\id 1TH ‑ Mixtec, Magdalena Peñasco
\h 1 Tesalonicenses
\mt1 Carta xinañuꞌu ni saꞌa Pablo ma ja ni tetniñu de nuu ñayii ka iyo ñuu Tesalónica ma
\c 1
\s1 Sukan ndákan‑tnuꞌu ñañaꞌa Pablo ma ñayii ka kandija Suꞌsi ma ja ka iyo i ñuu Tesalónica ma
\rem Saludo
\p
\v 1 Saña ja kúu sa Pablo te ka iyo sa jiꞌin Silvano a jiꞌin Timoteo a, te ka tee sa tnuꞌu yaꞌa, te ka tetniñu sa nuu ni ja ka kandija ni tnuꞌu Suꞌsi o a, ja ka iyo ni ñuu Tesalónica a, te ka iyo ni jiꞌin Yuva o Suꞌsi a jiꞌin Jesucristo iya tátnuni nuu o a. Te ka kuni sa ja maa Suꞌsi o ma, na skutaꞌvi ñaꞌa ya ndaka ni ja vii ja vaꞌa, te na saꞌa tna ya ja jin koo mani ni.
\s1 Sukan vivii ni ka kandija ñayii ñuu Tesalónica ma tnuꞌu vii tnuꞌu vaꞌa Suꞌsi ma, sukan jín kandija tna in‑ka jichi ñayii ma
\rem El ejemplo de fe que daban los de Tesalónica
\p
\v 2 Ndimaa ka ndakuan‑taꞌvi sa nuu Suꞌsi ma ja jin kuu ni, te ka ndakuneꞌe ñaꞌa sa ora ka jikan‑taꞌvi sa ma.
\m
\v 3 Ka ndakaꞌán ka ndakaꞌán sa nuu Yuva o Suꞌsi ma ja sukan ka jinukuechi ni nuu Suꞌsi ma vaa ka kandija ni tnuꞌu ya ma, jiꞌin sukan ka jinukuechi ni nuu tnaꞌa o a vaa ka kutoo tnaꞌa ni i, jiꞌin sukan ka kanda ni a te ka ndoꞌo ka neni ni a vaa ka kukanu ini ni Jesucristo iya tátnuni nuu o ma ja saꞌa ya ja jin koo vaꞌa ni.
\m
\v 4 Maa Suꞌsi ma kútoo ñaꞌa ndaka ni ja ni ka nduu ni saꞌya ya ma, te ka jini sa ja maa ya ni ndakaji ñaꞌa,
\m
\v 5 vaa kivi ni ka kaxtnuꞌu sa tnuꞌu vii tnuꞌu vaꞌa ma nuu ni a, te masu yika‑ni ja tnuꞌu ka kaꞌan‑ni sa kúu, nú masu ja iyo tnuꞌu ndee tnuꞌu ndatnu maa Xtumani Ndios ma jiꞌin sa. Te sukan ni ka kaꞌan sa, vaa ka kukanu ini xeen sa nuu Suꞌsi ma ja ja ndaa kúu. Te ka naꞌa ni sukan ni ka yo kuu sa jiꞌin ni, vaa ka kuni sa ja jin koo vaꞌa ni nuu Suꞌsi ma.
\p
\v 6 Ndijin chi ni ka saꞌa ni sukan ni ka saꞌa maa sa ma, jiꞌin sukan ni saꞌa maa Iya Tátnuni ma. Te maa Xtumani Ndios ma ni saꞌa ja ni ka jan‑taꞌvi sii ini ni tnuꞌu vii tnuꞌu vaꞌa ma, visi ka ndoꞌo ka neni ni a.
\m
\v 7 Te sukan, te ni ka kuu ni ñayii jin kaxtnuꞌu naxe jin ko kuu ndaka‑ka ñayii ka kandija Suꞌsi ma ja ka iyo i ñuu Macedonia ma jiꞌin ñuu Acaya ya.
\m
\v 8 Te ja maa ni, te ni kee tnuꞌu Iya Tátnuni ma, te ni jitenuu i masu yika‑ni ja ñuu Macedonia ma jiꞌin ñuu Acaya ya, nú masu ja ni‑kaꞌnu ñuu ñayivi a, te ndaka i ka jini sukan ka kandija ni nuu Suꞌsi ma. Te chukan kúu ja masu nawa jiniñuꞌu ja jin kaꞌan‑ka sa.
\m
\v 9 Suꞌva ka kaꞌan maa i sukan vivii ni ka jan‑taꞌvi ñaꞌa ni ma, jiꞌin sukan ni ka xndoo ni ja masu Suꞌsi ka kuu ma, te ni ka ndandikin ni Suꞌsi ndija ma iya téku ma, te ni ka kejaꞌa ni ka jinukuechi ni nuu ya.
\m
\v 10 Suni ka ndakani i sukan ka kukanu ini ni Jesús ma, Saꞌya Suꞌsi ma, iya ni jiꞌi te ni ndateku ya ma, te ka ndetu ka ndetu ni ja ndii ya onde andivi ma. Te maa ya saꞌa ja jin kaku o nuu tnundoꞌo tnuneni iyo ja kenda ma.
\c 2
\s1 Sukan ni satniñu Pablo ma ja ni kaxtnuꞌu de tnuꞌu Suꞌsi ma nuu ñayii ñuu Tesalónica ma
\rem El trabajo de Pablo en Tesalónica
\p \v 1 Ndaka ni ja ni ka nduu o saꞌya Suꞌsi ma, ka jini ni ja vaꞌa‑ni ni kuu ja ni jan koo sa ni jan koto ñaꞌa sa ma.
\m \v 2 Vaa ka jini ni ja visi ni ka xndoꞌo, ni ka xneni ñaꞌa ñayii ñuu Filipos ma, kovaa maa Suꞌsi ma ni chindee ñaꞌa ja ni ka kusaa ini sa, te ni jan koo sa nuu ka iyo ni a, te ni ka kaxtnuꞌu sa tnuꞌu vii tnuꞌu vaꞌa ya ma nuu ni a, visi kuaꞌa ñayii ni ka yo jaꞌnu ndee ma.
\m \v 3 Vaa tnaꞌa ja ni ka kaxtnuꞌu sa ma chi tnuꞌu ndaa tnuꞌu ndija kúu, te masu tnuꞌu xndaꞌvi tnaꞌa o kúu, ni a saꞌa uꞌvi nuu tnaꞌa o kúu.
\m \v 4 Vaa maa Suꞌsi ma ni kukanu ini ñaꞌa, sukan‑vaꞌa jin kaxtnuꞌu sa tnuꞌu vii tnuꞌu vaꞌa ma, te sukan ka saꞌa sa a. Te ja ka kaꞌan sa a, masu ka kuni sa ja jin chiñuꞌu ñaꞌa ñayii ma chi ja ka kuni sa kúu ja jatna ini Suꞌsi ma ja ka saꞌa sa a, vaa maa ya kúu iya jinitnuni nawa jani ini o a.
\m \v 5 Vaa ka jini ni ja masu nama ni ka kaꞌan sa tnuꞌu vivii te jin xndaꞌvi ñaꞌa sa sukan‑vaꞌa jin taa ni xuꞌun ni ma. Te maa Suꞌsi o ma naꞌa,
\m \v 6 chi vaa masu ka nduku sa ja jin chiñuꞌu ñaꞌa ñayii ñuu ñayivi a, ni a maa ni, ni a in‑ka ñayii. Tee ni tetniñu maa Cristo ma ka kuu sa, te ka iyo sa ja kuu jin tatnuni sa ja jin kunukuechi ni nuu sa, kovaa ñatuu ni ka saꞌa sa sukan.
\m \v 7 Suꞌva vivii ni ka yo kuu sa jiꞌin ni ma. Sukan kúu in ñaꞌa jito vivii ña saꞌya maa ña ma, sukan ni ka yo kuu sa jiꞌin ni ma.
\m \v 8 Vaa ka kutoo xeen ñaꞌa sa, te chukan kúu ja masu yika‑ni a ka kuni sa ja jin kaxtnuꞌu sa tnuꞌu vii tnuꞌu vaꞌa Suꞌsi ma nuu ni a, suꞌva ni‑yuꞌu ni‑ini sa jin kunukuechi sa nuu ni, sukan‑vaꞌa kuu jin chindee ñaꞌa sa ja na jin kundee ni nuu tnundoꞌo kenda koo ma, vaa ûni ka kutoo tnaꞌa xeen o.
\m \v 9 Ndaka ni ja ni ka nduu o saꞌya Suꞌsi o ma, jin ndakaꞌán ni sukan ni ka yo satniñu sa ma. Sukan, te ni ka yo niꞌi sa ja jin koteku sa ma. Nduu ñuu ni ka yo satniñu sa, sukan‑vaꞌa ñatuu na nde ni ko ndi ini naxe jin kaa sa ma, nani ni ka yo kaxtnuꞌu sa tnuꞌu vii tnuꞌu vaꞌa Suꞌsi o a.
\p \v 10 Maa Suꞌsi o a jiꞌin ndaka maa ni ka naꞌa ja masu nama ni ka saꞌa ñaꞌa sa ja uꞌvi ma, te ni ka saꞌa ndaa, ni ka saꞌa ndija sa jiꞌin ndaka ni ja ni ka kandija ni Suꞌsi ma. Te ñatuu‑ka na ja uꞌvi iyo jiꞌin sa.
\m \v 11 Vaa jâ ka jini ni ja sukan ka kuu o jiꞌin saꞌya o ma, sukan ni ka yo kaꞌan‑soꞌo sa nuu ni naxe jin ko kuu ni ma, te ni ka yo ndakaꞌan‑mani ñaꞌa sa ndi‑in ndi‑in ni ora ka kuxii ini ni ma,
\m \v 12 te ni ka yo tatnuni sa nuu ni ja jin ko kuu ni sukan ka kuu ñayii ka ndikin Suꞌsi ma, vaa ni kana ñaꞌa ya ja jin koo o jiꞌin ya nuu tatnuni ya ma te jin koo jayiñuꞌu o jiꞌin ya.
\p \v 13 Te chukan kúu ja suni saña tna chi ndimaa ka ndakuan‑taꞌvi sa nuu Suꞌsi o a ja kivi ni ka jan‑taꞌvi ni tnuꞌu Suꞌsi ma ja ni ka kaꞌan sa ma, te masu ni ka jani ini ni ja sukan‑ni kúu in tnuꞌu ka kaꞌan‑ni ñayii ma kúu, nú masu ja sukan káꞌan maa Suꞌsi ma kúu tnuꞌu ni ka kaꞌan sa nuu ni ma. Te ni ka jini ni ja ja ndaa kúu tnuꞌu maa Suꞌsi ma, te satniñu i ini anua o a ja ka kandija o Suꞌsi o a.
\m \v 14 Vaa ndijin ja ni ka nduu ni saꞌya Suꞌsi o ma, ni ka ndoꞌo ni sukan ni ka ndoꞌo ñayii ka iyo ñuu Judea ma ja ka kandija i Suꞌsi ma ja maa Jesucristo ma. Vaa ni ka saꞌa ndevaꞌa ñaꞌa ñayii judío ma, te vitna ja ndi‑tnaꞌa ñuu i ma, te sukan ni ka xndoꞌo ñaꞌa maa ñayii ñuu ni a.
\m \v 15 Te ñayii judío ma ka kuu ñayii ni ka jaꞌni Jesús Iya Tátnuni ma, jiꞌin tee ni ka yo ndakaxtnuꞌu tnuꞌu ni yo waꞌa Suꞌsi ma. Te saña, ni ka taji ñaꞌa i, te ñatuu ka saꞌa i sukan játna ini Suꞌsi ma, te ka jaꞌnu ndee i nuu ndaka ñayii ma ja má jin kandija i tnuꞌu Suꞌsi ma.
\m \v 16 Te ka jaꞌnu ndee i ja má jin kaꞌan sa nuu ñayii masu judío ka kuu i ma, chi vaa masu ka kuni i ja jin ndaniꞌi taꞌvi tna ñayii yukan. Te sukan, te ndimaa ka jiso kuechi xeen i, te jâ iyo ja xndoꞌo xneni Suꞌsi ma ndaka ñayii yukan.
\s1 Pablo ma, kúni de ja kiꞌin de in‑ka jichi ñuu Tesalónica ma
\rem Pablo desea visitar otra vez a los de Tesalónica
\p \v 17 Kovaa ndaka ni ja ni ka nduu o saꞌya Suꞌsi ma, ka iyo jika‑ka sa jaku kivi nuu ka iyo ni a, kovaa ini anua o a chi ka ñuꞌu ini tnaꞌa o, te ka ndi ini xeen sa, te ka kuni xeen sa ja jin kuni tnaꞌa o.
\m \v 18 Chukan kúu ja ni ka kuni sa ja jan koo sa nuu ka iyo ni a, te saña ja kúu sa Pablo a, ja ndaa ja uu uni jichi ni kuni sa ja jaan sa. Kovaa ni jaꞌnu ndee tachi ma.
\m \v 19 Kovaa saña chi ka kukanu ini sa ja jin koo sii ini xeen sa nuu Jesús iya tátnuni nuu o a kivi ndii ya ma, vaa ndataa ya ja vii ja vaꞌa jin kutaꞌvi sa, vaa ni ka kandija ni ja ni ka kaꞌan sa ma.
\m \v 20 Chukan kúu ja ndijin ka kuu jayiñuꞌu sa nuu Suꞌsi ma, te chukan kúu ja ka kusii ini xen‑xeen sa.
\c 3
\p \v 1 Chukan kúu ja nuu ñatuu ka kundee‑ka ini sa ma, te ni ka ndatnuꞌu tnaꞌa sa ja jin kendoo maa in‑ni sa ñuu Atenas ya,
\m \v 2 te ni ka tetniñu sa tnaꞌa o Timoteo a tee satniñu nuu Suꞌsi o a tee ka chitnaꞌa jiꞌin sa a ja ka kaxtnuꞌu sa tnuꞌu vii tnuꞌu vaꞌa Cristo ma, sukan‑vaꞌa chindee ñaꞌa de te ndakaꞌan‑soꞌo de nuu ni, sukan‑vaꞌa kuu jin ko saꞌa‑ka ni sukan iyo ja jin ko saꞌa ndaka o ja ka kukanu ini o Suꞌsi ma,
\m \v 3 sukan‑vaꞌa ñatuu na in ndakokuiñi ja kuechi ja ka ndoꞌo ka neni o a. Vaa ka jini maa ni ja ka iyo o ja jin ndoꞌo jin neni o,
\m \v 4 vaa nuu ni ka iyo‑ka sa jiꞌin ni ma, te jâ ni ka xtuꞌva ñaꞌa sa ja sukan jin ndoꞌo o. Te jâ ka jini ni, vaa sukan jâ ni ka ndoꞌo ni a.
\m \v 5 Te chukan kúu ja nuu ñatuu kundee‑ka ini sa ma, te ni tetniñu sa tnaꞌa o Timoteo a ja jan koto ñaꞌa de nú ka nukuiñi vaꞌa ni nuu Suꞌsi ma, nasa yukan, te skaꞌan ñaꞌa tachi ma te naa ndaka ja ni ka kaxtnuꞌu sa nuu ni a.
\p \v 6 Kovaa vitna ja ni ndenda Timoteo a nuu ka iyo sa ya, te ni ndakani de sukan ka kandija ni nuu Suꞌsi ma, jiꞌin sukan ka kutoo tnaꞌa ni ma, jiꞌin ndimaa ka ndakuneꞌe sii ini ñaꞌa ni ma, te ka kuni ni ja jin kuni ñaꞌa ni, te suni ka kuni tna sa ja jin kuni ñaꞌa sa.
\m \v 7 Te chukan kúu ja visi kuaꞌa ja ka ndoꞌo ka neni sa a, kovaa ni ka ndusii ini sa ja ni ka jini sa sukan ka saꞌa ni ja ni ka nduu ni saꞌya Suꞌsi o a, ja ka kandija ni nuu ya ma.
\m \v 8 Te vitna chi ka iyo vavaꞌa sa, vaa ni ka jini sa ja ka iyo vavaꞌa ni nuu Iya Tátnuni ma.
\m \v 9 Te chukan kúu ja ka ndakuan‑taꞌvi xeen sa nuu Suꞌsi o ya, vaa ka kusii ini xeen sa nuu ya, vaa ka jini sa ja sukan ka kuu ni a.
\m \v 10 Te ka jikan‑taꞌvi ka jikan‑taꞌvi sa nduu ñuu nuu Suꞌsi ma, sukan‑vaꞌa jin ndakuni tnaꞌa‑ka o, te jin chindee tnaꞌa o nawa kúni‑ka ja jin kutuꞌva ni naxe kúni Suꞌsi ma ja jin ko saꞌa ni ma.
\p \v 11 Ka kuni sa ja maa Yuva o Suꞌsi ma jiꞌin Jesucristo Iya Tátnuni ma, na chindee ñaꞌa ya ja jan koo sa nuu ka iyo ni a.
\m \v 12 Te maa Iya Tátnuni ma saꞌa ja jin kutoo tnaꞌa xen‑xeen ndi‑in ndi‑in ni, te jin kutoo ni ndaka ñayii ma, sukan ka kutoo ñaꞌa sa a,
\m \v 13 sukan‑vaꞌa jin koo siin ni nuu ndaka ja uꞌvi ma, te ni‑in kuechi jin kondiso ni nuu Yuva o Suꞌsi ma kivi ndenda Jesús Iya Tátnuni ma jiꞌin ndaka ñayii ñatuu ni ka yo saꞌa‑ka i ja uꞌvi ma.
\c 4
\s1 Sukan játna ini Suꞌsi ma ja jin ko saꞌa jin ko kuu o
\rem La vida que agrada a Dios
\p
\v 1 Ndijin ja ni ka nduu o saꞌya Suꞌsi o a, vivii ni ka kutuꞌva ni ja ni ka kaxtnuꞌu sa naxe jin ko saꞌa jin ko kuu ni sukan játna ini Suꞌsi ma. Te sukan jâ ka saꞌa ni. Te ja maa Jesús Iya Tátnuni ma ka jikan‑taꞌvi sa te ka ndakaꞌan‑soꞌo sa nuu ni ja sukan jin ko saꞌa‑ka ni.
\p
\v 2 Vaa jâ ka jini ni nde a ni ka kaxtnuꞌu sa ma, vaa sukan ni tatnuni maa Jesús Iya Tátnuni ma.
\m
\v 3 Vaa ja kúni maa Suꞌsi ma kúu ja jin xndoo ni ndaka ja uꞌvi ma, te máko jin kivi nduu ni jiꞌin ndi‑in ndi‑in ñaꞌa ma,
\m
\v 4 te ndi‑in ndi‑in ni, jin kani ini ni sukan vii sukan luu jin ko kuu ni jiꞌin ñasiꞌi ni ma, te sukan, te ni‑in ja uꞌvi jin ko saꞌa ni nuu Suꞌsi ma, te jin koo jayiñuꞌu ni.
\m
\v 5 Te máko jin saꞌa ni sukan ka saꞌa ñayii ñatuu ka jini Suꞌsi ma, ja ndevaꞌa‑ni nawa ka kuni i te ka saꞌa i ma.
\m
\v 6 Te ni‑in ni má saꞌa uꞌvi tnaꞌa, ni a xndaꞌvi tnaꞌa, vaa ndaka chaꞌa jin ndachunaa o kivi ndakan Iya Tátnuni ma kuenda nuu o ma. Te sukan ni ka kaꞌan sa nuu ni a te sukan jâ ni ka xtuꞌva ñaꞌa sa.
\m
\v 7 Vaa masu ni kana ñaꞌa Suꞌsi ma ja jin kondiso kuechi o, suꞌva ni kana ñaꞌa ya ja jin xndoo o ndaka ja uꞌvi ma.
\m
\v 8 Chukan kúu ja nú nde ni saxiko tnuꞌu ka kaxtnuꞌu sa a, masu nuu ñayii a saxiko ni a chi nuu Suꞌsi iya ni taa Xtumani Ndios ma.
\p
\v 9 Kovaa siki ja jin kutoo tnaꞌa o ma, maa Suꞌsi ma jâ ni kaxtnuꞌu nuu ni sukan jin kutoo tnaꞌa ndaka o, te masu nde jiniñuꞌu ja jin kaꞌan‑ka sa nuu ni.
\m
\v 10 Vaa sukan jâ ka saꞌa ni jiꞌin ndaka ñayii ka kandija Suꞌsi o a, ja ka iyo i ni‑kaꞌnu ñuu Macedonia a. Te ja ka jikan‑taꞌvi sa nuu ni kúu ja sukan jin ko saꞌa‑ka ni.
\m
\v 11 Te jin ko ndi ini ni ja jin koo mani ni, te jin katanuu ni na tniñu ka saꞌa ni, te jin satniñu ni jiꞌin ndaꞌa ni a, sukan‑vaꞌa jin niꞌi ni ja jin kaa ni, sukan ni ka kaxtnuꞌu sa ma,
\m
\v 12 sukan‑vaꞌa ñayii ñatuu ka kandija Suꞌsi ma, jin kaꞌan vaꞌa i ja jin kuu ni, te ñatuu nawa ko kaꞌni ñaꞌa i ja jin kaa ni a.
\s1 Sukan ndii Iya Tátnuni ma
\rem El regreso del Señor
\p
\v 13 Ndijin ja ka kuu o saꞌya Suꞌsi ma, ka kuni sa ja jin kuni ni siki ja tnaꞌa o ñayii ni ka jiꞌi ma, nasa jin kuxii ini ni sukan ka kuu ñayii ka jani ini ja ni ka naa tnaꞌa i ma te ñatuu nawa ka ndetu‑ka i.
\m
\v 14 Vaa ka kandija o ja ni jiꞌi Jesús ma te ni ndateku ya, te sukan ka kandija o ja ndaxteku ya tnaꞌa o ñayii ni ka jiꞌi ma, ñayii ni ka yo kukanu ini Jesús ma, te ni ka yo saꞌa i sukan ni tatnuni ya ma. Te kivi ndii ya ma, te jin ndakuni tnaꞌa o jiꞌin i.
\m
\v 15 Te chukan kúu ja ka kaxtnuꞌu sa sukan káꞌan tnuꞌu maa Iya Tátnuni ma, ja yoꞌo, nú ka teku o kivi ndii ya ma, masu jin koxtnuu o nuu tnaꞌa o ñayii jâ ni ka jiꞌi ma.
\m
\v 16 Vaa kayuꞌu niniꞌi maa Iya Tátnuni ma jiꞌin yuꞌu maa ya ma, te tatnuni maa ya, te tivi arcángel ma trompeta Suꞌsi ma. Sani te nuu ya onde sukun ma, te ñayii ni ka kandija Cristo ma te ni ka jiꞌi i ma, xinañuꞌu‑ka i jin ndateku. \fig |GR-gn38n.tif|span|||Ñayii ka kuu saꞌya Suꞌsi ma chi ndoneꞌe ñaꞌa ya, te jin koo i jiꞌin ya ni-kani ni-jika|4:16-17\fig*
\m
\v 17 Sani te nde o ka teku‑ka ma, te ndoneꞌe ñaꞌa ya, te jin nda koo kaa o jiꞌin ñayii ni ka ndateku ma onde nuu viko ma, sukan‑vaꞌa jin ndatnaꞌa o jiꞌin Iya Tátnuni ma onde andivi ma, te sukan jin koo o jiꞌin ya ni‑kani ni‑jika.
\m
\v 18 Te saꞌa jín kuꞌun ini o, te jín ndakaꞌan‑soꞌo nuu tnaꞌa ndi‑in ndi‑in o onde kivi ndenda ya ma.
\c 5
\p \v 1 Kovaa tnaꞌa ja na ora xi na kivi ndii Iya Tátnuni ma, masu kanuu‑ka ja tee sa nuu ni ja ka kuu o saꞌya Suꞌsi o a.
\m \v 2 Vaa jâ ka jini vavaꞌa ni ja kivi ndii Iya Tátnuni ma, ndii ya ora ñatuu na in ndetu ñaꞌa ma, sukan kúu in kuiꞌna kénda jakuaa ma.
\m \v 3 Nú ñayii ma, ka kaꞌan i: “Ndaka iyo nañii”, sani te kenda yachi ja jin ndoꞌo jin neni ñayii ma. Sukan kejaꞌa ja uꞌvi in ñaꞌa ja kâku saꞌya ña ma, sukan jin ndoꞌo i, te ñatuu ndenu kuu jin chuꞌu i ja jin kaku‑ka i.
\m \v 4 Kovaa ndijin ja ni ka nduu o saꞌya Suꞌsi o a, masu ñayii ka iyo‑ka nuu nee ma ka kuu ni vaa jin ko kuneé jin ko ku‑uun ni, te sanaa sanaa‑ni ndii Iya Tátnuni ma, te ndaniꞌi ñaꞌa ya sukan saꞌa in kuiꞌna ma.
\m \v 5 Vaa yoꞌo chi ñayii ka jika nduu ma ka kuu o, te masu ñayii ka jika nuu nee ma ka kuu o.
\m \v 6 Te chukan kúu ja máko jin kusu o, sukan ka kuu jaku i ma, suꞌva jin ko koto vaꞌa o maa o, te máko jin ko kuneé jin ko ku‑uun o.
\m \v 7 Vaa ñayii ka kixi ma chi jakuaa ma ka kixi i, te ñayii ka ndajini ma chi jakuaa ma ka ndajini i.
\m \v 8 Kovaa yoꞌo ja ka iyo o nuu ndijin ndaa nawa ka saꞌa ka kuu o, jín koo vaꞌa jín koo ndija o. Te jín kukanu ini o Suꞌsi ma, te jín kutoo tnaꞌa o, te sukan, te jín kasi o maa o, te ma kakiꞌi ñaꞌa ja uꞌvi ma, sukan jasi in suꞌnu kaa anua in soldado ma. Te ja ka ñuꞌu ini o ja jin ndaniꞌi taꞌvi o ma kúu ja kisaꞌvi vaꞌa tna ñaꞌa i, sukan‑vaꞌa ma kakiꞌi ñaꞌa ja uꞌvi ma, te ko kuu i sukan jasi in yuxini kaa xini in soldado ma.
\m \v 9 Vaa masu ni ndaniꞌi ñaꞌa Suꞌsi ma ja xndoꞌo xneni ñaꞌa ya, nú masu ja jin ndaniꞌi taꞌvi o ja maa Jesucristo iya tátnuni nuu o ma.
\m \v 10 Te maa ya ni jiꞌi nuu tniñu o, sukan‑vaꞌa, nú ka ndito ka teku o xi visi ni ka jiꞌi o, te jin ndateku o te jin koo o jiꞌin ya nuu iyo ya ma.
\m \v 11 Chukan kúu ja jin ndakaꞌan‑soꞌo nuu tnaꞌa ni, te jin chindee tnaꞌa ni, sukan‑vaꞌa jin koo vaꞌa ndi‑in ndi‑in ni nuu Suꞌsi o a, sukan jâ ka yikuu ni ka saꞌa ni a.
\s1 Káꞌan‑soꞌo Pablo ma nuu ñayii ni ka nduu saꞌya Suꞌsi ma
\rem Pablo aconseja a los hermanos
\p \v 12 Ka jikan‑taꞌvi sa nuu ni ja ni ka nduu o saꞌya Suꞌsi o a, ja jin kava respetu ni nuu tnaꞌa o ñayii ni kaji maa Iya Tátnuni ma ja jin kaxtnuꞌu i te jin ndakaꞌan‑soꞌo i nuu ni a.
\m \v 13 Te jin kaꞌan ni ja ñayii vavaꞌa ka kuu i, te jin kutoo ni i, kuechi ja ka jinukuechi i nuu Suꞌsi ma. Jin koo mani ndaka ni.
\p \v 14 Suni ka jikan‑taꞌvi sa nuu ni ja ni ka nduu o saꞌya Suꞌsi o a ja jin kaꞌan‑soꞌo ni nuu ñayii kuxi ma, te jín satniñu i. Jin ndakaꞌan‑soꞌo ni nuu ñayii ka xtaya nuu Suꞌsi ma. Jin chindee ni ñayii kuee‑ka ka jakuꞌni ini i ma. Jin kava kuee ini ni jiꞌin ndaka ñayii ma.
\p \v 15 Ndaka ni ja ni ka nduu o saꞌya Suꞌsi o a, jin ko koto vaꞌa ni maa ni, te máko jin ndachunaa ni ja uꞌvi, nú in ñayii ni saꞌa ñaꞌa ja uꞌvi ma. Suꞌva ndimaa ja vaꞌa jin ko saꞌa ni nuu ndi‑in ndi‑in tnaꞌa o a. Suni sukan jin ko saꞌa ni nuu ndaka ñayii ma.
\p \v 16 Ndimaa jin koo sii ini ni.
\m \v 17 Ndaka ora jin kakan‑taꞌvi ni.
\m \v 18 Jin ndakuan‑taꞌvi ni nuu Suꞌsi ma visi ka ndoꞌo ka neni ni, vaa sukan játna ini ya ja ndaka jin ndakuan‑taꞌvi o nuu ya ja ka kandija o Cristo Jesús ma.
\p \v 19 Máko jin saꞌa ndee ini ni ja masu jin koninisoꞌo ni ja káꞌan Xtumani Ndios ma.
\m \v 20 Máko jin ko saxiko ni tnuꞌu ka kaxtnuꞌu ñayii ka ndakaxtnuꞌu tnuꞌu ni waꞌa Suꞌsi ma.
\m \v 21 Jin ndasavaꞌa ni kuenda ndaka tnuꞌu ka kaxtnuꞌu i ma, te jin tavaꞌa ni tnuꞌu vaꞌa ma.
\m \v 22 Te jin xtandiyo ni ndaka ja uꞌvi ma.
\p \v 23 Te ka kuni sa ja maa Suꞌsi iya saꞌa ja ka iyo mani o a, ndásavii ndásandoo kuiti ya ni‑kaꞌnu ini anua ni a jiꞌin yikikuñu ni a, te ñatuu‑ka na ja uꞌvi jin ko saꞌa ni, te jin ko koto vaꞌa ni maa ni onde kivi ndii maa Jesucristo iya tátnuni nuu o a.
\m \v 24 Iya kuu jin kukanu ini o a kúu iya ni ndakana ñaꞌa, te saꞌa ndija ya ndaka sukan káꞌan ya nuu o a.
\s1 Ka ndakan‑tnuꞌu ñañaꞌa de ñayii ñuu Tesalónica ma
\rem Saludos y bendición final
\p \v 25 Ndijin ja ni ka nduu o saꞌya Suꞌsi o a, jin kakan‑taꞌvi ni nuu Suꞌsi o a ja jin kuu sa.
\p \v 26 Te vivii jin kuaꞌa ni nchuxi nuu ndaka ñayii ni ka nduu saꞌya Suꞌsi o a.
\p \v 27 Ja maa Iya Tátnuni ma, te káꞌan sa ja jin konaꞌa ni ja jin kaꞌvi ni tutu ni ka tee sa nuu ndaka ñayii ni ka nduu saꞌya Suꞌsi o ya ja jâ ni ka xndoo i ja uꞌvi ma.
\p \v 28 Te maa Jesucristo iya tátnuni nuu o ma, na skutaꞌvi ñaꞌa ya ja vii ja vaꞌa ja jin ko kuu ni. Te sukan kó kuu.