\id PHP ‑ Mixtec, Magdalena Peñasco
\h Filipenses
\mt1 Carta ni saꞌa Pablo ma ja ni tetniñu de nuu ñayii ka iyo ñuu Filipos ma
\c 1
\s1 Sukan ndákan‑tnuꞌu ñañaꞌa Pablo ma ñayii ka kandija Suꞌsi ma ja ka iyo i ñuu Filipos ma
\rem Saludo
\p
\v 1 Saña kúu Pablo a, te ka iyo sa jiꞌin Timoteo a ja ka jinukuechi sa nuu Jesucristo o a. Te tée sa nuu ndaka ni ja ni ka kandija ni Cristo Jesús ma te ñatuu‑ka na ja uꞌvi ka saꞌa ni ma, ja ka iyo ni ñuu Filipos a, jiꞌin tee ka ndakaꞌan‑soꞌo nuu ni naxe jin ko saꞌa jin ko kuu ni nuu Suꞌsi ma, jiꞌin tee ka jinukuechi nuu ni a sukan‑vaꞌa jin koo vaꞌa ni nuu Suꞌsi o a.
\m
\v 2 Te Yuva o Suꞌsi ma jiꞌin Jesucristo iya tátnuni nuu o a, na skutaꞌvi ñaꞌa ya ja vii ja vaꞌa, te jin koo mani ni.
\s1 Sukan jikan‑taꞌvi Pablo ma ja jin kuu ñayii ni ka nduu saꞌya Suꞌsi ma ja ka iyo i ñuu Filipos ma
\rem Oración de Pablo por los creyentes
\p
\v 3 Ndimaa ndákuan‑taꞌvi sa nuu Suꞌsi o ma ndaka jichi ndakaꞌán ñaꞌa sa naxe ka iyo ni a.
\m
\v 4 Ndaka jichi jikan‑taꞌvi sa nuu Suꞌsi ma, ndimaa kusii ini sa ja jikan‑taꞌvi sa ja jin kuu ni.
\m
\v 5 Vaa ni ka ketnaꞌa ini o, te ka chindee tnaꞌa o, ja jin kuni ñayii ma tnuꞌu vii tnuꞌu vaꞌa Suꞌsi ma, te onde nuu ni kejaꞌa ni ka chindee tnaꞌa o ma, te onde vitna ka ketnaꞌa ini o.
\m
\v 6 Te Suꞌsi ma, ni kejaꞌa satniñu ya ini anua ni a ja jin saꞌa ni ja vaꞌa ma, te kukanu ini sa ja maa ya sinu tniñu ni kejaꞌa ya ma, onde kivi ndenda Jesucristo ma.
\m
\v 7 Jani ini sa ja vaꞌa‑ni ja jani ini sa saꞌa ja jin kuu ni, chi vaa ñuꞌu xeen ini ñaꞌa sa ndaka ni. Vaa visi yinee sa vekaa ya, xi yikuu sa kaxtnuꞌu sa ja ja ndaa kúu tnuꞌu vii tnuꞌu vaꞌa Suꞌsi o a, kovaa ndaka ndijin ka jini sukan ni skutaꞌvi ñaꞌa Suꞌsi ma ndaka ja vii ja vaꞌa ma yoꞌo, vaa ka chindee tnaꞌa o ka jinukuechi o nuu ya ma.
\m
\v 8 Vaa Suꞌsi ma, jini ya ja sukan kútoo xeen ñaꞌa sa ndaka ni. Ûni kútoo ñaꞌa sa sukan ni kutoo ñaꞌa Jesucristo ma.
\m
\v 9 Te chukan kúu ja jikan‑taꞌvi sa nuu Suꞌsi ma, ja sukan ka kutoo tnaꞌa o a, te jin kutoo tnaꞌa‑ka o, te jin jakuꞌni vaꞌa ini o naxe jin ko saꞌa jin ko kuu o,
\m
\v 10 te jin kuni ni jin ndakaji ni nde a kúu ja vaꞌa‑ka ma, sukan‑vaꞌa jin ko kuu ni ñayii ka saꞌa ja vaꞌa ja ndaa ma. Te ñatuu na in ko kaꞌan ja ñayii ka saꞌa ja uꞌvi ka kuu ni kivi ndenda Cristo ma.
\m
\v 11 Te ja maa Jesucristo ma, te jin ko saꞌa ni ja vii ja vaꞌa ma, sukan‑vaꞌa jin kaꞌan vii jin kaꞌan vaꞌa ñayii ma ja kuu Suꞌsi ma, te koo jayiñuꞌu ya.
\s1 Saña chi nú téku sa chi ja kunukuechi sa nuu Cristo ma ko kuu
\rem Para mí el vivir es Cristo
\p
\v 12 Ndijin ja ni ka nduu ni saꞌya Suꞌsi o a, kúni sa ja jin kuni ni ja ndaka ja ni ndoꞌo, ni tnaꞌa sa ma chi ni ka chindee ñaꞌa i ja ni jitenuu‑ka tnuꞌu vii tnuꞌu vaꞌa Suꞌsi o ya.
\m
\v 13 Te ndaka soldado ka jito palaciu ya, jiꞌin ndaka tuꞌu ñayii ma, ka jini i ja yinee sa vekaa a ja kuechi ja káxtnuꞌu sa tnuꞌu vii tnuꞌu vaꞌa Cristo ma.
\m
\v 14 Te kuaꞌa‑ka tnaꞌa o ja ni ka nduu i saꞌya Suꞌsi o a, ja ni ka jini i ja yinee sa vekaa a, te ni ka niꞌi‑ka i tnuꞌu ndee tnuꞌu ndatnu, te ka kaxtnuꞌu i tnuꞌu vii tnuꞌu vaꞌa Suꞌsi ma, te masu ka yuꞌu i.
\p
\v 15 Te ja ndaa ndija kúu ja jaku i chi ka kaxtnuꞌu i tnuꞌu vii tnuꞌu vaꞌa Cristo ma kuechi ja ka kukueñu ini i, te ka kuni i ja jin kundee i nuu sa. Kovaa jaku‑ka i ma chi ni‑yuꞌu ni‑anua i ka kaxtnuꞌu i tnuꞌu Suꞌsi ma.
\m
\v 16 Ñayii ka kaxtnuꞌu tnuꞌu vii tnuꞌu vaꞌa Cristo ma ja ka kukueñu ini i ma chi masu ja ka jinukuechi vaꞌa i nuu Suꞌsi ma kúu chi suꞌva ka jani ini i ja sukan, te ndoꞌo neni‑ka sa.
\m
\v 17 Kovaa ñayii ka jini ja yinee vaꞌa sa vekaa a kuechi ja kaxtnuꞌu sa tnuꞌu vii tnuꞌu vaꞌa Suꞌsi ma, chi suꞌva ñukuun ka kaxtnuꞌu i tnuꞌu vii tnuꞌu vaꞌa Cristo ma, vaa ka kutoo ñaꞌa i.
\m
\v 18 Kovaa masu ndí ini sa, ndevaꞌa‑ni naxe ka ñuꞌu ini maa i ma te ka kaxtnuꞌu i ma. Nú ni‑yuꞌu ni‑ini maa i te ka kaxtnuꞌu i, xi ka kukueñu ini maa i, kovaa tnuꞌu Cristo ma ka kaxtnuꞌu i, te chukan kúu ja kúsii ini xeen sa, te suꞌva koo sii ini‑ka sa.
\p
\v 19 Sukan ka jikan‑taꞌvi ni nuu Suꞌsi ma ja kuu sa ma, te kúkanu ini sa ja maa Xtumani Ndios ma chindee ñaꞌa, te ndaka ja ndoꞌo sa a chi saꞌa i ja kaku sa nuu ja uꞌvi ma.
\m
\v 20 Sukan ñuꞌu ini sa, te ndetu sa, te masu nawa kúkan‑nuu sa, vaa suꞌva kúkanu ini‑ka sa Suꞌsi ma. Te visi na koteku sa xi na kûu sa, kovaa kuiti ja sukan ndoꞌo sa a chi koo jayiñuꞌu Cristo ma.
\m
\v 21 Vaa saña chi nú téku sa chi jinukuechi sa nuu Cristo ma, te nuna kûu sa chi jâ ni kundee sa kúu, vaa ndaniꞌi taꞌvi sa nuu Suꞌsi ma.
\m
\v 22 Kovaa nuna koteku‑ka sa chi ja vaꞌa‑ka ko kuu, vaa kuu‑ka kunukuechi sa nuu Suꞌsi ma, te kaꞌan‑ka sa tnuꞌu Suꞌsi o ya, te jin ndukuaꞌa‑ka o ja ka kuu o saꞌya Suꞌsi ma. Te chukan kúu ja ñatuu jini sa naxe kani‑nka ini sa.
\m
\v 23 Kovaa ndevaꞌa‑ni nde a ko kuu, iyo sa ja kuan‑taꞌvi sa, vaa kúu ini sa ja noꞌo sa nuu iyo Cristo ma, chi ja vaꞌa xen‑xeen‑ka maa sa ko kuu.
\m
\v 24 Kovaa ja jin koo vaꞌa maa ni, te jiniñuꞌu ja koteku sa.
\m
\v 25 Te kuiti kúkanu ini sa ja saꞌa ko kuu, te jini sa ja kuiti koo‑ka sa jiꞌin ni, sukan‑vaꞌa chindee‑ka ñaꞌa sa ja jin kukanu ini‑ka ni Suꞌsi ma, te jin koo vaꞌa‑ka ni nuu ya, te jin koo sii ini‑ka ni.
\m
\v 26 Te nuna jaan tuku sa in‑ka jichi nuu ka iyo ni a chi jin koo sii ini xen‑xeen‑ka ni nuu Cristo ma.
\p
\v 27 Yika‑ni ja kúni sa kúu ja jin ko saꞌa jin ko kuu ni sukan káꞌan tnuꞌu vii tnuꞌu vaꞌa Cristo ma, sukan‑vaꞌa nú tnu kaꞌan o ja na jaan sa xi ñaꞌa, kovaa kúni sa ja kunisoꞌo sa ja in‑ni ja ka jani ini ni, te ka nukuiñi vaꞌa ni nuu Suꞌsi ma, te vivii ka chindee tnaꞌa ndaka ni, te ka kuu inuu ini ni, te ka satniñu xeen ni ja ka kaxtnuꞌu ni tnuꞌu vii tnuꞌu vaꞌa Suꞌsi o a ja ka kandija o a.
\m
\v 28 Te saꞌa, te ka jini o ja Suꞌsi ma saꞌa ja ichi jin ndaniꞌi taꞌvi ni ma kuan koo ni. Chukan kúu ja másu ko jin koyuꞌu ni nawa ka saꞌa ka kuu ñaꞌa ñayii ñatuu ka kunimani nuu ni ma. Vaa saꞌa, te ka jini o ja kuan koo maa i ichi nuu jin skenaa i maa i ma, ja sukan ka saꞌa i ma.
\m
\v 29 Vaa in ja vii ja luu kúu ja ni ka niꞌi o a, vaa masu yika‑ni ja jin kandija o ya te ni kuu‑ni chi suni tna ja jin ndoꞌo jin neni o ja kuechi ja ka kaxtnuꞌu o tnuꞌu maa ya a.
\m
\v 30 Vaa ka jini ni ja sukan ni ndoꞌo ni neni sa onde xiꞌna‑ka ma, ja kuechi ja káxtnuꞌu sa tnuꞌu vii tnuꞌu vaꞌa maa ya a, te suni ka jinisoꞌo ni ja onde vitna chi sukan‑ni yikuu sa ndoꞌo sa, te suni sukan jin ko kuu tna ni.
\c 2
\s1 Sukan ni kuu ja ni kii ñayivi Cristo Iya Tátnuni ma ñuu ñayivi a
\rem Humillación y exaltación de Cristo
\p \v 1 Chukan kúu ja nú ni ka ndaniꞌi ni in tnuꞌu kanu ini ni saꞌa Cristo ma vaa kútoo ñaꞌa ya ma, te nú ka kutoo tnaꞌa ndija ni ma vaa jâ ni taa ya tnuꞌu ndee tnuꞌu ndatnu ma, te jin kundee ni jin ndakaꞌan‑mani nuu tnaꞌa ni ma. Te nú ka iyo ni jiꞌin Xtumani Ndios iya saꞌa ja jin ketnaꞌa ini ni ma, te jin kundaꞌvi ini nuu tnaꞌa ni ma,
\m \v 2 te nú ndaka chaꞌa ka saꞌa ni ma, te ka saꞌa ni ja iyo sii ini xen‑xeen sa. Te in‑ni ja jin kani ini o, te jín kutoo tnaꞌa o, te jín ketnaꞌa ini o, te in‑ni ja jín kuꞌun ini o.
\m \v 3 Te ñatuu nawa jin ko saꞌa ni ja jin ko kukueñu ini ni xi jin ko kuvixi ni chi suꞌva jin kani ini ni ja ka ndanuu‑ka ndaka‑ka ñayii ni ka nduu saꞌya Suꞌsi ma sana maa ni ma, te vivii jin kuandetu ni nuu i.
\m \v 4 Ñatuu nawa jin ko kani ini ni ja jin kuu maa‑ni ni chi suꞌva jin kani ini ni ja jin kuu ndaka‑ka ñayii ni ka nduu saꞌya Suꞌsi ma.
\p \v 5 Jin ko kani ini ni sukan ni yo jani ini Cristo Jesús ma.
\m \v 6 Vaa visi inuu‑ni kúu ya jiꞌin Suꞌsi ma, kovaa masu nde ni ndiyo ini ya ja koo ya nuu iyo Suꞌsi ma.
\m \v 7 Vaa suꞌva ni xndoo ya ndaka ja nevaꞌa ya ma, te ni kii ya ñuu ñayivi a, te ni jinukuechi ya nuu ñayii ñuu ñayivi a, kuenda tnuꞌu ja in ñayivi.
\m \v 8 Te nuu ni iyo ñayivi ya ma, te ni ka saꞌa ndevaꞌa ñaꞌa ñayii ma, te ni ka jaꞌni ñaꞌa i onde nuu krusi ma, te masu nawa ni kaꞌan kuiti ya.
\m \v 9 Te chukan kúu ja Suꞌsi ma chi ni waꞌa ya jayiñuꞌu xen‑xeen‑ka Cristo ma sana ndaka‑ka ñayii ma jiꞌin ndaka‑ka ángel ma, te ni xnani ya Cristo ma iya tátnuni nuu ndaka ja iyo a.
\m \v 10 Sukan‑vaꞌa ndaka ja ka iyo andivi ma, jiꞌin ndaka ja ka iyo ñuu ñayivi a, jiꞌin ndaka ja ka iyo ichi chii ñuꞌú a, jín konukuiñi jiti i nuu Jesús ma, te jín ndachiñuꞌu i ya.
\m \v 11 Te ndaka i ma jín ndakaꞌan jín ndakachi ja Jesucristo ma kúu iya tátnuni nuu ndaka o, sukan‑vaꞌa kóo jayiñuꞌu nuu Yuva o Suꞌsi ma.
\p \v 12 Chukan kúu ja ndijin ja ka kutoo tnaꞌa o a, sukan ndimaa ka kandija ñaꞌa ni ma, masu yika‑ni ja ora iyo sa jiꞌin maa ni ma chi suꞌva vitna ja iyo jika‑ka sa a, te jin kandija‑ka ni ja káꞌan sa a, te jin koyuꞌu ni nasa yukan, te jin ko saꞌa ni in ja ñatuu játna ini Suꞌsi o a, vaa ka naꞌa ni ja iya ndakan kuenda nuu o kúu ya, te jin ko ndi ini ni naxe jin ndaniꞌi taꞌvi ni.
\m \v 13 Vaa sukan kúni maa Suꞌsi ma, te maa ya kúu iya saꞌa ja jin kani vaꞌa ini o naxe jin saꞌa o ma, te maa ya chindee ñaꞌa ja kuu jin saꞌa o ma.
\p \v 14 Te jín saꞌa o ndaka, kovaa máko jin kaꞌan tnuꞌu tnaꞌa o, ni a jin ko skiti ini tnaꞌa o,
\m \v 15 sukan‑vaꞌa ñatuu nawa jin ndaxtekuechi ñaꞌa ñayii ma. Te jín kava kuee ini o, sukan‑vaꞌa jin ko kuu o saꞌya Suꞌsi ma. Te ñatuu na ja uꞌvi jín ko saꞌa o nani ka iyo o ñuu ñayivi a nuu ka iyo ñayii ka saꞌa ja uꞌvi a, ja ñatuu ka kandija i Suꞌsi ma. Jín ko kuu o sukan ka kuu tiuxini ma, ja ka nduꞌva i ñuu ñayivi a.
\m \v 16 Jin kotnii vaꞌa ni tnuꞌu vii tnuꞌu vaꞌa Suꞌsi ma, ja saꞌa ja jin koteku ni ma, sukan‑vaꞌa kivi ndenda Cristo ma, te koo sii ini xeen sa ja masu saneé sañuu‑ni kúu ja kuaꞌan vee sa ni satniñu sa nuu Suꞌsi o a.
\m \v 17 Te kúsii ini sa, te kúni sa ja jin koo sii ini ndaka ni jiꞌin sa, vaa visi na kûu sa ja jinukuechi sa nuu Suꞌsi ma, sukan‑vaꞌa jin kandija‑ka ni ya, te ndaka ja jin ndakuaꞌa ni nuu Suꞌsi ma, te kenda nuu maa ya ma.
\m \v 18 Sukan jin koo sii ini maa ni, te koo sii ini tna sa jiꞌin ni.
\s1 Ni tetniñu Pablo ma Timoteo ma jiꞌin Epafrodito ma ja jin koo de ñuu Filipos ma
\rem Timoteo y Epafrodito
\p \v 19 Ja maa Cristo Jesús iya tátnuni nuu o a, te kúni sa ja kuu tetniñu yachi sa Timoteo a jaan de nuu ka iyo ni a, sukan‑vaꞌa saña tna, na kuni sa naxe ka iyo ni a, te koo sii ini sa.
\m \v 20 Vaa ñatuu na in‑ka ñayii ja jin ketnaꞌa ini jiꞌin sa, ja ko ndi ini i sukan ndí ini ndija de ja jin kuu ni a.
\m \v 21 Vaa ndaka‑ka ñayii a chi ka ndi ini i ja jin kuu maa i, te ñatuu ka ndi ini i ja sukan kúni Cristo Jesús ma ja jin saꞌa i ma.
\m \v 22 Vaa ndaka ni, jâ ka jini ni sukan kúu Timoteo a, jiꞌin sukan jinukuechi de jiꞌin sa ja ka kaxtnuꞌu sa tnuꞌu vii tnuꞌu vaꞌa Suꞌsi o a, te chíndee ñaꞌa de kuenda tnuꞌu ja sayii sa kúu de.
\m \v 23 Chukan kúu ja nuna kuni sa naxe jin kaꞌan ñayii ka netniñu a naxe jin saꞌa ñaꞌa i, te tetniñu kunu sa de jaan de nuu ka iyo ni a.
\m \v 24 Kovaa suni kúkanu ini sa nuu Iya Tátnuni ma ja kuu jaan yachi tna sa nuu ka iyo ni a.
\p \v 25 Kovaa jani ini sa ja jiniñuꞌu ja tetniñu tna sa ñani o Epafrodito a, tee ni ka tetniñu ni ja na kunukuechi de nuu sa nawa jiniñuꞌu sa ma, te ka chindee tnaꞌa sa jiꞌin de ja ka kaxtnuꞌu sa tnuꞌu Suꞌsi ma, visi ndimaa kúni tachi ma ja kanu‑ndee i, kovaa masu nde kundee i.
\m \v 26 Vaa kúni xeen de ja kuni ñaꞌa de ndaka ndijin, vaa ni kuxii xeen ini de ja ni ka jinisoꞌo ni ja ni kuꞌu de ma.
\m \v 27 Ja ndaa ndija kúu ja ni kuꞌu xeen de ja sani te kûu de nkuu, kovaa Suꞌsi ma, ni kundaꞌvi ini ya de, te masu maa in‑ni de chi suni ni kundaꞌvi ini tna ñaꞌa ya maa sa a, sukan‑vaꞌa masu kuxii xeen‑ka ini sa.
\m \v 28 Chukan kúu ja tetniñu yachi sa de ja na jaan de nuu ka iyo ni a, sukan‑vaꞌa jin ndakuni tnaꞌa tuku ni jiꞌin de, te jin koo sii ini ni, sukan‑vaꞌa máko kuxii‑ka ini sa.
\m \v 29 Ja maa Iya Tátnuni ma, te jin kuan‑taꞌvi ni de, te jin koo sii ini xeen ni, te jin kutoo ni ndaka tee ka kuu sukan kúu de a.
\m \v 30 Vaa kuechi ja jinukuechi de nuu Cristo ma, vaa suu de táa ndaka nawa jiniñuꞌu sa ma, te suu de saꞌa ndaka ja masu kuu jin saꞌa ni ma, te chukan kúu ja ni iyo yika de ja vala tiꞌi‑nka, te kûu de nkuu ma.
\c 3
\s1 Maa in‑ni ja ndí ini sa kúu ja kenda sa nuu iyo ja kenda sa ma
\rem Prosigo al blanco
\p \v 1 Te chukan kúu ja ndijin ja ni ka nduu ni saꞌya Suꞌsi o a, jin koo sii ini ni nuu Iya Tátnuni ma. Vaa saña chi masu kuñaña sa ja suni maa i tée sa nuu tutu tetniñu sa nuu ni a, vaa chaꞌa kúu ja ka jiniñuꞌu ni.
\m \v 2 Jin koto vaꞌa ni maa ni nuu tee ka kuu sukan ka kuu la‑ina ma, te masu ka kaxtnuꞌu ndaa de tnuꞌu Suꞌsi ma, te ka kuni de ja jin chitnuni de yikikuñu ni ma.
\m \v 3 Vaa masu nde jiniñuꞌu ndaka chukan ja jin ko saꞌa o, vaa yoꞌo ndija ka kuu ñayii ka yitnuni nuu Suꞌsi ma, ndaka yoꞌo ja ni‑yuꞌu ni‑ini o ka jinukuechi o nuu Suꞌsi ma te ka kusii ini o nuu Cristo Jesús ma. Vaa masu nde ka kukanu ini o ja ka chitnuni ñayii ma yikikuñu i ma sana kuu jin koo vaꞌa o nuu Suꞌsi ma.
\m \v 4 Vaa visi iyo ja kuu kukanu ini sa ja ka saꞌa ñayii ma yikikuñu i ma, te nú na in jani ini ja kuu kukanu ini i ja ka chitnuni i yikikuñu i ma, te saña chi iyo ja kukanu ini‑ka sa.
\m \v 5 Vaa ni ka chitnuni ñaꞌa i nuu una kii ja ni kâku sa ma, te tee ñuu Israel ma kúu sa, te saꞌya tata tee kúu Benjamín ma kúu sa, vaa saꞌya tata tee ñuu hebreo ma kúu sa, te ni yo ndikin sa ni yo saꞌa sa sukan ni tatnuni Moisés ma, sukan ka saꞌa tee ka kuu fariseo ma.
\m \v 6 Te ûni ni yo kuni sa ja ndaka ñayii ma jin ko kuu sukan kúu sa ma, te chukan kúu ja ni yo sondikin sa ñayii ka kandija Jesús ma. Te ûni ni yo kuni sa ja saꞌa ndiꞌi saꞌa tuꞌu sa sukan káꞌan tnuꞌu ni tatnuni Moisés ma.
\p \v 7 Kovaa ndaka chaꞌa ja ni‑yuꞌu ni‑ini sa ni yo saꞌa sa ma, masu nawa ni chindee ñaꞌa i, vitna ja iyo sa jiꞌin Cristo o a.
\m \v 8 Vaa ndaka ja ni yo saꞌa, ni yo kuu sa ma, masu nde jiniñuꞌu i, te ja ni xndoo sa, vaa ndásaꞌa sa kuenda ja sukan ka kuu miꞌi ma, sukan ka kuu ndaka ja ni yo saꞌa sa ma. Kovaa vitna ja ni jini sa Cristo Jesús ya, te suu ya tátnuni nuu sa a, te ja kútoo sa ya, chukan kúu ja ni xndoo sa ndaka ja masu nde jiniñuꞌu ma, te ja ndí ini sa kúu ja koo sa jiꞌin ya te jatna ini ya ja saꞌa sa a.
\m \v 9 Te vitna ja ni ndatnaꞌa sa jiꞌin Cristo o ya, te jini sa ja tnuꞌu ni tatnuni Moisés ma, masu ni chindee ñaꞌa i ja ko saꞌa sa ja vaꞌa ja ndaa nuu Suꞌsi ma. Kovaa vitna ja kukanu ini sa Cristo o a, te maa Suꞌsi ma saꞌa ja kuu saꞌa sa ja vaꞌa ja ndaa sukan kúni ya a, vaa kándija sa ya.
\m \v 10 Te ja kúni sa kúu ja koo sa jiꞌin Cristo o a te kuni sa sukan iyo tnuꞌu ndee tnuꞌu ndatnu ya ja ni ndateku ya ma. Te kúni sa ja ndoꞌo neni tna sa sukan ni ndoꞌo ya ma, te kenda sa ja kûu sa sukan ni jiꞌi ya ma,
\m \v 11 sukan‑vaꞌa ndateku sa kivi jin ndateku ñayii ni ka jiꞌi ma.
\m \v 12 Kovaa masu ja saꞌa káꞌan sa ya, te jâ ni kundee sa jâ ni niꞌi sa ndaka kúu, chi suꞌva ja kúni sa kúu ja na chindee ñaꞌa Suꞌsi ma ja na kuu saꞌa vaꞌa saꞌa ndija sa ndaka‑ka. Vaa ja kúni sa kúu ja niꞌi sa ndaka ja ni skuiso maa Cristo Jesús ma ja skutaꞌvi ñaꞌa ya ma, vaa sukan ni skuiso ya kivi ni ndaniꞌi ñaꞌa ya onde xinañuꞌu ma.
\p \v 13 Ndijin ja ni ka nduu ni saꞌya Suꞌsi o a, masu ja kúni sa kaꞌan sa nuu ni ja jâ ni kundee sa kúu, chi ñaꞌa. Kovaa in ja saꞌa sa kúu ja jâ ni xndoo sa ndaka ja ni yo saꞌa sa onde xiꞌna‑ka nuu ñatuu kuni‑ka sa Cristo Jesús o a, te ja saꞌa‑ka sa kúu tnaꞌa ja chindee ñaꞌa ja kenda sa nuu iyo Suꞌsi ma.
\m \v 14 Te ndeꞌya sa ja kenda sa nuu iyo ja kenda sa ma. Te ja maa Cristo Jesús ma, te kundee sa niꞌi sa ja ni skuiso Suꞌsi ma nuu ni ndakana ñaꞌa ya ma.
\m \v 15 Sukan jín kani ini ndaka o ja ni ka kandija o Suꞌsi ma. Nú nde ni sama‑ka jani ini ni, te saꞌa na ndakaxtnuꞌu maa Suꞌsi ma nuu ni.
\m \v 16 Kovaa in ja káꞌan sa kúu: tnaꞌa ja ni ka jakuꞌni ini o ma, te jín ko saꞌa o sukan.
\p \v 17 Ndijin ja ni ka nduu ni saꞌya Suꞌsi o a, jin saꞌa ni sukan saꞌa sa a, te jin kondeꞌya ni nde in ka saꞌa sukan ka saꞌa sa a.
\m \v 18 Vaa jâ ka iyo kuaꞌa xeen ñayii ja ñatuu ka saꞌa ndaa i, sukan ni kaꞌan sa kuaꞌa xeen jichi ma. Te vitna chi ndaꞌyu sa, te káꞌan sa ja masu ñayii ka kunimani nuu Cristo iya ni jiꞌi nuu krusi ma ka kuu i.
\m \v 19 Kovaa kenda kivi ja jin skenaa i maa i, vaa suꞌsi i kúu ja ka ñuꞌu ini i ma, te jayiñuꞌu i ma kúu ja kan‑nuu ka niꞌi i, vaa ndimaa ja iyo ñuu ñayivi a ka ñuꞌu ini i ma.
\m \v 20 Kovaa yoꞌo chi masu ñuu ñayivi a jin koo o chi onde andivi ma iyo nuu jin koo o. Te suni ka ndetu o ja onde andivi ma ndii Jesucristo iya tátnuni nuu o a, iya ni saꞌa ja ni ka kaku o nuu ja uꞌvi ma.
\m \v 21 Te maa ya ndasajaa yikikuñu o a, tnaꞌa ja masu nde jiniñuꞌu a, te nduvii nduvaꞌa i sukan kaa yikikuñu maa ya ma. Vaa ja maa tnuꞌu ndee tnuꞌu ndatnu ya ma, te ndasajaa ya yikikuñu o a, vaa maa ya tátnuni nuu ndaka ja iyo a.
\c 4
\s1 Ndimaa jín koo sii ini o nuu Iya Tátnuni ma
\rem Alégrense siempre en el Señor
\p \v 1 Chukan kúu ja ndijin ja ni ka nduu ni saꞌya Suꞌsi o a, vaa kútoo xeen ñaꞌa sa te ñuꞌu xeen ini ñaꞌa sa, vaa maa ni ka saꞌa ja iyo sii ini xeen sa, te ja maa ni ma, te niꞌi sa ja iyo ja skutaꞌvi ñaꞌa Suꞌsi ma. Chukan kúu ja jin konukuiñi vaꞌa ni nuu Suꞌsi Iya Tátnuni ma.
\p \v 2 Te jikan‑taꞌvi xeen sa nuu Evodia ma jiꞌin Síntique ma ja jin ketnaꞌa ini ña sukan kúni iya tátnuni nuu o a.
\m \v 3 Suni sukan jikan‑taꞌvi tna sa nuu ni, ndijin ja ka ketnaꞌa ini o a te konukuiñi vaꞌa ni nuu Suꞌsi o a, ja na chindee ni ñaꞌa yaꞌa ja jin ketnaꞌa‑ka ini ña, vaa ni ka chindee ñaꞌa ña ni ka kaxtnuꞌu sa tnuꞌu vii tnuꞌu vaꞌa Suꞌsi o a. Te suni sukan tna ni yo saꞌa ñani o Clemente ma, jiꞌin ndaka‑ka tee ni ka chindee tnaꞌa jiꞌin sa ma. Te vaa ñani o a jiꞌin kuꞌva o a chi jâ ka yoxtnee ja ka nani de ma nuu tutu ka ndee ja ka nani ñayii jâ ni ka ndaniꞌi taꞌvi i ma.
\p \v 4 Ndimaa jín koo sii ini o nuu iya tátnuni nuu o a. In‑ka jichi káꞌan sa ja jín koo sii ini o nuu ya.
\m \v 5 Na jin ndakuni ñaꞌa ndaka ñayii ma ja ñayii ka saꞌa ja vii ja vaꞌa ka kuu ni, vaa Iya Tátnuni ma chi jâ iyo yatni ya ja ndii ya.
\m \v 6 Masu nawa jin ko ndi ini ni, suꞌva jin kakan‑taꞌvi xen‑xeen ni nuu Suꞌsi ma nawa ka jiniñuꞌu ni ndaka jichi ka ndakuan‑taꞌvi ni nuu ya ma.
\m \v 7 Te maa Suꞌsi ma na saꞌa ja jin koo mani ndaka o, vaa maa ya chi vivii saꞌa ya, te ûni masu kuu jakuꞌni ini o naxe saꞌa ya ja kuu jin ketnaꞌa ini o te jin koo mani o ma. Te maa tnuꞌu mani yukan na ko koto vaꞌa ini anua o a jiꞌin janitnuni o a, ja maa Cristo Jesús ma.
\s1 Ndimaa ja vii ja vaꞌa ma jín kuꞌun ini o
\rem Piensen en todo lo que es bueno
\p \v 8 Chukan kúu ja ndijin ja ni ka nduu ni saꞌya Suꞌsi o a, jin kani ini ni sukan ka kuu ñayii ka saꞌa ja ndaa ndija ma, jiꞌin ñayii ka saꞌa ja vaꞌa ja ndaa ma, jiꞌin ñayii in‑ni ja ka jani ini i ma, jiꞌin ñayii ka kaꞌan vii ka kaꞌan mani ma, jiꞌin ñayii ka kaꞌan vii ka kaꞌan vaꞌa ñayii ma ja jin kuu i ma, jiꞌin ñayii ka saꞌa ndaka ja vaꞌa ja saꞌa ja jin koo jayiñuꞌu i ma, te sukan jin ko kuu tna ni.
\m \v 9 Te jin ko saꞌa ni sukan ni kaxtnuꞌu sa ma, sukan ni tatnuni sa ma, sukan ni ka jinisoꞌo ni te ni ka jini ni ja ni yo saꞌa sa ma. Te sukan jin ko saꞌa ni, te maa Suꞌsi iya saꞌa ja jin koo mani o ma, koo ya jiꞌin ndaka ni a.
\s1 Tnaꞌa ja vii ja vaꞌa ni ka ndakuaꞌa ñayii ñuu Filipos ma nuu Suꞌsi ma
\rem Dádivas de los filipenses
\p \v 10 Kúsii ini xeen sa nuu iya tátnuni nuu o a, ja ndaka ni ni ka ndakaꞌán ñaꞌa te ni ka tetniñu ni ja jiniñuꞌu sa ma. Vaa masu ja ni ka ndunaa ñaꞌa ni kúu chi kuechi ja ñatuu ni kuu naxe jin tetniñu ni ma kúu.
\m \v 11 Kovaa masu káꞌan sa saꞌa kuechi ja iyo nawa jiniñuꞌu sa, vaa jâ ni kutuꞌva sa, te iyo sii ini sa, ndevaꞌa‑ni nú nevaꞌa sa ja jiniñuꞌu sa ma xi ñatuu.
\m \v 12 Te jini sa naxe kuu ja ko kundaꞌvi ko kukee o ma, te jini sa naxe kuu ja konevaꞌa o ndaka nawa jiniñuꞌu o ma. Jâ ni kutuꞌva sa ndaka naxe koteku sa ma, nú iyo kuaꞌa ja kaa sa, xi ko kokon ko yichi sa, xi konevaꞌa kuaꞌa‑ka sa sana nawa jiniñuꞌu sa ma, xi ja ñatuu nawa nevaꞌa kuiti sa ma.
\m \v 13 Ndaka kuu saꞌa sa, vaa iyo maa Cristo ma ja chíndee chítuu ñaꞌa ya.
\p \v 14 Kovaa vaꞌa‑ni ni ka saꞌa ni ja ni ka chindee ñaꞌa ni, kivi ni ndoꞌo ni neni sa ma.
\m \v 15 Vaa kivi ni kenda sa ñuu Macedonia ma ja kuaꞌan sa in‑ka ñuu ma ja kaxtnuꞌu sa tnuꞌu vii tnuꞌu vaꞌa Suꞌsi ma, te maa in‑ni ni ja ka iyo ni ñuu Filipos a ja ni ka nduu ni saꞌya Suꞌsi o a, ka kuu ñayii ni ka chindee ñaꞌa ndaka nawa jiniñuꞌu sa ma.
\m \v 16 Vaa suni nuu iyo sa ñuu Tesalónica ma, te suni in uu jichi ni ka tetniñu ni xuꞌun ja kuatniñu sa ma.
\m \v 17 Vaa masu ndúku sa ja na jin taa kuaꞌa ni ja kuatniñu sa chi suꞌva ja kúni sa kúu ja jin saꞌa kuaꞌa‑ka ni ja vaꞌa nuu Suꞌsi ma, sukan‑vaꞌa koo kuaꞌa‑ka ja ni ka saꞌa ni nuu Suꞌsi ma, te ndataa ya.
\m \v 18 Vaa ni ndaniꞌi sa ndaka ja ni ka tetniñu ni jiꞌin ñani o Epafrodito ma, te vitna chi nevaꞌa kuaꞌa‑ka sa, te ñatuu nawa jiniñuꞌu‑ka sa, vaa ni ndaniꞌi sa ja ni ka tetniñu ni jiꞌin de ma, tnaꞌa ja vii ja vaꞌa ni ka ndakuaꞌa ni nuu Suꞌsi ma, ja jáxiko asi ma, tnaꞌa ja játna ini Suꞌsi ma.
\m \v 19 Te maa Suꞌsi o ma na taa ndaka nawa ka jiniñuꞌu ni, vaa maa ya chi nevaꞌa ya ndaka ja kuu taa ya yoꞌo ja ka kandija o Cristo Jesús ma.
\m \v 20 Nuu maa Yuva o Suꞌsi ma na koo jayiñuꞌu ni‑kani ni‑jika. Te sukan kó kuu.
\s1 Sukan ka ndakan‑tnuꞌu ñañaꞌa de ñayii ka kandija Suꞌsi ma ja ka iyo i ñuu Filipos ma
\rem Saludos finales
\p \v 21 Ndákan‑tnuꞌu ñañaꞌa sa ndaka tnaꞌa o ka iyo jiꞌin ni a ja ni ka kandija i Cristo Jesús ma, ja jâ ni ka xndoo i ja uꞌvi ma. Suni ndaka tnaꞌa o ka iyo jiꞌin sa yaꞌa, ka ndakan‑tnuꞌu ñañaꞌa ña i.
\m \v 22 Suni ndaka ñayii ja ni ka xndoo i ja uꞌvi ja ka iyo i ñuu yaꞌa, ka ndakan‑tnuꞌu ñañaꞌa ña i. Te ñukuun kuiti ka ndakan‑tnuꞌu ñañaꞌa ña ñayii ka jinukuechi nuu tee kúu César ma.
\m \v 23 Te kóo ja vii ja vaꞌa skutaꞌvi ñaꞌa Jesucristo iya tátnuni nuu o a nuu ndaka ni. Te sukan kó kuu.