\id 1JN
\h Pahcha Waani Iyotepawa
\mt2 Pahcha Simiyame
\mt1 WAANI
\mt2 Iyotepawa
\c 1
\s Riosi Naera
\p
\v 1 Kúíra yomatiame iꞌka wehjoarichi mochikáme. Iꞌka noꞌo iyotewachio, aaatachi simiyame itapiti aamo nayewemane, kihta kiꞌtioi iꞌka wehjoario, ahjaka yasitokameopua waꞌasi, keꞌchu naayachisi oꞌínia. Puuu aaataa ihji aaatapua: taamo waꞌapi pusie tetewaria, taamoo puꞌkao keepuka ohjoria; taamoo puꞌkao, taamo sekae ahjachi ihcheparia. Ihji teꞌta aaataa, Eesusi Riosie Weratiame puuua; puuua, Apoe teꞌta Riosi Naera puuua, Riosia pukae ahpo Naeraeo, teꞌta kaaweruma ahjarikamera taamo kiꞌyamepua, weemerakamera ahjari.
\v 2 Ihji waꞌapi Riosi Naeraa, iꞌwa wehjoarichi eenaka tijoetukamepua, taamoo taamo pusie tetewiriamepua; pukachi waꞌa tiiachipa teemea, pichiwako tuuyámepua, iꞌwa wehjoarichi eenário. Puꞌka Naera Tijoetukamechi simiyame, aamo nayewatuna teemea. Puuu Naera Tijoetukamea ki wahjiamesi ahjari tiiamepua, puuua taamo Noono Riosi tiiarichi oꞌinia tekikamepua, puꞌka tiiarichi oꞌinia tekika weeechi eenaka, taamo ahpo tetewitekame.
\v 3 Puꞌka teꞌta taamo tetewaria, puꞌka teꞌta taamo inamuria tiame, aamo nayewatuame teemea, aamóo, waꞌachitia tamochitia taamo Noono tewekachi kahtiamechi teꞌtereka mochitomichiopua, waꞌachitia Riosi Taanarachi taamo teꞌtereka mochitoachitia, waꞌachi teꞌtereka mochitomichiopua, Eesusi Riosie teꞌta Weratiamechio.
\v 4 Waꞌa tiiame aamo tuuyepame teemea iꞌka iyotewachio, puꞌka aamo Riosichi peenia erakoao, epeche ahsepari teerepuawichiopua.
\s Riosia piipari tahjewari puuua
\p
\v 5 Eesusi Riosie Weratiame taamo aamo masitenureriaa, ihji kaaweruma weemera tuuyewari puuua: Riosia piipari tahjewari, kiꞌtiameoipua tiameo, ihtaoi ki kaaweruma tiiameo, kiisi oiyameoiopua tiameo, tukaparichio; ihjia teꞌta kaawerumache ihsiwa tiiamepua.
\v 6 Puꞌka Riosi ahjama kaawe teꞌtio tuusaa teeme, nape waꞌa chaachapaio ki kaꞌkaruma yooraka ohjosaa teeme, wistuame teeme taamo chaachapariao, ki taamo chaachapariachitia ohjoekapa teeme.
\v 7 Nape uutapachi ohjoresaa teeme kaawe ahpo uukao, Riosichitia uutapachi teꞌtereka mochitoame teemea, kaawe erakoka mochitoka taamo wahjachi ahjamaoi, Riosi Taanara Eesusio taamo tatakoriria teꞌta taamo piipateriopao, tísia kokosa aiwaka, ahkasi kurusichi mukukao.
\p
\v 8 Ki tatakoriwaeme taamo teewasaa teeme, taamo waꞌapi taamo wihkuiámepua, kihta kiꞌtiame teemea waikao, taamo pichiwariwao.
\v 9 Nape teemea Riosio taamo tatakoririo tuusaa, tísia kaawe erakometepua taamo tatakoritiao taamo cheriwemerikopua, puꞌkao tamochio, teꞌta kaawerumache ihsiamekopapua, yomatiame taamo kiisi kaawe nokariaopua, piipáteka.
\v 10 Nape ki tatakoriwaeme taamo tewasaa teeme, Riosikamera wihtuchame teeme waikáo, ki pichiwaka uuyamekapa teeme puꞌka cheeriao, Apoe Riosio cheeriopa taamoo, yomatiame teeme tatakoririameko tuuka.
\c 2
\s Eesusi Riosie Weratiame taamo nehpupari
\p
\v 1 Noꞌo Riosichi kukuchiwa, iꞌka itapiti aamowichio iyotiamenia, kaawe aamo inateka mochitomichio itapiti ki kaꞌkarumachi wichipuameo. Nape seenekachi aawata piire tatakorichi wichisoo, ijinueme teeme aaata taamo nehpupamerio, riaorósi taamo wenejia taamo Noono tewekachi kahtiamechio. Puuu Eesusi Riosie Weratiamea, waꞌa iintomeripua taamo nehpupakao, puuu Apoea, teꞌta tísia kaawerumakapa puuua, taamowichioo kaaweruma wichiyameche, ihsiamekapapua.
\v 2 Puꞌka Eesusio taamowichio mukiwarichi ahpo nehjariopaopua, yooma taamo tatakorika wikiriataria natetetiame itipikamepua, ki ehpe taawechiami taamochewichiopua, ahkasi yomatiame iꞌka wehjoarichi mochikamewichiopua, Eesusichi paparakameo.
\p
\v 3 Eꞌwaka mochisaapu teeme puꞌka Riosi nuurario, pukachi naneꞌrepuame teemea, pichiwa kaawe teꞌtereka mochitoamekopua Riosichio.
\v 4 Nape aaata ahka cheesoo: “Tísia kaawe teereka yasitoamenia Riosichio”, nape waꞌa chiiaio, ki yorame enesaapua Riosi nuurario, kihta Riosichi kaawe teereka yasitoamepua, oowera tísia wistuamepua, kihta pichiwari tiiamepua apochio.
\v 5 Sewina chaniwachio, aaata eꞌwaka yoorameapua Riosi nuurario, pukae eꞌwewa ihsiwae tetewitiame Riosio, tísia ahpo nakiyaopua Riosio. Pukachi waꞌa taamo tiiachi, taamo naneꞌriame teemea, taamo kaawe tiiamekopua Riosichio.
\v 6 Aaata ahpo Riosichi kaawe teereka yasitoameko tuuyamea, Riosi Taanara Eesusi iꞌwa weeechi yasariachitia, yasitómetepua.
\s Weemera nuurari
\p
\v 7 Noꞌo Riosichi nakiwaa, ihji nuurari aamo noꞌo iyotepiaa, ki weemera simiyame puuua, puuu waꞌapikai tiiapaopua ehkoriami oꞌinia simiyame, puuu waꞌapi puuua, ehpiami taamo nayewatuaa, puꞌkaopa aamoo inamuriapa waꞌási.
\v 8 Nape waꞌa tiiaipua, Riosie Weratiameo ahsieme eꞌwewa iintoriopa, yomatiame Riosi nuurari eꞌwepakaopua iꞌwa weeechi oirioio, weemera tiiame Riosi nuurari eꞌwewa, enepakamepua. Ehpeo eemeai Riosieo, yomatiame ahpo Taana Eesusichi paparameo, ahsepari eꞌwekame taamo tetewamepua ahpo nuurario. Pukaepa ehkoriami tukapari Riosi nuurarichi nokisitiamea, puuua saipatoamepua, ehpeo taamoo Riosi Taanara tahjewarachi mochitoamekopa, Eesusichi paparakao. Ehpeo eemea Eesusi tahjewarachi mochitoamea, kaawe ahpo nakika mochitoamepua.
\p
\v 9 Aaata piire ahka Eesusi tahjewarachi yasitoame teewasoo, waꞌachiaipua nekumesaa ahpo piirechio, tukapachi yasitoamekai chiiamepua pehjio.
\v 10 Nape puuu ahpo piire nakika yasitoamea, Eesusi tahjerawachi kaawe teeretoka yasitoame puuua, aaataai kihta tatakorichi wichiteme tiiamepua.
\v 11 Nape aaata ahpo piirechi nekumeka yasitoamea, waꞌa ahpo maꞌchitamepua tukaparichi yasitoamekoo, ki maꞌchiriameka tiiamepua, tukapachi oiyamechitia kiisi maꞌchiriachi.
\p
\v 12 Neeea Riosichi kukuchiwalao, iꞌka noꞌo iyoterichio eee chiiame kaꞌkaruma tuuyewa iyotiamenia aamowichioo, Riosichi aamo teꞌterepariopa aamoo, Riosio aamoo cheriweriopa tatakoririao, Eesusi Riosie Weratiameo aamowichio iintóriae.
\v 13 Eeme kukuchi yayawarao, iꞌka aamo iyotiamene aamowichioo, tísia naneꞌreka mochitoamekopa Riosie Weratiamechi simiyameo, puꞌkao keꞌchu naayachisi oꞌiniasi ahjaka yasitoame.
\p Aamo tehtemario, iꞌka kaawe eꞌrewa aamowichio iyotiamenia, tísia aiwaio anachaka newitoriopua riaorósio, tísia naꞌara aamo yoranareriameo.
\p Aamo kukuchio, iꞌka kaawe eꞌrewa aamowichio iyotiamenia tiameo, aamoo tísia nuꞌnuntikoiopua pehjio, aamo Riosichi paparamekopua.
\p
\v 14 Eeme yayawaraa, kaawechupena tísia paparakame eemea Riosie Weratiamechio, keꞌchu naayachi oꞌinia ahjaka yasitoamechio.
\p Eeme tehtemariaio, kaawechupena eemeai newitokamepua riaorósio, tísia anachatoaipua riaorósi naꞌarario, amochi tísia naꞌara yoranarewa, Riosi kaaweruma tuuyewarichikamera enepakaopua, tísia utewaeme enepakaopua amochio, riaorósi aamo tísia naꞌarewa nehpupariwichioo.
\p
\v 15 Waꞌa tiiachipao neeea yooma aamoo, chaaniamenia, kaꞌte puꞌsereka mochitomitia eemea, itapiti ki kaꞌkaruma nokiwame iꞌka wehjoarichio, ikotukaoi ihtaoi itapiti iꞌka wehjoarichi iintuameo. Aaata iꞌka wehjoarichi iintuame ikotuka yasitoamea, kiisi nakika yasitoamepua tewekachi taamo Noonoo.
\v 16 Waꞌa tiiamepua, yooma ki kaꞌkarumaa iꞌka wehjoarichie taamo ooweniamea, ki taamo tewekachi Noonoe ooweniamepua, ihjichitia weeechi iintuameaa: yooma ihta taamo tetewao, ki kaꞌkaruma yoranarewa; yooma taamo erakoa ki kaꞌkaruma yoranarewa; tísia paarasarieka yasitonarewa.
\v 17 Ihji weeea ahpo kajumite puuua, yooma apochi mochikame tiꞌtijoeri kiisi ki kaꞌkaruma ikotuame ahjama; nape sewina tiiachio, puuu Riosi nakiyachitia mochitoamea, ki wahjiamesi ahjameripua Riosi ahjamao.
\s Napapuka neꞌnewa, aachintiamera teꞌta pichiwarikoo ki pichiwarikooio
\p
\v 18 Noꞌo Riosichi kukuchiwala, waapi teetoamekaitepua epeche epecheche, Riosi ihsiwa kajumiachiopua iꞌka wehjoarichio. Inamukame ohjoare eemeapa, aaata iintumio tuuwao, aaata Riosie Weratiame teꞌta weruma Seepurawarao. Wee, weeka puuyapamepua waꞌasio Riosie Weratiame seepurawao, teꞌta Riosie Weratiame Seepurawa ijinuwarao. Waꞌa tiiachipa epeche epecheche, waapi teetoameko erakoame teemea, Riosi iꞌka wehjoarichi ihsia, kajumiachiopua.
\v 19 Puuu Riosie Weratiame seepurawaa, ahkasioi taamo tiꞌtiopachiamioi eꞌenariameaipua ookapio, ki pichiwa taamo Paamira Eesusichi paparame. Puuua ki taamo ijinuwara eneriamepua taamo Riosichi poponiwachio pipiniwachiopua tiameo, poanatukamekapapua, tamochitia pichiwa Riosichi paparame enesaapua, taamo ahjama itipimeriaipua. Nape waꞌa noonoitiamea, taamo maꞌchiame tetewimichio iintuamekopua taamo tiꞌtiopachioi Eesusi seepurawa, nape ki yoomahka.
\p
\v 20 Nape eemea ki poanatuamepua taamo Riosichi paparamechio, eemea amochi uukamekapa teꞌta Kaaweruma tiiamera Riosi Riosiwario, Riosi aamo kiꞌyariao, pukaepa machika mochitoame eemea, taamo Paamira Eesusi pichiwari tiiao.
\v 21 Pukaepa aamo iyotepamenia, aamo machiyamekopa Eesusichi simiyame pichiwarirao, kii ki aamo machiyamekopa. Eeme waꞌapi naneꞌriamepu, wistukio kaꞌchitia pichiwarichi eenamekopua.
\v 22 ¿Aatana ohjoarepu teꞌta wistuamea? Naati puuua, ki Riosie Weratiameko tuuyame Eesusio, ki Riosi tiiarichi eenameko tuuyame. Puuupua, teꞌta Riosie Weratiame seepurawaraa, ki uuka tetewamekamera Eesusi Riosi Taanarao, apoe teꞌta Eesusi Noonoraoi.
\v 23 Aawataai ki Riosichi eenameko tuuyamea Eesusio, ki apochi iniwaeka yasitoamepua teꞌta Eesusi Noonoraoi; nape, Riosichi eenameko tuuyamea Eesusio, apochi iinueka yasitoamepua teꞌta Eesusi Noonorao.
\p
\v 24 Pukaepa kaawe neesetomitiamua, puꞌka Riosichi simiyame tuuyewario, pukeri oꞌinetiachisi aamo inamuriao. Waꞌa teꞌteretoka neesetosaa eeme, pukachi Riosi Taanarachiche teꞌtereriame enemapu eemea, Eesusi Noonorachi teꞌteretokameche tiame.
\v 25 Teemea waꞌa teꞌteretokamea, kiapuame teemea waikao, Riosie Weratiame taamo kiapo tuutiameopua, kiisi wahjiamesi ahjaniameopua weemera ahjari.
\p
\v 26 Puꞌka waꞌa tiiame aamo iyotepamenia, kaawe aamo neesetoka mochitomichiopua aamo wihkuenariameo.
\v 27 Eemea tísia machika mochitoamekapaopua Eesusi Riosie Weratiame pichiwarirao, ki aaatae aamo epeche masitepuamepua, Riosi Riosiwarikamera aamo masitiamekopua, amochi yasitokao. Puuu Riosi Riosiwarikamera inisiamepua aamo teꞌta masitekao, ihtáoi Riosichi simiyameo. Puuu Riosiwari masitiaa, teꞌta pichiwarikamera puuua, kiisi wistúki. Waꞌa tiiachipa eemea, puꞌka Riosiwari amochi yasitoa masitia, eꞌweka mochitopuapua, puꞌka Eesusi Riosie Weratiamechiche, Riosiwarichi teetoka.
\p
\v 28 Ehpeo noꞌo Riosichi kukuchiwala, peewatiame mochitomitia eemea Riosie Weratiamechio, ki aamo suuwe erapatepuaichio aamo teꞌteretoriao, puꞌka Riosie Weratiame enasoopua teꞌta taawechio; epeche kaawe ahjachi erakoka mochitoniamea, puꞌka taawechi teꞌta enameriwichioo.
\v 29 Eemea naneꞌriame enesaa Riosie Weratiameo, kaawerumache ihsiamekoopua puꞌkao, naneꞌremete eemea tiameo, yooma aaata kaawerumache nokayameo, Riosi tatanarachitia teꞌteriamekopua, Riosi Taanara Eesusichi enepakamekopua.
\c 3
\s Riosi teꞌta tatanara
\p
\v 1 Eemea iꞌka noꞌo chiiao, inataka neꞌnemitiapua: Nee, taamo Noono Riosia, ki teesa taamo nakiyamepua, ahkasioi puuua taamoo, ahpo tatana taamo teewamepuá; pichiwa waꞌa teꞌtiamekate teeméa. Nape wahjachia, ki Riosichi paparaka mochitoamekapaopua, ki taamo Riosi tatanarachitia tetewamepua, kihta tewekachi kahtiame Noonochi teꞌteriapa.
\v 2 Noꞌo Riosichi poponiwa pipiniwaa tiame, ¡Riosi tatanarapa teeméa! Teemea ki teꞌta kaawe naneꞌriamepua taamo weerewa teꞌteremiao, nape wahka ihtoriachio Eesusi eenechi tewekachi oꞌinia tekisoo, Eesusi weerewaeka eenaria tetewapao, puꞌka weerewa taamo weerewaemeriko erakoame teemea.
\v 3 Yooma puꞌka puuyetoka mochikamea, Eesusi yeꞌkarichi ahjama mochipuameo, tísia piipari tiiame ahpo neesetoka mochimetepua, iiweta iꞌwa wehjoarichi mochitoaiopua pehjio, teꞌta Eesusi piipari tiiachitia.
\p
\v 4 Ki ahpo piipari neesetoka mochitoamea, ki iyorika mochitoamepua Riosi nuurario, puuu ki iyorika mochikamea puꞌka nuurario, tatakoriame puuua.
\v 5 Eemea naneꞌriamepua Eesusi Riosie Weratiameo, apoeopua kiisi ihta tatakorikameo, iꞌwa wehjoarichi eenariopua taamo tatakoriria kokosapuame, ahsieme choꞌwemiao.
\v 6 Aaata teꞌta Riosie Weratiamechi kaawe teeretoamea, kiisi oiyamepua tatakoriwachio; tatakoriwachi oika puꞌseriamea, kihta Riosie Weratiamechi teeretoamepua, puuua Riosie Weratiameo, kiisi machiyameka teeretoka yasitoamepua.
\v 7 Noꞌo Riosichi kukuchíwaa, kaꞌte aamo toimitia wihkuemichioo aaataoi; aaata kaawerumache yooramea, kaaweruma puuua, Riosie Weratiameka tiiamepua, ahpo kaaweruma tiiao.
\v 8 Nape tatakorika puꞌseriamea, riaorósikamerachi tiiame puuua, riaorósi iinuwara. Riaorósia, tatakorika puꞌseriamepua, Riosichio, ahpo poanaturiachisi waꞌana, ki naneꞌreniachi wahkasi ehkoriami oꞌiniao. Nape Eesusi Riosi Taanaraa, riaorósi taamo ahpo ijinuwa eenepatenariopa, waꞌinemia eenakamepua, riaorósio, ki taamo Riosi tatanara enejeriopa.
\p
\v 9 Aaataai teꞌta Riosi taanarachitia yasitoamea, kiisi tatakorika yasitonariamepua, weemera ahjari iinuekapapua Riosichio Riosie ahpo kiatiame. Pukaepa ki itipiamepua tatakorika simitewachio, eenechi naawakameka tiiame enepatetiapaopua, Riosieo. Puuua ahpo yooreminaopua iikachio, Riosi taanara enepakame puuuapa.
\v 10 Naneꞌrepori tiiame teemea, Riosi tatanara aatanakoo, riaorósi ijinuwarao aatanakoiopua, ahpo nokiwamechi maꞌchiame tetewiniamepua, aatanakamerakoo. Aawataai ki kaaweruma yooraka yasitoamea, kiisioi nakika yasitoame enesaa ahpo piirechio, ki Riosichi tatanarachitia teꞌteriamepua, riaorósikamera ijinuwarapua.
\s Napatika ahpo nakika mochitotaria naaju, aaatachioipua
\p
\v 11 Kiꞌyamisi oꞌinia taamo tuuyesiwa inamutiamepua, puuu waꞌapi ihjia: taamo ahpo nakika mochitopuamepua.
\v 12 Teemea ki Kaainitaru ohjoériachitia ohjoétometepua, ehkoriami naayachikoio pehjio, ohjoeriachitiao. Puuu Kaainia, riaorósi iinuwara enekamepuáa, ahpo pooni meꞌyakamekapa.\fig |228-AP-01-28.TIF|col|||Kaainia ahpo pooni meꞌyare.|3:12\fig* ¿Ihtatia tiiachipa waꞌa iintoriarepua ahpo pooni meꞌyakao? Wee, puuu Kaainia, naꞌarari inataka yasitoriamekapa waꞌa iintokamepua, puꞌka poonira Aaweri tewaniamea, kaawerumache yooraka yasitoamekopa, waꞌa yoratiamepua.
\p
\v 13 Waꞌa tiiachipa eeme noꞌo Riosichi kukuchiwaa, aamo nekumeka teteiwai iꞌka wehjoarichi mochikameeo, kaꞌte iinsa tiiameko erakoka mochitomitiapua. Puuu aamo kuꞌkume eꞌraka tetewamea, ehkoriami naayachi Kaaini teereriachitia, teꞌtereka mochitoamepua.
\v 14 Nape teemea Eesusichi paparamea, taamo kaawe nakika mochitoamepua, aaataoi kaawe eꞌraka nayeweka. Waꞌa teꞌteriapa teemea, naneꞌriamepua taamoo, ki aiwamerikopua oosa simiyamechi mukiwario, teemea weemera ahjarichi teetoapa, taamo Noono tewekachi kahtiame kiꞌyaria. Aaataai ki ahpo piirechi nakika yasitoamea, ahjaka oiaiopua mukukameka tiiamepua. Puuua waꞌapitia itipisaa, puuua eeyowa tiiamepua oosa mukiwachi wichipuameo.
\v 15 Aaataai ahpo piirechi nekumeka yasitoamea, tijoe koꞌyameka tiiamepua; eeme waꞌapiai naneꞌriamepua puꞌkao, aaataai tijoe koꞌyameo, kiisi kiapuamekopua, ki wahjiamesi ahjario.
\v 16 Teemea Eesusi Riosie Weratiame iintoriaeo, teꞌta pichiwarikamera nakiwari machiyamepua, ki teesa taamo nakiyapao, kurusichi mukuriopa, ki nuꞌuti kokosa tiiame aiwaka taamowichioo, apoe ahpo kaawe eꞌrachi waꞌapi. Waꞌachitia teemeai taamo poponi pipiniwa Riosichi paparamewichioo, ihtaoi aiwari aiwaiopua puꞌkawichioo, kaawe erakometepua, waꞌa teeka tetewiteniamepua tamochio, teꞌta kaaweruma Riosichi eename nakiniameo.
\v 17 Aaata ahka soparame iinuekai yasitoameapua ahpowichioo, waꞌa tiiaiopua ahpo piirechio, itapitichi tísia tooremuka yasitoame tetewaiopua kihta ihkorewae kuꞌisaopua puꞌkao, ¿ihtatiana, teꞌta kaaweruma nakiwari Riosichi eename iinuetapua?
\v 18 Noꞌo kukuchiwaa, taamo aaata nakiwaria, tamoe iintokache tetewiteniamepua, ki oowera chanikache.
\s Pichiwa cheriwetiameko tatakoririao
\p
\v 19 Waꞌa teeresoo taamo iintowachi tetewima teemea, taamo teꞌta Riosi pichiwarichi teꞌteriamekopua. Waꞌa teꞌteriapa teemea, teꞌta pichiwa ki kokosapo erakoame teemea, Riosi teꞌta taawechi tiꞌtijoeri katewiachio.
\v 20 Tahpitika eꞌroiopua taamoo, ki nuꞌutiko taamo tatakoririao, teꞌta taamo pichiwari eꞌraka cheriwejeraka itasoo Riosichio, cheriwepuameche teemea Riosieo, apoeo maꞌchiame tetewamekapa taamo iikachio, tahpitika eꞌraka taamo itaya cheriwejerao. Waꞌa iintomeri Riosia, yomatiame tiiamekapa naneꞌrewao.
\v 21 Nape kihta weruma tatakori tamochi pehtiamekoio Riosia, taamo cheriwemeripua tiameo,
\v 22 ahkasioi tísia nuꞌutikoi taamo tatakoririáo. Waꞌa iintoame taamo Noono Riosia, ahpo mochijerachitia mochitoameo, ahpo nuurariwa eꞌweka.
\v 23 Taamo Noono Riosi nuuraria ihjipua: ahpo Taana Eesusichiche paparaka mochitoniame, teꞌta pichiwari taamowichio iintorio erakoniame Eesúsio, teꞌta kaawe taamo ahpo nakika mochitoniame, teꞌta apoeo, taamo nuureriachitia.
\v 24 Yooma aaata puꞌka tewekachi taamo Noono nuurarira eꞌweka mochitoamea, taamo Noono tewekachi kahtiamechi teꞌtereka mochitoamepua; Apoe taamo Noono tewekachi kahtiameai pukachi. Teemea tamochi kahtiameko naneꞌriamepua Riosio, tamochi yasitoamekopua Riosiwarirao.
\c 4
\s Riosi Riosiwarira nayewaniame; riaorósi riaorósiwarira tiame
\p
\v 1 Aamo tísia noꞌo nakiyaa, kaꞌte yooma Riosichi simiyame masitio tuuyame pichikemitia. Naneꞌreka uumitia puꞌkao, kaawe inataka, seenekachi ki Riosichi eenamekoi enema puuua; iꞌka weeechio ki ookapi ohjoamepua maꞌmasiteri, puuua ki pichiwaka masitiame.
\v 2 Aaata maꞌmasitari Riosi Riosiwari apochi yachatoamea, eee cheeka ahpo masitewachi maꞌchitamapua: “Riosi tijoe tijoetukameo, Eesusi Riosie Weratiameko”, tuumapua.
\v 3 Ki Riosiko tuuyamea Eesusi Riosie Weratiameo, waꞌa chiiachi naneꞌrema teemea ki pichiwa chiiamekoo, puꞌkao teesaoi ki apochi tiiamekoo Riosi Riosiwario; puuua, riaorósi riaorósiwarikamera yachatoamepua, Riosie Weratiame teꞌta seepurawa. Inamuriare eemeapa, aaata enamerikoo, Riosie Weratiame teꞌta seepurawa. Weh, neeea puꞌkaopao, eenariameko tuuyamenia, puuu Riosie Weratiame seepurawa riaorósiwarirao, iꞌwa wehjoarichi tetewiniamekopa ihsiaopua waꞌási.
\p
\v 4 Eeme noꞌo Riosichi poponiwaa pipiniwaa tiame, Riosi tatanarakamera eemeapa, pukaepa eemeapa newitokamepua, puꞌka maꞌmasitari wihtuka masitiameo. Eemea ki yuumpatiamepua pukaeo, puꞌka Riosi Riosiwario amochi yasitoameo, tísia utewaemekopa, ki puꞌka riaorósi riaorósiwarichitia iꞌka wehjoarichio, ihsitoameo.
\v 5 Puuu maꞌmasitari wistukia, riaorósi riaorósiwarirae ahpo eratewakamera masitiamepua, ki Riosichi tiiakamera. Pukaepa ki Riosichi paparanariamea, puꞌka riaorósi riaorósiwarie eratetiamee masitiamekamera tísia puꞌsereka keepuamepua.
\v 6 Sewina teꞌterewachio, teemea Riosi ijinuwarapua. Puuu Riosi nakiyamea, taamo ahjama nayewaka puꞌseriamepua Riosichi simiyameo; nape ki nakika mochitoamea Riosio, kiisi puꞌseriamepua taamo ahjama nayewakao. Waꞌa teeka naneꞌremeri teemea, aatanakamera pichiwaka nakiyamekopua Riosio, aatanakamerakopua tiameo, ki pichiwaka nakiyamekopua Riosio, oowera wihkuaka nayewamekopua.
\s Ahpo nakika mochitopua
\p
\v 7 Eeme noꞌo poponiwa pipiniwa tiamea, tísia noꞌoe nakika mochitoamea, teeme Riosichi poponiwaa pipiniwaa tiame taamo kaawe nakika mochitometepua, ahkasi taamo wahjachioi, puꞌka nakiwario Riosichi eenamekopao. Aaata nakika uuyamea aaatao, kaawe tiiamepua Riosichio, Riosi taanarachitia.
\v 8 Aaata ki nakika tetewamea ahpo wahjachio, kihta iinuemepua Riosi nakiwariopua apochio, Riosia apoe teꞌta pichiwari nakiwarikapapua, yomatiame aaataoi nakiyame.
\v 9 Riosia tísia taamo ahpo nakiya tetewitenariapaopua, ahpo Taana tijoetutesa uhjurekamepua iꞌka wehjoarichio, taamo weemera ahjari kiapuawichioopua, puꞌka ahpo piiripi waꞌapi Taana iintóriae.
\v 10 Teꞌta ki nuꞌuti nakiwaria, Riosie taamo tetewitetiamepua, ki tamoekamera Riosio, apoe Riosio ahpo Taanakamera uhjurakamekopua, ahpo Taanakamera iintoriawichio, taamo cheriweriopa taamo tatakoririao, yomatiame ahsieme natetekaopua.
\p
\v 11 Waꞌa teesoo eeme noꞌo Riosichi poponiwaa pipiniwaa tiamé, Riosio ki teesa taamo nakiyame enesoo, waꞌachitia teemeai tísia kaawe taamo ahpo nakika mochitometepua.
\v 12 Riosia seenepioi, ki aaatae tetewiniamepua; nape ahpo kaawe nakika mochitoniachi, tetewiniamepua pukachio, teꞌta kaaweruma Riosichi eename nakiwariaa, puuu Riosi nakirewaa, kaawe ahpo nakika mochitoamerakachi, epeche epecheche tamochi teetopasiamepua.
\p
\v 13 Teemea taamoo, ki taamo ahpo nakiwariche naneꞌriame teemea, taamoo Riosichio kaawe teꞌteriamekoo, apoekamerakopua Riosio, ahpo Riosiwarie tamochi yasitoamekopua, ahpo Riosiwarieopua taamo inatarichio chaanesika, taamo tísia kaawe tiiamekopua apochio.
\v 14 Teemea tiameo, Riosi Taanarao, tamoe waꞌapi pusie tetewikamepua puꞌkao, pukaepa teemea Eesusi Noonorao, apoe waꞌapi tamochi uhjurario pichiwatamepua, yooma taamo iꞌka wehjoarichi mochikameo, newipatemichiopua.
\v 15 Riosia aaatachioi Eesusio Riosi waꞌapichi eenameko tuusoo, Riosie waꞌapi tijoetutetiameko tuusoo, Riosia pukachi pakiyamepua iikarachio, pukachi ohjoretomiaopua; puuu waꞌa ikitiamea Riosieo tijoea oowitiameaio, tísia kaaweruma teꞌteretoamepua Riosichio, Riosia tiameo pukachio.
\p
\v 16 Naakona waꞌa tiiaitepua, maꞌchiame pahtiame teemea ehpeo, achini tiiameko Riosi nakiwariopua tamochio; ejeꞌe pichiwa waꞌa tiiame puuua, pukaepa waꞌa tiiachipa pukachio, teꞌta pichiwariko erakoame teemea puꞌkao. Riosio teꞌta nakiwarikopaopua puꞌkao, aaata ahpo wahjachi tiame nakika yasitoamea, Riosichi ahpo teereka yasitoamepua; Riosiai pukachi teereka kahtiamepua.
\v 17 Waꞌa teꞌteretosaa teemea taamo wahjachi kaawe nakika mochitoniameo, kihta taamo seeweka mochitomete teemea, wahka ihtoriachi tiꞌtijoeri ki kaawe noonoikame, teꞌta Riosi katewemerichio, teꞌta Riosie Weratiame nakika yasitoriachitia, mochitoamekapa.
\v 18 Aaataai teꞌta Riosi nakiyachitia ahpo nakika mochitoniachio, kiꞌtiamepua Riosi kokosari majaniamea, wahka ihtori taawechiopua tiꞌtijoeri teꞌta katewemiachio. Ohsotia puuu majaniamea, ahpo pujayamepua tamochio, Riosi nakiyachitia taamo teꞌta ahpo nakika mochitosoo. Nape Riosi kokosari majaka yasitoamea, ki Riosi nakika yasitojerachitia, yasitoamekapa, waꞌa eꞌramepua.
\p
\v 19 Teemea ahpo nakika mochitoniameo, Riosie pepenipakamepua, ahpo Taana Eesusichi taamo tetewiterie, kurusichi taamowichio mukiwarie.
\v 20 Aaata piire ahka cheesaa: “Nakiyamenia Riosio”, nape waꞌa chiiaiopua, nekumesaa ahpo piirechio, wistuame puuúa. Aaata ki nakiyamea ahpo piirechio pusie teteiwameoipua puꞌkao, ¿osopenana nakitarepua Riosio ki ahpo pusie tetewao? Nakiniamea ki naawesarieche tetewiteniamepua, yoorakache tetewiteniamepua.
\v 21 Iꞌka nuurari taamo kiꞌyarepu Eesusi Riosie Weratiamea: ki Riosiche nakika mochitomete teemea, teemea ohso kaawe taamo piirechio, nakika mochitometepua tiaméo.
\c 5
\s Ki kaaweruma weemuwao, newitoniame
\p
\v 1 Aaata piire Eesusiko eꞌrame Riosie Weratiameo, puꞌkao Riosi tiiarachi oꞌinia eenamekoopua, puuua Riosi taanaraka tiiame puuuapa. Aaata tewekachi kahtiame Noonora nakiyamea, waꞌachitia nakiyamepua tiameo, puꞌka tatanarao.
\v 2 Riosi nakiyame enesaa teemea, eꞌwaka mochisaa tiame puꞌka nuurariwaoio, pukachi naneꞌreka mochitoma teemea, Riosi tatanarao, nakika mochitopuameo.
\v 3 Teemea Riosiwichio teꞌta pichiwari nakiwaria, Riosi nuurariwa eꞌweka yasitoniamepua; puuua eꞌweniamea kihta pehtiamekaitepua, ewanarewawichioo.
\v 4 Taamo Eesusichi paparaniamechi oꞌinia, eename taamo Riosi nuurariwa eꞌwaka yasinarewaa; pukae newitoame teemea ki kaꞌkaruma yoranarewa weemuwao.
\v 5 Newitoka machenasiamea puꞌka ki kaꞌkaruma yoranarewao, Eesusi utewarira apochi yachatoamekapa waꞌa tiiamepua, Riosi tiiarichi eenameko eꞌramakopua Riosie Weratiameo, Riosi Taanarakopua naawakameo.
\s Eesusi Riosie Weratiame naania tiiame aatanakoo
\p
\v 6 Teemea naneꞌriamepua Eesusi Riosie Weratiameo, Riosi Taanarakoopua, neerochi paatotioi machenoio, tewekachi kahtiame taamo Noono tewekachi kahtiamee maꞌchitatiamekopua puꞌkao, ahpo Taana teewakao. Piirechi akana oꞌinia eenameko taamo naneꞌriaa, kurusichi mukuyai tewekachi kahtiame taamo Noono nayeweriapua, ahpo Noono teewakao. Taamo naneꞌriaa tiameo, Riosi Riosiwari puuua, tamochi iikachi yasitoka, pichiwa Riosi Taanarako taamo tuuyamekopua puꞌkao, teꞌta Riosi tiiarichi oꞌinia naawakame.
\v 7 Waꞌa tiiachipa paikapua tewekachio, teꞌta Eesusi pichiwatamea aatanakoo: piiripia, taamo Noono Riosi tewekachi kahtiamepua, piirea Apoe Riosi Naerapua, piirechia tiameo, Apoe taamo Noono Riosiwarirapua, tewekachi kahtiame; ihji paikaa piiripikaitepua.
\v 8 Iꞌwa wehjoarichi taamowichioo, teꞌta Eesusi Riosie Weratiame aatanataa, ihji paikapua: piiripia Riosi Riosiwaripua, taamo iikachi tuuyame; piirea, Eesusi paatotioi neerochi machenoipua, ahpo Noonoe tewekachi kahtiamee nayewetiame, ahpo Taana teewakao; piirea, Eesusi kurusichi mukuyai taamowichio erawisukao, ahpo Noono nayewariapua tewekachi kahtiameo, ahpo Noono teewakao.
\v 9 Weh, pichikiame enesaa teeme tiꞌtijoeri chaachapao, epeche pichikemetepu teeme Riosi chiiao, epeche ki teesa nateyakamera. Pukaepa teꞌta pichikemete teemea Riosi chiiao, yomatiame Riosi Taanarachi simiyameo.
\v 10 Riosi Taanarachi paparakamea, ahpo waꞌapichi iꞌtoamepua Riosi Riosiwari chiiao. Ki pichikiamea Riosi chiiao, wistuchamepua Riosi chiiao, ki pichikiamekapapua Riosi Taanarachi simiyameo, apoe Riosi cheeriao.
\v 11 Riosi taamowichio teꞌta maꞌchitaa, ihji iintoriapua: ki wahjiamesi ahjari taamo kiꞌyaria, yooma aaata taamoo, ahpo Taanachi paparakameo, puꞌka Eesusi iintoriao, taamowichio iintorio erakoamekoo.
\v 12 Aaata ahpo nehpuwarichitia iniwaemea puꞌka Riosi Taanarao, puꞌkakamera kiꞌyakame Riosia, ki wahjiamesi weemera ahjario. Nape ki ahpo nehpuwarichitia apochi teetoameo, Riosi Taanarao, kiisi kiatiamepua Riosieo, puꞌka weemera ahjari ki wahjiameo.
\s Kajuyachi kuwateka tuuyewari
\p
\v 13 Neee Waania iꞌka aamo iyojurachio, teꞌta pichiwako naneꞌremichio iyotiamenia pukachio, amochi iinuemekoopua waꞌasi, puꞌka weemera ahjario, teꞌta Riosi Taanarachi paparakamekapao.
\p
\v 14 Pukaepa tísia ahjachi erakoame teemea, yooma ihtaoi taamo tatakoriria cheriwepua inatetioo, taamo inamumerikopua puuua, waꞌa eꞌraka kahtiamekapaopua waꞌasi.
\v 15 Waꞌa teesoo Riosia, ki waꞌatia itipimeripua, ki taamo inamukaopua. Naneꞌriame enesaa teeme taamoo keepuamekoopua puꞌkao, naneꞌriame enemeriai teeme waikao, taamo tatakoriria cheriwemichio itanesoo, taamo cheriwemerikochepua.
\p
\v 16 Aaata naꞌara ihsiame tetewisaapua ahpo Riosichi pooniwao piiniwaoiopua, puꞌka waꞌa ihsiwamewichioo Riosichi itamete muuua kuꞌiwao, puꞌkao ahpo katewemichiopua, weemera teꞌteremichiopua. Nape taamo Riosichi Taanarachi paparameo, itapiti ki kaawe tiiame tatakorisoo, puꞌka tatakoririawichio Riosia taamoo, ki taamo ipaka tetewimapua ki apochio, oosa simiyame mukiwachiopua. Nape ki ahpo Taanachi paparameopua Riosia, puꞌka tatakoririawichio Riosia, ki nakika teteimapua apochio, ipaka tetewimapua puꞌkao, ki wahjiamesi ki ahpo ahjama mochimichiopua, puuu waꞌa tiiame Riosie ipaniamea, oosa mukiwa tiiamera puuua. Puꞌka ki Riosichi teꞌteriame tatakoririawichioo, ki aamo itapo tuuyamenia Riosie cheriwepuao; aapoe waꞌapi Riosi itanemerikopua puꞌkao, ahpo tatakoriria cheriwepuawichioo.
\v 17 Yooma ihta ki kaawe nokiwamea tatakoripua; nape iintuaitepua tiame ki kaawe iintotiamea, puꞌkawichioo ki oosa simiyame mukiwarichi taamo iꞌtoamea, Riosi ijinuwarakamera enepatetiamekápa.
\p
\v 18 Naneꞌreka mochitoame teemea, aaata Riosi Noonoeka yasitoame, ki tatakorika yasitonariamekopua, ahpo neesetoka yasitoamekopua puꞌkao tatakoriniameo; Riosi Taanara Eesusieopua apochi inateka yasitoniamekapa, apoe Riosiwarieo. Pukaepa Satanasia kaꞌchi iika yuumpame tiiamepua puꞌkao, ahpokamera tatakoriniame naꞌnaritomichioo.
\v 19 Teemea Riosi ijinuwarakai, naneꞌriame teemea iꞌwa taamo ohjoekachio, Satanasi yeꞌkaritere taamo mochikamekoopua; pukaepa taamo kaawe neesetoka mochitometepua.
\v 20 Naneꞌriame teemea tiameo, Riosio ahpo Taanachi iꞌka wehjoarichi tekikamekoopua taamo mochikachio, apoe taamo machitanariapa, aatanakoopua teꞌta pichiwari Riosio. Waꞌa tiiachipa teemea pukachi teꞌta pichiwa Riosichi, pirena mochitoamepua, puꞌka Riosi Taanarachi teꞌtéretoka, puꞌka Eesusi Riosie Weratiamechi. Waꞌa teesoo ihji Eesusi Riosie Weratiamea, Apoepua teꞌta Riosi pichiwaria, teꞌta ki wahjiamesi ahjamea. Waꞌa tiiachipao apoepua taamoo, teꞌta kiꞌyameraa ki wahjiamesi ahjário.
\p
\v 21 Noꞌo Riosichi kukuchiwaa, kaꞌte paparamitia eemea itapiti riositaniamechio.
\p Wee, waꞌasi ihji noꞌo aamo tuuyeka iyotiaa. Waꞌa teꞌteremitiapua naaju.