\id 2TH - Kombio Wampukuamp portions [xbiW] -Papua New Guinea 2002 (DBL 2015) \h 2 Tesalonaika \toc1 2 Tesalonaika \toc2 2 Tesalonaika \toc3 2 Tes \mt1 2 Tesalonaika \c 1 \p \v 1 Antarko wielekeknel Pol antempel Sailas nti Timoti, an apul wupm keielel nakimp yipm ementitmuaken Wulapm Weinkel ka ar yemp suknel Tesalonaikael, yipm ka ar onto Waiek Ekeipmel antelel antempel Sepmel Antelel Jisas Krais. \v 2 An ka aiyimp Wulapm Weink nako kil wonempyupulp yipm nako kil yok yipm yapmonemp niuluknunel. \s Pol Nak Tukuaremp Wulapm Weink Apulp Minamp Sepmel Antuol Ntitmuaken Tesalonaikael \p \v 3 Antemp aninkanink, an ka nak naremp Wulapm Weink apulp yipm, ka apulp yapmonemp aiyipmel ka ar mintenk antempil, ka sankuork yapmonemp mintenkel aiyipmel karepel. Yipm eikusukn ka mpuaimpuai na yupulp yipm aiyipm yapmonemp sepmel aninkaninkel. Et minamp sepmel ka yipm nkisel karep kakir mila eikriekn, et kakilpe an ka nak tukuaremp Wulapm Weink apulp yipm. \v 4 Wankepm irpm ka ninkemp yipmel antempel yakop yipm nkampel ka nti omoule mpurel ok yipm apulp nti ka nkarkemp aiyapel Jisasel ka yipm nakerpmel. Et yipm karokn nkark. Yipm ka etn mintenk arkuos wankepm kilelel ka nti ok yipmel. An ka natip yipm yatip apulp minamp kilelel. Et kakilpe an ka etn la wampwamp sukueimp nti ementitmuaken Wulapm Weinkel apulp yipm, an ka aki nio aiyipmel namp ekeipm. \s Wulapm Weink Ka Akei Yapmonemp Sepmel Antunaiye An \p \v 5 Wankepm ka yipm ninkempel, ka apul niokn ar yapmonemp aiyipmel pminel nimpilemp yipm ar kipmin. Wulapm Weink ka aser minamp aiyipmel ka yipm nkisel et kil ko kil yiki nio aiyipmel nek na, “Yipm ka niantip elmpsoip. Et yipm war yer onto apmelel yentemp apm yupul niokn.” Sopilelel, ntiarko wampwamp ko ser Wulapm Weink ka sop yapmonemp sepmel sitel ka kil ranimp an omouleel. \v 6 Jisas antemp nti ensel salpikninel ankilel ko yo yentemp yete ka kakir no suknel. Aninkel kilelel, nti omoule kilelel ka ok yipm yakop apulp nti ka nkarkemp aiyapel Jisasel ka yipm nakerpmel, Wulapm Weink ko yupul nti milminel ware. \v 7 Kil ko yekei mintenk ankilel yuntun wankepm aiyipmel kilelel, et ko kil nimpil yupul wule kipminkiriekn aiyipmel ko nimpil yer pipilakn. \v 8 Nti omoule yapmonemp antuol karokn akuorp apulp Wulapm Weinkel et nti ka mpuar opmoump yuwa kil. Sank sepmel apulp Jisasel ka nti eipmel, nti karokn apul sop. \v 9 Kakilpe, Jisas kona yoelel, Wulapm Weink ko yupulp nti milminel ware. Et ko kil yekei loump yuntun nti yer peik. Nti kakorokn war yer kitnan nantipil, ser salpiknin suknel ankilel. Et kona sopilelel nti kileko semp yakop ka ko yer yopmoi yopmoiel. \v 10 Kona Jisas na yoelel, nti ementitmuaken Wulapm Weinkel ka yapmonemp mintenk apulpilel, nti kako yiki nio ankilel, mpuaimpuai antuol yupulpilel kako sukn yatip. Et yipm ankil ko yentemp nti yiki nio ankilel eik mpuaimpuaielip. Ka apulp kumpueik an la nakimp yipm sank Wulapm Weinkelel, yipm ka aimp o yapmonemp, ka yipm yapmonemp mintenk apulp. \s Nti Aiyimp Wulapm Weink Ko Kil Yupulp Nti Tesalonaika Na Yupul Niokn Ankilel \p \v 11 Wulapm Weink ka aiyimpukuap yipm na yer ntoka ntitmuaken ankilel, kakilpe an aiyimpil ko kil yupulp yipm na yupul sop sankminamp ankilel sukurel. Niokn sepmel mimi yipm upuikn na yupulel ko an yimpil nako kil yupulp yipm na yupulel. Kona kil yiki yipm yapmonemp yupulp niokn mimi ankilel ka kil ok yipm na yupulel, an aiyimpil na miepm sepmel ko neker niokn kilelel. \v 12 Jisas Krais Sepmel Antelel, et yipm ko yuntun nio sepmel yok kilel, nako kil yuntun nio sepmel yimp yipmel apulp kil antempel Wulapm Weink ka wonempapulp yipm. \c 2 \s Omoule Ka Antemp Wulapm Weink Nkisemp Wurokn Yankerel Kileko Niminink \p \v 1 Keielel an na nikimp yipm sank yupulp Sepmel Antelel Krais Jisas ko kil nimpil yo na yentemp an niye yer lekekn. An nakimp yipm na \v 2 yapmonemp aiyipmel kakorokn nimpilemp mpulumpiliel yupulp sank irpm yipm eipmel, nti ka nak na awun ka Jisas na nimpil yoelel karep niminink. Karokn. Emel kona semp sank keielel yer yempel nek nisilep yupulp. Omoule yatel kana nek na, “Ka Pirpm Wulapm Weinkel ankil ka akei miepm apmelel nak aworp sankel kil, ka yapmonemp Wulapm Weinkelip.” Kona nti nek sopilelel, yipm kakorokn numpul yupulp. Kona emelel nek sank mi apul wupm nek na wupm keielel ka an omoule Polel ankil apulel, kil ka ninkai yipmel. Ntokilelel, et yipm kako yetn mintenk, yipm kakorokn semp yapmonemp wankepmel yupulp. \v 3-12 Et yipm korokn semp sank emelel ka nakimp yipmel na pelkel yump yo yapmonemp ntoka sank ka etetelel. Yipm eipm. Awun ka Jisas na yoel kakorokn ninink kuserel. Karokn. Kumpueik apm antemp yipm arel, apm sukueimp yipm sukn apulp keielel. Et yikn karep wonempsukurel tikikn? Sukur nti omoule mitinkel kako yupul milminel yatip, nti kako nek nker Wulapm Weink et nti kana yupul upuikn antuol. Niatel. omoule ka antemp Wulapm Weink nkisemp wurokn yankerel, kil ko yopmon yemp yapelel. Aser keielel, setel ka tunkuorp aiyapel ankilel. Et yapmonemp kilelel na yentemp Wulapm Weink nkisemp wurokn yankerel kipe ka ar nkuwepm. Yapmonemp nkuwepmel kilelel kako yer nkuwepm lala ser Wulapm Weink ko nek na nker mekoret ka tunkuorp aiyapel omoule koretel kilelel ka antempil nkisemp wurokn yankerel. Kona Wulapm Weink nek na kil na nininkel, et kil ko ninink yapelelimp. \p Niatel Satan ko yok kil mintenk yupulp nako kil ninkai nti omouleel. Kil ko yekei mintenk Satanel yupul niokn mintenkel ko nti serel, et nti kako eik utnumpulel. Omoule kile kana nek yuntup nti ementitmuaken kana sop aiyapel Wulapm Weinkelel, nti kakorokn yiki nio Wulapm Weinkel yekei kil nkael. Nako kil nek yuntup nti ementitmuaken yatyatel, nti kakorokn yekei walaipm irpm wus nimin nkael yentempel salpiknin kitapmel nti kakorokn yupul. Sopilelel kil kana semp yemp Wulapm Weinkel na yer niorknelel ko nti eikusukn yepil sitel yer yetne suknel Wulapm Weinkel. Kil ko yupul niokn koretel mitinkel sopilelel yupulp na ninkai nti ntitmuaken nako nti sopilel. \p Kumpueik ka Wulapm Weink nakimp nti ntitmuaken kilelel sank milinel apulp Jisas ko nantip mo yerkomp ntiel, aser nti ka nkark. Nti karokn apulp na eipm kil sank yump yer yapmonemp. Upuikn antuol, nti na yupul sankminamp koretel na sop omoule kilelel ka antemp Wulapm Weink nkisemp wurokn yankerel. Kakilpe Wulapm Weink ko yupul nti yapmonemp nako yer mproelimp nako nti nsop sankminamp ka ninkaielel. Nti kako wonempwaiyimp yupulp na sank kile ka etetelimp. \p Nti ka mpuaimpuai apulp minamp koretel. Nti karokn mpuaimpuai apulp sank Wulapm Weinkel wat o ntunkel. Et kakilpe kona Wulapm Weink na yuntunel an omouleel, kil kileko yok nti wankepm suknel nako yupul nti milminel, et nti ko mproelimp. \p Omoule koretel kile ka antemp Wulapm Weink nkisemp wurokn yanker, kil kako yer yupul niokn koretel ankilel, aser aninkel Jisas ko yo yentemp yetemalaikn suknel ankilel nako yupul kil milminel. Jisas kako yekei wolpm salpikninel ankilel eik miepm ankilel semp omoule kile nako yer kil wuntu eiklekeknel. \s Wulapm Weink Ka Yuwak Yipm Ampulp Na Yipm Na War Yer Onto Ankilelel \p \v 13-14 Yipmarko mamuntomp antelel nti, an nak naremp Wulapm Weink ntenktenk apulp yipm. Ka apulp kumpueik eik nimpiliekn lael, Wulapm Weink ankil ka yuwak yipm. Pirpm Sepmel ankilel ka apul niokn apmoi yapmonemp nilmpniumpuaipm aiyipmel nako kil ye yipm mper yatelel, et yipm ko ankilelimp. Sank sepmel Wulapm Weinkel ampueik an nakimp yipmel, yipm ka nkamp aimp o yapmonemp aiyipmel nak na sank ka susukelimp, et yapmonemp aiyipmel ka ar mintenk ampulp. Sopeiye, Wulapm Weink ka nantip mo arnkomp yipm et ka yipm ar ntoka ntitmuaken ankilelel. An ka aser amorel upuikn ankilel, kil ka apulp yipm yatip. Karep kil aiyimp yipm na yipm'a yer yentemp Sepmel Antelel Jisas. Nio sepmel kana sempilel, yentempel salpiknin suknel ankilel ka ntoka yete akosepmel ka milipmalaiknelel ko yuwulmp Jisas yipmarko soplekekn. Et kona ntokilelel, aninkanink an ka nak tukuarempil ampulp yipm. \v 15 Wupm irpm ka an apulp yipmel antempel sank ka an nakimp yuwap yipmel, ko yer nimimpiepm yer yapmonemp aiyipmel nako yipm yetn mintenkel. \v 16-17 Sepmel Antelel Jisas Krais antempel Waiek antelel Wulapm Weink ka apulp an yatip, ka akei yapmonemp sepmel wonempapulp anel. Ntiwie ka mintenkitneip an apulp yapmonemp antelel ko yer mintenk. Et an ko niampepm ntanku tneip ntiwie ko ntiwie yupulp an sepmel yopmoi yopmoiel. \c 3 \s Yipm Yimp Wulapm Weink Yupulp Nako Kil Yikiwat Yipmel \p \v 1 Et yipm ampu eipm sankel kile apm'a nikimp yipmel. Yipm yimp Sepmel Antelel ko kil mintenkitneip an, et sopilelel sank ankilel ko sikir etn la wampwamp. Kona nti eipm sank ankilelel, nti kako yep sank keielel ntoka sinsi suknel sop ka kumpueik yipm apulel. \v 2 Yipm ka ntinkirai, nti omoule koretel ka aimp yapmonemp ntupmuel nak sank wael apulp sank Wulapm Weinkel. Et an aiyimp yipm nako yipm markipninket Jisas ko kil mpuanink an yupulp nti kakorokn yupul an koret. \v 3 Sepmel Antelel ka omoule akosepmel, et an ko yekei kil nkael apulp kil kako yupul sop sank etet kuntoel eikusukn ka kil nakel, nako kil mintenkitneip yipm yapmonemp, mpuanink yipm yupulp Satan kakorokn yupul yipm milminel. \v 4 Yapmonemp antelel, an nak na sank salpikninel sukurel an nakimp yipmel, karep yipm apul sopel, epe kileyar aninkaninkel kako yipm yupul sopel. Sepmel Antelel ka ok an yapmonemp irpm keielel. Et an na nimpil nikimp yipm ko yipm yupul soplekekn aninkaninkel. \v 5 An aiyimp Sepmel Antelel ko kil yekei su lep yipm yapmonemp nako yipm ser yoworel Wulapm Weink ka kil akei ontoniupuknel ankilel nkrawomp yipmel ko yipm ser yoworel minamp mintenkel Kraisel, kil karokn nkarkemp wankepm. Et sopilelel, ko yipm nkis minamp sepmel soplekekn. \s Nti Omoule Eikusukn Ko Yekei Onto Antuol Yupul Nioknelmp \p \v 6 An nkamp mpunti Jisas Kraisel ka Sepmel Antelel nako an nikimp yipm sank salpikninel lekekn. Nti mamuntomp aiyipmel ka yuwa likipel apulp niokn antuolel, et yipm ontonisep nti na yer antuol yatel. Nti karokn apul sop sank an ka nakimp yuwap yipmel. \v 7 An antemp yipm arel, sankminamp antelel ka sop muati kana tikiremp yipm aiyapel nako yipm nekerpmel. An karokn eik likipel, karokn. \v 8 An ka ntinkiliemp apul niokn wunoump awun, apulp nako an semp wuntokn yuwulmp an yupulp miepm irpm sinsiel. An karokn apulp na yipm ko yorkuos wankepm yuwulmp anel. \v 9 Mpunti ka sil anel ko an nikimp yipm na yuwulmp anel. Aser upuikn antelel, sankminamp antelel kako tikiremp yuwap yipm sop muatiel, nako yipm yupul soplekeknel. \v 10 An antemp yipm arel, sank salpikninel lekekn an nakimp yipmel nak na, “Kona emel karokn na yupul nioknel, et kil ko yer nilmpel. Yipm korokn yuwa kil miepm yel.” \v 11 Aser an eipm sank na nti omoule mpurel aiyipmel ka ar kuserel, nti karokn apul niokn. Sankminamp antuol ka nti ar nkisel, nti karokn onto wat o pmin, nti ka nkis eik wakerp yipmel. \v 12 Sepmel Antelel Jisas Krais, ka ok an salpiknin ankilel, et an nakimp nti kuorelel mintenkel nak na, “Yipm nkis yitonk ntemp yo kitapm, ko yipm yupul nioknelmp irpm aiyipmel, nako niumuapm yuwa yipmel!” \v 13 Mamuntoump antelel nti, yipm korokn sirkemp sankminamp sepmel, et yipm korokn likip yupulp. \v 14 Kona emel korokn yupul sop sank kipe an apul sil wupm kipelelel, et yipm ko niuknuyuwap kil aipopelel. Yipm korokn yentempil yer nkis, et kil ko semp wulemaiak yupulp minamp koretel ankilel. \v 15 An karokn nak nako yipm nker kil nuarep omoule ka antemp yipm nkisemp wurokn yankerel. Karokn. Ko yipm yekei yapmonemp niuluknunel yoworkwonempil, sankantempil. Kil ka mamuntomp aiyipmel. \s Pol Nakimp Nti Sank Uknuael \p \v 16 An aiyimp Sepmel Antelel ko kil yentemp yipm eikusukn yer, yok yipm yapmonemp eperiepm. Et ko sopilelel, kipminkiriekn aiyipmel kako yer niuluknun waiepm. Kil ka weink yapmonemp niuluknunel eikusuknel. \v 17 Apm Pol, apm sankar yipm, awun sepm. Apm ankil akei onto apmelel apul sank akopiteknel apmelel keiye. Wupm eikusukn apmelel ko yipm serel, yitomparai sopilelel ka silel ka yitomparai apmelel. \v 18 Sepmel Antelel Jisas Krais kako wonempyupulp yipm ntitmuaken eikusukn na yupul yipm sepm. Kakilpe. Sank apmelel ka kipe, ka miniat.