\id REV Huarijío
\h Waani tetewitewa
\mt2 Riosi Eesusie Waani
\mt1 Tetewitewa
\c 1
\s Waani teepotari
\p
\v 1 Kúíraa Riosichi paparame, ahkaoi tiꞌtiopachiami mochikame. Waani neeea, piiripi Eesusi Riosie Weratiame ajawaria. Ihji noꞌo cheemiachi simiyamea, Apoe Eesusi Riosie Weratiame noꞌo tetewiteriapua, apoe Riosi waꞌapi neꞌneteriapua Eesusio, noꞌoo tetewitepuaichio. Ihji Eesusia eeetiame noꞌo tetewitekapua ahpo tewekachi eenamee kuꞌiwarieopua, noꞌoo ahpo seekaerewachitia tiiameopua, yomatiame wehjoarichi mochikame naneꞌretemichiopua, iꞌka itapitio yomatiame wehjoarichi ikipuameo, ikikache itipimerikoopua. Ihji itapiti iꞌka wehjoarichi ikipuamea, ihta taawechi oꞌinesaopua, kiisi tehpe simiyamechi kajumeripua, yomatiame iꞌka wehjoarichi ikimeriopua, ikika.
\v 2 Iꞌkao neee Waania, yooma noꞌo tetewiriaopua, yooma noꞌo inamuteretiaopua tiameo, Riosi teꞌta apoe iintokamepua iꞌkao, Eesusie noꞌo tetewitepuawichiopua.
\p
\v 3 Neee Waani Eesusie weratiamea, yooma Eesusie noꞌo tetewiteretiaopua, teꞌta ki nuꞌuti iyorika iyonameopua iꞌkao, tísia kaawe eꞌriamenia puꞌkao, yomachiami tiꞌtiopachiami waꞌa teꞌteriameopua tiame, ihji noꞌo tetewiteretiaopua, waapiche teetoamekopapua puꞌkao.
\s Waani oowisani tiꞌtiopachi iyojura uhjurari
\p
\v 4 Neee Waania, iꞌka iyotesa uhjuraninia puꞌka tiꞌtijoeo ooweru tiameo, oowisani tiꞌtiopachiami mochikame, Aasia weeechiami wekanami tiꞌtiopachi. Taꞌiria mochisaa kaawe enemii eemea, aamo iikachio mooena eꞌrari erakoka, Apoe Riosieopua aamo kianiae. Ihji Riosia, keꞌchu naayachi oꞌinia ahjaka yasitoriamepua, ahkasi ehpe taawechiamichisi, ahkasi wahka ihtoriachisiopua ki wahjiamesi. Riosi Riosiwari oowisani puusieka tetewameai, yooma ihtaoi noriwi tiame tetewamea, aamo iikachi taꞌiria mochirewa kiꞌyamepua tiame, puuua Riosi yasirachi, norikame ajakamerapua.
\v 5 Neeea yooma iꞌka kaawerumari aamo eꞌrejerao, Apoe Riosie Weratiame tiame aamo kiajeraninia. Puuu Eesusi Riosie Weratiamea, yooma noꞌo tetewitekamepua, Riosi ahpo Noono noꞌo tetewitenureriaopua, noꞌoo puꞌka cheeka noꞌo iyotesimichiopua. Puuu Eesusi Riosie Weratiamea, apoe iintokamepua tiame, pukeri pahcha simiyame oijenaniameopua, teꞌta wahjipaniame tewitokaopua. Puuua tiameo, Apoe Teꞌta Yawichipua, yooma iꞌka wehjoarichi yaꞌyawichio, yooma teꞌta aampa teerekaopua. Riosie Weratiamea, tísia taamo nakiyamekapapua, ahpo mukiwae taamo piipatekamepua tatakoririao, ahpo eera wiꞌsukaopua taamowichioo.
\v 6 Waꞌa iintokaopua taamoo, neꞌneseriosi enepatekamepua, taamoo ahpo Noono Riosi kuꞌika nokisimichiopua, tiꞌtijoeopua ooweruopua tiame, tuuyepakaopua ahpo Noono tísia kaaweruma tuuyewario, puꞌka ahpo Noono Riosi keepukameo, pukachi paparamichiopua. Neipa weemera wehjoarichio, ahpo ahjama yaꞌyawichitumeri enepatekamepua taamoo, tiame. Pukaepa Eesusi Riosie Weratiamea, ¡teꞌta ki nuꞌuti yooreniame nakiyamepua, ki nuꞌuti nuurewari yeꞌkame, ahkasi ki wahjiamesi simiyame yawichituwa! Waꞌa teeremitia naaju puꞌkawichioo.
\p
\v 7 Waika taawechio, chaachapapuaitepua: “¡Nee! ¡Waꞌa ihtonapua waꞌasi! ¡Toomarichi weritoka ihtonapua!” \fig |230-cn01885B.tif|col|||Eesusia tewekachi oꞌinia tekina, yomatiame aaataoi tetewachi.|1:7\fig* Waikao, yooma weeechi mochikamea, ahpo pusie aapoe tetewimeripua puꞌkao, ahkasi puuu merijicherae chechekameai tetewimeripua tiame. Yooma ki kaꞌkaruma noonoikamea, naarakomeripua puꞌka taawechio, puꞌka Eesusio waꞌa ihtoame tetewapaopua, ahpoo tísia kokosamia. Eꞌesa naaju, waꞌa teerepuapua.
\p
\v 8 Apoe Teꞌta Paamiraa, Apoe teꞌta yomatiame utewari iinuemea, eee chiiamepua: “Neee apoepua, ki oꞌineraemea; neeepua tiameo, ki kajuyaeme tiiameraa”, waꞌa chiiame Apoe ehpiami ahjaka yasitoamea, Apoepua ki wahjiamesi oꞌinia yasitoamea, Apoepua tiameo, ki seena aampasi yasitomeria, Apoepua tiameo eenechi iꞌka wehjoarichi tekimeria.
\s Riosie Weratiame tahpitika tiiame, Waanie tetewitiame
\p
\v 9 Neee Waania, Eesusichi teereka kahtiamekaapa, aamo poonichitia tiiame neeea. Neeea aamochitia iinueme teemea, Riosi yeꞌkariwachi pirena ohjorepuao, piie taawechiami ahkao. Nape iꞌka weeechi tísia aiwaka nokisiaiopua pehjio, Riosi kuꞌiwarie anachasiame teemea, teꞌta Riosi utewarie. Neeeai ehpiamio aiwaka yasitoamepua, iꞌwa pawenasipa Pahmo tewaniachi peereso yachatiapa. Iꞌwa peereso yachatiame neeea, Riosi kaaweruma tuuyewari naewatuamekapa, iꞌkao Eesusia ahpo mukiwarie pichiwa tiiame machenakame.
\v 10 Piie taawe Toomikochio, taamo Paamira Taawe tewaniachioopua, noꞌo yuuweeme kahtioio noꞌo Noono teꞌpa kahtiamechi tísia inatakao, ki kuꞌwita nayewachaniame inamukania noꞌo pukaminao.
\v 11 Puuua cheechaniamekapua:
\p —Iꞌka noꞌo aamo tetewitemiao, yooma iyotesa uhjuramitiapua, oowisani tiꞌtiopachiami, Aasia weeechiami ajakamechiopua: Eejesio tewaniachiopua, Ehmirinapua, Peerekamo, Tiatira, Saarisi, Irarejia, Raoriséa tewaniachi tiame.
\p
\v 12 Waikao, noꞌo kuꞌrika neꞌnioiopua aatanakoo noꞌo nayewiao, naatiche ajakapua waꞌao, oowisani kaantera ahjachi ajawaniame, oꞌro netetiame.
\v 13 Waꞌa naasipa puꞌka ajakachio, tijoeka tiiame weeriapua, tarachisi wakiraeme, norikame muripao, oꞌro apoche wahsipuameapua,
\v 14 moochiopua, tohsanameapua kuuparao. Ihjia, tajenakameapua puichio.
\v 15 Ihji taararaa, oronse meetarika tiamekapua, naꞌie kosoka taapasitatiamechitia. Ihji iiyenaria, ki kuꞌita neeroi wichiyameka chiiapua.
\v 16 Ihjia ahpo ahjamina sekachio, oowisani soꞌpori makoka weeriapua. Iꞌka chuꞌwachiopua, tepekuma machenameapua nasimacheta, neneku tehpuchame. Ihji nanariraa, ki teesa kokosatiame tajayamekapua, taaachitia.\fig |231-Rev 1.16 Jesus without John.tif|col|||Waani oowisani kanterero tajaka ajakachi naasipa, Eesusi tetewiria.|1:16\fig*
\p
\v 17 Puꞌkao waꞌatiame tetewakapania, mukipakame wichikania, chokichi neꞌniachi. Nape Apoeo noꞌo chaanekapua, noochi seekarepakaopua, ahjamina:
\p —Kaꞌte mahja muuua, neeepua aamo machiyaa, aamo Riosiwa neeea; neeepua ki oꞌineriemea, ahkasi ki kajuyamea tiameo.
\v 18 Ahjame neeea; mukukaiopua eenechi ahjakame, ki seena aampasi ahjaka yasitomeri neeea; neeepua, teꞌta wahjochari iinuemea, puꞌka wahjipakame mochikachio, ahjae yeetapuniameopua yeetarao. Neeepua tiameo, puꞌka mukiwariopua yeꞌkameo, aampa tiiame utewariemenia puꞌkao.
\v 19 Yooma iyotemitiamua, iꞌka aamo noꞌo tetewitiaopua; ehpe taawechi simiyame puuua, wahka ihtoriachi ikimeripua tiameo.
\v 20 Ihji oowisani soꞌpori noꞌo ahjamina sekachi makoka weririaa, oowisani tuuyetori puuua, kaaweruma tuuyewari iꞌtoame, oowisani tiopachi mochikame. Puuu oowisani kaantera ahjachi ajawaniamea, oꞌro netetiamea, oowisani tiopapua.
\c 2
\s Eejesio tiopachi nayewatuamee tuuyepori
\p
\v 1 Waikao puuu tijoeka tiiame noꞌo nayeweria, noꞌo chaanekapua tiameo:
\p —Eejesio kahtiameopua Riosichi simiyame masitekao, iꞌka iyotesa uhjuremitiapua puꞌkao:
\p “Ihji naaweseria, Apoe oowisani soꞌpori makoka weeriamechi oꞌinia eenamepua, ahjamina sekachi makoka weririame. Puuua, iꞌka oꞌro oowisani kanterero naasipa oiyamepua, puuua, oowisani tiꞌtiopachi puuua. Puuua eee aamo chaaniamepua:
\v 2 Neeepua, teꞌta machiyameraapua aamo yooraka mochikao, aamo aachin teeka anachaopua tiameo, itapiti aꞌchi yoraniaopua, mooena eꞌraka. Naneꞌriamenia aamoo, ki anachaka tetewamekopua ki kaawe nokiwao. Muuua iintoteka neꞌnekamepua, puꞌka noꞌo ajawaria ahpo teewameopua pichiwatakao. Naneꞌrekame muuua puꞌkao, kiisi pichiwa chaachapamekopua puꞌkao.
\v 3 Naneꞌrenania aamoo ki naanaso eꞌramekopua, kiisi nahsinepaka tekipanakapua noꞌowichioo, anachakapua eemea, aiwakapua tiameo.
\v 4 Nape waꞌa chiiainia amochio, itapiti iinuenia amochio. Eemea toarepua puꞌkao, pukeri oꞌiniao, aamo peenia eꞌraka noꞌo yorakeka mochiriao.
\v 5 Inatepamitiaopua eemea, pukeri oꞌiniao, itapiti aꞌchi teeeriaopua noꞌo ahjamao, sewina erapamitiapua eemea, eenechi waꞌapi teeremitiapua, pukeri oꞌiniaopua aamo teeeriachitia. Ki waꞌa aamo noonoisoo, waꞌa eenaka aamo uꞌyemania, puꞌka aamo kantererowaopua.
\v 6 Nape waꞌa teꞌtiai eemea, itapiti iinue eemea noochitia, aamoopua, nekumiamekopua, Nikorai nokayaopua tiꞌtijoeri, noochitiaopua.
\v 7 Eꞌwaka mochitonariamea, inataka keepupuapua iꞌka Riosi Riosiwari chiiao, yooma eeme tiꞌtiopachio. Yooma eꞌwaka mochitokamea iꞌkao, newitoka puuyakameopua ki kaꞌkarumachio, neeeai reesiseri kiamania puꞌkao, kaawe koꞌkomichioopua, puꞌka kuuu ahjarichi taakiameopua, ki wahjiame ahjaniame taakiameopua, puꞌka Riosi eechichi, paarasarichi naasipa weeriameopua.”
\s Ehmirina tiopachi nayewatuamee tuuyepori
\p
\v 8 Waikao puuu tijoeka tiiame noꞌo nayeweria pukeri oꞌiniao, eee noꞌo chaanekapua:
\p —Ehmirina tiopachi mochikameo, puꞌka Riosichi simiyame waꞌa nayewatuameo, iꞌka noꞌo cheemia iyotesa, uhjurepuapua: “Ihji iꞌka naawesari chiiamea, aaata ki oꞌinerewa iinuemepua, kajuwaoiopua; ihjia mukukamekaiopua, eenechi ahjakamepua.
\v 9 Puuua eee aamo chaaniamepua: Neeea aamo Ehmirina mochikameo, naneꞌriamenia aamo tísia aiwaka mochikaopua, naneꞌriamenia aamoopua tiameo, kihta iinuekopua paarasario. Nape eemea waꞌa teꞌtiaio, teꞌta tísia paarasariemekaitepua. Naneꞌreka yasitoamenia puꞌka ahpo iꞌisaeri tiꞌtijoeri teewameo, aamoo aꞌchikoi chaaniakopua naꞌarekao; yooma puuua, Satanasi napawikarichi mochitoamekapa waꞌa chaachapamepua.
\v 10 Nape eemea kaꞌchi eramitia tísia aiwateniaeopua pukaeo. Neeea Satanasio, waꞌa tiiame reesisemerinia puꞌkao aamo aiwatemichioo, aamoo neꞌnenariapaopua, akatiasi noochi paparamekoopua. Néé, Satanasia, aamo amori oꞌiniame puuuapa, aamo karichiami toꞌtowatowaopua, ahpo kuꞌiwarieopua aamo naꞌara yoratekao. Waꞌa teeremeripua oosa mariki taawe Riosi inatarichi tiiao. Noꞌo iyorieme enepuapua naaju. Aamoo noochi paparario, ahkasi mukiwarichioi ki wekatiame enesoo, neeea aamoo waikao, teꞌta ahjari aamo kiamania, teꞌta ki wahjiame ahjarirakamera, teꞌta ki teesa nateyamera ahjari.
\v 11 Noꞌo keepuka mochitonariamea, noꞌo eꞌweka mochitopuapua, noꞌo keepuka iꞌka Riosi Riosiwari chiiaopua, yoomahka waꞌa Ehmirina tiopachiopua, yomachi tiꞌtiopachiopua tiameo, waꞌamio. Yoomahka Satanasie naꞌarari aiwatewa newitokamea, kiisi aiwameri puuua, oosa mukiwarichi simiyameopua waꞌasio, teꞌta ki Riosi ahjama mochiwameopua.”
\s Peerekamo tiopachi nayewatuamee tuuyepori
\p
\v 12 Waikao puuu tijoeka tiiame noꞌo nayeweria pukerio, noꞌo chaanekapua tiameo, Riosichi simiyame tuuyetoameopua, Peerekamo tiopachiopua, iꞌka iyotesa uhjurepuapua puꞌkao:
\p “Ihji naawesari chiiamea, maacheta neneku yoorame chuꞌwachi iinuemerapua, ahpo chiiaa ki teesa tiame muꞌipamera. Puuua Eesusi puuupua, eee aamo chaaniamepua:
\v 13 Naneꞌrenania waꞌa aamo ohjoekachio, Satanasi yeꞌkachikopua. Nape eemea Satanasi yeꞌkarichikoipua waꞌao, noꞌokamera iyorika mochitokame eemea. Aantipasi taawechi meritioiopua aamo tetewachi waꞌa tiopachio, muuua noꞌokamera teꞌta kaaweruma naewakamepua, káátisia aiwaniamekoipua waꞌa tiopachio, noꞌokamera paparakame eemea.
\v 14 Kaawepua aamo noonowiria, nape puꞌkachepa, itapiti iinuekane amochio ookapi. Eemea Waarami masitewachi mochitoaio, kiisi toinareka eemea puꞌka ki kaaweruma masitiao. Aamoo waꞌa teꞌtiopao, Waaramia Waaraki nuurerepua, puꞌkao ahpo iꞌisaeri tiꞌtijoerioo masitemichio, kaꞌchi tiio riꞌriosi manaketiame koꞌkotiaio, suwepori nokitioiopua, kaꞌchi ikinio tuuyemichioopua.
\v 15 Ahkasi nikoráita nokaya naꞌnaritona eemea, ookapia, kaꞌchi ikipo chaachapaka suuwe erapori nokayaio.
\v 16 Sewina erapasa naaju eemea. Ki aamo sewina erapasoo, waꞌa enamane nasiwari maachetaeka, puꞌka maacheta noꞌo chuꞌwachi iinuekaeopua, nasiwari mehtanamania.
\v 17 Eꞌwaka mochitonariamea, inataka keepupuapua iꞌka noꞌo Riosiwari iyoterichi chiiao, yomachiami tiꞌtiopachi mochikamea. Yooma eꞌwaka newitoka puuyakameo ki kaꞌkarumao, noꞌo Noonochi teꞌpa eenamee, koiꞌtemania, puuu apoechi eename, ki teteiwamepua pusieo. Aamoo, tehte tohsaname kiamane tiameo, aamo weemera teewarao ahjachi iyotetiame. Puꞌkao aawataoi ki naneꞌremapua, muuuche naneꞌremapua kiatiamerachi.”
\s Tiatira tiopachi nayewatuamee tuuyepori
\p
\v 18 Waikao puuu tijoeka tiiame noꞌo nayeweria pukerio, noꞌo chaanekapua tiameo, Tiatira tiopachi mochikameo, Riosichi simiyame waꞌa naewatuameopua, iꞌka iyotesa uhjuremitiapua:
\p “Ikachi nayewamea, Apoe Riosi Taanara puuua, ahpo puichio naꞌika tiame tajenarieme, ahpo tarachiopua oronse meetarika tiamepua, kosoka apochetatiame. Puuua eee aamo chaaniamepua:
\v 19 Neeea aamo yoorao yooma tetewamepua, aamo nakira iinuekaopua tiame noochio, aamo noochi paparaopua tiame, aamoo Riosiwichio yorakeka mochika, aamoo ki nahsinepaka teꞌteretoa, aamo tísia aiwatoai anachatoameko. Yooma aamo ehpe yooraka mochiraa, yooma epeche kaawe teetoamepua, epeche ki pukerichitia, aamoo pukeri noochi pichikerioio.
\v 20 Nape iꞌkachepa ki kaawe tiiame eemea, puꞌka Esaweri oowitiameo aamo reesisiamekopao, noꞌo tiꞌtijoeriwao wisikuemichioo. Puuu oowitiamea, suwepori nokiwa masitiamepua noꞌo tiꞌtijoerio, noꞌo tiꞌtijoeriopua tiameo, riꞌriosi oowewatiame kooame konuriamepua, kaꞌchi ikipo tuuka Riosichi kaawe teꞌtereniameo, koꞌkakaiopua puꞌkao.
\v 21 Neeea puꞌka oowitiameo, tehpe kiꞌyakame neeeapa, ahpo suwepori ihsiao toimichiopua, nape puuu oowitiamea, ahpo waꞌinanipua puꞌkao.
\v 22 Pukaepa waꞌapi inisinariopa puꞌkao, tísia aiwatemania, yooma puꞌka ahjamao, suwepori nokayameo. Puꞌka Esaweri tatanaraopua tiameo, ki kakupachi enepasoopua,
\v 23 yooma koꞌimania. Waikao yooma tiꞌtiopachio, naneꞌremapua noꞌoo, ahkasi kai waapisi noꞌo naneꞌriamekopua aaata inataopua, tiꞌtijoe ooweruoiopua tiameo. Pukaepa neeea, yooma pipiripi puꞌkaonia, ahkasi nokaria kiamania puꞌkao, noꞌo teewiaopua kiapuameo.
\v 24 Nape wahjachi aamo Tiatira mochikameo, ki puꞌka masitewa nokaka mochikameo, ki puꞌkachi wahjachi pepenipaka mochitoameo, puꞌka kai waapisi noriwi tiameopua Satanasichio, kaꞌchi chaaninia aamoo.
\v 25 Waꞌapi teekache mochijeraninia aamoo, noochiche paparaniame neesetoka, ahkasi noꞌo eenachisi eenechi.
\v 26 Yooma newitoka machenakame yomatiame naꞌarewao, noꞌoche eꞌra iintokaopua ahkasi kajuyachisio, neeea puꞌkao yomatiame iꞌka wehjoarichi tiꞌtijoerichiopua, kiamania yawichitumichioo.
\v 27 Puuua waikao, sisioki wepirae makoka nuuremapua, ki kaaweruma tiiario, sikorichitia kahsinamapua teꞌta ahpo utewarie, noꞌoopua kiꞌyariae.
\v 28 Puꞌka kiatiame neeeapa waꞌa iintomeria, teꞌta Apoe cheeriachitia noꞌo Noono. Puꞌkao kiamania tiameo weemera cheisopori, weemera wehjoarichio weemera maꞌchirepari, teꞌta peenia tiiamera.
\v 29 Eꞌwaka mochitonariamea, inataka keepupuapua iꞌka noꞌo Riosiwari iyoterichi chiiao, yomachiami tiꞌtiopachi mochikamea.”
\c 3
\s Saarisi tiopachi nayewatuamee tuuyepori
\p
\v 1 Waikao puuu tijoeka tiiame noꞌo nayeweria pukerio, noꞌo chaanekapua tiameo, Saarisi tiopachi Riosichi simiyame waꞌa naewatuameopua, iꞌka eee chiiame iyotesa uhjuremitiapua puꞌkao:
\p “Puuu Apoe oowisani Riosiwari iinuemea, oowisani soꞌpori sekachi iinuemea tiame, aamo chaaniamepua: Aamo tetewaninia waꞌao ihtana aamo ihsio. Tísia kaaweruma naewaniame muuua, nape mukukameka tiiaite muuua, ki ahjamekate muuua, kiisi kaawe tiiapa noochio.
\v 2 ¡Pusasa muuuapa! ¡Yaapiti muuua! Oijenate puꞌka amochi tiiaopua, teesa amori mukuyame waꞌasi itipiameopua amochio. Kihta tetewamenia amochio, noꞌo Noonowichio kaawe ihsiwao.
\v 3 Inatepasa naaju, puꞌka pukeri oiꞌinia aamo masiteretia. Puꞌkakamera naꞌnaritopuapua. Aamo Riosikamerachi kuꞌripuapua ohso kaawe. Naane eꞌreka moochi. Kaꞌkarumache yooraka ahkasi noꞌo eenachisi, ki naneꞌriapa eemea, achini keenako noꞌo enamiao. Seenekachi ki kaawe teeretare eemea, senawato noꞌo enasoopua, ichikoamechitia tukaoo.
\v 4 Waꞌa Saarisi tiopachio, mochiwipua pehji ookapi ki nohpikameopua apochio. Puuua noꞌo ahjama mochimeripua tohsaname wakiraeka, Riosie piipatetiamekapaopua tatakoririao, Teꞌta apoe noꞌo Noonoeopua cheriweka.
\v 5 Yooma neꞌnewitoka puuyakamea ki kaꞌkarumachio, totosaname wakiratepuame puuua. Yooma puꞌkaonia noꞌo ahjari iyotaperichio, ki choꞌwemania teewaraopua puꞌkao. Yooma puꞌka teewarao, kaꞌkarumachitia neꞌnetemania noꞌo Noonoopua waꞌa tewekachio, yooma noꞌo Noono kuꞌkuira tetewachiopua tiame.
\v 6 Eꞌwaka mochitonariamea, noꞌo Riosi Riosiwarie chiia keepupuapua, iꞌka iyoteri chiia iyonanioipua ahkaoi tiꞌtiopachio.”
\s Irarejia tiopachi nayewatuamee tuuyepori
\p
\v 7 Waikao puuu tijoeka tiiame noꞌo nayeweria pukerio, noꞌo chaanekapua tiameo, Irarejia tiopachi nayewatuameo, waꞌa mochikameopua tiameo, iꞌka eee chiiame iyotesa uhjuremitiapua puꞌkao:
\p “Ihji eee chiiamea neeepua, apoche teꞌta kaawerumaemera, apoe teꞌta pichiwakamera chiiame; neeea apoe Raawitaru yeetapura teꞌta iinuemerapua; neeea yeetepapurae noꞌo iinuekao, ihtaoi pukae noꞌo yeetepariao, kaꞌchi iika wahjonameripua aaataai; pukae noꞌo yeetapuriaoio, aaataai kaꞌchi iika yeetepameripua.
\v 8 Tetewaninia aamo kaawe nokayao. ¡Néé! Neee apoea noꞌo Noono yeꞌkarichi muimichio aamo wahjonekamepua, waꞌa aamo muimiao aaataai kihta aamo waꞌinameripua. Naneꞌriamenia aamoo aiwaka tesiwa teetoka nokisiriopua, kihta sewina erapaka noochio, ohsokamera eemea noochikamera epeche kaawe teetoka.
\v 9 ¡Néé! Neeea puꞌka Satanasi ijinuwaraopua tiꞌtijoerioopua, ahpo pichiwa iꞌisaeri tiꞌtijoeriko tuuyoiopua wihtukao, yooma puꞌkaonia kajuyachi taawechio, yooma aamo chokichi tetewachi chopokorieka ajatetemania, puꞌka Satanasi ijinuwara wistuameo, aamokamera teꞌta noꞌo nakiyameko tetewimichiopua, puꞌka chopokorieka aamo ajatekameo kaꞌi.
\v 10 Aamoopua, ahsepari noonowiriopa, iꞌka aamo noꞌo nuureriao nayewatukao, ki toaka neesetoriopa aamoo, waꞌachitia neeeai kiisi chewitema neeea, puꞌka ki teesa tiame aiwariopua, yomachi iꞌka tijoerichi enameriopua, puꞌka kajuyachi taawechiopua, yomatiame teeremeriopua iꞌka wehjoarichiopua.
\v 11 Senawato enameri neeea. Pukaepa kaawe neesetoka mochitomitia eemea noochi paparao, ki aaata aamo sewina erapatemichiopua ki aamo kiapuao, itapiti tísia nateyameopua aamo kiapuao.
\v 12 Newitoka puuyakameopua ki kaꞌkarumachio, ki kuꞌwitapisi mochira kiamania puꞌkao, noꞌo Noono kariwachiopua tewekachi, waꞌa aamo mochimapua ki wahjiamesi, waꞌa nawapakame mochimichiopua. Pukachio noꞌo Noono Riosi teewara iyotemania, puꞌka mochikachi mochiwari teewara tiamé, noꞌo Noono Riosi ijinuwarako tetewipuawichiopua, weemera Eerusareni tewekachio.
\v 13 Eꞌwaka mochitonariamea, iꞌka noꞌo Riosi Riosiwari chiia keepupuapua, iꞌka iyoteri iyonanioipua, ahkaoi tiꞌtiopachio.”
\s Raoriséa tiopachi nayewatuamee tuuyepori
\p
\v 14 Waikao puuu tijoeka tiiame noꞌo nayeweria pukerio, noꞌo chaanekapua tiameo, Raoriséa tiopachi naewatuameo, waꞌa mochikameopua tiameo, iꞌka iyotesa uhjuremitiapua puꞌkao:
\p “Iꞌka naawesari chiiamea neeepua, Apoe ahjachi erapua tiamerachi; Apoe teꞌta pichiwatame ahpo Noonoo; Apoeopua Riosichitiao, pukeri oꞌinia yooma ihta itapiti iintokameopua netekao.
\v 15 Aamo tetewaninia aamo teꞌta nokayao, ki teꞌta maꞌchiame teꞌtiamekopua noochio, aaata piirechioi. Ki tahtame eemea noochioi aaatachioi; ki tuurameoi eemea, noochioi, aaatachioi. Piiripi waꞌapi tiiame enesaa, kaawe enemii eemea; tahtamechekoi, tuuramechekoi.
\v 16 Aamo noochi teꞌterewao, teesa tataposoriamekopa noochio, yoꞌyomania aamoo, ki noochi poanatuwaka.
\v 17 Eemea chaachapanipua chaachapao: Ki teesa paarasakame teemea, yooma itapitichio, toomichioipua tiame, kiisi tesiwa erakona teemea, chaachapawa. Nape ki naneꞌriame eemea, ki nuꞌuti yuuwesiriekai amochio, kihta iinuekapa eemea aamo teꞌta paarasario. Eemea tesiwa teꞌteriaitepua, kiisi pahtiame eemea aamo inatachio, poiyame mochikamekate eemea aamo naawariachitia. Waꞌa teꞌtiame eemea noochio, aamo paarasarichikamera paparariapa.
\v 18 Pukaepa neeea, noochi aamo paayamepua, noochi iintuame oꞌro teꞌta nateyame, amochi paarasatemichiopua, oꞌro naꞌie teꞌta piipatetiame. Noꞌokamera itanepuapua, aamo poiyame mochikao ahjae toꞌpepuameo, wisasori tohsaname piipatetiameo. Noꞌokamera itanepuapua tiameo, aamo puichi iꞌyowapuaopua aamo kaawe maꞌchiremichiopua, ki kaawe aamo tiia puichio.
\v 19 Yooma noꞌo nakika kahtiao, kokosa yooraka kakupachi iintapame neeea, aaata ki kaawe noonoisoo. Kaꞌte ki kaawe nokimitia naaju. Ikanati iiyana erapamitia eemea naaju, puꞌka ki kaawe aamo nokayao. Ohso kaawe noochi eꞌenamitiapua, aamo sewina erapakapua kaawerumachi.
\v 20 ¡Nee! Amochi asiru neeeapa, muuuche toinapua reesisemichio, aamo iikachi pakimichioo.\fig |232-cn02107B.tif|col|||Eesusia taamo iikachi noonotenapua pakinareka.|3:20\fig* Aaata piire ahpo iikachi noꞌo paajutesoo, ahjachi enamania iikachio, waꞌa yasitomiaopua ahjama, taꞌiria mochitopuaichiopua pirena, kaawe eꞌraka.
\v 21 Neeea waꞌachitia neipa mukiwari newitoka machenakapao tatakori natetekao, noꞌo Noono yeꞌkachi yasipakame neeea, noꞌo Noono yeꞌkari yasirachiopua ahjama; waꞌachitia neeeai, yooma puꞌka ki kaꞌkaruma newitoka puuyakameo, noꞌo yawichika kahtiachi mochimichio kiamania puꞌkao, noꞌo ahjama mochitomichiopua.
\v 22 Eꞌwaka mochitonariamea, iꞌka noꞌo Riosi Riosiwari chiia keepupuapua, iꞌka iyoteri iyonanioipua ahkaoi tiꞌtiopachiamio.”
\c 4
\s Riosichi paparaniame inamutiame tewekachi
\p
\v 1 Neipa iꞌkao neee Waania, teꞌpa neꞌnepakania tewekachi, waꞌa tewekachionia, piiripi yeeta wahjokame tetewikania.\fig |233-OK.heavendoor.11.27.9 copy.tif|col|||Waania tewekachi oꞌinia paaeniaio, wahjokame tetewanipua tewekao.|4:1\fig* Waꞌa yeetaputiachi oꞌiniao, noꞌo paaechaniapua. Puuu waꞌa noꞌo paaechaniamea, puuu waꞌapi enechaniamekapua, puuu pukeri noꞌo paaekame. Puuu waꞌa noꞌo paaechaniamea, kokotiame cheechaniapua teꞌonichitia:
\p —Waaníii, mooenasa waꞌatikiáaa. Aamo neꞌnetenariame neeea, itapiti achini teeremeriko neipá itapiti noꞌo aamo tetewitemichio.
\p
\v 2 Waꞌa cheesoopua neeea, ikanati uutiapa Riosiwarieo, teꞌpa noꞌo tetewikania, noꞌo paaekame weeriachi. Waꞌa mooenasaapa noꞌo mooenaputiachio, yawichi yasira weeriapua waꞌao. Pukachi yasirao, waꞌa kahtiapua aaata.
\v 3 Puuu waꞌa kahtiamea, tehteka tiiamekapua, tisiwa peeniatiame tehte. Puuu tehtea, asape tewaniame tehte tiiamekapua, konarina tehteoika tiiame. Waꞌa ikisao yeꞌka yasirachio, kenora weeriapua waꞌao aampao. Puuu kenoraa, esmeráta tehteka tiiamekapua, káátisia peeniatiame.
\v 4 Waꞌachi norikame yeꞌka yasirachioi, waꞌachi ahjakapua piire weerewa aampa naao yaꞌyawichi yasira, pukachi pipiripichio mochikapua, piire weerewa aampa naao tiꞌtijoe oꞌochetiame. Puuua, apoche totosaname wakiraemekapua, puuua moochio apoche oꞌro yawichi moꞌkorira moꞌkoriemekapua, yaꞌyawichichitia.
\v 5 Nape teꞌta yawichi yasirachi oꞌiniao, kuhjipari puuyapapua waꞌao, rurusura chiiapua tiameo, waꞌa ikisa teꞌoni. Tawemina yeꞌkari yasirachio, oowisani tahjera ajakapua waꞌao, puuua oowisani Riosiwarikapua.
\v 6 Waꞌa teꞌta yawichi yasirachi taweminaopua tiameo, paꞌweka tiiame poꞌyapua waꞌamio, kawiyame akipame, kaawirachitia.
\p Waꞌa yawichi yasirachi norikameo, waꞌa ajakapua tiame, naao itapiti ahjakame, pochikame puusiemekapua taweminao, pukaminaopua waꞌachitia.
\v 7 Piiripi puuu ahjakamea, mawiyaka tiamekapua; piire ahjakamea, oisika tiamekapua; paikachi simiyamea, tijoekapua nanarirao; naaochi simiyamea, waꞌweka tiamekapua, anasawiapua poojachuka simiyamechitia.
\v 8 Yooma puuu naao ahjakamea, puhsani aanaemekapua pipiripichi. Aanatereopua, aampaopua tiameo, puusi apochekapua, puuua. Puuu naao ahjakamea, kiisi tewiapua kusuka chaachapakao, yooma taaweoi, yooma tukaooi. Puuua ahpo wiikachio, chaachapapua:
\q Teꞌta piipari, teꞌta piipari, teꞌta piipari,
\q2 waꞌa tiiame taamo Paamiraa,
\q2 waꞌa tiiame taamo Noonoa.
\q Waꞌa tiiame Noonoa,
\q ki teesa tiiame Utewariemeraa,
\q2 puuua yasariameraapa,
\q2 puuua ehpiami yasitoameraapua tiame,
\q2 apoeopua ahkasi ki seena aampasi yasitomeri,
\q kiisi naneꞌrewa wahka ihtori taawechisi.
\p
\v 9 Senepi ihji ahjakame wikataiopua, cheriwema kiasiapua yoorewi nookeka tiame puꞌka yawichi ki wahjiamesi ahjameopua.
\v 10 Puuu piire weerewa naao paꞌpamiratuamea, chopokorieka ajapakaopua taweminao, ahpo yawichi moꞌkori pujisaopua, puꞌka teꞌta yawichi tawemina toꞌtowesiapua. Waꞌa nokisikaopua tiameo, wiikesiapua tiameo chaachapasika:
\q
\v 11 Tisiwa weruma muuua, yooma ihta enepatekapa
\q2 tisiwa yooreniame muuua,
\q1 ki teesa cheeka nuurariemekapao,
\q yooma itapiti iintuameopua muuua,
\q1 amoe eꞌrae iintupatekamepua,
\q2 amoe eꞌrae netetiamepua,
\q2 amoe eꞌrarichi enepakamepua.
\c 5
\s Piꞌrinatiame iyotetiame, Poꞌwa teewataniame tiame
\p
\v 1 Waikao puuu yeꞌkari yasirachi kahtiamea, ahjamina sekachio, piiripi iyosi piꞌrinatiame makoyamekapua, neneku iyotetiame, oowisanisi ikichetiame, maꞌchi oꞌinia ahkasi kajuyachisi yooremina.
\v 2 Waikaonia puꞌka tetewisaapa, piiripi Riosi kuꞌiwari tetewakania, ki teesa uꞌwame. Waikao puuua, ki kuꞌita sisinakao, chaachakapua:
\p —¡Aatanakamera ikichapume tiiamejuarepu, iꞌka piꞌrinati iyotetiameooo? ¡Aatanajuarepu iꞌka iyosi piꞌrinatiameo saꞌrunasa iyonameriaaa, itapiti iyotetiame yooremina iinuekaooo?
\p
\v 3 Nape kiisi nehjiakapua aawataai. Yuuuwéeme tiiaapua waꞌao. Aawataai kiꞌtiapua waꞌao, iꞌka iyoteri ikichera wahjopume tiiameopua, ahkaoiopua, tewekachioi, weeechioi, wehtereoi. Aaataai ki neꞌneme tiiariemekapua puꞌka iyoterio.
\v 4 Neee Waania waikao, naarapua, ki tewiniopa aaataoiopua, puꞌka iyoteri wahjonameri tiiameopua; aawataai kiꞌtiapua waꞌao, puꞌka iyoteri yooremina neꞌnemeri ahsepari tiiariemeopua.
\v 5 Waikao, piiripi puuu waꞌa mochikame paamiratuamea, noꞌo chaanekapua:
\p —Kaꞌte naara muuua, iintuaitepua iꞌwao aaata ikichapumeria. Nee, naati iintomeripua puꞌka ikichapukao, Apoe Mawiya teewataniamera, Apoeo yooma ihta itapitichio, newitokame. Puuu Apoe Mawiyaa teewataniamea, naatikapua, Uura tetejimarichi machenakame, puuua Raawitaru ojochiwarachi naawakame. Puuukapua, puꞌka piꞌrinatiame iyoteri oowisani ikichera ikichapumeria. Puuukamerapua teꞌta ikichapume tiiariemea.
\p
\v 6 Waꞌa teꞌta yeꞌkari yasirachi weeriachi norikameo, paꞌpamiratuame ajakapua, puꞌka pukaminao naao ahjari ahjakame ajakapua norikameo. Yooma puꞌka norikame ajakachi naasipao, Poꞌwaka tiiame chuhkuapua waꞌao, tijoekai tiiameka puuua. Puuu Poꞌwaka tiiamea tijoekai tiiamea, meriretiamekai tiiamekapua tiiao, nape waꞌa chuhkuapua ahjakame. Puuu chuhkuamea, oowisani aawaemekapua oowisani puusieme tiame. Puuu Poꞌwa oowisani puusiraa, oowisani Riosi Riosiwarikapua, yomachi wehjoarichi uhjuratiame.
\v 7 Waikao puuu Poꞌwaka tiiame tijoekai tiiamea, eenaka uukapua puꞌka piꞌrinatiame iyotetiameo, yawichi yasirachi kahtiameo, ahjamina sekachi makoka kahtiao.\fig |234-OK.lamb.scroll.10.8.9.a copy.tif|col|||Poꞌwataniame tijoea, ahpo Noono Riosie kiaretupua tumitapi iyotetiameopua.|5:7\fig*
\v 8 Iꞌkao uusoopua puꞌka wipiri iyoterio, puuu naao ahjari ajakamea, puuu piire weerewa naao paꞌpamiratuameapua tiamea, chopokorieka ajapakapua puꞌka Poꞌwa teewataniame taweminaopua.\f + \fr 5.8 \ft Poꞌwa teewataniamepua Riosieo, taamo tatakori teꞌta piipateniamewichio meritiamekopua, ehkoriami oꞌiniame waꞌa nokisiniamechitia tatakori piipateniamewichioo, poꞌwa merisa mananiame Riosiwichioo.\f* Yooma puuua aꞌrapa iinuekapua, moorera makoyameapua tiame, apoche oꞌroe netetiame, choꞌie pochiwetiame. Puuu choꞌia, Riosi ahjae mooriniamekapua, yooma Riosichi mochiwariopua, ahjae Riosi taaenari itaneniame, ihtaoi itapiti.
\v 9 Ihjia waꞌao, weemera wiika wikatakapua, ki wikataniame pehji. Ihjia iꞌka wiikachio chaachapapua:
\q Muuuchepua iꞌka piꞌrinatiame iyotetiame iyoname tiiameraa,
\q2 ikichapume tiiameraa tiameo,
\q2 yooma puꞌka oowisani ikicheraopua.
\q Muuuchepua aamo mukuriae tarakamea tiꞌtijoerio,
\q Riosiwichio enemichioopua,
\q2 yomatiame ihta tiꞌtijoerioi,
\q2 yooma ihta nayewameoi,
\q2 yooma ihta tetejimari iintuameoi,
\q2 yooma pirenatakamemua taamoo,
\q
\v 10 piiripi waꞌapi yeꞌkarichi iintapaka,
\q2 piiripi waꞌapi mochiwarichi yomatiame paamiratuame iintapaka,
\q aamo yawichi yeꞌkarichi kuꞌipuawichioopua,
\q2 ahkasi yomatiame weeechi wehjoarichiopua.
\p
\v 11 Neipa eenechi noꞌo neꞌnepoio, muuwaeme ajakapua Riosi kuꞌiwari, nape kíí ookapi miiyoni, epeche epechesi simiyame miiyoni, ahkasi epeche miꞌmiyoni, kiisioipua ihtetakao, ahsepame tiiame,
\v 12 puuua, weeru siinakoapua, chaachapapua:
\q Puuu Poꞌwa teewataniame taamowichio meritiamea,
\q puuupua teꞌta yomatiame paarasari uume tiiariemea,
\q2 yooma ihta yeꞌkariopua,
\q2 yooma ihta machiwariopua tiame,
\q2 ki teesa uꞌwariopua tiame,
\q1 weruma teꞌta tísia yoorewiwa tiiameopua tiame,
\q yooma apochi kaaweruma chaachapari.
\p
\v 13 Puꞌka tetewisaapua inamukania, yooma ihta ahjatetiameopua, tewekachi ohjoemeopua, weeechi ohjoemeopua tiame, wehtere ohjoemeopua, paꞌwechi ohjoemeopua tiame, yooma ihjia chaachapachaniapua:
\q Teꞌta yeꞌkarichi kahtiameopua,
\q2 Apoe Poꞌwa teewataniameopua tiameo,
\q1 puꞌkakamera teꞌta kaawerumari chaachapari chaachapapua puꞌkao,
\q teꞌta weruma yoorewi eꞌrepuapua tiamé,
\q teꞌta weruma utewari uꞌwaeniame,
\q2 ahkasi ki wahjiamesi.
\p
\v 14 Puuu naao ahjakame teꞌta yawichi nooreka ajakamea, chaachapakapua waikaopua tiame:
\p —¡Waꞌa ikimitiapua! ¡Waꞌa teeremitia!
\p Puuu piire weerewa naao paꞌpamiratuamea, chopokorieka ajapakao, weruma yooreka iyorekapua.
\c 6
\s Poꞌwa teewataniame Tijoe oowisani ikichapura wahjonaria
\p
\v 1 Waꞌa ikisaopu Poꞌwa teewataniamea, piiripichi simiyame oowisani ikichapura, ikichapukapua. Iꞌkao ikichapoiopua, piiripi puuu naao ahjari waꞌa ajakamea, noꞌo chaanechaniapua:
\p —¡Yaapiii, uꞌmasika neꞌnesaoopua! —nape kokotiame nayewachaniame, ki kuꞌita teꞌteokachitia.
\p
\v 2 Waikaonia waꞌa uꞌmasika neꞌnepakania. Waꞌa noꞌo neꞌnioio, kaawai chukitoapua waꞌao tohsaname. Puꞌka kaawai yaasetoamea, atapori makotoamekapua, ahjae nasiwapuame. Puuua keꞌchu nasiwasiaio, yawichi moꞌkori kiatiapua. Puuua nasiwamiao newitomiache akipakapua.
\p
\v 3 Waikao ooka simiyame ikichera ikichapoiopua, puuu naaochi simiyame ahjariaipua, noꞌo chaanekapua:
\p —¡Yaapi uꞌmasika neꞌnésaaa!
\p
\v 4 Waikao piirechi kaawai machenakapua sehtaname. Iꞌka yaasetoamea, weruma maacheta nasiwari kiatiapua, taꞌiria mochikameopua, nasiwari mehtanamichiopua, aapoe ahpo koꞌimichio.
\p
\v 5 Paikachi simiyame ikichari ikichapunioiopua:
\p —¡Yaapi uꞌmasio neꞌnesaaa! —noꞌo chaanechaniame inamukania, puꞌka paikachi simiyame ahjariopua.
\p Waikao noꞌo neꞌnepoio, kaawai ohchoname machenakapua. Ihji yaasetoaa, sekachi makotoamekapua, pehtewari ahjae ihtetaniame.
\v 6 Puꞌka machenoiopua, naasipa puꞌka naao ahjari ajakachiopua, cheechaniapua:
\p —Piiripi peteri ihtetatiame kiapuamepua tiirikoo, piie taawechi tekipanaka yowiwameopua. Nape seewara tewaniame enesoopua tiirikoo, paika peteri ihtetatiame waꞌasi kiapuapua puꞌkao, piie taawe tekipanaka yowiwamewichioo. Iinuesaa itapiti ihkomerao itapiti nerosowioi, itapiti wiinooi, inateka nuutetopuapua puꞌkao. Kaꞌte naꞌatamitiapua puꞌkao, soopatioo kiteremerikopua puꞌkao waꞌasi.
\p
\v 7 Naaochi simiyame ikichera ikichapunioiopua Poꞌwa teewataniame tiꞌtijoeeo, puuu naaochi simiyame ahjaria, noꞌo chaanekapua:
\p —¡Yaapiti eenaka neꞌnesa!
\p
\v 8 Waikao, kaawai saawaeme machenakapua. Puꞌka yaaseka yasitoamea, Mukiwari tewaniamekapua, puꞌkapu pukaminao, Wahjipari Noonora ihtoapua. Puuua kiatiapua, piie naasipa naasipasi koꞌimichiopua tiꞌtijoerio, yomatiame weeechio, yooma ihta itapitie, nasiwarie, toorewie, koꞌkoamee, oorieoi koꞌkoniamee.\fig |235-OK._4.horsemen.2.11.10 copy.tif|col|||Ihji kaawaia uꞌmaka puuyakamepua pipiripi.|6:8\fig*
\p
\v 9 Puꞌka Poꞌwataniame Tijoeo, marikichi simiyame ikichera ikichaputiopua, waikao tatakori piipateniamechi teere ajakame tetewakania, Riosi tuuyewari iyorika mochitokamekapua, koꞌitiame.
\v 10 Puuua, ki kuꞌita siinakoapua chaachapaka:
\p —Yomari aampa tiaméee, apoche teꞌta kaawerumáaa, teꞌta pichiwariemeráaa, ¿ahkasi achinitio katewetamua Riosíii, aamowichio teꞌteretopa, taamo koꞌyakameopua weeechi mochikameo?
\p
\v 11 Waikao wisasori totosaname kiatiapua, wakiratamichioopua, yoomá pipiripi puuua, yooma ahsieme piipatetiameopua Riosieo. Puꞌkao Riosia puuyenurekapua pehjio, yooma kokosaniamepua weeechi nanaarameo, ahkasi ahsepachisiopua tiameo, Riosichi poponiwao, kehkisa enemerikoopua, Riosie Weratiamewichio nokaka wahjipakameopua, koꞌipuame toiyameopua pehjio, wisasori totosaname kiapuawichiopua tiame.
\p
\v 12 Waikao Poꞌwataniame Tijoeo puhsanichi simiyame ikichera ikichapusoopua, ki nuꞌuti ahpo sasawekame tetewikania weeeo, taaaai ohchonasipakapua waikao, itapiti tunakamee moꞌporetiamechitia. Waikao meechaa, eeraka tiiame eenepakapua.
\v 13 Waikao itapiti soꞌporika teꞌtiame wehchisi ruhjikapua, itapiti taakeri eekae ki muuenati sasawetiapa ruhjikamechitia.
\v 14 Teꞌpa tiiame tewekaai, piꞌripaka apechuka kiisi naania iikapua. Kaawiai iꞌka weeechio, yooma sewina ajapakapua ahpo ajakachio. Neronasipa weeeai, waꞌachi noonoikapua tiame, sewinachi ajapakaopua.
\v 15 Waikao iꞌka weeechi yaꞌyawichia kapitaia tiame, yooma ahpo soontaro ahjamaopua, yooma teꞌta totomiwaeme ahjamaopua tiame, ahpo puhkuchitia tekipaname ahjamaopua tiame, wahjachio oowera tekipanakame ahjamaopua tiame, yooma kaawichiami ujumakapua, teesochiami ichipumia.
\v 16 Waikao waꞌa kaawi teesochi mochikaopua, chaachapapua:
\p —¡Áii, áii! ¡Yaapiti tamochi ruꞌmisa kaawíii, taamo ichipupapuapuaaa! ¡Kaꞌte taamo tetewite puꞌka yawichi yasirachi kahtiameooo, puꞌka tamochi nekakameopua! ¡Taamo ichipupamitiaaa, puꞌka Poꞌwa Tijoe nekarewachiooo!
\v 17 ¡Asirupa Riosi ki nuꞌuti nekarewaaa, kiisi anachame tiiameaaa, tísia aiwari tiiameaaa!
\c 7
\s Machipori yahchetiame iꞌisaeri tetejimarichi tiꞌtijoeri
\p
\v 1 Neipa iꞌkao neee Waania tetewakania, naomina iꞌka weeechio, naao Riosi kuꞌiwari ajakame. Puuua, naomina iꞌka weeechio, eeka toꞌpiamekapua ki weeechi eejemichio, paꞌwechiamioi, uumawechiamioi; waꞌa teereniopa eekaa, yomatiame yuuwéeme itipikapua.
\v 2 Waꞌa teꞌtioipua ajakao, cherayachitepa eenakapua piirechi Riosi kuꞌiwari, puuua ahjae machitapuame iꞌtoamekapua, Riosi Ahjamechi paparameopua. Ihjia sisinamukapua puꞌka naao Riosi kuꞌiwari ajakameopua, yooma naꞌatamichiopua kiatiameopua, weeeopua paꞌweopua tiame.
\v 3 Iꞌkao chaanekapua:
\p —¡Kaꞌte pehjíii! Kaꞌte naꞌata aaataoi pehjíii, weeeoi, paꞌweoi, uumaweoi. Puuyemitiapua pehjío, ahkasi puꞌka Riosi tekipanakekameo, yooma yahcheniasichiopua pehjio, Riosi machitewaraopua koata.
\p
\v 4 Puuu machitewari yahchepuamea, kehki enemeri inamukania. Puuua, piire siento ooka weerewa aampa naao miirikapua.
\v 5 Yooma puuua, oosa mariki aampa ooka tetejimari, apoche isaeri tiꞌtijoeri, waika oꞌinia ehpe taawechiamisi, mochitoame tiꞌtijoetusika. Puꞌka oosa mariki ooka tetejimarichio, oosa mariki aampa ooka miꞌmiri uutiapua, yooma pipiripi tetejimarichiopua: piiripia naatikapua, Uura tetejimari, piirea Ruuweni tetejimari, waꞌa ikisa Kaati tetejimari,
\v 6 Aasere tetejimari tiame, waꞌa ikisao tiame, Nehtari tetejimari, Manase tetejimari,
\v 7 Simeoni tetejimari tiame, Reewi tetejimari, Isaka tetejimari,
\v 8 Sauroni tetejimari, Oose tetejimari, kuachiopua waꞌasio, Chaamini tetejimari.
\s Totosaname wakiraeme muuwaeme
\p
\v 9 Neipa iꞌkao iꞌka neꞌnetetiania. Waikao yawichi yasirachi taweminao, iꞌka Poꞌwataniame Tijoe kahtiachi taweminaopua tiame, ki ookapi ajakapua tiꞌtijoeri, nape ki ookapikapua, kiisi ahsepame tiiame ihtetaka. Ihji tiꞌtijoea oowerua tiame, yooma ihta tiꞌtijoeturikapua, yomatiame weeechi ohjoeme, yooma ihta naera yeenieme. Yooma puuua, wisasori totosaname chuhchaemekapua, ahpo sekachio, tahku saawara makoyáme.\fig |236-THIS.OK.REV.7.tmultitude._.4.tif|col|||Tisiwa ki ookapi tiꞌtijoeri yomatiame wehjoarichi seesenu naeraemea, ki nuꞌuti cheriwema kiꞌyani Riosio.|7:9\fig*
\v 10 Ihji tiꞌtijoea oowerua tiame, weeru siinakoapua chaachapakao:
\q Cheriwema Riosíii,
\q1 yawichi yasirachi kahtiámeooo,
\q1 cheriwema tiame Poꞌwa teewataniame tiaméee,
\q1 yooma taamoo, teꞌta newipateriawichiooo!
\p
\v 11 Neipao tetewakania, puꞌka yawichi yasirachio, puꞌka naao ahjari ajakameopua tiameo, puꞌka oꞌochetiame paꞌpamuratuameopua tiameo, yooma puuu Riosi kuꞌiwaria, norikame ajapakapua puꞌkao. Waikao ihjia, wehchisi koomorasipakao,
\v 12 chaachapapua:
\q ¡Waꞌa teeremitiaaa!
\q1 ¡Waꞌa teeremitiaaa!
\q1 ¡Cheriwema puꞌkawichiooo! ¡Kaaweruma chaachapari puꞌkawichiooo!
\q ¡Ki nuꞌuti yoorewa puꞌkawichiooo!
\q2 ¡Ki nuꞌuti iyoriwa puꞌkawichiooo!
\q2 ¡Ki nuꞌuti machirewa puꞌkawichiooo!
\q ¡Ki nuꞌuti yeꞌkari puꞌkawichiooo, ki wahjiamesi simiyame puꞌkawichiooo!
\p
\v 13 Waikao piiripi puuu piire weerewa naao paꞌpamuratuamea, noꞌo iinatukekapua:
\p —¿Aatanaju ihji totosaname wakiraemea? ¿Ki machiyamemua? ¿Ki naneꞌriamemu akana oꞌinia eꞌenakamekopua?
\p
\v 14 —Kaꞌi. Ki naneꞌriamenia. Muuupua naneꞌriameraa —chaanekania puꞌkao.
\p Waikaopua noꞌo chaanekapua:
\p —Naati ihjia, teꞌta aiwari enekachi oꞌinia eꞌenakame. Ihji puuupua, ahpo wisasoriwa piipatekamea, Apoe Poꞌwataniame Tijoe eerarae. Puuu tiꞌtijoepua, Apoe Poꞌwataniame Tijoeeo, totosaname enepatetiame wakirarao.
\v 15 Pukaepa iꞌwa nokayamepua Riosi tetewachi, Riosi kahtiachi tekipanamepua, yooma taawe yooma tukawariopua tiame. Puꞌkao Apoe Yawichi yasirachi kahtiame neesetomeripua puꞌkao, ahpo ahjama ohjoekopapua.
\v 16 Puuua Teꞌta Yawichi ahjamao, kiisi choꞌchorowaemeripua, kiisioi paramuka mochitomeripua, taaaeoi ki aiwaka mochitomeripua, taajenari tataeoi, ki aiwameripua.
\v 17 Waꞌa teꞌteremeri puuua, Apoe Poꞌwa teewataniamee neesetopuamekapapua, Apoe teꞌta yawichie yasirachi kahtiamee. Puuu Poꞌwataniamea, neeroi ahjamechi paichi maaniamechi nerojiteka mochitemeripua. Waꞌao, ki iintumerichipua naarakoniameopua waꞌasio, Riosio kiterepateriopa oꞌkewaniameo, waꞌasi werapakao.
\c 8
\s Oowisani ikicherachi simiyame naewaniame; oꞌro moorerachi nayewaniame tiame
\p
\v 1 Puꞌka Poꞌwa teewataniameo, oowisani ikichera ikichapusoopua, yuuweeme itipikapua, tepepi.
\v 2 Waikaopua puꞌka oowisani Riosi kuꞌiwari Riosi neꞌniachi ajakameo, oowisani kusupuchari kiatiapua.
\v 3 Waikao, piirechi Riosi kuꞌiwari waꞌa eenakao Riosi oꞌro tepawechi weripakapua chokichi. Puuua, weeru yahchetiapua moorerachio, choꞌwi. Puuu choꞌwia, Riosi tepawerachi, moomorepuamekapua, Apoe Riosio, saaemichiopua puꞌkao, pukachi Riosie yooma piipatetiameo, pukachi moorechi asimichiopua, ahpo nayewiaopua Riosichio.
\v 4 Puuu moorewaa, yooma paparatiame ahjamao, sekachi oꞌinia moomokaopua, Riosichi asikapua saaetekao.
\v 5 Waikao Riosi kuꞌiwaria, puꞌka Riosi oꞌro tepawechio, puꞌka moorerao, ihsawi tajenakame pochiwasaopua, weeechitipo wiꞌsunakapua. Waꞌa ikitioopua puuu ihsawia, yooma puuua tahpitika chaachapakapua tataka. Tahpitika nokayapua kuhjipaka, ki kuꞌwita teꞌteosika. Weeeai kai muuenati noonokapua waikao.
\s Kusupuchari turuwaniame
\p
\v 6 Waikaopu puuu kusupuchari kiatiamea, oowisani Riosi kuꞌiwaria, kaawe ahpo ajapapua, oꞌinemia nokayapua waꞌasio, puupuchekaopua ahpo kusupuchario.
\p
\v 7 Piiripichi simiyame Riosi kuꞌiwari kusutesoopua ahpo kusupuchewao, waikao tehje wiꞌsunetiapua weeechio, naꞌi, waꞌa ikisa eera tiame. Waikaopu wiꞌsuwetiamea, kiiyá naasipasi kosokapua weeechio, yooma uumaweopua, yooma toꞌiweopua tiame.
\p
\v 8 Okarichi simiyame Riosi kuꞌiwario, kusutesoopua ahpo kusupuchario, paꞌwechio, itapiti ipasetiapua naꞌi tajenakame. Puuua ki nuꞌutikapua, kaawi kehchuma. Paꞌwea waikao, kiiya naasipasi eeraeme enepakapua.
\v 9 Paꞌwechi ahjameai, kiiya naasipasi wahjipakapua. Paꞌwechi pawekakera nasiwaniamechiai, kiiya naasipasi kosotiapua.
\p
\v 10 Paikaríchi simiyame Riosi kuꞌiwari, kusutesoopua ahpo kusupuchewao, tewekachi oꞌiniao, ki nuꞌuti wichiyapua soꞌpori tajenakame. Weeechio puuua, akichiamisi wichikapua, paichiamisi tiame.
\v 11 Puuu soꞌpori tajenariraa, Chihpuame tewaniamekapua, yerowakapa puuua. Puuua, kiiya naasipasi neeroi nerojiniame, chihpunakapua yeroweeteka. Waikao pukaeo, tiꞌtijoeria, tahpitika iikapua wahjipaka.
\p
\v 12 Waikao, naaorichi simiyame Riosi kuꞌiwario, puupuchesoopua ahpo kusupuchewao, taaaa kiiya naasipasi tajayao, tukapasipakapua waikao. Meechaai kiiya naasipasi choipakapua tiameo. Soꞌporiai tewekachio, kiiya naasipasi choipakapua, tiame.
\p
\v 13 Ehjepaoo, waꞌweka tiiame tetewakania tewekachio, teꞌpa oiyapua eekachio cheeka:
\p —¡Áiii, áiii, áiii, eeme weeechi mochikamea, tahpitika ikimera eeméaaa, puꞌka wahja paika Riosi kuꞌiwari ahpo kusupuchari kusupuchamioiopua!
\c 9
\p
\v 1 Waikao marikichi simiyame Riosi kuꞌiwaria, kusutekapua ahpo kusupuchewao. Waikao aaata soꞌporika tiiame wichikame tetewakania weeechio. Puuua ahjae wahjochaniame kiatiapua, ki wahjiamesi yeewachi toꞌperao, wahjonamichio.
\v 2 Iꞌkao moꞌporapusoopua, ki kuꞌita moomokapua waꞌatikia. Ooronakapua puuua, nape kai nuꞌuti. Puuu moorewaraa mooenakao, yomatiame weeechi tukapame ekatatupatekapua, ki naania ikitekaopua, taaaoi.
\v 3 Puꞌka moroyachio, itapiti ohchika teꞌteriame puuyakapua. Puuua, machiri nokaya utewari kokosamichio kiatiapua.\fig |237-BK00058B.TIF|col|||Puuu itapiti ohchika teꞌteriamea, aaata kokosarisaa machirie kiꞌkitiameka koꞌkoame saaeniamekapua.|9:3\fig*
\v 4 Puuua chaanetiapua:
\p —Kaꞌte naꞌatamitia toꞌiweo, kuuu siionameoipua. Tiꞌtijoeche naꞌatapuapua, ki koata yahchetiameopua Riosi machitewarao.
\v 5 Ki reesisetiapua koꞌimichioo, oowera aiwatenuretiapua. Mariki meecha nokinuretiapua puꞌkao. Puuu kokosa aiwateniamea, machiri kiꞌkitiameka, eraniamekapua.
\v 6 Puꞌka taawechiamio tiꞌtijoeria, wahjipame eꞌraipua aiwakao, kaꞌchi ikime erameripua, mukinariai.
\p
\v 7 Ihji ohchika tiamea, kaawairakapua, ahjachi nasiwaniame. Ihjia moochio, oꞌro apoche mosokiratoapua yaꞌyawichi moꞌkoriraka tiame. Nanariraa, tijoe nanariraka teꞌtiamekapua.
\v 8 Kuuparaa, oowitiamechitia kuupaemekapua. Taameraa ihjia, mawiyaka tiamekapua.
\v 9 Ihji weerewaraa, sisioki wakiratetiamekatiapua, ahpo neesetoachitiao. Ihji maꞌsaraa, ki ookapi kaareta nasiwari kaawaiye panisutoamechitia, cheetoamekapua, nasiwasimia ujumasikamechitia.
\v 10 Ihji wasichiopua, machirika teꞌtiamekapua, ahjae inikia. Pukae kiꞌkitiaa, mariki meecha kokosa aiwaniamekapua.\fig |238-OK.A.afraid.5.12.10 copy1 copy.tif|col|||Puuu ohchika teꞌteriamea, tahpitika nokayapua weeechi tiꞌtijoeri naꞌnarikao, tísia kokosa yoramiapua kiꞌkiriao.|9:10\fig*
\v 11 Yooma iꞌka ohchi yeꞌkamea, ki wahjiame wichiwachi ohjoemekapua, apoe wahjipari noonora; eureo naewarichio, Awaroni tewaniamekapua, rieko naewaniachio, Aporioni tewaniamekapua, naꞌatarika pihtuchari noonora cheeka chaniwame.
\p
\v 12 Waꞌasipua, piiripichi simiyamea teꞌta iinyatiame aiwaria. Puuu pahcha simiyame aiwaria, uꞌmatokapua uꞌmatoao, toiyapua pehji, ooka simiyame.
\p
\v 13 Waikao, puhsanichi simiyame Riosi kuꞌiwaria, puupuchekapua ahpo kusupuchario. Waikaopua, waꞌa Riosi taweminao, oꞌro apoche tepawetiame weeriapua. Waikao, waꞌa naasipa puꞌka aawa naomina ajakameopua puꞌka Riosi tepawechio, chaanechaniapua, puꞌka puhsanichi simiyame kuꞌiwariopua, kusupuchari iinuemeo:
\p
\v 14 —Muuua puhjesa ehpeo, puꞌka naao Riosi kuꞌiwario, Eurate weruma akichi oꞌyaemeopua.
\p
\v 15 Waikaopu naao Riosi kuꞌiwaria, puhjetiapua. Ihji naao puhjetiamea, yooma tiꞌtijoe ooweru tiame koꞌimerikapua, kiiya naasipasi weeechi ohjoerio. Teꞌta iꞌka taawechiwichio, nuutetiame eneriapua.
\v 16 Ihji naao soontaroraa, kawachi nokisiapua, ooka siento miiyoni kehkikapua. Waꞌa kehkiko tuuwame, inamukania.
\p
\v 17 Ihji noꞌo tetewitetiamea, eee teꞌtiamekapua, yaasetoamea, kaawaia tiame. Kawachi nokisiamea, muripa iꞌtoapua ahpo neesetowao, paika tiiamekapua. Piiripi tiiaria, sehtanamekapua, tajenarichitia. Piire tiiaria, siionamekapua, tewekachitia. Paikachi simiyameopua tiiaa, saawaemekapua. Puuu kaawai moꞌoraa, mawiyaka teꞌtiamekapua. Ihjia chuꞌwachio, naꞌi puuchiamekapua aasujere tísia tahtame apochi, moroyamekapua tiameo.
\v 18 Iꞌka paika naꞌatarieopua, puꞌka kaꞌkawai chuꞌwachi machenameeopua, kiiya naasipasi wahjipatekapua tiꞌtijoerio, iꞌka wehjoarichiopua.
\v 19 Puuu kaꞌkawai naꞌatari utewariraa, chuꞌwachi yasitoamekapua, wahsirachi tiame. Ihji wahsiraa, siinoika teꞌtiame moꞌoekapua. Ihjia, ahpo moꞌoe naꞌatapua.
\p
\v 20 Nape puuu tiꞌtijoeri ki wahjipaka itipikamea, puꞌka yerowa ipasetiaio, kiisi kaꞌkaruma enepakapua ahpo ki kaꞌkaruma nokayao. Ohsotia simitekachekapua puꞌka kiisi kaaweruma ahpo nokayao, reemokamera naꞌnaritoamekapua. Ihji tiꞌtijoeria ooweruria tiame, waꞌapi teꞌteretoapua, ahpo riꞌriosiwachi paparakaopua, itapitie netetiamechiopua, miina meetarie, tehtee netetiamechi, kuuue netetiamechi tiame, yooma puuu ahjachi paparaa, kiisikoi tetewame puuua, kiisikoi inamuamekoiopua, kiisikoi ohjoamepua ahjameo.
\v 21 Ihji tiꞌtijoeria, kiisikoi toayapua ahpo koꞌyaoi. Kiisiki toayapua ahpo sipoyaoi, ahpo suwepori nokayaoi, ichikokaoi naapi simitiapua.
\c 10
\s Teꞌta Riosie uhjuratiame iyoteri piꞌrinatiame makoyame
\p
\v 1 Waikao neee Waania, aaata Riosie uhjuratiame tetewakania, puuua ki nuꞌuti tiiariemekapapua. Ihjia, tewekachi oꞌinia tekiyapua, toomarichi yooremina weritoka. Moꞌoraa, kenora naasipa weritoapua. Nanariraa, taaa tajayameka tiamekapua, tísia uutapatoapua. Toonoraapua, naꞌi tajayameka teetoapua.
\v 2 Sekachio ihjia, nuꞌuti iyosi piꞌrinatiame makotoamekapua. Ahjamina taararaopua, paꞌwechi ihteka weripakapua, owenamina taararaa, weeechi ihteka weripakapua.\fig |239-OK.Angel.8.22.9 copy 4.tif|col|||Tewekachi oꞌinia uhjuratiamea, paꞌwechi ihteka weeripua piiripi taaraeo, piire taaraeo weeechi.|10:2\fig*
\v 3 Waꞌa weripakao, ki kuꞌita sisinakapua, mawiyaka chaachaka. Iꞌka sisinasoopua, oowisanisa teꞌteoka nayewakapua.
\v 4 Oowisanisa teꞌteosoopua iꞌka teꞌteoni chiiao, oꞌinemo oꞌrai neeeapa iyotekao, nape tewekachi oꞌiniao noꞌo chaanechaniapua:
\p —Iꞌka oowisani teꞌteoni chanitiameo, kaꞌte iyote puꞌkao. Amochi inatarichiche neesetopuapua puꞌkao, puuua noriwi teeremerikopua pehjio.
\p
\v 5 Puuu ki nuꞌuti weruma tiiariemea, paꞌwechi ihteka weripakapua weeechi tiame. Waikao, teꞌpa apechunaka ahpo ahjamina seekao,
\v 6 Riosi tetewachi ahpo pichiwatakapua, yooma ahpo cheemiaopua. Ihji chanimiaa teꞌta pichiwakapua, Apoe ki wahjiame ahjamerachi eenamekapua; Apoe teꞌta teweka enepatekamerachi eenamekapua, apoe yooma tewekachi iintuame enepatekamechi; Apoe teꞌta wehjoari enepatekamepua, yooma ihta ahjachi iintuame tiame; Apoe teꞌta paꞌwe enepatekame, yooma paꞌwechi iintuame enepatekame tiame. Puuu aaata teꞌta weruma Riosie uhjuratiamea, eee cheeka sisinakapua:
\p —Pichiwa Apoe Riosi eꞌraria ikipuameo, kiisi kihta toiyamepua waꞌasi.
\v 7 Puꞌka oowisanichi simiyame Riosi kuꞌiwario, ahpo kusupuchari chaachatesoopua, asikame enemapua ikipuameo waꞌasio, Riosio, yooma ahpo nayewaturachi cheeriaopua ehkoriamio.
\p
\v 8 Waikao teꞌpa tewekachi noꞌo nayewachaniamea, eenechi noꞌo nayewechaniapua:
\p —Waaniii, waami enasa pahchu weruma tiiarieme weeriachi, paꞌwechi ihteka weeriamechi, weeechi tiame. Itanemitiapua puꞌkao, puꞌka nuꞌuti iyoteri piꞌrisarutiame makoka weeria.
\p
\v 9 Waikao, waꞌa eenaka itanekania puꞌka iyoteri piꞌrinatiame makoyao. Puuua puꞌka iyoteri piꞌrinatiame noꞌo kiꞌyaiopua, noꞌo chaanekapua:
\p —Íya, rupitupuapua iꞌkao. Koꞌkopuapua. Kakaremapua chuꞌwachio, seꞌorichitia kahkame, nape aamo topachio, tisiwa chipuremapua.
\p
\v 10 Waikao uusapania puꞌkao, rupitukania. Noꞌo chuwachio, kahkamekapua seꞌorichitia, nape noꞌo rupitusoopua topachio, chihpuamekapua.
\v 11 Waikaopu teꞌta weruma tiiarieme noꞌo chaanekapua:
\p —Muuua eenechi simitemerikaitepua nayewatukao, iꞌka Riosi chiiao, ki ookapi tiꞌtijoerichi ikipuame tuuyesiwa, seesenu tiꞌtijoerichi, seesenu naꞌnayewaniachi, seesenu yaꞌyawichichi tiame.
\c 11
\s Ooka pichiwatame tiꞌtijoe
\p
\v 1 Waikaopu teꞌta weruma tiiariemea paaka ahjae ihtetaniame noꞌo kiꞌyakapua. Waꞌa ikisaopua noꞌo chaanekapua:
\p —Werisika ihtetamitiamua Riosi tiopao. Ihtetamitiapua tiameo, waꞌa yooremina weeriame iyoriwachio, oꞌro netetiame tepaweoi. Waꞌa ikisaopua, ihtetapuapua tiame kehkinajuarepu waꞌa Riosi tioparachio, Riosichi paparameo.
\v 2 Nape maꞌchi tiopachi taꞌperachio, kaꞌte ihtetamitiapua waꞌao, waꞌao seesenu tiꞌtijoeri kiatiamekopua pehjio. Puuu seesenu tiꞌtijoeria, yooma nanaarame tekisomerichipua waꞌao, Riosi piipari muuwarichiopua mochiwari. Waꞌa teeremerikapua ahkasi ooka weerewa aampa ooka meechachisi.
\v 3 Neeea, ooka tiꞌtijoe ajawamania noꞌo chiia ikipuame tuuyemeri, sosotiame wakiraeme.\fig |240-OK._two witnesses.tif|col|||Ooka Riosi weeechi uhjuraria nokimichioo, tewekachisi apechunanipua, eenechi ahjatesapao.|11:3\fig* Puuua, piire miiri ooka siento, aampa paika weerewa taawe, nokimeripua. Puꞌka ooka noꞌo ajawamiaopua, utewari yahchesa yomatiame wehjoarichi uhjuramania, pukae utewarie puꞌkao, ahpo kuꞌisimichiopua.
\p
\v 4 Waikaopu teꞌta weruma tiiariemea, noꞌo simiteka tuuyekao, eee cheekapua:
\p —Ihji ooka noꞌoe uhjurapuamea, ooka tiꞌtijoekaitepua, Riosieo ooka ooriwo kuuuchitia tetewiniame, Riosi tawemina ajakame; puuu waꞌapi tiꞌtijoekaitepua ooka kaantera ahjachi ajawaniamechitia Riosie tetewiniame, Riosi tawemina ajakame, teꞌta yomatiame wehjoarichi Paamiratuame.
\v 5 Aaata naꞌara yoranaresoopua iꞌka ooka Riosi ajawaria pichiwatameo, naꞌie kosimapua ahpo chuꞌwachi machenamee. Aaata puꞌka naꞌara yoorakamea, choochotepuapua kosokao, mukimapua.
\v 6 Ihji ooka pichiwari tuꞌtuwaria, iinuepua ahpo kuꞌiwa utewario, yuꞌkioi ki ahpo yukitemiaopua, iiweta Riosi ahpo nayeoiopua; puꞌka ahpo utewarieopua tiameo, neeroioi puuua, eera ahpo enepatemia; puuua puꞌka ahpo utewarieopua tiameo, iinuepua ahpo iintomiao, ihtaoi itapiti teꞌta aiwaniame ahpo mehtanamiao, kehkisaoi ahpo eꞌrachisiopua.
\v 7 Iꞌkao kajusoopua, Riosichi simiyame nayewatukao, puuu maapori tiiame ahjakamea, ki wahjika wichiwachi oꞌinia mooenakaopua, nasiwasimapua puꞌka ooka ahjamao. Nape ihji ookaa, newitopuamepua. Puuu maapori tiiamea puꞌka ookao, koꞌimapua.
\v 8 Ihji weerewaraa wahjipakamea, oowera waꞌa maaniame tetewipuamepua, wehchi, waꞌa weruma mochiwarichiopua, pooerachi. Waꞌao, Eerusareni tewaniachi enemeripua, taamo Paamira Eesusio, kurusichi merinuratiachi. (Waꞌa Eerusareni ikipuachio, Sooroma teewataniachipua, Eejito teewataniachi tiame.)
\v 9 Waikao koꞌitiaapua, paika taawe aampa naasipasi, ahkaoi mochikame enapameripua neꞌnemiao, seesenu tiꞌtijoeri seesenu nayewame. Yooma waꞌa eꞌenakamea neꞌnemiao, oowera tetewimapua waꞌa poꞌyame. Puꞌkao, aawataai ki toipuamepua wetemajimichioopua.
\v 10 Waikao, iꞌka wehjoarichi mochikamea, kaawe erakomapua puꞌkao, meritiopa. Ahpo ihkokemapua pahkotakao, tisiwa peenia erakomapua, ki taꞌiria mochitetiamekapa.
\v 11 Paika taawe aampa naasipasi manisaopua waꞌao, puuua iwira kiatiapaopua Riosieo, ajasikapua oisikao. Iꞌkao waꞌa ikisoopua, tísia majakapu tiꞌtijoeria.
\p
\v 12 Waikao iꞌka oijenakameo, teꞌpa oꞌinia tewekachio, paaechaniapua puꞌkao. Puuua cheechaniapua:
\p —Moꞌmoena waꞌatikiáaa.
\p Waikao puuua, yooma ahpo seepurawa tetewachio, toomarichi moꞌmoenakapua tewekachio.
\v 13 Iꞌka moꞌmoenasocheopua, ki muenati noonokapu weeea. Pukae ahpo sasaweriae weeeo, muuwaeme kaari ruꞌrumikapua, ki ookapi koꞌyaka. Wahjipakamea, oowisani miirikapua. Waikao, ki wahjipakamea, ki nuꞌuti majariapua Riosio. Waꞌa ikisaopua, sewina erapakaopua kaawerumachi paparasikapua, Riosi tewekachi kahtiamerachi.
\p
\v 14 Waꞌa iikaopua, ookachi simiyame kokosari uꞌmatokapua, tisiwa aiwaniamea. Nape piirechi toiyapua pehjio, kiisi tehpe simiyachi ikimeri.
\s Oowisani kusupuchari chaachatetiame
\p
\v 15 Waikaopua, oowisanichi simiyame Riosi kuꞌiwari, kusutekapua ahpo kusupuchario. Waikao, teꞌpa tewekachi oꞌiniao, ki kuꞌita chaachapachaniapua:
\q Weeechi yeꞌkariwaaa,
\q1 taamo Noono Paamira iinuwara puuúaa,
\q taamo Paamira Riosie Weratiame iinuwara tiaméee.
\q Ki seena aampasi yawichitumeri puuúaa, ahkasi ki wahjiámesiii.
\p
\v 16 Puuu piire weerewa aampa naao paꞌpamuratuamea, Riosi yasirachi neꞌniachi mochikamea, chopokorieka ajapakaopua, wehchisi koomorasipaka. Puuua, chaachapakapua Riosi iyorikao:
\q
\v 17 Aamoo Paamira Riosiii,
\q1 aamoo tísia teꞌta utewariemeooo,
\q aamoo senepitia kahtiameooo,
\q aamoo senepitia yasakameooo.
\q Aamopua ehpeopua,
\q2 teꞌta utewari uukameooo,
\q Aamoopua ehpeo,
\q2 teꞌta yawichi yasipakame;
\q1 weruma yeꞌkaka yasimeriooo,
\q teꞌta weruma cheriwema kiꞌyame teemea aamoo,
\q muuukamera oꞌineriopa yawichitukao.
\q
\v 18 Yomatiame wehjoarichi tiꞌtijoeturia,
\q2 nekakokamepua amochío,
\q nape muuua asikamepamua,
\q1 aamo teꞌta kokosamiachiopua puꞌkaooo,
\q wahjipakameoiopua aamo katewemiachiopua.
\q Asikamepua tiameo,
\q1 aamo nuutewa kiamiachiopua,
\q aamoo yooreka mochiriameopua,
\q1 aamoopua, nayewatuka mochiriameopua tiameo,
\q ahpo iikachio piipatetiameopua,
\q puꞌka aamo iyorika tetewameopua.
\q Yooma katewemeri muuua,
\q2 peꞌyachi aaata weeweruma teerewaeme enemaaa,
\q2 peꞌyachi aaata ki weruma teꞌterewaeme enemaaa.
\q Asikamemua taawechio, aamoopua pihtunamiachiopua,
\q2 iꞌka weeechi naꞌatameopua.
\p
\v 19 Waikao tewekachio, Riosi tiopachio tetewakania wahjokame. Waꞌa yooreminao poꞌyamekapua kaaja, Riosi Riosiwari yasitoriachio, pukachi yooreminaopua tiameo, waꞌa maaniamekapua Riosi iꞌisaeri tiꞌtijoeri ahjama kateweriaa. Waikao tahpitika iintokapua kuhjipakao, ki kuꞌita teꞌteokaopua tewekachio. Turuwaka itipiapua, kuꞌitapio. Weeeai, ki nuꞌuti ahpo sasawekapua. Tehjeai, ki nuꞌunti yukukapua.
\c 12
\s Oowitiame taaa sipichaeme; itapiti ahjakame tísia iinya tiiame tiame
\p
\v 1 Ehjepao tewekachio, itapiti uurapari tetewakania. Puuu uuraparia oowitiamekapua. Ihji oowitiamea, taaa wakiraemekapua sipicha tiame. Taararaa, meechachi ihtiamekapua. Ihji oowitiamea moochio, yawichi moꞌkorira moꞌkoriemekapua. Puꞌka yawichi moꞌkorichiopua, oosa mariki aampa ooka soꞌpori\f + \fr 12.1 \ft Ihji oosa mariki aampa ooka soꞌporia, iꞌisaeri tetejimarikoipua, oosa mariki aampa ooka.\f* nachutetiamekapua.
\v 2 Ihji oowitiamea peteterepakamekapua amori sauyame. Ihji oowitiamea kokorepakapua, saumiapa waꞌasi.
\v 3 Waꞌa oꞌiniao, piirechi uurapari machenakapua teꞌpa tewekachio. Puuua, raakoni iinyatikapua, sehtaname, puuua oowisani moꞌoemekapua. Ihji moꞌorachi pipiripichio, yawichi moꞌkori moꞌkoriemekapua. Aawaraa, oosa marikikapua.
\v 4 Ihjia ahpo wahsieo tewekachio, kiiya naasipasi karuwakapua soꞌporio\f + \fr 12.4 \ft Puuu ki ookapi soꞌpori wahsie ihpapatiamea weeechio, raakoni waꞌapi kuꞌkuiwarakoipua puuua.\f*. Puꞌkao waikaopua, weeechi ihpapakapua. Waikao waꞌa iintosaopua, puuu raakonia, weeechi tekikao oowitiame kahtiachi chukipakapua; puꞌka oowitiame sausoopua taanarao, koꞌkonariame enemerikapua.\fig |245-OK.Rev.17.wo.beast.5.6.10 cop copy.tif|col|||Raakoni oowitiame naanariame, oowitiame sausoopua koꞌkonariame.|12:4\fig*
\v 5 Ihji oowitiamea ehjepamio saukapua, piiripi temari. Ihji temaria, yawichitumerikapua, yomatiame weeechi tiꞌtijoeturichiopua, tísia utewaerieme nuurarieme enemerikapua, sisioki wepijuarae. Nape ihji taanaraa, apechunatiapua Riosieo, ahpo yeꞌkaka kahtiachi yasirachi iꞌtokapua.
\v 6 Waikao oowitiamea mehka newipakapua, Riosi kateweriachi newipamichioo, Riosi neesetowatere ahpo yasitomiachi. Waꞌao ooruchi kahtioio, piire miiri ooka siento, aampa paika weerewa taawechi, Riosie koꞌkotetiapua waꞌao.
\p
\v 7 Waikao eenechi puꞌka oowitiame taanara apechunatiame nayewaniachio, waikao tewekachio, weruma nasiwaniame simikapua waꞌao. Mihkea, teꞌta Riosi kuꞌiwaria waꞌa tewekachio, ahpo kuꞌiwari ahjamaopua, raakonichi nasiwasikapua ahpo kuꞌiwari ahjama.
\v 8 Nape ihji raakonia newitotiapua Mihkeeo. Waikao puuu raakonia newitotiaapa waꞌasiopua, kaꞌchi iika tewekachi yasimerikapua waꞌasio.
\v 9 Waꞌa iika tewekachio raakonia, ipatiame itipikapua Riosieo, yooma ahpo kuꞌiwari ahjamaopua. Puuu raakonia, ehkoriami Siinoikapua, Satanasi tewaniame, riaorósi teewaeme tiame. Ihjia, puuukaitepua, yomatiame weeechi mochikame wisikuiamea.
\p
\v 10 Puuu raakonia weeechi ipatiamekapua yooma ahpo kuꞌiwari ahjamapua, Eesusio weeechi oꞌinia tewekachi eenariopapua, yooma natetewaopua tatakori tiiameo. Waikao tewekachi oꞌinia inamukane chiiameo:
\p —Natetetiame itipikame yooma tatakoritiameapa, asikame iꞌwaopa Riosi newipariaapa, yooma aaata Riosichi paparakamewichioo. Riosie Weratiamea, yawichitumia yasipakame puuuapa iꞌwa tewekachio, weeechi ipatiamekopua Satanasio, tísia wenejika yasitoriameopua Riosichio, yooma taawechiopua tukawariopua tiameo, yooma weeechi mochikame Riosichi paparameopua, poponiwaopua pipiniwaopua tiame.
\v 11 Taamo Riosichi poponiwaa pipiniwaa tiame, puꞌka iinyati ahjakameo, Riosi Poꞌwa teewataniamee newitoriopapua puꞌkao, ahpoo nehpupaka pejana mukuriamekopua puꞌkao. Waꞌa iintokamekopapua puꞌkao, ahpo tatakoriria choꞌwekaopua. Puuua, tísia paparamekapapua Poꞌwataniame Tijoechio, ki seꞌwika mochitorepua, teꞌta aiwaka mochitoaiopua, ahkasi mukiwachisioi anachasika.
\v 12 Pukaepa eeme Poꞌwataniame Tijoe newipatetiamea, kaawe erakomitiapua, tewekachi mochikamekapa waꞌasi puꞌka ahjama. Nape áiii eemea, weeechi mochikamea pehjio, paꞌwechi ohjoameopua tiame tekipanakao. Waꞌa akipa riaorósia weeechi ki teesa nekakame, naneꞌriapa puuua, waapi toiyopua ahpo teꞌta newitopuachiopua waꞌasio.
\p
\v 13 Waikao tewekachio, puuu raakonia, weeechi enasaapua noꞌo tetewitewachio, puꞌka naawakame yeeyerao, teꞌta yorasikapua puꞌkao merinareka.
\v 14 Nape waikao, puuu oowitiamea, ooka waꞌwe aana kiatiapua, mehka ki tiꞌtijoeekachi akipamichiopua, puꞌka siinoi nekarewao ki ahsepame tiiachi. Waꞌa akipasaapa pohjachuka anasawekao, waꞌao paika paaumpari aampa naasipasi yasariapua waꞌao, Riosi inatewachi koaka.
\v 15 Waikao puuu iinyati siinoia, neeroie puupuchekapua ahpo chuwachi machename, aaki eenepakao, ruꞌrupumichiopua puꞌka oowitiameo.
\v 16 Nape weꞌea, kuꞌipakapua oowitiameo. Puuua, chuꞌwachitia wahjokaopua, yooma nerojikapua puꞌka iinyati siinoi pupucheriaopua neeroi.
\v 17 Waikao raakonia, káátisia nekakapua oowitiamechio. Waꞌa iikapa puuua, simikapua waikao oowitiame tetejimarachi nasiwamiaopua, koꞌimiaopua puꞌkao. Ihji tetejimaraa, Riosi yooreka mochitoamerakapua, Eesusi pichiwari tuuyewari, ki seꞌwika iyorika mochitokame.
\c 13
\s Ooka iinyati ahjakame
\p
\v 1 Ehjepamio, paꞌwe suuwerachi weripakainia setechi. Paꞌwechio waikao, kai nuꞌuti iinyati pawesinoi, werisiame tetewakania. Puuua oowisani moꞌoemekapua, aawaraa oosa marikikapua. Yooma pipiripi awachiopua, yawichi moꞌkori yahchamekapua. Yooma pipiripi moochioipua, itapiti teewara toꞌwetiamekapua, Riosi naꞌarewa.
\v 2 Ihji iinyati paꞌwechi machenakamea, oori korowameka tiiamekapua. Taararaa, ooji taararaka tiiamekapua. Chuꞌwaraa, mawiya chuꞌwaraka tiiamekapua. Waikaopu raakonia, ki nuꞌuti utewari tiiaemea, iꞌka pawesinoi iinyati, weruma utewari kiꞌyakapua puꞌkao, ahpo ihsika yasitoachitia teetomichiopua.
\v 3 Piiripi puuu iinyati pawesinoi moꞌoraa, mukukai ahjakamekapua. Naania tiiamekapua moochio, meritiai saukachio. Waꞌa iikamekopua puꞌkao, yooma tiꞌtijoeria, ki nuꞌuti ikiriame erakoewa eꞌriamekapua puꞌkao.
\v 4 Waikao raakonio yooma tiꞌtijoea oowerua tiame, weruma paparawekapua puꞌkao, raakonio, ki nuꞌuti utewari kiꞌyariopua iinyati pawesinoio. Waꞌa ikitiopua iinyati pawesinoio, tiꞌtijoeria chaachapakapua, oisa eꞌrekao:
\p —¿Iintunare aaata iꞌkachitiao? ¿Aatana newitonaretapua aaata iꞌkaka tiiameo?
\p
\v 5 Puuu iinyati pawesinoia, ooka weerewa aampa ooka meecha reesisetiapua, naꞌareka oimichiopua Riosio, ahpokamera weruma tiiameko tuuka.
\v 6 Waꞌa iintokapua waikao. Riosio tísia naꞌarekapua iꞌka kaariraopua tewekachio, yooma ahjama mochikameopua tiame.
\v 7 Iꞌka weeechio puuu iinyati pawesinoia, nasiwari mehtanamichio reesisetiapua, Riosi piipateria tiꞌtijoechi nasiwamichiopua, yooma puꞌkao newitomichiopua. Ihjia kiatiapua tiameo, yomatiame tiꞌtijoeri ahpowichio iintamichiopua, yooma ahpo utewarieo, yoomachi weeechi tiꞌtijoeturiopua, yooma ihta tiꞌtijoeturiopua, yooma ihta nayewa yeeniemeopua.
\v 8 Yooma ki Poꞌwa teewataniame iyotaperirachi iyotetiame teewaraa naayachisi oꞌiniao, puꞌka pawesinoichi paparakapua. Puuu Poꞌwa teewataniame iyotaperirachi maaniame teewaraa, keꞌchu weꞌe yasipoi Riosia, waꞌa toꞌwakamepua teewarao, ahpo Taana Poꞌwa teewataniamechi, paparamerikopua, puꞌka Poꞌwa teewataniameo, yomatiame wehjoarichi mochikamewichioo, meritioopua.
\p
\v 9 Iꞌka noꞌo cheemiao nahkaemea, pahtemitiapua puꞌkao.
\v 10 Puꞌka taawechiamio, Riosie karichi yachapuame tetewitiamea, karichi yachapuamepua. Riosie koꞌipuame tetewiriaa, koꞌipuamepua. Waꞌa teeremirikopaopua puꞌka kajuyachi taawechiamiopua, eeme Riosichi teꞌta paparamea, kaawe aamo neesetomitiapua ki kaawe nokiwao, puꞌka taawechiami tísia aiwapuachio, ki aamo wekatemichiopua teꞌta Riosichi aamo paparao.
\p
\v 11 Waꞌa tiiame tetewisaapania, piirechi iinyati ahjari tetewikania. Puuua, wehtere oꞌinia werisiapua. Puuua ooka aawaemekapua poꞌwachitia, nape raakonichitia nayewamekapua.
\v 12 Ihji puuu wehtejuri iinyatia, waꞌachitia ahpo nuuramia utewari iinuemekapua, iinyati pawesinoi kiatiamechitia. Ihji iinyati wehtejuria, puꞌka iinyati pawesinoi moochi saukamerachi, paparatekapua, yooma weeechi tiꞌtijoerio.
\v 13 Ihjia waikao, yooma tetewimichiopua ahpoo, waꞌachi ihsiamekopua ahpoo, naꞌi ruhjitekapua tewekachitepaopua, puꞌka pawesinoi poꞌyachiopua. Ihjia yooma ihta peenia ihsiwa ihsiamekapua tiame.
\v 14 Ihjia, pukae ahpo peenia ihsiwaeopua, yooma tijoeri wisikuekaopua, pawesinoikamera paparatekapua, puꞌka pawesinoi itapitichi netesa, siinoika tiiame.
\v 15 Ihji wehtejuria, nayewatekapua ahjateka, puꞌka pawesinoi itapitie netetiameopua, puꞌka utewari, pawesinoie ahpo kiaretiaeopua. Ihji wehtejuria, koꞌimichio reesisetiamekapua tiame, ki yooriameopua, puꞌka itapitie netetiameopua pawesinoio, chopokorieka ajapekaopua.
\v 16 Ihjia tiameo, yooma ihta tiꞌtijoe ooweruopua tiame weeechi mochikameo, puꞌka pawesinoi maꞌchitame yahchenurakapua koatao, sekachiopua tiame. Waꞌa tiiame yahchenurakapua ahkasi yomatiame wehjoarichi mochikameopua, yooma ihta yaꞌyawichiopua ki yaꞌyawichioi, totomiwaemeopua ki totomiwaemeoipua tiame, puhkuchitia mochikameopua ki puhkuchitia mochikameopua tiame, oowera tekipanameoipua tiame.
\v 17 Ki koata yachatoameopua sekachioi, puꞌka pawesinoi teewaraopua, puꞌka teewara chiiameoiopua ihtetari, kaꞌchi iika tarimerikapua ahkaoi, kaꞌchi iika nehjimerikapua ihtaoi.
\v 18 Ihji ihtetaria, weeechi ohjoeme ahjae ihtetaniamekapua; ihji ihtetaria, puhsani siento paika weerewa aampa puhsanipua. Nape puꞌka ihtetari pahtenariamea, teꞌta inatari nakiyame puuua, naneꞌrenaria ihtana chiiamekoopua puꞌkao.
\c 14
\s Piie siento ooka weerewa naao miiri, wikatari
\p
\v 1 Puꞌkachi neipao neeea, Apoe Poꞌwa teewataniame tetewakania, Siioni roomosachi weeriame. Puuua, piie siento ooka weerewa aampa naao miiri, ahjama weeriapua, tiꞌtijoe ooweru tiamé. Yooma puꞌka ahjama ajakamea, puꞌka Poꞌwa teewataniame teewara, koata iyotetiamekapua, puꞌka Poꞌwataniame Noonora teewaraopua tiame.
\v 2 Waikao, teꞌpa tewekachi eename inamukania, kai kuꞌita aꞌrapachitia cheetechaniame, tahpitika cheechaniapua, ki ookapika nokichaniame, kai kuꞌita wawasora chiiame, neeroi kai kuꞌita wichiyamechitia. Kai kuꞌita teꞌonichitia chiiapua.
\v 3 Puuu weeka ahjama ajakamea, weemera wiika wikatapua. Riosi yasirachi wiikiapua puꞌka itapiti naao ahjakame ajakachi, puꞌka piire weerewa naao paꞌpamiratuameopua, naasipa. Puꞌka wiikao, aaataai ki pepenipame tiiapua, naaticheape, piie siento ooka weerewa naao miiriche. Puuua, ahpo tatakoriwa natetetiame iikamekapua, weeechio oꞌinia eꞌenakame.
\v 4 Puuua ahsieme iyorikamekapua Riosio, yooma ki kaaweruma ihtaopua, piipatetiame, Riosieo. Ihji tiꞌtijoea, Riosichewichio mochiriamekapua, kiisioi nenewikame. Puuua, ahkaoi simiyoipua, puꞌka Apoe Poꞌwataniame Tijoeo, naꞌnaritoamepua. Ihjipua tiameo, Riosiwichioopua, Apoe Poꞌwataniame Tijoewichiopua tiameo, pahcha simiyame taakerichitia, iꞌipatiamea.
\v 5 Ahpo chuꞌwachioipua, kihta chaachakamepua, ihta itapiti wihtukiopua, kihta aꞌchi tiiamekapua apochio.
\s Paika Riosi kuꞌiwari tuꞌtuiwisari
\p
\v 6 Eenechio neee Waania, piirechi Riosi kuꞌiwari tetewakania. Puuua teꞌpa poojachuka simiyapua eekáchi, itapiti cheesiapua ki wahjiamesi teetopuame, yooma tiꞌtijoeriwichioapua, ihta tiꞌtijoeturiwichiooi, ihta naeraemeoipuawichioo.
\v 7 Puuua ki kuꞌita sisinewasikaopua, cheesiapua:
\p —¡Tewekachi kahtiame teꞌta Noonorao, seeweka tetewimitiapua puꞌkao, asikamekopua puꞌka apoe teꞌtao, tiꞌtijoeri teꞌta katewemerio! Pukaepa eemea puꞌkao, teꞌta iyorika mochitopuapua, puꞌkao Apoe iintokamekopua teweka enepatekao, weeeoio, paꞌweopua tiamé, waꞌa ikisa yooma ihta paꞌpaichiopua tiamé.
\p
\v 8 Puꞌka waꞌapichio tiame, piirechi Riosi kuꞌiwari machenakapua, ookachi simiyamekapua. Puuua cheesiapua:
\p —¡Wichiparupa! ¡Wichiparupaaa, teꞌta weruma tiiame Wawironiaapa, yomatiame wehjoarichio, yomatiame tiꞌtijoeturi teekupatekamea, ahpo tísia ki kaaweruma suweporichi ikotutekamea.
\p
\v 9 Waikao piirechi Riosi kuꞌiwari machejenakapua, puuua paikachi simiyamekapua. Puuua noꞌo tetewachi weripaka sisinakapua, eee cheeka:
\p —Aaata piire ahkao, puꞌka wehtejurichi paparakamea, ahpo koataoi ahjamina sekachioi ahpo toisoopua puꞌka wehtejuri machitewarao ahpo yahchepuawichioopua,
\v 10 teꞌta saaemerichepua Riosi kokosario, kiisi anachame tiiameopua. Puuu ki teesa aiwaria, naꞌie kosoka saaetepuamepua, aasujeree tisiwa tahtamee tiame. Waꞌa yorapuame ihjia Riosi kuꞌiwari neꞌniachi, Apoe Poꞌwa teewataniame tetewachiopua tiame.
\v 11 Ihji aiwaka moroyaopua tajakao, ki wahjika moromapua apechuka, ahkasi ki seena aampasi. Kiisi resipuniachipua waꞌao, yooma taawechioipua, yooma tukaooiopua tiame, yooma puꞌka wehtejurichi paparakamewichiopua, wehtejurika tiame netetiameopua tiame paparakamewichioo, puꞌka teewara machitewara uukamewichioopua tiame.
\v 12 Waꞌa ikipuaoopua, anachari nakiwamepua Riosi ijinuwaraa, Riosi nuurari apochi neesetoameopua, Eesusichi paparamea.
\p
\v 13 Waikao tewekachio, chiiame inamukania:
\p —Iyoteo iꞌka: “Ehpe oꞌinia Paamirachi wahjipakamea, ki teesa kaawe ikitepuamepua. Tisiwa kaawe siimeria, pichiwa puuua.” Ejeꞌe, waꞌatepua, waꞌa noꞌo chaanena Riosiwaria, resipumeri puuua, kaawe noonoikapa tekipanaka weeechio Apoe teꞌta Paamirawichioo.
\s Weeechi iꞌipaniame
\p
\v 14 Waikao neee Waania, toomari tohsaname tetewakania, puꞌka toomarichio, tijoeka tiiame kahtiapua waꞌao. Moochiopua, yawichi moꞌkorira moꞌkoriekapua oꞌroe netetiame, sekachio puuua, ohsa makoyamekapua, tísia yoorame.\fig |242-OK. .Jesus.cloud.sickle.11 copy.tif|col|||Aaata tijoe tijoetukameka tiiamea, toomarichi weeri puuuapa, ohsa makoka.|14:14\fig*
\v 15 Tewekachi tiopachio, piirechi Riosi kuꞌiwari machenakapua. Puuua weeru sisinakaopua, chaaniapua puꞌka toomarichi kahtiameopua:
\p —Oꞌinesa muuuapa, tehpuchaka puꞌka weeechi taakekameopua, ahsepare puuuapa iꞌipapuachio. Iwapare puuuapa waꞌasi —waꞌasa chiiapua.
\p
\v 16 Waikao, puuu toomarichi kahtiamea, oꞌinekapua karuwaka tehpunakapua weeechio, waꞌa oꞌiniao. Waikao weeechio, iꞌipatiame itipikapua.
\p
\v 17 Puꞌka waꞌa ikisoopua, teꞌpa tewekachi tiopaopua, piirechi Riosi kuꞌiwari machenakapua waꞌao, puuua ohsachi makotoamekapua sekachio, ki teesa yoorame.
\v 18 Iꞌka machenasoopua, waꞌapi tewekachi tiopachiopua, waꞌa tepatetiachio, piirechi Riosi kuꞌiwari machenakapua. Puuua, puꞌka tísia yoorame ohsa makotoameopua, utewaeme sisinamukao chaanekapua:
\p —¡Yaapiti oꞌinesa tehpunaka puꞌka panijuwari yoꞌpiameóopua! ¡Iwakame puuuapáaa, iꞌipapuawichioopuáaa!
\p
\v 19 Waikao puuu Riosi kuꞌiwari ohsa makoyamea, weeechi uꞌmatotekaopua puꞌka ohsao, yooma tehpunakapua puꞌka panijuwari yoꞌpiameo, iꞌipaka. Waꞌa ikisaopua, Riosi iinuwara tekesowachi ihpoporowachi ihpapakapua puꞌka yoꞌpio. Puuu tekesoni ihpoporowaa, Riosi nekarewakapua.
\v 20 Ihji tekesoni ihpoporowaa, maꞌchi weeriamekapua muuwari mochiwachio, waꞌa sahtuchaniachiapua panijuwa iwapakamea. Waikao puꞌka panijuwa sahtuchaniachiopua, eera machenakapua waꞌao, nape kai kuꞌwitakapua, ahkasi kaawaio yakachisi manitoame, ahkasi norikameo, puhsani taawe pooesiniamekapua, weeresi. Puuu eeraa tijoe eerarakapua.
\c 15
\s Riosi kuꞌiwari kajuyachi waꞌasio; oowisani teꞌta aiwari tuuyeriwa
\p
\v 1 Waikao puꞌka tetewisaania, itapiti tetewakania tewekachio, itapiti ikipuame uurapame. Puuua weruma itapitikapua, tahpitika tiiame. Pukachi teteiwachio, oowisani Riosi kuꞌiwari ajakapua, puuua kajuyachi oowisani aiwapuame iinuemekapua. Riosia pukae oowisani tísia aiwarieo, kajumerikapua waꞌasi ahpo tísia nekarewao.
\p
\v 2 Waikao waꞌao, naati tiame tetewakania, paꞌwe poꞌyapua kaawiraka tiiame, iꞌka aampao, naꞌichitia tajayapua. Iꞌka paꞌwe ikichaminao, yooma ihji wehtejuri newitokamea, waꞌa ajakapua. Yooma puuu ajakamea, ki wehtejurika tiame netetiamechi paparakamekapua, yooma puuua tiameo, ki apochi toakamekapua yahchepuawichio wehtejuri machitewarao. Yooma ihjia waꞌa paꞌwesuwe ajakapua ahpo aꞌrapama, Riosie ahpo kiatiamee.\fig |243-OK.THISONE.harpers.7.19.10.tif|col|||Iꞌwa ajakamea, Riosi kaawe eꞌrewa wikatanipua, ahpo aꞌrapawa cheeteka.|15:2\fig*
\v 3 Ihjia, Moise wiikara wikatapua, Riosi ihsiweka yasakame. Naati wiikiapua tiameo, Apoe Poꞌwataniame paparawa. Puuua wiikekao chaachapapua:
\q ¡Muuu teꞌta weruma tiiarieme Riosia, ki nuꞌuti peenia tiiame iintokamemua taamowichioo!
\q ¡Muuua, taamo teꞌta Paamira Riosia,
\q2 yooma ihta itachi aampa simiyame utewariememua!
\q ¡Aamo tiꞌtijoerichio teꞌta kaawerumara ahjachi teerewaememua,
\q teꞌta pichiwarichi tiameraopua!
\q
\v 4 Aamo Apoe Paamirao, ¿aatana ki aamo seewetarepua?
\q ¿Aatana amochio, ki kaaweruma aamo nayewanaretapua, amochi paparakaopua?
\q Kiꞌtepua waꞌasio, epeche iyoriniameopua ki amochitiao.
\q Yomatiame tiꞌtijoeturi wehjoarichio, amochi paparamia eꞌenameripua,
\q puꞌka aamo iintoriao, tísia kaaweruma iintoria tetewikapao.
\p
\v 5 Neipa iꞌkao tewekachio, teꞌta Riosi iyoriwachi tiopachio wahjoame weeriame tetewakania, waꞌa yooreminao, waꞌa ajakapua tehte rarapenamea, ahjachi iyotetiamea, oosa mariki Riosi nuuraria.
\v 6 Waꞌa iyoriwachi oꞌiniao, oowisani Riosi kuꞌiwari puuyakapua. Ihjia oowisani aiwari iꞌtoamekapua, kiisi nohpieme riino wisasori wakiraeme tísia tatapara ihsiame, ihta itapiti ki kaawerumaopua; muripami norikameo, oꞌro apoche teekeraemeapua, wahsipurachitia.
\v 7 Puuu piiripi naao ahjari noꞌo tetewariaa, puꞌka Riosi kuꞌiwari oowisaniopua, oowisani oropetori kiꞌyakapua puꞌkao, yooma pipiripi. Ihji oropetoria, apoche Riosi nekarewae, popochiamekapua puuua, Apoe ki wahjika ahjamera Riosi.
\v 8 Waikao waꞌao, Riosi iyoriwa tiopachio, moorewa pochikapua waꞌao, puuua moorewaa Riosi utewarikapua, teꞌta Riosi tiiarichi eename. Waikao waꞌao, aawataai ki pakimerikapua waꞌao, ahkasi ki kajuyachisiopua, puꞌka oowisani Riosi kuꞌiwario, itapiti teꞌta aiwari ihpapakao.
\c 16
\s Iijipaso Riosi kokosari ijinueme
\p
\v 1 Waikao neee Waania, waꞌa Riosi tiopara teꞌta iyoriwachio, cheechaniame inamukania, puꞌka oowisani Riosi kuꞌiwario:
\p —Ehpeo weeechi siimpamitia eemea. Waꞌa siimpaka wiꞌsunamitiapua, puꞌka aamo oowisani oropetorichi iinuekao, Riosi teꞌta kokosari aiwariopua.\fig |244-OK.angels.bowls.5.27.9.BB.tif|col|||Piiripi oowisani Riosi kuꞌiwari weeechi wiꞌsunemeria, weeechi wiꞌsunenapua Riosi kokosario.|16:1\fig*
\p
\v 2 Waikao puuua puꞌka pahcha simiyame Riosi kuꞌiwario, weeechi wiꞌsunesoopua puꞌka Riosi teꞌta kokosari aiwario, yomatiame tiꞌtijoea oowerua tiame, tisiwa naꞌarari ikiwa ehcha puuyatekapua, tisiwa iinya teꞌtiame. Yooma puuu ehchapakamea, wehtejuri teewara yahchetiamekapua ahpo koatao, wehtejurika tiiamechi netetiame paparakamera.
\p
\v 3 Ookachi simiyame Riosi kuꞌiwario, paꞌwechi wiꞌsunesoopua, ahpo oropetori toatoao Riosi kokosari teꞌta aiwariopua, waikao paꞌwechi neeroia, eeraeme enepakapua, tijoe meritiamechitia eerarae. Iꞌka waꞌa ikisoopua, yooma paꞌwechi ahjamea, wahjipakapua.
\p
\v 4 Waikao paikachi simiyame Riosi kuꞌiwario puꞌka Riosi kokosari teꞌta aiwari, akichiami wiꞌsunesoopua ahpo iꞌtoao, yooma paichiamiopua tiameo, yooma eeraeme enepakapua.
\v 5 Waikao puuu Riosi kuꞌiwari neerochi wiꞌsunekamea, chaanechaniapua Riosio:
\p —Aa Muuua Riosia, Teꞌta Kaawerumachekameraa, tísia kaawe iintokamemua puꞌka nanaarame tísia kokosakao,
\v 6 waꞌa yoraniame nakiyamekaipua, puꞌka aamo naꞌnayewatura piipateriaopua tiameo, eerara wiꞌsuteriopa koꞌyakao. Pukaepa muuuai, waꞌachitia tísia aiwari saaetekamemua puꞌkaoi, koꞌyakao.
\p
\v 7 Waikao Riosi iyoriwa tepawetiachi oꞌiniao, inamukania cheechaniameo:
\p —Aa muuua, Apoe teꞌta yooma Paamiraa, ki teesa kaawe iintokame muuua, Aamo iintoriao tísia pichiwarikopaaa, kiisi seꞌwi kaaweruamachiche teetokaopuaaa.
\p
\v 8 Naaochi simiyame Riosi kuꞌiwario, Riosi kokosari teꞌta aiwari ahpo oropetorichi iꞌtoao taaachi wiꞌsunesoopua, waikaoo, weeechi mochikame tiꞌtijoeria, taaa tahtarae tajakapua.
\v 9 Nape ki teesa tajaka aiwakai puuua, kiisi sewina erapakapua ahpo ki kaawe nokayao. Ihjia, Riosikamera seewemetioipua iyorikao, ohsotiakamera nekawekapua Riosio.
\p
\v 10 Marikisachi simiyame Riosi kuꞌiwario, Riosi kokosari teꞌta aiwari ahpo iꞌtoao, wehtejuri yeꞌkari yasirachi wiꞌsunesoopua, waikao wehtejuri yawichituachio, tukapachi enepakapua waꞌao. Waikao puuu wehtejuri weeechi paparakamea, kiisi anachame erakoapua Riosie tísia aiwariopua, ahkasioi ahpo yeenioi kiꞌpuchapua, káátisia kokosari aiwapapua.
\v 11 Nape tisiwa aiwakaipua ehchapakao, kiisi toinarekapua ahpo naꞌara nokayao ohsotia waꞌa yoratiapa Riosieo, Riosikamera tísia naꞌarekapua tewekachi kahtiameo, tísia iinya chaachapakaopua Riosio.
\p
\v 12 Puhsanisachi simiyame Riosi kuꞌiwario Riosi kokosari teꞌta aiwario, Eurate akichi wiꞌsunesoopua puꞌka ahpo oropetorichi iꞌtoao, aakia wakipakapua, puꞌka cherayachi ohjoeme yaꞌyawichiwichioo, katewetiame itipikapua, ahka ahpo siimpachi nasiwamia paateka uumatomichiopua.
\p
\v 13 Waikao tetewakania raakoni chuꞌwachio, iinyati pawesinoi chuꞌwachiopua tiameo, ki pichiwari Riosi nayewaturachi chuꞌwachiopua tiameo, teemo puuyakapua pukachi pipiripichio. Puuu ki pichiwari Riosi nayewaturaa, waꞌapi iinyati wehtejurikai tiiapua.
\v 14 Ihji paika teemo nanaarari reemoniwaria, ahpo utewarie kiꞌyaka puꞌka iinyati pawesinoio, puꞌka iinyati wehtejuriopua tiame, itapiti ki maaepori peeniatiame nokisimichiopua. Puuu pawesinoia wehtejuria tiame, puuu ookaa, yomachi puuyakapua weeechio, yooma yaꞌyawichiami paajutemiaopua, puꞌka yaꞌyawichio pirenatumichiopua, yooma pirena nasiwapuawichiopua Riosi teꞌta puipanariapa nasiwarichioo, Apoe Poꞌwa teewataniame Riosieo, puꞌkao ki yawichi yasipamichiopua iꞌka weeechi enasaapa.
\v 15 Waikao neee Waania, Poꞌwa teewataniameo chiiame tetewakania taamoo: “¡Nee, neeea senawato enameripua, ichikoamechitia! Eeme noꞌo Noonoe piipakatetiamea, pusakame mochipuapua. Ki seꞌwika mochitosaapua noochi aamo paparao, tísia kaawe erakoma eemea, waꞌa noꞌo enasoopa, kihta suuwe erapakapaopua aamo ki kaawe teꞌtereriaopua noochio.”
\p
\v 16 Waikao tetewakania, weeechio yooma yaꞌyawichia, Amakeróni tewaniachi napawiriapua, yooma ahpo soontaroma. Amakeróni tewaniachikapua waꞌao, eureo naewaniachio.
\p
\v 17 Oowisanisachi simiyame Riosi kuꞌiwario, Riosi kokosari teꞌta aiwario, teꞌpa eekachi wiꞌsunesoopua ahpo oropetorichi iꞌtoao, tewekachi tiopachi oꞌiniao, nayewachaniame inamukania. Puuua cheechaniapua:
\p —¡Riosi nekarewaa, oꞌinepuameche toiyame puuuapa!
\p
\v 18 Waikao, tahpitika iintoka kuhjipakao, ki nuꞌuti tatakao, tahpitika chaachakapa teꞌteokao. Weꞌeai, tahpitika iintokapua ahpo sasawekao, ahkasi ki tetewiniachitiaopua, tiꞌtijoeri ohjoekoiopua weeechio.
\v 19 Waikao, puuu teꞌta ki kaaweruma mochiwaria, paikana taꞌpakapua. Waikaopua tiameo, yomachi muuwari mochiwari kaꞌkariwaraa, wehchi eꞌenakapua ruꞌmika. Waꞌasa iintoka Riosia. Riosia yooma weeechi mochikame ki kaꞌkaruma Wawironiao, kiisi kaawe nokaya inatepakaopua, ahpo tahpitika ihsiwa nekarewa saaetekapua.
\v 20 Yooma pawenasipa weꞌe, ki naania iikapua paꞌwetere noripakaopua; kaawiai, ki naania ijikikapua ruꞌmikao.
\v 21 Waikao tewekachi oꞌiniao, ki ookapi kai nuꞌnunti tehje ruhjikapua, tiꞌtijoerikachiopua. Ihji ki nuꞌnunti tehjea, ooka weerewa uꞌmatoame kiiro pehtiamekapua. Ihji tehje ruhjikamea, tisiwa eeyowa iintokapua tiꞌtijoerichio, waꞌa iintotiapa tiꞌtijoea ooweru tiamea, tisiwa naꞌaraka chaachapakapua Riosio.
\c 17
\s Teꞌta suwepori ihsiame oowitiame kokosari aiwatepuame Riosie
\p
\v 1 Piiripi puuu oowisani Riosi kuꞌiwaria, oowisani oꞌro pehtori iinueriamea sekachio, noochi eenakapua chaaneka:
\p —Nahpeomua. Aamo neꞌnetemaneopua, aaata oowitiame teꞌta suwepori ihsiameopua, ihjia ahpo kuunachi poanatukao, piirechi ahjama akipamechitia. Puuua naatika iintokame puuua, yooma aaata Riosichi papararaio poanatukame, Satanasichikamera eenepaka. Aaataai ki iyorika mochikameapua Riosichio, suwepori noonoikamepua Riosichio, puꞌka oowitiame suwepori iintokamekatepua, Riosi toakao Satanasikamerachi eꞌenepakao. Aamo tuuyemania Riosi kokosario, achini yoojoramiopua, yooma puꞌka oowitiamechitia nokaka mochitoamekoo.
\v 2 Puꞌka oowitiame ahjamao, yomatiame weeechi mochikame yaꞌyawichia, tísia suwepori noonowiriamekatepua. Yooma aaata tiꞌtijoe ooweru tiamea, ki ookapi iꞌka weeechi iintuame itapiti ikotuka ohjoemea, yooma yaꞌyawichi puꞌka oowitiame ahjama suwepori noonowiriae, tetekupatetiameka ijikitiamepua.
\p
\v 3 Waikao puuu Riosi kuꞌiwaria, poanachi noꞌo iꞌtokapua, ki tijoeekachi. Waꞌao, oowitiame noꞌo tetewitekapua, weruma itapiti iinyati ahjakamechi kahtiame, teꞌta tajayame sehtanamechi. Ihji itapiti iinyatia, pochikame toꞌwamekapua teewao, Riosiwichio tísia nekame tiiame. Ihji oowitiame yasitoachio, oowisani moꞌoemekapua; aawara moꞌoraa, oosa marikikapua yooma ahkao.
\v 4 Oowitiame wisasoriwaa, iimuri taakara iwakameka tiiame sehtamurame paꞌwisetiamekapua, waꞌa ikisa naapo iwakameka tiiame sehtaname paꞌwisetiamekapua tiameo. Ihji peeniatetiamea, oꞌro apoche chuhchetiamekapua; yooma ihta tehte peenia teꞌtiame chuhchetiameapua; puuu tehtea tísia nateyamekapua, paꞌwechi uutiame. Ihji oowitiamea, sekachio oꞌro iijipaso makoyameapua. Puꞌkachi paasochio, pochikame yahchamekapua, itapiti tísia iinya tiameopua naꞌarari, itapiti tatakori eiwepua tiame.
\v 5 Ihji oowitiamea, ahpo koataopua itapiti teewa iyotetiame iꞌtoka oiyamekapua, tesiwa eerina tiame pahtepuao. Puuu chiiame iyotetiamea, eee chiiamekapua: “Teꞌta Weruma Tiiamera Wawironia, Apoe Teꞌta Suwepori Nokayamera Yeeyera, Apoe Teꞌta Ki Kaꞌkaruma Mehtatiamera Yomachi Weeechi Mochikameopua Tiꞌtijoerio.”\fig |245-OK.Rev.17.wo.beast.5.6.10 cop copy.tif|col|||Ihji oowitiame iinyatichi kahtiamea, Riosichi paparameo toitiamepua, Satanasichikamera akipateka, ki Riosikamera iyoriwachi.|17:5\fig*
\v 6 Ihji oowitiamea, Riosi piipateria ahpo koꞌyaria eerarae, teekupakamekapua, Eesusi nehpupaka nayewamekapa koꞌitiame. Neeea, puꞌka oowitiame tetewakaopua, tajinachukania, tahpitika tiiamekoopua puꞌkao.
\v 7 Nape Riosi kuꞌiwaria, noomina eenakao, noꞌo chaanekapua:
\p —¿Achini iikai tahpitika erapanimua, puꞌka tahpitika iintoriaeo? Aamo tuuyemania aatia tiiachipa waꞌa tiiopua puꞌkao, ihtanakoopua puuu oowitiame tiiaa, ihtanakoopua tiame puuu oowitiame ahjachi yasitoaa, ihtanakoopua tiame puꞌka oowitiame ahjachi yasitoa oowisani moꞌoraa, ihtanakoopua tiameo, puꞌka yaasetoa oosa mariki aawaraopua.\fig |246-OK.REV.12._5.15.10 copy.tif|col|||Oowitiame suwepori nokiwa ihsiamea, raakoni oowisani moꞌmoemechi kahtipua.|17:7\fig*
\v 8 Puuu ahjari, itapiti tísia iinyatiame aamo tetewariaa, kiꞌyami yawichitukame puuua, ehpeo newitotiamepua newitotiao, nape eenechi machenamiite puuua yawichitumiao, ki wahjiamesi wichiwachi oꞌinia mooenasao, waꞌa ikisao eenechi enasaopua, kajuka pihtunapuamepua waꞌasio. Puuu weeechi mochikamea, ki naayachi oꞌinia Riosi iyotaperichi toatiameopua teewaraa, tahpitika erakomapua, puꞌka kiꞌyami yawichitukameo mukukaio, eenechi ahjaka ahpo mochiwachi yawichituamekopua puꞌkao, kiisi maaepori tiiaipua.
\p
\v 9 ’Ihji pahteniamea, teꞌta inatari machiniame nahkipua. Puuu oowisani moꞌoa, oowisani kaawipua, ihji oowitiame ahjachi kahtia,
\v 10 puuu kaawia oowisani yaꞌyawichikaitepua; mariki ihji yawichituwaa, newitotia ruhjikamepua waꞌasi; piiripi ihjia, ehpe taawechiami yawichituamepua pehjio; piirechi yawichitumeria pehjio, ki eenamepua pehjio; puuu yawichitumia enameria, kuꞌitapi yawichitumeripua waꞌasi, enasaapa.
\v 11 Puuu yawichituwa kiꞌyami enekamea, kiꞌtiameapua ehpeo, nape eenechi enepasaapua yawichituwao, osanao yawichituwa enemeripua, puuu osanao yawichituame enameria, piiripi puuu oowisanichi yawichi yawichitukame enemeripua. Nape puuu waꞌapia waikao, ki tehpesi yawichitumapua.
\p
\v 12 ’Puuu oosa mariki aawa aamo tetewariaa, oosa mariki yaꞌyawichi puuua, puuua ki yawichitumia mochipamepua pehji. Kuꞌitapi yawichitumichio kiapuamepua iinyatiame ahjari ahjama yawichitumichiopua.
\v 13 Ihji oosa mariki yaꞌyawichia, yooma ahka pirena, ahpo kaawe iintameripua ahpo kuꞌipakao, puꞌka iinyatiame ahjari yawichituachiopua.
\v 14 Yooma ahka nasiwasimapua, puꞌka Poꞌwachitia uutiamechiopua Riosieo, nape Apoe Poꞌwa teewataniamea, yooma newitomeripua puꞌkao, apoeopua, Apoe puuukapa puuua, teꞌta paꞌpamiraopua epeche teꞌta Paamirarakapapua; teꞌta yaꞌyawichiopua, epeche Teꞌta Werumara Yawichirakapapua; puuu Poꞌwa tewaniame ahjama teꞌtiamea, aapoe kaawe eꞌrekamepua ikae Poꞌwataniamee ahpo paajuteretiao; ihji Poꞌwataniamea ahpo paaeriao, ahpo ijinuwachitia uuriamepua Riosichio; ihji paajutetiamea, yoorewa iyoriwa tewaniamekapua.
\p
\v 15 ’Neeroi neꞌneroi aamo tetewariaa, puꞌka oowitiame suwepori ihsiame ahjachi yasariaa, yooma weeechi tiꞌtijoeripua; ki ookapi tiꞌtijoeri, yooma ihta naeri yeꞌyenieme, yooma yeꞌkari tiꞌtijoeri.
\v 16 Puuu oosa mariki aawa aamo tetewariaa iinyati ahjarichio, nekumemeripua puꞌka oowitiamechio, suwepori ihsiameo. Puꞌka oowitiame naꞌara yoramapua ahkasi piineri toaka, poiyáme; puꞌka saꞌparao koꞌkomeripua; puꞌka saꞌpara itipikameo, kosimeripua.
\v 17 Riosia, puꞌka oosa mariki pawesinoi iinyati aawara yaꞌyawichio, waꞌatiame noonoitekame enemapua, puꞌka yaꞌyawichio ahpo katewesaopua, teꞌta utewari kiamichiopua puꞌka iinyati pawesinoio, ahkasi yooma ikiyachisiopua puꞌka ahpo iintomia noꞌo tetewiteriao.
\v 18 Puuu oowitiame aamo tetewariaa, ki nuꞌuti mochiwari puuua, yomachiami paanieka kahtiame ihcheka, yomachi chuhkeka kahtiame ahpo tísia ki kaaweruma ihsiao, yomachi yaꞌyawichituniachiamiopua, yomatiame wehjoarichiopua.
\c 18
\s Wawironia muuwari wichiparia
\p
\v 1 Neipa iꞌkao neee Waania, piirechi Riosi kuꞌiwari tetewakania, tewekachi oꞌinia tekiyame. Puuua ki teesa tiiame iinuemekapua ahpo nuuramiao; oowera tisiwa tajitoapua uutapatoka, weeeai pukaeo, kawiyame uutapasipakapua.
\v 2 Weeechi tekisaopua, weeru sisinakao chaachakapua:
\p —¡Wichiparu tisiwa weruma Wawironiáapa! ¡Wichiparu tisiwa weruma Wawironiáaapa! ¡Puuu weruma Wawironiaaa, reꞌremo ohjirachi enepare puuuapáaa, yooma ihta ki kaꞌkaruma naayuri ohjirachi eneparepuaaa, oonori kaarira enepare puuuapáaa, yooma ihta oonorioipua tiaméee!
\v 3 Waꞌa ijikire ihjia, puꞌka suwepori oowitiame paatari iijikapapua, puuua puꞌka oowitiame erateriae, tetekupakapaopua, yomachiami weeechi mochikame yaꞌyawichi, yoomachi ihta yeꞌkari yawichituka mochitoameopua. Yooma chuhkewepakame puuua, puꞌka oowitiame suwepori mehtanariaeopua, yooma ihta ki kaꞌkaruma aꞌchi tiame nokiwaeeo. Puuu yomachi weeechi mochikameaipua yooma itapiti nehjameai, tísia totomiwaeme enepare puuua, puꞌka itapiti tarinariapaopua, naꞌataka toomi, tahpitika erakoapa puuua, yooma itapiti iinuenariapa, Riosikamera kaawe eꞌremitiooipua.
\p
\v 4 Piirechi sisinachachapua teꞌpao, puuua cheechaniapua:
\p —Pukaepa eemea noꞌo ijinuwaa, puuyamitiapua pukachio, ki aamo chewipamichiopua, puꞌka ki kaꞌkaruma nokiwaopua, tatakori nokiwaopua, puꞌka ihta aꞌchi tiame tísia aiwariopua, ki amochi wichimichiopua.
\v 5 Puꞌka suwepori oowitiamewichioo, ki teesa teeremerapua puꞌkawichioo, Riosi teꞌta kokosariopua. Ihjia, ki waapisi tatakorikame puuuapa, ahkasi tewekachi asina puuuapa, chuurawi tatakoririaopua. Apoe Riosia, tetewakamepua puꞌkaopua.
\v 6 Puuu oowitiamea, epeche yoraniame nahkipua puuua, apoekamera epeche kianiameopua paatario, epeche teꞌta utewaeme paatari, epeche teꞌta oosa simiyame utewaeme, tuumika epeche yorapuapua puꞌkao.
\v 7 Waꞌachita aiwatepuapua puꞌkao, puꞌkao ahpo iintoriachitia. Ahpo ki kuꞌita paarasateka yasariachitia, waꞌachitia aiwatepuapua puꞌkao, kehkisa. Ihji oowitiamea eꞌraka kahtipua: “Yawichi oowitiame neeea, ki aiwame neeea, kuunara mukukamechitiaopua. Kaꞌchitia taawechi yuuwesiameai neeea.”
\v 8 Pukaepa pukachi oowitiamechio, seenepi simikame yooma ihta kokosari enamapua ahjachio. Ahjachi enamapua toore aiwari, naarakowa, yoomá ihta aiwaniame tiame. Ihjia waꞌa ikisaa, kosipuamepua. Waꞌa iintoma Riosia, Apoekapa puuua, teꞌta Paamiraa, yooma aampa tiiamekapa puuua, utewariraa.
\p
\v 9 Yooma yaꞌyawichi ki iyorika mochikamea Riosio, puꞌka suwepori oowitiame teꞌterewa nokakamea, “Áiii” chaachapama puuua, ki teesa yuuwesika, naarakomapua. “Tísia kaawe teꞌtiai teemea”, chaachapamapua ahpoo, puꞌka oowitiame tajenaria moorewara neꞌnekaopua.
\v 10 Ihji yaꞌyawichia waikao, eeyowa eꞌerapakaopua puꞌka naꞌi tajenario, mehkache enetoma puuua, ki chewinariapaopua puꞌka naꞌieo. Chaachapamapua:
\p —¡Áiii, áiii, muuua teꞌta werumakaimua mochiwari! ¡Tahpitika ikina muuua Wawironi! ¡Tahpitika tiiamekaimua natekarirao! ¡Ikanati saipani muuua!
\v 11 Yooma ihta nehjame tariwachio, tísia yuuwesimapua ehpeo, naarakomapua kiꞌtiopa aaata tarimerio,
\v 12 itapiti oꞌroo, parata oꞌroo, tehte nateyameopua, perera peeniatiwaopua, riino wisasorioi, pupura paꞌwisame wisasorioi, pupura paꞌwisame wisasorioi, sehtaname wisasorioi, seera wisasori, yooma ihta maꞌre taparasi peeniajutiameoi, marajiri oꞌrooi, yooma ihta netetiame kuuu nateyamee, oronse meetarioi, sisiokioi, maramo eꞌpeoi,
\v 13 kaaneraoi ihtapaniameo, yooma ihta kooame yahcheniameoi ujurewao, moomori choꞌioi, miira sewajuyaoi, ihtaoi peeniajuwa sewajuyaoi, wiinooi, soowioi, aarinaoi, tiirikooi, wakasioi, poꞌwaoi, kaawaioi, kaarooi, tiꞌtijoeri nehjiwameoi.
\v 14 Puuu neꞌneka ajakamea, chaachapatarepua puꞌka tísia weruma muuwario:
\p —¡Muuua, yooma wewekakamemua itapiti teꞌta taꞌyame taakeriao, aamoo tisiwa aamo puꞌsereriao, pukaeomua tisiwa peenia eꞌraka yasariao! Yooma itapiti nateyameopua aamo puꞌsereriaa, yoomá wewekare puuua. ¡Ki seena aampa teteipuame muuua, puꞌka aamo paarasariaa!
\p
\v 15 Yooma iꞌka itapiti nehjiwari yooramea, puꞌka oowitiamechi teꞌta toomituri enepakamea, mehka ajaka itipima puuua, puꞌka aiwa majakaopua. Naarakoma puuua, ki teesa kaꞌchi ikime erakoapa.
\v 16 Puuua chaachapamapua naarakokao:
\p —¡Áiii muuua mochiwari! Teꞌta nateyame tiiai muuua, tisiwa peeniatiamekai muuua, wisasoriwao muuua, apoche riinokai muuua, pupura apochekai muuua, apoche sehtanamee yoꞌkiwa, oꞌro apoche peenia tiame teeweekai muuua, yooma tehte peenia teꞌtiameeo peeniatatiameai, perera oꞌro peeniatatiamekai, yooma saiparu muuua.
\v 17 ¡Yooma aamo ki teesa paarasateriaa, ikanati kihta itipiru muuua!
\p Yooma pawekakerachi kapitairaa, yooma pawekakerachi eꞌenakamea, yooma pawekakerachi tekipanamea tiame, mehka oꞌinia neꞌnekao,
\v 18 puꞌka Wawironi weruma mochiwario, moorewatere poꞌyamekopua puꞌkao tajenakao, chaachapakapua ki kuꞌita siinakokao:
\p —¿Iintukame ohjoare iꞌka wehjoarichio, iꞌka teꞌta weruma mochiwarichitiaopua, epeche tísia weruma paarasari teerekamea?
\p
\v 19 Waꞌa chaachapakaopua, tísia yuuwesikao, weeee ahpo mosowiapua naarakokao, eee chaachapapua:
\p —¡Áiii, áiii, weruma mochiwariaaa! Tesiwa ikina puuua. Yooma pawekakera puhkuemeo, ki teesa toomitupariachiopua, ¡ikanati wehchi yasipanipua saipakao!\fig |247-OK.Rev.18.Babylonfall.tif|col|||Teꞌta weruma Wawironiao Riosia, naꞌie ki nuꞌuti kokosanipua.|18:19\fig*
\p
\v 20 Waikao Riosi kuꞌiwaria chiiapua:
\p —¡Eemea tewekachi mochikamea, kaawe erakoka eemea! ¡Weeechi mochikamea tiamea, peenia erakomitia eemea, yooma Riosi ijinuwarakapao, Eesusi ajawariaa tiame, yooma ehkoriami Riosi nayewatukamea tiame, peenia erakoka eemea, iꞌka Riosi iintoriao, aamowichio iintoriopapua, iꞌka werumari muuwario, teꞌta weruma kokosari saaeteka kokosariopa!
\p
\v 21 Waikao, piirechi Riosi kuꞌiwari tísia uꞌwamea, weruma tehte apechunakaopua moorino matasuraka tiiameo, neerochi ipakapua puꞌkao. Waꞌa iintosaopua chiiapua:
\p —Waꞌa yooraka ipapuame, teꞌta werumara Wawironiaai, tísia eꞌraka yoojoraka, kai waapisi akipamichiopua paꞌwechi piwitewikaopua, ki oosa teteipuawichiopua puꞌkao, waꞌasio.
\p
\v 22 Puꞌka cheesaapua, chaanekapua Wawironiao:
\p —Muuu Wawironiaa, kiisi inamupuame muuuapa amochio, aꞌrapa cheeteniameopua, pakapuchera cheeteniameoipua, kusupucha turuwa cheeteniameoi, ihtaoi cheeteniame sooniai; aaataoi ihta neteyameoipua; ahjachi tusuniameoi ki inamupuamepua waꞌasi, seenampa.
\v 23 Taꞌpe tahjeraai, ki uutapamapua waꞌasi amochio; nenewiwaai ki iintumeripua amochio waꞌasi. Waꞌa teeremeri muuu Wawironiaa, teꞌta weeweruma nehjame aamo wisikueriopa, aamo teꞌta tomiwaetameopua.\fig |248-BK00069B.TIF|col|||Teꞌta weruma muuwari Wawironia, kiisi seenampasi ohjorepuamepua waꞌao, aaataeoi tiꞌtijoeri.|18:23\fig*
\p
\v 24 Puuu Riosi kuꞌiwari tísia uꞌwamea, cheekapua tiameo:
\p —Waꞌa ikimeripua puuu weruma Wawironia mochiwaria, pukachi waꞌa koꞌitiamekopapua, teꞌta weeweruma nayewaturaopua, yooma wahjachi tiame Riosi ijinuwarao, wahjachi tiꞌtijoeri yomatiame iꞌka wehjoarichio, koꞌiretiamewichioopua tiame.
\c 19
\p
\v 1 Neipa iꞌkao, ki ookapi ahka chaachapaniame tewekachio. Puuua chaachapachaniapua:
\q ¡Aamoo taamo Riosio, cheriwema aamo kiꞌyame teemea,
\q2 aamoo taamo newipatekamewichioopua;
\q Aamoopua taamo Riosio, ki teesa tiame tisiwari iinuemeopua;
\q1 Aamoopua taamo Riosio, tísia utewariemeopua!
\q
\v 2 Kaaweruma chaachapame teemea pukachio,
\q2 kaawe iintoriopua Riosia,
\q puꞌka teꞌta oowitiame suwepori iintokame kokosariopapua,
\q puꞌka oowitiameo, yomatiame weeechi mochikame ahpo suwepori ihsiriae naꞌatariopa.
\q Riosia, waꞌa yooraka nateteterepua puꞌka oowitiameo,
\q2 kokosakao, ahpo naꞌnayewatura koꞌyariopa,
\q2 ahpo teꞌta kaꞌkaruma tuuyewari nayewaturaopua.
\p
\v 3 Tewekachi oꞌiniao eenechi siinakokao, chaachapachaniapua:
\p —¡Cheriwema, tisiwa kaawerumari Riosi! Weruma Wawironia mochiwaria, puuu apoe suwepori ihsikame oowitiamea, morika itipiamepua waꞌao, ahkasi ki wahjiame taawechisi, waꞌa teeremeripua morokao.
\p
\v 4 Puuu piire weerewa aampa naao oꞌochetiamea, puuu naao ahjaria tiamea, Riosi yasirachi norikame chopokorieka ajapakapua, chaachapaka:
\p —¡Ejeꞌe muuua, kaawe iintore muuua! ¡Cheriwema ehpeo, puꞌka aamo iintoriawichio!
\p
\v 5 Ehjepao, Riosi yasirachi oꞌiniao, aaata teꞌta Riosi kuꞌiwaria, eee cheechaniapua yomatiame waꞌa chaachapachaniameo:
\q Ehpeo eemea, kaꞌkaruma nayewamitiapua,
\q2 teꞌta taamo Riosio, yooma eeme Riosiwichio nokisiameraa;
\q yooma eeme, weeweruma teꞌtereka teereka mochitoamea,
\q yooma eeme ki weeweruma teꞌtereka mochitoamea tiame,
\q2 yooma teꞌta weruma iyoriwa ijinuwaemeapua Riosichio.
\s Poꞌwa teewataniame neewiwa pahko
\p
\v 6 Waikao inamukane, tahpitika chaachapaniame tiꞌtijoeri, kai kuꞌita chiiame chaachapachaniapua, kai kuꞌita wichiyamechitia neeroi, kai muenati teꞌochaniamechitia toomari. Puuuaio Riosi yasirachi kahtiameo, kai kuꞌita eee chaachapachaniapua:
\q ¡Tísia kaawe erakotaria pukachio,
\q2 Riosi taamo teꞌta Paamirawachioo,
\q2 ehpeo puꞌkao, apoechekamera teꞌta yawichikopapua,
\q2 yomatiame puꞌka Apoeo teꞌta aampa utewarie tiiamekopapuao!
\q
\v 7 ¡Kaawe erakoka kaaweruma nayewetariapua puꞌkao,
\q2 kaawe eratekaopua puꞌka Apoeoo,
\q puꞌka Poꞌwachitia uuniame
\q2 tewekachi kahtiame taamo Noono Riosieo,
\q2 asikopa puꞌkao ahpo neewiwachitia taawechio,
\q2 yomatiame apochi paparakamechio!
\q ¡Yomatiame Eesusichi paparamea, tísia peeniatatiame kahtiame puuuapa,
\q2 aaata oowitiame neewimerichitiao!
\q
\v 8 Puuu yomatiame Eesusi ahjama neewimerichitia teꞌteriamea,
\q2 apoche riino wisasori tísia nateyame reesisetiame, chuhchetiame mochikame puuuapa.
\m Puuu wisasori tohsanamea, Riosi piipateria puuua, ahpo kaꞌkaruma yorakeka mochitoria.
\p
\v 9 Waikao Riosi kuꞌiwaria noꞌo chaanekapua:
\p —Iyotemitia iꞌkao: “Puꞌka Poꞌwa teewataniame neewiachi paajutetiamea, tísia taꞌiria nokimeripua waꞌa kaawe erakowa pahkotaniachiopua, ahpo pirena mochitopua katewetiameopua ahkasi ki wahjiame taawechisi.”
\p Waꞌa cheesaapa, noꞌo chaanekapua:
\p —Ihji naawesari Riosi chiiaa, ki teesa pichiwari puuua.
\p
\v 10 Waikao neeea, chopokorieka weripekai neeea Riosi kuꞌiwario. Nape puuua, noꞌo chaanekapua:
\p —Kaꞌi noꞌoo, kaꞌte waꞌa iintomua; amochika tiame neeeai Riosiwichio. Puꞌka ihsiweka kahtiame neeeai, wahjachitia tiame, aamo poponichitia, Eesusi nayewaria pichikekamechitia. Riosiche chopokorieka weripepapua.
\p Eesusi cheeriaa, Riosi Riosiwarichi eename puuua, ahpo ehkoriami nayewaturiachi, nayewaria.
\s Kaawai tohsaname yaasetoame
\p
\v 11 Waikao tewekachio, kawipakapua teꞌpao wahjokamechitia. Waꞌa kawipakachio, kaawai tohsaname chuhkuapua, yaaseka kahtiamea pukachio, Ki Seꞌwika Ihsiame tewaniamekapua teewaraa, Pichiwari tewaniamekapua tiame; nasiwamia machenasaapua, riisaka simiyame nasiwamekapua.
\v 12 Ihji puusiraa, naꞌi tajenakameka tiiamekapua; moochio, ki ookapi yachatoamekapua, yawichi mosokira. Ihjia, ahpo tiiara iyotetiame iꞌtoapua tiame, teewatewarachitia, aawataai ki machiya puꞌkao, Apoeche.
\v 13 Ihji ampawakiraraa, eerae saampatetiamekapua. Ihji teewaraa, Riosi Naera, tewatiamerakapua.
\v 14 Tewekachi soꞌsontarowa ahjama nokisiamea, pukamina nokisiapua, riino wisasori ampawakira chuchatoamekapua, ki teesa totosáname piipakame, puuua ahjachi nokisiao, kaawai totosánamechikapua.
\v 15 Kawachi yaaseka kahtiamea, tepekuma machenamekapua chuꞌwachio, nasiwari maacheta, tisiwa yoorame, ahjae nasiwamerika puuua. \fig |249OK.1.Jesus.whitehorse.4.17.10.tif|col|||Riosi Naera tewaniame kaawai tohsanamechi yaasetoamea, newitomiache machenanipua nasiwarichio.|19:15\fig*Ahpo seepurawao, ahpo teeretere teeremerikapua puꞌkao, sisioki kuhsie iintomerikapua, tisiwa aiwari saaetekapua puꞌkao; ahpo seepurawao, maaji sonaka yoojoramiapua puꞌkao, pihtunakao, maaji ihpoporowamechitiaopua, puꞌka teꞌta Riosi utewariemeopua, nekarewa ahjachi iintokaopua.
\v 16 Ampawakirachi kaichio, iyotetiamekapua, “Yaꞌyawichio, Teꞌta Yawichi; paꞌpamirao, Teꞌta Paamira”, chiiamekapua.
\p
\v 17 Waikao aaata Riosi kuꞌiwari tetewakania, taaachi weeriame. Waꞌa werikaopua sisinakao, yooma paaekapua oonorio, teꞌpa kunuriameopua eekachi, eee cheeka:
\p —Eꞌena eemea, teꞌta weruma Riosie koꞌkotewa, koꞌkopuachi,
\v 18 yooma ihta wahjipakame saꞌpara koꞌkomichioopua: yaꞌyawichi saꞌpara, kapitai saꞌpara, tiꞌtijoe tísia natekari teꞌteriame saꞌpara, kaawai saꞌpara, kaawai yaꞌyaseto saꞌpara, yooma ihta tiꞌtijoeri saꞌpara tiame: weeweruma teere teꞌteriame, nuꞌnunti teerewa teꞌteriame tiame, tehki paꞌpamiratoameopua saꞌpara, waꞌa ikisaopua tiameo, tekipanatewa tiame saꞌpara.
\p
\v 19 Waikao tetewakane, puꞌka wehtere oꞌinia machenakameopua wehtejurio. Waikao yooma weeechi yaꞌyawichia, ahpo soontaro ahjamaopua, wehtejuri ahjama, pirenatukapua nasiwamia. Ihjia, pirena nasiwamerikapua, puꞌka kaawai tohsanamechi kahtiame puipamerikapua, nasiwaka.
\v 20 Waikao, puuu kaawai tohsanamechi yasitoamea, puꞌka wehtejuriopua, puꞌka wihtuki naewatuameopua tiameo, chapikapua puꞌkao. Iꞌka wihtuki naewatuameopua, Apoe iintoriopua puꞌkao, puꞌka wehtejuri utewarie peenia ihsikaopua, puuua pukae peenia ihsiwae, tiꞌtijoeri wisikuekaopua. Ihji ihsiriopa tiameo, ahpo wehtejuri machitewara tiꞌtijoechi yahchekaopua, wehtejurika tiame netetetiamechi, paparatekaopua tiame. Pukaepa ihji ookaa, naꞌi paꞌwechi ihpapatiapua waikao, tisiwa tahtamechi, aasujere tajenarichiopua.
\v 21 Ihji soontarowaraa, yooma koꞌitiapua, kaawaichi yasitoameeopua, ahpo chuꞌwachi merimachetaeopua. Waikaopua, yooma ihta oonoria, poposakapua puꞌka, wahjipakame saꞌparaeopua.
\c 20
\s Piie miiri paamupari
\p
\v 1 Puꞌka tetewisaapania, piirechi Riosi kuꞌiwari tekiyapua tewekachitepao. Sekachio kaarena makotoapua, piiripi ikichapura tiame, ki wahjiamesi wichiwachi yeetara, ahjae yeetapuniame.
\v 2 Ihji Riosi kuꞌiwaria, puꞌka raakoniopua, eee kehki teewaemeo, ehkoriami Siinoio, riaorósio, Satanasi teewaemeopua tiameo, chapika purisa, kai waapi ki wahjiamesi wichiwachi ipakapua. Ihji raakoni waꞌa ipatiamea, piie miiri paaumpari waꞌa yasimerikapua, kaarenae oꞌyetiame.
\v 3 Waikao, ikicheka yeetepakapua puꞌkao, ki machenamichioopua waꞌao, aaataoi wehjoarichi mochikameo wisikuemia, ahkasi piie miiri paamuparisi uꞌmatoachisi.\fig |250-OK.REV.20.angel.dra.4.26.10.c copy.tif|col|||Raakoni Satanasia, tekorichi ki wahjiame wichiwachi ipania.|20:3\fig* Waꞌao piire miiri paamutesaopua oꞌyaekao, puhjemerikapua eenechio kuꞌitapio, Riosi kuꞌitapi.
\p
\v 4 Waikao, yaꞌyawichi moꞌmochira tetewakania. Waꞌa pukachio, waꞌa mochikapua yooma kiatiameapua, aaata katewemichioopua. Puꞌka tetewisaa, wahjipakame tetewakania waikao. Puuua, Riosie Weratiame pichiwatakameapua, Apoeo, Riosi Naerako tuukamekapua. Ihjia, ki pawesinoi iinyatichi paparakamekapua, naatichioi, puꞌka iinyati pawesinoi tiiamechi netetiamechioi; iinyati pawesinoi machitewaraoi, ki ahpo toakamekapua, ahpo yahchepuawichioo, ahpo koataopua sekachioi. Ihjia eenechi oijenakamea, piie miiri paaumpari mochimiapua, Riosie Weratiame ahjamaopua.
\v 5 Ihji oijenawaa, pahcha simiyamekapua, oijenaniame. Wahjachi ki Riosichi wahjipakamea, ki oijenamiapua pehjio. Neipa oijenamiapua eenechio, ahkasi piie miiri paamupari uꞌmatosopa.
\v 6 ¿Achipusa peenia tiiamejuarepu, pahcha simiyame oijenapuachi oijenaniameapua, yooma tatakori piipatetiame kaawe erakoameopua, kihta seewiapa teemea taamo poanachi uhjurapuaopua Riosieo, oosa simiyamechi mukiyamechitia? Teemea tísia kaawe erakomeripua Riosichi, Riosi neesetowatere mochitoamekapa Riosie Weratiametere tiame; puꞌka ahjama nokisikaopua yawichitukao, piie miiri paaumpari simiyame, puꞌkao puꞌkache yorakeka kuꞌisika.
\p
\v 7 Piie miiri paaumpariopua uꞌmatosoopua waanamio, eenechi puhjepuameapua Satanasia, kuꞌitapio.
\v 8 Eenechi puhjetiaapua, eenechi machenamerikapua waikao, yooma wisikuemiaopua, yoomá weeechi tiꞌtijoeri. Yooma puuu Satanasi wisikueria, yomatiame iꞌka weeechi eꞌenameripua, iꞌka weee Koojo kawiyanachisi yomatiame, ahkasi iꞌka weee Maakojo tetuyachisi. Puꞌkao Satanasia, ahpo nasiwamiawichio, soontarotameripua, nape yomatiame weeechi ki ookápi enemeripua, paꞌwé seeterachitia kehki.
\v 9 Iꞌkao tetewakania, yomatiame weeechi weerechisi nokiriameopua. Puuua, norikame noorepakapua puꞌka, muuwari Riosi teꞌta nakiyaopua, mochiwario; nape naꞌia iꞌkao, tewekachi oꞌinia eenakaopua, yooma koꞌyakapua puꞌkao, kosoka.
\v 10 Puuu Satanasi wisikuekamea noonoimichioo, naꞌichi ipatiapua waikao tiame, puꞌka wiwisituri nayewaturao, puꞌka iinyati ahjariopua tiame, ihpapatiachiopua, naꞌi paꞌwe tajayachiopua. Waꞌa yasimiapua waꞌasi, yooma taawechi aiwaniachiopua, tukaoopua, taawechiopua tiame. Ki seenáá aampasi aiwaka yasitomiapa waꞌasi.
\s Weruma teꞌta kateweri, teꞌta tohsaname yasirachi
\p
\v 11 Waikao, wéruma yawichi yasira tetewakania, tohsáname, waꞌa yasirachi yasipame tetewakania aaata. Iꞌka tetewakaopua, yoomá ujumakapua, weeechi ohjoemea, tewekachi ohjoemea tiame, ki waꞌa mochime tiiamekapa puuua, puꞌka tetewachio.
\v 12 Waꞌa ikisaopua, puuu weeechi wahjipakamea, puꞌka yawichi neꞌniachi, ajakapua, yooma weeweruma teꞌterewaemeapua, nuꞌnunti teꞌterewaemeapua tiame. Waikao, ooka iꞌiyotape wahjonatiapua, piiripi puuu ooka iyotapea Ahjaniame Iyotapekapua, yooma ki wahjiamesi ahjameri toatiachi teewara. Piire iyotapechio, yooma waꞌa toatiame maaniapua teewaraa, ki wahjiamesi ahjari uumeria. Yooma aaataai wahjipakamea, puꞌka ooka iꞌiyotapechi chiiae ihta noonowiria, pukae katewetiapua Riosieo.
\v 13 Yooma paꞌwechi wahjipakamea, weeechi wahjipakamea tiame, pirena katewetiapua Riosie, ihtana kaawe noonowiriaeopua ahpo kaaweruma tuuyewarieopua.
\v 14 Waikao wahjiparia, wahjipakame mochiriachiopua tiame, naꞌie kosotiapua Riosieo, naꞌi paꞌwe tajenarichi. Puuu paꞌwe naꞌichi ihpapaniamea, oosa simiyame mukiwamekapua waꞌasi, ki oosa aampa Riosi ahjama yasipuame.
\v 15 Yooma aaata puꞌka ahjari iyotaperichi kiꞌtiameopua teewarao, waꞌachi ihpapatiapua tiame, puꞌka naꞌi paꞌwe tajayamechi, ki wahjiamesi ki Riosi ahjama mochimerikapua.
\c 21
\s Teweka weemera; weemera weee tiame
\p
\v 1 Yooma puꞌka ikitiame uꞌmatosóópua, weemera teweka tetewakania waikao, weemera weee tiame; puuu pahcha simiyame tewekaa, puuu pahcha simiyame weeeapua tiamea, waꞌa ikisa puuu paꞌwe pahcha simiyameapua tiamea, kiꞌtiapua waꞌasi; yoomá pahcha simiyame iintuamea, uꞌmatokapua waꞌasi.
\v 2 Waikao waꞌa weemera tewekachio, Teꞌta Piipakame Muuwari, tetewakania waikao, Weemera Eerusareni. Puuu Weemera Eerusarenia, tewekachi oꞌinia tekiyapua, Riosi kahtiachi oꞌinia. Tisiwa peenia teetoapua, oowitiame neewimerichitia.
\v 3 Waikao inamukania waꞌao, ki kuꞌita siinachaniame, puꞌka Riosi yasirachi oꞌiniaopua:
\p —Riosia, yomatiame weeechi tiꞌtijoeekachi kahtiame puuuapa waꞌasi. Tiꞌtijoeria Riosi mochiwari enemeripua, Apoe Riosia puꞌka tiꞌtijoeri mochiwari, Riosiwara enemeripua.
\v 4 Nape Riosia, keꞌchuo muioi ahjama mochipuachio, wakipatemapua oꞌkewarao, puꞌka tiꞌtijoerio, kiteremiopua waꞌao, yuuwesirio, naarakorioi, kokosa saaeniameoi, wahjipaniameoi; waꞌa ikisa yooma ihta iintukame oochetiame ahjarichio, puꞌkao yoomá uꞌmatoriopua waꞌasio.\fig |251-OK.wipealltears. copy.tif|col|||Apoe taamo Riosi Eesusia, taamo wakipatemeripua oꞌkewaniameo.|21:4\fig*
\p
\v 5 Waikao, yawichi yasirachi kahtiamea, Riosi Apoea, chaachakapua:
\p —Nee, yooma weemera netekame neeea.
\p Chiiapua tiame:
\p —Iyotepuapua iꞌkao, pichiwari simiyame ihjia, ki seꞌwi wichiyame.
\p
\v 6 Noꞌo chaanekapua tiame:
\p —Yooma kuuweparu neeeapa. Neeepua, oꞌicharia, kajuyachiopua tiaméo, aapini oꞌinia yuꞌusisio. Weeechi mochikameo, paꞌparamuameo, ki natekachi nerojitemania, ahjaniame paichi neeroie.
\v 7 Aaata kaꞌkarumachi newitokamea, noꞌo taana enemapua; neeea, noonora enemapua puꞌkao, Apoe Riosi.
\v 8 Nape ki ahpo pujime erakoamea ki kaꞌkaruma nokiwao, ki ahjachi erakoamea noochi ahpo Riosichio, teꞌta ki kaawerumachio enepakamea, tijoe koꞌyamea, suwepori yooramea, susukituamea, ihtaoi riosiemea, wiꞌwisitua, yooma puuua, naꞌi paꞌwechi ihpapapuame puuua, paꞌwe tajenarieme poꞌyachi. Puuu paꞌwechi ihpapaniamea, puuukamera “teꞌta mukiwamera” tewaniamekapua, ki wahjiamesi seꞌwi mochiniamekapapua Riosichio.
\s Weemera Eerusareni
\p
\v 9 Waikao waꞌa eenakapua, piiripi puuu oowisani Riosi kuꞌiwaria, pehtorichi oowaka ajakamea, pukachiopua, aiwari iinueriamea. Puuua noꞌo chaanekapua:
\p —Eenakóómua waꞌana. Aamo neꞌnetemane, puꞌka oowitiame Poꞌwa teewataniame ahjama neewikameo.
\p
\v 10 Waikaopu Riosi kuꞌiwaria, kai waapi weeriame kaawichi noꞌo iꞌtokapua. Waꞌa oꞌinia noꞌo neꞌnetiaopua, Riosi piipateria muuwarikapua, weemera Eerusareni tewaniame. Puuu weemera Eerusarenia, tewekachi oꞌinia tekiyapua, Riosi kahtiachi oꞌinia,
\v 11 tahpitika teetoapua tajitokao, Riosi tisiwarieopua, tiiari. Ihji muuwari mochiwaria, tatapara teetoapua, tísia nateyame tehtee peeniatatiameopua. Ihji mochiwaria, kawiyamekapua, kiisi kihta aꞌchi tiiaeme, tehte ahpe kawiyamechitaopua.
\v 12 Puuu muuwari mochiwariopua, kai waapisi weeriame, koꞌraemekapua norikameo, oosa mariki aampa ooka muiraemekapua. Waꞌa muꞌmuirachio, oosa mariki aampa ooka ajakapua Riosi kuꞌiwari, yooma pipiripi muirachiopua. Yooma pipiripi muirachiopua, waꞌa iyotetiamekapua, yooma pipiripi puuu oosa mariki aampa ooka iꞌisaeri tetejimari teewaraopua.
\v 13 Cherayachiminao, paikakapua muira; kawiyamina wehjoarichiopua tiameo, paika muirakapua; wehjoari tekiyaminao, paikachikapua waꞌaoi muiwachio; ariyatuminao, paikachikapua waꞌa muiraa.
\v 14 Puuu muuwari mochiwari koꞌreraa, oosa mariki aampa ooka chokitetiamekapua; puꞌka chohkirachi pipiripichio, waꞌa iyotetiamekapua teewarao, puuu oosa mariki aampa ooka Poꞌwa teewataniame ajawariaa.
\p
\v 15 Puuu noꞌo neꞌneteka naewekamea, oꞌro kuhsi makotoapua, ahjae ihtetamiapua mochiwario, yooma muirachiopua tiame, yooma saꞌmi koꞌreopua tiameo.
\v 16 Puuu muuwari mochiwaria, naao ihkiamekapua, waꞌachi kekenuame. Puꞌka muuwari mochiwario, ooka miiri aampa ooka siento matoka, ihtetakapua kenekumao; waꞌachitia ihtetakapua weereo, oowepoteopua tiame.
\v 17 Ihji koꞌreraa, paika weerewa aampa mariki matoka puuyakapua, teꞌpasi weeriameopua, Riosi kuꞌiwari iꞌtoaopua ihtetaeo, waꞌachi kehki ihtetameapua, tijoe ihtetaeo.
\p
\v 18 Puuu koꞌrea, ahpe tehte nateyamee netetiamekapua; puuu muuwari mochiwaria, apoche oꞌroapua, kiisi aꞌchitiame iinuwaeme, ihtao.
\v 19 Yooma puuu koꞌre maaniame nawateraa, yooma ihta tehte peenia teꞌtiamee, peeniatatiamekapua: piiripichi simiyamea, ahpe tehte; ookachi simiyamea, saajiro; paikachi simiyamea, ákata tehte; naaochi simiyamea, esmeráta;
\v 20 marikichi simiyamea, onise tehte; puhsanichi simiyamea, konarina; oowisanichi simiyamea, kirisorito; osanaochi simiyamea, weeriro; watanichi simiyamea, toopasio; oosa marikichi simiyamea, kirisopasa; oosa mariki aampa piiripichi simiyamea, aasinto; oosa marikichi ookachi simiyamea, amatihta.
\v 21 Yooma puuu oosa mariki aampa ooka muiraa, oꞌro perera netetiamekapua; yooma pipiripi muiraa, pipiripi perera iinuekapua. Teꞌta muirachi pooea, apoche oꞌroapua, kiisikioiopua aꞌchitiameo.
\p
\v 22 Tiopaa, Riosi iyoriwachio, kiꞌtiamekapua waꞌao, Apoe yooma Paamirao waꞌa kahtiopa, waꞌachi kahtiamekoopua tiameo, puuu Paamira Poꞌwa teewataniameopua.
\v 23 Waꞌa muuwari mochiwaria, ki nakiyachikapua taaa tajenariopua, meechaoipua, Apoe Riosi tisiwarira taajenamerikapua waꞌao; Poꞌwa teewataniamea, ahjachi tahjeraapua ahjae tahjeniame.
\v 24 Yomatiame puꞌka wehjoarichio, yooma ihta tiꞌtijoerio, puꞌka tahjeraechi ohjomeripua. Ihjia, yooma yaꞌyawichiraa, Riosi kahtiachi eꞌenamapua, ahpo weruma iintowa, teꞌtereparia Riosio, iꞌyetokaopua, ahpo iyoriwaopua Riosio, Riosi kaawe eꞌremiaopua, cheriwema kiamiaopua tiameo.
\v 25 Waꞌa yomachi muꞌmuirachio, wahjoame werimeripua aꞌchi keenakooipua taawe; tukawaria kiteremeripua waꞌao.
\v 26 Yomatiame wehjoarichi ohjoemea, yooma ihta tiꞌtijoeri tijoetukameai, waꞌa eꞌenamapua Riosi kahtiachio teꞌta muuwarichio, ahpo kaꞌkaruma erakoa, chaachapamia Riosio, Riosi iintoriaopua.
\v 27 Nape aaata aꞌchitiamea ki kaꞌkarumao, ki muimeripua waꞌao, aaata teꞌta naꞌara nokayamea; aaataai, oowera Riosi pichikiameka nokayamea. Waꞌao, Poꞌwa teewataniame ahpo ahjari iyotaperichiche toꞌwaria teewara, muimeripua waꞌao.
\c 22
\p
\v 1 Yooma puꞌka noꞌo tetewitesaopua, naati noꞌo tetewitekapua waikao, piiripi aaki. Ihji aakia, kawiyame neeroikapua, ki teesa kawiyame. Ihji aakia, Riosi yasirachi oꞌinia pajenamekapua, waꞌa Poꞌwa teewataniame kahtiachi tiame.
\v 2 Ihji aakia, teꞌta Riosi muuwari mochiwachi, naasipami poꞌyapua, teꞌta naasipa pooechiami yeenapua. Puꞌka aakichiopua, nenekuo, kuuu ahjari ajakapua, senepi mechachi taakiame. Ihji kuuu saawaraa, yooma mochiwari kaꞌkaruma mochipuamichio iꞌyowapuamekapua.\fig |252-OK._treelife copy.tif|col|||Puuu waꞌa weeriamea, ahjaniame kuuupua.|22:2\fig*
\v 3 Ihtaoi kiteremerapua waꞌao aꞌchitiamea, Riosiche yasimapua waꞌao, Apoe Poꞌwa teewataniameopua tiame. Riosi tekipaneka mochikamea, ahjachi paparaka mochimeripua iyorikao.
\v 4 Riosio puuua, nanarira tetewika mochimeripua, ahpo koata yachatomerapua, Riosi teewarao.
\v 5 Kiterema tukawaria waꞌao; waꞌa mochikamea, ki tesiwa erakomapua tahjerawichioopua, taaa taajenarioipua, Apoe Paamira enemapua, taajenaria. Ihji ahjamao, ahkasi ki seena aampasi ahjaka, mochimerapua.
\s Eesusi Riosie Weratiame eenaria, waapi teetonapa
\p
\v 6 Waikao Riosi kuꞌiwaria noꞌo chaanekapua:
\p —Ihji naawesaria teꞌta pichiwari simiyamepua, teꞌta ahjachi erakopuame tiiame. Apoe Paamiraa, Apoe ihsikamekapua, ahpo naewaturachi nayewakaopua, Apoe uhjurakamepua tiameo, iꞌka ahpo kuꞌiwarioi ahpo yorakeka mochikameopua, aamo tetewitemichioopua.
\p
\v 7 Neee Eesusi tewekachi oꞌinia noꞌo kuꞌiwari aamo uhjuriamea, yooma weeechi mochikameo, chaanenania:
\p —Kuꞌwe enamiite neeea, waꞌa weeechi aamo mochikachio. Iꞌka iyotaperi chiia eꞌweka yasitokamea, tísia kaawe siimeripua, tísia kaawe erameripua.
\p
\v 8 Yooma iꞌka tetewikamea, inamukamea tiameo, neeepua Waani. Waikaonia, chopokorieka weripakainia, yoorewewa iintokaopua puꞌkao.
\v 9 Nape ihjia noꞌo chaanekapua:
\p —Kaꞌte yoorewi noꞌoo, Riosiwichio ihsiwiame neeeai aamochitia, aamo poponichitiaopua, Riosi naewatukame, yooma iꞌka iyoteri neesetoka mochitoamechitia tiame. Riosikamera chopokorieka weripapuapua.
\p
\v 10 Noꞌo chaanekapua tiame:
\p —Kaꞌte oowera iinuemitiapua iꞌka iyoteri chiiaopua, ohso kaawe nayewemitiapua aaata. Ihji chiia, ki mehka teetoamepua ikimiachio.
\v 11 Nape pahtekai ki nakikameopua iꞌka iyoteri chiiao, waꞌatia toipuapua puꞌkao, ahpo ki kaꞌkaruma yoorachiopua, ahpo ki kaaweruma tiia, naꞌnaritomichiopua. Kaꞌkaruma yooramea, kaꞌkarumache ahpo yoora simitema puuua. Aaata teꞌta iyoriamea Riosi, waꞌapitia teetomeri puuua Riosi iyorikao.
\p
\v 12 Waikaonia eenechi Eesusi naewame inamukania, puuua eee cheechaniapua:
\p —Kuꞌwe enamiitene waꞌao, yooma Riosichi teꞌteriameo, Riosichi teꞌteremia nuutewa iꞌtoka, yooma pipiripiwichióópua, ahpo ihta kehkisa noonowiria kiapuameopua.
\v 13 Neeepua, pahcha oꞌinia kahtiamea; neeepua tiame, neipa yasimeriapua pehji. Neeepua keꞌchu ihtaoi kiꞌtioi, yasariameapa; kihta iintumerioipua waꞌasio, waꞌapitia iiweta yasitomeri neeea. Neeepua oꞌicharia, kajuraapua tiame; kihta kiterekame noꞌo pahchao, noꞌo neipaoi, kihta kiteremeripua.
\p
\v 14 Tísia kaawe siimerapua aaataa, aaata ahpo wisasori wichonarekamea, tísia kaawe siimerapua, puuua, reesisepuamekapapua, puꞌka ahjari kuuura taakewa, koꞌkomichioopua; reesisepuamepua tiameo, Riosi muuwarichi pakimichióópua.
\v 15 Yooma naꞌararia Riosi muuwarichio, maꞌchi itipimerapua itapiti yoorakamekapa, tukapachi ohjowa nokiwame, ihtaoi riosichitia uuyamea, suwepori nokayamea, tijoe koꞌyamea, yooma puuu wisikuari yooraka puꞌseriamea.
\p
\v 16 —Neee Eesusia, noꞌo uhjurawa uhjurakamenia, yooma tiꞌtiopachi maꞌchitamichiopua, noꞌo tetewiteriao. Neeea apoe naatipua, keꞌchu Raawitarukooi ahjaka yasitokame, nape waꞌa tiiai neeea, teꞌta Raawi tetejimarisiwachi, naawakamenia tijoetukao. Neeea, cheisoporika tiiame neeea amochio.
\p
\v 17 Riosi Riosiwari iinuemea, waꞌapi Poꞌwa teewataniamechi nenewikamechi teꞌteriamea, chaachapamepua puꞌka Poꞌwa teewataniameo:
\p —¡Yaapiti enamitia muuuapa, muuua Apoe taamo Paamiraaa!
\p Apoe yooma weeechi taamo Paamiraa, taamo chaanenapua weeechi mochikameo:
\p —Aaata paramusaa, noochi enapuapua, ahjaniame neeroi noochi pajename nerojimia. Neeea aamoo, kihta natekachi aamo nerojitemapua.
\p
\v 18 Neeea Waania teꞌta pichiwa Riosie tetewitetiameapua iꞌkao, aamo chaanenane: Iꞌka iyotaperichi chiiao, kaꞌte epeche chanimitiapua aampachio; waꞌa iintosaamua, epeche tisiwa aiwatepuame muuua, iꞌwa iyoterichio, waꞌa chiiamekopua Riosio.
\v 19 Aamo uꞌyesoo iꞌka iyotaperichi chiiao, Riosiaipua aamo uꞌyemapua aamo ahpo ahjama yasipua nuuteka teewiaopua, ahpo ahjama mochipuachi taakia koꞌkopuameopua, teꞌta kuuu ahjari taakewaraopua; waꞌao, kaꞌchitia taawechi pakime teeremeri muuua, Riosi teꞌta muuwari mochiwari piiparichiopua.
\p
\v 20 Ihji iꞌka pichiwako tuuyamea, Apoe teꞌta Riosie Weratiamepua, eee chaanipua:
\p —Ejeꞌe. Enamache neeea waꞌao, kuꞌwe simiyachio.
\p Wee, waꞌa ikimitia naaju, Apoe taamo Paamira Eesusia.
\p
\v 21 Amochi Riosie piipatetiameo, Apoe taamo Paamira Eesusio, apoe Riosie Weratiameopua, amochi teetojeraninia ahpo kaawerumari tiiariwaopua. Waꞌa teerejerame neeea.
\p Iꞌwasi kajuyamenia cheekao, yomatiame Riosie Weratiamee noꞌo tetewitetiamea. Cheriwema, waꞌasipua.