\id 1JN ‑ Mixtec, Magdalena Peñasco
\h 1 Juan
\mt1 Carta xinañuꞌu ni saꞌa tee kúu Juan ma
\c 1
\s1 Tnuꞌu vii tnuꞌu vaꞌa Suꞌsi ma kúu Jesucristo iya saꞌa ja koteku o ma
\rem La Palabra de vida
\p
\v 1 Saña ja kúu sa Juan ma, te tée sa nuu ndijin siki iya ni iyo onde xinañuꞌu ma, Jesucristo iya ni ka yo jinisoꞌo sa ja ni yo kaꞌan ya ma, te ni ka jini sa ya jiꞌin nuu sa ma, te ni ka yo ndeꞌya sa ya, te ni ka yo tnii sa ya jiꞌin ndaꞌa sa ma. Suu ya kúu tnuꞌu ja saꞌa ja koteku o ma.
\m
\v 2 Te iya saꞌa ja koteku o ma, ni kii ñayivi ya, te ni ka jini sa ya, te ka ndakani sa ja maa ya saꞌa ja koteku o ma. Te ka kaxtnuꞌu sa nuu ni ja maa ya saꞌa ja jin koteku o ni‑kani ni‑jika ma, te ni iyo ya jiꞌin Yuva ya ma, te saa ni kii ya, te ni ka jini sa ya.
\m
\v 3 Te ka kaxtnuꞌu sa sukan kaa sukan iyo ya ma, te ni ka yo jinisoꞌo sa ja ni yo kaꞌan ya ma, te ka kaxtnuꞌu sa nuu ni a, sukan‑vaꞌa jín ketnaꞌa ini o sukan ka ketnaꞌa ini sa jiꞌin Yuva o Suꞌsi ma jiꞌin Saꞌya ya Jesucristo ma.
\m
\v 4 Te tnuꞌu yaꞌa tée sa, sukan‑vaꞌa jin koo sii ini ndija ndaka o.
\s1 Suꞌsi ma kúu ñuꞌu xtnuu nuu ñayii ma, te ka saꞌa i ja vaꞌa ja ndaa ma
\rem Dios es luz
\p
\v 5 Te tnuꞌu yaꞌa kúu tnuꞌu maa Jesucristo ma ja ni kaxtnuꞌu ya ma, te ka ndakaxtnuꞌu sa nuu ni, ja Suꞌsi ma kúu ñuꞌu ndúꞌva ñuu ñayivi a, te ñatuu nde kunee nuu iyo ya ma.
\m
\v 6 Nú ka kaꞌan o ja ka iyo o jiꞌin ya te ka saꞌa o sukan ka saꞌa ñayii ka iyo nuu nee ma chi ka xndaꞌvi tnaꞌa o, te ñatuu ka saꞌa o ja ndaa ma.
\m
\v 7 Kovaa nú ka saꞌa o ja vaꞌa sukan ka saꞌa ñayii ka iyo nuu xnduꞌva maa Suꞌsi ma ñuꞌu ya ma, te ka ketnaꞌa ini ndi‑in ndi‑in o, te maa niñi Saꞌya ya Jesucristo ma ndasavii ñaꞌa ndaka na kuechi o ma.
\p
\v 8 Nuna jin kaꞌan o ja ñatuu na kuechi o, ka xndaꞌvi o maa o, te ñatuu na ja ndaa ma ñunee ini anua o ma.
\m
\v 9 Kovaa nuna ndakaꞌan o na kuechi ni saꞌa o ma chi maa Suꞌsi ma kúu iya saꞌa ja vaꞌa ja ndaa, te ndasakanu ini ya na kuechi o ma, te ndasavii ñaꞌa ya ndaka ja uꞌvi ni saꞌa o ma.
\m
\v 10 Te nú ka kaꞌan o ja ñatuu na kuechi ka saꞌa o ma, te ka saꞌa o tnuꞌu ja Suꞌsi ma kúu iya xndaꞌvi ñaꞌa, te ñatuu na tnuꞌu ya ma ñunee ini anua o ma.
\c 2
\s1 Jesucristo ma kúu iya ni saꞌa ja kuu sakanu ini Suꞌsi ma kuechi o ma
\rem Cristo, nuestro abogado
\p \v 1 Saꞌya maa sa, tée sa tnuꞌu yaꞌa, sukan‑vaꞌa máko jin ndakuiso kuechi‑ka ni. Kovaa nú na in ndiso kuechi i, iyo maa Jesucristo ma ja chindee ñaꞌa ya ja xnaa ya kuechi i ma nuu Suꞌsi ma, vaa suu ya kúu iya saꞌa ja vaꞌa ja ndaa ma.
\m \v 2 Jesucristo ma kúu iya ni saꞌa ja kuu sakanu ini Suꞌsi ma kuechi o ma, te masu kuechi maa in‑ni o ma, nú masu ja kuechi ndaka ñayii ñuu ñayivi a, nuna jin kandija i ya ma.
\p \v 3 Nú ka kandija o ja ni tatnuni Jesucristo ma, te onde sukan saa jin konaꞌa o ja ka jini o ya.
\m \v 4 Kovaa nú na in káꞌan ja: “Saña chi jini sa ya”, te ñatuu saꞌa i sukan tátnuni ya ma, in ñayii xndaꞌvi ñaꞌa kúu i, te ñatuu na ja ndaa ma ñunee ini anua i ma.
\m \v 5 Kovaa nú na in kandija tnuꞌu káꞌan ya ma, te ñayii yaꞌa, kútoo ndija i ya, te nú sukan ka saꞌa o, saa ka jini o ja ka iyo o jiꞌin ya.
\m \v 6 Nú na in káꞌan ja iyo i jiꞌin Jesucristo ma, kó saꞌa i sukan ni yo saꞌa maa ya ma.
\s1 In tnuꞌu jaa tátnuni Suꞌsi ma
\rem El nuevo mandamiento
\p \v 7 Ndijin ja ka kutoo tnaꞌa o a, tnuꞌu tée sa a masu tnuꞌu jaa kúu, suni maa i ni ka yo jinisoꞌo ni onde xinañuꞌu ma. Te tnuꞌu yaꞌa, tnuꞌu janaꞌa kúu i, te suni maa i ni ka jinisoꞌo ni onde xiꞌna‑ka ma.
\m \v 8 Kovaa tnuꞌu tée sa a nuu ni a vitna a, in ja tátnuni jaa Jesucristo ma kúu, te in ja ndaa ni saꞌa ya jiꞌin o ma kúu. Vaa yoꞌo, jâ ni ka nde koo o nuu nee ni ka iyo o ma, te vitna jâ ni ndaxtnuu Suꞌsi ñuꞌu ndija ya ma nuu o a, ja jin ko saꞌa o ja vaꞌa ja ndaa ma.
\p \v 9 Nú na in káꞌan ja iyo i nuu tnuu ñuꞌu Suꞌsi ma, kovaa ndákiti ini i nuu tnaꞌa i ma, iyo‑ka i nuu nee ma.
\m \v 10 Nú na in kútoo tnaꞌa i ma, iyo i nuu ndúꞌva ñuꞌu ma, te ñatuu nawa saꞌa ja ndakuiso kuechi‑ka i.
\m \v 11 Kovaa nú na in ndákiti ini i nuu tnaꞌa i ma, iyo i nuu nee ma, te kuaꞌan vee i nuu nee ma kúu i, te ñatuu jini i ndenu kiꞌin i, vaa nuu nee ma iyo i, te ñatuu kúndijin nuu i.
\p \v 12 Saꞌya sa, tée sa saꞌa nuu ni, vaa ja maa Jesucristo ma, te ni sakanu ini ñaꞌa Suꞌsi ma ndaka kuechi ni ma.
\p \v 13 Tée sa nuu ndijin ja jâ ka iyo saꞌya ni ma, vaa jâ ni ka jini ni iya iyo onde xinañuꞌu ma.
\p Suchi jaa, tée ri nuu roꞌo, vaa jâ ni ka kundee ro nuu ja uꞌvi ma.
\p Saꞌya sa, ni tee sa saꞌa nuu ni, vaa ni ka jini ni Yuva o Suꞌsi ma.
\p \v 14 Ni tee sa nuu ndijin ja ka iyo saꞌya ni ma, vaa ni ka jini ni iya iyo onde xinañuꞌu ma.
\p Suchi jaa, ni tee ri saꞌa nuu roꞌo, ja jâ ni ka jan‑taꞌvi ro tnuꞌu Suꞌsi ma ini anua ro a, te ñatuu ni ka yuꞌu ro nawa jin kaꞌan ñayii ma ja jin kuu ro ma, vaa jâ ni ka kundee ro nuu ja uꞌvi ma.
\p \v 15 Máko jin kutoo ni ñuu ñayivi a ni ja ka iyo ñuu ñayivi a. Nú na in kútoo‑ka i ñuu ñayivi a, masu kútoo i Yuva o Suꞌsi ma.
\m \v 16 Vaa ndaka ja iyo ñuu ñayivi a masu nuu Yuva o ma vee, nú masu ja maa neꞌun ñayii ma. Te chaꞌa kúu ja táa ñuu ñayivi a: ja kuꞌun ini o ja uꞌvi ma, jiꞌin ja kuꞌun ini o ja konevaꞌa o nawa játna ini o ma, jiꞌin ja saꞌa o tnuꞌu ja maa o kuu‑ka ma.
\m \v 17 Kovaa ñuu ñayivi ya jiꞌin ja játna ini ñayii ma ja saꞌa i ma chi ja naa ko kuu nuu Suꞌsi ma, kovaa ñayii saꞌa sukan játna ini Suꞌsi ma, koteku i ni‑kani ni‑jika nuu ya ma.
\s1 Ñayii xndaꞌvi ñaꞌa te ñatuu káxtnuꞌu ndaa i tnuꞌu ndaa tnuꞌu ndija Suꞌsi ma chi masu iyo i ichi ndaa ma
\rem La verdad y la mentira
\p \v 18 Saꞌya sa, jâ ve ndiꞌi kivi a. Te jâ ka jinisoꞌo ni ja vee in suchi kanaa jiꞌin Cristo ma, te jâ ve kuyatni i, te suni jâ ni ka kenda koo kuaꞌa ñayii ñatuu ka kunimani nuu Cristo ma. Te chukan kúu ja ka jini o ja ve kuyatni kivi naa ñuu ñayivi a.
\m \v 19 Ñayii yaꞌa, ni ka nde koo i neꞌun o a, vaa masu ñayii ka ndikin Cristo ma ka kuu i. Vaa nute ka ndikin i ya chi jin koo kaꞌnu o jiꞌin i. Kovaa saꞌa ni kuu, sukan‑vaꞌa jin kuni ndaa o ja masu ndaka o ka kuu saꞌya Suꞌsi ma.
\p \v 20 Cristo ma, ni taa ya Xtumani Ndios ma nuu ndijin, te ndaka ndijin ka jini nawa kúu ja vaꞌa ja ndaa ma.
\m \v 21 Te tée sa tnuꞌu yaꞌa nuu ni masu kuechi ja ñatuu ka jini ni ja ndaa ma, chi vaa ndijin, jâ ka jini ni ja ndaa ma, te jâ ka jini ni ja ni‑in ja xndaꞌvi tnaꞌa o ma, kituu i nuu ja ndaa ma.
\m \v 22 ¿Na in kúu ja xndaꞌvi ñaꞌa ma? Ñayii xndaꞌvi ñaꞌa ma kúu ñayii káꞌan ja Jesús ma, masu Cristo iya ni tetniñu Suꞌsi ma ñuu ñayivi a kúu ya. Ñayii yukan kúu ñayii ñatuu kúnimani nuu Cristo ma, vaa ñatuu kándija i ni a Yuva o Suꞌsi ma ni a Saꞌya ya ma.
\m \v 23 Ndevaꞌa‑ni ñayii káꞌan ja masu Saꞌya Suꞌsi ma kúu Cristo ma, suni ñatuu iyo i jiꞌin Yuva o ma. Kovaa nú na in káꞌan ja Saꞌya Suꞌsi ma kúu Cristo ma, ñayii yukan, iyo i jiꞌin Yuva o ma.
\p \v 24 Te chukan kúu ja jin chunee vaꞌa ni ini anua ni a tnuꞌu ni ka jinisoꞌo ni onde xinañuꞌu ma. Te nú ka ñuꞌu ini ni te ka saꞌa ni sukan káꞌan tnuꞌu ni ka jinisoꞌo ni onde xinañuꞌu ma, te jin konaꞌa ni ja ka iyo ni jiꞌin Yuva o Suꞌsi ma jiꞌin Saꞌya ya ma.
\m \v 25 Te chaꞌa kúu ja ni skuiso Jesucristo ma nuu o a: ja jin koteku o ni‑kani ni‑jika.
\p \v 26 Te ni tee sa saꞌa, sukan‑vaꞌa máko jin kandija ni ja ka kaꞌan ñayii ka kuni i ja jin xndaꞌvi ñaꞌa i ma.
\m \v 27 Vaa ndijin chi ka iyo ni jiꞌin Xtumani Ndios ma iya ni taa maa Jesucristo ma, te ñatuu na in ka jiniñuꞌu‑ka ni ja ko skuaꞌa ñaꞌa i, vaa maa Xtumani Ndios ma káxtnuꞌu ndaka tnuꞌu nuu ni a, te ja kaxtnuꞌu ya ma kúu ja ndaa, te ñatuu xndaꞌvi ñaꞌa ya. Chukan kúu ja jin koo ni nuu ndaꞌa Cristo ma, sukan káxtnuꞌu Xtumani Ndios ma.
\p \v 28 Vitna vi, saꞌya sa, jín koo ndaa jín koo ndija ni nuu Cristo ma, sukan‑vaꞌa kivi kii ya ma, te ma jin ndakukan‑nuu o, te jin kusaa ini o ja jin koo o jin tnaꞌa o ya.
\m \v 29 Vaa jâ ka jini ni ja Jesucristo ma, iya saꞌa ja ndaa kúu ya, te chukan kúu ja ndaka ñayii ka saꞌa ja ndaa ma, saꞌya Suꞌsi ma ka kuu i.
\c 3
\s1 Ñayii ñatuu ka saꞌa‑ka ja uꞌvi ma ka kuu saꞌya Suꞌsi ma
\rem Hijos de Dios
\p
\v 1 Jin kondeꞌya ni sukan kútoo ñaꞌa Yuva o Suꞌsi ma, vaa ni xnani ñaꞌa ya saꞌya maa ya ma. Te suu ka kuu o. Te chukan kúu ja ñayii ñuu ñayivi a, ñatuu ka jini ñaꞌa i, vaa ñatuu ka jini i maa Suꞌsi ma.
\m
\v 2 Ndijin ja ka kutoo tnaꞌa o a, vitna chi saꞌya Suꞌsi ma ka kuu o, te visi ñatuu jin kuni‑ka o naxe jin ko kuu o kivi jin koo o nuu Cristo ma, kovaa ka jini o ja nuna kii Jesucristo ma, jin ko kuu o sukan kúu ya ma, vaa kivi yukan, te jin kuni o ya sukan kaa sukan iyo ya ma.
\m
\v 3 Te ndaka ñayii ka kukanu ini saꞌa te ka ndetu i ya ma, ka ndasavii ka ndasandoo‑ka i maa i sukan iyo vii iyo ndoo maa ya ma.
\p
\v 4 Kovaa ndaka ñayii saꞌa ja uꞌvi ma chi ñatuu kándija i ja ni tatnuni Suꞌsi ma. Chukan kúu ja ndákuiso kuechi ndákuiso kuechi i ma.
\m
\v 5 Ndijin chi jâ ka jini ni ja Jesucristo ma, ni kii ya ñuu ñayivi ya, sukan‑vaꞌa xnaa ya kuechi ñayii kandija sukan tátnuni ya ma. Te vaa maa ya chi ni‑in kuechi ndiso ya, vaa ñatuu játna ini ya ja uꞌvi ka saꞌa ñayii ma.
\m
\v 6 Chukan kúu ja ndaka ñayii iyo kaa jiꞌin ya ma chi ñatuu na kuechi jin kondiso‑ka i, kovaa ndaka ñayii jiso kuechi‑ka ma, ñatuu kuni‑ka i ya.
\m
\v 7 Saꞌya sa, ñatuu ni‑in ñayii ko xndaꞌvi ñaꞌa: nú na in saꞌa ja ndaa ma, in ñayii vaꞌa in ñayii ndaa kúu i, vaa saꞌa i sukan saꞌa ndaa maa ya ma.
\m
\v 8 Kovaa ñayii saꞌa ja uꞌvi ma chi tnaꞌa tachi ma kúu i, vaa tachi ma chi onde xinañuꞌu ma ndiso kuechi i. Te chukan kúu ja ni kenda Jesucristo Saꞌya Suꞌsi ma, sukan‑vaꞌa xnaa ya ja saꞌa tachi ma.
\m
\v 9 Chukan kúu ja ñayii kúu saꞌya Suꞌsi ma, masu nde jika‑ka i ichi uꞌvi ma, vaa iyo ja ni chunee Suꞌsi ma ini anua i ma, te sukan ko kuu ni‑kani ni‑jika. Te masu kuu saꞌa‑ka i ja uꞌvi ma, vaa saꞌya Suꞌsi ma kúu i.
\m
\v 10 Te sukan, te jini o na in ka kuu saꞌya Suꞌsi ma jiꞌin na in ka kuu saꞌya tachi ma: vaa ndaka ñayii ñatuu ka saꞌa ja vaꞌa ma te ñatuu ka kutoo tnaꞌa i ma, masu saꞌya Suꞌsi ma ka kuu i.
\s1 Jín kutoo tnaꞌa ndi‑in ndi‑in o
\rem Amémonos los unos a los otros
\p
\v 11 Te tnuꞌu ni ka jinisoꞌo ni onde xinañuꞌu ma kúu ja jín kutoo tnaꞌa ndi‑in ndi‑in o.
\m
\v 12 Máko jin ko kuu o sukan ni yo kuu Caín ma, vaa tnaꞌa tachi ma ni yo kuu i, te ni jaꞌni i ñani i ma. Te ¿navaꞌa ni jaꞌni i ñani i ma? Vaa Caín ma, ja ni yo saꞌa i ma ja uꞌvi kúu, te ñani i ma ni yo saꞌa ja vaꞌa ma.
\p
\v 13 Ndijin, nú ñayii ñuu ñayivi a, ka ndakiti ini i nuu ni, te máko jin ko sanuu ni.
\m
\v 14 Vaa yoꞌo chi ka kutoo tnaꞌa o a, te chukan kúu ja ka jini o ja jâ ni ka yanduu o ja ma jin kûu‑ka o, suꞌva jin koteku o. Te ñayii ñatuu ka kutoo tnaꞌa i ma, ñatuu ndáteku‑ka i nuu Suꞌsi ma.
\m
\v 15 Ndaka ñayii ñatuu kúnimani i nuu tnaꞌa i ma, kuenda kúu in ñayii jaꞌni tnaꞌa kúu i. Te ka jini ni ja ni‑in ñayii jaꞌni tnaꞌa ma, masu kuu koteku maa i ni‑kani ni‑jika.
\m
\v 16 Te chukan kúu ja yoꞌo chi ka jini o nawa kúu ja kutoo tnaꞌa o ma, vaa Jesucristo ma, ni kachi ya ja ni jiꞌi ya nuu tniñu o ma, te suni sukan jin kachi o ja jin saꞌa o ja jin kuu tnaꞌa o ma.
\m
\v 17 Nú nde o kúu xiku te ndeꞌya o in tnaꞌa o ma ja jiniñuꞌu i ja chindee o i, kovaa nú ñatuu waꞌa o nawa jiniñuꞌu i ma, ¿naxe kuu kaꞌan o ja kútoo tnaꞌa o sukan kútoo ñaꞌa Suꞌsi ma?
\m
\v 18 Saꞌya maa sa, ja kutoo tnaꞌa o ma, masu yika‑ni ja tnuꞌu káꞌan‑ni o kúu, nú masu ja ûni káꞌan o te saꞌa o ja vaꞌa ma.
\m
\v 19-20 Te ja ka kutoo tnaꞌa o sukan ma, te jin kuni o ja ka iyo o nuu ja ndaa ma, te visi ini anua o a, jani uu jani uni ini i ja masu vaꞌa‑ni kúu ja saꞌa o ma, kovaa Suꞌsi ma chi kaꞌnu‑ka ya sana ini anua o a, te jini ya ndaka nawa ñuꞌu ini o ja saꞌa o ma.
\p
\v 21 Ndijin ja ka kutoo tnaꞌa o a, nú ini anua o a, ñatuu nawa ndáxtekuechi ñaꞌa i, chi kuu jin koo o jin tuꞌva sii ini o nuu Suꞌsi ma,
\m
\v 22 te maa ya taa ndaka nawa kakan o ma, vaa ka kandija o ja tátnuni ya ma, te ka saꞌa o ja játna ini ya ma.
\m
\v 23 Te ja tátnuni ya ma kúu ja jin kandija o Saꞌya ya Jesucristo ma, jiꞌin ja jin kutoo tnaꞌa ndi‑in ndi‑in o ma, sukan ni tatnuni maa ya ma.
\m
\v 24 Ñayii ka kandija ja tátnuni ya ma, ka iyo i jiꞌin ya, te iyo ya jiꞌin i. Te saꞌa, te ka jini o ja iyo ya jiꞌin o, ja maa Xtumani Ndios ni chunee ya ini anua o ma.
\c 4
\s1 Naxe jin kuni o ñayii ka iyo ndija jiꞌin Xtumani Ndios ma
\rem El Espíritu de Dios y el espíritu del enemigo de Cristo
\p \v 1 Ndijin ja ka kutoo tnaꞌa o a, máko jin kandija ni ja ka kaꞌan ndaka ñayii ka saꞌa i tnuꞌu ja tnuꞌu Xtumani Ndios ma kúu tnuꞌu ka kaꞌan i ma, nú masu ja jin kototnuni ni i, sukan‑vaꞌa jin kuni ni nú ka nevaꞌa i Xtumani Ndios ma, xi ñatuu, vaa jâ ni ka kenda koo kuaꞌa ñayii ka xndaꞌvi tnaꞌa ñuu ñayivi a, te ka saꞌa i tnuꞌu ja ka kaꞌan i tnuꞌu Suꞌsi ma.
\m \v 2 Te sukan, te jin kuni ni na in iyo jiꞌin Xtumani Ndios ma: Ndaka ñayii jin ndakuan‑yuꞌu ja Jesucristo ma, ni kii ñayivi ya nuu ñuꞌú ya, ñayii yaꞌa iyo jiꞌin Suꞌsi ma.
\m \v 3 Ñayii ñatuu ndákuan‑yuꞌu sukan ni kii Jesús ma, ñatuu na Xtumani Ndios ma iyo jiꞌin i, suꞌva iyo i jiꞌin tachi ma, suchi ñatuu kúnimani nuu Cristo ma. Ndijin, jâ ni ka jinisoꞌo ni ja suchi yukan chi kii i ma, te vitna chi ja iyo i ñuu ñayivi ya.
\p \v 4 Saꞌya maa sa, ndijin chi saꞌya Suꞌsi ma ka kuu ni, te jâ ni ka kundee ni nuu ñayii ka xndaꞌvi tnaꞌa ma, vaa iya ka iyo jiꞌin ni a chi iya kúndee nuu suchi iyo ñuu ñayivi a kúu ya.
\m \v 5 Ñayii yukan chi ñayii ñuu ñayivi a ka kuu i. Chukan kúu ja ndimaa ja iyo ñuu ñayivi a ka kaꞌan i, te ñayii ñuu ñayivi a, ka ninisoꞌo i ja ka kaꞌan i ma.
\m \v 6 Kovaa yoꞌo, saꞌya Suꞌsi ma ka kuu o. Na in jini Suꞌsi ma chi ninisoꞌo i ja ka kaꞌan o ma, kovaa ñayii masu saꞌya Suꞌsi ma ka kuu i ma, masu nde ka ninisoꞌo i ja ka kaꞌan o ma. Te sukan, te jin kuni o na in ka nevaꞌa ndija Xtumani Ndios ma jiꞌin nde in iyo jiꞌin tachi suchi xndaꞌvi ñaꞌa ma.
\s1 Suꞌsi ma kúu iya kútoo ñaꞌa
\rem Dios es amor
\p \v 7 Ndijin ja ka kutoo tnaꞌa o a, jiniñuꞌu ja jin kutoo tnaꞌa ndija ndi‑in ndi‑in o, vaa ja kutoo tnaꞌa o ma chi nuu Suꞌsi ma vee. Te ndaka ñayii ka kutoo tnaꞌa ma chi saꞌya Suꞌsi ma ka kuu i, te ka jini i Suꞌsi ma.
\m \v 8 Kovaa ñayii ñatuu ka kutoo tnaꞌa ma, ñatuu ka jini i Suꞌsi ma, vaa Suꞌsi ma chi iya kútoo ñaꞌa kúu ya.
\m \v 9 Suꞌsi ma, ni kaxtnuꞌu ya ja kútoo ñaꞌa ya, te ni tetniñu ya Saꞌya maa in maa tnuꞌu‑ni ya ma ñuu ñayivi a, te ni ndoꞌo ni neni ya ma, sukan‑vaꞌa ja maa ya ma, te jin koteku o.
\m \v 10 Ja kútoo ñaꞌa Suꞌsi ma kúu ja ni saꞌa ya saꞌa xiꞌna‑ka: ni tetniñu ya Saꞌya ya ma, sukan‑vaꞌa ja ni ndoꞌo ni neni ya ja kuechi o ma, te sukan saa ni kuu ni sakanu ini Suꞌsi ma kuechi ndaka o ma. Kovaa yoꞌo, ni masu nde ni ka yo kutoo o Suꞌsi ma onde xinañuꞌu ma.
\p \v 11 Te ndijin ja ka kutoo tnaꞌa o a, nú sukan ni kutoo ñaꞌa Suꞌsi ma, suni sukan tna na jin kutoo tnaꞌa o.
\m \v 12 Suꞌsi ma, ñatuu na in ni jini kuiti ya, kovaa nú ka kutoo tnaꞌa ndi‑in ndi‑in o ma, te ka jini o ja Suꞌsi ma iyo jiꞌin o, te ka jini o ja ka saꞌa ndija o sukan saꞌa Suꞌsi ma, ja kútoo ñaꞌa ya ma.
\m \v 13 Te nú saꞌa ka saꞌa o, te ka jini o ja ka iyo o jiꞌin Suꞌsi ma te iyo Suꞌsi ma jiꞌin o, vaa ni taa ya Xtumani Ndios ma.
\m \v 14 Te maa o ni ka jini ja Yuva o Suꞌsi ma, ni tetniñu ya Saꞌya ya ma, ja ni ndoꞌo ni neni ya ma, sukan‑vaꞌa jin ndaniꞌi taꞌvi ñayii ñuu ñayivi a, te sukan ka ndakaꞌan ka ndakachi o nuu ñayii a.
\m \v 15 Ndevaꞌa‑ni na in ndákuan‑yuꞌu ja Jesús ma, te Saꞌya Suꞌsi ma kúu ya, iyo i jiꞌin Suꞌsi ma, te iyo Suꞌsi ma jiꞌin i.
\p \v 16 Te saꞌa, saa ni ka jini o, te ni ka kandija o ja kútoo ñaꞌa Suꞌsi ma. Te Suꞌsi ma, iya kútoo ñaꞌa kúu ya, te ñayii ka kutoo tnaꞌa ma, ka iyo i jiꞌin Suꞌsi ma, te Suꞌsi ma iyo jiꞌin i.
\m \v 17 Te sukan saa kúu in ja ndaa ja ka kutoo tnaꞌa o ma, sukan‑vaꞌa kivi ndakan Suꞌsi ma kuenda nuu o a, te jin kusaa ini o ja jin kenda koo o nuu ya ma, vaa sukan ni saꞌa ni kuu maa Jesucristo ma, sukan ka saꞌa ka kuu o nuu ñayii ñuu ñayivi a.
\m \v 18 Nú kútoo o tnaꞌa o ma, te masu nawa koyuꞌu o, chi vaa ja kutoo tnaꞌa ndija o ma, xtandiyo i ja koyuꞌu o ma, vaa ja koyuꞌu o ma kúu ja ndachunaa o kuechi o ma nuu Suꞌsi ma. Chukan kúu ja nú na in yuꞌu chi ñatuu kenda‑ka i ja kutoo tnaꞌa ndija i sukan kúni Suꞌsi ma.
\p \v 19 Yoꞌo chi ka kutoo o Suꞌsi ma, vaa xinañuꞌu maa ya ni kutoo ñaꞌa.
\m \v 20 Nú na in káꞌan: “Saña chi kútoo sa Suꞌsi ma”, te ndákiti ini i nuu tnaꞌa i ma, in ñayii xndaꞌvi ñaꞌa kúu i. Vaa nú ñatuu kútoo i tnaꞌa i ma, te vitna ja ndeꞌya i tnaꞌa i ma, te ¿naxe kutoo i Suꞌsi ma, iya ñatuu ndeꞌya i jiꞌin nuu i ma?
\m \v 21 Jesucristo ma, ni tatnuni ya ja nú na in kútoo Suꞌsi ma, suni na kutoo i tnaꞌa i ma.
\c 5
\s1 Jín kukanu ini o Jesucristo ma te jin kundee o nuu ja uꞌvi iyo ñuu ñayivi a
\rem Nuestra victoria sobre el mundo
\p \v 1 Ndaka ñayii ka kandija ja Jesús ma kúu Cristo ma, saꞌya Suꞌsi ma ka kuu i. Te ñayii ka kutoo Yuva o Suꞌsi ma, suni ka kutoo tna i ñayii ka kuu saꞌya Yuva o Suꞌsi ma.
\m \v 2 Nú ka kutoo o Suꞌsi ma te ka kandija o tnuꞌu ni tatnuni ya ma, te ka jini o ja suni ka kutoo o ñayii ka kuu saꞌya Suꞌsi ma.
\m \v 3 Ja kutoo o Suꞌsi ma kúu ja saꞌa o sukan játna ini ya ma te saꞌa o sukan káꞌan tnuꞌu ni tatnuni ya ma, te ja ni tatnuni ya ma masu in ja tnundoꞌo ja jin kandija o kúu,
\m \v 4 vaa ndaka ñayii ka kuu saꞌya Suꞌsi ma, ka kundee i nuu ndaka ja iyo ñuu ñayivi a. Te yoꞌo chi ka kandija tna o Suꞌsi ma, te chukan kúu ja jin kundee o siki ndaka ja iyo ñuu ñayivi a.
\m \v 5 Nú na in kándija ja Jesús ma kúu Saꞌya Suꞌsi ma, jâ ni kundee i nuu ja iyo ñuu ñayivi a.
\s1 Saꞌa káꞌan Suꞌsi ma siki ja Saꞌya ya Jesucristo ma
\rem El testimonio acerca del Hijo de Dios
\p \v 6 Te Jesucristo ma kúu iya ni kii jiꞌin ndute jiꞌin niñi. Masu yika‑ni ja ndute, nú masu ja ndute jiꞌin niñi. Maa Xtumani Ndios ma kúu testigu ja sukan ni kuu, te Xtumani Ndios ma kúu iya káxtnuꞌu ja ndaa ma.
\m \v 7 Te andivi ma ka iyo uni testigu: Yuva o Suꞌsi ma, jiꞌin Saꞌya ya Jesucristo ma, jiꞌin Xtumani Ndios ma. Te ndinuni ya chi in‑ni ya kúu.
\m \v 8 Te ñuu ñayivi ya, uni tnaꞌa ja ka kaxtnuꞌu na in kúu Jesucristo ma: Xtumani Ndios ma, jiꞌin ndute ma, jiꞌin niñi ma, te in‑ni ka kaꞌan ndinuni i ja kuu ya.
\m \v 9 Ka kandija o ja ka kaꞌan ñayii ma, kovaa ja káꞌan Suꞌsi ma ja vaꞌa xeen‑ka kúu ja kandija o, vaa ja káꞌan Suꞌsi ma, te káxtnuꞌu ya na in kúu Saꞌya ya ma.
\m \v 10 Nú na in kándija Saꞌya Suꞌsi ma, te ja káꞌan Suꞌsi ma ñunee ini anua i ma. Nú na in ñatuu kándija Suꞌsi ma, saꞌa i tnuꞌu ja Suꞌsi ma kúu iya xndaꞌvi ñaꞌa, vaa ñatuu kándija i ja káꞌan Suꞌsi ma siki ja Saꞌya ya Jesucristo ma.
\m \v 11 Te ja káꞌan Suꞌsi ma kúu ja ni taa ya ja jin koteku o ni‑kani ni‑jika ma, te ja jin koteku o ni‑kani ni‑jika ma kúu ja jin niꞌi o ja maa Saꞌya ya Jesucristo ma.
\m \v 12 Nú na in iyo jiꞌin Saꞌya Suꞌsi ma, te koteku i ni‑kani ni‑jika. Kovaa nú ñatuu na Saꞌya Suꞌsi ma iyo jiꞌin i, masu kuu koteku i ni‑kani ni‑jika.
\s1 Jaku‑ka tnuꞌu ni kaꞌan‑soꞌo Juan ma nuu o
\rem Conclusión y consejos finales
\p \v 13 Te tée sa nuu ni ja ka kandija ni Jesucristo Saꞌya Suꞌsi ma, sukan‑vaꞌa jin konaꞌa ni ja jin koteku ni ni‑kani ni‑jika.
\p \v 14 Ka kukanu ini o Suꞌsi ma, vaa ka jini o ja nú nawa na jin kakan o sukan kúni ya ma chi ninisoꞌo ya.
\m \v 15 Te chukan kúu ja ka kukanu ini o ja Suꞌsi ma chi ninisoꞌo ya nawa ka jikan‑taꞌvi o nuu ya ma, te suni ka kukanu ini o ja jin niꞌi o nawa ka jikan o nuu ya ma.
\p \v 16 Nú na in ndeꞌya ja in ñayii ni nduu saꞌya Suꞌsi ma, yikuu i saꞌa i ja uꞌvi ma, in ja masu saꞌa ja kûu ñayii yukan ma, kákan‑taꞌvi i nuu Suꞌsi ma, te maa ya sakanu ini kuechi ñayii ma, sukan‑vaꞌa koteku i nuu ya ma. Nú in ja uꞌvi ja masu saꞌa ja skenaa i maa i ma kúu kuechi ni saꞌa i ma chi kuu jin kakan‑taꞌvi o. Kovaa iyo kuechi saꞌa ja skenaa ñayii ma maa i nuu Suꞌsi ma, te kuechi yukan masu káꞌan sa ja jin kakan‑taꞌvi ni.
\m \v 17 Ndaka ja uꞌvi ma chi in kuechi kúu, kovaa iyo kuechi ja ndasakanu ini Suꞌsi ma te ndaniꞌi taꞌvi o, te iyo kuechi ja masu ndasakanu ini ya.
\p \v 18 Ka jini o ja nú na in ni ndakâku jaa nuu Suꞌsi ma, ñatuu na ja uꞌvi saꞌa‑ka i, vaa Saꞌya Suꞌsi ma jito ñaꞌa, te tachi ma, ñatuu jan tnaꞌa ñaꞌa i.
\m \v 19 Ka jini yoꞌo ja saꞌya Suꞌsi ma ka kuu o, kovaa ni‑kaꞌnu ñuu ñayivi a, nuu ndaꞌa tachi ma iyo i.
\m \v 20 Suni ka jini o ja Saꞌya Suꞌsi ma, ni kii ya, te ni saꞌa ya ja kuu jin ndasaꞌa o kuenda nde in kúu Suꞌsi ndija ma. Te ka iyo o jiꞌin iya saꞌa ja ndaa ja ndija ma, ja kúu ya Jesucristo Saꞌya Suꞌsi ma. Iya yaꞌa kúu Suꞌsi ndija iya saꞌa ja jin koteku o ni‑kani ni‑jika.
\p \v 21 Saꞌya sa, másu ko jin tuꞌva ni nuu ja masu Suꞌsi ka kuu ma.
\p Te sukan kó kuu.