\id JUD
\h Uurasi Iyotepawa
\mt1 Uurasi
\mt2 Iyotepawa
\c 1
\s Uurasi teepotewari
\p
\v 1 ¡Kúíraa yomatiame Riosie Weratiamechiwikame, yomatiame pukachi paparame! Neeea Uurasi tewaniamenia, Riosie Weratiamechi tekipaname, Saantiao yeeyerachi naawakame tiame. Iꞌka iyojura iyotesa uhjurenania, yooma aamoo tewekachi kahtiame Noonoe paajutetiameo, ahpo ijinuwa enemichioo, yooma aamo taamo Noonoe tísia neesetoniame ahpo ijinuwa enepateriopaopua, ahpo Taana Eesusichi tísia paparakopaopua.
\v 2 Yooma aamoo neeea pukaeo, ki nuꞌuti kaaweruma tiiame teerejeraninia amochio, tísia taꞌiria erakoka mochitomichiopua aamo iikachio. Aamo kuꞌijeraninia tiameo, aamo tísia nakika mochitonemichiopua aamo wahjachioi.
\s Wistuki maꞌmasitiame
\r (Oosa Peero Iyotepawa 2:1-17)
\p
\v 3 Noꞌo Riosichi poponiwa pipiniwa tiamée, taamo newiparichi simiyame tísia aamo nayewemo oꞌrainia, nape ohso kaawe papararichi simiyamekamera aamo nayewemania, puꞌkakamera tísia nakiwiamekopua nehpupuapuao. Puꞌkakamera aamo utewaeme chaaniamenia, aamo puꞌkakamera utewaeme teetomichiopua puꞌka nehpupakao, Riosi teꞌta kaaweruma tuuyewari pichiwarikámera. Riosia iꞌka pichiwari ki seenampa sewina ikiyame, kiꞌyakamepua ahpo ijinuwao.
\v 4 Iꞌka aamo chaaniame neeea, muuwaeme weeechi siikuarichitia amochi muipariopao, Riosi teꞌta pichiwarichi simiyame seꞌwika masitiameo. Puuua, kaꞌchi ikiniameko tuuyamepua ihtaoi ki kaaweruma iintotiaio, Riosieopua taamo cheriweniamekopao, ihta tatakori iintotioiopua. Puuua ki masitiamepua Riosie teꞌta newipaniameo, Riosichi teꞌta paparaniameoi. Puuua tísia iinya tiiame nokakao, ukana ajatoamepua taamo teꞌta Paamirakamera taamo Teekoo, apoe teꞌta taamo Paamira Eesusio, Riosie Weratiameo. Nape puꞌka waꞌa nokayameo, ki ehpesi ehkoriami oꞌinia Riosia Iyoterichio, ki nuꞌuti kokosamio tuuyamepua.
\p
\v 5 Aamo naneꞌreka mochikoiopua iꞌkao, aamo chaanemania eenechio. Taamo Noono tewekachi kahtiameo, ehkoriami taamo noonori Eejito mochikame puuyanakoio, yomatiame apochi paparakamekooio, neipamiopua yooma puꞌkao, toakamekopua puꞌkao apochi paparao, wahjipaterepua puꞌkao.
\v 6 Riosia ahkasi ahpo tewekachi mochikame ki kaawe noonokame ahpo kuꞌiwarioi, ahpo ki iyorikameopua, tukapachi kaarenae purisa iinuemepua pehjio, ahkasi asiyachisi puꞌka ahpo teꞌta kokosamia taawechio.
\v 7 Naati maꞌmasitari Riosi teꞌta pichiwarichi simiyame sewinatamea, puuua waꞌa nokayaio Riosie tísia kokosapuaitepua, ehkoriami Sooroma mochiwari kokosaretiachitia, Oomora mochiwari kokosaretiachitia tiame, wahjachi yooma norikame mochiwari mochikamechitia ahjamachitia tiamé, itapiti tísia iinyatiame yooraka mochiriamekopaopua, kiisioi nokime tiiame nokaka mochitoriopa.\fig |229-MX-19.tif|col|||Sooroma muuwaria Riosie kokosatiame, moroka poꞌipua Riosio naꞌie kosoka tajenapuriopa.|1:7\fig* Pukaepa waꞌa noonoikapa puuua, ki nuꞌuti kokosari naꞌie aiwatetiamepua Riosieo. Puuu waꞌa iintoka kokosatiame Riosieo, Ehkoriami Iyoterichi iyotetiamea, taamo Riosichi iyoriwa teꞌta neesetoka mochitomichio ikitiamepua, ki waꞌachitia naꞌie taamo kosoka kokosapuawichiopua, ki wahjiame kokosarichio.
\p
\v 8 Puuu maꞌmasitari Riosi teꞌta pichiwarichi simiyame seꞌwika masitiamea, naneꞌriamekai naꞌie kokosatiameopua kiisi iyoriameopua Riosichio, waꞌapi teetoamepua ahpo weerewachi tísia iinya tiame ahpo naꞌataka nokisikao, itapiti iinyatiamée suweporitiameoi yorasika. Puuua kiisi aaata yooreka mochitoamepua, ihtaoi teꞌta iyoriwa yoorewaopua, ahkasi teꞌta Riosi iyoriwaoiopua naꞌareka tetewamepua, ahkasi Riosie tewekachi kuꞌkuiwari utewariraoiopua tísia naꞌareka kiisi iyoriamepua, ahkasioi Satanasioi naꞌareka.
\v 9 Nape Apoe Mihkeai, Riosi teꞌta kuꞌiwarikaipua, ki teꞌyarepua Satanasio, ki reesiseriemekapaopua Riosieo, Moise weerewa iintoriarekooichi simiyame chaachapanioio, wahka ihtoriachi ehkoriamio, Mihkea oowera eee chaanerechepua puꞌkao: “Aamoo Riosikamera apoe aamo terimeripua, neeea kaꞌi.”
\v 10 Ihji maꞌmasitari teꞌta Riosi pichiwari seꞌwitaka mochitoamea, ihtaoi itapiti ki pahtiaio, naꞌareka naewamepua, kihta machiaipua puꞌkao. Nape puuua ahpo tísia weerewachi ikotuwae erakoawaeopua, animarichitia nokayamechitia nokayamepua, aꞌchikoi nokaka suwepori, ahpo weerewa naꞌatamepua, ahpochitia tijoechi kunapakao uuwasari chewipakao, ooweruchioi uupitaka uuwasari chewipakaopua.
\p
\v 11 Nape ai puuu waꞌa iintokameapua, tísia iinya tiiame koꞌkoame yekika wahjipameripua. Puuua tísia naꞌara nokayamepua ahpo piirechio, ehkoriami Kaaini ahpo pooni meꞌyariamechitia. Puuua ehkoriami Waarami iintoriachitia nokayaepua tiameo, puuua tahpitika erakoamekapapua toomichio, noriwi kuꞌipamo eꞌrakame iꞌisaeri seepurawakamera newitomichioo. Puuu maꞌmasitari Riosi teꞌta pichiwarira seꞌwichamea, ehkoriami Koorea ikiriachitia ijikimeripua, Riosieo, puuua Moise paamiratuwa waꞌinekamekapaopua wenejikao, weee wahjorae rupitutetiameopua, Riosieo.
\v 12 Ihji maꞌmasitaria, iinya nokayamepua aamo Eesusichi iyoriwa koꞌkopoi napawiriachi eꞌénapakao, tahpitika erakoka eejenapamekopapua, tísia posakache koꞌkonarekaopua. Puuu ki kaꞌkaruma maꞌmasitaria, ki kaꞌkaruma tepuyameka teꞌteriamepua, puuua sapoori ahpo tepuya koꞌkonaresoopua, ahpo tepuyao toisa uujumapamepua, ahpochekamerache kaawe neesetopaka. Puuua toomarika teꞌteriamepua tiameo, kihta neeroi iinueme eekae iꞌtoniame. Puuua tiameo, itapiti oowara taakiame ki taakiameka teꞌteriamepua. Puuuapa, itapiti oowara wakipaka oosa wahjipakameka teꞌteriamepua, yomatiame nawapuka koꞌrinatiame.
\v 13 Puuua tiameo, paꞌweka nokayamepua, ahpo tahpitika ihsika peꞌkonieo, ahpo toonewatae ahpo tísia maapori ihsiwa tetewitiame. Ihjia soꞌpori wewekakamepua, ki nuꞌuti tukaparichi uumpakame. Puuu ki kaawe waꞌa nokayamea, ahkasi ki wahjiamesi tukaparichi mochimichio, kokosatiamepua aiwamichioo.
\p
\v 14 Eenoko ehkoriamiai, Aarani oowisani neipa tijoeturichi naawakameai, iꞌka naꞌara nokayame tiꞌtijoerio, cheeka nayewariaipua: “Noꞌo Riosi Paamirao tetewakania, kíí ookapi miꞌmiri tiꞌtijoeri piipakame yeetoka eename,
\v 15 Apoe Paamirao yooma tiꞌtijoeri katewemia eename, yooma puꞌka tiꞌtijoeri ki kaawe noonoikame, yooma naꞌara nokaka tatakorikame, yooma puꞌka tiꞌtijoeri weeechi ohjoriameo, taamo Paamira Eesusi naꞌarekameo.”
\v 16 Ihji tiꞌtijoeriai ehpe taawechiamioi, waꞌachi chaachapamepua, yooma ihtaoi Riosichi simiyame ki kaawe chaachapakao, tísia naꞌarekaopua tiame. Yooma ihtaoi ki taꞌiria mochiko tuuyamepua; ahpoche erakoa ikotuka iꞌyamepua; ahpo oisa eꞌreka, weeru nayewame; peenia chaachapemepua aaatao, oowera ahpo yoramichio ahpo nakiyao.
\s Kaaweruma tuuyewari
\p
\v 17 Pukaepa eeme tísia noꞌo nakiyaa, kaꞌte natakepamitia eemea, puꞌka Eesusi ajawariae aamo masiteretiao. Puuu ajawaria aamo masiterepua, itapiti simiyameo ikimeripua, keꞌchu ikimiachiopua.
\v 18 Aapoeo aamo chaaneka nayeweriaipua, kajuyachi taawechiamiopua, eꞌenamio tuuka, Riosi nanaarameopua, ahpoche weemua, naꞌara nokayame.
\v 19 Ihjipu tiꞌtijoea oowerua tiame, aamo poanatumichio nokayamea, oowera iꞌka weeechi iintuame puꞌserewache inatamepua, kihta yasitoamepua apochio, Riosichi eenameopua Riosiwario.
\p
\v 20 Nape eeme tísia noꞌo nakiyaa, utewaeme Riosichi mochitomitiapua, epeche epecheche ahjachi erakoka, Riosichiopua. Eemea Riosichi nayewiaiopua, Riosi Riosiwari amochi eꞌraka, nayewepuapua.
\v 21 Nape eeme Riosi Riosiwari amochi yachatoamea, Riosi nakiwarichiche teetoka mochitopuapua, puuyetoka ahkasi puꞌka Eesusi Riosie Weratiame eenechi eenachisio, aamo ki wahjiame ahjari aamo kiamiachisio, puꞌkao Riosio, aamo tesiwa eꞌriamekapa aamo kiamiao.
\p
\v 22 Aaata iꞌka weemera ahjari ki apochi tiiame erakoameopua, oowera erapuatepuapua puꞌkao, pichiwa Eesusichi paparame enesoo ahpo tatakoriria cheriwepuawichioo, pichiwa iinuemeriko tuuyepuapua, Riosie ahpo kiapuameopua weemera ahjario.
\v 23 Aaata eeyowati mochikameopua Riosie ahpo kokosapuameo, tesiwa eꞌreka kuꞌipuapua puꞌkao, Riosi kokosari naꞌirachi puuyanamechitiaopua, tísia kaawe tuuyeka puꞌkao, teꞌta Eesusichi paparasache newipatepuamekopua Riosi kokosapuachio. Wahjachi tísia iinyatiame tatakorichi nokayameoi, tesiwa eꞌreka kuꞌipuapua puꞌkaoi, nape aamo inateka naaju ki waꞌachi nokiwamechi wichitarekoi muuuai. Eiweka tetewipuapua puꞌka tísia iinya tiiame nokayao, aamo kaawe inateka ki amochi chuhkepamichio puꞌkao.
\s Kaawe eꞌreka kaaweruma nayewaniame Riosiwichio
\p
\v 24 Ehpeo kajuyachionia, Riosi ahjama nayewamania: “Muuu teꞌpa kahtiame taamo Noono Riosia, muuuchepua. Muuuchepua tiameo, teꞌta taamo neesetoamea, taamoo muuua, ki ruhjimichiopua tatakorichio. Muuuchepua tiameo, taamo ki nohpieme iꞌtomeri tiamea, teꞌta aamo kahtiachiopua tewekachio, aamo kahtiachiopua tísia peenia tiiachiopua, waꞌa ajasisaopua tísia peenia erapuachio.
\v 25 Muuuche puuua, teꞌta machiwari machiyamea. Muuuche puuua tiameo, teꞌta taamo newipatiamea, Eesusie taamo Paamiraeo, muuua apoe amoe Weerariaeo. Pukachipa teemea, puꞌka yooma ki nuꞌuti aamo iintoriowichioopua taamowichioo, waꞌapi tiiame aamo teꞌta weruma iyoriniame, enejeriame teemea, ki nuꞌuti teꞌta weruma utewarieme, ahkasi ki wahjiamesi tiiame.”
\p Iꞌwasi ihji noꞌo iyotepawaapa. Waꞌa teeresa naaju.