\id JAS
\h Saantiao Iyotepawa
\mt1 Saantiao
\mt2 Iyotepawa
\c 1
\s Saantiao iyojura, iꞌisaeri chiꞌrika mochikamewichio
\p
\v 1 Kúíraaa, yomachiami iꞌisaeri mochikame. Kaꞌkaruma mochisaa eemea, kaawe enemiipua. Teemea iꞌwao, kaꞌkaruma mochikamepua. Neee Saantiaoa Riosiwichio tekipanamepua, Eesusi Riosie Weratiamewichio tiame. Yooma aamo oosa mariki aampa ooka iꞌisaeri tetejimario, wekanami chiꞌrika mochikamewichioo, iꞌka iyojura teepotari aamo uhjurenania.
\s Riosichi oꞌinia eename machiwari
\p
\v 2 Aamo noꞌo Riosichi poponiwao pipiniwao tiame, iꞌka noꞌo iyotiachio, itapiti aamo tuuyewa chaanemania, achini teeka taamo mochitomerikopua Riosichio. Noꞌo poponiwa noꞌo pipiniwa tiamée, kaꞌchi erakomitia eemea ihta itapiti aꞌchitiame aiwaio, ohso kaawe kaawe erakomitiapua puꞌkao, epeche pewatiame aamo enepamichioko puuua, aamo Riosichi paparawao.
\v 3 Waꞌa teꞌteresa eemea, Riosi kuꞌiraeo, ihtaoi teꞌta aiwaiopua, epeche kaawe anachaka mochitomapua.
\v 4 Puuu aamo aiwari anachaka teꞌteretoaa, epeche epecheche aamo utewaeme enepatemichio puuua, teꞌta aamo oowe eꞌrewachiopua Riosichio. Waꞌa iikao eemea, soparame uꞌmatoame iinuemapua utewari, ihtaoi aiwari aamo ahjae anachapuameo.
\p
\v 5 Nape kaꞌchi ikime erasaamua itapiti aꞌchitiame aamo aiwaka ikiyao, Riosi itanepuapua aamo kuꞌipuaichioo, apoe tísia kaawe eꞌraka aamo kuꞌipamapua kiisi kihta aamo nahsineka, soparame uꞌmatoame aamo kuꞌiwae, aamoo iikachio, iika yachapamichiopua, puꞌka ihtaoi aamo aiwaka yasitoao.
\v 6 Nape teꞌta ahjachi paparaka teꞌta ahjachi oowe eꞌreka tiame, itanepuapua Riosio, kiisi sewina eꞌraka, ki pukeri ahjachi paparasikaopua, ki eenechi pukachi paparasikaopua Riosichio. Puuu waꞌa nokaka paparamea Riosichio, paꞌwe eekae peꞌkoteniameka nokayamepua, seenekachi eejesoopua peꞌkoame, ki eejesoopua ki peꞌkoame.
\v 7 Puuu aaata waꞌa nokayamea, kiisi inatametepua Riosie ahpo kuꞌipua itanewao.
\v 8 Ooka eꞌrarichi naasipa yasitoamea, Riosichi paparaiopua piirechi inatarichi erapasiameapua tiameo, kaꞌchitia piiripi tiiame inatamete puuua.
\p
\v 9 Aaata tesiwa teerewaeme Riosichi paparakamea, tísia kaawe erametepua Riosichio, Riosio ahpoo, tísia nateyamechitia tetewiriopa, ahkasioiopua Riosio, ahpo taanachitia uuka tetewiriopa.
\v 10 Aaata tísia paarastiame Riosichi paparamea, waꞌachitia tísia kaawe erametepua Riosichio, Riosio apochi paparariopa ahpo tatakoriria cheriweriopua, ki ahpo teꞌta paarasari iinuekamekopua. Ihta paarasario kihtawichio nateyamekopua Riosichi kaawe teerepuameo, puꞌka paarasario kiisi tehpe eꞌramekopa, puꞌka paarasario toꞌiwe seewarachitia, ikanati waaropaka wakipamekopa.
\v 11 Oowera puuu toꞌiwe seewaraa, taaa machenasoche, ki teesa taipasochepua wakipaka wehchi wichiyamekopua, ahpo tísia peenia tiiao wekateka. Waꞌachitia tísia paarasatiameai, ahpo paarasarichikamera paparamea, ahpo paarasarichi saipameripua, ki Riosie cheriwetiaopua ahpo tatakoririao.
\s Riosichi taamo paparawa taamo toitetewa
\p
\v 12 Riosia ki nuꞌuti kaawe eꞌraka tetewamepua, aaata apochi iyoriwao, kiisi toayameo, weeka ihta aiwari aiwaka yasitoaiopua. Waꞌa teereka yasitokamea, yooma ahpo aiwatoa newitoka machenakameo, Riosia puꞌkao, ki wahjiamesi ahjari kiameripua, itapiti uꞌmasiwa teꞌeri newitotiame, yowitiamechitia. Waꞌa iintomeri Riosia, yooma ahpo teꞌta nakiyao, aapoeo waꞌa iintokemo tuukamekapa puꞌkawichioo.
\p
\v 13 Aaata itapiti ki kaaweruma ahka, tísia ki kaꞌkaruma yoramichio paꞌpasuniame enesaa, kaꞌte Riosi aamo aatiatawa maaemitiapua, Riosia kaꞌchitia taawechi waꞌa tiiame aamo eratemeripua, Riosio, kaꞌchitia taawechi waꞌa tiiame inatamekopua, tatakorinarewao.
\v 14 Puuu ki kaꞌkaruma taamo yoranarewaa, taamo waꞌapi ki kaaweruma ikotuwa eratewae taamo panisuniamepua, taamoo ki kaaweruma iintomichioo.
\v 15 Puꞌka ikotuwa ki kaaweruma eratewa panisuwae newipatotiaapa muuua, tatakoriamemua. Puꞌka tatakorichi yasitosisaamua, Riosi kokosapuamemua, Riosie poanatuniachi ki wahjiamesi seenampa, mukukamechita Riosiwichioo.
\p
\v 16 Pukaepa kaꞌte aamo waꞌapi wihkuemua, tatakorio kihta aamo aꞌchi ikiyame maaekaopua.
\v 17 Yooma kaawerumachi mochipuawichio kuꞌiwaa, teꞌpa taamo Noonochi oꞌinia eenamerapua, tamochi eenaka kuꞌyamepua, ki tatakorichi taamo wichimichio. Puuu tewekachi taamo Noonoa, puuu waꞌapi iintokamepua yooma tewekachi tajayame netetiamepua, iꞌwa wehjoarichio taamo tahjemichiopua. Puuu tewekachi tajayame ekawiraa, sewina ikiyamepua, nape Riosi kuꞌiwa ki taamo tatakoriwachi wichipuawichioo, kaꞌchitia taawechi sewina ikiyamepua.
\v 18 Riosia epeche teꞌta nateyame taamo tetewinariapao ki yooma ihta itapiti ahpo neteriachitiao, tísia taamo cheriwenariame puuua, yooma taamo tatakoririao, taamo weemera ahjari ki wahjiame kianariapapua, yooma taamoo, teꞌta ahpo pichiwarichi simiyamechi paparariopa.
\s Teꞌta Riosi pichiwarichi teꞌterewa
\p
\v 19 Waikao Riosio ahpo tatanachitia tetewame enesoo, noꞌo kaawe eꞌrewa poponia, kaawe ahpo uuka mochitopuapua, kaawe ahpo nakika tiame. Aaata piirechi aamo ki kaawe nayewioio, kaawe uuka keepusapa nehjiapuapua puꞌkao, ki ikanati nekaya chaachaka.
\v 20 Taamo piirechichi nekaka mochitoame enesaa teeme, ki Riosi kaawe eꞌrachitia mochitoame teemea.
\v 21 Pukaepa eeme ki uuyamea pehjio puꞌka iꞌka Riosi pichiwa chiiao, yooma toipuapua ki kaꞌkaruma nokiwameo, ihtaoi suwepori ki kaꞌkarumaopua tiameo, puꞌkao yomachi wehjoarichi pochikame kahtiameo. Ohso kaawe eemea, puꞌka Riosi kaaweruma tuuyewari amochi teewia, teewetopuapua, waꞌa aamo ohjoekachiami tuuyeka nayewatutiameopua. Puuu naawesarikamera aamo newipatemeripua, itapiti ki kaꞌkaruma nokiwamechiopua, aamoo Riosieo, weemera ahjari kiapuawichiopua.
\p
\v 22 Nape puꞌka Riosi tuuyewari amochi tuuyesiwao, yoorakache mochitopuapua puꞌkao, ki oowera keepukache. Oowera keepukache soparaniame maaesaa eemea, aamoe waꞌapi wihkuiamepua.
\v 23 Puuu ki yooramea ahpo kaaweruma tuuyeniameo, ahpo nanari neerochi tetewitekameka tiiamepua,
\v 24 waꞌa neerochi seꞌwi akipasaapua, ahpo neerochi nanariraa ki naania ikiyamepua. Waꞌachitia ki naania ikiyame Riosi kaaweruma tuuyewari keepukai toakamea natakepakao, ki yooraka yasitoakamekapapua puꞌkao.
\v 25 Nape Riosi teꞌta kaawerumara tuuyewari ahpo keepuria yooraka yasitoamea, yooma toinarepakaopua ahpo ki kaaweruma ihsiwao, yooma cheriwepuamepua Riosieo, ihtaoi ahpo ki kaawe ihsiriaopua. Waꞌa iintosaapa Riosia, ahpo Taana Eesusichi paparariopao, tísia kaawe yorameripua puꞌkao, ahsieme piipakame enepatekaopua.
\p
\v 26 Aaata Riosichi teꞌta paparameka eꞌramekai, nape waꞌa eꞌrameaio aꞌchikoi ki kaawe tiiame chiiame enesaapua ahpo yeenieo, wistuamepua ahpo teꞌte Riosichi papara eꞌraopua. Kiisi teꞌta paparai chiiamepua.\fig |216-DN00464b.tif|col|||Ihji tijoea, kaꞌchi iika teeweteme eꞌramepua ahpo nekarewao.|1:26\fig*
\v 27 Teꞌta pichiwa Riosichi paparamea, eee teꞌtiamepua: kaawe uuka tetewamepua aaataoi; aaata kunamukukameo, kaawe eꞌraka kuꞌyamepua tiameo, ihtaoi itapiti nakiwawachio; kukuchi ki yayawaemeoipua, tesiwe eꞌreka kuꞌyamepua puꞌkao, ihkokekao. Teꞌta pichiwa Riosichi chiia teetoamea, tísia kaawe ahpo neesetoamepua, iꞌka weeechi ki kaꞌkaruma nokiwao, ki ahpo chuhkemichiopua.
\c 2
\s Ki epeche nateyame tetewiniame aaataoi
\p
\v 1 Noꞌo Riosichi poponiwaa pipiniwaa tiame, eeme teꞌta iyoriwame enepakame Eesusi Riosie Weratiamechio, teꞌta kaawe aamo neesetopuapua eemea, ki aaata epeche nateyame aamo tetewimia aaatachiopua.
\v 2 Oowera naewakao chanimakosao neeea: Waꞌamahka aamo napawiriachi enatarekoiopua aaatao, aaata tísia tomiwaeme tísia nateyame wikiraemeopua, sutuchiopua tiameo, oꞌro sutuchuchari chuchatoameoiopua, puꞌkaomua epeche nateyame uuka eee chaanesaomua: “Iꞌwa yasipamua teꞌta kaaweruma yasirachi”,
\v 3 nape piirechi waꞌa asisoopua tísia kaꞌrame wakiraemeo, puꞌkaomua kihta neteyamechitia tetewakaopua eee chaanesaamua: “Waami werimitiamua ikicha, iꞌwaoi yasimitiamua nape wehchi”,
\v 4 ¿ki aaata epeche ki nateyame uuyamemua? Waꞌa iintosaamua ¿napatinakona uuyamemua aaatao?
\p
\v 5 Noꞌo poponiwa pipiniwa tiamea, noꞌo keepumitiaomua iꞌkao: Nape Riosia ki amochitia inatamepua. Riosia teꞌta ki paarasatiameopua, teꞌta paarasatiamechitia tetewamepua, apochi papararie teꞌta paarasatiame enepatemerikapapua, ahpo tatanachitia ahpo teꞌta yeꞌkariwachi mochipatesaapapua. Waꞌa iintomo tuukame Riosia, yooma aaata ahpokamera teꞌta nakika mochitoameo.
\v 6 Nape eemea teꞌta paarasatiamera ehpe nateyamechitia tetewakao, tesiwa yooramepua tesiwa teꞌtiameopua ki paarasariekao. ¿Ki puuukamerapu ki Riosichi paparamera teꞌta paarasatiame, aꞌchikoitia wisikuaka aamo wenejika, peereirachi aamo panisutoka aamo iijitoamea?
\v 7 ¿Ki puuupu tiame Eesusi naꞌariamea, puꞌka Eesusi aamo tísia iyorika mochitopao, aamo Eesusi teewarachi Riosichi aamo itapiti itayopao?
\p
\v 8 Eemea teꞌta naneꞌriamepua, Riosi teꞌta iyoriwa nuurario, eee chiiamekopua puꞌkao: “Aamo waꞌapi nakiyachitia nakipuapua aamo piirechio.” Waꞌa teꞌtereka mochitosaa eemea, kaawe nokayamepua.
\v 9 Nape eemea, aamo waꞌapi nakiyachitia ki napati uuyame enesaamua aamo wahjachio, tatakoriamemua, kiisi kaawe iintoamemua Riosi nuurariwao. Puuu waꞌa iintoniamea, Riosi kokosapuachi wichiniamepua.
\v 10 Muuua yooma yooramekai Riosi iyoriwa nuurarirao, piipiri waꞌapichioi seꞌwi ikisaomua, yomatiame Riosi nuurari ki eꞌwekamekaitemua.
\v 11 Puuu waꞌapi Riosi nuurari: “Kaꞌte suwepori ihsi”, chiiamea: “Kaꞌte meꞌya”, chiiameapua tiame, Riosi nuurari waꞌapikaitepua tiame. Pukaepa ki suwepori iintokaiomua, nape aaata merisaamua, yomatiame Riosi nuurarichi naꞌitutiamemua, ki ahsieme eꞌwekamekapapua Riosi nuurario.
\v 12 Pukaepa taamo neesetoka mochitomete teemea, ki ahsepari eꞌweka mochitoniame Riosi nuurario, Riosi kokosarichi wichiniamekopapua. Puuu Riosi oosa nuuraria, taamo kuꞌika ki seꞌwitomeri enerepua, taamo kaꞌkarumara eꞌwewa teetomichiopua Riosi pooerachio.
\v 13 Ki aaata tesiwe eꞌreka mochitokamea ahpo piirechio, waꞌachitia ki tesiwe eꞌreka kokosapuamepua Riosieo, ahpo nuurari chiiae. Nape aaata tesiwe eꞌreka mochitokamea ahpo piirechio, newitoka puuyameripua puꞌka Riosi kokosarichio, teꞌta Riosi waꞌasi, tiꞌtijoeri katewiachiopua.
\s Riosia ahpo nuurario yorajeramechepua, ki oowera yoramo tuuniameche
\p
\v 14 Nee, eeme poponiwaa pipiniwaa tiamee, ¿ihtatia kaawe enetariapua, teꞌta iyoriameko tuuyaipua Riosichio, kiisi yooraka yasitoamekaipua Riosi chiiao? ¿Nehpupapuame ohjoarepua Riosi kokosarichio, waꞌa ahpo tiiameko tuuyamekocheeo?
\v 15 Oowera waꞌa teeretakao cheemania. Aaataoiopua aamo piirechio, itapiti wisasoriwichio tesiwa tiiamekoiopua, kooamechioiopua tiameo,
\v 16 puꞌkaomua oowera waꞌatia: “Eꞌesa kaawe teetoka naaju, kaawe aamo neesetoka tuurawio, kaawe koꞌkomitia aamo taꞌpechi asisaa.” Nape kihta wisasori kiꞌyakai waꞌa cheesaamua, wisasorioi kooameoi, keemaoi ahjae kemitopuao, ¿ihtatiana kaaweruma enetapu, aamo kaawe chaaneka noꞌrapuriaa? Kihta.
\v 17 Waꞌachi tiiame aamo Riosichi paparariai. Kihta nateyame aamo Riosichi tísia paparameko tuuyaa, ki amochi tetewitiame enesaamua, aaata tísia itapitichi tesiwa tiiame tísia kaawe eꞌraka kuꞌikao.
\p
\v 18 Muuua noꞌo chaanemakoiomua: “Neeea tísia paparameko tuumanekoipua Riosichio, muuua tísia aaataoi kuꞌika yasitoameko tuumaoipua aaatao.” Wee, waꞌa teesoo noꞌo neꞌnetemitiamua, aamo Riosichi paparao, nape kihtae kuꞌyai aamo piirechio. Neeea aaata kuꞌika aamo neꞌnetemania noꞌo teꞌta Riosichi paparao. Waꞌa teesoo ki noochitia aaata kuꞌisaamua, kaꞌchi iika aamo neꞌnetemamua Riosichi paparao.
\v 19 Muuua piiripi Riosi waꞌapi iintuameko erasaamua, pichiwa waꞌa tiio eꞌramemua; riaorósi reꞌremoniai naneꞌriamepua tiame, piiripi waꞌapikoopua Riosio, Riosio tísia utewaeme kokosamekopapua puꞌkao, chachapia nokayamepua majakoamepua Riosio, tísia kokosapuamekapapua ahpoo.
\v 20 Kaꞌte kii ijinatame enemitia eemea, seꞌwi erakokao. ¿Kiisi pahtiame eemea, kihta yooraka mochitosa eemea Riosiwichioo, kihta Riosichi paparari aamo tetewitiamekoopua?
\v 21 Neꞌnepamitiao eemea, aamo ehkoriami Aurani iintoriao. ¿Ki ahpo Riosichi paparari maꞌchitariarepua Auraniai, ahpo taana Riosiwichio oowemo oꞌrarioiopua, Riosie ahpo chaaneretiachitiao? Ejeꞌe, waꞌa iintokaopua, Riosichi paparari ahpo tetewiterepua. Riosia Auranio, apochi paparapa waꞌa iintomerikoopua, kaꞌteparepua ahpo merimioiopua ahpowichio oowepakao. Pukaepa Riosia Auranio, teꞌta apochi paparamekopa uukamepua, teꞌta tísia kaawerumachitia tijoe, ahsieme piipakame tiiamechitia.
\v 22 Aaí, Aurania ahpo iintoriae teꞌta ahpo paparari tetewiterepua Riosichio. Waꞌa chiiame Ehkoriami Iyoteria, Auranichi simiyame nayewakao.
\v 23 Waꞌa teesoo Ehkoriami Iyoteri chiiaa, tísia pichiwa chiiamepua, eee chiiachiopua: “Aurania ki nuꞌuti pichiwa oowe eꞌrekamepua Riosio, pukaepa teꞌta tísia kaawerumachitia uutiamepua Riosieo. Waꞌa iintowachi Aurania, ahsieme piipakame tetewitiamepua, Riosieo. Waika oꞌinia Riosia Auranio, tísia kaawe ahpo eꞌriameko tuukamepua.”
\p
\v 24 Aaí, waꞌa tiiachipua, Aurani waꞌa iintoriae maꞌchiame naneꞌreniame teemea, ki oowera taamo Riosichi paparariche teꞌta tamochi kaaweruma tetewiniamekopua, taamo Riosiwichio yoorakache tiame.
\v 25 Ehkoriami Iyoterichio tiame, Raaja tewaniame oowitiame nayewamepua tiameo, suwepori tehkiwa toakame oowitiame. Puuuaiopua, ahpo iintoriae tetewitekamepua, Riosichi ahpo paparario. Puꞌkao Riosia kaawerumachitia tetewikamepua, Erikoo, isaeri tiꞌtijoe ihpuemia eꞌenakameo, ahpo taꞌpechio, ichipupaka nehpupateriopa, sewinachi pooechiami newiteka.\fig |217-HK00332B.TIF|col|||Raaja tewaniame oowitiamea, ihpuemia eꞌenakame kuꞌika newipatena.|2:25\fig*
\v 26 Waꞌa tiiachio, aaata Riosichi ahpo paparameko tuuyamea, ki itapiti kaawe iintoka ahpo paparari tetewitiamea, puuua Riosichi ahpo paparao kiꞌtiamepua, aaata weerewa mukukameo, ki iikaemechitia.
\c 3
\s Ahpo yeeni naꞌara cheemia inatewa
\p
\v 1 Eeme noꞌo Riosichi poponiwaa pipiniwaa tiame, ki yooma tuꞌtuyewari enemeripua, ahpo kaawe mochitopuawichio tuuyemeria, puꞌka yooraka mochitoamea tuꞌtuyewari, teesa sewina iikaipua ahpo tuuyewarichio, naꞌarepuamekopua, kiisi kaawe cheerio tuukaa.
\v 2 Yooma teeme seꞌwi chaachapamaoipua seenekachio, nape aaata kaawe ahpo neesetoka ahpo nayewamea, peeniamepua yeꞌkaka ahpo yeenio, iwapakamekapa puuua ahpo yeeni chanimia yeꞌkakao, puuu waꞌa tiiamea, ahkasi yomatiame ahpo weerewaoi, yeꞌkamepua ki naꞌara iintomichioo.
\v 3 Teemea kaawaioi chuꞌwachi yakajipurekacheoi, yooma weerewama cheewame teemea yeꞌkakao.\fig |218-LB00035B.TIF|col|||Yekajipuraa ki werumakoieo, kaawe yeꞌkaniamepua werumakoi kaawaio.|3:3\fig*
\v 4 Pawekakeraai ki nuꞌutikoipua tiameo, kiisi werumakoipua ahjae yeꞌkaniameo, kiisi pehtiame kuꞌrichaniamepua ki muuenati ekayoio, ahka ahpo iꞌtonariachiamiopua.
\v 5 Waꞌachitia taamo yeeniai, kiisi werumakaipua taamo weerewachiopua, pukae yeenieo, ki nuꞌuti oijerari chaachapame teemea. Naꞌiai teesa tajenakaio, ki kuꞌichisi kosoyamepua tajenakao.
\v 6 Taamo weerewachio taamo yeenia, naꞌika ihsiamepua, taamo nayewasoopua, ki nuꞌuti nekarewa tajenatiame taamo aaatachiopua.\fig |219-WA03989b.tif|col|||Yeeni nekarewa kaꞌchi yorame teewetewaa, Paoro merinarena.|3:6\fig* Taamo ki kaaweruma nayewaa, taamo naꞌitutiamepua, taamo wahjachichi kaawe teꞌteriao. Waꞌa teꞌteriame enesaa teemea, Satanasi eꞌrarikamera nokayamepua, ki Riosi eꞌrarikamera.
\v 7 Yooma ihta animaria kaawe kajuniamepua eꞌwetekao, tuchikichitia, siinoioi, ihta paꞌwechi ohjoemeoi,
\v 8 nape aaataai ahpo yeeni naꞌara chiiao, kaꞌchi iika teeweteme eꞌramepua. Puuu yeeni naꞌariraa, yerowaka ihsiamepua, taamo kaawe teꞌterewa Riosichio, taamo aaatachi kaawe teꞌterewa tiame, aaatachi taamo kaawe teꞌterewao, naꞌitutiamekapa.\fig |220-AP-13-23.tif|col|||Ooka ooweru ahpo nekakoka nayewena.|3:8\fig*
\v 9 Teemea taamo yeenie waꞌapi, kaawe chaachapamepua tewekachi taamo Paamirao, puꞌka taamo yeenieo waꞌapi tiameo, naꞌariame teemea aaatao, napatika tiꞌtijoeo ooweruopua tiame, teeme tiꞌtijoeria. Riosi eꞌrachitia erakoamekapapua.
\v 10 Waꞌapi taamo yeenieo tiameo, kaꞌkaruma nayewame teemea, ki kaꞌkaruma tiame. Nape teeme Riosichi poponiwaa pipiniwaa tiame, ki naꞌarari chanimetepua taamo yeeniewao, ohso kaawe taamo yeenieo teemea, kaawe taamo neesetometepua, taamo naꞌara chanimiao, taamoo ki itapiti ki kaawerumachi wichipuawichioo.
\v 11 Naakooko eemea, wahka paichio inataka neꞌnemitiao: ¿Naakonakosa ookasa tiiame pajename waꞌao, ki onachari neeroi pajenamekai, onacharieme neeroi pajenatarepua?
\v 12 Kaꞌi, kaꞌchitiapua. Nee, naakoo noꞌo poponiwa pipiniwaopua tiame, chuunaai ki ooriwo taakewa taakiamepua; panijuwariai ki chuuna taakiamepua. Pukaepa ihta onachari pajename paichiai, kaꞌchitia pajenamapua neeroi taꞌyameo.
\s Teꞌta pichiwari peenewari
\p
\v 13 Aaata aamo mochikachio, teꞌta peenewari ahpo penipakame erasaa, iintoka ahpo neꞌnetemapua, kaaweruma inisika tiꞌtijoerichio, kaawe eꞌraka aaatachiopua tiameo, kiisi weruma ahpo eꞌraka.
\v 14 Nape aaata ikotuwae pochikapa ahpo iikachio, aaata chipuweka nekumiame enesaa, kihta teꞌta peenewari, ahpo machiyame neꞌnetiamepua. Aaata waꞌa eꞌramea, kihta eꞌramepua Riosi nakiyao, aaata waꞌa tiiamea, ki nuꞌuti ahpo waꞌapi wihkuiamepua.
\v 15 Puuu waꞌa tiiame peenewaria, ki teꞌpa taamo Noonochi oꞌinia eenamepua, iꞌwache weeechi peenewari inataniamepua, Satanasikamera inatarira.
\v 16 Ikotuwa iintoniamea, ahpo nekamucheniameapua tiameo, yooma ihta naꞌarari mehtachame puuua, aꞌchikoi nokiwame kiisi kaꞌkaruma.
\v 17 Nape taamo Noonochi peenewari eename iinuemea, eee teeka mochitoamepua: pahcha simiyameo, teꞌta piipakame puuua ahpo inatarichio, ahpo nayewaopua tiame; waꞌa tiiamea, ki aaata nasiwateniame mehtachamepua; kaawe eꞌraka ihkokeniame aaatao; ki eꞌraka ihsiamepua aaatachioi; puuua tesiwa eꞌriamepua aaataoi; aaataoi puuua, napati tetewamepua waꞌachitia; puuua ahpo eꞌrao, pichiwa chaniwamepua; ki wihtuwa chiiame; kaawe ihsiwa nokiwame.
\v 18 Yooma iꞌka taꞌireka teꞌteretoamea, taꞌiria mochipuame echayamepua, taꞌirewa taakerewa teetoamepua, tiꞌtijoerichio.
\c 4
\s Ki Riosichi teꞌtereniame nokiwa
\p
\v 1 ¿Akana machenamepu aamo ahpo aaatachi nekakoniamea, nasiwaniamea tiame? ¿Ki aamo ki kaaweruma ikotuwachi machenamepua, itapiti tísia aamo puꞌseria iinuwenariapa?
\v 2 Eemea itapiti tísia iinuenariamepua, waꞌa erakoamekapa eemea, ahkasioi nasiwamepua iinuenariapao, ahkasioi aaata meꞌyakao. Nape waꞌa nokaka iinuepaniamea, kiisi kaaweruma puuua, ohso kaawe eemea Riosikamera itanepuapua, itapiti iinuenariaa.
\v 3 Nape ki kaaweruma inataka itanesaamua Riosio, ki kiapuamemua, ki kaaweruma ihsinariapao, aamoo, ki kaaweruma puꞌserewachi naꞌataka soopanariopao.
\v 4 ¡Ai eeme kiisi iyoriame Riosichio! ¿Kiisi inatapame eemea, aaata ahpochewichio ihsiwa iꞌyamea iꞌwa wehjoarichi yasitoaio, Riosi seepurawa enepamekoo? Aaata ki Riosichi paparaka yasitonariamea, Riosi seepurawa puuuapa.
\v 5 Pukaepa eee chiiame Riosia, Ehkoriami Iyoterichio: “Noꞌo Riosiwari amochi yahchario, ki iꞌtojeramenia ki kaawerumachio. Ki nuꞌuti yuuwesimerinia, waꞌa aamo iꞌtosoopua.”
\v 6 Nape aaata Riosiwari apochi yahchatiamekai, ki kaawerumachi wichisoo, waꞌa iikaio eenechi Riosichi enanaresoopua, Riosia, cheriweka tetewimapua puꞌkao, Ehkoriami Iyoterichio eee chiiachitia: “Riosia, aaata ahpo aiweka ki toinareka yasitonariameopua, ki kaꞌkaruma yooraka ahpo yasitoao, waꞌiniamepua puꞌkao, ki yooraka yasitomichiopua ki kaꞌkarumao; nape aaata tesiwa erapaka toakameopua ahpo ki kaaweruma ihsiao, Riosia kaawe eꞌraka uuyamepua puꞌkao.”
\v 7 Pukaepa eemea, kaawe teꞌtereka mochitopuapua Riosichio. Satanasio, aamo ki kaawerumachi wichitenarioopua, aamo waꞌinepuapua puꞌkao, aamo tísia utewari eꞌrae waꞌinesoopua puꞌkao, aamo toimapua.
\v 8 Satanasio ki kaaweruma aamo eratenaresoo, Riosi chokichikamera enepapuapua aamo iikachio, Riosi amochi enamichio aamo kuꞌipamiao, Satanasio ki aamo newitomichiopua, ahpokamera ihsia, ki kaaweruma yorasimichioo. Eeme Riosichi mochitoai, Satanasi aamo ki kaawerumachi eratewachi wichisaa, Riosi nayewepuapua waikao, apoe taamo Noono Riosio, aamo cheriwemichiopua aamo ki kaawerumachi wichiriaopua.
\v 9 Eemea, naaracheka itanepuapua aamo Noono Riosio, nape pichiwa amochi eꞌraka: “Kiisi kaawe iintokame neeea”, chaaneka. Nape pichiwa amochi yuuwesiri eꞌrapa, chaanepuapua, aamo pukerio, aamo kaawe eꞌrachi ki kaawe iintoriapa.
\v 10 Tesiwa cheeka itanepuapua Riosio, aamo kiisi kaawe iintoriaopua cheriwemichio, waikaopua apoeo, aamo ki kaawe iintoriao, puhjesa kakupachi iintapamapua.
\s Ki naꞌara chaniwame ahpo piirechio
\p
\v 11 Noꞌo poponíwaa pipiniwaa tiame, kaꞌte naꞌara chaanemitiapua aamo aaatao. Aaata ki kaaweruma iintosoo, Riosikamera katewemeripua puꞌkao, ki muuu. Aaata ki kaawe iintokame amoe katewenaresaamua puꞌkao, kiisi kaawe iintomerimua Riosi nuurarichio. Waꞌa iintosaamua, amoe waꞌapi ki kaawe iintomerimua Riosi nuurarichio, amoekamera nuurario, eꞌwemeriaipua.
\v 12 Muuua kihta iintomerimua Riosi nuurarieo, aaatachi ki kaawe iintokamechio, teꞌta Riosichekopua ahpo nuurari taamo yoramichio yahchakamea, waꞌa tiiachiopua, apoechepua, ahpo nuurarie katewemeria. Waꞌa tiiachio muuua, ¿aatanakana muuua, Riosi nuurarie aamo aaata ki kaawe iintoria aamo katewemerioopua?
\s Ki pichiwataniame ahpo iintomia, ki naneꞌriamekai meeriamahka ikipuao
\p
\v 13 Ehpeo eemea kaawe keepumitiaopua iꞌkao. Eemea chaachapamepua: “Meereo ihta mochiwachi siimpama teemea. Waꞌa mochika tekipanakao piie paaumpari, weeka yowimeri teemea toomi.”
\v 14 Nape ¿aachin teeka waꞌa chaachapata eemea, kiisi naneꞌriai meeriamahka aamo ikimiao? ¿Ki naneꞌriamekosa eemea aamo ahjario paawika ikiyamekoopua, ahjaniamea kuꞌwitapi ahjasaopua, ikanati ki naania ikiwamekoopua?
\v 15 Pukaepa eemea ohso kaaweo, eee chaachapamete eemea: “Taamo Noono tewekachi kahtiameo, noꞌo ahjari eꞌresoo, yoramania waikao noꞌo iintonariao.”
\v 16 Nape eemea kihta apochi Riosi eꞌrewa itakao, amochiche machename eꞌrakao, chaachapamepua: “Siimache neeea noꞌo siinariachio.” Yooma waꞌa tiiame chaachapaniamea, ahpo aiweniamepua, puuu waꞌa chaachapaniamea, kiisi kaawe tiiamepua Riosiwichioo.
\v 17 Aaata Riosi nakiya naneꞌriamekai ki yoraniamea, tatakoriniamepua Riosiwichioo.
\c 5
\s Tísia totomiwaeme naane eꞌreka mochitonurawa
\p
\v 1 Eeme paarasatiamea toomichio, noꞌo keepumitiapua pahchuo. Eeme totomiwaeme ki Riosi eꞌweka mochitoamea, naarakomete eemeapa, aamoo tísia kokosapuamekopapua, aamo ki kaawe noonowiriawichioo.
\v 2 Neꞌnemitiao eemea aamo paarasario, wahka ihtoriachiopua ihtana ikiyamekopua. Aamo paarasariaa, yooma esoratupakame maaniamepua wahka ihtoriachio; aamo teꞌta nateyame wisasoriaa, yooma kaꞌrapakame puuua wahka ihtoriachio, wehtapachie koꞌkotiame puuua.
\v 3 Aamo paarasatia oꞌro toomia, tataparasi toomia tiameo, yooma nanaepakame maaniamepua wahka ihtoriachio. Yooma puuu toomi nanaepariraa, aamo iꞌka wehjoarichi ki kaawe noonowiria puuua, teꞌta aamo wenejimeripua, wahka kajuyachi taawechio, Riosieo tísia aamo kokosapuawichioopua. Yooma ihta aamo paarasatiaa, naꞌie kosipuaitepua, yooma iꞌka wehjoarichi paarasari naꞌpoatiameopua.
\v 4 ¡Inamukao eemea! Puuu aamo ki nateteka tekipanatetiamea, aamo echaria iꞌipaka tekipanaria ki natetetiamea tiame, Riosichi sisinatiame puuuapa tekipanakameeo, Riosi yomatiame teꞌta aampa utewariemea keepukame puuuapa puꞌkao.
\v 5 Eemea iꞌka wehjoarichio, taꞌiria koaka wiipakamepua, wakasi wiipateniamechitia, tísia peenia teꞌtiame itapiti iinueka mochitokame eemeapa. Nape eemea waꞌa teꞌtiaio, amori asiyamekaite eemeapa wiipakame koꞌipuachio wakasi wiiyachatiamechitia, koꞌkopuawichioopua.
\v 6 Waꞌa yorapuame eemea, puꞌka tiꞌtijoeri kihta naꞌara aamo yoorakameo, tesiwa yooraka koꞌyakapa.
\s Ki yaapi eraniame; Riosichi paparaka nayeweniame tiame
\p
\v 7 Eeme noꞌo poponiwachitia pipiniwachitia mochitoamea tiame, kaꞌte nahsinapa eemea aamo puuyeka mochitoao, ahkasi taamo Paamira Eesusi eenachisio, epeche epecheche wapiche teetoame. Eemea, aaata echayamechitia teꞌterepuapua, puꞌka echitiamechi yukuyoipua kiisi yaapi eꞌraka momochiachitia, ahkasi iꞌipaniame asiyachisi.
\v 8 Waꞌachi teꞌteremete eemea, ahkasi taamo Paamira Eesusi eenachisi, kiisi nahsinepaka puuyeka, puuu Riosie Weratiame enamiachio, epeche epechechi waapi teetoaitepua.
\v 9 Eemea Riosichi mochitoamea, kaꞌte aamo apochi nasiwaka mochitomitia, apoe Riosi Riosie Weratiamechi eenaiopua, kihta naꞌara aamo nokayame teimichiopua, puꞌka enamerio, aamo petechi muirachi weeriameka, tiiamekopua waꞌasi.
\v 10 Eeme Riosichi noꞌo poponiwaa pipiniwaa tiame, ehkoriami Riosi nayewaturachitia mochitopuapua, aiwaka mochitoaio, ki nahsinepaka Riosie ahpo chaanesiwaopua, nayewatukao.
\v 11 Teemea puꞌka ehkoriami naꞌnayewatura, anachaka mochitoriaopua ahpo aiwao, yooreka tetewame teemea puꞌkao. Naneꞌriame eemea, puꞌka Oou tewaniameopua ehkoriamio ki teesa aiwaiopua puuua, tísia anachariamekoo puuua, puꞌkao Riosia tísia anachariopao, aachin iintoka ki nuꞌunti tesiweriopua puꞌkáo, tísia kaawe yoorakaopua neipamio. Riosia waꞌa iintokamepua Oou tewaniameo, tísia tesiwa eꞌrewa ihsiamekapapua aaataoi, apochi teꞌta paparaka yasitoamekoo, tisiwa iyorikaopua apochio.
\p
\v 12 Nape neeea teꞌta aamo chaanenariao, ihjipua: Kaꞌte aamo pichiwata muuua cheekao: “Ki noꞌo iintosoo, noꞌo meripuapua.” Ihta itapitichioi, kaꞌte aamo pichiwata muuua, itapiti tewekachi iintuamechioi, ihta weeechi iintuameeoi. Muuua: “Ejeꞌe” cheesaa, ejeꞌe enepuapua; “Kaꞌi” aamo cheesoo, kaꞌi enepuapua. Waꞌa tiiame enepuapua, ki aamo kokosamichiopua Riosio, wistuamekoopua.
\p
\v 13 Aaata itapiti kiisi taisa eꞌrame enesaa, Riosichi itapuapua kaawe erapario. Aaata Riosichi tísia peenia eꞌramea, Riosiwichio kaawe eꞌrari wikatapuapua.
\v 14 Aaata kaꞌchi ikime eꞌrame enesaa, tísia yuuwesiri aiwame enesaapua ahpo tatakoririaeo, tiopachi paꞌpamiratuame paaepuapua, pirena Riosichi paparaka itanepuawichiopua Riosio, puꞌka iikachi aiwamewichioo, yachapatepuawichiopua. Ahpo pirena Riosichi paparanioiopua, itapiti nerosowieoi pechichipuapua, Riosie yachapateniame tetewipuawichiopua puꞌkao.
\v 15 Teꞌta Riosichi paparaka itatiao, puꞌka tísia yuuwesiri aiwameo, yachapatemapua puꞌkao, puꞌka tísia tatakoririao, cheriweka.
\v 16 Eeme tiame Riosichi paparakameapa, aaata ki kaawe aamo yoorariao, aamo naꞌara yooraria aamo cheriwepua itaka katewepuapua, pirena Riosichi itaka ahpoo, kaawe teꞌterepuawichiopua. Riosichio teꞌta pichiwa eꞌraka itatiamea, kaawerumache ikiwamechepua teꞌta Riosi utewarieo.
\v 17 Waꞌachi iintokame ehkoriamio Eeriataruai, ki yukijera Riosi itanerioiopua, ahkasi Eeria eenechi yukijererioipua Riosi itanekao. Waikao waꞌa teerekamepua ahkasi paika paamuparichisi uꞌmatoame.
\v 18 Neipamio ahkasi Eeria eenechi Riosi itaneriachi yukijerakao, eenechi yukurepua, yooma ihta echitiamekoo, taaketeka.
\p
\v 19 Iꞌka noꞌo aamo iyotepa kajuyachiopua, iꞌka noꞌo aamo chaanemiao, tísia kaawe inataka keepujeraninia. Aaata Riosi paparame sewina erapaka seꞌwikame Riosi pooerachio, eenechi Riosichi eꞌenamichio oowe erapatekamea,
\v 20 kaꞌte natakepamitia eemea, Riosie kokosapuameoi newipatekamekopua, yooma tatakoririaopua cheriweteka, ki ookapikoipua tatakoririao.
\p Iꞌwasi kuꞌyamenia waꞌasi iꞌka noꞌo aamo iyotepao. Cheriwema waꞌasi.