\id EPH ‑ Mixtec, Magdalena Peñasco
\h Efesios
\mt1 Carta ni saꞌa Pablo ma ja ni tetniñu de nuu ñayii ka iyo ñuu Éfeso ma
\c 1
\s1 Sukan ndákan‑tnuꞌu ñañaꞌa Pablo ma ñayii ka kandija Suꞌsi ma ja ka iyo i ñuu Éfeso ma
\rem Saludo
\p
\v 1 Saña, kúu sa Pablo tee ni tetniñu Jesucristo ma, ja sukan ni jani ini maa Suꞌsi ma. Te tée sa nuu ndijin ja ñatuu na ja uꞌvi‑ka ka saꞌa ni ma te ka ndikin vaꞌa, ka ndikin ndija ni Cristo Jesús ma, ja ka iyo ni ñuu Éfeso a.
\m
\v 2 Yuva o Suꞌsi ma jiꞌin Jesucristo iya tátnuni nuu o a, na skutaꞌvi ñaꞌa ya ja vii ja vaꞌa, te jin koo mani ni.
\s1 Sukan ni skutaꞌvi ñaꞌa Suꞌsi ma ja vii ja vaꞌa, ja maa Cristo ma
\rem Bendiciones espirituales en Cristo
\p
\v 3 Jayiñuꞌu kóo nuu Suꞌsi Yuva Jesucristo iya tátnuni nuu o a. Vaa ja maa Cristo ma, te ni skutaꞌvi ñaꞌa ya ndaka ja vii ja vaꞌa iyo andivi ma.
\m
\v 4 Te ja maa ya ma, te jâ ni ndakaji ñaꞌa Suꞌsi ma onde xiꞌna‑ka ma sana ni kuvaꞌa ñuu ñayivi a, sukan‑vaꞌa jin ko kuu o ñayii másu jin ko saꞌa‑ka ja uꞌvi, te jin nduvii jin ndundoo o nuu Suꞌsi ma.
\m
\v 5 Ja kútoo xeen ñaꞌa maa Suꞌsi ma, te ni jani ini ya ja ndakuan‑saꞌya ñaꞌa ya. Te ja maa Jesucristo ma, te ni ka nduu o saꞌya Suꞌsi ma, sukan ni kuu ini maa ya ja saꞌa ya ja jin kuu o, vaa ni kundaꞌvi ini ñaꞌa ya ma.
\m
\v 6 Saꞌa ni saꞌa Suꞌsi ma, sukan‑vaꞌa koo jayiñuꞌu ya, vaa ni skutaꞌvi ñaꞌa ya ja vii ja vaꞌa ma. Te ni ndakuan‑taꞌvi ñaꞌa ya, ja maa Saꞌya ya Jesucristo iya kútoo xeen ya ma.
\m
\v 7 Sukan nevaꞌa kuaꞌa Suꞌsi ma ndaka ja vii ja vaꞌa ma ja taa ya ma, chukan kúu ja onde maa niñi Jesucristo ma ni ndachunaa ya, sana ni ka ndayaa o nuu ja uꞌvi ma, te ni sakanu ini ñaꞌa ya ndaka kuechi ni ka yo saꞌa, ni ka yo kuu o, nuu ni ka yo iyo o nuu ja uꞌvi ma.
\m
\v 8 Te ni saꞌa ya ja ni ka niꞌi o kuaꞌa xeen ja vii ja vaꞌa ma, sukan‑vaꞌa jin nduu o ñayii ndichi ma, te jin kuni o nawa jin ko saꞌa o ma.
\m
\v 9 Te ni kaxtnuꞌu ya tnaꞌa ja ni iyo yuꞌu ma, tnaꞌa ja sukan jâ ni jani ini ya ja ko kuu o ma, tnaꞌa ja saꞌa Cristo ma ja jin kuu o ma, vaa kúndaꞌvi ini ñaꞌa ya ma.
\m
\v 10 Te kivi ndiꞌi ñuu ñayivi a, sukan iyo ja ko kuu ma, te ndaxtutu ya ndaka ja iyo andivi ma jiꞌin ja iyo nuu ñuꞌú a, te xndoo ya nuu ndaꞌa Cristo ma.
\p
\v 11 Te ja maa Jesucristo ma, te jin niꞌi o tnaꞌa ja jin ko kuu taꞌvi o ma, vaa sukan jâ ni jani ini maa Suꞌsi ma iya kúu saꞌa ndaka ma, ja jin kutaꞌvi o ma,
\m
\v 12 sukan‑vaꞌa jin ndakaꞌan jin ndakachi ñayii ma ja vii ka saꞌa ka kuu o ma, te koo jayiñuꞌu nuu Suꞌsi ma, ja sukan ni saꞌa ya ja jin kuu o ma. Te saꞌa ko kuu jiꞌin saña, ja ni ka kukanu ini sa Cristo ma xinañuꞌu‑ka ma.
\m
\v 13 Sani te ndijin tna, ja ni ka jinisoꞌo ni tnuꞌu ndaa tnuꞌu ndija maa Suꞌsi ma, tnuꞌu vii tnuꞌu vaꞌa ja saꞌa ja jin ndaniꞌi taꞌvi o ma. Te ja ni ka kandija ni ya ma, te ja maa Cristo ma, te ndijin ndandaa ja ka iyo ni jiꞌin Xtumani Ndios ma, iya ni skuiso Suꞌsi ma ja kii ya te koo ya ini anua o ma.
\m
\v 14 Te Xtumani Ndios ma, ni sonuu Suꞌsi ma ni taa ya, sukan‑vaꞌa saꞌa maa Xtumani Ndios ma ja jin kukanu ini o ja jin niꞌi o ndaka ja taa Suꞌsi ma, kivi kenda ja jin kaku o nuu ndaka tuꞌu ja uꞌvi ma, te jin nduu o ñuu maa ya ma, sukan‑vaꞌa ndaka o, te jin ndakaꞌan jin ndakachi o sukan saꞌa sukan kúu Suꞌsi ma, te jin chiñuꞌu o ya.
\s1 Sukan ni jikan‑taꞌvi Pablo ma nuu Suꞌsi ma ja jin kuu ñayii ka kandija Suꞌsi ma ja ka iyo i ñuu Éfeso ma
\rem El espíritu de sabiduría y de revelación
\p
\v 15 Te chukan kúu ja saña tna, ja ni jinisoꞌo sa ja sukan ka kukanu ini ni Jesús iya tátnuni nuu o a, jiꞌin ja sukan ka kutoo ni ndaka tnaꞌa o a ja ñatuu na ja uꞌvi‑ka ka saꞌa i ma,
\m
\v 16 te chukan kúu ja ndimaa ndákuan‑taꞌvi sa nuu Suꞌsi ma ja jin kuu ni, te ñatuu ndúnaa sa ja jikan‑taꞌvi sa nuu Suꞌsi ma ja jin kuu ni ndaka jichi ora jikan‑taꞌvi sa ma.
\m
\v 17 Te jikan‑taꞌvi sa nuu Suꞌsi o ma, iya ni kaxtnuꞌu Jesucristo iya tátnuni nuu o a ja Yuva o kúu ya, te iyo kuaꞌa jayiñuꞌu ya, te jikan‑taꞌvi sa ja na chunee ya tnuꞌu ndichi ini anua ni a, te na kaxtnuꞌu ya sukan saꞌa sukan kúu maa ya ma.
\m
\v 18 Te jikan‑taꞌvi sa nuu Suꞌsi ma ja na chindee ñaꞌa ya ja na jin koo ndijin jin koo ndaa janitnuni ni ma, sukan‑vaꞌa jin kunitnuni ni nawa ka ndetu ni ja jin niꞌi ni ja taa iya ni ndakana ñaꞌa ma, te nde a kúu ja vii ja vaꞌa ja jin kutaꞌvi ñayii ni ka nduu i ñuu maa ya ma, ja ñatuu ka saꞌa‑ka i ja uꞌvi ma.
\m
\v 19 Te jin kuni o tnuꞌu ndee tnuꞌu ndatnu ya ma, ja kuaꞌa xeen ja saꞌa ya nuu yoꞌo ja ka kandija o ya ma. Te tnuꞌu ndee tnuꞌu ndatnu ya ma ni kaxtnuꞌu ndiꞌi kuiti ya
\m
\v 20 kivi ni ndaxteku ya Cristo ma neꞌun ñayii ni ka jiꞌi ma, te ni ndasunkoo ya ya xiñi kuaꞌa ya ma onde andivi ma.
\m
\v 21 Te maa Cristo ma tátnuni nuu ndaka ja ka tatnuni ma, jiꞌin nuu ndaka ja ka xnani ñayii ma ja ka tatnuni ka kuu i ma, jiꞌin nuu ndaka tee ka tatnuni ñuu ñayivi a. Te chukan kúu ja maa ya tátnuni nuu ndaka ja iyo tiempu yaꞌa jiꞌin kivi kiꞌin o a.
\m
\v 22 Te ni skendoo Suꞌsi ma ndaka chii jaꞌa Cristo ma, te ni saꞌa Suꞌsi ma ja Cristo ma kúu xini ndaka ñayii ni ka nduu saꞌya Suꞌsi ma ja ka iyo i ndaka ñuu ma.
\m
\v 23 Te ndaꞌa ya ma jaꞌa ya ma ni ka nduu ndaka ñayii ka kandija ya ma. Vaa sukan kúu Cristo ma, sukan ka kuu maa i ñuu ñayivi ya. Te maa ya ma kúu iya saꞌa ja ndaka ja iyo a, te jin ko kuu i sukan kúni maa Suꞌsi ma ja jin ko kuu i ma, te masu nawa jaꞌni ñaꞌa i ja jin ko kuu i ma.
\c 2
\s1 Ja ni kundaꞌvi ini ñaꞌa Suꞌsi ma, saa ni ka ndaniꞌi taꞌvi o
\rem Salvos por gracia
\p \v 1 Te maa Suꞌsi ma ni ndaxteku ñaꞌa ndijin, vaa kuenda tnuꞌu ja ni ka jiꞌi ni nuu ka iyo ni nuu ja uꞌvi ma, te ni ka yo saꞌa, ni ka yo kuu ni ndaka ja uꞌvi ma,
\m \v 2 tnaꞌa ja ni ka yo saꞌa ni, nuu ñatuu jin kuni‑ka ni tnuꞌu Suꞌsi o a, te ni ka yo ndikin, ni ka yo ndikin ni, ni ka yo saꞌa ni sukan ka saꞌa ñayii ñuu ñayivi a, sukan tátnuni tachi ma, suchi iyo ñuu ñayivi a, suchi satniñu ini anua ñayii ñatuu ka kandija Suꞌsi o a.
\m \v 3 Te sukan tna ni ka yo kuu ndaka o, nuu ñatuu jin kuni‑ka o tnuꞌu Suꞌsi o a, te ni ka yo saꞌa o sukan ni ka yo kuni maa yikikuñu o a, jiꞌin ja sukan ni ka yo jani ini maa o ma, te ni ka yo saꞌa o sukan ka saꞌa ndaka‑ka ñayii ma, te ni ka yo saꞌa o ja ni yo ndakiti ini Suꞌsi ma nuu o ma.
\m \v 4 Kovaa Suꞌsi o ma chi ndaꞌvi xen‑xeen ini ya, te kútoo xen‑xeen ñaꞌa ya,
\m \v 5 vaa nuu ja ni kundee maa ja uꞌvi ma ni jaꞌni ñaꞌa i ma, kuechi ndaka ja uꞌvi ni ka yo saꞌa o ma, te ja ndaꞌvi ini maa Suꞌsi ma, te ni skutaꞌvi ñaꞌa ya ja vii ja vaꞌa ma, te nuu ni ndateku Cristo ma, te ni ka ndateku tna o, te ni ka ndaniꞌi taꞌvi o.
\m \v 6 Te ni saꞌa Suꞌsi ma ja ni ka ndateku o jiꞌin Cristo ma, te ni ndasunkoo ñaꞌa ya jiꞌin Cristo Jesús ma onde andivi ma.
\m \v 7 Te kivi kiꞌin o a, te kaxtnuꞌu ya ndaka ja vii ja vaꞌa skutaꞌvi ñaꞌa ya yoꞌo, ja ka iyo o jiꞌin Cristo Jesús o a, vaa ni kundaꞌvi xen‑xeen ini ñaꞌa ya ma.
\m \v 8 Vaa kuechi ja ndaꞌvi ini Suꞌsi ma, te ni skutaꞌvi ñaꞌa ya ja vii ja vaꞌa ma, te ni ka ndaniꞌi taꞌvi o a, vaa ni ka kandija o ya ma. Te chaꞌa chi masu in ja ni ka saꞌa maa o ma te ni ka niꞌi o kúu, chi ñaꞌa. Vaa in ja vii ja vaꞌa ni skutaꞌvi ñaꞌa maa Suꞌsi ma kúu.
\m \v 9 Vaa masu kuechi ja vii ja vaꞌa ni ka yo saꞌa o ma te ni ka niꞌi o, vaa jin ko kuvixi o.
\m \v 10 Vaa ja maa Cristo Jesús ma, te ni saꞌa Suꞌsi ma ja ni ka nduu o ñayii jin ko saꞌa ja vaꞌa, te jin kondikin o ichi ni satuꞌva ya onde xinañuꞌu ma.
\s1 Ja ni jiꞌi Cristo ma nuu krusi ma, te ni ka ndumani ndaka o, te ni ka nduu tna o ñuu Suꞌsi ma
\rem Reconciliación por medio de la cruz
\p \v 11 Chukan kúu ja ndijin ja masu ñayii judío ma ka kuu ni, jin ndakaꞌán ni ja onde xiꞌna‑ka ma, te ñayii ka yitnuni ma, ni ka yo xnani ñaꞌa i ndijin ñayii masu ka yitnuni, te masu ka iyo ndoo ni nuu Suꞌsi ma ni ka yo kaꞌan i, vaa maa i chi ni ka yo jatanuu‑ka i ja ni ka yo chitnuni i yikikuñu tee ma, vaa ka jani ini i ja onde sukan, te ka iyo ndoo‑ka i nuu Suꞌsi ma.
\m \v 12 Te kivi yukan ma, ñatuu ni ka yo iyo ni jiꞌin Cristo ma, te ni ka yo iyo jika ni ñuu Israel ma, te ñatuu ni ka yo saꞌa ni ja ni tatnuni Suꞌsi ma sukan‑vaꞌa jin koo vaꞌa o jiꞌin ya ma te jin niꞌi o ndaka ja ni skuiso ya nuu o ma. Te ni ka iyo ni ñuu ñayivi a, kovaa masu ni iyo Suꞌsi ma jiꞌin ni, te ñatuu na ja vaꞌa ni ka yo ndetu ni ja jin niꞌi ni ma.
\m \v 13 Kovaa vitna, ja maa niñi Cristo Jesús ma ja ni jati nuu krusi ma, te ka iyo ni jiꞌin Suꞌsi ma. Te ndijin ja ni ka yo iyo jika ni nuu ya ma, te vitna ja ni ka nduyatni ni nuu ya.
\m \v 14 Vaa ja maa Cristo ma, te ni ka ndumani o, vaa ñayii ja masu judío ka kuu i ma jiꞌin ñayii ñuu judío ma, ni saꞌa ya ja ni ka nduu o in‑nka‑ni ñuu, te ni xtandiyo ya ndaka ja ni yo jaꞌnu ndee ja in‑ni ñuu jin ko kuu o ma.
\m \v 15 Te ni xnaa ya ja ñatuu ni ka yo ketnaꞌa ini o ma, te ni xtandiyo ya tnuꞌu ni tatnuni Moisés ma ja ni ka yo kaꞌvi, ni ka yo kaꞌvi sa ndi‑kivi ndi‑kivi ma. Saꞌa ni saꞌa ya, sukan‑vaꞌa jin nduu o in‑ni ñuu, te jin ketnaꞌa ini o, kuenda tnuꞌu ja in‑nka‑ni ñayii jin ko kuu o.
\m \v 16 Te ja ni jiꞌi Cristo ma nuu krusi ma, te ni saꞌa ya ja nduu jichi ñayii ma, te ni ka nduu i in‑nka‑ni ñuu, te ni xnaa ya ja ñatuu ka ketnaꞌa ini i ma, sukan‑vaꞌa jin koo mani ndaka i jiꞌin Suꞌsi ma.
\m \v 17 Te ni kii ya, te ni kaxtnuꞌu ya tnuꞌu vii tnuꞌu vaꞌa ya ma nuu ni, ja ka iyo jika‑ka ni nuu ya ma, jiꞌin nuu sa, ja ka iyo yatni‑ka sa nuu ya ma, sukan‑vaꞌa jin koo mani ndaka o jiꞌin ya ma.
\m \v 18 Vaa ja maa Cristo ma, te ndijin jiꞌin saña, kuu jin kenda koo o nuu Yuva o Suꞌsi ma, ja maa Xtumani maa ya ma.
\m \v 19 Te chukan kúu ja ndijin, masu ka iyo siin‑ka ni, ni a in‑ka jichi ñayii ka kuu ni, suꞌva ñayii ñuu nuu ka iyo ñayii ñatuu na ja uꞌvi‑ka ka saꞌa i ma ka kuu ni, te tnaꞌa saꞌya tata Suꞌsi ma ka kuu ni.
\p \v 20 Te sukan kúu in veꞌe ka kuu o. Vaa Cristo ma kúu yuu kanuu‑ka ni kejaꞌa veꞌe ma, te tee ni tetniñu ya ma, jiꞌin tee ni ka yo ndakaxtnuꞌu tnuꞌu ni yo waꞌa Suꞌsi ma, ka kuu yuu ni ka jakoxtnaꞌa siki yuu kanuu‑ka ma, te yoꞌo ka kuu yuu ni ka jakoxtnaꞌa siki yuu jâ ka yoxtnaꞌa ma.
\m \v 21 Te nú vivii jin jakoxtnaꞌa yuu ma, te kusukun‑ka i, te kenda i ja ko kuu i in veñuꞌu ii ja yoxtnee siki yuu kanuu‑ka ma. Te maa Jesucristo ma kúu yuu kanuu‑ka ni kejaꞌa veꞌe ma.
\m \v 22 Te siki iya kúu yuu kanuu‑ka ma ka yoxtnaꞌa tna ni, sukan‑vaꞌa ndaka o, te ja maa Xtumani Ndios ma, te jin ko kuu o veꞌe nuu koo Suꞌsi ma.
\c 3
\s1 Sukan ni kaxtnuꞌu Pablo ma tnuꞌu Suꞌsi ma nuu ñayii masu judío ka kuu i ma
\rem Ministerio de Pablo a los gentiles
\p \v 1 Saña, kúu sa Pablo, te kuechi ja jinukuechi sa nuu Cristo Jesús o a, ja káxtnuꞌu sa tnuꞌu ya a nuu ni ja ka kuu ni ñayii masu judío ma, te ni ka tnii ñaꞌa i, ja yinee vaꞌa sa vekaa a.
\m \v 2 Vaa jâ ka jini ni sukan ni skutaꞌvi ñaꞌa Suꞌsi ma ja vii ja vaꞌa, sukan‑vaꞌa kunukuechi sa nuu ni a, ja kaxtnuꞌu sa tnuꞌu vii tnuꞌu vaꞌa ya ma.
\m \v 3 Vaa sukan jâ ni tee viviꞌi sa nuu ni a, sukan ni kaxtnuꞌu Suꞌsi ma ja sukan ni jani ini ya ja saꞌa ya ma.
\m \v 4 Nuna jin kaꞌvi ni tutu ni tee sa a, te jin ndasaꞌa ni kuenda ja sukan jákuꞌni ini sa nawa kúu ja jani ini Suꞌsi ma ja saꞌa ya ja maa Cristo ma.
\m \v 5 Te onde kivi vee o ma chi ñatuu ni kaxtnuꞌu Suꞌsi ma nuu saꞌya tata ñayii ñuu ñayivi a tnuꞌu yaꞌa. Kovaa vitna, te ja maa Xtumani Ndios ma, te ni ndakaxtnuꞌu ya nuu tee ni tetniñu Cristo ma ja jin kaxtnuꞌu de tnuꞌu vii tnuꞌu vaꞌa ya ma, jiꞌin tee ni ka yo ndakaxtnuꞌu tnuꞌu ni yo waꞌa Suꞌsi ma.
\m \v 6 Vaa ñayii masu judío ka kuu i ma, jin ndaniꞌi taꞌvi tna i, te jin niꞌi tna i ja ni skuiso Suꞌsi ma, te in‑ni ñayii jin ko kuu i jiꞌin ñayii judío ma, te ja maa tnuꞌu vii tnuꞌu vaꞌa Cristo Jesús ma, te jin niꞌi tna ni ndaka ja ni skuiso Suꞌsi ma.
\m \v 7 Te maa sa jinukuechi ja káxtnuꞌu sa tnuꞌu vii tnuꞌu vaꞌa Suꞌsi o a, vaa sukan ni kundaꞌvi ini ñaꞌa ya, te ni skutaꞌvi ñaꞌa ya ja vii ja vaꞌa a, te sukan, te ka jini ndaka o ja iyo xeen tnuꞌu ndee tnuꞌu ndatnu ya nawa kúni ya ja saꞌa ya ma.
\p \v 8 Kovaa saña chi masu in ñayii kanuu‑ka kúu sa neꞌun ndaka‑ka ñayii ni ka nduvii ni ka ndundoo ka iyo nuu Suꞌsi ma, vaa kuenda kúu in suchi luluu‑ka ni kuu sa. Kovaa saa nuu saña, ni skutaꞌvi ñaꞌa ya ja vii ja vaꞌa, te ni kukanu ini ñaꞌa ya, ja na ndakaxtnuꞌu sa tnuꞌu vii tnuꞌu vaꞌa ya ma nuu ñayii masu judío ka kuu i ma, sukan‑vaꞌa jin kuni i ja ni saꞌa Cristo ma ja jin kuu i ma, vaa ûni masu kuu jin jakuꞌni ini o ndaka ja ni saꞌa ya ma, jiꞌin ja yikuu‑ka ya saꞌa ya ja jin kuu ndaka o ja ka kandija o ya a.
\m \v 9 Te káxtnuꞌu ndaa sa naxe ni jani ni kaꞌvi ini Suꞌsi ma sukan saꞌa sukan kúu ya ni‑kani ni‑jika ma. Te maa in‑ni iya ni saꞌa ndaka ma ni yo naꞌa sukan ko kuu ma.
\m \v 10 Kovaa vitna jâ ni kaxtnuꞌu Suꞌsi o ma sukan saꞌa sukan kúu ya jiꞌin ndaka o ja ni ka nduu o saꞌya ya ma, sukan‑vaꞌa jin kuni ndaka ja ka ndanuu ma te ka tatnuni i ja ka iyo i andivi ma, ja sukan ndichi xen‑xeen Suꞌsi ma.
\m \v 11 Te ja ni yo ñuꞌu ini Suꞌsi ma onde xinañuꞌu kuiti ma ja saꞌa ya ma, te ni saꞌa ya kivi ni tetniñu ya Saꞌya ya Jesucristo iya tátnuni nuu o a.
\m \v 12 Te ja maa Cristo ma, te ni ndanune ja kuu jin tuꞌva sii ini o nuu Suꞌsi ma, te masu nawa jin koyuꞌu o, vaa ka kandija o ya.
\m \v 13 Chukan kúu ja jikan‑taꞌvi sa nuu ni ja másu ko jin xtaya ni ja sukan ndoꞌo neni sa vaa kuechi ja ni kaxtnuꞌu sa tnuꞌu Suꞌsi a nuu ni a. Kovaa ja saꞌa ndoꞌo neni sa a, te jin koo jayiñuꞌu maa ni.
\s1 Ûni kútoo xen‑xeen ñaꞌa Suꞌsi ma
\rem El amor que excede a todo conocimiento
\p \v 14 Te chukan kúu ja jínkoo jiti sa, te jikan‑taꞌvi sa nuu Suꞌsi o Yuva Jesucristo iya tátnuni nuu o a,
\m \v 15 iya tníi kuenda ja ka nani ndaka saꞌya tata ñayii ma, ja ka iyo i andivi ma jiꞌin ñuu ñayivi ya.
\m \v 16 Chukan kúu ja jikan‑taꞌvi sa nuu Suꞌsi iya kúu saꞌa ndaka ma te iyo kuaꞌa jayiñuꞌu ya ma, te ja maa Xtumani maa ya ma, te saꞌa ya ja na koo tnuꞌu ndee tnuꞌu ndatnu maa ya ma ini anua ndaka ni a,
\m \v 17 sukan‑vaꞌa jin kukanu ini ni Cristo ma, te koo ya ini anua ni a, te jin niꞌi yoꞌo vavaꞌa ni te jin konukuiñi vaꞌa ni. Te suni jikan‑taꞌvi sa ja na jin jakuꞌni ini ni sukan jin kutoo tnaꞌa ndija ni ma.
\m \v 18 Vaa nini ja onde jin kutoo tnaꞌa ndija ni ma, sana kuu jin jakuꞌni ini ni jiꞌin ndaka‑ka ñayii ñatuu‑ka na ja uꞌvi ka saꞌa i ma sukan kútoo xen‑xeen ñaꞌa Cristo ma.
\m \v 19 Te na chindee ñaꞌa ya ja jin ndasaꞌa ni kuenda sukan kútoo xen‑xeen ñaꞌa ya ma, vaa in ja kaꞌnu xen‑xeen‑ka kuu ja kútoo ñaꞌa ya ma, te ñatuu na in jakuꞌni ini ja maa i ma‑ni. Te chukan kúu ja jikan‑taꞌvi sa nuu Suꞌsi ma ja na koo ndija ya ini anua ni a, te jin ko saꞌa ni ndaka sukan saꞌa maa ya ma.
\p \v 20 Te maa Suꞌsi iya kúu saꞌa ndaka ma kúu iya taa kuaꞌa xeen‑ka sana ja jikan‑taꞌvi o ma xi ja jani ini o ma. Vaa iyo kuaꞌa xeen tnuꞌu ndee tnuꞌu ndatnu ya ma, te ni ndaxsama ñaꞌa ya ja ni ka nduu o ñayii ka saꞌa ja vaꞌa.
\m \v 21 Te ja maa Cristo Jesús ma, te na koo jayiñuꞌu nuu Suꞌsi ma nuu ka ndatnaꞌa ndaka o ja ni ka nduu o saꞌya ya ma. Te saꞌa kó kuu ndi‑kivi ndi‑kivi ni‑kani ni‑jika. Te sukan kó kuu.
\c 4
\s1 Maa Xtumani Ndios ma na chindee ñaꞌa, te jín kuꞌun ini o ja jin ketnaꞌa ini ndaka o
\rem La unidad del Espíritu
\p
\v 1 Chukan kúu ja saña, ja kuechi ja káxtnuꞌu sa tnuꞌu vii tnuꞌu vaꞌa Iya Tátnuni a, te yinee sa vekaa a, te jikan‑taꞌvi sa nuu ni ja jin ko kuu vaꞌa jin ko kuu ndaa ni, sukan iyo ja jin ko saꞌa o ja ka kuu o ñayii ni ndakana ñaꞌa Iya Tátnuni ma. \fig |GR-gn37n.tif|span||| |4:1\fig*
\m
\v 2 Jín kava kuee ini o, te jín ndakunitnuni o nawa ka saꞌa ka kuu o ma, te jín kanda nuu tnaꞌa o, vaa ka kutoo tnaꞌa o a.
\m
\v 3 Vaa sukan saꞌa maa Xtumani Ndios ma ja jin koo mani o ma, te jín ko ndi ini o ja jin ketnaꞌa ini ndaka o.
\m
\v 4 Te jín kani ini o ja in‑ni ñayii ka kuu o, vaa in‑ni Xtumani Ndios ni ka kutaꞌvi ndaka o. Vaa in‑ni ja ni skuiso ya ja jin niꞌi ndaka o ja ni ndakana ñaꞌa ya ma, te inuu‑ni jin ko kuu ndaka o.
\m
\v 5 Vaa in‑ni iya tátnuni nuu ndaka o. Te suni maa ya ka kukanu ini ndaka o. Te inuu‑ni ni ka jandute o.
\m
\v 6 Te maa in‑ni Suꞌsi ma kúu Yuva ndaka o, te maa ya tátnuni nuu ndaka o, te saꞌa ya ja jin koo vaꞌa ndaka o, te iyo ya ini anua ndaka o.
\m
\v 7 Te maa Cristo ma, jâ ni skutaꞌvi ñaꞌa ya ja vii ja vaꞌa, sukan jini ya ja kuu jin kunukuechi ndi‑in ndi‑in o nuu ya ma.
\m
\v 8 Chukan kúu ja ndee nuu tutu Suꞌsi ma:
\q1 Ni ndaa ya onde sukun ma,
\q2 te ni jan xsiaꞌa ya ja ni yo tatnuni nuu o ma, te ni chinee vaꞌa ya,
\q1 te ni skutaꞌvi ya ñayii ma ja vii ja vaꞌa.
\p
\v 9 ¿Te nawa kúni kaꞌan ja ni ndaa ya ma? Ja kúni kaꞌan kúu ja xinañuꞌu suni ni kêe ya ni jaꞌan ya onde nuu kunu‑ka ma sana ni ndaa ya ma.
\m
\v 10 Vaa iya ni kêe onde kunu‑ka ma, te suni maa ya ni ndaa onde siki ndaka andivi ma, sukan‑vaꞌa ko koto ya ndaka tuꞌu ja iyo a.
\m
\v 11 Te maa ya ni jani ini ja jin koo tee jin kaxtnuꞌu tnuꞌu maa ya ma te ni tetniñu ya de, te jin koo ñayii jin ndakaxtnuꞌu tnuꞌu ni yo waꞌa maa ya ma, te jin koo ñayii jin kaxtnuꞌu tnuꞌu vii tnuꞌu vaꞌa maa ya ma nuu ñayii ñatuu jin kuni‑ka ma. Te nuu ka iyo ñayii ni ka nduu saꞌya Suꞌsi ma ndi‑in ndi‑in ñuu ma, te jin koo ñayii jin ko koto ñaꞌa. Te jin koo ñayii jin ndakaxtnuꞌu tnuꞌu maa ya ma nuu ñayii jâ ni ka nduu saꞌya Suꞌsi ma,
\m
\v 12 sukan‑vaꞌa ñayii yaꞌa, jin skuaꞌa i ñayii ni ka nduu saꞌya maa ya ma ja ñatuu na ja uꞌvi‑ka ka saꞌa i ma, sukan‑vaꞌa jin koo tuꞌva i ja jin kunukuechi i nuu Suꞌsi ma, sukan‑vaꞌa jin ko kuu i ñayii jin koo vaꞌa nuu ya ma, te kuenda tnuꞌu ja ndaꞌa Cristo ma xi jaꞌa ya ma ka kuu o,
\m
\v 13 sukan‑vaꞌa onde nú ni ka kenda koo ndaka o ja inuu‑ni jin kukanu ini o ya ma, te jin ko kuu o in ñayii ni ka teku vaꞌa ini, te jin kutuꞌva o ja jin saꞌa o ndimaa ja vaꞌa sukan saꞌa maa Cristo ma, sukan‑vaꞌa jin kenda koo o ja jin saꞌa ndaa jin saꞌa ndija o sukan saꞌa maa Cristo ma.
\m
\v 14 Te masu kuu jin ko kuu‑ka o sukan ka kuu suchi kuechi ma, ja ka ndaxsama yachi i ja ka jani ini i ma, te ndevaꞌa‑ni tnuꞌu ka jinisoꞌo i ja ka xndaꞌvi ñaꞌa ñayii masu ka jika ichi ndaa Suꞌsi a, te ka kandija i, vaa vivii ka kaꞌan ñayii yukan.
\m
\v 15 Kovaa yoꞌo chi suꞌva jín koo vaꞌa jin koo ndija o, te jín kutoo tnaꞌa ndija o, sukan‑vaꞌa jin teku‑ka ini o te jin ko saꞌa o sukan saꞌa maa Cristo ma, iya kúu xini ndaka o ja ka kuu o yikikuñu ya ma.
\m
\v 16 Te jín ndasaꞌa o kuenda sukan vivii ka chindee tnaꞌa ndaꞌa o a jaꞌa o a, ni‑kaꞌnu yikikuñu o a, sana kuu nawa saꞌa o ma, te sukan jin ko kuu o, te vivii jin ketnaꞌa ini o, te jin koo tutu ndaka o, te jin chindee tnaꞌa ndaka o. Nde a kúu ja ni taa Suꞌsi ma ja jin saꞌa o ma, te jín saꞌa o, te jín chindee tnaꞌa o, te jin koo vaꞌa jin koo vii ndaka o, vaa ka kutoo tnaꞌa o a.
\s1 Sukan jin ko kuu o ja ni ndasajaa ñaꞌa Cristo ma
\rem La nueva vida en Cristo
\p
\v 17 Chaꞌa kúu ja káꞌan sa, te ja maa Iya Tátnuni ma, te tátnuni sa nuu ni a. Máko jin ko kuu ni sukan ka kuu ñayii ñatuu ka jini Suꞌsi ma, ja ka jani yaꞌa ka jani yukan‑ni ini i ma.
\m
\v 18 Ja ka iyo nee janitnuni i ma, te ka iyo jika i nuu ndaꞌa Suꞌsi ma. Vaa ñayii ñatuu ka jakuꞌni ini ka kuu i, vaa ka saꞌa ndee i ini anua i ma nuu Suꞌsi ma.
\m
\v 19 Te ñayii yaꞌa chi masu nde ka kukan‑nuu‑ka i, te ka saꞌa i ndevaꞌa‑ni nde a ka kuni i ma, te ka iyo sii ini i ja ka saꞌa i ndaka ja uꞌvi ma.
\m
\v 20 Kovaa ndijin chi masu sukan ni kaxtnuꞌu Cristo ma ja jin saꞌa ni ma.
\m
\v 21 Te nú ja ndaa ja ni ka jinisoꞌo ni tnuꞌu ni kaꞌan sa ja ni kaꞌan ya ma, te ni ka kutuꞌva ni sukan ni kaxtnuꞌu maa ya ma, vaa ndaka tnuꞌu ni kaxtnuꞌu ya ma chi ja ndaa kúu.
\m
\v 22 Chukan kúu ja jin xndoo ni ndaka ja uꞌvi sukan ni ka yo saꞌa, ni ka yo kuu ni ma, tnaꞌa ja ni yo xndaꞌvi ñaꞌa ma, te ni ka yo saꞌa neé, ni ka yo saꞌa uun ni ma, te ni xtivi ñaꞌa i ma.
\m
\v 23 Kovaa vitna, te jin ndasajaa ni janitnuni ni a.
\m
\v 24 Te jin nduu ni in ñayii jaa, sukan ni ndasaꞌa ñaꞌa Suꞌsi ma. Te jin ko kuu ni ñayii jin ko saꞌa ja vaꞌa ja ndaa, te ñatuu‑ka na ja uꞌvi jin ko saꞌa kuiti ni.
\p
\v 25 Chukan kúu ja ñatuu koo jin xndaꞌvi tnaꞌa‑ka ni, suꞌva ndi‑in ndi‑in ni jin kaꞌan ndaa nuu tnaꞌa, vaa ndaka o chi in‑ni ñayii ka kuu o.
\m
\v 26 Nú ve jin ndakiti ini ni, kovaa másu ko jin kuaꞌa ni tnuꞌu ja jin ko saꞌa ni ni‑in ja uꞌvi ja saꞌa ja jin kuiso kuechi ni, ni másu ko jin kuaꞌa ni tnuꞌu ja jin ko ndakiti ini ni in nduu kuiti ma,
\m
\v 27 te másu ko jin kuaꞌa ni tnuꞌu ja ko skaꞌan ñaꞌa tachi ma.
\m
\v 28 Chi nú nde ni ni yo sakuiꞌna nuu ñatuu jin kuni‑ka ni tnuꞌu Suꞌsi ma, te máko sakuiꞌna‑ka ni, suꞌva satniñu vaꞌa ni jiꞌin ndaꞌa ni a, sukan‑vaꞌa niꞌi ni nawa chindee ni ñayii ndaꞌvi ka jiniñuꞌu ma.
\m
\v 29 Ñatuu ni‑in tnuꞌu ndevaꞌa ko kee yuꞌu ni a, ja kuñaꞌa ni nuu tnaꞌa ni ma, suꞌva tnuꞌu káꞌan ni ma ko kuu tnuꞌu kuatniñu, sukan‑vaꞌa jin chindee tnaꞌa ni ja jin koo vaꞌa‑ka ni nuu Suꞌsi ma. Te ja sukan jin saꞌa ni ma, te vivii jin kuatnuꞌu ini ñaꞌa ñayii ka ninisoꞌo ñaꞌa ma.
\m
\v 30 Te másu ko jin saꞌa ni ja ko kuxii ini Xtumani Ndios ma, vaa suu ya kaxtnuꞌu na in ka kuu o nuu Suꞌsi ma, te kivi ndenda koo o nuu Suꞌsi ma, te ndakuni ñaꞌa Suꞌsi ma ja saꞌya maa ya ka kuu o.
\m
\v 31 Chukan kúu ja jin xtandiyo ni ndaka tuꞌu tnuꞌu jatu tnuꞌu xiko tnuꞌu ndiꞌvi tnuꞌu kini ja saꞌa ja ka kuxii ka kundaꞌvi ini ni ma. Suni jin xtandiyo ni ja ka ndakiti ini ni ma, jiꞌin ja ka kuyachi ini ni ma, jiꞌin ja ka kana ka kayuꞌu ni ja ka kaꞌan uꞌvi nuu tnaꞌa ni ma, jiꞌin ndaka‑ka ja uꞌvi ka saꞌa ni ma.
\m
\v 32 Suꞌva jin kava vaꞌa ini ni, te jin kundaꞌvi ini nuu tnaꞌa ni, te jin sakanu ini nuu tnaꞌa ni, sukan ni saꞌa Suꞌsi ma, ja maa Cristo ma, te ni sakanu ini ñaꞌa ya ma.
\c 5
\s1 Jín ko kuu o sukan kúu ñayii ni ndaxtnuu Suꞌsi ma janitnuni i ma
\rem Cómo deben vivir los hijos de Dios
\p \v 1 Yoꞌo ja ka kuu o saꞌya too Suꞌsi ma, jín saꞌa o sukan saꞌa maa ya ma.
\m \v 2 Te ndimaa jín kutoo tnaꞌa o, sukan ni kutoo ñaꞌa Cristo ma, vaa ja ni kutoo ñaꞌa ya ma kúu ja ni kachi ya ni chunaa ya nuu tniñu o ma, te ni ndakuaꞌa ya maa ya nuu Suꞌsi ma, kuenda tnuꞌu ja in kiti ja ni ka jaꞌmi i te ni ndaa xiko asi ti ma nuu Suꞌsi ma. Sukan kúu ja ni saꞌa ya ma, te ni jatna ini Suꞌsi ma.
\p \v 3 Kovaa ndijin, jin ko kuu ni sukan iyo ja jin ko kuu ñayii ñuu Suꞌsi ma, ja ñatuu na ja uꞌvi‑ka ka saꞌa i ma. Chukan kúu ja másu ko jin ko kivi nduu jin ko kivi niꞌni ni jiꞌin ñayii ñatuu ni tnandaꞌa jiꞌin ni ma, ni a jin ko saꞌa ni ni‑in ja uꞌvi, ni a jin ko ndiyo ini ni ndaka ja ka iyo ñuu ñayivi a,
\m \v 4 ni a jin ko kaꞌan ni tnuꞌu ndevaꞌa, ni a jin ko kaꞌan ni tnuꞌu ja masu kuatniñu o ma. Vaa masu vaꞌa‑ni ja ndaka tnuꞌu yaꞌa ko kaꞌan o ma, suꞌva ja saꞌa o kúu ja na ndakuan‑taꞌvi o nuu Suꞌsi ma.
\m \v 5 Vaa ka jini ni ja ñayii ka kivi nduu jiꞌin in‑ka ñayii ñatuu ni ka tnandaꞌa jiꞌin i ma, jiꞌin ñayii ka saꞌa ja uꞌvi ma, jiꞌin ñayii ka ndiyo ini ma, inuu‑ni ka kuu i jiꞌin ñayii ka ndachiñuꞌu tnaꞌa ja masu Suꞌsi ka kuu ma, vaa saa ka jatanuu i ndaka chukan te ka xndoo i Suꞌsi ndija ma. Te ni‑in ñayii yaꞌa, masu kuu jin koo i nuu tatnuni Cristo ma jiꞌin Suꞌsi ma, nuu ni skutaꞌvi ya ñayii ka saꞌa ja vaꞌa ja ndaa ma.
\m \v 6 Chukan kúu ja ndijin, jin ko koto vaꞌa ni maa ni, ja ñatuu na in ko xndaꞌvi ñaꞌa ja vivii ko kaꞌan i, te tnuꞌu iyu tnuꞌu suꞌva‑ni ko kuu ma. Vaa ndaka chaꞌa ka saꞌa ñayii ñatuu ka kandija ja káꞌan Suꞌsi ma. Chukan kúu ja ndákiti ini ya nuu i ma.
\m \v 7 Te másu ko jin saꞌa ni sukan ka saꞌa ñayii yukan ma.
\m \v 8 Vaa ndijin chi onde xiꞌna‑ka ma chi ni ka yo iyo ni nuu nee ma, kovaa vitna chi ja maa Iya Tátnuni ma, te ka iyo ni nuu ndúꞌva ñuꞌu vivii maa ya ma, te ndimaa jin ko saꞌa ni sukan ka saꞌa ñayii ka iyo nuu ndúꞌva ñuꞌu vivii maa ya ma.
\m \v 9 Vaa ndaka ja ka saꞌa ñayii ka iyo jiꞌin Xtumani Ndios ma kúu ja jin kava vaꞌa ini i ma, jiꞌin ja jin saꞌa i ja ndaa ndija ma, jiꞌin ja jin kaꞌan i ja ndaa ma,
\m \v 10 te ndimaa ka ndasaꞌa i kuenda nawa játna ini Iya Tátnuni ma, te sukan ka saꞌa i ma.
\m \v 11 Te másu ko jin ko saꞌa ni ja ka saꞌa ñayii ka iyo nee janitnuni i ma, vaa masu nde jiniñuꞌu ja ka saꞌa i ma. Suꞌva jin ndakaꞌan‑soꞌo ni nuu i.
\m \v 12 Vaa ja kan‑nuu xeen kúu ja ka saꞌa yuꞌu i ma, te onde ja ndakaꞌan o ja ka saꞌa i ma, ja kan‑nuu kuu.
\m \v 13 Kovaa ndaka kuechi saꞌa ñayii ma ndatuu kivi ndenda i nuu ndúꞌva ñuꞌu vivii maa Cristo ma, te ndundaa kuechi i ma, vaa nuu ndúꞌva ñuꞌu Cristo ma chi ndaka ndatuu.
\m \v 14 Chukan kúu ja káꞌan tnuꞌu Suꞌsi a:
\q1 Ndoto ni, ndijin ja kixi ni,
\q2 te ndakoo ndijin neꞌun ñayii ni ka jiꞌi ma,
\q1 te Cristo ma, saꞌa ya ja ndundijin nuu ni a.
\p \v 15 Jin ko koto vavaꞌa ni naxe jin ko saꞌa jin ko kuu ni, te jin ko kuu ni ñayii ndichi. Másu ko jin ko kuu ni ñayii ñatuu ka jakuꞌni ini.
\m \v 16 Jin kuatniñu vaꞌa ni tiempu a, vaa kivi ka iyo o a chi kivi iyo xeen‑ka ja uꞌvi kúu.
\m \v 17 Chukan kúu ja jin ko kuu ni ñayii jin ndasaꞌa kuenda nde a kúni Iya Tátnuni ma ja jin saꞌa ni ma, te másu ko jin ko saꞌa ni sukan ka saꞌa ñayii ka iyo nee janitnuni i ma.
\m \v 18 Te másu ko jin ko koꞌo ni ndixi te jin ndajini ni, vaa ja xtivi o maa o kúu. Suꞌva ja jin kuꞌun ini ni kúu ja na koo Xtumani Ndios ma ini anua ni a, te jin ko saꞌa ni sukan kúni maa ya ma.
\m \v 19 Te maa tnuꞌu Suꞌsi ma jin kuatniñu ni ja jin ndakaꞌan‑soꞌo nuu tnaꞌa ndi‑in ndi‑in ni. Te tnaꞌa ja ka jita o ma, ni‑yuꞌu ni‑anua ni jin kata ni, te jin ndachiñuꞌu ni Iya Tátnuni ma.
\m \v 20 Te ja maa Jesucristo iya tátnuni nuu o a, te ndimaa jin ndakuan‑taꞌvi ni nuu Yuva o Suꞌsi ma ja ndaka ja táa ya ma.
\s1 Jín kuandetu nuu tnaꞌa ndi‑in ndi‑in o
\rem La vida familiar del cristiano
\p \v 21 Jín kuandetu nuu tnaꞌa ndi‑in ndi‑in o, vaa ka naꞌa o ja ndeꞌya ñaꞌa Suꞌsi ma.
\m \v 22 Ndijin ja ka kuu ni ñaꞌa ni ka tnandaꞌa ma, jin kuandetu ni nuu yii ni ma, sukan ka jandetu ni nuu Iya Tátnuni ma.
\m \v 23 Vaa yii ni ma, kuenda tnuꞌu ja xini ni ma kúu de, sukan kúu Cristo ma, vaa suu ya kúu xini ma, te ndaka yoꞌo ja ni ka nduu o saꞌya Suꞌsi ma, ka kuu o yikikuñu Cristo ma, vaa maa Cristo ma kúu iya ni saꞌa ja ni ka ndaniꞌi taꞌvi o ma.
\m \v 24 Te sukan ka kandija ndaka o ja ni ka nduu o saꞌya Suꞌsi ma ndaka ja káꞌan Cristo ma, sukan tna na jin kuandetu ñaꞌa ma nuu yii ña ma ndaka nawa káꞌan de ma.
\p \v 25 Ndijin tna ja ka kuu ni tee ni ka tnandaꞌa ma, jin kutoo ni ñasiꞌi ni ma, sukan kútoo Cristo ma ndaka o ja ni ka nduu o saꞌya Suꞌsi ma, vaa maa ya ni ndoꞌo ni neni nuu tniñu o ma, sukan‑vaꞌa jin ndaniꞌi taꞌvi o ma.
\m \v 26 Te ja ni saꞌa ya sukan ma, te ni ndasavii, ni ndasandoo ñaꞌa ya, te ni ndakate ñaꞌa ya jiꞌin tnuꞌu maa ya ma, sukan saꞌa ndute ma,
\m \v 27 sukan‑vaꞌa jin koo o nuu maa ya ma, te jin ko kuu o saꞌya maa Suꞌsi ma, te jin koo jayiñuꞌu o, te ñatuu ni‑in ja uꞌvi ko satneꞌe ñaꞌa. Suꞌva jín xndoo o ndaka ja uꞌvi ma.
\m \v 28 Sukan ni kutoo ñaꞌa Cristo ma, sukan tna jin saꞌa ndijin, jin kutoo ni ñasiꞌi ni ma, sukan ka kutoo ni yikikuñu ni a. Vaa tee kútoo ñasiꞌi de ma chi kútoo de maa de.
\m \v 29 Vaa masu na in saxiko yikikuñu maa i ma chi suꞌva jito vaꞌa i, te ndí ini i ja na koo vaꞌa i ma. Sukan kuiti saꞌa Cristo ma jiꞌin yoꞌo ja ni ka ndaketnaꞌa ini o jiꞌin ya ma ja vivii jito ñaꞌa ya te ndí ini ya nawa ka jiniñuꞌu o ma.
\m \v 30 Vaa yikikuñu maa ya ma ka kuu o.
\m \v 31 Te chukan kúu ja tee tnandaꞌa ma chi xndoo de yuva de ma jiꞌin siꞌi de ma, te kueka tnaꞌa de jiꞌin ñasiꞌi de ma, te in‑nka‑ni yikikuñu jin ko kuu nduu de jiꞌin ña.
\m \v 32 Kaꞌnu xeen kúu tnuꞌu yaꞌa ja ni kaxtnuꞌu Suꞌsi ma nuu o a. Kovaa ja kúni saña kúu ja jin jakuꞌni ini ni sukan ni kutoo ñaꞌa Cristo ma yoꞌo ja ka kuu o ñayii ni ka ndaketnaꞌa ini jiꞌin ya ma.
\m \v 33 Te in‑ka tnuꞌu ni kaꞌan sa ma kúu ja ndi‑in ndi‑in ndijin, jin kutoo ni ñasiꞌi ni ma, sukan ka kutoo ni maa ni ma. Te suni ndijin tna ñaꞌa, jin kuandetu ni nuu yii ni ma.
\c 6
\p
\v 1 Suchi kuechi, jin kandija ro sukan ka kaꞌan yuva ro ma jiꞌin siꞌi ro ma, vaa sukan játna ini Iya Tátnuni ma, te ja vaꞌa kúu chaꞌa.
\m
\v 2 Jin kuandetu nuu yuva ro ma jiꞌin nuu siꞌi ro ma, vaa chaꞌa chi in ja xinañuꞌu ni tatnuni Suꞌsi ma kúu, te iyo in ja ni skuiso ya ja niꞌi o nuna saꞌa o sukan ni tatnuni ya ma.
\m
\v 3 Te ja ni skuiso ya ma kúu ja koo vaꞌa o ñuu ñayivi a, te koteku kani o ñuu ñayivi a.
\p
\v 4 Te ndijin ja ka kuu ni yuva suchi kuechi ma, máko jin saꞌa ni ja jin ndakiti ini saꞌya ni ma. Te ja maa Iya Tátnuni ma, te jin kaꞌan‑soꞌo ni nuu i, te jin kaxtnuꞌu vii jin kaxtnuꞌu vaꞌa ni nuu i ja na jin ko saꞌa jin ko kuu i sukan kúni maa Iya Tátnuni ma.
\p
\v 5 Ndijin ja ka jinukuechi ni nuu ñayii xi‑nuu ka satniñu ni ma, jin kandija ni, te jin kava vii jin kava vaꞌa ini ni, te jin kuandetu ni nuu i, kuenda tnuꞌu ja nuu maa Cristo ma ka kandija ni.
\m
\v 6 Jin satniñu ndija ni. Masu yika‑ni ja ora ka ndeꞌya i ma, te jin saꞌa ni ja ka satniñu ni, sukan‑vaꞌa jin kuatnuꞌu ini ñaꞌa i, chi ñaꞌa. Jin kani ini ni ja nuu maa Cristo ma ka jinukuechi ni, te ni‑yuꞌu ni‑anua ni jin satniñu ni nuu ñayii xi‑nuu ka satniñu ni ma, sukan kúni Suꞌsi ma ja jin saꞌa ni.
\m
\v 7 Má jin kani ini ni ja nuu ñayii ma‑ni ka jinukuechi ni, suꞌva jin kani ini ni ja nuu maa Iya Tátnuni ma ka jinukuechi ni, te jin kunukuechi vavaꞌa ni.
\m
\v 8 Vaa jin konaꞌa ni ja ndevaꞌa‑ni na ja vaꞌa ka saꞌa ka kuu maa ñayii ma, te sukan jin ndaniꞌi i ja ndakuaꞌa maa Iya Tátnuni ma, ka kuu i ñayii ka jinukuechi xi ka kuu i ñayii masu ka jinukuechi.
\p
\v 9 Ndijin ja ka nevaꞌa ni ñayii ka jinukuechi nuu ni ma, jin ko kuu vii jin ko kuu vaꞌa ni jiꞌin i, te másu ko jin xsiuꞌu ni i ja nú masu kuu saꞌa i ma te masu jin chuyaꞌvi ni i, chi ñaꞌa. Vaa jin ndakaꞌán ni ja onde andivi ma iyo iya tátnuni nuu o a, te inuu‑ni kútoo ñaꞌa ya ndijin jiꞌin maa i ma.
\s1 Jín kuatniñu vaꞌa o ndaka tnuꞌu ndee tnuꞌu ndatnu táa Suꞌsi ma
\rem La armadura de Dios
\p
\v 10 Chukan kúu ja ndijin ja ni ka nduu tna ni saꞌya Suꞌsi ma, jin kukanu ini vavaꞌa ni iya tátnuni nuu o a, sukan‑vaꞌa chindee chituu ñaꞌa ya, te jin niꞌi ni tnuꞌu ndee tnuꞌu ndatnu maa ya ma.
\m
\v 11 Jin ko tnii vavaꞌa ni ndaka tnuꞌu ndee tnuꞌu ndatnu taa Suꞌsi ma, sukan‑vaꞌa kuu jin konukuiñi vavaꞌa ni, te masu kundee tachi ma nuu ni ora kúni i ja xndaꞌvi ñaꞌa i ma.
\m
\v 12 Vaa masu ñayii ñuu ñayivi a ka kanaa jiꞌin o, nú masu ja ndaka ja ka chindee tnaꞌa jiꞌin tachi ma, ndaka ja ka iyo yatni andivi ma, tnaꞌa ja ka tatnuni nuu nee ma tiempu yaꞌa. Ndaka chaꞌa ka kuu ja ñatuu ka kunimani nuu o a.
\m
\v 13 Chukan kúu ja jín ko tnii vavaꞌa o ndaka tnuꞌu ndee tnuꞌu ndatnu táa Suꞌsi ma, sukan‑vaꞌa kivi kenda tachi ma ja nduku i ja xndaꞌvi ñaꞌa i ma, te masu jin kandija o ja káꞌan i ma. Te nú ni jinu ni ka satuꞌva vaꞌa o maa o, te jín konukuiñi vavaꞌa o.
\m
\v 14 Ûni jín konukuiñi vavaꞌa o, te jín ko tnii vavaꞌa o tnuꞌu ndaa tnuꞌu ndija Suꞌsi ma. Te ûni jín saꞌa o ja vaꞌa ja ndaa ma sukan tátnuni Suꞌsi ma, sukan‑vaꞌa ñatuu na ja uꞌvi ma jin ko xtnaꞌa ñaꞌa.
\m
\v 15 Ndimaa jín koo tuꞌva o, sukan‑vaꞌa kuu jin koo o jin kaxtnuꞌu o tnuꞌu vii tnuꞌu vaꞌa Suꞌsi ma ja saꞌa ja jin ndumani ñayii ma jiꞌin Suꞌsi ma.
\m
\v 16 Te in‑ka ja jin saꞌa o kúu ja ûni jín kukanu ini vavaꞌa o Suꞌsi ma, sukan‑vaꞌa kasi ndee kasi ndoso ñaꞌa ya nuu ndaka ja uꞌvi tétniñu tachi ma nuu ka iyo o a.
\m
\v 17 Te jín kuꞌun jín kuꞌun‑ni ini o ja Suꞌsi ma saꞌa ja jin ndaniꞌi taꞌvi o ma, te masu nawa kuu saꞌa tachi ma ja xndaꞌvi‑ka ñaꞌa i. Te jín tnii vavaꞌa o tnuꞌu vii tnuꞌu vaꞌa Suꞌsi ma, ja ni taa Xtumani maa ya ma, ja kúu i kuenda tnuꞌu ja in yuchi kúu espada ma, vaa suu tnuꞌu ya ma chindee ñaꞌa ja jin kundee o nuu tachi ma. \fig |GR-lllc24n.tif|span|||Jín kuatniñu vaꞌa o ndaka tnuꞌu ndee tnuꞌu ndatnu táa Suꞌsi ma|6:17\fig*
\m
\v 18 Te maa Xtumani Ndios ma na chindee ñaꞌa, te ndimaa jín kakan‑taꞌvi jín kakan‑taꞌvi‑ni o nuu Suꞌsi ma ndaka ora, te másu ko jin ndunaa o ja jin kakan‑taꞌvi o ja jin kuu ndaka‑ka ñayii ni ka nduu saꞌya Suꞌsi ma, ja ñatuu‑ka na ja uꞌvi ka saꞌa i ma.
\m
\v 19 Te jin kakan‑taꞌvi ni ja kuu sa, sukan‑vaꞌa niꞌi ini sa naxe kaxtnuꞌu sa tnuꞌu vii tnuꞌu vaꞌa Suꞌsi ya nuu ñayii ma, te máko koyuꞌu sa.
\m
\v 20 Vaa Suꞌsi ma ni tetniñu ñaꞌa ja kiꞌin kii sa ndaka ñuu a, kaxtnuꞌu sa tnuꞌu vii tnuꞌu vaꞌa maa ya a, te chukan kúu ja vitna chi ni ka juꞌni ñaꞌa i jiꞌin yoꞌo kaa, te yinee vaꞌa sa vekaa ya. Te jin kakan‑taꞌvi ni ja kuu sa, sukan‑vaꞌa máko koyuꞌu sa, te káꞌan sa tnuꞌu vii tnuꞌu vaꞌa Suꞌsi o ya, sukan kúni ya ja saꞌa sa a.
\s1 Ndákuan‑taꞌvi Pablo nuu ñayii ka kandija Suꞌsi ma ja ka iyo i ñuu Éfeso
\rem Saludos finales
\p
\v 21 Kovaa ja kúni sa kúu ja jin kuni tna ni naxe iyo naxe kúu sa a, te nde a kúu ja saꞌa sa a. Te ndaka chaꞌa chi kaxtnuꞌu ñani o Tíquico a, tee ka kutoo tnaꞌa jiꞌin o a, tee jinukuechi vaꞌa nuu Iya Tátnuni ma.
\m
\v 22 Te tee yaꞌa ni tetniñu sa ja jaan de nuu ka iyo ni a, sukan‑vaꞌa kaxtnuꞌu de naxe ka iyo sa yaꞌa, sukan‑vaꞌa jin ndaniꞌi ni tnuꞌu kanu ini.
\p
\v 23 Te maa Yuva o Suꞌsi ma jiꞌin Jesucristo iya tátnuni nuu o a, na saꞌa ya ja ndaka ni ja ni ka nduu ni saꞌya Suꞌsi o a, na jin koo mani ni, te jin kutoo tnaꞌa‑ka ni, te jin kukanu ini‑ka ni Suꞌsi o ma.
\m
\v 24 Te na skutaꞌvi ñaꞌa ya ja vii ja vaꞌa ndaka ni ja ka kutoo xen‑xeen ni Jesucristo iya tátnuni nuu o a. Te sukan kó kuu.