\id PHM
\h PILEMON
\toc1 PILEMON
\mt Pilemon
\c 1
\s Juꞌu Paplo, Pilemon teamtau jiꞌojte
\p
\v 1 Inepo Paplo, Jesukrijtota betchiꞌbo etaꞌitakai intok
juꞌu Krijtopo itomak weri, Timoteoꞌ teamtamak aneka, ikaꞌa
jiꞌojteita ne eu jiꞌojte, itom nakeꞌu Pilemon teame, empo
Liojta tekilpo itom aniame.
\v 2 Intok jumeꞌ Krijtota sualeka em joꞌapo nau emo
totojammewi, intok ket jukaꞌ itomak weri, Appiaꞌ teamta
intok ket junuen, jukaꞌ itom aniaka tekipanoamta, Arkiipoꞌ
teamtau, inimeꞌe siꞌimemmeu jiꞌojteka am tebotua.
\v 3 Itom achai Liojta betana intok itom yoꞌowe Jesukrijtota
betana, jukaꞌ emou tuꞌuwatunemta enchim alleeneeꞌuta
intok enchim jiapsimpo yanti elwamta em bitne.
\s Juꞌu Pilemonta Krijtota sualeka, yeꞌa nakeꞌu
\p
\v 4 Jiba ne Liojta aet bai sae, eu waatekai, au bicha
in nokaꞌabeleki.
\v 5 Yoꞌowe Jesukrijtota em nakeꞌpo intok em aꞌ sualeꞌpo
intok siꞌime jumeꞌ Krijtopo emak werim em am nakeꞌpo
enchi juꞌuneiyaakai.
\v 6 Intok junueni, Lios aapo am aniane, jumeꞌe, Krijtota
tuꞌisi em sualekaꞌ betchiꞌbo, ket Krijtota suallame.
Ket bem junuen tuꞌisi aꞌ juꞌuneiyaaneꞌ betchiꞌbo, siꞌimeta
jukaꞌ tuꞌik, ae betana itou bittuawakaꞌuta.
\v 7 Intok tuꞌisi te allea, Krijtota tuꞌisi em nakeꞌ
betchiꞌbo. Intok ket, ee betchiꞌbo, itou weyemta te ka
juiwaka, ito ousi eiyaa. Bweꞌituk, itomak weri, ee betchiꞌbo,
jumeꞌ aman Krijtota sualeme, jiapsi joteꞌelam.
\s Juꞌu Paplo, Oneesimoꞌ teamta betchiꞌbo ujbwanta aꞌawa
\p
\v 8 Inia betchiꞌbo san, Krijtota tekilpo in aneꞌ betchiꞌbo,
em jooneeꞌut enchi in sauneꞌpo neu lutuꞌuria oꞌoben.
\v 9 Taa cheꞌa ne inen aꞌ tuꞌure, in enchi nakeꞌ betchiꞌbo,
ne eu ujbwana, inepo Paplo, jaibu yoꞌotuitakai, intok Jesukrijtota
in sualeꞌ betchiꞌbo, etaꞌitakai.
\v 10 Oneesimoꞌ teamta betchiꞌbo ne tua eu ujbwana, inim
in etaꞌipo, Krijtota nok lutuꞌuriata in au nokaka aapoꞌik
aꞌ sualekaꞌ betchiꞌbo, juꞌu Krijtopo tua in yoemiata
betchiꞌbo.
\p
\v 11 Bat naataka iniꞌi Oneesimo, enchi tekokai, kaitaꞌpo
enchi anian. Taa iꞌani, siꞌimeku a itom aniane.
\v 12 Inikaꞌasan ne juchi eu bittua, in eu yepsakaꞌa
benasia em aꞌ mabetneꞌ betchiꞌbo.
\v 13 Nee cheꞌa, im in etaꞌiꞌpo, nemak aꞌ tawaatuapea
oꞌoben, intok Krijtota nok lutuꞌuriata betchiꞌbo im in
etaꞌatuneꞌpo tajtia, ee betchiꞌbo, nee aꞌ bit iꞌakai.
\v 14 Taa nee, kia inepo in eaꞌpo, ka im aꞌ tawaak. Ka
emak aꞌ lutuꞌuria yaakai. Intok junuen em nee aniaka
em yaꞌaneeꞌuta, ka utteꞌapo benampo aꞌ joone, taa cheꞌa
em aꞌ joopeaꞌpo amantune.
\v 15 Jiba tua, jumak, juꞌu Oneesimo, chuuba enchi toꞌo
simlatukan, junuen, iꞌan, jiba emak tawaabaekai.
\v 16 Taa iꞌan, ka bat naataka em aꞌ jipueꞌe benasia
aꞌ mabetne. Taa cheꞌa aꞌ eiyaakai, ka enchi aꞌ teko iꞌakai,
taa em aꞌ sailaka aꞌ nakeꞌe benasia aꞌ mabetne. Inepo
ala nee tuꞌisi aꞌ nake. Taa empo nee bepa cheꞌa aꞌ nakpo
yumaꞌi. Ka kia ele benasia aꞌ yoemtukaꞌ betchiꞌbo jiba,
taa cheꞌa, Krijtopo emak aꞌ weriakaꞌ betchiꞌbo.
\p
\v 17 Junuen san, empo, wepulsi nemak eaꞌateko, nee em
mabetaꞌa benasia aꞌ mabetne.
\v 18 Intok ka ammaꞌali emak aꞌ tawalatuko, intok enchi
aꞌ wikiriao, aapoꞌik wikiriaꞌuta, neu aꞌ aꞌaune.
\v 19 Inepo Paplo, in maamea inikaꞌa ne eu jiꞌojte. Inepone
enchi aꞌ bejeꞌetuane. Nee intok enchi a au waatitua
oꞌoben, Krijtota em sualeꞌ betchiꞌbo, em nee wikiriaꞌa
benasia em machiakaꞌpo.
\v 20 Jeewi, nemak weri, ikaꞌa ujbwanta nee yaꞌariane,
yoꞌowe Jesukrijtota em sualeꞌpo amani, intok Krijtopo
em nemak weriakaꞌ betchiꞌbo, inikaꞌa nee yaꞌariaka in
jiapsi alleetuane.
\p
\v 21 Inikaꞌa inien ne eu jiꞌojte, em nee nok jikkajineꞌpo
juꞌuneakai. Intok ne juꞌunea, ka kia in enchi yaꞌasaeꞌuta
jiba em yaꞌaneꞌpo.
\v 22 Intok ket, jiba junaensu, iiyilen ne eu ujbwana,
ama in yebijneeꞌuta, nee beas aꞌ tuꞌutene. Bweꞌituk inepo
Liojtat ne boꞌo bicha, in emou noitineꞌ betchiꞌbo, nee
aꞌ ania neꞌpo, au bicha enchim nee nokriakaꞌpo amani.
\s Jiꞌojtesuk am tebotua, intok Liojta betana ameu tuꞌik aꞌawa
\p
\v 23 Juꞌu, Jesukrijtota betchiꞌbo im nemak etaꞌi, Epaapraj
teame eu tebote.
\v 24 Intok Maekoj teame, intok juꞌu Arijtaarkoꞌ teame,
intok juꞌu Lemaj teame intok juꞌu Lukaj teame, tekilpo
nemak aneme, siꞌime enchim tebotua.
\p
\v 25 Itom yoꞌowe Jesukrijto, aꞌ tuꞌuwae enchi alleetuane.
Tua junuentune.