\id COL
\h KOLOSENSEM
\toc1 KOLOSENSEM
\mt Kolosensem
\c 1
\s Juꞌu Paplo, bweꞌu joꞌara Koloosaj teaꞌpo Krijtota sualemmeu jiꞌojte
\p
\v 1 Inepo Paplo, Liojta junen eakaꞌ betchiꞌbo, Jesukrijtota
beetana yeu puꞌataka nee yeteu bittuari. Inepo intok
ket, juꞌu Krijtopo itomak weri, Timoteeoꞌ teamta make,
\v 2 itepo inikaꞌa jiꞌojteita, tee, jumeꞌ bweꞌu joꞌara
Koloosaj teaꞌpo joomem taka, jumeꞌe, ka aꞌ koptaka, Krijtota
sualeka Liojta yoemiammeu, tee aꞌ jiꞌojte. Aapo juꞌu
Lios itom yoꞌowa, aapoꞌik betana ka jain eaka, yumaꞌisi
yanti elwamta enchim aꞌ bittuane.
\s Paplo, jumeꞌ Krijtota sualeme, Liojtau bicha am nokria
\p
\v 3 Itepo tee jiba jukaꞌ Liojta, itom yoꞌowe Jesukrijtota
yoꞌowata tee aapoꞌiku bicha enchim nokriakai, emo betchiꞌbo
te aꞌ bai sae.
\v 4 Bweꞌituk itepotee inim, emo betana Jesukrijtota
enchim aꞌ sual taꞌaaꞌuta intok siꞌime jumeꞌ Liojta yoemiam
enchim tuꞌisi am nak taꞌaaꞌu betana, tee emo tana aꞌ
etejoriari.
\v 5 Emeꞌe junuen aneka, jukaꞌa, chukula jiba betchiꞌbo
teekau tuꞌik enchim bitneeꞌuta aꞌ ayukaꞌpoꞌenchim aꞌ
juꞌuneiyaꞌ betchiꞌbo. Emeꞌe, inikaꞌa teekau jiba betchiꞌbo
enchim bitneeꞌut, jukaꞌ Krijtota betana bemela nok lutuꞌuriata,
aꞌ jikkajaka aꞌ mabetakai, junue inikaꞌa taꞌaak.
\v 6 Jiba iniꞌi, Krijtota bemela nok lutuꞌuria, emou bicha
teuwaawakame, aniat yeu tajtia siꞌimekut weyeka intok
teuwaawaka, sualwa. Inia betana, jiba emo nasuk yeu aꞌ
sikaꞌa benasia, junak bat naataka jukaꞌ Liojta, tuꞌisi
aapoꞌik yee aꞌ nakeꞌuta enchim aꞌ jikkajakaꞌpo naatekai
intok junako, emeꞌe junuen yee aꞌ nak taꞌaaꞌuta tua lutuꞌuria
taka aꞌ weyeꞌuta enchim aꞌ juꞌuneiyaakai.
\v 7 Inia betana juꞌu itom nak taꞌaaꞌu, Epapraaj teame,
iniꞌi itomak tekipanoakame, intok jiba aapo, emo betchiꞌbo
Krijtota betana tekilta ka aꞌ koptaka aꞌ joame, aapo
enchim aꞌ majtak.
\v 8 Aapo aꞌabo inim emo betana etejota itou nuꞌupaka
intok, Krijtota sualeka enchim yee nak taꞌaaꞌuta emot
ayukaꞌu, itom etejoriak.
\p
\v 9 Inia betchiꞌbo itepo, inia betana enchim juꞌuneiyaaka
naatekai, itepo katte enchim koptaka, Liojtau bicha jiba
enchim nokria. Intok junuen, inepo, aapoꞌik Liojta, aꞌ
eaꞌpo aman inien enchim jiapsiꞌeaꞌut, tuꞌisi yumaꞌisi
enchim aꞌ taꞌaaneeꞌut, intok ket, siꞌimekut, koba suawata
emot aꞌ autuaneeꞌut, intok aapoꞌik betana weyeka, siꞌime
jukaꞌ lutuꞌuriata, yumaꞌisi enchim aꞌ taꞌaaneeꞌut, enchim
aꞌ anianeꞌ betchiꞌbo aapoꞌiku bicha ne enchim nokria.
\v 10 Junuen emeꞌe, jumeꞌ Liojta yoemiam jiapsiꞌeaꞌa
benasia, a jiapsine. Intok emeꞌe jiba aapoꞌik tuꞌureka
aꞌ joo iꞌaꞌuta aꞌ joakai. Junuen emeꞌe inim siꞌime tuꞌik
boꞌo jooriawamta emot bittebone. Intok jiba cheꞌa juniꞌi
emeꞌe yumaꞌisi Liojta aꞌ taꞌaa sakakai.
\v 11 Itepo, siꞌimeku aapoꞌik Liojta betana weyeka, kaitau
a tamachiatuka juꞌu aapoꞌik utteꞌawae, yumaꞌisi aapoꞌik
enchim anianeꞌ betchiꞌbo te au bicha enchim nokria.
Junuen enchim siꞌimeta jukaꞌ bette maisi machik emou
weyemta, yumaꞌisi, ka seej chukti eaka, intok tua enchim
alleaꞌu emot ayuka, ka enchim koꞌom eeneꞌ betchiꞌbo.
\v 12 Intok jukaꞌ itom yoꞌowa Liojta junuen aapoꞌik,
jumeꞌ teekau ujyoiku jiapsammak, jukaꞌ aapoꞌik betana
tuꞌik, jumeꞌ aꞌ yoemiam am bittuaneeꞌuta, ket enchim aꞌ
mabetneeꞌuta enchim au lutuꞌuriatuneꞌ betchiꞌbo enchim
aꞌ tuꞌu yaꞌariakamta, enchim aet aꞌ bai sauneꞌ betchiꞌbo.
\v 13 Juꞌu Lios, inim itom jumeꞌ lutuꞌuriat ka juꞌuneaka
intok bebejeꞌerita betana yekawaka, ka tuꞌik itot ayukamta
betana, aapo itom jinneꞌuk. Intok aapo, tua aꞌ nakeka
aꞌ yoemia, teekau nesaweka aꞌ katekaꞌu, junaman jiba betchiꞌbo
itom aamak aneꞌuta itom aꞌ tuꞌu yaꞌariak.
\v 14 Jiba junae, aapoꞌik ito betchiꞌbo aꞌ mukukaꞌue
itom jinneꞌuka intok itom ka tuꞌuwa yaꞌarimmet itom
jiokoekai.
\s Krijtota kuuset mukukaꞌ betchiꞌbo, uꞌu Liojtamak a emo tuꞌutewame
\p
\v 15 Juꞌu Lios, juꞌu ka bittaka jiapsame, aꞌ uꞌusiwa
aꞌabo yepsaka junuen aapo inim bittaka aanek. Iniꞌi
intok aapo jiba juꞌu Liojtamak tuka siꞌime jukaꞌ juꞌunakteita
au yoꞌotaka aꞌ yekame.
\v 16 Ketchia, jiba aapo juꞌu Krijto junaꞌatakai, juꞌu,
jum teekapo ayukamta intok inim bwiapo ayukamta, kia
juꞌu a bittumta intok kia juꞌu ka a bittumta juniꞌi,
aapo junaꞌa aꞌ juꞌunaktekame. Inien aꞌ weyekai, kia teekau
juniꞌi, siꞌime ka bittaka juꞌu yoꞌo yaꞌuraa nesawemta,
intok jumeꞌ inim siꞌimem bepa yaꞌuraam, cheꞌa utteꞌaka
yoꞌo nesaweme, aapo siꞌimeta juꞌunaktek, intok siꞌime
aapoꞌik betchiꞌbo juꞌunaktewak.
\v 17 Aapo juꞌu Krijto, siꞌime ayukamta bepat cheꞌa bat
naataka naateka jiapsa. Intok aapoꞌik betchiꞌbo siꞌime
juꞌunaktei ayukame, ka taꞌabwisi, ala tua junaen aꞌ weꞌeaꞌa
benasia ayuka weye.
\v 18 Intok naa buustia juꞌu Krijto, siꞌime jumeꞌ aꞌ
sualeme, inimeꞌe aapoꞌik taka benasi machika, aapo junaꞌa
juꞌu inimmeu koba taka ameu yoꞌowe. Jiba aapo, inimeꞌe
aꞌ sualeme, jiba yuu jiapsiwamta amet autuame. Aapo junaꞌatuk,
inim juꞌu cheꞌa bat weyeka, jumeꞌ kokkoarim nasuk jiabijtekame.
Junuen weyeka, aapoꞌik siꞌimeku yoꞌotaka, bat aꞌ kikteneeꞌuta
junuen au lutuꞌuria tuneꞌ betchiꞌbo.
\v 19 Bweꞌituk juꞌu Lios, junuen aapo, aapoꞌik junuen
weyeka aꞌ Lioj tukaꞌu, siꞌimeku aapoꞌik Krijtota aꞌ bittuneeꞌuta
junuen aꞌ waatak.
\v 20 Intok ketchia juꞌu Lios, Krijtota inim aꞌ yaakaꞌue
amani, siꞌimeta ayukamta, junuen jumeꞌ inim bwiapo jiapsame,
intok kia aman teekapo jiapsame nasuk juniꞌi, nau eewamta
aꞌ yaꞌaneeꞌuta waatak. Junuen Krijtota inim siꞌimem
betchiꞌbo kuuset popontaka aꞌ mukukaꞌue, aapoꞌiku mak
a bem emo tuꞌuteneeꞌuta aꞌ yaakai.
\p
\v 21 Bat naataka emeꞌe Liojta mak ka lutuꞌuriakai, intok
juꞌu ka tuꞌik enchim boꞌo jooriaꞌ betchiꞌbo, Liojta ka
alleetuaka, aꞌ bejeꞌeka jiapsaka juniꞌi, taa iꞌani juꞌu
Lios, jiba aapoꞌiku mak eaka enchim jiapsineeꞌuta aꞌ
yaak.
\v 22 Inikaꞌa, jiba aapo juꞌu Krijto, aꞌ takaawapo jiokot
koꞌokosi machik aꞌ ineꞌaka, mukuka aꞌ yaakai. Inien inikaꞌa
aapo aꞌ yaak, junuen chukula, wepulsi aapoꞌik betchiꞌbo
yoemra taka intok ka tuꞌika kaita emot tawalataka intok
naa buusti, jiokot enchim aet tawaanaaꞌuta, kaita emot
ayuka, junuen Liojta bichapo enchim mabet tuneꞌ betchiꞌbo.
\v 23 Taa inikaꞌa bit betchiꞌbo, emeꞌe, Krijtota enchim
sual taꞌaaꞌut, ka taꞌabwisi eaka, iniat emeꞌe machisi
aet juꞌuneaka bichau bicha aet eaka jiapsine. Intok
juꞌu Krijtota bemela nok lutuꞌuriata enchim aꞌ jikkajakaꞌ
betchiꞌbo, tuꞌik enchim aet bit boꞌo bichaꞌuta, ka aꞌ
koptakai. Iniꞌi Krijtota bemela nok lutuꞌuria junaꞌa,
juꞌu inim siꞌimekut aniat yeu tajtia teuwaawame, intok
inepo Paplo, nee ket inikaꞌa aꞌ tekiaka, yee aꞌ majta
betchiꞌbo ne au puꞌari.
\s Paplo, Krijtota sualeme am bit betchiꞌbo am tekil maki
\p
\v 24 Iꞌan ne allea juꞌu inim emo betchiꞌbo jiokot in
ino bichaꞌutchi. Bweꞌituk inepo inien nee jiba jukaꞌ
Krijtota, jumeꞌ aapoꞌik sualeme, aapoꞌik takaawa benasi
aꞌ bichaꞌum, ame betchiꞌbo jiokot au aꞌ bitꞌeaꞌuta, ama
beꞌeemta, junuen inepo in takaapo aꞌ chupaꞌi.
\v 25 Inepone, jumeꞌ Krijtota nau sualeme nasuk, Liojta
betana weyemtat siꞌimeku am bichaka ne au yeu puꞌatuk.
Liojta, tuꞌik emo tana waataka, jukaꞌ tekilta aapoꞌik
betana in mabetri, iniꞌi emo betchiꞌbo tuꞌika weyeka,
Krijtota bemela nok lutuꞌuriata, yumaꞌisi, kaita beꞌeeka
in yee aꞌ majta iꞌawaꞌu betchiꞌbo.
\v 26 Jiba inikaꞌa, cheꞌa bat naataka naateka taewaimmet,
jukaꞌ Liojta jiba aꞌ juꞌuneiyaaka, intok ka yeu machiari
tukaꞌuta, taa inia betana aapo iꞌan, jumeꞌ aapoꞌik yoemiammeu
machisi aet am juꞌuneetualaa.
\v 27 Inimeꞌe bempoꞌimmeu juꞌu Lios, inia betana ka juꞌuneiyaawamta,
juꞌu ka jurio yoemrata betchiꞌbo, kaitau a tamachiatuka,
ama butti tuꞌik aet ayukaꞌuta, inikaꞌa am juꞌuneiyaatuabaek.
Iniꞌi Liojta jiba juꞌuneiyaaꞌu intok, iniꞌi, Krijtota
iꞌan emot jiapsaꞌu junaꞌa. Intok aapoꞌikut emeꞌe aꞌ
bitne, jukaꞌ chukula, aapoꞌik bichapo tua enchim eiyaanaaꞌuta.
\p
\v 28 Itepo, Krijtota betana weyemta tee yeteu aꞌ teuwaa.
Intok itepo inim siꞌimemmeu nokaka am tejwaa. Intok
tee siꞌimem majta, junuen yumaꞌisi bem juꞌuneeneꞌ betchiꞌbo.
Junuen inim weꞌepulaka Krijtotamak eaka, cheꞌa yumaꞌisia
aꞌ sualeka bem jiapsineꞌ betchiꞌbo.
\v 29 Jiba inia betchiꞌbo, inepo, Krijtota utteꞌata net
aꞌ autuaꞌue, iniat jiapseka, aet bejeꞌewaka jiokot aet
ino bichaka juniꞌi, jiba nee bichau bicha jukaꞌ tekilta
jooa.
\c 2
\p
\v 1 Bweꞌituk inepo, emo betchiꞌbo intok jumeꞌ jum bweꞌu
joꞌara Laoriseaꞌ teaꞌpo joꞌaakame betchiꞌbo, intok siꞌime
jumeꞌ kee nee bit taꞌaame betchiꞌbo, nee Liojta bichapo
aneka, tua unnaa in tekipanoaꞌuta nee enchim aꞌ juꞌuneiyaa
iꞌa.
\v 2 Inien inepo, kaitaꞌpo bem koꞌom eeneꞌ betchiꞌbo
intok nau eaka bem emo nak taꞌaaneꞌ betchiꞌbo intok
Liojta betana suawata, kaitau a tamachiatuka, amet auneꞌ
betchiꞌbo. Junuen Liojta betana, aapoꞌik jiba aꞌ juꞌuneiyaaka,
iniꞌi, jiba aapoꞌik jukaꞌ Krijtota, aꞌ taꞌaaka, ka taꞌabwisi
eaka aet bem yoem eeneꞌ betchiꞌbo iniat nee am nokriakai.
\v 3 Bweꞌituk aapoꞌik Krijtotat aayuk juꞌu kaitau a
tamachiatuka koba suawa, intok siꞌime waꞌa, siꞌimekut
a juꞌuneewaka intok a taꞌeewaka suawa. Iniꞌi aapoꞌikut
essoitaka aayuk.
\v 4 Inepo nee inia betana nee inikaꞌa emou teuwaa, junuen,
inim kaabem, ujyoisi, sual maisi emou nokaka enchim am
bai taꞌaatuaneꞌ betchiꞌbo.
\v 5 Bweꞌituk kannee aman emomak aneka enchim bichaka
juniꞌi, inepo emot eaka, emomak in aneꞌe benasi ne ea.
Intok alleenee emo nasuk siꞌimeku enchim nau eaka jiapsaꞌuta
intok ka taꞌabwisi eaka, Krijtota ka aꞌ koptaka enchim
aꞌ sualeꞌuta enchim juꞌuneiyaakai.
\p
\v 6 Inien san, jiba enchim, yoꞌowe Jesukrijtota aꞌ mabetakaꞌa
benasia, emeꞌe junuen bichau bicha aapoꞌiku mak eaka
enchim jiapsineeꞌu utteꞌa.
\v 7 Emeꞌe, wepulsi aapoꞌikut eaka enchim jiapsaꞌut emo
juꞌuneiyaakai, intok enchim aꞌ sual taꞌaꞌ betchiꞌbo aet
emo utteꞌa jooriakai, intok aapoꞌik junuen enchim jiapsi
iꞌaꞌut, bichau bicha cheꞌa yumaꞌisi aet emo temaineekai,
jiba junaen enchim majtawakaꞌa benasia, emeꞌe jiba Liojta
yoꞌoreka aꞌ bai saekai.
\s Krijtota sualeka, ka bat naataka benasi jiapsiwame
\p
\v 8 Emeꞌe emo suuane, jumeꞌe, bempo bem suawa betana
aꞌ taꞌaaka intok ka lutuꞌuriata weiyaaka, yee nok kobaꞌ
betchiꞌbo bem yee majtaꞌue, iniae ka enchim am bai taꞌaatuabaane.
Bweꞌituk bempo ka Krijtota betana weyeka lutuꞌuriat
eakai, ala, inim bat naataka katriam betana bem taꞌaakaꞌut
intok inim ayuka weyemta betana junuen sualwaka aꞌ taꞌaaka
iniat eaka iniae yee majta.
\p
\v 9 Bweꞌituk Liojta betana, aapoꞌik tokti aꞌ Liojtukaꞌuta,
iniꞌi, kaita beꞌeeka, Jesukrijtotat ayuka bitwaa.
\v 10 Emeꞌe intok, iꞌan Krijtota sualeka aamak eaka jiapsakai,
jinneꞌuimtaka, aapoꞌik Liojta betana weyeme kaita emou
beꞌee. Aapo juꞌu Krijto intok, siꞌime yoꞌo yaꞌuraata
intok nesaweme bepa cheꞌa yoꞌotaka, am saweka am yekame.
\v 11 Ketchia emeꞌe jiba Krijtota mak eaka enchim jiapsaꞌ
betchiꞌbo, iꞌan aapoꞌik betana inien yaꞌarim benasi bitwaa.
Taa iniꞌi, sirkunsisionpo taꞌeewame, ka juꞌu takaapo aꞌ
joowaꞌa benasia weyekai. Ala, emeꞌe juꞌu enchim inim
ka tuꞌi yoemem tukaꞌ betchiꞌbo, ka tuꞌik emot ayuka, enchim
ka tuꞌuwa yaꞌarim betana emeꞌe jiokoiwaka, junuen emou
chupuk. Inile benaka, junaꞌa Krijtota betana weyeka, sirkunsisionpo
taꞌeewame.
\v 12 Emeꞌe, batoꞌowaawakai, junako emeꞌe junae, aapoꞌik
Krijtota mak maꞌatuka intok ketchia junamaꞌa emeꞌe, kokolam
taka, aamak nau jiabijtek. Junuen emeꞌe, Liojta utteꞌata
aet ayuka, Krijtota kokoarim nasuk aꞌ jiabijtetuakaꞌuta
enchim aꞌ sualekaꞌ betchiꞌbo.
\v 13 Emeꞌe bat naataka enchim ka tuꞌuwa yaꞌarim betchiꞌbo
intok emeꞌe junak ka enchim sirkunsiraaroarim tukaꞌ
betchiꞌbo, Liojta bichapo kokolam benasi bitwan. Taa
iꞌan juꞌu Lios, aapoꞌik Krijtota mak jiba yuu jiapsiwamta
emot autuari, siꞌime enchim ka tuꞌuwa yaꞌarimmet enchim
jiokoekai.
\v 14 Aapo juꞌu Lios, jumeꞌ nesauri jiꞌojteim, inia betana
itou utteꞌataka intok inikaꞌa, ama weyemta itom chupaꞌika
jiapsiꞌeaꞌuta ka itom chupaꞌiakaꞌ betchiꞌbo junuen ka
tuꞌisi itom tatawamta, aapo, jukaꞌ itou utteꞌatukaꞌuta
junamaꞌa aꞌ chupuk. Inikaꞌa, Krijtota mak kuuset aꞌ poponakamta
benasi ayukai.
\v 15 Krijto, aapo junuen jum kuuset mukuka, junamaꞌa,
bebejeꞌerita betana siꞌime nesaweme intok yoꞌo yaꞌuraa
utteꞌakame, ama am koobak. Intok aapo junamaꞌa, teekapo
Liojta saweꞌum ankelesim bichapo, junameꞌe, ka am utteꞌakaꞌa
benasi am tawaakai. Inien kuuset aꞌ yaakaꞌue, ka naa
buusti intok utteꞌaka bem tawaneeꞌu am kobakai.
\s Liojta betana weyemtat emeꞌe emo temainee
\p
\v 16 Inien san emeꞌe inim juꞌu jita enchim bwaꞌeeꞌu
oo enchim jeꞌeeꞌu betana, oo pajko taewaim yoꞌoriwame
betana oo bemela metta yejtemta yoꞌoriwamta betana oo
yum joꞌe taewaita yoꞌoriwamta betana, inikaꞌa ka enchim
aꞌ boꞌo jooriaꞌu betana, kaabe iniat lutuꞌuriaka a emot
nokne.
\v 17 Siꞌime iniꞌi weyeme, wepulsi jukaꞌ chukula yeu
weenemta aꞌ teuwaaka joowan. Taa iꞌan juꞌu inia betana
tua lutuꞌuriapo aꞌ teuwaaka weyeme, aapo juꞌu Krijto
junaꞌa.
\v 18 Emeꞌe, wameꞌe inim, bempo aa nokiꞌichiapo tua ka
emo jabeleme benasi jiapsame, intok jumeꞌ ankelesim yee
yoꞌori iꞌame betana, emeꞌe, jukaꞌ Liojta betana, kaitau
a tamachiatuka enchim mabetri, ka enchim aꞌ uꞌaatuabaane.
Bempo, Liojta betana tenkupo benasi emo aꞌ bichaꞌati
jiaka juniꞌi, ka lutuꞌuriata yee majta. Intok inimeꞌe
inim ayuka bem taꞌaakaꞌut jiapseka, emo cheꞌewareka jiapsa.
\v 19 Bempo, bem joaꞌuta ka Krijtota sualeka ka aamak
eaka aꞌ jooa. Juꞌu Krijto, siꞌime jumeꞌ aꞌ sualeme aapoꞌik
takaawata benasi machika, aapo bempoꞌim kobata benaka,
aapoꞌik betana weyemtae am aniaka junaet am yoꞌoturiaka,
intok inimeꞌe, bem jooꞌeaꞌut tekilet, siꞌimem nau am tojaka,
inien Liojta aapoꞌik betana weyemta junaen aꞌ chup iꞌaꞌuta
aꞌ joame.
\p
\v 20 Emeꞌe inim Krijtota mak nau kokokame benasi bitwaa.
Iniat emeꞌe jiba juꞌu inim jachin jiapsiwaka joowamta
betana au joiwaka enchim aꞌ koptakaꞌ betchiꞌbo. Junak
su, jaisaaka emeꞌe ketuni inim kee Krijtota taꞌaame benasi
jiapsibae. Emeꞌe junuen jukaꞌ enchim yoꞌowasukaꞌum betana,
nesauta benaka utteꞌataka joowamta aꞌ joakai.
\v 21 Maa suko emeꞌe: “Inikaꞌa ka bwaꞌane, junakaꞌa
ka jiubaanee intok kia ka aꞌ nuꞌubaekaꞌeenee juniꞌi”,
ti jiia.
\v 22 Inia betana siꞌime juꞌu nesauta benaka joowame,
juꞌu inim sawaawaka intok lauti luꞌu luꞌutemta betana
weye. Intok inim watem betana jiba yee majtawaka intok
nesaurim benakai.
\v 23 Lutuꞌuria ala inile benaka boꞌo jooriawame, Liojta
betana lutuꞌuria taka, suawaekamta benasi aꞌ machiaꞌu.
Bweꞌituk iniat wateku Liojta ae yoꞌoriwamta benak ama
weye, ka emo jabeliwamta betana intok bettesi machika
tekiata ama weye. Taa inia betana, siꞌime iniꞌi, ka tuꞌika
senuk joopeaꞌuta betana junakaꞌa aꞌ suꞌu toji betchiꞌbo,
ka yee aniakai.
\c 3
\p
\v 1 Junuentuko, inien emeꞌe, jaibu Krijtota mak kokoarim
nasuk jiabijtelame benasi bitwakai, emeꞌe, Krijtota teekau
Liojta batatana betana aꞌ katekaꞌu, chukula, kaitau a
tamachiatuka tuꞌika enchim bitneeꞌut emo utteꞌa jooriaka
jiapsine.
\v 2 Emeꞌe, juꞌu jum teekau enchim juꞌuneiyaaꞌuta, ka
koptaika aet jiapsine. Intok inim weyeka, ka tuꞌik ka
eiyaakai.
\v 3 Bweꞌituk emeꞌe inim ka tuꞌik betana, Jesukrijtota
mak enchim kokokaꞌa benasi tawalam. Intok iꞌani emeꞌe,
tua lutuꞌuriapo jiapsiwamta emot ayukaꞌue, aapoꞌik Krijtota
mak nau, teekau Liojta mak emot aayuk.
\v 4 Jiba aapo juꞌu Krijto junaꞌa, juꞌu jiba yuu jiapsiwamta
yetet autuame. Intok chukula, aapoꞌik juchi aꞌabo notteko,
junako emeꞌe ket aamak ama bittune. Intok emeꞌe, aapoꞌik
tua ujyoika intok yoꞌorisi aꞌ machiakaꞌuta, emeꞌe aamak
aꞌ bitne.
\s Juꞌu bat naataka jaisa jiapsiwakaꞌu, intok chukula juꞌu bemelasi jiapsiwame
\p
\v 5 Inien san emeꞌe, siꞌimeta jukaꞌ inim ka tuꞌika enchim
joopeaꞌuta, ka au jiapsame benaka, tokti kaita emot aune.
Kaabe, oꞌoutaka oo jamuttaka, ka emo jubeka emo nau tuꞌurine.
Intok kia jukaꞌ ka tuꞌuwata tiusi machik ka aꞌ joobaane.
Intok kaabe bichau bicha ka tuꞌik betana ama butti eewamta
intok siꞌime ka tuꞌik tuꞌuriwamta intok kia ka weelaꞌpo,
jain juniꞌi jita waatiawamta, inikaꞌa jiba inim taꞌabwi
liosim yoꞌoriwaꞌa benasi weyekai, ka aꞌ weetuane.
\v 6 Jiba inile benaka ka tuꞌik betchiꞌbo, wameꞌe, Liojta
ka aꞌ nok jikkajammeu, aapoꞌik Liojta betana junen juꞌu
tua jiokot yee aꞌ bittuaneeꞌu ameu weye.
\v 7 Emeꞌe intoko ketchia, bat naataka kee Krijtota sualeo,
siꞌimeta inikaꞌa ka tuꞌik aꞌ joaka jiapsan.
\v 8 Taa iꞌani emeꞌe, siꞌimeta inikaꞌa aꞌ suꞌu tojine,
inim jitat kujtiꞌeewamta, intok jukaꞌ seej chukti ama
butti omtiwamta. Intok jukaꞌ ka tuꞌik yeteu eiyaawamta.
Intok ka yee yoꞌoriwaka jaana yeteu nokwamta. Intok
siꞌime ka tuꞌika seej chukti enchim nokꞌeaꞌuta, siꞌimeta
inikaꞌa suꞌu tojine.
\v 9 Emo nasuk ka aa nokiꞌichiata nau nokbaane. Emeꞌe
junuen iꞌan, ka bat naataka benasia inim ka tuꞌisi jiapsiwaꞌa
benasia jiapsakai, intok jukaꞌ bat naataka ka tuꞌik enchim
joo sukaꞌuta junakaꞌa suꞌu tojilam takai.
\v 10 Intok iꞌan emeꞌe, bemelasi, Liojta tuꞌu jiapsie
aniawaka, bemelasi tuꞌik joaka jiapsa. Iniat emeꞌe, aapoꞌik
Liojta, jukaꞌ inien jiapsiwamta emot autuakamta, aꞌ eaꞌpo
aman, aet suatu saka. Junuen emeꞌe, aapoꞌik yumaꞌisi enchim
aꞌ taꞌaaꞌu tajtia.
\v 11 Iꞌan inim, jurio yoem tuwame oo ka jurio yoem tuwame.
Intok kia sirkunsiraaroari taka oo senu ka junuen yaꞌataka,
intok kia inim mekka taꞌabwi yoemra takai intok kia
tekoka jiapsiwame, oo kaabeta tekoka jiapsiwame, siꞌime
iniꞌi kaita teuwaa. Ala inim iꞌan juꞌu Krijto, siꞌimem
betchiꞌbo taka intok jumeꞌ aꞌ sualemmet jiapsa.
\p
\v 12 Aapo juꞌu Lios enchim nakke. Intok aapo, enchim
aapoꞌik yoemiam tuneꞌ betchiꞌbo enchim yeu puꞌari. Junuen
san emeꞌe, inim tua junen jiaka, yeteu tuꞌu jiapseka yee
nak jiokol taꞌaaka jiapsaka, kaitaꞌpo emo cheꞌewareka,
emeꞌe kaabeta betana jitat enchim uttianaaꞌuta jariwakai.
Intok ka seej chukti eaka, a enchim boꞌo bitneeꞌuta, inikaꞌa
emot bit teboka jiapsine.
\v 13 Emo nasuk emeꞌe ka seej chukti eaka, nau tuttuꞌine.
Intok emo nasuk jita nat juꞌuneiyaꞌateko, emo jijiokoine.
Junuen Krijtota, ka tuꞌuwa yaꞌarimmet, aapoꞌik enchim
jiokoekaꞌa benasia, jiba inien emeꞌe a emo jiokoine.
\v 14 Intok siꞌimeta bepa emeꞌe tua emo nak taꞌaaka
jiapsine. Bweꞌituk inien emo nasuk emeꞌe siꞌimekut yumaꞌisi
nau eewamta aet bitne.
\v 15 Intok Krijtota betana juꞌu yanti, ka jain eaka
enchim jiapsaꞌu jiba emot ayuka, inim tuꞌisi enchim jiapsiꞌeaꞌu
junuen jiapsa betchiꞌbo, junae emo aniane. Bweꞌituk jiba
inia betchiꞌbo juꞌu Lios, wepul yoemta benasi aapoꞌik
betana enchim yoemiarim tuneꞌ betchiꞌbo enchim yeu puꞌak.
Intok emeꞌe, siꞌimeku Liojta a bai saune.
\p
\v 16 Juꞌu Krijtota betana bemela nok lutuꞌuria, kaitaꞌpo
emou beꞌeeka, emeꞌe yumaꞌisi aꞌ taꞌaaka, jiba au waateka
jiapsine. Emo nasuk, inia betana siꞌime suawaka ayukamtae
emo majtaka, intok emo nasuk, ka koꞌom eeneꞌ betchiꞌbo
naas emo aniane. Emeꞌe, jumeꞌ salmom teaka bwiknee. Intok
jumeꞌe, Liojta yoꞌori betchiꞌbo bwiikim, Liojtau bicha,
jiba enchim aꞌ bai saeka aꞌ yoꞌoreeꞌuta au aꞌ teuwaaka
bwiknee.
\v 17 Jita juniꞌi enchim joaꞌuta oo jukaꞌ enchim nokaꞌuta,
emeꞌe, siꞌimeta, yoꞌowe Jesukrijtotat eaka aꞌ yoꞌori betchiꞌbo
aꞌ joone. Intok Krijtotat eaka, itom yoꞌowa Liojtau bicha
a nokaka, aapoꞌik bai saune.
\s Krijtota sualeme, jaisa emo bichaka nau am jiapsiꞌeaꞌu
\p
\v 18 Emeꞌe kukunakame, enchim kukunammak tuttuꞌika, am
nok jikkajaka jiapsine. Bweꞌituk iniꞌi emou chaꞌaka,
yoꞌowe Jesukrijtota enchim aꞌ sual taꞌaꞌ betchiꞌbo.
\v 19 Emeꞌe intok jujubekame, jumeꞌ enchim jujubim nakeka,
tuꞌisi amemak jiapsine. Intok emeꞌe, kaitaꞌpo bettesi
amemak katne.
\v 20 Emeꞌe intok yoemiawaim, enchim yoꞌowam, siꞌimekut
am nok jikkajine. Bweꞌituk emeꞌe junuen jiapsaka, yoꞌowe
Jesukrijtota alleetuane.
\v 21 Emeꞌe yoemiakame, enchim yoemiam, kaitaꞌpo bettesi
amemak kateka am omtituabaane, junuen inimeꞌe kaitaꞌpo
siokaka, kaitat emo suꞌu tojirika kia beja bem jiapsineꞌ
betchiꞌbo.
\v 22 Emeꞌe, jumeꞌ inim tetekoka jiapsaka tekipanoame,
jumeꞌ enchim tetekom, inim siꞌimeku am nok jikkajine.
Inimeꞌe ka enchim am bichao jiba, inimeꞌe junuen kia
tuꞌisi ame mak tawa betchiꞌbo jiba, taa ala emeꞌe, Liojta
enchim aꞌ yoꞌori taꞌaꞌ betchiꞌbo, tua aet jiapseka, tekilta
am jooriane.
\v 23 Emeꞌe, kia jita juniꞌi tekilta enchim joaꞌuta, inikaꞌa
ka aꞌ rojiktaka, ala eaka aꞌ joone. Iniat emeꞌe, yoꞌowe
Jesukrijtota tekilta enchim aꞌ jooriaꞌa benasi eaka
intok ka inim jabeta aꞌ jooriaka juꞌuneakai.
\v 24 Inia betana, yoꞌowe Jesukrijtota, teekau tuꞌik enchim
aꞌ bittuaneeꞌut emeꞌe jaibu juꞌuneakai. Emeꞌe Krijtota
junen tekilta jooria, aapoꞌik jukaꞌ lutuꞌuriapo enchim
jikkajaka enchim yoꞌowa.
\v 25 Taa juꞌu ka tuꞌik boꞌo jooriame, junae ka tuꞌik
betchiꞌbo au chupne. Juꞌu Lios intok inim kaabetau weyeka,
siꞌimem nanancha bicha.
\c 4
\p
\v 1 Emeꞌe tekowaim, wameꞌe enchim tetekoka jiapsame
jipueme, amemak tuttuꞌika, siꞌimekut ameu aꞌ lutuꞌuriatukaꞌpo
aman am bitne. Emeꞌe juniꞌi ket, teekau jukaꞌ senuk enchim
jikkajaka emou yoꞌota aꞌ aneꞌepo juꞌuneakai.
\p
\v 2 Emeꞌe, Liojtau bicha jiba enchim nokneeꞌuta ka koptaka,
aet jiapseka aꞌ joone. Intok siꞌimekut, cheꞌa bat, Liojta
aet bai saune.
\v 3 Itom ketchia emeꞌe Liojtau bicha nokriane. Junuen
chukula, Jesukrijtota, jukaꞌ aapoꞌik bemela nok lutuꞌuriata,
intok naa buustia jukaꞌ Krijtota betana weyeka ka juꞌuneiyaawaꞌuta,
inikaꞌa, ka aet bejeꞌewaka in aꞌ teuwaaka intok in yee
aꞌ majtaneeꞌut, yumaꞌisi nee aꞌ anianeꞌ betchiꞌbo. Bweꞌituk
nee jiba inia Liojta betana weyeka nok lutuꞌuriata betchiꞌbo,
inepo inim etaꞌi.
\v 4 Emeꞌe Liojtau bicha nee nokria, junuen inia betana
machisi, intok aꞌ teuwaaꞌeaꞌa benasia in aꞌ teuwaaneꞌ
betchiꞌbo.
\p
\v 5 Emeꞌe, inim jumeꞌ ka Krijtota sualeme nasuk, suasi
emo ujuꞌuka jiapsine. Inien inim inimeꞌe taewaimmet,
ka kia beja jiapsaka, taa Krijtota betana weyemta aꞌ
nokakai.
\v 6 Watemmak etejoka, enchim teuwaaneeꞌu jiba weeꞌpo
jikkaji machika, tuꞌisi yeteu weecheka intok suawane.
Intok emeꞌe inim siꞌime wameꞌe Liojta betana juꞌuneebaeme,
juꞌu enchim am yoopnaneeꞌuta aꞌ taꞌaane.
\s Jiꞌojtesuka juꞌu Paplo am tebotua
\p
\v 7 Juꞌu Krijtopo itomak weri, itom nakeꞌu, Tiikikoꞌ
teame, aapo tekilta, ka aꞌ koptaka nee aniame, intok aapo,
Krijtota betana tekilta weyemta nemak aꞌ yaakame, aapo
aman nee betana weyemta siꞌimeta enchim etejoriane.
\v 8 Jiba inia betchiꞌbo nee aapoꞌik aman emou bittuabae,
junuen aapoꞌik inim juꞌu itom aneꞌu betana enchim aꞌ
etejoriaka, intok aapoꞌik enchim jiapsi joꞌaneꞌ betchiꞌbo.
\v 9 Aapoꞌiku mak ketchia juꞌu seenu, tua itom nakeꞌu
intok yumaꞌisi Krijtota sualeka aapo aman emomak jometaka,
juꞌu Oneesimoꞌ teame aamak weye. Inimeꞌe, bempo siꞌimeta
jukaꞌ inim weyemta aman enchim aꞌ etejoriane.
\p
\v 10 Juꞌu Arijtarkoꞌ teame, in etaꞌipo nemak im katekame,
aapo utteꞌesia enchim tebotua. Intok ketchia juꞌu Maekos,
jukaꞌ Bernabeeꞌ teamta aꞌ chiꞌilaata ouꞌasoa, enchim
tebotua. Emeꞌe jaibu etejoriarim, aapoꞌik Maekojta emou
aꞌ yepsako tuꞌisi enchim aꞌ mabetneꞌpo betana.
\v 11 Ketchia juꞌu senu Jesuj teakame, juꞌu Jujtoꞌoti
taꞌeewame, aapo enchim tebotua. Inimeꞌe, kaabe intoko,
jurio yoemrata betana, Krijtota sualeka, bempo, teekau
Liojta yoꞌotaka aꞌ katekaꞌu betana jukaꞌ nok lutuꞌuriata
nemak yee aꞌ majtalaa. Intok inimeꞌe, nemak anekai, tua
yumaꞌisi nee ou bujtalaa.
\v 12 Juꞌu Epapraaj teame enchim tebotua. Iniꞌi, wepulsi
Krijtota betchiꞌbo jiapsaka aapoꞌik tekilta joame, intok
emomak, emo benasi aman joome. Aapo jiba tua aet jiapseka
Liojtau bicha nokaka, junuen enchim sualeꞌu betana, ka
taꞌabwisi eaka intok jukaꞌ Liojta aꞌ waataꞌpo aman, junuen
wepulsi siꞌimeku enchim jiapsineꞌ betchiꞌbo, enchim nokriakai.
\v 13 Bweꞌituk inia betana inepo, jukaꞌ Epapraajta tua
emot au aꞌ temaeꞌuta intok naa buustia wameꞌe, bwere
joꞌaram Laoriseaꞌ teaꞌpo intok Ieraapolij teaꞌpo joꞌaaka,
Krijtota sualemmet ket tua au aꞌ temaeꞌuta, nee aꞌ bichaka
nee aꞌ teuwaa.
\v 14 Luukas, juꞌu a yee jittoka, tua itom nakeꞌu, enchim
tebotua. Intok ketchia juꞌu Leemaj teame enchim tebotua.
\p
\v 15 Emeꞌe, jumeꞌe, jum bweꞌu joꞌara Laoriseaꞌ teaꞌu
joꞌaaka Krijtota sualeme, itom am tebotuariane. Emeꞌe
ketchia jukaꞌ Nimpajta intok jumeꞌe, inia aapoꞌik joꞌaapo,
Krijtota sualeka nau yaajame, itom am tebotuariane.
\v 16 Emeꞌe, inikaꞌa jiꞌosia jiꞌojteita, emo nasuk aꞌ
noksukai, chukula, bweꞌu joꞌara Laoriseaꞌ teaꞌu, jumeꞌ
aman Krijtota sualeme nasuk aꞌ noknaꞌ betchiꞌbo am aꞌ
bittuane. Emeꞌe intok junaꞌabo bweꞌu joꞌara Laoriseaꞌ
teaꞌa betana jiꞌosiata emou yepsakamta, junammeu in bittuakaꞌuta,
emeꞌe ket aꞌ nokne.
\v 17 Nee betana jukaꞌ Arkiipoꞌ teamta emeꞌe inikaꞌa
aapoꞌik aꞌ etejorianee: “Yoꞌowe Jesukrijtota betana
jukaꞌ aapoꞌik tekilta aꞌ mabetri, ka aꞌ koptaka, yumaꞌisia
aꞌ joone”, ti au jiakai.
\p
\v 18 Inepo Paplo, inim naateka inikaꞌa, chukula weeka
teboteita jiba, nee, inepo in maammea intok in jiꞌojteꞌe
benasia nee iniae enchim tebotua. In etaꞌitukaꞌut emeꞌe
iniat ka nee koptaka neu waatine. Emeꞌe, Liojta betana
tuꞌika enchim alleeneeꞌu emot aune. Tua junuentune.