\id 1CO
\h 1 KORINTIOM
\toc1 1 KORINTIOM
\mt 1 Korintiom
\c 1
\s Paplo, bweꞌu joꞌaraa Korintoꞌ teaꞌu, Krijtota sualemmeu jiꞌojte
\p
\v 1 Inepo Paplo, Liojta junen eakaꞌ betchiꞌbo, Jesukrijtota
betana jukaꞌ nok lutuꞌuriata yeteu nok iꞌaꞌawaka ne
yeu puꞌari. Juꞌu Krijtopo itomak weri Soojtenej teamtamak
anekai.
\v 2 Inikaꞌa jiꞌosiata ne, jumeꞌe, bweꞌu joꞌara Korintoꞌ
teaꞌpo, Krijtota nau sualemmeu ne aꞌ jiꞌojte. Jumeꞌ Krijtotamak
bem nau eaꞌ betchiꞌbo Liojta yoemiam. Juꞌu Lios, wepulsi
aapoꞌik betchiꞌbo am jiapsineꞌ betchiꞌbo yeu am puꞌala.
Intok siꞌime jumeꞌ watemmeu siꞌimekut aneka, itom yoꞌowe
Jesukrijtota yoem eiyaaka, au bicha nokammeu. Iniꞌi, aapo
bempoꞌimmeu intok kia itou juniꞌi, achai yoꞌowe.
\v 3 Itom Lios achai, intok itom yoꞌowe Jesukrijtota
betana, jukaꞌ tuꞌuwata intok enchim alleeneeꞌuta, intok
yanti elwamta emeꞌe bitne.
\s Krijtota betchiꞌbo juꞌu, juꞌu tuꞌikue alleewame
\p
\v 4 Jiba ne emo betchiꞌbo Liojta baisae, Jesukrijtota
enchim sualeka, Liojta betana, jukaꞌ emou tuꞌika, jiba
yuu jiapsiwamta enchim mabetlaꞌ betchiꞌbo.
\v 5 Bweꞌituk Krijtotamak enchim eaꞌ betchiꞌbo, juꞌu
Lios, jukaꞌ siꞌimek bepa cheꞌa eiyaawatchika, aapoꞌik
betana weyemta enchim juꞌuneiyaatuala, intok siꞌimeku
enchim aꞌ teuwaneꞌ betchiꞌbo intok cheꞌa tuꞌisi enchim
aet juꞌunee betchiꞌbo, enchim ania.
\v 6 Junuen san, juꞌu Krijtota betana lutuꞌuria, emou
teuwaawaka, enchim jikkajakaꞌu, lutuꞌuriapo enchim aꞌ
sualekaꞌpo aman emot yeu maachi.
\v 7 Inien aꞌ weeꞌpo san, Liojta betana enchim mabetrika,
enchim a joaꞌuta, kaita emou beꞌee. Ket inim jiapsaka,
taewaita, Jesukrijtota aet yebijneeꞌuta boꞌo bichakai.
\v 8 Jiba enchim aet jiapseka aꞌ sualneꞌ betchiꞌbo, aapo
enchim aet aniane, taewaim enchim mikwaꞌu tajtia. Intok
junuen, kaabeta, kaita ka tuꞌikut enchim a yeu bwijneꞌ
betchiꞌbo, yoꞌowe Jesukrijtota aꞌabo notteo.
\v 9 Aapo juꞌu Lios, jiba juꞌu aꞌ teuwaarit yeu yuyyuma.
Intok jiba aapo junaꞌa, juꞌu, aꞌ uꞌusiwa, itom yoꞌowe Jesukrijtota
makꞌeaka, inim, intok chukula enchim jiapsineꞌ betchiꞌbo
enchim yeu puꞌakame.
\s Krijtota sualeme nasuk, nattepola emo naꞌikimtewame
\p
\v 10 Krijtopo nemak werim, Jesukrijtota betana lutuꞌuriakai
ne emou ujbwana, enchim emo nau tuꞌuteneꞌ betchiꞌbo intok
ka nattepola emo eiyaakai. Taa cheꞌa juni san, siꞌimeku
nau tuttuꞌikai, wepulsi weyemta nau eiyaane.
\v 11 Inikaꞌa ne emou teuwaa, Krijtopo nemak werim, bweꞌituk
jumeꞌ Kloeꞌ teamtaim betana nee etejoriawak, enchim ka
nau tuttuꞌireakaꞌpo.
\v 12 Inen ne jiubaeka inikaꞌa teuwaa oꞌoben, emo tana,
weꞌepulaim, taꞌabwisi jiaꞌu. Waate: “Paplotamak ne ea”,
ti jiame aane. Wate intok: “Apooloj teamtamak ne ea”,
ti jiia. Wate intok: “Peoꞌ teamtamak ne ea”, ti jiia.
Wate intok: “Jesukrijtotamak ne ea”, ti jiakai.
\v 13 Taa ka nattepola taꞌabwisi intok, Krijto sualwa.
Intok kia inepo Paplo juniꞌi, ka emo betchiꞌbo kuuset
popontuk. Intok emeꞌe ka nee sualeka batoꞌowaatuk.
\v 14 Nee intok, Liojta baisae, emo betana kaabeta in
batoꞌowaakaꞌ betchiꞌbo. Inimeꞌe wooim jiba, jukaꞌ Krijpoꞌ
teamta intok jukaꞌ Kaayoꞌ teamta ne jiba batoꞌowaak.
\v 15 Junueni kaabeta, nee sualeka au batoꞌowaatuk ti
jiuneꞌ betchiꞌbo.
\v 16 Ket jumeꞌ Ejteepanaj teamtaim ne ket batoꞌowaak.
Taa ne kaabemmeu intok waate, in am batoꞌowaakaꞌpo.
\v 17 Bweꞌituk kannee yee batoꞌowaaneꞌ teaka, Krijtota
betana yeteu bittuari. Taa aapoꞌik betana, bemelaka nok
lutuꞌuriata in yee majtaneꞌ betchiꞌbo. Taa ne ka ujyooi
intok suawa maisi nokie yeteu aꞌ teuwaa. Taa ala, Krijtota
jachin betchiꞌbo kuuset aꞌ mukukaꞌpo betana, juꞌunakkiachisia
ne yee aꞌ majta. Junuen, ito betchiꞌbo aꞌ yaakaꞌuta, ka
yeu tawaabaekai.
\s Krijtota betana juꞌu utteꞌawa weyeme, intok Liojta betana juꞌu suawa
\p
\v 18 Itepo, Krijtota betana, aapoꞌik kuuset popontaka
mukukaꞌuta, jukaꞌ bemela nok lutuꞌuriata yee majta. Taa
jumeꞌ ka juꞌuneaka, jiokot bem emo bitneeꞌu yajineeme
betchiꞌbo, ameu ka suasi maachi. Taa itom, jumeꞌ jinneꞌurim
betchiꞌbo, iniꞌi bemela lutuꞌuria, Liojta yee a ae aꞌ
jinneꞌuꞌpo, utteꞌata aet ayukaꞌpo te aꞌ juꞌuneiyaa.
\v 19 Taa Liojta jiꞌosia jiꞌojteimpo inien jiꞌojtei:
\q Jumeꞌ inim bwiapo, unnaa jita taꞌaame ne kaitaꞌpo am
tawaane.
\q Intok jumeꞌ cheꞌa suawakame, jitat juꞌuneame junak, nee
betchiꞌbo, kaitat juꞌuneame benane.
\p
\v 20 Intok iꞌani, juꞌu jitat juꞌuneame, oo juꞌu yee maj
majtame, oo juꞌu inim weyemta betana a yee nok tejawaame,
Liojta betana weyemta intok itou tuꞌik juꞌuneiyaꞌ betchiꞌbo,
kaitaꞌpo itom ania. Bweꞌituk inim bwiapo juꞌu suawa,
juꞌu Lios, ka aꞌ suawatukaꞌa benasi aꞌ tawaari.
\v 21 Taa juꞌu Lios, aꞌ joaꞌut juꞌuneaka aꞌ joame, jumeꞌ
inim jiapsame, ka bem suawae aman, aapoꞌik am taꞌaatuak.
Ala inen aꞌ tuꞌurek, aapoꞌik betana, juꞌu nok lutuꞌuriae,
yeteu nokwamtae, jumeꞌ aꞌ sualeme, junae a am jinneꞌuneꞌpo.
Iniꞌi nok lutuꞌuria intok, jumeꞌ watem betchiꞌbo, ka suawakamta
benasi machika juniꞌi.
\p
\v 22 Jumeꞌ juriom, iniat Liojta betana aꞌ weyeꞌpo juꞌuneebaeka,
jukaꞌ machilaata, suum watchisi machik bitbae. Jumeꞌ
intok, riekom teame, bem ama butti jita taꞌaaꞌut aꞌ juꞌuneiyaabae.
\v 23 Taa itepo, Krijtota betana jukaꞌ nok lutuꞌuriata
teuwaa saka, aapoꞌik kuuset aꞌ popontukaꞌpo betana. Jumeꞌ
juriom intok, inikaꞌa bemela nok lutuꞌuriata, ka emo aꞌ
tuꞌurituaka, kaitaꞌpom aꞌ bicha. Jumeꞌ intok ka juriom,
ka aꞌ suawakaꞌa benasi aꞌ eiyaa.
\v 24 Taa jumeꞌ Liojta yeu puꞌarim betchiꞌbo, juriomtakai
intok riekomtakai juniꞌi, Jesukrijtota sualeka, Liojta
utteꞌawata, intok Liojta suawata aet ayukaꞌpo, aꞌ teuwaa.
\v 25 Bweꞌituk juꞌu inim bwiapo yoemrata betchiꞌbo, Liojta
betana weyeme, kaita aet ayukaꞌa benasi bem eiyaaꞌuta,
junaꞌa, bem suawata bepa intok bem a jajameꞌuta bepa,
cheꞌa juniꞌi suawa ama aayuk. Juꞌu intok, ame betchiꞌbo
juꞌu Liojta betana weyeka, kaitaꞌpo yeeꞌaniaꞌa benasi
bem eiyaaꞌu, cheꞌa juniꞌi bempoꞌim a joaka, bem aet eaꞌu
bepa yee a ania.
\v 26 Krijtopo nemak werim, emeꞌe, juꞌuneepo yumaꞌi, Liojta
enchim yeu puꞌariakaꞌpo. Emo betana ka juebena oꞌoben,
jumeꞌ inim bwiapo jitat juꞌuneame, intok ka juebena, juꞌu
yoꞌotaka nesaweme oo eiyaawatchisi machim yoꞌowakame.
\v 27 Taa juꞌu Lios, junuentaka juniꞌi juꞌuneakai, jumeꞌ
inim jiapsame betana, tua kaitat juꞌuneame benasi eiyaawame,
intok jumeꞌ kaita betchiꞌbo tuttuꞌi benasi eiyaawame,
aapo yeu am puꞌari, junuen, siꞌimem jumeꞌ inim jiapsame
betana, unnaa koba suawakame benasi eiyaawame, intok jumeꞌ
yoꞌo yaꞌarim siꞌimeku emo yumaꞌaleme, Liojta bichapo
tua kaita bem teuwaaꞌut bem aꞌ juꞌuneiyaaneꞌ betchiꞌbo.
\v 28 Intok ket aapo juꞌu Lios, inim bwiapo jumeꞌ ka
eiyaawame intok kia jak waꞌam bitwame juniꞌi, yeu puꞌari,
intok junuen, jumeꞌ siꞌimem bepa eiyaawame, amau am tawaa
betchiꞌbo.
\v 29 Junuen beja, kaabeta, Liojta bichapo au jabelineꞌ
betchiꞌbo.
\v 30 Taa jiba Lios, aapo junaꞌa juꞌu, Jesukrijtota enchim
sualeka, aamak enchim eetualame. Juꞌu Krijto intok, itot
jiapsakai, Liojta betana suawata itot autuari. Intok
kaita ka tuꞌik yaꞌari benasi, tuꞌisi itom aꞌ mabettuari.
Intok wepulsi aapoꞌik betchiꞌbo itom jiapsineeꞌut itom
anialame. Intok ket itom jinneꞌukame.
\v 31 Junuen san, Liojta nok lutuꞌuriapo aꞌ jiꞌojteiꞌi
benasia: “Senu au uttiabaeꞌeteko, cheꞌa tuꞌine, yoꞌowe
Jesukrijtota uttiaꞌateko.”
\c 2
\s Krijtota kuuset popontukaꞌa betana, juꞌu lutuꞌuria yee majtawame
\p
\v 1 Taa Krijtopo nemak werim, inepo ne junakriapo, Liojta
betana jukaꞌ lutuꞌuriata, ka siꞌimem aet juꞌuneaꞌuta,
aman enchim aꞌ majtakai, kannee yuꞌin suawakamta benasi
intok ino yoꞌori teboka, emou nookak.
\v 2 Bweꞌituk junak, nee emomak aneka, juebenak nasuk,
kaita intok taꞌabwik ne emo betchiꞌbo yeu puꞌak. Taa
Jesukrijtota betana jukaꞌ wepul lutuꞌuriata jiba, intok
aapoꞌik jachin betchiꞌbo kuuset aꞌ popontukaꞌuta.
\v 3 Emou yepsakai, inepo kannee ino cheꞌewareka ne ama
emou yepsak. Intok enchim suumꞌeiyaakai, emo tana ino
majjautuakai.
\v 4 Intok Krijtota betana jukaꞌ nok lutuꞌuriata enchim
majtaka, emou aꞌ teuwaakai, kanne, senuk unnaa jitat juꞌuneaka
yee aꞌ majtaꞌa benasia emou nookak, enchim aet juꞌuneeneꞌ
betchiꞌbo. Taa ala emeꞌe, Liojta tuꞌu jiapsiwata betana
aꞌ juꞌuneiyaatuawak, intok Liojta a jita joaꞌapo aman
aniawakai.
\v 5 Junuen beja, Krijtota enchim sualeꞌu, Liojta a jita
joaꞌ betchiꞌbo enchim aꞌ sualekaꞌuta aꞌ juꞌuneiyaane.
Intok ka junuen, inim unnaa jita taꞌaame betana etejoriawakai.
\s Lios, juꞌu aꞌ tuꞌu jiapsie, yee aꞌ juꞌuneiyaatua
\p
\v 6 Taa junuentaka juniꞌi, itepo jumeꞌ jaibu tuꞌisi
Krijtota sualeme nasuk anekai, taꞌabwisi intok cheꞌa
obiachik betana te am majta. Taa iniꞌi suawa intok, ka
inim bwiapo weemta teuwaa. Intok kia inim, jumeꞌ yoꞌo
yaaꞌuchim betana juniꞌi, ka weye, jumeꞌ luꞌutineeme.
\v 7 Taa juꞌu itom yee majtaꞌu, Liojta betana, kaabeta
juꞌuneiyaaka suawa junaꞌa. Cheꞌa bat naatakai, kee aniata
juꞌunaktekai jukaꞌ Liojta intok aapoꞌik jiba juꞌuneiyaaka,
aꞌ yaꞌabaeꞌuta, junuen, jiba yuu betchiꞌbo itom jinneꞌubaekai.
\v 8 Inikaꞌa intok, jumeꞌ inim bwiapo yoꞌo yaaꞌuchim,
kaabe aꞌ juꞌuneiyaala. Bweꞌituk aꞌ juꞌuneiyaꞌateko, kaibum
kuuset aꞌ popon ean jukaꞌ siꞌimemmeu cheꞌa yoꞌorisi
machika itom achaita.
\v 9 Taa Liojta nok lutuꞌuriapo aꞌ jiꞌojteitukaꞌa benasi
weye, inien aꞌ jiaꞌapo:
\q Juꞌu Lios, jumeꞌ aapoꞌik nakeme betchiꞌbo, jukaꞌ tuꞌuwata
kaabeta jee bitlaꞌuta, intok kaabeta juꞌuneiyaaꞌuta,
\q intok kia jeela juniꞌi, kaabeta aet jiapsekaꞌuta, ammeas
aꞌ juꞌunaktelaa.
\m
\v 10 Inikaꞌa junen, aapo juꞌu Lios, aapoꞌik tuꞌu jiapsie
aman itom aꞌ juꞌuneiyaatuala. Bweꞌituk juꞌu aꞌ tuꞌu
jiapsiwa, siꞌimetat juꞌuneaka, siꞌimeta taꞌaa intok siꞌimekut
a itom mammatetua, Liojta betana jukaꞌ cheꞌa obiachik,
ka a juꞌuneiyaatumta.
\v 11 Inim jiapsame nasuk, kaabe senuk kialaꞌa eaꞌpo
aꞌ juꞌuneiyaane. Taa senu, aapo aꞌ jiapsie au juꞌuneiyaane.
Ket jiba junaeni juꞌu Liojta tuꞌu jiapsiwa jiba Liojta
betana weyemta juꞌuneiyaa.
\v 12 Taa itepo intok, ka inim jachin eewaka jiapsiwaꞌa
benasiꞌea. Taa Liojta betana jukaꞌ aꞌ tuꞌu jiapsiwa,
itot jiapsa. Junuen, jukaꞌ Liojta ito betchiꞌbo jiokot
eaka itot aꞌ autuarit juꞌunee betchiꞌbo.
\v 13 Itepo te inikaꞌa weyemta betana yee majta, Liojta
tuꞌu jiapsita itom aet juꞌuneetuaꞌpo amani. Intok ka
itom jita taꞌaꞌ betchiꞌbo, aꞌ taꞌaalamtakai te enchim
aꞌ majta. Junuen itepo, jumeꞌ Liojta tuꞌu jiapsita amet
jiapsaꞌummeu, Liojta betana itom juꞌuneiyaaꞌuta te ameu
aꞌ teuwaa.
\p
\v 14 Juꞌu Krijtota betana tuꞌu jiapsita ka aet aneme,
Liojta betana aꞌ tuꞌu jiapsie juꞌuneiyaawamta ka a aet
junꞌuneene. Bweꞌituk iniꞌi, aapoꞌik betchiꞌbo, kaita suawata
aet ayukaꞌa benasi maachi. Intok ka a amet juꞌuneene.
Bweꞌituk inien weyeme, Liojta tuꞌu jiapsi jiba, a yee
aet juꞌuneetua.
\v 15 Taa juꞌu, Liojta tuꞌu jiapsi aapoꞌikut aneꞌu, iniꞌi,
inim bwiapo weyemtat intok Liojta betana weyemtat juniꞌi
a juꞌunea. Juꞌu intok inim ka Krijtota sualeme, inia
betana ka a juꞌuneakai, ka junae mak eene.
\v 16 Bweꞌituk Liojta nok lutuꞌuriapo inen jiꞌojtei:
“Kaibu jabe, yoꞌowe Jesukrijtota eeri a juꞌuneiyaa.
Kaibu jabe a jitat aꞌ tejwaa.” Junuentaka juniꞌi, itepo,
jumeꞌ Krijtota sualeme, aapoꞌik betana jukaꞌ aꞌ eiyaaꞌuta
tee aꞌ juꞌuneiyaatuawa.
\c 3
\s Jumeꞌ nau tekilta joaka, Liojta tekil boꞌo jooriame
\p
\v 1 Junuen san, inepo, Krijtopo nemak werim, junakriapo,
enchim majtakai, kanne, jaibu Krijtota tuꞌu jiapsita emot
anekaꞌa benasia emou nookak. Taa kia tokti inim weyemtat
jiba enchim jiapsekaꞌa benasia. Taa cheꞌa, Krijtota betana
weyemtat juꞌubwa enchim aet juꞌunee taiteꞌpo benasia.
\v 2 Ka obiachisi enchim aet juꞌuneeneeꞌuta ne enchim
majtak, ili usita, ketun cheꞌemta, kawammea aꞌ jiapsaꞌa
benasia, intok kee bwaꞌamta aꞌ bwaꞌeꞌe benasia. Bweꞌituk
emeꞌe, Liojta betana jukaꞌ lutuꞌuriata, cheꞌa obiachikut
ka a juꞌunean. Iꞌan tajtia kateꞌem au joiwala.
\v 3 Bweꞌituk emeꞌe ketunia tokti inim jiapsiwaꞌa benasi
jiapsa. Emo nasuk ketun ka enchim emo bibitpeaka enchim
emo bejeꞌeeꞌu intok nattepola emeꞌe emo eiyaakai, emeꞌe
ketuni inim jiapsiwaꞌa benasia, ka ammaꞌali jiapsa.
\v 4 Bweꞌituk seenu, inepone Paplotamak ne ea ti jiaꞌateko,
senu intok, Apoolojtamak ne ea ti jiaꞌateko, watem tua
ka ammaꞌali inim aneme jiapsaꞌa benasi em emo ujuꞌu.
\p
\v 5 Bweꞌituk inepo Paplo intok Apooloj teame juniꞌi,
ka itou chaꞌaka enchim itom yoemꞌeiyaaneeꞌu. Itepo kia
beja te wepulsi, Liojta betana tekilta jooa. Bweꞌituk
emeꞌe intok, ito betchiꞌbo Jesukrijtota sualek. Itepo
intok, weꞌepulaka, tekilta, itom yoꞌowe Jesukrijtota betana
itom mabetri te yaꞌari.
\v 6 Inepo cheꞌa bat, Krijtota nok lutuꞌuriawata ne emou
teuwaaka, enchim aꞌ majtak. Chukula intok juꞌu Apooloj
teame emou yepsaka, watek enchim majtaka, junae utteꞌata
emot autuak. Taa juꞌu Lios junaꞌa, juꞌu enchim aꞌ sualeka
enchim aet juꞌuneeneꞌ betchiꞌbo enchim aet aniakame.
\v 7 Junuen san beja, juꞌu tua bat, Krijtota betana enchim
majtakame, intok kia juꞌu chukula emou nokakame juniꞌi,
ka itou chaꞌaka, itot enchim eeneeꞌu. Taa Lios, juꞌu enchim
jinneꞌukame junaꞌa. Bweꞌituk aapo utteꞌata emot autuari.
\v 8 Jumeꞌ cheꞌa bat, Krijtota betana yee majtame intok
kia jumeꞌ chukula kateka, emou aꞌ teuwaame juniꞌi, Liojta
bichapo nanancha bitwa. Lios aapo, weꞌepulaimmeu bem
tekilet ameu aꞌ lutuꞌuriatukaꞌpo aman, aet am mabetneeka
juniꞌi.
\v 9 Bweꞌituk itepo, Liojta betana jukaꞌ tekilta te nau
aꞌ boꞌo jooria. Wajta, Apooloj teamtamak itom nau tekipanoaꞌa
benasia machikai. Juꞌu Lios intok, jukaꞌ wajta atteakame
benasi machikai.
\p Oo ket, emeꞌe, Liojta karita, aꞌ joaꞌa benasi maachi.
\v 10 Ineponee intok, Liojta betana nakwaka, in au yeu
puꞌawakaꞌpo amani, senuk, tua tuꞌisi a kaatemta benaka,
ne bat emou yepsaka, kari nawata benaka, Krijtota betana
jukaꞌ cheꞌa bat weyemta ne enchim aꞌ majtatuawak. Chukula
intok, juchi senuk, bichau bicha cheꞌa yumaꞌisia enchim
majtaka enchim aet yoꞌoturia. Taa jumeꞌ chukula enchim
majtaneeme, aet suaka, ka taꞌabwisi intok enchim aꞌ majtane.
\v 11 Bweꞌituk inim, jukaꞌ bat weyeka siꞌimeta aet naateꞌuta,
jukaꞌ cheꞌa bat jaibu enchim majtasuakaꞌuta, chukula
kaabe taꞌabwisi intok yee aꞌ majtane. Iniꞌi naateme,
jiba aapo juꞌu Jesukrijto junaꞌatakai.
\v 12 Taa seenu, bichau bicha cheꞌa yumaꞌisia enchim
aet utteꞌata autuaneeme, jiba benasi, tuꞌisi ama waꞌam
aꞌ tekipanoa, oo kia jaana, jak waꞌam juniꞌi aꞌ tekipanoa.
Senuk, kaata chupaꞌabaeka, tuꞌikue, bejeꞌemtae, oo kia jaana
machikue aꞌ chupaꞌa benasia.
\v 13 Bweꞌituk taewait, Liojta yee aet yaꞌuraa bittuaneeꞌuta
yumako, weꞌepulaka, jukaꞌ Krijtota betchiꞌbo bem yaakaꞌut
juꞌuneiyaanaa. Junaꞌa taewai intok, tajiu a tamachiatu.
Junamaꞌa intok, weꞌepulaka, jukaꞌ bem yaꞌari, tuꞌika oo
ka tuꞌika, ama yeu machine.
\v 14 Juꞌu intok, aꞌ yaꞌari betana tuꞌisi ama yeu sikame,
jukaꞌ ae betchiꞌbo, cheꞌa naa buustia, jukaꞌ tuꞌik aꞌ
bitneeꞌuta au naꞌikiatune.
\v 15 Taa senu intok, juꞌu aꞌ yaakaꞌut, ka tuꞌisi ama
yeu siiko, jukaꞌ tekilta, kia beja tua aꞌ yaꞌane. Aapo
intok, jinneꞌutuneeka juniꞌi, taa senuk, junamaꞌa beeteꞌpo
kaitamak au aꞌ jinneꞌukaꞌa benasia.
\p
\v 16 Emeꞌe inien au waateꞌpo yumaꞌi, Krijtota enchim
sualeꞌ betchiꞌbo, Liojta emot jiapsaꞌpo, intok aapoꞌik
enchim teꞌopokaꞌa benasi enchim aꞌ eiyaaꞌpo.
\v 17 Senu intok, Liojta bichapo junaen machika, juꞌu
ka tuꞌikut au kobeko, juꞌu Lios, aapoꞌik aꞌ luꞌutineeꞌuta
iniau chupaꞌane. Bweꞌituk aapo juꞌu Lios, jukaꞌ teꞌopowata
yee aꞌ yoꞌori iꞌa, intok jiba emeꞌe junameꞌem, Liojta
teꞌopom benasi aꞌ bichaꞌum.
\p
\v 18 Kaabe inim juꞌu ayukamtat au bai tattaꞌane. Emo
nasuk seenu, inim bwiapo weyemta betana au suawaileꞌeteko,
junaꞌa, kaita aꞌ taꞌaꞌa benasia au eiyaane. Junuen lutuꞌuriapo
Liojta bichapo aapoꞌik tua suawakamtaꞌa benasi aꞌ eiyaanaꞌ
betchiꞌbo.
\v 19 Bweꞌituk inim bwiapo juꞌu suawa, Liojta betchiꞌbo
kaita teuwaa. Jum Liojta nok lutuꞌuriapo inen jiꞌojtei:
\q Juꞌu Lios, aapo, jumeꞌ junuen emo suawareka, bem yee ae
bai taꞌaabaeꞌue, bempoꞌim aet emo kokoptua.
\m
\v 20 Inen ket jiꞌojtei:
\q Juꞌu achai Lios, jumeꞌ suawakame eaꞌut juꞌunea, junakaꞌa
aꞌ kaita betchiꞌbo tukaꞌpo.
\m
\v 21 Junuen san, kaabe, senuk ale benasi yoemta yoemꞌeiyaaka,
ae tana au uttiabaane. Bweꞌituk siꞌime Liojta betana
weyeme, emou tuꞌineeka weye.
\v 22 Kia inepo Paplo juniꞌi, intok kia Apoolos juniꞌi,
intok kia Peeotaka juniꞌi, ite, enchim ania betchiꞌbo
jiapsa. Intok kia iniꞌi ania juniꞌi, intok kia juꞌu jiapsiwame
intok kia juꞌu kokkowame juniꞌi, intok kia iꞌan lautipo
ayukame intok chukula aꞌabo weyeme juniꞌi, siꞌime iniꞌi,
emou tuꞌineeka weye.
\v 23 Ite ka emou yoꞌowe. Ala, emeꞌe, Krijtota yoꞌowak.
Juꞌu Krijto intok, Liojta yoꞌowak.
\c 4
\s Jumeꞌ Krijtota yeu puꞌarim tekil joaꞌu
\p
\v 1 Junuen san beja, emeꞌe, kaachin intok, taa kia beja
Krijtota betana itom sawaꞌa benasi jiba itom eiyaane.
Liojta betana weyeka, kaabem juꞌuneiyaaꞌuta, yee aꞌ majta
betchiꞌbo itom aꞌ tekil makrimtukaꞌa benasia.
\v 2 Junuen san, juꞌu Liojta betana tekilta boꞌo jooriame
aꞌ yoemꞌeiyaanaaꞌuta au juꞌuneiyaa tebone.
\v 3 Taa ne intok, ne tana, kaachin ne tua ino eetua jachin
enchim nee bichaꞌpo, oo inim yaꞌuraapo temaituneeka juniꞌi.
Bweꞌituk inepotaka juniꞌi, kaitat nee ino juꞌuneiyaa.
\v 4 Nejponee intok, Liojta bichapo kaita ka tuꞌik nee
ino yaꞌa juꞌuneiyaa. Taa junuentaka juniꞌi, ne ka witti
nooka, tua kaita net aukaꞌa benasia. Taa itom yoꞌowe
Jesukrijto junaꞌa juꞌu nee yaꞌuraa bittuaka, tuꞌisi oo
ka tuꞌikut nee juꞌuneiyaaneeme.
\v 5 Junuen san emeꞌe, ka cheꞌa bat naataka eaka juꞌu
inien weyemtat, jachin aꞌ weyeꞌut juꞌuneebaane. Ala jukaꞌ
yoꞌowe Jesukrijtota emeꞌe yebij boꞌo bitne, jukaꞌa, etbwa
ka juꞌunakkiachisi machik yaꞌarita, machisi yeu aꞌ bwijnemta.
Aapo juꞌu yoꞌowe Jesukrijto intok junak, weꞌepulaim, jitaa
betchiꞌbo intok jachin eaka, aapoꞌik betchiꞌbo bem jiapsaꞌuta
aꞌ juꞌuneiyaa tebone. Intok junako juꞌu Lios, weꞌepulaimmeu,
ameu aꞌ lutuꞌuriatukaꞌpo aman, uttiawaka bem eiyaanaaꞌuta
ameu aꞌ naꞌikiane.
\p
\v 6 Krijtopo nemak werim, inika weemta ne emou etejo,
emo betana tuꞌik waatakai, Apooloj teamta intok kia inepo
ino emou teuwaakai inikaꞌa nee teuwaa. Junuen, ito betana
weyemta mammateka, ka taꞌabwisi intok, taa tua junuen
aꞌ jiꞌojteitukaꞌpo aman jiba aꞌ joaka, kaabeta, senuk
cheꞌa weyeka, senuk intok kia jak waꞌam aꞌ bitbaaneꞌ
betchiꞌbo.
\v 7 Bweꞌituk, empo jukaꞌ suawata intok watek et ayukaꞌuta,
jabesa et aꞌ autuari. Ka empo emo aꞌ maki, taa juꞌu Lios,
juꞌu enchi juꞌunaktei junaꞌa. Taa siꞌimeta et ayukaꞌuta,
Liojta betana ee aꞌ mabetri. Junuentukaꞌateko intok,
Liojta betana aꞌ mabetlatakai, intok jaisaakai empo ae
emo uttia, jukaꞌ em mabetri empo emot aꞌ autuariꞌi benasia.
\p
\v 8 Emeꞌe jaibu kaita emou beꞌeeka, kaitaꞌpo enchim
jiokot eaꞌa benasia aane. Emeꞌe jaibu emeꞌemo saweme
benasia, itom intok em yeu tawaalam. Tua tuꞌi ean lutuꞌuriapo
emeꞌe a emo saweꞌeteko, intok inikaꞌa junuen, enchim a
emo saweeꞌuta, alleaka emomak itom aꞌ bitneꞌ betchiꞌbo.
\v 9 Bweꞌituk inepo, jukaꞌ Liojta aapoꞌik, iitom jumeꞌ
Krijtota betana inim yeteu naas bittuarim, siꞌimem bepa
cheꞌa juniꞌi ka eiyaawame benasi itom tawaari ti ne
ea. Itepo tee, watem bem suꞌatuneꞌ betchiꞌbo yeu puꞌarim
bebena. Jiba itepo tee, jumeꞌ inim bwiapo jiapsame betana
intok kia jumeꞌ ankelesim betana juniꞌi, ame bichapo
suumwatchisia bem bitchuneeꞌum benasi machikai.
\v 10 Itepo, Jesukrijtota betchiꞌbo tee ka susuakame
benasi eiyaawa. Enchim intok Krijtota betana weyemtat
tua junama waꞌam enchim emo aꞌ taꞌaaleꞌ nasuku juniꞌi.
Itepo te kaita betchiꞌbo tuttuꞌi benasi eiyaawa. Taa
enchim intok siꞌimek betchiꞌbo tuttuꞌi benasi eiyaawaꞌpo.
Itepo intok, kia te jak waꞌam bitwaa, enchim intok yoꞌoriwaꞌpo.
\v 11 Iꞌan tajti te jiokot ito bicha. Jamak ka jiꞌibwaka,
intok ka baꞌa jeꞌee. Intok te kia ka tajoꞌorisuk, kia
te jiokot te joowa. Katte joꞌaak.
\v 12 Intok ito ania betchiꞌbo, itom maammea te lot lotteka
tekipanoa. Jaana te jijiawaawa. Taa itepo intok te tuꞌik
itom ametana waataꞌuta ameu teuwaa. Itou im suua, taa
itepo intok kia beja te aꞌ ineꞌa.
\v 13 Ka tuꞌisi itot nokwa, taa tee ka jain eaka, am sua
tejwaa. Tokti betchiꞌbo tee jak juniꞌi ka bibitpeewa
jita jaibu ka tuꞌireakaꞌa benasi eiyaawakai iꞌan tajtia.
\p
\v 14 Kannee tiusi enchim beꞌeꞌ betchiꞌbo nee inien
emou jiꞌojte. Taa cheꞌa, enchim sua tejwaabaekai, in yoemiam,
tuꞌisi in nakeꞌum benasi enchim eiyaaki.
\v 15 Bweꞌituk, ama butti juebenaka Krijtota betana jumeꞌ
enchim majtame aneo juniꞌi, taa ka juebena jumeꞌ emou
yoꞌowe. Ineponee ala junaꞌa, juꞌu enchim yoꞌowa. Nee
betchiꞌbo Jesukrijtota enchim sualeka intok aapoꞌik
betana jukaꞌ bemela nok lutuꞌuriata in enchim majtakaꞌue.
\v 16 Junuen san ne emou ujbwana, in jiapsakaꞌa benasia,
enchim neu aꞌ suawaꞌuka, junaen enchim jiapsineꞌ betchiꞌbo.
\v 17 Inia betchiꞌbo san ne Timoteoꞌ teamta ne emou
bittuala, jukaꞌ Krijtota in sualeꞌe betchiꞌbo, in yoemia
tuꞌisi in nakeꞌuta. Juꞌu Krijtota betana tekilet jiapsekame.
Aapo intok juchi enchim aet tejwaane, Krijtota in sualeꞌpo
amani, jachin in jiapsaꞌpo betana, intok siꞌimekut, jumeꞌ
Krijtota sualeme in am majtaꞌapo.
\v 18 Emo betana waate, bem jikat emo eiyaaꞌu amet aayuk,
nee aman enchim majjaeka, ka intok nee emou noitineꞌetiꞌeakai.
\v 19 Taa ne lauti emou noitibaekaꞌea, itom yoꞌowe Jesukrijtota
junen eao. Junak beja ne amet juꞌuneene, inimeꞌe jikat
emo eiyaakammetchi, lutuꞌuriapo, Liojta betana tuꞌik a
bem joaꞌuta, oo kia beja tua ka lutuꞌuriapo bem teuwaaꞌuta.
\v 20 Bweꞌituk Liojta betana weyeka yee aꞌ jinneꞌuꞌu,
ka kia etejorie, taa Liojta a jita joaꞌapo aman, aꞌ joaꞌue
weye.
\v 21 Enchim mampo aayuk. Ne aman emou yepsaka intok
enchim emo tuꞌuteneꞌ betchiꞌbo, emeꞌe kuttipo ka nee
enchim sua tejwaa iꞌaꞌateko, iꞌan lautipo em emo tuꞌutine.
Junak intok, nee aman yepsaka enchim nakeka tuꞌu nokie
jiba emou nokne.
\c 5
\s Senuk ama butti ka tuꞌisi ayukamtat nau etejowaꞌpo
\p
\v 1 Emo nasuku seenu, aꞌ waimꞌaemak jiapsaꞌ teaka juꞌuneiyaawa.
Iniꞌi intok, kia ilitchisi juniꞌi ka tuꞌi. Intok kia
jumeꞌ ka Liojta taꞌaame nasuk juniꞌi ka joowa.
\v 2 Intok ketun naa buustia enchim emo cheꞌewareꞌu
emot aayuk. Junae betchiꞌbo emeꞌe siokꞌeaka su. Juꞌu
intok inile benak ka tuꞌik yaakame, ka intok emo nasuk
tuꞌurinaa.
\v 3 Bweꞌituk ineponee ka emomak aane, taa nee emomak
in aneꞌe benasi aman jiapsek. Intok junueni, junakaꞌa,
jukaꞌ ka tuꞌik yaakamta, au aꞌ chupneeꞌuta, jaibu ne au
yeu aꞌ puꞌari, emomak anemta benasi.
\v 4 Emoꞌem nau tojine, itom yoꞌowe Jesukrijtota betana
nau wepul lutuꞌuriakai. Inepo intok, nee in emomak aneꞌe
benasi aman jiapsine. Itom yoꞌowe Jesukrijto intok ket
emomaktuka, enchim aet aniane.
\v 5 Intok junueni, junaꞌa oꞌou, bebejeꞌeritau suꞌu tojitune.
Junuen beja aꞌ takaawapo jiokot au aꞌ chupuka aꞌ luꞌutineꞌ
betchiꞌbo. Taa ket junueni, yoꞌowe Jesukrijtota notteo,
aꞌ jiapsiwata jinneꞌutuneꞌ betchiꞌbo.
\p
\v 6 Emeꞌe juꞌu inile benasi ka tuꞌik yeu sikamta betana
emo jabeleka, ka ammaꞌali aane. Emeꞌe tuꞌisi juꞌunea,
jukaꞌ ka tuꞌisi ayukamta, kia beja aꞌ bichaꞌateko, siꞌimem
nayyotenee: “Reberuata ilitchik juniꞌi, siꞌime kittimet
aꞌ kikkimuꞌu benasia.”
\v 7 Bat naatakai, ka tuꞌisi enchim jiapsaꞌuta, jukaꞌ
siꞌimem nayyotenemta koptane. Intok junuen, Liojta bichapo
kaita ka tuꞌik yaꞌarika enchim bitnaꞌ betchiꞌbo, lutuꞌuriapo
enchim jaibu jinneꞌurimtukaꞌ betchiꞌbo. Bweꞌituk jiba
Krijto, aapo ito betchiꞌbo ket meꞌetuk. Junuen aapo bat
naataka jumeꞌ bwalam pajko taewait am susuꞌawaꞌa benasia,
iꞌan ito betchiꞌbo yaꞌatuk.
\v 8 Junuen san itepo, tua junen jiaka intok lutuꞌuriapo,
Krijtota itom sualeꞌuta, alleaka intok aet jiapseka aꞌ
boꞌo jooriane. Jumeꞌ paanim, ka reberuakame, bat naataka,
juriom jiba bem aꞌ sualeka bem bwaꞌeeꞌum benasia machikai.
Katte intok jukaꞌ ka tuꞌik joaka jiapsine. Intok jukaꞌ
tokti betchiꞌbo tiusi ka tuꞌik koptakai, bat naataka
juꞌu reberuatau tammachiaka teuwaawamta.
\p
\v 9 Jiꞌosiata bat naataka in emou aꞌ jiꞌojtekaꞌpo ne
enchim etejoriak, jumeꞌ ka bem jubimmak emo tuꞌuremmak
ka enchim eesaekai.
\v 10 Taa ne ka jumeꞌ inim ka Krijtota sualeka inen
jiapsame betana inikaꞌa inien emou aꞌ teuwaa. Oo jumeꞌ
tokti betchiꞌbo ka tuꞌisi jiapsame betana, oo jumeꞌe,
jain juniꞌi jita waatame betana, oo jita eꞌetbwame betana,
oo jumeꞌ taꞌabwi liosim, maammea yaꞌarim yoꞌoreme betana
nee ka inimeꞌe betana nooka. Bweꞌituk inimeꞌe ka bibitpeaꞌateko,
emeꞌe ka im bwiapo amemak jiapsi ean.
\v 11 Juꞌu in enchim juꞌuneiyaa iꞌaka in teuwaakaꞌu,
iniꞌi junaꞌa, juꞌu Krijtopo itomak au weriꞌiti jiaka,
taa ket tokti betchiꞌbo ka tuꞌisi jiapsamta make ka
aamak emo tuꞌuribaane. Oo juꞌu, jain juniꞌi jita waatamtamake
oo juꞌu taꞌabwi liosim yoꞌoremtamake, oo ka lutuꞌuriata
juniꞌi yete tana eꞌetejomtamake, oo naamumukemtamake.
Oo jitat suuammake, ka enchim aamak eeneꞌ betchiꞌbo, ka
aamak jiꞌibwabaanee juniꞌi.
\v 12,13 Bweꞌituk inepo, kannee a bem ka tuꞌisi tawaaneeꞌuta
ameu tammachia, jumeꞌ ka Krijtopo itomak werim. Taa aapo
juꞌu Lios junaꞌa juꞌu am yaꞌuraa bittuaneeme, bem tuꞌisi,
oo ka tuꞌisi tawaaneꞌe betchiꞌbo. Taa emeꞌe, Krijtopo
emomak werimmeu lutuꞌuriak, enchim, juꞌu ka tuꞌik betana
am tejwaaneꞌpo. Junuen san, jukaꞌ junaen ka tuꞌisi aulamta,
ka intok emo mak aꞌ tuꞌureka yeu aꞌ jiokoine.
\c 6
\s Ka Krijtota sualeka, yee nau tutuꞌuteme bichapo jitat nau nok nassuawaꞌpo
\p
\v 1 Emo nasuku seenuk, jitat aꞌ naꞌatejobaeꞌeteko, kaachin
a jumeꞌ ka itomak Krijtota sualeka, yee nau tutuꞌutemmeu
nokne. Ito benasi Liojta yoemiammeu nokꞌeaka su.
\v 2 Emeꞌe juꞌuneene, jumeꞌ Liojta yoemiam, inim jumeꞌ
ka Liojta sualemmeu, chukula enchim ameu japteneꞌpo.
Intok emeꞌe junuen, jukaꞌ yoemratau japteneꞌeteko, jaisaakai
emeꞌe inien weyeka, ka jaikiku ka yuuma.
\v 3 Intok kia jiba junaen, jumeꞌ ankelesimmeu juniꞌi,
itom ameu japteneꞌpo ket juꞌuneene. Junuentukaꞌateko,
juꞌu, inim itou aukame, cheꞌa juniꞌi itou chaꞌaka.
\v 4 Emeꞌe intok junuen, inim weyeka, ka enchim nau eaꞌuta
emou aukamta tuꞌutebaeꞌeteko, emeꞌe, jumeꞌ ka au lutuꞌuriaka
ka Krijtota sualeka emo nasuk, kaita tekiakammeu, kaachin
emeꞌe nau emo tuꞌutebaekaꞌeene.
\v 5 Inikaꞌa ala nee enchim tiunee betchiꞌbo nee aꞌ
teuwaa. Jaisa wepuꞌulaka juniꞌi kaabe jaꞌani, emo nasuk
au yumame, jumeꞌ Krijtopo aamak werim nasuk ayukamta
aꞌ tuꞌuteneeme.
\v 6 Taa emeꞌe, Krijtopo nau wewerika juniꞌi, ka nau tuttuꞌika,
emo naꞌatejo, intok inikaꞌa jooa, jumeꞌ ka Krijtota sualeka,
yee nau tutuꞌuteme bichapo.
\p
\v 7 Junuen san, juꞌu enchim junuen nau aneꞌu, tokti enchim
emo kokobeꞌu ama aayuk. Emo betchiꞌbo cheꞌa tuꞌisi yeu
weama, siꞌimeta jukaꞌ ka tuꞌika emou weyemta, kia beja
tua enchim aꞌ ineꞌao. Intok junuen, jita etbwariawaka
juniꞌi, ka montekai.
\v 8 Taa emeꞌe junuen anꞌeaka su, ala emeꞌe, ka tuꞌik
boꞌo jooria, intok jita eꞌetbwa, intok kia Krijtopo emomak
am weriak juniꞌi jita am eꞌetbwaria.
\p
\v 9 Emeꞌe em jaibu juꞌunea, jumeꞌ siꞌime inien ka tuꞌik
boꞌo jooriame, Liojtamak ka bem lutuꞌurianeꞌpo. Kateꞌem
aet jijiꞌobe. Bweꞌituk jumeꞌe, ka bem jubimmak juniꞌi
emo tuꞌureme, intok jumeꞌ ka tua liosim juniꞌi yoꞌoreme,
intok jumeꞌ jujubeka juniꞌi, tattaꞌabwi jaamuchimmak
emo tuꞌureme, intok jumeꞌ oꞌowimtaka juniꞌi, jaamuchim
benasi emo tammachiame,
\v 10 intok kia jumeꞌ jita eꞌetbwame, intok jumeꞌ jain
juniꞌi jita atteapeame, intok jumeꞌ nanaakome, intok jumeꞌ
ka lutuꞌuriata juniꞌi yetet nonokame, intok kia jumeꞌ
yee bai tattaꞌaaka jita yeteu waatame, inimeꞌe siꞌime
inien benak ka tuꞌik boꞌo jooriame, Liojta yaꞌuraata
intok aꞌ ujyoriata ka aamak aꞌ bitne.
\v 11 Emo betana waate inien mamachiakan. Taa iꞌan junameꞌe
jaibu junae ka tuꞌik betana jiokoirimtaka, bemelasi, wepulsi
Liojtat jiba jiapseka intok aapoꞌik bichapo tuꞌisi mabetrim,
yoꞌowe Jesukrijtota junuen enchim aꞌ tuꞌu yaꞌariakaꞌ
betchiꞌbo. Intok junaen, jukaꞌ Liojta tuꞌu jiapsitau
suꞌu tojilamtakai.
\s Senuk aꞌ takaae, tuꞌik jiba aꞌ joaꞌu
\p
\v 12 Lutuꞌuria ala juꞌu inien jiuwame: “Senuk jita
juniꞌi aꞌ yaaꞌpo.” Taa ka siꞌime tuꞌisi yeteu yeu weama.
Lutuꞌuria junuen aꞌ weyeꞌpo, taa kaabe, jita juniꞌi joaka,
junau au suꞌu tojibaekaꞌeene.
\v 13 Inen jiuwame ket lutuꞌuria, jukaꞌ iꞌan lautipo
ayukamta, ka aꞌ jiba yuu betchiꞌbotuneꞌpo. Bweꞌituk itom
takaa, jiapsi betchiꞌbo bwaꞌawamta waata. Taa juꞌu Lios
inimeꞌe wooi weemtau, taewaita yeu puꞌari am luꞌutineeꞌuta.
Taa tua ka lutuꞌuria, seenuk naa buustia intok aꞌ jaamuchianeeꞌuta
aꞌ tuꞌireakaꞌpo. Taa ala, yoꞌowe Jesukrijtota betchiꞌbo
juꞌunaktewak. Aapo juꞌu yoꞌowe Jesukrijto intok junaꞌa
juꞌu itou yoꞌowe.
\v 14 Intok jiba junaeni, Liojta, yoꞌowe Jesukrijtota,
kokkoarim nasuk aꞌ jiabijtetuakaꞌa benasia, itom ketchia,
aapoꞌik a jita joaꞌapo aman, kokkoarim nasuk itom jiabijtetuane.
\p
\v 15 Juꞌuneenee emeꞌe, enchim weꞌepulaim Krijtotamak
enchim nau eaꞌ betchiꞌbo, aapoꞌik aꞌ takaawa benasi enchim
machiakaꞌpo. Jaisa tuꞌi machi jaꞌani, inepo, Krijtota
mak junuen jiapsaka, intok ka tuꞌi jaamuchimmak in ino
tuꞌureꞌpo. Kaachin junuentune.
\v 16 Juꞌuneenee emeꞌe, senuk oꞌouta, ka tuꞌi jamuttamak
au tuꞌuremta, Liojta bichapo junae jamuttamak wepuꞌulai
benasi bittaka tawane. Bweꞌituk Liojta nok lutuꞌuriapo
inen jiꞌojtei: “Woika juniꞌi, jumeꞌ emo jujubeme, Liojta
bichapo wepuꞌulai benasi tawane.”
\v 17 Taa senu yoꞌowe Jesukrijtotamak eaka aꞌ mabetlatuko,
junaꞌa Krijtotamak nau, Liojta bichapo, aamak wepulsi
bitnaa.
\p
\v 18 Junuen san inile benaka taꞌabwi jaamuchimmak enchim
ka emo tuꞌurineeꞌut, tuꞌisi em emo aet suuane. Juꞌu waate
ka tuꞌik senuk yaꞌaneeꞌu, ka junuen aꞌ takaawata ka tuꞌik
yaꞌane. Taa juꞌu taꞌabwi jaamuchimmak au tuꞌureme, aꞌ
takaawata ka tuꞌisi tatawa.
\v 19 Juꞌuneenee emeꞌe, Liojta betana jukaꞌ aꞌ tuꞌu jiapsiwata
emot aꞌ jiapsaꞌpo, intok ae betchiꞌbo, aapoꞌik teꞌopota
benasi enchim machiakaꞌpo, intok junuen emot aꞌ jiapsaꞌpo,
kateꞌem emeꞌe emo ujuꞌu.
\v 20 Bweꞌituk juꞌu Lios, enchim jinneꞌubaeka, ama butti
buꞌuuk emo betchiꞌbo yaak. Aꞌ uꞌusiwata meꞌetuneꞌ betchiꞌbo
aꞌ suꞌu tojakai. Junuen san, emeꞌe, juꞌu enchim jiapsaꞌue,
intok tuꞌik enchim boꞌo jooriaꞌue, Liojta yoꞌoritebone.
Bweꞌituk enchim taka intok juꞌu jiapsi, Liojta betana
attearim.
\c 7
\s Jujupwamtat yee nok tejwaame
\p
\v 1 Iꞌan intoko, enchim juꞌuneiyaabaeka, nattemaeka neu
jiꞌojtekaꞌuta betana ne emou aꞌ teuwaaka, ne emou jiꞌojte.
Lutuꞌuria ala, juꞌu oꞌouta, kee jubeka, jamuttat kia juniꞌi
aet mamte betchiꞌbo, tua ka tuꞌi.
\v 2 Taa inim juꞌu ka emo jujubeka, nau emo tuꞌuriwamta
aukaꞌ betchiꞌbo, intok junakaꞌa luꞌutineꞌ betchiꞌbo tuꞌine,
oꞌowim, weꞌepulaka jujubeꞌpo. Intok jaamuchim weꞌepulaka
kukunaꞌpo.
\v 3 Intok junuen san, juꞌu kunawai, aꞌ jubimak, siꞌimeku
tuꞌisi intok yumaꞌisia aamak jiapsaka, kaitaꞌpo aꞌ sioktuane.
Intok ketchia, juꞌu jubiari, jiba junaen aꞌ kunamak jiapsine.
\v 4 Juꞌu jubiwai, ka aapo au atteak taa juꞌu kunawai.
Intok ketchia jiba junaeni, juꞌu kunawai, ka aapo au atteak,
taa juꞌu jubiwai. Bempo nanancha emo atteak.
\v 5 Junae betchiꞌbo emeꞌe, ka emo koptabaekaꞌeene. Taa
ala emo tejwaarika, junuen nau eaꞌateko, chuubaa ka enchim
emo bitneꞌpo nau juꞌuneiyaꞌateko jiba, wepulsi Liojta
yoꞌoribaeka, au bicha nokbaeꞌeteko, junuen anne. Taa iniat
chukula, juchi em nau nottine. Jiꞌobek, junak emeꞌe nattepola
ka a emo ujuꞌukai, juꞌu bebejeꞌeri, ka tuꞌik enchim yaꞌatuane.
\p
\v 6 Siꞌimeta inikaꞌa inepo betana nee enchim tejwaaka
emou nooka, taa ka junuen Krijtota betana enchim aet
sawakai.
\v 7 Nejpo ala, kia siꞌimem juniꞌi, nele benasi am jiapsituapea.
Taa juꞌu Lios, nattepola, weꞌepulaim, tattaꞌabwisi ameu
aꞌ chupaꞌi, jukaꞌ bem jooneeꞌuta intok bem jiapsineeꞌuta.
\p
\v 8 Jumeꞌ ka jujubekammeu intok jumeꞌ jamut jokoptuimmeu,
inen ne ameu jiia, cheꞌa ameu aꞌ tuꞌineꞌpo, ka juchi bem
jujupneꞌpo, nele benasia.
\v 9 Taa ka jubeka, junuen ka a jiapsaꞌateko, emo jujuptuanee
oo emo kukunatuane. Bweꞌituk cheꞌa tuꞌine, jujubeko intok
kukunako, intok ka junuen, senuk ka jubekai aet ka tuꞌisi
tawane.
\p
\v 10 Taa ne, jumeꞌ Krijtota sualeka, jaibu jujubekame,
jukaꞌ jubiwai, aꞌ kuna ka aꞌ jimaaneꞌ betchiꞌbo ne junuen
am nok tejwaa. Iniꞌi in enchim yaꞌasaeka tejwaaꞌu, lutula
weeꞌpo inepo ka aꞌ teuwaala, taa juꞌu itom yoꞌowe Jesukrijto
junuen aꞌ teuwaala.
\v 11 Taa juꞌu jubiwai, aꞌ kuna jimmaako, aapo ka intok
kunabaekaꞌeene. Oo juchi aꞌ kunamak nauꞌeaka au tuꞌutene.
Intok jiba junaeni, juꞌu kunawai, ka aꞌ jubi jimmaabaekaꞌeene.
\p
\v 12 Jumeꞌ watemmeu inepo betana nee inikaꞌa teuwaa,
intok ka Jesukrijtota betana aꞌ juꞌuneiyaakai. Seenu,
Krijtopo itomak werika, ka Krijtota sualemta jubeka, taa
junaꞌa jubiari, alleaka aamak jiapsaꞌateko, ka aꞌ jimaaꞌpo
yumaꞌi.
\v 13 Intok kia jamuttaka juniꞌi, Krijtopo itomak werik,
ka Krijtota sualemta kunako, taa junaꞌa kunawai alleaka
aamak jiapsaꞌateko, ka aꞌ jimaaꞌpo yumaꞌi.
\v 14 Bweꞌituk juꞌu kunawai, ka Krijtota sualeme, aꞌ jubiawa
Krijtota sualemtamak eakai, aꞌ jubiawata betchiꞌbo, Liojta
betana tuꞌisi aꞌ tawaanaaꞌuta a jajamne. Intok ketchia
juꞌu jubiwai, junueni ka Krijtota sualeme, aꞌ kunawa Krijtota
sualemtamak eakai, aꞌ kunawata betchiꞌbo Liojta betana
tuꞌisi aꞌ tawaanaaꞌuta a jajamne. Ka junuentuko, jumeꞌ
enchim yoemiam, jumeꞌ ka Krijtota sualeme yoemiam bebena
ean. Taa iꞌan intok im Liojta betana yoemiarim bebena.
\v 15 Taa juꞌu kunawai oo juꞌu jubiari, ka Krijtota sualeme,
aamak aꞌ jiapsaꞌu, aꞌ jimmaabaeꞌeteko, a junen aayu. Bweꞌituk
junuen aꞌ weyeꞌpo, juꞌu Krijtopo itomak weri, oꞌoutaka
oo jamuttaka juniꞌi, kaita utteꞌapo a nau am jiapsitua.
Bweꞌituk juꞌu Lios, yanti elaka itom jiapsineꞌ betchiꞌbo
itom yeu puꞌari.
\v 16 Bweꞌituk empoꞌe, ka juꞌunea, jubiwai, tuꞌisi em aamak
jiapsaꞌ betchiꞌbo, em kuna, jumak aꞌ jinneꞌutuneꞌpo. Intok
empoꞌe ka juꞌunea kunawai juniꞌi, tuꞌisi em aamak jiapsaꞌ
betchiꞌbo, em jubi jumak aꞌ jinneꞌutuneꞌpo.
\p
\v 17 Taa jachinpo juniꞌi, weꞌepulaka, yoꞌowe Jesukrijtota
betana amet ayuka, bem, a joaꞌuta, boꞌo jooriane. Intok
Krijtota nok lutuꞌuriata sualeka aꞌ nok jikkajako, junuen
au aꞌ aniaka aꞌ jiapsaꞌpo benasia boꞌo jooriaka jiapsine.
Siꞌimekut nee jumeꞌ Krijtota sualeme inien amet nesawe.
\v 18 Maa su, seenu, jaibu sirkunsiraaroataka Liojta betana
nok lutuꞌuriata sualeka aꞌ nok jikkajakai, iniꞌi junuen
yaꞌataka tawane. Juꞌu senu intok, ka sirkunsiraaroaritaka,
Liojta nok lutuꞌuriata jikkajaka aꞌ sualeko, iniꞌi junen,
ka sirkunsiraaroatune.
\v 19 Senu intok, sirkunsiraaroaka oo ka junuen yaꞌatuka
juniꞌi, junaꞌa kaachin jiubae. Taa ala juꞌu ka itom koptaneeꞌu,
jiba Liojta itom jiapsi iꞌaꞌpo aman itom jiapsineeꞌu
junaꞌa.
\v 20 Siꞌime weꞌepulakai, Liojta nok lutuꞌuriata jikkajaka
aꞌ sualeka aꞌ mabetaka, bat naataka bem emo aniaka bem
jiapsaꞌa benasia, jiapsine.
\v 21 Senu intok tekoka jiapsaka, Krijtota nok lutuꞌuriata
jikkajaka aꞌ sualeko, kaachin eenee junae betchiꞌbo.
Taa junuentaka juniꞌi, junae betana, a emo naꞌikimteꞌeteko,
a junuen aane.
\v 22 Bweꞌituk juꞌu, junuen tekoka jiapsaka, Liojta nok
lutuꞌuriae, Jesukrijtota sualekame, iꞌan, yoꞌowe Jesukrijtota
betchiꞌbo, jaibu ka bebejeꞌerita tekoka jiapsa, intok
jiba junaeni, juꞌu, ka tekoka Krijtota sualeme, junaꞌa
iꞌan, yoꞌowe Jesukrijtota tekoka jiapsamta benasi jiapsine.
\v 23 Bweꞌituk aapo juꞌu Lios, enchim jinneꞌubaeka, ama
butti buꞌuuk emo betchiꞌbo yaak. Junuen san emeꞌe, kaabemmeu
emo suꞌu tojirine, Liojtau emo suꞌu tojiriꞌeaka su.
\v 24 Junuen san Krijtopo nemak werim, siꞌime weꞌepulaka,
Liojta nok lutuꞌuriata jikkajaka aꞌ sualeka, bat naataka
enchim emo aniaka jiapsakaꞌa benasia, jiba junaen jiapsaka
emo aniane.
\p
\v 25 Jumeꞌ intok, kee jujubeme betchiꞌbo, tua ame betchiꞌbo,
ameu chaꞌakamta, yoꞌowe Jesukrijtota betana kaita ne
juꞌuneiyaa. Taa inen ne emou jiubae, Jesukrijtota nee
aꞌ jiokolekaꞌ betchiꞌbo a in yoemꞌeiyaatuꞌpo amani.
\v 26 Juꞌu ka jubekamta betana, jiba junaen, ka jubeka
aꞌ tawaneꞌpo nee cheꞌa aꞌ tuꞌi machia iꞌan lautipo wasuktiammetchi,
bettesi aukame betchiꞌbo.
\v 27 Empo intok, jubekaꞌateko, ka aꞌ jimmaabaekaꞌeene.
Intok juꞌu ka jubekame juniꞌi, junae betana ka au temaine.
\v 28 Taa empo jubekaꞌateko, ka junae betchiꞌbo ka tuꞌik
yaꞌalatune. Intok kia juꞌu beeme juniꞌi, kunako, ket ka
junae betchiꞌbo ka tuꞌik yaꞌalatune. Taa jumeꞌ jujubekame,
chukula, jiba junaetchi obisi ameu aunee inim jiapsakai.
Nee intok inikaꞌa ka enchim bittuapea oꞌoben.
\p
\v 29 Krijtopo nemak werim, inen ne jiubae oꞌoben, katte
juebena taꞌapo im bwiapo jiapsine. Iꞌan bichau bicha
jumeꞌ jujubekame, ka jujubekame benasi emo eetuaka jiapsine.
\v 30 Intok siok maisi eewamta emot ayukaꞌateko juniꞌi,
ka siokamcha emo eetuane. Intok enchim alleaꞌu, enchim
jiapsipo jiba aꞌ juꞌuneiyaane. Intok jumeꞌe, jita jinuri,
cheꞌa tuꞌisi kia, ka tua bempoꞌim betchiꞌbo bem aꞌ jipueꞌe
benasi eene.
\v 31 Jumeꞌ intok, inim bwiapo bem joaꞌue tuꞌisi ae emo
aniame, ka junaet jiba jiapsine. Bweꞌituk juꞌu inim bwiapo
itom bichaꞌu, luꞌutiseka weye.
\p
\v 32 Inepo ala, nee kaitat enchim obisi eeneeꞌuta emot
bitpea. Seenu, ka jubeka, yoꞌowe Jesukrijtota betana weyemtat
jiba aꞌ jiapsaꞌuta aet aune. Intok siꞌimeku, Jesukrijtota
aꞌ alleetuaneeꞌuta.
\v 33 Taa juꞌu jaibu jubekame intoko, inim, tuꞌisi aꞌ
jiapsineeꞌut jiba au temaine. Intok aꞌ jubiawata aꞌ
alleetua baaneeꞌut jiba au temaine. Junuen san, ka wepuꞌulaikut
jiba jiapsinee taa wooi weeme au aune.
\v 34 Intok ket jiba junaen maachi jaamuchim kukunakammeu
intok ka kukunakammewi. Juꞌu ka kunakame, yoꞌowe Jesukrijtota
betana weyemta aꞌ boꞌo joorianeeꞌuta, intok junueni, siꞌimeku
aꞌ joaꞌue, intok kia siꞌimeku tuꞌik aꞌ boꞌo jooriapeaꞌue,
wepulsi Krijtota betchiꞌbo jiapsakai. Taa juꞌu jaibu
kunakame intoko, inim tuꞌisi aꞌ jiapsineeꞌut intok aꞌ
kunawat jiba au temaine.
\p
\v 35 Inikaꞌa intok inien weyemta ne emou teuwaa, tuꞌik
emo tana in waataꞌ betchiꞌbo. Intok junuen, ka jitaꞌapo
obisi enchim emo bitneꞌ betchiꞌbo. Taa cheꞌewasu tuꞌisi
enchim emo ujuꞌuka jiapsineꞌ betchiꞌbo, yoꞌowe Jesukrijtota
betana weyemta boꞌo jooriakai.
\p
\v 36 Taa intok seenu, japchiwai, bemeta maraka, aꞌ kuna
iꞌaꞌateko, jaibu yoꞌotu chupaꞌasukamta bichakai, intok
junuen aꞌ kunaneeꞌuta cheꞌa aꞌ tuꞌu machiako, bem eaꞌpo
aman aune. A am kukunatua. Bweꞌituk kattim junae betchiꞌbo
ka tuꞌisi aune.
\v 37 Taa seenu, ka junuen au aꞌ utteꞌatu machiako, intok
tua junuen jiaka aꞌ yaꞌabaeꞌut yeu yumaꞌabaeꞌeteko, intok
junuen aꞌ yoemiawata tua junuen ka aꞌ kunaneꞌpo aꞌ teuwaalatuko,
ammaꞌali aune.
\v 38 Junuen san juꞌu, jukaꞌ aꞌ beme yoemiawata kunatuakame,
tuꞌisi aune. Taa juꞌu intok, ka aꞌ kunatuakame, cheꞌa
juniꞌi tuꞌisi aulatune.
\p
\v 39 Juꞌu jamut kunakame, aꞌ kuna ket jiapsao, au chaꞌaka
junaemak jiba aꞌ jiapsineꞌpo. Taa jukaꞌ aꞌ kuna mukuko,
juꞌu jamut junak aapola au saunee intok aꞌ kunabaeꞌumak
a kunane. Taa juꞌu intok, aꞌ kunaneeꞌu, ale benasi Krijtota
sualnee ala.
\v 40 Taa juꞌu jokoptukame, cheꞌa juniꞌi alleaka jiapsine,
ka juchi kunako. Junuen ne aꞌ tuꞌi machia. Nee intok,
Liojta tuꞌu jiapsi net anekai, ino aꞌ juꞌuneiyaꞌatiꞌea.
\c 8
\s Bwaꞌaame, jumeꞌ ka lutuꞌuriapo liosim betchiꞌbo jiba yaꞌari
\p
\v 1 Iꞌan intoko, ka liosimtaka, maammea yaꞌarim yoꞌoriwame
betchiꞌbo, bwaꞌamta yaꞌarita betana ne enchim yoopnabae.
Lutuꞌuria ala inia betana weyemta siꞌimem itom aꞌ juꞌuneiyaaꞌpo.
Taa juꞌu tuꞌisi itom jita ito juꞌuneiyaaleꞌu, senuk au
cheꞌewarineeꞌu jiba aet aayuk. Juꞌu intok, senuk yee
nakeꞌu, cheꞌa juniꞌi Liojta bichapo junaen Krijtota benasia
itom jiapsineeꞌut itom ania.
\v 2 Senu intok, au jita taꞌaaleꞌeteko, ketun kee tua
junama waꞌam aꞌ juꞌuneaꞌpo au juꞌuneiyaane.
\v 3 Taa inim seenu, lutula weeꞌpo Liojta nak taꞌaꞌateko,
inia betana juꞌu Lios aet juꞌuneene.
\p
\v 4 Junuen san, jumeꞌ maamea yaꞌarim, ka liosimtaka yoꞌoriwame
betchiꞌbo bwaꞌawamta betana, lutuꞌuria juꞌu inien maamea
yaꞌari, inim yoꞌoriwame tua kaita teuwaa. Intok ket lutuꞌuria,
wepuꞌulaik jiba Liojtukaꞌpo.
\v 5 Taa inim aneka juniꞌi, intok kia teekapo juniꞌi,
jumeꞌ ka lutuꞌuriapo liosim teame intok junuen bem mamachi
benaka, alam tuꞌisi buꞌuu jumeꞌ ka lutuꞌuriapo liosim
intok jumeꞌ yoꞌoweꞌ teaka yoꞌoriwame oꞌoben.
\v 6 Ito betchiꞌbo ala, wepuꞌulai jiba juꞌu Lios, itom
yoꞌoreeꞌu, juꞌu itom achai. Aapo juꞌu Lios achai, siꞌimeta
juꞌunaktek. Itepo intok tee aapoꞌik betchiꞌbo jiapsa.
Intok ket wepuꞌulai jiba juꞌu itom yoꞌowe Jesukrijto.
Aapoꞌik betchiꞌbo siꞌime ayukame jiapsa. Intok tee itepo
juniꞌi te ae betchiꞌbo jiapsa.
\p
\v 7 Taa ka siꞌime jumeꞌ Krijtota sualeme inikaꞌa juꞌuneiyaa.
Waate, jumeꞌ ka liosimtaka juniꞌi yoꞌoriwame yoꞌoreka,
junuen joiwalamtukaꞌum, ketuni jukaꞌ bwaꞌamta, jumeꞌ yoꞌoriwame,
ka lutuꞌuriapo liosimtaka juniꞌi, tua junameꞌe, lutuꞌuriapo
liosim betchiꞌbo tukaꞌa benasi eaka aꞌ bwaꞌee. Intok
junuen, bempo, jukaꞌ bem yoꞌoreꞌu betana, ka tuꞌisi bem
aulaꞌut am juꞌuneetua.
\v 8 Juꞌunakkiachi, ka juꞌu itom bwaꞌeeꞌu betchiꞌbo, Liojta
bichapo tuꞌisi itom mabetrimtuneꞌpo. Bweꞌituk katte
juꞌu itom jiꞌibwa betchiꞌbo cheꞌa tuꞌisi anne. Intok
kia tee ka itom jiꞌibwaꞌ betchiꞌbo juniꞌi cheꞌa ka tuꞌisi
anne.
\v 9 Taa emeꞌe, juꞌu enchim jaibu juꞌuneiyaaka, enchim
a joaꞌut intok kaita teuwaaꞌut, enchim a bwaꞌaneeꞌu betana,
iniat, tuꞌisi em emo aet suuane. Jumeꞌ waate Krijtota
sualeka, kee tuꞌisi aet utteꞌitume, junaet enchim bichaka,
ka tuꞌikut ka bem jiꞌopneꞌ betchiꞌbo.
\v 10 Maasuko, empo inia betana weyemtat jaibu juꞌuneakai,
jumeꞌ yaꞌarim, ka liosimtaka juniꞌi, yoꞌoriwaꞌpo aneka
enchi ama jiꞌibwao, intok seenu, Krijtota sualeka taa
iniꞌi kee tua jiapsi yumaꞌisi aet suatukai, junamaꞌa
enchi bichako, jiba tua ket jukaꞌa, junau ka liojtaka
yoꞌoriwamta yoꞌoriwaꞌpo yaꞌarita ket aꞌ bwaꞌabaane.
\v 11 Intok junuen empo, junae betana, tua kaita aꞌ teuwaaꞌpo
juꞌuneaka aꞌ joame, junae betchiꞌbo, jukaꞌ senuk ele benasi
Krijtota sualeka taa kee aet suatumta, aet jiꞌoptua, jukaꞌ
Krijtota ae betchiꞌbo ket mukukaꞌuta.
\v 12 Junuen san, junuen jumeꞌ Krijtota sualeka, taa kee
tua jiapsi yumaꞌisi aet suatume, ka tuꞌikut am jiꞌoptuakai,
junuen emeꞌe, jiba aapoꞌik Krijtota bejeꞌeka ka tuꞌik
jooa.
\v 13 Junuen san, inepo, in bwaꞌaneeꞌu betchiꞌbo, jukaꞌ
Krijtopo nemak werik, ka tuꞌikut jiꞌoptuaneꞌeteko, inen
nee aꞌ tuꞌi machia, wakajta, jakwoo juniꞌi ka in aꞌ bwaꞌaneꞌpo,
ka junuen, junakaꞌa ka tuꞌikut jiꞌoptua betchiꞌbo.
\c 9
\s Krijtota tekil boꞌo jooriamtau juꞌu au aꞌ lutuꞌuriakaꞌu
\p
\v 1 Juꞌuneewa, Krijtota betana in yeteu bittuaritukaꞌ
betchiꞌbo, neu lutuꞌuria jitaꞌpo in anianaꞌpo. Intok
ne inim kaabeta nesaupo jiapsa. Bweꞌituk itom yoꞌowe
Jesukrijtota ne bitlaa. Emeꞌe intok junameꞌem, jumeꞌe,
Jesukrijtota tekilta in joaꞌ betchiꞌbo, aꞌ suallame.
\v 2 Waate jumak, ka junuen aꞌ lutuꞌuria ti eene, Krijtota
betana in yeteu bittuaritukaꞌpo. Taa emeꞌe a junuen
nee juꞌuneiyaa. Bweꞌituk emeꞌe junuen, nee betana Krijtota
nok lutuꞌuriawata jikkajaka aꞌ sualekai, junaꞌa lutula
weeꞌpo aꞌ teuwaa, aapoꞌik betana in yeu puꞌaritukaꞌpo.
\p
\v 3 Inien ne jiaka am yoopna, jumeꞌ nee bejeꞌeka net
nokame.
\v 4 Siꞌimeku neu lutuꞌuria, jumeꞌ in majtim betana in
bwaꞌaneeꞌuta intok in jiꞌineeꞌuta ame betana in aꞌ mabetneꞌpo.
\v 5 Intok ket, jamutta, Krijtopo itomak werik, in aꞌ jupneꞌpo,
jumeꞌ waate Krijtota yeu puꞌarim jujubeka jiapsaꞌa benasia.
Intok jumeꞌe, yoꞌowe Jesukrijtota ou sailam benasia intok
Peota benasia.
\v 6 Jaisa emeꞌe, Bernabeeꞌ teamta intok nee jiba, itom
maamea tekipanoaka, itom ito anianeꞌpo aꞌ utteꞌatu machia
jaꞌani. Intok ket junuen, Krijtota bemela nok lutuꞌuriata
yee majtaneꞌpo. Ka junuen weye.
\v 7 Maasuko, juꞌu sontaao, ket ka aapo maamea tekipanoaka
au aniabaane. Taa yaꞌuraata betana aniatune. Juꞌu intok,
paꞌasim eechi, ket au lutuꞌuria paꞌasim betana aꞌ bwaꞌaneeꞌu.
Intok ket jiba junaeni, juꞌu, bwaram jipueka am bichame,
ammea au aꞌ anianeeꞌuta au lutuꞌuria.
\v 8 Inikaꞌa intok nee ka watem betana oo kia in eaꞌpo
aman aꞌ teuwaa. Bweꞌituk Liojta nok lutuꞌuria, Moiseejtukaꞌuta
jiꞌojtekaꞌpo ket inien aꞌ teuwaa.
\v 9 Bweꞌituk jum Moiseejtukaꞌuta nesaurim jiꞌojteimpo:
“Jukaꞌ boejta, tiikom jotame, ka aꞌ ten sumaꞌine.” Juꞌunakkiachi,
jukaꞌ Liojta, ka jumeꞌ boesim betana jiba, au aꞌ temaeꞌ
betchiꞌbo inien aꞌ teuwaakaꞌpo.
\v 10 Taa ala itom ae majtabaekai aꞌ teuwaak. Iniꞌi
nesauri ito betchiꞌbo tuꞌik teuwaaka jiꞌojtewak. Bweꞌituk
juꞌu bwiata moꞌitekame intok kia juꞌu chukula, bachiata
toboktame juniꞌi, junamaꞌa echimupo, bem ama jajamneeꞌut
eaka aꞌ yaꞌane.
\v 11 Junuen san itepo, emo nasuk Krijtota betana lutuꞌuriata
emo nasuk enchim aꞌ majtalamtakai, junuen aꞌ echakame
benakai, jiba su tua, itou lutuꞌuria emo betana inim jitaꞌapo
itom bitnaaꞌu.
\v 12 Jumeꞌ chukula kateka, enchim majtakame, emo betana
inien bitwaka aniawak. Itou intok, cheꞌa juniꞌi lutuꞌuria
oꞌoben.
\p Taa itepo, inia betana katte inien itou aꞌ lutuꞌuriaꞌati
jiaka emot ea. Taa ala, inia betana itepo siꞌimekut tee
ito aniasuk. Junuen, Jesukrijtota betana jukaꞌ bemela
nok lutuꞌuriata itom yee majtaꞌuta, junuen jiba tuꞌisi
aꞌ mabetnaꞌ betchiꞌbo.
\v 13 Emeꞌe su jaibu juꞌunea, jumeꞌ cheꞌa bat naataka
jum bweꞌu teꞌopopo yoꞌo jaꞌabwekame, junamaꞌa teꞌopopo
betana bem anianaaꞌu ameu lutuꞌuriatukan. Intok jumeꞌe,
jum teꞌopopo, bwaram peutawaka bem tattaawaꞌpo tekiakame,
ameu lutuꞌuriatukan, bem peutakaꞌuta, watekumak bem tawaneꞌpo.
\v 14 Iꞌan intok ket jiba junaeni, juꞌu itom yoꞌowe Jesukrijto,
jumeꞌ aapoꞌik betana nok lutuꞌuriata yee aꞌ majtaka
aꞌ teuwaame, aet nesaula, junae tekilta betchiꞌbo, Krijtota
sualeme betana bem anianaꞌpo.
\v 15 Taa ineponee inien neu aꞌ lutuꞌuriatuko juniꞌi,
kannee junuen aꞌ waatasuk. Intok nee ka enchim nee mikneꞌ
betchiꞌbo inikaꞌa emou jiꞌojte. Cheꞌa bat naataka nee
mukuk juniꞌi, nee cheꞌa aꞌ tuꞌure, kee jukaꞌ Liojta bichapo
in ino uttiaka joaꞌuta, taꞌabwisi aꞌ joakai.
\p
\v 16 Inepo kannee ino uttiaꞌ betchiꞌbo Krijtota betana
nok lutuꞌuriata yee aꞌ majta. Cheꞌa juni san neu utteꞌa
in yee aꞌ majtaneꞌpo. Intok inikaꞌa nok lutuꞌuriata,
nee ka yee aꞌ majtako, tua jiokot neu chupne.
\v 17 Junuen san inepo tua junen eaka aꞌ boꞌo jooriaꞌateko,
chukula, Liojtamak cheꞌa naa buustia jukaꞌ tuꞌik nee
aꞌ bitne. Taa nee aet utteꞌa jooriawaka aꞌ joaꞌateko
juniꞌi, jiba nee jukaꞌ tekilta Liojta betana in aet sawaꞌuta
nee aꞌ joone.
\v 18 Inien san, iꞌan, Jesukrijtota betana nok lutuꞌuriata,
kaita kobaka in yee aꞌ majtaneeꞌu, junaꞌa juꞌu ino uttiaka,
chukula tuꞌik in mabetneeꞌu. Junuen, Krijtota nok lutuꞌuriata
in yee aꞌ majtaꞌ betchiꞌbo in anianaꞌpo neu aꞌ lutuꞌuriatuk
juniꞌi, ka junuen aꞌ waatakai.
\p
\v 19 Ineponee inim kaabeta tekoka tekipanoaka jiapsa,
oꞌoben. Taa junuentaka juniꞌi, nee siꞌimem aniabaeka,
junuen ne am tekoka benasi ea. Intok junuen cheꞌa juniꞌi
juebenam, Jesukrijtota sualneꞌ betchiꞌbo ameu nokbaekai.
\v 20 Jumeꞌ juriom nasuk aneꞌeteko, bempoꞌimmak eaka
ne ame benasi ne ino ujuꞌuka amemak ne aꞌane, junuen,
Jesukrijtota am sualneꞌ betchiꞌbo ameu nokbaekai. Intok
jiba junaensu, jumeꞌ nesaurim, Moiseejtukaꞌuta jiꞌojtekaꞌuta
boꞌo jooriame nasuk anekai, inepone ame benasi eaka amemak
aꞌane. Ket junuen am majta betchiꞌbo. Lutula weeꞌpo,
ka iniae nesau jiꞌojteipo aman jiapsaka juniꞌi.
\v 21 Intok ketchia, jumeꞌe, Liojta betana nesaurim, Moiseejta
jiꞌojteimmet ka juꞌuneammak aneka, ame benasi ne ino
tamachia, junuen, Jesukrijtota am sualneꞌ betchiꞌbo ameu
nokbaekai. Nejpo ala nee, tua lutuꞌuriapo, Liojta nesaupo
aman jiapsaka juniꞌi. Bweꞌituk iꞌan nee, Krijtota eaꞌpo
intok aꞌ nesaupo aman ne jiapsa.
\v 22 Jumeꞌe, Krijtota sualeka, kee aet suatummak anekai,
ame benasi ne ino tammachia, ket jiba junaen, Krijtota
betana am jinneꞌuimtu iꞌakai. Siꞌimem beꞌekatana, bem
emo ujuꞌuꞌu benasia ne jiapsaka, ameu ne ino tammachia.
Jumak juniꞌi junuen aneka, Krijtota sualeka am jinneꞌuimtuneꞌ
betchiꞌbo.
\v 23 Siꞌimeta inikaꞌa nee inien boꞌo jooria, Krijtota
nok lutuꞌuriata in nakeka, in yee aꞌ majtabaeꞌ betchiꞌbo.
Juꞌu Krijtota nok lutuꞌuriata betchiꞌbo jukaꞌ tuꞌik
itom jajamneeꞌuta bitbaekai.
\p
\v 24 Ket emeꞌe jaibu em juꞌunea, jumeꞌ jinkoꞌolaame,
siꞌimem nau tetteneꞌpo, taa wepuꞌulainee jiba jukaꞌ senuk,
ama miknaaꞌuta aꞌ yoꞌoneeme. Emeꞌe intok ketchia, jukaꞌ
emou tuꞌik, chukula Liojta mak enchim bitneeꞌuta yoꞌo
betchiꞌbo, Liojta itom jiapsi iꞌaꞌut junama waꞌam yeu
kat betchiꞌbo, emo aet utteꞌa joone.
\v 25 Maasuko, siꞌime jumeꞌ yoꞌobaeka emo utteꞌa jooriame,
tuꞌisi emo majta. Intok siꞌimeta ameu ka tuꞌi machik
koptaka, omola aꞌ tatawa. Bempo intok, juya koonata, chubala
betchiꞌbo jiba yoꞌoneeka juniꞌi, junakaꞌa jooa. Taa itepo
te jukaꞌ chukula itom jajamneeꞌuta, jiba yuu betchiꞌbo
aꞌ bitneeka mabet betchiꞌbo te ito utteꞌa jooria.
\v 26 Inepo ala nee, kannee kia jak waꞌam jiapsa, taa
tuꞌisi aet suuaka, intok aet juꞌuneaka ne in aet ino
utteꞌa jooriaꞌut juniꞌi jiapsa. Intok ka kia jak waꞌam
kaita betchiꞌbo ino utteꞌa jooria.
\v 27 Taa ala ne, ka ino jiokoleka, siꞌimekut ne ino utteꞌa
jooriaka ino ujuꞌu. Ka junuen inepo, cheꞌa bat naataka
yee majtalatakai intok junuen, chukula aet jiꞌobeka, in
kobaꞌabaeꞌu betana ka in yeu tawaabaeꞌ betchiꞌbo.
\c 10
\s Ka liosimtaka yoꞌoriwame betana yee nok tejwaawame
\p
\v 1 Inikaꞌa ne enchim juꞌuneiyaa iꞌa, Krijtopo nemak
werim. Jumeꞌ cheꞌa bat naataka katriamtaka, itom amet
yeu sakaꞌariam, itom yoꞌowasukaꞌum, bwiaraa Ejiiptoꞌ teaꞌa
betana yeu kateka, namu jekkaapo bem boꞌo joakaꞌpo. Intok
junuen ket, siꞌimem, Sikii bawepo waꞌam wakiaku benasi
bem ama yeu sajakaꞌpo.
\v 2 Junuen, siꞌimetaka, Moiseejtukaꞌutamak nau, junae
namu jekkaawae intok jum Sikii bawepo yeu sajaka, Moiseejtamak
eaka, bemelasi Liojtau emo suꞌu tojaka, junuen, Moiseejta
betana batoꞌowaim tukaꞌa benasi taawak.
\v 3 Intok ket, Liojta nok lutuꞌuriae aniawaka aꞌ bwaꞌawametukaꞌa
benasia utteꞌata mabetak.
\v 4 Intok ket siꞌime, Liojta a jita joa betchiꞌbo, jumeꞌ
baꞌam, tetapo yeu sikame jeꞌeka. Bweꞌituk jum bweka paꞌaku,
bem boꞌo joaꞌpo junaꞌa teta, Krijtota junakriapo, ka bittaka
amemak aꞌaneꞌuta teuwaan.
\v 5 Taa junuentaka juniꞌi, junameꞌe, bempoꞌim betana,
juꞌu cheꞌa buꞌuuraa, Liojta ka nok jikkajaka junuen aꞌ
sioktuaka san, junuen, bem boꞌo joaꞌut, mekka paꞌariapo
kokok.
\v 6 Siꞌime iniꞌi junuen yeu siika, junuen itom aꞌ mammateka,
siꞌimeta jukaꞌ itou ka tuꞌi machik, ka itom aꞌ eiyaaka
aꞌ joopeebaaneꞌ betchiꞌbo, bem ayukaꞌa benasia.
\v 7 Junuen san emeꞌe, jumeꞌ ka liosimtaka yoꞌoriwame,
emeꞌe ka am yoꞌoribaane, bempoꞌim betana watem junuen
ayukaꞌa benasia. Liojta nok lutuꞌuriapo ket ame betana
aꞌ jiꞌojteitukaꞌa benasia: “Juꞌu yoemra, jukaꞌ maamea
yaꞌarita yoꞌoribaeka, emo nau tojaka, jiꞌibwawamta intok
jita jiꞌiwamta weetuan. Intok ketchia, alleebaawaka, bweꞌuusi
pajkowamta weetuan.”
\v 8 Intok katte taꞌabwi jaamuchimmak ito tuꞌuribaane,
bempoꞌim betana, watem junuen ayukaꞌa benasia. Intok
inimeꞌe, senu taꞌapo, senu taka ama baji miiltaka kokosuk.
\v 9 Intok kia itepo, katte jukaꞌ achai Liojta, a yetet
aꞌ boꞌo bichaꞌut, junaet aꞌ jiꞌobilaabaanee juniꞌi, kia
bempoꞌim betana watem junuen ayuka intok junuen jumeꞌ
bakochim am kikisuka am kokkokaꞌa benasia.
\v 10 Intok kia em kaachin, Liojta bejeꞌeka nok baane,
bempoꞌim betana watem junuen aꞌ bejeꞌekaꞌa benasia.
Intok ket inimeꞌe, juꞌu Liojta betana ankelta jissuareo
am suꞌak.
\p
\v 11 Siꞌime iniꞌi junen, jumeꞌ bat naataka itom yoꞌowam
yoꞌowasukaꞌummeu inien yeu siika. Intok Liojta nok lutuꞌuriapo
inien jiꞌojtewak, itom, jumeꞌ inimeꞌe aniata luꞌuteꞌpo
taewaimmet jiapsame, aꞌ juꞌuneiyaaka, inile benakut itom
ito suuaneꞌ betchiꞌbo.
\v 12 Junuen san beja, juꞌu, wepulsi, tua junama waꞌam,
Krijtota jiba au sualeꞌetiꞌeaka, ka au jiꞌopneꞌetiꞌeame,
jiba junaet, ka tuꞌikut ka jiꞌop betchiꞌbo, au suuane.
\v 13 Juꞌu ka tuꞌika emou weyeme, enchim aet jiꞌopꞌeaꞌu,
ka ama butti emou aune. Intok jiba juꞌu inim, kaabe yeu
beꞌeeka, itou aukame benane. Taa emeꞌe ka jain eaka, Liojtat
eene. Bweꞌituk aapo juꞌu Lios, ka naa buustia intok, ka
enchim au yumaꞌalaa bepa intok emou aꞌ autuane. Taa
ala jukaꞌ enchim aet jiꞌopꞌeaꞌu ka tuꞌik emou weyeo,
junak ket aapo juꞌu Lios, enchim ka aet jiꞌopneꞌ betchiꞌbo,
enchim aet aniane. Intok junuen beja, emeꞌe ka aet jiꞌobeka,
ama yeu katne.
\p
\v 14 Inia betchiꞌbo san, Krijtopo nemak werim, in nakeꞌum,
jumeꞌ maammea yaꞌarim ka liosim, ka enchim am yoꞌori
betchiꞌbo aet emo suuane.
\v 15 Enchim a jita mammateꞌpo juꞌuneaka, nee junuen
emou jiia. Intok emeꞌe ket a emo aet temae juꞌu in emou
teuwaakaꞌutchi.
\v 16 Nau anekai, itepo junak inikaꞌa yoꞌoreka, jukaꞌ
Liojta bai saeka, paꞌasi baꞌawata jeꞌeekai, Jesukrijtota
betana, kuuset aꞌ mukukaꞌue, ito betchiꞌbo tuꞌik itom
mabetri itom au waateꞌuta tee aꞌ teuwaa. Intok jumeꞌ
paanim reebeim nau bwaꞌeekai, Krijtota kuuset popontuka
au aꞌ nenkakaꞌue, itepo tua tuꞌik itom mabetri tee aꞌ
teuwaa.
\v 17 Ite intok, nau juebenaka juniꞌi, siꞌime tee wepul
paanim rebektim nau bwaꞌee. Iniꞌi intok, wepuꞌulaik itom
nau sualeꞌpo, Krijtopo itom nau weriakaꞌpo aꞌ teuwaa.
\p
\v 18 Ijraꞌel yoemrata betana weyemta em mammatene.
Bempo junamaꞌa teꞌopopo, bem boꞌo jooriaꞌu betchiꞌbo,
junuen junaet Liojtamak nau eaka, Liojta betana bem jajameꞌuta
teuwaa.
\v 19 Taa inikaꞌa teuwaaka juniꞌi, kannee jumeꞌ maammea
yaꞌarim, ka liosimtaka yoꞌoriwame, lutuꞌuriapo utteꞌata
amet aukaꞌuta aꞌ teuwaa. Intok kia jukaꞌa, junameꞌ betchiꞌbo
wakaj meꞌeri juniꞌi, kaitaꞌpo cheꞌa taꞌabwisi maachi,
juꞌu wakajta itom bwaꞌeeꞌu bepa jukaꞌ aꞌ teuwaaꞌpo.
\v 20 Ala juꞌu in teuwaaꞌu, iniꞌi junaꞌa, jumeꞌ ka Liojta
taꞌaaka junuen waka suꞌawamta weetuakai, bebejeꞌeri jiapsim
ae alleetua. Intok ka lutuꞌuriapo Liojta betchiꞌbo aꞌ
jooa. Ineponee intok, inimeꞌe bebejeꞌeri jiapsimmak ka
enchim ee iꞌa.
\v 21 Juꞌu yoꞌowe Jesukrijtotau waateka intok aꞌ yoꞌoreka,
jukaꞌ paꞌasi baꞌawata jiꞌiwamta intok jumeꞌ paanim rebektawamta
bwaꞌawamta, aapoꞌik betchiꞌbo aꞌ joakai, taa intok ket
junaemak, bebejeꞌerita betana weyemta bebejeꞌerita ae
alleetuabaeka aꞌ joaꞌateko, tua em ka ammaꞌali anne.
\v 22 Junuen itepo aneꞌeteko, yoꞌowe Jesukrijtota tua
ka alleetuane. Jaisa itepo junuen aapoꞌiku ito elpeiyaanee
jaꞌani.
\s Krijtota sualeka, juꞌu au yumaꞌawame intok juꞌu a yee nakwame
\p
\v 23 Lutuꞌuria ala, juꞌu inien jiuwame: “Senu jita
juniꞌi aꞌ yaꞌaneꞌpo.” Taa ka siꞌime juꞌu itom joaꞌu
tuꞌisi itou yeu weama. Lutuꞌuria ala: “Senuk junuen
jita juniꞌi yaꞌaneꞌpo.” Taa ka siꞌime Liojta betana
weyemtat itom aꞌ jajamneeꞌut itom ania.
\v 24 Watem betana tuꞌik itom eiyaaneeꞌut te ito temaine,
tuꞌik ame tana waatakai, intok te ka itepo jiba ito eiyaane.
\p
\v 25 Wakase nenenkiwaꞌpo enchim jinuka, aꞌ bwaꞌaneeꞌu,
jita betchiꞌbo aꞌ meꞌetukaꞌpo ka nattemaeka aꞌ bwaꞌane,
ae ka ammaꞌali enchim tawaneꞌpo kaachin enchim eeneꞌ
betchiꞌbo.
\v 26 Bweꞌituk iniꞌi bwia intok siꞌime inim jiapsame,
achai Lios aꞌ atteak intok au yoꞌowe.
\p
\v 27 Senuk, ka Krijtota sualemta, enchim aꞌ jiꞌibwa nunuko,
intok emeꞌe aamak jiꞌibwabaeꞌeteko, junamaꞌa emou tojiwamta
bwaꞌane, ka aet nattemaekai, junuen ka tuꞌisi enchim tawaaneꞌut
kaachin eakai.
\v 28 Taa seenu, juꞌubwa Krijtota suallataka: “Iniꞌi
waakas, ka lutuꞌuriapo liojtaka, junakaꞌa yoꞌori betchiꞌbo
meꞌeri”, ti emou aꞌ jiao, junak emeꞌe ka aꞌ bwaꞌane, junakaꞌa
junuen enchim tejwaakamta ka junuen ka tuꞌikut aꞌ jiꞌoptuaꞌ
betchiꞌbo. Intok ket junakaꞌa, aapoꞌik junae betana, Liojta
bichapo ka tuꞌik jooa, ti ka aꞌ eeneꞌ betchiꞌbo.
\v 29 Inikaꞌa ne teuwaa, juꞌu lutuꞌuriat kee tuꞌisi juꞌuneamta,
jachin au aꞌ eetuaneꞌu betana, intok ka jumeꞌ jaibu tuꞌisi
aꞌ juꞌuneiyaame betana.
\p Taa senu a inen jiunee: “Jaisaaka inepo, in joaꞌu
betana, tuꞌisi in aneꞌepo juꞌuneaka juniꞌi, intoko taꞌabwik,
junuen au aꞌ eetuaꞌ betchiꞌbo, junae inepo ka ammaꞌali
aulatune.
\v 30 Bweꞌituk ineponee in bwaꞌeeꞌuta, Liojtau bicha
nokaka aet aꞌ baisaeka ne aꞌ bwaꞌee. Junuentukaꞌatek,
jaisa betchiꞌbo ka tuꞌisi net noknaa in aꞌ bwaꞌ betchiꞌbo.”
\v 31 Inen naꞌa yoopnanee junakaꞌa: Junuen san, tuꞌinee
jiꞌibwaꞌateko oo jita juniꞌi enchim weetuaꞌuta, Liojta
yoꞌoreka intok au waateka aꞌ jooneꞌeteko.
\v 32 Kaabem emeꞌeꞌem jitat emo betchiꞌbo ka tuꞌikut
am jiꞌopneꞌ betchiꞌbo aet emo suuane, am juriomtuko intok
kia jumeꞌ ka juriom juniꞌi, intok kia jumeꞌ Krijtopo
itomak werim juniꞌi.
\v 33 Inepone ala, siꞌimemmak alleaka tuꞌisi in amemak
weeneeꞌut cheꞌa eiyaa. Intok ne kia inepo, ka nee betchiꞌbo
jiba tuꞌik waata taa ala watem betchiꞌbo, junaet ne ino
temae, junuen bempoꞌim ket jinneꞌuimtuneꞌ betchiꞌbo.
\c 11
\p
\v 1 Inien Jesukrijtota in sualeka in ino ujuꞌuꞌu benasia,
emeꞌe intok ket junaen neu aꞌ suawaꞌuka jiapsine.
\s Jumeꞌ jaamuchim, Liojta yoꞌoriwaꞌpo, jaisa bem ama anꞌeaꞌu
\p
\v 2 Krijtopo nemak werim, enchim ne aet uttia, jiba enchim
neu waateꞌ betchiꞌbo intok nee betana jukaꞌ in enchim
majtaka enchim neu taꞌaakaꞌuta, ka enchim koptaꞌ betchiꞌbo.
\v 3 Taa Jesukrijtota betana aapoꞌik siꞌime jumeꞌ oꞌowimmeu
kobataka aꞌ yoꞌotukaꞌpo, enchim ne aꞌ juꞌuneiyaa iꞌa.
Juꞌu intok kunawai, aꞌ jubibeu kobataka yoꞌowe, jukaꞌ
Liojta, Jesukrijtotau kobataka aꞌ yoꞌotukaꞌa benasia.
\v 4 Seenu, oꞌoutaka, Liojta yoꞌoriwaꞌpo aneka Liojtau
bicha nokaka oo Liojta betana jukaꞌ nok lutuꞌuriata
yee aꞌ majtakai, intok kobat au pattaika, tiusi machine.
\v 5 Taa seenu, jamuttaka intok ka kobapo au pattaika,
Liojtau bicha nokaka, oo Liojta betana nok lutuꞌuria
weyemta yee majtakai, aapoꞌik betchiꞌbo tiusi machine,
chonim tua siꞌimem chuktai benasia.
\v 6 Taa juꞌu jamut, ka kobat au jintuaka, junuen aneꞌeteko,
cheꞌa tuꞌine, chonim siꞌimem chuktako. Taa jukaꞌ jamutta
junuen au yaꞌarik, ka tuꞌi jamutta benasi aꞌ bitwao, junak
emo jintuane.
\v 7 Taa juꞌu oꞌou, jum Liojta yoꞌoriwaꞌpo, ka au kobat
pattaine. Bweꞌituk juꞌu oꞌou, wateku, aapoꞌik Liojta benasi
juꞌunaktei. Intok Liojta betana weyeme aet yeu maachi,
Liojta ae au uttianeꞌ betchiꞌbo juꞌunaktei. Taa juꞌu
jamut, jukaꞌ oꞌouta yoꞌoreka, junuen aꞌ alleetuaneeꞌuta
aet aayuk.
\v 8 Bweꞌituk juꞌu Lios, jukaꞌ oꞌouta juꞌunaktekai, ka
juꞌu jamutta taka betana aꞌ nuꞌuka aꞌ juꞌunaktek, taa
ala jiba juꞌu oꞌouta sanaꞌita betana aꞌ nuꞌuka aꞌ juꞌunaktek.
\v 9 Intok kia juꞌu jamut, juꞌu oꞌoutau aꞌ beꞌeꞌ betchiꞌbo
juꞌunaktei. Intok ka jukaꞌ oꞌouta, jamuttau aꞌ beꞌeꞌ
betchiꞌbo.
\v 10 Inia betchiꞌbo san juꞌu jamut, jum Liojta yoꞌoriwaꞌpo,
kobapo au aꞌ pattaineꞌpo au utteꞌa, jukaꞌ jamutta, oꞌouta
au yoꞌotuneꞌ betchiꞌbo aꞌ juꞌunaktewakaꞌpo, junuen jumeꞌ
ankelesim am juꞌuneiyaaneꞌ betchiꞌbo.
\v 11 Junuentaka juniꞌi, itom, jumeꞌ Krijtota nau sualeme
nasuku, juꞌu oꞌou, ka jamutta betchiꞌbotuko, kaabe tu ean.
Intok juꞌu jamut juniꞌi, ka oꞌouta betchiꞌbotuko kaabe
tu ean.
\v 12 Bweꞌituk lutuꞌuriapo juꞌu jamut, oꞌouta taka betana
aꞌ juꞌunakteituko, ket jiba junaen iꞌan lutuꞌuria, jumeꞌ
oꞌowim jamuttat yeu am yoemtuꞌpo. Intok kia siꞌime juniꞌi,
Liojta betana juꞌunaktei.
\p
\v 13 Emeꞌeꞌem nokne, jukaꞌ jamutta ka aꞌ jiniaka Liojtau
bicha aꞌ nokneꞌpo junuen aꞌ tuꞌireakaꞌpo oo ka aꞌ tuꞌireakaꞌpo.
\v 14 Siꞌimem betana, siꞌimem junuen itom ito ujuꞌuꞌuta
aꞌ teuwaa, tiusi aꞌ machiakaꞌpo jukaꞌ oꞌouta tettebem
aꞌ chonneꞌepo.
\v 15 Taa jukaꞌ jamutta intok, tettebem aꞌ chonneꞌepo,
aet aꞌ uttiakaꞌpo. Bweꞌituk aapoꞌik ammea au pattaineꞌ
betchiꞌbo junuen tettebe chonim makri.
\v 16 Taa senu intok, inia betana aet nok nassuabaeꞌeteko,
juꞌuneene, iitom intok, kia jumeꞌ siꞌimekut Krijtota nau
sualeme juniꞌi, ka taꞌabwisi intok itom ito ujuꞌuuꞌpo.
\s Jesukrijtota yoꞌoriwaka, jiꞌibwaꞌpo ama butti aneme
\p
\v 17 Taa naa buustia ne inikaꞌa emou jiꞌojtekai, enchim
nau yaajaka, enchim boꞌo jooriaꞌu betana, kaitat nee enchim
uttia machi. Bweꞌituk enchim nau yaajaka, enchim boꞌo
jooriaꞌpo, tuꞌik ama jajjamꞌeaka su, ka tuꞌik ama tettea.
\v 18 Bweꞌituk cheꞌa bat naataka inen ne emo tana aꞌ
jikkaja, Liojta yoꞌori betchiꞌbo, ka wepulsi enchim nau
eaka aꞌ joaꞌapo. Nejpone intok, inia betana, wateku ne
junuen aꞌ lutuꞌuriatu machia.
\v 19 Bweꞌituk, utteꞌa, emo nasuk junuen ka enchim nau
eaka, nattepola enchim emo naꞌikimteneꞌpo. Junuen, jumeꞌ
tua lutuꞌuriapo Krijtota suallame, am juꞌuneiyaanaꞌ betchiꞌbo.
\v 20 Junuen san, jum enchim nau emo totojaꞌpo, wepulsi
nau aneka, juꞌu junamaꞌa enchim weetuaꞌu, ka lutuꞌuriapo
emeꞌe, Jesukrijtotau waati betchiꞌbo aꞌ jooa.
\v 21 Bweꞌituk tukaapo jaibu jiꞌibwabaawao, weꞌepulaka,
ka boꞌo bichaka, bem bwaꞌaneeꞌuta nunuꞌee. Jumeꞌ intok
watem, tebaureka am tatawaꞌpo. Waate intok ket, kia nanaako
juniꞌi.
\v 22 Emeꞌe, enchim joꞌaram beꞌekatana enchim jiꞌibwaneeꞌuta
weetuane. Bweꞌituk emeꞌe, iꞌan junaen anekai, jumeꞌ Krijtota
nau sualeme, teꞌopopo, jak waꞌam am eiyaamcha aane. Intok
jumeꞌ kaita jipueme, tiusiꞌem am tatawa. Jaisa intok
ne emou jiune. Inia betana su nee ka a enchim uttia.
\s Jesukrijtotau waatiwaka, jiꞌibwawame
\p
\v 23,24 Bweꞌituk inepone, inikaꞌa in enchim majtakaꞌuta,
jiba Jesukrijtota betana nee aꞌ taꞌaak. Aapoꞌik itom
yoꞌowe Jesukrijtota, jiba junae tukaariat, aapoꞌik etbwa
bwijwako, intok ket junako, jumeꞌ paanim nuꞌuka, ame betchiꞌbo
Liojta baisaeka, am rebektaka, inen jiiak: “Inimeꞌe em
bwaꞌane. Inimeꞌe in takaata, emo betchiꞌbo koꞌoko maisi
aꞌ yaꞌatuneeꞌuta teuwaa. Inikaꞌa emeꞌe inien aꞌ boꞌo
joorianee neu waatekai.”
\v 25 Intok ketchia, junamaꞌa kupteo jiꞌibwasukai, jukaꞌ
paꞌasi baꞌawata ama aukaꞌuta nuꞌuka, inen jiiak: “Iniꞌi
aꞌ teuwaa, jukaꞌ bemela lutuꞌuriata, Liojtamak jukaꞌ emo
tuꞌutewamta. Juꞌu ojbo, kuuset popontaka in woꞌotaneeꞌue
aꞌ chupiatukaꞌpo aꞌ teuwaa. Inikaꞌa paꞌasi baꞌawata
enchim jeꞌeꞌebeleki, neweꞌem waateka aꞌ joone.”
\v 26 Junuen san beja, emeꞌe, Jesukrijtota juchi aꞌabo
notteꞌu tajtia, inimeꞌe paanim bwaꞌeeka, intok jukaꞌ paꞌasi
baꞌawata enchim jeꞌeꞌebeleki, aapoꞌik emo betchiꞌbo aꞌ
mukukaꞌpo enchim au waateꞌuta aꞌ teuwaa.
\s Jesukrijtota yoꞌoriwaka, jiꞌibwawamta aꞌ joowaꞌu
\p
\v 27 Junuen san, jabetaka juniꞌi, jukaꞌ Jesukrijtota
betana junuen lutuꞌuriateita, jukaꞌ paꞌasi baꞌawata jeꞌeeka,
intok jumeꞌ paanim bwaꞌeeka, Liojta bichapo ka ammaꞌali
aneka, junuen ka aꞌ yoꞌoreka intok aꞌ joaꞌateko, Jesukrijtota
ito betchiꞌbo aꞌ yaakaꞌuta bejeꞌekai, unnaa ka tuꞌisi
aune.
\v 28 Junuen san beja, weꞌepulaka, nattepola, Liojta bichapo
jachin aꞌ jiapsaꞌpo au juꞌuneiyaane, jumeꞌ paanim kee
bwaꞌeekai intok jukaꞌ paꞌasi baꞌawata kee jeꞌeekai.
\v 29 Bweꞌituk juꞌu, junuen jukaꞌ aꞌ joaꞌuta, Jesukrijtota
junuen yaꞌawaka ito betchiꞌbo mukukaꞌuta aꞌ teuwaaꞌut,
ka juꞌuneaka, kia beja junakaꞌa bwaꞌeeme, ka tuꞌisi au
aꞌ chupneeꞌuta ama bitne.
\v 30 Jiba inia betchiꞌbo san, emo nasuku juebenaka koꞌokoe.
Intok ka uꞌutteꞌak. Intok ketchia, waate kokkosukamme.
\v 31 Taa itepo tuꞌisi aet mammateka aꞌ boꞌo jooriaꞌateko
intok aet ito temaeka, jukaꞌ ka tuꞌik suꞌu tojako, junak
juꞌu Jesukrijto ka junuen bettesi itou aꞌ chupaa ean.
\v 32 Taa aapo juꞌu yoꞌowe Jesukrijto, itom aet sua tejwaꞌateko,
bettesi itou aꞌ autuane. Taa junuen, jumeꞌ ka aapoꞌik
sualemmak, ka itom amemak jiba betchiꞌbo ka tuꞌisi tawaanaꞌ
betchiꞌbo.
\p
\v 33 Junuen san Krijtopo nemak werim, kupteo nau jiꞌibwa
betchiꞌbo nau aneꞌeteko, jiꞌibwabaeꞌeteko, emoꞌem boꞌo
bibitne.
\v 34 Taa senu intok, tua tebaureꞌeteko, aꞌ joꞌawapo bat
jiꞌibwane. Intok ka junuen, enchim nau aneka, jachin juniꞌi
enchim joaꞌu betchiꞌbo Liojta ka bettesi emou aꞌ chupaꞌaneꞌ
betchiꞌbo. Jukaꞌ waatek emou ayukamta, inepo, emomak aneꞌeteko
nee aꞌ tuꞌutene.
\c 12
\s Liojta tuꞌu jiapsi, weꞌepulaim jita bem boꞌo joorianeeꞌut yee aꞌ aniaꞌu
\p
\v 1 Krijtopo nemak werim, wate weyemta ne enchim juꞌuneiyaa
iꞌa. Jukaꞌ Liojta betana emot autuarika enchim a joaꞌu
betana.
\p
\v 2 Emeꞌeꞌem tuꞌisi juꞌunea, ketuni kee Krijtota enchim
sualeka, jumeꞌ ka liosimtaka juniꞌi yoꞌoriwame, am sualeka,
enchim am yoꞌorisukaꞌpo intok ameu enchim emo suꞌu tojiriatukaꞌpo.
\v 3 Junuen san ne iꞌan, inikaꞌa ne enchim juꞌuneiyaaꞌiiꞌa,
jabeta juniꞌi, Liojta tuꞌu jiapsita aet aneo, junuen:
“Juꞌu Jesus, Liojta bichapo ka tuꞌisi tawala”, ti kaibu
aꞌ jiuneꞌpo. Intok kia jabeta juniꞌi, Liojta tuꞌu jiapsita
ka aet aneo: “Jesukrijtota ne yoꞌowak”, ti ka aꞌ jiuneꞌpo.
\p
\v 4 Liojta betana aet ayuka, senuk a jooneeꞌu, juebenaka
ka nanau machika aayuk. Taa juꞌu, inikaꞌa itot autuame,
jiba juꞌu wepul Liojta tuꞌu jiapsi junaꞌa.
\v 5 Intok ketchia ka nanau maisi itepo te itom a joaꞌue
te wate a yee ania. Taa juꞌu itom ae betchiꞌbo aꞌ joaꞌu,
jiba juꞌu itom wepul yoꞌowe Jesukrijto junaꞌa.
\v 6 Intok ket, juebena ka nanau machika tekil aayuk,
itom a jooneeꞌu. Taa juꞌu, siꞌimem junuen aꞌ jootuame,
jiba aapo juꞌu itom wepul achai Lios junaꞌa.
\v 7 Taa weꞌepulaka siꞌimete Liojta tuꞌu jiapsi betana
jitat aniari, itot aꞌ jiapsaꞌpo aꞌ juꞌuneiyaanaꞌ betchiꞌbo
intok siꞌimem tuꞌik aet bitneꞌ betchiꞌbo.
\v 8 Aapo, aꞌ tuꞌu jiapsie, waatem, tuꞌisi aapoꞌik betana
suawakamta aꞌ teuwaaneeme, au am yumaꞌaneꞌ betchiꞌbo
junau am yumaꞌatua. Waatem intok ket, jiba juꞌu aꞌ tuꞌu
jiapsie, aapoꞌik betana, tua junama waꞌam suawakamta bem
yee majtaneeꞌu bem aꞌ jooneꞌ betchiꞌbo junaet am ania.
\v 9 Intok ket waate, jiba junae tuꞌu jiapsie, aapoꞌik
Liojta siꞌimeku yumaꞌisi aet yoemꞌeeneꞌ betchiꞌbo, junaet
am ania. Waate intok, jumeꞌ koꞌokoeme emo ineꞌetetuaꞌ
betchiꞌbo ama yumaꞌatualaa, jiba aapoꞌik wepul tuꞌu jiapsie.
\v 10 Waate inim, machilaata ka a jootu machik a bem
jooneꞌ betchiꞌbo am jootualaa. Intok waate, Liojta betana
aꞌ juꞌuneiyaatuawaka, chukula yeu weenemta aꞌ teuwaatualaa.
Intok watem ket, jiba aapo juꞌu Lios, suawata amet autua,
senukut aꞌ jiapsiwata, lutuꞌuriapo Liojta betana aꞌ tuꞌu
jiapsitukaꞌpo oo ka junuen aꞌ lutuꞌuriatukaꞌpo yetet
juꞌunee betchiꞌbo. Wate ketchia, wate ka nanau maisi
taꞌabwi nokpo a bem nokneꞌ betchiꞌbo amet autuari. Intok
ketunia waate, junuen jukaꞌ wate tattaꞌabwi nokpo teuwaarita,
junakaꞌa machisi aꞌ teuwaaneeme, au yumaka amet autuari.
\v 11 Taa siꞌimeta inikaꞌa inien weyemta, jiba juꞌu Liojta
wepul tuꞌu jiapsi aꞌ jooa, juꞌu, junuen aꞌ eaꞌpo aman,
weꞌepulaka, bem au yumaka, bem a jooneeꞌuta amet autuame.
\s Siꞌime te itepo, wepul takaapo nau chupiam benasi maachi
\p
\v 12 Bweꞌituk juꞌu itom yoꞌowe Jesukrijto, takaata, jue
benasi ka nanau maisi machika nau aꞌ wepuꞌulaikaꞌa benasi
maachi. Intok junameꞌe, juebenaka juniꞌi, wepulsi nau
chupia.
\v 13 Bweꞌituk itepo te siꞌime, juriomtakai oo riekomtakai,
tekoka oo kaabeta tetekoka jiapsaka juniꞌi, taa Krijtota
yoem eiyaaka batoꞌowaawakai, siꞌime nau tee, wepul Liojta
tuꞌu jiapsie aman, itepo siꞌime, Liojta bichapo, takaata
wepuꞌulaiꞌireakaꞌa benasi te bitwa. Intok siꞌime itepo,
nanancha, wepul Liojta tuꞌu jiapsita amet jiapsatuari.
\p
\v 14 Juꞌu itom takaa, ka wepul weyeme jiba. Taa mamaka,
wokeka intok watek jue benasi ka nanau maisi machika
chupia.
\v 15 Junuen san, jumeꞌ wokim: “Kannee jumeꞌ mamam bena,
junuen san, kannee takaamak weye”, ti a jiaꞌateko, juniꞌi,
jiba juꞌu takaamak weye.
\v 16 Intok jumeꞌ nakam juniꞌi: “Kannee puusim bena,
junuen san nee ka juꞌu takaamak weye”, ti a jiaka juniꞌi,
jiba juꞌu takaamak weye.
\v 17 Bweꞌituk juꞌu itom takaa, siꞌime pusituko, kaachin
te a jikkaji ean. Intok juꞌu itom takaa, siꞌime nakamtuko,
kaachin te jita a jujjuꞌubwa ean.
\v 18 Taa juꞌu Lios, juꞌu ka nanau machikue, aapoꞌik junuen
aꞌ waataꞌpo aman, wepul takaata nau chupak.
\v 19 Junuen san, siꞌime, wepul weemta jiba tuko, kaachin
takaatu ean.
\v 20 Taa junuentaka juniꞌi, inien maachi, juebenaka ka
nanau machika juniꞌi, wepuꞌulai jiba juꞌu takaa.
\p
\v 21 Jumeꞌ puusim, jumeꞌ mamammeu: “Kaitaꞌpo ne emot
ea”, ti ka a jiia. Intok kia juꞌu koba juniꞌi, jumeꞌ
wokimmmeu: “Kaitaꞌpo ne emot ea”, ti ka a jiia.
\v 22 Taa cheꞌa juni san, juꞌu ka nanau machika itom
taka nau weyeme intok juꞌu cheꞌa kaitaꞌpo itom aet eeleeꞌu,
cheꞌa juniꞌi itou beꞌee.
\v 23 Intok ket, itom taka betana juꞌu cheꞌa juniꞌi itom
ito tiuleeꞌue, junae betana ket tee cheꞌa juniꞌi suasi
ujuꞌu.
\v 24 Juꞌu itom taka betana, kaachin itom ae eaꞌuta, ka
junuen eiyaaꞌpo. Taa aapo juꞌu Lios, junuen aꞌ taka chupak,
junuen beja jukaꞌ cheꞌa juniꞌi ka eiyaawamta, cheꞌa juniꞌi
itou tuꞌika itom aꞌ aniaꞌ betchiꞌbo.
\v 25 Junuen, tua ka nanau machika jukaꞌ takaata ka nattepola
au aꞌ ujuꞌuneꞌ betchiꞌbo, ala, jum takaapo, weꞌepulaika,
siꞌimeta nanancha au aꞌ eiyaaneꞌ betchiꞌbo.
\v 26 Takaapo mamam betana oo wokim betana oo ka nanau
machika weyemta betana, jak jiokot aꞌ machiako, juꞌu taka
siꞌime aꞌ ineꞌene. Taa intok juꞌu takaapo nau weyemta
betana, tuꞌik mabetao, siꞌime juꞌu taka alleene.
\p
\v 27 Iꞌan intoko, emeꞌe junameꞌem jumeꞌe, Jesukrijtota
sualeka, aꞌ taka benasi eiyaawame. Intok weꞌepulakai
em, jukaꞌ aꞌ takaawata nau chupaꞌi.
\v 28 Junuen san beja, juꞌu Lios, jumeꞌ Krijtota nau sualeme
nasuku, waatem yeu puꞌari. Weꞌepulaim a bem jooneeꞌu
yeu am puꞌari. Jumeꞌ bat yeu puꞌarim, Krijtota betana
naj bittuarim. Inimmet chaꞌaka intok, Liojta betana bem
juꞌuneiyaatuawaꞌu yee majtaneeme. Inimeꞌe wooimmet chaꞌakai
intok, jumeꞌe, Liojta nok lutuꞌuriata a yee aꞌ majtame.
Junak intok ket jumeꞌe, aapoꞌikue aniawakai, ka a jootu
maisi machik joame. Inimmet chaꞌaka intok, jumeꞌe, koꞌokoeme,
emo ineꞌetetuaꞌ betchiꞌbo au yumame. Inimmet chaꞌaka
intok, jumeꞌ a yee aniame. Intok jumeꞌe, jita weyeꞌpo,
bat jajapteme. Intok ket jumeꞌe, juebena ka nanau maisi
machik a nok betchiꞌbo junuen aꞌ mabetri.
\v 29 Bweꞌituk ka siꞌime Krijtota betana naj bittuari.
Ka siꞌime Liojta betana bem juꞌuneiyaatuawaꞌuta, yeteu
nonoka. Ka siꞌime, Liojta nok lutuꞌuriata a yee aꞌ majta.
Intok kia ka siꞌime juniꞌi, ka a jootu maisi machik aꞌ
jooa.
\v 30 Ka siꞌime jumeꞌ koꞌokoeme emo ineꞌetetuaꞌ betchiꞌbo
au yuuma. Ka siꞌime, juebena ka nanau maisi machik a
nok betchiꞌbo junuen aet juꞌuneetuari. Intok kia lutuꞌuria
juniꞌi, ka siꞌimem jukaꞌ junuen taꞌabwisi ka juꞌunakkiachika
nokwamta juꞌuneiyaaka, machisi a am teuwaaꞌpo.
\v 31 Junuen san emeꞌe, Liojta betana jukaꞌ cheꞌa juniꞌi
tuꞌika, enchim au yumaka a enchim jooneeꞌutau, yumaꞌa
betchiꞌbo aet emo utteꞌa jooriane. Taa ineponee ketuni
senu weemta cheꞌa juniꞌi tuꞌik ket enchim majtabae.
\c 13
\s Juꞌu yee nakwame
\p
\v 1 Ineponee ala ne, siꞌimem bepa cheꞌa ujyoisi a nokaꞌateko,
intok kia jumeꞌ ankelesim benasi juniꞌi, taa nee in yee
nakneeꞌuta ka taꞌaꞌateko, kia beja kubaji jiawaita simeꞌe
benasi jiune. Oo jita sisiꞌiwookim nat tajtawaka am
jiaꞌa benasia.
\v 2 Intok nee ket, Liojta betana juꞌuneetuawaka chukula
yeu weenemta a yeteu teuwaꞌateko, intok siꞌimeta ka juꞌuneiyaawamta
juꞌuneiyaꞌateko, intok ne ket, kia siꞌimekut koba suawaka,
intok ne ket, ka a jootu maisi machik betchiꞌbo, Liojtat
eaka aꞌ joaꞌateko, taa ne, in yee nakneeꞌuta ka taꞌaꞌateko,
kia beja ne aꞌ jooa.
\v 3 Intok ne siꞌimeta in jipueꞌuta, poobemmet aꞌ naꞌikimteko,
intok ne kia, in takaata juniꞌi, aꞌ tayaꞌanaꞌ betchiꞌbo
ino suꞌu tojaka juniꞌi, taa ka yee nakeka aꞌ joaꞌateko,
in joaꞌuta kaitaꞌpo tawane.
\p
\v 4 Juꞌu tua yee nakeme, ka seej chukti eaka, jitat a
boꞌo bicha. Tuꞌuwata jiba yeteu weiyaa. Intok ka jita
nau nae. Kaitae au uꞌuttia. Intok ka au cheꞌewarine.
\v 5 Juꞌu tua yee nakeme, kaitaꞌpo yee tiutua. Ka aapoꞌik
betchiꞌbo jiba tuꞌik eiyaa. Kaabetamak juꞌena. Intok
kaitat oꞌomte.
\v 6 Juꞌu tua yee nakeme, jumeꞌ watem ka tuꞌisi aneꞌuta
juꞌuneaka, ka aet alleebaane. Taa siꞌimeku tuꞌika lutuꞌuriakaꞌ
betchiꞌbo jiba alleene.
\v 7 Siꞌime au weyemta, Liojtat eaka aet a boꞌo bitne.
Ka seej chukti eaka, aꞌ ineꞌene.
\p
\v 8 Juꞌu yee nakwame, jakwoo juniꞌi ka luꞌutine. Taewai
yumaꞌane, Liojta betana lutuꞌuriata juꞌuneiyaaka teuwaame,
ka bem intok yee aꞌ majtaneꞌpo. Intok kia jumeꞌe, ka
nanau maisi nokame, bem kaabeꞌintoktuneꞌpo. Intok kia
juꞌu tuꞌisi jitat juꞌuneewame juniꞌi, ka intok aꞌ utteꞌatuneꞌpo.
\v 9 Itepote ala, ka yumaꞌik, watek jiba te taꞌaa. Intok
tee ka yumaꞌisia Liojta betana nok lutuꞌuriata, chukula
yeu weenemta yee majta.
\v 10 Taa chukula jukaꞌ Liojta betana weyemta yumaꞌisi
itom aꞌ juꞌuneiyaao, junako te ka iꞌan benasi, watekut
jiba juꞌuneene.
\p
\v 11 Maasu inepo ilitchikai, ilitchi benasi ne nookan.
Intok ne jiba junaen bem joaꞌuta tuꞌureka ame benasi
ean. Taa nee yoꞌotukai, ilitchi benasi in machiakaꞌuta,
nee aꞌ koptak.
\v 12 Ket jiba junaeni, iꞌani, te jukaꞌ Liojta betana
itom juꞌuneiyaaꞌut te ka yumaꞌisi, taa rebe rebekti te
aet juꞌunea. Taa junakaꞌa taewaita yumako, te siꞌimeta
machisi juꞌuneiyaane. Iꞌan, inepone, kia rebe rebekti
ne jiba aꞌ juꞌuneiyaa. Taa chukula, junako ne yumaꞌisi
aꞌ juꞌuneiyaane. Iꞌan Liojta nee juꞌuneiyaꞌa benasia.
\v 13 Junuen san beja, Jesukrijtota itom sualeka intok
ae betana jukaꞌ tuꞌik chukula itom mabet boꞌo bitneeꞌu,
intok juꞌu, itom yee nakneeꞌu jiba yuu itot aune. Taa
inimeꞌe baji weemta betana, juꞌu itom yee nakneeꞌu, cheꞌa
siꞌimem bepa bat eiyaawatchi.
\c 14
\s Liojta tuꞌu jiapsie, ka nanau maisi nokwame
\p
\v 1 Junuen san enchim yee nakneeꞌuta emot auneꞌ betchiꞌbo,
aet emo temaine. Intok ket iniamak nau, Liojta betana
enchim au yumaka a jooneeꞌuta, au bicha aꞌaune. Taa juꞌu
cheꞌa juniꞌi enchim eiyaaneeꞌu, Liojta betana aꞌ juꞌuneiyaaka
aꞌ nok lutuꞌuriawata enchim yee majtaneeꞌu junaꞌatune.
\v 2 Bweꞌituk juꞌu taꞌabwik, ka juꞌunakkiachik nokame,
Liojta mak jiba etejo. Bweꞌituk kaabe a aet juꞌuneenee
juꞌu aꞌ teuwaaꞌut. Jukaꞌ aꞌ teuwaaꞌuta, Liojta tuꞌu jiapsi
junaꞌa juꞌu aꞌ noktuame. Taa juꞌu aꞌ teuwaaꞌu, ka aet
juꞌuneewatchi.
\v 3 Taa juꞌu, Liojta betana aꞌ juꞌuneiyaaka, aꞌ nok lutuꞌuriawata
yee majtame, watem, cheꞌa juniꞌi yumaꞌisia Krijtota am
sualneꞌ betchiꞌbo aꞌ jooa. Ket junuen am nok tejwaaka,
junaen ket am jiapsi joꞌa betchiꞌbo.
\v 4 Juꞌu junuen, taꞌabwik, ka juꞌunakkiachik nokame, aapo
jiba, cheꞌa tuꞌisi Krijtota aꞌ sualneeꞌuta junae jajamne.
Taa juꞌu, Liojta betana aꞌ juꞌuneiyaaka aꞌ nok lutuꞌuriawata
yee majtame, jumeꞌ Krijtota sualeme, cheꞌa tuꞌisi Krijtota
bem sualneeꞌut am ania.
\p
\v 5 Ineponee ala, enchim siꞌimem juniꞌi, taꞌabwik, ka
juꞌunakkiachik nokwame ne enchim au yumaꞌatuapea oꞌoben.
Taa ne, cheꞌa juniꞌi, Liojta betana enchim aꞌ juꞌuneiyaaka
aꞌ nok lutuꞌuriawata enchim yee aꞌ majtaneeꞌuta emo
tana waata. Bweꞌituk inien weyeme boꞌo jooriaꞌpo cheꞌa
juniꞌi tuꞌi, juꞌu taꞌabwik ka juꞌunakkiachik a nokwamta
bepa. Ala juꞌu, junaen ka juꞌunakkiachik nokwame, aꞌ teuwaaꞌpo
juꞌunakkiachisia teuwaatuko, jiba junen tuꞌine. Junae,
jumeꞌ Krijtota nau sualeme, cheꞌa juniꞌi tuꞌisi bem aꞌ
sualneeꞌut am aniaꞌ betchiꞌbo.
\v 6 Junuen san, Krijtopo nemak werim, inepo emou aneka
intok ne junuen, ka juꞌunakkiachik emou nokaꞌateko, kaitaꞌpo
emou tuꞌine. Ala ne, Liojta betana in juꞌuneiyaatuawaꞌu
betana emou aꞌ teuwaꞌateko, oo aapoꞌik betana nok lutuꞌuriata
enchim aꞌ taꞌaaneeꞌuta oo Liojta betana aet juꞌuneetuawaka,
chukula yeu weenemta emou teuwaꞌateko, oo jitaa, senuk
lutuꞌuriat enchim majtakai, junak ala, junaꞌa emou tuꞌine.
\p
\v 7 Maasuko ketchia, jumeꞌ jiutua betchiꞌbo yaꞌarim,
ka bempola jiame, kusiatuko, oo aapatuko, junameꞌe intok,
kia beja jiutuawaꞌateko, ka juꞌunakkiachinee jukaꞌ aꞌ
ponaꞌuta.
\v 8 Intok kia jum nassuabaawaka, nau kimuwaꞌpo juniꞌi,
jukaꞌ kopre kusiata, ka junama waꞌam jiutuawao, jumeꞌ
sontaom nassuabaeme, kaabe jiꞌaaniraane.
\v 9 Emou juniꞌi ket jiba inien yeu weama. Emeꞌe, ka
juꞌunakkiachik nokaꞌateko, kaabe enchim teuwaaꞌut juꞌuneene.
Cheꞌa tuꞌisi, kia jekapo noknee.
\v 10 Lutula weeꞌpo inim bwiapo, juebena, jumeꞌ ka nanau
machik nokame. Taa intok ketchia, jumeꞌ aꞌ nokame jiba
emo jikkaja.
\v 11 Taa ineponee intok, senuk, ka in nokpo neu nokamta
ka aꞌ jikkajakaꞌateko, junaꞌa, taꞌabwi bwiaarau in jometukaꞌa
benasia nee eiyaane. Intok ketchia, aapo juniꞌi, nee betchiꞌbo
junuen eiyaanaa.
\v 12 Junuen san, emeꞌe, Liojta betana enchim au yumaka,
a jooneeꞌut jiba jiapsekai, cheꞌa bat naataka jumeꞌ Krijtopo
nau werim, bichau bicha, cheꞌa juniꞌi tuꞌisi bem aꞌ sualneeꞌut
am anianemta enchim a jooneeꞌuta yeu aꞌ puꞌane.
\v 13 Junuen san beja, juꞌu junuen, taꞌabwik, ka juꞌunakkiachik
nokame, Liojtau bicha aet ujbwanne, jukaꞌ junuen aꞌ nokaꞌuta,
juꞌunakkiachisi a yeu aꞌ bwij betchiꞌbo.
\v 14 Bweꞌituk inepo nee junaen, taꞌabwi nokpo ka juꞌunakkiachisia
Liojtau bicha nokaꞌateko, lutuꞌuria ala, senuk ka au juꞌuneiyaamta
benasi machika, au bicha in nokaꞌapo. Taa junuen, inepo
betchiꞌbo in a jita mammateꞌue, kaita tuꞌik nee jajjamne.
\v 15 Inien nee cheꞌa aꞌ tuꞌi machilee, junuen in ka
ino juꞌuneiyaamta benasi machika, au bicha in nokneꞌpo.
Taa ketchia, jukaꞌ in au teuwaaꞌpo ket in juꞌuneeneꞌpo.
Intok ket jiba junaen, Liojta yoꞌori betchiꞌbo, ka ino
juꞌuneiyaamta benasi machika au bicha in bwikneꞌpo.
Taa ketchia, jukaꞌ in au bicha in bwikaꞌut in juꞌuneeneꞌpo.
\v 16 Bweꞌituk empo junuen, wepulsi ka emo juꞌuneiyaamta
benaka Liojta yoꞌoreka intok aꞌ bai saeka au bicha nokaꞌateko,
junak juꞌu juꞌubwa Krijtota sualeme enchi jikkajaka
juniꞌi, kaachin emak eaka Liojta bai saune, aapoꞌik juꞌu
em jiaꞌut ka aꞌ juꞌuneaꞌ betchiꞌbo.
\v 17 Juꞌu junuen Liojtau bicha nokaka em aꞌ baisauꞌu,
tua tuꞌineeka juniꞌi, taa juꞌu enchi jikkajame, Liojta
betana weyemtat aꞌ suatuka aꞌ jajamneeꞌuta, ka aet anianaa.
\v 18 Inepo ala nee, Liojta baisae, enchim siꞌimem bepa
juniꞌi cheꞌa buꞌuuk emo bepa, Liojtau bicha, taꞌabwisi
a junuen in au nokaꞌapo.
\v 19 Taa jumeꞌ Krijtota sualeme nau aneꞌepo ne cheꞌa
aꞌ tuꞌi machia mamni jikkajiwatchisia in teuwaaneꞌpo,
junuen watem nookim in am majtabaeꞌ betchiꞌbo, junuen,
woj mamni miil weyemta, taꞌabwika, ka juꞌunakkiachik in
teuwaaneꞌpo bepa.
\p
\v 20 Krijtopo nemak werim, enchim emo ujuꞌuneꞌpo betana,
ka illitchi benasi ee baane. Ala, juꞌu ka tuꞌik ka enchim
boꞌo joorianeꞌ betchiꞌbo, illitchi benasi emo eiyaane.
Taa enchim tuꞌisi emo ujuꞌuneꞌpo betana, yoꞌowem benasi
eebaane.
\v 21 Taa nesaurim jiꞌojteipo inen jiꞌojtei: “Inia
yoemratau ne, ka ame benasi nokame intok jumeꞌ ka amemak
joomem ne ameu am noktuane. Taa kia junuentakai juniꞌi,
kattim nee nok jikkajine”, ti jiia juꞌu achai Lios.
\v 22 Junuen san, juꞌu Liojta tuꞌu jiapsie junuen ka
nanau machik, senuk a nokneeꞌu, jumeꞌ juriom, ka Krijtota
sualeme, aet bem mammateneꞌ betchiꞌbo weye. Taa juꞌu
intok, senuk, Liojta betana juꞌuneaka aꞌ nok lutuꞌuriawata,
senuk yee majtaneeꞌu, jumeꞌ Krijtota sualeme, aet bem
mammateneꞌ betchiꞌbo weye. Intok ka jumeꞌe, kee Krijtota
sualeme betchiꞌbo.
\v 23 Junako jumeꞌ Krijtota sualeme, siꞌime nau aneka,
ka nanau machik, ka juꞌunakkiachik siꞌimem junuen nokao,
intok jumeꞌe, juꞌu lutuꞌuriat kee juꞌuneame oo Krijtota
ka sualeme, wate ama yajako, jiba tua inimeꞌe enchim ka
suatulam ti jiune.
\v 24 Taa enchim siꞌimem, Liojta betana aꞌ nok lutuꞌuriawat
juꞌuneaka, jikkajiwatchisia enchim aꞌ teuwaao, intok seenu,
ka Krijtota sualeka oo kee tuꞌisi aet juꞌuneame ama
yepsako, junak junaꞌa, ka tuꞌisi aꞌ aulaꞌut juꞌuneene,
intok junuen, enchim teuwaaꞌuta jikkajaka, juꞌu lutuꞌuriat
au temaine.
\v 25 Intok ket junueni, junakaꞌa, aapoꞌik jiba juꞌuneiyaaka,
juꞌu au aꞌ eetuaꞌut, Liojta aet juꞌuneaꞌpo juꞌuneaka,
inen intok ketchia, Liojta yoꞌore betchiꞌbo tonommea
kiktene, intok junuen tua aꞌ lutuꞌuria, ti jiune, Liojta
emomaktukaꞌpo.
\s Siꞌimeta enchim joaꞌuta, ka jak waꞌam, taa aet suaka aꞌ joonee
\p
\v 26 Junak san Krijtopo nemak werim, inien tua weye,
Liojta yoꞌoreka nau aneka, waate emo betana bwikimmea,
salmom teammea, Liojtau bicha bwikaka aꞌ yoꞌorine. Waate
intok, Liojta nok lutuꞌuriae, yee majtane, oo Liojta betana
enchim juꞌuneiyaatuawaꞌuta aꞌ teuwaane. Oo ket, Liojta
tuꞌu jiapsie, ka juꞌunakkiachik a noknee. Oo senu intok,
jukaꞌ junuen nokpo teuwaarita, juꞌunakkiachisia aꞌ teuwaaneeme
a junuen aayu. Intok junueni, siꞌime juꞌu enchim boꞌo
jooriaꞌu, jumeꞌ Krijtopo nau werim, cheꞌa juniꞌi tuꞌisi
bem aꞌ sualneeꞌut am ania betchiꞌbotune.
\v 27 Taa junamaꞌa intok, jumeꞌ Liojta tuꞌu jiapsie, ka
nanau maisi ka jikkajiwatchik nokneeme, wooika, oo bajinee
jiba. Ka siꞌime nawi. Taa weꞌepulaka nat chaꞌakai nokne.
Intok ketchia, juꞌu, junameꞌe teuwaaꞌuta, juꞌunakkiachisia
aꞌ teuwaaneeme ama annee.
\v 28 Taa juꞌu, junuen, junakaꞌa juꞌunakkiachisia aꞌ teuwaaneemta
kaabetuko, cheꞌa tuꞌinee junamaꞌa nau anwaꞌapo, kaabeta
junuen, ka juꞌunakkiachik aꞌ nokneꞌpo. Ala, weꞌepulaka
bem teuwaabaeꞌuta, bempola jiba, ka kusisi Liojtamak etejone.
\v 29 Intok ket jiba junaeni, jumeꞌ Liojta betana aꞌ
juꞌuneiyaaka, jukaꞌ lutuꞌuriata yee majtaneeme, wooi oo
bajinee jiba, jumeꞌ nokneeme. Jumeꞌ waate intok, jukaꞌ
teuwaawamta, Liojta betana aꞌ weyeꞌpo, oo ka junaen aꞌ
weyeꞌpo, aet mammatene.
\v 30 Taa intok, junamaꞌa, senuk anemta, juꞌu Lios, senu
weemta aꞌ teuwaaneeꞌut aꞌ juꞌuneetuako, juꞌu jaibu ama
aneka nokame, nok yaatine, junakaꞌa nokneꞌ betchiꞌbo.
\v 31 Junueni, siꞌime emeꞌe, jumeꞌ junuen Liojta betana
weyemta aꞌ juꞌuneiyaatuawakame, weꞌepulaka junuen nok
betchiꞌbo, nat chaꞌaka emo aꞌ tekil makne. Intok junuen,
siꞌimem, Liojta nok lutuꞌuriata juꞌuneiyaaka, ket junuen
cheꞌa tuꞌisi bem aet jiapsineꞌ betchiꞌbo.
\v 32 Jumeꞌ intok, Liojta betana weyemta juꞌuneiyaatuawaka,
yee aꞌ majtame, junae betana, aꞌ boꞌo jooria betchiꞌbo
suasi a emo yuꞌiine.
\v 33 Bweꞌituk juꞌu Lios, wepulsi suasi weyemta eiyaa.
Intok jukaꞌ kia jak waꞌam, jachin juniꞌi weyemta, ka tuꞌure.
\p Siꞌimekut, jumeꞌ Krijtota sualeka bem nau yaajaꞌpo
aꞌ weetuawaꞌa benasia.
\v 34 Jumeꞌ jaamuchim, jum Krijtota nau sualeme, Liojta
yoꞌoreꞌpo, ka monteka ama annee. Bweꞌituk bempo, ka au
lutuꞌuriak. Taa a ameu noktune, Liojta betana nesauta
aꞌ lutuꞌuria yaꞌari benasia.
\v 35 Taa bempo, jita juꞌuneiyaabaeꞌeteko, joꞌaraapo bem
kukunammeu nattemaine. Bweꞌituk Liojta yoꞌoriwaka nau
anwaꞌapo, jamutta aꞌ nokneeꞌu, ka junuen aet utti.
\p
\v 36 Auꞌem waatine, jukaꞌ Liojta nok lutuꞌuriata, ka
emo betana bat aꞌ juꞌuneiyaawakaꞌpo. Intok ka emeꞌe
jiba juniꞌi, jumeꞌ aꞌ sualeka aꞌ mabetlame.
\v 37 Taa seenu, Liojta betana aꞌ juꞌuneiyaaka, aꞌ nok
lutuꞌuriawata yeteu aꞌ teuwaaneꞌpo, au ama yumaꞌaleeme,
oo Liojta betana aꞌ tuꞌu jiapsie aniawaka, siꞌimeta a
au joaꞌatiꞌeeneeme, inikaꞌa in emou jiꞌojteꞌuta, yoꞌowe
Jesukrijtota betana in aet nesauritukaꞌpo aman aꞌ juꞌuneiyaane.
\v 38 Taa juꞌu, ka junaen aꞌ lutuꞌuria tiꞌeame, junak,
aapo juniꞌi, Krijtota sualeme nasuk aapoꞌik kaita lutuꞌuriakaꞌpo
juꞌuneiyaanaa.
\p
\v 39 Junuen san, Krijtopo nemak werim, Liojta betana
aꞌ juꞌuneiyaaka aꞌ nok lutuꞌuriawata a enchim teuwaaneeꞌut,
emo temaine. Intok jumeꞌ junuen Liojta betana tuꞌu jiapsie,
ka juꞌunakkiachik nokame, junae betana kaabe ameu suuane.
\v 40 Taa siꞌimeta jukaꞌ enchim boꞌo jooriaꞌuta, ka kia
jak waꞌam juniꞌi, taa tua junama waꞌam suasi aꞌ joone,
aꞌ weꞌeaꞌpo amani.
\c 15
\s Jesukrijtota, aꞌ jiabijtekaꞌu
\p
\v 1 Iꞌan intoko, Krijtopo nemak werim, Jesukrijtota betana
nok lutuꞌuriata in enchim majtakaꞌu beu ne enchim waati
iꞌa. Jiba iniꞌi nok lutuꞌuria junaꞌa juꞌu enchim mabetakaꞌu,
intok jiba inia betchiꞌbo emeꞌe bichau bicha ka taꞌabwisi
intok, Krijtota sual saka.
\v 2 Intok ketchia, jiba inia bemela nok lutuꞌuriata
betchiꞌbo emeꞌe jinneꞌurim, emeꞌe, in enchim aꞌ majtakaꞌa
benasia tua junen jiaka aꞌ sualeꞌeteko. Taa intok, jukaꞌ
enchim sualekaꞌuta, kia kaita aꞌ teuwaao jiba, junak ka
jinneꞌurimtune.
\p
\v 3 Cheꞌa bat naatakai ineponee jukaꞌ Krijtota nee
aꞌ juꞌuneiyaatuaka, junakaꞌa nee enchim aꞌ majtak. Jesukrijtota
itom ka tuꞌuwa yaꞌarim betchiꞌbo aꞌ mukukaꞌuta ne enchim
majtala. Jum Liojta nok lutuꞌuriapo jaibu aꞌ jiꞌojteitukaꞌpo
amani junuen aꞌ mukneꞌeti jiakai.
\v 4 Intok ketchia aꞌ maꞌawakaꞌpo intok baji taewaita
weyeka aꞌ jiabijtekaꞌpo. Ket jiba jum Liojta nok lutuꞌuriapo
aꞌ jiꞌojteitukaꞌpo benasi.
\v 5 Intok ket Peotau, juꞌu Sepajpo taꞌeewamtau au yeu
aꞌ machiakaꞌpo. Cheꞌa chukula intok ket, jumeꞌ woj mamni
ama woika, yeu aꞌ puꞌarimmeu au yeu aꞌ machiakaꞌpo.
\v 6 Chukula intok ketchia, jumeꞌe, aapoꞌik sualeka, mamni
sientota bepa, wepulsi nau anemmeu, au yeu aꞌ machiakaꞌpo.
Inimeꞌe betana intoko, juebenaka ketun jiapsa. Wate intok
kokkosuk.
\v 7 Intok cheꞌa chukula, Jakooboꞌ teamtau, juꞌu yeu aꞌ
puꞌakamtau au yeu machiak. Intok ket cheꞌa chukula, siꞌime
jumeꞌ yeu aꞌ puꞌakaꞌummewi yeu aꞌ machiakaꞌpo.
\p
\v 8 Junak intok, cheꞌa siꞌimemmet chukula, neu ket au
yeu machiak. Inepo ala ne junuen, ka jumeꞌ watem benasi
aapoꞌik betana majtitakai juniꞌi, kia seej chukti yeu
puꞌatuk.
\v 9 Bweꞌituk inepo, siꞌime jumeꞌ wate, Krijtota yeu puꞌarim
bepa, cheꞌa ka neu chaꞌaka ame benasi in eiyaanaaꞌu, intok
kia ne, ame benasi in taꞌeenaꞌpo juniꞌi ka neu lutuꞌuria
tu machia juniꞌi. Bweꞌituk inepone, jumeꞌ Krijtota nau
sualeme, ka ama eltuaka ameu suuasuk.
\v 10 Taa ne, Jesukrijtota betana yeu puꞌari, aapoꞌik
tuꞌisi nee aꞌ nakekaꞌ betchiꞌbo. Intok junuen aapoꞌik
nee jiokoleka, aapoꞌik nee yeu puꞌakaꞌuta, ka kia beja
junen taawak. Taa cheꞌa juni san ne, siꞌimem bempoꞌim
bepa ne tekipanoala. Taa ka inepo in eaꞌpo aman junaꞌa
junuen tekipanoame. Taa aapo juꞌu Lios, tuꞌisi yee aꞌ
nakeꞌ betchiꞌbo nee aniak.
\v 11 Taa iꞌan, kia nee betana oo wate yeu puꞌarim betana
emeꞌe majtimtuko, junaꞌa kaachin jiubae. Inien tee siꞌime
enchim majtala, intok iniꞌi su junaꞌa juꞌu enchim sualekaꞌu.
\s Jumeꞌ kokkoarim jijiabijteꞌu
\p
\v 12 Taa Jesukrijtota betana, aapoꞌik kokkoarim nasuk
aꞌ jiabijtekaꞌu betana itom yee aꞌ majtao, jaisa betchiꞌbo
emo betana waate, kokkoarim ka am jijiabijteꞌeti jiia.
\v 13 Bweꞌituk jumeꞌ kokkoarim ka am jijiabijteo, junak
ket Jesukrijto juniꞌi, aapo ka jiabijtek.
\v 14 Intok junuen Jesukrijtota ka jiabijteko, juꞌu aapoꞌik
betana nok lutuꞌuria, itom yee majtaꞌu, tua kaita teuwaa.
Intok kia aapoꞌik enchim sualeka juniꞌi, kaita em aet
jajamla.
\v 15 Junuen aꞌ lutuꞌuriatuko, itepo, Liojta betana juꞌu
lutuꞌuria ti jiaka itom teuwaaꞌuta, aa nokiꞌichiatu ean.
Bweꞌituk itepote, jukaꞌ Liojta, Jesukrijtota aꞌ jiabijtetuak
ti jiula. Junuen san, jumeꞌ kokkoarim lutuꞌuriapo ka
am jijiabijteo, junak ket ka lutuꞌuria, Liojta Jesukrijtota
aꞌ jiabijtetuakaꞌpo.
\v 16 Bweꞌituk jumeꞌ kokkoarim ka am jijiabijtetuawao,
junak ket aapo juꞌu Jesukrijto juniꞌi ka jiabijtela.
\v 17 Intok junuen juꞌu Jesukrijtota ka jiabijtelatuko,
emeꞌe tua kaita betchiꞌbo aꞌ suale. Enchim ka tuꞌuwa
yaꞌarimmet emeꞌe ketuni ka jiokoirim.
\v 18 Intok tua junuen aꞌ lutuꞌuriatuko, jumeꞌe, Jesukrijtota
sualeka kokkosukame, jiba betchiꞌbo kokkolam.
\v 19 Itepo intok, jumeꞌ Jesukrijtota sualeme, ae betana
inim bwiapo jiapsaka jiba, tee tuꞌik ae tana mabet boꞌo
bichaꞌateko, siꞌimem bepa tee cheꞌa juniꞌi jiokolwatchisi
machine.
\p
\v 20 Taa iꞌan tua lutuꞌuria, jukaꞌ Jesukrijtota kokkoarim
nasuk aꞌ jiabijtetuawakaꞌpo. Aapo intok junuen jiabijteka
juꞌu aꞌ teuwaame, jumeꞌ aapoꞌik sualeka kokkokame, lutuꞌuriapo
am jiabijteneꞌpo.
\v 21 Bweꞌituk jiba junaen, wepul yoemta betchiꞌbo, kokkowamta
naatekaꞌa benasia, ket junuen wepul yoemta betana naatek
juꞌu kokkoarim nasuk jiabijtewame.
\v 22 Siꞌimem juꞌu, Adamtukaꞌuta betchiꞌbo, ka tuꞌisi
tawaka kokkowaꞌa benasia, ket jiba junaensu, siꞌime jumeꞌe,
Jesukrijtota sualeme, ae betana, jiba yuu jiapsituannaa.
\v 23 Taa weꞌepulaim nat chaꞌakai, taewaim ameu yeu am
puꞌawaꞌummetchi. Juꞌu Jesukrijto, jukaꞌ jiabijtewamta
aꞌ teuwaaka jiabijtekame batchia. Chukula intok, Jesukrijtota
juchi aꞌabo notteo, jumeꞌ aapoꞌik sualeka kokkokame ket
jiabijtene.
\v 24 Junak intok yumaꞌanee juꞌu taewai, siꞌimeta aet
luꞌutineeꞌu. Junak, Jesukrijtota siꞌime yoꞌo yaꞌuraata
kaitaꞌpo tawaako intok junuen, aꞌ yaꞌuraawata achai Liojtau
suꞌu tojine.
\v 25 Bweꞌituk juꞌu yoꞌowe Jesukrijto, inikaꞌa kee yeu
weyeo, inia bepat bat, inim bwiapo siꞌimekut nesaweka
aꞌ yejneeꞌuta au lutuꞌuriatune, jumeꞌ aꞌ ee bejeꞌeka
aneme am kobaꞌasuꞌpo tajtia.
\v 26 Junak intok, iniat chukula juꞌu kokkowame, juꞌu
yee bejeꞌeka weyeme, jiba betchiꞌbo luꞌutanaa.
\v 27 Bweꞌituk juꞌu Lios, Jesukrijtota, siꞌimek bepa aꞌ
yoꞌotuneꞌ betchiꞌbo, au lutuꞌuriaka, siꞌimeta au aꞌ suꞌu
tojak. Taa Liojta nok lutuꞌuriapo junuen, siꞌimeta au
suꞌu tojituk ti Krijtotau jiaka juniꞌi, ite a juꞌuneene,
ka achai Liojtau ket aꞌ yoꞌotukaꞌpo. Bweꞌituk aapo Lios
junaꞌa juꞌu siꞌimeku aꞌ yoꞌo yaakame.
\v 28 Junak intok, siꞌimeta Jesukrijtota, siꞌimeku yoꞌotaka
aneo, aapo Jesukrijto, juꞌu usiwai, achai Liojtau au suꞌu
tojine, juꞌu, siꞌimeku aꞌ yoꞌo yaakamtawi. Junuen beja
juꞌu achai Lios, siꞌimeku, siꞌimem bepa yoꞌotune.
\p
\v 29 Junuentukaꞌateko, waate, jumeꞌ kokkoarim betchiꞌbo
emo babatoowame, ka junuen an ean, jumeꞌ kokkoarim lutuꞌuriapo
ka am jijiabijteo. Kaabe junuen emo batoꞌowaa ean.
\p
\v 30 Junuentukaꞌateko, jumeꞌ kokkoarim ka jiabijteneeo,
jiba jinilwatchiku itom ito bichaꞌu tua kaabetau tuꞌineeka
we ean.
\v 31 Chikti taꞌapo in meꞌepeewaꞌu jinilwatchisi neu
aayuk. Iniꞌi intok junuen in auneeꞌu, Krijtopo nemak
werim, Jesukrijtota enchim sualeꞌ betchiꞌbo, nee ka jain
eaka, aet yanti elaka nee junuen ino bicha.
\v 32 Inepo jum bweꞌu joꞌara Eepesoꞌ teaꞌpo, jumeꞌ ouseimmak
nassuaka, jiokot ino bichakai. Taa nee junaet kaita jajamne,
tua lutuꞌuriapo jumeꞌ kokkoarim ka am jijiabijteo. Junuentukaꞌateko
inen tee jiu ean: “Jiꞌibwawamta intok jiꞌiwamta tee
weetuane, kee yoko oo matchuko kokkokai.”
\p
\v 33 Jumeꞌ junuen jiame betana kateꞌem emo bai tattaꞌaatebo.
Lutuꞌuriapo inen jiuwaꞌa benasia: “Jumeꞌ ka tuꞌi yoemem,
jumeꞌ tuꞌik boꞌo jooriame, ka tuꞌikut am jiꞌoptua.”
\v 34 Ka kia jak waꞌam, taꞌabwisi intok eaka jiapsibaane.
Taa intok, siꞌimeku Krijtota nok lutuꞌuriawata tua junama
waꞌam aꞌ sualeka, ka tuꞌisi ka enchim auneeꞌut emo suuane.
Bweꞌituk emo betana waate ka Liojta taꞌaa. Inien ne
emou jiia enchim tiuneꞌ betchiꞌbo.
\s Jumeꞌ kokkoarim jiabijteneeꞌu
\p
\v 35 Taa jiba tua, senu nattemaibaanee: “Jaisam tua
jiabijtenee jumeꞌ kokkoarim. Jaisa machim tua takaane”,
ti jiakai.
\v 36 Tua kaita mammatenee juꞌu junuen nattemaineeme.
Bweꞌituk juꞌu jiabijtewame, bachia etwakame benasi maachi.
Junaꞌa bachia, ka intok bachiataka tawanee jukaꞌ basiunemta
yoꞌotuneꞌ betchiꞌbo.
\v 37 Taa juꞌu etnaame, ka juꞌu ouwo ba siuneeme junaꞌa.
Ala juꞌu bachia junaꞌa etnaame. Tiikotaka oo ket jita
taꞌabwik bachiatakai.
\v 38 Chukula intok, juꞌu Lios junakaꞌa bachiata, aꞌ eaꞌpo
maisi maachik aꞌ ba siutuane. Intok jukaꞌ bachiata, weꞌepulaik,
aꞌ eaꞌpo aman aꞌ ouwokaꞌuta aꞌ autuane.
\v 39 Ka siꞌime juꞌu jiapsame, nanaꞌanak takaak. Jukaꞌ
yoem takaata aꞌ machiakaꞌut te juꞌunea. Intok siꞌime
jumeꞌ naikim wokekame taꞌabwisi machik takaak. Jumeꞌ
wikitchim juniꞌi ket tattaꞌabwisi maachi. Jumeꞌ kuchum
juniꞌi ket, cheꞌa tattaꞌabwisi maachi.
\v 40 Ket jiba junaeni, teekapo jiapsaka, intok inim bwiapo
jiapsame, ka nanancha maachi. Taa jumeꞌ teekau jiapsame,
ka jumeꞌ im bwiapo jiapsame benaka, taa cheꞌa taꞌabwik
ujyooriak.
\v 41 Juꞌu taꞌa tachiria, juꞌu mecha tachiriata bepa
taꞌabwisi maachi. Intok kia juꞌu chokim tachiria juniꞌi
ka nanancha maachi. Intok jumeꞌ chokim nasuku, nat bepa
tattaꞌabwik cheꞌa tattaꞌabwik tachiriak.
\v 42 Jumeꞌ kokkoarim jiabijteneeꞌu betana juꞌu bachia
etwakame benasi maachi. Juꞌu takaa, a moyeka maꞌatune.
Taa juꞌu jiabijteneeme, ka intok mukneeka yejtene.
\v 43 Ka bibit machika maꞌawaka juniꞌi, intok taꞌabwisi,
suum watchika ujyoika jiabijtene. Tua kaita utteꞌaka
juniꞌi, bwiata betuk maꞌawaka, siꞌimeku utteꞌaka jiabijtene.
\v 44 Inim juꞌunakteitaka, juꞌu takaa, maꞌatuko, chukula
jiabijteka, Liojta betana, teekapo jiapsi betchiꞌbo takaatakai
yejtene. Bweꞌituk inim bwiapo jumeꞌ taka juꞌunakteim
ayukaꞌa benasia ket jiba junaen jum teekapo jiapsi betchiꞌbo
jumeꞌ takaam aane.
\p
\v 45 Junuen san, Liojta nok lutuꞌuriapo inen jiꞌojtei:
“Juꞌu oꞌou, bat yoem yaꞌawakame, juꞌu Adam teame, Liojta
betana inim jiapsiwamtae juꞌunakteitaka jiapsak.” Taa
juchi juꞌu senu Adam teaka, Liojta uꞌusi chukula yebijneeꞌu,
junaꞌa, Liojta tuꞌu jiapsie jiba yuu jiapsiwamta yetet
autuaneeka yepsak.
\v 46 Taa juꞌu bat juꞌunaktewame, ka jum teekapo jiapsi
betchiꞌbo junaꞌatuk, taa inim bwiapo jiapsi betchiꞌbo.
Ala chukula, juꞌu, jum teekapo jiapsi betchiꞌbo junaꞌatune.
\v 47 Juꞌu bat yoemtukaꞌu, bwiae juꞌunaktewakame, inim
bwiapo betchiꞌbo juꞌunaktewak. Juꞌu intok chukula weyeme,
juꞌu itom yoꞌowe Jesukrijto, teekau, Liojta yoꞌo nesaweka
katekaꞌpo jiapsa.
\v 48 Jumeꞌ inim, iꞌan itom takaam, jiba junae yoeme, bwiae
juꞌunaktewakamta takaasukaꞌu bebena. Jumeꞌ intok teekau
betchiꞌbo takaamtuneeme, juꞌu yoꞌowe Jesukrijto, teekau
jiapsamta takaam benane.
\v 49 Iꞌan itepo, juꞌu yoeme bwiae juꞌunaktewakamta benasi
mamachikai, ket jiba junaeni, chukula, itepotee junae teekapo
jiapsamta bebenane.
\p
\v 50 Inen ne emou jiubae, Krijtopo nemak werim. Jumeꞌ
iꞌan inim itom takaam, ama teekapo, Liojta yoꞌotaka katekaꞌu,
kaachin bem aman a jiapsineꞌpo betana. Bweꞌituk juꞌu,
ka jiba betchiꞌbotuneeme, jum jiba yuu jiapsiwaꞌu, ka
a aman jiapsa.
\v 51 Taa senu weemtat, kaabeta juꞌuneiyaaꞌuta ne enchim
juꞌuneiyaa iꞌa. Katte siꞌime kokkone. Taa ala, siꞌime
te, ka iꞌan bebenanee bweꞌituk juꞌu Lios, takaam tattaꞌabwisi
mamachim itot autuane.
\v 52 Kia senu wechiapo, senu repiktiapo benasi, jukaꞌ
sisiꞌiwok kusiata, kaaꞌintok jiuneeka, kusisi aꞌ jiao,
jumeꞌ kokkoarim jiabijtenemme, jakwoo juniꞌi kaaꞌintok
kokkoneekai. Itepo intok tee, ka iꞌan bebenane. Taa tattaꞌabwisi
te juꞌunaktenaa.
\v 53 Bweꞌituk iꞌanꞌ inim itom jiapsaꞌu, luꞌutineeme,
utteꞌa, jiba yuu betchiꞌbo itom jiapsineeꞌuta itot aꞌ
autuanaaꞌpo. Intok juꞌu itom taka juniꞌi, luꞌutineeme,
utteꞌa jiba betchiꞌbo itom takaaneeꞌum, itot am autuawaꞌpo.
\v 54 Intok inikaꞌa inien itou chupsuko, junak inim itom
juꞌunaktei, jukaꞌ takaata luꞌutineemta, jiba yuu jiapsi
betchiꞌbo, taꞌabwisi yaꞌatuneeo, intok jiba inimeꞌe itom
takaam kokkoneeme, jakwoo juniꞌi kaaꞌintok kokkoneꞌ betchiꞌbo,
taꞌabwisi yaꞌatuneeo, junak chupnee juꞌu, jum Liojta nok
lutuꞌuriapo jiꞌojtei: “Jiba betchiꞌbo juꞌu kokkowame,
Krijtota kuuset aꞌ yaakaꞌue, iniꞌi, kaitaꞌpo tawaawaka,
luꞌutawak”, ti jiame.
\v 55 Iꞌan jaibu juꞌu kokkowame kaita intok ito betchiꞌbo
utteꞌak. Iꞌan jaibu juꞌu kokkowame, itom jiokot ito bittuaneꞌ
betchiꞌbo kaita utteꞌak.
\v 56 Juꞌu ka tuꞌik itom joaꞌu junaꞌa juꞌu, jukaꞌ itom
kokkoneeꞌuta joame. Juꞌu intok, Liojta betana bat naataka
nesauri, ka itom au yumaꞌ betchiꞌbo cheꞌa juniꞌi ka tuꞌisi
itom tatawa.
\v 57 Taa achai Liojta ne aet baisae itom yoꞌowe Jesukrijtota
betchiꞌbo, junuen aꞌ yaakaꞌue kokkowamta betana itom
aꞌ jinneꞌukaꞌ betchiꞌbo, intok siꞌimek ka tuꞌik betana,
tuꞌisi itom yeu aꞌ kattuaꞌ betchiꞌbo.
\p
\v 58 Inia betchiꞌbo san Krijtopo nemak werim tuꞌisi
in nakeꞌum, itom jiabijteneeꞌuta juꞌuneaka, kaachin taꞌabwisi
eaka, wepulsi Jesukrijtota jiba sualne. Intok itom yoꞌowe
Jesukrijtota betana jukaꞌa, tekilta, jiba cheꞌa juniꞌi
aꞌ boꞌo jooria sakane. Bweꞌituk emeꞌesu juꞌunea, jukaꞌ
tekilta, yoꞌowe Jesukrijtotamak nau eaka, ae betana enchim
joaꞌuta, ka kia beja tua enchim aꞌ yaꞌaneꞌpo. Taa tuꞌik
enchim aet jajamneꞌpo.
\c 16
\s Jumeꞌ Krijtota sualeme ania betchiꞌbo, juꞌu nau tojiwakame
\p
\v 1 Juꞌu intok, jumeꞌ Krijtopo itomak werim, bweꞌu joꞌara
Jerusalen teaꞌpo anianeꞌ betchiꞌbo, enchim nau woꞌotaneeꞌu
betana. Jum bwiaraa Kalaasiaꞌ teaꞌpo, Krijtota nau sualeme
beꞌekatana, in am tejwaakaꞌa benasia, emeꞌe ame benasi
ket aꞌ yaꞌane.
\v 2 Chikti lominko taꞌapo, emeꞌe weꞌepulaka, enchim kobaꞌi,
au enchim yumaꞌalaapo aman, aꞌ eꞌeriane. Junuen nee ama
yepsako, ka junak juꞌubwa nau aꞌ toji betchiꞌbo.
\v 3 Inepo intok, chukula aman yepsako, bweꞌu joꞌara Jerusalen
teaꞌu bicha nee am bittuane, jumeꞌ junam bicha kat betchiꞌbo
enchim yeu puꞌaneeꞌum. Jiꞌosiam intok ne ket amemak
bittuane. Junuen junae mak, junaman, jumeꞌ junamaꞌa Krijtota
sualemmeu, jukaꞌ enchim nau tojakaꞌuta am tojineꞌ betchiꞌbo.
\v 4 Ne intoko, in aman weeneꞌpo junuen ket aꞌ tuꞌi machiako,
nemak im katne.
\s Paplota Romaꞌ teaꞌu bichaa, aꞌ weebaeꞌu
\p
\v 5 Aman emou bichaa weyeka intok, utteꞌa, jum bwiaara
Maserooniaꞌ teaꞌpo bat in yebijneꞌpo. Junuen san ne
cheꞌa chukula, jum bweꞌu joꞌara Korintoꞌ teaꞌu ne yebijne.
\v 6 Jiba tua ne, junamaꞌa emomak ili binwaa ama tawane.
Oo ne cheꞌa jumak, junamaꞌa seberiata simsuꞌutajti emomak
anne. Intok junako, emeꞌe junuen a nee aniane, chukula
in weeneꞌu bicha betchiꞌbo.
\v 7 Iꞌan ne ka kia enchim bichaka emot waꞌam weebae.
Taa ne, ili ne binwa emomak ama tawabaekaꞌea, Jesukrijtota
junen eao.
\v 8 Taa ne bweꞌu joꞌara Eepesoꞌ teaꞌpo ne tawabae, taewai
Pentekojtej teamta aet yumaꞌu tajtia.
\v 9 Bweꞌituk inimiꞌi juꞌu tekil, Jesukrijtota betana
in jooneeꞌu, ketuni tuꞌisi neu aayuk. Intok ne tua tuꞌisi
yeu aꞌ wee machia. Taa intok jumeꞌ nee bejeꞌeka aneme
ket juebenamme.
\p
\v 10 Timoteoꞌ teamta emou yepsako, kaitat jain eaka,
taa alleaka emomak aꞌ anneꞌ betchiꞌbo, tuꞌisi em aꞌ bitne.
Bweꞌituk aapo, yoꞌowe Jesukrijtota betana tekilta, nele
benasi aꞌ jooa.
\v 11 Junuen san, kaabe emo betana, jak waꞌam aꞌ bitbaane.
Taa ala emeꞌe, kaitat obisi eaka, naa buusti aꞌ sikaa,
nee aꞌabo aꞌ bitneꞌ betchiꞌbo, aꞌ aniane. Bweꞌituk nee
aꞌabo aꞌ yebij boꞌo bicha, jumeꞌ waate, Krijtopo itomak
werimmake.
\p
\v 12 Juꞌu intok, Krijtopo itomak weri, Apooloj teamta
betana, jue benasi ne au ujbwanak, jumeꞌ wate Krijtopo
itomak werimmak, aꞌ sikaa, aman enchim aꞌ bitneꞌ betchiꞌbo.
Taa aapo iꞌan ka aman weebabaek. Aman emou weenee chukula,
ama yumaꞌateko.
\s Jiꞌojtesuka am tebotua
\p
\v 13 Tuꞌisi em emo suua. Yoꞌowe Jesukrijtota jiba enchim
sualneeꞌu ka koptane. Kaitaꞌpo koꞌom eaka ousiꞌeene.
\v 14 Siꞌimeta enchim boꞌo jooriaꞌuta, yee nakeka aꞌ
joone.
\p
\v 15 Iꞌan intoko, Krijtopo nemak werim, emeꞌe tuꞌisi
juꞌunea jum bwiaraa Akaayaꞌ teaꞌpo, Teepanaj teamtaim,
bat Krijtota nok lutuꞌuriata am sualekaꞌpo. Intok bempoꞌim
jumeꞌ Krijtopo itomak werim ania betchiꞌbo, emo am tekil
maklatukaꞌpo.
\v 16 Kialiꞌikun san inepone emou ne ujbwana, enchim
junuen bempoꞌim bebenam intok siꞌimem jumeꞌ a yee aniaka
intok Krijtota tekil boꞌo jooriame, enchim am yoꞌoreka
am nok jikkajineꞌ betchiꞌbo.
\v 17 Alleanee jumeꞌ emo betana inen teakame nemak im
aneꞌ betchiꞌbo, Ejteepanak, juꞌu Portunaato intok juꞌu
Akaikoꞌ teame. Bweꞌituk bempom, enchim ka a nemak anekai,
ka enchim nee yaꞌariaꞌut inimeꞌe, neem aniak.
\v 18 Bweꞌituk bempo, emo betana nee jiapsi yechak. Intok
kia enchim juniꞌi. Inimeꞌesan emeꞌe am nakeka am yoꞌori
taꞌaane.
\p
\v 19 Jumeꞌ Krijtopo itomak werim bwiaraa Aasiaꞌ teaꞌa
betana teꞌopom beꞌekatana nau yaajame, emou tebotemme.
Akiila intok Risiila ti teakame. Intok ketchia jumeꞌ
bem joꞌapo nau yaajame, Jesukrijtota enchim amemak nau
aꞌ sualekaꞌ betchiꞌbo, utteꞌesia enchim tebotua.
\v 20 Siꞌime jumeꞌ inim, Krijtopo nemak werim betana
em, teboteita mabeta. Emeꞌe intok ketchia, enchim naas
emo nakeꞌepo teuwaaka, emo tebotuane.
\p
\v 21 Inepo Paplo, inikaꞌa teboteita, in maammea jiꞌojteita,
nee emou bittua.
\p
\v 22 Senu intok, emo nasuk, yoꞌowe Jesukrijtota ka naksi
aꞌ eiyaabaao, ka tuꞌisi aꞌ tawaneꞌpo betana witti aꞌ
tejwaane. Yoꞌowe Jesukrijto, eu te chaae, lauti itou yebijne.
\p
\v 23 Krijtopo nemak werim, itom yoꞌowe Jesukrijto aꞌ
tuꞌuwae enchim alleetuane.
\v 24 Siꞌimem, Jesukrijtota itom aꞌ nakeꞌe benasi, nee
ket junaen ne enchim nake.