\id 1TH
\h 1 TESALONISENSEM
\toc1 1 TESALONISENSEM
\mt 1 Tesalonisensem
\c 1
\s Juꞌu Paplo, bweꞌu joꞌara Tesaloonikaꞌ teaꞌpo joꞌaaka Krijtota sualemmeu jiꞌojte
\p
\v 1 Inepo Paplo, juꞌu Silbaanoꞌ teamtamake intok juꞌu
Timoteoꞌ teamtamake, inikaꞌa jiꞌosia jiꞌojteita, jum bweꞌu
joꞌara Tesaloonikaꞌ teaꞌpo, Krijtota sualeka, inimeꞌe
itom yoꞌowa Liojtamak intok juꞌu Jesukrijtotamak eaka
taꞌeewaka nau emo totojame, inikaꞌa nee emou bittua.
Itom yoꞌowa Liojta betana intok itom yoꞌowe Jesukrijtota
betana weyeka, emeꞌe, jukaꞌ emou tuꞌik intok yumaꞌisi
yanti elaka jiapsiwamta te emo tana aꞌ waata.
\s Jumeꞌe, bweꞌu joꞌara Tesaloonikaꞌ teaꞌpo Krijtota sualeme, tuꞌisi bem aꞌ sualeꞌu amet juꞌuneiyaawa
\p
\v 2 Jiba itepo enchim siꞌimem betchiꞌbo, Liojta aet
bai sae. Intok itepo, Liojtau bicha nokaka, jiba enchim
nokria.
\v 3 Itom yoꞌowa Liojta bichapo itepo, iniat tua aapoꞌikut
eaka tekilta enchim joaꞌubeu intok ket, tua enchim aꞌ
nak taꞌaaka, emeꞌe yee aniaka jiapsaꞌubeu intok junuen
ket, yoꞌowe Jesukrijtota betana enchim tuꞌik aet bit
boꞌo bichaꞌu, enchim ka aꞌ koptaꞌubeu waatekai te Liojta
aet bai sae.
\v 4 Emeꞌe, Krijtopo itomak werim, juꞌu achai Lios tua
enchim eiyaa. Intok itepo te juꞌunea, tua aapoꞌik enchim
yeu puꞌariakaꞌu.
\v 5 Bweꞌituk junako, itepo jukaꞌ Krijtota bemela nok
lutuꞌuriata, yee jinneꞌumta enchim aꞌ majtakai, iniꞌi,
ka kia noki ausuꞌlikai emou teuwaawak. Ala ketchia, iniꞌi,
Liojta tuꞌu jiapsi utteꞌata aet ayukaꞌue weyekai. Intok
tua Liojta nok lutuꞌuriata, wepulsi aꞌ lutuꞌuria tukaꞌpo
teuwaaritakai. Emeꞌe tuꞌisi juꞌunea, emo nasuk aneka,
emo betchiꞌbo tuꞌik waataka junuen tuꞌisi itom jiapsakaꞌu.
\p
\v 6 Emeꞌe intok ketchia, emo nasuk aneka, itom jiapsakaꞌa
benasia, intok yoꞌowe Jesukrijtota aapoꞌik jiapsisukaꞌa
benasia aꞌ taꞌaaka, emeꞌe inien jiapsa. Intok emeꞌe juꞌu
alleeri, Liojta tuꞌu jiapsi emot aꞌ autuaꞌue, jukaꞌ bemela
nok lutuꞌuriata aꞌ mabetak. Iniat emeꞌe tua jiokot emo
bichaka juniꞌi.
\v 7 Inien weyeka, chukula, emeꞌe siꞌime wameꞌe jum bwiaara
Maserooniaꞌ teaꞌa betana intok bwiaara Akaayaꞌ teaꞌa
betana Krijtota sualeme, inimeꞌe, emeꞌe juꞌu Krijtota
sualeka tuꞌisi enchim jiapsaꞌue, bempoꞌim emou aꞌ taꞌaatuak.
\v 8 Junamaꞌa, emo betana naatekai, juꞌu Krijtota bemela
nok lutuꞌuria, iniꞌi, ka jum bwiaara Maserooniaꞌ teaꞌpo
intok Akaayaꞌ teaꞌpo jiba, weye. Ala iniꞌi siꞌimekut
mekka tajti yumaꞌalaa. Intok juꞌuneewa, Liojta sualeka,
enchim aet eaka jiapsaꞌuta. Inien san ka utteꞌa emo
betana jita junammeu itom teuwaaneeꞌu.
\v 9 Ala jiba bempo, emo nasuk itom anekaꞌu betana, intok
enchim junuen tua itomak tuꞌika, enchim itom mabetakaꞌu
betana aꞌ teuwaa. Intok ket, tua Liojtamak eaka, jumeꞌ
ka lutuꞌuriapo liosim yoꞌoriwame, junameꞌe enchim am
koptakaꞌpo, junuen jukaꞌ lutuꞌuriapo Lios, jiba yuu jiapsamta,
aꞌ yoꞌoreka enchim jiapsi taitekaꞌpo betana aꞌ teuwaa.
\v 10 Ketchia bempo, tua enchim jukaꞌ Jesujta, Liojta
yoemiata, jiba jukaꞌ aapoꞌik Liojta kokkoarim nasuk jiabijtetuakaꞌuta,
inikaꞌa, teeka betana aꞌabo aꞌ nottineeꞌuta enchim aꞌ
boꞌo bichaꞌu betana aꞌ teuwaa. Aapo Jesus junaꞌa, ka
tuꞌik betchiꞌbo, tua jiokot emo bitnaamta betana juꞌu
yee jinneꞌume.
\c 2
\s Juꞌu tekil, jum joꞌara Tesaloonikaꞌ teaꞌpo, Paplota yaakaꞌu
\p
\v 1 Jiba emeꞌe aꞌ juꞌuneiyaa, Krijtopo itomak werim,
itom aman emomak aneka, juꞌu emo nasuk itom yaakaꞌu, ka
kia beja aꞌ yaꞌawakaꞌpo.
\v 2 Ala itepo, ka binwatuka jum bweꞌu joꞌara Piliipoj
teaꞌpo junuen tiusi jiokot joosuaka juniꞌi, jaibu enchim
aꞌ juꞌuneiyaꞌa benasia, junamaꞌa juꞌu Lios, aapoꞌik betana
jukaꞌ bemela nok lutuꞌuriata, kaitat jain eaka emou itom
aꞌ teuwaaneꞌ betchiꞌbo aet itom aniak. Junuen tua aet
itom bejeꞌewaꞌ nasuk juniꞌi.
\v 3 Bweꞌituk itepo tee, juꞌu itom yee majtaꞌu betana,
katte jiꞌoplamtaka, intok kia itepo, kaita ka tuꞌik weetuabaeka,
intok kaabeta ae bai taꞌaabaeka itepo yee aꞌ majtak.
\v 4 Junuen tuꞌeaka su, ala juꞌu Lios inia betana itou
aꞌ tuꞌureka intok, inia yee jinneꞌuka, aapoꞌik nok lutuꞌuriau
itom yeu puꞌak. Intok itepo, jiba inien tee yee majta.
Itepo, katte inim jabeta alleetuaka ito uttiabaekaꞌea.
Ala itepo, Liojta, jukaꞌ yetet juꞌu itom eaꞌut juꞌuneamta
alleetuabae.
\v 5 Enchim jaibu juꞌuneaꞌa benasia, itepo jakwoo juniꞌi
tee ka itom enchim sual iꞌaka ujyoisi emou nookak. Intok
te kia kaitat jiawiteka tomita emou waatak juniꞌi. Juꞌu
Lios jaibu iniat itot juꞌunea.
\v 6 Itepo jakwoo juniꞌi, inim watem betana yoꞌoriwaka
itom eiyaanaaꞌuta tee ka aꞌ jaiwa. Kia emo betana intok
kia watem betana juniꞌi. Junuen itepo, Krijtota betana
itom naas bittuarim tukaꞌ betchiꞌbo au lutuꞌuriaka, jitaꞌapo
enchim a itot tekipanoaneeꞌu juniꞌi.
\v 7 Ala itepo, katte bettesi emomak jiapsak, taa senu
aewaita, ili aꞌ yoemiam tuꞌisi aꞌ yoꞌoturiaꞌa benasia
enchim eiyaaka enchim bichakai.
\v 8 Itepotee inien tua enchim eiyaa taꞌaakai, itepo,
katte kia jukaꞌ Liojta betana bemela nok lutuꞌuriata
jiba enchim aꞌ majtabaa ean, taa kia emo betchiꞌbo suꞌawak
juniꞌi, te kaachin jiia. Bweꞌituk itepo tua enchim nak
taꞌaasulamtakai.
\v 9 Krijtopo nemak werim, emeꞌesu juꞌunea, aman emo nasuk
anekai, ite ito ania betchiꞌbo, bettesi itom tekipanoakaꞌut.
Junako itepo, taewait intok tukaariat naa buusti te tekipanoak.
Junuen, ketun jukaꞌ Liojta bemela nok lutuꞌuriata itom
enchim aꞌ majtaꞌu tajtia, ka enchim itot obisi eeneꞌ
betchiꞌbo.
\p
\v 10 Jiba emeꞌe, intok kia juꞌu Lios juniꞌi, aꞌ bitlataka
juꞌunea, enchim jumeꞌ Krijtota sualemmak aneka, itepo,
Liojta bichapo aapoꞌik betchiꞌbo jiapsaka, intok wepulsi
lutuꞌuriata boꞌo jooriaka itom jiapsakaꞌu. Junuen emo
nasuk, kaabeta jitat itot nokneꞌ betchiꞌbo.
\v 11 Ketchia emeꞌe juꞌunea tua itom enchim siꞌimem,
ka enchim koꞌom eeneꞌ betchiꞌbo, intok ka taꞌabwisi eaka,
Krijtota enchim yoꞌori taꞌaaneeꞌu betana itom emou nokakaꞌu,
junuen, senu yoꞌowawaita aꞌ yoemiam aꞌ aniaꞌa benasia.
\v 12 Itepotee, inim wameꞌe Liojta betana yoemiarimtaka,
inimeꞌe aapoꞌik betchiꞌbo bem jiapsiꞌeaꞌa benasia, junuen
enchim emo ujuꞌuneꞌ betchiꞌbo tee emou noksuk. Lios,
jiba aapo juꞌu, teekau yoꞌotaka aꞌ katekaꞌu, ujyooria,
jiapsiwamta enchim aamak aꞌ bitneꞌ betchiꞌbo enchim
yeu puꞌakame.
\p
\v 13 Inia betchiꞌbo itepo, jiba Liojta te bai sae. Bweꞌituk
junako, emeꞌe, jukaꞌ Liojta betana bemela nok lutuꞌuriata,
itom enchim majtakaꞌuta, aꞌ jikkajakai, inikaꞌa emeꞌe,
Liojta betana aꞌ nok lutuꞌuria tukaꞌuta, intok ka inim
jabeta betana aꞌ weyeꞌut juꞌuneaka, aꞌ mabetak. Intok,
tua lutuꞌuriapo iniꞌi nok lutuꞌuria Liojta betana weyeka
intok, enchim, jumeꞌ aꞌ sualemmet, taꞌabwisi enchim jiapsituaka
emot yeu machikai.
\v 14 Emeꞌe, Krijtopo nemak werim, junako, chukula emeꞌe,
jumeꞌ emo benasi yoemem, enchim bwiaarapo jomem betana
jiokot emo bichakai, junak, jiba wameꞌe aman bwiaara Jureaꞌ
teaꞌpo Krijtota sualeka, Liojta yoemiam nau yaajame, jiba
junuen bem emo bichakaꞌu benasi emou yeu siika. Bweꞌituk
bempo ket junuen, jiba jumeꞌ ame benasi jurio yoemrata
betana jiokot bitwak.
\v 15 Jiba iniꞌi jurio yoemra junuen jukaꞌ yoꞌowe Jesukrijtota,
kuuset aꞌ poponaka aꞌ meꞌaak. Jiba junuen, bat naataka,
wameꞌe Liojta betana juꞌuneetuawaka nokame ameu bittuarim
bem am suꞌakaꞌa benasia. Itom intok bempo mekka beebak.
Intok inimeꞌe, Liojta bejeꞌeka, ka aꞌ alleetua, intok kia
inim kaabetamak tuttuꞌi.
\v 16 Bweꞌituk, itom, jumeꞌ ka jurio yoememmeu bempoꞌim
ket jinneꞌuim tuneꞌ betchiꞌbo, itom ameu nokbaekaꞌeao,
inimeꞌe ka itom aꞌ joo iꞌaka itom bejeꞌeka aane. Intok
inien aneka, bempo, Liojta bichapo jukaꞌ ka tuꞌik bem
yaꞌari, aꞌ buꞌuuria. Taa iꞌan siꞌimekut chukula, Liojta
betana weyeka jantiachika, jukaꞌ tua jiokot machika bem
bitneeꞌuta ameu yumaꞌalaa.
\s Juꞌu Paplo, jum joꞌara Tesaloonikapo Krijtota sualemmeu, juchi ameu noitibaekaꞌea
\p
\v 17 Krijtopo nemak werim, junakriapo, itepo chuubaa
ka juebena taꞌapo enchim toꞌo sakaꞌalamtakai itepo ka
emomak aneka juniꞌi, jiba te aman emot jiapsekan. Intok
itepo, tua tee juchi aman emomak anpeak.
\v 18 Junamaꞌa itepo emou kat jijiꞌobek. Jiba inepo
Paplo, jaikisi nee aman emou noitibaek, taa juꞌu bebejeꞌeri
junaet ka itom yeu yumaꞌatuak.
\v 19 Bweꞌituk juꞌu itom bit boꞌo bichaꞌu intok tua
itom alleeneeꞌu, intok juꞌu tuꞌik itom bichaka junae
itom ito uttianeeꞌu, jiba emeꞌe junameꞌemtune, chukula
jukaꞌ itom yoꞌowa Jesukrijtota aꞌabo aꞌ notteo.
\v 20 Junuen weye, emeꞌe junameꞌem jumeꞌ jiba betchiꞌbo
itom alleeneeꞌu intok tuꞌik itom bitneeꞌu.
\c 3
\p
\v 1 Junako itepotee ka intok a aet boꞌo bichakai, ite,
jum bweꞌu joꞌara Ateenaj teaꞌpo tee itepola ama tawababaek.
\v 2 Intok junamaꞌa, jukaꞌ Krijtopo itomak werik Timoteoꞌ
teamta enchim aman bitneꞌ betchiꞌbo emou aꞌ bittuabaek.
Bweꞌituk aapo, Liojta betana aꞌ tekilta joaka, itomak
tekipanoaka, Krijtota betana weyemta yee majta. Intok
aapo, junuen, ka koꞌom eaka intok ka taꞌabwisi eaka, Krijtota
bichau bicha enchim aꞌ sualneꞌ betchiꞌbo a enchim ania.
\v 3 Junuen emo nasuk, juꞌu bettesi machik emou weyemta
betchiꞌbo, kaabeta, Krijtota bem sualeꞌu betana bem koꞌom
eeneꞌ betchiꞌbo. Bweꞌituk jiba emeꞌe juꞌunea, inim inile
benakut, jiokot itom ito bitneeꞌut.
\v 4 Junako ketchia, itepo ketun emomak aman anekai, junuen,
inien jiokot itom ito bitneꞌeti jiaka te enchim etejoriak.
Intok iniꞌi tua junuen yeu siika, jiba enchim aꞌ juꞌuneiyaꞌa
benasia.
\v 5 Inia betchiꞌbo junako, inien emot in juꞌuneepeaꞌut
ka intok boꞌo bitpeaka, inepo, Krijtota enchim sualeꞌu
betana tuꞌisi enchim jiapsaꞌuta aman enchim juꞌuneiyaabaekai,
nee senuk aman bittuak. Bweꞌituk inepo, jumak juniꞌi,
juꞌu bebejeꞌeri, jita ka tuꞌikut am jiꞌoptualaa ti eakai.
Intok junuen emo nasuk tekil itom yaꞌari, kia beja yaꞌatunee
ti eakai.
\p
\v 6 Taa iꞌan juꞌu Timoteeoꞌ teame junaman bweꞌu joꞌara
Tesalonikaꞌ teaꞌa betana aꞌabo nottekai, intok aapo emo
betana nokta tuꞌik, Krijtota enchim sualeꞌu betana intok
juꞌu enchim yee nak taꞌaaꞌu betana itom aꞌ juꞌuneiyaatualaa.
Junae betchiꞌbo te tuꞌisi alleaka taawak. Junuen aapo,
tua junen jiaka enchim itom bitpeaka enchim itou waateꞌuta,
itom etejolaa. Jiba junuen itom ket enchim bitpeaꞌa
benasia.
\v 7 Inia betchiꞌbo, Krijtopo itomak werim, itepo, juebena
obisi intok bettesi intok tua itom jiokot ito bichaꞌ
nasuk, itepo, enchim ka taꞌabwisi eaka, Krijtota bichau
bicha enchim sualeꞌu betana juꞌuneaka, yumaꞌisi itom
yanti elaꞌu itot aayuk.
\v 8 Iniꞌi, inien enchim yumaꞌisi, ka taꞌabwisi eaka, Krijtota
enchim sualeꞌuta, enchim itom juꞌuneiyaaꞌu, ito betchiꞌbo
juchi yumaꞌisi jiapsiwame.
\v 9 Junuen san, kaachin tee, itepo, yumaꞌisi aꞌ bai sae
jukaꞌ itom yoꞌowa Liojta, emo betchiꞌbo intok tua yumaꞌisi
alleewamta aapoꞌik betana itot ayukamta betchiꞌbo.
\v 10 Itepo, taewait intok tukaariat juniꞌi, enchim aman
bit betchiꞌbo, Liojta itom aꞌ anianeeꞌu betana, tua junen
jiaka, te au bicha ito nokria. Intok junuen, emomak aneka,
enchim Krijtota sualeꞌu betana, ketun jiokot enchim aet
emo bichaꞌut, enchim aniabaekai.
\p
\v 11 Jiba aapo juꞌu itom yoꞌowa Lios, intok juꞌu itom
yoꞌowe Jesukrijto, a itom aman enchim bitneꞌ betchiꞌbo,
itom aniane.
\v 12 Intok aapo juꞌu itom yoꞌowa, cheꞌa juniꞌi yumaꞌisi,
wepulsi Krijtota enchim sualneeꞌut, intok cheꞌa juniꞌi
yumaꞌisi enchim naas emo nakneeꞌut, intok siꞌimem enchim
nakneeꞌut, enchim aniane. Junuen, itom tuꞌisi enchim nakeꞌe
benasia.
\v 13 Aapo, ka wooi weemtat enchim jiapsineeꞌut, intok
wepulsi Liojta betchiꞌbo jiba, enchim jiapsineeꞌut, enchim
aniane. Intok itom achai Liojta bichapo, ka tuꞌik kaita
yaꞌarikai enchim yeu machineꞌ betchiꞌbo, chukula, aapoꞌik
jukaꞌ itom yoꞌowe Jesukrijtota, siꞌime wameꞌe aamak jiapsaka,
aapoꞌik attearimmak, aꞌabo koꞌom aꞌ notteo.
\c 4
\s Jaisa jiapsiwaka, Liojta ae alleaꞌu
\p
\v 1 Iꞌan intok, Krijtopo nemak werim, yoꞌowe Jesukrijtota
betana lutuꞌuriaka, tee inia betana enchim tejwaaka emou
nokbae, achai Liojta yoꞌoreka, jiba aꞌ alleetuaka enchim
jiapsineeꞌu betana, jiba itom enchim majtakaꞌa benasia,
intok ket iꞌan enchim jiapsaꞌa benasia, jiba junaen, bichau
bicha cheꞌa juniꞌi enchim aet jiapsineꞌ betchiꞌbo.
\p
\v 2 Bweꞌituk emeꞌe aꞌ juꞌuneiyaa, yoꞌowe Jesukrijtota
betana weyemta, aꞌ boꞌo jooriawaꞌuta, aapoꞌik betana aet
tejwaarimtakai, junak jukaꞌ itom enchim majtakaꞌuta.
\v 3 Jukaꞌ achai Liojta emo tana aꞌ waataꞌuta, iniꞌi,
siꞌimeku wepulsi aapoꞌik betchiꞌbo jiba enchim jiapsineeꞌuta
junaꞌa. Kaabe, jamutta ka aꞌ jubeka aamak au tuꞌuribaane.
\v 4 Emeꞌe siꞌime, weꞌepulaka enchim jujubimmak nau, wepulsi
Liojta betchiꞌbo jiba enchim jiapsaꞌuta juꞌuneaka, intok
am yoꞌori taꞌaaka amemak jiapsine.
\v 5 Intok emeꞌe, ka wameꞌe ka Liojta yoꞌori taꞌaaka,
bem jiapsaꞌa benasi jiapsine. Wameꞌe ka tuꞌikut jiapseka,
jain juniꞌi jaamuchim tuꞌureka, amet emo taꞌarume jiapsaꞌa
benasia.
\v 6 Emo betana kaabe junuen, inien weyemta betana jukaꞌ
Krijtopo aamak werik bai taꞌaabaane. Bweꞌituk itom jaibu
enchim tejwaari benasia, juꞌu itom yoꞌowa Lios, siꞌime
inile benakut, tua bettesi yee jiokot emo bittuane.
\v 7 Bweꞌituk juꞌu Lios, ka jukaꞌ tua tiusi machik ka
tuꞌik itom joaka jiapsineꞌ betchiꞌbo itom yeu puꞌak.
Ala wepulsi aapoꞌik betchiꞌbo jiba, tuꞌik joaka itom
jiapsineꞌ betchiꞌbo.
\v 8 Junuen san, juꞌu, inikaꞌa yee majtawamta, ka aꞌ mabetaka,
omola aꞌ tawaame, ka inim jabeta, ala jukaꞌ Liojta inien
bitne, aapoꞌik jukaꞌ aꞌ tuꞌu jiapsiwata itot autuaritae,
wepulsi ae betchiꞌbo jiba itom jiapsituamta.
\p
\v 9 Taa inikaꞌa Krijtopo nau werim nasuk emo nakꞌeewamta
betana, inepo kaita nee a emou jiꞌojte. Bweꞌituk jiba
aapo juꞌu Lios inia betana, emo nasuk enchim naas emo
nakneeꞌut enchim aet juꞌuneetuari.
\v 10 Bweꞌituk emeꞌe su, siꞌime jumeꞌ Krijtopo emomak
werim, siꞌimekut jum bwiaara Maserooniaꞌ teaꞌpo joomem,
jiba inien am nake. Taa junuen taka juniꞌi Krijtopo
itomak werim, itepo inia betana enchim emo nak taꞌaaꞌuta
cheꞌa juniꞌi emo nasuk aꞌ auneꞌ betchiꞌbo te emou nooka.
\v 11 Emeꞌe inim kaitat jain eaka intok weꞌepulaka, emou
aukamtat jiba emo temaeka, enchim jiapsineeꞌuta jariune.
Emeꞌe enchim maammea tekipanoakai, jiba inia betana itom
enchim tejwaalatukaꞌa benasia.
\v 12 Junuen, siꞌimem betana, jumeꞌ ka Krijtota sualeme
betana tuꞌisi enchim bitnaꞌ betchiꞌbo, intok junuen kaitaꞌpo
enchim jiokot eeneꞌ betchiꞌbo.
\s Jukaꞌ Jesukrijtota jaisa aꞌ yebijneeꞌu
\p
\v 13 Krijtopo itomak werim, wameꞌe Krijtota sualeka
kokkokame chukula jukaꞌ ameu yeu weamaꞌu betana, inikaꞌa
tee enchim juꞌuneiyaa iꞌa, junuen ka enchim siokꞌeeneꞌ
betchiꞌbo, wameꞌe waatem, ka Krijtota sualeme aneꞌe benasia.
Inimeꞌe, chukula bem bitneeꞌut ka juꞌuneiyaame.
\v 14 Junuen itepo, jukaꞌ Jesujta mukilataka intok juchi
kokkoarim nasuk aꞌ jiabijtekaꞌuta aꞌ sualekai, ket jiba
junaen itepo, jukaꞌ Liojta, chukula Jesujta notteo, wameꞌe
aapoꞌik inikaꞌa sualeka kokkokame, aamak kat betchiꞌbo,
inimeꞌe aꞌ jiabijtetuaneeꞌuta.
\p
\v 15 Inia betchiꞌbo san, itepo inikaꞌa, jiba Jesukrijtota
betana aꞌ jikkajilamtakai, emou aꞌ teuwaa. Inikaꞌa, itom
jumeꞌ chukula aapoꞌik yoꞌowe Jesukrijtota aꞌabo aꞌ notteꞌu
tajtia inim jiapsame, itepo, katte jumeꞌ Krijtota sualeka
kokkolam bepat bat teekau jikau itom nuk sakaꞌanaaꞌuta
bitnee.
\v 16 Bweꞌituk jiba aapo juꞌu itom yoꞌowe Jesukrijto,
teeka betana, yoꞌo nesawekai, intok senu ankel yaꞌut, intok
Liojta betana sisiꞌiwook kusiata jiutuaka aꞌabo nottine.
Junako, wameꞌe Krijtota suaheka kokkolame, inimeꞌe, kokkoarim
nasuk cheꞌa bat jiabijtene.
\v 17 Inimmet chukula, itepo jumeꞌ ketun inim tawaka
inim jiapsame juniꞌi, inimeꞌe bempoꞌimmak nau itepo namummeu
jikau toboktanaa. Intok junuen itepo junaman jekapo,
yoꞌowe Jesukrijtota koꞌom weyemtau nanki betchiꞌibo.
Junuen itepo, yoꞌowe Jesukrijtotamak jiba betchiꞌbo aamak
jiapsine.
\v 18 Inia betchiꞌbo emeꞌe, inia teuwaaritae emo nasuk
kaabeta koꞌom eeneꞌ betchiꞌbo, emo jiapsi joaka nau aꞌ
teuwaa sakane.
\c 5
\p
\v 1 Taa inikaꞌa inia betana jita taꞌapo aꞌ yumaꞌaneeꞌu
betana oo jita wasuktiatchi, Krijtopo nlmak werim, ka
utteꞌa inia betana in emou jiꞌojteneeꞌu.
\v 2 Emeꞌe inia betana tuꞌisi juꞌunea jukaꞌ taewaita,
yoꞌowe Jesukrijtota aet aꞌabo aꞌ nottineꞌuta, tua ka
au waatiwao aꞌ yumaꞌaneꞌpo, juꞌu jita eꞌetbwamta, jita
etbwabaeka tukaapo weyeꞌe benasia.
\v 3 Junako jukaꞌ yoemrata: “Iꞌan inim, yanti jiapsiwame
ausuꞌli intok kaita jinilwame”, ti am jiao, junak junamaꞌa
seej chukti, inimmeu, tua jiokot luꞌutekame benasi, a bem
jinneꞌuimtuneeꞌuta jiba betchiꞌbo aꞌ taꞌarune. Jiba
jumeꞌ wantiam, jamutta yeu kiktebaemtau yumakaꞌa benasia
intok inimeꞌe kaachin ama yoꞌeene.
\v 4 Taa emeꞌe, Krijtopo nemak werim, jiba inia betana,
machiku aneme benaka, jaibu inia betana aꞌ juꞌuneiyaa,
junuen jukaꞌ taewai, Jesukrijtota aet aꞌabo aꞌ yebijneeꞌuta
ka enchim aꞌ etbwa nuꞌuneꞌ betchiꞌbo.
\v 5 Bweꞌituk siꞌime emeꞌe, Liojta betana nok lutuꞌuriata
juꞌuneaka intok tuꞌik boꞌo jooriaka jiapsaka, emeꞌe, taewai
machiku jiapsame bena. Katte tukaapo ka machiku jiapsame
bebena.
\v 6 Inia betchiꞌbo katte inim ka juꞌuneame benasi, kia
beja jiapsine, jumeꞌ waatem ka Krijtota sual taꞌaaka,
kokocheme benasi jiapsaꞌa benasia. Ala itepo, Liojta
bichapo ka tuꞌikut ito suuane. Intok inim juꞌu itom
jiapsaꞌu betana, ka yeupo benasi aꞌ eiyaakai, oo kia kokocheme
benasi anekai.
\v 7 Maa su, jumeꞌ kokkocheme, tukaapo kokkoche. Jumeꞌ
intok nanaakome, inimeꞌe tukaariat nanaako.
\v 8 Taa itepo, Krijtota betana nok lutuꞌuriat juꞌuneaka,
itepo taewai machiku jiapsame benaka, itepo inim itom
jiapsaꞌut, ka yeupo benasi aꞌ eiyaane. Itepo, Jesukrijtota
sual taꞌaaka intok inim yee nak taꞌaaka, iniae te ito
suuane, junuen jukaꞌ sontaota, nassuabaeka, sisiꞌiwookie
tawit ae au aꞌ aniaꞌa benasia. Intok itepo, ketun inim
jiapsaka, ka tuꞌik betana itom jinneꞌurimtuneeꞌut boꞌo
bitne. Iniꞌi ito betchiꞌbo, juꞌu sisiꞌiwook moꞌobeꞌi,
sontaota kobat ae au aꞌ aniakaꞌu benakai.
\v 9 Bweꞌituk juꞌu Lios, ka juꞌu chukula tua jiokot yee
aꞌ bittuaneeꞌu betchiꞌbo itom yeu puꞌari. Ala aapo, yoꞌowe
Jesukrijtota yaakaꞌue, itom jinneꞌuimtuneeꞌuta itom aꞌ
bitneꞌ betchiꞌbo itou aꞌ chupak.
\v 10 Aapo juꞌu itom yoꞌowa Jesukrijto, ito betchiꞌbo
aꞌ jiapsi nenkak, junuen, aapoꞌik notteo jumeꞌ ketun inim
jiapsame intok kia jumeꞌ kokkosukame juniꞌi, jiba betchiꞌbo
aapoꞌikumak nau itom jiapsineꞌ betchiꞌbo.
\v 11 Inia betchiꞌbo emeꞌe, emo nasuk, kaabeta koꞌom eeneꞌ
betchiꞌbo intok siꞌimem junuen cheꞌa yumaꞌisi Krijtota
enchim sualneꞌ betchiꞌbo emo ania sakane, iꞌan tajtia
enchim aꞌ joaꞌa benasia.
\s Juꞌu Paplo jumeꞌ Krijtopo nau werim sua tejwaa
\p
\v 12 Krijtopo itomak werim, jumeꞌ emou yoꞌowem intok
emo nasuk tekipanoaka, Krijtota betana weyemtat enchim
aniaka intok tuꞌisi enchim jiapsineeꞌu betana emou nokame,
inimeꞌe, enchim am yoꞌori taꞌaaneꞌ betchiꞌbo te emou
nooka.
\v 13 Intok emeꞌe, inimeꞌe, tuꞌisi am bichaka tua am nakne,
bempoꞌim jukaꞌ tekilta bem joaꞌu betchiꞌbo am eiyaakai.
Siꞌime emeꞌe nau tuttuꞌika, alleaka nau jiapsine.
\p
\v 14 Ketchia Krijtopo itomak werim, ikaꞌa te enchim
yaꞌa iꞌa. Wameꞌe kaita joaka jiapsibaeme, emeꞌe ameu
nokne. Wameꞌe mammajeka, koꞌom eame intok wameꞌe, Krijtota
sualeka taa kee tuꞌisi aet utteꞌitume, junae betana am
aniane. Intok emeꞌe, ka seej chukti eaka, siꞌimemmak tuttuꞌika
a boꞌo bitne.
\v 15 Iniat emeꞌe emo suuane, ka tuꞌik nat notnottawamta
aꞌ kaitatuneeꞌutchi. Ala emeꞌe siꞌime, emo nasuk tuꞌik
enchim emo joorianeeꞌut, intok inim siꞌime jiapsame, naas
inien enchim am bitneeꞌut jiapsine.
\v 16 Enchim jiba yumaꞌisi alleaka jiapsineeꞌu emot
aune.
\v 17 Emeꞌe, Liojtau bicha jiba enchim nokneeꞌuta, ka
aꞌ koptane.
\v 18 Emeꞌe, siꞌimeta jukaꞌ emou weyemta betchiꞌbo, Liojta
aet bai saune. Bweꞌituk inien weyeka junaꞌa, juꞌu, achai
Liojta, jumeꞌ Krijtota sualeme aꞌ joo iꞌaꞌu.
\v 19 Emeꞌe, Liojta tuꞌu jiapsita, aapoꞌik emo nasuk juꞌu
tuꞌikue au aꞌ juꞌuneiyaa teboꞌu betana, emeꞌe ka aꞌ bejeꞌeka
ka aꞌ luꞌutituane.
\v 20 Emeꞌe, wameꞌe Liojta betana juꞌuneetuawaka nokame,
jukaꞌ bempoꞌim emou nokaꞌuta, ka jak waꞌam aꞌ eiyaaka
aꞌ jikkajine.
\v 21 Inia betana, emeꞌe, siꞌimeta jukaꞌ enchim jikkajaꞌuta,
aet suuane. Intok inia betana emeꞌe, wakaꞌa ama cheꞌa
tuꞌi machik aamak tawane.
\v 22 Emeꞌe, siꞌimeta, jita juniꞌi, jukaꞌ ka tuꞌik betana,
ka aꞌ eiyaane.
\p
\v 23 Jiba aapo juꞌu achai Lios, yanti elaka jiapsiwamta
yee bittuame, aapo, tuꞌik ausuꞌlik emchim boꞌo jooriaka,
wepulsi yumaꞌisi aapoꞌik betchiꞌbo enchim jiapsineeꞌut
enchim aniane. Intok ket aapo, Jesukrijtota juchi aꞌabo
aꞌ notteꞌpo tajtia, enchim jiapsi intok enchim tuꞌiꞌeeri
intok enchim takaa, yumaꞌisia, jita ka tuꞌik kaita emot
ayukai, ae bichapo enchim anneꞌ betchiꞌbo enchim aniane.
\v 24 Aapo juꞌu Lios, aapoꞌiku bicha enchim yeu puꞌakame
siꞌimekut a yoem eiyaatu. Intok aapo, siꞌimeta inia betana
inien emou aꞌ chupne.
\s Jiꞌojtesuka am tebotua intok Liojta betana ameu tuꞌik aꞌawa
\p
\v 25 Krijtopo itomak werim, Liojtau bicha emeꞌe itom
nokriane.
\p
\v 26 Siꞌime jumeꞌ Krijtopo itomak werim, itom am ibaktariaka,
itom am tebotuariane.
\p
\v 27 Yoꞌowe Jesukrijtota betana lutuꞌuriaka, inepo nee
inikaꞌa jiꞌosia jiꞌojteita, siꞌime jumeꞌ Krijtota sualemmeu
enchim aꞌ nokneꞌ betchiꞌbo nee emou ujbwana.
\p
\v 28 Aapo juꞌu itom yoꞌowe Jesukrijto, aapoꞌik betana
jukaꞌ emou tuꞌik enchim aꞌ bittuane. Tua junuentune.