\id 1TI ‑ Mixtec, Magdalena Peñasco
\h 1 Timoteo
\mt1 Carta xinañuꞌu ni saꞌa Pablo ma ja ni tetniñu de nuu tee kúu Timoteo ma
\c 1
\s1 Sukan ndákan‑tnuꞌu ñañaꞌa Pablo ma tee kúu Timoteo ma
\rem Saludo
\p
\v 1 Saña kúu Pablo tee ni tetniñu Jesucristo ma ja kaxtnuꞌu sa tnuꞌu vii tnuꞌu vaꞌa ya a, vaa sukan ni tatnuni maa Suꞌsi ma, iya saꞌa ja jin ndaniꞌi taꞌvi o ma, jiꞌin maa Jesucristo iya tátnuni nuu o a iya ka kukanu ini xeen o a, vaa ja maa ya, te jin koo vaꞌa o a onde vitna te ni‑kani ni‑jika.
\m
\v 2 Tétniñu sa carta yaꞌa nuu ni, Timoteo, vaa ni kaꞌan sa tnuꞌu Suꞌsi o a nuu ni a, te ni kandija ni, te chukan kúu ja kuenda tnuꞌu ja saꞌya sa kúu ni nuu Suꞌsi o a. Na kundaꞌvi ini ñaꞌa Yuva o Suꞌsi ma, jiꞌin Jesucristo iya tátnuni nuu o a, te na skutaꞌvi ñaꞌa ya ja vii ja vaꞌa, te kási ndee ya, te ñatuu nawa ko xtnaꞌa ñaꞌa i, te koo sii ini ni.
\s1 Xtuꞌva ñaꞌa Pablo ma siki tee ka xsama te ñatuu ka kaxtnuꞌu ndaa de tnuꞌu vii tnuꞌu vaꞌa Suꞌsi ma
\rem Advertencia contra falsas doctrinas
\p
\v 3 Konaꞌa ni te saꞌa ni sukan ni jikan‑taꞌvi sa nuu ni, te ni kendoo ni ñuu Éfeso ma, kivi nuu ni jaꞌan sa ñuu Macedonia ma, sukan‑vaꞌa tatnuni ni nuu jaku tee ka iyo ñuu Éfeso a, ja máko jin kaxtnuꞌu‑ka de nuu ñayii ma sukan ka xsama de ka kaxtnuꞌu de ma,
\m
\v 4 te máko jin katanuu de tnaꞌa cuentu ja ka ndakani ñayii ma, jiꞌin nde in xi‑saꞌya tata ka kuu ñayii ma, vaa masu jinu cuentu yukan. Vaa ndaka chaꞌa chi yika‑ni ja saꞌa i kúu ja jin kanaa o, te masu nawa chíndee ñaꞌa i ja jin kukanu ini‑ka o Suꞌsi ma te jin jakuꞌni‑ka ini o naxe jin ko saꞌa jin ko kuu o nuu ya ma. Te vitna, te ndáxndaku ini tuku ñaꞌa sa sukan ni tatnuni sa nuu ni ma, te sukan tatnuni ni nuu tee yukan ma.
\m
\v 5 Saꞌa ni sukan, te jin ndasaꞌa de kuenda, vaa ja kúni Suꞌsi ma kúu ja jin koo vii jin koo ndoo ini anua o a jiꞌin ja jin kani vaꞌa ini o ma jiꞌin ja jin kandija ndija o Suꞌsi ma, te onde ndaka chaꞌa koo ini anua o a sana kuu jin kutoo tnaꞌa ndija o.
\m
\v 6 Vaa jaku ñayii ma chi ni ka xndoo i sukan kúni Suꞌsi ma ja jin ko kuu i ma, te ni ka skenaa i maa i, kuechi ja ni ka jatanuu i tnuꞌu ndevaꞌa tnuꞌu masu nde jiniñuꞌu ni ka yo kaꞌan i ma.
\m
\v 7 Vaa ni ka kuni i ja jin ko kuu i ñayii ka jini‑ka tnuꞌu ni tatnuni Moisés ma, kovaa ni masu nde ka ndasaꞌa i kuenda, te ni masu nde ka jakuꞌni ini i tnaꞌa ja ka kaxtnuꞌu i ma, kovaa maa i chi ûni ka tatnuni i ja sukan jin ko saꞌa ndaka‑ka ñayii ma, vaa sukan játna ini Suꞌsi ma, ka jiñaꞌa i.
\p
\v 8 Kovaa ka jini o ja tnuꞌu ni tatnuni Moisés ma chi ja vaꞌa kúu, nuna jakuꞌni ndandaa ini o te ko saꞌa ko kuu o sukan káꞌan tnuꞌu ni tatnuni Suꞌsi ma nuu Moisés ma.
\m
\v 9 Yoꞌo ja ni ka nduu o ñayii ka saꞌa ja vaꞌa ja ndaa ma, te jín konaꞌa o ja tnuꞌu ni waꞌa Suꞌsi ma ja ni tatnuni Moisés ma nuu ñayii ma chi káꞌan ndaka sukan jin ndoꞌo jin tnaꞌa ñayii ka saꞌa ja uꞌvi ma, kovaa masu ja jin kuu yoꞌo kúu chi ja jin kuu ñayii soꞌo ñayii ñatuu ka kandija sukan káꞌan Xtumani Ndios ma kúu. Vaa ndimaa ka saꞌa i ja uꞌvi ma, te ñatuu ka ndaa respetu i nuu Suꞌsi ma, suꞌva ka jatanuu i tnaꞌa ja iyo ñuu ñayivi a. Vaa jaku ñayii ma chi ka jaꞌni i yuva i ma xi siꞌi i ma xi ndevaꞌa‑ni na ñayii jin niꞌi i ma.
\m
\v 10 Te jaku‑ka i ma, ka kivi nduu i jiꞌin ñayii masu ni ka tnandaꞌa jiꞌin i ma, te jaku tee ma, ka ndatuu de jiꞌin tee jiꞌin de ma. Te jaku‑ka ñayii ma, ka sakuiꞌna i ñayii sukan‑vaꞌa jin niꞌi i nawa ka kuni i ma, te jaku‑ka ñayii ma, ka xndaꞌvi tnaꞌa i, te ûni ka kaꞌan i ja ja ndaa kúu ja ka kaꞌan i ma. Te ndaka chaꞌa ka saꞌa ka kuu ñayii ma, te masu nde ka kandija i sukan káꞌan tnuꞌu vaꞌa ka skuaꞌa o a,
\m
\v 11 tnaꞌa tnuꞌu vii tnuꞌu vaꞌa Suꞌsi iya iyo jayiñuꞌu ma, tnaꞌa tnuꞌu vii tnuꞌu vaꞌa ni tatnuni ya ja kaxtnuꞌu sa nuu ñayii ni‑kaꞌnu ñuu ñayivi a.
\s1 Sukan ndákaꞌan Pablo ma ja ni kundaꞌvi ini ñaꞌa Suꞌsi ma te ni nduu de in tee jinukuechi nuu ya ma
\rem El ministerio de Pablo
\p
\v 12 Ndakuan‑taꞌvi sa nuu Cristo iya tátnuni nuu o a ja ni chindee ni chituu ñaꞌa ya, vaa ni jini ya ja masu xndoo sa ichi ya a, te ni sunkani ñaꞌa ya ja kunukuechi sa nuu ya,
\m
\v 13 visi onde xiꞌna‑ka ma ni yo kaꞌan ndevaꞌa sa ja kuu tnuꞌu vii tnuꞌu vaꞌa ya a, te ni yo sondikin sa ñayii ka kandija Jesús o a, te ni yo kaꞌan ndevaꞌa sa ja jin kuu i jiꞌin ya ma. Kovaa ni ndakundaꞌvi ini ñaꞌa ya, vaa masu nde jini sa nawa kúni Suꞌsi ndija o a ja saꞌa sa ma nkuu, te masu nde kándija sa tnuꞌu maa ya ma nkuu, te chukan kúu ja ni yo sondikin sa ñayii ka kandija Jesucristo ma.
\m
\v 14 Kovaa kuaꞌa xeen ja vii ja vaꞌa nevaꞌa iya tátnuni nuu o a ja ni skutaꞌvi ñaꞌa ya, te ja maa Cristo Jesús ma, te ni saꞌa Suꞌsi ma ja kuu kukanu ini sa ya te kuu jin kutoo tnaꞌa o.
\m
\v 15 Tnuꞌu ndaa tnuꞌu ndija kúu tnuꞌu yaꞌa ja jin kuan‑taꞌvi ndaka ñayii ma: Vaa Cristo Jesús ma, ni kii ya ñuu ñayivi a ja ni ndoꞌo ni neni ya ma, sukan‑vaꞌa kuu jin ndaniꞌi taꞌvi ñayii ni ka yo saꞌa ja uꞌvi ma, nuna jin ndakani jin ndakaꞌvi ini i te jin ndandikin i Suꞌsi ma. Te saña kúu in ñayii ni yo iyo neꞌun i ma ja ni yo saꞌa xeen‑ka sa ja uꞌvi ma.
\m
\v 16 Te visi sukan ni yo saꞌa, ni yo kuu sa ma, kovaa ni ndundaꞌvi ini ñaꞌa Suꞌsi ma, te ni ndaniꞌi taꞌvi sa. Saꞌa ni saꞌa ya jiꞌin saña, sukan‑vaꞌa jin kuni ndaka‑ka ñayii ma sukan ndaꞌvi xeen ini ya ma, te jin kandija tna i ya ma, te jin koteku i ni‑kani ni‑jika.
\m
\v 17 Te chukan kúu ja ndimaa na koo jayiñuꞌu nuu Rey ma, iya tátnuni ni‑kani ni‑jika ma, iya téku ni‑kani ni‑jika ma, iya masu kuu jin kuni ñayivi o ya ma, iya ndichi ma, te maa in‑ni ya kúu, vaa ñatuu na in‑ka Suꞌsi iyo. Te sukan kó kuu ni‑kani ni‑jika.
\p
\v 18 Saꞌya sa Timoteo, in ja tátnuni sa nuu ni a kúu ja konaꞌa ni ja saꞌa ni sukan ni ka kaꞌan ñani o ma onde xinañuꞌu ma. Te kuꞌun ini ni sukan, te sukan ko saꞌa ni, te kunukuechi ni nuu Suꞌsi o a, sukan‑vaꞌa kundee ni nuu ja uꞌvi ma.
\m
\v 19 Ndimaa kukanu ini ni Suꞌsi ma, te kuꞌun kaji kuꞌun vaꞌa ini ni. Vaa jaku ñayii ma, ñatuu ni ka ñuꞌu kaji, ni ka ñuꞌu vaꞌa ini i, te chukan kúu ja ñatuu ni ka kukanu ini‑ka i Suꞌsi ma, te ni ka xndoo i ya, te ni ka skenaa i maa i.
\m
\v 20 Vaa sukan tna ni ka ndoꞌo tee kúu Himeneo ma jiꞌin Alejandro ma. Te chukan kúu ja ni ndakuaꞌa sa de nuu ndaꞌa tachi ma, sukan‑vaꞌa jin kutuꞌva de ja máko jin ko kaꞌan ndevaꞌa‑ka de ja kuu Suꞌsi ma, te máko jin ko saꞌa‑ka de ja jin saxiko ñayii ma Suꞌsi ma.
\c 2
\s1 Jín kakan‑taꞌvi o nuu Suꞌsi ma ja jin kuu ndaka ñayii ñuu ñayivi a
\rem Instrucciones sobre la oración
\p \v 1 Ndákaꞌan‑soꞌo sa nuu ndaka ni ja jin kakan‑taꞌvi xen‑xeen ni nuu Suꞌsi ma ja jin kuu ndaka ñayii ma, te jin ndakuan‑taꞌvi ni nuu Suꞌsi ma ja jin kuu ndaka o ja ka iyo o ñuu ñayivi a.
\m \v 2 Te ñukuun jin kakan‑taꞌvi ni ja jin kuu ndaka tee ka netniñu ma, sukan‑vaꞌa jin konetniñu vaꞌa de, te koo tnuꞌu mani ni‑kaꞌnu ñuu ñayivi a, sukan‑vaꞌa ndaka o jin ndanduku Suꞌsi ma, te jin ko saꞌa o sukan játna ini ya ma.
\m \v 3 Vaa nuna jin ko saꞌa o saꞌa chi játna ini Suꞌsi o a, iya saꞌa ja jin kaku o nuu ja uꞌvi ma.
\m \v 4 Vaa ja kúni Suꞌsi ma kúu ja ndaka ñayii ma jin kuni tnuꞌu ndaa tnuꞌu ndija ni kaxtnuꞌu ya ma, sukan‑vaꞌa jin ndaniꞌi taꞌvi i.
\m \v 5 Vaa ñatuu na in‑ka Suꞌsi iyo, nú masu ja maa in‑ni ya kúu Suꞌsi ndija, te ja maa Jesucristo ma sana kuu ndenda koo ñayii ma nuu Suꞌsi ma, te maa in‑ni Jesucristo iya ni kii te ni iyo ñayivi ya ñuu ñayivi ya kuu chindee ñaꞌa, te masu na in‑ka kuu chindee ñaꞌa ja jin ndenda koo o nuu Suꞌsi ma.
\m \v 6 Vaa maa Jesucristo ma kúu iya ni waꞌa tnuꞌu te ni jiꞌi ya nuu tniñu ndaka o ma, sukan‑vaꞌa jin kaku o nuu ja uꞌvi ma. Onde ni kenda kivi ja ni jani ini Suꞌsi ma ja sukan ko kuu ma, te saa ni saꞌa ya sukan, te ni kaxtnuꞌu Jesucristo ma ja maa in‑ni ya kúu iya saꞌa ja kuu jin ndenda koo o nuu Suꞌsi ma.
\m \v 7 Te chukan kúu ja ni kana ñaꞌa Jesucristo ma, te ni tetniñu ñaꞌa ya ja kaxtnuꞌu sa tnuꞌu vii tnuꞌu ndaa Cristo a, te masu xndaꞌvi ñaꞌa sa, te suu sa skuaꞌa ñayii masu judío ka kuu i ma, sukan‑vaꞌa jin kukanu ini i Suꞌsi ma te jin kandija i tnuꞌu ndaa tnuꞌu ndija ya ma.
\p \v 8 Te chukan kúu ja kúni sa ja ndaka tee ma, ni‑yuꞌu ni‑ini de jin kakan‑taꞌvi de nuu Suꞌsi ma ndaka nuu kuan koo de ma, te jín ndoneꞌe de ndaꞌa de ma nuu ya, ja ko kuu in seña ja ka iyo vii, ka iyo ndoo de nuu ya, te másu ko jin skiti ini nuu tnaꞌa de te jin ko kanaa de. Suꞌva ndimaa ja vaꞌa jín ko saꞌa jín ko kuu de.
\p \v 9 Te suni sukan tátnuni sa nuu ñaꞌa ma ja jín kava ñuka ini saꞌma jin koneꞌnu ña ma, te máko jin ko ndi ini ña ja jin koneꞌnu ña saꞌma vaꞌa xeen te ndee yaꞌvi xeen ma, ni a ko jin ndatnaa vivii ña xini ña ma te jin ko kani ini ña ja sukan, te vivii‑ka ka naꞌa ña ma, chi ñaꞌa. Ni a jin kuꞌun ndaꞌa ña ma, xi ja jin kuꞌun sukun ña ma, xi ja jin kiꞌi soꞌo ña ma oro xi siki kúu perla ma, te jin ko kani ini ña ja vivii‑ka ka naꞌa ña, chi ñaꞌa.
\m \v 10 Suꞌva jín kuꞌun ini ña ja jin saꞌa ña ja vaꞌa ja játna ini Suꞌsi ma, sukan ka saꞌa ñaꞌa ka kandija Suꞌsi ma.
\m \v 11 Te chukan kúu ja ñaꞌa ma, kóninisoꞌo ñukuun ña ñayii káxtnuꞌu tnuꞌu Suꞌsi a nuu ña ma, te kuándetu ña i.
\m \v 12 Vaa ñatuu kúni sa ja ñaꞌa ma, te kaxtnuꞌu ña tnuꞌu Suꞌsi ma nuu ka iyo kuaꞌa ñayii ma, ni a ko tatnuni ña nuu tee ma. Suꞌva na kasiyuꞌu ña.
\m \v 13 Vaa xinañuꞌu‑ka Adán ma ni saꞌa Suꞌsi ma, sana ni saꞌa ya Eva ma.
\m \v 14 Te masu Adán ma ni xndaꞌvi ñaꞌa tachi ma chi Eva ma ni xndaꞌvi i, te nuu ja ni xndaꞌvi i ña ma, te ni kundee ja uꞌvi ma nuu ña ma, te ni jiso kuechi ña.
\m \v 15 Kovaa ñaꞌa ma, nuna katanuu ña saꞌya ña ma te skaka vaꞌa ña i ichi Suꞌsi a, te kukanu ini ña Suꞌsi ma, te kutoo ña ndaka ñayii ma, te ñatuu ni‑in ja uꞌvi ko saꞌa ña, te ñatuu ko kujini ko kusuꞌva ña nuu tee ma chi ndaniꞌi taꞌvi ña nuu Suꞌsi ma.
\c 3
\s1 Sukan kúni Suꞌsi ma ja ko saꞌa ko kuu tee jito ndoso nuu ndaka ñayii ni ka nduu saꞌya Suꞌsi ma
\rem Requisitos de los obispos
\p \v 1 Tnuꞌu ndaa tnuꞌu ndija kúu chaꞌa: Nú na nde in tee ma, kúni de ja ko kuu de tee ko koto ndoso nuu ka ndatnaꞌa ndaka o ma nú vaꞌa‑ni xi masu vaꞌa‑ni ka saꞌa ka kuu o ja ka kandija o Suꞌsi ma, te ja vaꞌa kúu ja kúu ini de ja saꞌa de ma.
\m \v 2 Kovaa jiniñuꞌu ja ko kuu de in tee ja ñatuu ni‑in ja jin xtekuechi ñaꞌa ñayii ma ja masu vaꞌa‑ni saꞌa de ma, te kónaꞌa de ja vivii ko kuu de jiꞌin ñasiꞌi de ma, te máko kivi nduu de jiꞌin in‑ka ñaꞌa, te kónaꞌa de na in kúu de ma, te káni vaꞌa ini de nawa ko saꞌa ko kuu de ma, te másu ko kaꞌan de tnuꞌu kini tnuꞌu ndevaꞌa, te kuánuu de veꞌe de ma ja jin ndoo ñayii ka jiniñuꞌu ja jin ndoo i ma, te vivii satuꞌva de naxe kaxtnuꞌu de tnuꞌu Suꞌsi ma nuu ñayii ma sukan‑vaꞌa jin jakuꞌni ini i,
\m \v 3 te másu ko koꞌo de ndixi, te másu ko kanaa de, te másu ko xndaꞌvi de ñayii ma sukan‑vaꞌa niꞌi de nawa konevaꞌa de ma, te másu ko ndiyo ini de ja ko kuu maa de ma. Suꞌva káva vii káva vaꞌa ini de, te káva kuee ini de.
\m \v 4 Te vivii kó kuu de jiꞌin ñasiꞌi de ma jiꞌin saꞌya de ma, te kó ndi ini de nawa ka jiniñuꞌu ñayii ka iyo veꞌe de ma, te vivii ndákaꞌan‑soꞌo de nuu saꞌya de ma ja vivii jín kandija i te jín kuandetu i nuu de ma.
\m \v 5 Vaa nú ñatuu jini de naxe tatnuni de naxe jin ko saꞌa jin ko kuu ndaka ñayii ka iyo veꞌe de ma, te nú sukan‑ni kúu de ma chi masu kuu de ko koto de ndaka ñayii ni ka nduu saꞌya Suꞌsi ma.
\m \v 6 Chukan kúu ja jiniñuꞌu ja in tee jâ ni kuu kii‑ka ni kandija de Suꞌsi ma ko kuu tee ko koto ñayii ni ka nduu saꞌya Suꞌsi ma, te masu in tee yika ni kandija tnuꞌu Suꞌsi ma ko kuu de. Vaa nasa yukan, te kivi ñaꞌa ja kani ini de ja maa de kúu‑ka, te saꞌa de in ja masu játna ini Suꞌsi ma, te ndakan Suꞌsi ma kuenda nuu de, te skenaa de maa de, sukan ni skenaa tachi ma maa i ma.
\m \v 7 Te suni jiniñuꞌu ja kuꞌun ini de ja ko saꞌa de ja vaꞌa nuu ñayii ñatuu ka jini tnuꞌu Suꞌsi o a, sukan‑vaꞌa jin kaꞌan vaꞌa i ja kuu de, sukan‑vaꞌa máko xndaꞌvi ñaꞌa tachi ma, te skenaa de maa de.
\s1 Sukan kúni Suꞌsi ma ja jin ko saꞌa jin ko kuu tee ka jinukuechi nuu ndaka ñayii ni ka nduu saꞌya Suꞌsi ma
\rem Requisitos de los diáconos
\p \v 8 Suni sukan tna jín ko kuu tee jin kunukuechi nuu ndaka o ja ni ka nduu o saꞌya Suꞌsi ma, te ndimaa jín ko kaꞌan ndaa jín ko kaꞌan ndija de, te másu ko jin koꞌo de ndixi te ko jin ndajini de, ni a ko jin ndiyo ini de nawa jin konevaꞌa de te jin ko xndaꞌvi de ñayii ma, sukan‑vaꞌa jin niꞌi de ja ka kuni de ma. Suꞌva ndimaa jín ko saꞌa de ja vaꞌa ma, sukan‑vaꞌa jin kava respetu ñayii ma nuu de.
\m \v 9 Te jiniñuꞌu ja skuaꞌa‑ka de tnuꞌu vii tnuꞌu vaꞌa Suꞌsi ma te kúkanu ini vavaꞌa de sukan káꞌan tnuꞌu ya a, sukan ni ka kukanu ini o ma, te ni a in ja uꞌvi ko kuꞌun ini de, sukan‑vaꞌa koo vii koo ndoo de nuu Suꞌsi ma.
\m \v 10 Te tee yaꞌa chi jiniñuꞌu ja xinañuꞌu‑ka kejaꞌa de kunukuechi de jaku nuu ñayii ni ka nduu saꞌya Suꞌsi o ma, te jin ko koto vaꞌa ni de naxe saꞌa naxe kúu de, te nú ñatuu ni‑in‑ka ja uꞌvi saꞌa de, sana kuu kunukuechi de nuu Suꞌsi o a, vaa sukan játna ini ya.
\p \v 11 Suni ñaꞌa jin kunukuechi nuu ñayii ma chi jín ko saꞌa ña ja vaꞌa, te másu ko jin ko kaꞌan ña tnuꞌu ñayii ma. Te jín ko kuꞌun kaji jín ko kuꞌun vaꞌa ini ña sukan jin ko saꞌa jin ko kuu ña ma, te jín ko kukanu ini vaꞌa ña Suꞌsi ma, te jín ko saꞌa ña sukan kúni ya ma, sukan‑vaꞌa jin kandija ñayii ma ja ka kaꞌan ka kachi ña ma.
\p \v 12 Te tee jin kunukuechi nuu ñayii ni ka nduu saꞌya Suꞌsi ma chi jín konaꞌa de ja vivii jín ko kuu de jiꞌin ñasiꞌi de ma, te máko jin ko nduku de in‑ka ñaꞌa. Te ûni jín kuꞌun ini de ja kuu jin kaꞌan jin kachi de nuu saꞌya de ma jiꞌin nuu ñasiꞌi de ma naxe jin ko saꞌa jin ko kuu de, sukan‑vaꞌa jin koo vaꞌa de nuu Suꞌsi ma te kuu jin kunukuechi de nuu ya.
\m \v 13 Vaa tee ka jinukuechi vaꞌa nuu ñayii ni ka nduu saꞌya Suꞌsi ma chi jin niꞌi de jayiñuꞌu xen‑xeen, te vivii jin koo sii ini de, te jin kusaa ini de ja jin kaxtnuꞌu de nuu ñayii ma sukan ka kukanu ini de Cristo Jesús ma.
\s1 Sukan káꞌan tnuꞌu ndaa tnuꞌu ndija Suꞌsi ma tnaꞌa ja ni ka jini o a
\rem El misterio de la piedad
\p \v 14 Visi jani ini sa ja jaan yachi sa nuu iyo ni a, kovaa ndaka tnuꞌu yaꞌa jâ ni tee sa nuu ni,
\m \v 15 sukan‑vaꞌa nuna kukuee sa kenda sa, te jâ jini ni naxe ko saꞌa ko kuu ni jiꞌin ñayii ni ka nduu saꞌya Suꞌsi o iya téku ma, vaa ndaka maa ñayii ni ka nduu saꞌya Suꞌsi o a, ka nukuiñi vaꞌa ka nukuiñi lili i nuu tnuꞌu ndaa tnuꞌu ndija Suꞌsi o a, te sukan, te ka kaxtnuꞌu i ja tnuꞌu vii tnuꞌu ndaa kuu tnuꞌu Suꞌsi o a.
\m \v 16 Vaa tnuꞌu ndaa tnuꞌu ndija Suꞌsi o a ja ni ka jini o a chi ja kanuu xeen kúu, sukan‑vaꞌa jin niꞌi ini o naxe jin kukanu ini o Suꞌsi ma te jin kondikin o ya, te masu na in ko kaꞌan ja masu ja ndaa kúu:
\q1 Vaa Jesucristo ma chi ni kii ñayivi ya ñuu ñayivi a,
\q1 te maa Xtumani Ndios ma ni kaxtnuꞌu ja iya saꞌa ja vaꞌa ja ndaa kúu ya,
\q1 te ni ka saꞌvi‑nka ini ángel ma ja ni ka jini i sukan ni saꞌa ya ma,
\q1 te ñayii masu judío ka kuu i ma, ni ka jinisoꞌo i na in kúu ya,
\q1 te ni ka kandija ñayii ñuu ñayivi a ja Suꞌsi kúu ya,
\q1 te ni ndaa ya andivi ma,
\q2 te vivii ni ka ndakuan‑taꞌvi i ya nuu ni ndenda ya ma.
\c 4
\s1 Sukan kenda koo ñayii jin xndoo ichi ndaa Suꞌsi ma
\rem Predicción de la apostasía
\p \v 1 Kovaa ndandaa‑ni ni kaꞌan Xtumani Ndios ma ja kivi ve ndiꞌi kivi ma, te jaku ñayii ni ka nduu saꞌya Suꞌsi o a chi jin xndoo i ichi ndaa Suꞌsi o a, te jin koninisoꞌo i ja jin kaxtnuꞌu ñayii jâ ni xndaꞌvi ñaꞌa tachi ma, te jin kandija i ndaka.
\m \v 2 Vaa ñayii yukan chi jin kaꞌan i ja ka kandija i Suꞌsi ma, kovaa masu ka saꞌa i sukan kúni ya ma, vaa jâ ni kundee maa ja uꞌvi ma ni jasi i janitnuni i ma, te masu nde ka ndasaꞌa‑ka i kuenda naxe kúni Suꞌsi ma ja jin ko kuu o.
\m \v 3 Te chukan kúu ja jin kaꞌnu ndee i ja jin tnandaꞌa ñayii ma, te jin tatnuni i ja ka iyo kuaꞌa ja masu kuu kaa ñayii ma, te vitna ja ndaka ni saꞌa Suꞌsi ma, sukan‑vaꞌa jin ndakuan‑taꞌvi ñayii ma nuu Suꞌsi ma te kuu jin kaa i ma. Chukan kúu ja yoꞌo ja ni ka jini o ja ndaa ma te ni ka kandija o ya, jín ndakuan‑taꞌvi o nuu ya, te jín kaa o.
\m \v 4 Vaa ndaka ja ni saꞌa Suꞌsi ma ja kaa o ma chi ja vaꞌa kúu, te ñatuu nawa ko saxiko o, suꞌva jín ndakuan‑taꞌvi o nuu ya ja ni taa ya, te jín kaa o.
\m \v 5 Vaa ka jini o ja ja maa tnuꞌu maa ya ma jiꞌin ja jikan‑taꞌvi o nuu ya ma ja ndakuan‑taꞌvi o ja iyo ja kaa o ma, te ndasavii ndasandoo ya ja kaa o ma.
\s1 Sukan jin kunukuechi vaꞌa o nuu Jesucristo ma
\rem Un buen ministro de Jesucristo
\p \v 6 Nuna kaxtnuꞌu ni ndaka chaꞌa nuu ñayii ni ka nduu saꞌya Suꞌsi ma chi ko kuu ni tee jinukuechi vaꞌa nuu Jesucristo ma, te ko kuu ni in tee ni skuaꞌa vaꞌa tnuꞌu vii tnuꞌu vaꞌa Suꞌsi o a, tnuꞌu saꞌa ja kuu kukanu ini vaꞌa o ya ma, te ko kuu ni tee ndikin vaꞌa te saꞌa ni sukan káꞌan tnuꞌu vii tnuꞌu vaꞌa Suꞌsi o a ja ni kutuꞌva ni ma.
\p \v 7 Te xtandiyo ni ndaka cuentu janaꞌa ma ja ka ndakani ñayii ñuu ñayivi a, suꞌva katanuu ni saꞌa ni sukan játna ini Suꞌsi ma.
\m \v 8 Te konaꞌa ni ja ndaka ja saꞌa ja kúu o sukan‑vaꞌa koo‑ka tnuꞌu ndee tnuꞌu ndatnu yikikuñu o a chi vala‑ni chíndee ñaꞌa i, vaa ja kuu yikikuñu o a‑ni kúu. Kovaa ja kútuꞌva o ja saꞌa ja kuu o sukan játna ini Suꞌsi o a chi ndaka tuꞌu chíndee ñaꞌa i, vaa chíndee ñaꞌa i ja koo vaꞌa ini anua o a jiꞌin yikikuñu o a nuu Suꞌsi ma, vaa jâ ni skuiso Suꞌsi ma ja iyo ja jin niꞌi o nani ka iyo o ñuu ñayivi ya, jiꞌin ja jin niꞌi o kivi ndenda koo o nuu ya ma.
\m \v 9 Tnuꞌu ndaa tnuꞌu ndija kúu tnuꞌu yaꞌa, te iyo i ja kuu jin kuan‑taꞌvi ndaka ñayii ma.
\m \v 10 Chukan kúu ja yoꞌo, ka ndoꞌo ka neni o ka satniñu o nuu tnuꞌu maa ya a ja ka kaxtnuꞌu o nuu ñayii ma. Vaa ni ka kukanu ini o ja maa in‑ni Suꞌsi ma kúu iya kuu saꞌa ja jin kaku ndaka ñayii ma nuu ja uꞌvi ma, nuna jin kandija ndija i ya, vaa yika‑ni ja ñayii ni‑yuꞌu ni‑ini i kandija i ya ma, saꞌa ya ja ndaniꞌi taꞌvi i.
\p \v 11 Saꞌa kaxtnuꞌu ni te tatnuni ni nuu tnaꞌa o a.
\m \v 12 Te masu kuu‑ni‑nka ja suchi jaa‑ni kúu ni a, te jin ko saxiko i tnuꞌu káꞌan ni a chi suꞌva kaxtnuꞌu ni nuu ñayii ka kandija tnuꞌu Suꞌsi o a sukan saꞌa sukan kúu ni a nde kuaꞌan nde vee ni, jiꞌin sukan vivii káꞌan ni a, jiꞌin sukan vivii kútoo ni ñayii a, jiꞌin sukan ni‑yuꞌu ni‑ini ni kukanu ini ni Suꞌsi o a, te ñatuu ni‑in ja uꞌvi‑ka saꞌa ni. Te ja jin kondeꞌya i sukan saꞌa sukan kúu ni ma, te sukan jin ko saꞌa tna i.
\m \v 13 Nani kenda kivi jaan sa, te katanuu ni ja kaꞌvi ni tnuꞌu Suꞌsi o a, te kaxtnuꞌu ni nuu ñayii a, te ndakaꞌan‑soꞌo ni nuu i.
\m \v 14 Máko ndunaa ni ja vii ja vaꞌa ni skutaꞌvi ñaꞌa Suꞌsi o a kivi ni ka sonee tee nijaꞌnu ma ndaꞌa de siki ni a te ni ka kaꞌan de sukan kúni Suꞌsi ma ja ko saꞌa ko kuu ni ma.
\m \v 15 Katanuu ñukuun ni, te ndimaa ko saꞌa ko kuu ni ndaka sukan ni ka kaꞌan, ni ka kachi ñani o ma, sukan‑vaꞌa ndaka ñayii ma, jín kuni i sukan ve kuaꞌnu‑ka ni nuu Suꞌsi o a.
\m \v 16 Te ko koto vaꞌa ni maa ni nawa saꞌa nawa kúu ni nde kuaꞌan nde vee ni, jiꞌin naxe káxtnuꞌu ni nuu ñayii ma. Vaa nuna kaxtnuꞌu ndaa ni nuu i ma, te kaku ni nuu ja uꞌvi ma, te saꞌa ni ja jin kaku tna ñayii ka ninisoꞌo tnuꞌu kaꞌan ni ma.
\c 5
\s1 Sukan ko saꞌa ko kuu Timoteo ma nuu ndi‑in ndi‑in ñayii ni ka nduu saꞌya Suꞌsi o a
\rem Deberes hacia los demás
\p \v 1 Máko ndonda ni nuu tee nijaꞌnu ma, suꞌva ndakaꞌan‑soꞌo ni nuu de kuenda tnuꞌu ja yuva ni ka kuu de. Te nuu suchi jaa ma kaꞌan ni kuenda tnuꞌu ja ñani ni ka kuu i.
\m \v 2 Te nuu ñaꞌa nijaꞌnu ma ndakaꞌan‑soꞌo ni kuenda tnuꞌu ja siꞌi ni ka kuu ña. Te nuu ñaꞌa jaa ma kuꞌun kaji kuꞌun vaꞌa ini ni, te ndakaꞌan‑soꞌo ni nuu ña kuenda tnuꞌu ja kuꞌva ni ka kuu ña.
\p \v 3 Te ñaꞌa ni ka jiꞌi yii ma, chindee ni ña, nú ñatuu na in tnaꞌa ña ja chindee ñaꞌa i.
\m \v 4 Kovaa nú in ñaꞌa ni jiꞌi yii ña ma, te ka iyo saꞌya ña xi sañani ña ma chi jiniñuꞌu ja xinañuꞌu jin kutuꞌva suchi yaꞌa ja jin chindee i tnaꞌa i ma, vaa sukan játna ini Suꞌsi ma, te jín ndachindee tna i yuva i ma jiꞌin siꞌi i ma. Vaa chaꞌa chi ja vaꞌa kúu, te játna ini Suꞌsi ma ja sukan jin saꞌa o.
\p \v 5 Saꞌa kó kuu nú tnu kaꞌan o ja ñaꞌa ni jiꞌi yii ma, te ni kendoo maa in‑nka ña ma, te kúkanu ini ña Suꞌsi ma ja chindee ñaꞌa ya, te nduu ñuu ûni jikan‑taꞌvi jikan‑taꞌvi ña nuu ya. Jin ko ndi ini ni ja ko kuu ña.
\m \v 6 Kovaa ñaꞌa ni jiꞌi yii ña ma te nú ndúku ña naxe ko kusii ini ña ñuu ñayivi ya chi visi téku ña, kovaa ja ni jiꞌi ña nuu Suꞌsi ma, vaa masu jatanuu ña sukan kúni ya ja saꞌa ña ma.
\p \v 7 Saꞌa tatnuni ni nuu ñayii ni ka nduu saꞌya Suꞌsi o ma ja jin katanuu i ja jin ko saꞌa i sukan kúni Suꞌsi ma, sukan‑vaꞌa ñatuu nawa jin ndaxtekuechi ñaꞌa ñayii ñuu ñayivi a.
\m \v 8 Chi vaa yoꞌo ja ka jini o tnuꞌu ndaa Suꞌsi ma, nú ñatuu ka ndi ini o naxe jin ko kuu ñayii veꞌe o ma jiꞌin tnaꞌa o ma chi kuenda tnuꞌu ja jâ ni ka xndoo o tnuꞌu ni tatnuni Suꞌsi ma, te kaꞌvi‑ka ka kuu o sana ñayii ñatuu jin kandija‑ka tnuꞌu Suꞌsi ma.
\p \v 9 Te jin konaꞌa ni ja jin chiso tnuni ni nde‑ni ñaꞌa jin chindee ni ma, yika‑ni ja ñaꞌa ka yiꞌi viꞌi‑ka uni xiko kuiya ma, ñaꞌa ni ka yo kuu nijaꞌnu, ni ka yo kuu vaꞌa jiꞌin yii ña ma, te ñatuu ni ka yo kuneé, ni ka yo ku‑uun ña ma,
\m \v 10 te ka kaꞌan vii ka kaꞌan vaꞌa i ja jin kuu ña ma, vaa ndimaa ja vaꞌa ka saꞌa ña ma, te ni ka skuaꞌnu vaꞌa ña saꞌya ña ma, te ka wanuu ña veꞌe ña ma ja jin ndoo ñayii ka jiniñuꞌu ja jin ndoo i ma, te inundaꞌvi ini ña te ka chindee ña ñayii ñatuu‑ka na ja uꞌvi ka saꞌa i ma ndaka nawa ka jiniñuꞌu i ma, te ka chindee ña ñayii ka kuxii ini na tnundoꞌo ka tnaꞌa i ma, te ndaka tuꞌu ja vaꞌa ka saꞌa ña, te ni‑in ñayii ñatuu ka saxiko ña.
\p \v 11 Kovaa ñaꞌa jaa‑ka ma te ni ka jiꞌi yii ña ma, másu kuaꞌa ni tnuꞌu ja jin koso tnuni ña nuu tutu ma ja jin chindee ni ña ma, vaa nuna kenda ja jin kuu ini ña ja jin ndatnandaꞌa ña ma, te jin xndoo ña ichi Cristo o ma, te jin ndatnandaꞌa ña‑ni.
\m \v 12 Te sukan, te jin ndakuiso kuechi‑ka ña, vaa ñatuu ka saꞌa ña sukan ni ka skuiso ña ja jin ko saꞌa ña ma.
\m \v 13 Vaa nuna jin chindee o ña ma chi jin kutuꞌva ña ja jin kava kuxi ña, te masu yika‑ni ja jin kava kuxi ña ma‑ni chi kuan koo ve koo ña veꞌe veꞌe, ka nduku ña cuentu, te ka kivi nduu ka kivi niꞌni ña, ka kaꞌan ña tnaꞌa ja másu jin kaꞌan ña ma.
\m \v 14 Ja tátnuni sa kúu ja ñaꞌa jaa ni ka jiꞌi yii ña ma, vaꞌa‑ka ja na jin ndatnandaꞌa ña, te jin katanuu ña jin skuaꞌnu ña saꞌya ña ma, te jín ko ndi ini ña naxe jin koo vaꞌa ña veꞌe ña ma, te máko jin saꞌa ña ja uꞌvi tnaꞌa ja saꞌa ja niꞌi ini tachi ma nawa xtekuechi ñaꞌa i ma.
\m \v 15 Vaa jâ ka iyo jaku ñaꞌa jaa ma ja ni ka xndoo ña ichi Suꞌsi ma, te ni ka ndandikin ña ichi tachi ma.
\p \v 16 Nú iyo in ñayii ni nduu saꞌya Suꞌsi o a te iyo in tnaꞌa i ñaꞌa jâ ni jiꞌi yii ña ma, te kó ndi ini i naxe koteku ña ma, sukan‑vaꞌa másu jin ko ndi ini‑ka ndaka ñayii ni ka nduu saꞌya Suꞌsi o a ja kuu ña ma, sukan‑vaꞌa kuu jin katanuu i jaku‑ka ñaꞌa ni ka jiꞌi yii ña ma te ñatuu na tnaꞌa ña ma ja jin chindee ñaꞌa i ma.
\p \v 17 Tee ni kuu kii‑ka ka skuaꞌa de tnuꞌu Suꞌsi o a te ka jinukuechi vaꞌa de nuu ñayii ni ka nduu saꞌya Suꞌsi ma, te jin konaꞌa o ja ka iyo de ja jin ko ndi ini o naxe jin kaa de ma. Na ko kaꞌan o ja tee ka satniñu ja ka kaxtnuꞌu de tnuꞌu Suꞌsi o a nuu ñayii ma ka kuu tee ñukuun kuiti jin ko ndi ini o ndaka nawa ka jiniñuꞌu de ma.
\m \v 18 Vaa sukan káꞌan tnuꞌu Suꞌsi o a: “Másu chuꞌun o ñunu yuꞌu xndiki jaxi triu ma.” Te suni káꞌan tna tnuꞌu Suꞌsi o a: “Ñayii satniñu ma chi iyo i ja keꞌen yaꞌvi i.”
\p \v 19 Nú ka xtekuechi i tee jinukuechi nuu ñayii ni ka nduu saꞌya Suꞌsi o ma in nawa ni saꞌa de ma, te máko kandija ni chi onde nú ka iyo uu xi uni ñayii ni ka jini nawa ni saꞌa de ma, sana kandija ni.
\m \v 20 Te ñayii kúni ja saꞌa‑ka i ja uꞌvi ma, ndonda ni nuu i nuu ka iyo ndaka tnaꞌa o ni ka nduu saꞌya Suꞌsi ma, sukan‑vaꞌa jin koyuꞌu tna ndaka‑ka i ma, te má jin ko saꞌa tna i sukan.
\m \v 21 Te konaꞌa ni ja ndeꞌya ñaꞌa maa Suꞌsi o a, te nuu maa Jesucristo ma jiꞌin nuu ángel ni ndakaji ya ma ka iyo o, te tátnuni sa ja saꞌa ko saꞌa ni. Inuu ko saꞌa ni jiꞌin ndaka ñayii ni ka nduu saꞌya Suꞌsi o a, te máko kundaꞌvi ini ni in i ma te saxiko ni in‑ka i ma.
\m \v 22 Te máko sonee ni ndaꞌa ni a siki in ñayii ma ja sacargu ni i na tniñu ko saꞌa i nuu Suꞌsi ma, nú ñatuu jini ni naxe ko saꞌa ko kuu i ma, nasa yukan, te saꞌa i ja uꞌvi ma, te ko kuiso kuechi tna ni ja ni saꞌa i ma. Suꞌva ko ndi ini ni ja koo vii koo vaꞌa ni nuu Suꞌsi ma.
\p \v 23 Máko koꞌo‑ka ni ndute suꞌva‑ni, vaa sukan ndóꞌo chii ni a. Koꞌo ni vala ndute ndeꞌya tnu uva ma, sukan‑vaꞌa na nduvaꞌa ni.
\p \v 24 Jaku ñayii ka saꞌa ja uꞌvi ma chi yachi‑ni jin ndatuu nawa ka saꞌa i ma, te ka jini o ja kenda kivi ja jin ndachunaa maa i. Kovaa jaku‑ka i ma chi kuee‑ka ka ndatuu ja uꞌvi ka saꞌa i ma, kovaa suni kenda kivi ja jin ndachunaa i ja uꞌvi ka saꞌa i ma.
\m \v 25 Te suni sukan kúu jiꞌin jaku ñayii ka saꞌa ja vaꞌa ma chi yachi‑ni kuni o ja vaꞌa ka saꞌa i ma. Te ja vaꞌa ka saꞌa jaku‑ka ñayii ma chi kuee‑ka sana kuni o, kovaa masu ja kuyuꞌu kúu ja vaꞌa ka saꞌa ka kuu o a.
\c 6
\p
\v 1 Ndaka ni ja ka xtetuu ñaꞌa ñayii ma ja jin kunukuechi ni nuu i ma, jin konaꞌa ni ja ñayii xi‑nuu ka jinukuechi ni ma chi ka iyo i ja jin kuandetu ni nuu i, sukan‑vaꞌa másu jin kaꞌan ndevaꞌa i ja kuu Suꞌsi o a jiꞌin tnuꞌu maa ya ja ka kaxtnuꞌu o a.
\m
\v 2 Te nú in nuu ñayii jâ ni nduu saꞌya Suꞌsi o a ka satniñu ni, te jin konaꞌa ni ja masu kuu‑ni‑nka ja in tnaꞌa o jâ ni nduu saꞌya Suꞌsi ma kúu i ma te ma jin kuandetu ni nuu i chi suꞌva jin kunukuechi vaꞌa‑ka ni nuu i, vaa jin konaꞌa ni ja suni ñayii kándija Suꞌsi ma kúu tna i ma, te jin kunukuechi vaꞌa ni nuu i, te jin chindee ni i, vaa ka kutoo tnaꞌa o jiꞌin i ma.
\m Saꞌa kaxtnuꞌu ni nuu tnaꞌa o ni ka nduu saꞌya Suꞌsi o a, te ndakaꞌan‑soꞌo ni nuu i ja sukan jin ko saꞌa i.
\s1 Jín koo sii ini o ndevaꞌa‑ni naxe ka iyo o
\rem Piedad y contentamiento
\p
\v 3 Te nú na in ka xsama ja ka kaxtnuꞌu i te ñatuu kétnaꞌa jiꞌin tnuꞌu ndaa tnuꞌu ndija Jesucristo iya tátnuni nuu o a tnaꞌa ja ka kaxtnuꞌu sa a, tnaꞌa ja káꞌan sukan kúni Suꞌsi ma ja jin ko saꞌa o ma,
\m
\v 4 te jin ko koto vaꞌa ni maa ni, vaa ñayii yaꞌa chi ja ni ka ndu‑uun kuiti i kúu ja ka saꞌa i sukan ma, te masu inundija i ja ka kaꞌan i ma chi ja inuvixi i kúu, vaa sukan kúu in kueꞌe kúu ja sukan ka saꞌa i ma, vaa ja ka kuni i kúu ja jin skiti ini ñaꞌa i yoꞌo ja ka kaxtnuꞌu o tnuꞌu vii tnuꞌu vaꞌa Suꞌsi o a, te ja ka jani ini i sukan, chukan kúu ja ka kukueñu ini i ja ñatuu ka saꞌa o sukan ka saꞌa i ma, te ka kuni i ja jin kanaa o jiꞌin i, te ka kaꞌan ndevaꞌa i ja jin kuu tnaꞌa o ma, te ka xtekuechi ñaꞌa i ja masu vaꞌa‑ni ka saꞌa ka kuu o.
\m
\v 5 Te ñatuu jínu jin ndakanaa maa i ja ñatuu ka jakuꞌni ini i ma, vaa masu ka jani vaꞌa ini i, te ñatuu ka jakuꞌni ini i tnuꞌu ndaa tnuꞌu ndija Suꞌsi ma. Te ka jani ini i ja jin kuatniñu i tnuꞌu Suꞌsi o a, sukan‑vaꞌa kuu jin niꞌi kuaꞌa i xuꞌun nuu ñayii ka xndaꞌvi i ma. Te chukan kúu ja másu ko jin kondikin tnaꞌa ni jiꞌin ñayii yaꞌa.
\m
\v 6 Ja ndaa kúu ja nuna jin ko saꞌa o sukan játna ini Suꞌsi ma chi jin ko niꞌi jin ko tnaꞌa o ja taa maa Suꞌsi ma. Saꞌa ko kuu jiꞌin ñayii ka iyo sii ini i jiꞌin nawa ka nevaꞌa i ma‑ni.
\m
\v 7 Vaa masu nawa ka yindaꞌa o ni ka kenda koo o ñuu ñayivi yaꞌa, te ni masu nawa jin ndakeꞌen o kivi jin xndoo o ñuu ñayivi yaꞌa.
\m
\v 8 Chukan kúu ja nú iyo ja kaa o jiꞌin saꞌma koneꞌnu o, te koo sii ini o, te máko ndiyo ini o nawa konevaꞌa‑ka o.
\m
\v 9 Vaa ñayii kúni i ja ko kuxiku i ma chi skaꞌan ñaꞌa tachi ma, te saꞌa i ja uꞌvi sukan kúni yikikuñu i ma, te ndaka ja uꞌvi kúni i ja saꞌa i ma kundee nuu i, te skenaa i maa i, te ndita ndita andeya ma kenda i ja ndachunaa i ja uꞌvi ni yo saꞌa i ma.
\m
\v 10 Vaa ja ko ndiyo ini o ja konevaꞌa kuaꞌa o xuꞌun ma te kuꞌun kuꞌun‑ni ini o nuu xuꞌun ma masu ja vaꞌa kúu, vaa sani te kenda koo ndaka ja uꞌvi ja jin xndaꞌvi ñaꞌa i ma. Vaa sukan ni ka ndoꞌo jaku ñayii ja ni ka ndiyo ini i xuꞌun ma, te ni ka ndunaa i Suꞌsi ma, te ñatuu ka kukanu ini‑ka i ya, te ni ka kenda koo kuaꞌa xeen tnundoꞌo tnuneni nuu i ma.
\s1 Jin kundee o nuu tachi ma, nuna jin kukanu ini o Suꞌsi ma
\rem La buena batalla de la fe
\p
\v 11 Kovaa ndijin ja kúu ni saꞌya Suꞌsi ma, má ko ndiyo ini ni ndaka chaꞌa, suꞌva ko saꞌa ni ja ndaa ja ndija káꞌan Suꞌsi ma, te saꞌa ni sukan játna ini ya ma, te kukanu ini ni ya, te kóo tnuꞌu kútoo tnaꞌa ma ini anua ni a, te kava kuee ini ni, te koninisoꞌo ni nawa kaꞌan‑soꞌo in‑ka ñayii ma, te máko kava yachi ini ni, te máko ndakoneꞌe xiko ni.
\m
\v 12 Ndimaa kukanu ini ni nuu Suꞌsi ma, sukan‑vaꞌa kundee ni nuu tachi ma. Te kuꞌun ini ni ja ndaniꞌi taꞌvi ni te koteku ni ni‑kani ni‑jika, vaa chukan kúu ja ni ndakana ñaꞌa Suꞌsi ma, te maa ni chi masu ni kukan‑nuu ni te ni ndakaꞌan ni ndakachi ni nuu ka iyo kuaꞌa ñayii ni ka nduu saꞌya Suꞌsi ma ja kúkanu ini ni ya ma te másu xndoo kuiti ni ya.
\m
\v 13 Te konaꞌa ni ja vitna chi ka iyo o nuu Suꞌsi iya saꞌa ja ka teku ndaka ja iyo a, te ka iyo o nuu Jesucristo iya ni kaxtnuꞌu nuu tee kúu Poncio Pilato ma ja maa ya kúu iya kúu saꞌa ndaka ma, te saꞌa tátnuni sa nuu ni,
\m
\v 14 ja kandija ni ja ko koto vaꞌa ni maa ni, te ñatuu ni‑in ja uꞌvi ko saꞌa ni, sukan‑vaꞌa ñatuu nawa jin ndaxtekuechi ñaꞌa ñayii ma, nani ka iyo o ñuu ñayivi a onde kenda kivi ndenda Jesucristo iya tátnuni nuu o a.
\m
\v 15 Vaa sukan ni jani ini Suꞌsi ma ja sukan ko kuu ja kenda kivi, te kaxtnuꞌu ya ja maa in‑ni ya kúu Suꞌsi iya vii iya vaꞌa ini, te maa in‑ni ya tátnuni nuu ndaka o, te ñatuu‑ka na in‑ka Suꞌsi iyo, vaa maa in‑ni ya kúu Rey tátnuni nuu ndaka‑ka rey ma, te maa ya tátnuni nuu ndaka‑ka tee ka tatnuni ma.
\m
\v 16 Vaa maa in‑ni ya téku ni‑kani ni‑jika, te masu kûu kuiti ya, te vivii ndúꞌva ñuꞌu nuu iyo ya ma, kovaa masu na in kuu jin tuꞌva nuu iyo ya ma, te ni‑in ñayii ñatuu kuni‑ka ya tiempu yaꞌa jiꞌin nuu i ma. Te nuu maa ya na koo jayiñuꞌu, vaa maa ya tátnuni, te jín ndachiñuꞌu o ya ni‑kani ni‑jika. Te sukan kó kuu.
\s1 Sukan jin ko saꞌa jin ko kuu ñayii ka kuxiku ma
\rem Instrucciones para los ricos
\p
\v 17 Te tatnuni ni nuu ñayii ka kuxiku tiempu yaꞌa ja máko jin kani ini i ja maa i ka kuu‑ka ma, ni a jin kukanu ini i nuu xuꞌun i ma. Vaa xuꞌun ma chi níꞌi o, te sani te ndíꞌi tuku maa i. Suꞌva jín kukanu ini i nuu Suꞌsi iya téku ma ja maa ya kúu iya táa ndaka tuꞌu nawa nevaꞌa o ma, te suꞌva kuaꞌa‑ka taa ya, sukan‑vaꞌa jin kuatniñu vaꞌa o sukan kúni ya ja jin saꞌa o ma, te jin koo sii ini o.
\m
\v 18 Chukan kúu ja ñayii ka kuxiku ma, jín ko saꞌa i ja vaꞌa ma, sukan‑vaꞌa jín ko kuxiku i nuu Suꞌsi ma, te tnaꞌa ja vii ja vaꞌa ka saꞌa i nuu ya ma, te máko jin ndatna‑uꞌvi ini i nawa ni ka chindee i ñayii ka jiniñuꞌu ma.
\m
\v 19 Te sukan, te ka satuꞌva vaꞌa i ja vaꞌa jin niꞌi i kivi kiꞌin o ma, te jin ndaniꞌi taꞌvi i te jin koteku i ni‑kani ni‑jika ma.
\s1 Sukan ni sacargu Pablo ma nuu Timoteo ma
\rem Encargo final de Pablo a Timoteo
\p
\v 20 Saꞌya sa Timoteo, ko koto vaꞌa ni maa ni, te ko saꞌa ni sukan ni tatnuni Suꞌsi ma nuu ni a. Te máko ndatnuꞌu ni jiꞌin ñayii ka kaꞌan tnuꞌu masu kuatniñu ma, jiꞌin ñayii ka jani ini i ja inundichi xeen‑ka i ma.
\m
\v 21 Vaa sukan ni ka ndoꞌo jaku ñayii ma, te ni ka xndoo i Suꞌsi o a, te ñatuu ni ka kukanu ini‑ka i ya ma. Kovaa ndijin, na skutaꞌvi ñaꞌa Suꞌsi ma ja vii ja vaꞌa, te koo vaꞌa ni nuu ya. Te sukan kó kuu.