\id PHM
\h Iremoni Iyotepawa
\mt2 Paoro
\mt1 Iremoni
\mt2 Iyotepawa
\c 1
\s Paoroe teepotewa Iremoni
\p
\v 1 Kúíraa Iremoni. Paoro neeea, Eesusi Riosie Weratiamechi simiyame nayewatuamekapao, iꞌwao peeresochitia yachatiame. Neeea Timoteo kuꞌiraeo, iꞌka iyoteri aamo uhjurenane. Aamo Iremonio teemea, tísia aamo nakika mochitoamepua, aamoo tamochitia Riosichi tekipanaka yasitoamekopa.
\v 2 Ihji iyoteri taamo uhjuriaapua tiameo, yooma aamo taꞌpechi nanapawiamewichiopua tiame, Riosichi paparame tiꞌtijoewichio ooweruwichiopua tiame. Iꞌka iyojuraopua tiameo, Aapia tewaniamewichiopua tiame, puꞌkao taamoo Riosichi piinichitia tetewa. Arakipo tewaniamewichioopua tiameo, teepotari uhjuriame teemea, tamochitia Riosiwichio utewaeme tekipanaka weritoamekopa.
\v 3 Taamo Noono Riosio, apoe Eesusi Riosie Weratiameopua tiameo, yooma amochio kaawerumari yahchejeraninia, aamoo taꞌiria mochitomichiopua, kihta aꞌchi erakoka aamo iikachio.
\s Iremoni Eesusi Riosie Weratiamechi nakirewa, pukachi paparawa tiame
\p
\v 4 Neeea aamowichioo Iremonio, senepi Riosi ahjama nayewaionia, aamowichio cheriwema kiꞌyamenia Riosio,
\v 5 aamoopua inamukapao, tísia nakiweka paparamekopua taamo Paamira Eesusichio, aamoopua tiameo, yooma Riosie piipatetiameopua, yooma tísia nakika yasitoameko tuuwame.
\v 6 Naneꞌriame neeea aamoo Riosie Weratiamechio, tísia oowe eꞌraka yasitoamekoopua, tamochitia. Simitiamenia Riosichi itakao, epeche machika aamo yasitomichiopua, Riosie aamo kaawerumari kiasiwaopua, yooma Riosichi aamo ahjama teꞌteriameopua tiame, tamochitia Riosie Weratiamechi paparakameopua.
\v 7 Tísia kaawe eꞌraka yasitoamenia amochio, tísia nakika yasitoamekopua aamoo, yooma wahjachi aamo taꞌpechi nanapawiameo Eesusichi paparamiao, ahpo iika yachapateriopua iikachio, itapiti ahpo aꞌchi erakoao.
\s Paoroa tesiwe eꞌrewa itanipua Oonesimowichioo
\p
\v 8 Ehpeo aamo Iremoni itanemania, itapiti noꞌowichio yorajerawa. Muuua, ki seꞌwika naꞌnaritoamekopa Eesusi Riosie Weratiamechio, waꞌa tiiopa aamoo, itapiti noꞌo yorakemichio aamo itanesoo, tísia oowe eꞌriamenia amochio, yoramerichekopua.
\v 9 Neeea aamo utewa yorame tiiaipua noꞌo yorajekewao, ki waꞌa iintonariapaopua, ohso kaawe aamo kaawe eꞌrachi yorajeraninia, teemea ahpoo, tísia kaawe eꞌraka tetewamekopa.
\v 10 Waꞌa taamo teꞌteriopao, noꞌo kaawe iintojeraninia Oonesimochio, puꞌkao neeea Riosichio noꞌo taanachitia enepateriopapua, puꞌkao noochitia, tísia Eesusichi paparamepakamekopapua, iꞌwa noꞌo ahjama kahtiaiopua perekarichio.
\v 11 Ihji Oonesimoa amochi kahtiaiopua puhkuchitiao, ki kaawe ihsiame eneriaipua waikamio, nape ehpeo puuua, kaaweruma enepakamepua, Eesusi Riosie Weratiamechi paparakapao. Pukaepa kaawe ihsiamekapapua ehpeo, kaawe ihsiame enemeripua amochio, noochitiaopua tiame.
\v 12 Iꞌkao neeea ehpeo, kaaweruma enepakame noꞌrapuamenia amochio, naarame eꞌrainia noochio, ki noꞌo ahjama yasimerikopua waꞌasio. Pukaepa neeea puꞌkao, kaawe eꞌraka asipujeraninia aamo taꞌpechio, kaawe eꞌraka uuká.
\v 13 Puꞌkao neeea tísia kaawe eramiipua, iꞌwa noꞌo ahjama itipisoo, iꞌwa karichi noꞌo kahtioiopua pehjio, noꞌo kuꞌika yasitomeriaipua, Riosi kaaweruma tuuyewariwichioo.
\v 14 Nape aamo iinatukenare neeea iꞌka Oonesimo amochi uhjuremiao, ki nooe aamo uhjurenariapa ki aamo reesiserieo, ohso kaawe aamo reesisewachikamera amochi uhjurenariamenia.
\v 15 Seenekachi Oonesimo kuꞌitapi amochi poanaturiaa, Riosichi kaaweruma enepamichiokoi enerepua, noꞌoopua amochio, kaaweruma enepakame noꞌrapumichiopua, eenechi aamo ahjama yasimichiopua waꞌasi.
\v 16 Eenechi aamo kaawe uusoopua Oonesimoo, epeche kaawe ihsika yasitomapua amochio, nape ki puhkuchitia, puuua amochio Riosichi poonika teeremerikopua. Neeea puꞌkao, tísia kaawe nakika yasitokamenia, nape muuua ehpeo epeche kaawe nakimakoi, Riosichi aamo poonika teeremerikapapua, ki aaata puhkuchitia.
\v 17 Muuua Riosichio, noꞌoo aamo poonichitia tetewame enesaa, waꞌachitia Riosichi poonichitia teteipuapua puꞌkaoi, kaawe uuka.
\v 18 Iꞌka Oonesimo ki kaawe iintokame enesoopua amochio, itapiti aamo wikirieme enesooio, noꞌokamera koparoapuapua wikiriarao.
\v 19 Neee Paoroa noꞌo aamo natetemo tuukao, nooe iyoteka aamo chaaniamenia, kiisi waꞌatia itipimerinia puꞌkao, ki natetekao.
\v 20 Ejeꞌe, pichiwa waꞌa iintomania puꞌkao. Puꞌka Oonesimoo, kaawe uuka aamo tetewisoo, tísia kaawe eꞌraka yasitomania, iika yachapakame noochio waikao. Waꞌatiao teemea, nenekuti tísia kaawe itipimeri teemea Riosichio, Eesusi Riosie Weratiamechiopua tiame.
\v 21 Nee, neeea aamo Iremonio, amochi tísia oowe eꞌreka itanekamenia iyotekao, iꞌka noꞌo aamo itaniao, yoramerichekoopua iꞌkao, epeche tísia kaawe iintomio oowe eꞌriamenia Oonesimochio, ki noꞌo aamo teꞌta itaneriachitia.
\v 22 Noꞌoopua tiameo, katewetiame iinuejeraninia noꞌo cheꞌrepamiachioi, ookapi taaweoi yasimo oꞌrachi waꞌa enasaa. Waꞌa ikimania iꞌwa noꞌo perekarichi maꞌchipatiaapua, aamo noꞌowichio Riosichi itaya inamutioopua.
\s Kajuyachi teepotari
\p
\v 23 Yooma iꞌwao, Riosie Weratiamechi simiyame noꞌo kuꞌika mochitoamea, aamo teepotenapua puuua ihjipua: Epajarasi tewaniamepua piiripia, puuua iꞌwa noꞌo ahjama perekarichi yachatiamea, Eesusichi simiyame nayewatuamekapaopua tiame;
\v 24 wahjachi aamo teepotiameapua tiameo, Marako tewaniamepua, Arihtako tewaniame tiamé, Reemasi tewaniame, Ruuka tewaniame tiame.
\p
\v 25 Noꞌo chiiaapua waꞌasio, puuuchepua. Taamo Paamira Eesusi Riosie Weratiamecheo, tísia kaawe iintojeraninia amochi.
\p Waꞌa ikisaapua, tísia kaawe enemapua. Cheriwema waꞌasi Iremoni.