\id 1TI
\h 1 TIMOTEEO
\toc1 1 TIMOTEEO
\mt 1 Timoteeo
\c 1
\s Juꞌu Paplo, Timoteoꞌ teamtau jiꞌojte
\p
\v 1 Inepo Paplo, Jesukrijtota betana yeu puꞌataka yeteu
bittuari, itom yoꞌowa Liojta, juꞌu itom jinneꞌumta betana
intok juꞌu yoꞌowe Jesukrijto, aapo juꞌu, chukula aapoꞌik
benasi itom machipeaꞌu itom aet aꞌ bit boꞌo bichaꞌu,
inime betana aet nesau takai.
\v 2 Inikaꞌa jiꞌosia jiꞌojteita nee eu bittua, Timoteo,
Krijtopo betana in yoemia, tua yumaꞌisi aapoꞌik sual
taꞌaakai. Inepo, itom yoꞌowa Liojta betana intok itom
yoꞌowe Jesukrijtota betana, siꞌimeku eu tuꞌik intok tua
em nak jiokolinaaꞌuta intok yumaꞌisi, yanti elaka em
jiapsineeꞌuta, inikaꞌa em bitneeꞌuta ee betana aꞌ waatakai.
\s Ka tuꞌik majtawamta betana yee nok tejwaawame
\p
\v 3 Bat naataka, bwiaara Maserooniaꞌ teaꞌu bicha simeka,
inia betana junak in eu nokakaꞌa benasia, jiba iꞌan, jum
bweꞌu joꞌara Eepesoꞌ teaꞌpo tawane, junamaꞌa, waatem, inimeꞌe
taꞌabwika ka jukaꞌ Krijtota nok lutuꞌuriata mak weyemta,
ka inikaꞌa bem yee aꞌ majtaneꞌ betchiꞌbo junuen iniat
am nok konta betchiꞌbo.
\v 4 Intok kia jukaꞌ jakwoo weeriata, kia beja etejoita
betana intok jukaꞌa, jumeꞌ cheꞌa bat naataka nat tomti
katriam betana, ka jak chupemtat, ka bem emo temaineꞌpo
betana juniꞌi. Iniꞌi weyemtat, wepulsi nok nassuawame
jiba ama yeu weama, kaita tuꞌik weiyaakai. Intok jukaꞌ
Liojta betana tekilta itom weetua iꞌawaꞌuta, inikaꞌa,
Liojtat eewaka jiba weetuawamta betana, kaitaꞌpo yee
ania.
\p
\v 5 Bweꞌituk juꞌu iniae teuwaabaawame, iniꞌi, inim siꞌimem,
Liojta bichapo tuꞌisi itom jiapsaꞌut juꞌuneakai intok
ka jiapsita bepa Krijtota itom sualeꞌpo juꞌuneakai, wepulsi
itom tuꞌu jiapsimmea itom naas ito nakneeꞌu junaꞌa.
\v 6 Waate inim inien inikaꞌa koptaka intok inimeꞌe
kia beja kaita tuꞌik etejoit nau nok nassuawamtat emo
taꞌarulaa.
\v 7 Inimeꞌe, Liojta betana nesaurim jumeꞌ jiꞌojteim,
inimeꞌe bempo tuꞌisi yee emo am majtalekai, taa bempo,
kia jukaꞌ jiba bempo bem nokaꞌut ka juꞌunea, intok bem
teuwaaꞌut juniꞌi. Intok kia tua witti nokaka, bem yee
majtaꞌut juniꞌi ka juꞌunea.
\p
\v 8 Itepo tee ala juꞌunea, jumeꞌ Liojta betana nesauri
jiꞌojteim, inimeꞌe tua bem boꞌo jooriaꞌeewaꞌpo aman am
sawaawaꞌpo, inimeꞌe bem tuꞌireakaꞌu.
\v 9 Inia betana jumeꞌ nesauri jiꞌojteim, ka jumeꞌ tuꞌik
jiba joaka, tuꞌisi jiapsame betchiꞌbo am weyeꞌpo juꞌuneakai.
Ala, jumeꞌ nesauri jiꞌojteim, wameꞌe, kaabeta yoꞌoreka
intok ka yaꞌuraakame betchiꞌbo weye. Intok jumeꞌ ka
tuꞌik boꞌo jooriame intok jumeꞌe, Liojta ka yoꞌori taꞌaame,
intok Liojta betana weyemta ka aꞌ yoꞌoreme. Jumeꞌ bem
yoꞌowam susuꞌame intok junuen, siꞌime jumeꞌ yee susuꞌame
betchiꞌbo.
\v 10 Intok ketchia, jumeꞌ jujubeka juniꞌi, omot tattaꞌabwi
jaamuchimmak emo tuꞌureme. Oo jumeꞌ jamut oꞌowimmak
emo tuꞌureme. Jumeꞌ yee eꞌetbwame intok jumeꞌ a yee
bai tattaꞌaame intok jumeꞌ jita ka lutuꞌuriata teuwaaka
juniꞌi, bem nokaꞌuta aꞌ lutuꞌuriateme betchiꞌbo. Intok
naa buustia, jumeꞌ Liojta betana nesauri jiꞌojteim, ketchia
siꞌimeta jukaꞌa, inikaꞌa tuꞌik jiba in yee majtaꞌuta
aꞌ bejeꞌeka weyemta betchiꞌbo weye.
\v 11 Iniꞌi tuꞌik betana weyeka yee majtawame, ket jiba
juꞌu, yoꞌorisi machika Krijtota betana bemela nok lutuꞌuria,
yee jinneꞌume, iniꞌi, jukaꞌ achai Lios, tua nak yoꞌoriwamta,
aapoꞌik nee aꞌ tekil makakaꞌu mak weye.
\s Juꞌu Paplo, Liojta aꞌ nakekaꞌ betchiꞌbo, aet aꞌ bai saeꞌepo
\p
\v 12 Inepo, jukaꞌ itom yoꞌowa Jesukrijtota, jukaꞌ aapoꞌik
betana utteꞌata net autuaka nee aniakamta ne tua junen
jiaka nee aꞌ bai sae. Bweꞌituk aapoꞌik ket aapoꞌik betana
tuꞌikut net eaka, aapoꞌik betana tekileu nee yeu puꞌakai.
\v 13 Siꞌimeta inikaꞌa nee yaꞌarialaa, junuen bat naataka
nee aapoꞌik bejeꞌeka ka tuꞌik teuwaaka intok jumeꞌ aapoꞌik
sualeme, jiokot emo am bittuaka, aapoꞌik bejeꞌeka nee
jiapsisuk juniꞌi. Taa juꞌu Lios, nee nak jiokoleka, tuꞌik
nee yaꞌariak. Bweꞌituk junak inepo, kee nee Krijtota
sualen, intok ka tuꞌik in joaꞌut nee ka juꞌunean.
\v 14 Jiba inia betchiꞌbo, inepo, jukaꞌ Jesukrijtota betana,
tuꞌi weyemta, tua nee yumaꞌisi aꞌ bichak. Naa buusti,
aapoꞌik tua in aꞌ yoem eiyaaka intok ketchia in yee
nak taꞌaaneeꞌut, itom siꞌimem, Krijtota mak itom eaꞌ betchiꞌbo,
siꞌimem itom aꞌ taꞌaaꞌut, junaet nee aniak.
\p
\v 15 Iniꞌi teuwaawame tua lutuꞌuria, intok inikaꞌa, siꞌime
aꞌ sualpo yumaꞌi, iniꞌi: “Jesukrijtota, jumeꞌ ka tuꞌik
yaꞌalame jinneꞌubaeka, inim bwiau yeu aꞌ machiakaꞌuta”,
ti jiuwame. Inime betana inepo, Liojta bichapo cheꞌa
bepa ka tuꞌik ino yaꞌarilekai.
\v 16 Taa junae betchiꞌbo juꞌu Lios tua nee nak jiokoleka
nee bichak, junuen, jukaꞌ Krijtota tua bepa aapoꞌik a
yetet boꞌo bichaka yee aꞌ jinneꞌuꞌuta, aapoꞌik betana
net bat junuen aꞌ bitnaꞌ betchiꞌbo. Junuen inepo, wameꞌe
chukula, jiba aapoꞌik sualeka jukaꞌ jiba yuu jiapsiwamta
aꞌ bitneeme betchiꞌbo, inepo, bempoꞌim nee mammateꞌeaꞌu
tuk.
\v 17 Inien san, itepo, jukaꞌ jiba betchiꞌbo yoꞌo nesawemta,
intok jiba betchiꞌbo jiapsamta, pusimmea ka a bittumta,
jukaꞌa, aapoꞌik jiba Lioj taka, intok siꞌimekut juꞌuneamta,
itepo, aapoꞌik Liojta itom yoꞌoreeꞌuta, intok siꞌimeku
aꞌ eiyaawaka aꞌ alleetuawaaꞌuta, tee jiba betchiꞌbo au
bicha te aꞌ teuwaane. Tua junuentune.
\p
\v 18 Krijtopo betana in yoemia Timoteeo, inikaꞌa em
jooneeꞌuta, Jesukrijtota betana weyeka em au yeu puꞌari,
junuen yumaꞌisi Krijtota sualeka intok siꞌimeku tuꞌisi
em jiapsaꞌpo emo juꞌuneiyaaka, iniae, ka jain eaka, tuꞌisi
aꞌ boꞌo jooriaka aet em jiapsineꞌ betchiꞌbo ne eu nooka.
Inikaꞌa, jiba bat naataka jumeꞌ itomak Krijtota sualeme,
Liojta betana aet juꞌuneetuawaka, bempoꞌim ee betana
iniat nokaka aꞌ teuwaakaꞌa benasia.
\v 19 Inia betana waate, Liojta betana weyemtat bem eaꞌut
juꞌuneaka juniꞌi, jiba iniau ka bem waateꞌ betchiꞌbo,
inimeꞌe, Krijtota bem sualeꞌu betana tokti jiꞌobeka emo
taꞌaruk.
\v 20 Inien ameu yeu siika, waate, juꞌu Imeneoꞌ teamtau
intok juꞌu Alejanroꞌ teamtau. Jiba inimeꞌe, inepo, junuen
bempoꞌim, ka intok Liojta bejeꞌeka ka tuꞌik bem nokneeꞌu
betana, iniae, jiokot machikue bem aꞌ taꞌaaneꞌ betchiꞌbo,
inepo, juꞌu bebejeꞌeritau am suꞌu tojak.
\c 2
\s Liojtau bicha jaisa nok betchiꞌbo yee tejwaawame
\p
\v 1 Inim inepo, cheꞌa bat naataka, Liojtau bicha inim
siꞌime yoemrata betchiꞌbo nee enchim ameu waateka intok
tua junen jiaka, Liojtau bicha am nokriaka intok inime
betchiꞌbo, aapoꞌik Liojta aet bai saeka, nee au bicha
enchim am nokrianeeꞌu betana enchim aet tejwaa.
\v 2 Jumeꞌ inim cheꞌa yoꞌo yaꞌarim, intok siꞌime jumeꞌ
wate yoꞌooraata inim nesaweme betchiꞌbo am nokriane.
Junuen, inim ka majjaiwaka intok yanti, ka jakuꞌubo itou
suawaka, ala wepulsi Liojta betchiꞌbo intok siꞌimeku
itom jiapsaꞌut ito yoꞌori teboka a jiapsi betchiꞌbo.
\v 3 Iniꞌi tuꞌika junen joowa. Intok jukaꞌ itom yoꞌowa
Liojta, jukaꞌ yee jinneꞌumta betana tuꞌisi bitwa mabet
maisia.
\v 4 Intok aapo, inim siꞌime yoemrata, jinneꞌui tu iꞌa
intok siꞌimem aapoꞌik betana nok lutuꞌuriata am taꞌaa
iꞌa.
\v 5 Bweꞌituk wepuꞌulai jiba juꞌu siꞌimekuu Lios. Intok
wepuꞌulai jiba ketchia, waꞌa, jumeꞌ inim jiapsame, Liojtamak
emo tuꞌuteka aamak eaka bem jiapsineeꞌu betana a am
aniame, Jesukrijto, ito benasi inim yoemtaka jiapsakaꞌu.
\v 6 Aapo Jesukrijto, aꞌ meꞌetuneꞌ betchiꞌbo au suꞌu
tojak, junuen, inim siꞌimem jinneꞌuimtuneeꞌuta inia betana
junae aꞌ bejeꞌetua betchiꞌbo. Iniꞌi yaꞌari intok, taewai
aet aꞌ chupneeka yeu aꞌ puꞌarit aꞌ juꞌuneiyaawaka chupuk.
\v 7 Inia betchiꞌbo inepo nee, Liojta betana in yeteu
nokneꞌ betchiꞌbo, intok nee ket, wameꞌe ka jurio yoemem,
Jesukrijtota tuꞌisi bem aꞌ sualneꞌ betchiꞌbo intok aapoꞌik
betana bemela nok lutuꞌuriata in majta betchiꞌbo nee
yeu puꞌawak. Iniae inepo lutuꞌuriata teuwaa, intok kaabeta
nee bai tattaꞌaa.
\p
\v 8 Inien san inepo, siꞌimekut, Krijtota sualeme nau
yaajaꞌpo, jumeꞌ oꞌowim, inimeꞌe, Liojta aꞌ yoꞌori betchiꞌbo,
aapoꞌik bichapo tuꞌik bem joaꞌuta intok ka nau omtiwaka
nau nok nassuawamta weetuakai, bempoꞌim nee, Liojtau bicha
am nok iꞌa.
\v 9 Intok jumeꞌ jaamuchim, inimeꞌe, emo suaka, ka jaana
maisi emo aꞌanaarine. Ka ama butti maisi bem emo chi
chikrineeꞌue, intok kia ka sawai tomie yaꞌaritae, ujyooi
tetammea oo bem tajoꞌori unnaa bejeꞌemtae, ka iniae ujyoisi
maisi bittubaane.
\v 10 Ala bem ujyoineeꞌu, siꞌimeku a yee nak jiokoleka,
tuꞌik bem boꞌo jooriaꞌue junaꞌatune. Inikaꞌa, jaamuchim
tua wepulsi Liojta betchiꞌbo jiapsame junuen bem jiapsiꞌeaꞌa
benasia.
\v 11 Inimeꞌe jum nau anwaꞌpo, ka japteka nokne. Jukaꞌ
ama bem majtawaꞌu betana, kia aꞌ jikkajinee intok kaitaꞌpo
cheꞌa emo eiyaakai.
\v 12 Bweꞌituk inepo nee, jukaꞌ jamutta, kannee jum anwaꞌpo
yee aꞌ majta iꞌa. Intok kia junamaꞌa jukaꞌ oꞌouta, aapoꞌik
inia bepa ka aꞌ weeneeꞌuta juniꞌi. Ala iniꞌi, kaitaꞌpo
cheꞌa bat nesaune. Ka monteka ama annee.
\v 13 Bweꞌituk juꞌu Lios, jukaꞌ Adam teamta bat aꞌ juꞌunaktek.
Aet chukula intok jukaꞌ Eebaꞌ teamta.
\v 14 Intok ketchia, juꞌu Adam tukaꞌu junuen, ka bai taꞌaawak.
Ala aapo juꞌu jamut. Intok iniꞌi, bai taꞌaatuka, Liojta
bichapo ka tuꞌik yaak.
\v 15 Taa jumeꞌ jaamuchim, inimeꞌe, yoemiaka intok am
yoꞌoturiaka, inien jinneꞌuimtune. Taa inimeꞌe, inim Krijtota
sual taꞌaaka, yee nak taꞌaaka intok wepulsi Liojta mampo
emo suꞌu tojaka intok siꞌimeku suasi jiapsakai.
\c 3
\s Krijtota sualemmeu yoꞌo yaꞌarim jaisa bem jiapsi iꞌaꞌawaꞌpo
\p
\v 1 Iniꞌi teuwaawame tua lutuꞌuria, inim jabetaka juniꞌi,
jumeꞌ Krijtota nau sualemmeu yoꞌotupeame, junaꞌa, inikaꞌa
tua tuꞌi tekilta joopeene.
\v 2 Inia betchiꞌbo, waꞌa, inikaꞌa tekilta joaka Krijtota
sualemmeu yoꞌo yaꞌari, iniꞌi siꞌimekut au suaka jiapsine,
junuen kia jita ka tuꞌika juniꞌi kaita aet bittuneꞌ
betchiꞌbo. Iniꞌi, wepuꞌulaik jiba jubine. Intok yumaꞌisi
suasi jiapsine. Au yuꞌinee intok au yoꞌori tebokai.
Jumeꞌ mekka betana au yajame, inimeꞌe tuꞌisi aꞌ mabbetneeꞌut
jiapsine. A yee aꞌ majtaneeꞌuta aꞌ taꞌaane.
\v 3 Ka naamukne. Ka nanassuane. Intok kia tomita, ka
aꞌ kobaꞌita, ka aꞌ waatane. Ala yee jiokol taꞌaane. Siꞌimemmak
tuꞌika jiapsine. Aapo ka unnaa naa buusti tomit au temaine.
\v 4 Iniꞌi, aꞌ joꞌapo siꞌimem tuꞌisi am kuaktaka am ujuꞌune.
Intok jumeꞌ aꞌ yoemiawam, bem jikkajineeꞌuta intok bem
yee yoꞌorineeꞌuta am majtane.
\v 5 Bweꞌituk seenu, jiba aꞌ joꞌapo joꞌaakame, aapoꞌik
tuꞌisi am ujuꞌuneeꞌuta ka aꞌ taꞌaame, iniꞌi, kaachin jumeꞌ
Krijtota sualemmeu yoꞌotaka a am kuaktane.
\v 6 Junuen san, juꞌu Krijtota sualemmeu yoꞌotuneeme,
ka juꞌubwa jeela Krijtota sualeme tune. Ka junuen iniꞌi,
au jabeleka intok jukaꞌ bebejeꞌerita ka tuꞌisi au aꞌ
tawaakaꞌa benasia, jiba junaen au aꞌ tawaaneꞌ betchiꞌbo.
\v 7 Ketchia utteꞌa, jumeꞌ ka Krijtota sualeme nasuk,
aapoꞌik yoꞌoriwaka, tuꞌisi aꞌ bitnaaꞌuta. Junuen jitaꞌapo
ka tuꞌik betana ka aet noknaꞌ betchiꞌbo. Intok junuen
iniae bebejeꞌerita ka aꞌ jiꞌoptuaneꞌ betchiꞌbo.
\s Teꞌopopo tekiakame, jaisa bem jiapsi iꞌaꞌawaꞌpo
\p
\v 8 Junaen ketchia, jumeꞌ jum teꞌopompo, wate tekileu
yeu puꞌarim, inimeꞌe oꞌowim yoꞌori bitwametune. Bem nokaꞌut
yeu yuyyumane. Ka nanaakone. Intok tomita ka bempoꞌim
kobaꞌi, ka aꞌ waatane.
\v 9 Inimeꞌe, jukaꞌ lutuꞌuriataka inim ito nasuk yeu
machiaka itom sualeꞌuta, aet jiapseka aꞌ sual sakane.
Intok iniamak, Liojta bichapo tuꞌisi bem jiapsaꞌut emo
juꞌuneiyaakai.
\v 10 Inimeꞌe, junae tekilae, baat jiꞌobilaatune. Intok
junamaꞌa bempo, juꞌu tekileu bem makriu yumaꞌateko, bempo
inikaꞌa teꞌopopo tekilta aꞌ joone.
\v 11 Jumeꞌ jaamuchim juniꞌi ketchia, emo yoꞌori tebone.
Ka bem yetet nokꞌeaꞌuta, ka yetet nok sasakane. Siꞌimeku
suasi emo ujuꞌune. Intok siꞌimeta bem joaꞌut, a amet
yoem eetune.
\v 12 Juꞌu teꞌopopo inien tekilekame, wepuꞌulaik jiba
jubine. Intok iniꞌi, jumeꞌ aꞌ joꞌawapo joꞌaakame intok
aꞌ yoemiam, intok junamaꞌa siꞌimeta, tuꞌisi aꞌ ujuꞌune.
\v 13 Bweꞌituk jumeꞌ inien, jum teꞌopopo tekileka bem
tekilta tuꞌisi aꞌ joame, inimeꞌe junae tekil bem joaꞌu
betana cheꞌa bepa au lutuꞌuriaka aꞌ maktune. Intok inimeꞌe,
Jesukrijtota junuen bem aꞌ sualeꞌu betana cheꞌa juniꞌi
utteꞌaka, bem aꞌ teuwaaneeꞌuta aet aꞌ jajamne.
\s Jukaꞌ itom sualeꞌut ka siꞌimem a aet juꞌuneaꞌpo
\p
\v 14 Inepo lauti nee enchi aman bitbaekaꞌea. Taa jiba
nee inikaꞌa jiꞌojteita nee eu bittua,
\v 15 junuen, ka lauti a nee aman eu weyeo juniꞌi, jiba
junuen, jumeꞌ Krijtota sualeme nasuk, tuꞌisi ame nasuk
em tekipanoaka juꞌu em anneeꞌut em juꞌuneeneꞌ betchiꞌbo.
Junameꞌe intok, juꞌu Lios, jiba yuu jiapsamta yoemiam
taka, bempo, Krijtota betana jukaꞌ nok lutuꞌuriata siꞌimekut
aꞌ suuaka intok aꞌ nokria sakame.
\v 16 Juꞌunakkiachisi lutuꞌuria iniꞌi itom sualeꞌu betana,
wepulsi au emo suꞌu tojirika, ka sep lauti a aet juꞌuneetuꞌuu.
Maa su, inen jiꞌojtei:
\q Lios, aapo ito benasi au yaaka, inim au yeu machiak.
\q Liojta tuꞌu jiapsi aet aneka, aapo wepulsi tuꞌika jiba
aet ayuka jiapsak.
\q Jumeꞌ ankelesim betana bittuk.
\q Inim bwiapo siꞌime ka nanau machi yoemratau aapoꞌik
betana ameu bicha teuwaatuk.
\q Inim bwiapo jiapsame betana sualtuk.
\q Chukula intok, juchi teekau mabettuk.
\c 4
\s Jumeꞌe, ka intok Krijtota sualbaeme
\p
\v 1 Taa inim juꞌu Liojta tuꞌu jiapsi machisi itom aet
juꞌuneetualaa, chukula, siꞌimeta abe aet yumao taewaimmet,
watem, jumeꞌ Liojta sualeka juniꞌi, aꞌ koptaka intok inimeꞌe,
bebejeꞌerita betana ka tuꞌi jiapsim, yee bai tattaꞌaame,
intok inimeꞌe betana weyeka juꞌu yee majtawamtau, inimeꞌe
inimmeu emo suꞌu tojineeme.
\v 2 Intok inimeꞌe, wameꞌe, ka lutuꞌuriapo emo tuꞌu joame,
ka lutuꞌuriata yee majtame, junamemak eaka am jikkajine.
Junameꞌe, ka tuꞌik joaka juniꞌi, ka emo tetemaeme.
\v 3 Bempo, inim jujupwamta yee uꞌaa. Intok ketchia, wate
bwaꞌamta ka aꞌ bwaꞌa nesae. Junakaꞌa bwaꞌamta intok,
juꞌu Lios, wameꞌe Krijtota sualeme, intok wameꞌe, Krijtota
bemela nok lutuꞌuriata aꞌ taꞌaame, bempoꞌim, aapoꞌik bai
saeka bem aꞌ bwaꞌaneꞌ betchiꞌbo, juꞌu Lios aꞌ juꞌunaktei.
\v 4 Bweꞌituk, siꞌime juꞌu inim Liojta juꞌunaktei tuꞌi.
Intok itepo inia betana, kaita omola tatawaane. Ala inikaꞌa,
inia betchiꞌbo, Liojta bai saeka, tee aꞌ mabetne.
\v 5 Bweꞌituk siꞌime iniꞌi, aapoꞌik Liojta nok lutuꞌuria
betana intok juꞌu aapoꞌiku bicha nokaka, itom aꞌ bai
saeꞌue, aapoꞌik bichapo tuꞌika yeu weama.
\s Jesukrijtota tekil tuꞌisi boꞌo jooriame
\p
\v 6 Inikaꞌa empo, jumeꞌ Krijtopo itomak werim, yumaꞌisi
am majtaꞌateko, empo, lutuꞌuriapo Krijtota betana jukaꞌ
em tekil makrita yumaꞌisi tuꞌisi aꞌ joame tune. Intok
empo, tuꞌik, utteꞌata em aet mabet simeꞌuta et juꞌuneiyaanaa.
Inikaꞌa, Krijtota ae sualwaka intok jukaꞌ tuꞌik betana
em majti, em boꞌo jooriaka, jukaꞌ ka em koptaꞌu betana.
\v 7 Taa empo, jukaꞌ inim ka tuꞌik weyeꞌe betana intok
kaita suawaka ama ayuka, etejowamta, chuubaa juniꞌi, ka
aꞌ jikkajibaane. Ala, empo, aapoꞌik Liojta betana weyemta,
yumaꞌisi em aꞌ taꞌaaka em aet jiapsineeꞌut emo temaine.
\v 8 Bweꞌituk, takaapo utteꞌata aꞌ bwij betchiꞌbo, juꞌu
emo utteꞌa jooriawame, wateku yeteu tuꞌik weiyaa oꞌoben.
Taa waꞌa Liojta betana weyemtat yumaꞌisi aet jiapsiwame,
iniꞌi, siꞌimeku yeteu tuꞌik weiyaa. Bweꞌituk iniꞌi, ketun
inim jiapsaꞌpo, intok kia chukula, jiba yuu itom jiapsineeꞌu
betchiꞌbo juniꞌi, itou tuꞌik weiyaa.
\v 9 Iniꞌi teuwaari tua lutuꞌuria intok inikaꞌa, siꞌime
aꞌ juꞌuneiyaaka aꞌ sualpo yumaꞌi.
\v 10 Itepo, jiba inia betchiꞌbo san tekipanoa intok
itepo aet jiokot bitwaka ee bejeꞌewa. Bweꞌituk itepo
su, juꞌu Lios, jiba yuu jiapsamtat eaka jiapsakai. Aapo,
juꞌu inim siꞌimem jiapsame, inim bem jiapsaꞌpo, amemaktuka
am bichame. Intok cheꞌa bat naataka wameꞌe aꞌ sual taꞌaame,
bempoꞌim jiba yuu jiapsineꞌ betchiꞌbo iniat am bichakai.
\p
\v 11 Inikaꞌa weyemta, empo, utteꞌa yee aet tejwaaka intok
em yee aꞌ majtaneeꞌuta.
\v 12 Em juꞌubwa yoꞌotuꞌ betchiꞌbo, iniat ka jak waꞌam
em bitnaꞌ betchiꞌbo, aet emo suaka jiapsine. Ala empo
jumeꞌ Krijtopo itomak werim, tuꞌik eu am taꞌaatuane.
Empo junuen ame bichapo em nokaꞌue intok em tuꞌisi amemak
emo weiyaaꞌue. Intok em a yee nak taꞌaaka, Liojta tuꞌu
jiapsi et aneꞌue aꞌ juꞌuneiyaa tebone. Intok inikaꞌa,
Krijtotat em eiyaaꞌue intok Liojta bichapo, wepulsi tuꞌi
eerita jiba et ayukaꞌue.
\v 13 Nee aman eu yepsaꞌu tajtia, empo, jumeꞌ Liojta betana
nok lutuꞌuria jiꞌojteim, yeteu am nok simne. Krijtota
sualeme am majtane. Intok ka bem koꞌom eeneꞌ betchiꞌbo
amemak etejone.
\v 14 Empo ket, kaachin jukaꞌ Liojta betana em mabetrika,
em a joaꞌuta, inikaꞌa, jumeꞌ Krijtota sualemmeu yoꞌowem,
Liojta betana juꞌuneetuawaka, Liojtau bicha enchi nokriaka,
em mabetakaꞌuta, ka aꞌ koptaka, jiba aet jiapsine.
\p
\v 15 Inia weemta betana empo, jiba weeꞌpo yumaꞌisi au
kikne. Junuen siꞌimem a bem aꞌ bitneꞌ betchiꞌbo, juꞌu
em joaꞌu betana, ka kia beja weyeka, tuꞌik ama ayukaꞌuta.
\v 16 Empo, juꞌu inim ammaꞌali em jiapsaꞌu betana emo
suuane. Intok juꞌu em yee majtaꞌuta, tuꞌisi aꞌ weeneeꞌu
betana emo suuane. Intok empo, siꞌimeta jukaꞌ lutuꞌuriaka
tuꞌisi weyemta, ka aꞌ koptaka aet jiapsine. Bweꞌituk
inikaꞌa empo inien aꞌ joaꞌateko, jiba empo, intok ketchia,
wameꞌe em ameu nokaka enchi jikkajammak nau, Liojta betana
tuꞌik aet bichaka jinneꞌuimtune.
\c 5
\s Jumeꞌ Krijtota sualemmak jaisa au weiyaanaaꞌu
\p
\v 1 Senuk yoꞌotuita, ka empo bettesi jitaꞌapo aꞌ nok
tejwaane. Ala, inikaꞌa, em aꞌ yoꞌowakaꞌa benasi junae
betana au noknee. Intok jumeꞌ juꞌubwa yoꞌotume, inimeꞌe,
em am sailakaꞌa benasi amemak emo weiyaane.
\v 2 Intok jumeꞌ jaamut yoꞌotuim juniꞌi ketchia, inimeꞌe,
em am aekaꞌa benasia amemak emo weiyaane. Intok jumeꞌ
bebemem juniꞌi ketchia, inimeꞌe, em am waekaꞌa benasia,
siꞌimekut tuꞌik, sua machik jiba jooriaka, amemak emo
weiyaane.
\p
\v 3 Jumeꞌ jaamut jokoptuim, lutuꞌuriapo jiokot eame,
am aniane.
\v 4 Taa juꞌu jamut jokoptui yoemiakame oo jumeꞌ aꞌ
amuwam jipueme, inimeꞌe, cheꞌa bat naataka jumeꞌ amemak
joꞌaakammak tuꞌisi amemak emo weiyaaka bem jooneeꞌut
intok jumeꞌ bem yoꞌowam junaet bem am nakeka am yoꞌoturiakaꞌuta
tua bem am bai sauneeꞌuta, inikaꞌa aꞌ taꞌaane. Bweꞌituk
inien weyeme iniꞌi tuꞌi. Intok juꞌu Lios ae alleene.
\v 5 Juꞌu jamut, lutuꞌuriapo jokoptui, tua aapola tawalame,
iniꞌi Liojta betana aꞌ anianaaꞌuta boꞌo bichaka jiapsa.
Intok taewait intok tukaariat naa buustia, Liojta aꞌ
yoꞌoreka, jiba au bicha aꞌ nokaꞌuta aꞌ weetua.
\v 6 Taa juꞌu jamut jokoptui, inim ka tuꞌikue alleebaeka
jiba au suꞌu tojirika jiapsame, iniꞌi, jiapsaka, Liojta
bichapo ka jiapsamta benane.
\v 7 Empo inia weyemta betana ket am tejwaaka ameu nokne,
junuen, inimeꞌe kaita ka tuꞌikut bempoꞌim aet am sua
tejwaa machik amet auneꞌ betchiꞌbo.
\v 8 Bweꞌituk inim emo nasuk seenu, jumeꞌ aꞌ wawaim ka
ameu waateka ka am aniaꞌateko, intok cheꞌa juniꞌi jumeꞌ
aamak joꞌaaka tuꞌisi aꞌ bitꞌeaꞌum ka aniaꞌateko, iniꞌi,
ka Krijtota sualemta benasi bitnaa intok iniꞌi, senuk
ka Krijtota sualemta bepa cheꞌa ka tuꞌik joone.
\p
\v 9 Inim, jumeꞌ jokoptuim yeu puꞌarimtaka, bem yeu puꞌari
bem jooꞌeaꞌuta jaꞌabwekammak, waꞌa jokoptui, baji taka
wasuktiam bepa weiyaame jiba ama amemak naꞌikiatune.
Intok iniꞌi, wepuꞌulaik jiba kunalatusukame.
\v 10 Iniꞌi taꞌeenaa inim jukaꞌ tuꞌik boꞌo jooriaka
aꞌ jiapsisukaꞌuta. Maa suko inile benak aꞌ yoemiam tuꞌisi
am yoꞌotuarialatuko. Wameꞌe mekka betana au yaajame,
aꞌ joꞌawapo siꞌimeku tuꞌisi am mabbetsulatuko. Intok
jumeꞌ Krijtopo aamak werim, iniꞌi am wok baksialatuko.
Intok wameꞌe, jitaꞌapo jiokot emo bichakame, junaet am
anialatuko. Oo jita juniꞌi inile benak tuꞌik aꞌ boꞌo
joorialatuko, junuen a amemak naꞌikiatune.
\p
\v 11 Taa jumeꞌ beme yoꞌotaka jokoptulam ka amemak am
naꞌikiane. Bweꞌituk inimeꞌe, chukula juchi kukunabaekaꞌeaꞌateko,
inien bem eaꞌu, Krijtotamak eaka bem joobaeꞌuta am koptatuane.
\v 12 Intok chukula inimeꞌe, Liojta bichapo bem joaka
aꞌ chupaꞌaneꞌeti jiaka bem nokakaꞌu betana, iniat bempo
ka a aet yeu yumakai, junak inimeꞌe inia betana ka tuꞌisi
aet emo tawaarika ama yeu katne.
\v 13 Intok naa buustia, inimeꞌe, joꞌaat rejteꞌeteko, bempo
tua kaitat jiapseka, kaita bem joopeaꞌuta aet taꞌaane.
Intok ka iniat jiba joiwane, ketchia bempo, ka bem yetet
nokꞌeaꞌuta yetet nok sasakane. Intok kaita bem a tuꞌuteꞌpo
kikkimune. Intok ka nok maisi machik nok sasakane.
\v 14 Inia betchiꞌbo inepo, nee jumeꞌ beme yoꞌotaka jokoptuim,
am kukuna iꞌa. Intok inimeꞌe yoemiaka, bem joꞌau siꞌimeta
bichaka joꞌane. Intok inimeꞌe, ka tuꞌika bem joaꞌuta,
kaita amet aune, junuen jumeꞌ itom bejeꞌeka aneme, kaitaꞌpo
itot nokneꞌ betchiꞌbo.
\v 15 Bweꞌituk inim waate jokoptuim jaibu inien, Krijtota
bem sualeꞌuta koptaka intok bebejeꞌerita mak eaka ka
tuꞌik jooa.
\p
\v 16 Inim senu Krijtota sualeme, oꞌoutakai oo jamuttakai
juniꞌi, jokoptuim wawaekame, iniꞌi, inimeꞌe am aniane.
Intok junameꞌe, jumeꞌ Krijtota nau sualeme am anianeꞌ
betchiꞌbo, ka iniat obiachisi ameu am suꞌu tojirine.
Junuen jumeꞌ Krijtota nau sualeme, wameꞌe jokoptuim, lutuꞌuriapo
am ania machim kaabeta jipueme, inimeꞌe a aniane.
\p
\v 17 Wameꞌe Krijtota sualemmeu yoꞌo yaꞌarim, bempo bem
tekil tuꞌisi aꞌ joame, inimeꞌe, ameu aꞌ chaꞌakaꞌpo aman,
nat bepa aniawaka intok eiyaawaka bitnaa. Inien cheꞌa
bat naataka, jumeꞌe, Krijtota nok lutuꞌuriata aꞌ nokaka
intok yee aꞌ majtame.
\v 18 Bweꞌituk jum Liojta betana jiꞌosia jiꞌojteimpo:
“Jukaꞌ boejta, tiikom jotamta, aꞌ jiꞌibwaneꞌ betchiꞌbo,
ka aꞌ ten sumaꞌine”, ti jiꞌojtei. Intok inim omot ket:
“Juꞌu tekipanoareeo, aꞌ kobaꞌita, aꞌ bejeꞌetuanaaꞌu au
lutuꞌuria”, ti ama jiꞌojtei.
\p
\v 19 Empo, inim senu, Krijtota sualemmeu yoꞌota betana
aꞌ bejeꞌeka eu aꞌ naꞌatejowao, kaita yaꞌane, junae betana
ka wooika oo bajim junae betana juꞌuneaka nokame aneo.
\v 20 Taa jumeꞌ inien, Liojta bichapo ka tuꞌik joame,
junae betana siꞌimem bichapo am nok tejwaane, junuen
jumeꞌ watem, am ee majjauneꞌ betchiꞌbo.
\v 21 Inia betana inepo, achai Liojta bichapo intok Jesukrijtota
bichapo, intok jumeꞌ aamak aneka aapoꞌik yeu puꞌarim
ankelesim bichapo, inikaꞌa weyemta, siꞌimem nanancha, kaabeta
yeu puꞌaka, em aet yeu yumaka aꞌ sawaanee nee enchi tejwaa.
\v 22 Intok ket empo, Krijtota sualemmeu senuk yoꞌo yaꞌabaeꞌeteko,
tuꞌisi aet bichaka boꞌo bitne. Junuen empo, ka watem
ka tuꞌisi aulammak, amemak jiꞌoplata benasi bitnaꞌ betchiꞌbo.
Ka tuꞌik, ka em jooneeꞌut emo suuane.
\p
\v 23 Jiba jeela tompo em koꞌokoeꞌu betchiꞌbo, empo, ka
baꞌam jiba jiꞌine, ala paꞌasi baꞌawata ket iliikik jiꞌine.
\p
\v 24 Inim, watemmet, jukaꞌ ka tuꞌika bem yaꞌarita, machisi
a juꞌuneiyaatu, kee yaꞌuraa bittuawakai. Taa inia betana,
watemmet intok, ka sep a juꞌuneiyaatu. Taa chukula yee
yaꞌuraa bittuawao juꞌuneiyaatune.
\v 25 Intok jiba inieni, juꞌu tuꞌika boꞌo jooriawame,
iniꞌi juꞌunakkiachisi a juꞌuneiyaatu. Intok ka sep juꞌuneiyaatuka
juniꞌi, ka junuen tawaka, chukula jiba juꞌuneiyaatune.
\c 6
\p
\v 1 Wameꞌe Krijtota sualeka, tetekoka jiapsame, inimeꞌe,
bem tekom tua am yoꞌoreka am bitne. Junuen, juꞌu yoꞌorisi
machika itom yoꞌowa Liojtat, intok kia juꞌu itom taꞌaaka,
itom yee majtaꞌut juniꞌi, ka jaana amet noknaꞌ betchiꞌbo.
\v 2 Jumeꞌ intoko inim tetekoka, juname betchiꞌbo jiapsame,
bem tekom ket Krijtota am sualeo, inimeꞌe, bempoꞌim junuen
amemak Krijtota am sualeꞌ betchiꞌbo, ka junae betchiꞌbo
cheꞌa ka am yoꞌoreka am bitbaane. Ala cheꞌa juniꞌi junameꞌe,
tekilta tuꞌisi am jooriane. Bweꞌituk jumeꞌ enchim joaꞌu
betana tuꞌik mabetneeme, inimeꞌe, Krijtota sualeme intok
aapoꞌik betana naksi eiyaawame junameꞌe. Empo, inikaꞌa
yee majtaka iniat am tejwaane.
\s Juꞌu itom sualeꞌu, intok itom ae betchiꞌbo alleaꞌu
\p
\v 3 Senu inim jitaa taꞌabwik betana intok ka juꞌu yoꞌowe
Jesukrijtota betana tuꞌika yee majtawamtamak weyeka,
intok kia wakaꞌa Liojta junuen yoꞌoriwaka itom sualeꞌu
betana, cheꞌa bat weyeka yee majtawamta betana, ka iniamak
weyeka yee aꞌ majtaꞌateko,
\v 4 iniꞌi siꞌimem bepa au cheꞌewareka intok iniꞌi, tua
kaita taꞌaa. Jita juꞌuneiyaapeewaka aet emo nok kokobawamta
betana aet au taꞌarulaa. Intok inile benak betana, jitat
ka nau eewaka, nat koptiwame. Emo bejeꞌewame, intok ka
emo yoꞌoriwaka nau nokwame, intok ka nat yoem eewame
junama yeu weyekai.
\v 5 Intok iniꞌi, jumeꞌ tua tiusi machikut jiapseka intok
jukaꞌ lutuꞌuriata ka taꞌaammak, ka luꞌuteka nau nok nassuawame
ama aayuk. Intok inimeꞌe, Liojta aꞌ sualwaꞌpo, iniae bempo
ae tomi yoꞌowaꞌa benasi eame. Empo, jumeꞌ inien anemmak
kaitaꞌpo amemak eene.
\v 6 Juꞌunakkiachisi lutuꞌuria ala, jukaꞌ Liojta yoꞌoriwaka
aꞌ sualwaꞌut, eiyaawatchika, kaitau a tamachiatuka itom
bit machik ama aayuk. Iniꞌi junaꞌatakai, inim senuk, juꞌu
aꞌ jipueꞌue yanti elaka tua alleaka aꞌ jiapsiwame.
\v 7 Bweꞌituk inikaꞌa te juꞌuneiyaane, itepo kaitamak
tee inim yeu yoemtuk. Intok kia chukula, kokok juniꞌi,
kaita tee a weiyaane.
\v 8 Taa itepo inim jukaꞌ itom bwaꞌaneeꞌuta intok jukaꞌ
itom tajoꞌoneeꞌuta itepo aꞌ jipueꞌeteko, iniae tee tua
yanti elne.
\v 9 Taa ka inieni wameꞌe cheꞌa bepa yuꞌin totomipeame.
Inimeꞌe junaet emo taꞌaruka intok juebenaka tua ka suasi
bem eaka bem joopeaꞌu am nanasontemtat, inikaꞌa inim
siꞌimem aet emo taꞌaruka, aet kokkowamtat, jiteꞌipo benasi
aet emo kokobe.
\v 10 Bweꞌituk iniꞌi juꞌu tomit jiba eewaka, yuꞌin tomipeewame,
iniat naate siꞌime juꞌu ka tuꞌika joowame. Intok wate
aane, inikaꞌa unnaa bem aꞌ eiyaꞌ betchiꞌbo, junuen, Krijtota
bem sualeꞌuta koptalam. Intok junae betchiꞌbo tua jiokot
emo bichaka jiapsa.
\s Krijtota itom sualeꞌut tuꞌisi aet yeu yumaꞌawame
\p
\v 11 Taa empo Timoteeo, wepulsi Liojta betchiꞌbo jiapsaka
aꞌ nesaupo aneme, siꞌime inikaꞌa ka tuꞌik betana emo
suuaka, omola aꞌ eiyaane. Ala empo inim siꞌimeku, lutuꞌuriaka
tuꞌisi weyemta boꞌo jooriaka jiapsine. Iniamak Liojta
jiba alleetuaka aꞌ yoꞌorine. Intok Jesukrijtotat eakai
intok yee nak taꞌaakai, intok ka seej chukti eaka a boꞌo
bichaka, intok kaitaꞌpo emo cheꞌewareka jiapsine.
\v 12 Inia eiyaawatchik, Liojta em sual taꞌaaꞌut, jiokot
aet emo bichaka juniꞌi, jiba em aet jiapsineeꞌuta ka
aꞌ koptane. Aapoꞌik Liojta betana em mabetri, chukula
jiba yuu jiapsiwamtat utteꞌaka, jiba em aet jiapsineeꞌuta
jariune. Bweꞌituk juꞌu Lios jiba inia betchiꞌbo enchi
yeu puꞌari. Intok empo jiba iniat jiapseka, em aet eaꞌut
empo inim juebenam bichapo aet emo juꞌuneiyaa tebolaa.
\v 13 Iꞌan intoko, juꞌu Lios, inim siꞌime jiapsamta aꞌ
jiapsituamta bichapo intok juꞌu Jesukrijto, aapo ket,
waꞌa Ponsio Pilaatotukaꞌuta bichapo, aapoꞌik jabetukaꞌuta,
witti nokaka au taꞌaa tebokamta bichapo, nee enchi aet
tejwaa,
\v 14 jukaꞌ inim in enchi aet sawekaꞌuta, em aꞌ chupaꞌaneꞌ
betchiꞌbo, ka taꞌabwisia aꞌ weetuakai, inia betana yumaꞌisi
junuen kaabe jitat enchi nok tejwaakai, inikaꞌa, junaen
chukula, yoꞌowe Jesukrijtota juchi aꞌabo aꞌ notteꞌu tajtia.
\v 15 Iniꞌi chukula taewai, jaibu yeu puꞌarita aꞌ yumako,
juꞌu Lios, inikaꞌa inien yeu aꞌ weetuane. Aapo su iꞌan
junaꞌa, aapola jiba juꞌu nak yoꞌoriꞌeewaka, siꞌimeku nesaweka
Lios. Aapo, siꞌime cheꞌa yoꞌo nesaweme bepa intok siꞌime
jumeꞌ inim cheꞌa yoꞌoriwame bepa yoꞌotaka intok yoꞌoriwame.
\v 16 Aapo su junaꞌa, juꞌu wepuꞌulaka jiba, ka mumukeme.
Aapo, jum tachiria, inim yoemta kaabeta a au rukteꞌepo
jiapsame. Inim aapoꞌik kaabe aꞌ bitlaa, intok kia kaabe
inim aꞌ bitne. Aapoꞌik jiba betchiꞌbo aꞌ yoꞌorinaaꞌuta
intok jiba betchiꞌbo yoꞌotaka aꞌ nesauneeꞌuta, aapoꞌiku
lutuꞌuriatune. Tua junuentune.
\p
\v 17 Jumeꞌ inim tua yuꞌin totomeka jiapsame, kaitaꞌpo
bem emo cheꞌewarineꞌ betchiꞌbo, ameu nokne. Intok kia
bempoꞌim, ka juꞌu bem tomit jiapseka bem aet eeneꞌ betchiꞌbo
juniꞌi. Bweꞌituk iniꞌi, ka jiba siꞌimeku yee ania. Ala
bempoꞌim juꞌu Liojtat, aapo jiba yuu jiapsamtat intok
siꞌime tuꞌik itou tuꞌika yumaꞌisi itom aꞌ bittuamtat
bem eeneꞌ betchiꞌbo.
\v 18 Inimeꞌe, empo, watem betchiꞌbo tuꞌik joaka, junuen
junae, chukula jiapsineeꞌu betchiꞌbo cheꞌa eiyaawatchika
tuꞌik bem kobaꞌaneꞌ betchiꞌbo intok, bempoꞌim jukaꞌ bem
jipueꞌuta, kaachin eaka, inikaꞌa watemmeu bicha a bem
aꞌ naꞌikianeꞌ betchiꞌbo, inia betana ameu nokne.
\v 19 Inien bempo, chukula jiapsinaaꞌuta, jukaꞌ siꞌimek
bepa tuꞌik jipuꞌune. Iniat junuen bem aman lutuꞌurianeꞌ
betchiꞌbo witti aꞌ juꞌuneiyaane. Intok naa buustia, bempo,
Krijtota sualeka inim jiapsaka, junuen aapoꞌik betchiꞌbo
tuꞌik bem joaꞌuta, siꞌimekut yumaꞌisi aꞌ joaka jiapsine.
\s Paplota jiꞌojtesuꞌpo, Timoteota joo iꞌaꞌu tejwaawakaꞌpo
\p
\v 20 Empo Timoteeo, jukaꞌa, Liojta betana em au yeu puꞌarita,
em tekil maki, ka aꞌ koptaka aꞌ weetuane. Empo, inim juebenaka
nau nok nassuawaka, kaita tuꞌik suawaekamta intok kia
jukaꞌ lutuꞌuriata bejeꞌeka nokta, kia beja nokitaka juniꞌi,
suawakame ti taꞌeewamta, ili juniꞌi ka aꞌ jikkajibaane.
\v 21 Bweꞌituk waate, inien weyeka suawaekameꞌe teamta
jikkajaka, aꞌ sualeka, Krijtota bem sualeꞌuta koptaka,
omola aꞌ tawaalam.
\p Juꞌu Lios, aapoꞌik betana tuꞌik enchi aꞌ bittuane.
Tua junuentune.