\id COL ‑ Mixtec, Magdalena Peñasco
\h Colosenses
\mt1 Carta ni saꞌa Pablo ma ja ni tetniñu de nuu ñayii ka iyo ñuu Colosas ma
\c 1
\s1 Sukan ndákan‑tnuꞌu ñañaꞌa Pablo ma ñayii ka kandija Suꞌsi ma ja ka iyo i ñuu Colosas ma
\rem Saludo
\p
\v 1 Saña, kúu sa Pablo tee ni tetniñu Jesucristo ma, ja sukan ni kuni maa Suꞌsi ma, te ka iyo sa jiꞌin ñani o Timoteo a.
\m
\v 2 Te ka ndakan‑tnuꞌu ñañaꞌa ña sa ndijin ja ni ka nduu ni saꞌya Suꞌsi o a ja ka iyo ni ñuu Colosas a, ja ñatuu‑ka na ja uꞌvi ka saꞌa ni ma te vivii ka ndikin ni Cristo Jesús ma. Te Yuva o Suꞌsi ma, jiꞌin Jesucristo iya tátnuni nuu o a, na skutaꞌvi ñaꞌa ya ja vii ja vaꞌa, te jin koo mani ni.
\s1 Jikan‑taꞌvi Pablo ma ja na kuaꞌa Suꞌsi ma tnuꞌu ndichi ñayii ni ka nduu saꞌya Suꞌsi ma
\rem Pablo pide que Dios les conceda sabiduría espiritual
\p
\v 3 Ndaka jichi ka jikan‑taꞌvi sa nuu Suꞌsi, Yuva Jesucristo iya tátnuni nuu o ma, te ndimaa ka ndakuan‑taꞌvi sa nuu ya ja jin kuu ni.
\m
\v 4 Vaa ni ka jinisoꞌo sa sukan ka kukanu ini ni Cristo Jesús ma, te sukan ka kutoo ni ndaka ñayii ni ka nduu saꞌya Suꞌsi o ma ja ñatuu‑ka na ja uꞌvi ka saꞌa i ma.
\m
\v 5 Vaa vitna chi jâ ka kukanu ini ni ja iyo tuꞌva onde andivi ma ja vaꞌa jin niꞌi ni ma, sukan káꞌan tnuꞌu vii tnuꞌu vaꞌa ni ka jinisoꞌo ni ma, ja kúu tnuꞌu ndaa tnuꞌu ndija Suꞌsi o ma.
\m
\v 6 Te sukan ni kenda tnuꞌu yaꞌa nuu ka iyo ni a, sukan ni kenda i ni‑kaꞌnu ñuu ñayivi a, te saꞌa i ja ka nduvii ka nduvaꞌa ini anua ñayii ma. Te chukan kúu ja ve jin ndukuaꞌa‑ka o ja ka kandija o tnuꞌu Suꞌsi o a, te suni sukan tna ni kuu onde kivi ni ka jinisoꞌo ni tnuꞌu vii tnuꞌu vaꞌa ya ma, te ni ka ndakunitnuni ni ja ja ndaa kúu, te sukan vivii ka kuu ni.
\m
\v 7 Vaa sukan ni kaxtnuꞌu Epafras ma tee ka kutoo xeen sa ma, ja ka jinukuechi sa jiꞌin de nuu Cristo Jesús ma, te ni‑yuꞌu ni‑ini de jinukuechi de nuu ni a.
\m
\v 8 Te suni maa de ni ndakani nuu sa sukan saꞌa Xtumani Ndios ma, ja vivii ka kutoo tnaꞌa ni a.
\p
\v 9 Chukan kúu ja onde kivi ni ka jini sa ma, te ñatuu ka ndunaa sa ja jin kakan‑taꞌvi sa nuu Suꞌsi ma ja jin koo vaꞌa ni, te ka jikan‑taꞌvi xeen sa nuu ya ja na jin jakuꞌni vaꞌa ini ndaka ni, sukan kúni ya ja jin ko kuu ni ma, te jin ko kuu ni ñayii ndichi nuu ya,
\m
\v 10 sukan‑vaꞌa jin ko saꞌa jin ko kuu ni sukan iyo ja jin saꞌa yoꞌo ja ka ndikin o Iya Tátnuni ma, te ndimaa jin saꞌa ni sukan játna ini ya ma, te jin saꞌa ni ndaka ja vaꞌa ma, te ûni jin kuꞌun ini ni ja jin jakuꞌni‑ka ini ni sukan kúni ya ja jin ko kuu ni ma.
\m
\v 11 Te sukan ka jikan‑taꞌvi sa nuu ya ja na taa ya tnuꞌu ndee tnuꞌu ndatnu, sukan nevaꞌa maa ya ma ja kúu saꞌa ya ndaka ma, sukan‑vaꞌa jin kundee ni te jin kava kuee ini ni nuu tnundoꞌo tnuneni ma,
\m
\v 12 sukan‑vaꞌa sii ini jin ndakuan‑taꞌvi ni nuu Yuva o iya ni satuꞌva nuu jin ndaniꞌi taꞌvi o jiꞌin ndaka‑ka ñayii ñatuu‑ka na ja uꞌvi ka saꞌa i ma, vaa masu nuu nee‑ka ma ka iyo o a.
\m
\v 13 Vaa maa ya ni saꞌa ja ni ka ndayaa o nuu ndaꞌa suchi iyo nuu nee ma, te ni ka ndenda koo o ñuu nuu tátnuni maa Saꞌya ya iya kútoo xeen ya ma
\m
\v 14 iya ni jati niñi ya ma nuu krusi ma. Te chukan, saa ni ndasakanu ini Suꞌsi ma kuechi o ma, te ni ka ndayaa o nuu ja uꞌvi ma.
\s1 Ja ni jiꞌi Cristo ma nuu krusi ma, te ni ka ndumani o jiꞌin Suꞌsi ma
\rem Reconciliación por medio de la muerte de Cristo
\p
\v 15 Suꞌsi ma, masu kuu kuni ndijin o ya, kovaa Cristo ma ni kaxtnuꞌu sukan kaa ya ma, vaa suu ya kúu Saꞌya xinañuꞌu Suꞌsi ma, te maa ya jâ iyo xinañuꞌu‑ka sana ndaka‑ka ja ka iyo a.
\m
\v 16 Vaa ja maa ya ma, te ni saꞌa Suꞌsi ma ndaka ja ka iyo ya, ndaka ja ka iyo andivi ma, jiꞌin ndaka ja ka iyo nuu ñuꞌú ya, ja ka ndeꞌya o a, jiꞌin ja masu ka ndeꞌya o a, ndaka ja ka tatnuni ichi andivi ma, jiꞌin ndaka ja ka tatnuni nuu ñuꞌú ya. Te ja maa Cristo ma, te ni saꞌa Suꞌsi ma ndaka, te jayiñuꞌu maa Cristo ma kúu ja ka iyo ndaka ja ka iyo a.
\m
\v 17 Te maa ya iyo xinañuꞌu sana ndaka‑ka ja ka iyo a, te ja maa ya, te ka iyo ndaka, te ñatuu nawa naa.
\m
\v 18 Te maa ya kúu xini ndaka yoꞌo ja ni ka nduu o saꞌya Suꞌsi ma, te ka kuu o yikikuñu ya ma. Te maa ya kúu xinañuꞌu ma, te maa ya ni ndateku xinañuꞌu neꞌun ñayii ni ka jiꞌi ma, sukan‑vaꞌa maa ya ko kuu xinañuꞌu nuu ndaka ja ka iyo ñuu ñayivi a.
\m
\v 19 Vaa ni jatna ini Suꞌsi ma ja nuu maa Cristo ma koo ndaka tnuꞌu ndee tnuꞌu ndatnu ya ma.
\m
\v 20 Te ja maa Cristo ma, te ndaka ja iyo ñuu ñayivi a, jiꞌin ndaka ja ka iyo andivi ma, ni ka ndumani i jiꞌin Suꞌsi ma. Vaa ja maa niñi ya ni jati nuu krusi ma, te ndaka o ja ni ka kandija o Cristo ma, te ni ka ndumani o jiꞌin Suꞌsi ma.
\p
\v 21 Vaa ndijin tna chi onde xiꞌna‑ka ma chi ñatuu ni ka yo ketnaꞌa ini ni jiꞌin Suꞌsi ma, vaa kuechi ja ndimaa ni ka yo ñuꞌu ini ni ja jin ko saꞌa ni ja uꞌvi ma.
\m
\v 22 Kovaa vitna jâ ni ka ndumani ni jiꞌin Suꞌsi ma, vaa maa Cristo ma ni ndoꞌo ni neni nuu krusi ma nuu ni kii ñayivi ya ma, sukan‑vaꞌa jin ndaniꞌi taꞌvi o ma. Te onde saꞌa ni saꞌa ya ma, saa ni ka nduvii, ni ka ndundoo ni ma, te jin ko kuu ni ñayii ñatuu‑ka na ja uꞌvi ka saꞌa ka kuu‑ka, sukan‑vaꞌa vivii ndenda koo ni nuu Suꞌsi ma,
\m
\v 23 nú tnu kaꞌan o ja ka nukuiñi vaꞌa ni nuu Suꞌsi o a, te ka kukanu ini‑ka ni ya, te másu ko jin ndunaa ni ndaka sukan ni skuiso Suꞌsi ma ja jin niꞌi ni ma, nuu tnuꞌu vii tnuꞌu vaꞌa ni ka jinisoꞌo ni ma. Vaa tnuꞌu yaꞌa kúu tnuꞌu ja ka kaxtnuꞌu i ni‑kaꞌnu ñuu ñayivi a, te suni ni tatnuni Suꞌsi ma ja kaxtnuꞌu sa nuu ni.
\s1 Sukan jinukuechi Pablo ma ja káxtnuꞌu de tnuꞌu Suꞌsi ma nuu ñayii masu judío ka kuu i ma
\rem Ministerio de Pablo a los gentiles
\p
\v 24 Kovaa vitna chi kúsii ini sa sukan ni ndoꞌo sa ja jin kuu ni a, te ja saꞌa ndoꞌo sa ya chi vala‑ni kúu. Kovaa Cristo ma chi ni ndoꞌo xen‑xeen‑ka ya ja jin kuu o, sana ni ka nduu o saꞌya Suꞌsi ma, te vitna chi jâ ni ka kuu o yikikuñu ya ma.
\m
\v 25 Te maa Suꞌsi ma ni saꞌa ja kunukuechi sa nuu ya, sukan‑vaꞌa kaxtnuꞌu ndiꞌi kuiti sa tnuꞌu vii tnuꞌu vaꞌa ya ma nuu ni a, sukan ni jani ini ya ja jin kuu ni ma.
\m
\v 26 Te tnuꞌu yaꞌa chi ñatuu ni ka yo jini ñayii ma onde xiꞌna xen‑xeen‑ka ma, kovaa vitna chi jâ ni kaxtnuꞌu Suꞌsi ma nuu ñayii ñatuu‑ka na ja uꞌvi ka saꞌa i ma.
\m
\v 27 Vaa ni kuni Suꞌsi ma ja jin kuni ndaka o ja vii ja vaꞌa ja jin niꞌi ni ja ka kuu ni ñayii masu ñuu judío ma. Te chaꞌa kúu ja koo Cristo ma meꞌñu ndaka ni ma, te chukan kúu ja ka kukanu ini ni ja koo jayiñuꞌu Cristo ma jiꞌin ni.
\m
\v 28 Saña chi ka kaxtnuꞌu vii ka kaxtnuꞌu vaꞌa sa tnuꞌu Cristo ma, te ka ndakaꞌan‑soꞌo sa nanimaa tnuꞌu ndichi ya ma nuu ndi‑in ndi‑in ñayii ma, sukan‑vaꞌa kivi ndakan Suꞌsi ma kuenda nuu o ma, te ka iyo vii ka iyo ndoo o ndenda koo o nuu ya ma ja ma Cristo ma.
\m
\v 29 Te maa tnuꞌu ndee tnuꞌu ndatnu ni taa Cristo ma kúu ja chíndee ñaꞌa ja jinukuechi sa nuu ya a, te ndí ini xeen sa ja jin kuu ni a.
\c 2
\p \v 1 Vaa kúni sa ja jin kuni ni sukan ndoꞌo neni sa ja jin kuu ni a, jiꞌin ja jin kuu ñayii ñuu Laodicea ma, jiꞌin ja jin kuu ndaka‑ka ñayii ñatuu jin kuni tnaꞌa‑ka jiꞌin sa a,
\m \v 2 sukan‑vaꞌa jin ndaniꞌi ndaka ni tnuꞌu kanu ini ini anua ni a, te jin kuꞌun ini ni ja jin kutoo tnaꞌa ndaka o, onde jin kundee o jin jakuꞌni ndiꞌi kuiti ini o ndaka sukan iyo ja taa Suꞌsi ma, sukan‑vaꞌa jin ndasaꞌa o kuenda ndaka ja ñuꞌu ini Yuva o Suꞌsi ma ja saꞌa ya ja jin kuu o ma nuu ni tetniñu ya Cristo ma.
\m \v 3 Vaa nuu maa Cristo ma iyo ndaka tnuꞌu ndichi tnuꞌu vaꞌa ma, jiꞌin naxe jin jakuꞌni ini o ma.
\m \v 4 Te ndaka chaꞌa káꞌan sa, sukan‑vaꞌa ñatuu na in ko xndaꞌvi ñaꞌa jiꞌin ndevaꞌa‑ni tnuꞌu ka kuni i ja jin kandija ni ma.
\m \v 5 Kovaa visi ñatuu iyo sa nuu ka iyo ni a, kovaa ini anua sa a chi iyo sa jiꞌin ni, te kúsii ini sa ja jini sa sukan ka iyo ndaa ni nuu Suꞌsi ma, te ka kukanu ini vaꞌa ni Cristo ma.
\p \v 6 Chukan kúu ja sukan ni ka jan‑taꞌvi ni Cristo ma ja kuu ya iya tátnuni nuu ni ma, jin ko saꞌa jin ko kuu ni sukan kúni maa ya ma.
\m \v 7 Jin kuꞌun ini ni ja jin niꞌi yoꞌo vaꞌa ni nuu tnuꞌu maa ya a, te jin konukuiñi vavaꞌa ni nuu maa ya a, te jin kukanu ini vavaꞌa ni ya, sukan ni ka kutuꞌva ni ma. Te ndimaa jin ndakuan‑taꞌvi ni nuu ya.
\s1 Sukan jin saꞌa jin kuu o ja ka kandija o Cristo ma
\rem Plenitud de vida en Cristo
\p \v 8 Jin ko koto vaꞌa ni ja ñatuu na in ko xndaꞌvi ñaꞌa ja jin ko kaxtnuꞌu i sukan‑ni ka skuaꞌa ñayii ma‑ni, vaa tnuꞌu iyu tnuꞌu suꞌva‑ni kúu ma, vaa ka ndaneꞌe i sukan ka kaꞌan ñayii ma‑ni, te masu na tnuꞌu kanu ini iyo ja ka kaꞌan i ma. Vaa tnaꞌa ja ka skuaꞌa ñayii ñuu ñayivi a‑ni kúu ma, te ka kukanu ini i ja ka tatnuni ñuu ñayivi a, te ñatuu ka kukanu ini i Cristo ma.
\m \v 9 Te vitna ja maa Cristo ma kúu ndaka tnuꞌu ndee tnuꞌu ndatnu Suꞌsi ma.
\m \v 10 Te ndijin chi jâ ka nevaꞌa ni ndaka, vaa ka iyo ni jiꞌin ya ma. Vaa maa ya tátnuni nuu ndaka ja ka tatnuni ma.
\m \v 11 Vaa ja maa Cristo ma, te jâ ni ka jakitnuni ni, te masu sukan ni ka yo chitnuni tnaꞌa ñayii ma ni saꞌa ya chi ja ni ka kandija ni maa ya ma kúu, te ni xtandiyo ya ndaka ja uꞌvi ni ka yo saꞌa, ni ka yo kuu ni ma.
\m \v 12 Vaa kivi ni ka jandute ni ma, te kuenda tnuꞌu ja ni ka jiꞌi ni, te ni ka kuyuꞌu ni sukan ni kuyuꞌu ya ma, nuu ni ka saꞌvi ni nuu ndute ma. Te suni sukan ni ndateku ya ma, suni sukan ni ka ndateku ni, nuu ni ka nana koo ni nuu ndute ma. Vaa ni ka kandija ni ja iyo tnuꞌu ndee tnuꞌu ndatnu Suꞌsi ma, vaa ni ndaxteku ya Cristo ma.
\m \v 13 Vaa ndijin chi kuenda tnuꞌu ja ni ka jiꞌi ni, ka iyo ni, kuechi ja uꞌvi ni ka yo saꞌa, ni ka yo kuu ni ma, vaa masu ñayii judío ma ni ka yo kuu ni ma. Te ni sakanu ini ñaꞌa Suꞌsi ma ndaka ja uꞌvi ni ka yo saꞌa ni ma, te ni ndaxteku ñaꞌa ya, sukan ni ndaxteku ya Cristo ma.
\m \v 14 Te ni ndaxnaa ya tutu ndee ja ka tavi ni ma nuu káꞌan ja masu ñayii ñuu ya ma ka kuu ni ma, te ni xtandiyo ya neꞌun ndaka ni a, te ni chitnii ya nuu krusi ma.
\m \v 15 Nuu ni jiꞌi ya nuu krusi ma, te sukan ni kaxtnuꞌu ya nuu ñayii ma ja ni kundee ya ni ndaxtandee ya tnuꞌu ndee tnuꞌu ndatnu ja ka tatnuni ñuu ñayivi a.
\p \v 16 Te chukan kúu ja ñatuu na in ko xtekuechi ñaꞌa ja uꞌvi kúu ja ndevaꞌa‑ni na ndeyu ka jaa ni ma, xi na ndute ka jiꞌi ni ma, jiꞌin ja ñatuu ka chiñuꞌu ni viko ka saꞌa i ma, jiꞌin kivi ndenda yoo jaa ma, jiꞌin kivi ni tatnuni Suꞌsi ma ja ma jin satniñu ñayii ma.
\m \v 17 Vaa ndaka tnuꞌu yaꞌa kúu ja ni kaxtnuꞌu Moisés ma, ja ni xtuꞌva ñaꞌa de sukan ko kuu kivi kenda Cristo ma kúu. Kovaa maa Cristo ma kúu ja ndandaa ja iyo ja jin kandija o ma.
\m \v 18 Chukan kúu ja ñayii ka saꞌa tnuꞌu ja ñayii ndaꞌvi ini ka kuu i ma, ja ka ndachiñuꞌu i ángel ma, te ka saꞌa i tnuꞌu ja ka jininuu i ja káꞌan Suꞌsi ma, te ka kuvixi i ja sukan ka jani ini i ma, máko jin kuaꞌa ni tnuꞌu ja jin ko xndaꞌvi ñaꞌa i ja jin skenaa ni maa ni, vaa ndijin chi jâ ni ka ndaniꞌi ni tnuꞌu vaꞌa ma.
\m \v 19 Kovaa ñayii yukan chi masu nde ka tnii tnaꞌa i jiꞌin Cristo ma, ja kúu ya xini o ma te tátnuni ya nuu ndaka o ja ka kuu o yikikuñu ya ma. Kovaa yoꞌo chi ja maa Cristo ma, te jin jakuꞌni‑ka ini o, te jin kuaꞌnu‑ka o, te jin ketnaꞌa‑ka ini o sukan kúni maa Suꞌsi ma.
\p \v 20 Nú ni ka jiꞌi ni sukan ni jiꞌi Cristo ma nuu ndaka ja ka saꞌa ka kuu ñayii ñuu ñayivi a, ¿te navaꞌa ka saꞌa ka kuu ni ndaka ja ka saꞌa ka kuu ñayii ñuu ñayivi a, te ka kandija ni sukan ka tatnuni i ma?
\m \v 21 Vaa ka kaꞌan i ja másu ko jin keꞌe ko jin kaan ni ma, ni a másu ko jin kototnuni ni jiꞌin yuꞌu ni ma, ni a másu ko jin kakiꞌi ndaꞌa ni ma, vaa masu ja vaꞌa kúu, ka kaꞌan i.
\m \v 22 Vaa ndaka chaꞌa chi ja ka kaxtnuꞌu ñayii ma‑ni kúu, te ka tatnuni i ja jin saꞌa ñayii ma, te vitna ja ndaka ndatniñu yaꞌa chi ka tivi i nuna kuatniñu o, te ka naa i.
\m \v 23 Ja ndaa kúu ja ndaka chaꞌa chi ka iyo ñayii ka jani ini i ja vaꞌa kúu, te ka xndoꞌo ka xneni i maa i ja jin kondikin i ja jin saꞌa i ndaka chaꞌa, kovaa masu nde jiniñuꞌu ndaka chaꞌa, chi yika‑ni ja ka saꞌa ñayii ma sukan ka jatna ini yikikuñu i ma‑ni kúu. ¿Te navaꞌa ka kandija ni ma?
\c 3
\p \v 1 Nú tnu kaꞌan o ja ni ka ndateku ni sukan ni ndateku Cristo ma, te jin ndanduku ni ja ka iyo onde sukun ma, tnaꞌa ja ka iyo ja taa ya ma, tnaꞌa ja ka iyo nuu núkoo Cristo ma xiñi kuaꞌa Suꞌsi ma.
\m \v 2 Jin kondeꞌya ni ja ka iyo onde sukun ma, ja taa Suꞌsi ma, te máko jin kondeꞌya‑ka ni ja ka iyo ñuu ñayivi a.
\m \v 3 Vaa ndijin chi ja ni ka jiꞌi ni nuu ndaka ja uꞌvi ma, te ja maa Cristo ma, te ka saꞌa ni sukan játna ini Suꞌsi ma.
\m \v 4 Te jâ ka iyo ni jiꞌin Cristo ma, te kivi jin kuni o ya ma, te jin kuni o sukan jin koo jayiñuꞌu o jiꞌin ya ma.
\s1 Jín xndoo o ndaka ja uꞌvi ni ka yo saꞌa o ma, te jín ndatnii o jín ndasaꞌa o sukan játna ini Suꞌsi ma
\rem La vida antigua y la nueva
\p \v 5 Jin kuꞌun ini ni ja másu ko jin ko saꞌa‑ka ni sukan ka saꞌa ñayii ñuu ñayivi ya, ja ka saꞌa i sukan ka kuu ini maa i ma, te ka satneꞌe i ini anua i ma, te ka saꞌa ndevaꞌa ndekuu‑ni i maa i ma, te ka ndiyo ini i ja jin konevaꞌa i ndaka ja iyo ñuu ñayivi a, te ka saꞌa i sukan ka saꞌa ñayii ka ndachiñuꞌu tnaꞌa ja masu Suꞌsi ka kuu ma.
\m \v 6 Kovaa ñayii ka saꞌa sukan ma chi ndákiti ini Suꞌsi ma nuu i, te kenda kivi ja jin ndachunaa i ja ka saꞌa i ma, vaa masu nde ka kandija i ja tátnuni Suꞌsi ma.
\m \v 7 Ndaka chukan ni ka yo saꞌa tna ni, nuu ni ka yo iyo ni nuu ja uꞌvi ma.
\m \v 8 Kovaa vitna ja jâ ka iyo ni jiꞌin Cristo a, te jin xndoo ni ndaka ja uꞌvi ka saꞌa i ma. Másu ko jin ndakiti‑ka ini nuu tnaꞌa ni. Másu ko jin kaꞌan uꞌvi nuu tnaꞌa‑ka ni. Másu ko jin kaꞌan ndevaꞌa ni ja jin kuu tnaꞌa ni ma. Te másu ko jin kaꞌan‑ka ni tnuꞌu kini tnuꞌu ndevaꞌa nuu tnaꞌa ni ma.
\m \v 9 Másu ko jin xndaꞌvi nuu tnaꞌa‑ka ni, sukan ni ka yo saꞌa, ni ka yo kuu ni onde xiꞌna‑ka ma, nuu ñatuu jin kandija‑ka ni Cristo o a, chi vaa ndaka chukan jâ ni ka xndoo ni ja másu ko jin saꞌa‑ka ni.
\m \v 10 Vaa jâ ni ka ndujaa ni nuu Suꞌsi ma. Te ja kúni ya kúu ja jin jakuꞌni ndiꞌi kuiti ini ni, te jin nduu ni sukan kaa maa iya ni saꞌa ñaꞌa ma.
\m \v 11 Vaa Cristo ma chi masu nde saꞌa siin ya ñayii griego ma, xi ñayii judío ma, xi ñayii yitnuni sukan ni tatnuni Moisés ma, xi ñayii ñatuu yitnuni ma, xi ñayii in‑ka ñuu kúu i ma, xi ñayii ñatuu ni ka yo jini i naxe jin ko saꞌa jin ko kuu i ma, xi ñayii satniñu nuu in‑ka ñayii ma, xi ñayii ñatuu satniñu nuu in‑ka ñayii ma, vaa maa in‑ni ya tátnuni nuu ndaka o ma, te iyo ya jiꞌin ndaka o ma, ndevaꞌa‑ni na in ka kuu o chi inuu‑ni ka kuu o nuu ya.
\p \v 12 Vaa Suꞌsi ma, ni kutoo ñaꞌa ya ndaka o ja ni ndakaji ñaꞌa ya te ka kuu o ñuu ya ma te ñatuu‑ka na ja uꞌvi ka saꞌa‑ka o. Chukan kúu ja jín ko saꞌa jín ko kuu o ndaka sukan játna ini Suꞌsi ma. Jín kundaꞌvi ini tnaꞌa o. Jín kava vaꞌa ini o, te má jin kani ini o ja suu o ka ndanuu‑ka ma. Te jín kava kuee ini nuu tnaꞌa o,
\m \v 13 te jín kanda o nawa ka saꞌa ñaꞌa tnaꞌa o ma. Vaa sukan ni sakanu ini ñaꞌa Cristo ma, te sukan tna jín sakanu ini o tnaꞌa o ma.
\m \v 14 Te ndaka chaꞌa kuu jin saꞌa o, nuna jin kutuꞌva o ja jin kutoo tnaꞌa ndija o, vaa ja kutoo tnaꞌa o ma kúu ja saꞌa ja ûni jin ketnaꞌa ini ndaka o.
\m \v 15 Te maa Suꞌsi ma na chunee ini anua o a tnuꞌu mani ma, te jín koo mani ndaka o, vaa chukan kúu ja ni ndakana ñaꞌa ya ja jin ko kuu o yikikuñu ya ma, te in‑ni ñayii jin ko kuu o. Te ndimaa jin ndakuan‑taꞌvi o nuu Suꞌsi ma jiꞌin nuu ndi‑in ndi‑in tnaꞌa o ma.
\m \v 16 Te nanimaa tnuꞌu Suꞌsi ma na jin kun‑nee ini anua ndaka ni a, te jin ndakaxtnuꞌu nuu tnaꞌa ni, te ndimaa tnuꞌu ndichi ko kuu tnuꞌu jin ndakaꞌan‑soꞌo nuu tnaꞌa ni a. Te ini anua ni a koo tnuꞌu sii ini, te jin kata ni yaa salmos ma, jiꞌin yaa káꞌan sukan saꞌa Iya Tátnuni ma ja jin kuu o ma, sukan‑vaꞌa na koo jayiñuꞌu ya ma.
\m \v 17 Te ndaka ja jin saꞌa ni ma, xi nde a jin kaꞌan ni ma, te jin ndakuneꞌe ni ja maa Jesús iya tátnuni nuu o a, te jin saꞌa ni. Te ja maa ya, te jin ndakuan‑taꞌvi ni nuu Yuva o Suꞌsi ma.
\s1 Sukan jin kuandetu nuu tnaꞌa ndi‑in ndi‑in o vitna ja ni ka nduu o saꞌya Suꞌsi ma
\rem Deberes sociales de la vida nueva
\p \v 18 Ndijin ja ka kuu ni ñaꞌa ni ka tnandaꞌa ma, jin kuandetu ni nuu yii ni ma, vaa sukan játna ini Iya Tátnuni ma.
\m \v 19 Ndijin ja ka kuu ni tee ni ka tnandaꞌa ma, jin kutoo ni ñasiꞌi ni ma, te máko jin ko kaꞌan xiko ni nuu ña te jin ko saꞌa ndevaꞌa ni ña.
\m \v 20 Roꞌo ja ka kuu ro suchi kuechi ma xi suchi jaa ma, jin kandija ndaka ja vaꞌa káꞌan yuva ro ma, jiꞌin ja vaꞌa káꞌan siꞌi ro ma. Vaa sukan játna ini Iya Tátnuni ma.
\m \v 21 Ndijin ja ka iyo saꞌya ni ma, máko jin kaꞌan ndevaꞌa ni nuu i te jin saꞌa ni ja jin ndakiti ini i nuu ni te ma jin kandija‑ka i ja ka kaꞌan ni ma.
\p \v 22 Ndijin ja ka satniñu ni nuu jitoꞌo ni ma, jin kandija ni ndaka nawa tátnuni de ma, te másu ko jin saꞌa ni ja ka satniñu ni yika‑ni ora ka ndeꞌya de ma, sukan ka saꞌa ñayii ka nduku ja jin kuatnuꞌu ini ñaꞌa ñayii ma‑ni. Suꞌva ndijin chi ni‑yuꞌu ni‑ini ni jin satniñu ni, vaa ka naꞌa ni ja ndeꞌya ñaꞌa Iya Tátnuni ma.
\m \v 23 Te ndaka ja jin saꞌa ni ma, ni‑yuꞌu ni‑ini ni jin saꞌa ni, vaa jin konaꞌa ni ja kuenda tnuꞌu ja nuu maa Iya Tátnuni ma ka jinukuechi ni, ja sukan ka jinukuechi ni nuu ñayii ma.
\m \v 24 Vaa jâ ka jini ni ja maa Iya Tátnuni ma taa ja jin kutaꞌvi ni ma, vaa ka jinukuechi ni nuu Cristo iya tátnuni nuu o a.
\m \v 25 Kovaa ñayii ka saꞌa ja uꞌvi ma chi jin ndaniꞌi jin ndatnaꞌa maa i ja uꞌvi ka saꞌa i ma. Te ñayii ka saꞌa ja vaꞌa ma chi jin ndaniꞌi jin ndatnaꞌa maa i ja vaꞌa ka saꞌa i ma. Vaa Suꞌsi ma, ndakan ndaa ya kuenda nuu ndi‑in ndi‑in o.
\c 4
\p
\v 1 Ndijin ja ka nevaꞌa ni ñayii ka satniñu nuu ni ma, jin saꞌa vaꞌa jin saꞌa ndaa ni ja jin kuu i ma, vaa ka naꞌa tna ni ja onde andivi ma iyo iya xi‑nuu ka jinukuechi ni ma.
\p
\v 2 Te másu ko jin kava kuxi ni ja jin kakan‑taꞌvi ni nuu Suꞌsi ma, te másu ko jin ndunaa ni ja jin ndakuan‑taꞌvi ni nuu ya ma.
\m
\v 3 Te suni jin kakan‑taꞌvi ni nuu Suꞌsi ma ja jin kuu sa, sukan‑vaꞌa na ndanune ichi jin koo sa jin kaxtnuꞌu sa tnuꞌu maa ya a, sukan‑vaꞌa jin kuni kuaꞌa‑ka ñayii ma tnuꞌu maa Cristo o a. Vaa kuechi ja kaxtnuꞌu sa tnuꞌu maa ya a, te yinee vaꞌa sa vekaa ya a.
\m
\v 4 Jin kakan‑taꞌvi ni nuu ya ja na kaxtnuꞌu vii kaxtnuꞌu vaꞌa sa tnuꞌu maa ya a, sukan kúni ya ja saꞌa sa a.
\p
\v 5 Jin kani vaꞌa ini ni naxe jin ko kuu ni jiꞌin ñayii ñatuu jin kandija‑ka tnuꞌu Cristo o a, te ndaka kivi ndaka ora, te jin kaxtnuꞌu ni tnuꞌu maa ya nuu ñayii ma.
\m
\v 6 Ndaka ja jin kaꞌan ni ma, te jin kaꞌan ni tnuꞌu vii tnuꞌu vaꞌa tnuꞌu kuatniñu, sukan‑vaꞌa nawa jin ko kakan‑tnuꞌu ñaꞌa ñayii ma, te jin niꞌi ini ni naxe jin ndakoneꞌe ni nuu ndi‑in ndi‑in i ma.
\s1 Sukan ka ndakan‑tnuꞌu ñañaꞌa de ñayii ka kandija Suꞌsi ma ja ka iyo i ñuu Colosas ma
\rem Saludos finales
\p
\v 7 Te ndaka naxe ka iyo naxe ka kuu sa ya chi ndakani maa ñani sa Tíquico a, tee ka kutoo tnaꞌa jiꞌin sa a. Tee yaꞌa chi ni‑yuꞌu ni‑ini de chíndee ñaꞌa de ja jinukuechi sa nuu Iya Tátnuni a.
\m
\v 8 Te suu de ni tetniñu sa ja na jaan de, sukan‑vaꞌa jin kuni sa naxe ka iyo ni jiña, te na ndakaꞌan‑soꞌo de nuu ni a.
\m
\v 9 Te kuan jaan tna ñani o Onésimo ma, tee ka kutoo tnaꞌa jiꞌin o a, tee ni‑yuꞌu ni‑ini de jinukuechi de nuu Suꞌsi o a, ja kúu de tnaꞌa maa ni a. Te jin ndakani de ndaka naxe ka iyo sa yaꞌa.
\p
\v 10 Ñani o Aristarco a, tee ka yinee jiꞌin sa vekaa ya, ndakan‑tnuꞌu ñañaꞌa ña de. Suni Marcos sajin Bernabé a. Nuna jaan de jan koto ñaꞌa de, te jin kuan‑taꞌvi ni de, vaa jâ ka naꞌa ni sukan ni tatnuni sa ja jin ko kuu ni jiꞌin de ma.
\m
\v 11 Te suni ndakan‑tnuꞌu ñañaꞌa ña Jesús ma tee ka xnani i Justo ma. Te maa in‑ni tee yaꞌa ka kuu tee judío ma ja ka chindee ñaꞌa de ja ka kaxtnuꞌu sa nuu ñayii ma sukan tátnuni Suꞌsi ma, te ni ka saꞌa de ja ni ndusii ini sa.
\m
\v 12 Suni ndakan‑tnuꞌu ñañaꞌa ña Epafras ma, te suni tnaꞌa maa ni kúu de. Tee jinukuechi vaꞌa nuu Suꞌsi o ma kúu de, te ndimaa jikan‑taꞌvi xen‑xeen de ja jin kuu ni, sukan‑vaꞌa jin konukuiñi vaꞌa ni nuu Suꞌsi o a te jin saꞌa ni ndaka tuꞌu ja kúni ya ma.
\m
\v 13 Te maa sa jini ja sukan ndí ini xeen de ja jin kuu ni a, jiꞌin ja jin kuu ñayii ñuu Laodicea ma, jiꞌin ja jin kuu ñayii ñuu Hierápolis ma.
\m
\v 14 Suni ndakan‑tnuꞌu ñañaꞌa ña Lucas tee tatna ma, tee ka kutoo tnaꞌa jiꞌin o ma, jiꞌin tee kúu Demas ma.
\m
\v 15 Jin ndakuaꞌa ni nchuxi tnaꞌa o ka iyo ñuu Laodicea ma, jiꞌin ñaꞌa kúu Ninfas ma, jiꞌin ndaka ñayii ni ka nduu saꞌya Suꞌsi o a ja ka iyo i veꞌe ña ma.
\m
\v 16 Nú ni jinu ni ka kaꞌvi ni carta yaꞌa nuu ka iyo ni a, te jin tetniñu ni kíꞌin nuu ñayii ni ka nduu saꞌya Suꞌsi o a ja ka iyo i ñuu Laodicea ma, sukan‑vaꞌa na kaꞌvi in ñayii nuu ndaka i ma. Te carta iyo yukan na ndajaa nuu ka iyo ni a, te jin kaꞌvi ni nuu ndaka tnaꞌa o ni ka nduu saꞌya Suꞌsi o a.
\m
\v 17 Jin kuñaꞌa ni tee kúu Arquipo a ja saꞌa káꞌan sa nuu de: “Ko ndi ini ni ja sinu ni tniñu ni kundaꞌa ni nuu Iya Tátnuni ma.”
\p
\v 18 Saña ja kúu sa Pablo a, te ndaꞌa maa sa tée sa tnuꞌu yaꞌa ja ndákan‑tnuꞌu ñañaꞌa ña sa, te jin konaꞌa ni ja yinee vaꞌa sa vekaa ya. Te maa Suꞌsi o ma, na skutaꞌvi ñaꞌa ya ja vii ja vaꞌa nuu ndaka ni. Te sukan kó kuu.