\id EPH
\h EPEESIOM
\toc1 EPEESIOM
\mt Epeesiom
\c 1
\s Juꞌu Paplo, jumeꞌe, bweꞌu joꞌara Eepesoꞌ teaꞌpo Krijtota sualemmeu jiꞌojte
\p
\v 1 Inepo Paplo, Liojta junen eakaꞌ betchiꞌbo, Jesukrijtota
betana nee yeteu bittuari. Inepone, jumeꞌ Krijtota sualeka,
bweꞌu joꞌara Eepesoꞌ teaꞌpo, Liojta yoemiammeu nee inikaꞌa
jiꞌosiata nee emou aꞌ jiꞌojte.
\v 2 Itom yoꞌowe Jesukrijtota betana intok itom yoꞌowa
Liojta betana, tuꞌik enchim alleeneeꞌuta intok yanti
elaka, ka jain eewamta nee emo tana waata.
\s Krijtota sualeka, Liojta betana itou tuꞌika weyeme
\p
\v 3 Itom yoꞌowe Jesukrijtota yoꞌowa jukaꞌ Liojta, alleaka
itom aꞌ baisaeꞌuta te au aꞌ teuwaane. Jiba aapo juꞌu
Lios, jukaꞌ Jesukrijtotamak eaka itom jiapsaꞌ betchiꞌbo,
aapoꞌik betana siꞌime ka nanau machika itou tuꞌika, aamak
itom bitneeꞌuta, itom juꞌuneiyaatualaa.
\v 4 Aapo juꞌu Lios, inim kee aniata juꞌunakteka naatekai,
Krijtota itom aꞌ sualeka, aapoꞌik betchiꞌbo inien aapoꞌiku
bicha itom yeu puꞌariakan, junuen siꞌimeku, wepulsi aamak,
wepul yoemta benasi intok ka tuꞌisi itom aet tawaaneeꞌu,
kaita itou aꞌ ayuka, aamak itom jiapsineꞌ betchiꞌbo.
\v 5 Aapoꞌik, tuꞌisi yee aꞌ nakeꞌ betchiꞌbo, cheꞌa bat
taewaimmet naateka, inien aapoꞌik betana itom yoemiarim
tuneꞌ betchiꞌbo, itom yeu puꞌak, Jesukrijtota ito betchiꞌbo
aꞌ yaakaꞌue, aapoꞌik junen aꞌ tuꞌureka aꞌ yaꞌabaekaꞌpo
aman.
\v 6 Inia betchiꞌbo itepo, Liojta betana kaitau a tamachiatuka
tuꞌik itom aꞌ yaꞌariakaꞌu betchiꞌbo, jiba te aapoꞌiku
bicha itom aꞌ bai saeꞌuta, alleaka te au bicha aꞌ teuwaa.
Inikaꞌa aapo, juꞌu aꞌ yoemiawata, tuꞌisi aꞌ nakeꞌu mak
itom eaka jiapsaꞌ betchiꞌbo, itom aꞌ bittuak.
\v 7 Juꞌu Lios, tua yumaꞌisi yee nak taꞌaakai, aapo, juꞌu
aꞌ usiwata kuuset aꞌ mukukaꞌue, junae itom jinneꞌulaa,
junuen itom ka tuꞌuwa yaꞌarimmet itom jiokoekai.
\v 8 Juꞌu Lios, ama butti yee aꞌ nakeꞌuta, kaita beꞌeeka
itom aꞌ juꞌuneiyaatuari, siꞌimeku koba suawata intok
yumaꞌisi juꞌu lutuꞌuriat itom juꞌuneetualatakai.
\v 9 Intok naa buustia, inikaꞌa, tua aapoꞌik jiba juꞌuneiyaaka
aꞌ weetuabaeꞌuta, itom aꞌ juꞌuneiyaatuari, jiba inikaꞌa
aapoꞌik betana cheꞌa bat naataka naateka jaibu Krijtota
betana weyeka aꞌ chupneꞌeti jiaka aꞌ teuwaariakaꞌuta.
\v 10 Jiba inien, aapoꞌik cheꞌa bat inien weetuabaeꞌut
wikiakai, inikaꞌa, aꞌ teuwaaripo aman, chukula taewai aapoꞌik
au yeu aꞌ puꞌari yumako, junako juꞌu Lios, Krijtota siꞌimeku
aꞌ yoꞌo yaꞌane, kia jukaꞌ teekapo ayukamtau, intok kia
jukaꞌ inim bwiapo ayuka jiapsamtau juniꞌi.
\p
\v 11 Itepo, jiba Krijtota mak eaka itom jiapsaꞌ betchiꞌbo,
juꞌu Lios, jukaꞌ aapoꞌik betana weyeka yetet aꞌ autuaneeꞌuta,
inia betana itom ama aꞌ bitneꞌ betchiꞌbo, cheꞌa bat naatakai
itom yeu puꞌak. Intok siꞌime iniꞌi, jiba Liojta, siꞌimeta
junuen aꞌ weetuabaeꞌpo aman weye. Aapo juꞌu, siꞌimeta,
aapoꞌik aꞌ tuꞌureeꞌpo aman aꞌ joame.
\v 12 Inikaꞌa inien yeu aꞌ simtuak, junuen, itom jumeꞌ
cheꞌa bat naataka Krijtota sualeka aet eaka jiapsame,
junuen juꞌu itom jiapsineeꞌue, junae, jukaꞌ Liojta aapoꞌik
kaitau a tamachiatuka aꞌ yoꞌotukaꞌuta, aꞌ taꞌeewaka, aapoꞌik
yoꞌorinaꞌ betchiꞌbo.
\v 13 Intok ketchia emeꞌe, junako Krijtota betana jukaꞌ
bemela nok lutuꞌuriata, jukaꞌ enchim jinneꞌuimtuneeꞌu
betana, emou aꞌ teuwaawakamta, aꞌ jikkajaka intok emeꞌe
Krijtota sualeka au emo suꞌu tojakai, junak aapo aꞌ tuꞌu
jiapsi, juꞌu jaibu yetet aꞌ autuaneeka aꞌ teuwaakaꞌuta,
inikaꞌa emot aꞌ jiapsituak. Iniae, Liojta betana enchim
yoemiamtukaꞌuta, jiba betchiꞌbo emou aꞌ lutuꞌuria yaak.
\v 14 Intok juꞌu Liojta tuꞌu jiapsi junaꞌa, juꞌu, jukaꞌ
Liojta betana tuꞌika itou naꞌikiarita, chukula aapoꞌik
itom bittuaneeꞌuta itom aꞌ jajamneꞌ betchiꞌbo itou aꞌ
utteꞌatukaꞌuta aꞌ teuwaame. Chukula jumeꞌ aꞌ makneeꞌum,
aapoꞌik am yumaꞌariasuko. Junuen jukaꞌ Liojta, kaitau
a tamachiatuka aꞌ yoꞌotukaꞌuta aꞌ taꞌeewaka aapoꞌik
yoꞌorinaꞌ betchiꞌbo.
\s Juꞌu Paplo, jumeꞌ Krijtota sualeme, koba suawata Liojtau bicha am aꞌauria
\p
\v 15 Inia betchiꞌbo inepo, yoꞌowe Jesukrijtota yumaꞌisi
enchim aꞌ sualeꞌpo intok siꞌime jumeꞌ Liojtau bicha
siꞌimeku wepulsi yeu puꞌarim, tuꞌisi enchim am nak taꞌaaꞌpo
enchim juꞌuneiyaakai,
\v 16 jiba, ka enchim koptaka nee emo betchiꞌbo Liojta
bai sae. Inepo, Liojtau bicha in nokaꞌabeleki ne emou
waateka enchim nokriakai.
\v 17 Inepo jiba nee itom yoꞌowe Jesukrijtota aꞌ yoꞌowa
Liojtau bicha, juꞌu siꞌimem bepa yoꞌorisi machikamtau,
jiba ne enchim nokria, aapoꞌik tuꞌu jiapsi betana weyeka,
suawata emot aꞌ autuaka, junuen aapoꞌik betana weyemta
lutuꞌuriat intok iniae, aapoꞌik Liojta cheꞌa tuꞌisi enchim
aꞌ taꞌaaneꞌ betchiꞌbo.
\v 18 Intok inepo Liojtau bicha ne nooka, enchim machisi
jitat juꞌuneeneeꞌut, aapoꞌik enchim aꞌ anianeꞌ betchiꞌbo.
Junuen, jachin juniꞌi weyeka, tua junen aꞌ junaꞌatukaꞌuta,
wakaꞌa jiba enchim bit boꞌo bichaka iniau aapoꞌik enchim
yeu aꞌ puꞌariakaꞌuta. Intok naa buustia jukaꞌa, aapoꞌik
betana weyeka, jumeꞌ aapoꞌik yoemiam jiba betchiꞌbo aapoꞌik
am bittuaꞌuta, kaitau a tamachiatuka, eiyaawatchika, tuꞌikut
iniat enchim juꞌuneeneꞌ betchiꞌbo.
\v 19,20 Intok ketchia, juꞌu ka luꞌuteka intok ama bea
butti jukaꞌ utteꞌata aet ayukaꞌue, jiba iniae, iitom, jumeꞌ
Krijtota sualeme, ae itom aꞌ aniaꞌuta aapo itom aꞌ juꞌuneiyaatuane.
Jiba iniꞌi, aapoꞌik utteꞌae, aapo junuen junako jukaꞌ
Krijtota kokkoarim nasuk aꞌ jiabijtetuaka intok aapo,
teekau aꞌ batatana betana aꞌ yejtetuaka, junuen tua yumaꞌisi
utteꞌaka aꞌ aniaka aꞌ bit tebok.
\v 21 Junuen aapoꞌik siꞌime jukaꞌ yoꞌo yaꞌuraata bepa,
kia inim bwiapo oo teekau, nesaweka, siꞌimemmeu jaꞌabwekame
bepa, oo kia inim jachin teuwaawaka yoꞌoriwame bepa, jukaꞌ
Krijtota yoꞌo yaak. Intok kia inia betana, iꞌan lautipo
inim jiapsiwao betchiꞌbo intok chukula, teekau jiba yuu
jiapsinaao betchiꞌbo juniꞌi.
\v 22 Intok, kaita beꞌeeka, siꞌimeta jiba aapoꞌik yoꞌotaka
kateka aꞌ nesauta betuk au aꞌ suꞌu tojak. Intok jiba
aapoꞌik Krijtota, aapoꞌik inikaꞌa aꞌ sualemmeu siꞌimeku
ameu aꞌ yoꞌo yaak ameu kobata benasi weyekai.
\v 23 Bweꞌituk siꞌime jumeꞌ Krijtota sualeme nau, weꞌepulaka,
jiba aapoꞌik aꞌ takaawata aꞌ yumaꞌarialata benakai.
Krijto, aapo junaꞌa, siꞌimeta aapoꞌik betana weyeka, siꞌimeta
yumaꞌisi aꞌ chuptuame.
\c 2
\s Liojta yee nakeꞌ betchiꞌbo jumeꞌ jinneꞌurim
\p
\v 1 Juꞌu Lios, enchim Krijtota mak nau, jukaꞌ jiba yuu
jiapsiwamta aamak enchim aꞌ bittuak. Junuen, junako ketuni
enchim ka tuꞌik emot ayukamta betchiꞌbo intok enchim
ka tuꞌuwa yaꞌarim betchiꞌbo, ka jiapsame benasi enchim
jiapsao juniꞌi.
\v 2 Jiba inim ka tuꞌisi jiapsiwaꞌa benasi, emeꞌe junakaꞌa
joaka jiapsan. Intok junuen, emeꞌe, jukaꞌ bebejeꞌerita,
jumeꞌ ka bittakai ka tuꞌi jiapsim jekapo naj kateme
saweme, jukaꞌa, jumeꞌ ka Liojta eaꞌpo aman jiapsibaeme,
ka tuꞌikut am aniamta, emeꞌe aapoꞌik eaꞌpo aman jiapsan.
\v 3 Siꞌime tee itepo juniꞌi ket, bat naataka taewaimmet,
jiba tee inien tee jiapsak. Itepo ka tuꞌik betana itom
eaꞌpo aman jiapsakai. Intok jukaꞌ ka tuꞌik itot ayuka
itom joopeaꞌuta intok inia betana junuen itom eaka itom
eiyaaꞌuta, aꞌ joaka jiapsan. Inia betchiꞌbo itepo ketchia,
jiba jumeꞌ watem benasia, Liojta betana jukaꞌ aapoꞌik
tua jiokot yee aꞌ bittuaneeꞌuta, itou chaꞌakan.
\v 4 Taa juꞌu Lios, tua yumaꞌisi yee aꞌ nak jiokoleꞌ
betchiꞌbo intok tua ama butti itom aꞌ nakeꞌ betchiꞌbo,
\v 5 aapo junuen, aapoꞌik Krijtotamak, jiba yuu jiapsiwamta
itom bittuak, junuen, aapoꞌik bichapo, itepo itom ka tuꞌuwa
yaꞌarim betchiꞌbo, ka jiapsame benasi bitwakai, junuen
itom naj kuakteo juniꞌi. Bweꞌituk emeꞌe, jiba Liojta
tua tuꞌik yeteu aꞌ jiapsekaꞌ betchiꞌbo emeꞌe jinneꞌuim.
\v 6 Ketchia, aapo juꞌu Lios, inim aapoꞌik Krijtota mak
nau, kokolam nasuk itom jiabijtetuaka intok aapo, jiba
aapoꞌiku mak, jum teekau jaibu aman aamak aneme benasi
aapo itom bicha.
\v 7 Aapo inikaꞌa yaak junuen, chukula wasuktiammet inim
aapoꞌik tua itom aꞌ nak taꞌaaꞌuta intok jiba Jesukrijtota
itom aꞌ yaꞌariakaꞌu betchiꞌbo, aapoꞌik tua tuꞌik yete
tana aꞌ waataꞌuta aꞌ juꞌuneiyaa tebobaekai.
\v 8 Bweꞌituk emeꞌe, jiba jukaꞌ Liojta junuen yee aꞌ
nak taꞌaꞌ betchiꞌbo, emeꞌe jinneꞌurim, ket Jesukrijtota
emeꞌe aꞌ sualekai. Intok iniꞌi sualwame, ka jita emo
betana tuꞌika enchim yaꞌari, ala inikaꞌa emeꞌe Liojta
betana kia beja aꞌ bittuari.
\v 9 Iniꞌi, ka jita senuk tuꞌik aꞌ yaꞌari betchiꞌbo weye,
junuen san iniat kaabe au cheꞌewarine.
\v 10 Bweꞌituk juꞌu Lios itom juꞌunaktei. Aapo, Jesukrijtota
betchiꞌbo inim siꞌimeku tuꞌik boꞌo jooriawamta betchiꞌbo,
taꞌabwika bemela yoemrata benasi itom juꞌunaktei. Inia
betana aapoꞌik jaibu bat naataka aꞌ weetuabaeꞌpo amani.
\s Krijtota betana juꞌu itom yanti elaꞌu itot ayukame
\p
\v 11 Junuen san emeꞌe au waatine, bat naataka enchim
jiapsisukaꞌubewi. Emeꞌe, ka jurio yoemratukan. Intok
jiba inia betchiꞌbo, jumeꞌ juriom bempo jumeꞌ bem ou
yoemiam, bem takaapo am sirkunsiraaroaka, inimeꞌe, junuen
yaꞌarimpo emo teuwaa. Enchim intok inia betana, ka junuen
yaꞌarimpo enchim taꞌaa.
\v 12 Jiba junakriapo emeꞌe, ka Krijtota taꞌaaka intok
juꞌu ijraꞌel yoemrata mak ka naꞌikiarimtaka jiapsak.
Intok emeꞌe, Liojta betana jukaꞌ bemela lutuꞌuria yaꞌarita
intok jukaꞌ Liojta betana tuꞌika itou chupneeka itou
naꞌikiarita, emeꞌe ka aꞌ taꞌaan. Emeꞌe inim jiapsaka,
chukula teekau tuꞌik enchim bitneeꞌuta, tua kaita boꞌo
bichakai, intok Liojta juniꞌi ka taꞌaaka jiapsan.
\v 13 Taa emeꞌe, Jesukrijtota sualeka, aamak eakai, kia
bat naataka, Liojtamak ka lutuꞌuriaka, mekka au aneme
benasi jiapsakai juniꞌi, iꞌani, Krijtota emo betchiꞌbo
kuuset aꞌ mukukaꞌue, emeꞌe junae aamak lutuꞌuriaka, aapoꞌik
bichapo tuꞌisi mabetrimtakai, ka au mekka aneme benasi
jiapsa.
\v 14 Aapo juꞌu Krijto junaꞌa, juꞌu ka jain eaka yanti
elaka jiapsiwamta itot autuakame. Jiba aapo, jukaꞌ jurio
yoemrata intok jukaꞌ ka jurio yoemrata, inimmea wepul
yoemrata yaak. Junuen aapo, bempoꞌim nasuk, saptita nananaꞌaku
aman weeka benasi, jukaꞌ emo bejeꞌewaka, iniae ka bem
nau eaꞌuta aꞌ luꞌutakai.
\v 15 Juꞌu Krijto, jiba aapo aꞌ takaapo, jiokot aꞌ yaꞌanaꞌ
betchiꞌbo au nenkakai junuen jukaꞌ ka nanau maisi weyeka,
jum nesauri jiꞌojteipo weyemta, ka naa buusti aꞌ boꞌo
joorianaaꞌuta junuen junamaꞌa aꞌ kechak. Intok junuen
aapo, inimeꞌe ka nanaꞌanaka woi yoemrata nasuk, aamak
eaka jiapsaka, ammea bemelaka wepul yoemrata yaakai.
Junuen ka jain eaka, yanti elaka jiapsiwamta amet autuakai.
\v 16 Jiba inien weyekai, aapo, kuuset popontaka aꞌ mukukaꞌue,
juꞌu Krijto, juꞌu woi yoemrata nasuk jukaꞌ emo am bejeꞌeka
jiapsaꞌuta, ka nau eewamta am luꞌutariaka intok junuen
aapo, bempoꞌim eiyaawaka, Liojta bichapo tuꞌisi am mabettuneeꞌuta,
tuꞌik am yaꞌariak. Junuen aapo inimmea, aapoꞌik yeu puꞌarim,
wepul yoemta benasi am yaakai.
\p
\v 17 Juꞌu Krijto inim aneka intok inim siꞌimemmeu, Liojta
mak eewaka aamak emo tuꞌutewamta betana, jukaꞌ tuꞌi nok
lutuꞌuriata ameu aꞌ teuwaak. Kia emou, jumeꞌ ka jurio
yoemrataka, ka Liojta mak lutuꞌuriaka, mekka au jiapsammeu,
intok kia juꞌu jurio yoemrataka aamak lutuꞌuriaka jiapsammeu
juniꞌi.
\v 18 Bweꞌituk aapoꞌik Krijtota betchiꞌbo inim siꞌime
itepo, kia jurio yoemratakai oo taꞌabwika ka jurio yoemratakai
juniꞌi, iꞌan itepo, jiba Liojta wepul aꞌ tuꞌu jiapsiwae
itot jiapsamtae, itepo Liojtau bicha, itepo siꞌime, au
bicha nok betchiꞌbo au lutuꞌuriak.
\v 19 Jiba inia betchiꞌbo emeꞌe, iꞌan Liojta bichapo,
ka watem jak taꞌabwi, ka bem bwiaarapo jiapsame benasi
bitwaa. Ala iꞌan emeꞌe, siꞌime jumeꞌ Liojta yeu puꞌarimmak,
aman lutuꞌuriaka emeꞌe aꞌ joꞌapo, Liojta yoemiammak aman
amemak naꞌikiarim.
\v 20 Senu bweꞌu karita yoꞌoturiawamta benasi, emeꞌe,
jumeꞌ Krijtota betana yeu puꞌarim taka naas bittuarim
intok jumeꞌe, Liojta betana juꞌuneetuawaka yeteu noktuawakame,
inimeꞌe, Liojta betana bem juꞌuneiyaaka bem sualeꞌuta,
inia betana emeꞌe, inimmet, jikau yoꞌotume benaka, amemak
aꞌ suale. Juꞌu Jesukrijto intok ket jiba aapo junaꞌa,
inikaꞌa siꞌimeta senu bweꞌu teta, karita utteꞌaneeka
aet aꞌ naateꞌu benakai.
\v 21 Iniꞌi, karita aet utteꞌakame, jiba aapo Krijto takai,
jumeꞌ aꞌ sualeme, aapoꞌikut bepaa bicha, karita ae yaꞌarim
yoꞌoturia benasi machikai, tua junama waꞌam weyeka, yoꞌotuka,
chukula inimeꞌe, teꞌopota, wepulsi Liojta betchiꞌbo yaꞌarita
intok Jesukrijtota mak eaka jiapsakai.
\v 22 Junuen ket emeꞌe, Krijtota sualeka aamak eaka jiapsakai,
siꞌime wameꞌe waate, bat naataka Liojta yoemiammak emo
naꞌikiarikai, senu karita, Liojta aꞌ tuꞌu jiapsie ama
jiapsineeꞌuta nau aꞌ chupakame benakai.
\c 3
\s Paplo, jumeꞌ ka juriom betchiꞌbo Krijtota betana weyemta aꞌ tekil makri
\p
\v 1 Jiba inikaꞌa bitwamta betchiꞌbo, inepo Paplo, Jesukrijtota
betana weyekai intok, enchim, jumeꞌ ka jurio yoemem betana
tuꞌik waataka nee inim etaꞌitaka, nee Liojtau bicha enchim
nokria.
\v 2 Bweꞌituk iꞌan emeꞌe jaibu aꞌ juꞌuneiyaapo yumaꞌi,
jukaꞌ Liojta tuꞌisi yee aꞌ jiokol taꞌaꞌ betchiꞌbo, inikaꞌa,
aapoꞌik betana tekilta, jiba emo betchiꞌbo tuꞌika weyeka,
nee aꞌ makriakaꞌu.
\v 3 Juꞌu Lios inim jukaꞌ aapoꞌik jiba juꞌuneiyaaka
aꞌ weetuaꞌuta, jukaꞌ lutuꞌuriata nee aꞌ juꞌuneiyaatuak.
Inia betana bat naataka wateku jiba, in emou jiꞌojtesukaꞌa
benasia.
\v 4 Junakaꞌa jiꞌosiata emeꞌe aꞌ nokakai, Krijtota betana
lutuꞌuriata, Liojta jiba juꞌuneiyaaka aꞌ weetuaꞌuta, in
juꞌuneetuaritukaꞌuta emeꞌe juchi ama aꞌ bitne.
\v 5 Iniꞌi, Liojta jiba juꞌuneiyaaka aꞌ weetuaꞌu, bat
naataka taewaimmet inim kaabeta yumaꞌisi juꞌuneiyaatuawakame,
inia betana iꞌan juꞌu Lios, jumeꞌe, wepulsi aapoꞌik betchiꞌbo
jiapsaka, Krijtota yeu puꞌarim intok jumeꞌe, Liojta betana
juꞌuneetuawaka, chukula yeu weenemta teteuwaame, jiba
aapoꞌik Liojta tuꞌu jiapsie inikaꞌa aapo am juꞌuneiyaatualaa.
\v 6 Jiba iniꞌi junaꞌatukan juꞌu lutuꞌuria Liojta jiba
juꞌuneiyaaꞌu, iꞌan jiba jukaꞌ Krijtota betana bemela
nok lutuꞌuriata sualekai, jumeꞌ ka jurio yoemem takai,
inimeꞌe, jiba jumeꞌ jurio yoemem benasi jukaꞌ Liojta
betana tuꞌik bem bitneeꞌuta, amemak aꞌ bitne. Intok inimeꞌe
jiba bempoꞌimmak wepulai benasi Liojta yoemiamtune.
Intok jukaꞌ Liojta, aapoꞌik betana weyeka, siꞌimeku tua
tuꞌika aapoꞌik itou aꞌ naꞌikiakaꞌuta, jiba Krijtota enchim
sualeꞌ betchiꞌbo, emeꞌe aꞌ bitne.
\v 7 Nee intok, inikaꞌa ka neu aꞌ lutuꞌuriatuko juniꞌi,
taa Liojta yee aꞌ nak taꞌaꞌ betchiꞌbo, inepo, Krijtota
betana aapoꞌik bemela nok lutuꞌuriata in aꞌ teuwaaneꞌ
betchiꞌbo, iniꞌi, jukaꞌ Liojta, aapoꞌik a jita joaꞌ betchiꞌbo
weyekai, ne au yeu puꞌawak.
\v 8 Ineponee intok, siꞌime jumeꞌ Krijtota sualeme bepa,
kia jeela juniꞌi ka neu lutuꞌuriatakai, taa junuentaka
juniꞌi, juꞌu Lios inikaꞌa yeu puꞌata benaka tua nee alleetuamta
neu yeu puꞌak. Junuen juꞌu ka jurio yoemratau, Krijtota
betana bemela nok lutuꞌuriata, inim kaitau a tamachiatuka,
tuꞌik aet ayukamta, in ameu aꞌ teuwaaneꞌ betchiꞌbo inikaꞌa
nee tekil makak.
\v 9 Intok aapo inim siꞌimem, jukaꞌ bat naataka taewaimmet
naateka, Liojta, jukaꞌ inim siꞌimeta juꞌunaktekamta aapoꞌik
jiba juꞌuneiyaaka aꞌ weetuabaeꞌuta, inim siꞌimem inia
betana in am majtaka in am etejorianeꞌ betchiꞌbo nee
aꞌ tekil makak.
\v 10 Iniꞌi inien yeu siika junuen, iꞌan siꞌime jumeꞌ
teekapo yoꞌotaka nesaweme, inim jumeꞌ Krijtota sualeme
betchiꞌbo, jukaꞌ Liojta ame nasuk aꞌ joaꞌuta, bem aꞌ mammateka,
inimeꞌe, jukaꞌ Liojta aapoꞌik ka nanau maisi siꞌime suawata
aꞌ jipueꞌpo bem aꞌ juꞌuneiyaaneꞌ betchiꞌbo.
\v 11 Aapo juꞌu Lios, junuen cheꞌa bat naataka, aniata
kee juꞌunaktewao naatekai, chukula itom yoꞌowe Jesukrijtota
aꞌ yoemiaꞌue aapoꞌik aꞌ chupaꞌaneeka aꞌ yaꞌabaeꞌue aapo
aꞌ yaak.
\v 12 Intok itepo, Krijtotat eaka, kaitat te majjaeka
itepo Liojtau bicha witti a ito nokria. Inikaꞌa au itom
nokaꞌu betana itepo aꞌ sualekai.
\v 13 Inia betchiꞌbo inepo, jiba emo betchiꞌbo tua jiokot
in ino bichaꞌu betana, ka enchim koꞌom eeneꞌ betchiꞌbo
ne emou nooka. Bweꞌituk ala iniae emeꞌe tua enchim eiyaawatchiakaꞌuta
aꞌ juꞌuneiyaaka intok iniat emo ou bujtane.
\s Jesukrijtota jaisa yee aꞌ nakeꞌu
\p
\v 14 Jiba inikaꞌa bitwamta betchiꞌbo, inepo, juꞌu itom
Jesukrijtota yoꞌowa Liojta bichapo nee tonommea kikteka
nee au bicha nooka.
\v 15 Juꞌu Lios, siꞌime jumeꞌ ka nanau machi yoemra inim
jiapsame, intok jum teekapo juniꞌi, siꞌime jumeꞌ ankelesim
ama aneme, aapoꞌik bichapo siꞌime juꞌu bem taꞌeenaaꞌuta
ameu yeu am puꞌanemta, junae Liojta bichapo ne enchim
nokria.
\v 16 Inepo aapoꞌik itom yoꞌowa Liojtau, aapoꞌik tua
eiyaawatchika aapoꞌik betana tuꞌik weyemtae, jiapsi utteꞌata,
ka enchim koꞌom eeneeꞌuta, aapo, aapoꞌik betana aꞌ tuꞌu
jiapsie, emot aꞌ autuaa betchiꞌbo.
\v 17 Junuen jiba enchim aꞌ sual taꞌaꞌ betchiꞌbo, aapo
juꞌu Krijto emot jiapsine. Intok ket, jiba iniae, lutuꞌuriapo,
ka jiapsita bepa enchim a yee nak taꞌaaꞌu emot ayuka,
\v 18 junuen enchim, siꞌime jumeꞌ waate Krijtota sualemmak
nau, aapoꞌik Krijtota betana kia ka nuklaka intok ka
a tamachiatuka jukaꞌ yee aꞌ nak taꞌaaꞌuta, yumaꞌisi enchim
aet juꞌuneeneꞌ betchiꞌbo.
\v 19 Junuen san nee inepo inia betana, Krijtota tua
yee aꞌ nak taꞌaaꞌuta, inia betana inim siꞌime itom taꞌaaꞌu
bepa cheꞌa yumaꞌisi aꞌ eiyaawatchiakaꞌuta enchim aꞌ
taꞌaaneꞌ betchiꞌbo ne Liojtau bicha nee enchim nokria.
Intok junueni iniae enchim, jukaꞌ Liojta betana weyeka,
yumaꞌisi aapoꞌik enchim aꞌ jiapsi iꞌaꞌa benasia, enchim
jiapsineꞌ betchiꞌbo.
\p
\v 20 Iꞌan intoko, Liojta, aapoꞌik inim siꞌimem betana
eiyaawaka aꞌ yoꞌorinaaꞌuta au lutuꞌuriatune. Aapo juꞌu,
inim siꞌimekut yumaka, siꞌimeta jukaꞌ aapoꞌiku bicha
itom aꞌawaꞌuta intok kia jukaꞌ itom aꞌauꞌeaꞌu betana
ka itom teuwaaꞌu bepa, cheꞌa naa buustia itom aꞌ bittua
betchiꞌbo utteꞌakame. Intok junae, siꞌimeku itom yumaꞌatuakai.
\v 21 Inim jukaꞌ Liojta, Krijtota sualeme betana, jiba
aapoꞌik Krijtota betana weyemta betchiꞌbo, jiba yuu betchiꞌbo
Liojta, siꞌimem betana eiyaawaka aꞌ yoꞌorinaaꞌuta au
lutuꞌuriatune. Tua junuentune.
\c 4
\s Liojta tuꞌu jiapsi betchiꞌbo, jumeꞌ nau eaka jiapsame
\p
\v 1 Inia betchiꞌbo inepo Paplo, yoꞌowe Jesukrijtota
mak in eaka jiapsaꞌ betchiꞌbo inim etaꞌitakai, inepo
nee emou nooka, enchim, jiba siꞌime jumeꞌ waate Liojta
betana yeu puꞌarimtakai, bem jiapsiꞌeaꞌu benasia junuen
enchim emo ujuꞌuka jiapsineꞌ betchiꞌbo, emeꞌesu ket, jiba
aapoꞌik betana yeu puꞌarimtakai.
\v 2 Emeꞌe ka emo cheꞌewareka jiapsine. Taa ala siꞌimeku
a naas emo eiyaakai, emo nasuk ka seej chukti eakai a
boꞌo bichaka intok emo nak taꞌaakai, emeꞌe siꞌimeku tuꞌik
betana nat jiapsekai.
\v 3 Emeꞌe intok, juꞌu Liojta tuꞌu jiapsi betana aniawakai,
jiba enchim nau eaka jiapsineeꞌut emo temaine, enchim
yanti, nau eaka jiapsipeaꞌue, iniae emeꞌe a aet yumaꞌaneekai.
\v 4 Itepo siꞌime nau, wepul yoemta benasi tee bitwaa.
Intok ito nasuk wepul Liojta tuꞌu jiapsi jiba aayuk.
Inia mak ketchia, juꞌu tuꞌika, Liojta betana itom bit
boꞌo bichaꞌu juniꞌi, ket wepuꞌulaikai.
\v 5 Ito betchiꞌbo wepuꞌulaka jiba itou yoꞌowe, juꞌu
Krijto. Juꞌu itom aꞌ sualeꞌu ket wepuꞌulaisi weye. Aapoꞌik
sualeka ito batoꞌowaawame, wepulsi jiba joowa.
\v 6 Juꞌu siꞌimem yoꞌowa Lios, wepuꞌulai jiba. Aapo inim
siꞌimemmeu yoꞌotaka nesawe. Aapo, aꞌ weetuabaeꞌuta, itom
sawaka aꞌ jooa. Intok aapo, itom siꞌimemmet aane.
\p
\v 7 Taa ito betana, weꞌepulaka, aapoꞌik betana weyeka,
itepo, au yumaka a itom joaꞌuta, Krijtota itou yeu aꞌ
puꞌakaꞌpo amani tee au yumaꞌatuari.
\v 8 Inia betchiꞌbo, jum Liojta betana jiꞌosia jiꞌojteipo:
\q Aapo teekau jikau nottek intok jumeꞌe, bebejeꞌerita
betana jipuꞌuwaꞌum aamak nuk sikaari.
\q Intok aapo, inim jiapsame, tuꞌik betana, au yumaka, bem
a jooneeꞌuta amet naꞌikimtek ti jiꞌojtei.
\p
\v 9 Iꞌan intok iniꞌi: “teekau jikau nottek ti”, jiame
jaisa jiubae. Iniꞌi, cheꞌa bat teeka betana koꞌom yepsaka,
inim bwiapo cheꞌa koꞌom betukun bicha noitek ti jiubae
oꞌoben.
\v 10 Juꞌu inim koꞌom yepsakame, jiba aapo junaꞌa juꞌu,
ket cheꞌa mekka jikau teekau bicha nottekame. Junuen
junamaꞌa, aapo inim bwiapo aapoꞌik betana weyeka, jiba
betchiꞌbo tuꞌik aꞌabo bitnaꞌ betchiꞌbo ama aane.
\v 11 Intok aapo, inim ito nasuk au yumaka itom a jooneeꞌuta
itot autuak. Inimeꞌe betana, waatem aapoꞌik betana yeteu
bittuarim tuneeme yeu puꞌak. Watem, Liojta betana juꞌuneetuawaka,
chukula yeu weenemta teuwaaneeme. Watem intok, naj kateka,
Krijtota betana jukaꞌ bemela nok lutuꞌuriata aꞌ teuwaaneeme.
Watem ket, jumeꞌ Krijtota sualeme suuaneeka ameu yoꞌo
yaꞌa tuneeme. Intok watem ket, Liojta betana nok lutuꞌuriata
jiꞌojteita a yee aꞌ majtaneeme yeu puꞌak.
\v 12 Aapo junuen, inim jumeꞌ yeu aꞌ puꞌarim, aapoꞌik
betana weyeka, tekilta bem au yumaka bem aꞌ jooneꞌ betchiꞌbo
am aniak. Junuen jumeꞌe, aꞌ sualeka, wepul yoemta benasi
nau bitwame, inimeꞌe, aapoꞌik betana weyemtat cheꞌa yumaꞌisi
am yoꞌoturiabaekai.
\v 13 Junuen siꞌime itom nanancha aapoꞌik sualeka, intok
Liojta yoemia betana weyemta, lutuꞌuriata yumaꞌisi aꞌ
taꞌaaka, junuen wepulsi nau eaka, itom jiapsaꞌu tajtia.
Junuen beja itepo, senuk aꞌ yoꞌotu chupakaꞌa benasia,
Krijtota betana weyeka, siꞌimeku aapoꞌik betana itom
jiapsiꞌeaꞌa benasi, yumaꞌisi itepo junaen jiapsine.
\v 14 Junuen itepo, katte wameꞌe ili uusim bebenane.
Inimeꞌe, bem sualeꞌu betana ka wepulsi aꞌ sualeka, jukaꞌ
ka nanau maisi weyeka, bemelasi sualwamta yee majtammak
eꞌeame. Junuen bempo, wameꞌe ujyoisi weyeka ka lutuꞌuriata
yee majtaka, bempoꞌim iniat amemak aꞌ ee iꞌaka am bai
taꞌaabaeme betana bai taꞌaarimtakai.
\v 15 Ala itepo iniat wikiaka, itom yee nak taꞌaaꞌuta
ka koptaikai, itepo siꞌimeku lutuꞌuriata jiba aꞌ nokne.
Itepo siꞌimeku Krijtota mak eaka, jiba juꞌu, jumeꞌ aꞌ
sualemmeu yoꞌotakai, aapoꞌik betana itom jiapsi iꞌawaꞌa
benasi yumaꞌisi jiapsakai.
\v 16 Intok jiba aapoꞌik Krijtota betana aniawakai, siꞌime
jumeꞌ aapoꞌik sualeka aꞌ takaawa benasi eiyaawame, inimeꞌe,
takaata nau aꞌ chupeꞌe benasi, wepulsi nau eaka jiapsakai
intok inimeꞌe weꞌepulaim, tuꞌisi jiapsaka, tuꞌisi am kateo,
inimeꞌ nasuk senuk yoꞌotu chupaꞌa benasia cheꞌa tuꞌisi
bempoꞌim naas emo nak taꞌaaka jiapsaꞌu ka chukteka jiba
aune.
\s Krijtota sualeka, juꞌu ka bat naataka benasi jiapsiwame
\p
\v 17 Inikaꞌa junen nee, inepo emou teuwaaka intok inia
betana nee, Jesukrijtota betana au lutuꞌuriaka, enchim
inim ka intok, wameꞌe ka Liojta sual taꞌaaka, inimeꞌe
ka tuꞌikut jiapseka, kaitat am aniame, Liojta betana suawa
kaita amet ayukame, inimeꞌe jiapsaꞌa benasia, junuen ka
enchim jiapsineꞌ betchiꞌbo nee emou nooka.
\v 18 Bempo, jukaꞌ Liojta betana weyeka, bem bemelasi
jiapsiꞌeewaꞌa benasi ka junuen jiapsa. Bweꞌituk inimeꞌe
Liojtau ka bem emo suꞌu tojirika jiapsibaeꞌ betchiꞌbo,
juꞌu lutuꞌuriat ka juꞌunea.
\v 19 Inimeꞌe, jukaꞌ ka tuꞌika, tiusi machik betana bem
tiuꞌeaꞌuta, taꞌarulam. Intok ka tuꞌika am kobaꞌalataka
iniau emo suꞌu tojiri. Bempo siꞌime ka nanau machika,
tiusi ka tuꞌika, kaachin emo eetuaka joakai.
\v 20 Taa emeꞌe, jukaꞌ Krijtota betana enchim taꞌaakaꞌuta
ka inien aꞌ taꞌaak.
\v 21 Inikaꞌa emeꞌe, tua junen jiaka, aapoꞌik betana weyemta
aꞌ jikkajaka intok emeꞌe aapoꞌik Jesujta betana lutuꞌuriata,
tua aapoꞌik betana majtimtaka aꞌ taꞌaalamtuko.
\v 22 Emeꞌe, bat naataka, jiba inim juꞌu enchim emo ujuꞌuka
jiapsisukaꞌu, wakaꞌa bebejeꞌerita betana ka tuꞌikue bai
taꞌaarimtakai, bat naataka weeriata, ka tuꞌika enchim
joopeaka emot ayukaꞌuta betana, inikaꞌa koptaine.
\v 23 Emeꞌe intok inim jachin enchim eaka intok jita
joopeaka enchim jiapsipeaꞌu betana, Krijtota enchim aꞌ
ee iꞌaꞌa benasi, bemelasi taꞌabwisi iniat enchim jiapsineeꞌu
utteꞌa.
\v 24 Intok emeꞌe inim Liojta betana aꞌ tuꞌureꞌpo aman,
bemelasi jiapsituawaka, aapoꞌik enchim jiapsi iꞌaꞌa benasia,
iniae emo aniaka jiapsine. Inia betana emeꞌe Liojta
betana, tua machisi lutuꞌuriataka, siꞌimem bichapo ammaꞌali
jiapsiwame intok ka tuuꞌiika kaita emot ayuka bittukai.
\p
\v 25 Inia betchiꞌbo, emeꞌe ka intok aa nokiꞌichiata
nokbaane. Emo betana, weꞌepulaka, inim jumeꞌ watemmak,
lutuꞌuriata jiba noknee. Bweꞌituk itepo siꞌime, Krijtota
nau sualeme, takaata junuen nau weyeka aꞌ chupeꞌe benasi
te maachi.
\p
\v 26 Intok emo betana senu oꞌomteko, iniꞌi, ka inia betchiꞌbo
jitaꞌapo ka tuꞌik yaꞌabaane. Intok juꞌu enchim omteꞌu,
ka jiba emot ayuka siꞌime taewaine.
\v 27 Intok jitaꞌapo juniꞌi, bebejeꞌerita ka enchim aꞌ
jiꞌoptuaneꞌ betchiꞌbo emeꞌe emo suuane.
\p
\v 28 Juꞌu jita eꞌetbwame, ka intok aꞌ joone. Ala iniꞌi
tekipanoane, junuen, aapo aꞌ mamammea, jukaꞌ tuꞌisi bitwaka
tekilta joone. Intok ket, junuen aneka, aapo, jumeꞌ kaitae
emo ania machim, inimeꞌe ania betchiꞌbo, jita jipuꞌune.
\p
\v 29 Emeꞌe, ka tuꞌik tiusi machik ka nokbaane. Ala emeꞌe,
juꞌu nooki enchim sawaꞌu, iniꞌi siꞌimeku tuꞌine. Intok
iniae jumeꞌ enchim jikkajame, ameu tuꞌika intok Liojta
betana weyemta bem taꞌaaneeꞌuta, intok siꞌimeku am aniamta
jiba nokbaane.
\v 30 Emeꞌe, jukaꞌ Liojta betana tuꞌu jiapsita, kaitaꞌpo,
ka aꞌ alleetuabaane. Bweꞌituk juꞌu Liojta tuꞌu jiapsie,
emeꞌe, enchim Liojta betana yoemiarim tukaꞌu, emeꞌe junuen
taꞌeenaaka aꞌ bittuari. Junuen, chukula taewait, aapoꞌik
inim siꞌimeta yumaꞌisi weyeka, enchim aet aꞌ jinneꞌuneeꞌuta
aꞌ yumaꞌu tajtia.
\p
\v 31 Emeꞌe, siꞌimeku, ka nau alleewame, intok siꞌime ka
juꞌuneame benasi omtiwame, intok enchim ka emo bibitpeaꞌu,
intok senuku omteka, jaana au nokwame, intok siꞌime ka
tuꞌisi weyeme, inile benaka kaita emot aune.
\v 32 Ala, emeꞌe emo nasuk nau tuttuꞌika intok naas emo
nak jiokoleka emo bitne. Intok emeꞌe ket emo nasuk a
emo jiokol taꞌaane, jiba jukaꞌ Liojta, Krijtota emo betchiꞌbo
aꞌ yaakaꞌue, enchim aꞌ jiokoekaꞌa benasia.
\c 5
\s Jumeꞌ Liojta betana yoemiarim, jaisa bem jiapsiꞌeaꞌu
\p
\v 1 Emeꞌe intok inien weyeka, Liojta betana tua nakwaka
yoemiarimtakai, emeꞌe ket, jiba aapoꞌik jiapsaꞌa benasi
jiapsibaane.
\v 2 Emeꞌe yee nak taꞌaaka jiapsine, jiba iniat, Krijtota
junuen itom aꞌ nakeka intok itom ka tuꞌuwa yaꞌarimmet
itom a jiokoimtuneꞌ betchiꞌbo, aapo aꞌ meꞌeetuneꞌ betchiꞌbo
au suꞌu tojakaꞌa benasia. Junuen, bwalata aꞌ meꞌetukaꞌa
benasia machika, iniat Liojta bichapo tua tuꞌisi aet
mabetwakai.
\p
\v 3 Emeꞌe inien Liojta betana kateka, aꞌ yoemiarimtakai,
jukaꞌ ka emo jubeka emo nau tuꞌuriwamta, oo kia jita
juniꞌi tua tiusi machika ka tuꞌik joowamta, oo jukaꞌ
ka weelaꞌpo jita waatiawamta, inikaꞌa emeꞌe ka aꞌ boꞌo
jooriaka intok emo nasuk kaabe aꞌ etejopo yumaꞌi.
\v 4 Jukaꞌ ka tuꞌik tiusi machik ka teuwaane. Intok
kia watem bichapo, jukaꞌ kaita tuꞌika ka suasi jiuwamta
juniꞌi emeꞌe ka aꞌ nokbaane. Bweꞌituk iniꞌi inile benaka
nokwame, kaitaꞌpo tuꞌika, ka emou chaꞌaka. Ala inien tuꞌeaka
su, emeꞌe, Liojta betana yee aꞌ nak taꞌaaꞌuta teuwaane.
\v 5 Bweꞌituk emeꞌe jaibu juꞌunea, jabeta juniꞌi, jukaꞌ
ka emo jujubeka emo nau tuꞌuriwamta aꞌ joamta, oo jukaꞌ
ka tuꞌik tiusi machik joamta, oo jukaꞌ jain juniꞌi ka
weelaꞌpo jita waatiawamta, iniꞌi ket jiba jumeꞌ maammea
yaꞌarim yoꞌoriwamme am yoꞌoriwaꞌa benasi yeu weama, juꞌu
inile benak joame, junaꞌa, teekau Krijtota intok achai
Liojta yoꞌotaka nesaweka bem jiapsaꞌu, ka aman aꞌ lutuꞌurianeꞌpo.
\v 6 Inim emeꞌe, kaabeta, nooki ka suawakamtae emeꞌe kaabeta
iniae enchim bai taꞌaatuane. Bweꞌituk tua inia ka tuꞌika
ayukamta betchiꞌbo san, aꞌabo weye, wameꞌe aapoꞌik Liojta
ka aꞌ nok jikkajaka jiapsame betchiꞌbo juꞌu Liojta tua
jiokot yee aꞌ bittuaneeꞌu.
\v 7 Junuen san, emeꞌe inile benasi jiapsammak emeꞌe
junae betana kaitaꞌpo amemak emo tuꞌurine.
\p
\v 8 Emeꞌe, bat naataka Liojta betana lutuꞌuriat ka juꞌuneaka,
tua ka machiku benasi jiapsan. Taa iꞌani emeꞌe, yoꞌowe
Jesukrijtota mak eaka jiapsakai, juꞌu aapoꞌik betana
lutuꞌuria, tachiriata benaka emot aayuk. Junuen san, emeꞌe
tachiriata benaka lutuꞌuriat juꞌuneame benasi jiapsine.
\v 9 Bweꞌituk Krijtota betana juꞌu, tachiriata benaka,
aꞌ nok lutuꞌuriawa, yee jiokol taꞌeewamtat, intok lutuꞌuriata
nokwamtat, intok siꞌimeku lutuꞌuriataka junuen jiapsiwamtat
yee juꞌuneetuaka, junuen yee jiapsitua.
\v 10 Emeꞌe, junuen enchim jiapsaka, Jesukrijtota enchim
junuen aꞌ yoꞌoreka intok enchim aꞌ alleetuaka jiapsineeꞌut,
aꞌ taꞌaa betchiꞌbo emo temaine.
\v 11 Emeꞌe, wameꞌe lutuꞌuriat ka juꞌuneaka, inimeꞌe tua
ka machiku jiapsame benaka, jukaꞌ kaitaꞌpo tuꞌika ka
tuꞌik emo alleetuaka bem joaꞌuta, ka amemak aꞌ joobaane.
Ala, inimeꞌe, emeꞌe juꞌu lutuꞌuriae junae betana am nok
tejwaane.
\v 12 Bweꞌituk inimeꞌe, etbwa bem joaꞌuta, teuwaapo juniꞌi
tiusi maachi.
\v 13 Taa inia betana, juꞌu Krijtota betana lutuꞌuriae,
bempo juꞌu ka tuꞌik bem joaꞌut, junaet juꞌuneakai, junak
bempo ka tuꞌik betana emo temaine. Bweꞌituk iniꞌi lutuꞌuria,
tachiriata benasi, siꞌimeta tajpaꞌalasia yeu aꞌ mamachia.
\v 14 Inia betchiꞌbo, Liojta jiꞌosia jiꞌojteipo:
\q Empo, juꞌu lutuꞌuriata ka taꞌaaka, intok chukula, Liojta
mak em bitneeꞌut ka juꞌuneame, aet juꞌuneaka emo temaine.
\q Junuen empo Liojta bichapo, ka intok ka jiapsamta benasi
em machineꞌ betchiꞌbo, Krijtota sualeka aꞌu emo suꞌu
tojine.
\q Aapo juꞌu Krijto intok, inia betana enchi aniaka enchi
jinneꞌunee ti jiꞌojtei.
\p
\v 15 Junuen san, emeꞌe inim juꞌu enchim emo ujuꞌuka
enchim jiapsaꞌu betana aet em mammatene. Intok emeꞌe,
ka wameꞌe kaita bichaka ka juꞌuneame benasi jiapsine.
Ala wameꞌe lutuꞌuriat yumaꞌisi suawaka jiapsiꞌeaꞌa benasia.
\v 16 Ka emeꞌe inim kia jachin juniꞌi jiapsaka, taewaim
sakaꞌatuane. Bweꞌituk inim inimeꞌe taewaimmet siꞌime
ka tuꞌisi weye.
\v 17 Inia betchiꞌbo san, kaachin emeꞌe kia beja ka suasi
jiapsibaane. Ala emeꞌe, yoꞌowe Jesukrijtota aꞌ tuꞌureka
aꞌ joo iꞌaꞌut aet juꞌunee betchiꞌbo aet emo temaine.
\v 18 Ka emeꞌe nanaakobaane. Bweꞌituk iniat enchim tuꞌi
eerim ae nasontuneeꞌu jiba ama aayuk. Inien tuꞌeaka
ala emeꞌe, Liojta betana tuꞌu jiapsita yumaꞌisi emot
jiapsituaka, siꞌimeku aapoꞌik enchim jiapsi iꞌaꞌpo aman
jiapsine.
\v 19 Emeꞌe, emo nasuk jumeꞌ salmom teaka jiꞌojteim nokaka,
Liojta betana weyemta teuwaane. Intok jumeꞌe, Liojta
ammea yoꞌori betchiꞌbo bwiikim tuꞌuteim bwikakai. Intok
ka jiapsita bepa, tua junen jiaka junuen Liojtau bicha
enchim alleaꞌuta teuwaakai.
\v 20 Emeꞌe, jiba weeꞌpo siꞌimek betchiꞌbo jukaꞌ achai
Liojta aꞌ bai saune, junuen iniat itom yoꞌowe Jesukrijtota
betana lutuꞌuriakai.
\s Jumeꞌ Krijtota sualeka nau jiapsame, jaisa bem nau jiapsiꞌeaꞌu
\p
\v 21 Emeꞌe, Jesukrijtota enchim nau yoꞌoreꞌ betchiꞌbo,
nanancha emo yoꞌoreka, emeꞌe siꞌimeku naas emo nok jikkajine.
\p
\v 22 Jumeꞌ kukunakame, inimeꞌe, bem kukunam eiyaaka, bem
nesaupo aman katne, bempoꞌim, Jesukrijtota eiyaaka aꞌ
nok jikkajaꞌa benasia.
\v 23 Bweꞌituk juꞌu oꞌou aꞌ jubiawatau yoꞌowe, jiba jukaꞌ
Krijtota, jumeꞌ aapoꞌik sualemmeu aꞌ yoꞌotukaꞌa benasia.
Juꞌu Krijto ket aapo junaꞌa, jumeꞌ aꞌ sualeme betchiꞌbo
mukuka intok am jinneꞌuka, aapo, aapoꞌik betchiꞌbo aꞌ
takaawa benasi am eiyaame.
\v 24 Taa jumeꞌ Krijtota sualeme, bempoꞌim Krijtota eiyaaka
aamak eaka aꞌ nok jikkajaꞌa benasia, ket jiba junaen
jumeꞌ kukunakame, inimeꞌe siꞌimeku bem kukunammak eaka
am nok jikkajaka jiapsine.
\p
\v 25 Emeꞌe jujubekame, jumeꞌ enchim juubim am nak taꞌaane.
Krijtota, jumeꞌ aꞌ sualeme, am nakeka intok aꞌ meꞌetuneꞌ
betchiꞌbo, aapoꞌik au aꞌ suꞌu tojakaꞌa benasia.
\v 26 Aapo inien aayuk, junuen, jumeꞌ aꞌ sualeme, am jiokoituka,
wepulsi Liojta betchiꞌbo am jiapsineꞌ betchiꞌbo. Aꞌ
nok lutuꞌuriae ka tuꞌik betana, yumaꞌisi kaita amet ayukaꞌa
benasi bem bittuneꞌ betchiꞌbo.
\v 27 Junuen inimeꞌe Krijtota sualeme, yumaꞌisi intok
ujyoisi tuꞌuteimtaka, ka tuꞌika kaita amet bittaka, ala
bempoꞌim, wepulsi siꞌimeku yumaꞌisi Liojtau emo suꞌu
tojilamtaka, aapoꞌik bichapo bem bittuneꞌ betchiꞌbo.
\v 28 Jiba inien san, jumeꞌ jujubekame, bem emo nakeꞌe
benasia, junuen bem jujubim am nak taꞌaaneeꞌuta ameu
utteꞌa. Bweꞌituk, juꞌu aꞌ jubiawata nak taꞌaame, cheꞌa
tuꞌisi iniꞌi, jiba aapo au nakeka juneꞌelaane.
\v 29 Bweꞌituk kaabe inim, aapo aꞌ taka omtaka aane.
Ala, juꞌu aꞌ takaakame, bwaꞌawamta aꞌ bwaꞌatuaka intok
inikaꞌa aꞌ suuane. Juꞌu Jesukrijto intok ket, jumeꞌ aapoꞌik
sualeka aꞌu emo suꞌu tojame, jiba inien am bicha.
\v 30 Bweꞌituk inimeꞌe, aꞌ takaawa, ka nanau machika nau
aꞌ weyeꞌe benasi maachi.
\v 31 “Jiba inia betchiꞌbo san, inim seenu, jubeko, iniꞌi
utteꞌa jumeꞌ aꞌ yoꞌowawam, aapoꞌik am toꞌo simneeꞌuta,
junuen aꞌ jubiamak jiapsi betchiꞌbo. Intok junuen inimeꞌe,
Liojta bichapo, woika juniꞌi, wepul yoemta benasi bittune”,
ti jiꞌojtei.
\v 32 Iniꞌi inien weeme, ka witti machisi a aet juꞌuneetuka,
tua eiyaawatchik, taꞌabwik teuwaa oꞌoben. Ineponee intok
inikaꞌa, jumeꞌ Krijtota sualeme intok aapoꞌik Jesukrijtota
aꞌ wepul yoemta benasi bem machiaꞌut aꞌ nokaꞌati jiia.
\v 33 Taa ketchia iniꞌi, enchim weꞌepulaim, jiba enchim
emo nakeꞌe benasia, emeꞌe enchim jubim junuen enchim
am nak taꞌaaneeꞌuta aꞌ teuwaa. Intok naa buustia, jumeꞌ
kukunakame, inimeꞌe bem kukunam, bem am nak yoꞌoreeꞌuta
aꞌ teuwaa.
\c 6
\p
\v 1 Emeꞌe usiwaim, Krijtota sualeka enchim jiapsaꞌ betchiꞌbo,
enchim yoꞌowam enchim am nok jikkajineeꞌuta utteꞌa.
Bweꞌituk iniꞌi, Liojta betana lutuꞌuriaka weye.
\v 2 Jum nesauri jiꞌojteimpo Liojta betana juꞌu seenu,
iniat chukula tuꞌika aet bitneeka juꞌu inen bat weyeme,
iniꞌi: “Em yoꞌowam empo am nak yoꞌorine”, ti jiame
junaꞌa.
\v 3 “Junuen empo, inim binwaa jiapsaka intok Liojta
betana tua alleewamta bichaka em jiapsineꞌ betchiꞌbo”,
ti jiꞌojtei.
\p
\v 4 Emeꞌe intoko yoꞌowawaim yoemiakame, jumeꞌ enchim
yoemiam, ka naa buusti ameu nokaka am omtituabaane. Ala
emeꞌe inimeꞌe, siꞌimeku tuꞌik ammaꞌali kateka bem jiapsineeꞌut
am yoꞌoturiane. Intok Liojta betana weyemtat am majtakai,
junuen Jesukrijtota sualeka bem jiapsineꞌ betchiꞌbo.
\p
\v 5 Emeꞌe intok, jumeꞌ enchim tekom betchiꞌbo jiapsaka
tekipanoame, emeꞌe, jumeꞌ inim bwiapo enchim tekom, tekilpo
am yoꞌoreka, intok kaitaꞌpo am bai tattaꞌaka am omtituaka,
junuen am nok jikkajaka jiapsine. Iniat jiba, Krijtota
betchiꞌbo enchim tekipanoaꞌa benasia.
\v 6 Emeꞌe, inimeꞌe, ka ama am aneo jiba, intok junuen,
tuꞌisi amemak tawabaekai, tekilpo am bitne. Ala emeꞌe,
Krijtota betchiꞌbo jiapsaka tekilta enchim joaꞌa benasi
eaka, ka jiapsita bepa, Liojta enchim aꞌ jiapsi iꞌaꞌpo
aman jiapsakai.
\v 7 Emeꞌe, jukaꞌ enchim tekilta, emeꞌe babaeka aꞌ joone.
Inikaꞌa emeꞌe, ka inim watem betchiꞌbo jiba, ala yoꞌowe
Jesukrijtota betchiꞌbo enchim aꞌ joaꞌa benasi eakai.
\v 8 Bweꞌituk emeꞌe jaibu juꞌunea, jumeꞌ tekom betchiꞌbo
jiapsame, oo jumeꞌ ka tetekoka jiapsame juniꞌi, weꞌepulaim,
jita tuꞌik juniꞌi aꞌ yaakaꞌu betchiꞌbo, yoꞌowe Jesukrijtota
betana inikaꞌa junaet tuꞌik aꞌ bittuanaaꞌu.
\p
\v 9 Emeꞌe intoko tekowaim, jumeꞌ emo betchiꞌbo jiapsaka,
tekipanoammak, jiba junaen siꞌimeku amemak tuttuꞌine.
Intok kaitaꞌpo naa buusti bettesi amemak katnee. Iniau
emeꞌe waatine, kia enchim intok kia bempoꞌim Lios, teekau
jiapsamta, siꞌimem nanancha aꞌ yoꞌowakaꞌu. Aapo juꞌu
achai Lios intok, kaabeta yeu beꞌerika, siꞌimem nanancha
eiyaaka am bicha.
\s Jumeꞌ Krijtota sualeme, Liojta betana weyeka, juꞌu ae bem emo anianeeꞌu
\p
\v 10 Iꞌan intok Krijtopo nemak werim, emeꞌe, yoꞌowe Jesukrijtota
mak eaka jiapsakai, siꞌimeku aapoꞌik betana utteꞌaka
jiapsine. Jiba aapoꞌik betana weyeka, tua bepa aapoꞌik
utteꞌawae.
\v 11 Emeꞌe, Liojta betana weyeka, juꞌu enchim ae emo
anianeeka emot autuarie, emeꞌe junuen bebejeꞌerita betana
weyeka yee ae aꞌ bai taꞌaaꞌu betana ka bai taꞌaarim
tu betchiꞌbo iniae emo aniane.
\v 12 Bweꞌituk itepo, katte watem inim jiapsaka bitwame
betana bejeꞌewa. Taa ala iniꞌi, bebejeꞌerita betana ka
tuꞌi jiapsim, ka bittaka jekapo rejteme betana te bejeꞌewakai.
Inimeꞌe inim bwiapo, ka tuꞌik ayukaꞌpo, aꞌ kobaꞌika im
nesaweka aneme junameꞌe.
\v 13 Junuen san emeꞌe, siꞌimeta jukaꞌ enchim emo ae
aniaka, Liojta betana emot autuarie, inikaꞌa, sontaota
nassuabaeka juꞌu ae au aꞌ aniaꞌue benasi machikai, ka
aꞌ koptane. Junuen emeꞌe, taewaita, bebejeꞌerita betana
ka tuꞌik weyeo, kaitaꞌpo jiꞌop betchiꞌbo intok chukula
emeꞌe iniau yumaꞌasukai, ka taꞌabwisi eaka, tuꞌisi jiapsaka
enchim yeu kat betchiꞌbo.
\v 14 Junuen san emeꞌe, wikosata benaka, Liojta nok lutuꞌuriae
emo aniaka, bichau bicha, kaitaꞌpo taꞌabwisi eene. Intok
lutuꞌuriakamta, tuꞌik jiba enchim joaka jiapsaꞌue, juꞌu
ka tuꞌik betana emo aniane. Sontaota, sisiꞌiwook supem
benakue taupo iniae au aꞌ aniaꞌa benasia.
\v 15 Emeꞌe, Liojta mak yanti, kaitat jain eaka jiapsiwamta
betana weyeka jukaꞌ bemela nok lutuꞌuriata, yeteu enchim
aꞌ teuwaaneeꞌu betana, enchim aꞌ taꞌaaka intok au yumaka
enchim aꞌ jooneꞌ betchiꞌbo, emo aet temaine. Inia betana
jiba jukaꞌ sontaota, au aꞌ bochampo wokteka, au aꞌ aniaꞌa
benasia.
\v 16 Taa siꞌimeta inia bepa, emeꞌe, siꞌimeku Liojta emomak
tukaꞌuta enchim aꞌ yoemꞌeiyaa taꞌaaꞌue emo aniane. Junuen,
sontaota koꞌei sisiꞌiwokta mampo weiyaaka ae au aꞌ aniaꞌa
benasia. Junuen emeꞌe, bebejeꞌerita betana, juꞌiwam tajekame
emou bicha kateme benaka, bettesi machika ka tuꞌik emou
aꞌ joobaeꞌuta, ka emou aꞌ yumaꞌ betchiꞌbo.
\v 17 Emeꞌe, Liojta betana weyeka, enchim jinneꞌurim tukaꞌuta,
aꞌ juꞌuneiyaaka, kaitat jain eaka jiapsine. Junuen sontaota,
kobat sisiꞌiwook moꞌobeꞌie au aꞌ aniaꞌa benasia. Intok
emeꞌe, jukaꞌa, Liojta betana aꞌ nok lutuꞌuriata, inikaꞌa,
tebe kuchiꞌim benasi, Liojta betana tuꞌu jiapsita enchim
sawaatuaꞌuta, iniat eene.
\v 18 Inikaꞌa siꞌimeta emeꞌe, jiba Liojta betana aꞌ tuꞌu
jiapsie aniawaka, aet juꞌuneaka, Liojtau bicha aet emo
nokriaka aꞌ joone. Junuen inikaꞌa, emeꞌe, aꞌ joo betchiꞌbo,
ka taꞌabwisi eaka, ka emo koptaika aet jiapseka aꞌ joone.
Intok ket siꞌime wameꞌe inim, Liojta yoemiam am nokriane.
\v 19 Nee betchiꞌbo intok ket emeꞌe, Liojtau bicha nokne.
Junuen, chukula in teuwaaneeꞌut, aapoꞌik nee anianeꞌ betchiꞌbo.
Intok ketchia, jukaꞌ Krijtota betana bemela nok lutuꞌuriata,
bat naataka kaabeta tua aet juꞌuneaꞌuta, inim, kaitat
jain eaka, machisi yeteu in aꞌ teuwaaneꞌ betchiꞌbo nee
nokriane.
\v 20 Juꞌu Lios, Krijtota betana bemela nok lutuꞌuriata,
mekkaa, taꞌabwi yoemratau in aꞌ weiyaaneꞌ betchiꞌbo, nee
au yeu puꞌak. Jiba inia betchiꞌbo iꞌan inepo inim etaꞌi.
Jiba inikaꞌa Krijtota nok lutuꞌuriata, ka jain eaka in
yee aꞌ majtaꞌeaꞌa benasi in aꞌ teuwaaneꞌ betchiꞌbo emeꞌe
Liojtau nee nokriane.
\s Jiꞌojtesuka juꞌu Paplo, siꞌimem tebotua
\p
\v 21 Juꞌu Tiikiko, tua naksi itom eiyaaꞌu, juꞌu Krijtopo
itomak weri, intok Jesukrijtota tekilpo, ka aꞌ koptaka
siꞌimeku tuꞌisi itom aniame, aapo, siꞌimeta jukaꞌ nee
betana weyemtat intok inim in joaꞌu betana enchim etejoriane.
\v 22 Inia betchiꞌbo inepo, aapoꞌik aman emou aꞌ bittua,
junuen itom ito bichaꞌut, enchim tejwaakai intok ket
enchim jiapsim aꞌ joꞌaneꞌ betchiꞌbo.
\p
\v 23 Aapo juꞌu itom yoꞌowa Liojta betana intok itom
yoꞌowe Jesukrijtota betana, siꞌime jumeꞌ Krijtota sualemmeu,
kaitat jain eaka, yanti jiapsiwamta intok aapoꞌik Jesukrijtota
enchim sual taꞌaaꞌuta enchim yee nak taꞌaaꞌue emot aꞌ
bit teboka, inikaꞌa emot autuane.
\v 24 Intok aapo juꞌu Lios, siꞌime jumeꞌe, tua junen jiaka
jiba betchiꞌbo yoꞌowe Jesukrijtota aꞌ nak taꞌaame, aꞌ
tuꞌuwae am alleetuane. Tua junuentune.