\id 2CO ‑ Mixtec, Magdalena Peñasco
\h 2 Corintios
\mt1 Carta ku‑uu ni saꞌa Pablo ma ja ni tetniñu de nuu ñayii ka iyo ñuu Corinto ma
\c 1
\s1 Sukan ndákan‑tnuꞌu ñañaꞌa Pablo ma ñayii ni ka kandija Suꞌsi ma ja ka iyo i ñuu Corinto ma
\rem Saludo
\p
\v 1 Saña, kúu sa Pablo tee ni tetniñu Jesucristo ma ja sukan ni kuu ini maa Suꞌsi ma, te ka ndakan‑tnuꞌu ñañaꞌa ña sa jiꞌin ñani o Timoteo a ndaka ni ja ni ka nduu ni saꞌya Suꞌsi o a ja ka iyo ni ñuu Corinto ma jiꞌin ndaka ni ja jâ ni ka ndusiin ni nuu ja uꞌvi ma ja ka iyo ni ñuu Acaya ma.
\m
\v 2 Te maa Yuva o Suꞌsi ma jiꞌin Jesucristo iya tátnuni nuu o a, na skutaꞌvi ñaꞌa ya ja vii ja vaꞌa, te jin koo mani ni.
\s1 Sukan ni ndoꞌo ni neni Pablo ma
\rem Aflicciones de Pablo
\p
\v 3 Ja vii ja vaꞌa kúu Suꞌsi o, Yuva Jesucristo iya tátnuni nuu o a, ja kúu ya Yuva o iya ndaꞌvi ini xeen ma. Te maa ya kúu Suꞌsi o, iya ndátaa tnuꞌu kanu ini ma.
\m
\v 4 Vaa ora ka iyo o nuu tnundoꞌo tnuneni ma chi maa ya ndátaa tnuꞌu kanu ini nuu o a, sukan‑vaꞌa suni maa tnaꞌa tnuꞌu kanu ini ni taa ya ma, te jin ndakuaꞌa tna o nuu tnaꞌa o ñayii ka iyo nuu tnundoꞌo tnuneni ma.
\m
\v 5 Vaa visi kuaꞌa jichi ka ndoꞌo ka neni o ja kuechi ja ka ndikin o Cristo ma, kovaa sukan kuaꞌa jichi ndákaꞌan‑mani tna ñaꞌa maa Cristo ma.
\m
\v 6 Chukan kúu ja nú ka ndoꞌo ka neni sa ma chi ja vaꞌa maa ni kúu, vaa jin niꞌi ini sa naxe jin ndakaꞌan‑mani ñaꞌa sa te jin ndaniꞌi taꞌvi ni. Te nú Suꞌsi ma, ndákaꞌan‑mani ñaꞌa ya saña ma chi suni ja vaꞌa maa ni kúu chi suni kuu jin ndakaꞌan‑mani tna ñaꞌa sa, sukan‑vaꞌa jin kundee ni nuu tnundoꞌo tnuneni ma te jin ndaniꞌi taꞌvi ni, vaa maa Cristo ma ndakaꞌan‑mani ñaꞌa nú ka ndoꞌo ka neni ni sukan ka ndoꞌo ka neni sa a.
\m
\v 7 Te ka kukanu ini sa ja sukan ko kuu jiꞌin ni, vaa ka jini sa ja sukan ka ndoꞌo ka neni ni jiꞌin sa a, te chukan kúu ja jin ndaniꞌi ni tnuꞌu kanu ini jiꞌin sa.
\p
\v 8 Vaa ka kuni sa ja jin kuni ni sukan ni ka ndoꞌo, ni ka neni sa ñuu Asia ma, vaa ûni jâ ni ka skenaa ndiꞌi sa tnuꞌu kanu ini ja jin koteku sa nkuu.
\m
\v 9 Vaa jâ ka iyo yika sa ja jin kûu sa nkuu, te ni ka jani ini sa ja kuiti jâ ni ka skenaa sa maa sa ma nkuu. Kovaa saꞌa ni kuu, sukan‑vaꞌa jin kutuꞌva‑ka sa ja jin kukanu ini sa Suꞌsi ma te masu jin kukanu ini sa maa sa ma, vaa visi na jin kûu sa ma, kovaa Suꞌsi ma kúu iya ndáxteku ñayii ni ka jiꞌi ma.
\m
\v 10 Te suu ya ni saꞌa ja ni ka kaku sa, te suu ya saꞌa ja ka kaku sa onde vitna a, te ka kukanu ini sa ja maa ya saꞌa ja jin kaku sa ja ma jin kaꞌni ñaꞌa i.
\m
\v 11 Vaa ka chindee ñaꞌa ni, ka jikan‑taꞌvi ni nuu Suꞌsi ma ja jin kuu sa, te tnaꞌa ja vii ja vaꞌa táa Suꞌsi ma te kuaꞌa ñayii jin ndakuan‑taꞌvi nuu ya.
\s1 Navaꞌa ni ndaxsama Pablo ma kivi kiꞌin de ñuu Corinto ma
\rem Por qué Pablo pospuso su visita a Corinto
\p
\v 12 Te ka kutachi xeen sa, vaa maa Suꞌsi ma kúu iya chíndee ñaꞌa ja in jayiñuꞌu kúu ja sukan ka saꞌa sa, te onde maa Suꞌsi ma naꞌa ja ka kaꞌan ndaa ka kaꞌan ndija sa ka iyo sa ñuu ñayivi a, te ñukuun‑ka ka kuu sa jiꞌin ni, te chaꞌa chi masu ja sukan jani ini ñayii ñuu ñayivi a kúu chi ja ni skutaꞌvi ñaꞌa maa Suꞌsi ma kúu ja ka saꞌa sa saꞌa.
\m
\v 13 Vaa ñatuu ka tee sa nuu carta sa a in‑ka tnuꞌu ja masu kuu jin kaꞌvi ni te masu kuu jin jakuꞌni ini ni, suꞌva ni ka nduku sa naxe jin tee sa sukan‑vaꞌa kuu jin jakuꞌni ini ni te jin koo vaꞌa‑ni nuu Suꞌsi o a.
\m
\v 14 Vaa jâ ni ka jakuꞌni ini ni jaku nawa ka kuu sa nuu ni a, te chukan kúu ja kivi ndii Jesús iya tátnuni nuu o a, te jin kuni ni ja in jayiñuꞌu ka kuu sa nuu ni a, te sukan ka kuu ni nuu maa sa a.
\p
\v 15 Te kúkanu ini sa ja saꞌa ka jani ini tna ni, te chukan kúu ja ni jani ini sa ja jaan sa xinañuꞌu‑ka nuu ka iyo ni a, sukan‑vaꞌa kuu jan koto ñaꞌa sa, sana kiꞌin sa ñuu Macedonia ma, te ora ndii tuku sa ma, te ndayaꞌa sa jaan sa nuu ka iyo ni a, sukan‑vaꞌa jin ndakuni tnaꞌa tuku o in‑ka jichi.
\m
\v 16 Vaa jani ini sa ja xinañuꞌu kivi kiꞌin sa ñuu Macedonia ma, te jaan sa, te kivi ndakokuiñi sa ma, te jaan tuku sa in‑ka jichi, sukan‑vaꞌa maa ni jin ko kuu ñayii jin ndaskaka ichi ñaꞌa, te noꞌo sa ñuu Judea ma.
\m
\v 17 Ja ni jani ini sa saꞌa ma, ¿ka jani ini ni ja ñatuu ni jani vaꞌa ini sa? ¿Ka jani ini ni ja jani uu jani uni‑ni ini sa, sukan ka jani ini ñayii ma ja nú kuu xi ñaꞌa?
\m
\v 18 Vaa Suꞌsi ma chi in‑ni ja káꞌan ya te saꞌa ya. Chukan kúu ja ja ka kaxtnuꞌu sa a chi masu yika‑ni ja nú saa xi ñaꞌa kúu.
\m
\v 19 Saña jiꞌin Silvano a jiꞌin Timoteo a, ja ka kaxtnuꞌu sa tnuꞌu Jesucristo Saꞌya Suꞌsi ma nuu ni a chi masu ja nú saa xi ñaꞌa kúu chi in ja ndaa ndija kúu.
\m
\v 20 Vaa ndaka ja ni skuiso Suꞌsi ma chi saꞌa ya, te chukan kúu ja ora ka ndachiñuꞌu o Suꞌsi ma, te ka kaꞌan o ja ja maa Jesucristo ma, te sukan ko kuu, vaa ka kendoo ini o ja káꞌan ya ma.
\m
\v 21 Te maa Suꞌsi ma kúu iya saꞌa ja ka nukuiñi vaꞌa o nuu Cristo ma, te maa ya kúu iya chíndee ñaꞌa, te jin xndoo o ja uꞌvi ma.
\m
\v 22 Te ni chitnuni ñaꞌa ya ja kuenda maa ya ka kuu o, vaa ni chunee ya Xtumani maa ya ma ini anua o a, sukan‑vaꞌa jin konaꞌa o ja ndimaa jin koo o jiꞌin ya, te ko koto ñaꞌa ya ni‑kani ni‑jika.
\p
\v 23 Kovaa ñatuu jaan‑ka sa ñuu Corinto a, te maa Suꞌsi ma naꞌa sukan jani ini anua sa a vaa kuechi ja kúndaꞌvi ini ñaꞌa sa kúu.
\m
\v 24 Vaa ñatuu ka kuni sa ja jin kani ini ni ja ûni ka tatnuni sa nuu ni ja jin kondikin ni Suꞌsi ma sukan ka kuni maa sa, chi ñaꞌa. Suꞌva ja ka kuni sa kúu ja jin chindee tnaꞌa o, sukan‑vaꞌa jin koo sii ini ni, vaa jâ ni ka kandija ni Suꞌsi ma, te jin konukuiñi vaꞌa ni nuu ya.
\c 2
\p \v 1 Chukan kúu ja saꞌa ni jani ini sa, ja nuna jaan sa in‑ka jichi nuu ka iyo ni a chi masu saꞌa sa ja jin kuxii ini ni.
\m \v 2 Vaa nuna saꞌa sa ja jin kuxii ini ni, te vitna ja maa ni ka kuu ñayii ka saꞌa ja iyo sii ini maa sa a.
\m \v 3 Te saꞌa ni tee sa nuu carta sa ma, sukan‑vaꞌa nuna jaan sa ma, te ni a maa ni, ni a maa sa, másu jin kuxii ini o, vaa ja maa Suꞌsi ma, te ndimaa ka iyo sii ini o a, te kúkanu ini sa ja sukan kúu sii ini sa a te ka kusii ini tna ni.
\m \v 4 Vaa ndákani ndákaꞌvi ini sa, te kúxii xeen ini anua sa a, te ndaꞌyu sa jiꞌin ndenuu sa, nuu ni tee sa carta ni tetniñu sa nuu ni ma. Kovaa masu ja jin kuxii ini ni kúu ja ndákaꞌan sa a chi ja na jin kuni ni sukan kútoo ñaꞌa sa kúu.
\s1 Pablo ma, ni sakanu ini de ñayii ni saꞌa ja ni kuxii ini de ma
\rem Pablo perdona al ofensor
\p \v 5 Kovaa ñayii ni saꞌa ja ni kuxii ini sa ma chi masu nuu maa in‑ni sa ni saꞌa i chi onde nuu ndaka maa ni, kovaa masu ja skaa‑ka sa káꞌan sa kúu ja ndákaꞌan‑soꞌo sa nuu ni a.
\m \v 6 Vaa ja sukan ni ka ndakaꞌan‑soꞌo ndaka ni ma nuu tee yukan kuechi ni saꞌa de ma chi chukan‑ni kó kuu, te ndásaꞌa maa de kuenda.
\m \v 7 Te chukan kúu ja ndijin chi suꞌva jin sakanu ini ni de te jin ndakaꞌan‑mani ni de, sukan‑vaꞌa má kundee tnuꞌu xii ini ma nuu de ma te skenaa de maa de.
\m \v 8 Te ja jikan‑taꞌvi sa nuu ni kúu ja sukan jin saꞌa ni de ma, te kuni de ja ka kutoo ndija ni de.
\m \v 9 Vaa suni chukan kúu ja ni tee sa nuu ni a, te kunitnuni sa nú ka kandija ni ndaka ja káꞌan káchi sa a.
\m \v 10 Te nú ni ka sakanu ini ni tee yukan, te suni sakanu ini tna sa de. Te maa Cristo ma jini ja jâ ni sakanu ini sa de, vaa ja kúni sa kúu ja jin koo vaꞌa maa ni,
\m \v 11 sukan‑vaꞌa ni a vala ma kundee tachi ma nuu o, vaa jâ ka jini o sukan saꞌa i ja kúni i ja xndaꞌvi ñaꞌa i sukan‑vaꞌa kundee i nuu o ma.
\s1 Sukan ndí ini Pablo ma nuu iyo de ñuu Troas ma
\rem Ansiedad de Pablo en Troas
\p \v 12 Te nuu jâ ni kenda sa ñuu Troas ma ja kaxtnuꞌu sa tnuꞌu vii tnuꞌu vaꞌa Cristo ma nuu ñayii ñuu yukan, te visi vivii ni ndakune Iya Tátnuni ma ichi ja kaxtnuꞌu sa tnuꞌu vii tnuꞌu vaꞌa ya ma,
\m \v 13 kovaa ñatuu ni ndatatu ini anua sa a, vaa ñatuu ni ndaniꞌi sa ñani o Tito ma. Te chukan kúu ja ni ndakuan‑taꞌvi sa nuu tnaꞌa o ñayii yukan, te kuan noꞌo sa ñuu Macedonia ma.
\s1 Ja maa Cristo Jesús ma, te ndimaa ka kundee o nuu ja uꞌvi ma
\rem Triunfantes en Cristo
\p \v 14 Kovaa ka ndakuan‑taꞌvi o nuu Suꞌsi ma, ja saꞌa ya ja yoꞌo ja ka iyo o nuu Cristo Jesús ma, ka kundee o nuu ja uꞌvi ma, te ja sukan ka saꞌa ka kuu o ja vii ja vaꞌa ma vaa ka jini o Suꞌsi ma, te kénda tnuꞌu yukan ni‑kaꞌnu ñuu ñayivi a, sukan kénda in ja jáxiko asi.
\m \v 15 Vaa ndaka ja vii ja vaꞌa ka saꞌa ka kuu o ma ndákuaꞌa Cristo ma nuu Suꞌsi ma, te kénda i nuu ya ma sukan kúu in ja jáxiko asi, te sukan kúu tna i nuu ñayii jin ndaniꞌi taꞌvi ma, kovaa masu sukan kúu nuu ñayii ka skenaa maa i ma.
\m \v 16 Vaa nuu ñayii jin skenaa maa i ma chi ja vii ja vaꞌa saꞌa tnuꞌu Suꞌsi a ini anua o a chi ñatuu ka jatna ini i, vaa kuenda tnuꞌu ja sukan jáxiko in ñayii jâ ni jiꞌi ma kúu ka jani ini i. Kovaa nuu ñayii jin ndaniꞌi taꞌvi ma chi kénda vivii tnuꞌu Suꞌsi ma kuenda tnuꞌu ja jáxiko asi, te saꞌa i ja koteku o. Te chukan kúu ja masu ndevaꞌa‑ni ñayii kuu kaxtnuꞌu tnuꞌu Suꞌsi o a.
\m \v 17 Vaa ka iyo kuaꞌa ñayii ja ka jatniñu i tnuꞌu Suꞌsi ma ja jin niꞌi kuaꞌa i xuꞌun, kovaa saña chi masu ka saꞌa sa sukan ka saꞌa i ma. Vaa ka naꞌa sa ja Suꞌsi ma ni tetniñu ñaꞌa, te ja maa Jesucristo ma, te ka kaxtnuꞌu ndaa ka kaxtnuꞌu ndija sa, te ndeꞌya ñaꞌa maa Suꞌsi ma nú ndija sa ja ka kaꞌan sa a xi ñaꞌa.
\c 3
\s1 Sukan ni jinukuechi Pablo ma ja ni kaxtnuꞌu de tnuꞌu jaa ni skuiso Suꞌsi ma
\rem Ministros del nuevo pacto
\p \v 1 Te nú ka kaꞌan sa saꞌa ja masu ndevaꞌa‑ni ñayii kuu kaxtnuꞌu tnuꞌu Suꞌsi o a, ¿te ka jani ini ni ja ka kuvixi sa kúu ja ka kaꞌan sa sukan kúni Suꞌsi ma ja jin ko saꞌa o a? ¿Xi ka jani ini ni ja ka xndaꞌvi ñaꞌa sa? ¿Xi jiniñuꞌu ja jin taa sa in carta, te jin kuni ni sukan ka saꞌa ka kuu sa a? ¿Xi jin kakan sa ja jin tee ni in carta ja jin ndakaꞌan ni naxe ka saꞌa ka kuu sa, sukan ka saꞌa jaku‑ka ñayii ma?
\m \v 2 Kovaa masu nde jiniñuꞌu ndaka chukan, vaa maa ni, ja ka saꞌa ni ja vii ja vaꞌa ma chukan kúu carta ja ndákaxtnuꞌu naxe ka saꞌa ka kuu tna sa a, te ndaka ja vii ja vaꞌa ka saꞌa o a chi onde ini anua o a ka ke koo, te ka jini ndaka ñayii ma ja ka saꞌa ka kuu o a, te kuenda tnuꞌu ja ka kaꞌvi i in carta ma kúu.
\m \v 3 Sukan, te ndandaa naꞌa ja maa ni ka kuu carta ni tee Cristo ma te ni ka tetniñu maa sa, vaa ka saꞌa o sukan kúni ya ma. Kovaa masu jiꞌin tinta ndee nuu carta ma chi maa Xtumani Suꞌsi iya téku ma ni tee, te masu in nuu yuu ndee i chi in nuu kuñu vita, vaa ini anua o a ndee, vaa maa Xtumani Ndios ma saꞌa ja ka saꞌa o ja vii ja vaꞌa a.
\p \v 4 Te ja maa Cristo ma, te ka kukanu ini sa Suꞌsi ma ja sukan ni saꞌa ya ini anua o a.
\m \v 5 Te masu ja ka jini xeen sa kúu ja ka jani ini sa sukan ka kaꞌan ka kachi sa a chi ka ndakunitnuni sa ja nuu maa Suꞌsi ma vee ja ka kaꞌan ka kachi sa a.
\m \v 6 Te maa ya ni saꞌa ja kuu jin kunukuechi sa ja jin kaxtnuꞌu sa tnuꞌu jaa ja ni skuiso Suꞌsi ma. Te masu sukan‑ni ndee nuu tutu ma‑ni chi sukan saꞌa Xtumani Ndios ma ini anua o a kúu ja ka kaxtnuꞌu sa a. Vaa nuu tutu ma chi ndee ja nú ma saꞌa o sukan kúni Suꞌsi ma chi kûu o, kovaa Xtumani Ndios ma chi chíndee ñaꞌa ya ja saꞌa o ja vii ja vaꞌa te koteku o ni‑kani ni‑jika.
\p \v 7 Vaa tnuꞌu ni yo ndakaxtnuꞌu Moisés ma, ja ndee nuu yuu ma nuu káꞌan ja ñayii masu saꞌa sukan kúni Suꞌsi ma chi kûu i ma, te ni saꞌa i ja vivii ni yeꞌe niꞌni nuu de ma ja iyo jayiñuꞌu Suꞌsi ma nuu de ma, te ûni ñatuu ni ka kundee ñayii ñuu Israel ma jin kondeꞌya i nuu de ma ja iyo jayiñuꞌu Suꞌsi ma, te vitna ja nunuu‑ni, te ni yo naa ma.
\m \v 8 Te nú sukan ni yo kuu jiꞌin tnuꞌu ni yo ndakaxtnuꞌu Moisés ma, kuiti kuaꞌa‑ka jayiñuꞌu Suꞌsi ma koo ja sukan saꞌa Xtumani Ndios ma ini anua o a vitna.
\m \v 9 Vaa nú ni iyo jayiñuꞌu tnuꞌu ni yo ndakaxtnuꞌu Moisés ma ja káꞌan ja nú ma saꞌa o sukan kúni Suꞌsi ma chi kûu o ma, te kuiti koo kuaꞌa‑ka jayiñuꞌu tnuꞌu vii tnuꞌu vaꞌa Suꞌsi ma ja káxtnuꞌu sukan ni chunaa ya nuu tniñu o ja jin ndaniꞌi‑taꞌvi o te jin koteku o ni‑kani ni‑jika ma.
\m \v 10 Vaa in ja ni iyo jayiñuꞌu ma, te ni kenda in‑ka ja iyo kuaꞌa xen‑xeen‑ka jayiñuꞌu ma chi ni saꞌa i ja ni nuu‑ka jayiñuꞌu ja iyo onde xinañuꞌu ma.
\m \v 11 Vaa nú tnuꞌu kaꞌan ja nú ma saꞌa o sukan kúni Suꞌsi ma chi kûu o ma, ni iyo jayiñuꞌu i, te kuiti kuaꞌa xeen‑ka jayiñuꞌu koo nuu tnuꞌu kaꞌan sukan chíndee ñaꞌa Xtumani Ndios ma ja jin ko saꞌa o ja vii ja vaꞌa ma te jin koteku o ni‑kani ni‑jika ma.
\p \v 12 Chukan kúu ja vitna ja ka nevaꞌa o tnuꞌu kanu ini yukan te saña chi ûni ka kaꞌan ndiꞌi ka kaꞌan tuꞌu sa sukan kúni Suꞌsi ma ja jin ko kuu o ma.
\m \v 13 Te másu ko jin saꞌa sa sukan ni yo saꞌa Moisés ma ja ni yo jasi de nuu de ma jiꞌin in saꞌma, sukan‑vaꞌa másu jin kuni ñayii ñuu israelita ma sukan naa jayiñuꞌu iyo ja ndiꞌi ma, vaa ja ka kaꞌan sa vitna a chi koo i ni‑kani ni‑jika.
\m \v 14 Kovaa maa ñayii yukan, ñatuu ni ka kuni i ja jin jakuꞌni ini i, te onde vitna, te ora ka kaꞌvi i tnuꞌu ni skuiso Suꞌsi ma onde xiꞌna‑ka ma, te maa saꞌma yukan jasi nuu i ma, te ñatuu ka jakuꞌni ini i ja káꞌan ma. Te masu na in kuu xtandiyo saꞌma ma, nú masu ja onde maa Cristo ma xtandiyo.
\m \v 15 Te onde vitna ora ka kaꞌvi i tnuꞌu ni tee Moisés ma ja ni tatnuni Suꞌsi ma, te kuenda tnuꞌu ja in saꞌma ndesi janitnuni i ma, te ñatuu ka jakuꞌni ini i.
\m \v 16 Kovaa kivi jin kandija i te jin kuan‑taꞌvi i Cristo Iya Tátnuni ma, te xtandiyo ya saꞌma ka ndesi janitnuni i ma, te jin jakuꞌni ini i.
\m \v 17 Vaa Iya Tátnuni ma, suni maa ya kúu Xtumani Ndios ma, te ñayii iyo jiꞌin Xtumani Iya Tátnuni ma chi nune ndaꞌa nuu i ma, te kuu saꞌa i ndaka ja vii ja vaꞌa ma.
\m \v 18 Chukan kúu ja yoꞌo chi ñatuu‑ka na saꞌma ka ndesi nuu o a, te sukan kúu espeju ma, sukan ka kuu o, ja ka saꞌa o ja vii ja vaꞌa ma, sukan‑vaꞌa jin kuni ñayii ma jayiñuꞌu Iya Tátnuni ma. Te ndi‑kivi ndi‑kivi ve ndaxsama ñaꞌa ya sukan‑vaꞌa jin ko kuu o sukan saꞌa sukan kúu maa ya ma, te ndi‑kivi ndi‑kivi, te ka niꞌi‑ka o jayiñuꞌu ya ma, vaa sukan saꞌa maa Xtumani Iya Tátnuni ma iya ka iyo jiꞌin o a.
\c 4
\p
\v 1 Vaa sukan kúndaꞌvi ini ñaꞌa Suꞌsi o a, te chukan kúu ja jâ ni kenda nuu ndaꞌa sa a ja sukan jin kunukuechi sa nuu ya, te masu jin kuita sa.
\m
\v 2 Te chukan kúu ja saña chi ñatuu ka jatna ini sa ja jin saꞌa sa in ja uꞌvi ja saꞌa ja jin ndakukan‑nuu sa, ni a koo jin nduku sa naxe jin saꞌa sa ja jin xndaꞌvi sa ñayii ma jiꞌin tnuꞌu Suꞌsi a. Suꞌva ja ka kuni sa kúu ja na jin kuni ñayii ma tnuꞌu ndaa Suꞌsi ma, te jin ndakunitnuni ndaka i ja vii ja vaꞌa kúni Suꞌsi ma ja jin ko saꞌa i ma.
\m
\v 3 Kovaa nú ka iyo‑ka ñayii ja ñatuu ka jakuꞌni ini i tnuꞌu vii tnuꞌu vaꞌa ka kaxtnuꞌu sa a, te kuechi maa i ka kuu ja ñatuu ka jakuꞌni ini i te jin skenaa i maa i.
\m
\v 4 Vaa tachi iyo ñuu ñayivi a, ni jasi i janitnuni ñayii ñatuu ka kandija Suꞌsi ma, sukan‑vaꞌa masu jin jakuꞌni ini ñayii ma tnuꞌu vii tnuꞌu vaꞌa maa Cristo ma, iya iyo jayiñuꞌu ma, iya kaa sukan kaa maa Suꞌsi ma.
\m
\v 5 Vaa ja ka kaxtnuꞌu sa a, masu ka kaxtnuꞌu sa naxe ka kuu maa sa, suꞌva ja ka kaxtnuꞌu sa a kúu ja Jesucristo ma kúu iya tátnuni nuu o a, te saña chi tee ni tetniñu ñaꞌa maa Iya Tátnuni ma ja jin kunukuechi sa nuu maa ni ka kuu sa, vaa ka kutoo sa Jesús ma te ka saꞌa sa sukan kúni ya ma.
\m
\v 6 Vaa Suꞌsi ma, ni tatnuni ya ja ndatnuu ñuꞌu ya ma nuu nee xeen ma, te ni ndaxtnuu ya ñuꞌu ya ma ini anua o a, te onde sukan saa ni ka jini o jayiñuꞌu Suꞌsi ma, ja ni ka jini o Jesucristo ma.
\s1 Jín kukanu ini o ja téku Jesús ma te chíndee ñaꞌa ya
\rem Viviendo por la fe
\p
\v 7 Kovaa ka nevaꞌa sa in ja vaꞌa xeen ja jin kaxtnuꞌu sa nuu ñayii ma, visi sukan‑ni kúu in vasu ñuꞌú‑ni ka kuu sa. Kovaa sukan, te jin kuni ñayii ma ja maa Suꞌsi ma kúu iya táa tnuꞌu ndee tnuꞌu ndatnu ka nevaꞌa sa a ja kúu ka kaꞌan ka kachi sa tnuꞌu vii tnuꞌu vaꞌa maa ya a, te masu ja ka kuu xeen maa sa kúu ja kúu ka kaꞌan sa a.
\m
\v 8 Chukan kúu ja masu nde ka kuxii ini sa, visi ka ndoꞌo ka neni sa a. Xi visi ka jakoxtnaꞌa ka jakoxtnii ja ka saꞌa sa a, kovaa Suꞌsi ma saꞌa ja ka iyo kuee ini sa te vivii ka ke koo ndaka.
\m
\v 9 Visi ka sondikin ñaꞌa i, kovaa masu nde xndoo ñaꞌa Suꞌsi ma. Visi ka saꞌa ndevaꞌa ñaꞌa i, kovaa masu nde ka kundee i ja jin xnaa ñaꞌa i.
\m
\v 10 Chukan kúu ja ndaka nuu kuan koo sa ma chi ndimaa ka iyo sa ja jin ndoꞌo sa sukan ni ndoꞌo ni neni Jesús ma nuu ni jiꞌi ya ma, sukan‑vaꞌa jin kuni ñayii ma ja téku Jesús ma, ja sukan ka kanda sa ma.
\m
\v 11 Vaa saña chi nani ka teku sa a chi ka iyo yika sa ja jin kûu sa, kuechi ja ka kaxtnuꞌu sa tnuꞌu vii tnuꞌu vaꞌa Jesús ma, sukan‑vaꞌa jin kuni ñayii ma ja téku Jesús ma te chíndee ñaꞌa ya ja jin koteku sa ni‑kani ni‑jika, visi na jin kûu sa ñuu ñayivi a.
\m
\v 12 Te visi na jin kaꞌni ñaꞌa i saña, kovaa ndijin chi jâ ni ka ndaniꞌi taꞌvi ni te jin koteku tna ni ni‑kani ni‑jika.
\p
\v 13 Vaa sukan ndee tnuꞌu Suꞌsi ma: “Ni kukanu ini sa Suꞌsi ma, te ni kaꞌan sa”, saꞌa káꞌan. Te sukan tna ni ka saꞌa sa, vaa ni ka kukanu ini sa Suꞌsi ma, te ni ka kaꞌan tna sa tnuꞌu vii tnuꞌu vaꞌa Cristo ma nuu ni a.
\m
\v 14 Vaa ka jini sa ja maa Suꞌsi iya ni ndaxteku Jesús Iya Tátnuni ma, te ndaxteku tna ñaꞌa ya, sukan ni ndaxteku ya Jesús ma, te saꞌa ya ja jin ndenda koo ndaka o nuu ya ma.
\m
\v 15 Vaa ndaka chaꞌa ka ndoꞌo ka neni sa, vaa kuechi ja ka kutoo ñaꞌa sa. Saꞌa ka saꞌa sa, sukan‑vaꞌa kuaꞌa xeen‑ka ni jin ndaniꞌi ja vii ja vaꞌa ja skutaꞌvi ñaꞌa Suꞌsi ma, sukan‑vaꞌa kukuaꞌa‑ka o ja jin ndakuan‑taꞌvi o nuu Suꞌsi ma, te kukuaꞌa‑ka jayiñuꞌu nuu ya ma.
\m
\v 16 Te chukan kúu ja masu nde ka xtaya sa a. Visi yikikuñu sa a, ve jinyavi i, kovaa ini anua sa chi ndi‑kivi ndi‑kivi ve ndujaa‑ka i.
\m
\v 17 Vaa ja ka ndoꞌo ka neni o ñuu ñayivi a chi vala‑ni kúu chi sani te yaꞌa‑ni. Kovaa ja jin ndaniꞌi o ma chi in jayiñuꞌu kaꞌnu xen‑xeen‑ka ko kuu, te masu ndiꞌi masu naa i, vaa ni‑kani ni‑jika ko kuu.
\m
\v 18 Chukan kúu ja máko jin ko ndi ini o ja jin niꞌi o ja ka ndeꞌya o ñuu ñayivi a, suꞌva jin ko ndi ini o ja jin niꞌi o ja taa Suꞌsi ma tnaꞌa ja masu ka ndeꞌya o vitna a. Vaa ja ka ndeꞌya o ma chi ja jin yaꞌa‑ni ka kuu, te ja masu ka ndeꞌya o ma chi ja koo ni‑kani ni‑jika ko kuu.
\c 5
\p
\v 1 Vaa jâ ka jini o ja yikikuñu o a chi kuenda tnuꞌu ja in veꞌe ndaꞌvi in veꞌe kee‑ni kúu i. Te chukan kúu ja visi na naa i, kovaa ja ka nevaꞌa tuꞌva o in yikikuñu jaa kuenda tnuꞌu ja in veꞌe vavaꞌa kúu i, ja ni satuꞌva Suꞌsi ma onde andivi ma ja ndutaꞌvi ini anua o a, te koo o ni‑kani ni‑jika, vaa sukan ni jani ini ya te ni satuꞌva ya ma.
\m
\v 2 Chukan kúu ja ûni ka ndiyo ini sa ja jin nduu yikikuñu sa a in veꞌe vavaꞌa nuu koo anua sa a onde andivi ma.
\m
\v 3 Vaa chukan kúu ja nuna koo tuꞌva in yikikuñu jaa nuu koo ini anua o a chi kuenda tnuꞌu ja ni ndinuu o in saꞌma te masu koo vichi o kúu.
\m
\v 4 Chukan kúu ja yoꞌo ja kuenda tnuꞌu ja ka iyo o in veꞌe ndaꞌvi in veꞌe kee ma chi ka ndiyo ndaꞌvi kuiti ini o ja jin ndutaꞌvi anua o in yikikuñu jaa ja ni satuꞌva Suꞌsi ma, vaa ñatuu ka kuni o ja jin koo vichi anua o a chi suꞌva na koo in nuu koo i ma, sukan‑vaꞌa yikikuñu o a ja iyo ja kûu i ma, te nduu i ja koteku ni‑kani ni‑jika ma.
\m
\v 5 Te maa Suꞌsi ma kúu iya satuꞌva ñaꞌa ja saꞌa ko kuu, vaa ja ni taa ya Xtumani Ndios ma, sukan‑vaꞌa jin konaꞌa o ja iyo tuꞌva ja jin niꞌi o ja skutaꞌvi ñaꞌa Suꞌsi ma.
\p
\v 6 Chukan kúu ja ndimaa jín kukanu ini o nuu Suꞌsi ma. Vaa ka jini o ja nani ka iyo o nuu yikikuñu o a chi kuenda tnuꞌu ja ka iyo jika o nuu Iya Tátnuni ma kúu.
\m
\v 7 Vaa vitna masu nde ka ndeꞌya o Suꞌsi ma jiꞌin nuu o a, kovaa ka kukanu ini xen‑xeen o ya ja ko kuu sukan jâ ni skuiso ya ma.
\m
\v 8 Te ûni ka ndetu kaꞌnu kuiti o, te ka kuu ini xeen o ja jin xndoo o yikikuñu o ja ka nevaꞌa o vitna a, sukan‑vaꞌa jin koo yatni‑ka o nuu Suꞌsi o Iya Tátnuni ma.
\m
\v 9 Chukan kúu ja visi ka iyo yatni o ja sani te ndenda koo o nuu iyo ya ma, xi jin koteku kani‑ka o ñuu ñayivi a, kovaa ja ka ndi ini o kúu ja ndimaa jin ko saꞌa o sukan játna ini ya ma.
\m
\v 10 Vaa jín konaꞌa o ja iyo ja ndenda koo ndaka o nuu núkoo Cristo ma ja kaꞌnde ya tniñu ndaka o ma, sukan‑vaꞌa ñayii ni ka yo saꞌa ja vaꞌa ma ñuu ñayivi a, jin ndaniꞌi i ja vaꞌa ma, te ñayii ni ka iyo saꞌa ja uꞌvi ma ñuu ñayivi a, jin ndaniꞌi maa i ja uꞌvi ma.
\s1 Ka jinukuechi de nuu Suꞌsi ma ja ka ndakaxtnuꞌu de sukan kúni Suꞌsi ma ja jin ndumani ñayii ma jiꞌin ya ma
\rem El ministerio de la reconciliación
\p
\v 11 Jâ ka jini o ja jiniñuꞌu ja jin koyuꞌu o Iya Tátnuni ma, vaa ndakan ya kuenda nawa ka saꞌa o ma. Chukan kúu ja ka ndi ini sa ja ka kaxtnuꞌu sa tnuꞌu vii tnuꞌu vaꞌa Suꞌsi ma nuu ñayii ma. Te Suꞌsi ma chi jini ya naxe ka saꞌa ka kuu sa, te ka kukanu ini sa ja ndijin tna chi ka jini ni naxe ka saꞌa ka kuu sa.
\m
\v 12 Te ja ka ndakaꞌan sa saꞌa nuu ni a, masu ja ka kuvixi sa kúu chi ja ka kuni sa kúu ja jin ndasaꞌa maa ni kuenda naxe ka saꞌa ka kuu sa ja ka iyo sa jiꞌin ni ma te nawa ni ka kaxtnuꞌu sa nuu ni ma, sukan‑vaꞌa jin niꞌi ini ni naxe jin kuñaꞌa ni nuu ñayii ka saꞌa tnuꞌu ja vaꞌa‑ni ka saꞌa maa i ma. Kovaa masu nde ka jini i naxe ka iyo ndija ini anua i ma.
\m
\v 13 Vaa visi ka jani ini jaku ñayii ma ja ni ka nduneé xini sa a ja ka saꞌa sa saꞌa, kovaa masu ka ndi ini sa ja ka kaꞌan i sukan, vaa nuu Suꞌsi ma ka jinukuechi saña. Kovaa nú ka jani ini maa ni ja ka ñuꞌu kaji ini sa ja ka saꞌa ka kuu sa saꞌa chi ja vaꞌa maa ni ka kuu.
\m
\v 14 Vaa kuu‑ni ni ka jakun‑tnuni ini sa sukan kútoo ñaꞌa Cristo ma, sani te ni ka ndi ini sa ja jin kaxtnuꞌu sa saꞌa nuu ni: ja maa in‑ni Cristo ma ni jiꞌi nuu tniñu ndaka o ma, te chukan kúu ja ndaka yoꞌo ja ni ka kandija o ya ma, kuenda tnuꞌu ja ni ka jiꞌi tna o, vaa ni ka xndoo kuiti o ja uꞌvi ma.
\m
\v 15 Te jín konaꞌa o ja ni jiꞌi ya ja jin kuu ndaka o, sukan‑vaꞌa yoꞌo ja ni ka kandija o ya ma te ka teku o a, máko jin ko saꞌa‑ka o sukan ka kuu ini maa o, suꞌva jín ko saꞌa o sukan kúni maa iya ni jiꞌi nuu tniñu o ma, te ni ndateku ya sukan‑vaꞌa jin koo vaꞌa maa o.
\m
\v 16 Chukan kúu ja vitna chi yoꞌo chi masu ka ndi ini‑ka o naxe ka ndaa ka iyo maa ñayii ma, vaa kútoo ñaꞌa Suꞌsi ma ndaka o. Te visi yoꞌo ni ka yo jani ini o ja kuꞌu maa Cristo ma kúu ja ni waꞌa ya tnuꞌu ja ni jiꞌi ya nuu krusi ma, kovaa vitna masu sukan ka jani‑ka ini o.
\m
\v 17 Chukan kúu ja nú na in iyo nuu ndaꞌa Cristo ma, in ñayii ni ndasaꞌa jaa ñaꞌa Cristo ma kúu i, te ndaka ja ni yo saꞌa, ni yo kuu i onde xiꞌna‑ka ma, ñatuu saꞌa‑ka i, te ja saꞌa ja kúu i vitna ma chi ndimaa ja vaꞌa ja vii kúu. \fig |GR-gn10n.tif|span|||Ñayii iyo jiꞌin Cristo ma chi ni xndoo i ndaka ja uꞌvi ma|5:17\fig*
\m
\v 18 Vaa ndaka chaꞌa chi nuu Suꞌsi ma vee, nuu iya ni ndakaꞌan‑mani ñaꞌa ma ja maa Cristo ma, te ni tatnuni ya ja jin kunukuechi sa nuu ya ja jin ndakaxtnuꞌu sa sukan jin ndumani o jiꞌin ya.
\m
\v 19 Te ja maa Cristo ma, te kuu jin ndumani ñayii ñuu ñayivi a jiꞌin Suꞌsi ma, te masu ndakeꞌen kuenda‑ka ya ja uꞌvi ni ka yo saꞌa i nuu ñatuu jin kuni‑ka i ya ma. Te ni xndoo ya nuu ndaꞌa sa ja jin ndakaxtnuꞌu sa sukan kuu jin ndumani ñayii ma jiꞌin Suꞌsi ma.
\m
\v 20 Chukan kúu ja saña chi maa Suꞌsi ma ni tetniñu ñaꞌa, te ja maa Cristo ma, te jin ndakaxtnuꞌu sa sukan ndakaꞌan‑mani ñaꞌa ya ma. Te vitna, te ka kaꞌan ka kaꞌan sa nuu ni ja maa Cristo ma, te jin ndumani ni jiꞌin Suꞌsi ma, te jin konaꞌa ni ja maa Suꞌsi ma káꞌan káꞌan ja saꞌa jin saꞌa ni, visi saña ka kaꞌan ya.
\m
\v 21 Vaa Cristo ma, ni‑in ja uꞌvi ñatuu ni saꞌa ya, kovaa ni saꞌa Suꞌsi ma ja suu ya ni ndakuiso kuechi o ma. Te ni chunaa ya nuu tniñu o ma, sukan‑vaꞌa ja maa ya, te yoꞌo ja ni ka kandija o ya ma, ñatuu‑ka na kuechi ka ndiso o nuu Suꞌsi ma, te jin ko kuu o ñayii ka saꞌa ja vaꞌa ja ndaa nuu ya.
\c 6
\p
\v 1 Chukan kúu ja saña ja ka jinukuechi sa nuu Suꞌsi ma, te ka ndakaꞌan‑soꞌo sa nuu ni ja másu ko jin saxiko ni ja vii ja vaꞌa ni skutaꞌvi ñaꞌa ya ma.
\m
\v 2 Vaa saꞌa káꞌan tnuꞌu Suꞌsi ma:
\q1 Kivi ni jan‑taꞌvi ñaꞌa ni ma, te ni jinisoꞌo sa ja káꞌan ni ma,
\q2 te kivi ndóꞌo néni ni ma, te ni chindee ñaꞌa sa, te ni kaku ni.
\m Saꞌa káꞌan tnuꞌu Suꞌsi ma.
\p Te vitna kúu kivi kuan‑taꞌvi ni ya te ndakuan‑taꞌvi ñaꞌa ya, te vitna kúu kivi iyo ja kuu kaku ni nuu ja uꞌvi ma.
\p
\v 3 Te saña chi ñatuu nde ka jaꞌnu ndee kuiti sa nuu ni‑in ñayii ma ja ma ki koo i ki tnaꞌa i Suꞌsi o a, sukan‑vaꞌa ñatuu na in ko kaꞌan ndevaꞌa siki tniñu ka saꞌa sa ja ka jinukuechi sa nuu Suꞌsi o a.
\m
\v 4 Vaa ka kanda sa, visi ka ndoꞌo ka neni sa, te suni ka kanda sa nawa ka jiniñuꞌu sa ma xi ora ka ndi ini xeen sa ma, te sukan, te ka kaxtnuꞌu sa ja ka jinukuechi sa nuu Suꞌsi ma.
\m
\v 5 Xi visi ka kani ñaꞌa i ma, xi visi ka chinee ñaꞌa i vekaa ma, xi visi ka skaꞌan tnaꞌa i ja jin saꞌa ndevaꞌa ñaꞌa i ma, xi visi ka satniñu xeen‑ka sa, xi visi ka ndito xeen sa, xi visi ka kokon ka yichi sa, kovaa ka kanda sa.
\m
\v 6 Te ka ndi ini sa ja ñatuu‑ka na ja uꞌvi jin koo ini anua sa a, te ka jini sa ja tnuꞌu ka kaxtnuꞌu sa a chi tnuꞌu ndaa tnuꞌu ndija maa Suꞌsi ma kúu, te ñatuu ka kuyachi ini sa, te inuvaꞌa ini sa, vaa ka iyo sa jiꞌin Xtumani Ndios ma, te ka kutoo ndija ñaꞌa sa,
\m
\v 7 te ka kaꞌan ndaa ka kaꞌan ndija sa, vaa iyo tnuꞌu ndee tnuꞌu ndatnu Suꞌsi ma jiꞌin sa, te ka kundee sa nuu ja uꞌvi ma, vaa ka saꞌa sa sukan káꞌan tnuꞌu ndaa tnuꞌu ndija Suꞌsi ma.
\m
\v 8 Iyo naxe ka kaꞌan vii ka kaꞌan vaꞌa i ja jin kuu sa, te iyo naxe ka kaꞌan i ja masu ja vaꞌa kúu ja ka saꞌa sa a, te ka kaꞌan i ja ka xndaꞌvi sa ñayii ma, kovaa masu sukan iyo chi saña chi ka kaꞌan ndaa ka kaꞌan ndija sa.
\m
\v 9 Te ñayii ma chi visi ka jini vii ka jini vaꞌa ñaꞌa i, kovaa ka saꞌa i tnuꞌu ja masu nde ka jini ñaꞌa i te ka saꞌa ndevaꞌa ñaꞌa i. Visi ka iyo yika sa ja sani te jin kûu sa, kovaa ja maa Suꞌsi ma, te ka teku sa. Visi ka xndoꞌo ka xneni ñaꞌa i, kovaa ñatuu ka kundee i ja jin kaꞌni ñaꞌa i.
\m
\v 10 Kuenda tnuꞌu ja ka kuxii ka kundaꞌvi ini sa, kovaa ka iyo sii ini xeen ini anua sa a nuu Suꞌsi ma. Kuenda tnuꞌu ja ka kundaꞌvi xeen sa, kovaa ka saꞌa sa ja kuaꞌa ñayii, ka nduxiku xeen i nuu Suꞌsi ma vaa jin ndaniꞌi taꞌvi i. Visi ñatuu kuiti nawa ka niꞌi ka tnaꞌa sa ñuu ñayivi ya, kovaa ja maa Suꞌsi ma, te ñatuu kuiti nawa jaꞌni tna ñaꞌa i.
\p
\v 11 Ndijin ja ni ka nduu ni saꞌya Suꞌsi o a ja ka iyo ni ñuu Corinto a, ni ka kaꞌan ndaa, ni ka kaꞌan ndija sa nuu ni, te ñatuu nawa ni ka chuꞌu sa ja ma jin kaxtnuꞌu sa nuu ni a.
\m
\v 12 Saña chi ka kutoo ndija ñaꞌa sa, kovaa ndijin chi ñatuu.
\m
\v 13 Te jin saꞌa ni sukan ka saꞌa sa a, vaa kuenda tnuꞌu ja saꞌya sa ka kuu ni, te ka ndakaꞌan‑soꞌo sa nuu ni ja jin ndakune ni ini anua ni a te jin kutoo ndija ñaꞌa ni.
\s1 Iyo Suꞌsi iya teku ma ini anua o a
\rem Somos templo del Dios viviente
\p
\v 14 Jin konaꞌa ni ja másu ko jin tnandaꞌa ni jiꞌin ñayii ñatuu ka kandija Suꞌsi ma, vaa masu chindee ñaꞌa i ja jin koo vaꞌa ni nuu Suꞌsi ma. ¿Xi inuu kúu nuu tnuu ñuꞌu ma jiꞌin nuu nee ma?
\m
\v 15 ¿Xi kuu jin ketnaꞌa ini Cristo ma jiꞌin tachi ma? Chukan kúu ja masu kuu jin ketnaꞌa ini ñayii ka kandija Suꞌsi ma jiꞌin ñayii ñatuu ka kandija Suꞌsi ma.
\m
\v 16 Jin konaꞌa ni ja ndijin chi ini anua ni a iyo Suꞌsi téku ma. Te chukan kúu ja kuenda tnuꞌu ja in veꞌe nuu iyo Suꞌsi ma ka kuu ni. Te naku xi játna ini Suꞌsi téku ma ja jin ndachiñuꞌu ni tnaꞌa ja masu Suꞌsi ka kuu ma. Vaa saꞌa káꞌan Suꞌsi ma:
\q1 Koo sa jiꞌin ñayii a,
\q2 te kuaꞌan vee sa ko kuu sa neꞌun i ma,
\q1 te maa sa ko kuu Suꞌsi i,
\q2 te maa i jin ko kuu ñuu maa sa.
\m
\v 17 Chukan kúu ja káꞌan tna Iya Tátnuni ma:
\q1 Jin kakayata ni neꞌun ñayii ka saꞌa ja uꞌvi ma,
\q2 te máko jin kuꞌun kuiti ini ni ja jin ko saꞌa ni ja uꞌvi ka saꞌa i ma,
\q1 te ndakuan‑taꞌvi ñaꞌa sa,
\q1
\v 18 te maa sa ko kuu Yuva ni,
\q2 te ndijin chi jin ko kuu ni sayii sa jiꞌin sasiꞌi sa.
\q1 Saꞌa káꞌan iya kúu saꞌa ndaka ma.
\c 7
\p \v 1 Chukan kúu ja ndijin ja kútoo ñaꞌa sa, nú sukan ni skuiso Suꞌsi ma ja jin niꞌi o ndaka ja vii ja vaꞌa ja taa ya ma, jín kuꞌun ini o ja máko jin saꞌa o ni‑in ja uꞌvi ja játna ini yikikuñu o a ja saꞌa o ma, te ni a in ja uꞌvi máko jin kuaꞌa o tnuꞌu ja kun‑nee i ini anua o a, sukan‑vaꞌa jin koo vii jin koo ndoo ni‑kaꞌnu ni‑tuꞌu o nuu Suꞌsi ma. Te máko jin saꞌa‑ka o ni‑in‑ka ja uꞌvi ma, vaa ka naꞌa o ja ndeꞌya ñaꞌa Suꞌsi ma, te ndakan ya kuenda nuu o a.
\s1 Ni kusii ini Pablo ma ja ni ka ndakani, ni ka ndakaꞌvi ini ñayii ñuu Corinto ma
\rem Regocijo de Pablo al arrepentirse los corintios
\p \v 2 Máko jin saxiko ñaꞌa ni, te jin kuan‑taꞌvi ni tnuꞌu ka kaꞌan sa a, vaa jin konaꞌa ni ja masu nama uun ka saꞌa ñaꞌa sa ja uꞌvi, ni a jin saꞌa sa ja jin kuxii ini ni, te ni a in ni masu nama uun ka xndaꞌvi ñaꞌa sa.
\m \v 3 Masu ja ni kaꞌan sa saꞌa te jin kani ini ni ja xtekuechi ñaꞌa sa kúu, vaa jâ ni kaꞌan sa onde xiꞌna‑ka ma ja kútoo xeen ñaꞌa sa, te visi na jin kûu sa xi jin koteku sa, kovaa ndimaa jin koo kaa o.
\m \v 4 Te ni‑yuꞌu ni‑ini sa káꞌan sa nuu ni a, vaa kúkanu ini xeen ñaꞌa sa, te kútachi xeen sa ja sukan ka saꞌa ka kuu ni a. Te kúsii ini xeen sa, visi ka ndoꞌo ka neni sa, vaa jini sa ja ka iyo vaꞌa ni nuu Suꞌsi a.
\m \v 5 Vaa ja ndaa kúu ja nuu ni ka kenda koo sa ñuu Macedonia ma chi ñatuu ni ka ndatatu yikikuñu sa a. Vaa ndimaa ni ka ndoꞌo, ni ka neni sa ja ni ka saꞌa ñaꞌa ñayii yukan ma, te ka yuꞌu ka yuꞌu‑nka ini anua sa a.
\m \v 6 Kovaa Suꞌsi ma chi ndákuaꞌa ya tnuꞌu kanu ini ñayii kúxii kúndaꞌvi ini i ma ja sukan ndóꞌo néni i ma, vaa nuu ni tetniñu ya Tito ma ni jaan de, te ni ka ndusii ini xeen sa ja ni ka ndatnaꞌa sa jiꞌin de ma.
\m \v 7 Kovaa masu kuechi ja ni ka ndatnaꞌa sa jiꞌin de ma‑ni kúu ja ni ka ndusii ini sa ma, chi suni ja ni ndakani de sukan ni ndusii ini maa de ja ni jini de sukan ka ndi ini ni ja kuu sa a, vaa ka kuxii ini ni sukan ka ndoꞌo ka neni sa a, te ka kuni ni ja jin kuni ñaꞌa ni, te ja ni jinisoꞌo sa sukan ma, te ni ndusii ini xeen‑ka sa.
\m \v 8 Vaa nuu ni tetniñu sa carta ni tee sa ma, ni saꞌa sa ja ni ka kuxii ini ni nkuu, te ja ni jini sa sukan ma chi ni ndakani ini sa ja ni tee sa sukan ma. Kovaa nuu ni jini sa ja visi ni ka kuxii ini ni jaku ja sukan ni tee sa ma,
\m \v 9 te vitna chi kúsii ini xeen sa, kovaa masu kuechi ja sukan ni ka kuxii ini ni ma kúu chi kúsii ini sa, vaa ja sukan ni ka kuxii ini ni ma, te ni ka ndakani, ni ka ndakaꞌvi ini ni, te ni ka nukuiñi ndaa ni nuu Suꞌsi o a. Te saꞌa ni kuu, vaa maa Suꞌsi ma ni kuni ja sukan jin kuxii ini ni ma, sukan‑vaꞌa ma jin skenaa ni maa ni. Te chukan kúu ja saña, masu na ja uꞌvi ni saꞌa ñaꞌa sa.
\m \v 10 Vaa nú maa Suꞌsi ma káꞌan niꞌi nuu o ma ja masu vaꞌa‑ni yikuu o saꞌa o ma, te kúxii ini o ma chi ja vaꞌa kúu chi saꞌa i ja ndakani ndakaꞌvi ini o, te nukuiñi vaꞌa o nuu ya te ndaniꞌi taꞌvi o. Chukan kúu ja másu ko ndakani ini o ja sukan ni ndoꞌo o ma. Kovaa nuna kuxii ini o ja káꞌan niꞌi Suꞌsi ma nuu o te ko kuliva o sukan ka saꞌa ñayii ñatuu ka jini Suꞌsi ma chi ja saꞌa o sukan chi saꞌa i ja kûu o te skenaa o maa o ma.
\m \v 11 Chukan kúu ja sukan ni ka kuxii ini ni jaku ma chi maa Suꞌsi ma ni ndakaꞌan‑soꞌo nuu ni ma, sukan‑vaꞌa jin ndakani jin ndakaꞌvi ini ni te jin koo vaꞌa ni nuu ya. Te jin ko ndi ini‑ka ni ja jin kuu sa, te jin chindee‑ka ñaꞌa ni ja na jin kaku sa nuu ñayii ka kaꞌan ja kuechi sa kúu ja ni saꞌa tee yukan sukan ma. Te ja ni ka kaꞌvi ni carta ni tetniñu sa ma, te ni ka ndakiti xeen ini ni nuu tee yukan. Te ni ka ndayuꞌu xeen ni nuu Suꞌsi ma. Te ûni ni ka kuni ni ja jin kuni ñaꞌa ni, te ûni ni ka kuni ni ja na kundaa kuechi tee yukan ma, sukan‑vaꞌa jin kuni ñayii ma ja kuechi maa de kúu ma.
\m \v 12 Vaa ja ni tee sa ma chi masu ni tee sa ja kuechi tee ni saꞌa ja uꞌvi ma, ni ja kuechi ñayii ni ndoꞌo ja uꞌvi ma chi ja kúni sa kúu ja jin kuni ni sukan ndí ini xeen sa naxe jin koo vaꞌa ni nuu Suꞌsi ma.
\m \v 13 Chukan kúu ja ni ka ndusii ini sa ja jâ ni ka ndusii ini ni a, kovaa ja ni ka ndusii ini‑ka sa kúu ja sukan ni ndusii ini tna ñani o Tito ma ja sukan vivii ka kuu ni nuu Suꞌsi ma.
\m \v 14 Vaa visi jâ ni jiñaꞌa sa de ja vii ja luu ka saꞌa ka kuu ni nuu Suꞌsi ma, sana ni jaan de nuu ka iyo ni a, kovaa masu na ja kan‑nuu ni tnaꞌa sa, vaa nuu ni jaan maa de ma, te ni jini de ja ja ndaa kúu ja sukan ka jiñaꞌa sa ma. Vaa sukan ka saꞌa ka kuu ndija ni a.
\m \v 15 Te jini sa ja kútoo xen‑xeen ñaꞌa de ndaka ni, vaa ndákuneꞌe ndákuneꞌe ni de sukan ka kandija ni Suꞌsi o a, sukan vivii ni ka jan‑taꞌvi ni de ma, te ni ka jan‑taꞌvi ni nawa ni kaꞌan de ma.
\m \v 16 Kúsii ini xeen sa vaa kúkanu ini ñaꞌa sa ja ndijin chi jâ ka saꞌa ni ndaka sukan kúni Suꞌsi ma.
\c 8
\s1 Sukan sii ini ni ka ndakuaꞌa ñayii ñuu Corinto ma nuu Suꞌsi ma ja jin kuatniñu ñayii ni ka nduu saꞌya ya ma
\rem La ofrenda para los santos
\p \v 1 Te vitna, ndijin ja ni ka nduu ni saꞌya Suꞌsi o ma, ka kuni sa ja jin kuni ni sukan vii sukan luu saꞌa Suꞌsi ma ja jin kuu ñayii ni ka nduu saꞌya ya ma ja ka iyo i ñuu Macedonia ma.
\m \v 2 Vaa tnaꞌa o yukan chi visi ka ndoꞌo ka neni i, kovaa ka iyo sii ini xeen i nuu Suꞌsi o a. Vaa visi ka kundaꞌvi i ka kukee tna i ma, kovaa vivii ni ka ketnaꞌa ini i, te kuaꞌa xeen ja ni ka xtutu i kuenda tnuꞌu ja xiku ka kuu i, te ni ka tetniñu i nuu ñayii ni ka nduu saꞌya Suꞌsi ma ja ka kundaꞌvi‑ka i ma.
\m \v 3 Te ndákani sa sukan ni ka saꞌa i ma, vaa ndi‑in ndi‑in i, ni ka waꞌa i ndaka sukan ka kuni i ja jin ndakuaꞌa i nuu Suꞌsi ma, te ûni kuaꞌa‑ka ni ka waꞌa i sana sukan iyo ja jin kuaꞌa i ma. Te masu na in ni xtetuu i ja sukan jin ko saꞌa i ma chi ja ni ka kuu ini maa i kúu, te ni‑yuꞌu ni‑ini maa i ni ka waꞌa i ma.
\m \v 4 Te ni ka jikan‑taꞌvi xen‑xeen i ja na jin kuaꞌa sa tnuꞌu ja na kuu jin chindee tna i ñayii ka iyo ñuu Jerusalén ma ja ka kandija i Suꞌsi ma te ñatuu‑ka na ja uꞌvi ka saꞌa i ma.
\m \v 5 Vaa ja ni ka saꞌa ñayii ñuu Macedonia ma sukan ma chi xinañuꞌu kuiti ni ka kandija i nuu Iya Tátnuni ma, te sana ni ka kandija i nuu saña sukan kúni maa Suꞌsi ma, vaa vivii‑ka ni ka saꞌa i sana sukan ka ndetu sa ja jin saꞌa i ma.
\m \v 6 Te chukan kúu ja ka ndakaꞌan‑soꞌo sa nuu Tito a ja sukan ni kejaꞌa de kaxtnuꞌu de naxe jin ndakuaꞌa tna ni nuu Suꞌsi ma nawa ka nevaꞌa ni ma, te kúꞌun ini de ja ndimaa sukan jin ko saꞌa tna ni nuu ka iyo ni a, vaa sukan játna ini Suꞌsi o a.
\m \v 7 Vaa ndaka ni ja ka iyo ni ñuu Corinto a chi jâ vivii ka saꞌa ka kuu ni, vaa jâ vivii ka kukanu ini xeen ni Suꞌsi ma, te vivii jâ ka kaxtnuꞌu ni tnuꞌu maa ya a nuu jaku‑ka ñayii ma, te vivii jâ ni ka jakuꞌni ini ni, te vivii ka jatanuu ni ja ka jinukuechi ni nuu Suꞌsi o a, te vivii ka kutoo ñaꞌa ni. Te chukan kúu ja vivii jin kuꞌun tna ini ni ja jin chindee ni tnaꞌa o ñayii ndaꞌvi‑ka ma, vaa sukan játna ini Suꞌsi ma.
\p \v 8 Masu káꞌan sa sukan káꞌan in ñayii tatnuni. Yika ja kúni sa kúu ja jin kuni ni sukan vivii ka saꞌa jaku‑ka ñayii ni ka nduu saꞌya Suꞌsi o a jiꞌin sukan vivii ka kutoo i ndaka ñayii ma, te sukan jin ko saꞌa tna ni.
\m \v 9 Vaa jâ ka jini ni ja vii ja vaꞌa sukan ni skutaꞌvi ñaꞌa Jesucristo iya tátnuni nuu o ma, vaa ja kutoo xeen ñaꞌa ya kúu. Vaa nuu iyo ya andivi ma chi xiku kúu ya, vaa maa ya nevaꞌa ndaka ma. Te ni xndoo ya ndaka, te ni kii ya ñuu ñayivi ya, te ni ndundaꞌvi ya ja jin kuu o. Te ja ni ndundaꞌvi ya ma, te ni ka nduxiku yoꞌo, vaa ni saꞌa ya ja jin ndaniꞌi taꞌvi o.
\m \v 10 Te chukan kúu ja kúni sa ja jin keꞌen kuenda ni ja káꞌan sa a, vaa ja vaꞌa maa ni kúu. Ja ndaa kúu ja onde kuiya ni kii o ma jâ ni ka kejaꞌa ni ka saꞌa ni ja vaꞌa xeen ma, te masu yika‑ni ja ka saꞌa ni‑ni kúu chi ûni ka ñuꞌu ka ñuꞌu‑ni ini ni ja jin ko saꞌa ni sukan kúni Suꞌsi ma.
\m \v 11 Te sukan yachi‑ni ni ka jakuꞌni ini ni ma te ni ka kejaꞌa ndi‑in ndi‑in ni ka ndakuaꞌa ni nawa ka nevaꞌa ni ma nuu Suꞌsi ma, sukan‑vaꞌa jin chindee ni in‑ka ñayii ma. Te vitna, te káꞌan sa ja sukan ni ka kejaꞌa ni onde xiꞌna‑ka ma, te sukan‑ni jin ko saꞌa ni, te naxe ka niꞌi ka tnaꞌa ndi‑in ndi‑in ni ma, te jin kuꞌun ini ni ja sukan jin ndakuaꞌa ni nuu Suꞌsi ma, sukan‑vaꞌa jin chindee ni in‑ka ñayii ma.
\m \v 12 Vaa nú ni‑yuꞌu ni‑ini o kuaꞌa o nawa nevaꞌa o ma chi kuan‑taꞌvi Suꞌsi ma. Vaa Suꞌsi ma chi masu jikan ya in ja masu kundee o kuaꞌa o ma.
\m \v 13 Te ja káꞌan sa saꞌa, masu kuechi ja kúni sa ja jin chindee ni tnaꞌa ni ma te jin kendoo ndaꞌvi jin kendoo kee maa ni kúu, chi suꞌva ja kúni Suꞌsi ma kúu ja inuu‑ni jin niꞌi ndaka o nawa ka jiniñuꞌu o ma.
\m \v 14 Te vitna chi ndijin chi ka nevaꞌa ni tnaꞌa ja ka jiniñuꞌu ñayii yukan, te kuu jin chindee ni i, sukan‑vaꞌa ñatuu nawa ko kaꞌni ñaꞌa i ni a maa i, ni a maa ni, sukan‑vaꞌa nuna kenda kivi ja ka jiniñuꞌu tna ni, te ja ka nevaꞌa i ma, te jin ndachindee tna ñaꞌa i, sukan‑vaꞌa ñatuu nawa ko kaꞌni ñaꞌa i ndaka o.
\m \v 15 Vaa saꞌa ndee nuu tnuꞌu Suꞌsi ma: “Ñayii ni ndaxtutu kuaꞌa‑ka ja ni tetniñu Suꞌsi ma ja kaa i ma, masu ni kuu konevaꞌa kuaꞌa‑ka i kivi yukan. Te ñayii ni ndaxtutu jaku‑ni ma, masu nawa ni jaꞌni ñaꞌa i ja kaa i ma.”
\p \v 16 Te ka kutaꞌvi o nuu Suꞌsi ma ja ni chindee ya Tito ma, te ni chindee ñaꞌa de ndijin ma.
\m \v 17 Ja ndaa kúu ja ni yo ninisoꞌo ñukuun de ja ni ka ndakaꞌan‑soꞌo sa nuu de ma, vaa jâ jani ini de ja jaan maa de jan koto ñaꞌa de ndijin.
\m \v 18 Te ni ka tetniñu sa de jiꞌin ñani o tee vivii ka kaꞌan ndaka tnaꞌa o ñayii ka iyo yaꞌa ja ni ka nduu i saꞌya Suꞌsi ma ja kuu de a, kuechi ja vivii káxtnuꞌu de tnuꞌu vii tnuꞌu vaꞌa Suꞌsi o a.
\m \v 19 Te vaa suni maa tna ñayii ni ka nduu saꞌya Suꞌsi ma, ni ka kaji i de ja jin kondikin tnaꞌa sa jiꞌin de ichi jin koo sa jin xsiaꞌa sa xuꞌun a nuu ñayii ka jiniñuꞌu ma, sukan‑vaꞌa kuni de te ndakaꞌan de nuu tnaꞌa o ka iyo yaꞌa ja ka saꞌa sa sukan ka jani ini i ja jin saꞌa sa ma, sukan‑vaꞌa na koo jayiñuꞌu maa Iya Tátnuni ma.
\m \v 20 Vaa ñatuu ka kuni sa ja jin kaꞌan i tnuꞌu sa siki ja xuꞌun ni ka kundaꞌa sa a ja jin kuaꞌa sa ñayii ka jiniñuꞌu ma.
\m \v 21 Vaa ja ka ndi ini sa kúu ja jin saꞌa sa ja vaꞌa ja ndaa nuu Iya Tátnuni ma jiꞌin nuu ñayii ma.
\m \v 22 Te suni ni ka tetniñu tna sa in‑ka ñani o a jiꞌin de, in tee ni ka jini sa kuaꞌa xeen jichi ja ni‑yuꞌu ni‑ini de jinukuechi de nuu Suꞌsi o a. Te vitna chi ûni ni‑yuꞌu ni‑ini‑ka de jinukuechi de nuu ya, vaa kúkanu ini xeen de ja sukan ni ka kaꞌan ni ma te jin saꞌa ni.
\m \v 23 Te Tito a chi in tee ka ndikin tnaꞌa jiꞌin maa sa ja ka jinukuechi sa nuu ni a sukan kúni maa Suꞌsi ma kúu de. Te uu‑ka ñani o a chi tee ni ka tetniñu ñayii ni ka nduu saꞌya Suꞌsi o a ka kuu de, sukan‑vaꞌa jin ndakani de ndenda koo de yaꞌa naxe ka jani ini ni ma, te jayiñuꞌu maa Cristo ma ko kuu.
\m \v 24 Te jin kutoo ni de sukan ka kutoo tnaꞌa o a, sukan‑vaꞌa jín kuni ndaka tnaꞌa o ñayii ni ka nduu saꞌya Suꞌsi o a ja ja ndaa kúu ja ni ka jiñaꞌa sa sukan ka saꞌa ka kuu ni ma.
\c 9
\p \v 1 Te chukan kúu ja masu nawa káꞌan‑ka sa naxe jin saꞌa ni ja jin kuu ñayii ka kundaꞌvi‑ka ma, tnaꞌa o ñayii ni ka kandija Suꞌsi ma te jâ ni ka xndoo i ja uꞌvi ma, vaa maa ni chi jâ ka jini ni.
\m \v 2 Vaa jini sa sukan ka jani vaꞌa ini ni a, te chukan kúu ja kúsii ini xeen sa ndákani sa nuu tnaꞌa o ka iyo ñuu Macedonia a, vaa maa ni ja ka iyo ni ñuu Acaya a chi jâ ni ka kutuꞌva ni onde kuiya ni kii o ma, te jâ ni ka satuꞌva ni ja jin chindee ni in‑ka ñayii ma, te ja ni ka jini i sukan ka saꞌa ni ma, te ni ka ndachuꞌun ini kuaꞌa xeen tna i ja sukan jin saꞌa i.
\m \v 3 Kovaa ni tetniñu sa ñani o a, sukan‑vaꞌa jin kuni de ja masu ja káꞌan‑ni‑nka sa kúu ja jiñaꞌa sa sukan ka saꞌa ni ma, te chukan kúu ja jin koo tuꞌva ni.
\m \v 4 Nasa yukan, te jan koo sa jiꞌin jaku tnaꞌa o ñayii ñuu Macedonia a, te jin ndaniꞌi ñaꞌa sa ja ñatuu ka iyo tuꞌva ni, te jin kukan‑nuu sa ja ñatuu ka saꞌa ni sukan ka kukanu ini ñaꞌa sa ja jin ko kuu ni ma, te jin ndatnaꞌa‑ka maa ni ja kan‑nuu.
\m \v 5 Chukan kúu ja ni jani ini sa te ni ndakaꞌan‑soꞌo sa nuu ñani o a, vaa jiniñuꞌu ja jan koo de xinañuꞌu‑ka nuu ka iyo ni a, sukan‑vaꞌa jin satuꞌva ni nawa ka jani ini ni ja jin ndakuaꞌa ni nuu Suꞌsi ma. Te jâ jin koo tuꞌva ni, sukan‑vaꞌa másu ko kuu i ja xtetuu tnaꞌa o kivi kenda koo sa nuu ka iyo ni a.
\p \v 6 Chukan kúu ja káꞌan sa ja nú na in vala‑ni ndákuaꞌa i nuu Suꞌsi ma chi vala‑ni ndakuaꞌa ya i, te nú na in na ndakuaꞌa kuaꞌa‑ka nuu Suꞌsi ma chi kuaꞌa‑ka ja ndaniꞌi i ja ndakuaꞌa ya.
\m \v 7 Ndi‑in ndi‑in o na ndakuaꞌa nuu Suꞌsi ma sukan ni jani ini o ja ndakuaꞌa o nuu ya ma. Te máko kuxii ini o, ni a kani ini o ja xtetuu ñaꞌa ya ja ndakuaꞌa o ya, vaa Suꞌsi ma chi kútoo ya ñayii sii ini‑ni waꞌa i nawa ni kuu ini i ja ndakuaꞌa i nuu ya ma.
\m \v 8 Vaa Suꞌsi ma chi iya kúu saꞌa ndaka kúu ya te saꞌa ya ja koo kuaꞌa ja vii ja vaꞌa nuu ni, sukan‑vaꞌa nú ka nevaꞌa ni kuaꞌa‑ka ndaka ja kuatniñu o ma chi kuu jin chindee‑ka ni ñayii ka jiniñuꞌu ma.
\m \v 9 Sukan ndee nuu tutu Suꞌsi ma:
\q1 Ni kundaꞌvi ini de ñayii ka kundaꞌvi ma,
\q2 te ni waꞌa de ja ka jiniñuꞌu i ma,
\q1 te ja vaꞌa ja ndaa saꞌa de ma koo ni‑kani ni‑jika nuu Suꞌsi ma.
\p \v 10 Te maa Suꞌsi ma kúu iya táa ndikin sáka o ma, te maa ya táa xtatila ma ja kaa o ma, te suni maa ya saꞌa ja jin niꞌi jin tnaꞌa‑ka o, sukan‑vaꞌa kuu jin chindee tnaꞌa o ma, te ja vaꞌa ja ndaa saꞌa o ma saꞌa ya ja ndukuaꞌa‑ka.
\m \v 11 Te sukan, te jin konevaꞌa ni ndaka ja ka jiniñuꞌu ni ma, sukan‑vaꞌa ñatuu nawa kaꞌnu ndee ja jin chindee ni ñayii ka jiniñuꞌu ma, sukan‑vaꞌa ja jin saꞌa ni ma, te jin ndakuan‑taꞌvi kuaꞌa xeen ñayii ma nuu Suꞌsi ma.
\m \v 12 Te sukan, te ka jinukuechi ni nuu Suꞌsi ma, masu yika‑ni ja jin chindee ni ñayii ka kundaꞌvi ma kúu chi suꞌva sukan, te ka saꞌa ni ja kuaꞌa ñayii ma, ka ndakuan‑taꞌvi i nuu Suꞌsi ma.
\m \v 13 Ja jin kuni i sukan ka saꞌa ni ma, te jin ndachiñuꞌu i Suꞌsi ma ja sukan ka kandija ni ma te ka saꞌa ni sukan káꞌan tnuꞌu vii tnuꞌu vaꞌa Cristo ma, jiꞌin ja sukan ka chindee ni tnaꞌa o ñayii ni ka nduu saꞌya Suꞌsi ma jiꞌin ndaka‑ka ñayii ma, te ñatuu kuiti nawa jaꞌnu ndee ja ka saꞌa ka kuu ni ma.
\m \v 14 Te ja sukan ka saꞌa ni ma, te maa i chi jin kakan‑taꞌvi i nuu Suꞌsi ma ja jin kuu ni, te jin kutoo xeen ñaꞌa i kuechi ja vii ja vaꞌa ni skutaꞌvi ñaꞌa Suꞌsi ma te ni ka chindee ni i ma.
\m \v 15 ¡Ka kutaꞌvi o nuu Suꞌsi ma ja ni skutaꞌvi ñaꞌa ya ja vii ja vaꞌa ma, sukan‑vaꞌa kuu jin kutoo tnaꞌa o te jin chindee tnaꞌa o ma, te ni masu kuu jin ndakaꞌan o ndaka ja saꞌa ja kúu ya ja jin kuu o ma!
\c 10
\s1 Káxtnuꞌu Pablo ma sukan saꞌa ndaa saꞌa ndija de ja jinukuechi de nuu Suꞌsi ma
\rem Pablo defiende su ministerio
\p \v 1 Te maa sa ja kúu sa Pablo a, ja maa Cristo ma iya kuee ini ma te vivii káꞌan ya ma, te jikan‑taꞌvi sa nuu ni a, visi ka jani ini jaku ni a ja ora iyo sa neꞌun ni a kuee‑ka ini sa kovaa ora jika‑ka iyo sa ma te niꞌi‑ka ini sa, ka kaꞌan ni.
\m \v 2 Te jikan‑taꞌvi sa ja nuna jaan sa te jin koo o nuu ka iyo ni a, te ma jin saꞌa ni ja kuniꞌi ini sa nuu ni sukan ka kaꞌan ni ja kúu sa a. Vaa jâ jani ini sa ja ndonda sa nuu jaku ñayii ka jani ini i ja ka saꞌa sa sukan ka kúni yikikuñu sa a te ñatuu ka saꞌa sa sukan játna ini Suꞌsi ma.
\m \v 3 Kovaa visi ka iyo sa nuu yikikuñu sa a, kovaa masu nde ka saꞌa sa sukan ka kuni yikikuñu sa a.
\m \v 4 Vaa masu ka kanaa sa sukan ka kanaa ñayii ñuu ñayivi a sana jin kundee sa nuu ja ñatuu kúnimani nuu sa a, suꞌva maa Suꞌsi ma táa tnuꞌu ndee tnuꞌu ndatnu, te maa ya chíndee ñaꞌa ja ka kundee sa nuu ndaka tnuꞌu ndee tnuꞌu ndatnu iyo ñuu ñayivi ya.
\m \v 5 Te ja maa ya, te ka xnaa sa ndaka ja ka kaꞌán ñayii ma ja ka jaꞌnu ndee i ja masu jin kuni ñayii ma Suꞌsi ma, te ndaka ja uꞌvi ka jani ini ñayii ma ka xndoo sa nuu ndaꞌa maa Cristo ma, sukan‑vaꞌa maa ya saꞌa ja jin ndasama janitnuni i ma te jin kandija i ya ma.
\m \v 6 Te saña chi ka iyo sa ja kuu jin saꞌa sa ja jin ndoꞌo jin neni ñayii ñatuu ka kandija Suꞌsi ma, nuna jin saꞌa jin kuu ndaka‑ka ni sukan kúni Suꞌsi ma.
\p \v 7 Ka ndeꞌya ni sukan ka saꞌa ka kuu ñayii ma. Te nú nde ni jini ja iyo ndija ni jiꞌin Cristo ma, te nú sukan jani ini maa ni ja saꞌya Cristo ma kúu ni, te suni konaꞌa ni ja saꞌya tna ya ka kuu sa.
\m \v 8 Chi vaa kúsii ini sa ja ni taa Iya Tátnuni ma tnuꞌu ja tatnuni‑ka sa, te sukan ni taa ya ma, sukan‑vaꞌa chindee ñaꞌa sa ja jin koo vaꞌa‑ka ni nuu ya, kovaa masu ja ni taa ya tnuꞌu ja tatnuni‑ka sa ma te saꞌa sa ja jin skenaa ni maa ni. Chukan kúu ja masu kúkan‑nuu sa ja káꞌan sa saꞌa nuu ni,
\m \v 9 sukan‑vaꞌa jin kuni ni ja masu xsiuꞌu ñaꞌa sa kúu ja káꞌan niꞌi sa nuu ni nuu carta ni tetniñu sa ma.
\m \v 10 Vaa ka iyo ñayii ja ka kaꞌan i ja niꞌi xeen káꞌan sa ja tée sa nuu carta ma, kovaa ora iyo maa sa ma chi masu nde káꞌan niꞌi sa nuu ni, te masu nde ka ndi ini i tnuꞌu káꞌan sa ma.
\m \v 11 Ñayii káꞌan sukan ma, te nú ma ndasaꞌa i kuenda naxe saꞌa naxe kúu i nuu Suꞌsi ma chi sukan ni kaꞌan niꞌi sa nuu carta ma, te suni kuu saꞌa sa sukan ora kenda koo sa nuu ka iyo ni a.
\m \v 12 Vaa saña chi ñatuu ka kusaa ini sa ja jin kaꞌan sa sukan ka kaꞌan jaku ñayii ma ja ka ndachiñuꞌu i maa i ma te ka kaꞌan i ja maa i ka kuu‑ka sana in‑ka ñayii ma, vaa masu ñayii ka jani vaꞌa ini ka kuu i ja ka saꞌa i sukan ma.
\m \v 13 Kovaa saña, masu ja ka ndachiñuꞌu sa maa sa kúu ja ka ndakaꞌan sa ja ni ka kenda koo sa nuu ka iyo ni a, nú masu ja maa Suꞌsi ma tétniñu ñaꞌa nuu kúni maa ya ma, te chukan kúu ja ni ka kenda koo sa nuu ka iyo ni a.
\m \v 14 Saña chi ñatuu jan koo sa nuu masu iyo ja jin koo sa ma, kovaa nuu ka iyo ni a chi xinañuꞌu saña ni jan koo ja jin kaxtnuꞌu sa tnuꞌu vii tnuꞌu vaꞌa Cristo ma.
\m \v 15 Saña chi ñatuu ka kuni sa ja jin ndachiñuꞌu sa maa sa nú in‑ka ñayii jâ ni satniñu ma, suꞌva saña chi ja ka ndetu sa kúu ja jin kuaꞌnu‑ka ni nuu Suꞌsi ma, sukan‑vaꞌa jin koo jayiñuꞌu maa sa nuu maa ni sukan kúni maa Suꞌsi ma.
\m \v 16 Te suni sukan jin koo sa jin kaxtnuꞌu sa tnuꞌu vii tnuꞌu vaꞌa Cristo ma onde jika‑ka sana nuu ka iyo ni a. Kovaa suni másu jin koo sa nuu jâ ni ka satniñu siin‑ka ñayii ma, sukan‑vaꞌa jin niꞌi sa jayiñuꞌu sa nuu jâ ni ka satuꞌva in‑ka ñayii ma.
\m \v 17 Te nú na in kúni ja koo jayiñuꞌu i, te vaꞌa‑ka ja na koo jayiñuꞌu i nuu Iya Tátnuni ma.
\m \v 18 Vaa masu nde jiniñuꞌu ja maa ñayii ma, te ndachiñuꞌu i maa i, suꞌva vaꞌa‑ka ja maa Suꞌsi ma, te ndachiñuꞌu ñaꞌa ya.
\c 11
\p
\v 1 Naka vaꞌa ko kuu nuna jin kanda ni ndaka ja káꞌan káchi sa nuu ni a, visi ka jani ini ñayii ma ja kuneé sa. ¡Saa vi, nuna jin kanda ni ja káꞌan sa a chi ja vaꞌa maa ni jin ko kuu!
\m
\v 2 Vaa saña chi ûni kúkueñu ñaꞌa sa, vaa nasa yukan, te jin skenaa ni maa ni nuu Suꞌsi ma, vaa ja kúni sa kúu ja ni‑in ja uꞌvi jin ko saꞌa ni, te jin koo vii jin koo ndoo ni kivi kaxtnuꞌu ñaꞌa sa nuu Cristo ma, sukan kúu in suchi siꞌi ja jito vii jito vaꞌa i maa i, te ndetu i ja kenda suchi tnandaꞌa jiꞌin i ma. Sukan jin ko koto vaꞌa ni maa ni.
\m
\v 3 Kovaa yuꞌu sa, nasa yukan, te xndaꞌvi tachi ma janitnuni ni a, te jin kakayata ni nuu ndaꞌa Cristo o a te jin ndasaꞌa ni ja uꞌvi ma, vaa sukan ni saꞌa tachi ma ja vivii ni kaꞌan koo ma te ni xndaꞌvi ti Eva ma.
\m
\v 4 Vaa ndijin chi nú ni kenda in‑ka ñayii ja sama káꞌan i ja kuu Jesús ma, te ka ninisoꞌo ni, te ka kandija ni in‑ka tnuꞌu, kovaa masu Xtumani Ndios iya ni ka jan‑taꞌvi ni ma waꞌa tnuꞌu ka kaꞌan i ma. Te nú ka kenda koo ñayii ja ka kaꞌan i in‑ka tnuꞌu ja masu tnuꞌu vii tnuꞌu vaꞌa Cristo ma kúu, te vivii ka jan‑taꞌvi ni i te ka ninisoꞌo ni ja ka kaꞌan i ma, te ni masu ka ndasaꞌa ni kuenda.
\m
\v 5 Vaa jani ini sa ja tee ka jani ini ja tee ni tetniñu ñaꞌa Suꞌsi ma ka kuu de ma, masu ka jini‑ka de sana saña.
\m
\v 6 Vaa visi saña chi ñatuu kúu kaꞌan vivii sa, kovaa jini sa ndaka ja káꞌan Suꞌsi ma. Vaa ndaka nuu kuan koo sa ma, te ndaka ja ka saꞌa ka kuu sa ma, te ka jini ñayii ma sukan káꞌan tnuꞌu Cristo ma.
\m
\v 7 Te ñatuu ni jani ini sa ja maa sa kúu ñayii kanuu‑ka, suꞌva ni jatanuu ñukuun ñaꞌa sa maa ni ja ni kaxtnuꞌu sa tnuꞌu vii tnuꞌu vaꞌa Suꞌsi ma nuu ni. ¿Te ka jani ini ni ja in ja uꞌvi kúu ja ni kaxtnuꞌu sa ma te masu nawa ni jikan sa ja jin taa ni ma?
\m
\v 8 Suꞌva in‑ka jichi ñayii ni ka nduu saꞌya Suꞌsi ma, ni ka taa i xuꞌun ja kii sa nuu ka iyo ni a, te kunukuechi sa nuu ni a.
\m
\v 9 Te nuu ni iyo sa nuu ka iyo ni a, ni iyo ja ni jiniñuꞌu sa, kovaa ñatuu ni kaꞌan sa nuu ni, sukan‑vaꞌa másu taa sa tnundoꞌo nuu ni. Vaa ja ni jiniñuꞌu sa ma chi ni ka taa tnaꞌa o ni ki koo ñuu Macedonia ma. Te sukan ko saꞌa sa ja ma taa sa tnundoꞌo nuu ni.
\m
\v 10 Vaa tnuꞌu ndaa tnuꞌu ndija Cristo ma iyo jiꞌin sa, te ni kaꞌnu ñuu Acaya a masu na in kaꞌnu ndee ja masu niꞌi sa jayiñuꞌu sa ma.
\m
\v 11 ¿Navaꞌa káꞌan sa saꞌa? ¿Kuechi ja masu kútoo ñaꞌa sa? ¡Ñaꞌa! Vaa Suꞌsi ma jini ja kútoo ñaꞌa sa.
\m
\v 12 Saꞌa ko saꞌa sa, sukan‑vaꞌa masu kuaꞌa sa tnuꞌu ja tee ka jani ini ja maa de ka jini‑ka ma, te jin kani ini de ja inuu ka kuu sa jiꞌin de.
\m
\v 13 Vaa tee yaꞌa chi masu ja ndaa kúu ja Cristo ma ni tetniñu ñaꞌa. Te ka xndaꞌvi ñaꞌa de ja tee ni tetniñu ñaꞌa Cristo ma ka kuu de, te ka sakuiꞌna de xuꞌun ni a.
\m
\v 14 Te kuiti sukan ka saꞌa maa de, vaa onde tachi ma, te xndaꞌvi i ñayii ma ja in ángel vivii kúu i.
\m
\v 15 Chukan kúu ja masu ja ko sanuu o kúu, vaa suni tee ka jinukuechi nuu tachi ma chi ka ndaneꞌe de, te ka xndaꞌvi ñaꞌa de ja ka jinukuechi de nuu Suꞌsi ma. Kovaa ja sukan ka saꞌa ka kuu de ma, te sukan ndaxndoꞌo ndaxneni‑ka ñaꞌa Suꞌsi ma.
\s1 Sukan ni ndoꞌo ni neni Pablo ma ja káxtnuꞌu de tnuꞌu Suꞌsi ma
\rem Sufrimientos de Pablo como apóstol
\p
\v 16 In‑ka jichi káꞌan sa ja ni‑in ni ko kani ini ja kuneé sa, kovaa nú nde ni jani ini sukan, jin kuan‑taꞌvi ni ja káꞌan sa ya, visi na jin kani ini ni ja kuneé sa ma, sukan‑vaꞌa ndachiñuꞌu tna sa maa sa vala.
\m
\v 17 Tnaꞌa ja káꞌan sa ya, masu káꞌan sa sukan kúni maa Iya Tátnuni ma, suꞌva sukan káꞌan ñayii kuneé ma, sukan‑vaꞌa kuu koo jayiñuꞌu sa ma.
\m
\v 18 Vaa kuaꞌa xeen ñayii ma, ka ndachiñuꞌu i maa i ma, sukan ka jatna ini yikikuñu i ma. Te sukan tna ndáchiñuꞌu sa maa sa a.
\m
\v 19 Vaa ndijin, ja ka jani ini ni ja ka jini ni ma, te ka jan‑taꞌvi ni ñayii ñatuu ka jakuꞌni ini ma.
\m
\v 20 Vaa ka jan‑taꞌvi ni tee ka saꞌa ja ka jinukuechi ni nuu de ma. Te ka sakuiꞌna ñaꞌa de nawa ka nevaꞌa ni ma, te ka xndaꞌvi ñaꞌa de, te ka saxiko ñaꞌa de, te ka waꞌa de in yikinuu ni ma.
\m
\v 21 Ndákukan‑nuu maa sa ja ndákaꞌan sa saꞌa, vaa saña chi ñatuu ni ka kusaa ini sa ja jin kakan sa nawa jin chindee ñaꞌa ni ma. Kovaa ni kenda koo tee yukan te ni ka xndaꞌvi ñaꞌa de ja maa de ka kuu‑ka te ni ka jatanuu ni de, te maa de chi ni ka saꞌa ndevaꞌa ñaꞌa de.
\p Kovaa vitna te káꞌan sa ja in ñayii kanuu kúu sa, visi masu maa sa iyo ja kaꞌan sa sukan.
\m
\v 22 ¿Ka kaꞌan de ja ka ndanuu‑ka de kuechi ja ka kaꞌan de saꞌan hebreo ma? Saña tna chi káꞌan sa saꞌan yukan. ¿Ka kaꞌan de ja ñayii ka ndanuu ka kuu de, kuechi ja ñayii ñuu Israel ma ka kuu de ma? Suni ñayii ñuu yukan kúu tna sa. ¿Ka kaꞌan de ja saꞌya tata Abraham ma ka kuu de? Saña tna chi saꞌya tata Abraham ma kúu sa.
\m
\v 23 ¿Ka kaꞌan de ja tee ka jinukuechi nuu Cristo ma ka kuu de? Te saña tna chi jinukuechi‑ka sa nuu Cristo ma. (Ja káꞌan sa saꞌa chi káꞌan sa sukan káꞌan in ñayii ni ndunee, vaa masu maa sa iyo ja ndakaꞌan ja kuu maa sa.) Vaa satniñu‑ka sa sana tee yukan, te kuaꞌa‑ka jichi ni ka kani ñaꞌa tee ka netniñu ma, te kuaꞌa‑ka jichi ni yinee sa vekaa ma, te kuaꞌa‑ka jichi ni iyo yika sa ja jin kaꞌni ñaꞌa i,
\m
\v 24 vaa nuu ñayii judío o a chi uꞌun jichi ni ka kani ñaꞌa de, te in jichi in jichi ma, oko jaꞌun kuun (39), oko jaꞌun kuun (39) jichi ni ka kani ñaꞌa de jiꞌin ñií ja ka keꞌen de ñayii ma.
\m
\v 25 Te uni jichi ni ka kani ñaꞌa de jiꞌin yutnu xii, te in jichi ni ka waꞌa yuu ñaꞌa i, te uni jichi ja vala‑nka te skenaa sa maa sa nuu mar ma, te in jichi ma chi in jakuaa te in nduu kuaꞌan vee sa nuu mar ma ni yo kuu sa.
\m
\v 26 Te kuaꞌa jichi ni iyo yika sa ichi kuaꞌan sa ma, kúu yute ma, xi nuu kuiꞌna ma, xi nuu ñayii ñuu sa ma, xi nuu ñayii masu ñuu judío ma. Te suni ni iyo yika sa ini ñuu ma ja jin saꞌa ndevaꞌa ñaꞌa ñayii ma, jiꞌin nuu ñatuu kuiti nawa iyo ma, jiꞌin nuu ñayii ka saꞌa tnuꞌu ja saꞌya Suꞌsi ka kuu i ma.
\m
\v 27 Ni yo ndoꞌo, ni yo neni sa, ni yo satniñu sa, ni yo kuita sa, te kuaꞌa jichi ñatuu ni yo kixi sa jakuaa ma, te ni yo kokon, ni yo yichi sa, vaa ñatuu nawa kaa sa ma, te ni yo kuvijin sa, vaa ñatuu na saꞌma sa ma.
\m
\v 28 Te masu chaꞌa‑ni chi ndí ini xeen sa nawa ka ndoꞌo ka tnaꞌa ndaka ñayii ni ka nduu saꞌya Suꞌsi ma ja ka iyo i ndaka ñuu ma.
\m
\v 29 Vaa nú na in kuꞌu in kueꞌe ma chi kuenda tnuꞌu ja maa sa kuꞌu. Vaa nú na in na saꞌa ja ndakakayata in tnaꞌa o ma chi saña chi kúxii xeen ini sa ja sukan ni saꞌa i ma.
\p
\v 30 Te nú iyo nde a kuu ndachiñuꞌu sa maa sa, suꞌva ndáchiñuꞌu sa maa Suꞌsi ma vaa maa ya ni chindee ñaꞌa, vaa kuaꞌa ja masu jini sa naxe saꞌa sa ma.
\m
\v 31 Te maa Suꞌsi, Yuva Jesucristo iya tátnuni nuu o a, iya iyo ja ndachiñuꞌu o ya ni‑kani ni‑jika ma, jini ya ja masu xndaꞌvi ñaꞌa sa.
\m
\v 32 Vaa ñuu Damasco ma, tee kúu gobiernu ñuu yukan ma, ja jinukuechi de nuu rey kúu Aretas ma, ni yo jito ñukuun de ichi nuu kívi o ñuu yukan ma, sukan‑vaꞌa tnii ñaꞌa de.
\m
\v 33 Kovaa ni ñunee sa in nuu chika ma, te ni ka nuneꞌe ñaꞌa tnaꞌa o ma ichi ventana veꞌe kátuu yuꞌu ñuu ma, te ni kaku sa nuu ndaꞌa tee yukan ma. \fig |MX-69.tif|span|||Saꞌa ni kaku Pablo ma nuu ndaꞌa rey ma|11:33\fig*
\c 12
\s1 Ni waꞌa Suꞌsi ma tnuꞌu ja xndoꞌo xneni tachi ma Pablo ma
\rem El aguijón en la carne
\p \v 1 Ja ndaa kúu ja masu vaꞌa‑ni ja ndachiñuꞌu sa maa sa, kovaa iyo ja ndakaꞌan sa ja ni kaxtnuꞌu Iya Tátnuni ma nuu sa, nuu ni jini nuu sa ma naxe kúni ya ja jin jakuꞌni ini o ma.
\m \v 2 Jini sa in tee ja jinukuechi de nuu Cristo o a, jâ iyo uxi kuun kuiya ma, te ni ndoneꞌe ñaꞌa Suꞌsi ma onde andivi ku‑uni ma, te masu jini sa nú ni jaꞌan de jiꞌin yikikuñu de ma xi ñaꞌa, kovaa maa Suꞌsi ma chi jini ya.
\m \v 3 Te jini sa tee yukan, kovaa masu jini sa nú ni iyo de jiꞌin yikikuñu de ma xi ñaꞌa, kovaa maa Suꞌsi ma chi jini ya,
\m \v 4 ja ni kaa de onde nuu nani paraíso ma, te yukan, te ni jinisoꞌo de tnuꞌu ni kaꞌan Suꞌsi ma ja iyo yuꞌu ma, te ni‑in ñayii masu kuu kaꞌan i tnuꞌu yukan.
\m \v 5 Saña chi kuu ndakaꞌan sa ja ni saꞌa Suꞌsi ma jiꞌin tee yukan, kovaa ja ndakaꞌan sa ja kuu maa sa masu kúu. Ja kuu ndakaꞌan sa kúu ndaka ja masu kúu saꞌa sa ma.
\m \v 6 Nú kúni sa chi kuu ndakaꞌan sa sukan saꞌa Suꞌsi ma jiꞌin sa, sukan‑vaꞌa koo jayiñuꞌu sa, chi vaa ja ndaa kúu. Kovaa masu nawa ndakaꞌan sa nawa saꞌa sa, sukan‑vaꞌa ñayii ndeꞌya ñaꞌa ma jiꞌin ñayii ninisoꞌo ja káꞌan sa ma, te ndakaꞌan maa i nú ja vaꞌa kúu ja sukan saꞌa sukan kúu sa ma.
\m \v 7 Te ñatuu ni kachi Suꞌsi ma ja ko saꞌa vixi sa maa sa ja jini‑ka sa kuechi ja sukan ni kaxtnuꞌu Suꞌsi ma kuaꞌa ja vii ja vaꞌa onde sukun ma. Te chukan kúu ja ni waꞌa Suꞌsi ma tnuꞌu ja tachi ma, xndoꞌo xneni ñaꞌa i, kuenda tnuꞌu ja in iñu kani xeen ni kivi yikikuñu sa a te saꞌa ndevaꞌa ñaꞌa i.
\m \v 8 Te ja sukan ndoꞌo neni sa ma, ja ni kuu uni jichi ni jikan‑taꞌvi sa nuu Iya Tátnuni ma ja na xtandiyo ya i te máko xndoꞌo xneni‑ka ñaꞌa i.
\m \v 9 Kovaa Iya Tátnuni ma, ni kaꞌan ya: “Masu nawa jiniñuꞌu‑ka ni, vaa jâ ni skutaꞌvi ñaꞌa sa ja vii ja vaꞌa ma, chukan kúu ja niꞌi ni ndaka nawa jiniñuꞌu‑ka ni ma. Vaa ora jani ini ni ja masu kuu‑ka nawa saꞌa ni ma, te maa ora yukan‑ni, te kuaꞌa‑ka ja chindee ñaꞌa sa ja saꞌa ni ma”, kúu ya káꞌan ya. Chukan kúu ja kúsii ini xeen‑ka sa, vaa masu kúu nawa saꞌa maa in‑ni sa ma, te chukan kúu ja maa tnuꞌu ndee tnuꞌu ndatnu Cristo ma koo ini anua sa a, sana kuu saꞌa sa nawa kúni Suꞌsi ma ja saꞌa sa ma.
\m \v 10 Te kúsii ini sa ja ñatuu nawa kúu saꞌa sa ja maa‑ni sa ma. Te kúsii ini sa ora ka kaꞌan ndevaꞌa i nuu sa ma, jiꞌin ora nawa jiniñuꞌu sa ma, jiꞌin ora ka sondikin ñaꞌa i ma, jiꞌin ora ndí ini xeen sa ma. Vaa ora jini sa ja ñatuu nawa kuu saꞌa sa ma, te ora yukan, te ndániꞌi‑ka sa tnuꞌu ndee tnuꞌu ndatnu ja kuu saꞌa sa ma. Te ndaka kánda sa, vaa kútoo sa Cristo ma.
\p \v 11 Ni saꞌa neé sa maa sa ja ni ndachiñuꞌu sa vala maa sa, vaa maa ni ni ka xtetuu ñaꞌa, vaa masu nde ni ka ndakunitnuni ni ndaka nawa saꞌa nawa kúu tna sa ma. Vaa visi ñatuu nawa kúu sa nuu Suꞌsi ma ka jani ini ni, kovaa masu ka ndanuu‑ka tee ka kaꞌan maa de ja Cristo ma ni tetniñu ñaꞌa ma sana saña.
\m \v 12 Vaa ni ndoꞌo ni neni sa, te ni kanda sa. Te ni ka iyo seña jiꞌin milagru nuu ka iyo ni a ja ni saꞌa Suꞌsi ma, te chukan kúu tnaꞌa ja ka kaxtnuꞌu ja in tee ni tetniñu Cristo ma kúu sa.
\m \v 13 Vaa ndevaꞌa‑ni nuu ni jaꞌan sa ja ni kaxtnuꞌu sa tnuꞌu Suꞌsi ma chi ñayii ni ka nduu saꞌya Suꞌsi o a chi ni ka yo chindee ñaꞌa i. Te yika‑ni ja ndijin kúu ja ñatuu nawa ni jikan sa ja jin chindee ñaꞌa ni. Te jin sakanu ini ñaꞌa ni, nú ni saꞌa sa ja ni ka kuxii ini ni ma.
\s1 Pablo ma, káxtnuꞌu de ja kiꞌin de ñuu Corinto ma in‑ka tuku jichi
\rem Pablo anuncia su tercera visita
\p \v 14 Jâ iyo tuꞌva sa ja jaan sa nuu ka iyo ni a ja ku‑uni jichi a, te másu ko jin ko ndi ini ni ja nawa jin taa ni, vaa masu ndúku sa ja nawa jin taa ni chi ja ndí ini‑ka sa kúu ja jin koo vaꞌa maa ni. Vaa ndijin chi ka jini ni ja saꞌya sa ka kuu ni, te masu nawa jin ko ndi ini ni ja nawa jin taa ni ja kúu sa yuva ni ma. Vaa sukan kúu o jiꞌin saꞌya o ma, ja maa o ja kúu o yuva i ma ko ndi ini nawa jiniñuꞌu saꞌya o ma.
\m \v 15 Te maa sa chi sii ini xeen kuatniñu sa ja nevaꞌa sa a ja jin kuu ni, te visi na xndoꞌo‑ka sa maa sa ja jin kuu ni kuechi ja kútoo ñaꞌa sa a. Vaa ja ndaa kúu ja kútoo xeen‑ka ñaꞌa sa, te maa ni, visi ma jin kutoo xeen ñaꞌa ni.
\m \v 16 Kúkanu ini sa ja jin kuan‑taꞌvi ni ja káꞌan sa ya, vaa masu nawa ni kuni sa ja jin taa ni, kovaa ka iyo jaku ni a ja ka jani ini ni ja jini xeen sa naxe xndaꞌvi ñaꞌa sa te jin taa ni xuꞌun ni ma.
\m \v 17 ¿Xi ni jatniñu sa in tee ni tetniñu sa ma ja xndaꞌvi ñaꞌa sa te niꞌi sa xuꞌun ni ma? Chi ñatuu.
\m \v 18 Ni jikan‑taꞌvi sa nuu Tito ma ja kuan koo de jiꞌin in‑ka ñani o ma nuu ka iyo ni a. ¿Ni xndaꞌvi ñaꞌa Tito ma? ¿Xi masu inuu‑ni ka jani ini sa jiꞌin de? ¿Xi masu inuu‑ni ichi ka jika sa jiꞌin de?
\p \v 19 ¿Ja saꞌa vivii káꞌan sa a, ka jani ini ni ja saꞌa‑ni‑nka sa kúu, sukan‑vaꞌa na yaꞌa na kuita‑ni‑nka ja ni ndakaꞌan‑soꞌo sa nuu ni ma? Ñaꞌa. Vaa ni‑yuꞌu ni‑ini sa káꞌan sa, te jini maa Suꞌsi ma. Te ja maa Cristo ma, te ka kaꞌan vii ka kaꞌan vaꞌa sa nuu ni, vaa ka kutoo ñaꞌa sa, te ka kuni sa ja jin koo vaꞌa‑ka ni nuu Suꞌsi ma.
\m \v 20 Kovaa ja ndí ini sa kúu ja nuna jaan sa jan koto ñaꞌa sa ma, te ma ndaniꞌi sii ini ñaꞌa sa sukan kúni sa ja jin koo sii ini ni nuu Suꞌsi ma. Te maa ni, ma jin koo sii ini ni ja jin kuni ñaꞌa ni ma. Vaa ndí ini sa ja nasa yukan, te ka skiti ini tnaꞌa ni, xi ka kukueñu ini nuu tnaꞌa ni, xi ka kanaa ni, xi ka jani ini ni ja maa ni ka kuu‑ka ma, xi ka kaꞌan uꞌvi nuu tnaꞌa ni, xi ka kaꞌan tnuꞌu tnaꞌa ni ma, xi ka saꞌa neé ka saꞌa uun‑nka ni ma.
\m \v 21 Vaa ndí ini xeen sa ja nuna jaan sa ma, te saꞌa Suꞌsi ma ja ndakukan‑nuu sa nuu ya ja kuechi ni ma, xi saa kondaꞌyu sa ja kuechi in jichi ni a, ja jâ ni kuu kii ja ka ndiso kuechi i ma, vaa ka ndasatneꞌe i maa i ma nuu ja uꞌvi ma, te ka kivi nduu ka kivi niꞌi‑ni i jiꞌin ñayii ñatuu ni ka tnandaꞌa jiꞌin i ma, te ñatuu nde ka ndakani ka ndakaꞌvi ini i ja uꞌvi ka saꞌa i ma sukan‑vaꞌa ndasakanu ini ñaꞌa Suꞌsi ma.
\c 13
\p \v 1 Chaꞌa kúu ja ku‑uni jichi ja jaan sa nuu ka iyo ni ja ni ka nduu ni saꞌya Suꞌsi o a, te jin ndasaꞌa ndaa o ndaka naxe ka saꞌa ka kuu ni a, te onde uu xi uni ñayii jin ndakaꞌan naxe iyo ma, sana kundaa.
\m \v 2 Káꞌan sa nuu ñayii ni ka ndakuiso kuechi i ma jiꞌin nuu ndaka ni a, vitna ja ñatuu jaan‑ka sa nuu ka iyo ni a, te ndaxndaku ini ñaꞌa sa sukan ni kaꞌan sa nuu ni jaan sa ja ku‑uu jichi ma. Vaa nuna jaan sa a chi ûni keneꞌe sa i nuu ka iyo ni a, onde nú ni ka ndakani, ni ka ndakaꞌvi ini maa i nuu Suꞌsi ma.
\m \v 3 Vaa ka nduku ni nú ndija ja maa Cristo ma ni taa tnuꞌu káꞌan sa a. Kovaa jin konaꞌa ni ja maa ya káꞌan ja káꞌan sa a, te masu káꞌan kuee ya nuu ni chi káꞌan niꞌi ya, te ûni satniñu ya jiꞌin tnuꞌu ndee tnuꞌu ndatnu ya ma nuu ka iyo ni a.
\m \v 4 Visi ni ndakaa ya nuu krusi ma kuenda tnuꞌu ja ñatuu na tnuꞌu ndee tnuꞌu ndatnu ya ma, kovaa téku ya jiꞌin tnuꞌu ndee tnuꞌu ndatnu maa Suꞌsi ma. Te suni sukan ka ndoꞌo ka neni sa ja ka ndikin sa ya a, kovaa ja maa tnuꞌu ndee tnuꞌu ndatnu maa Suꞌsi ma, te ka iyo sa nuu ndaꞌa Cristo ma, te jin koteku sa, te jin kunukuechi sa nuu ni a.
\m \v 5 Jin ndasaꞌa maa ni kuenda, te jin ndakototnuni ni maa ni nú ka iyo vaꞌa ni nuu Suꞌsi ma te ka kukanu ini vaꞌa ni ya. ¿Xi ñatuu ka ndasaꞌa ni kuenda ja Jesucristo ma ka iyo jiꞌin ni? ¿O xi ñatuu ka iyo vaꞌa ni nuu Suꞌsi ma?
\m \v 6 Kovaa saña chi ka kukanu ini sa ja jin ndakunitnuni ni ja saña chi ka iyo vaꞌa sa nuu Suꞌsi ma.
\m \v 7 Te saña chi ka jikan‑taꞌvi sa nuu Suꞌsi ma ja másu ko jin saꞌa ni ni‑in ja uꞌvi, kovaa masu kuechi ja ka kuni sa ja jin koo vaꞌa‑ka maa sa nuu Suꞌsi ma kúu ja ka jikan‑taꞌvi sa nuu Suꞌsi ma chi ñaꞌa. Suꞌva ja ka kuni sa kúu ja jin saꞌa ni ja vaꞌa nuu Suꞌsi ma, sukan‑vaꞌa ma jin skenaa ni maa ni.
\m \v 8 Vaa masu kuu ja masu jin ko saꞌa ni sukan káꞌan tnuꞌu ndaa tnuꞌu ndija Suꞌsi o a chi kuiti nini ja ûni jin ko saꞌa ni sukan káꞌan tnuꞌu Suꞌsi o a, sukan‑vaꞌa jin kundee o nuu ja uꞌvi ma.
\m \v 9 Te chukan kúu ja ka kusii ini sa, vaa ora ka kuxii ka kundaꞌvi ini sa ja ni kenda in tnundoꞌo ma, te ndijin chi ka iyo‑ka tnuꞌu ndee tnuꞌu ndatnu ni ma. Te ka jikan‑taꞌvi sa nuu Suꞌsi ma ja ûni jin konukuiñi vaꞌa jin konukuiñi ndaa ni nuu ya ma.
\m \v 10 Te chukan kûu ja tee sa saꞌa vitna ja iyo jika‑ka sa a, sukan‑vaꞌa kivi koo sa nuu ka iyo ni a, te masu kaꞌan niꞌi xeen‑ka sa. Vaa Iya Tátnuni ma, ni taa ya tnuꞌu ndee tnuꞌu ndatnu ja tátnuni sa nuu ni a, kovaa masu ja saꞌa sa ja jin skenaa ni maa ni kúu chi suꞌva ja jin koo vaꞌa‑ka ni nuu Suꞌsi ma kúu ja ndakaꞌan‑soꞌo sa nuu ni saꞌa.
\s1 Sukan ndákan‑tnuꞌu ñañaꞌa Pablo ma ñayii ka kandija Suꞌsi ma ja ka iyo i ñuu Corinto ma
\rem Saludos y doxología final
\p \v 11 Te chukan kúu ja ndijin ja ni ka nduu o saꞌya Suꞌsi ma, jin koo sii ini ni, te jin koo vaꞌa‑ka ni nuu Suꞌsi ma, te jin ndakaꞌan‑mani tnaꞌa ni, te in‑ni ja jin kani ini ni, te jin koo mani ni. Te maa Suꞌsi iya kútoo ñaꞌa ma iya saꞌa ja jin koo mani o ma, koo ya jiꞌin ni.
\m \v 12 Jin ndakuaꞌa tnaꞌa ni nchuxi ndi‑in ndi‑in ni ja ka kuu ni ñayii jâ ni ka xndoo ja uꞌvi ma.
\m \v 13 Te ka ndakan‑tnuꞌu ñañaꞌa ña ndaka ñayii ka iyo jiꞌin sa yaꞌa ja ni ka nduu i saꞌya Suꞌsi o a ja ni ka xndoo i ja uꞌvi ma.
\m \v 14 Te Jesucristo iya tátnuni nuu o a, na skutaꞌvi ñaꞌa ya ja vii ja vaꞌa, sukan kútoo ñaꞌa Suꞌsi ma. Te kóo Xtumani Ndios ma jiꞌin o, te saꞌa ya ja jin ketnaꞌa ini o jiꞌin ya. Te sukan kó kuu.