\id 2TI ‑ Mixtec, Magdalena Peñasco
\h 2 Timoteo
\mt1 Carta ku‑uu ni saꞌa Pablo ma ja ni tetniñu de nuu tee kúu Timoteo ma
\c 1
\s1 Sukan ndákan‑tnuꞌu ñañaꞌa Pablo ma tee kúu Timoteo ma
\rem Saludo
\p
\v 1 Saña kúu Pablo, tee ni tetniñu Jesucristo ma, vaa sukan ni kuu ini maa Suꞌsi ma, ja saña kaxtnuꞌu sukan ni skuiso ya ja saꞌa ya ja ni‑kani ni‑jika jin koteku ñayii ka kandija Cristo Jesús iya ni tetniñu Suꞌsi ma.
\m
\v 2 Ndakan‑tnuꞌu ñañaꞌa ña sa, Timoteo, ja kúu ni saꞌya too sa nuu Suꞌsi ma. Na skutaꞌvi ñaꞌa Yuva o Suꞌsi ma jiꞌin Jesucristo iya tátnuni nuu o a ja vii ja vaꞌa, te kúndaꞌvi ini ñaꞌa ya, te koo sii ini ni.
\s1 Ndákuan‑taꞌvi Pablo ma nuu Suꞌsi ma ja kuu Timoteo ma
\rem Pablo da gracias a Dios por Timoteo
\p
\v 3 Ndákuan‑taꞌvi sa nuu Suꞌsi o a ja ni chindee ñaꞌa ya te ni ndanune ndaꞌa ini anua sa a, te ñatuu nawa jasi ndee janitnuni sa a, te ñukuun jinukuechi sa nuu ya, sukan ni ka yo jinukuechi tnaꞌa sa tee janaꞌa ma. Te saña chi ndaka kivi ndaka jakuaa, ndimaa jikan‑taꞌvi sa nuu Suꞌsi ma ja kuu ni.
\m
\v 4 Vaa ndákaꞌán sa sukan ni kuxii ini ni ma te ni ndaꞌyu ni kivi ve ndii sa ma. Te kúni sa ja kuni ñaꞌa sa, sukan‑vaꞌa ndusii ini sa.
\m
\v 5 Vaa ndákaꞌán sa sukan kándija ndija ni Suꞌsi ma, te kúsii ini sa, vaa sukan ni ka yo kuu naꞌnu ni Loida ma, jiꞌin siꞌi ni Eunice ma, te kúkanu ini tna sa Suꞌsi ma ja sukan ni ka yo kandija ña Suꞌsi ma, te sukan ko kuu tna ni nuu ya.
\m
\v 6 Te chukan kúu ja ndákaꞌan‑soꞌo sa nuu ni ja kunukuechi‑ka ni nuu Suꞌsi ma, sukan‑vaꞌa kuatniñu‑ka ni ja ni skutaꞌvi ñaꞌa Suꞌsi ma kivi ni sonee sa ndaꞌa sa siki ni ma.
\m
\v 7 Vaa Suꞌsi ma chi jâ ni taa ya tnuꞌu ndee tnuꞌu ndatnu ya ma, te chukan kúu ja másu jin koyuꞌu ini anua o a, vaa ja maa ya, te kuu jin kutoo tnaꞌa o, te máko jin kuaꞌa o tnuꞌu ja ko xndaꞌvi ñaꞌa ja uꞌvi ma te jin saꞌa o ja ñatuu játna ini Suꞌsi ma.
\p
\v 8 Chukan kúu ja másu ko kukan‑nuu ni ja ndakaꞌan ndakachi ni sukan ni saꞌa Jesucristo iya tátnuni nuu o a, jiꞌin sukan ndóꞌo sa a, ja yinee sa vekaa a, kuechi ja káxtnuꞌu sa tnuꞌu vii tnuꞌu vaꞌa Suꞌsi o a. Visi na ndoꞌo neni ni, kovaa kaxtnuꞌu ni tnuꞌu vii tnuꞌu vaꞌa Suꞌsi o a, vaa maa ya taa tnuꞌu ndee tnuꞌu ndatnu ya ma, te kanda ni.
\m
\v 9 Vaa maa ya ni saꞌa ja ni ka kaku o nuu ja uꞌvi ma, te ni ndakana ñaꞌa ya ja jin ko kuu o ñuu maa ya ma, te ñatuu‑ka na ja uꞌvi jin ko saꞌa o. Vaa másu ko jin kani ini o ja kuechi ja ñayii ka saꞌa ja vaꞌa ka kuu o kúu ja ni ndakana ñaꞌa ya ma, chi ñaꞌa. Suꞌva onde xiꞌna xen‑xeen‑ka ma onde nuu ni kejaꞌa ñuu ñayivi ya, ni jani ini ya ja ja maa Jesucristo ma, te skutaꞌvi ñaꞌa ya ja vii ja vaꞌa ma.
\m
\v 10 Te vitna ja ni kenda Cristo Jesús ma, iya ni ndatava ñaꞌa nuu ja uꞌvi ma, te ni kundee ya ni xnaa ya ja saꞌa ja ka jiꞌi ñayii ma te ja skenaa i maa i ma. Te ja ni kaxtnuꞌu ya tnuꞌu vii tnuꞌu vaꞌa ya ma, te sukan, te ni ndaxtuu ndandaa ya ja kuu jin koteku o ni‑kani ni‑jika ma.
\m
\v 11 Te maa Suꞌsi ma ni sakargu ñaꞌa saña, ja kaxtnuꞌu sa tnuꞌu vii tnuꞌu vaꞌa ya ma, te maa ya ni tetniñu ñaꞌa ja ko kuu sa teskuaꞌa nuu ñayii masu judío ka kuu i ma.
\m
\v 12 Chukan kúu ja saꞌa ndóꞌo néni sa a. Kovaa masu nde kúkan‑nuu sa, vaa jini sa na in ni kandija sa, te kúkanu ini sa ya ja iyo tnuꞌu ndee tnuꞌu ndatnu ya ja ko koto vaꞌa ya ini anua sa a, te kuu xsinu sa ndaka tniñu ni sakargu ñaꞌa ya a.
\m
\v 13 Chukan kúu ja kotnii vaꞌa ni tnuꞌu vaꞌa Suꞌsi o a, te ko saꞌa ni sukan ni jinisoꞌo ni ja ni kaxtnuꞌu sa ma, ja na kukanu ini ni Suꞌsi ma te kutoo ni tnaꞌa o ma, sukan ni kaxtnuꞌu Cristo Jesús ma.
\m
\v 14 Te ja maa Xtumani Ndios ma, iya iyo ini anua o a, te ko koto vaꞌa ni maa ni ja ñatuu na ja uꞌvi ko saꞌa ni, te ko ndi ini ni ja ko saꞌa ni ja vii ja vaꞌa ni sacargu ñaꞌa ya a.
\p
\v 15 Te jâ jini maa ni ja ni ka xndoo ñaꞌa ndaka tnaꞌa o ka iyo ñuu Asia ma, te neꞌun ñayii yukan ka iyo tee kúu Figelo ma jiꞌin tee kúu Hermógenes ma.
\m
\v 16 Te maa Iya Tátnuni ma na kundaꞌvi ini Onesíforo ma, jiꞌin ndaka ñayii ka iyo veꞌe de ma, vaa kuaꞌa jichi ni ndataa de tnuꞌu kanu ini, te ñatuu ni kukan‑nuu ñaꞌa de ja ni yinee sa vekaa ma.
\m
\v 17 Suꞌva kivi ni kenda‑ni de ñuu Roma ma chi ñukuun kuiti ni ndanduku ñaꞌa de, onde ni ndaniꞌi ñaꞌa de.
\m
\v 18 Te maa ni chi naꞌa ni sukan ni yo chindee ñaꞌa de nuu ni ka iyo o ñuu Éfeso ma. Te maa Iya Tátnuni ma, na kundaꞌvi ini ya de kivi ndakan ya kuenda nuu ndaka o ma.
\c 2
\s1 Jín ko kuu o nuu Jesucristo ma sukan kúu in soldado ja visi ndóꞌo néni de kovaa kánda de
\rem Un buen soldado de Jesucristo
\p
\v 1 Ndijin, saꞌya maa sa, ja maa ja vii ja vaꞌa ni skutaꞌvi ñaꞌa Cristo Jesús ma, te ndatnii ni tnuꞌu ndee tnuꞌu ndatnu, te saꞌa ni sukan kúni Suꞌsi ma.
\m
\v 2 Te tnaꞌa ja ni jinisoꞌo ni ja ni kaꞌan sa nuu ka iyo kuaꞌa tnaꞌa o ma, sukan kaxtnuꞌu tna ni nuu ndaka tee ja ni‑yuꞌu ni‑ini de ka ndikin de Suꞌsi ma, tee jini ni ja kuu jin kaxtnuꞌu de nuu jaku‑ka ñayii ma tnuꞌu vii tnuꞌu vaꞌa Suꞌsi o ma.
\m
\v 3 Kovaa ndijin, máko koyuꞌu ni, visi ndóꞌo néni ni, vaa sukan ka ndoꞌo ka neni ndaka o ja ka kuu o soldado ka jinukuechi ndija nuu Jesucristo ma.
\m
\v 4 Vaa ñatuu ni‑in ñayii ja yinee i kúu i soldado ma, te ko katanuu i ja iyo ñuu ñayivi a, vaa nú ja kúni i kúu ja játna ini jitoꞌo i ma ja saꞌa i ma chi katanuu i tniñu i ma.
\m
\v 5 Te suni sukan kuiti kúu jiꞌin tee ka jinu suꞌva ma, vaa nú ma jin kunu ndiꞌi de sukan iyo ja jin ko kunu de ma, te masu jin niꞌi de ja iyo ja niꞌi tee kundee ma.
\m
\v 6 Te suni sukan kuiti kúu tna jiꞌin tee jitu itu de ma, ja sáka de nawa kúni de ja konevaꞌa de ma chi xinañuꞌu satniñu ñukuun de, sana kuꞌun ini de ja kuu itu de ma te koo ja ndaxtutu de.
\m
\v 7 Ndasaꞌa ni kuenda ndaka ja káꞌan sa ya, te maa Iya Tátnuni ma na chindee ñaꞌa ja jakuꞌni ini ni ndaka sukan iyo ja ko kuu o nuu Suꞌsi ma.
\m
\v 8 Ndakaꞌán ni sukan ni ndoꞌo ni neni tna Jesucristo ma, iya ni ka skuaꞌnu saꞌya tata David ma nuu ni kii ñayivi ya ñuu ñayivi a, iya ni ka jaꞌni i te ni ka chuꞌu i ya nuu ka chuꞌu i ñayii ni ka jiꞌi ma, te nuu uni kii ma te ni ndateku ya ma, te sukan káꞌan tnuꞌu vii tnuꞌu vaꞌa káxtnuꞌu sa nuu ñayii a.
\m
\v 9 Te ka xndoꞌo ka xneni ñaꞌa i, kuechi ja káxtnuꞌu sa tnuꞌu vii tnuꞌu vaꞌa ya a, te onde vekaa a ka chinee ñaꞌa i, kuenda tnuꞌu ja na ja uꞌvi ni saꞌa sa. Kovaa visi sukan ka saꞌa ñaꞌa i saña, kovaa tnuꞌu vii tnuꞌu vaꞌa Suꞌsi o a chi masu kuu jin chinee vaꞌa i vekaa a.
\m
\v 10 Chukan kúu ja kánda sa ndaka ja ka saꞌa ka kuu ñaꞌa i a, vaa kútoo sa ndaka ñayii ni ndakaji Suꞌsi ma, ja ka iyo i ja jin ndaniꞌi taꞌvi i ja maa Cristo Jesús ma te jin koo jayiñuꞌu i ni‑kani ni‑jika.
\m
\v 11 Tnuꞌu ndaa tnuꞌu ndija kúu chaꞌa:
\q1 Te visi na jin kaꞌni ñaꞌa i, kuechi ja ka ndikin o ya a,
\q2 kovaa yoꞌo chi jin koteku o, vaa maa ya chi téku ya.
\q1
\v 12 Te nú ka ndoꞌo ka neni o, ja kuechi ja ka ndikin o ya a
\q2 chi kenda kivi ja jin tatnuni tna o jiꞌin ya.
\q1 Te nú maa o na jin kaꞌan ja ñatuu ka jini o ya
\q2 chi suni kaꞌan tna ya ja masu jini ñaꞌa ya.
\q1
\v 13 Te visi yoꞌo, masu ka saꞌa o sukan ni ka skuiso o nuu ya ma ja jin saꞌa o ma,
\q2 kovaa maa ya chi saꞌa ya ndaka ja ni skuiso ya nuu o ma,
\q1 vaa masu iya ndáxsama ja jâ ni kaꞌan ya ma kúu ya.
\s1 Jín ko kuu o ñayii ka jinukuechi ndaa ka jinukuechi ndija nuu Suꞌsi ma, te ñatuu nawa jin ndakukan‑nuu o
\rem Un obrero aprobado
\p
\v 14 Ndaxndaku ini ni tnaꞌa o a: Vaa nuu maa Iya Tátnuni ma ka iyo o, te ndakaꞌan‑soꞌo tna ni nuu tnaꞌa o a, ja másu ko jin skiti ini tnaꞌa i, te jin ko tetnaꞌa i tnuꞌu, vaa masu nawa chíndee ñaꞌa ja sukan ko kuu o ma, vaa yika‑ni ja saꞌa i kúu ja ñayii ka ninisoꞌo ma chi jin ndakakayata i nuu Suꞌsi ma, te jin skenaa i maa i ja kuechi o ma.
\m
\v 15 Suꞌva ko ndi ini ni ja koo vaꞌa ni nuu Suꞌsi ma, te kuꞌun kaji kuꞌun vaꞌa ini ni, te ko kuu ni in ñayii jinukuechi vaꞌa nuu ya, ja ñatuu nawa ko ndakukan‑nuu ni, te kaxtnuꞌu ndaa kaxtnuꞌu ndija ni tnuꞌu vii tnuꞌu vaꞌa, tnuꞌu ndaa Suꞌsi o a.
\m
\v 16 Te másu ko kaꞌan ni tnuꞌu kini tnuꞌu ndevaꞌa, tnuꞌu masu nde jiniñuꞌu ja ka kaꞌan ñayii ñuu ñayivi a. Vaa ñayii jâ ni ka nduvii nuu Suꞌsi ma, te jin kejaꞌa i jin ndakaꞌan i ndaka tnuꞌu yaꞌa chi ndi‑vala ndi‑vala, te ka ndujika i nuu ndaꞌa Suꞌsi o a, te ka ndasaꞌa i ja uꞌvi ma.
\m
\v 17 Te tnuꞌu ka kaꞌan i ma chi jika jika‑ni kuaꞌan, sukan kúu kueꞌe nani gangrena ma ja xteꞌyu xteꞌyu‑ni i kuaꞌan i ma. Te sukan ka kuu tee nani Himeneo ma jiꞌin tee nani Fileto ma.
\m
\v 18 Te tee yaꞌa chi jâ ni ka xndoo de tnuꞌu ndaa ma, vaa ja ka kaꞌan de kúu ja jâ ni ka ndateku ñayii ni ka jiꞌi ma, te jâ ni kenda kivi yukan, te jâ ni yaꞌa. Te ja sukan ka kaꞌan de ma, te ka saꞌa de ja ñatuu ka kandija‑ka ñayii ma Suꞌsi ma.
\m
\v 19 Kovaa Suꞌsi ma chi jâ ni jani vavaꞌa ya nuu jin koxtnee o ma ja ka kandija o ya ma, vaa onde xiꞌna‑ka ma jâ jini ya na in jin ko kuu saꞌya ya ma, vaa kuenda tnuꞌu ja ka yitnuni o nkuu, vaa saꞌa ni kaꞌan ya ma: “Iya Tátnuni ma chi naꞌa ya na in ka kuu saꞌya maa ya ma”, te vaa: “Ndaka yoꞌo ja ka ndakuneꞌe o Cristo ma na jin xndoo o ndaka ja uꞌvi ma, te máko jin ko saꞌa‑ka o.”
\p
\v 20 Vaa in veꞌe kaꞌnu ma chi ka ñuꞌu ndatniñu ka kuu oro ma xi ndatniñu ka kuu plata ma, kovaa suni ka ñuꞌu tna ndatniñu ka kuu yutnu jiꞌin ñuꞌú kixin ma. Te maa maa i ka iyo ndenu kuatniñu o. Ja vaꞌa‑ka ma kuatniñu o kivi kúu viko ma, te ja ndaꞌvi‑ka ma kuatniñu o kivi ndevaꞌa‑ni ma.
\m
\v 21 Chukan kúu ja nú nde o ndásavii maa o te ñatuu nde saꞌa‑ka o ja uꞌvi ma chi kuu o ja kuatniñu vaꞌa ñaꞌa Iya Tátnuni ma, vaa kuaꞌa‑ka ja saꞌa o te koo jayiñuꞌu ya, vaa koo tuꞌva o ja saꞌa o ndaka ja vii ja vaꞌa ma.
\m
\v 22 Chukan kúu ja másu ko kuaꞌa ni tnuꞌu ja ko saꞌa tna ni ndaka ja uꞌvi ka saꞌa suchi jaa ma. Suꞌva katanuu ni ja ko saꞌa ni ja vaꞌa ja ndaa ma, te kukanu ini ni Suꞌsi ma, te kutoo ni tnaꞌa o ma, te koo mani ni jiꞌin ndaka ñayii ka iyo vii ka iyo ndoo ini anua i ma, ja ka ndakuneꞌe i Iya Tátnuni ma.
\m
\v 23 Te xtandiyo ni tnuꞌu xiko tnuꞌu kini ma, ja saꞌa i ja ka skiti tnaꞌa ini ñayii ma. Vaa ka jini o ja sukan ka kejaꞌa ñayii ma, sani te ka kenda koo i ja ka kanaa i ma.
\m
\v 24 Vaa ñayii jinukuechi nuu Iya Tátnuni ma chi masu iyo ja ko kanaa i, suꞌva káꞌan vii káꞌan vaꞌa i nuu ndaka ñayii ma, te kóo tuꞌva i ja kuu kaxtnuꞌu i nuu ñayii ma tnuꞌu vii tnuꞌu vaꞌa Suꞌsi ma, te káva kuee ini i.
\m
\v 25 Te káꞌan kuee i nuu ñayii ñatuu ka jatna ini sukan káꞌan tnuꞌu Suꞌsi ma ja jin ko saꞌa jin ko kuu i ma, sukan‑vaꞌa ndakani ichi vaꞌa i ñayii yukan ma, xi saa chindee ñaꞌa Suꞌsi ma, ja na jin ndakani jin ndakaꞌvi ini ñayii yukan ma te jin ndakokuiñi i nuu Suꞌsi ma, te jin jakuꞌni ini i te jin ko saꞌa i ja vaꞌa ja ndaa ma.
\m
\v 26 Te jin kaku i nuu ndaꞌa tachi ma, suchi kúndee kuiti ja tátnuni i nuu ñayii ma, te ka saꞌa ñayii ma sukan kúu ini maa i ja kúu i tachi ma.
\c 3
\s1 Sukan jin ko saꞌa jin ko kuu ñayii jin kenda koo ja jin xndaꞌvi i ñayii ka kandija tnuꞌu Suꞌsi ma
\rem Carácter de los hombres en los postreros días
\p \v 1 Suni jiniñuꞌu ja jin kuni ni sukan ko kuu kivi kiꞌin o a: Vaa kivi ve ndiꞌi kivi ma chi ko kuu yika xeen‑ka.
\m \v 2 Vaa ñayii ma chi jin ko ndi ini‑ka i ja jin kuu maa i ma, te jin nduku i naxe jin konevaꞌa kuaꞌa‑ka i xuꞌun, te jin ko kuvixi xeen i, te jin kani ini i ja maa i ka kuu‑ka, te jin kaꞌan ndevaꞌa i ja kuu Suꞌsi ma, te masu jin kandija i ja ka kaꞌan yuva ka kaꞌan siꞌi i ma, te masu jin ndakuan‑taꞌvi i nuu Suꞌsi ma ja ka niꞌi ka tnaꞌa i ma, te jin saꞌa i ndaka ja uꞌvi ma,
\m \v 3 te masu jin kutoo i ñayii ma, ni masu jin kundaꞌvi ini i ñayii ma. Jin kaꞌan i tnuꞌu ñayii ma, visi masu ja ndaa kúu. Te kundee maa ja uꞌvi ma tatnuni i nuu i ma, te masu jin ko ndi ini i chi suꞌva ndaka‑ka ja uꞌvi ma jin saꞌa i, te masu na tnuꞌu ndaꞌvi ini jin koo ini anua i ma.
\m \v 4 Te jin keꞌen‑suꞌva i ñayii ma, te jin kusaa ini i ja jin ko saꞌa i ndaka sukan ka jatna ini maa i ma, ndaka tnaꞌa ja masu nde jiniñuꞌu ma, te masu jin ko ndi ini i ja jin ndanduku i Suꞌsi ma.
\m \v 5 Te yuꞌu vii yuꞌu vaꞌa i jin ko kuu i, kuenda tnuꞌu ja ñayii ka saꞌa sukan játna ini Suꞌsi ma ka kuu i, kovaa ndaka ja uꞌvi ka saꞌa ka kuu i ma, te ka ndaxtuu i maa i ja ñayii ka xndaꞌvi ñaꞌa ka kuu i, vaa masu na tnuꞌu ndee tnuꞌu ndatnu Suꞌsi ma ka iyo jiꞌin i ja kuu jin saꞌa i ja vaꞌa ja ndaa ma. Chukan kúu ja másu jin kondikin tnaꞌa ni jiꞌin ñayii ka saꞌa sukan ma.
\m \v 6 Vaa neꞌun ñayii yaꞌa ma ka iyo tee jan koo veꞌe ñaꞌa ka kuneé ka ku‑uun ma, te ka kundaꞌa‑nka maa de ña ma, vaa ñaꞌa ka kuneé ka ku‑uun ka kuu tna ña, te ñaꞌa ka ndiso kuaꞌa kuechi ka kuu ña, te ka saꞌa ña ndaka ja uꞌvi ka jatna ini ña jin saꞌa ña ma.
\m \v 7 Vaa ñaꞌa yaꞌa chi ndimaa ka saꞌa ña tnuꞌu ja ka skuaꞌa ña tnuꞌu Suꞌsi o a, kovaa masu nde ka kundee ña ja jin jakuꞌni ini ña ja ndaa ma, te chukan kúu ja ka saꞌa neé ka saꞌa uun ña ma.
\m \v 8 Vaa suni sukan ni ka yo saꞌa tee kúu Janes ma, jiꞌin tee kúu Jambres ma, ja ñatuu ni ka kandija de ja ni kaꞌan Moisés ma, te sukan tna ka kuu tee káꞌan sa ya, vaa masu nde ka kandija de tnuꞌu ndaa tnuꞌu ndija Suꞌsi o ya. Te tee ñatuu ka jani vaꞌa ini ka kuu de, te masu jin kuu maa de jin kukanu ini de Suꞌsi ma, vaa saa ka saꞌa neé ka saꞌa uun de ma.
\m \v 9 Kovaa masu jika‑ni jin kenda koo de. Te jin kuni ndaka ñayii ma ja masu nde ka kandija de ja jin saꞌa de sukan káꞌan Suꞌsi ma, te jin ndoꞌo de sukan ni ka ndoꞌo tee ñatuu ni ka kandija ja ni kaꞌan Moisés ma.
\p \v 10 Kovaa ndijin chi jâ ndikin ni saꞌa ni ja vaꞌa ma, sukan ni kaxtnuꞌu sa nuu ni ma, sukan ko saꞌa ko kuu o nani iyo o ñuu ñayivi a, jiꞌin sukan kuꞌun ini o ja kunukuechi o nuu Suꞌsi ma te kukanu ini o ya ma. Te jâ kánda ni sukan kánda sa a. Te jâ kútoo ni tnaꞌa o a, sukan kútoo tna sa i ma.
\m \v 11 Vaa ni jini ni sukan ni ka sondikin ñaꞌa ñayii ma kuechi ja káxtnuꞌu sa tnuꞌu Suꞌsi o a, sukan ni ndoꞌo ni neni sa a, sukan ni ndoꞌo sa nuu ni iyo sa ñuu Antioquía ma, jiꞌin nuu ni iyo sa ñuu Iconio ma, jiꞌin nuu ni iyo sa ñuu Listra ma. Ndaka jichi ni ka sondikin ñaꞌa ñayii ma chi ndimaa ndimaa ni kaku sa nuu i ma, ni saꞌa maa Iya Tátnuni ma.
\m \v 12 Te suni ndaka tnaꞌa o ñayii ka kuni ja jin saꞌa i sukan játna ini Cristo Jesús ma chi suni jin sondikin tna ñaꞌa ñayii ma, te jin ndoꞌo jin neni tna i.
\m \v 13 Kovaa tee ka saꞌa ja uꞌvi ma te ka xndaꞌvi de ñayii ma chi suꞌva kaꞌvi‑ka jin ndandoꞌo de. Vaa jin xndaꞌvi‑ka de ñayii ma, te ñayii ma, suni jin ndaxndaꞌvi tna i de.
\m \v 14 Kovaa ndijin, konukuiñi vaꞌa ni nuu ndaka ja ni kutuꞌva ni ma, vaa ni jakuꞌni ini ni, te naꞌa ni na in ni kaxtnuꞌu nuu ni ma.
\m \v 15 Vaa onde nuu luluu ni ma, ni kutuꞌva ni tnuꞌu Suꞌsi o a. Te maa tnuꞌu Suꞌsi o a kúu ja saꞌa ndichi‑ka ñaꞌa, ja na kukanu ini‑ka ni Cristo Jesús ma, sukan‑vaꞌa ndaniꞌi taꞌvi ni.
\m \v 16 Vaa ndaka tnuꞌu ndee nuu tutu Suꞌsi o ma chi maa ya ni jani ini ja sukan kondee, te suu i kúu ja kanuu kuiti. Te jín kuatniñu o ja jin kaxtnuꞌu nuu tnaꞌa o ma, sukan‑vaꞌa jín ndasaꞌa o kuenda naxe jin ko saꞌa jin ko kuu o nuu Suꞌsi ma. Te suni maa i ndakani ichi ñaꞌa, sukan‑vaꞌa jin kutuꞌva o ja jin saꞌa o ja vaꞌa ja ndaa ma,
\m \v 17 sukan‑vaꞌa ndaka ñayii ka kandija Suꞌsi ma, te jín koo tuꞌva kuiti i ja jin saꞌa i ndaka ja vii ja vaꞌa ma, vaa jâ ni ka jini i tnuꞌu Suꞌsi ma.
\c 4
\s1 Sukan sacargu Pablo ma Timoteo ma ja na kaxtnuꞌu ndaa de tnuꞌu Suꞌsi ma
\rem Predica la palabra
\p \v 1 Jín konaꞌa o ja ndeꞌya ñaꞌa maa Suꞌsi o a, te ka iyo o nuu Jesucristo iya tátnuni nuu o a, iya iyo ja kenda kivi, te jin kuni ndaka o ya, ja maa ya kúu Iya Tátnuni ma, te ndakan ya kuenda nuu ñayii ka teku a, jiꞌin nuu ñayii ni ka jiꞌi ma, nawa ni ka yo saꞌa, ni ka yo kuu i ma. Te konanaꞌa ni ja ka iyo o nuu maa ya a, te sacargu xen‑xeen ñaꞌa sa
\m \v 2 ja na kaxtnuꞌu ndaa ni tnuꞌu Suꞌsi o a nuu ñayii ka jatna ini ja jin koninisoꞌo i ma. Te ndimaa ko ndi ini ni ja kaxtnuꞌu tna ni tnuꞌu Suꞌsi o a nuu ñayii ma, visi ñatuu ka kuni i ja jin koninisoꞌo i ma. Te vivii ndakaꞌan‑soꞌo ni nuu ñayii ma, sukan‑vaꞌa jín ndasaꞌa i kuenda te jín ko saꞌa i sukan káꞌan tnuꞌu ndaa tnuꞌu ndija Suꞌsi o a, sukan kúni ya ja jin ko saꞌa o ma. Te ndakaꞌan ni nuu i na ja uꞌvi ni ka saꞌa i ma, sukan‑vaꞌa jín ndasaꞌa i kuenda te máko jin ko saꞌa‑ka i sukan ni ka yo saꞌa i ma.
\m \v 3 Vaa kenda kivi ja masu jin kachi‑ka i jin koninisoꞌo i tnuꞌu vii tnuꞌu vaꞌa Suꞌsi o a. Suꞌva jin nduku i ñayii jin kaxtnuꞌu sukan ka kuu ini maa i ja jin koninisoꞌo i ma‑ni.
\m \v 4 Te masu jin kuaꞌa‑ka i tnuꞌu ja jin koninisoꞌo i tnuꞌu ndaa tnuꞌu ndija Suꞌsi o ma, te jin katanuu i jin koninisoꞌo i ndaka cuentu jin ndakani ñayii jin nduku maa i ma.
\m \v 5 Kovaa ndijin, ndaka ja saꞌa ja kuu ni ma, te kuꞌun kaji kuꞌun vaꞌa ini ni nuu Suꞌsi ma, ja masu na ja uꞌvi ko saꞌa ni, sukan ka saꞌa ndaka‑ka ñayii ma. Te kanda ni ndaka ja ndoꞌo neni ni ma, te vivii kaxtnuꞌu ni tnuꞌu vii tnuꞌu vaꞌa Suꞌsi o a nuu ñayii ñatuu jin kuni‑ka ma. Saꞌa ni ja ni sakargu ñaꞌa Suꞌsi ma ja ko saꞌa ni ma.
\p \v 6 Vaa saña chi jâ iyo ja kiꞌin sa ndoꞌo neni sa, te jâ ni kuyatni kivi xndoo sa ñuu ñayivi yaꞌa.
\m \v 7 Jâ ni kundee sa nuu tachi ma. Jâ ni sinu sa ndaka ja ni tatnuni Suꞌsi ma ja saꞌa sa ma. Te ñatuu ni ndunaa sa Suꞌsi ma, suꞌva ndimaa ni kukanu ini sa ya.
\m \v 8 Te vitna chi ja iyo tuꞌva corona iyo ja kutaꞌvi sa nuu Iya Tátnuni ma, vaa ni saꞌa sa ja vaꞌa ja ndaa nuu ya ma. Vaa maa ya chi iya saꞌa ndandaa kúu ya, te sukan saꞌa ndandaa ya kivi ndakan ya kuenda nuu ndaka ñayii ma. Te masu nuu maa in‑ni sa skutaꞌvi ñaꞌa ya corona ma chi nuu ndaka tna ni ja ka saꞌa ni ja vaꞌa ja ndaa nuu ya ma te ka ndetu ni kivi ndenda ya ma.
\s1 Pablo ma, jikan de nuu Timoteo ma ja na chindee ñaꞌa de
\rem Instrucciones personales
\p \v 9 Ko ndi ini ni ja kii yachi ni ki koto ñaꞌa ni.
\m \v 10 Vaa tee kúu Demas ma chi ni xndoo ñaꞌa de, vaa jatanuu‑ka de ja iyo ñuu ñayivi a, te kuaꞌan de onde ñuu Tesalónica ma. Te tee kúu Crescente ma, kanuu kuiti ja kiꞌin de ñuu Galacia ma te kuaꞌan de, te tee kúu Tito ma, kuaꞌan tna de ñuu Dalmacia ma, vaa ka jatanuu de Suꞌsi o a.
\m \v 11 Yika‑nka‑ni ja tee kúu Lucas ya iyo jiꞌin sa. Te kueka ni Marcos ma, te kii ni jiꞌin de chi jiniñuꞌu sa de ja kunukuechi de nuu Suꞌsi o a.
\m \v 12 Vaa tee kúu Tíquico ma, ni tetniñu sa de kuaꞌan de ñuu Éfeso ma.
\m \v 13 Te kindaꞌa ni kii ni soo sa ni xndoo sa ñuu Troas ma, veꞌe tee kúu Carpo ma, te konaꞌa naꞌa ni ja kindaꞌa ni libru ma. Másu ko ndunaa ni ja kindaꞌa ni libru ni ka kuvaꞌa jiꞌin ñií kiti ma, vaa jiniñuꞌu sa.
\p \v 14 Te Alejandro tee saꞌa ndatniñu ka kuu kaa ma, ni saꞌa xeen ñaꞌa de ja uꞌvi, te maa Iya Tátnuni ma na ndakan kuenda nuu de, te na ndachunaa de ndaka ja ni saꞌa ñaꞌa de ma.
\m \v 15 Konee ni cuidado nuu de, vaa jaꞌnu ndee xeen de ja jin kandija ñayii ma tnuꞌu Suꞌsi o a tnuꞌu ka kaxtnuꞌu o a.
\p \v 16 Te nuu ni iyo sa nuu tee ka netniñu ma xinañuꞌu kuiti ma ja ni kundaa kuechi sa ma chi ni‑in tnaꞌa o ma, ñatuu ni ka iyo i ja jin chindee ñaꞌa i. Suꞌva ndaka i ni ka xndoo ñaꞌa. Te maa Suꞌsi Iya Tátnuni ma, máko keꞌen kuenda ya ja ni ka saꞌa i ma.
\m \v 17 Kovaa maa Suꞌsi o Iya Tátnuni ma chi ni iyo ya jiꞌin sa, te ni taa ya tnuꞌu ndee tnuꞌu ndatnu, sukan‑vaꞌa ni kuu ni kaxtnuꞌu sa nuu ndaka ñayii masu judío ka kuu i ma tnuꞌu vii tnuꞌu vaꞌa Suꞌsi o ma, te sukan, te ni kaku tna sa yuꞌu ndikaꞌa ma.
\m \v 18 Te maa ya chindee ñaꞌa ja na kaku sa nuu ndaka ja uꞌvi ka ñuꞌu ini ñayii ya ja jin saꞌa ñaꞌa i ma, te maa ya ko koto vaꞌa ñaꞌa, onde kenda kivi ja noꞌo sa onde nuu tatnuni iya iyo andivi ma. Te nuu maa ya na koo jayiñuꞌu ni‑kani ni‑jika. Te sukan kó kuu.
\s1 Ndákan‑tnuꞌu ñañaꞌa Pablo ma ndaka ñayii ka chindee tnaꞌa jiꞌin de ja ka kaxtnuꞌu de tnuꞌu Suꞌsi ma
\rem Saludos y bendición final
\p \v 19 Ndákan‑tnuꞌu ñañaꞌa sa ñaꞌa kúu Prisca ma, jiꞌin yii ña tee kúu Aquila ma, jiꞌin ndaka ñayii ka iyo veꞌe tee kúu Onesíforo ma jin kuñaꞌa ni.
\m \v 20 Te káxtnuꞌu sa ja tee kúu Erasto ma chi ni ndoo de ñuu Corinto ma, te tee kúu Trófimo ma chi ni xndoo sa de ñuu Mileto ma, vaa kuꞌu de vala.
\m \v 21 Ko ndi ini ni ja kii ni xiꞌna‑ka sana kenda tiempu vijin ma. Te tee kúu Eubulo ma, jiꞌin tee kúu Pudente ma, jiꞌin tee kúu Lino ma, jiꞌin ñaꞌa kúu Claudia ma, jiꞌin ndaka‑ka tnaꞌa o ja ka iyo i yaꞌa, ka ndakan‑tnuꞌu ñañaꞌa ña i.
\p \v 22 Te maa Jesucristo iya tátnuni nuu o a na koo ini anua ni a, te maa ya na skutaꞌvi ñaꞌa ja vii ja vaꞌa nuu ndaka ni. Te sukan kó kuu.