kaꞌkaruma yoranarewae chapitiame eneriai teemea, ki kaꞌkaruma ikotuwa puꞌserewa. Teemea pukerio ki kaawerumachi teꞌtereka ohjoeriaipua; piirechi iinueka ikotuchewachio, tahpitika erakoamekai teemea. Nekumeka tetewamekai teemea wahjachio, epeche iinuwaemekopaopua ki tamochitia.
\v 4 Nape taamo Noono teꞌpa tewekachi kahtiamea, waꞌa taamo teꞌterioiopua, tísia taamo nakiyamekapaopua, tísia taamo tesiwa eꞌrepakamepua, puꞌka taamo ki kaꞌkaruma nokiwachiopua puuyanakao.
\v 5 Riosia waꞌa iintokaopua tamochio, ki nuꞌuti kaawe iintokamepua tamochio, taamo tísia tatakoririao, apoe waꞌapie taamo kokosapuame newipatekao. Puuu waꞌa iintoriaa, kihta taamo iintowa natekachi iintokamepua, oowera tísia ki nuꞌuti taamo nakiyamekapapua, pukaepa ahpo Riosiwarieopua, yomatiame ahsieme taamo piipatekamepua, weemera ahjarikamera tamochi enepateka.
\v 6 Taamo Noono tewekachi kahtiamea, ahpo Taana Eesusichi iintoriaeopua, tamochi yahchepakamepua ahpo Riosiwario, ahkasi pochikame wiꞌsuamesi.
\v 7 Ehpeo teemea weemera ahjari iinuekapaopua, ahpo taamo ki nuꞌuti tesiwewae taamo cheriweriopaopua, puuyeka mochitoamepua, ki wahjiamesi Riosi ahjama mochipuameo.
\p
\v 8 Yooma ihji aamo noꞌo tuuyeriaa, tisiwa ahjachi oowe eꞌrepuame tiiamepua, pichiwa simiyame. Iꞌka noꞌo cheeriachi simiyameo, eepi utewaeme chaanesipuapua puꞌkao, yooma taamo teꞌpa kahtiame Noonochi paparameopua, pukae ahpo neꞌnesetoka mochitomichiopua puꞌkao, kaꞌkarumache yoorakao. Ihji noꞌo chiiaa, tísia kaaweruma tiiamepua, yoomawichioopua, tísia nateyame.
\v 9 Kaꞌte tehpe eenepamitiamua, ki inatame iinatukewa nehjiakaopua, kihta kaawewichio iinatukeme tiiameopua. Kaꞌte ehkoriami ahpo noonorichi oꞌinia eꞌenawa nayewaka, tehpe eenepamitiamua, pukachi simiyame chaachapakao, kihtawichio kaawe tiiameopua. Kaꞌte nekakowa mehtanamitiamua, Moise nuurari yoratewachi simiyame nayewakao, puuua kihta nateyame puuuapa. Yooma pukachi simiyamea, kihtawichio chaachapapuamepua waꞌasio, puuua, kihta kaawerumachi taamo iꞌtoamekopao.
\p
\v 10 Aaata wahka taamo Noono tiꞌtioparachiami ahka napawitiachio, seꞌwika masiteka ahpo nasiwatiame enesoopua, seenepioi oosaoi utewaeme terika tuuyepuapua puꞌkao. Ki aamo eꞌwesoopua tísia tuuyetiaio, kaꞌte uuka tetewimitiapua puꞌkao waꞌási.
\v 11 Puuu aaata aamo kaaweruma tuuyewari tísia utewaeme tuuyetiaio ipaka tetewikamea, ahsieme wekakameko tetewimamua puꞌka waꞌapi ahpo nokayaeo, ahpo waꞌapi ki kaawe nokayaeo, ahpo waꞌapi Riosi kokosarichi ahpo ihpapakamepua, taamo Noono teꞌpa kahtiameeo, ahpo kokosapuamechi.
\s Paoro Tiito tuuyewa yoramichio
\p
\v 12 Wee muuu Tiitoa, noꞌoo Atemasi tewaniame aamo uhjuresoo, Tikikooi noꞌo aamo uhjuresooio, aꞌchitiaoi Niikopori noꞌo tetewijeraninia, waꞌa yasimo oꞌranepu tuuroi uꞌmatoachisio.
\v 13 Nehpupari tekipaname Seenasio, Aaporo tewaniameoi tiameopua, aꞌchitia aamo kuꞌimetiae kuꞌipuapua puꞌkao, iinuetomichiopua itapiti ahpo nakiwiao, wahka ahpo siimpachiopua.
\v 14 Waꞌa aamo iintosoopua, puꞌka aamo iintoriaeo, waꞌachi nokipua pepenitemamua wahjachioi, ahpo kuꞌika mochitopuameopua, ahpo tesiwewa nokiwame kuꞌiniameo, taamoo tiꞌtijoeri masitiaeo. Waꞌa teꞌteriame enesaapua ahpo ahjaka ajatowachio, nateyamerakamera nokayame enemeripua, taamo Noono tewekamechi teꞌteretokaopua.
\s Kajuyachi teepotari; Paoroe kaaweruma eꞌrewari tiame
\p
\v 15 Iꞌka aamowichio noꞌo iyotewa kajuyachio, eee chiiame aamo uhjuriamenia: Yooma iꞌwa noꞌo ahjama mochikaa, yooma aamo teepotiamepua waꞌa aamo kahtiachi mochikameo. Yooma wahja tamochitia Eesusichi paparameopua tiamé, teepotemitiapua tiame.
\p Iꞌwasi kajuyamenia iꞌka iyojurao. Kaaweruma eꞌrewa eꞌriamenia waꞌa aamo kahtiachi mochikámeo, taamo Noono tewekachi kahtiame eꞌrewaeo.
\p Cheriwema iꞌwasio.