\id TIT ‑ Mixtec, Magdalena Peñasco
\h Tito
\mt1 Carta ni saꞌa Pablo ma ja ni tetniñu de nuu tee kúu Tito ma
\c 1
\s1 Sukan ndákan‑tnuꞌu ñañaꞌa Pablo ma tee kúu Tito ma
\rem Saludo
\p
\v 1 Saña kúu Pablo, tee jinukuechi nuu Suꞌsi o a, te ni tetniñu ñaꞌa Jesucristo ma, ja kaxtnuꞌu sa nuu ñayii ni ndakaji Suꞌsi ma, sukan‑vaꞌa jin kukanu ini i ya, te jin jakuꞌni ini i ja ndaa ma, te jin ko saꞌa i sukan kúni maa ya ma.
\m
\v 2 Vaa ka kukanu ini o ya ja saꞌa ya ja jin koteku o ni‑kani ni‑jika, vaa sukan ni skuiso ya ja saꞌa ya, onde nuu ñatuu kuvaꞌa‑ka ñuu ñayivi a jâ ni skuiso ya sukan, te masu xndaꞌvi ñaꞌa ya.
\m
\v 3 Te jâ ni kenda kivi jâ ni jani ini maa ya ma, te ni kaxtnuꞌu ya tnuꞌu vii tnuꞌu vaꞌa maa ya ma. Te ni sacargu ñaꞌa maa ya ja kaxtnuꞌu sa nuu ndaka ñayii a sukan saꞌa ya ja jin ndaniꞌi taꞌvi o ma.
\p
\v 4 Te tée sa tnuꞌu yaꞌa nuu ni, Tito, vaa ka kukanu ini o Suꞌsi o a. Te maa Yuva o Suꞌsi ma, jiꞌin Jesucristo iya saꞌa ja jin kaku o nuu ja uꞌvi ma, na skutaꞌvi ñaꞌa ya ja vii ja vaꞌa ma, te koo sii ini ni. Vaa kuenda tnuꞌu ja saꞌya ndija sa kúu ni nuu Suꞌsi ma.
\s1 Sukan jin ko kuu tee jin ndakaꞌan‑soꞌo nuu ndaka ñayii ni ka nduu saꞌya Suꞌsi ma
\rem Requisitos de ancianos
\p
\v 5 Nuu ni xndoo ñaꞌa sa ñuu Creta ma, ni saꞌa sa sukan, kuechi ja kúni sa kúu ja na ndakaꞌan‑soꞌo ni nuu ñayii ma, ja na jin saꞌa i ndaka‑ka ja kúni Suꞌsi ma ja jin saꞌa i ma. Te sunkani ni tee jin ndakaꞌan‑soꞌo nuu ñayii ni ka nduu saꞌya Suꞌsi ma ndi‑in ndi‑in ñuu ma.
\m
\v 6 Te tatnuni ni nuu de ja saꞌa jin ko kuu de ma: Tee yaꞌa chi ñatuu na ja uꞌvi ko saꞌa de ja jin ko ndaxtekuechi ñaꞌa ñayii ma. Te konaꞌa de ja vivii ko kuu de jiꞌin ñasiꞌi de ma, te máko nduku‑ka de in‑ka ñaꞌa. Te saꞌya de ma, jín kandija i ja káꞌan de ma, te ñatuu na ja uꞌvi jin ko saꞌa i ja jin ndakaꞌan ñayii ma kuechi i ma.
\m
\v 7 Vaa tee ndákaꞌan‑soꞌo nuu ñayii ma chi in tee jinukuechi vaꞌa nuu Suꞌsi ma ko kuu de, te jiniñuꞌu ja ñatuu na ja uꞌvi‑ka ko saꞌa de ja saꞌa i ja jin ndaxtekuechi ñaꞌa ñayii ma. Te másu ko kuu de in tee ja ko kani ini de ja maa de kúu‑ka te masu na in tátnuni‑ka nuu de, te másu ko kuyachi ini de ja ko ndakiti ini de, te másu ko koꞌo de ndixi te ko ndajini de. Te másu ko kanaa de. Te másu ko ndiyo ini de nawa konevaꞌa de ma te ko xndaꞌvi de ñayii ma, sukan‑vaꞌa niꞌi de ja kúni de ma.
\m
\v 8 Suꞌva kuánuu de veꞌe de ma, ja jin ndoo ñayii ka jiniñuꞌu ja jin ndoo i ma. Te kúꞌun ini de ja saꞌa de ja vaꞌa ma, te káni vaꞌa ini de naxe ko saꞌa ko kuu de ma, te ndimaa ja vaꞌa ja ndaa ma kó saꞌa de, te ni‑in ja uꞌvi ko saꞌa de, te kúndee de tátnuni de nuu maa de ma ja ñatuu na ja uꞌvi ko saꞌa de nuu Suꞌsi ma.
\m
\v 9 Te kónaꞌa de sukan káꞌan tnuꞌu vii tnuꞌu vaꞌa Suꞌsi ma, sukan ni kutuꞌva de onde xinañuꞌu ma, sukan‑vaꞌa kuu ndakaꞌan‑soꞌo de nuu ñayii ñatuu ka kendoo vaꞌa ini sukan káꞌan tnuꞌu vii tnuꞌu vaꞌa Suꞌsi o a, sukan‑vaꞌa saꞌa de ja jin ndasaꞌa i kuenda nawa kúu ja ndaa ja ndija káꞌan Suꞌsi ma, te jin kandija i.
\p
\v 10 Vaa ka iyo kuaꞌa tee ja inusoꞌo xeen ka ndaa de, te ndimaa ka kaꞌan de ja masu kuatniñu, te ka xndaꞌvi de ñayii ma, te ja ka ndi ini‑ka de kúu ja jin kaxtnuꞌu de ja jiniñuꞌu ja jin kitnuni tee ma, sana ja jin kaxtnuꞌu de sukan kúni Suꞌsi ma ja jin ko saꞌa jin ko kuu o ma.
\m
\v 11 Te tee yukan chi jiniñuꞌu ja skasiyuꞌu o de, vaa ka saꞌa de ja jin skenaa ndaka ñayii ma maa i, vaa masu nde jiniñuꞌu ja ka kaxtnuꞌu de nuu i ma chi sukan‑ni ka saꞌa de, sukan‑vaꞌa jin niꞌi de xuꞌun ma.
\m
\v 12 Onde in tnaꞌa maa de ma, ja ndakaxtnuꞌu sukan ka kuu ñayii ñuu de ma, saꞌa‑ni ni ndakaꞌan de: “Ñayii ka iyo ñuu Creta a, ndimaa inutnuꞌu xeen i. Sukan ka kuu kiti yuku ma, sukan ka kuu i. Ka jaa xeen i, te inukuxi xeen i.”
\m
\v 13 Te ja sukan ni ndakaꞌan tee yukan chi ja ndaa kúu. Te chukan kúu ja ndakaꞌan‑soꞌo xen‑xeen ni nuu ñayii ñuu jiña, sukan‑vaꞌa jin konukuiñi vaꞌa i nuu ndaꞌa Suꞌsi o a.
\m
\v 14 Te másu ko jin katanuu i cuentu ka ndakani ñayii judío a, ni a jin katanuu i ja ka tatnuni tee ñatuu ka kandija tnuꞌu ndaa Suꞌsi o a.
\m
\v 15 Ndaka ñayii ka kandija Suꞌsi ma chi ka ñuꞌu kaji ka ñuꞌu vaꞌa ini i, te ndaka ja ka ndeꞌya i ma chi ka ndeꞌya ndaa i sukan iyo ma. Kovaa ndaka ñayii ñatuu ka kandija Suꞌsi ma chi ndimaa ja uꞌvi ka ñuꞌu ini i ja jin saꞌa i ma, te onde ndaka ja ka ndeꞌya i ma, masu ja vaꞌa ja vii kúu ka jini i. Vaa onde janitnuni ñayii yaꞌa ma ka iyo tneꞌe, vaa nanimaa ja uꞌvi ka ñuꞌu ma.
\m
\v 16 Vaa ka kaꞌan tna i ja ka kandija i Suꞌsi ma, kovaa ndaka ja ka saꞌa ka kuu i ma, te ka jini o ja masu inundija i ja ka kaꞌan i ma. Te ja uꞌvi xen‑xeen kúu ja ka saxiko i Suꞌsi ma, te ka sasoꞌo i nuu ya ma, te ni masu jin kuu maa i ja jin ko saꞌa i ja vaꞌa ma, visi ka kaꞌan i ja ka kandija tna i Suꞌsi ma.
\c 2
\s1 Jín kaxtnuꞌu ndaa jín kaxtnuꞌu ndija o tnuꞌu Suꞌsi a, te máko jin ndaxsama o
\rem Enseñanza de la sana doctrina
\p \v 1 Kovaa ndijin chi kaꞌan ni nuu ñayii a sukan káꞌan tnuꞌu vii tnuꞌu vaꞌa Suꞌsi o a, tnaꞌa ja ka skuaꞌa o a, te másu ko ndaxsama ni.
\m \v 2 Te tatnuni ni nuu tee jin ndakaꞌan‑soꞌo nuu ñayii ni ka nduu saꞌya Suꞌsi o ma ja na jin kani vaꞌa ini de naxe jin ko saꞌa jin ko kuu de, te na jin kuꞌun kaji jin kuꞌun vaꞌa ini de, te ni‑yuꞌu ni‑ini de na jin kukanu ini de Suꞌsi o a, te na jin kutoo ndija de ndaka ñayii ma, te na jin kava kuee ini de.
\p \v 3 Te suni tatnuni ni ja sukan tna na jin ko kuu ñaꞌa jin ndakaꞌan‑soꞌo nuu ndaka ñaꞌa ni ka nduu saꞌya Suꞌsi o a, ja na jin kani vaꞌa ini ña naxe jin ko saꞌa jin ko kuu ña ma, te máko jin ko saꞌa tnuꞌu ña, ni a koo jin koꞌo ña ndixi ja jin ko ndajini ña, sukan‑vaꞌa ñaꞌa kuechi‑ka ma, te jin kondeꞌya ña sukan ka ñuꞌu kaji ka ñuꞌu vaꞌa ini ña ma, te jin ko saꞌa tna ña sukan.
\m \v 4 Te jín kaxtnuꞌu ña nuu ñaꞌa jaa ma ja jin kutoo ña yii ña ma jiꞌin saꞌya ña ma.
\m \v 5 Te suni jín kaxtnuꞌu tna ña nuu ñaꞌa jaa ma ja na jin kani vaꞌa ini ña naxe jin ko saꞌa jin ko kuu ña ma, te máko jin kuꞌun ini ña in‑ka tee, te jín koto vaꞌa ña veꞌe ña ma, te jín kava vaꞌa ini ña, te jín kuandetu ña nuu yii ña ma, sukan‑vaꞌa máko jin kaꞌan ndevaꞌa ñayii ma ja kuu tnuꞌu Suꞌsi o a ja kuechi ña ma.
\p \v 6 Suni ndakaꞌan‑soꞌo tna ni nuu ndaka suchi jaa ma, ja na jin kuꞌun kaji jin kuꞌun vaꞌa ini i.
\m \v 7 Te maa ni ko kuu tee kaxtnuꞌu ndaka ja vaꞌa ja vii saꞌa ni ma, jiꞌin ja ni‑yuꞌu ni‑ini ni jatanuu ni Suꞌsi o a, jiꞌin ja ñuꞌu kaji ñuꞌu vaꞌa ini ni a, sukan‑vaꞌa ja jin kondeꞌya i ndijin ma, te jin saꞌa tna i sukan saꞌa sukan kuu ni nuu Suꞌsi o a.
\m \v 8 Te ndimaa tnuꞌu vii tnuꞌu vaꞌa kaꞌan ni, sukan‑vaꞌa na ndakukan‑nuu maa ñayii ñatuu kúnimani nuu o ma, ja ñatuu ni‑in ja uꞌvi niꞌi i ja ndaxtekuechi ñaꞌa i ma.
\p \v 9 Ndakaꞌan‑soꞌo ni nuu ñayii ka jinukuechi ma, ja na jin kandija i nuu jitoꞌo i ma na tniñu ka tatnuni jitoꞌo i ma ja jin saꞌa i ma, te máko jin ndakoneꞌe i nuu jitoꞌo i ma.
\m \v 10 Te másu ko jin sakuiꞌna i jitoꞌo i ma. Suꞌva jín kaxtnuꞌu i ja ñayii ka saꞌa ja vaꞌa ja ndaa ka kuu i, sukan‑vaꞌa vivii jin kaꞌan ñayii ma ja kuu tnuꞌu Suꞌsi o a, iya ni ndeneꞌe ñaꞌa nuu ja uꞌvi ma te ni ka ndaniꞌi taꞌvi o a.
\p \v 11 Vaa Suꞌsi ma chi ni kaxtnuꞌu ya nuu ndaka ñayii ñuu ñayivi a ja vii ja vaꞌa ja skutaꞌvi ñaꞌa ya ma, sukan‑vaꞌa kuu jin ndaniꞌi taꞌvi tna i, nuna jin kandija i jin saꞌa i sukan kúni ya ma.
\m \v 12 Te tnuꞌu vii tnuꞌu vaꞌa Suꞌsi ma, káxtnuꞌu i nuu ndaka o ja na jin xndoo o ndaka ja uꞌvi ka ñuꞌu ini ñayii ñatuu ka kandija Suꞌsi ma ja jin saꞌa i ma. Te chukan kúu ja yoꞌo ja ka iyo o tiempu yaꞌa chi jín kani vavaꞌa ini o naxe jin ko saꞌa jin ko kuu o, te jín ko saꞌa o ja vaꞌa ja ndaa ma, sukan kúni maa Suꞌsi ma ja jin ko saꞌa o ma, sukan‑vaꞌa jin ndaniꞌi taꞌvi o.
\m \v 13 Te jín kondetu o ja kenda kivi ja ndenda Suꞌsi o Jesucristo ma, iya kanuu xen‑xeen ma, iya ni ndeneꞌe ñaꞌa nuu ja uꞌvi ma, te jin kuni o jayiñuꞌu ya ma, te jin kusii ini xen‑xeen o.
\m \v 14 Vaa maa ya chi ni kachi ya ja ni ndoꞌo ni neni ya nuu tniñu o ma, te sukan, te ni ndeneꞌe ñaꞌa ya nuu ndaka ja uꞌvi ma, te ni ndasavii, ni ndasandoo ñaꞌa ya, sukan‑vaꞌa jin ko kuu o ñayii ñuu maa ya ma, te ndimaa jín kuꞌun ini o ja jin ko saꞌa o ja vii ja vaꞌa ma.
\m \v 15 Te ndaka chaꞌa ndakaꞌan‑soꞌo ni nuu tnaꞌa o a, te má koyuꞌu ni, te máko kuaꞌa ni tnuꞌu ja jin ko kaꞌan i ja masu nde jiniñuꞌu ni ma.
\c 3
\s1 Ja maa Suꞌsi ma, te ni ka nduu o ñayii ka saꞌa ja vaꞌa ja ndaa
\rem Justificados por gracia
\p \v 1 Te ndaxndaku ini ni ndaka ñayii ni ka nduu saꞌya Suꞌsi o a ja na jin kandija i ja ka kaꞌan tee ka netniñu ma, te jín koo tuꞌva i ja jin satniñu i nde tniñu ka tatnuni de ja jin saꞌa i ma, te jín ndasaꞌa i kuenda ja nú in ja játna ini Suꞌsi ma kúu.
\m \v 2 Te másu ko jin kaꞌan i tnuꞌu ni‑in ñayii ma, suꞌva jín nduku i ja jin koo mani i nuu ndaka ñayii ma. Te máko jin nduku i ja jin ko kanaa i, suꞌva jín kava kuee ini i nuu ndaka ñayii ma.
\m \v 3 Vaa suni yoꞌo tna ma chi onde xiꞌna‑ka ma chi masu nde ni ka yo ndasaꞌa tna o kuenda ma, te ñatuu ni ka yo kandija o ja ni ka yo kaꞌan tee ka netniñu ma. Te kuan koo neé kuan koo uun tna o ma. Te ni yo tatnuni maa yikikuñu o a nde a kúu ini i ja jin saꞌa o ma, te ni ka yo kusii ini o ja ni ka yo saꞌa o ndaka ja uꞌvi ma. Te ni ka yo kukueñu ini nuu tnaꞌa o ma. Te ni ka yo saxiko ñaꞌa ñayii ma, te ni ka yo ndasaxiko o ndi‑in ndi‑in ñayii ma.
\m \v 4 Kovaa nuu ni kenda tnuꞌu ndaꞌvi ini Suꞌsi o a, iya ni saꞌa ja ni ka kaku o nuu ja uꞌvi ma, saa ni ka jini o sukan kútoo ya ndaka ñayii ma,
\m \v 5 vaa ni saꞌa ya ja ni ka kaku o nuu ja uꞌvi ma. Kovaa masu ja kuechi ja inuvaꞌa xeen ini o ma kúu xi ja kuechi ja ja vaꞌa xeen ka saꞌa ka kuu o ma kúu ja ni saꞌa ya ja ni ka kaku o nuu ja uꞌvi ma chi ñaꞌa, chi ja ni kundaꞌvi ini xeen ñaꞌa ya ma kúu ja ni ka kaku o nuu ja uꞌvi ma. Te maa Xtumani maa ya ma ni saꞌa ja ni ka nduvii, ni ka ndundoo o, te ni ndasaꞌa jaa ñaꞌa ya, te ni ka nduu o in ñayii jaa.
\m \v 6 Te ja maa Jesucristo iya ni ndeneꞌe ñaꞌa nuu ja uꞌvi ma kúu ja ni skutaꞌvi ñaꞌa Suꞌsi ma Xtumani maa ya ma, te ni ka kutaꞌvi o ndaka ja vii ja vaꞌa ma.
\m \v 7 Te ja maa ja vii ja vaꞌa ni skutaꞌvi ñaꞌa Suꞌsi ma, te ni ka nduu o ñayii ka saꞌa ja vaꞌa ja ndaa ma, te chukan kúu ja ka kukanu ini o ja saꞌa ya jin koteku o ni‑kani ni‑jika, sukan ni skuiso ya ma.
\p \v 8 Tnuꞌu ndaa tnuꞌu ndija kúu chaꞌa, te kúni sa ja ni‑yuꞌu ni‑ini ni kaꞌan ni nuu ndaka ñayii ni ka kandija Suꞌsi ma, sukan‑vaꞌa ndaka i, te jin ko ndi ini i ja jin saꞌa i ja vaꞌa ja jin kuu ndaka ñayii ma. Nuna jin saꞌa o saꞌa chi ja vaꞌa kúu, vaa chíndee o ñayii ma, te játna ini Suꞌsi ma.
\m \v 9 Kovaa ja ndaka tnuꞌu ja ka skiti tnaꞌa ini ñayii ma te ka kanaa i ma, jiꞌin ja na in xi‑saꞌya tata ka kuu i ma, jiꞌin ja ka tetnaꞌa i siki tnuꞌu ni tatnuni Moisés ma, te ka ndanduku i kuenda tnaꞌa ja masu nde jiniñuꞌu ma, ndaka chaꞌa máko kuaꞌa ni tnuꞌu ja jin ko katanuu i, vaa masu nde jiniñuꞌu, te ni masu nawa chíndee ñaꞌa i ja koo vaꞌa o nuu Suꞌsi ma.
\m \v 10 Nú na in saꞌa siin tnaꞌa o ma nuu ka iyo ni a, te nú ni saꞌa i sukan in jichi, te ndakaꞌan niꞌi ni nuu i, te nú ma kandija i ja káꞌan ni ma, sani te má kuan‑taꞌvi‑ka ni i nuu ka ndatnaꞌa ni a.
\m \v 11 Vaa ka jini o ja nú na in saꞌa neé saꞌa uun ma chi jiso kuechi i ja sukan saꞌa i ma. Te tnaꞌa ja ni saꞌa maa i ma, te ndachunaa i.
\s1 Sukan ni tatnuni Pablo ma nuu Tito ma ja saꞌa de
\rem Instrucciones personales
\p \v 12 Te nuna tetniñu sa tee kúu Artemas ma xi Tíquico a nuu iyo ni a, te ko ndi ini ni ja kii ni ki koto ñaꞌa ni ñuu Nicópolis ma, vaa yukan ni jani ini sa ja koo sa tiempu vijin ma.
\m \v 13 Te tee nani Zenas ma ja jini de ley ma, jiꞌin tee kúu Apolos ma, jin chindee ni de ndaka ja iyo ja kuu jin chindee ni de ma, sukan‑vaꞌa jin konevaꞌa de ndaka ja ka jiniñuꞌu de ma ichi jin koo de ma,
\m \v 14 te sukan, te jin kutuꞌva tna tnaꞌa o a ja jin saꞌa i ja vaꞌa te jin chindee i ñayii ka jiniñuꞌu ma, sukan‑vaꞌa jin ko kuu i ñayii kuatniñu ñaꞌa Suꞌsi ma.
\s1 Sukan ndákan‑tnuꞌu ñañaꞌa Pablo ma ñayii ka kandija Suꞌsi ma
\rem Saludo final
\p \v 15 Te ndaka tnaꞌa o ka iyo jiꞌin sa a, ka ndakan‑tnuꞌu ñañaꞌa ña i. Te ndakuaꞌa ni nchuxi sa a nuu ndaka tnaꞌa o ka iyo jiꞌin ni a ja ka kutoo tnaꞌa o jiꞌin i ma, vaa ka kukanu ini o jiꞌin i Suꞌsi ma. Te ja vii ja vaꞌa na skutaꞌvi ñaꞌa Suꞌsi ma ndaka ni. Te sukan kó kuu.