\id 2TI
\h 2 TIMOTEEO
\toc1 2 TIMOTEEO
\mt 2 Timoteeo
\c 1
\s Juꞌu Paplo, juchi Timoteoꞌ teamtau jiꞌojte
\p
\v 1 Inepo Paplo, Jesukrijtota betana sawaka, nee yeteu
bittuari, Liojta junen aꞌ tuꞌurekaꞌ betchiꞌbo. Ket jiba
jukaꞌ Jesukrijtota betana, aꞌ sualeka, chukula jiba yuu
jiapsiwamta itou naꞌikiarita, inikaꞌa yee aꞌ majtaneꞌ
betchiꞌbo nee yeu puꞌari.
\v 2 Inikaꞌa jiꞌosia joꞌojteita nee eu bittua, Timoteeo,
Krijtopo in yoemia, in nakeꞌu. Inepo tua junen jiaka,
Lios itom yoꞌowa intok yoꞌowe Jesukrijtota betana, siꞌimeku
eu tuꞌik intok tua em nak jiokolinaaꞌuta intok yumaꞌisi
yanti, ka jain eaka em jiapsineeꞌuta, nee ee betana aꞌ
waata.
\s Krijtota tuꞌisi sualeka, watem ket aꞌ sualtuawaꞌpo
\p
\v 3 Taewait intok kia tukaariat naa buustia, inepo, Liojtau
bicha nokaka intok eu waateka, nee enchi nokria. Intok
nee ee betchiꞌbo jukaꞌ Liojta bai saekai. Jukaꞌ Liojta,
aapoꞌik bichapo tuꞌisi in jiapsaꞌpo ino juꞌuneiyaaka
in yoꞌoreka, ae betchiꞌbo in jiapsaꞌuta. Jiba bat naateka
taewaimmet, jumeꞌ in yoꞌowasukaꞌum ae betchiꞌbo bem jiapsaꞌa
benasia.
\v 4 Junak aman in enchi toꞌo sikaa, junamaꞌa tua em
siokaka, intok yuꞌin em opoaka betana jiba ne eu waate.
Intok inepo juchi enchi nee bitpea, junuen juchi emak
aneka, tua yumaꞌisi alleewamta bit betchiꞌbo.
\v 5 Bweꞌituk inepo, Jesukrijtota lutuꞌuriapo tua junen
jiaka em aꞌ sualeꞌubeu ne waate. Juꞌu em mala yoꞌowe,
Loiraꞌ teame intok juꞌu em ae Euniiseꞌ teame, inimeꞌe
cheꞌa bat inien tua lutuꞌuriapo aꞌ sualek. Intok inepo,
inia betana, ket jiba junuen, tua em aꞌ sualeꞌut nee juꞌunea.
\p
\v 6 Inia betchiꞌbo inepo, wakaꞌa, nee ee bepa mamteka,
Liojtau bicha enchi nokriaka, aapoꞌik betana jukaꞌ em
mabetaka, au yumaka em a joaꞌuta, ka em aawaj kopteka,
aet jiapseka em aꞌ boꞌo joorianeꞌ betchiꞌbo ne enchi
aet tejwaa.
\v 7 Bweꞌituk juꞌu Lios, inim kaitat majjaeka itom jiapsineꞌ
betchiꞌbo, jukaꞌ aꞌ tuꞌu jiapsiwata itot autuari. Ala
ikaꞌa itom yaꞌariak, ka itom koꞌom eeneꞌ betchiꞌbo jukaꞌ
utteꞌata intok itom yee nak taꞌaaneeꞌuta. Intok tuꞌik
yumaꞌisi, suasi itom ito ujuꞌuka jiapsineeꞌuta, juꞌu aꞌ
tuꞌu jiapsie iniae itot aꞌ autuari.
\v 8 Inien san empo ka tiunee jukaꞌ yoꞌowe Jesukrijtota
betchiꞌbo, aapoꞌik betana weyemta em aꞌ teuwaaneeꞌu betana.
Intok kia, nee juniꞌi, aapoꞌik mak in eaꞌ betchiꞌbo inim
in etaꞌita betchiꞌbo juniꞌi ka tiune. Ala, empo ket eu
weyemta inien juꞌu aapoꞌik bemela nok lutuꞌuriata betchiꞌbo,
jiokot emo bitwamta, inikaꞌa, jiba Liojta, aapoꞌik utteꞌata
yetet aꞌ autuaꞌut eaka aꞌ ineꞌene.
\v 9 Juꞌu Lios, itom jinneꞌuk intok inim wepulsi aapoꞌik
betchiꞌbo itom jiapsineꞌ betchiꞌbo itom yeu puꞌari.
Taa ka jita tuꞌik itom yaꞌari betchiꞌbo, ala iniꞌi, tua
aapoꞌik junen aꞌ chupaꞌabaekaꞌ betchiꞌbo. Intok Krijtota
mak itom eaꞌ betchiꞌbo itom nak taꞌaasukai. Juꞌu Lios,
bat naataka, inim aniata kee aet naateo naateka jaibu
itom nak taꞌaan.
\v 10 Taa inikaꞌa, tua yee aꞌ nakeꞌuta, aapo iꞌan jukaꞌ
Jesukrijtota, itom jinneꞌumta, inim aꞌabo aꞌ yepsakaꞌue,
iniae yee aꞌ juꞌuneiyaatua. Aapo juꞌu, jukaꞌ kokowamta,
jiba betchiꞌbo taka utteꞌakamta, kobakame. Intok aapo,
jiba aapoꞌik betana nok lutuꞌuriae yee jinneꞌumtae, jukaꞌ
jiba yuu jiapsiwamta, jukaꞌ kaibu a nasonteitumta, inim
machisi aꞌ juꞌuneiyaa tebok.
\p
\v 11 Juꞌu Lios, inikaꞌa bemela nok lutuꞌuriata, in yeteu
aꞌ teuwaaneꞌ betchiꞌbo nee yeu puꞌak. Intok aapo, juꞌu
ka jurio yoemratau bicha, inimmeu nee bittuak, junuen,
inimeꞌe in am majtaneꞌ betchiꞌbo.
\v 12 Jiba inia betchiꞌbo san, inepo, inim inien siꞌimekut
jiokot ino bicha. Taa nee ka aet tiiwe. Bweꞌituk nee
jukaꞌ jabeta in sualeka in aet yoem eaꞌuta nee juꞌunea.
Intok nee witti juꞌunea, aapoꞌik siꞌimeku aꞌ yumaꞌu, junuen
chukula, aapoꞌik aꞌabo notteꞌu tajtia, inepoꞌik in jiapsi,
intok siꞌimeta jukaꞌ aapoꞌik mampo in suꞌu tojiri, aapoꞌik
nee aꞌ suuariaka nee aet anianeꞌpo.
\p
\v 13 Empo, jukaꞌ tuꞌik betana yee majtawamta in enchi
majtaka, in enchi tejwaakaꞌuta, jiba junama waꞌam em neu
aꞌ taꞌaakaꞌa benasia aꞌ weiyaaka, junuen jiba aꞌ boꞌo
jooriane. Intok empo, siꞌimeku Krijtota mak eaka, itom
jiapsaꞌ betchiꞌbo, siꞌimeku aapoꞌik sualeka intok yee
nak taꞌaaka jiapsine.
\v 14 Juꞌu Liojta tuꞌu jiapsie, itot aꞌ jiapsineꞌ betchiꞌbo
itot jiapsituarie, junae aniawaka, Liojta betana jukaꞌ
yumaꞌisi em a joaka, jukaꞌ eu suꞌu tojirita, ka aꞌ koptaka,
jiba aet jiapsine.
\p
\v 15 Iꞌan em jaibu juꞌuneaꞌa benasia, siꞌime jumeꞌ Aasia
bwiaara betana, jumeꞌ Krijtota sualeme, nee koptaka ka
intok aꞌabo neu yaaja. Inimeꞌ nasuk kia juꞌu Pikeeloj
teame intok juꞌu Ermoojenej teame juniꞌi ketchia.
\v 16 Juꞌu itom yoꞌowa Jesukrijto, aapo jukaꞌ Onesiiporoꞌ
teamta, jumeꞌ aꞌ joꞌaapo ama jiapsame, tua am nak jiokoleka,
tuꞌik am bittuane. Bweꞌituk aapo juꞌu Onesiiporoꞌ teame,
ka nee koptakai, jue benasi, tua tuꞌik nee yaꞌarialaa.
Intok aapo junuen, inim in etaꞌitukaꞌu betana, ka inia
betana tiwekai.
\v 17 Ala junako, aapo jum bweꞌu joꞌara Roomaꞌ teaꞌpo
anekai, junamaꞌa binwaa, nee aꞌ teaꞌpo tajtia, ama nee
jaiwaka nee teak.
\v 18 Inikaꞌa, juꞌu itom yoꞌowa Jesukrijto, chukula juchi
aꞌabo nottekai, jukaꞌ cheꞌa bepa yee nak jiokoleka, aapoꞌik
betana au tuꞌik, aamak aꞌ bittuane. Empo su jaibu tuꞌisi
juꞌunea, aapoꞌik jum bweꞌu joꞌara Eepesoꞌ teaꞌpo tua
yumaꞌisi itom aꞌ aniakaꞌu.
\c 2
\s Jesukrijtota tuꞌisi nok jikkajame aꞌ sontaotukaꞌa benasia
\p
\v 1 Empo intoko in yoemia benasi in eiyaaꞌu, Jesukrijtota
mak itom aamak eaꞌ betchiꞌbo, jukaꞌ tuꞌik itom ae betana
bichaꞌutau waateka, aet utteꞌaka jiapsine.
\v 2 Empo, jukaꞌa, juebenam bichapo aneka, jukaꞌ bempoꞌim
majtaka em jikkajaka neu em taꞌaakaꞌuta, jiba inikaꞌa
naa buustia inim watem, siꞌimekut a yoem eiyaatume, inimeꞌe,
bempo naa buustia, watem aꞌ majtaꞌ betchiꞌbo au yumame
am majtaka aꞌ tekil makne.
\p
\v 3 Junuen empo, Jesukrijtota betana, senu sontaao, tekilta
tuꞌisi aꞌ jooriame takai, jukaꞌ jiokot em emo bichaꞌuta,
ka jain eaka aꞌ ineꞌene.
\v 4 Kaabe senu inim bwiapo sontaao taka tekilpo au
bichakai, iniꞌi jum ka sontao tekilpo kaibu ama annee.
Bweꞌituk utteꞌa iniꞌi, jukaꞌ sontaommeu yoꞌo yaꞌutta,
aꞌ nesaupo aman jiba aꞌ weeneꞌpo.
\v 5 Iniꞌi ket jiba inien weyekai, waꞌa, yeeuwaka yoꞌobaawaꞌpo
junamaꞌa aneme, iniꞌi, junamaꞌa kaita yoꞌoka yeu weene,
iniꞌi, junae betchiꞌbo aꞌ jooneeꞌuta aet aꞌ tejwaawakaꞌu,
ka junuen aet yeu yumakai.
\v 6 Waꞌa jum wajpo tekipanoame, iniꞌi, jukaꞌ etwakamta
bachia ama yeu sikamta, junamaꞌa au lutuꞌuriatune, aapoꞌik
cheꞌa bat, jukaꞌ au naꞌikiarita aꞌ mabetneeꞌuta.
\v 7 Empo, jukaꞌ inim in nokaꞌut, aet mammate. Intok siꞌime
inia betana juꞌu yoꞌowe Jesukrijto, aet juꞌuneeneꞌ betchiꞌbo
enchi aet aniane.
\p
\v 8 Itom yoꞌowa Jesukrijtota, aapoꞌik mukuka, kokkoarim
nasuk aꞌ jiabijtekaꞌu betana intok aapoꞌik juꞌu yoꞌo
yaꞌari, Labiitukaꞌuta yoemiam nat tomti aapoꞌikut yeu
katriam betana aꞌ weyeꞌu, iniau jiba waatine. Iniꞌi junaꞌa
juꞌu Krijtota betana bemela nok lutuꞌuria in yee majtaꞌu.
\v 9 Jiba inikaꞌa nok lutuꞌuriata in yee majtaꞌ betchiꞌbo
inepo jiokot ino bicha. Kia inepo ketchia, yee suꞌarik
weelaꞌpo, ae betchiꞌbo inim etaꞌi takai. Taa juꞌu Liojta
betana aꞌ nok lutuꞌuriawa, bichau bicha sualwaka aꞌ teuwaanaꞌ
betchiꞌbo, kaabe inien yee eꞌetawaꞌpo aꞌ tawaa.
\v 10 Inia betchiꞌbo inepo, siꞌime wameꞌe Liojta yeu
puꞌarim betchiꞌbo tuꞌik waatakai, siꞌimeta jukaꞌ neu
weyemta nee, ka jain eaka aꞌ ineꞌa. Junuen ket bempoꞌim,
jukaꞌ cheꞌa bepa eiyaawatchika, kaitau a tamachiatuka
intok inikaꞌa, jiba betchiꞌbo takai, Krijtota mak itom
nau eaꞌ betchiꞌbo jukaꞌ jinneꞌuwamta itom bittuari, bempoꞌim
ket aꞌ bitneꞌ betchiꞌbo, nee inien ino bicha.
\p
\v 11 Iniꞌi teuwaari tua lutuꞌuria:
\q Itepo iꞌan, siꞌime ka ammaꞌali weyemta betana tee Krijtota
mak, aamak kokkokame benasi ito eiyaꞌateko, ketchia, itepo,
jukaꞌ jiba yuu jiapsiwamta aamak bitne.
\q
\v 12 Itepo, inim aapoꞌik betchiꞌbo jiokot jiapsakai, ketchia
itepo, aapoꞌik nesaweka aꞌ jiapsaꞌu, junuen tee aamak
nesaweka, jiapsine.
\q Itepo inim ka aamak eaka, ka ito aꞌ taꞌaꞌati jiaꞌateko,
aapo ket chukula junuen ka itom au taꞌaꞌati jiune.
\q
\v 13 Inim itom, jukaꞌ aapoꞌik sualeka tuꞌisi itom jiapsiꞌeaꞌut
ka itom aet yeu yumao juniꞌi, aapo jiba weeꞌpo ka itom
koptaka, itom aniane.
\q Bweꞌituk juꞌu Lios, aapo kaachin jukaꞌ aꞌ teuwaaꞌuta,
ka chupaka junuen aapoꞌik Liojtukaꞌu betana a au kopne.
\s Krijtota tekilet tuꞌisi yeu yumaꞌaneeme
\p
\v 14 Inen iniau, jita etejoi kia beja nokita betana,
ka bem aet nok nassuaneeꞌu betana, Jesukrijtota betana
lutuꞌuriaka, ameu nokaka am tejwaane. Iniꞌi junuen, jita
betana nau nok nassuawame kaita tuꞌika ama yeu weama.
Ala inia betana, jumeꞌ aꞌ jikkajame, ame betchiꞌbo ka
tuꞌine.
\v 15 Empo, aet suaka emo utteꞌa jooriane, inia betana,
senuk tekipanoamta, junaet tuꞌisi weyeka, kaachin, kaitat
tiweka, tuꞌisi aꞌ mabettukaꞌa benasia, Liojta bichapo
junuen em mabettuneꞌ betchiꞌbo. Jukaꞌ Liojta nok lutuꞌuriata,
kaita beꞌeeka, yumaꞌisi yee aꞌ majtakai.
\v 16 Jukaꞌ kia beja nokita betana, kaita suawakamta
nau nok nassuawamta, empo, kia juniꞌi ka aꞌ jikkajibaane.
Bweꞌituk jumeꞌ inien nonokame, laauti, cheꞌa juniꞌi juꞌu
ka tuꞌikut emo tattaꞌaru.
\v 17 Intok inimeꞌe betana juꞌu ka tuꞌika bem yee majtaꞌu,
aꞌ jikkajame betchiꞌbo, saꞌawata ka a jittotumta, cheꞌa
bwekasi aꞌ weyeꞌe benasia ameu yeu weene. Inien san
ameu yeu siika, jumeꞌe, Imeneeoꞌ teamtau intok Pileetoꞌ
teamtau.
\v 18 Inimeꞌe, Liojta lutuꞌuriata bem sualeꞌuta omola
aꞌ tawaarika, bempo, chukula taewaita, jumeꞌ kokkoarim
aet jiabijteneeꞌu, jaibu aꞌ yumaꞌasuk ti jiakai. Intok
bempo inim, waatem, bem sualeꞌu betana, junae betana iniae
taꞌabwisi am eetua.
\v 19 Taa juꞌu Lios, senu weemta lutula weyeka, itom a
aet eaꞌuta itom juꞌuneiyaatualaa. Iniꞌi inen weyekai:
“Juꞌu itom yoꞌowa Jesukrijto, jumeꞌ lutuꞌuriapo aꞌ sualeka,
aapoꞌik yoemiam, am taꞌaa.” Intok ketchia: “Siꞌime
jumeꞌe, Krijtota emo sualeꞌeti jiame, inimeꞌe, siꞌimeta
jukaꞌ ka tuꞌik joowamta betana emo suaka, ka aꞌ joone.”
\p
\v 20 Maasu, senuk yuꞌin tomekamta bweꞌu kari joꞌaawakaꞌpo,
junamaꞌa, ka wepulsi sawai tomie intok tosai tomie yaꞌari,
sawaawame jita ama aayuk. Ala junamaꞌa ketchia inia
betana, kutae intok babue yaꞌari aayuk. Waate, ka jiba,
taa kulupti, yeu puꞌata benaku sawaawa. Wate intok, kia
jita betchiꞌbo juniꞌi sawaanaa.
\v 21 Inien, seenu, Jesukrijtota betana tekilta weyemta
betchiꞌbo, wepulsi Liojta betchiꞌbo jiapsaka, inia betana
siꞌimeku au yumaka, cheꞌa bepa tuꞌika aapoꞌik aꞌ joo
iꞌaꞌuta boꞌo jooria betchiꞌbo, iniꞌi, inim siꞌimeta jukaꞌ
ka tuꞌik betana, inikaꞌa omola aꞌ tawaaneeꞌuta au utteꞌatune.
Junako, iniꞌi siꞌime tuꞌika boꞌo jooriawamta betchiꞌbo
au yumaka tuꞌine.
\p
\v 22 Junuen san empo, inim usiraata ka tuꞌika bem tuꞌureka
ae bem emo alleetuaꞌuta, omola aꞌ tawaaka intok empo,
siꞌimeku lutuꞌuriaka tuꞌisi weyemta, intok inia mak siꞌimeku
Liojtat ee taꞌaaka intok yee nak taꞌaaka, intok siꞌimeku,
siꞌimemmak tuꞌika, yanti, ka yee bejeꞌeka jiapsine. Intok
inikaꞌa, siꞌime wameꞌe kaita ka tuꞌik joaka, intok Krijtota
bem sual taꞌaaꞌuta aꞌ teuwaaka jiapsammak anekai.
\v 23 Empo, juꞌu kia beja nooki, kaita suawakamtat, nau
nok nassuawamta, kia juniꞌi ka aꞌ jikkajibaane. Empo
su juꞌuneakai junae betana, ka nau eewaka, nau nok nassuawamta
jiba ama ayukaꞌu.
\v 24 Intok juꞌu, Krijtota betana tekilta joame, ka au
chaꞌaka, jum nau nok nassuawamta weyeꞌpo aꞌ anneeꞌu.
Ala iniꞌi, siꞌimemmak tuꞌisi weene. Iniꞌi ket tuꞌisi
a yee aꞌ majtaneeꞌuta taꞌaane. Iniꞌi, ka seej chukti
eaka, jitat a boꞌo bitne.
\v 25 Intok wameꞌe, jukaꞌ lutuꞌuriata betana taꞌabwisi
eaka aꞌ bejeꞌeme, tuꞌisi amemak weyeka, tuꞌik betana am
majtane. Junuen jukaꞌ Liojta, aapoꞌik, ka tuꞌik betana
taꞌabwisi am eetuaka, intok jukaꞌ lutuꞌuriata bempoꞌim
aꞌ taꞌaatuaneeꞌuta boꞌo bichakai.
\v 26 Junuen, tuꞌik betana aet mammateka aꞌ jajameka
intok bempoꞌim, jukaꞌ bebejeꞌerita am bai taꞌaarika aꞌ
jipueka, aapoꞌik am nok jikkajineꞌ betchiꞌbo, junama bem
ama yoꞌeeneꞌ betchiꞌbo.
\c 3
\s Chukula taewaim aꞌabo weyemmet, yoemrata jaisa jiapsineꞌpo
\p
\v 1 Ketchia empo inikaꞌa juꞌuneiyaane, inim chukula
taewaimmet jiapsinaao, junako yumaꞌane, jumeꞌ inim Krijtota
sualeme betchiꞌbo intok aapoꞌik betana bem yee majtaneeꞌu
betchiꞌbo jinilwatchika aꞌ obiachineeꞌu.
\v 2 Yoemra junako siꞌimeku bempo jiba emo nak jiokoline.
Tomit jiba emo temaine. Emo cheꞌewarine. Bem jipueꞌue
jak waꞌam yee bitne. Inimeꞌe, Liojta betana weyemta bejeꞌeka
nokne. Bem yoꞌowam ka nok jikkajine. Kaita bai saune.
Intok jukaꞌ sualwaka yoꞌoriwamta, kia jak waꞌam aꞌ bitne.
\v 3 Kaabeta jiokoli taꞌaane. Kaabetamak tuttuꞌika jiapsine.
Yetet nokaka naj katne. Inimeꞌe ka tuꞌik bem joopeaꞌut
ka emo yuꞌiine. Ka tuꞌik yeteu joone. Intok siꞌimeta
jukaꞌ tuꞌisi weyemta, aꞌ bejeꞌeka jiapsine.
\v 4 Amemak eame juniꞌi, am bejeꞌeka an jajaptene. Seej
chukti ka tuꞌik bem yaꞌaneeꞌut ka majjaune. Inimeꞌe,
ka lutuꞌuriapo, kia nokpo, siꞌimeta tattaꞌaane. Liojta
betana weyemta jaiwaka alleꞌeaka, bempo inim ka tuꞌikue
jiba bem alleeneeꞌuta jariune.
\v 5 Inimeꞌe tua lutuꞌuriapo benasi jukaꞌ sualwamta
ka aꞌ koptaine, taa inia betana juꞌu Liojta betana weyeka
bem jiapsimmeu tuꞌika ama ayukamta, omola aꞌ tawaane.
\p Emeꞌe, jumeꞌ inile benasi jiapsame betana emo suuaka,
ka enchim am bai taꞌaatuane.
\v 6 Bweꞌituk inime betana san, jumeꞌ joꞌarammet kateka,
intok junamaꞌa jumeꞌ jaamuchim, jumeꞌ kaita tattaꞌaame
intok siꞌime ka tuꞌik boꞌo jooriame, ameu am jojoiwatuaka,
am bai tattaꞌaame aane. Inimeꞌe jaamuchim san, juꞌu ka
nanau machik ka tuꞌik bem joopeaꞌu betana ka a emo yuꞌee.
\v 7 Inimeꞌe, jiba jita emo majta, taa junuen taka juniꞌi,
bempo, Liojta betana lutuꞌuriata ka aꞌ taꞌaa machi.
\v 8 Intok iniꞌi, jiba jumeꞌ junako yee sisibowamta weetuaꞌum,
Jannes intok Jamrej ti teakaꞌum, inimeꞌe jukaꞌ Moiseejtukaꞌuta
boꞌo jooriaꞌu betana aꞌ bejeꞌeka anekaꞌum benasia, ketchia
inimeꞌe oꞌowim, Liojta betana jukaꞌ lutuꞌuriata aꞌ bejeꞌeka
aane. Inimeꞌe oꞌowim, ka tuꞌik boꞌo jooriapeewamtae nasontulam.
Intok Liojta betana weyemta bem sualeꞌuta kaita amet
ayukaꞌpo juꞌuneiyaawa.
\v 9 Taa inia betana, inimeꞌe, inikaꞌa bejeꞌeka bem joaꞌu,
ka tua yumaꞌisi, kaita kobaka ama yeu katne. Bweꞌituk
siꞌime am juꞌuneiyaane, inimeꞌe jukaꞌ bem yaꞌari, tua
ka suawaka aꞌ weyeꞌu. Jiba junuen jumeꞌ woika, Moiseej
tukaꞌuta aꞌ bejeꞌeka aukame, junae betana ameu yeu aꞌ
sikaꞌa benasia.
\s Ka intok au jiꞌojteneeka, juꞌu Paplo, Timoteotat nesawe
\p
\v 10 Taa empo, jukaꞌ in yee majtai, tua yumaꞌisi aꞌ taꞌaaka,
jiba aet jiapsek. Inim tuꞌisi in jiapsaꞌut intok inim
jukaꞌ in aet jiapseka in aet yeu yumaꞌapeaꞌut. Krijtota
tua in aꞌ eiyaaka jiapsekaꞌut. Siꞌimeku a in boꞌo bichaꞌut.
Jukaꞌ in yee nak taꞌaaka jiapsaꞌut. Intok siꞌime neu
weyemta, ka jain eaka in aꞌ ineꞌaaꞌut.
\v 11 Iniꞌi, Krijtota mak in eaꞌ betchiꞌbo, inepo jajjawaka
intok jiokot ino bichakai jiba ka taꞌabwisia, taa Krijtota
mak eaka in jiapsaꞌu. Empo, jukaꞌa, jum bwere joꞌaram,
Antiokiaꞌ teaꞌpo intok Ikoonioꞌ teaꞌpo intok Lijtraꞌ
teaꞌpo, junaman siꞌimeta jukaꞌ neu suawaka, jiokot in
bitwakaꞌuta empo aꞌ juꞌuneiyaa. Taa junaman juꞌu yoꞌowe
Jesukrijto, siꞌime inia betana nee aniaka nee ama yoꞌeetuak.
\v 12 Bweꞌituk inia betana lutuꞌuria, inim siꞌime jumeꞌe,
wepulsi Krijtota betchiꞌbo jiapsibaeme, inimeꞌe, ameu
suawaka, bem jiokot emo bitneeꞌuta ameu aꞌ auneꞌpo.
\v 13 Taa jumeꞌ ka tuꞌi yoemem intok jumeꞌe, jukaꞌ aa
nokiꞌichiata yee sualtuaka am majtame, inimeꞌe cheꞌa
juniꞌi tua bem ka tuꞌi yoememtu sakaneeꞌu amet aune.
Inimeꞌe, yee bai tattaꞌaaka intok naa buustia bempo juniꞌi
bai taꞌaarim takai.
\p
\v 14 Taa iꞌan, empo, jukaꞌ em taꞌaalaaꞌuta empo inikaꞌa
aꞌ lutuꞌuriatukaꞌuta aꞌ mammateka em aet juꞌuneaꞌuta,
ka aꞌ koptaka, bichau bicha aet jiapsine. Empo su jaibu
juꞌunea, inikaꞌa jabetau em aꞌ taꞌaakaꞌuta.
\v 15 Bweꞌituk empo, jumeꞌ Liojta betana jiꞌosia jiꞌojteim,
inimeꞌe, tuꞌikut enchi majtaneeme, intok inimeꞌe enchi
aet juꞌuneetuame, Jesukrijtota, aꞌ sualeka aapoꞌik betchiꞌbo
em jinneꞌui tuneeꞌuta.
\v 16 Siꞌime iniꞌi Liojta betana nooki jiꞌojtei, jumeꞌ
aꞌ jiꞌojtekame, Liojta betana tua aꞌ eaꞌpo aman juꞌuneetuawaka
aꞌ jiꞌojtek. Intok iniꞌi san, Liojta betana lutuꞌuriata,
yee ae majtapo intok iniae, ka ammaꞌali jiapsiwamta betana
intok junuen, Liojta bichapo, siꞌimeku tuꞌisi jiapsiwamta
betana, iniꞌi, yee ae aniapo tuꞌi.
\v 17 Junuen iniae, itom jumeꞌ Liojta betchiꞌbo jiapsame,
inim siꞌime tuꞌisi weyemta, yumaꞌisia au yumaka, a itom
aꞌ jooneꞌ betchiꞌbo.
\c 4
\p
\v 1 Liojta bichapo, intok juꞌu itom yoꞌowa Jesukrijtota
bichapo, iniꞌi, aapo juꞌu aꞌabo, senuk siꞌimem bepa cheꞌa
yoꞌo yaꞌataka katekamta benasi weyeka intok inim, wameꞌe
jiapsame intok jumeꞌ kokkolam am yaꞌuraa bittuaneemta
bichapo, inepo nee tua junen jiaka,
\v 2 jukaꞌ Krijtota bemela nok lutuꞌuriata, jiba weeꞌpo,
ee betana aꞌ jikkajibaawao, intok kia ka aꞌ jikkajibaawao
juniꞌi, em yeteu aꞌ nokneꞌ betchiꞌbo nee enchi aet tekil
maka. Empo, aet yanti elaka bempoꞌim aꞌ mabet maisi ameu
aꞌ teuwaane. Intok tuꞌisi bem jiapsaꞌu betana, tuꞌikut
ameu noknee. Inia betana, a em boꞌo bichaka em yee majtaꞌuta
et bit tebokai.
\v 3 Bweꞌituk inim chukula taewaim yumaꞌane, junako jukaꞌ
yoemrata, juꞌu tuꞌik betana weyeka bempoꞌim majtawaꞌuta,
ka aꞌ eiyaaka, ka aꞌ mabetbaaneeo. Ala inimeꞌe, bempoꞌim
eaꞌpo aman, bem tuꞌureeꞌu betana, juebenam jumeꞌ am majtaneeme
jariwaka, bempoꞌim am majtatuane.
\v 4 Jukaꞌa, Liojta betana nok lutuꞌuriata jikkajiꞌeaka
su, omola aꞌ tawaaka intok inimeꞌe, siꞌimeta ka lutuꞌuriata,
aa nokiꞌichiata aꞌ jikkajipeene.
\v 5 Taa empo, jiba jukaꞌ siꞌimeku suasi jiapsaka em
emo ujuꞌuneeꞌuta, ka aꞌ koptaine. Aapoꞌik betchiꞌbo em
jiokot emo bitneeꞌuta, ka aꞌ majjaune. Empo, jukaꞌ Krijtota
nok lutuꞌuriata, yee aꞌ majtaka, aꞌ sual tebone. Jukaꞌ
em au yeu puꞌarit, em a joaꞌuta, tuꞌik tekilet, tuꞌisi
aet yeu yumaꞌane.
\p
\v 6 Inepo ala, nee inim in meꞌetuneeꞌu betana, jaibu
abe net nesawa. Intok juꞌu taewai, Krijtotamak anneeka
in aet luꞌutineeꞌu, jaibu yumaꞌasek.
\v 7 Ineponee inim tua juebenaka obiachiku jiokot ino
bitchuk. Intok inepo, Krijtota in aꞌ sual taꞌaaꞌuta, ka
aꞌ taꞌaruka, inepo inim Krijtota sualeka jiapsaka, aapoꞌik
betchiꞌbo in jooꞌeaꞌuta, kaita ama beꞌeekai, nee aet yeu
yumaꞌasuk.
\v 8 Intok iꞌani, inim siꞌimeku Liojta bichapo tuꞌisi
jiapsiwaka yee makwaꞌu, kaitau a tamachiatuka, tuꞌika
aamak in bitneeꞌu, iniꞌi, chukula yoꞌowe Jesukrijto, aapo
yeteu aꞌ lutuꞌuriatukaꞌpo aman yee yaꞌuraa bittuame,
junae taewait nee aꞌ bittuane. Intok inikaꞌa, ka nee
inepolaik jiba, aꞌ bittuanee junae taewaitchi. Ala inikaꞌa,
siꞌime jumeꞌ jiba aapoꞌik nak taꞌaaka, juchi aꞌabo aꞌ
nottineeꞌuta aꞌ bitpeaka jiapsisukame.
\s Paplota, jukaꞌ Timoteota aꞌ yaꞌaria iꞌaꞌu
\p
\v 9 Empo lauti aꞌabo em nee bitneꞌ betchiꞌbo, nee jiokoeka,
lauti aꞌabo weene.
\v 10 Bweꞌituk juꞌu Lemaaj teame, aapo ka intok neu yepsaka
inim nee toꞌo simlaa. Bweꞌituk aapo inim jukaꞌ ka Liojta
betana weyeka joowamta cheꞌa aꞌ tuꞌurekai. Intok aapo
jum bweꞌu joꞌara Tesaloonikaꞌ teaꞌu bicha simlaa. Juꞌu
Kreseenteꞌ teame, aman bwiaara Kalaasiaꞌ teaꞌu bicha
simlaa. Juꞌu intok Tiitoꞌ teame, bwiaara Lalmaasiaꞌ teaꞌu
bicha siika.
\v 11 Inim, kia juꞌu Luukaj teame jiba nemak tawalaa.
Junaman jukaꞌ Maekoj teamta jaiwaka, aapoꞌik aꞌabo nuꞌupane.
Bweꞌituk aapo tekilta a nee jooria.
\v 12 Jukaꞌ Tikiikoꞌ teamta nee aman bweꞌu joꞌara Eepesoꞌ
teaꞌu bicha nee aꞌ bittualaa.
\v 13 Intok empo, aman jumeꞌ tebeka in bepa tajoꞌoreꞌum,
jum bweꞌu joꞌara Tooaj teaꞌpo, seenu, Karpoꞌ teamta joꞌaapo
in toꞌo sikaꞌum, empo bina bicha weyeo, ka am koptaka,
neu am nuꞌupane. Intok ket jumeꞌ liprom. Taa nee jumeꞌ
jiꞌosia jiꞌojteim cheꞌa juniꞌi nee am boꞌo bicha.
\p
\v 14 Jukaꞌ sisiꞌiwookta tekipanoame, juꞌu Alejanroꞌ
teame, ka tuꞌik buꞌuuk neu yaꞌalaa. Taa aapo juꞌu achai
Lios, aapoꞌik neu yaakaꞌuta, jiba junaen aꞌ bittuane.
\v 15 Empo inia betana ket emo suuane. Bweꞌituk iniꞌi,
Krijtota betana itom yee majtaꞌuta, tua namakasi aꞌ bejeꞌeka
aane.
\p
\v 16 Junako, cheꞌa bat yaꞌuraatau nee yeu tojiwao, kaabe
nee nokriak. Taa junamaꞌa siꞌime nee ama inepolaika
toꞌo sajak. Junuen taka juniꞌi, tua tuꞌi ean, juꞌu Lios
aet am jiokoeko.
\v 17 Taa junamaꞌa juꞌu yoꞌowe Jesukrijto, nemak tuka
intok kaachin in eeneꞌ betchiꞌbo, nee aniak. Junuen san
inepo junamaꞌa, jukaꞌ Jesukrijtota betana nok lutuꞌuriata
aꞌ teuwaaka intok junuen, siꞌime jumeꞌ ka jurio yoemrataka
ama aneme, nee aꞌ jikkajituak. Intok jiba junaen juꞌu
Lios, junamaꞌa unnaa jinilwatchiku, jiba ousei tebauremta
betana nee jinneꞌukamta benasi aayuk.
\v 18 Intok ketchia, aapo siꞌimeku inim juꞌu ka tuꞌik
betana, ka in aet jiꞌopneꞌ betchiꞌbo, nee aniaka nee ama
yoꞌeetuane. Intok chukula, jum aapoꞌik yoꞌo nesaweka
aꞌ katekaꞌu, teekau in aamak anneꞌ betchiꞌbo, junak tajtia
siꞌimeku nemak tune. Aapoꞌiku, jiba betchiꞌbo aapoꞌik
yoꞌoriwaka aꞌ alleetuaneeꞌu au lutuꞌuriatune. Tua junuentune.
\s Jiꞌojtesuka aꞌ tebotua intok Liojta betana au tuꞌik aꞌawa
\p
\v 19 Jukaꞌ Piijkaꞌ teamta intok jukaꞌ Akiilata intok
siꞌime jumeꞌ Onesiiporoꞌ teamta joꞌaapo joꞌaakame, empo
nee am tebotuariane.
\v 20 Juꞌu Erajtoꞌ teame, jum bweꞌu joꞌara Korintoꞌ teaꞌpo
taawak. Jukaꞌ Toopimoꞌ teamta intok, koꞌokoemta nee joꞌara
Mileetoꞌ teaꞌpo aꞌ toꞌo siika.
\v 21 Empo, baji metpo sebeneeka kee aꞌ yumao, aꞌabo wee
betchiꞌbo emo bamijtuane. Jumeꞌ inen teakame eu tebote,
juꞌu Euboloꞌ teame, juꞌu Puurej teame, juꞌu Linoꞌo teame,
juꞌu Kaauriaꞌ teame intok siꞌime jumeꞌ inim Krijtopo
itomak werim.
\p
\v 22 Aapo juꞌu yoꞌowe Jesukrijto, siꞌime em jiapsaꞌut
jiba emak tune. Intok juꞌu Lios, siꞌime enchim, aapoꞌik
betana tuꞌik enchim bittuane.