\id 2TH
\h 2 TESALONISENSEM
\toc1 2 TESALONISENSEM
\mt 2 Tesalonisensem
\c 1
\s Juꞌu Paplo, bweꞌu joꞌara Tesaloonikaꞌ teaꞌpo Krijtota sualemmeu juchi ameu jiꞌojte
\p
\v 1 Inepo Paplo, juꞌu Silbaanoꞌ teamtamake intok juꞌu
Timoteoꞌ teamtamake, inikaꞌa jiꞌosia jiꞌojteita, jum bweꞌu
joꞌara Tesalonikaꞌ teaꞌpo, Krijtota sualeka, inimeꞌe itom
yoꞌowa Liojtamak intok juꞌu itom yoꞌowe Jesukrijtotamak
eaka taꞌeewaka nau emo totojame, inikaꞌa nee emou bittua.
\v 2 Itom yoꞌowa Liojta betana intok itom yoꞌowe Jesukrijtota
betana weyeka, emeꞌe jukaꞌ emou tuꞌik intok yumaꞌisi
yanti elaka jiapsiwamta te emo tana aꞌ waata.
\s Jesukrijtota juchi aꞌabo notteko, juꞌu Lios, jumeꞌ ka tuꞌisi aulame, junae betchiꞌbo ka tuꞌisi am tawaanee
\p
\v 3 Krijtopo itomak werim, itepo emo betchiꞌbo, jiba
tee Liojta aet bai saune. Inikaꞌa itom aꞌ boꞌo joorianeeꞌuta
itou aꞌ lutuꞌuriatukaꞌpo amani. Bweꞌituk iniꞌi, Krijtota
enchim sualeꞌu, cheꞌa juniꞌi yumaꞌisi emot ayukai. Intok
emo nasuk, weꞌepulaka enchim naas emo nak taꞌaaꞌu, cheꞌa
juniꞌi yumaꞌisi emot ayukai.
\v 4 Inien san jiba itepotaka, siꞌimekut, Liojta yoemiam
teꞌopom bem nau aneꞌepo, itepo alleaka te emo betana
weyemta eꞌetejo. Emou suawaka intok siꞌime jukaꞌ tua
enchim jiokot emo bichaꞌ nasuk juniꞌi, ka jain eaka a
boꞌo bichaka intok cheꞌa juniꞌi yumaꞌisi Krijtota enchim
aꞌ sualeꞌu emot ayukamta betchiꞌbo.
\v 5 Iniꞌi inien weyekai, jukaꞌ Liojta siꞌimeta aꞌ joaꞌuta,
aꞌ lutuꞌuriatukaꞌpo aman aꞌ weetuaꞌpo aꞌ teuwaa. Junuen
junaman aapoꞌik cheꞌa yoꞌotaka aꞌ katekaꞌu aamak enchim
jiapsineeꞌuta iniae emou aꞌ lutuꞌuria yaakai. Emeꞌe
ket jiba inia betchiꞌbo su inim jiokot emo bicha.
\p
\v 6 Bweꞌituk inia betana, jukaꞌ Liojta jumeꞌ jiokot
enchim emo bittuame, chukula aapoꞌik ket junameꞌe jiokot
emo am bittuaneeꞌu betana lutuꞌuriak.
\v 7 Enchim intok, jiokot emo bichame, inia betana enchim
yum joꞌerianee intok inien kia itom juniꞌi, chukula junako
taewait jukaꞌ itom yoꞌowe Jesukrijtota teeka betana,
bweꞌu taobiapo, wameꞌe aꞌ saweꞌum, yoꞌo nesaweka aꞌ ankelesimmak
aapoꞌik aꞌabo koꞌom notteo.
\v 8 Aapo inim, wameꞌe, Liojta aꞌ jabe tukaꞌuta ka aꞌ
taꞌaame intok kia wameꞌe, jukaꞌ Krijtota betana bemela
nok lutuꞌuriata juniꞌi, ka aꞌ nok jikkajibaeme, inimeꞌe
tua jiokot bem emo bitneeꞌuta ameu aꞌ chupaꞌ betchiꞌbo
juchi aꞌabo nottine.
\v 9 Inimeꞌesan, jiba betchiꞌbo ka tuꞌisi tawalamtaka
taji jiba yuu beeteꞌpo jiokot emo bitne. Intok inimeꞌe,
yoꞌowe Jesukrijtota yoꞌorisi maisi intok cheꞌa yoꞌo
nesaweka aꞌ jiapsaꞌuta, kia jakwoo juniꞌi ka aꞌ bitneekai.
\v 10 Iniꞌi inien yeu weene, junako juꞌu taewai Jesukrijtota
aꞌabo notteka, junuen wameꞌe aapoꞌik yeu puꞌarim betana
yoꞌorinaakai intok siꞌime jumeꞌ aapoꞌik sualeme betana
eiyaawakai. Emeꞌe junamemak tunee bweꞌituk emeꞌe, jukaꞌ
Liojta betana nok lutuꞌuriata itom emou teuwaakaꞌuta
aꞌ sualekai.
\p
\v 11 Inia betchiꞌbo itepo jiba weeꞌpo te Liojtau bicha
enchim nokria, junuen, jiba aapoꞌik betana, juꞌu enchim
au yeu aꞌ puꞌakaꞌut jiapseka, enchim aet yeu yumaꞌaneeꞌut
aapoꞌik enchim anianeꞌ betchiꞌbo. Intok ketchia, itepo,
aapoꞌik Liojta siꞌimeta jukaꞌ tuꞌik enchim joopeaꞌut
intok jukaꞌ tekilta, Liojtat eaka inim enchim boꞌo jooriaꞌut,
aapoꞌik a jita aꞌ joaꞌue, junaet enchim aꞌ anianeꞌ betchiꞌbo
te enchim nokria.
\v 12 Intok junuen enchim tuꞌisi jiapsaꞌ betchiꞌbo, juꞌu
itom yoꞌowa Jesukrijto, sualwaka tua yoꞌorinaa. Emeꞌe
intok ket naa buustia, aapoꞌik betchiꞌbo watem betana
yoꞌorinaa. Iniꞌi, itom yoꞌowa Liojta intok jukaꞌ yoꞌowe
Jesukrijtota tua yee am nak jiokoleꞌ betchiꞌbo inien
emou chupia.
\c 2
\s Juꞌu oꞌou ka tuꞌik boꞌo joorianeeme
\p
\v 1 Iꞌan intoko emeꞌe, Krijtopo itomak werim, chukula
yoꞌowe Jesukrijtota juchi aꞌabo notteka, junak aamak
itom aꞌ weiyaaneeo taewaita betana te enchim aet tejwaabae.
\v 2 Krijtota enchim aꞌ sualeka, enchim jiapsaꞌu betana,
ka taꞌabwisi enchim eeneꞌ betchiꞌbo te emou nooka. Intok
kia jukaꞌ tenkupo benasi Liojta betana weyemta benaka
juniꞌi, intok kia nau anwaꞌapo jita emou nokwamta jikkajaka
juniꞌi, intok kia jiꞌosia jiꞌojteita ito tana aꞌ weyeꞌebenaka
mabetako juniꞌi, inikaꞌa, jukaꞌ itom yoꞌowa Jesukrijtota
aapoꞌik aꞌabo aꞌ nottineeꞌuta taewaita jaibu aꞌ yumaꞌasukaꞌu
ti aꞌ teuwaawao, ka am sualeka ka am majjaune.
\v 3 Kia jachin weyeka juniꞌi, emeꞌe ka emo bai tattaꞌaa
tebone. Bweꞌituk inikaꞌa taewaita kee aꞌ yumao, utteꞌa
inien yeu aꞌ weeneeꞌu. Inim siꞌimekut unnaa jumeꞌ Liojta
bejeꞌeka jiapsame annee. Junak intok senu oꞌou yeu machinee
ka yaꞌuraaka intok Liojta bichapo tua ka tuꞌik joakai.
Iniꞌi, chukula, ka tuꞌikun bicha taji jiba yuu beeteꞌu
naꞌikiaritakai.
\v 4 Iniꞌi junaꞌa, juꞌu siꞌimeta jukaꞌ Liojta betana
weyemta oo kia aapoꞌik betana weyeka yoꞌoriwamta aꞌ
bejeꞌeka jiapsame. Intok iniꞌi, aapo aꞌ Lioj tukaꞌa benasia,
Liojta bweꞌu teꞌopopo juniꞌi yejteneekai, jiba aapo au
Lios yaꞌarikai.
\p
\v 5 Junako inepo ketun aman emomak anekai, inikaꞌa inia
betana nee siꞌimeta emou teuwaak. Jaisa emeꞌe ka au
waate jaꞌani.
\v 6 Intok iꞌan emeꞌe juꞌunea jabeta aawas aneꞌu, junuen
junakaꞌa, jukaꞌ taewaita aapoꞌik aet yeu machineeꞌuta
kee aꞌ yumao junuen ka yeu aꞌ machiatuamta.
\v 7 Bweꞌituk jukaꞌ bebejeꞌerita juꞌuneiyaaka inim aꞌ
yaꞌabaeꞌu, watek jaibu weye. Iꞌan, kia waꞌa aawas aneka
intok ka siꞌimeta aꞌ jootuame, iniꞌi inim aꞌabo nuꞌunaaka
jiba beꞌee.
\v 8 Junak intok waꞌa oꞌou, Liojta bejeꞌeka tua ka tuꞌik
joame yeu machine. Inikaꞌa, juꞌu yoꞌowe Jesukrijto aꞌabo
yebijpat aꞌ jiabijteꞌu jekae aꞌ meꞌene. Intok ket, jiba
aapo inim aꞌ jiapsaꞌue, inikaꞌa, siꞌimeta aapoꞌik betana
utteꞌa weyemta aꞌ luꞌutane.
\v 9 Iniꞌi oꞌou yeu machineeme, bebejeꞌerita betana sawaka
intok iniꞌi, tua utteꞌaka, ka a jootu machik, a jita aꞌ
joaꞌue, yee ae bai taꞌaaka yebijne.
\v 10 Iniꞌi, juebenaka, siꞌime ka nanau machik ka tuꞌik
joone, junae jumeꞌ jiba betchiꞌbo ka tuꞌisi tawaneeme,
am bai taꞌaabaekai. Inimeꞌe beja su, jukaꞌ ae bem jinneꞌuimtuꞌeaꞌuta,
jukaꞌ Krijtota betana nok lutuꞌuriata, ka aꞌ jikkajaka
intok ka aꞌ mabetbaekai.
\v 11 Intok inia betchiꞌbo, juꞌu Lios junakaꞌa tua ka
lutuꞌuriata am sualtuaka junae emo bai taꞌaane.
\v 12 Junuen, siꞌime wameꞌe, jukaꞌ Liojta betana lutuꞌuriata
ka aꞌ waataka ka aꞌ sualbaekame, taa inimeꞌe, jukaꞌ ka
tuꞌik cheꞌa eiyaame, ka tuꞌisi am tawaanaꞌ betchiꞌbo.
\s Jumeꞌe, bem jinneꞌutunaꞌ betchiꞌbo yeu puꞌarim
\p
\v 13 Taa itepo, jiba tee emo betchiꞌbo Liojta aet bai
saunee Krijtopo itomak werim, intok achai Liojta betana
tua nakwame. Bweꞌituk juꞌu Lios, aapoꞌik betana aꞌ tuꞌu
jiapsie, aapoꞌik betchiꞌbo wepulsi enchim jiapsituamtae
intok jukaꞌ Krijtota betana bemela nok lutuꞌuriata enchim
aꞌ sualeꞌue, enchim jinneꞌuimtuneꞌ betchiꞌbo, cheꞌa bat
taewaimmet naateka enchim yeu puꞌari.
\v 14 Inia betchiꞌbo juꞌu Lios enchim yeu puꞌari inien,
juꞌu Jesukrijtota bemela nok lutuꞌuriae, itom enchim
majtakaꞌue, junuen enchim, jukaꞌ itom yoꞌowa Jesukrijtota,
aapoꞌik tua yoꞌo nesaweka, yoꞌorisi aꞌ katekaꞌu, juꞌu
kaitau a tamachiatuka tuꞌik, aamak enchim aman aꞌ bitneꞌ
betchiꞌbo.
\p
\v 15 Junuen san, emeꞌe Krijtopo itomak werim, jukaꞌ emot
autuarita, ka taꞌabwisi eaka aꞌ sualne. Intok emeꞌe, junak
emomak aneka, wakaꞌa itom enchim majtai, intok ket kia
wakaꞌa ae betana itom emou jiꞌojtekaꞌuta juniꞌi, ka aꞌ
koptane.
\v 16 Jiba aapo juꞌu itom yoꞌowa Jesukrijto intok juꞌu
itom achai Lios, juꞌu tua yee aꞌ nak jiokoleꞌ betchiꞌbo
itom nakeme intok jiba betchiꞌbo, aapoꞌik itom yanti
elneeꞌuta itot aꞌ autuakai intok chukula itom bitneeka
aet itom boꞌo bichaꞌuta itou chuplame,
\v 17 aapo enchim jiapsi joꞌanee intok ketchia siꞌimeta
jukaꞌ tuꞌik enchim teuwaaneeꞌuta intok tuꞌik enchim
jooneeꞌu betana, enchim aniane.
\c 3
\s Juꞌu Paplo, Liojtau bicha am nokria iꞌa
\p
\v 1 Iꞌan intoko iniꞌi jiba, Krijtopo itomak werim, Liojtau
bicha emeꞌe itom nokriane, junuen, jukaꞌ Krijtota betana
bemela nok lutuꞌuriata, lauti siꞌimekut aꞌ teuwaatuneꞌ
betchiꞌbo intok inikaꞌa, emo nasuk yeu aꞌ sikaꞌa benasia,
tua eiyaawaka aꞌ mabettuneꞌ betchiꞌbo.
\v 2 Intok ketchia, Liojtau bicha emeꞌe itom nokriane,
jumeꞌ ka tuꞌi yoemem betana intok jumeꞌ tua ka tuꞌisi
jiapsame betana itom ama yoꞌeneꞌ betchiꞌbo. Bweꞌituk
ka siꞌime Liojta sual taꞌaa.
\v 3 Taa juꞌu itom yoꞌowa Lios, aꞌ teuwaaꞌut a yoem eiyaatu.
Aapo emomak tune, kaitaꞌpo enchim jiꞌopneꞌ betchiꞌbo
intok juꞌu bebejeꞌerita betana enchim suuane.
\v 4 Intok Liojtat itepo ea, jukaꞌ enchim aꞌ jooneꞌ betchiꞌbo
itom enchim majtakaꞌuta, enchim aꞌ joaꞌapo, intok kia
chukula bicha juniꞌi enchim aꞌ jooneeꞌuta.
\v 5 Jiba aapo juꞌu achai Lios, aapoꞌik yee aꞌ nakeꞌe
benasi, ket junuen enchim yee nakneꞌ betchiꞌbo, intok
ket, Krijtota siꞌimeta aꞌ inneꞌakaꞌa benasia enchim ket
a boꞌo bitneꞌ betchiꞌbo enchim aniane.
\s Kaabe kia beja kaita joaka jiapsinee
\p
\v 6 Krijtopo itomak werim, itepo, yoꞌowe Jesukrijtota
betana lutuꞌuriaka, itepo iniat te emou nooka, enchim
inim, kia jabe taka juniꞌi, Krijtota sualeka, inikaꞌa kaita
joaka jiapsibaemta mak, intok ketchia, emomak aneka jukaꞌ
Liojta betana weyemta itom enchim majtai, ka inikaꞌa
tua aꞌ weyeꞌpo aman jiapsibaemta mak, kaitaꞌpo enchim
aamak eaꞌuta aꞌ juꞌuneiyaaneꞌ betchiꞌbo, ka aamak emo
tuꞌurine.
\v 7 Bweꞌituk emeꞌe juꞌunea tuiꞌisi enchim jiapsaka,
jiba emo nasuk itom jiapsisukaꞌa benasia, junuen enchim
jiapsineꞌ betchiꞌbo. Itepotee ka kia beja emo nasuk
jiapsak kaita joakai.
\v 8 Intok te kaabetau kia beja jiꞌibwak. Jiba te aꞌ
bejeꞌetuak. Ala itepo, taewait intok kia tukaariat juniꞌi,
lotteka intok tua tekipanoaka, te ito aniak. Junuen emo
betana kaabeta itot obisi eeneꞌ betchiꞌbo.
\v 9 Junuen itepo enchim itom anianeeꞌu betana emou
nokneeka lutuꞌuriaka juniꞌi, jiba itepo tee tekipanoak.
Itepo junuen aayuk iniat enchim itou aꞌ taꞌaaneꞌ betchiꞌbo.
\v 10 Bweꞌituk junak itepo emomak anekai, itepo inen
weyemta betana emou nokaka enchim aet tejwaak, intok:
“Waꞌa ka tekipanoabaeme, ket ka jiꞌibwane”, ti jiakai.
\v 11 Bweꞌituk emo betana waatem, ka tekipanoaka jiapsame
intok inimeꞌe, ka bem nokꞌeaꞌuta jiba yetet nok sasakame,
intok ka bem au yeu puꞌari betana kimume itepo am juꞌuneiyaalaa.
\v 12 Jumeꞌ inien emo jipueme itepo, itom yoꞌowe Jesukrijtota
betana lutuꞌuriaka, inikaꞌa te am tejwaa, inimeꞌe inia
betana, suasi emo jipueka intok tekipanoaka, bem kobaꞌue
am jiapsineꞌ betchiꞌbo.
\p
\v 13 Krijtopo itomak werim, jiba jukaꞌ tuꞌik enchim
jooneeꞌuta, ka aꞌ rojiktane.
\v 14 Emo nasuk seenuk, jukaꞌ inim jiꞌosia jiꞌojteipo
itom teuwaaꞌuta ka aꞌ nok jikkajibaeo, aꞌ jabetukaꞌuta
aꞌ mammatenee intok inikaꞌa, aꞌ tiuneꞌ betchiꞌbo, emeꞌe
omola aꞌ eiyaaka, ka aamak emo tuꞌurine.
\v 15 Taa junakaꞌa emeꞌe, ka jabeta senuk enchim bejeꞌeka
weyekamta benasi aꞌ bitbaane. Ala junakaꞌa emeꞌe, jiba
jabe Krijtota sualemtau nokamta benasi, tuꞌik betana
au nokne.
\s Jiꞌojtesuka, Liojta betana ameu tuꞌik aꞌawa
\p
\v 16 Intok jiba aapo juꞌu yoꞌowe, yanti elaka jiapsiwamta
yetet autuame, jiba weeꞌpo intok jitaꞌapo juniꞌi, juꞌu
enchim emo bichaꞌu betana, yanti elaka jiapsiwamta emot
autuane. Aapo itom yoꞌowa Lios, siꞌime enchim emo maktune.
\p
\v 17 Inepo Paplo, inikaꞌa teboteita, nee inepo tua in
maammea tua in jiꞌojteꞌe benasia inikaꞌa jiba ineponee
aꞌ jiꞌojtei, nee betana aꞌ weyeꞌuta enchim juꞌuneeneꞌ
betchiꞌbo. Siꞌime jumeꞌ nee betana jiꞌojteim ineponee
inien nee jiba, inikaꞌa in maammea amet jiꞌojte.
\v 18 Aapo juꞌu yoꞌowe Jesukrijto, aapoꞌik betana weyeka,
jukaꞌ tuꞌik enchim siꞌimem aꞌ bittuane. Tua junuentune.