\id GAL
\h KAALATAM
\toc1 KAALATAM
\mt Kaalatam
\c 1
\s Juꞌu Paplo, siꞌime jumeꞌ bwiaara Kalaasiaꞌ teaꞌpo Krijtota sualemmeu jiꞌojte
\p
\v 1 Inepo Paplo, Jesukrijtota betana sawaka nee yeteu
bittuari. Ka inim senuk betana nok lutuꞌuriata weiyaaka
intok kia ka inim watem betana yeu puꞌaritakai. Ala
jiba aapoꞌik Jesukrijtota betana intok juꞌu Lios achaiwai,
juꞌu aapoꞌik kokoarim nasuk aꞌ jiabijtetuakamta betana
weyekai nee aꞌ tekil makritakai.
\v 2 Inepo intok siꞌime jumeꞌ Krijtota sualeme nemak
aneme, itepo nau inikaꞌa jiꞌosiata te emou jiꞌojte, siꞌime
jumeꞌe, bwiaara Kalaasiaꞌ teaꞌpo Krijtota sualemmewi.
\v 3,4 Itom yoꞌowa Liojta betana intok itom yoꞌowe Jesukrijtota
betana, jiba aapo juꞌu, itom ka tuꞌuwa yaꞌarimmet itom
jiokoinaꞌ betchiꞌbo, meꞌetuneeka au suꞌu tojakame, junuen
inim aniapo ka tuꞌik weyemta betana itom jinneꞌubaekai,
iniꞌi, itom Lios achaita junuen au aꞌ chupakaꞌpo amani.
Inime betana, tuꞌika enchim alleeneeꞌuta intok yanti,
kaitat jain eaka enchim jiapsineeꞌuta tee emo tana aꞌ
waata.
\v 5 Liojtau bicha aapoꞌik alleetuawaka aꞌ yoꞌorinaaꞌu,
jiba yuu betchiꞌbo au aune. Tua junuentune.
\s Ka taꞌabwika intok Krijtota nok lutuꞌuria aayuk
\p
\v 6 Emo tana tua nee aꞌ suum eiyaa, Liojta junuen lauti
enchim aꞌ koptaꞌ betchiꞌbo. Aapoꞌik jukaꞌ Krijtota, yee
aꞌ nak jiokoleꞌ betchiꞌbo, chukula teekau enchim aamak
jiapsineꞌ betchiꞌbo enchim nunukamta. Intok enchim, jukaꞌ
Krijtota betana nok lutuꞌuriata, yee jinneꞌumta, ka inikaꞌa,
taꞌabwik enchim aꞌ sualeꞌ betchiꞌbo.
\v 7 Ka junuen lutula weeꞌpo taꞌabwika intok Krijtota
nok lutuꞌuria aayuk oꞌoben. Senu weeme ala aayuk, inim
waate ka enchim yanti eltuaka intok inimeꞌe, Krijtota
bemela nok lutuꞌuriata taꞌabwisi enchim aꞌ majtabaeme
ama aneꞌepo.
\v 8 Taa jabetaka juniꞌi, waꞌa enchim taꞌabwisi weyeka
Krijtota betana nok lutuꞌuriata, ka juꞌu itom enchim
aꞌ majtai benasi enchim aꞌ majtaꞌateko, junaꞌa, Liojta
betana ka tuꞌisi aꞌ tawaanaaꞌuta au chupne. Iniꞌi, elaꞌpo
su, jiba ito betana senu weyekai, oo kia teeka betana
senu ankeles weyeme tuneeka juniꞌi, ka tuꞌisi aꞌ tawaanaaꞌuta
au chupne.
\v 9 Inikaꞌa nee juchi emou aꞌ teuwaa, jabetaka juniꞌi,
Krijtota bemela nok lutuꞌuriata, taꞌabwisi, ka bat naataka
jukaꞌ enchim jikkajaka enchim sualekaꞌuta benaka aꞌ
teuwaamta aneo, iniꞌi Liojta betana ka tuꞌisi aꞌ tawaanaaꞌuta
au chupne.
\p
\v 10 Inikaꞌa inepo teuwaaka, jaisa nee inim jukaꞌ yoemrata
nee aꞌ uttia iꞌakai, oo inepo jukaꞌ Liojta nee aꞌ uttia
iꞌaka aꞌ teuwaa, jaꞌani. Kannee inim jabetamak tuꞌisi
tawabaekaꞌea. Bweꞌituk junuen inepo inim yoemratamak
tuꞌisi tawabaeꞌeteko, iꞌan kannee intok inepo, Jesukrijtota
betana weyeka intok aꞌ tekil joaka jiapsi ean.
\s Paplota Krijtota betana nokneeka, jaisa yeu aꞌ puꞌawakaꞌpo
\p
\v 11 Taa inikaꞌa emeꞌe juꞌuneiyaane, Krijtopo nemak
werim, jukaꞌ Krijtota bemela nok lutuꞌuriata in yee majtaa
tekiakaꞌuta, inikaꞌa ka jabe inim yoemta suawa betana
aꞌ weyeꞌu.
\p
\v 12 Intok nee kia ka inim jabeta betana jiꞌosiapo
jiꞌojteita majtawaka aꞌ mabetlaa. Ala jiba aapo juꞌu
Jesukrijto inikaꞌa nee aꞌ juꞌuneiyaatuak.
\p
\v 13 Emeꞌe jaibu nee betana aꞌ jikkajilaa, bat naataka
in jiapsakaꞌu betana, junako inepo inim jukaꞌ jurio yoemrata,
junuen Liojta bem sualeꞌpo aman, ketun nee amemak eaka
aꞌ sualeo. Intok emeꞌe juꞌunea, kia jumeꞌ Krijtota sualeme,
junuen tua ka ameu alleaka in ameu suuaka intok in am
luꞌutabaekaꞌpo.
\v 14 Intok inepo, jumeꞌ juriom junuen weyeka, Liojta
am sualeꞌpo, inepo nee, jumeꞌ nele benasi jurio yoemem,
newit kateka juꞌubwa yoꞌotume, inime bepa cheꞌa nee ame
bepat tulatukan yaꞌuraa tekil betchiꞌbo. Bweꞌituk inim
inepo cheꞌa tuꞌisi aet jiapseka aꞌ boꞌo joorian, jukaꞌa,
wameꞌe bat naataka in yoꞌowasukaꞌum, bem sualeka, au joiwalataka
bem boꞌo jooriasukaꞌuta.
\v 15,16 Taa juꞌu Lios, kee nee yeu yoemtuu naataka nee
yeu puꞌak. Intok aapoꞌik tua yee aꞌ nak taꞌaꞌ betchiꞌbo,
ka neu aꞌ lutuꞌuriatuk juniꞌi, aapoꞌik tekileu aapo nee
kechak. Intok chukula, aapoꞌik junen aꞌ waatakaꞌpo amani,
jukaꞌ aꞌ usiwata Krijtota nee aꞌ taꞌaatuak, junuen aapoꞌik
betana jukaꞌ bemela nok lutuꞌuriata, juꞌu ka jurio yoemrata
nasuk in yee aꞌ majtaneꞌ betchiꞌbo. Junako inien neu
yeu aꞌ siiko, inepo inia betana juꞌunee betchiꞌbo, nee
kaabetamak etejok.
\v 17 Intok ne kia jum bweꞌu joꞌara Jerusalen teaꞌu
juniꞌi ne ka noitek, junaman jumeꞌ nee bepat jaibu Krijtota
betana yeu puꞌarim inia betana am bit betchiꞌbo. Ala
nee, inepo junaman noitiꞌeaka su, nee ka boꞌo bichaka
nee bwiaara Araabiaꞌ teaꞌu ne noitek. Iniat chukula,
inepo junaꞌabo juchi nee jum bweꞌu joꞌara Lamajkoꞌ teaꞌu
nottek.
\p
\v 18 Intok inepo, jum bweꞌu joꞌara Jerusalen teaꞌu, kannee
aman siika. Baji wasuktiam simsuk chukula inepo aman
sikaari. Junako jukaꞌ Peota nee aꞌ taꞌaak. Intok junamaꞌa
nee woj mamni ama mamni taꞌapo nee aamak ama taawak.
\v 19 Taa junamaꞌa, wameꞌe Krijtota yeu puꞌarim betana
kaabeta intok ne ama bichak, kia jukaꞌ Jakooboꞌ teamta
jiba, Jesukrijtota sailawata jiba nee ama bichak.
\v 20 Inikaꞌa in emou jiꞌojteꞌuta, Liojta bichapo nee
tua aꞌ lutuꞌuriatukaꞌuta nee enchim aꞌ tejwaa.
\p
\v 21 Inim, iniat chukula nee intok bwiaara Siiriaꞌ teaꞌu
intok Siliisiaꞌ teaꞌu ne siika.
\v 22 Jumeꞌe, bwiaara Jureaꞌ teaꞌpo Krijtota sualeme,
inimeꞌe ka nee bit taꞌaan.
\v 23 Bempo senu weemta jiba nee betana jikkajilamtakai:
“Juꞌu bat naataka itou ka alleaka itou suaꞌu, iniꞌi
iꞌan Krijtota aꞌ sualwaꞌu betana yee aꞌ majta. Inikaꞌa,
bat naataka wasuktiammet aapoꞌik aꞌ luꞌutabaekaꞌu ti,”
jiuwamta.
\v 24 Intok inimeꞌe inien neu yeu aꞌ sikaꞌ betchiꞌbo,
Liojta baisaeka bem aꞌ yoꞌoreeꞌuta au aꞌ teuwaan.
\c 2
\s Jumeꞌ wate Krijtota yeu puꞌarim Paplota mak eakaꞌpo
\p
\v 1 Junama woj mamni ama naiki wasuktiam sikaa, chukula
nee juchi bweꞌu joꞌara Jerusalen teaꞌu ne noitek. Inim
juꞌu Bernabeeꞌ teamtamake. Jukaꞌ Tiitoꞌ teamta intok
ket inepo aꞌ weiyaakai.
\v 2 Ineponee junaman noitek, Liojta betana junaman in
weeneeꞌut juꞌuneetuawakai. Junaman Jerusalenpo inepo
jumeꞌ waate Krijtota sualeme nasuk jumeꞌ cheꞌa bat eiyaawaka,
siꞌimeku yoꞌowe benasi bitwame, omola bempoꞌimmak jiba
anekai, inepo, jukaꞌa, jumeꞌ ka juriom nasuk Krijtota betana
bemela nok lutuꞌuriata in yee majtaꞌuta nee am juꞌuneiyaatuak.
Inien ne aayuk, jukaꞌ in joaꞌuta, inikaꞌa bempoꞌimmak
jumak juniꞌi tuꞌisi aꞌ weyeꞌut juꞌuneebaekai.
\v 3 Taa inim, kia juꞌu Tiitoꞌ teame, nemak weamaꞌu, aapo
ka jurio yoemtaka juniꞌi, ka aet nesawak, aapoꞌik au sirkunsiraaroaneeꞌu
betana.
\v 4 Ala lutuꞌuria junamaꞌa wate, ka lutuꞌuriapo Krijtota
sualeme aneꞌepo, inimeꞌe etbwa ito nasuk kimulamtaka
aꞌ sirkunsiraaroa iꞌan. Inimeꞌe, wateku kia itot mammatebaeka
ama yajilamtukan. Inimeꞌe junuen, Jesukrijtotamak eaka
aꞌ sualeka, inia betchiꞌbo Moiseejtukaꞌuta nesauri jiꞌojteim
betana, utteꞌataka joowamta, itou bicha ka aꞌ utteꞌatukaꞌuta
itot aꞌ juꞌuneiyaabaekai. Intok inimeꞌe, jumeꞌ nesaurim,
juchi utteꞌapo itom am joaka jiapsineꞌ betchiꞌbo itom
utteꞌa jooriabaekai.
\v 5 Taa itepo, kia chubala jitaꞌapo juniꞌi te ka amemak
eak. Bweꞌituk itepo, Krijtota betana jukaꞌ bemela nok
lutuꞌuriata, bichau bicha, ka taꞌabwisi intok enchim aꞌ
sual iꞌakai.
\p
\v 6 Taa junamaꞌa Jerusalenpo jumeꞌ bajika, Jakooboꞌ
teamta intok Peota intok Joanta, jumeꞌ Krijtota sualeme
nasuk cheꞌa bat eiyaawaka, siꞌimeku yoꞌowe benasi bitwame,
bempo, in yee majtaꞌu betana, kaita bemelasi weyemta nee
tejwaak. Nee intok inia betana bempoꞌim junuen bitwaka
bem eiyaawaꞌuta, iniꞌi nee betchiꞌbo kaita teuwaa bweꞌituk
Liojta bichapo itepo siꞌime nanancha bitwaa.
\v 7 Bempo jitaa bemelasi weyemta nee tejwaaꞌeaka su,
bempo nemak eaka nee betana aꞌ juꞌuneiyaak, jukaꞌ Liojta,
Krijtota betana bemela nok lutuꞌuriata jumeꞌ ka juriommeu
in aꞌ teuwaaneꞌ betchiꞌbo, aapoꞌik nee aꞌ tekil makriakaꞌuta,
jiba jukaꞌ Peota, juꞌu jurio yoemratau jiba inikaꞌa nok
lutuꞌuriata, aꞌ teuwaaneꞌ betchiꞌbo aꞌ tekil makakaꞌa
benasia.
\v 8 Bweꞌituk jiba aapo juꞌu achai Lios, jukaꞌ Peota,
yeu aꞌ puꞌaka, jurio yoemratau bichaa aꞌ bittuaka, aapoꞌik
utteꞌawae, aamaktukame, aapo ketchia, juꞌu ka jurio yoemratau
bicha nee yeu puꞌaka, aapoꞌik utteꞌawae nemaktukai.
\p
\v 9 Inia betchiꞌbo juꞌu Jakooboꞌ teame, juꞌu Peeo intok
juꞌu Joan, inimeꞌe, jumeꞌ Krijtota sualeme nasuk, eiyaawaka
siꞌimeku yoꞌowe benasi bitwame, inimeꞌe inile benaka
aapoꞌik betana tua eiyaawaka tuꞌik net aꞌ autuakaꞌuta
aꞌ tuꞌureka aꞌ bichak. Intok junamaꞌa, neetchi intok
Bernabeeta, bempo itom mam bwisek, iniae aꞌ teuwaakai,
itom nakeka, itomak bem eaꞌu, ka jurio yoemrata nasuk
ameu sajaka, aman itom tekipanoaneeꞌuta. Bempo intok
junamaꞌa jumeꞌ jurio yoemrata nasuk tekipanoabaekai.
\v 10 Inimeꞌe ala, kaita intok, kia junamaꞌa jumeꞌ tua
jiokot aneka jiapsame, itom am anianeeꞌu betana itou
nookak. Intok inikaꞌasan nee aꞌ joobaeka aet jiapsek.
\s Paplo, jum Antiokiaꞌ teaꞌpo, Peota nok tejwaa
\p
\v 11 Taa junaet chukula, jukaꞌ Peota, bweꞌu joꞌara Antiokiaꞌ
teaꞌu aꞌ yepsako, jum teꞌopopo inepo nee witti aapoꞌiku
nokaka, ka ammaꞌali aꞌ anekaꞌu betana nee aꞌ nok tejwaak.
Bweꞌituk aapo junamaꞌa juꞌu aꞌ weetuaꞌu, ka juꞌu lutuꞌuriata
mak weyen.
\v 12 Bweꞌituk aapo junamaꞌa cheꞌa bat jumeꞌ ka jurio
yoememtaka Krijtota sualemmak au weiyaaka amemak jiꞌibwak.
Taa chukula junama Jakooboꞌ teamta betana watem ama
yajako, junak aapo inime mak ka intok eaka ka intok amemak
jiꞌibwak. Bweꞌituk aapo junamaꞌa jumeꞌ waate, jukaꞌ sirkunsision
ti teaka aꞌ boꞌo jooriame, ame tana majjaekai.
\v 13 Junako junamaꞌa jumeꞌ waate jurio yoemem taka,
Krijtota sualeme, inimeꞌe, jukaꞌ Peota junuen ka lutuꞌuriataka
aꞌ joaꞌuta aꞌ bichaka, bempo ale benasi eaka, jukaꞌ kia
beja aꞌ joaꞌuta, aꞌ joo japtek. Intok kia juꞌu Bernabeeꞌ
teame juniꞌi, iniat amemak eakai.
\v 14 Taa junako inepo, inimeꞌe, ka jukaꞌ Krijtota betana
nok lutuꞌuriata itom yee majtawamta aꞌ weyeꞌe benasia,
ka iniamak weyeka am jiapsame aꞌ juꞌuneiyaakai, inepo
nau anwaꞌapo siꞌimem bichapo juꞌu Peotau: “Empo jurio
yoem takai, inim jumeꞌ ka jurio yoemem benasi emo ujuꞌuk.
Junuen san jaisaakai inimeꞌe ka jurio yoemem Krijtota
sualeme, utteꞌapo jiba jumeꞌ jurio yoemem benasi am jiapsi
iꞌa”, ti ne au jiiak.
\s Jumeꞌ juriom, siꞌime jumeꞌ wate yoemra benasi, Krijtota sualeka bem jinneꞌuimtukaꞌpo
\p
\v 15 Empo intok inepo, jurio yoemem tee yoꞌowak. Intok
itepo tee ka omot bwiaara yoemrata benasi, Liojta bichapo
ka tuꞌik tee ka aꞌ jooa.
\v 16 Junuentaka juniꞌi inim kaabeta, jumeꞌ Moiseej tukaꞌuta
nesauri jiꞌojteim boꞌo jooriaka aꞌ jiapsaꞌ betchiꞌbo
junae Liojta bichapo tuꞌisi aꞌ mabettuneeꞌuta tee juꞌunea.
Taa inikaꞌa, wepulsi Jesukrijtota betchiꞌbo aꞌ sualekai
jiba. Inia betchiꞌbo itepo ketchia Jesukrijtota tee
aꞌ suallam junuen itepo, Liojta bichapo, ka tuꞌika kaita
itot ayuka bitwaka, tuꞌisi mabettubaekai. Intok inikaꞌa,
ka nesauri jiꞌojteimpo weyemta itom aꞌ boꞌo joorialatukaꞌ
betchiꞌbo. Bweꞌituk kaabe, jum nesauri jiꞌojteimpo weyemta
aꞌ boꞌo jooriaka aꞌ jiapsaꞌ betchiꞌbo jinneꞌuitune.
\p
\v 17 Taa inim itepo Krijtota sualeka, aapoꞌik betchiꞌbo
Liojta bichapo tuꞌisi mabettubaekai, taa ketchia itepo
ka tuꞌik itom joaꞌu itot ayukai, jaisa iniꞌi aꞌ teuwaa
jaꞌani, Krijtota jukaꞌ ka tuꞌik itom joaꞌuta, aapoꞌik
itom aꞌ jootuaꞌuta. Kaachin itepo inien aapoꞌikut nokne.
\v 18 Bweꞌituk inim inepo, jumeꞌ Moiseej tukaꞌuta nesauri
jiꞌojteim sualwame bejeꞌeka, ka inimmea senuk aꞌ jinneꞌuituneꞌeti
jiaka, intok inepo chukula, iniae, Liojta bichapo tuꞌisi
itom mabettuneeꞌu aꞌ utteꞌatukaꞌuta juchi aꞌ teuwaꞌateko,
junak ala inepo tua ka tuꞌik joone.
\v 19 Bweꞌituk inepo juꞌu nesaurita betana, tuꞌisi aet
tawaa betchiꞌbo ka au yumakai, iꞌan, inia nesaurita betana
nee ka in jiapsaꞌa benasi nee ino eiyaak. Jiba juꞌu
nesauri inien nee tawaak junuen bemelasi Liojta betchiꞌbo
jiba in jiapsineꞌ betchiꞌbo.
\v 20 Inepo, Krijtotamak in eaꞌ betchiꞌbo, aamak kuuset
in popontukaꞌa benasia nee ino eiyaa. Inien san, kannee
inepo junaꞌa, witti jiapsame. Ala aapo Krijto junaꞌa
net jiapsaka aapoꞌik eaꞌpo aman nee jiapsituame. Iꞌan
inim juꞌu in takaapo in jiapsaꞌu, inepo, jukaꞌ Liojta
uꞌusi, inim tua nee aꞌ nak taꞌaaka intok aꞌ meꞌetuneꞌ
betchiꞌbo au suꞌu tojakamta, aapoꞌik nee sual taꞌaaka
aꞌ jiapsa.
\v 21 Inepo junuen, jukaꞌ Liojta yee aꞌ nak taꞌaꞌ betchiꞌbo
itou bicha aꞌ naꞌikiakaꞌuta, kannee omola aꞌ eiyaa. Bweꞌituk
inim seenu, Moiseej tukaꞌuta nesaurim am boꞌo jooriaka
aꞌ jiapsakaꞌ betchiꞌbo, junae, Liojta bichapo aꞌ mabettuneeo,
junako juꞌu, jukaꞌ Krijtota aꞌ meꞌetukaꞌuta, tua kaita
teuwaaka yeu sim ean.
\c 3
\s Moiseejtukaꞌuta nesaurim joakai, oo Krijtota sualekai
\p
\v 1 Uu emeꞌe, bwiaara Kalaasiaꞌ teaꞌpo joome. Tua emeꞌe
tuꞌika suawa kaita emot aayuk. Jabesa inim sibowamta
benasi weyeka enchim bai taꞌaak, junuen, Krijtota betana
bemela nok lutuꞌuriata inikaꞌa ka enchim aꞌ nok jikkajineꞌ
betchiꞌbo. Itepo enchim majtakai, jiba aapoꞌik Jesukrijtota,
kuuset popontukamta, machisi sep a aet juꞌunee maisi
itepo emou aꞌ teuwaaka, junak emeꞌe sep juꞌunakiachisi
tua junen jiaka aꞌ mabbetan.
\v 2 Inia betana emeꞌe nee tejwaane, emeꞌe jaisa jukaꞌ
Moiseej tukaꞌuta nesaurimpo weyemta enchim aꞌ boꞌo jooriaka
jiapsaꞌ betchiꞌbo, oo jukaꞌ Krijtota betana enchim majtawaka
enchim aꞌ sualeka aꞌ jikkajakaꞌue betchiꞌbo, Liojta betana
jukaꞌ aꞌ tuꞌu jiapsita mabetakai.
\v 3 Jaisa emeꞌe enchim suawa taꞌarulaa jaꞌani. Jaisa
weyeka iꞌan emeꞌe, wakaꞌa bat naataka ka au yumaka, junako
wepulsi Liojta tuꞌu jiapsie aniawaka, aapoꞌik betana
enchim jajamekaꞌuta, emeꞌe iꞌan, au yumaka kia enchim
a joaꞌue, naa buusti emeꞌe cheꞌa yumaꞌisi tuꞌisi Liojta
yoemiam tubae jaꞌani.
\v 4 Jaisa emeꞌe, bat naataka, jaibu enchim emo bichakaꞌu
betana, kaita aet taꞌaak jaꞌani. Tuꞌi ean ka junuentuko,
taa emeꞌe tuꞌik ama taꞌaako.
\v 5 Inim juꞌu Lios, jukaꞌ aꞌ tuꞌu jiapsiwata emot aꞌ
jiapsituaka, intok iniae jukaꞌ ka a jootu machik emo
nasuk joaka, jaisaaka aꞌ jooa. Inikaꞌa, aapo, ka Moiseej
tukaꞌuta nesauri jiꞌojteimpo weyemta enchim aꞌ boꞌo
jooriaꞌ betchiꞌbo, taa ala aapo, jukaꞌ enchim majtawaka
enchim jikkajakaꞌuta, junakaꞌa enchim aꞌ sualeꞌ betchiꞌbo
aꞌ jooa.
\p
\v 6 Juꞌu Apraꞌamtukaꞌu inim jiapsakai, aapo jukaꞌ Liojta
au bicha aꞌ naꞌikiakaꞌuta, aꞌ sualeka aet yoem eaka jiapsak.
Intok aapoꞌik inien aet yoem eakaꞌ betchiꞌbo, juꞌu Lios
iniae aapoꞌik bichapo tuꞌisi aꞌ mabetak.
\v 7 Inia betchiꞌbo emeꞌe aꞌ juꞌuneiyaane, jumeꞌ tua
lutuꞌuriapo juꞌu Apraꞌamtukaꞌutat yeu katriam benasi
taꞌeewame, inimeꞌe, wameꞌe Krijtota sualeme bem junameꞌem
tukaꞌu.
\v 8 Cheꞌa bat naatakai jum Liojta jiꞌosia jiꞌojteimpo
jaibu ama weyen iniꞌi, kia jumeꞌ ka jurio yoemem nasuk,
wameꞌe Krijtota sualeme, Liojta betana tuꞌisi bem mabetrimtuneeꞌu.
Aapo inikaꞌa bemela nok lutuꞌuriata, juꞌu Apraꞌamtukaꞌutau,
inikaꞌa: “Ee betchiꞌbo, siꞌime aniat juꞌu ka nanau machi
yoemra, nee betana jukaꞌ chukula tua ameu tuꞌik bitne”,
ti au aꞌ teuwaakai.
\v 9 Junuen san, siꞌime jumeꞌ Krijtota sualeme, inimeꞌe,
juꞌu Apraꞌamtukaꞌu, aapoꞌik Liojta sualekamtamak nau,
jukaꞌ Liojta betana weyeka, chukula tua ameu tuꞌik aꞌ
bittualaa.
\p
\v 10 Jumeꞌe, bem jinneꞌuituneꞌ betchiꞌbo, jumeꞌ Moiseej
tukaꞌuta nesaurimmet eaka amet boꞌo bichame, inimeꞌe,
ka tuꞌik ameu chupneeꞌuta bitne. Bweꞌituk jum Liojta
jiꞌosia jiꞌojteimpo: “Jabetaka juniꞌi, Moiseej tukaꞌuta
nesauri jiꞌojteimpo weyemta, ka siꞌimeta jukaꞌ ama jiꞌojteita
yumaꞌisi aꞌ joame, iniꞌi, ka tuꞌik au chupneeꞌuta bitne”,
ti ama jiꞌojtei.
\v 11 Junuen san, juꞌunakkiachi inim, kaabeta, jumeꞌ nesauri
jiꞌojteimpo weyemta aꞌ joaka jiapsakaꞌ betchiꞌbo, junae
Liojta betana tuꞌisi aꞌ mabettuneeꞌuta. Bweꞌituk jum
Liojta betana nok lutuꞌuriapo: “Waꞌa, Liojta bichapo
tuꞌisi mabettukame, iniꞌi, wepulsi Liojtat yoemꞌeaka aꞌ
sual taꞌaꞌ betchiꞌbo mabetri”, ti ama jiꞌojtei.
\v 12 Juꞌu intoko, Moiseej tukaꞌuta betana nesauri jiꞌojteimpo
weyemta boꞌo jooriaka jiapsame, iniꞌi, ka utteꞌa Liojtat
yoem eewaka aꞌ joonaaꞌuta. Taa inia betana: “Juꞌu am
joame, iniꞌi, wepulsi siꞌimekut yeu yumakame jiapsiwamta
amet bitne”, ti jiꞌojtei.
\p
\v 13 Juꞌu nesauri jiꞌojteita ka yumaꞌisi itom aꞌ chupaꞌ
betchiꞌbo, ka tuꞌisi tawarimtaka jiokot itom ito bitꞌeaꞌu
betana, aapo juꞌu Krijto itom ama yoꞌeetuak. Bweꞌituk
jiba aapo junaꞌa tuk, juꞌu, itou chupꞌeaꞌu betana ito
betchiꞌbo, senuk ka tuꞌisi tawalata tawakame. Bweꞌituk:
“Jabetaka juniꞌi, kutat jikat chayaꞌawakame, junaꞌa, Liojta
bichapo ka tuꞌisi tawaritaka bitnaa”, ti jiꞌojtei.
\v 14 Iniꞌi inien chupuk, junuen, jukaꞌ Liojta betana,
kaitau a tamachiatuka tuꞌik, aapoꞌik, Apraꞌamtukaꞌutau,
au aꞌ chupneꞌeti jiaka au aꞌ naꞌikiakaꞌuta, inikaꞌa, jumeꞌ
ka jurio yoememmeu, Jesukrijtota sualeka, bempoꞌimmeu
aꞌ naꞌikiatuneꞌ betchiꞌbo. Intok junuen, inim itepo siꞌimem,
Krijtota sualeka, jukaꞌ Liojta tuꞌu jiapsita, aapoꞌik
itou naꞌikiarita, itom aꞌ mabetneꞌ betchiꞌbo.
\s Moiseej tukaꞌuta nesaurimmet, intok Liojta betana itou naꞌikiawakamtat nokame
\p
\v 15 Emeꞌe Krijtopo nemak werim, inim jiapsiwaka joowamta
betana, iniat nee nokaka senu weemta enchim tejwaabae.
Inim, seenu, yaꞌuraata bichapo jitaa betana, senuku bicha
aꞌ lutuꞌuriatuneeꞌu betana aꞌ tuꞌu yaako, intok iniꞌi,
aapoꞌik aꞌ teawam ama aet aꞌ jiꞌojteko, junak, junuen
jiba tawaka, kaabe a au suuane.
\v 16 Iꞌan intoko ketchia, juꞌu Lios, juꞌu Apraꞌamtukaꞌutau
bicha intok jumeꞌ aet yeu katriam betana, senukuu bicha
ket aꞌ lutuꞌuriatakai. Inim aꞌ mammatene, Liojta betana
jiꞌosia jiꞌojteimpo, inimeꞌe betana ka juebenammet aꞌ
nokaꞌuta, ala, inikaꞌa wepuꞌulairiakaꞌuta jiba. Iniꞌi
intok juꞌu Krijto, aapo junaꞌa.
\v 17 Juꞌu in teuwaaꞌu, iniꞌi junaꞌa oꞌoben. Juꞌu Lios,
juꞌu Apraꞌamtukaꞌutamak, senu lutuꞌuriata aamak yaak.
Inikaꞌa intok, tua au aꞌ chupneeꞌu betana machilaatamak
weyekai. Inia betchiꞌbo san, jumeꞌ Moiseej tukaꞌuta nesaurim,
naiki siento ama senu taka ama woj mamni wasuktiam beas
chukula jiꞌojtewakame, inimeꞌe, wakaꞌa bat naataka, Liojta
betana aꞌ chupneꞌeti jiaka aꞌ lutuꞌuria yaꞌawakamta,
kaachin aawaj tuka ka yeu aꞌ yumaꞌatuane.
\v 18 Bweꞌituk jukaꞌ Liojta betana weyeka aapoꞌik yee
mikaꞌuta, inikaꞌa, jumeꞌ Moiseejtukaꞌuta nesaurimpo weyemta
am boꞌo jooriaka junaen jiba aꞌ mabetwaao, junako iniꞌi
ka jita yeteu naꞌikiaritaka yee mikwame tu ean. Taa
juꞌu yeu sikame iniꞌi junaꞌa, juꞌu Lios, Apraꞌamtukaꞌutau,
kia beja mikpo au aꞌ naꞌikiak.
\p
\v 19 Junak su, jumeꞌ Moiseej tukaꞌuta betana nesaurim,
jitau sa tuꞌika jiꞌojtewak. Inimeꞌe, cheꞌa chukula weyeka
ama jiꞌojtewak iniꞌi junuen, inim siꞌimem, Liojta bichapo
ka aꞌ joo iꞌaꞌuta, nesaurimmea inim aꞌ ayukaꞌut bem aet
juꞌuneeneꞌ betchiꞌbo. Iniꞌi nesauri jiꞌojtei ka jiba
sawaawaka, kia chukula, Krijtota, jukaꞌ Apraꞌam tukaꞌutat
yeu katriam betana weyemta, aapoꞌiku naꞌikiawamta aꞌ
yepsaꞌu tajtia jiba tu ean. Jumeꞌ nesauri jiꞌojteim,
inimeꞌe, Liojta betana ankelesim aapoꞌiku am teuwaak.
Juꞌu Moisees intok junuen, inim inime betana naa buustia
juꞌu Ijraꞌel yoemrata am juꞌuneiyaatuak.
\v 20 Taa inia betana kaabeta intok aneka, wepuꞌulaik
jiba aꞌ weyeo, ka utteꞌa naa buusti juchi senuk weeneeꞌu.
Inim intok juꞌu Lios, aapola wepuꞌulai jiba.
\s Jumeꞌ nesaurim, jaisa betchiꞌbo bem jiꞌojtewakaꞌu
\p
\v 21 Iꞌan su, jaisa iniꞌi aꞌ teuwaa machi jaꞌani, Moiseej
tukaꞌuta betana jumeꞌ nesauri jiꞌojteim, inimeꞌe, wakaꞌa
bat naataka Liojta betana tuꞌika itou chupneeka itou
naꞌikiawakamta, inikaꞌa bejeꞌeka aꞌ jiꞌojtei tukaꞌuta
jaꞌani. Kaachin inientune. Bweꞌituk nesauri, iniꞌi, jiba
yuu jiapsiwamta a aet jajamtuka yee maktuko, junak iniae,
jabe juniꞌi, Liojta bichapo a tuꞌisi mabet tu ean junakaꞌa
nesauta aꞌ joaꞌ betchiꞌbo.
\v 22 Taa iniꞌi jiba jum Liojta betana jiꞌosia jiꞌojteimpo
aꞌ teuwaari benasi, inim kaabe yeu beꞌeeka, siꞌime, Liojta
bichapo, juꞌu ka tuꞌik betana ka a emo yuꞌeeka, iniꞌi
inien weye junuen, siꞌime jumeꞌ Krijtota sual taꞌaame,
inimeꞌe, a bem aet yoem eaꞌue, jukaꞌ tuꞌika Liojta itou
bicha aꞌ naꞌikiarita, a bem aꞌ mabetneꞌ betchiꞌbo.
\p
\v 23 Bat naataka Krijtota kee inim aneka, kee aꞌ sual
taꞌeewao, juꞌu yoemra, jumeꞌ nesauri jiꞌojteim, utteꞌapo
benasi am boꞌo jooriaka, itom jiapsaꞌu. Iniꞌi, chukula
jukaꞌ sualnaamta inim yeu aꞌ machiaka aꞌ juꞌuneiyaawaꞌu
tajtia.
\v 24 Inien san juꞌu nesauri jiꞌojtei, itom illitchika,
senuk itom suuatuawamta benasi weyeka, chukula Jesukrijtota
aꞌabo aꞌ yepsaꞌu tajtia, senuk itom aꞌ majtamta benasi
machika, junuen itepo Krijtota sualeka, aapoꞌikue Liojta
bichapo a tuꞌisi itom mabettuneꞌ betchiꞌbo.
\v 25 Taa iꞌan intok, jukaꞌ Krijto sualwamta inim aꞌ
aneo, iꞌan itepo, katte intok junae bat naataka jukaꞌ
senuk itom majtamta benasi machika jumeꞌ nesauri jiꞌojteim
am boꞌo jooriaka jiapsa.
\p
\v 26 Bweꞌituk, Jesukrijtotamak eaka, aapoꞌik enchim sualeꞌ
betchiꞌbo, iniae siꞌime emeꞌe Liojta yoemiam.
\v 27 Siꞌime emeꞌe, iꞌan Krijtotamak eaka jiapsibaeka
emo batoꞌowaalame, emeꞌe jiba aapoꞌik utteꞌae, aꞌ tuꞌu
jiapsie, Liojta bichapo emeꞌe aapoꞌik benasi bitwaa.
\v 28 Iꞌan jaibu inim inia betchiꞌbo, juriotaka oo rieekotaka,
nesaupo jipuꞌuwame oo ka tekokame, oo oꞌoutaka oo jamuttaka,
kaabe Liojta bichapo taꞌabwisi eiyaawa. Bweꞌituk emeꞌe,
Jesukrijtotamak eaka jiapsakai, siꞌime emeꞌe wepul yoemta
benasi bitwaa.
\v 29 Iꞌan intoko, emeꞌe Krijtotamak eaka, aapoꞌik sual
taꞌaꞌateko, junako emeꞌe Apraꞌamtukaꞌuta yoemiammet yeu
katriam benasi bitwaa. Intok naa buustia, emeꞌe inia
betana emou aꞌ lutuꞌuriatukaꞌpo aman, jukaꞌ tuꞌika, Liojta
Apraꞌam tukaꞌutau aꞌ naꞌikiakaꞌuta, emeꞌe aꞌ mabetne.
\c 4
\p
\v 1 In emou teuwaabaeꞌu inen weye oꞌoben. Senu usiwai,
iniꞌi, chukula aꞌ yoꞌowa betana jitaa tuꞌik aꞌ atteawata,
siꞌimeta mabetneeme, iniꞌi, ketuni aꞌ ilitchiako, aꞌ joꞌawapo,
kia senuk utteꞌapo jipuꞌuwaka tekipanoatuawamta benasi
jipuꞌunaa, lutula weeꞌpo iniꞌi chukula junamaꞌa yoꞌotaka
juniꞌi.
\v 2 Junamaꞌa inikaꞌa, wate aꞌ suuaka intok aapoꞌik betana
siꞌimeku aꞌ bichame annee, chukula inikaꞌa aꞌ yoꞌowa,
junuen aꞌ bit iꞌaꞌu tajtia.
\v 3 Iꞌan intok jiba inien itou machiakan. Bat naataka
inia betana ketun ili usim benasi machikai, jukaꞌ bat
naataka katriam betana, ka nanau machika joowamta, au
joiwalataka utteꞌapo itepo aꞌ joakai.
\v 4 Taa chukula, jukaꞌ taewai au yeu puꞌarita aꞌ yumako,
juꞌu Lios, jukaꞌ aꞌ usiwata aꞌabo itou aꞌ bittuak. Aapo,
inim yoeme, senu jamut aꞌ asoakai. Intok aapo, jurio taka
inim aꞌ yepsakaꞌ betchiꞌbo, jumeꞌ Moiseej tukaꞌuta jiꞌojtekaꞌu
nesaurim boꞌo jooriaka jiapsak.
\p
\v 5 Inien aapo inim aꞌabo yepsak, junuen, itom jumeꞌ
nesauri jiꞌojteim utteꞌapo am boꞌo jooriaka jiapsame,
junae betana itom aniaka, itom ama yoꞌeetuabaekai. Intok
junuen ketchia, Liojta aꞌ yoemiam benasia itom a mabetneꞌ
betchiꞌbo.
\v 6 Junako chukula juꞌu Lios junuen jaibu aapoꞌik betana
enchim yoemiam tukaꞌpo, inia betana enchim aꞌ juꞌuneiyaa
iꞌakai, aꞌ yoemia betana jukaꞌ aꞌ tuꞌu jiapsiwata emot
jiapsituak. Intok inia betchiꞌbo, iꞌan itepo Liojtau
bicha nokaka, itom yoꞌowa ti te a au jiia.
\v 7 Junuen san beja iꞌani, empo, aapoꞌik Liojta betana
yoemiari intok iꞌan empo, ka utteꞌapo nesaupo jipuꞌuwamta
benasi jiapsa. Intok empo, aapoꞌik betana yoemia takai,
juꞌu Lios, Jesukrijtota em sualeꞌ betchiꞌbo, iniae, jukaꞌ
tuꞌika yeteu aꞌ naꞌikiaka, yee aꞌ mikbaeꞌuta, enchi aꞌ
bittuane.
\s Juꞌu Paplo, jumeꞌ Krijtota sualeme betchiꞌbo jain au eetua
\p
\v 8 Bat naataka emeꞌe junako kee Liojta aꞌ taꞌaakai,
emeꞌe inim jumeꞌ maammea yaꞌarim, ka liosimtaka yoꞌoriwame,
inimeꞌe tua am eiyaaka, ammeu emo suꞌu tojilamtukan.
\v 9 Taa iꞌan intok emeꞌe, jaibu jukaꞌ Liojta aꞌ taꞌaakai,
oo, ala inikaꞌa cheꞌa tuꞌisi jiaꞌateko, jiba emeꞌe Liojta
betana aapoꞌik yoemiarim benasi taꞌeewakai, iꞌan su inia
betana, jaisa weyeka, emeꞌe junakaꞌa bat naataka inim
jiapsame betana, tua kaita tuꞌika aet ayuka jukaꞌ boꞌo
jooriawamta juchi au notteka juchi aꞌ joobae. Inikaꞌa
emeꞌe juchi bat naataka benasi utteꞌapo au suꞌu tojiri
benasi aꞌ joobaekai.
\v 10 Emeꞌe ketuni inim jita betana taewaim yumakame,
oo wate meecham oo wate wasuktiam yumakame, am yoꞌoreka
amet papajkowame, inikaꞌa kee koptaka aꞌ jooa.
\v 11 Emo betana tua ka in yanti elaꞌu net aayuk, emo
nasuk jukaꞌ tekil in yaꞌarita kaita betchiꞌbo aꞌ tuꞌiriak
ti eakai.
\p
\v 12 Krijtopo nemak werim, enchim, jiba inim in sualeꞌuta,
juꞌu nesauri jiꞌojteipo, kaitaꞌpo in iniat eaka jiapsaꞌa
benasia inien enchim jiapsineꞌ betchiꞌbo inia betana
ne emou nooka. Inepo, bat naataka aꞌ boꞌo jooriasuka
nee ino, enchim, ka nele benasi jurio yoemem taka emo
benasi nee ino eiyaa. Junako nee emo mak aneo, emeꞌe
siꞌimekut tuꞌisi nee bichak.
\v 13 Iꞌan intok, enchim jaibu juꞌuneaꞌa benasia, junako
cheꞌa bat Krijtota bemela nok lutuꞌuriata aman in emou
aꞌ teuwaako, inikaꞌa junuen, senu koꞌokoa in ino jiokot
bichaꞌ betchiꞌbo nee emou aꞌ teuwaak.
\v 14 Intok, junaen in koꞌokoekaꞌu, emo betchiꞌbo siꞌimeku
betteꞌeaka juniꞌi, taa emeꞌe ka junuen junae betchiꞌbo
jak waꞌam nee bichak. Intok kia emeꞌe ka nee omola tawaak.
Ala emeꞌe, nee, senu Liojta betana weyeka ankelej tukaꞌa
benasia, oo nee, jiba aapoꞌik Jesukrijto tukaꞌa benasi
emeꞌe alleaka nee mabetak.
\v 15 Intok junako nee emo mak aneka, jukaꞌ tuꞌik tua
alleewamta in emo tana bichakaꞌu, iꞌan, junaꞌasu jaisa
taawak. Bweꞌituk inepo inim emo tana nee a inen jiia,
junako, emeꞌe, kia enchim pusim a nee makaꞌateko juniꞌi,
emeꞌe nee am mak ean.
\v 16 Intok iꞌan su emeꞌe junae betchiꞌbo nee enchim
bejeꞌeꞌe benasi nee bicha jaꞌani, inikaꞌa inien lutuꞌuriata
in emou aꞌ teuwaakaꞌ betchiꞌbo.
\p
\v 17 Jumeꞌ ka lutuꞌuriata betana enchim majtame, inimeꞌe
emo betana tua emo temaeka jiapsa. Taa bempo ka jak
tuꞌik bem emo tana aꞌ waataꞌ betchiꞌbo. Ala bempo, ito
tana enchim emo naꞌikimteneeꞌuta waata, junuen chukula,
emeꞌe emo temaeka, siꞌimeku amemak eaka enchim jiapsipeeneꞌ
betchiꞌbo.
\v 18 Iniꞌi kaachin maachi inien yetet emo temaiwame,
taa iniꞌi, siꞌimeku tuꞌisi weyeka joowaꞌateko. Intok
inia betana jiba juniꞌi weyekai intok ka kia in emomak
aneo jiba.
\v 19 Emeꞌe tua in naksi eiyaaꞌum, iꞌan juchi nee emo
betchiꞌbo jiokot ino bicha, jiba senu jamutta abe yoemiaka,
jiokot au aꞌ bichaꞌa benasi jiokot ino bichakai. Intok
ketun nee inien jiokot ino bitne, inim Krijtota tuꞌu
jiapsita emot jiapsaka intok junuen enchim jiapsiꞌeaꞌa
benasia, inikaꞌa enchim aꞌ taꞌaaꞌu tajtia.
\v 20 Inepo ala, iꞌan lautipo aman emo mak aneꞌeteko
juniꞌi, tua tuꞌi ean. Intok junuen inepo emo mak aneka
inia betana, taꞌabwisi, cheꞌa witti a emo mak etejo betchiꞌbo.
Bweꞌituk lutuꞌuriapo nee tua ka juꞌunea emo betana juꞌu
in eeneꞌpo.
\s Juꞌu, taꞌabwikut nokaka, jaamuchim Akar intok Saaraꞌ teamtat nokaka, teuwaari
\p
\v 21 Emeꞌe jumeꞌ Moiseej tukaꞌuta nesauri jiꞌojteimmet
eaka am boꞌo jooriabaeme, emeꞌe inia betana nee tejwaane,
jaisa emeꞌe junamaꞌa nesauripo weyeka teuwaarita ka
aꞌ jikkajilaa jaꞌani.
\v 22 Bweꞌituk aꞌ jiꞌojteiꞌi benasi, juꞌu Apraꞌamtukaꞌu,
wooim oꞌowim yoemiakan, seenuk, jiba ama juꞌu jamut bempoꞌim
tekoka jiapsame aꞌ yoemiakan. Jukaꞌ senuk intok, juꞌu
tua aꞌ jubiawa, iniꞌi kaabeta tekokame aꞌ yoemiakan.
\v 23 Juꞌu ama bempoꞌim tekokamta asoa, iniꞌi, inim siꞌimem
usiwame, junuen weyeka am yoemiawaꞌa benasia yeu yoemtuk.
Taa juꞌu kaabeta tekoka intok aapoꞌik Apraꞌamta kunakamta
asoa, iniꞌi, inia betana, aapoꞌik Liojta junuen ameu aꞌ
chupneeꞌu betana ameu bicha aꞌ teuwaarita junuen aꞌ
chupneꞌ betchiꞌbo iniꞌi yeu yoemtuk.
\v 24 Iniꞌi intok taꞌabwik teuwaamta benasi yeu weama.
Inimeꞌe wooi jaamuchim, wooi weyemta, Liojta lutuꞌuriata
yaꞌarika yeteu aꞌ chupbaeꞌuta teuwaa. Juꞌu seenu, Moiseej
tukaꞌuta, jum kawi Sinaiꞌ teaꞌpo aꞌ makwakaꞌuta teuwaa.
Inikaꞌa intok, juꞌu jamut Akar teame aꞌ teuwaa. Jumeꞌ
intoko junameꞌe, junakaꞌa lutuꞌuria yaꞌarita, nesaurim
boꞌo jooriaka jiapsame, inimeꞌe, tetekoka jiapsame benane.
\v 25 Bweꞌituk juꞌu jamut Akar teame, iniꞌi, jum Aarabem
bwiaarapo senu kawi Sinaiꞌ teaka ama katekaꞌpo junamaꞌa
jukaꞌ senuk lutuꞌuria yaꞌaritaka yeteu aꞌ chupbaeꞌuta
aꞌ teuwaa. Intok iniꞌi, iꞌan jumeꞌ bweꞌu joꞌara Jerusalen
teaꞌpo jiapsame teuwaa. Inimeꞌesu, jukaꞌ nesaurita utteꞌapo
aꞌ boꞌo jooriaka bem jiapsaꞌ betchiꞌbo, tetekoka jiapsame
benasi maachi.
\v 26 Taa waꞌa, teekau Liojtamak itom bitneeꞌu, Jerusalenpo
taꞌeewaka, iniꞌi, juꞌu jamut, ka tekoka jiapsame aꞌ teuwaa.
Itepo tee intok junae betana yoemiarim bena.
\v 27 Bweꞌituk jum Liojta jiꞌosia jiꞌojteimpo:
\q Alleaꞌe, jamut, juꞌu ka a asoame. Intok empo, ka yoemiakame,
jukaꞌ em alleaꞌuta, chai nokpo aꞌ teuwaane, jiba empo
iꞌan juꞌu asou wantiriam ka taꞌaame.
\q Bweꞌituk juꞌu jamut jimaatukame, juꞌu, iniꞌi kunakamta
bepa cheꞌa yuꞌin yoemiane, ti jiꞌojtei.
\p
\v 28 Krijtopo nemak werim, emeꞌe junameꞌe, juꞌu yoemra,
Liojta betana, chukula aapoꞌik yoemiamtuneeka aꞌ teuwaari,
jiba jukaꞌ Isaak tukaꞌuta au aꞌ chupakaꞌa benasia.
\v 29 Taa junak taewaimmet benasia, juꞌu usiwai, inim
siꞌimem usiwame junuen weyeka yeu yoemtukame, inikaꞌa,
wakaꞌa senuk, Liojta betana aꞌ tuꞌu jiapsi a jita aꞌ
joaꞌapo aman yeu yoemtukamta, junau aꞌ bejeꞌeka au suuaka
aꞌ jiapsakaꞌa benasia, iꞌan taewaimmet ket inia betana
jiba inien weye.
\v 30 Taa jum Liojta jiꞌosia jiꞌojteimpo inen jiꞌojtei:
“Jukaꞌ jamut, enchim tekokamta intok jukaꞌ inia asoawata,
ka intok emomak am joꞌaaneꞌ betchiꞌbo, am sakaꞌatuane.
Bweꞌituk juꞌu jamut tekokamta asoa, juꞌu tua em juubi,
iniꞌi ka tekokamta, aꞌ asoamak, jukaꞌ ee betana tuꞌika,
kaachin aamak aꞌ atteaka aꞌ mabetne.”
\v 31 Junuen san Krijtopo nemak werim, itepo katte juꞌu
jamut tekoka jiapsakamta betana yoemiarim taka, ala itepo,
junaꞌa jamut ka tekoka jiapsamta betana itepo yoemiarim
bena itou yeu weama.
\c 5
\s Juꞌu itom joo tekiakaꞌu betana tee aet jiokoilaa
\p
\v 1 Juꞌu Krijto, aapo iꞌan jukaꞌ nesauri jiꞌojteita
betana ka nanau maisi weyeka itom joo tekiakaꞌu betana,
ka naa buustia itom aꞌ tekipanoaneꞌ betchiꞌbo, itom aet
jiokoeka itom aniak. Junuen san emeꞌe, inien, wakaꞌa junae
betana enchim yum joꞌeriakamta emeꞌe aet jiapseka, bichau
bicha ka aꞌ koptane. Intok emeꞌe junuen ka intok naa
buusti emo au suꞌu tojirika jiapsibaane, jukaꞌ ka nanau
machika, enchim joaka jiapsaꞌuta, tetekokame benasi utteꞌapo
enchim joaka jiapsaꞌuta.
\p
\v 2 Iniat emeꞌe nee jikkajine, jiba inepo Paplo inen
ne emou aꞌ lutuꞌuriate, emeꞌe, jukaꞌ sirkunsision teaka
boꞌo jooriawamta tuꞌisi tawaa betchiꞌbo aet eaka enchim
aꞌ joao, junako Krijtota betana weyeme tuꞌikai, kaitaꞌpo
emou tuꞌine.
\v 3 Inikaꞌa nee juchi nee emou teuwaabae, inim jabeta
juniꞌi oꞌouta, junakaꞌa, jukaꞌ sirkunsision ti teaka boꞌo
jooriawamta aꞌ joamta, inikaꞌa, siꞌime jukaꞌ Moiseej tukaꞌuta
nesauri jiꞌojteimpo weyemta, aꞌ boꞌo joorianeeꞌuta au
aꞌ utteꞌatuneeꞌu.
\v 4 Emeꞌe, inim wameꞌe nesauri jiꞌojteim boꞌo jooriaka,
Liojta bichapo ammea tuꞌisi tawarimtune ti eame, emeꞌe
Jesukrijtota omola aꞌ tawaalam. Intok emeꞌe, aapoꞌik
Liojta yee aꞌ nak taꞌaꞌ betchiꞌbo jukaꞌ jiba betchiꞌbo,
kaitau a tamachiatuka tuꞌik, yetet aꞌ autuaꞌu betana
emo naꞌikimtelaa.
\v 5 Bweꞌituk itepo, jiba jukaꞌ Liojta tuꞌu jiapsita
itot jiapsaꞌue intok aapoꞌik Krijtota itom sual taꞌaꞌ
betchiꞌbo, inia betchiꞌbo itepo, juꞌu Liojta bichapo tuꞌisi
itom tawarim tuneeꞌuta aꞌ bicha.
\v 6 Intok itepo iꞌani Jesukrijtotamak eaka jiapsakai,
inia betana itepo, kia sirkunsiraaroa taka, oo ka junuen
yaꞌarim takai juniꞌi, iniꞌi kaita teuwaaka intok kia
beja joowaka yeu weama. Ala juꞌu inim itou tuꞌika yeu
weamame, Krijtota itom aꞌ sual taꞌaakai intok jiba inia
betchiꞌbo, itom yee nak taꞌaaka jiapsineeꞌu, junaꞌa.
\p
\v 7 Emeꞌe, juꞌu lutuꞌuriata betana tuꞌisi jiapsan. Junak
su inia lutuꞌuriata betana, jabesa ka enchim aꞌ nok jikkajineꞌ
betchiꞌbo emoas kiktek.
\v 8 Iniꞌi junuen ka enchim aꞌ nok jikkajaka jiapsaꞌu,
ka aapoꞌik Liojta betana weye, jiba jukaꞌa, ka intok tetekokame
benasi enchim jiapsineꞌ betchiꞌbo enchim yeu puꞌabaemta
betana.
\v 9 Emeꞌe inien weyemtau waatine, juꞌu reberuua, iliikika
juniꞌi, siꞌime jumeꞌ aina kittimmet kimuka, inikaꞌa am
boboyoriaꞌu. Iniꞌi inikaꞌa teuwaakai, inim jukaꞌ ka Liojta
betana lutuꞌuriata, ka junen machika juniꞌi, juebenam
aet emo am bai tattaꞌaaꞌu.
\v 10 Ineponee intok, jiba emo betana juꞌu yeu aꞌ weeneeꞌut,
juꞌu lutuꞌuriata betana ka taꞌabwisi intok enchim aꞌ
sualneeꞌut, yoꞌowe Jesukrijtota enchim anianeꞌpo nee
aet yoemꞌea. Taa aapo juꞌu Lios, jukaꞌ ka yanti enchim
eltuamta, inikaꞌa kia aꞌ jabetuk juniꞌi, jiokot au aꞌ
bittuane.
\p
\v 11 Nee betana intoko Krijtopo nemak werim, inepo nee
ketuni jukaꞌ sirkunsision teamta aꞌ boꞌo joorianaꞌ betchiꞌbo
inikaꞌa nee yee aꞌ majtao, jumeꞌ juriom ka neu suua ean.
Bweꞌituk inikaꞌa junuentuko, juꞌu Krijtota nok lutuꞌuria,
aapoꞌik kuuset aꞌ poponwakaꞌu betana in yee majtaꞌu,
ka am omtitua ean.
\v 12 Taa junameꞌe inien enchim emo sirkunsiraaroa iꞌaka,
ka enchim ama eltuame betana, tuꞌi ean inimeꞌe, bempo
kaita amet beꞌaako siꞌimeta emo chuktariapo.
\p
\v 13 Bweꞌituk, Krijtopo nemak werim, emeꞌe Krijtota betana
yeu puꞌatuk, ka naa buusti, utteꞌapo tetekokame benasi
jumeꞌ nesauri jiꞌojteimpo weyemta enchim joaka jiapsi
betchiꞌbo. Taa ala, emeꞌe, ka junuen iniat jiaꞌawiteka,
wepulsi jukaꞌ ka tuꞌik enchim tuꞌureeꞌuta aꞌ jooneꞌ
betchiꞌbo. Inien tuꞌeaka su ala, emeꞌe, yee nak taꞌaaka
jiapsakai, siꞌimeku naas emo aniaka jiapsine.
\v 14 Bweꞌituk juꞌu Moiseej tukaꞌuta nesaurim jiꞌojteita
betana weyemta, siꞌime, wepulsi inien jiamtat: “Em emo
nakeꞌe benasia, empo, jukaꞌ inim ele benasi yoemta aꞌ
nak taꞌaane”, ti jiamta junamaꞌa wepulsi chupiataka
yeu weama.
\v 15 Taa inia betana intoko, emeꞌe, emo nasuk ka nau
eaka, ka nau tuttuꞌika jiapsaꞌateko, iniat emeꞌe emo suuane,
ka junuen jiba enchim emo nasuk iniae, Krijtota betana
jukaꞌ tuꞌik enchim aꞌ yaꞌariaka emo nasuk ayukamta, ka
aꞌ luꞌutineꞌ betchiꞌbo.
\s Juꞌu ka tuꞌuwa senuk joopeaꞌu, intok juꞌu Liojta tuꞌu jiapsi itom joo iꞌaꞌu
\p
\v 16 Taa juꞌu in teuwaaꞌu inen weye oꞌoben, emeꞌe, jiba
jukaꞌ Liojta tuꞌu jiapsi emot anemta, enchim aꞌ joo iꞌaꞌa
benasi jiapsinee intok junuen emeꞌe ka intok inim jukaꞌ
ka tuꞌika enchim tuꞌureeꞌuta aꞌ joone.
\v 17 Bweꞌituk inim juꞌu ka tuꞌika itom tuꞌureka itom
joopeaꞌu, iniꞌi, jukaꞌ Liojta tuꞌu jiapsi itom joo iꞌaꞌuta
aꞌ bejeꞌe. Juꞌu intok Liojta tuꞌu jiapsi betana weyeme,
jukaꞌ inim itom joopeaꞌuta aꞌ bejeꞌe. Inimeꞌe ka nanancha
ea. Inia betchiꞌbo emeꞌe, jukaꞌ enchim tuꞌureka enchim
joopeaꞌuta ka aꞌ jooa.
\v 18 Taa emeꞌe jiba jukaꞌ Liojta tuꞌu jiapsita, jukaꞌ
emot anemta betana aniawakai aꞌ eaꞌpo aman jiapsaꞌateko,
junako emeꞌe, jumeꞌ nesauri jiꞌojteimpo weyemta enchim
boꞌo jooriaka jiapsineeꞌu ka utteꞌatune.
\p
\v 19 Ka obiachi aet juꞌuneepo inim juꞌu, jumeꞌ wepulsi
ka tuꞌika bem tuꞌureeꞌuta joaka jiapsame juꞌu bem joaꞌu.
Inimeꞌe oꞌowimtaka oo jaamuchimtaka, ka emo jujubeka
nau emo tuꞌuriwamta boꞌo jooria. Jita tua tiusi machika
ka tuꞌik intok ka a bem suꞌu tojaꞌuta jojoa.
\v 20 Inimeꞌe, jumeꞌ bem yaꞌarim, liosim benasi am yoꞌore.
Intok ka tuꞌik bem taꞌaaꞌue, yee sisibowamta boꞌo jooria.
Yee omta. Emo ee bejeꞌe. Jujuꞌenamme. Intok naꞌet bukeꞌam.
Kaita betchiꞌbo juniꞌi oꞌomte. Inimeꞌe, ameu tuꞌik betchiꞌbo
jiba, ujbwanta jooa. Teꞌopompo nattepola emo eiyaawamta
joaka ka lutuꞌuriata sualemmak eꞌea.
\v 21 Inimeꞌe jitat kop kopte. Yee sussuꞌa. Naakowamte
tuꞌure. Ka weelaꞌpo jijiꞌibwa. Intok naa buustia watek
ale benak boꞌo jooria. Inia betana bat naataka in aꞌ
teuwaari benasia, juchi nee enchim aet tejwaa, wameꞌe
inile benak joaka jiapsame, jum teekau, Liojta cheꞌa yoꞌotaka
aꞌ jiapsaꞌu, kaachin bem aman lutuꞌuriaka bem aman anneeꞌu.
\p
\v 22 Taa jukaꞌ Liojta tuꞌu jiapsita yee aꞌ jiapsituaꞌu,
iniꞌi, yee nak taꞌeewame. Alleaka jiapsiwame. Yanti, kaitat
jain eaka jiapsiwame. Ka seej chukti eewaka, a boꞌo bitwame.
Siꞌimeku yeteu tuꞌu jiapsiwamta senuk tuꞌuwata yete
tana waataneeꞌu. Siꞌimeku senuk aꞌ yoem eiyaatuneeꞌuta.
\v 23 Kaitaꞌpo emo cheꞌewariwame. A emo yuꞌiiwame, iniꞌi
junaꞌa. Inile bena weemta betana, kaita aꞌ bejeꞌeka nesauri
aayuk.
\v 24 Jumeꞌ intoko, Krijtota sualeka ae betana kateme,
bempo inim jukaꞌ ka tuꞌik bem joopeaka amet ayukamta
betana, jiba aapoꞌik Krijtota, kuuset poponwaka aꞌ mukukaꞌa
benasi emo jipue.
\v 25 Junuen itepo, jiba juꞌu Liojta tuꞌu jiapsi betana
bemelak taꞌabwisi jiapsiwamta itot autuarikai, ketchia
itepo iꞌan, jiba jukaꞌ Liojta tuꞌu jiapsita juꞌu itom
joaꞌut aapoꞌik itom aet aꞌ juꞌuneetuaꞌpo amani, itepo
aꞌ joone.
\p
\v 26 Itepo, kaitaꞌpo te ito cheꞌewaripo yumaꞌi, junuen
ka naas ito ka alleetuaꞌ betchiꞌbo. Intok te kia ito
nasuk ka nat koptine.
\c 6
\s Emoꞌem naas ania saka
\p
\v 1 Krijtopo nemak werim, emeꞌe, junamaꞌa emo nasuk seenuk
jabeta, Liojta bichapo ka tuꞌisi aulata aꞌ juꞌuneiyaꞌateko,
inien jumeꞌe, Liojta tuꞌu jiapsi enchim jiapsi iꞌaꞌpo
aman jiapsame, emeꞌe, junakaꞌa, juchi yumaꞌisi tuꞌisi aꞌ
jiapsineꞌ betchiꞌbo, emeꞌe iniat aꞌ aniapo yumaꞌi. Taa
inia betana emeꞌe, kaitaꞌpo emo cheꞌewareka aꞌ joone.
Intok siꞌime inia betana ka emo koptaika, tuꞌisi emo
suuane, jiꞌobek junak jiba junaen emou chupneꞌeti eakai.
\v 2 Emeꞌe emo nasuk weꞌepulaka, juꞌu bettesi machik
emou ayukamta betana, tuꞌisi aet yeu kat betchiꞌbo, emo
aniane. Intok junuen emeꞌe, jukaꞌ Krijtota itom aet aꞌ
tejwaakaꞌuta, nesauta, aꞌ chupaꞌika jiapsine.
\p
\v 3 Bweꞌituk inim seenu, jitaꞌapo tua au eiyaa tebokai,
aapo junae betana kaitaꞌpo au lutuꞌuriatakai, junae aapo
au bai taꞌaarine.
\v 4 Weꞌepulaka, junuen bem jiapsaka bem joaꞌut, emo bichaka
emo temaine. Intok junako, senu siꞌimeku tuꞌisi aꞌ weyeꞌuta
au juꞌuneiyaakai, junuen, aapo ka watem betana tuꞌisi
aꞌ aneꞌut uttiawakai juniꞌi, aapo yanti elne.
\v 5 Bweꞌituk utteꞌa, inim weꞌepulaka, nattepola, ameu
aꞌ lutuꞌuriatukaꞌpo aman, bem aet yeu yumaka jiapsiꞌeaꞌuta
ameu aꞌ ayukaꞌuta.
\p
\v 6 Juꞌu, Krijtota bemela nok lutuꞌuriata betana tuꞌikut
majtawame, utteꞌa, jukaꞌ au kechaꞌitaka aꞌ majtamta, siꞌime
ka nanau machika tuꞌikue aꞌ anianeeꞌuta.
\p
\v 7 Ka emeꞌe, ka tuꞌik enchim joaꞌue, Liojta emo bai
tattaꞌaꞌati eene. Bweꞌituk kaabe, Liojtamak yeeweka, jaana
aꞌ bitne. Maa suko, inikaꞌa teuwaaka senu inen jiunee:
“Senuk echakaꞌu betana, senu jiba junakaꞌa ama jichupane.”
\v 8 Inim seenu, juꞌu aapoꞌik ka tuꞌik aꞌ joopeaꞌpo aman
jiba weyeka, ka tuꞌik joaꞌateko, iniꞌi, junae betana juꞌu
aꞌ jajameka, au chupneeme, iniꞌi juꞌu aꞌ mukneeꞌu junaꞌatune.
Taa juꞌu, Liojta tuꞌu jiapsita aꞌ joo iꞌaꞌuta aman weeka,
tuꞌik joame, iniꞌi, Liojta tuꞌu jiapsi betana juꞌu aꞌ
jajameka au chupneeme, juꞌu jiba yuu jiapsiwame junaꞌatune.
\v 9 Junuen san itepo, katte aꞌ rojiktaka, jukaꞌ tuꞌisi
weyemta jiba aꞌ joo sakane. Bweꞌituk itepo inia betana
ka taꞌabwisi eaka ka aꞌ koptaꞌateko, chukula taewaita
Liojta yeu puꞌarita yumako, inia betana tee tuꞌik aet
bitne.
\v 10 Inia betchiꞌbo san itepo, tee ama yumakai intok
jiba weeꞌpo, itepo siꞌimem te tuꞌik am jooriane. Intok
inia betana, jumeꞌ Krijtota sualeka itomak werim, cheꞌasan
ameu lutuꞌuriatakai.
\s Wate weemtat am tejwaaka, jiꞌojtesuka am tebotua
\p
\v 11 Akeꞌem aꞌ mammate, inim naateka tua ne bweresi
jiꞌojte, iꞌan tua inepo in maammea emou jiꞌojtekai.
\v 12 Jumeꞌe, taꞌabwisi enchim majtaka, bem aꞌ joaꞌa benasi,
utteꞌapo enchim emo sirkunsiraaroa iꞌame, inimeꞌe inikaꞌa
jooa, wepulsi juꞌu jurio yoemratamak tuꞌisi kat betchiꞌbo.
Intok bempo, ka witti, Krijtota ito betchiꞌbo kuuset aꞌ
mukukaꞌuta bem aꞌ lutuꞌuriateꞌu betana, ka iniat jiokot
emo bitbaekai aꞌ jooa.
\v 13 Bweꞌituk inien, kia jumeꞌe, jukaꞌ sirkunsision ti
teaka joowamta boꞌo jooriame, bempo juniꞌi ka siꞌimeta
jukaꞌ nesauri jiꞌojteipo weyemta aꞌ boꞌo jooriaka jiapsa.
Taa ala bempo inikaꞌa enchim aꞌ boꞌo jooria iꞌa junuen,
bempo inia betana enchim aet utteꞌa joorialamtaka emo
cheꞌewareka emo uttiabaekai.
\v 14 Taa inepo inia betana, juꞌu ae in ino uttianeeꞌu,
kaita intok aayuk. Ala jiba jukaꞌ yoꞌowe Jesukrijtota
ito betchiꞌbo kuuset popontaka aꞌ mukukaꞌut, intok in
aꞌ teuwaaneeꞌut jiba nee ino uttia. Bweꞌituk junuen
aapoꞌik Krijtota, kuuset mukukai, nee betchiꞌbo ket inim
bwiapo, siꞌimeta ka tuꞌik joowamta betana inepo aamak
inia betana in mukukaꞌa benasi nee ino eiyaa. Intok
ket jiba inepo, jumeꞌ inim jiapsame betana nee kaita
teuwaakai.
\v 15 Bweꞌituk ito betchiꞌbo, jukaꞌ sirkunsision teamta,
aꞌ boꞌo jooriakai oo inikaꞌa ka aꞌ joakai juniꞌi, iniꞌi
kaita teuwaaka, kia beja joowa. Ala inim juꞌu itom eiyaaꞌeaꞌu,
Liojta betana weyeka, Krijtotamak itom eaꞌ betchiꞌbo,
jukaꞌ taꞌabwik bemelak jiapsiwamta itom mabetlaaꞌuta
junaꞌa.
\v 16 Junuen san, siꞌime wameꞌe, chupaꞌanaaka jiba inikaꞌa
inim teuwaarita aꞌ weyeꞌpo aman jiapsame, jumeꞌe, kaita
taꞌabwik betana, wepulsi Krijtota sualeka, lutuꞌuriapo
Liojta yoemiam, inimmeu, kaitat jain eaka, yanti elaka
intok Liojta betana nak jiokoliwaka bem jiapsineeꞌu
ameu aune. Ala inimeꞌe tua junameꞌe, Liojta bichapo Ijraꞌel
yoemrapo taꞌeewame.
\p
\v 17 Iꞌan inim bichau bicha, kaabeta ne intok, jitat
nee sioktua iꞌa. Bweꞌituk inepo, Krijtota betchiꞌbo bepsuitaka,
jumeꞌe, takaapo sipakiam net ayukaꞌum, inimeꞌe, Jesukrijtota
betana in yeu puꞌaritaka, aapoꞌik betchiꞌbo jiapsaka
aꞌ tekilwata in aꞌ joaꞌuta, aꞌ teuwaa.
\p
\v 18 Krijtopo nemak werim, juꞌu itom yoꞌowe Jesukrijto,
aapoꞌik betana tuꞌik weyemtae, siꞌimeku enchim alleetuane.
Tua junuentune.