\id 2PE
\h Oosa Peero Iyotepawa
\mt2 Oosa Simiyame
\mt Peero
\mt2 Iyotepawa
\c 1
\s Teepotewa
\p
\v 1 Kúíra, yomatiame tamochitia Eesusichi paparame. Neeea Siimoni Peeropua, piiripi Eesusi Riosie Weratiame ajawaria, tiꞌtijoeekachiami uhjuratiame, Riosi kaꞌkaruma tuuyewari tuuyemichioopua. Aamoo puꞌka tuuyewari pichikeka Eesusichi paparakamewichio iꞌka iyotesa uhjuriamenia, aamo tatakoririao Eesusi iintoriae piipatetiameopua, puuua Apoe teꞌta taamo Riosiwara, Apoe teꞌta taamo Newipatekame.
\v 2 Neeea Riosieo, tísia kaaweruma amochi teetojeraninia, aamo Riosichi simiyameo epeche epecheche pahteniameeo, aamo teꞌta Paamira Eesusichi simiyameo, epeche epecheche naneꞌrerewae.
\s Riosi Weratiamechi aachin teeka mochitopuame
\p
\v 3 Riosia epeche kaawe taamo pahtesoopua Eesusichi simiyameo, ahpo tísia utewarie taamo kaawe mochitotesimapua, ahpo teꞌta nakiyachitia. Riosia apoe taamo Noonoa, ahpo Taanachi iintoka taamo taꞌiria mochiwa iintapakamepua.
\v 4 Riosia ahpo Taana Eesusi iintoriae taamowichioo, ahpo tísia peenia tiiame iintomo tuuria taamowichio iintokamepua, taamo iꞌka wehjoarichi kiisi kaaweruma nokiwachi puuyanakao, apochi newipatekao. Waꞌa tiiamechi taamo puuyanakapaopua, ahpo kihta aꞌchi tiiame Riosiwarichi taamo kipotepamepua.
\v 5 Pukaepa neeea aamo chaanenapua, aamo Riosichi paparaka mochitoaio, iꞌka naati itapiti yorapuapua tiameo: teꞌta kaaweruma eneniame; epeche epecheche Riosichi simiyame pepenipaka mochitoka;
\v 6 puꞌka aamo ki kaꞌkarumachi wichiniameo, kaawe aamo neesetopuapua; aamo pewatiame teꞌterewaopua Riosichio waꞌapi pewatiame teeremitiamua, kiisi toaka puꞌkao; aamo Riosichi iyoriwao epeche epecheche teerepuapua;
\v 7 amochitia Riosichi paparameo, teꞌta kaawe eꞌraka tetewipuapua puꞌkao; waꞌa ikisa tiameo, aamo ahpo nakika mochitowao, epeche epecheche teetopuapua.
\v 8 Yooma iꞌka yooraka mochitosaa eemea, teꞌta Riosie Weratiame nakiyachitia mochitomapua, itapiti kaaweruma yoorame enemapua, aamo mochiwachi taaketiame.
\v 9 Nape yooma iꞌka teereniame toinariamea, ki tetewamepua Riosie ahpo kaawe yorapuameopua meere taawechio, puuua ahpo tesiweka tatakoriwa piipatetiameo, natakepakame puuua puꞌkao.
\v 10 Pukaepa eeme Riosichi poponiwaa pipiniwaa tiame, Riosie paaetiamekapa ahpo tatanachitia enemichiopua ahpo taꞌpechio, pewatiame amochi chapika mochitopuapua Riosichi aamo paparawao. Yooma iꞌka yooraka mochitoame enesaa, kiisi soꞌmimeri eemea ki kaawerumachio.
\v 11 Waꞌa teꞌtereka aamo mochitosoopua Riosia, kaawe eꞌraka aamo uumapua weemera wehjoarichio, ahpo Taana aamo newipatekame yeꞌkaka yasimiachiopua, ki wahjiamesi.
\s Pichiwarikamera masitewa eꞌwewa
\p
\v 12 Waꞌa tiiachipa neeea, kiisi toimania iꞌka aamo tuuyesiaopua, kiisi natakepaka mochitomichiopua aamoo, iꞌka noꞌo aamo masitiao, aamoo naneꞌreka mochitoamekoiopua puꞌkao, pichiwarikoopua.
\v 13 Neeea ahjaka kahtiaapua pehjio, kaawe noꞌo ihsiame maayamenia iꞌka aamo noꞌo iyotepao, iꞌka aamo pusatewa inatepasiwaopua, yooma aamo noꞌo chaaneriaopua masitekao.
\v 14 Naneꞌriame neeea iꞌka noꞌo weerewaeka kahtiao, amori kiteremerikopapua, waꞌa tiame neꞌnetetiame neeea noꞌo Paamiraeo, apoe Weratiameeopua Eesusi.
\v 15 Nape iiweta ahjaka yasitoaone pehjio, yooma aꞌchikoi iintoma neeea, iꞌka noꞌo aamo masiteriaopua, noꞌo kiꞌtioiopua masitekao, waꞌapi teetomichiopua noꞌo masiteriao.
\s Eesusi ajawaria Eesusichi simiyame pichiwataria
\p
\v 16 Teeme Eesusi ajawaria masitiaa, ki taamoe erakoa chaachapakameopua teemea aamo masiteriao, yooma ihta Eesusi Weratiame utewarira taamo aamo nayeweriaopua, puꞌkao wahka taawechi enamerichi simiyame taamo aamo nayeweriaopua tiame. Yooma puuua teꞌta pichiwaripua, teeme waꞌapiai tetewikamepua Eesusio, ki nuꞌuti tiiame utewariemekopua puꞌkao.
\v 17 Puꞌkao tiame teemea, naneꞌriame teemea ki teesa tiiame werumakoopua, puꞌka Eesusi teꞌta Noonorao, Eesusichi simiyame inamukamekapapua, eee cheekamekoopua ki nuꞌuti tahpitika tiiame nayewakao: “Ihjia noꞌo Taanápua, teꞌta ki nuꞌuti nakika yasitoamerao, tisiwa ki nuꞌuti kaawe eꞌriamenia puꞌkáo.”
\v 18 Puꞌka waꞌa chiiame taamo inamoio Noonorao, kaawichi taamo yeetokoikapua, sewina tiiame enepariamekoio.\fig |224-CN01728B.TIF|col|||Peeroa tuuna achini cheerio Eesusi Noonorao tewekachitepao.|1:18\fig*
\v 19 Ihji waꞌa taamo inamuria sewina ikiriachio, teꞌta pichiwa puuua. Yooma ehkoriami Riosi naꞌnayewatura Eesusichi simiyame iyotekaopua, teꞌta pichiwa puuuai tiameo. Pukaepa eemea teꞌta pichiwa chaachapario tetewika mochitopuapuaa, yooma puꞌka Ehkoriami oꞌinia Riosi naꞌnayewatura Iyoterichi chaachapariao, yooma puuua pichiwa machenamerikopua. Yooma iꞌka chaachapatiame ikisiwa teteiwachio, amochi tahjeraka teeretoniamepua, aamo teꞌta pahtepuamechio kuꞌisimichiopua, ahkasi aamo maꞌchirepachisiopua teꞌta aamo pehterepachisio, aatanakamera nayewaka chaachapariamekopua Eesusichi simiyame iyoteriaopua.
\v 20 Iꞌka ehkoriami Riosi naꞌnayewatura chaachapariao, aaataai ki sewina tiiame chaachapametepua ahpo masitiachio, aapoeche waꞌapi machename kaawe chaachapaniameo. Aapoe ehkoriami Riosi naꞌnayewaturaai, ki aapoe ahpo inatarichi eꞌra chaachapatiame puuua,
\v 21 Riosi apoekamera ahpo Riosiwarie waꞌa cheeka iyoteteriopa, ki aapoe Riosi naꞌnayewatura erakoachi iyoteriapa. Pukaepa ihji Riosi naꞌnayewatura chaachapaka iyoteriaa, ki nuꞌuti iyoriwa tiiaitepua.
\c 2
\s Maꞌmasitari wistuki masitiame
\r (Uurasi 4-13)
\p
\v 1 Ehkoriami isaeri tiꞌtijoeturichioio, iinturiaipua tiame tiꞌtijoeri, Riosichi simiyameo tísia wistuka nayewame; waꞌachitia ehpe taawechiamioi amochio, iintumeripua tiame aaata wistuka naewameopua Riosichi simiyameo. Puuua ki maaeteka nayewaka aaataoi wihkuemeripua, ihtaoi aamo sewina ikimichiopua ahpo masitewaeo, pukachi ki naneꞌretoka wichimichiopua, ahkasioi Eesusi aamowichio mukuria aamo tatakoria natetekao, ki pichiwako chaachapamamua.
\v 2 Muuwaeme tiꞌtijoeria, puꞌka ki pichiwa chaachapaniamera nokisisimeripua, puꞌka yooma ihta suwepori tiiame nokisika, itapiti ki kaꞌkaruma. Waꞌa teꞌteretopua puꞌkao Riosi pooechi nokisiameai, kiisi kaawe chaachapapuamepua.
\v 3 Ihji ki kaꞌkaruma masitaria, tahpitika eꞌramekapapua toomichio, wihkueka toomitumapua tiꞌtijoerichio. Nape puꞌka waꞌa nokayamewichio Riosia, ki ehpesi oꞌinia, ki nuꞌuti kokosamo eꞌramepua, kaꞌchitia taawechi puuyame tiamechi kokosari.
\v 4 Riosia tewekachi ahpo kuꞌiwaoi, kiisi cheriwerepua puꞌkaoio tatakorikameo, yooma ahpo seepurawachikamera enepakameo, puꞌkao Riosia pehjio puuyeka mochitenapua pehjio wahka oorosi tukapachio kaarenae oꞌyaekáo, ahkasi wahka ihtoriachio ahpoo teꞌta katewemiachi taawéchio.
\v 5 Riosia ehkoriami Nooe taawechiamioi ki kaꞌkaruma tiꞌtijoerio, ki ahpo iyorika mochitoriopa puꞌkao, yomatiame siꞌripuka kokosariamepua puꞌkao, kiisi cheriweka tatakoriraopua puꞌkao, kiisi ahpo cheriwejereriopa.\fig |225-cn02094b.tif|col|||Ki Riosichi paparanarekamea, neeroi paꞌwe pochiria siꞌrina.|2:5\fig* Riosia waꞌa iintoaio, Nooeche newipateriamepua, oowisani ahpo taꞌpechi ohjoemeche ahjama, Nooeche waika taawechiami tiꞌtijoerio, Riosi kaaweruma tuuyewari nayeweka yasitoriopa.
\v 6 Riosia ehkoriami Aurani taawechiamioi, Sooroma tewaniachio Oomora tewaniachiopua tiameo, tísia tatakorika mochiriopua puꞌkao, naꞌie tísia kokosarepua puꞌkao, napiso yachapateka.
\v 7 Riosia waꞌa Sooromao, Rooti tewaniameche newipateriamepua puꞌkao, kaawerumakoopua puꞌkao, iꞌkao tísia aiwaka kahtiamekopua waꞌao, wahjachi waꞌa ohjoeme tísia naꞌara yoraniaeo.\fig |226-MX-20.tif|col|||Riosia Rooti newipatena Sooroma Riosie naꞌie tajenatetioio.|2:7\fig*
\v 8 Ihji Rooti tewaniamea, tísia aiwaka yasariaipua waꞌao, yooma ihta kiisi kaawe tiiame nokiopa waꞌao, yooma aꞌchi tiame ki kaaweruma inamukaopua, kiisi kaawe nokiwame tetewapaopua tiameo, kiisi wahjiame senepi taawechi.
\v 9 Iꞌka Riosi waꞌa iintoria tetewitoka teemea, teꞌta ki kaꞌkaruma yooraka mochitoameopua, ki teesa kokosari aiwatemeri Riosia puꞌkao. Nape teꞌta kaꞌkarumache yooraka mochitoameo, kaawe eꞌraka tetewamepua puꞌkao, kaawe eꞌraka maꞌchipasiamepua, ihta itapiti aꞌchi tiame aiwasiachiopua. Puuu teꞌta ki kaawe noonoikame teꞌta kokosapuachio, Riosi ki nuꞌuti kokosamiachio, Riosi teꞌta katewemiachi taawechi enemeripua.
\v 10 Ihji nuuteniame kokosaria, naatiwichiopua: teꞌta suwepori nokayamewichio, Riosi kaaweruma tuuyepuawichio waꞌiname, kiisi yooreka yasitoame aaata tísia yoorepua tiiariemeoi. Ihjia, teꞌta iyoriniameoi kiisi suuwe erapaka naꞌara chaachapame, ahkasioi teꞌpa kahtiame Riosi kuꞌiwa naꞌarekaiopua, kiisi suuwe erapame.
\v 11 Nape puuu Riosi tewekachi kuꞌkuiwaria, epeche tísia utewari iinuekaipua tewekachi taamo Noonoeo, kihta teriwa chaachapamepua puꞌkao, Riosi tetewachio.
\v 12 Ihji maꞌmasitari kiisi kaꞌkaruma masitiamea, oowera animarika teꞌtiamepua chapisa koꞌiniame. Ihjia kiisi ijinatamepua, ahpoche erasia nokisiamepua; ihji tiꞌtijoeria, kiisi ihta kaawe pahtiaiopua, aaata naꞌariamepua.
\v 13 Yooma ihji aiwateka nokisiame Riosichi teꞌteriameo, ki teesa kokosapuaite puuua Riosieo, yooma puꞌka aaata tetewachioi suwepori nokayameopua, pahkotaka, aꞌchitia keenakooi. Ihjia, aamo koayachi koaka mochikaoiopua tiameo, tísia iinya nokayamepua amochio, aamo kaꞌkaruma tiia ohchopatekao.
\v 14 Ihji tiꞌtijoea aaata oowitiame neꞌniaiopua ahpo puichio, ki nuꞌuti ikotuka tetewamepua, tahpitika eꞌraka ki aiwaniamesi; ihjia tiameo kiisi teeweka tatakoriamepua. Ihjia tiameo, tahpitika eꞌramepua ahpo ikotuwachio, tísia pepeniamekapa aaataoi oowe erapatekaopua, ihjia aaataoi oowe erapatiamepua, ki pepeniameopua ahpo waꞌinakao. Nape puꞌka waꞌa nokayameo, kiisi waꞌatia itipimeri puuua Riosi kokosarieo.
\v 15 Puuua, toakamekapa puuua kaaweruma pooeo, ki teesa wewekakame puuua naꞌararichio. Ihji tiꞌtijoeria, Waarami tewaniame tijoechitia nokisiamepua, ehkoriami yasakame. Ihji Waaramia Weeori taanara eneriaipua, toomi ikotuwawichio, sewina iintokame ahpo Riosichi iyoriao, ahpo ki kaawe iintomiawichioopua, toomi uunarekame.
\v 16 Nape ihjia, iꞌka ki kaawe iintomia simiaio, teriretupua ahpo uuruwa yaasetoaeo, kaꞌchitiame taawechi nayewameoi, iꞌka uuruchi ihtoio, ki uꞌmatonarerioi. Uurua waꞌa iintoka ki iintoterepua Waaramio, ahpo ki kaaweruma iintomia erasiao.
\v 17 Puuu wistuki maꞌmasitiamea tiameai, neeroi kaaweruma pajename wakipakameka teꞌteriamepua, pukachio kihta kaꞌkaruma pajenamekopua waꞌasi. Ihji tiꞌtijoeri ki kaꞌkaruma masitiamea, paꞌwichurichitia iꞌtoniamepua eekaeo, kuꞌwitapiche nokisa toomitusa sewinachiami uumatosiame. Ihjia waꞌa nokayaio naꞌarakao, ki teesa tiiame Riosi kokosamiachi iꞌtopuaitepua, ki teesa iinya tiiame tukapachi ahpo uhjurachi, ahkasi ki wahjiamesi ki teesa tiiame aiwamiachi.
\v 18 Ihjia tísia peenia tiame nayeweka oowe orapatiamepua, waꞌa chaachapakaopua aaata ki pewatiame teꞌteriameopua Riosichio, sewina erapatekaopua puꞌkao, ahpochitia nokisimichio ki kaꞌkarumachio, kihta nateyamechi, aamo kaꞌkaruma enepanariapao, ki kaꞌkaruma yooraka mochitoai puuyariachi.
\v 19 Puuu aamo seꞌwi tiiame maꞌmasitiamea, ahpo ahjamao nokisisoopua, saꞌrumio tuuyamepua itapiti nuurari iyorika mochitoniameopua aamo oꞌyaeka teꞌteretiao. Puꞌka nuurari aamo oꞌyaeka teꞌteriachi naꞌsosaapua, ihtaoi aamo nakiya yoranariachiopua, kihta eerina teeremio tuuyamepua. Nape puuua aapoekamera oꞌyaeka mochitoai chaachapamepua, ahpo tísia tatakoriwachi chapitiamekapa, yooma ahpo ihta ki kaꞌkaruma ikotuwachi.
\v 20 Aaata taamo Apoe Paamira Eesusichi paparakapa iꞌka weeechi ki kaaweruma nokiwa newipatetiameaipua, ki waꞌachi nokisimichio, eenechi ki kaꞌkaruma yooraka yasitosaapua, epeche ki kaaweruma teerewa tiiame, enepamepua Riosichio, ki pukeri ahpo teereriachitiaopua.
\v 21 Aaata waꞌa iintokame enesaa, epeche kaawe eneriaipua ki machisaa Riosi kaaweruma pooeo, ki epeche ikimichiopua puꞌkao, ahpo ki kaaweruma teereriachitiaopua pukeri oꞌicharichio, iꞌka Riosi kaaweruma machikaiopua.
\v 22 Waikaopua puuu waꞌa iintokamea, eee chaachapaniameka iintoamepua: “Chuhchuria, eenechi ahpo yoꞌyoria koꞌkomia eenakamepua”; piirechi chaniwamea, eee chaniwamechitia tiiamepua tiameo: “Koowia kaawe papakoka uupetiaioo, eenechi wehsarachi eenaka wehsarapamepua.”\fig |227-CN01760B.TIF|col|||Koowia wehsarachi poꞌi.|2:22\fig*
\c 3
\s Taamo Paamira Eesusia eenechi enameri
\p
\v 1 Aamo noꞌo teꞌta nakiya poponiwa pipiniwa tiame, ihji noꞌo aamo iyotepaapa, oosa simiyamepua. Neeea iꞌka oosa simiyame iyojurachio, teꞌta aamo inatajeramenia, kai waapisi tiiame inataka Riosichi simiyame, yooma teꞌta tísia kaꞌkaruma Riosi tuuyewarichiopua.
\v 2 Ki natakepajerani neeea, puꞌka ehkoriami Riosi nayewatura iyoteka chaachapariaopua, Riosie piiparieme. Yooma puꞌka chaachapariache yooraka mochitojeraninia, yooma Eesusi ajawaria aamo masiteriaopua tiame, Eesusie taamo Paamirae Apoe taamo newipatekameopua tiame, nayewatumichio uhjuraria.
\v 3 Keꞌchu ihta chiiainia aamoo, iꞌka pahcha aamo naneꞌrejeraninia: kajuyachi taawechiamio, eꞌenameripua aaata tiꞌtijoeri, ahpochewichio erakoa inatame.
\v 4 Puuua aamoo naꞌara erakokao, iinatukemeripua chaachapaka: “Nee, ¿enamerijoarepua, ki kuꞌitapisikoipua Eesusi ahpo kuꞌwe enamio tuurioio? Ihji weeeai waꞌapi teetoamepua naayachi oꞌinia enepatetiao, kihta sewina ikiyamepua ahkasi ehpiami taawechisio. Taamo ehkoriami noonoriai wahjipakameai, waꞌachi chaachapaniame puuyetoka mochitoriaipua Eesusi enamerio, nape ahkasi ehpesioi, kiisi eenamepua. ¿Achinitio enameripua naaju?”
\v 5 Waꞌa chaachapamea, kiisi pichikiamepua Riosi iintomo tuuyaa kiisi wehchi wichiyameopua ahkasi ahsieme ikiyachisi. Ki pichikiame puuua iꞌka weeeo, keꞌchu iꞌka yachanioiopua pehjio, Riosio chaachakache wakiyachi iintapariopua iꞌka weeeo, paꞌwetere tiioipua iꞌka weeeo, paꞌweo norikame manipateka.
\v 6 Ihji nanaarame masitaria, kiisioi naneꞌriamepua tiame ehkoriamio, Riosi cheeriachichee yomatiame siꞌripurioopua weeeo, yomatiame nanaarame wehjoarichi siꞌripuka.
\v 7 Nape iꞌka weee kajuyachio Riosia, teꞌta ahpo utewarieo, chaachasache tajenatemeripua yomatiame iꞌka weeeo, ahkasi tewekaopua tiame. Waꞌa iintomeri Riosia, teꞌta ahpo katewiachi taawechiopua, yooma nanaarame katewesa kokosaiopua.
\v 8 Pukaepa eeme noꞌo Riosichi poponiwaa pipiniwaa tiame, kaꞌte waꞌa yaapi erakoka mochitomitiapua, nanaaraka chaachapamechitiao, taamowichioo piie miiri paamupario, Riosia piie taawechitia tetewamekopa; Riosio piie taawechitia tetewao, taamowichio piie miiri paaumparipua.
\v 9 Waꞌa teeka tetewiniachiopua, taamo Paamira Eesusia waikao, kiisi ariwapaitepua ahpo teꞌta enamiachio, aaata waꞌami ahka tísia ariwapamekoo Eesusio chaachapanioioo; nape ihji taamo Eesusi Paamiraa, ki aaata epeche tatakorichi wewekamichiopua puuyeka tiiamepua pehjio, tehpe teewepamepua ahpo enamiao, epeche weeka apochi eꞌenapuawichioopua, ahpo tatakoriniameopua waꞌasio, toakaopua waꞌási.
\v 10 Nape taamo Paamiraa enamachepua, ihji eenaiopua senawato asimitepua ichikoamechitia. Puꞌka taawechio, ihji tewekaa, kiterepamitepua waikao, ki nuꞌuti tiame teꞌteoka. Yooma aaata taamo itapiti ahjae neteniameai, yooma saipameri puuuai naꞌieo, kihta enepaka waꞌasi. Weeechioi, yooma ihta netetiameai, waꞌachitia saipameripua tiameo, weee tajenarieo.
\v 11 Yooma iꞌka weeeo saipaka kajupuamekoopua, iꞌka weee tewekara tiameo, ¿ki teꞌta kaꞌkarumachi yooraka mochitomerijoare eemea teꞌta aamo iyoriwa teꞌterekaopua Riosichio,
\v 12 yaapi erakoka Apoe Eesusi tekimichioopua, aamo newipatemiao, iꞌka weee kajuyachi tajenamerichio?
\v 13 Teemea, yooma waꞌa iꞌka weeeo tajenaka kajumerikoiopua, yooma tewekaoiopua ki naania ikimerikoopua tiame, yooma ahjachi iintuameopua ki naania ikimerikopua tiameo, weemera wehjoari taamo mochimiachi, puuyeka mochitoame teemea, weemera teweka iinueme, Apoe taamo Paamira Riosio, iintomo tuuriachitia. Waꞌa weemera taamo mochikachio, kiteremeripua ki kaꞌkarumao, apoche kaꞌkarumache ohjorepuachi waꞌao.
\v 14 Pukachipa eeme noꞌo tísia nakiwaa, kaꞌkarumache yooraka mochitopuapua pewatiame mochitoka Riosichio, waꞌa aamo teꞌteresoo Eesusi eenaio aamo katewemiao, kaꞌkaruma teꞌteriame aamo tewimichiopua, kihta aꞌchitiame tatakorieme.
\v 15 Puuu tepepi teeweniamea Eesusieo, epeche weeka muuwepamichiopua apochi newipamerio; waꞌa teeka tetewimete teemea, puꞌka Eesusi tehpe puuyewa teewiao. Taamoo Paoroa taamo paꞌchichitia tetewaa, waꞌachi cheeka aamo iyotepekame puai iꞌka tehpe eenepaniame Eesusieo, iꞌka Riosie ahpo kiaretia tiꞌtijoeri tuuyewarichiopua.
\v 16 Yooma ahkaoi ahpo iyotepariachiopua, waꞌachi cheeka iyoteparepua iꞌka tehpe eenepaniame Eesusieo. Iꞌka Paoro iyoteparichi tísia tehki tiiame masitiamekopao, ki kaawe pahtekameapua, seꞌwikamepua puꞌkao, teꞌta Paoro masiteriachitia masitepuao. Pukaepa, ki teꞌta machiyame Riosichi simiyameo, seꞌwichi ruhjiamepua ki kaawerumachi. Ihji maꞌmasitari ki ahsieme pepenipakame Paoro masiteriao, seꞌwi chaachapaka masitiamepua, wahjachi Riosi iyotaperichi chiiao. Puuu seꞌwi masitiamea, kiisi kaawe nokayamepua Riosi teꞌta pichiwari chiiao, waꞌa teꞌtiapa puuua, ahpo waꞌapi naꞌatamepua.
\v 17 Pukaepa eeme noꞌo poponichitia kaawe eꞌriaa, puꞌka seꞌwi masitiamechio, kaawe aamo inateka mochitopuapua, ki aamo apochi panisutomichiopua ahpo tísia wihkuewae, aamo kaawe Riosichi teꞌterewao, ruhjipateka.
\v 18 Pukaepa eemea, kaawe machipakame mochitopuapua Eesusi masitiao, teꞌta taamo Paamira Eesusi nakiyachitia, Apoe Eesusi Riosie Weratiameo, taamo teꞌta newipatemichio weratiame. Pukaepania iꞌka iyotepe kajuyachiopua, iꞌka Eesusi Riosie Weratiamewichioo, weruma iyoriwa teerejeraninia puꞌkawichioo, ahkasi ki wahjiamesi.
\p Waꞌa teꞌteresaa kaawe enemiipua. Cheriwema waꞌasi.