\id 2JN
\h Oosa Waani Iyotepawa
\mt2 Oosa Simiyame
\mt Waani
\mt2 Iyotepawa
\c 1
\s Pichiwariwa nayewaniame, nakiwariwa tiame
\p
\v 1 Neee iꞌwa teꞌta tiopachi paamiratuamea, Oochetiame tewaniamea, iꞌka iyojura iyotiamenia, yomatiame puꞌka Riosi taanarachi paparameopua, yomatiame tiꞌtiopachi mochitoameopua, Oowitiame Riosie uutiame tewaniamechiopua, yooma pipiripi puꞌka Oowitiame tiopa tatanarawichioopua tiame. Puꞌkao neeea tísia kaawe eꞌreka yasitoamepua, tísia kaawe eꞌraka mochitoamekopa Riosi tísia kaaweruma tuuyewarichiopua, ki neeechepua, yooma wahja iꞌwa mochikame tiamépua.
\v 2 Teemea tísia aamo nakika mochitoame, tísia papaka mochitoamekapa teꞌta pichiwari Riosi tuuyewario, puuua, ki wahjiamesi yasitomeripua tamochio.
\v 3 Pukaepa neeea taamo Noono tewekachi kahtiamechi oꞌinia eenameopua kaawerumario, amochi teꞌta teeretojerani neeea, amochi tísia tesiwewa eꞌrewaopua, aamo tísia taꞌiria mochiwa iikachiopua tiame, yooma puꞌkaopua tiaméo, Riosi Taanarachi oꞌinia eenamekoopua, apoe taamo Paamira Eesusichi oꞌiniaopua. Waꞌa tiiame itayamenia Riosichio, yooma aamowichio Riosi teꞌta pichiwarira uukameo, puꞌka teꞌta nakiwarira uukameopua tiameo.
\p
\v 4 Neee tísia kaawe erapakamepua, aaata ookapi aamo tatana tetewikapaopua, puꞌkao tísia kaawe teꞌteretoamekopaopua, Riosi teꞌta pichiwarirachi paparaniameopua, teꞌta taamo Noono tewekachi kahtiame nuurariachitia.
\v 5 Ehpeopu aamo Riosi tiopa Oowitiame tewaniameo, aamo utewaeme nokisijeraninia, ahpo nakika mochitoniameopua. Ki weemera nuurari simiyamechitia tetewijeraninia, iꞌka noꞌo aamowichio iyotiao, ohsotiaonia puꞌkao, ehkoriami oꞌinia waꞌa teetoniameko tetewijeraninia.
\v 6 Ihji Riosi nakiwari aamo iyotekiaa, Riosi nuurari uuka, yooraka yasitoniamepua. Ihji nuuraria ahpo nakika mochiwamepua, kiisi ehpesi oꞌinia aamo inamuriachitia.
\s Wihkuame tiꞌtijoeri
\p
\v 7 Ki ookapi ohjoamepu iꞌka wehjoarichio, wihkuaka masitiame, puuu waꞌa nokayamea, kiisi uukamepua teꞌta Riosi nakiwarirao; puuua ki pichiwarichitia tetewamekoipua, Eesusi Riosie Weratiameo, Riosi tiiarichi oꞌinia weeechi tijoe tijoetukamekoo. Puuu waꞌa erakoamea, tísia seꞌwi teꞌteriamepua teꞌta pichiwari Eesusichi simiyameo; waꞌa teꞌteriapa puuua Riosie Weratiameo, seepurawara puuua, Pukaepa teꞌta Eesusichi simiyameo, wihkuaka masitiamepua.
\v 8 Waꞌa tiiachipa pukachio eemea, tísia aamo neesetoka mochitopuapua, ki waꞌatia wekatepuawichioopua, puꞌka taamo aamo masiteriaopua, Riosie Weratiame taamo aaatatariaopua amochio, aamoo ahsieme uumichiopua taamo nokariaeo, Riosie aamo ihkokepuaopua, weemera ahjari ki wahjiameo.
\p
\v 9 Aaata seꞌwi masitiame naꞌnaritoamea, ki Eesusi Riosie Weratiamekamera masiteriao, teꞌta ahpo aatanakoopua chaanekao, kihta Riosichi teereka yachatoamepua. Nape aaata teꞌta Eesusi masitiakamera teetoamea, apochi iinuepua tewekachi kahtiame taamo Noonoo, puꞌka Taanaraoiopua tiamé, Eesusio.
\v 10 Pukaepa aaata waꞌami ahka aamo nanapawiachi enasoo, aamo itapiti masitenarioopua, puꞌkao ki iꞌtosoo iꞌka Eesusichi simiyame pichiwari masitiao, kaꞌte kaawe uuka reesisemitiapua aamo napawiriachio; puꞌkaoio kaꞌte kaawe cheeka paajutemitiamua aamo petechio, puꞌka ki kaaweruma masitiaomua, kaawe iintákao; kaꞌte Riosi kaawerurae teepotemitiakoiopua puꞌkao, wahka pooechiamiahka natepakaiopua.
\v 11 Waꞌa nokisaa eeme, puꞌkachi yoorame enemapu eemeaipua waikao, puꞌka ki kaꞌkaruma masiteniame nehpupaka.
\s Kuatera naawesari
\p
\v 12 Weeka iinuene pehji aamo noꞌo chaanemia, nape ki yoranarene iyojurachio, siimo oꞌrapa waꞌa aamo tiꞌtiopachiami neꞌnemiao, nooe aamo nayewemia puꞌkao. Epeche kaawe eneriai noꞌo waꞌa ikisoopua, epeche kaawe erakopuawichio nenekuti.
\p
\v 13 Iꞌwa noꞌo kahtiachio, aamo koꞌchi tiopa tatanaraa, yooma aamo teepotenapua tiame. Puuua Riosie uutiamepua aamochitia, ahpo ijinuwa enemichiopua.
\p Waꞌasi ihjia ehpeo.