\id 3JN
\h Paisa Waani Iyotepawa
\mt2 Paisa Simiyame
\mt Waani
\mt2 Iyotepawa
\c 1
\s Kaayo tewaniame kaaweruma nayewaniame
\p
\v 1 Neee iꞌwa tiopachi Riosichi paparamewichioo, Teꞌta Oochetiame tewaniame paamiratuamea, iꞌka iyoteri iyotiamenia Kaayowichioo, puꞌkao Riosi teꞌta pichiwarichio, tísia noꞌo nakiya.
\p
\v 2 Aamoo, tísia noꞌo kaawe eꞌriaopua Riosichi poonio, tísia kaaweruma yasitowa aamo kiajeraninia Riosio, yooma ihta aamo yoorao kaawe tiiame machenasiwa, taꞌiria yasitoniame kihta kokoreka, naneꞌriamenia aamoo, tísia kaawe teetoamekopua Riosichi simiyameo.
\v 3 Tísia kaawe erapakane aamo kaawe tiio tuuyetiaapa, ookapi waꞌa oꞌinia eꞌenakamee poponiwaeo, puuua aamoo, ki seꞌwika teeto noꞌo tuuyekopa, puꞌka aamo Riosi pichiwarichi teetoa tehkiwachio.
\v 4 Kihta epeche kaawe erapamenia noochio, ki iꞌkachitiao: yooma Riosichi kukuchiwao, Riosie Weratiamechi kaawe ohjoameko tuutiameo, Eesusichi simiyame teꞌta pichiwarichio.
\p
\v 5 Muuu noꞌo tísia kaawe eꞌria Riosichi poonia, muuua tísia kaawe teetoamepua waꞌa Riosi tiopachio, poponiwachio pipiniwaopua tiameo, senepi kuꞌika yasitoamekapaomua, waꞌa Eesusichi paparameo, epeche pehjiomua, ahkaoi oꞌinia enapameo, Eesusichi simiyame maꞌmasitiameo.
\v 6 Puuu ahkaoi ohjoka nayewatukamea, waꞌa chaachapakamepua iꞌwa tiopachi eꞌenasaopua yooma inamuachio, kehkisi aamoo ki nuꞌuti nakika ahpo kuꞌitiamekopua. Muuua waꞌa aamo tiopachi mochikamee kuꞌyame enesaamua waꞌami uꞌmatopame Eesusichi simiyame masitiameo, ihtaeoi oowewiame enesaamua puꞌkao pooechi nakipuameo, noꞌo kaawe itipiwa ihsimeri muuua, Riosio teꞌta puꞌka yorajera ihsiame enemerimua.
\v 7 Puꞌkao, aamochiche Riosichi paparamechiche uumeripua kuꞌiwao, puꞌka Eesusi Riosie Weratiame tehkiwachi ahpo nokisimiaopua, kihta aaata ki Riosichi paparame kuꞌiwa uusika nokisiamekopapua.
\v 8 Pukaepa teemekamera Riosichi paparamea kuꞌitomeripua puꞌkao, iinuemichiopua puꞌkao, ihta ahpo ahjae nokisipuameopua, puꞌka teꞌta Riosichi simiyame pichiwari nayewatusiwachiopua.
\s Riioteje kiisi kaawe ihsiame
\p
\v 9 Neeea iyotepakamepa seenepio, puꞌka Riioteje tioparachi nanapawiamechiopua, nape Riiotejea kiisi taamo nahkekapua waꞌao, taamo Riosichi eename tuuyewario, waꞌami uꞌmatopameopua kuꞌinarekao, Riosichi simiyame masitiameo, apoeche eꞌramekapapua teꞌta ahpo paamiratuameo.
\v 10 Pukaepa neeea waꞌa Riioteje tioparachi simisaopania, yooma tuuyemenia waꞌa tiopachi nanapawiameopua, aachin cheeka tísia taamo naꞌariamekoopua Riiotejeopua, yooma ihta wihtuki cheeka oiyaopua tamochio. Puuua ki soparachitia ahpo cheeka oiyaeo, waꞌinamepua waꞌa ahpo tiopachi asipuawichioo, Eesusichi simiyame masitiameopua Riosichi poponio; waꞌapi ahpo tiopachi nanapawiameoi tísia waꞌiniamepua asipumichioo puꞌka Riosichi simiyame maꞌmasitario. Yooma aaata waꞌa tiopachi mochikameo, ahpo taꞌpechi asipunariameopua Eesusichi simiyame nayewatuameo, ujumapuamepua waꞌao, ahpo tiopachio, ki ahpo tiopachi mochitomichioopua.
\p
\v 11 Muuu noꞌo teꞌta nakiya poonia, kaꞌte waꞌachi ihsimitia muuua, ihtaoi aaata ki kaꞌkaruma nokayao; teꞌta kaawerumarache ihsipuapua ohso kaaweo. Kaaweruma ihsiamea, kaawe tiiamepua Riosichio, nape ki kaawe ihsiamea, kiisi kaawe tiiamepua Riosichio.
\s Reemetio nayewaniame
\p
\v 12 Nape Reemetio tewaniamea, tísia kaawe tiiame nayewaniamepua. Yooma puꞌka teꞌta machiyamea, teꞌta pichiwako tuuyamepua, Reemetio waꞌa chaachapaniameo. Teemeai waꞌachi chaachapamepua, teꞌta pichiwako tuukao, Reemetio waꞌa chaachapaniameo; muuu waꞌapiai teꞌta naneꞌriamepua puꞌkao, teꞌta pichiwakopua taamo chaachapao.
\s Kujuyachi chaniwa waꞌasi
\p
\v 13 Ki ookapi iinuenia aamo chaanemiao, nape ki iyoterichi aamo cheenariamenia puꞌkao.
\v 14 Kuꞌwe waꞌa siimo oꞌrapa, nooe aamo nayewenariapa waꞌa enasapao.
\p
\v 15 Waꞌasi ihjiapa noꞌo aamo tuuyaa. Kaawe eꞌraka yasitojeramechenia aamo iikachio. Iꞌwa noꞌo ahjama mochikamea aamo kaawe eꞌriame, aamo teepotenapua. Muuua tiameo, teepotaka kiamitiapua, yooma puꞌka taamo kaawe eꞌreka mochikameopua waꞌao. Waꞌa ikisa naaju.