\id 1PE
\h Pahcha Peero Iyotepawa
\mt2 Pahcha Simiyame
\mt Peero
\mt2 Iyotepawa
\c 1
\s Teepotewa
\p
\v 1 Kúíra, yooma aamoo seesenu weeechiami mochikame, aamo taamo tewekachi kahtiame Noonoeo, ahpowichio iintapatiame. Neee Peero Eesusi Riosie Weratiamee weratiamea, iꞌka iyojura iyotesa aamo uhjurenania, yooma aamo seesenuchitia ohjoemeopua: Poonto weeechiami, Kaarasia weeechiami, Kaparosia weeechiami, Aasia weeechiami, Wiitinia weeechiami tiame.
\v 2 Eeme Riosie ahpo ijinuwa uꞌuwitiamea, ahpo ehkoriamisi oꞌinia waꞌa tiame ahpo iintomia inataria puuua. Riosia aaataoi waika oꞌinia ahsieme piipatemo eꞌrakamepua tatakoririameo, ahpo Weeraria Eesusichi teꞌta paparakameopua, Eesusi ahpo Taana meripua eerara neꞌnetokaopua, taamowichio mukimerikopua puꞌkao. Riosia ahpo eꞌrarichio eꞌrariaipua tiameo, tamochi yasitomerikopua ahpo Riosiwarie taamo kuꞌisinariapapua, ahpo nuuresiachitia nokisimichiopua. Neeea Riosio amochio, ahpo teꞌta kaawerumari teetotejeraninia, yooma pipiripichi amochio, teꞌta taꞌiria aamo mochitomichiopua iikachio.
\s Ki wahjiamesi ahjaniame Riosichi erakoa
\p
\v 3 Teemea kaaweruma nayewataria naaju Riosio, teꞌta weruma iyoriwa teeweka taamo Paamira Eesusi Riosíwarachio, Apoe Eesusi Noonórawachi. Waꞌa tiiame ki nuꞌuti iyoriwa kiajeraninia teꞌta Eesusi Noonorao, taamoopua puꞌkao, ki nuꞌuti taamo tesiweriopa, puꞌkaopua taamoo, weemera ahjariwa taamo kiꞌyamekopapua, ahpo Taana taamowichio mukukamekoio, eenechi ahjateriaeopua, taamo ahjachi paparariopáopua. Ehpeo teemea weemera ahjari ijinuekapaopua, kaawe erakoka puuyetoka mochitoame teemea,
\v 4 itapiti Riosi taamo nuutekeka kahtiaopua tewekachio, wahka ihtorichi taawechi taamo kiamiaopua. Puuu itapiti nuutewa taamo kiapuamea, kaꞌchitia taawechi esoratupamepua, kiisioi nanaepamepua kiisioi kaꞌrapamepua, puuua ohsotiao, ki wahjiamesi eꞌramepua.
\v 5 Teemea teꞌta iyorika paparamekopua Eesusichio, Riosia taamo neesetoka yasitoamepua, ahkasi taamo kiꞌyachisi ahpo taamo nuutekiaopua, iꞌka weeechi tatakoriniameo, taamo newipatekaopua teꞌta kajuyachi taawechiopua.
\p
\v 6 Waꞌa tiiachipa eemea puꞌka newipari kiapuamekapaopua, kaawe erakoka mochitoamepua iꞌka wehjoarichio, yooma ihta aꞌchi tiame aiwaka mochitoaio, ehpiamiopua pehjio.
\v 7 Aamo Eesusichi paparaka mochitoaa, epeche nateyamepua ki oꞌrochitia. Aamo Eesusichi paparaka mochitoaa, aamo aiwarie aatiataka neꞌneniamepua teꞌta paparari pichiwarirao, oꞌroo naꞌie kosoka, kaawerutaniamechitia. Waꞌachitia eemeai, yooma ihta aiwarichi newitoka kaawerupakamea puꞌka naꞌiechitiao, kiapuame eemea Riosieo, Riosi aamowichio nuuteka kahtiao, teꞌta kajuyachi Riosi katewiachi taawechiopua, Eesusi eenechi enasoopua iꞌka wehjoarichio. Waikao yooma tewekachi mochikameaipua tiame, aamo kaawe eꞌraka uuka tetewimeripua.
\p
\v 8 Eemea ki aamo puusie tetewikameai Eesusio, tísia aamo nakika uukamepua. Ki tetewikai eemea, tísia oowe eꞌreka ahjachi paparakamepua, ki nuꞌunti kaawe erakoka, kiisi ahsepame tiame chanikao.
\v 9 Ehpeo eemea tísia kaawe erakoka mochitoamepua, naneꞌreka mochitoapa Riosie kokosapuao, Eesusichi paparaka newipaniamekopua.
\p
\v 10 Yooma ehkoriami Riosi nayewaturaa, iꞌyeka kiisi pahtekaipua, Riosie ahpo chaanetiache iyoterepua, iꞌka tatakoriwachi simiyame, Riosie newipaniameopua. Puuu ehkoriami Riosi naꞌnayewatura ahpo taawechiami tiꞌtijoeturi nayewaturiaa, ehpe aamo taawechiami ikipuame chaachapariamepua. Riosia ehkoriami oꞌiniao ki nuꞌuti amochi iintomo inatakamepua aamo taawechiamio.
\v 11 Ihji Riosie Weratiame Riosiwariraa, keꞌchu iꞌka weeechi naawaiopua pehjio, apoe iintokamekaitepua ehkoriami Riosi naꞌnayewatura tuuyekaopua, aaata Riosie uupuame enameriko tuukao; puꞌkao ehkoriami Riosi naꞌnayewaturaa, aiwatepuameko tuukamepua, nape neipa teꞌta ahpo aiwasoopua, tísia peenia tiiame teeremerikopua, puꞌka aaata tísia aiwariaeo, ahsieme natetetiame itipiriopa, tatakoritiameo. Pukaepa ehkoriami Riosi naꞌnayewaturaa, teꞌta kaawe neꞌneka iꞌyeriaipua puꞌka aaatao, aatanakamera enemerikopua Riosi Riosiwari ahpo chaaneriao, achinitio wahka ihtoriachi enamerikopua tiameo.
\p
\v 12 Nape Riosi Riosiwaria, ehkoriami naꞌnayewatura ahpo iyoteteriao, ki ahpo taawechiami enemeriko erapaterepua puꞌkao, ahpo Riosie iyotenureteriao, taamokamera wahka ihtoriachi taawechiwichio, enemerikopua puꞌkao.\fig |221-MX-62.tif|col|||Ehkoriami Riosi naꞌnayewaturaa Eesusi kurusichi mukimiao, teesa taꞌwesarichi tetewameka teꞌtereriamepua. |1:12\fig* Yooma ihji ehkoriami Riosi naꞌnayewatura chaachapatiamea, ihji Eesusi ikiriamepua taamo taawechiamío, Eesusie tísia peeniatiame iintotiame tiame. Puꞌka Eesusichi simiyame ehkoriami Riosi naꞌnayewaturae iyotetiamea, puuupua, ehpe taawechiami aamo mochikachiami nayewatuniamea, Riosie newipaniame tatakoriaio, tepoona eename Riosi Riosiwarie kuꞌiwarie, nokisiniame. Iꞌka Eesusi ikitiame keꞌchu ikinioiopua pehjio, ahkasi Riosi kuꞌiwari tewekachi mochikameai, tísia tetewinareka mochitoriaiopua tiame, iꞌka Eesusichi ikitiameopua.
\s Riosi kaꞌkarumache yorajera
\p
\v 13 Pukaepa eeme tewekachi Noono kahtiachi ahjama ohjoemerikapaopua, kaawe neesetoka aamo mochitopuapua, aamo ki kaꞌkaruma nokiwameopua, kaꞌkarumache yooraka mochitoka. Riosie aamo kaawe yorapuameche puuyeka mochitopuapua, Apoe Eesusi Riosie Weratiame eenechi eenachisisopua.
\v 14 Eemea Riosi teꞌta tatanarachitia tísia eꞌweka mochitopuapua, kihta nokisika ki kaꞌkarumao, keꞌchu Eesusichi aamo teꞌtererioio, nokaka mochitoriachitiaopua tatakorikao.
\v 15 Toipuapua tatakoriniameo ohso kaawe, ohso kaawe teꞌta piipakame mochitopuapua, kaꞌkarumache nokiwa teꞌteretoka, Apoe taamo Noono tewekachi kahtiameo, waꞌa tiiamekopua puꞌkao.
\v 16 Waꞌa teꞌteretoka mochitomeri eemea, Ehkoriami Iyoterichio Riosia, waꞌa taamo chaaneka, iyoteriachitia:
\q Neeea teꞌta aamo Noono tewekachi kahtiamea,
\q2 aamo chaaniamenia:
\q2 “Kaꞌte tatakorika mochitomitia eemea;
\q2 ohso kaawe noochitia,
\q2 kaawe piipakame enemitiapua,
\q2 noꞌoo tísia piipariemekopaopua.”
\p
\v 17 Waꞌa teeresoo, Riosio aamo Noono teewame enesaa, teꞌta tísia iyorika mochitopuapua puꞌkao, teꞌta eꞌweka tiame. Waꞌa teꞌteremeri eemea, iiweta iꞌka wehjoarichi mochikaiopua pehjio, Riosi katewiachi taawechisiopua, puꞌka katewiachi taawechio, ki aamo kokosapuawichiopua Riosieo, napati aamo waꞌachitia katewiachiopua.
\v 18 Kaꞌte natakepamitia eemea, aamo teꞌta ki kaꞌkaruma nokiwachi puuyanatiamekoo, kihtawichio kaawekamechi, aamoo, ehkoriami noonoriwa nokaka mochitoriachitia. Naneꞌriame eemea tiameo, aamo kihtawichio nokiwachi puuyanaretiaa, tísia natekachi natetetiamekopaopua, epeche ki oꞌrochitia nateyamee natetetiamekopapua, epeche ki tataparasi toomi nateyachitiaoi, puuu meetari toomia, iꞌka wehjoariche nateyamepua.
\v 19 Eemea aamo tatakoririawichio natetetiamea, teꞌta Eesusi mukiwarie natetetiamepua, teꞌta ki nuꞌuti nateyameraae, Apoe teꞌta Riosie Weratiame eerarae. Ihji Riosie Weratiame Eesusia, teꞌta Riosi oowewa enekamepua, poꞌwa meritiame Riosi oowewachitia, nape taamo tatakoririao ahsieme natetepuawichiopua, ki ehkoriami nokiwa oowewachitia, animari merisa ooweniame Riosio, ahpo tatakoriria oowera cheriwepuawichioopua pehjio. Puuu animari eeraraa ki natetiame enerepua tatakoritiameo, kihta ahsieme choꞌwiamekapapua tatakoritiameo. Ihji Eesusi mukiwae oowewaria, teꞌta kaawerumara piiparieme enekamepua, kiisi ihta aꞌchi tiiaeme, kiisi ehkoriami Riosiwichio animari meriwa Riosi ooweweniamechitia, teꞌta kaawerumara animari uusa Riosiwichio meꞌretiaio.
\v 20 Ihji Eesusia, keꞌchu iꞌka weee yasipoio pehji, taamo tatakoriria natetemichio inatatiame enerepua Riosieo, Riosia iꞌkao, ki maꞌchiame tetewipukame eneriaipua pehjio, ahkasi taamo taawechiami tetewipuawichioopua. Yooma ihji Riosie inatatiamea, yooma aamo kaawe teeremichio enekamepua, apoe Riosi Eesusichi iintoriae, yooma aamo newipatepuawichiopua tatakoririao.
\v 21 Ehpeo eemea Riosi waꞌa iintoriopa Eesusichio, Riosichi oowe eꞌreka mochitoamepua, Riosio Eesusio mukukoio apoe waꞌapi eenechi oijenateriopua. Waꞌa tiiachipa eeme Eesusichi paparaka mochitoamea, pukachi puuyetoka mochitoame eemea, itapiti tísia peeniatiame kiapuameopua aamowichioo, Eesusi eenechi wehjoarichi enasoopua tepoona oꞌiniao.
\p
\v 22 Puꞌka Eesusichi simiyame kaaweruma tuuyewari eꞌwaka mochikamekapao, piipatetiame eemeapa, kaawe aamo nakika mochitopuawichioopua. Waꞌa teesoo waꞌa teꞌteretopuapua, nape teꞌta aamo iikachi utewaeme aamo erakowae.
\v 23 Eemea waꞌa erakoka aamo nakika mochitoamepua, weemera enepakamekapa aamo iikachio, eenechi naawakamechitia aamo yoreminao. Ihji weemera naawaniamea, ki weeechi noonorewachi naawaniamepua; ihjia tewekachi kahtiame Noonorepaka, eenechi tijoetuka naawakameka ikiniamepua, teꞌta Riosi Riosiwarirae, puuu weemera ahjaria, wahjiamesi ahjaniamepua.
\v 24 Iꞌwa wehjoarichi ahjaniamea, wahjipaniamepua, Riosi cheeriachitia Ehkoriami Iyoterichio. Puuua cheeriaipua:
\q1 Yooma iꞌka wehjoarichi mochikamea,
\q2 toꞌiwe seewaraka teꞌteriamepua,
\q2 ki tehpe eꞌrame;
\q1 Ihta tiꞌtijoeria,
\q2 yooma itapiti tísia peeniatiame noonowiriaopua,
\q2 yooma kiisi naania ikiyamepua,
\q2 itapiti toꞌiwe seewarachitiao,
\q2 wakipaka wichiyame.
\q1 Toꞌiwe seewaraa,
\q2 wichika wakipamepua,
\q2 kiisi tehpe eꞌraka;
\q2
\v 25 nape Riosi chiiaa waꞌapi teeremeripua,
\q2 kaꞌchitia taawechi sewina ikika.
\p Puuu Riosi kaaweruma tuuyewari aamo nayewetiamea, Riosi chiia puuua, kiisi sewina ikiyamera.
\c 2
\p
\v 1 Waꞌa tiiachiopua eemea, yooma ihta itapiti ki kaꞌkaruma nokiwameopua, yooma toaka mochitomitiapua puꞌkao, iꞌkachitia: wihkueniamechitia, wistuai pichiwameka chaachapaniame, ikotuchewa, noriwi naꞌara chaniwame aaata.
\v 2 Eemea Riosichi simiyame teꞌta kaawerumakamera masitewario, kohjachitia erakometepua, ahpo yeeye muꞌira paramuamechitia, tísia paramuka eepi iꞌiyame. Waꞌa teꞌteriame enesaa eemea, kaawe teꞌteretoame enema eemea Riosichio, aamo Riosichi weweripatokaopua, aamo Riosi newipatemerichiopua.
\v 3 Puꞌka taꞌirepasaa eemea, tísia kaawe erakoma eemea taamo Noono tewekachi kahtiamechio, tísia kaawerumakoopua puꞌkao.
\s Eesusia tehte ahjamechitia nayewaniame
\p
\v 4 Ehpeo eemea waꞌa erakokamea, tehte ahjameka teꞌteriamepua, Riosi ahpo tiopa ahjae weraniame, nape tiopa ki pusie teteiwame. Eesusia teꞌta Riosi tioparachi nawatewachi yachaniamepua, aamoo pukachi tehtechi toasika saꞌmiteka weraniame Riosi tioparao. Yooma aaata tiꞌtijoeturi ki Eesusi paparakamea, ipaka tetewikamepua Eesusio, ki kaaweruma tehtechitia ahjae karitapuameo. Nape Riosia ki ipaka tetewikamepua Eesusio, ohso kaawepua puꞌkao, ki nuꞌuti nateyame tetewikamepua puꞌkao.
\v 5 Aamoopua tiameo ahpo ahjae neteyameopua puꞌka tiopa ki pusie tetewiniamechio, neꞌneseriosichitia tetewamepua waꞌao, waꞌa yooreminao Riosi yorakeka mochitoame. Eeme Eesusichi paparakamea, aamo kaawerumache yooraka mochitoaa, Riosi oowewarikai tiiamepua ki pusie tetewiwame, apoe taamo Noono tewekachi kahtiameeo, tísia kaawe eꞌraka uuniame.
\v 6 Iꞌka Tehte Ahjame taamo chaachapaa, Ehkoriami Riosi eee cheeriapua Iyoterichio:
\q ¡Nee! Neee Riosia noꞌo mochiwarichi Siioni tewaniachio,
\q2 teꞌta nateyamera Tehte yahcheka oꞌinemania,
\q2 waꞌa ohjorepasimichiopua noꞌo piipatesiao.
\q1 Iꞌka Tehte Ahjame tísia nateyamechi paparamea,
\q2 kaꞌchitia taawechi suuwe erapamapua.
\m
\v 7 Aamo tísia paparame puꞌka Tehte Ahjamechio, puuu Tehte Ahjamea, tísia nateyamechitia tetewamepua; nape ki puꞌka Tehte Ahjamechi paparamea, tísia ipaka tetewamepua puꞌkao, Ehkoriami Iyoterichio eee cheeriachitia:
\q Riosia puꞌka Tehte Ahjameo, aaata ahpo ahjae karitamia ipaka tetewiriao,
\q2 Riosia teꞌta tísia nateyame iintaparepua, ahpo tiopachi nawatewachi yachaniamechitia.
\m
\v 8 Sewinachi Ehkoriami Iyoterichiopua tiameo, Riosie Weratiame naewakaopua, eee cheekamepua tiameo:
\q Wahka ihtoriachi iꞌka wehjoarichio,
\q2 iintumeri aaata ahjachi motochipuachi,
\q2 puuua tehteka teeremeripua aaata tiꞌtijoeturi nanaarame,
\q2 motochika ruhjiniachi.
\m Yooma puuu ki Riosi Taanarachi paparaka nakika tetewikamea, ki pichikekamea tiame Riosi chiiao, pukachi Riosi Taanara Tehtechi, motochika ruhjimeripua Riosi kokosarichio, ahpo tatakoriwachi itipikaopua.
\s Aaata Riosi ijinuwara
\p
\v 9 Nape eemeapao ki waꞌachi kokosarichi ruhjimeripua, eemeapa weemera kaꞌkaruma mochiwarikapapua, Riosiekamera uutiamekapa Riosichi tetejimari. Eemea ehpeo, weemera Riosi yeꞌkarichi mochitoamepua. Eemea tiameo, weꞌwemera Riosi neꞌneseriosi enepakamepua, weemera Riosi tioparachi ki pusie teteiwamechi. Eemea waꞌa weemera mochiwarichi mochikamepapua, apoche teꞌta piipakame, Riosikamera ijinuwara. Waꞌa iikapa eemea, yooma napatika siimpaka tuuyetomeri eemea, ahkaoi mochiwachiamiopua, puꞌka peenia tiame Riosi iintoria amochio, aamo tukaparichi oiyameoi maꞌchiparia, aamoo kaaweruma uutapachi iintapaka, teꞌta kakupachi.
\v 10 Keꞌchu aamo tukapachi puuyachaniaio, kihta mochiwari eneriai eemea Riosichio, nape ehpeo eemea, Riosi teꞌta mochiwari enepakamepua; Riosia keꞌchu apochi paparoio, aaataai ki aamo cheriweka tetewiriaipua, aamo ki kaꞌkarumachi tesiwa teꞌterioio, nape ehpeo Riosia aamo teꞌta tesiwa eꞌrekapaopua, aamo cheriweka puuyanakamepua aamo ki kaꞌkaruma tukapachi mochitoriachio.
\s Ahpo kaawerumache mochitowa tetewitewa
\p
\v 11 Aamo Riosichi poponiwao pipiniwaopua tiame tísia noꞌo nakiyao, waꞌa weeechiami seesenuka teꞌtereka mochikameo, aamo inateka mochitojeraninia ki kaꞌkarumachi ruhjipuao; itapiti ikotuawa ki kaawe ikitiame iikachi.
\v 12 Kaawerumache aamo yoorame tetewitepuapua, ki Riosi machika mochitoameopua pehjio. Puuua ehpiamio aamo naꞌareka tetewameaipua, waꞌa teꞌtiai puuua Eesusichi paparapasaapa, Riosi katewiachi asisoopua taawechio, kaꞌkaruma nayewamiitepua Riosio, yooma ahpo ki kaawe nokaria tatakorio, Riosie cheriwetiamekapapua.
\p
\v 13 Ahkaoi seesenu yawichituwachi mochikaio, yooreka mochitopuapua yaꞌyawichituameo, weruma yawichikoi ki weruma yawichikoio, aaataoi tiꞌtijoeri ajawatiameo. Waꞌa aamo teꞌterejerani Eesusi taamo Paamiratuamea.
\v 14 Yooma mochiwari yaꞌyawichia, mochiwari kaawe teeretomichio ajawatiame puuua, ahkaoi mochiwachiamio yoorewa neesetomichiopua, ki kaawe nokayameo kokosamichiopua, kaawe nokayameo kuꞌimichiopua puꞌkao, kaawe teꞌteremichioo.
\v 15 Riosia kaawe aamo nokayame tetewitejerame puuua; waꞌa aamo teꞌteresoo, puuu ki ijinatame aamo naꞌariamea, ki machiyapa Riosichi simiyameo, ki iinuemichiopua aamo ki kaawe chaachapamiao, ihchi mochimichiopua puꞌkao.
\p
\v 16 Eemea riaorósi puhkurachitia tekipanaio, puhjetiame eemeapa Riosieo, ki puꞌkakamera eꞌweka mochitomichiopua waꞌasi. Nape puuu riaorósichi aamo puhjetiamea, ki aamo naꞌara nokimichio puhjetiamepua, ihtaoi ki kaaweruma aamo yoranarewao; ohso kaawe eemea, Riosikamera tekipanakewa yoramichio puhjetiamepua, Riosi nakiyache yooraka nokisiwa. Waꞌa aamo teꞌteretosoo, yoorewa neꞌnesetoamea, kihta aamo terimapua waikao.
\v 17 Aaataoi yoorepuameo, yooreka teteipuapua, nape epeche aamo Riosichi poponiwao pipiniwaopua tiameo, teꞌta kaawe eꞌreka tetewipuapua. Teꞌta taamo Noono Riosio, teꞌta ki nuꞌuti iyoriwa teewepuapua puꞌkao. Aamo teꞌta weruma weeechi yawichituameo, yooreka yasitopuapua puꞌkao.
\s Aaata teekoraemea, aachin teereka Riosie Weratiame nakiyachitia mochitopuame
\p
\v 18 Aaata ahpo teeko tekipanakiamea, yooreka mochitopuapua puꞌkao, eꞌweka tiame, kaawe eꞌreka aamo nayewiameoi, eꞌraka cheeka aamo nayewiameoi.
\v 19 Aamoo Riosia, apochi kaawe teꞌteriapa naꞌarewa aiwamekoo, anachamekoopua puꞌkao, Riosia aamo kaawe teꞌteretoame tetewamepua.
\v 20 Nape ahpo naꞌara iintoriawichio naꞌara yoorariao, Riosia kiisi kaawe iintokame tetewamepua puꞌkao. Nape kaaweruma yooraka aiwameopua, Riosia puꞌkao, tísia kaawe eꞌraka tetewamepua puꞌkao.
\v 21 Riosia apochi aamo paajutiaiopua, naneꞌriame enere puuua, waꞌa tiame aamo aiwamerikoopua, ahpo Taana Eesusichi teꞌteriapaopua. Teemea Eesusio taamowichio teꞌta aiwariopao, kaꞌchi eramete teemea Eesusichi taamo teꞌteriapa aiwaniameo.
\v 22 Isaiaa ahpo Ehkoriami Iyoterichio, iꞌka Eesusi iintomeri taamowichio naewakao, cheeriamepua, eee cheekao: “Puuua kihta tatakorikamepua, kihta wihkuakamepua aaataoi.
\v 23 Teꞌta naꞌareniaipua, kihta nekaweka naꞌareka nehjiakamepua. Tísia aiwateniaiopua ahpoo, kihta waꞌachi iintomo tuukamepua, ohsotia ahpo naꞌara yoraniameo, Riosikamera toowekapua puꞌkao katewemichioo.
\v 24 Puuua tiameo, ahpo weerewachi iꞌtoka mukurepua kurusichio, yooma taamo ki kaawe nokaka tatakoriria, natetetiame itipimichiopua. Waꞌa tiiachiopua teemea, taamo weerewa tatakorikameopua, puꞌka ahjama mukuyamechitia, taamo ikiyameko tuuyamepua, weemera weerewachi enepakamechitia, kaꞌkarumache yooraka mochitopuame. Waꞌa tiiame enepateka sautetiame teemea, taamo tatakorika mochitonarewao.”
\v 25 Eemea pukerio tatakorika mochitoaio, poꞌwa wewekakameka teꞌtereriaipua.\fig |222-LB00014B.TIF|col|||Eesusi tepuyachitia poꞌwakoꞌrera.|2:25\fig* Nape ehpeo eemea wewekakaio, tewitiameka ijikamepua Eesusichi paparakamekapa, Eesusi poakorechi upatiamechitia, Eesusi neesetotere mochitoamekapapua. Ehpeo eemea Eesusieo, poꞌwa tepuniameka teꞌteriamepua.
\c 3
\s Achini teeka ohjorepuame nenewikamea
\p
\v 1 Ehpeo nenewikamewichio nayewemane aamoo, aachin teeka ohjorepuame ahpo taꞌpechio. Waꞌachitia taamo Eesusi neesetotere teꞌtetoachitia, waꞌachitia eemeai ujupiraa, aamo kuuna neesetoratere teꞌteremeripua, aamo kukunao aamo taꞌpechio, moꞌorachitia tetewika, waꞌa tiame yachatiamekopua Riosieo, aamo taꞌpechi teꞌteretopuameo. Muuu uupiraa, Riosi nakiyachitia aamo neesetoka yasitomeripua, puꞌka aamo kuunao ki Riosichi paparemekoiopua, aamo Riosichi kaaweruma teetowa tetewitepapua aamo kuunao, amochitia Riosichi paparame, enepanaremichioopua puꞌkaoi.
\v 2 Waꞌa ikisaa aamo kuunaa, aamo ihsitoa neꞌnetoka Riosichi paparanarepakame enemapua; oowera aamo Riosichi iyoriwa tetewaka, kihta masiteka nayewetiaipua Riosichi simiyameo, paparakame enemapua.
\v 3 Eeme ujupiraa, aamo teꞌta peenia tiiame enenariamea, ki aamo maꞌchi iintoame teꞌta peenia tiiamee enemeripua, itapiti naatichitiaeopua: oꞌroe chuhchaka aamo peeniataniameeopua, siintoka peeniataka itichinarewaoi, wisasorioi siintoka teꞌta nateyame chuchanarewaoi.
\v 4 Eemea aamo iikachi yooreminakamera peenia tiiame enemeripua ki maꞌchi aamo weerewachikamera, ki itapiti oꞌro peenia tiame chuchaniamee, kiisi tehpe eꞌramee. Eemea amochi peenia teꞌtereniameaa, aamo wahjachi kaawe eꞌreka nayeweniamera puuua, aamo taꞌiria yasitoame tetewiniame, waꞌa teꞌteriame ooweruo Riosia, peenia eꞌreka tetewamepua puꞌkao.
\v 5 Waꞌa teꞌtereka ohjoeme eneriai oowerua, ehkoriami Riosichi paparaka mochitoriamea, ahpo iikachi yooremina kaaweruma teꞌteriae, peenia teꞌtiame enerepua Riosie teteiwachio. Puuua Riosi oowe eꞌreka, ahpo kuuna neesetowatere, mochitoame eneriaipua tiameo.
\v 6 Piiripi puuu oowitiame teꞌta waꞌa teereka yasitokame Riosichio, ahpo kuunachiopua tiame, Saara tewaniame enerepua, ehkoriami Aurani uupira. Puuua ahpo kuuna Auranio, ahpo petechio moꞌorachitia tetewame eneriaipua, ahpo kuunao yooreka tetewame. Eemea Saarachitia teꞌtereka mochitosaa, kihta aaata aamo aꞌchi chaanewa seewemeripua, kaaweruma aamo nokisiwa teꞌteriamekapa, aamo wahjachi ooweruo tetewakao, waꞌachi nokisimichiopua.
\p
\v 7 Eemea oowitiame kukunaraa, kaawe uuka teteipuapua aamo uupio, kaawe eꞌraka keepupuapua aamo uupio, itapiti aamo tuuyenarioo. Kaꞌte natakepamitia aamo uupio, ki amochitia utewaemekoo, ki Riosichi paparamekoiopua pehjio, nape Riosia ahpo Taana Eesusichi paparasoopua, amochitia waꞌachitia kiapuamepua ki wahjiamesi weemera ahjario, Riosia tísia tesiwa eꞌriamekapa puꞌkao. Waꞌa teꞌteretosaa eemea aamo nenewiria mochitoniamechio, kihta aꞌchi tiiame teerema eemea, Riosi ahjama aamo nayewamiao.
\s Kaaweruma yoorapa aiwaniame
\p
\v 8 Ehpeonia yooma aamo Riosichi paparameo, iꞌka aamo chaanemania: Aamo tesiwaka eꞌreka mochitopuapua, aamo Riosichi poponiwaopua pipiniwaopua tiame, yoomahka aamo, yooma aamo ahpo napati nakika, kiisi weruma aamo erakoka.
\v 9 Aaatae naꞌaretiaeo, kaꞌte waꞌachi iintonaremitia muuua, naꞌarekao. Ohso kaawe kaꞌkaruma nehjiapuapua puꞌkao, kihta nekaweka. Waꞌa aamo teꞌteresoo, kaawe eꞌreka aamo tetewimapu Riosia, aamo itaeoi kaawe yooraka.
\v 10 Ehkoriami Iyoterichio eee cheeka nayewamepua:
\q Tehpe taꞌiria ohjoenariamea,
\q2 ahpo inateka yasimachepua yeeniwao,
\q2 ki naꞌsomichiopua itapiti ki kaawe tiiame nayewakao;
\q2 kihta aamo chuꞌwachi machenamichiopua wistukio.
\q
\v 11 Poanatupuapua aamo ki kaawe nokiwao,
\q2 ukana weripakapua puꞌkao.
\q1 Taꞌiria yasitowa iꞌyapuapua aamo wahjachioipua,
\q2 kihta ki kaawe teerepuawichio aaatachio.
\q
\v 12 Apoe taamo Paamiraa,
\q2 taamo tetewaka yasitoamepua taamo nokaka mochitoao,
\q2 ahpo nahkaeopua tiame inamuka,
\q2 taamo inamumia teereka kahtiamepua,
\q2 ihtaoi itapiti taamoe ahpo itanetioopua,
\q2 ikanati taamo keepunariapao.
\q1 Nape naꞌara nokayameopua,
\q2 kiisi kaawe eꞌreka ukana weripamepua puꞌkao.
\m
\v 13 Aamoo utewaeme kaawerumache yooraka yasitonariame enesoo, ¿aatana aamo uumpatapua aamo itapiti ki kaaweruma yoranarewa erapatekao?
\v 14 Nape kaawerumache yoranariame enesoo, aꞌchikoi aamo chaanenia aiwaiopua ki kaaweruma enepamichioo, newitoka machenamerimua, waikao taꞌiria yasitomamua. Yooma puꞌka aꞌchikoi aamo chaaneniaio, kiisi majawemamua.
\v 15 Pukaepa yooma eeme Riosie Weratiamechi paparaka mochitoamea, kaawerumache teꞌtereka mochitopuapua, Apoe Eesusi aamo teꞌta Paamira nakiyachitia. Aaata aamo utewa yooroo ki kaaweruma iintomichioo, ohso kaawe kaawe eꞌreka tuuyepuapua puꞌkao, achini tiiachipa ki naꞌara ihsinariamekopua aamoo, itapiti Riosi aamo kiamia puuyeka yasitoapa, Riosi Eesusichi iintomo tuuria.
\v 16 Nape sosopatiame nayeweka chaanepuapua, kaaweruma inataka, kihta aamo weruma uuka. Eemea, kaꞌkarumache yooraka mochitopuapua, teꞌta Riosie Weratiame ijinuwarachitia, aaata aamo naꞌara chaachapameo, suuwe erakomichiopua aamo naꞌarenariaio.
\v 17 Epeche kaawe kaawerumawichio aiwaniamea, Riosio waꞌa tiiame reesiserioipua, ki taamo ki kaawe nokayapa aiwaniamechitiao.
\p
\v 18 Eesusia taamo kaawe teerepuawichio aiwaka mukukamepua, kihta ki kaaweruma iintokameai. Apoe waꞌapi ahpo kaawe eꞌrachi ahpo mukiwachi nehjakamepua, taamo tatakoririao, seenepi mukuka ahsieme taamo choꞌwepuawichiopua. Puuua waꞌa iintokamepua taamowichioo, ahpo Noonochi mochipuawichio iꞌtomiapa. Eesusia meriretupua meꞌyao nape weerewarache, nape Riosiwariraa kaꞌi, ahjamepua pehji; Eesusia ahpo Noonoe oijenatetiaapa, tewekachi weerewaeme enepakamepua.
\v 19 Eesusia meritiai mukisao, ehkoriami naayachi mochiriame, wahjipakame mochikachi nayewemia tekikamepua ahpo Riosiwarieo.
\v 20 Yooma puuu wahjipakamea, ehkoriami Nooe taawechiami, kiisi eꞌweka mochitokamepua Riosio. Riosia puꞌka taawechiami tiꞌtijoeri wahjipakameo, ki kuꞌitapisi puuyekame eneriaipua, apochi eꞌenaka paparamichioopua, teewekaopua kiisi kaꞌkaruma ahpo nokayao, Nooeo, pawekakera oꞌineriachisi netekao, ahkasi kajuyachisi puꞌkao.\fig |223-KV-006.tif|col|||Nooea tisiwa weruma pawekakera netena wehjoari siꞌripoio, ahpo kuꞌkuiwa ahjama.|3:20\fig* Nape Riosia ki waꞌa noonowiriopao, osanao waꞌapi newipaterepua puꞌka Nooe pawekakera neteriachiopua, puꞌkao teꞌta tisiwa Riosichikamera paparakamekopapua.
\v 21 Puuu neeroichi newipatiamea Riosichi paparakapao, ehpe taawechiami taamo tatakoriria toinareka neerochi paatoniamekaitepua, Eesusi taamowichio iintorio erakoapa, cheriweniame teemea taamo tatakoririao. Puuu neerochi paatoniamea, ki taamo aampa weerewachikamera piipatiamera puuua, taamo yooreminakamera piipatiamepua, teꞌta taamo iikachi eraniamee, Eesusi teꞌta taamowichio mukuka eenechi oijenakamekopua.
\v 22 Waꞌa ikisao Eesusia, tewekachi moenarepua ahpo Noono Riosi kahtiachi, waꞌaopua ahpo Noono kahtiachi yasirachi yasiparepua ahjamina, ahpo Noono seekarewachitia, iꞌwa wehjoarichi yaꞌyawichio, seekarewachitia. Waꞌa yasakao Eesusia, yooma ahpo Noono utewarieo, yooma ihtaoi aaata teꞌta kuꞌkuiwari tewekachio, ihtaoi tewekachi teꞌta utewariopua tiameo, ahpo teeretere teꞌtere tiiamepua, ahpo tisiwari teꞌta utewarieopua.
\c 4
\s Riosi nakiyachitia ohjoeniame
\p
\v 1 Eemea aamo tatakoriwichio mukuriopua Eesusio, ahjama mukukamechitia erakomete eemea, ki simitenareka aamo tatakorinarewaopua waꞌasi, aaata wahjipakameopua waꞌasi, ki tatakoriamekopua waꞌasi.
\v 2 Aaata Eesusi ahjama mukukameka eꞌramea, kihta tatakorinareka yasitomeri puuua, ahpo ahjaka weritoachiopua pehjio, kaꞌkarumache yooraka yasitomapua, teꞌta taamo Noono nakiyachitia, teꞌpa tewekachi kahtiameo.
\v 3 Aamo ki kaꞌkaruma yooraka mochitoriao, puꞌka tiꞌtijoeri ki Riosichi paparame puꞌsereka nokayao, kiisi waꞌa nokaka mochitopua eemea puꞌkao, kaꞌchitia taawechi, iꞌka eee tiameo: ki teesa suwepori ihsiwame; ki kaꞌkaruma eꞌrari ikotuwao; nawajiwa nokiwameopua; weeru chaachapaniame pahkotakaopua; itapiti riꞌriosi neteniamechi paparaniameoi, ki taamo Noono Riosichikamera paparaniame.
\v 4 Puuu ki Riosichi paparamekapaopua, uꞌmatoka ki kaꞌkaruma enepakamepua waꞌasi, ahkasioi aamo iinsa teꞌtiameko eꞌriamepua, ki ahpochitia nokisinariopao ahjama.
\v 5 Nape puuua waꞌa nokayaiopua, Riosi teꞌta katewiachiopua taawechio, iinatuketiao ahpo noonowiriao, yooma tuumii nookapua Riosio, ahpo ki kaꞌkaruma nokaria iꞌka wehjoarichio. Waꞌa teeremiitepua yooma ahjaka mochikamewichioo, yooma wahjipakamewichioopua tiame.
\v 6 Pukaepa Eesusia iꞌka weeechi oiyaiopua, Riosi kaꞌkaruma tuuyewari tuuyerepua, yooma aaata tatakorichi wahjipakameka teꞌteriameo, ahpo Noonochi eꞌenamichiopua, puꞌka ki kaawe noonowiriao, cheriwepuawichioopua, ahpo weemera ahjari kiapuawichioopua tiame, Riosi Riosiwarichi teꞌtereka mochitomichiopua, iꞌka wehjoarichi mochikaiopua pehjio.
\p
\v 7 Epeche epecheche waapi teetoamekopa Riosi teꞌta katewemiachiopua taawechio, kaawe aamo inateka mochitopuapua aamo ki kaꞌkarumachi ruhjiniameopua, Riosichiche itaka mochitopuapua aamo kuꞌipuao, ki waꞌa aamo ruhjipuawichioopua, nape teꞌta pichiwa Riosichi paparaka.
\v 8 Aamo nakika mochitoniameo, epeche teeremitiapua pukachio, puuu aamo nakika mochitoniamea, ki ookapi ki kaawe teereniame, katewiamepua amochio, ahpo kaawe erapatekaopua amochio.
\v 9 Kaawe aamo eꞌreka tetewame enepuapua ahpoo, aaata aamo taꞌpechi cheꞌrepaniame nakiwiame enesoo, kaawe eꞌraka reesisepuapua, chorowame enesoo, ihkokepuapua kooameoi, kihta kichiwewa erakoka.
\v 10 Yooma aaata iinuekaitepua Riosi yeꞌkario, Riosichi eename kuꞌiwao, ahjae aꞌchitiaoi kuꞌipuameopua aaatao. Pukae ihsipuapua ahkaoi aamo kahtiachio, Riosie kaawe ikipuameopua ahkaoi, amochie asimichiopua aamo wahjachioi.
\v 11 Peeneka naewame enesaamua, peeneka maꞌchiame tuuyemerimua aaatao, Riosichi simiyameo. Peeneka kuꞌyame enesaamua, peeneka kuꞌipuapua aaatao, Riosie aamo yeꞌkari kiꞌyariachitiaopua. Aamo aaata kuꞌinarewaa, Riosichi eenamepua Eesusi Riosie Weratiamechi paparakopa, puꞌkao teꞌta utewari tiiameopua, puꞌkao teemea, teꞌta iyoriwa kiameripua, ahkasi ki seena aampasi. Puꞌkawichioo, waꞌa teerewaopua naaju.
\s Riosie Weratiamechi paparapa aiwaniame
\p
\v 12 Noꞌo teꞌta nakika tetewa poponia pipinia tiame, kaꞌte aamoche tísia aiwameko erakomitiapua. Yooma aaata teeme Eesusichi paparamea, yooma waꞌa tiame aiwamekaite teemea, taamo toiteme tiiame Eesusichi paparaniameo.
\v 13 Puꞌka aiwaniameo, ohsotia kaawe eꞌraka aiwapuapua, puꞌka Riosie Weratiameo, waꞌa tiiame aiwakamekopua aamowichioo. Waꞌa teꞌtiame enesaa eemea, apoe enasoopua Riosie Weratiameo, epeche tísia kaawe erakomeri eemea, ki aamo aiwariachitia.
\v 14 Riosie Weratiamechi teꞌteriapa naꞌaretiaa, ohso kaawe tísia kaawe erakopuapua, Riosi Riosiwari aamo kuꞌyamekapa waꞌa aamo eratekaopua, aamo aiwaopua anachateka.
\v 15 Aaata Eesusi Riosie Weratiamechi paparapa aiwamea, kaꞌchitia aaata meritiamewichio enemeripua, ichikoniamewichiooi, ihtaoi einasika ikitiamewichiooi. Waꞌa noonoikameo naꞌaraka, kiisi kaawe eꞌraka tetewame Riosia.
\v 16 Riosie Weratiamechi mochitoapa naꞌarewaa, kihta suuwe erapoa tiiame puuua. Pukaepa eemea ohsotia tísia kaawe erakomete eemea, teꞌta Eesusichikamera teꞌteriamekapa eemea, Riosieoiopua tísia kaawe eꞌraka aamo tetewiniamekopapua.
\p
\v 17 Ehpe taawechiami teꞌta aiwaniamechio, tísia kaawe tamochi yooremina neꞌnepamete teemea, teꞌta pichiwa taamo Riosichi teꞌta iyorika mochikao. Teemea taamoe waꞌapi taamo katewia tísia taamo suuwe eꞌriame enesoopua, ¿kehkinasa epeche teꞌta kokosa tiiame enetapu teꞌta kajuyachi taawechiopua, teꞌta Riosi tiꞌtijoeri katewiachiopua taawechio, kiisi Riosi Taanarachi paparakamewichioo?
\v 18 Ehkoriami Saromonia cheeriaipua Ehkoriami Riosie Iyoteriachio:
\q Riosie cheriwetiameo,
\q2 tísia tehki eꞌrario enesoopua Riosichi ahpo paparamia enanarewaopua,
\q2 ¿epeche kehkisa tísia tehkisa ohjorepua,
\q2 kihta iinuemekopaopua Riosichi ahpo eꞌenanarewaopua paparamia,
\q2 puuua tísia puꞌseriamekapaopua,
\q2 teꞌta tatakorikao?
\p
\v 19 Waꞌa tiiachipa eemea, Eesusichi paparakamekapaopua, itapiti aiwasaapua Eesusichi teꞌteretowawichioo, kaꞌte aamo einawa tetewimitiapua puꞌkao, ohso kaawe puꞌka aamo eerina tiiao, Riosikamera tooepuapua puꞌkao aamo katewekemichioo; ohso kaawe eemea, kaawe erakokache simitepuapua aamo kaawerumache nokisiao.
\c 5
\s Eesusichi paparame, kaawe nokipuame tuuyewa
\p
\v 1 Ehpeo neeea, waꞌa aamo mochikachiami napawiniachi paꞌpamiratuameo, aamo chaanemania aamoo. Neeea eemechitia paamiratoamekapao, neeea yooma tetewikamekapa Eesusi meritioio kurusichio, neeeapua tiameo, waꞌachitia kiapuamekapa Riosie taamo kiapua ki taamo tetewiteniameopua pehjio, iꞌka aamo tuuyenarenia:
\v 2 Kaawe neesetomitia eemea, waꞌa Riosichi paparaka mochitoameo, aaata poꞌwa tepuyameka teꞌteriameo, nape aamoe kaawe eꞌrawae, ki aaata nuurewachi, kihta erakoka aamo toomi natetewao.
\v 3 Puꞌka aamo neesetoka mochitoao, kaꞌte eꞌraka yoramitiapua puꞌkao, aaata teeko ahpo puhkuchitia tetewameopua, ahpo tekipanatiao; ohso kaawe eemea puꞌka aamo neesetoao, kaꞌkaruma aamo teꞌterewa nokayame, tetewitepuapua puꞌka aamo neesetoka teetoao.
\v 4 Waꞌa aamo teꞌteretosoopua, aamoo poꞌwa tepuyamechitia neesetokao, aamo Teꞌta Neesetoame enasaapua Apoe Eesusia, tísia kaawe aamo yoramapua, itapiti tísia peenia tiiame aamo kiꞌyakaopua, ki wahjiamesi eꞌrame.
\p
\v 5 Ehpeo neeea aamo tehtemario, aamo chaanenania. Eeme tehtemaria, yooreka tetewipuapua aaata teꞌta paamuriemeopua, peꞌyachi tijoe enema, peꞌyachi ooweruoi. Eemea amochioi, kaꞌte weruma erakoka mochitomitiapua apochioi.
\q1 Yooma ahpo weruma tetewameopua Riosia,
\q2 kiisi kaawe eꞌraka tetewamepua puꞌkao,
\q2 nape tesiwa teeka ahpo uuyameo,
\q2 tísia kaawe eꞌraka tetewamepua puꞌkao,
\q2 tesiwa eꞌreweka.
\p Waꞌa chiiame ehkoriami Saromonia puꞌka iyoteriachio.
\v 6 Pukaepa eemea, Riosi neesetotereche mochitopuapua tesiwa teꞌteretoka, Riosio ahpo teꞌta utewarie aamo neesetomichiopua, Riosio teꞌta aamowichio iintomiachi asisoopua, teꞌta weruma kaawe eꞌrari aamo teeremichiopua, ahpo ahjama mochipuachi aamo kiꞌyoiopua, teꞌta tísia peenia tiiachi mochiwarichiopua.
\v 7 Yooma ihta aamo aꞌchi erakoao, Riosichi paparapuapua puꞌkao, aamo katewekepuawichioopua, Apoe aamo Noono tewekachi kahtiameo, waꞌache tiiame aamo eꞌreka yasitoamekopaopua, aamo kuꞌinarewakao.
\p
\v 8 Cheꞌmaka mochitopuapua eemea riaorósichio, puuu riaorósi aamo seepurawao, mawiyáchitia maꞌuchaka oiyamekopapua, aaata konarekao.
\v 9 Puꞌka riaorósi amochi enasoopua ki kaaweruma ihsimichio eratekao, utewaeme aamo waꞌinepuapua puꞌkao: “Kaꞌi, kiisi waꞌa iintomania”, chaaneka, aamo Riosichi paparakaopua. Amochio inatepapuapua, ki muuuche waꞌa tiiame ikiyamekopua, yomachi weeechi aamo poponia pipiniai, waꞌachi tiiame ikiyamekopua puꞌkao, riaorosiéo.
\v 10 Nape Riosia neipao, kuꞌitapi aamo waꞌa teꞌterioiopua aamo riaorósi ahjama nasiwakao aamo waꞌineka, Riosia amochi enamiitepua teꞌta naꞌsonemiao, aamo riaorósichi oꞌyaekachitia teꞌteriao. Nape iꞌwa wehjoarichi aamo aiwaka mochitoiopua pehjio, aamo utewari kiamapua, aamo anachaka mochitomichiopua riaorósi aamo naꞌareka yasitoao, puꞌka utewari aamo kuꞌiwae newitomichiopua riaorósio. Waꞌa iintomeri Riosia, apoe aamo paaekamea, tísia peenia tiiachi ahpo yeꞌkarichi mochimichioo, yooma ahpo Taanachi paparakameopua, Eesusichio.
\v 11 Waꞌa iintomerikopua Riosio, tísia cheriwema kiꞌyamenia puꞌkao, teꞌta ki nuꞌuti utewari tiiameraopua, ahkasi ki wahjiamesi simiyame waꞌa teerejeraka.
\s Kajuyachi teepotari
\p
\v 12 Iꞌka iyojura noꞌo aamo uhjuriaa, paikapioi naawesaripua, noꞌo kuꞌiwa Siriwano ahjama iyotetiamepua, puꞌkao noꞌoo poonichitia tetewa. Iꞌka iyoterichi noꞌo chiiaa, Riosi teꞌta taamo tesiweria nayewamepua, teꞌta pichiwarichi simiyame, aamoo Riosichio, teꞌta pewatiame mochitojerawa, Riosichi aamo paparawao.
\p
\v 13 Iꞌwa Wawironia tiopachi mochikamea, puuua Riosie ahpowichio uutiamea amochitia, aamo teepotewa uhjurenapua. Marakoai noꞌo taanachitia tetewao, aamo teepotenapua tiame.
\v 14 Eemea Riosichi teꞌteriamea, ahkaoi aamo natepaio, yoorewae koomorepaka teepotepuapua.
\p Yooma aamo Riosie Weratiamechi paparameo, taꞌiria mochitojerame neeea. Waꞌa aamo teꞌteresoo tísia kaawe eramania. Cheriwema waꞌasi.