\id 2CO
\h 2 KORINTIOM
\toc1 2 KORINTIOM
\mt 2 Korintiom
\c 1
\s Paplo, bweꞌu joꞌaraa Korintoꞌ teaꞌu, jumeꞌ Krijtota sualemmeu jiꞌojte
\p
\v 1 Inepo Paplo, Liojta junen eakaꞌ betchiꞌbo, Jesukrijtota
betana yeu puꞌaritaka ne yeteu bittuari. Krijtopo itomak
weri Timoteoꞌ teamtamake, inikaꞌa jiꞌojteita te, jumeꞌ
bweꞌu joꞌaraa Korintoꞌ teaꞌpo Krijtota sualeme, intok
siꞌime jumeꞌe, bwiaraa Akaayaꞌ teaꞌpo, Liojta yoemiammeu
te jiꞌojte.
\v 2 Itom achai Lios, intok itom yoꞌowe Jesukrijtota
betana tuꞌikue enchim alleeneeꞌuta, intok yanti elaka
enchim jiapsineeꞌuta tee emot aꞌ au iꞌa.
\s Paplota jiokot au aꞌ bichaꞌu
\p
\v 3 Liojta, jukaꞌ itom yoꞌowe Jesukrijtota achai yoꞌota,
itom au alleaꞌuta tee jiba au bicha teuwaa sakane. Bweꞌituk
aapo junaꞌa, juꞌu itom achai, itom nak jiokoleka itom
bichame. Intok aapo ket junaꞌa juꞌu itom jiapsi joame.
\v 4 Aapo juꞌu Lios, siꞌimekut, jiokot itom ito bichaꞌut
itom jiapsi jojoa. Junuen itom ket, jumeꞌ jiokot emo
bichame, itom a am jiapsi joꞌaneꞌ betchiꞌbo, jiba aapoꞌik
Liojta betana itom aꞌ mabetakaꞌa benasia, itom am jiapsi
joꞌaneꞌ betchiꞌbo.
\v 5 Bweꞌituk Jesukrijtota itom yoꞌoreꞌ betchiꞌbo, ama
butti jiokot itom ito bichaꞌa benasia, ket jiba junaen,
itepo, chukula aapoꞌik Krijtota betana ama butti itom
alleeneeꞌuta te bitne.
\v 6 Junuen san, juu u jiokot itom ito bichaꞌu, junaꞌa,
enchim jiapsi joꞌaa betchiꞌbo intok enchim jinneꞌuimtuneꞌ
betchiꞌbo junuen itou weye. Taa Liojta betana itom jiapsi
joꞌaawao, ket jiba enchim jiapsi joꞌaa betchiꞌbo, intok
jinneꞌurimtuneꞌ betchiꞌbo weye. Junuen san chukula emeꞌe,
ka seej chukti eaka itomak a jiokot emo bitne, iꞌan inim
itom jiokot aet ito bichaꞌut, ka jain eaka ket enchim
aꞌ inneꞌeneꞌ betchiꞌbo.
\v 7 Kaitat te jain eaka enchim a yoemꞌeiyaa. Bweꞌituk
te juꞌunea, itomak junuen jiokot enchim aet emo bichaꞌa
benasia, junuen ket emeꞌe, itomak, Liojta betana itom jiapsi
joꞌawaꞌuta, enchim aꞌ bitneꞌpo.
\p
\v 8 Krijtopo itomak werim, enchim te juꞌunee iꞌa, jum
bwiaraa Aasiaꞌ teaꞌpo, ama butti obiachisi itom ito bichakaꞌpo.
Tua ama butti bettesi itou yeu siika. Kia te juniꞌi,
ka ito au elpeiyaan itom au yumaꞌaneꞌpo. Intok te kia,
jiapsaka itom ama yeu katneeꞌuta juniꞌi, tee ka boꞌo
bichan.
\v 9 Kia te suꞌabaawaka yeu puꞌarim benasi te ito eiyaan.
Taa iniꞌi inien yeu siika, Liojta a itom yoemꞌeiyaaneꞌ
betchiꞌbo, jukaꞌa, jumeꞌ kokkoarim jiabijtetuanemta. Intok
ka junuen, jitau itom ito yoemꞌeiyaꞌ betchiꞌbo.
\v 10 Lios itom ama yoꞌeetuak. Intok iꞌan tajtia itom
aet ania sime, juꞌu, tuꞌisi jinilwatchika kokkowamta betana.
Aapoꞌik Liojtat te ea, bichau bicha ket aapoꞌik itom
ama yoꞌeetuaneꞌpo.
\v 11 Taa enchim juebenam, Liojtau bicha itom nokriaka,
junaet enchim itom aniao, chukula juebenaka, Liojta aet
bai saune, junuen aapoꞌik itom siꞌimem betchiꞌbo, jukaꞌ
tuꞌik ae betana weyeka, aapoꞌik Liojta betana itom mabetaꞌu
betchiꞌbo.
\s Paplota ka lauti, Korintoꞌ teaꞌu noitekaꞌu
\p
\v 12 Lutula weeꞌpo, juꞌu itom aet ito uttiaꞌu iniꞌi
junaꞌa, Liojta bichapo, aapoꞌik itom jiapsi iꞌaꞌpo aman,
intok ka jak waꞌam, intok ka jiapsita bepa aꞌ sualeka,
te inim junuen ito ujuꞌuꞌu itom ito juꞌuneiyaaꞌu junaꞌa.
Intok cheꞌa bat naataka emo nasuk anekai. Lios, aapo
tuꞌisi yee aꞌ nakeꞌ betchiꞌbo junuen itom jiapsineꞌ
betchiꞌbo itom aet aniak. Iniꞌi intok, ka itom koba suawaeka
au betchiꞌbo weye.
\v 13 Juꞌu inim jiꞌojteimpo itom emou teuwaakaꞌu, kaita
taꞌabwika, taa juꞌu enchim a nokaꞌu intok aet juꞌuneaꞌu
jiba. Ne intok emot aꞌ boꞌo bicha, tua junama waꞌam enchim
aet juꞌuneeneeꞌuta.
\v 14 Junuen wateku jaibu enchim juꞌuneaꞌa benasia.
Junuen jukaꞌ taewaita yumako, yoꞌowe Jesukrijtota aꞌabo
notteo, junak emeꞌe ito betchiꞌbo enchim alleewamta emo
jajamek ti jiuneꞌ betchiꞌbo. Intok ket jiba junaeni
itepo, ito betana emo betchiꞌbo itom alleaꞌu itot aune.
\p
\v 15 Inia weyemta betana junuen aꞌ lutuꞌuriatukaꞌpo
juꞌuneaka, emou ne cheꞌa bat noitibaeka ean. Junuen wosa
in emou noiteka, junuen ne tana enchim alleeneꞌ betchiꞌbo.
\v 16 Bwiaraa Maserooniaꞌ teaꞌu bicha weyekai, nee emou
bat yebijbaeka ean. Intok chukula, junaꞌabo notteka nee
juchi emou yebijbaen. Junuen beja enchim a nee anianeꞌ
betchiꞌbo, naa buusti, bwiaraa Jureaꞌ teaꞌu bicha in weeneꞌebetchiꞌbo.
\v 17 In teuwaarit yeu yumaꞌabaekai, kannee bai tiaka
taa tua junuen jiaka aꞌ teuwaak. Bweꞌituk inepo, jukaꞌ
in yaꞌabaeꞌuta, kannee jumeꞌ ka Krijtota sualeme benasi,
wooi weyemta, ka wepulsi eaka aꞌ jooa.
\v 18 Taa Lios itom juꞌuneiyaa, wepulsi eaka, intok ka
woik teuwaaka, itom emou nokaꞌapo.
\v 19 Bweꞌituk juꞌu Jesukrijto, juꞌu Liojta yoemia, emou
itom teuwaaꞌu, jakwoo juniꞌi ka lutuꞌuriata, wooi weyemta
aꞌ nookak. Intok junuen siꞌime juꞌu Jesukrijtota betana
itom teuwaaꞌu, Silbaanoꞌ teame, intok Timoteoꞌ teame intok
inepo, lutuꞌuriataka yeu weama.
\v 20 Bweꞌituk ite aꞌ juꞌuneiyaa, aapoꞌik Liojta betana
siꞌimeta jukaꞌ itou naꞌikiarita, aapoꞌik Krijtota betchiꞌbo
itou aꞌ chupukaꞌpo. Inia betchiꞌbo itepo, Liojta nau
yoꞌorekai, tua junuentunee ti jiaka, te aꞌ lutuꞌuriate.
\v 21 Intok jiba aapo juꞌu Lios junaꞌa juꞌu iitom intok
enchim juniꞌi, ka taꞌabwisi intok eaka, Jesukrijtota itom
sualneꞌ betchiꞌbo itom aniame. Intok jiba aapo junaꞌa
juꞌu, siꞌimeku aapoꞌik betchiꞌbo jiba itom jiapsineꞌ
betchiꞌbo itom junuen eetuame.
\v 22 Intok aapoꞌik betana itom kateꞌepo itot juꞌuneiyaatebo.
Intok aꞌ tuꞌu jiapsiwata itot jiapsituari, junae, jukaꞌ
chukula itom bitneeꞌuta, junuen itou aꞌ chupneꞌpo itou
aꞌ lutuꞌuriatukaꞌpo junae itom aꞌ juꞌuneiyaatua.
\p
\v 23 Taa ne iꞌan tajti, kee jum bweꞌu joꞌara Korintoꞌ
teaꞌu weyekai, in junen jiulatukaꞌa benasia, Liojta nee
aꞌ juꞌuneiyaaꞌpo, ne juꞌuneaka aꞌ teuwaa, junuen ka in
enchim sioktuabaeꞌ betchiꞌbo ka in aman emou sikaꞌapo.
Ka junuen lutuꞌuriatuko, Lios aapo nee betchiꞌbo juꞌunea.
\v 24 Itepotee ka jachin juniꞌi, Krijtota enchim sualneeꞌut
enchim utteꞌa jooria. Bweꞌituk emeꞌe jaibu em junama
waꞌam, ka taꞌabwisi intok Krijtota suale. Taa ala, cheꞌa
juniꞌi enchim alleeneeꞌut te enchim aniabaekaꞌea.
\c 2
\p
\v 1 Jiba inia betchiꞌbo san ne ka juchi emou noitibaekaꞌeꞌeak,
ka alleewamta ka emo nasuk au iꞌakai.
\v 2 Bweꞌituk inepo junuen ka enchim alleetuaꞌateko,
junak, inepo emo tana alleꞌeaka su, ka in alleaꞌu emo
betana neu aune.
\v 3 Junuen san ne emou jiꞌojtek, jaibu enchim juꞌuneaꞌa
benasia. Bweꞌituk inepo juniꞌi, nee ka emo betana in
siokneꞌ betchiꞌbo, ne ka emou siika, emo betana alleꞌeaka
su. Bweꞌituk ne jaibu juꞌunean, alleaka nee emo mak aneo,
enchim siꞌimem ket nemak alleeneꞌpo.
\v 4 Bweꞌituk junak inepo, junakaꞌa jiꞌosia jiꞌojteita
emou bittuakai, unnaa ka in yanti elaꞌuta net ayukan.
Intok tuꞌisi ka in alleaꞌuta, junuen in opoam woꞌotakai.
Ala ne, ka enchim ka alleetuaꞌ betchiꞌbo emou jiꞌojtek,
tua ama butti in enchim nakeꞌuta enchim juꞌuneiyaa iꞌakai.
\s Jukaꞌ ka tuꞌisi aulata jiokoiwakaꞌu
\p
\v 5 Taa seenu, jabetaka juniꞌi, emo nasuk ka ammaꞌali
aneka yee sioktuakaꞌateko, ka nee jiba junuen sioktua,
taa wateku enchim siꞌimem juniꞌi sioktua. Wateku ti
ne jiia, ka unnaa bettesi emou aꞌ yechaꞌabaekai.
\v 6 Jum enchim nau aneꞌepo, junako emeꞌe batte siꞌime
ama aneka, juꞌu oꞌoutau, kutti enchim au yechakaꞌue, junae
aꞌ suꞌu tojine.
\v 7 Junuen san iꞌani, emeꞌe aꞌ jiokoibaekaꞌeene. Intok
aꞌ jiapsi yechakai. Ka junuen, ama butti au intok aꞌ
sioktuaka, tokti koꞌom eaka, au aꞌ taꞌaruneꞌ betchiꞌbo.
\v 8 Junuen san iꞌan ne emou ujbwana, juchi weeꞌpo emeꞌe,
enchim aꞌ nakeꞌpo aman aꞌ juꞌuneetuane.
\v 9 Cheꞌa bat naataka inia weemta betana ne emou jiꞌojtek,
intok jiba junuen, enchim jiꞌobilaa betchiꞌbo, junuen
enchim in tejwaaka enchim aet sawekaꞌut enchim aet jiapsekaꞌpo
enchim juꞌuneiyaabaekai.
\v 10 Iꞌan intoko, jukaꞌ junuen jitat enchim jiokoekaꞌuta,
nejponee ket aꞌ jiokoine. Bweꞌituk jukaꞌ in jiokoilaaꞌuta,
lutuꞌuriapo junuen nee aꞌ jiokoiꞌeao, in emo betana jiokot
eaꞌ betchiꞌbo, Jesukrijtota bichapo ne junuen aꞌ jiokoek.
\v 11 Jukaꞌ bebejeꞌerita junuen, kaitaꞌpo itom aꞌ kobaꞌaneꞌ
betchiꞌbo. Bweꞌituk tuꞌisi te juꞌunea, aapoꞌik yee bai
taꞌaaka a yee aꞌ jiꞌoptuaꞌpo.
\s Bweꞌu joꞌara Tooaj teaꞌpo aneka, Paplota ka yanti elakaꞌu
\p
\v 12 Junak, jum bweꞌu joꞌaraa Tooaj teaꞌpo, Krijtota
betana jukaꞌ nok lutuꞌuriata yee majtabaeka nee aman
yepsako, junamaꞌa juꞌu tekil Krijtota betchiꞌbo in jooꞌeaꞌu
neu juebenaek.
\v 13 Taa junuentaka juniꞌi, junamaꞌa jukaꞌ Krijtopo
nemak weri Tiitoꞌ teamta ka ama teakai, ka in yanti elaꞌu
net aukan. Junuen san beja ne, ka in ama tawaneꞌe betana
ne ameu nokaka ne am mam bwiseka am tebotuaka, ne bwiaraa
Maserooniaꞌ teaꞌu bicha ne yeu siika.
\s Krijtota betchiꞌbo siꞌimeku yoꞌooꞌam
\p
\v 14 Taa Liojta te aet bai saune, aapoꞌik, jukaꞌ Jesukrijtota
betchiꞌbo aꞌ yaakaꞌue, siꞌimeku yoꞌorika itom yeu katneꞌ
betchiꞌbo itom aniamta. Intok aapo, aapoꞌik betana jukaꞌ
aꞌ nok lutuꞌuriawata siꞌimekut itom yee aꞌ majtaneꞌ
betchiꞌbo itom ania. Iniꞌi nok lutuꞌuria intok, jita
tua win jubak siꞌimekut aꞌ weyeꞌe benasi machikai.
\v 15 Bweꞌituk itepote, Jesukrijtota sualekai, Liojta
tuꞌisi alleetua. Intok itepo, jumeꞌ Krijtota sualeme
nasuku, intok kia jumeꞌ ka aꞌ sualeme nasuku juniꞌi, Krijtota
betana weyeme, itot yeu maachi win jubak naꞌikim weyeꞌe
benasia.
\v 16 Jumeꞌ ka Krijtota nok jikkajibaemmeu, iniꞌi Liojta
betana lutuꞌuria weyeme, cheꞌa juniꞌi bem ka tuisi tawaka
kokkoneeꞌuta aet teune. Taa jumeꞌ intok, Krijtota sualeka,
jinneꞌuimtuneemeꞌ betchiꞌbo, tuꞌika bem ae jiapsineeꞌuta
aet jajamne. Intok inia tekilet, kaabe aapo aꞌ eaꞌpo
au yuuma.
\v 17 Itepo, katte jukaꞌ Krijtota betana lutuꞌuriata
teuwaaka, jita ae kobaꞌ betchiꞌbo aꞌ jooa, juebenam aneꞌe
benasia. Taa ala, tee, tua junen jiaka, Krijtota nok lutuꞌuriata
yee majta. Liojta betana itom aꞌ tekil maktukaꞌpo amani.
Intok Liojta itom juꞌuneiyaaꞌpo juꞌuneaka aꞌ teuwaa.
Intok Jesukrijtota itom aꞌ yoꞌowakaꞌpo amani.
\c 3
\s Bemela lutuꞌuriata betana juꞌu yee majtawame
\p
\v 1 Inepo intoko, inile benak teuwaakai, katte itepo
ito uttiabaeka juchi te emou nooka. Intok ka utteꞌa
juniꞌi, jakuꞌubo itom kateꞌepo, tuꞌisi itom mabettuneꞌ
betchiꞌbo, jiꞌosiaka itom emou yajineꞌpo. Intok kia emo
betana, watemmeu kat betchiꞌbo juniꞌi, ka utteꞌa, jiꞌosiaka
itom katneꞌepo, watem aꞌ joaꞌa benasia.
\v 2 Ka junuentune. Bweꞌituk emeꞌeꞌem junameꞌem, juꞌu
jiꞌosia, watemmeu kat betchiꞌbo itou beꞌeeka itom ae
mabettuneeꞌu benakai. Emeꞌe, Krijtota enchim sualeꞌ betchiꞌbo,
junuen, siꞌime ito tana aꞌ juꞌuneiyaa, lutuꞌuriapo Liojta
betana tekilta itom joaꞌapo.
\v 3 Bweꞌituk a emeꞌe juꞌuneiyaatu, Jesukrijtota betana
enchim yoemiarimtukaꞌpo. Ite intok junameꞌem, tuꞌisi
enchim aet yeu yumaꞌaneꞌ betchiꞌbo aet enchim majtame.
Junuen san, jukaꞌ Liojta, jiba yuu jiapsamta, aꞌ tuꞌu jiapsiwata
inen enchim jiapsituaꞌ betchiꞌbo, jiꞌosiampo jiꞌojteita
bepa siꞌimem betana a emot juꞌuneetu, Krijtota enchim
sualeꞌpo, ka kia jita teta bebberaimmet jiꞌojteita bepa
juniꞌi. Taa ala tua enchim jiapsimpo juꞌunaktei.
\p
\v 4 Itepo ala tee inikaꞌa, tua inien aꞌ weyeꞌpo te tua
aꞌ lutuꞌuriaꞌati jiia, Jesukrijtota betchiꞌbo Liojtat
eakai.
\v 5 Katte itom eaꞌpo, jita a itom jooneeꞌuta ito au
yumaꞌaleka aꞌ boꞌo jooria. Taa ala siꞌimeta jukaꞌ a
itom joaꞌuta, Liojta a jita joaka intok aapoꞌik itomaktukaꞌ
betchiꞌbo tee aꞌ jooa.
\v 6 Bweꞌituk aapo, juꞌu aapoꞌik betana, senu bemela lutuꞌuriata,
a itom au yumaka, aꞌ tekipanoaꞌ betchiꞌbo itom aet ania.
Iniꞌi intok, ka jukaꞌ Moiseejta nesauri jiꞌojteita betana
weye. Taa ala Liojta tuꞌu jiapsita, itom aꞌ mabetneꞌpo
betana junaen weye. Bweꞌituk juꞌu nesauri jiꞌojtei, ka
tuꞌisi tawaarimtaka, itom kokkoneeꞌut itom tejwaa. Taa
juꞌu Liojta tuꞌu jiapsi, jiba yuu jiapsiwamta yee bittua.
\p
\v 7 Iniꞌi nesauri, Moiseejtukaꞌuta betana, teta beraikut
jiꞌojtei, iniꞌi intok, yeu machiaka, ama butti utteꞌakamta
tachiriakan. Jumeꞌ intok ijraꞌeliitam, kia jukaꞌ Moiseejta,
aꞌ mabetakamta, katim a aet remten. Bweꞌituk juꞌu aꞌ
pujbawa, unnaa tachiriakan. Taa junuentaka juniꞌi, junaꞌa
tachiria, laaauti weyeka, luꞌutek. Taa iniꞌi intok nesauri
jiꞌojtewakame, ka tuꞌisi tawalamtaka kokkowamta yee teuwaame,
junuen unnaa eiyaawaka aꞌabo tojiwakai,
\v 8 juꞌu itom Jesukrijtota nok lutuꞌuriawa, Liojta tuꞌu
jiapsiwata betana itom aet juꞌuneetuawaꞌu, cheꞌa juniꞌi
eiyaawaka mabettune.
\v 9 Junuen, juꞌu nesauri, ka tuꞌisi yee tawaaneeꞌut, yee
tejwaakame, unnaa eiyaawatchisi yepsakaꞌateko. Junuen
san, juꞌu, Krijtota betana nok lutuꞌuria, Liojta betana
itom tuꞌisi mabettuneeꞌuta itom tejwaame, cheꞌa juniꞌi
ujyoisi eiyaawaka mabettune.
\v 10 Bweꞌituk juꞌu nesauri jiꞌojtewakame, bat naataka
weeria, junak eiyaawatchiakaꞌu, iꞌani junaꞌa, inia cheꞌa
juniꞌi bepa eiyaawatchik betchiꞌbo kaita teuwaa.
\v 11 Junuen san, juꞌu chubala betchiꞌbo jiba tuꞌeaka,
eiyaawatchisi machikai, cheꞌa juniꞌi eiyaawatchisi machine,
juꞌu jiba yuu betchiꞌbotuneeme.
\p
\v 12 Jiba iniat itom jiapsekaꞌ betchiꞌbo san, itepote
aet ito ou bujtaka, kaitat jain eaka te yeteu aꞌ nooka.
\v 13 Kattee juꞌu Moiseejtukaꞌuta benasi aane, aꞌ pujbawata,
tajoꞌorimmea au aꞌ pattakaꞌa benasia. Intok junuen, jumeꞌ
ijraꞌeliitam, jukaꞌ tachiriata ka binwatunemta, ka aꞌ
luꞌuti bit iꞌakai.
\v 14 Taa bempo, inikaꞌa siꞌimeta, jita aꞌ teuwaaꞌpo, katim
aet juꞌunean. Iꞌan tajtia, jukaꞌ bat naataka weeriata,
Liojta amemak wepulsi lutuꞌuriata yaakaꞌuta, aꞌ nokakai,
junak naateka, ka bem a aet juꞌuneaꞌa benasia, jiba junaen
iꞌan tajtia juniꞌi, katim a aet juꞌunea. Bweꞌituk juꞌu
junuen ka bem aet juꞌuneaꞌu, Jesukrijtota betana weyemtae
jiba a juꞌuneiyaatune.
\v 15 Iꞌan tajtia bempo, jumeꞌ liprom, Moiseejtukaꞌuta
jiꞌojtekaꞌum nokakai, juꞌu junak naateka bem ka aet juꞌuneaꞌu,
ketun amet aayuk.
\v 16 Taa jabetaka juniꞌi, yoꞌowe Jesukrijtota sualeka
aꞌ mabetako, juꞌu bat naataka ka aꞌ juꞌuneiyaaꞌuta aꞌ
juꞌuneiyaane.
\v 17 Juꞌu intok Liojta betana tuꞌu jiapsi, yoꞌowe Jesukrijto
junaꞌa. Juꞌu intok Krijtota tuꞌu jiapsita mabetlame,
ka intok utteꞌatune, bat naataka benasi, Moiseejta jiꞌojtekaꞌuta
nesaurita boꞌo jooriaka aꞌ jiapsineꞌpo.
\v 18 Inia betchiꞌbo san siꞌime itepo jumeꞌ Krijtota
sualeme, jaibu Krijtota betana lutuꞌuriata juꞌuneiyaakai,
aapoꞌik yoꞌowe Jesukrijtota betana jukaꞌ eiyaawatchisi
machika weyeme a itot juꞌuneiyaatu. Intok junueni, itepo,
lau laauti tee, cheꞌa juniꞌi aapoꞌik Krijtota benasi
jiapsi saka. Bweꞌituk cheꞌewasu juniꞌi, itepo, juꞌu eiyaawatchisi
machika, juꞌu aapoꞌik betana weyeme, itot yeu maachi.
Iniꞌi san, yoꞌowe Jesukrijtota betana weye, juꞌu Liojta
betana tuꞌu jiapsi.
\c 4
\p
\v 1 Junuen san itepo, katte aꞌ koptaka, jakwoo juniꞌi
te ka koꞌom ea. Bweꞌituk Lios, aapo tuꞌisi itom aꞌ nakeꞌ
betchiꞌbo, itom jiokoleka, inikaꞌa tekilta itom maki.
\v 2 Itepote ala, jukaꞌ ka juꞌuneiyaawaka, tiusi machik
watem boꞌo jooriaꞌuta, te aꞌ koptaka intok, kaabem te
bai tattaꞌaaka jiapsa. Intok kia te ka taꞌabwisi juniꞌi
watek yee majta. Taa ala Liojta betana jukaꞌ nok lutuꞌuriata
jiba te yeteu teuwaa. Intok inieni itepo, siꞌimem bichapo,
Liojta bichapo tuꞌisi itom jiapsaꞌpo ito juꞌuneiyaatebo,
junuen bempo, tuꞌisi itom bichaka bem emo jiapsi temaineꞌ
betchiꞌbo.
\v 3 Taa juꞌu Jesukrijtota betana nok lutuꞌuria, itom
yee majtaꞌu, watem betchiꞌbo juꞌuneiyaapo obiachiako,
iniꞌi, jumeꞌ ka Liojta nok jikkajibaeka, jiba betchiꞌbo
jiokot bem emo bitneeꞌu yajineemmeu inien maachi.
\v 4 Inien bempoꞌim ka Liojta sualeꞌ betchiꞌbo, juꞌu
bebejeꞌeri, inim bwiapo au lios joame, aapo, juꞌu lutuꞌuriat
ka bem juꞌuneeneꞌ betchiꞌbo, ka bibichame benasi, a jita
bem mammateneeꞌuta am uꞌaari. Junuen inimeꞌe, Jesukrijtota,
yoꞌorisi intok eiyaawatchika, Liojtaka, inim ito benasi
au yaaka, Liojta aꞌ machiakaꞌuta, machisi aꞌ teuwaamta
betana jukaꞌ nok lutuꞌuriata ameu aꞌ teuwaawao juniꞌi,
ka bem aet juꞌuneeneꞌ betchiꞌbo.
\v 5 Itepo yee majtakai, katte ito betana weyemta yeteu
teuwaa. Taa ala juꞌu itom yee majtaꞌu, Jesukrijtota itom
aꞌ yoꞌowakaꞌpo betana aꞌ teuwaa. Itepo intoko ito betana
kia te beja enchim nesauta jooriame benasi itom eaꞌuta
ite enchim juꞌunee iꞌa, Jesukrijtota itom nakeka aꞌ yoꞌoreꞌ
betchiꞌbo.
\v 6 Bweꞌituk jiba junaꞌa juꞌu Lios, a jita joame, jum
ka machiku, tachiriatunee ti jiaka, tachiriata juꞌunakteme,
ket jiba aapo, jukaꞌ Krijtota betana lutuꞌuriata itom
juꞌuneiyaatuala. Junuen junae lutuꞌuriae itom juꞌuneiyaaꞌue,
itom, jukaꞌ Liojta betana siꞌimek bepa eiyaawatchisi
machisi machika, Jesukrijtota betana a itom juꞌuneiyaaꞌuta,
aet itom juꞌuneeneꞌ betchiꞌbo.
\s Krijtotat yoemꞌeaka jiapsiwame
\p
\v 7 Taa inikaꞌa, Jesukrijtota betana lutuꞌuriata, siꞌimek
jita bejeꞌewaekamta bepa cheꞌa eiyaawatchisi machika
itom taꞌaaꞌuta, itom takaam, babu sotoꞌim benasi machika,
ama itom aꞌ jipueꞌe benasi te ea. Junuen aꞌ juꞌuneiyaanaꞌ
betchiꞌbo, junuen inikaꞌa itom bichaꞌuta, Liojta a jita
joaꞌ betchiꞌbo, aapoꞌik betana aꞌ weyeꞌpo. Intok ka itom
au yumaka, aꞌ joaꞌ betchiꞌbo.
\v 8 Junuen san, itepo obisi itom ito bichaꞌuta jiba
itou aꞌ ayukaꞌ nasuk juniꞌi, katte ito koꞌom eiyaa. Intok
tee jamak, tua kaachin itom an machiakaꞌuta itou ayuk
juniꞌi, katte kia beja ito suꞌu tottoja.
\v 9 Jachin ito eewaka itou suuawao juniꞌi, katte itepolai
benasi ito eiyaa. Jiokot maisi joowaka juniꞌi, katte
aꞌ juiwaka, jiba itom boꞌo jooriaꞌut jiapsek.
\v 10 Jak juniꞌi itom aneꞌepo, jiba tee jiokot machik
aet bichaka juniꞌi, Jesukrijtota ito betchiꞌbo aꞌ mukukaꞌuta,
tee aꞌ teuwaa. Siꞌimek betana aapoꞌik benasi kokkolame
benasi eakai. Junuen ket, jiba ito betchiꞌbo, Jesukrijtota
aꞌ jiapsaꞌpo juꞌu itom jiapsaꞌue aꞌ juꞌuneiyaa tebokai.
\v 11 Bweꞌituk itepo ket inim jiapsakai, Jesukrijtota
itom sualeꞌ betchiꞌbo, chikti taꞌapo jumeꞌ itom suꞌapeame,
ka mekka itou aane. Junuen beja, ketchia, jiba itepo junaen,
aet suꞌawaka juniꞌi, Jesukrijtota betana, jukaꞌ jiba yuu
jiapsiwamta aꞌ juꞌuneiyaa tebone.
\v 12 Junuen san, Jesukrijtota betana itom boꞌo jooriaꞌu
betchiꞌbo, juꞌu kokkowame itou aayuk. Taa juꞌu intok,
bemelasi jiapsiwame emo betchiꞌbotune.
\p
\v 13 Liojta nok lutuꞌuriapo aꞌ jiꞌojteiꞌi benasia:
“Nejpo nee aꞌ sualek, intok inia betchiꞌbo sanne aꞌ
teuwaak.” Junuen ket, itepo jiba junakaꞌa aꞌ sualekaꞌa
benasia, tee aꞌ sualla. Intok junae betchiꞌbo tee ket
yeteu aꞌ teuwaa.
\v 14 Bweꞌituk itepo te juꞌunea, Liojta, yoꞌowe Jesukrijtota,
kokkoarim nasuk aꞌ jiabijtetuakamta, itom ketchia aapoꞌik,
Krijtotamak an betchiꞌbo, itom jiabijtetuane. Intok emomak
nau, aapoꞌiku mak te anne.
\v 15 Siꞌime iniꞌi inien itou weye, tuꞌik enchim jajamneeꞌutata
itom waataꞌ betchiꞌbo. Intok junuen Liojta betana, juebenaka,
jukaꞌ bem jiapsim betchiꞌbo tuꞌik jajameka, junuen ket,
juebenam aꞌ bai sauneꞌ betchiꞌbo, Liojta junuen aꞌ yoꞌorinaꞌ
betchiꞌbo.
\v 16 Inia betchiꞌbo san, katte koꞌom ea. Elaꞌpo junuen
itom takaam lau laauti luꞌutineeka juniꞌi, taa juꞌu itom
jiapsi ala, chikti taꞌapo, bemelasi, Liojta betana utteꞌata
mabeta.
\v 17 Bweꞌituk juꞌu, inim, iꞌan itom inneꞌaaꞌu, ka binwatuka
chubala jibatune. Intok iniat chukula itepo jiba yuu
alleewamta Liojta mak itom bitneeꞌuta, cheꞌa juniꞌi bepa
tuꞌik tee jajamne.
\p
\v 18 Bweꞌituk itepo inim weyeka a bittumtat te ka ito
temae. Taa ala, juꞌu itom eiyaaꞌu, chukula juꞌu itom bitneeꞌu
junaꞌa. Bweꞌituk juꞌu inim ayuka, iꞌan itom bichaꞌu, ka
binwatune. Taa juꞌu iꞌan, ka itom bichaka, itom eiyaaꞌu,
jiba yuu betchiꞌbotune.
\c 5
\p
\v 1 Bweꞌituk juꞌuneate, iꞌan itom takaam, karim ka binwatuneeme
benasi maachim, luꞌutineeo, Liojtau, teekau ito beas jiba
yuu itom ama aamak joꞌaneeꞌuta, ka maammea yaꞌarita itoas
aꞌ ayuꞌupo.
\v 2 Lutuꞌuria ala, iꞌan lautipo ket inim jiapsaka, ka
itom yanti elaꞌuta itot aꞌ aukaꞌpo. Jumeꞌe, teekau, chukula
itom takaaneeꞌum baa waatakai.
\v 3 Intok junuen, jumeꞌ aman itom takaaneeꞌum jipueka,
ka juneꞌelaka itom bitnaꞌ betchiꞌbo.
\v 4 Itepo lutula weeꞌpo, inimeꞌe takaaka, inim ketun
jiapsakai, katte allea, intok siokwame itot aayuk. Katte
kia beja, inimeꞌe iꞌan itom takaam taꞌarupea oꞌoben.
Taa ala juꞌu itom eiyaakaꞌu, baa, jumeꞌ aman itom takaaneeꞌum
junameꞌe. Junuen, jukaꞌ inim tawanemta, aꞌ luꞌuteka, jiba
yuu, bemelasi itom machineeꞌuta itot auneꞌ betchiꞌbo.
\v 5 Intok Lios aapo junaꞌa, waꞌa inia betchiꞌbo itom
au yeu puꞌakame. Intok aapo aꞌ tuꞌu jiapsiwata itot
jiapsituari, jukaꞌa, chukula itom bitneeꞌuta, lutuꞌuriapo
itou aꞌ chupneꞌpo itom aꞌ juꞌuneiyaaneꞌ betchiꞌbo.
\p
\v 6 Junuen san itepo, jiba Liojtat itom eaꞌu itot aayuk.
Juꞌuneate, inim ket itom jiapsaka, ketun kee itom au yaajaꞌpo.
\v 7 Bweꞌituk Krijtota sualeka te jiapsa. Intok ka jukaꞌ
itom inim a bichaꞌut jiapsekai.
\v 8 Taa iniat te yoemꞌea, cheꞌa juniꞌi te aꞌ tuꞌi machia,
ka intok inim takaampo itom jiapsaꞌpo, junuen yoꞌowe
Jesukrijtotamak baa jiapsibaekai.
\v 9 Inia betchiꞌbo te itepo, jiba weeꞌpo jukaꞌ Jesukrijtota,
jachin jiapsaka itom aꞌ alleetuaneeꞌut ite ito temae,
ket inim jiapsakai. Intok kia chukula juniꞌi, jaibu aamak
anekai.
\v 10 Bweꞌituk itepo siꞌime, Krijtota sualeme, kaabe yeu
beꞌeeka, itepote siꞌime, utteꞌa, Jesukrijtota yaꞌuraa bichapo
itom yeu machineeꞌu. Bweꞌituk weꞌepulaka, ket inim jiapsaka,
juꞌu, tuꞌik oo ka tuꞌik bem yaꞌari betana, ameu aꞌ lutuꞌuriatukaꞌpo
aman, bem aꞌ bitneꞌ betchiꞌbo.
\s Yanti elaka jiapsiwamta betana, juꞌu yee majtawame
\p
\v 11 Junuen san, yoꞌowe Jesukrijtotat itom ee majjaeꞌpo
amani, siꞌimem, Liojta betana lutuꞌuriata, aꞌ juꞌuneiyaaka,
bem aꞌ mabetneeꞌut te jiapsek. Taa Lios jaibu itom juꞌuneiyaa
siꞌimekut tuꞌisi itom jiapsaꞌpo. Intok enchim juniꞌi
te ito betana junuen enchim aꞌ juꞌuneiyaatuapea.
\v 12 Iꞌan te emou jiꞌojteka, katte ito betana weyemta
tuꞌik emou teuwaa enchim itom uttianeꞌ betchiꞌbo. Ala
te emot boꞌo bicha, tuꞌik ito tana juꞌuneiyaaka, intok
junuen itom yoemꞌeiyaaka, junae betana, a tuꞌisi itom
jiapsaꞌatiuneꞌ betchiꞌbo. Junaen ket enchim, wameꞌe kia
beja jiapsita bepa Krijtota sualeka emo uttiame, ka lutuꞌuriata
bem itot nokaꞌu betana a am yoopnaneꞌ betchiꞌbo.
\v 13 Bweꞌituk itepo, alleerimmea, ka juꞌuneame benasi
bitwakai, Liojta te yoꞌoreka junen maachi. Intok itepo,
junuen susuakai, emo betchiꞌbo tuꞌineeka weye.
\v 14 Bweꞌituk Jesukrijtota tuꞌisi yee aꞌ nakekaꞌuta,
itepo aꞌ juꞌuneiyaaka junae betchiꞌbo ae betana weyemtat
ite ito utteꞌa jooria. Intok kia itepo aꞌ juꞌuneiyaa
juniꞌi, senuk siꞌimem jinneꞌu betchiꞌbo aꞌ mukukaꞌpo
intok inia betchiꞌbo san, siꞌime jumeꞌ aꞌ sualeme, inim
weyemta betana aamak ka jiapsame benasi bem machiakaꞌpo.
\v 15 Siꞌimem betchiꞌbo muukuk juꞌu Krijto. Junuen jumeꞌ
aapoꞌik sualeka jiapsame, ka bem eaꞌpo, taa aapoꞌik eaꞌpo
aman bem jiapsineꞌ betchiꞌbo, juꞌu ame betchiꞌbo mukuka
intok juchi jiabijtekamta betchiꞌbo.
\v 16 Junuen san, iꞌan, bichau bicha, inim jumeꞌ eiyaawaka
jiapsame, katte junaen am eiyaaka am taꞌaa. Bweꞌituk
bat naataka itepo, Jesukrijtota inim aꞌ machika aꞌ jiapsakaꞌa
benasi aꞌ taꞌaasukai juniꞌi, iꞌan te ka jiba junaen aꞌ
taꞌaaka aꞌ suale. Ala taꞌabwisi te aꞌ yoꞌore.
\v 17 Junuen san, juꞌu, Jesukrijtotamak eaka aꞌ mabetakame,
iniꞌi, aapoꞌik a jita aꞌ joaꞌapo aman, bemelasi, taꞌabwisi
tuꞌisi jiapsituanaa. Siꞌime waꞌa aapoꞌik betana bat
naataka weeria luꞌutine, intok iꞌan, siꞌime, wepulsi bemelasi
weemetune.
\p
\v 18 Inikaꞌa siꞌimeta joame, Lios aapo junaꞌa. Jesukrijtota
ito betchiꞌbo yaakaꞌue aamak itom ito tuꞌuteneꞌ betchiꞌbo
itom aꞌ tuꞌu yaꞌariakame. Intok ket siꞌimem aamak bem
emo tuꞌuteneꞌ betchiꞌbo, itom ameu nokneꞌ betchiꞌbo itom
aꞌ tekil makak.
\v 19 Bweꞌituk Lios, Krijtota ito betchiꞌbo aꞌ yaakaꞌue,
siꞌimem inim, aamak a emo tuꞌutineꞌ betchiꞌbo aꞌ tuꞌuwa
yaak. Juꞌu yoemrata betana, ka tuꞌik bem yaꞌarit, ka nappat
amet bichakai. Itom intoko, Krijtota nok lutuꞌuriata
aapoꞌikumak emo tuꞌute betchiꞌbo weyemta itom ameu aꞌ
teuwaa betchiꞌbo, itom aꞌ tekia makak.
\v 20 Junuen san itepo, Jesukrijtota betana, aapoꞌik nok
lutuꞌuriata teuwaa iꞌawakai, te yeteu bittuari. Lios
aapo emou nokbaeka, itom enchim tejwaaneꞌ betchiꞌbo, itom
emou bittuarikai. Junuen san, itepo emou ujbwana, junuen
Jesukrijtota betana lutuꞌuriakai, Liojtamak enchim emo
tuꞌuteneꞌ betchiꞌbo.
\v 21 Krijto, jakwoo juniꞌi, tua kaita ka tuꞌuwata yaakai,
taa ito betchiꞌbo juꞌu Lios, aapoꞌik ka tuꞌu yoemtukaꞌa
benasi au aꞌ chupak. Junuen beja itom Krijtotamak eaka
aꞌ sualeka, Liojta jukaꞌa, ka tuꞌik, kaita itom yaꞌarikaꞌa
benasi, a itom tuꞌu mabetneꞌ betchiꞌbo.
\c 6
\p
\v 1 Junuen san, itepo, Liojta betana tekilta itom nau
joaꞌapo amani, emou te ujbwana, Liojta tuꞌisi yee nakeka
yee aꞌ jiokoeꞌuta, aapoꞌik betana enchim juꞌuneiyaatuari,
ka aꞌ koptaka aet jiapsine.
\v 2 Bweꞌituk aapoꞌik betana nok lutuꞌuriapo inen jiia:
\q Wasuktiat enchim aniaꞌeaꞌut ne enchi jikkajak.
\q Intok taewait enchim a jinneꞌuituneeꞌut, ne enchi jikkajak.
\q Maa iꞌan junaꞌa juꞌu wasuktia, em aet anianaaꞌu.
\q Intok iniꞌi taewai junaꞌa, em a aet jinneꞌuituneeꞌu.
\p
\v 3 Kaabeta te jitat jiꞌoptua. Junuen Liojta betana
tekilta itom joaꞌut, kaabem ka tuꞌisi ae tana nokneꞌ
betchiꞌbo.
\v 4 Taa ala itepo siꞌimeku itom joaꞌut, ite ito juꞌuneiyaa
iꞌa Liojta nesaupo itom ito bichaꞌpo. Itepo ka seej
chukti eaka a boꞌo bichakai jiokot ito bichakai, obiachisi
intok kokko maisi itom ito bichaꞌ nasuk juniꞌi.
\v 5 Bweꞌituk itepo bepsuite. Intok te eꞌetasuak. Juebenam
betana ka itomak eewaka, ka tuꞌisi bitwakai. Tekilpo
unnaa betteku ito bichakai, yette kokkote. Intok te tebaure.
\v 6 Taa ketchia, iniat ite ito juꞌuneiyaa iꞌa, siꞌimeku,
tuꞌisi itom jiapsaꞌutchi, Liojta betana nok lutuꞌuriata
aꞌ teuwaaꞌut, itom juꞌuneiyaaꞌue, ka seej chukti eaka
a boꞌo bichakai. Intok itom a yee jiokoleeꞌue. Liojta
tuꞌu jiapsiwata itot juꞌuneiyaa tebokai. Intok tua junuen
jiaka, itom a yee nakeꞌue.
\v 7 Aa nokiꞌichiata jakwoo juniꞌi ka nokakai. Lutuꞌuriata
jiba te nooka. Intok Liojta a jita joaꞌuta itot bit
tebokai. Tuꞌi lutuꞌuriata nokaka intok aꞌ boꞌo jooriaka,
junae itepo, Krijtota betana weyemtae, juebenam Krijtota
sualneꞌ betchiꞌbo am aniakai.
\v 8 Jamak watem betana te tuꞌisi bitwaka eiyaawa. Jamak
intok te ka yoꞌoriwa. Jamak, tuꞌisi itot nokwa. Jamak
intok ka tuꞌisia. Kulupti te ket ka lutuꞌuriata teuwaame
benasi bitwa. Taa junuentaka juniꞌi, lutuꞌuriata ausuꞌlik
te nooka.
\v 9 Kulupti te ket, ka taꞌeewame benasi bitwa. Jamak
intok tuꞌisi taꞌeewame benasia. Kulupti intok ket itom
suꞌapeame ka mekka itou aane, taa te ka susuꞌawa. Jiokot
joowaka juniꞌi, te ka kokko.
\v 10 Siokame bebenaka juniꞌi, jiba te allea. Tua kaitae
ito ania machika juniꞌi, juebenam te, juꞌu, Liojta betana
siꞌimek bepa eiyaawatchisi machikue am ania. Tua te
kaita jipueka juniꞌi, kaita itou beꞌee.
\p
\v 11 Krijtopo itomak werim, Korintoꞌ teaꞌpo joomem.
Tua te witti nokaka, emou te ito yeu bwijlaa. Kaita intok
emou yeu bwij machika itot aayuk.
\v 12 Ito betana tua kaita juꞌu ka itom enchim nakeꞌu.
Ala emo betana weye juꞌu ka itomak eaka enchim ka itom
nakeꞌu.
\v 13 Emou ne ujbwana, senu achaiwaita aꞌ yoemiammeu
aꞌ ujbwanaꞌa benasia, in enchim nakeka, emou in ino yeu
bwisekaꞌa benasia, enchim witti itou nokaka, enchim neu
emo yeu bwijneꞌ betchiꞌbo.
\s Lios, jiba yuu jiapsamta, teꞌopom benasi te maachi
\p
\v 14 Emeꞌe, jumeꞌ ka Krijtota sualemmak, ka amemak emo
chupbaekaꞌeenee emo jujubekai. Bweꞌituk junuentuko, jiba
ka nanacha eewamta ama aune. Bweꞌituk juꞌu tuꞌisi weyeme,
juꞌu ka tuꞌik mak, ka a jootu. Juꞌu lutuꞌuria aukame
juniꞌi, aa nokiꞌichiataka ka lutuꞌuriatamak ka a kuute.
\v 15 Krijto juniꞌi, jum bebejeꞌeritamak, tokti kaachin
a aamak eene. Juꞌu Krijtota sualeme juniꞌi, juꞌu ka aꞌ
sualemtamak kaachin nau tuttuꞌine, nau eaka bem jiapsineꞌ
betchiꞌbo.
\v 16 Intok jum teꞌopompo, Liojta jiba yoꞌoriwaꞌpo juniꞌi,
jumeꞌ ka liosimtaka yoꞌoriwame, ka ama kia. Emeꞌe intok
junameꞌem, jumeꞌe, juꞌu Lios jiba yuu jiapsamta betchiꞌbo,
teꞌopom benasi eiyaawame. Jiba aapoꞌik Liojta aꞌ teuwaakaꞌa
benasi inen jiakai:
\q Amemak ne naj kuaktinee intok amemak ne jiapsine.
\q Nejponee ameu Liojtune, bempo intok in yoemratune, ti
jiakai.
\m
\v 17 Junuen san ket inen aꞌ teuwaak:
\q Jumeꞌ ka tuꞌik boꞌo jooriame betana em ame nasuk yeu
katne.
\q Intok ka amemak emo tuꞌurine, ti jiia juꞌu itom achai
Lios.
\q Intok jukaꞌ ka tuꞌik ka joobaane.
\q Junak ne enchim mabetne.
\q
\v 18 Junak intok, emeꞌe nee yoꞌowane.
\q Emeꞌe intok in ou yoemiamtunee intok in jamut yoemiamtune,
\q Ti jiia juꞌu achai Lios siꞌimeku yumaka, siꞌimeta a
joame.
\c 7
\p
\v 1 Junuen san, Krijtopo itom nakeꞌum, inile benaka Liojta
betana itou naꞌikiari, junuen san itepo ka tuꞌisi itom
aet tawaneeꞌut te ito aet suuane. Itom jooneeꞌut intok
kia itom eiyaaneꞌu betana juniꞌi. Intok Liojtat ee majjaekai,
siꞌimeku wepulsi Liojta betchiꞌbo jiba jiapsaka, itom
aet yeu yumaꞌaneeꞌut ito temaine.
\s Jumeꞌ Korintoꞌ teaꞌpo joomem, Liojta bichapo ka bat naataka benasi bem jiapsaꞌu
\p
\v 2 Tua em junen jiaka, itom yoemꞌeiyaaka itom mabetne.
Kia te jabetau juniꞌi ka tuꞌik ka yaꞌari. Intok kia
te kaabeta ka tuꞌikut aꞌ majtala juniꞌi. Intok te kia
kaabeta jitaꞌapo bai taꞌaari juniꞌi, jita au waatakai
ujyoisi au nokaka.
\v 3 Kannee jitat ka tuꞌisi enchim tawaneꞌeti jiaka
inikaꞌa teuwaa. Bweꞌituk bat naataka in emou jiakaꞌa
benasia, tua junen jiaka, enchim in nakeꞌpo enchim etejoriakai,
junuen, emomak jiapsaka oo emomak mukneeka juniꞌi.
\v 4 Tuꞌisi ne emot yoemꞌea, intok emo betchiꞌbo in ino
uttiaꞌu net aayuk. Siꞌimeku, jiokot itom ito bichaꞌ nasuk
juniꞌi, ka in koꞌom eaꞌu net aayuk. Intok ama butti in
alleaꞌu.
\p
\v 5 Bwiaraa Maserooniaꞌ teaꞌu itom yajakaꞌpo naateka
te ka yanti ela. Taa ala, obiachika itou weyeme itou
aayuk. Itom bejeꞌewaꞌu jiba itou aayuk. Intok itom am
majjaeꞌu.
\v 6 Taa juꞌu Lios, jumeꞌ rojiktiꞌeame, jiapsi jojoame,
itom ou bujtala, jukaꞌ Tiitoꞌ teamta itou aꞌ tojakai.
\v 7 Intok ka junae betchiꞌbo jiba, taa ket aapoꞌik emo
betana aꞌ yantelaꞌuta aet bichakai. Aapo itom etejoriak,
tuꞌisi enchim itom bitpeaꞌpo. Intok jukaꞌ enchim emo
sioktuaꞌpo. Intok nee betana enchim jiokotꞌeaꞌpo. Inien
sannee ketun cheꞌa juniꞌi alleaka taawak.
\p
\v 8 Juꞌu jiꞌojtei in emou bittuakaꞌue, emeꞌe rojikteka
taawak oꞌoben. Taa iꞌan ne kaachin ne jiia, ka aꞌ juiwakai.
Bat naataka ala aꞌ juiwak, juꞌu jiꞌosiata in emou bittuakaꞌue,
chuubaa, ka enchim alleaꞌuta juꞌuneiyaakai.
\v 9 Iꞌan ala ne allea. Taa ka junuen enchim siokaꞌ
betchiꞌbo. Ala junuen enchim siokaka, enchim emo jiapsi
temaeka, taꞌabwisi enchim eakaꞌ betchiꞌbo. Intok emeꞌe,
junuen ka alleaka juniꞌi, kaachin emo eetuaka, junuen
Liojta bichapo tuꞌisi aayuk. Inien san itepo emou jiꞌojteka,
kaita te ka tuꞌik emou yaak.
\v 10 Bweꞌituk senuk siokakai, Liojta betana weemtat
au jiapsi temaeka, Liojta aꞌ alleetuaneeꞌuta aꞌ jinneꞌuituneeꞌuta
aet jajamne. Intok inia betana kaabe aet siokne. Taa
inim aniapo weemta betchiꞌbo senuk au sioktuaneeꞌu, kokkowame
jiba ama aayuk.
\v 11 Emeꞌe em sioksi eaka junuen ka jain eaka emo temaeka,
Liojta alleetuak. Intok iꞌani, em aꞌ mammate jukaꞌ emou
yeu aꞌ sikaꞌapo. Bweꞌituk jukaꞌ ka tuꞌi weyemta enchim
aet mammatetuak intok enchim yaꞌari emeꞌe yeu aa bwisek.
Ka tuꞌisi aukamtamak, enchim ka junaemak alleaꞌuta. Enchim
ee majjaeꞌuta emot autuak. Chukula intok emeꞌe nee bitpeꞌeak.
Intok ama naa buustia emeꞌe wepulsi nau eaka, jukaꞌ ka
tuꞌisi aukamta, bettesi au aꞌ chupneꞌ betchiꞌbo em aet
nesawek. Siꞌime inile benakue emeꞌe emo juꞌuneiyaatebok,
inile benaka ka tuꞌiku, kaita enchim ama yaꞌariakaꞌpo.
\v 12 Junuen san, junako, inepo junakaꞌa jiꞌojteita ne
emou bittuakai, kanne, juꞌu ka tuꞌik yaakamta betchiꞌbo,
intok kia juꞌu ka tuꞌik au yaꞌawakamta betchiꞌbo jiba,
emou jiꞌojtek, taa ala, Liojta emot juꞌuneaꞌpo juꞌuneakai,
enchim tua itot emo temaeꞌut, enchim emo juꞌuneiyaaneꞌ
betchiꞌbo ne emou jiꞌojtek.
\v 13 Inia betchiꞌbo san itom yanti elaꞌu itot aayuk.
\p Taa ketunia iniat itom alleaꞌ nasuku, cheꞌa tee naa
buusti allea, Tiitoꞌ teamta yantelaꞌuta bichakai. Bweꞌituk
enchim siꞌimem betchiꞌbo aꞌ yantelaꞌu aet aayuk enchim
yoem eiyaakai.
\v 14 Junuen san inepo, enchim uttiaka, Tiitoꞌ teamtau
enchim etejokai, kannee jiꞌobek. Taa ala siꞌimeta jukaꞌ
itom emou teuwaarita aꞌ lutuꞌuriatukaꞌa benasia, junuen
ketchia, enchim uttiaka Tiitoꞌ teamtau itom teuwaakaꞌu,
ka aa nokiꞌichiatukan, itom emo betchiꞌbo yantelaꞌati
jiakai.
\v 15 Aapo juꞌu Tiito intok, cheꞌa juniꞌi enchim nake,
enchim siꞌimem aꞌ nok jikkajakaꞌuu waatekai. Intok enchim
ka emo jabeleka taa enchim ee majjaeka aꞌ mabetakaꞌuu
waatekai.
\v 16 Alleane, siꞌimeku in a enchim yoemꞌeiyaꞌ betchiꞌbo.
\c 8
\s Totomekame benasi eaka, jumeꞌ yee mikame
\p
\v 1 Iꞌan intoko Krijtopo nemak werim, enchim te etejoriabae,
jum bwiaraa Maserooniaꞌ teaꞌpo siꞌimekut Krijtota sualeme
beꞌekatana, Liojta betana aniawaka, bem yee jiokoleeꞌuta
amet itom aꞌ bichaꞌpo.
\v 2 Bempo, obiachikut, jiokot bem emo bichaꞌ nasuk juniꞌi,
intok junae betchiꞌbo koꞌomꞌeꞌeaka su, tuꞌisi bem alleaꞌu
amet aayuk. Intok tua kaita bem jipueꞌ nasuk juniꞌi,
kaachin jiaka, totomekame benasi yeeꞌania betchiꞌbo, yumaꞌik
nau tojak.
\v 3 Ineponee am juꞌuneiyaa, tua junen jiaka, siꞌimeta
bem ama yumaꞌalaapo aman bem nau aꞌ tojakaꞌpo. Intok
naa buusti, ka junakaꞌa jiba, taa cheꞌa ae bepa eaka nau
aꞌ tojakai.
\v 4 Tuꞌisim itou ujbwanak, jumeꞌ Krijtopo itomak werim
ania betchiꞌbo, bempo ket am aniabaekai.
\v 5 Intok ketun naa buustia, itom ame tana boꞌo bichaꞌu
bepa ayukamme. Bweꞌituk bempom cheꞌa bat, yoꞌowe Jesukrijtotau
emo suꞌu tojak, aꞌ yoemꞌeiyaakai. Intok aet chukula, itowi
ket emo suꞌu tojak, Liojta junen eakaꞌpo amani.
\v 6 Junuen san itepo, Tiitoꞌ teamtau te ujbwanla, aapoꞌik
bat naataka emo nasuk aꞌ naatekaꞌuta junuen enchim yee
jiokoleka a yeeꞌaniaꞌu betana, intok aapoꞌik emo nasuk
nau aꞌ toji taitekaꞌa benasia, iꞌan, bichau bicha aꞌ weetuaka,
aet yeu yumaꞌaneꞌ betchiꞌbo.
\v 7 Junuen siꞌimeku enchim yumaꞌa benasia, Krijtota
tuꞌisi sualeka, aꞌ lutuꞌuriat tuꞌisi juꞌuneakai, tuꞌisi
a yee aꞌ majtakai, tuꞌisi siꞌimekut jiapsekai, intok itom
juniꞌi, tuꞌisi nakekai, junuen san emeꞌe ket inikaꞌa tuꞌik,
enchim yee jiokoleka, a yee aniaꞌuta, ka koptaka aꞌ boꞌo
jooriane.
\p
\v 8 Inikaꞌa ne emou teuwaa, taa ka aꞌ nesau jiꞌojteitukaꞌa
benasi, ala ne waatem, jumeꞌ inien iniat jiapsekammet
enchim mammate iꞌaka emot nee juꞌuneebae, enchim yee
nakeꞌuta tua aꞌ lutuꞌuriatukaꞌpo.
\v 9 Bweꞌituk emeꞌe jaibu aꞌ juꞌuneiyaa, itom yoꞌowe
Jesukrijtota betana, aapoꞌik ama butti yee aꞌ nak jiokoleeꞌuta
kaita au beꞌeeka, aapo kaitaꞌpo jiokot eaka juniꞌi. Taa
tuꞌisi enchim aꞌ nakekaꞌ betchiꞌbo, inim bwiapo jiokot
au bichak. Junuen beja, aapoꞌik inim jiokot au aꞌ bichakaꞌu
betchiꞌbo, jiba yuu betchiꞌbo tuꞌik, intok kaita emou
beꞌeeka, enchim aamak aꞌ bitneꞌ betchiꞌbo.
\p
\v 10 Inia weemta betana nee enchim etejoriabae, tuꞌik
emo tana waatakai. Emeꞌe, wae wasuktiat naateka, tuꞌisi
em aꞌ naatek. Inia weyemta betana ka kia aet jiapseka
jiba taa tua junen jiaka aꞌ joobaekai.
\v 11 Iꞌan emeꞌe bichau bicha aet yeu yumaꞌane. Bat
naatakai enchim aet jiapseka aꞌ naatekaꞌa benasia, iꞌan
enchim au yumaꞌalaapo nau aꞌ tojakai.
\v 12 Bweꞌituk seenu, tua junen jiaka yee aniabaeꞌeteko,
juꞌu Lios aꞌ jipueꞌpo aman beekik aꞌ tuꞌu mabetriane.
Bweꞌituk aapo juꞌu Lios, kaita jipuemta, ka utteꞌa jooria
yee aꞌ anianeeꞌut.
\p
\v 13 Katte enchim, kaita jipueka juniꞌi, yee enchim anianeeꞌut
enchim utteꞌa jooriabae oꞌoben.
\v 14 Ala, nanancha enchim emo bitneꞌ betchiꞌbo weye.
Iꞌani emeꞌe, bempoꞌim ania betchiꞌbo aꞌ jipue. Chukula
intok enchim jiokot eao, bempo enchim ania betchiꞌbo
aꞌ jipuꞌune. Inien san nanancha enchim emo eiyaaꞌu emot
aune.
\v 15 Liojta nok lutuꞌuriapo aꞌ jiꞌojteitukaꞌa benasia
inen jiakai: “Juꞌu, yuꞌin nau aꞌ tojakamtau, kaita aet
beꞌeeka. Juꞌu intok, iliikik nau aꞌ tojakamtau, ka au
beꞌeeka.”
\s Tiitoꞌ teame intok waate aamak rejteme
\p
\v 16 Taa Liojta te bai saune, jukaꞌ Tiitoꞌ teamta jiba
in emot ino temaeꞌe benasia, aapoꞌik ket, Liojta junuen
aꞌ eetuakaꞌ betchiꞌbo.
\v 17 Bweꞌituk aapo, in aet aꞌ tejwaakaꞌuta mabetak.
Intok aapo emot tuꞌisi au aꞌ temaeꞌpo amani, iꞌan aapo
aꞌ eaꞌpo enchim aman bichiꞌise.
\p
\v 18 Intok aapo, Tiitoꞌ teamtamak ket seenuk, Krijtopo
itomak werik te emou bittuabae. Iniꞌi intok, siꞌimekut,
Krijtota nau sualeme beꞌekatana Krijtota nok lutuꞌuriata
tuꞌisi a yee aꞌ majtaꞌ betchiꞌbo tuꞌisi uttiawa.
\v 19 Intok ka inia betana jiba, taa ketchia, siꞌimekut
jumeꞌ Krijtota sualeme, jiba inikaꞌa Krijtopo itomak
werik, yeu puꞌatuk, itomak aꞌ boꞌo jooneꞌ betchiꞌbo. Intok
jiba inim tekilpo, jukaꞌ yee ae aniabaawaka, nau aꞌ toji
betchiꞌbo yeu puꞌatuk. Junuen itom boꞌo jooriaꞌue, Jesukrijtota
yoꞌorinaaꞌu au auneꞌ betchiꞌbo intok ket, tua enchim
aet jiapseka enchim joopeaꞌuta emot juꞌuneiyaanaꞌ betchiꞌbo.
\v 20 Intok junuen ket itepo, inia yee aniabaawaka itom
nau tojaꞌu betana juꞌu itom aꞌ sawaꞌpo betana te ito
suuabae, junuen, kaabem ka tuꞌisi itot nokneꞌ betchiꞌbo.
\v 21 Bweꞌituk itepo tee, jukaꞌ itom joaꞌut tuꞌisi te
aet yeu yumaꞌabae, yoꞌowe Jesukrijtota bichapo intok
ket siꞌime yoemrata bichapo juniꞌi.
\p
\v 22 Tiitoꞌ teamtaimmak intok ketchia, juchi seenuk,
Krijtopo itomak werik te emou bittua. Inikaꞌa ketchia,
juebena weemtat tuꞌisi aꞌ jiapsekaꞌpo te aꞌ juꞌuneiyaa.
Intok iꞌani, junaꞌa cheꞌa juniꞌi junen eaka emou weebae,
emot tuꞌisi aꞌ yoemꞌeaꞌu betchiꞌbo.
\v 23 Senuk intok, Tiitoꞌ teamta aꞌ jabetukaꞌpo aꞌ nattemaeo,
am tejwaane, nee betana aꞌ weyeꞌpo. Intok enchim ania
betchiꞌbo, Jesukrijtota betana tekilta nemak aꞌ joaꞌapo.
Oo jumeꞌ waate Krijtopo itomak werim betana am nattemaeo
juniꞌi, am tejwaane, jumeꞌ Krijtota nau sualeme betana,
aman am bittuarimtukaꞌpo. Intok Jesukrijtota bem yoꞌoriteboꞌpo.
\v 24 Junuen san, jumeꞌ Krijtota nau sualeme aꞌ juꞌuneiyaaneꞌ
betchiꞌbo, tua lutuꞌuriapo enchim am nakeꞌepo aman, tuꞌisi
am bitne. Intok junuen em juꞌuneeneꞌ betchiꞌbo, lutuꞌuriaka,
tuꞌisi ameu enchim itom etejoꞌpo.
\c 9
\s Krijtota sualeme ania betchiꞌbo, juꞌu nau tojiwakame
\p
\v 1 Jumeꞌ Liojta yoemiam enchim am anianeeꞌut, lutula
weeꞌpo ka utteꞌa, in emou jiꞌojteneꞌpo.
\v 2 Bweꞌituk jaibu nee enchim juꞌuneiyaa, tua junen
jiaka, enchim yee aniabaeꞌpo. Jiba ne enchim uttiaka,
jumeꞌe, bwiaraa Maserooniaꞌ teaꞌpo, Krijtota sualemmeu
enchim eꞌetejo. Enchim, jumeꞌ Akaayaꞌ teaꞌpo joomem, wae
wasuktiat naateka, enchim yee aniaꞌpo au enchim yumaꞌapo.
Intok juebenaka, jumeꞌ Maserooniaꞌ teaꞌpo joomem, Krijtota
sualeme, junuen enchim bichaka, ket junaet emo temae.
\v 3 Junuentaka juniꞌi, inimeꞌe Krijtopo itomak werim
ne emou bittuala. Inia weemta betana junuen, jukaꞌ tuꞌik
in emo tana teuwaarita, ka aꞌ aa nokiꞌichiatukaꞌpo aman
bem aꞌ juꞌuneiyaaneꞌ betchiꞌbo, intok in ameu jiaꞌa benasia,
lutuꞌuriapo siꞌimeku yumaꞌisi enchim emo jipuꞌuneꞌ betchiꞌbo.
\v 4 Kulupti juniꞌi, waate, bwiaraa Maserooniaꞌ teaꞌpo
joomem, nemak emou katbaane, intok junuen, kee enchim nau
aꞌ tojaosu, emou yajine. Iniꞌi junuen ito betchiꞌbo tiusi
machine, itepo siꞌimeku enchim yoemꞌeiyaasukai. Emo betchiꞌbo
cheꞌa juniꞌi tiusi machinee oꞌoben.
\v 5 Jiba inia betchiꞌbo san ne aꞌ utteꞌa tu machiak,
inimeꞌe Krijtopo itomak werimmeu ujbwan betchiꞌbo, bempoꞌim
nepat bat emou noitineꞌpo, intok bempoꞌim enchim am aniaka,
jukaꞌ yeeꞌania betchiꞌbo, bat naataka enchim nau tojirokakaꞌuta,
aꞌ yumaꞌarianeꞌ betchiꞌbo. Intok junueni, jukaꞌ enchim
nau tojineeꞌuta, jaibu emeꞌe aꞌ jipuꞌune, tua enchim yee
jiokoleka aꞌ joaꞌuta, emot juꞌuneiyaatebokai. Intok ka
junuen, itom enchim aet utteꞌa jooriaꞌpo benasi aꞌ weyeꞌpo.
\p
\v 6 Iniau em waate, juꞌu ka yuꞌin echakame, ketchia iliikik
ama toboktane. Juꞌu intok, yuꞌin echakame, ketchia yuꞌin
jichupane.
\v 7 Weꞌepulaka bem aꞌ tuꞌureꞌpo aman, tua junen jiaka,
yee mikne. Intok ka kia ka babalekai, utteꞌapo benampo.
Bweꞌituk juꞌu Lios, jumeꞌ tua junen jiaka, alleaka yeeꞌaniame,
am nake.
\v 8 Juꞌu Lios, siꞌimeta jukaꞌ ka nanau machika, emou
tuꞌik, yumaꞌisi emou aꞌ chupaꞌane. Junuen beja, siꞌimeta
emou beꞌemta, jiba enchim aꞌ jipuꞌuneꞌ betchiꞌbo. Intok
naa buustia, emeꞌe yuꞌin aꞌ jipuꞌune, junuen, siꞌime yeteu
tuꞌikue a yeeꞌaniane.
\v 9 Liojta nok lutuꞌuriapo inen jiꞌojtei:
\q Jumeꞌ jiokot emo bichammeu, jukaꞌ tuꞌik, kaita beꞌeeka,
yumaꞌisia ameu autuari juꞌu Lios.
\q Intok juꞌu tuꞌuwa aꞌ yaꞌari, jiba yuu betchiꞌbo tatawane.
\m
\v 10 Juꞌu Lios, juꞌu bachiata et betchiꞌbo yee mikame,
intok jukaꞌ bwaꞌanaamta bem bwaꞌaneeꞌuta ameu aꞌ buꞌuuriame,
aapo ketchia, siꞌimeta jukaꞌ et betchiꞌbo emou beꞌemta,
enchim mikne, intok emou aꞌ amuituane. Intok junuen, tuꞌik
yeteu enchim joaꞌu betana, ama butti tuꞌik emeꞌe aet
jajamne.
\v 11 Junuen beja emeꞌe, kaita emou beꞌeeka, siꞌimeta
jipuꞌune. Junuen yuyuꞌin yee mik betchiꞌbo emeꞌe ama
yumaꞌane. Intok jukaꞌ enchim am aniaꞌ betchiꞌbo, itomak
enchim aman bittuakaꞌue, jumeꞌ Krijtopo itomak werim,
Liojta aet bai saune.
\v 12 Bweꞌituk itepo, jumeꞌ Krijtopo itomak werim, junuen
aniakai, katte, jukaꞌ ama ameu beꞌeeꞌut jiba te am ania.
Taa ketchia, bempoꞌim tua junen jiaka, tuꞌisi Liojta am
bai sauneeꞌut te a am ania.
\v 13 Bempo Liojtam aet yoꞌorine. Bweꞌituk inia enchim
am aniaꞌue bempo aꞌ juꞌuneiyaanee junuen lutula weeꞌpo,
Jesukrijtota nok lutuꞌuriatat enchim aet yeu yumaꞌapo.
Intok jiba junaet enchim yee jiokoleeꞌut bempoꞌim intok
juebenam aniaꞌut, Liojta yoꞌoritebone.
\v 14 Intok bempo juniꞌisu ket, emo betchiꞌbo, Liojtau
bicha nokne, tuꞌisi enchim emo naktuakai, Liojta tuꞌisi
yee aꞌ nakeꞌuta emot bichakai.
\v 15 Liojta te tuꞌisi aet bai sae, jukaꞌ aapoꞌik betana
siꞌimek bepa eiyaawatchisi machika itot aꞌ autuariꞌ
betchiꞌbo. Jukaꞌ itom tua witti intok juꞌunakkiachisi
aꞌ teuwa betchiꞌbo, ka itom au yumaꞌuta.
\c 10
\s Paplota, Krijtota betana yeꞌa puꞌaritukaꞌpo aman, juꞌu aꞌ nesaweꞌu
\p
\v 1 Inepo Paplo, Jesukrijtota tuꞌik yeteu jiapseka intok
yee a jiokoleꞌe benasi enchim eiyaaka, emou ne ujbwanaka
inen nooka. Nee betana inen jiuwa, emo mak aneka, ne ino
koꞌom eiyaꞌati jiuwa, taa mekka nee emou aneo intok junak
emou jiꞌojteka, bettesi ne nokaꞌati jiia.
\v 2 Junuen san emou ne ujbwana, chukula aman nee emou
yebijneeo, waatem jumeꞌ itom eaꞌpo inim bwiapo aꞌ weyemta
itom boꞌo jooriaꞌati jiaka itot nokame, ka junuen aꞌ
utteꞌatuneꞌ betchiꞌbo, kuttipo in ameu nokneꞌ betchiꞌbo,
emo tuꞌutene. Bweꞌituk ameu ne ino yumaꞌalee, junuen
kuttipo in ameu nokneꞌpo.
\v 3 Lutuꞌuria ala, itom inim bwiapo yoememtaka itom
naj kuakteꞌpo. Taa jukaꞌa, Jesukrijtota betchiꞌbo itom
boꞌo jooriaꞌuta, ka juꞌu inim yoemrata bem aꞌ joaꞌa benasia
aꞌ weetua.
\v 4 Bweꞌituk juꞌu inim bwiapo itom boꞌo jooriaka, yee
itom majtaꞌu, ka tuꞌik bejeꞌeka, itom ae ito jinneꞌuꞌu,
ka inim boꞌo jooriawame. Ala iniꞌi, Liojta betana weyeka,
junuen ket siꞌimeta jukaꞌ Liojta bejeꞌeka weyemta, tokti
aꞌ kobaꞌ betchiꞌbo, utteꞌak.
\v 5 Junuen san itepo, sua machika, siꞌimeta jukaꞌ Liojta
bejeꞌeka nokwamta, intok kia jachin aꞌ bejeꞌeka weyeka
juniꞌi, jumeꞌ cheꞌa emo eiyaaka, junuen jukaꞌ Liojta ka
aꞌ sual teboka jukaꞌ bem nokaꞌuta, te, tua kaita lutuꞌuriata
aꞌ jipueꞌuta te yeu aꞌ machia. Intok siꞌimem wameꞌe
inim weyemta betana emo susuawaleme, juꞌu bem eaꞌu betana,
itepo, Krijtotau bem emo suꞌu tojaka junuen bem aꞌ nok
jikkajineꞌ betchiꞌbo, te am utteꞌa jooria.
\v 6 Intok itepo te, siꞌimem jumeꞌe, emo nasuk ka ammaꞌali
aneme, bettesi ameu itom aꞌ yechaꞌaneꞌpo te ama yuuma.
Taa cheꞌa bat, enchim siꞌimem jumeꞌ watem, jaibu yumaꞌisi
Krijtotau enchim emo suꞌu tojilamtukaꞌpo bat juꞌuneaki.
\p
\v 7 Emeꞌe, jukaꞌ enchim bichaꞌuta, paꞌaria tana aꞌ bichame
benasi maachi. Intok tua wajiwa jachin aꞌ weyeꞌut ka
aꞌ juꞌuneiyaa. Senu intok, Jesukrijtota betana aꞌ yoemiaritukaꞌpo
au juꞌuneiyaame ket inien ito tana au waatine, ket jiba
junaeni, aapoꞌik benasi, itom juniꞌi, Krijtota yoemiamtukaꞌpo.
\v 8 Ineponee intok, itou aꞌ lutuꞌuriatukaꞌpo aman, cheꞌa
ili naa buusti emomak weyeꞌeteko juniꞌi, kaachin ne ino
tiutua. Bweꞌituk juꞌu itom yoꞌowe Jesukrijto, inikaꞌa
emou lutuꞌurianeeꞌuta itot autuari. Junuen, enchim Liojta
betana weyemta, yumaꞌisi enchim majta betchiꞌbo te au
yumaꞌatuari. Intok ka junuen ka tuꞌik enchim ae bittua
betchiꞌbo.
\v 9 Kanne inimeꞌe jiꞌosiam in emou bittuaꞌummea, in
enchim wom womtaꞌa benasia enchim ee iꞌa.
\v 10 Waate, net nokaka, jumeꞌ jiꞌosiam in emou bittuaꞌum,
unnaa betteka intok kuttipo am nokaꞌati jiia. Taa ne
intok, emomak aneꞌeteko intok, nee ka junaen ousi nonokaꞌ
tea. Intok juꞌu in teuwaaꞌu juniꞌi, ka jikkajipeewatchiꞌ
tea.
\v 11 Taa juꞌu intok, inile benak teuwaame, iniau waatine,
junaen mekka betana emou jiꞌojteka, itom junuen emou
nokaꞌa benasia, itom emomak aneka, te jiba junaen juꞌu
itom joaꞌue, itom aet yumaꞌaneꞌpo.
\p
\v 12 Itepote kia juniꞌi te ka ito ameu chatchaa, jumeꞌ
waatem, bempo emo eiyaateboka, yeteu nokame benasia. Inimeꞌesan,
ka suasim aane. Bempo emo naas nau tammachiakai intok
bempo naas jitat nanancha emo joakai.
\v 13 Itepote kaa, juꞌu ka itom au yeu puꞌari betchiꞌbo
ito uttiabae. Lios ala, aapo junaꞌa juꞌu, jakun tajtia,
juꞌu tekileu itom yeu puꞌame. Intok aapo, jum bweꞌu joꞌara
Korintoꞌ teaꞌu, itom emou yeu yajineꞌ betchiꞌbo, itom
aet aniak juꞌu tekilet tuꞌisi itom yeu katneꞌ betchiꞌbo.
\v 14 Junuen san itepo, katte juꞌu itom au yeu puꞌari
bepa te aane. Bat naataka ka emou lutuꞌuriakame benasi
anekai. Bweꞌituk itepo junameꞌem, jumeꞌ cheꞌa bat emou
yajaka, Krijtota nok lutuꞌuriata enchim majtakame.
\v 15 Intok te ka juꞌu tekil watem yaꞌarit te ito uttiatebo,
itepo aꞌ yaꞌariꞌi benasia. Taa ala, inen te yeu aꞌ wee
iꞌa, enchim bichau bicha cheꞌa juniꞌi tuꞌisi Krijtota
sualeo, emo nasuk tekilta, cheꞌa juniꞌi itom aꞌ jooneꞌpo.
Taa jiba Liojta betana, itom au yeu puꞌatukaꞌpo amani.
\v 16 Iniat chukula tee ket, cheꞌa naa buustia, kat baa
saka emou wannaꞌabo, intok junuen, jukaꞌ Krijtota nok
lutuꞌuriata, cheꞌa waꞌam bicha, taꞌabwi bwiaarampo joꞌaakammeu
aꞌ teuwaa betchiꞌbo. Taa ka junuen, juꞌu tekil watem
yaꞌarit ito uttia tebokai.
\p
\v 17 Taa jabe juniꞌi, senuk uttiabaeme, yoꞌowe Jesukrijtota
jiba uttiane.
\v 18 Bweꞌituk juꞌu tuꞌisi mabettuneeme, ka juꞌu au tuꞌisi
jiapsaꞌati jiame junaꞌatune. Taa ala, waꞌa Liojta, tuꞌisi
aꞌ jiapsaꞌpo aet aꞌ juꞌuneaꞌu junaꞌatune.
\c 11
\s Paplo, intok jumeꞌ ka lutuꞌuriapo Krijtota tekil joame
\p
\v 1 Tuꞌi ean, emeꞌe, juꞌu ka tua suasi benasi machik
in teuwaabaeꞌut, nee jiokoeko. Taa jachinpo juniꞌi, nee
aet jiokoine.
\v 2 Bweꞌituk enchim in nakeka in emot jiapsekaꞌu, net
aayuk, Liojta itom nakeꞌe benasia. Bweꞌituk inepo, Jesukrijtota
enchim sualtualataka, chukula, enchim au aꞌ bit iꞌa, jamut
bemeta, ka tuꞌik kaita yaꞌarika, wepuꞌulaik jiba aꞌ kunakaꞌa
benasia.
\v 3 Taa jukaꞌ bebejeꞌerita a yee aꞌ bai taꞌaaꞌue, jukaꞌ
Ebaꞌ teamta, ka tuꞌik aꞌ yaꞌatuakaꞌa benasia, enchim ket
junaen emo bai taꞌaateboneeꞌut ne emo tana majjae. Intok
enchim tua junen jiaka enchim Krijtota yoꞌoreeꞌut, ka
intok enchim aet emo temaineeꞌu betana.
\v 4 Bweꞌituk emeꞌe, unnaa amemak tuꞌik, jumeꞌe, Jesukrijtota
betana ka itom enchim aꞌ majtakaꞌa benasia taa taꞌabwisi
emou nokammake. Intok emeꞌe, Liojta tuꞌu jiapsi jaibu
mabetlamtaka juniꞌi, ka jain eaka taꞌabwik jiapsitau
emo suꞌu tojak. Intok Krijtota betana, jukaꞌ nok lutuꞌuriata
jikkajisuka juniꞌi, taꞌabwisi weyemta intok, sualbae.
\v 5 Bweꞌituk, jumeꞌ emo jabeleka chukula emou yajaka,
intok taꞌabwisi enchim majtakame, jumeꞌ enchim jikkajipeaꞌum,
nee ka cheꞌa nee bepa am eiyaa machia.
\v 6 Nejponee ala, jumak, kannee ujyoika intok yeu puꞌata
benak nooka oꞌoben. Taa Krijtota betana jukaꞌ lutuꞌuriata,
ne yumaꞌisi aꞌ juꞌuneiyaaka, kaita neu beꞌee. Inikaꞌa
intok tee jiba enchim juꞌuneiyaatuala, siꞌimeku itom
boꞌo jooriaꞌue.
\p
\v 7 Oo nee ka tuꞌisi aayuk jaꞌani, junak, Krijtota betana
nok lutuꞌuriata enchim majtaka, kaita emou waatakai, intok
ino koꞌom eiyaakai, junuen jukaꞌ emou tuꞌik jiba emo
tana waatakai.
\v 8 Inepone, jumeꞌ Krijtota nau sualeme, watem betana
tomita mabetak, bempoꞌim neu naꞌikiakaꞌuta mabetakai,
ae ino aniaka, junuen Krijtota betana tekilta emo nasuk
joaka, enchim kaabeta obisi net eetuakai.
\v 9 Intok nee junak emomak anekai, kaita jipuekai juniꞌi,
emo nasuk kaabeta nee net obisi eetuak. Bweꞌituk jumeꞌ
Krijtopo itomak werim, bwiaraa Maserooniaꞌ teaꞌa betana
yajakame, in ino ae anianeeꞌuta, neu nuꞌupak. Junuen beja
nee aet ino suuak, kaitaꞌpo enchim net obisi eeneꞌ betchiꞌbo.
Intok ne jiba junaen, bichau bicha aꞌ boꞌo jooriabae.
\v 10 Junuen san, Jesukrijtota betana jukaꞌ lutuꞌuriata
tua yumaꞌisi ne in aꞌ taꞌaaꞌpo, tua in juꞌuneaꞌa benasia.
Ket ne junuen juꞌunea, in inien ae ino uttiaka, Liojta
bichapo in boꞌo jooriaꞌu, jum bwiaraa Akaayaꞌ teaꞌpo
siꞌimekut, kaabe inia betana taꞌabwisi nee eetuane.
\v 11 Kanne taꞌabwi weemta betchiꞌbo intok, inien jiia.
Taa tua in enchim nakeꞌ betchiꞌbo jiba. Lios nee juꞌuneiyaa,
jaikisia in enchim nakeꞌpo.
\p
\v 12 Taa ne, jukaꞌ in joaꞌuta, jiba ne aꞌ boꞌo jooriabae
junuen jumeꞌ jitat jiawiteka bem uttianaaꞌuta jaiwame,
ka junuen in am au iꞌaꞌ betchiꞌbo. Intok ka ito benasia
bem emo aꞌ boꞌo jooria ti jiuneꞌ betchiꞌbo.
\v 13 Bweꞌituk inimeꞌe, ka lutuꞌuriapo Krijtota betana
yeu puꞌarimtakai, yeem bai tattaꞌaa, Krijtota betana yeu
puꞌarim benasia emo tammachiakai.
\v 14 Taa iniꞌi intok, kaita ka juꞌuneiyaawamta teuwaa.
Bweꞌituk juꞌu bebejeꞌeri, aapo juniꞌi, taꞌabwisi au yaaka,
lutuꞌuriapo Liojta betana aꞌ weyeꞌe benasia au jooa.
\v 15 Junuen san, jumeꞌ aamak eaka intok aꞌ eaꞌpo aman
kateme, jiba junaen ale benasi, taꞌabwisi emo yaaka, tuꞌik
boꞌo jooriame benasi a emo joone. Taa inimeꞌe, jiba juꞌu
bem yaꞌari betchiꞌbo, junaen ka tuꞌisi ameu chupne.
\s Paplota, Krijtota betana yeꞌa puꞌatukaꞌpo aman, junuen jiokot au aꞌ bichaꞌu
\p
\v 16 Juchi weeꞌpo ne inen emou jiia, kaabe, ka in suuakaꞌa
benasia nee eiyaane. Taa junuen emeꞌe nee eiyaꞌateko,
junaen ket, ka in suuakaꞌa benasia em nee emou noktua.
Junuen beja ne ket, ili ino uttiaka emou nokneꞌ betchiꞌbo.
\v 17 Inikaꞌa intok, in emou nokbaeꞌuta, ne ka Jesukrijtota
betana aet sawaka aꞌ teuwaa. Taa inia betana, in ino
uttianeeꞌu ti jiaka ne ka tua ino suareka aꞌ teuwaa.
\v 18 Inim aniapo betana weyemtae, juebenam emo uttiame
aneꞌe benasia, junaen ket nee ino uttiabae.
\v 19 Bweꞌituk emeꞌe, tuꞌisi emo koba susuawarekai, jumeꞌ
ka susuawakame, kaachin jiaka alleaka am jikkajibaane.
\v 20 Bweꞌituk emeꞌe, jumeꞌ enchim utteꞌapo am ania iꞌame,
oo jumeꞌe, tuꞌik enchim jipueꞌuta enchim uꞌaame, oo jumeꞌe,
emou bem yoꞌotukaꞌa benasi aneme, oo jumeꞌ enchim ka
tuꞌureme, oo jumeꞌ ka enchim yoꞌoreme, oo jumeꞌ pujbat
enchim choname, emeꞌe junuen am tuꞌureme benasi aane.
\v 21 Inien inepo jiuneeka juniꞌi ne tiiwe oꞌoben. Bweꞌituk
itepote ala, tua ka iniau ito yumaꞌalek, ka inien anbaekai.
\p Taa jukaꞌa, watem emo au yumaꞌaleka bem joaꞌuta, inepo
nee ket iniau yumaka aꞌ jooa. Inikaꞌa intok inepo nee
kia in eaꞌpo aman aꞌ teuwaa, ka suawaekamta nokamta benasia
aꞌ teuwaa oꞌoben.
\v 22 Jumeꞌ waate enchim majtame, ebreeo yoemrata betana
kateo, nejpo juniꞌi ketchia. Bempoꞌim ijraꞌeliita yoemrata
betana kateo, nejpo juniꞌi ketchia. Bempoꞌim Apraꞌamtukaꞌuta
yoemrammet yeu am katriamtuko, nejpo juniꞌi ket ne aet
yeu simria.
\v 23 Bempoꞌim Krijtopo betana aꞌ nesauri am joao, nejponee
ket, cheꞌa juniꞌi ame bepa junakaꞌa tekilta jooa. Taa
ne inikaꞌa inien teuwaaka, ka in eaꞌpo aman, taa emo tana
utteꞌa jooriawakaꞌa benasia nee aꞌ teuwaa. Bweꞌituk
ne cheꞌa juniꞌi ame bepa tekilta yaꞌari. Cheꞌa juniꞌi
ne ame bepa Krijtota betchiꞌbo bepsui. Cheꞌa juniꞌi
nee ame bepa yuꞌin eꞌetasuak. Jue benasi intok ne bat
batte memeꞌesuak.
\v 24 Mamni weeꞌpo jumeꞌ juriom nee jiokot yaak. Senu
taka ama woj mamni ama batanisia, waka bea jibebiae nee
bepsukai.
\v 25 Bajisia, kuta jibebiae ne bepsuak. Sejtul intok
nee mamaasuak. Bajisia, jumeꞌ bawepo bweꞌu kuta kanoam
in ama boꞌo jooakaꞌum, jekae, bawe mayoau nee tetammet
kotti yeu biaktawak. Intok sejtul nee, bawe nasuk, tukaapo
intok taewaimpo bawepo yeu bajumeka ino jinneꞌuk.
\v 26 Jue benasi nee wokimmea naas simla. Intok ne batweempo
tuꞌisi jinilwatchisi aꞌansuk. Yee eꞌetbwariame nasuk
ne jinilwatchisi ne ino bichak. Intok jumeꞌ nele benasi
yoemrata, intok kia taꞌabwi yoemrata nasuk juniꞌi, ne
jinilwatchisi ino bichak. Jum bwere joꞌarampo juniꞌi,
intok ka joꞌara beꞌemu, intok kia bawepo juniꞌi, jinilwatchisi
ino bichak. Intok jumeꞌe, ka lutuꞌuriapo Krijtota sualeme
nasuk juniꞌi, ne jinilwatchisi jiapsak.
\v 27 Tekilpo intok obiachiku nee ino bitchuk. Jue benasi
ne ka kokkotchuk. Baꞌae mumukeka, intok jiokot maisi
nee tebbaurek. Binwa ne kaita bwaꞌamachika jiapsisuk.
Seberiata nee jiokot ineꞌesuk. Intok nee ka tajoꞌosuk.
\p
\v 28 Inikaꞌa intok waate weemta neu weyeꞌ nasuk juniꞌi,
chikti taꞌapo ne cheꞌa juniꞌi bettesi aꞌ inneꞌa, jumeꞌ
siꞌimekut Krijtota sualeme betana in amet ino temaeꞌpo,
tuꞌik ame tana waatakai.
\v 29 Senuk, jabeta, Krijtota sualeka, taa kee aet suatuu
nejpone, aamak ino machiakaꞌa benasia ne ea. Senuk, ka
tuꞌikut jiꞌoptuawako, nejposu nee tiurae intok omtiae
nee jiokot eene.
\v 30 In ino uttianeeꞌuta utteꞌatuko, nejponee inia weemtae,
ka in ino cheꞌewareeꞌuta intok ka in siꞌimem bepa machiakaꞌuta
teuwaaka, junae nee ino uttiane.
\v 31 Juꞌu itom yoꞌowe Jesukrijtota achai Lios, juꞌu
jiba betchiꞌbo yoꞌoriwame, aapo juꞌunea, lutuꞌuriata in
teuwaaꞌpo.
\v 32 Jum bweꞌu joꞌara Lamajkoꞌ teaꞌpo nee aneo, juꞌu
kobanao, jukaꞌ senu rei Areetaj teamtau weyekame, junamaꞌa
bweꞌu joꞌaraapo yeu katwaꞌu bicha nee bwiseka, nee weeyaaneeme
joak.
\v 33 Taa ne senu bweꞌu warita benaku, junamaꞌa bweꞌu
joꞌara, mekka jikat kora yaꞌaripo bepa omot wikiae ne
koꞌom yechaꞌawak. Inien sannee junameꞌe betana ino jinneꞌuk.
\c 12
\s Tenkupo benasi weyeka intok, juꞌu Liojta betana Paplota juꞌuneiyaaꞌu
\p
\v 1 Junuen ne, tuꞌik betana ino uttiaka nokaꞌateko, tuꞌik
ne kaita ne aet tettea. Ala ne, achai Liojta betana, in
mabetri, tenkupo benasi in bichakaꞌuta intok ae betana
lutuꞌuriata in juꞌuneiyaatuarita neu aune.
\v 2 Senuk oꞌouta, Krijtota sualemta ne taꞌaa. Junaꞌa
intok woj mamni ama naiki wasuktiam simsukaꞌpo, teekau,
Liojta yoꞌotaka katekaꞌu jikau noitawak. Kannee juꞌunea,
chikti aꞌ takaamak aman aꞌ noitekaꞌpo, oo kia aꞌ jiapsi
jiba. Ala Lios aapo juꞌunea.
\v 3 Taa nee juꞌunea, junakaꞌa oꞌouta, aꞌ takaamak, oo
ka aꞌ takaawamak, junakaꞌa ne ka juꞌuneiyaa, Lios aapo
jiba aꞌ juꞌuneiyaa.
\v 4 Junaꞌa, jumeꞌ Krijtota sualeka kokkokame yaajaꞌu
noitek. Junamani nokta, tua ka a juꞌuneiyaatumta aꞌ jikkajak.
Inikaꞌa nokta intok, inim yoeme, ka au chaꞌaka aꞌ teuwaaneꞌpo.
\v 5 Senuk, junuen, aapoꞌik benasi maachik yoemta, ala
ne uttiane. Taa ne, inepo, kaitat intok ino uttia, taa
juꞌu kaabeta bepa cheꞌa in machiakaꞌut jiba ne ino uttia.
\v 6 Nee intok, junuen ino uttiabaeꞌeteko juniꞌi, kannee
ka suasi an ean oꞌoben. Bweꞌituk ne junuen lutuꞌuriata
jiba nok ean. Taa ne ka ino uttiabae, junuen kaabeta
net aꞌ bichaꞌu, oo net aꞌ jikkajaꞌu, cheꞌa bepa ka nee
aꞌ eiyaaneꞌ betchiꞌbo.
\p
\v 7 Junaꞌa, Liojta betana ama butti suum watchisi intok
eiyaawatchisi machik in juꞌuneiyaatuawakaꞌu betchiꞌbo,
intok nee ka ama bea butti in ino uttianeꞌ betchiꞌbo,
koꞌokoata nee inneꞌetuak, wichata net kiktekaꞌaweelaꞌpo
benasia. Iniꞌi wantia intok, bebejeꞌerita betana inen
weyeka, ne ka ama eltuaꞌ betchiꞌbo neu suꞌu tojiri.
\v 8 Inikaꞌa koꞌokoata intok, nee aꞌ suꞌu tojineꞌ betchiꞌbo,
bajisi, yoꞌowe Jesukrijtotau ne au ino nokriak.
\v 9 Taa juꞌu Jesukrijto inien nee aꞌ juꞌuneiyaatuari,
aapoꞌik betana tua yee aꞌ nak jiokoleka yee aꞌ bichaꞌut
jiba in eeneeꞌu. Intok junuen senuk ka cheꞌa bepa au
aꞌ eiyaaꞌue, aapoꞌik a jita aꞌ joaꞌuta, junuen cheꞌa tuꞌisi
aꞌ juꞌuneiyaatuneeꞌu. Inien san nee inien jiapsaka ne
cheꞌa aꞌ tuꞌure. Junuen weyeka beja, jukaꞌ Jesukrijtota
a jita aꞌ joaꞌuta, net aꞌ bitnaꞌ betchiꞌbo.
\v 10 Junuen san ne aet yanti ela juꞌu inim jiapsaka
neu weyemta betana. Jaana in jiawaawaꞌut. Jukaꞌ ka in
jipuꞌusukaꞌutchi. Intok jukaꞌ neu suawaka, ka in bibitpeewaꞌut.
Intok jukaꞌ obiachika, Krijtota betchiꞌbo in aet jiokot
ino bichaꞌut. Bweꞌituk ne junuen, in jiapsaꞌ nasuk juniꞌi,
Krijtota betana juꞌu a jita aꞌ joaꞌuta, cheꞌa juniꞌi
neas yeu maachi.
\s Korintoꞌ teaꞌpo Krijtota sualeme betana, Paplota jachin au eetuaꞌu
\p
\v 11 Inim nee inien jiba inepo nee betana tuꞌisi in
jiapsaꞌuta teuwaakai, senuk tua ka suawaekamta benasi
nee aulaa. Taa emeꞌe junameꞌe jumeꞌ nee inien noktuakame.
Bweꞌituk emeꞌe junameꞌemtukan jumeꞌ nee uttiaka nee
tana tuꞌik teuwaaꞌeaꞌum. Bweꞌituk inepo nee kaitaꞌpo
nee a ino yeu tawaa machia, inimeꞌe ka lutuꞌuriapo, Krijtota
betana emo kateꞌeti jiame bepa, jumeꞌ enchim amemak eaꞌum.
Junuen nee intok kaitaꞌpo cheꞌa ne ino eiyaao juniꞌi.
\v 12 Emomak aneka, jukaꞌ tekilta, ka aꞌ rojiktaka, ino
ou bujtaka emo nasuk in yaakaꞌue, machilae juꞌuneiyaatuk,
Liojta a jita joaꞌue, intok suum watchisi machikue junuen
tua lutuꞌuriapo, Krijtota betana in yeteu bittuaritukaꞌpo.
\v 13 Enchim nee, jiba jumeꞌ wate siꞌime Krijtota sualeme
benasi amewit nee tuꞌisi enchim bichak. Ala inepone,
kaitaꞌpo nee enchim nee aniatuak. Iniae nee ka ammaꞌali
emomak ayuko, nee em aet jiokoe.
\p
\v 14 Iꞌanne iniamak beja, bajisi ne emou noitine. Intok
junuentaka juniꞌi kaitaꞌpo nee enchim net obisi ee iꞌa.
Bweꞌituk kannee jita enchim jipueꞌuta emot jaiwa. Ala
ne, emo tana su, tuꞌik waatakai. Bweꞌituk jumeꞌ achaiwaim
junameꞌem, jumeꞌe, bem yoemiam betchiꞌbo tomita yoꞌoneeme.
Intok ka jumeꞌ yoemiarim junameꞌe, jumeꞌ bem yoꞌowam
betchiꞌbo.
\v 15 Inepo intok, ne kaachin jiaka, alleaka, jukaꞌ in
jipueꞌuta ne emot wiutane. Intok ne kia inepo juniꞌi,
ne ka ino beutia, enchim jinneꞌuimtuneeꞌuta cheꞌa emo
tana waatakai. Taa emeꞌe intok, cheꞌa in enchim nakeꞌ
nasuk su, cheꞌewasu ka nee eiyaame bena.
\p
\v 16 Taa waate, kaitaꞌpo enchim net obisiꞌeakaꞌpo, tuꞌisi
juꞌuneaka juniꞌi, ne enchim bai taꞌaaka ne etbwa emot
eak, ti jiia.
\v 17 Jaisa ne enchim bai taꞌaabaeka, jumeꞌ watem emou
bittuak jaꞌani. Emeꞌesu juꞌunea, ka aꞌ lutuꞌuriatukaꞌpo.
\v 18 Tiitoꞌ teamtau ne ujbwanak, emou aꞌ noitineꞌ betchiꞌbo.
Intok ket ne aamak, senuk Krijtopo itomak werik bittuak.
Jaisa enchim bai taꞌaak jaꞌani juꞌu Tiito. Emeꞌe su
juꞌuneakai, aapoꞌik intok neetchi, nanancha itom eaka
siꞌimeta nanancha itom aꞌ boꞌo jooriaꞌpo.
\p
\v 19 Jaisa emeꞌe jumak, itom ito nokriaka inien emou
jiaꞌatiꞌea. Taa ka junuen weye. Ala te, Liojta itom juꞌuneiyaaꞌpo
juꞌuneaka intok Krijtota betana lutuꞌuriaka emou nooka.
Taa siꞌime iniꞌi, Liojta betana weyemtat cheꞌa juniꞌi
yumaꞌisi enchim aꞌ taꞌaaneꞌ betchiꞌbo weye, Krijtopo
itomak werim, tuꞌisi in nakeꞌum.
\v 20 Bweꞌituk ikaꞌa ne ama au machia. Nee emou noiteo
jumak juniꞌi, ka in emot juꞌuneiyaabaeꞌu su, ama emot
aunee tiꞌeakai. Intok kia enchim juniꞌi, ka enchim net
boꞌo bichaꞌu su, enchim net juꞌuneiyaaneꞌpo. Ka baeka
juniꞌi, ne inen ea, enchim emo ee bejeꞌeeꞌuta intok jitat
ka nat tuꞌuriwamta, emo omtawamta, emo cheꞌewariwamta,
cheꞌa emo eiyaawamta, ka lutuꞌuriata yetet nokwamta, jitat
ka yee tuꞌuriwaka yetet nokwamta, emo jabeliwamta intok
ka suasi jiapsiwamta, inikaꞌa siꞌimeta ne ama au machia.
\v 21 Iꞌan ne emou noitineeo, inen nee yeu aꞌ wee machia,
enchim, Liojta bichapo tiusi nee tawaaneꞌpo. Intok kia
ketchia, enchim juebenam betchiꞌbo in bwanneꞌpo. Jumeꞌ
binwatuk naateka, Liojta bichapo emo nasuk ka tuꞌisi
jiapsame betchiꞌbo. Junuen, inikaꞌa ka ammaꞌali anwamtat
ka emo temaeme. Intok jukaꞌ tattaꞌabwi jaamuchim mak,
kaꞌam jubekai juniꞌi, amemak emo tuꞌuriwamta intok siꞌimeta
jukaꞌ ka tuꞌik bem au joiwalataka boꞌo jooriaꞌutat, ka
emo temaeme.
\c 13
\s Jiꞌojtesuka, juꞌu Paplo am sua tejwaaka intok am tebotua
\p
\v 1 Iniamak ne beja, bajisi ne aman emou noitine. Siꞌime
juꞌu emo nasuk ka tuꞌisi weyeme, wooi oo bajika aꞌ juꞌuneiyaaka,
machisi aꞌ teuwaaneeme betana jiba tuꞌutenaa.
\v 2 Intok jumeꞌe, bat naataka ka tuꞌisi ayukame intok
kia siꞌimem, iꞌan nee ket, mekka emou aneka, juchi jukaꞌa,
wosa in emou noiteka in enchim aet sua tejwaakaꞌuta,
juchi enchim aet tejwaa. Iꞌan, in juchi emou noiteka,
kutti in emou aꞌ yechaꞌaneꞌpo.
\v 3 Junak emeꞌe, jukaꞌ enchim juꞌuneiyaabaeꞌuta bitne,
Krijtota betana juꞌuneetuawaka, aapoꞌik betana weyemta
in teuwaaꞌpo. Juꞌu yoꞌowe Jesukrijto intok, enchim sua
tejwaakai, kuttipo emou nooka. Intok ama naa buustia,
siꞌime utteꞌata aet ayukaꞌuta emo nasuk yeu aꞌ machia.
\v 4 Lutuꞌuria ala, tua kaita utteꞌata aet ayukaꞌa benasia,
kuuset aꞌ poponwakaꞌpo. Taa Liojta betana utteꞌata aet
autuawakaꞌue, iꞌan junae, jiba yuu jiapsa. Junuen san
ket itepo, ale benasi te ito eiyaaka, kaita utteꞌakame
benasi te mamachi. Taa itepo aamak eakai, Liojta betana
aniawaka te jiapsine, Krijtota betana weyemtat enchim
ania betchiꞌbo.
\p
\v 5 Emeꞌeꞌem emo aet temaine, ka taꞌabwisi intok jiapsita
bepa Krijtota enchim sualeꞌpo juꞌunee betchiꞌbo. Bweꞌituk
juꞌu Jesukrijtota tuꞌu jiapsiwa, lutuꞌuriapo emot jiapsa.
Enchim junuen ka jiapsita bepa lutuꞌuriapo aꞌ sualeo.
\v 6 Taa itepo ala te, enchim juꞌunee iꞌa, itom ka junuen
aa nokiꞌichiapo itom aꞌ sualekaꞌpo.
\v 7 Intok jiba te Liojtau bicha enchim nokria, junuen
enchim kaita ka tuꞌuwata boꞌo joorianeꞌ betchiꞌbo. Ka
junuen, watem, itom tekilta betchiꞌbo itom am uttia iꞌaka.
Taa kia beja te tuꞌik jiba enchim joo iꞌakai, elaꞌpo
su itepo junae, tuꞌik betana ka lutuꞌuriakame benane.
\v 8 Bweꞌituk itepo, katte a jukaꞌ Liojta betana lutuꞌuriata
bejeꞌeka aane. Ala tee, siꞌimeta itom boꞌo jooriaꞌuta,
Krijtota nok lutuꞌuria nokriaka aꞌ jooa.
\v 9 Inia betchiꞌbo san te yanti ela junuen itepo kaitau
yumame benakai, taa itepo enchim siꞌimeku yumamebaekai.
Intok jiba te bichau bicha Liojtau bicha enchim nokriane,
junuen siꞌimeku, Krijtota benasi enchim jiapsineeꞌuta
enchim jajamneeꞌuta emo tana waatakai.
\v 10 Inikaꞌa jiꞌojteita ne bat emou bittua, kee emou
noitekai, junuen chukula emomak aneka, emomak etejoka,
ka unnaa bettesi emou in nokbaeꞌ betchiꞌbo. Bweꞌituk
yoꞌowe Jesukrijtota betana, kutti in emot nesaweeꞌuta,
nee au yumaꞌatuari. Taa junuen emou nokaka, Liojta betana
lutuꞌuriat yumaꞌisi enchim aꞌ taꞌaaneꞌ betchiꞌbo. Intok
ka junuen, ka tuꞌikut enchim jiꞌoptua betchiꞌbo.
\p
\v 11 Iꞌan intoko Krijtopo nemak werim, Lios emo maktune.
Enchim inien tuꞌisi enchim jiapsineeꞌut em emo temaine.
Emoꞌem naas jiapsi joꞌane. Siꞌimeku em wepulsi nau eene.
Yantelaka nau jiapsine. Intok junuen juꞌu Lios, yantelwamta
yetet autuame, intok tuꞌisi yee nakeme, aapo emomaktune.
\v 12 Emeꞌe intok ket, tua naksi emo eiyaaka, naas emo
tebotuane.
\p
\v 13 Siꞌime jumeꞌe, Krijtopo itomak werimtaka, inim aneme,
utteꞌesia enchim tebotua.
\v 14 Yoꞌowe Jesukrijtota betana jukaꞌ emou tuꞌik em
mabetne. Intok Liojta jiba enchim nakneeꞌuta em bitne.
Intok Liojta tuꞌu jiapsiwa jiba emomaktune. Tua junuentune.