\id JAS
\h SANTIAAKO
\toc1 SANTIAAKO
\mt Santiaako
\c 1
\s Juꞌu Santiaakoꞌ teame, Krijtota sualeka, naꞌikimtulammeu jiꞌojte
\p
\v 1 Inepo Santiaakoꞌ teame, achai Liojta betana intok
yoꞌowe Jesukrijtota betana sawame, Ijraꞌeltukaꞌuta betana,
jumeꞌ woj mamni ama wooi aꞌ yoemiam betana jukaꞌ yoemrata
aniat yeu tajtia naꞌikimtulame, ne am tebotua.
\s Juꞌu suawa, Liojta betana weyeme
\p
\v 2 Krijtopo nemak werim, emeꞌe, ka nanau machika, betteka
emou weyemtae jiꞌobilaawako, kaachin eaka, alleene.
\v 3 Bweꞌituk emeꞌe jaibu juꞌunea, Krijtota enchim sualeꞌut
emeꞌe junuen jiꞌobilaawakai, ka seej chukti eaka, a enchim
boꞌo bitneeꞌuta taꞌaane.
\v 4 Intok emeꞌe junuen, a enchim boꞌo bichaꞌut jiapseka,
ka aꞌ koptane. Junuen, yumaꞌisi tuꞌik joaka enchim jiapsaꞌu
tajtia. Enchim juꞌuneiyaaꞌeaꞌuta kaita emou beꞌeekai.
\p
\v 5 Emo betana seenu, wate weemtat juꞌunee betchiꞌbo
ka koba suawako, Liojtau bicha aꞌ aꞌaune. Juꞌu Lios intok
junaet aꞌ aniane. Bweꞌituk aapo juꞌu Lios, siꞌimem, siꞌimekut
a am ania, intok kaabeta jitat tiusi aꞌ tawaakai.
\v 6 Taa inikaꞌa, tua Liojtat eaka aꞌ aꞌaune, ka taꞌabwisi
intok ee simekai. Bweꞌituk, juꞌu, ka aet eame, bawepo, baꞌa
roꞌaktiam benane, jekae naas weyeawakai.
\v 7 Juꞌu inien eame, achai Liojta betana kaita mabet
boꞌo bitne.
\v 8 Bweꞌituk juꞌu, junuen ka wepulsi eame, kaachin wepulsi
weyemtat yeu yumaꞌane.
\p
\v 9 Juꞌu Krijtota sualeme, kaita jipueme, alleene, Liojta
betana aꞌ eiyaawaꞌpo juꞌuneakai.
\v 10 Juꞌu intok Krijtota sualeme, tomekai, alleene, jaibu
ka intok au aꞌ cheꞌewareꞌ betchiꞌbo. Bweꞌituk juꞌu yuꞌin
tomekame, juya sewata benasi maachi, ka a binwatune.
\v 11 Maasu, jukaꞌ taꞌata unnaa utteꞌako, juꞌu juya waknee
intok juꞌu aꞌ seewawa wetne. Juꞌu aꞌ ujyoriawa luꞌutine.
Ket jiba junaeni, juꞌu yuꞌin tomekame, inim ujyoisi jiapsaka
juniꞌi, seej chukti luꞌutine.
\s Itom jiꞌobilaawaꞌu intok juꞌu itom ae jiꞌobilaawaꞌu
\p
\v 12 Tua alleenee juꞌu yoeme, juꞌu au weyemta, ka seej
chukti eaka aꞌ ineꞌaame. Bweꞌituk chukula, junuen tuꞌisi
yeu sikaa, juꞌuneiyaawaꞌateko, ujyoik aꞌ yoꞌoneeꞌu benasia,
Liojta betana jukaꞌ jiba yuu jiapsiwamta mabetne, Liojta,
jumeꞌ aꞌ nakemmeu aꞌ naꞌikiakaꞌuta, aꞌ mabetne.
\v 13 Seenu, jabetaka juniꞌi, ka tuꞌik joobaemeta, ka Liojta
betana junuen aꞌ antuawaꞌa benasi eene. Bweꞌituk juꞌu
Lios, jukaꞌ ka tuꞌik aꞌ jooneeꞌuta, ka aꞌ taꞌaa. Intok
kia jukaꞌ ka tuꞌik, kaabeta aꞌ joopeꞌeetua juniꞌi.
\v 14 Taa ala, seenu, ka tuꞌik aꞌ joobaeꞌu betchiꞌbo, aꞌ
boꞌo jooriabaeme, junak san junaꞌa, ka tuꞌik joopeaka
aane.
\v 15 Iniat, ka tuꞌik senuk joopeaꞌut yeu weama, Liojta
bichapo juꞌu ka tuꞌuwa. Iniat ka tuꞌikut chaꞌakai intok,
tua ama butti aꞌ weyeo, aꞌ mukneeꞌuta au chupne.
\p
\v 16 Krijtopo nemak werim, in nakeꞌum, ka emeꞌe aet jiꞌopne.
\v 17 Siꞌimeta jukaꞌ lutuꞌuriakamta, intok tuꞌika au
yumaka, a itom boꞌo jooriaꞌuta, itot autuari, jikat betana,
Liojta betana weye, juꞌu teekau, jumeꞌ chokim yaakame.
Juꞌu Lios ket, wepulsi, ka taꞌabwisi intok aane. Intok
jukaꞌ jekkaata, omot bicha aꞌ yejteꞌpo benasi juniꞌi,
ka aꞌane.
\v 18 Intok aapoꞌik nok lutuꞌuriae, bemela jiapsiwamta
itot autuari aapoꞌik junuen eakaꞌ betchiꞌbo. Junuen
itom bemelasi, siꞌimem jumeꞌ aapoꞌik juꞌunakteim betana
cheꞌa bat itom eiyaimtuneꞌ betchiꞌbo.
\s Juꞌu, tua lutuꞌuriapo Liojta sualwame
\p
\v 19 Inia betchiꞌbo san, Krijtopo nemak werim, in nakeꞌum,
emeꞌe, weꞌepulaka, watem bat jikkajibaekaꞌeene. Taa ka
emeꞌe bat nokbaekaꞌeene. Intok ka baamiajtaka oꞌomtine.
\v 20 Bweꞌituk juꞌu omteme, ka jukaꞌ tuꞌik, Liojta tuꞌureꞌuta
yaꞌane.
\v 21 Jiba inia betchiꞌbo san, emeꞌe, siꞌimeta jukaꞌ ka
tuꞌisi enchim tawaamta koptane. Intok juebenaka jukaꞌ
ka tuꞌisi weyemta, jitat tiusi boꞌo jooriawamta suꞌu
tojaꞌem. Intok emeꞌe, Liojta betana nok lutuꞌuriata enchim
majti, alleaka aꞌ jikkajaka aꞌ tuꞌu mabetne. Bweꞌituk
iniꞌi Liojta nok lutuꞌuria, enchim jinneꞌu betchiꞌbo
utteꞌak.
\p
\v 22 Taa emeꞌe, jukaꞌ Liojta nok lutuꞌuriapo enchim
majtawaꞌuta, aꞌ yaꞌane, ka kia beja aꞌ jikkajakai tawane.
Bweꞌituk junuen emeꞌe emo bai tattaꞌaane.
\v 23 Bweꞌituk juꞌu, kia beja tua, jukaꞌ Liojta nok lutuꞌuriata
aꞌ jikkajakame, intok ka aꞌ majtawaꞌuta boꞌo jooriame,
junaꞌa, senuk jitaꞌapo au aꞌ bichaꞌa benasi annee.
\v 24 Bweꞌituk iniꞌi, tua aꞌ machiakaꞌut au bitne, taa
junamaꞌa lautipo sikaa, aawaj koptinee juꞌu aꞌ machiakaꞌpo.
\v 25 Taa juꞌu, nokta aꞌ jikkajaꞌuta, ka kia beja aꞌ jikkajame
taa ala, Liojta betana tuꞌi nok lutuꞌuriata, jukaꞌ ka
tuꞌik boꞌo jooriawamta betana itom yoꞌeetuamta, aꞌ mammateka
intok ka aꞌ koptakai, taa tuꞌisi aꞌ boꞌo jooriame, junaꞌa,
aꞌ joaꞌut, tua alleaka aet yeu weamne.
\p
\v 26 Emo nasuk seenu, Liojta au suale ti eame, taa aꞌ
nokaꞌu betana ka au suuame, aapo au bai taꞌaane, intok
juꞌu aꞌ sualeꞌut kaita jajjame.
\v 27 Juꞌu Liojta tua junama waꞌam aꞌ sualwame intok
aapoꞌik Lios achaita bichapo tuꞌik ausuꞌlik weiyaame
iniꞌi junaꞌa, jumeꞌ ka yoꞌowakame aniawame. Intok jumeꞌ
jaamut jokoptuim jiapsi joꞌawame jiokot emo am bichao.
Intok inim aniapo ka tuꞌik weyemta betana emo suakai.
\c 2
\s Siꞌimem itepo nanancha eiyaanee
\p
\v 1 Krijtopo nemak werim, emeꞌe, jumeꞌ yoꞌorisi machika,
itom yoꞌowe Jesukrijtota sualeme, ka emeꞌe ket watem
cheꞌa eiyaaka, watem intok ka eiyaabaane.
\v 2 Maasuko, jum emo nau totojaꞌpo, senuk sawai tomie
yaꞌarita mam pusiampo aꞌ yechaꞌik intok tuꞌik tajoꞌorekamta
ama yepsako, taa ket intok senuk, kaita jipueka, ka tuꞌik
tajoꞌorekamta ket ama aneo,
\v 3 intok emeꞌe, jukaꞌ tuꞌik atteaka weyemta, cheꞌa tuꞌisi
mabetaka: “Inimiꞌi, cheꞌa tuꞌikun yeesa”, ti au jiaꞌateko.
Taa juꞌu ka tomekamtau: “Empo aman keka, oo im bwiapo
yeesa”, ti au jiaꞌateko,
\v 4 emeꞌe junuen, emo nasuk, ka nanancha emo eiyaa. Intok
emeꞌe junuen, yeteu emo yoꞌo jooamta benasi aane, ka tuꞌisi
eakai.
\p
\v 5 Krijtopo nemak werim, in nakeꞌum, inikaꞌa em jikkaja.
Juꞌu Lios, jumeꞌ inim, tua kaita jipueme, yeu puꞌari, junuen
junameꞌe Krijtota tuꞌisi sualekai, inim ayukamta bepa,
cheꞌa eiyaawatchik bem jipuꞌuneꞌ betchiꞌbo. Intok ket
chukula, jumeꞌ aapoꞌik nakeme, aapoꞌik betana jukaꞌ tuꞌik
ameu aꞌ naꞌikiakaꞌuta, bem aꞌ mabetneꞌ betchiꞌbo.
\v 6 Taa iꞌan intok, emeꞌe, jumeꞌ kaita jipueme tiusi
am tatawa. Bweꞌituk jumeꞌ totomekame junameꞌem, jumeꞌe,
enchim jita uꞌaame, intok jumeꞌ yaꞌuraata bichapo enchim
yeu tojame.
\v 7 Intok bempo junameꞌe, jumeꞌe, yoꞌowe Jesukrijtota
team jaana jiawaame, jukaꞌ enchim aꞌ sualeꞌ betchiꞌbo,
enchim Krijtiaanompo taꞌeewaꞌuta.
\p
\v 8 Taa emeꞌe tua lutuꞌuriapo Liojta betana nesaurita
joaꞌateko, siꞌimem bepa eiyaawatchisi machik, Liojta nok
lutuꞌuriapo aꞌ jiꞌojteitukaꞌpo amani inen jiamta: “Ele
benasi yoemta, em emo nakeꞌe benasi aꞌ eiyaaka aꞌ nakne”,
ti jiamta junak emeꞌe tuꞌisi annee.
\v 9 Taa emeꞌe ka nanancha yee eiyaaka watem cheꞌa eiyaꞌateko,
ka tuꞌuwata emeꞌe joone. Intok Liojta nok lutuꞌuria
nesauta bejeꞌeka Liojta bichapo ka tuꞌisi aulamtune.
\v 10 Bweꞌituk seenu, Liojta betana nok lutuꞌuria nesauta
yumaꞌisi siꞌimeta boꞌo jooriaꞌateko, taa junae nesauta
betana, wepuꞌulaik juniꞌi yeu beꞌaaka, junakaꞌa nesauta
betchiꞌbo siꞌimem bejeꞌeka, ka tuꞌisi tawane.
\v 11 Bweꞌituk jiba aapo juꞌu Lios: “Jamutta, ka aꞌ
jubeka, ka aamak emo tuꞌurine”, ti jiakame, ket: “Kaabeta
meꞌene”, ti jiiak. Junuen san, seenu, ka taꞌabwi jamuttamak
au tuꞌureka juniꞌi, taa yee suꞌako, junak, junuen Liojta
nok lutuꞌuria nesaurita bejeꞌeka, ka tuꞌisi aune.
\v 12 Emeꞌe, enchim nokaꞌu betana intok inim juꞌu enchim
emo ujuꞌuneeꞌu betana tua enchim emo suuaneeꞌu, utteꞌa.
Inim Krijtota betana nesauri itom aniamta, utteꞌataka
tuꞌika itom jooꞌeaꞌut, iniꞌi nesauri itom juꞌuneetuamta
betana emeꞌe yaꞌuraa bittuanaame benasi eakai.
\v 13 Bweꞌituk, jumeꞌe, ame benasi yoemem ka jiokolisukame,
junaen, ka jiokoliwaka, yaꞌuraa bittuane. Taa jumeꞌ a
yee jiokolisukame, achai Liojta yee yaꞌuraa bittuao, junae
betchiꞌbo alleewamta bitne.
\s Juꞌu Krijtota sualwame, intok juꞌu tekia
\p
\v 14 Krijtopo nemak werim, kaachin tuꞌine, senu junuen:
“Jesukrijtota ne sualla”, ti jiaka, taa kaita tuꞌik
boꞌo jooriaka jiapsaꞌateko. Bweꞌituk juꞌu, junuen Krijtota
jiba aꞌ sualeꞌuta, kaachin aꞌ jinneꞌune.
\v 15 Maasuko, Krijtopo emo mak werika, jamutta oo oꞌoutaka,
ka yumaꞌik tajoꞌoreka intok junae taewait kaita aꞌ bwaꞌa
machiako,
\v 16 intok emo nasuk senu: “Lios emak tune. Enchim
jinteneeꞌuta intok enchim bwaꞌaneeꞌuta ka emou biꞌine”,
ti au jiaꞌateko, taa jita aꞌ jinteneeꞌuta intok aꞌ bwaꞌaneeꞌuta
ka aꞌ makakai, kaitaꞌpo tuꞌine.
\v 17 Ket jiba junaen san, senu, Krijtota sualeka taa
jukaꞌ tuꞌik ka joaꞌateko, Krijtota aꞌ sualeꞌuta, kaita
aꞌ sualeꞌu benane.
\p
\v 18 Taa senu jumak inen jiunee: “Empoꞌe Krijtota
suale. Inepo intok, nee tuꞌik boꞌo jooria”, ti jiune.
Junuen san, empo ka aꞌ juꞌuneiyaa tebo, kaita tuꞌik joaka,
Krijtota em sualeꞌuta. Taa inepo intok, nee, tuꞌik joaka,
junae, Krijtota in sualeꞌuta aꞌ juꞌuneiyaa tebone.
\p
\v 19 Empo, wepuꞌulaik jiba Liojtukaꞌpo, tuꞌisi aꞌ suale.
Inien empo tuꞌisi aane. Taa inikaꞌa juꞌuneiyaane, jumeꞌ
bebejeꞌerim ka tuꞌi jiapsim ket inien aꞌ suale. Intok
inimeꞌe tuꞌisi majjae.
\v 20 Taa empo, kaita mammateme, ka aꞌ juꞌuneiyaame, senuk
Krijtota sualeka, tuꞌik ka boꞌo jooriame, aꞌ sualeꞌuta
aꞌ teuwaꞌateko, junakaꞌa kaita aꞌ sualeꞌe benasi aꞌ machineꞌpo.
\v 21 Juꞌu Lios, jukaꞌ cheꞌa bat naataka itom yoꞌowasukaꞌuta,
Apraꞌamtukaꞌuta aꞌ tuꞌu mabetak, aꞌ uꞌusiawata, Isaak
tukaꞌuta, Liojta alleetua betchiꞌbo, bwaram bem sussuꞌaaꞌu
aꞌ tojako.
\v 22 Junuen san a juꞌuneiyaatu, Apraꞌamtukaꞌuta tuꞌik
yaaka, Liojta lutuꞌuriapo aꞌ sualeꞌuta aꞌ juꞌuneiyaa
tebokaꞌpo. Intok junuen, juꞌu aꞌ yaakaꞌue, yumaꞌisi yeu
siika juꞌu Liojta aꞌ sualeꞌu.
\v 23 Liojta nok lutuꞌuriapo juꞌu jiꞌojtei inen jiame
junuen chupuk: “Juꞌu Apraꞌam, Liojta sualek. Juꞌu Lios
intok, junaet jatteaka, aꞌ tuꞌu mabetak.” Juꞌu Apraꞌam
ket, Liojta nakeme, ti taꞌeewak.
\p
\v 24 Junuen san juꞌuneene emeꞌe, senuk, aꞌ boꞌo jooriaꞌ
betchiꞌbo ket, Liojta aꞌ tuꞌu mabetneꞌpo. Intok ka aꞌ
sualeꞌ betchiꞌbo jiba.
\v 25 Ket jiba junaen su, au yeu siika, juꞌu ka tuꞌi jamut,
Raꞌap teamtawi, jumeꞌ Ijraꞌeliitam betana, aman bwiaraau
bittuarim, tuꞌisi am mabetakai. Intok ket, chukula, taꞌabwi
boꞌot bicha yeu am sakaꞌatuakai. Juꞌu Lios ket, junakaꞌa
tuꞌik aꞌ yaakaꞌu betchiꞌbo, tuꞌisi aꞌ mabetak.
\v 26 Intok jukaꞌ takaata, jiapsita ka aet kateko, ka
aꞌ jiapsaka kaita betchiꞌbo aꞌ tuꞌikreakaꞌa benasia,
ket junaen, juꞌu Krijtota sualwame, kaita teuwaa, tuꞌik
boꞌo joowamta ka aamak weyeo.
\c 3
\s Juꞌu itom ae nokaꞌu
\p
\v 1 Krijtopo nemak werim emo nasuk ka juebenaka annee,
jumeꞌ yee majtawamta emo tekil makbaaneeme. Bweꞌituk
juꞌuneewa, itom, jumeꞌ yee majtame, cheꞌa juniꞌi bepa itom
yaꞌuraa bittuanaaꞌpo.
\v 2 Siꞌimete itepo, juebenaku ka tuꞌikut jijiꞌobe. Senu
intok, aꞌ teuwaaꞌpo kaitaꞌpo jijiꞌobeꞌeteko, junaꞌa, Liojta
betana tuꞌu yoemtune. Siꞌimekut a au yuꞌeeme.
\v 3 Kabaꞌita itom aꞌ weetuabaeꞌu bicha aꞌ weeneꞌ betchiꞌbo,
tenpo aꞌ sumaꞌane. Junak san te junakaꞌa aꞌ nunupne.
\v 4 Bwere kuta kanoam juniꞌi, emeꞌe ket am mammatene.
Junameꞌe kaituꞌuna bwerekai, intok juꞌu jeeka am weiyaame,
utteꞌak oꞌoben. Taa juꞌu, junakaꞌa weiyaame, ka jalletchikue
aꞌ weebaeꞌu bicha aꞌ weiyaa.
\v 5 Jiba junaen san ket juꞌu itom ae nokaꞌu. Takaapo
tua ka jalletchika juniꞌi, taa ama butti juebenaku a
yumaꞌane. Juya juebenaka, ka juebena tajie a tayaꞌatu.
\v 6 Juꞌu intok, itom ae nokaꞌu, tajiu a tammachiatu.
Siꞌime juꞌu takaa, ka tuꞌik aet bicha. Iniꞌi intok, jiba
junaen, bebejeꞌerita betana junuen, ka tuꞌikue sawaawa.
Intok naa buustia, senuk aꞌ jiapsaꞌu tajtia, jiokot au
bittuane.
\v 7 Inim juꞌu yoeme, siꞌime jumeꞌ naikim wokeka jiapsame,
am yeeka. Intok jumeꞌ masakame juniꞌi. Intok jumeꞌ bakotchim,
intok kia jumeꞌ bawepo jiapsame juniꞌi a am yeeka.
\v 8 Taa kaabe jukaꞌ ae aꞌ nokaꞌuta a yeeka. Ka tuꞌika
aet ayuka, ka a yekatu. Intok ama naa buustia bicha, ka
tuꞌik ae kokkowame aet aayuk.
\v 9 Jiba inia, itom ae nokaꞌue, itepo Lios achaita ae
yoꞌoreka te aꞌ bwibwikria. Intok ket, itepo, jumeꞌ ito
benasi yoemem, wateku Liojta benasi juꞌunakteim juniꞌi,
tee ka tuꞌik ame tana tetteuwaa.
\v 10 Senuk, tuꞌik senuku bichaa aꞌ teuwaaneeꞌu aet aayuk,
intok kia ka tuꞌik aꞌ teuwaaneeꞌu juniꞌi. Krijtopo nemak
werim, iniꞌi kaachin inientune.
\v 11 Kaachini wepul senneꞌekapo, tuꞌi baꞌam intok chibukai,
kaibu ama yeu weene.
\v 12 Krijtopo nemak werim, juꞌu chuna ouwoo juniꞌi, kaachin
jumeꞌ aseitunam takane. Intok kia juꞌu paꞌasi ouwoo
juniꞌi, kaachin chunam takane. Junuen san, kaachin wepul
senneꞌekapo, choꞌokoka intok kakaka ama yeu weene.
\s Juꞌu tua lutuꞌuriapo suawa
\p
\v 13 Emo nasuk, seenu, koba suawaka, tuꞌisi jitat juꞌuneiyaꞌateko,
tuꞌisi jiapsaka au juꞌuneiyaa tebone, aꞌ suawa betchiꞌbo
ka au cheꞌewareka aꞌ jiapsaꞌue.
\v 14 Taa emeꞌe, jita ka nat tuꞌureka, ka emo bibitpeaꞌateko,
intok emo betchiꞌbo jiba tuꞌik waataka, jita joaꞌateko,
junak emeꞌe kaachin enchim suawae emo uttiane. Bweꞌituk
junuen aa nokiꞌichiatu ean. Intok ka lutuꞌuriatune.
\v 15 Bweꞌituk iniꞌi suawa ka junaꞌa, juꞌu, Liojta betana
weyeme. Taa ala inim bwiapo yeu simla, watem betana intok
juꞌu bebejeꞌeri aꞌ yaꞌari.
\v 16 Bweꞌituk, jum jita ka nat tuꞌuriawaꞌpo, intok emo
betchiꞌbo jiba tuꞌik waatiawaꞌpo, junamaꞌa, ka nanancha
weyeme ama aayuk, intok siꞌime juꞌu ka tuꞌuwa.
\v 17 Taa jumeꞌe, Liojta betana lutuꞌuriat juꞌuneame,
cheꞌa bat naatakai, ka jak waꞌam juniꞌi jiapsa. Chukula
intok ket, ka nanassuaꞌaram. Tuꞌik jiba yete tana waata.
Yeteu tuꞌik jiapsek. A yee nak jiokole. Intok inimeꞌe
tuꞌuwata am jooa. Intok ket, wepulsi jita teteuwaa. Intok
kaita eꞌesso.
\v 18 Jumeꞌ intok, nau eewamta waatame, nau eewamta boꞌo
jooriaka jiapsa. Junuen siꞌimeku ammaꞌali jiapsi betchiꞌbo.
\c 4
\s Juꞌu, inim bwiapo emo ae alleetuawamta, tuꞌuriwame
\p
\v 1 Ka tuꞌik jiba enchim boꞌo joopeaka, enchim aꞌ utteꞌa
jooriaꞌ betchiꞌbo, juꞌu ka enchim emo bibitpeaꞌu, intok
enchim nau nassuaꞌu emo nasuk aayuk.
\v 2 Emeꞌe jita waatakai, taa intok ka aꞌ jipuekai, junak
emeꞌe emo sussuꞌa. Jita ka enchim atteata eiyaa. Intok
junakaꞌa, emeꞌe ka aꞌ mabetakai, junak emeꞌe aet nau nassuane.
Enchim waataꞌuta emeꞌe ka aꞌ mabbeta, Liojtau bicha ka
enchim aꞌ aꞌawaꞌ betchiꞌbo.
\v 3 Intok emeꞌe, Liojtau bicha junakaꞌa aꞌawakai juniꞌi,
kateꞌem aꞌ mabbetak. Bweꞌituk emeꞌe ka junama waꞌam
aꞌ aꞌawa. Bweꞌituk junakaꞌa emeꞌe, kia ae emo alleetuabaekai
aꞌ aꞌawa.
\v 4 Emeꞌe yoemra Liojta bai taꞌaabaeme, juꞌuneaꞌem, inim
ka tuꞌisi jiapsiwamta, Liojta bejeꞌeka, ka aꞌ tuꞌireakaꞌpo.
Junuen san, jabe juniꞌi, inim ka tuꞌisi jiapsame benasi
junuen jiapsibaeme, Liojta bejeꞌeka jiapsine.
\v 5 Inia betchiꞌbo san inen jiꞌojtei: “Juꞌu Liojta
tuꞌu jiapsi, aapoꞌik itot autuari, itom nakeka, Liojta
jiba itom nak iꞌa.” Inikaꞌa, aꞌ lutuꞌuriatukaꞌ betchiꞌbo
aꞌ teuwaa.
\v 6 Taa juꞌu Lios, itom cheꞌa juniꞌi nak jiokoleka itom
ania. Bweꞌituk jum Liojta nok lutuꞌuriapo inen jiꞌojtei:
“Juꞌu Lios, jumeꞌ jikat emo eiyaame, am bejeꞌe. Taa jumeꞌ
kaitaꞌpo emo cheꞌewareme, juꞌu Lios am nak jiokoleka
a am ania.”
\v 7 Junuen san emeꞌe, Liojta mampo emo suꞌu tojine, bebejeꞌerita
intok bejeꞌeka, ka aamak eene. Iniꞌi intok, ka intok emou
suaka, simne.
\v 8 Emeꞌe Liojtau bicha waatine. Aapo intok ket emou
waatine. Ka tuꞌik boꞌo jooriame, enchim joaꞌuta, ka intok
aꞌ joone. Emeꞌe intoko, Liojtat nak yoꞌoreka, taa intok
ket inim aniapo aukamta tuꞌureme, enchim jiapsim wepulsi
Liojtau suꞌu tojine.
\v 9 Ka emeꞌe alleebaane, intok siokne. Enchim alleꞌeaꞌu
bwanwametune.
\v 10 Achai Liojta bichapo emeꞌe ka emo cheꞌewarine.
Aapo intok, chukula, enchim eiyaatebone.
\s Krijtopo aamak werikut ka tuꞌisi nokame
\p
\v 11 Krijtopo nemak werim, emeꞌe ka naas nat nokne.
Juꞌu Krijtopo aamak werikut ka tuꞌisi nokame, oo ka tuꞌisi
aꞌ tatawaame, junaꞌa, Liojta nesaurit ka tuꞌisi nokaka
intok ka tuꞌisi aꞌ tawaamta benasi aane. Intok junuen,
empo, Liojta nesaurit ka tuꞌisi aꞌ tataawakai, au emo
yoꞌo joone. Junakaꞌa nesaurita aꞌ chupaꞌaꞌeaka su.
\v 12 Taa wepuꞌulai jiba, juꞌu lutuꞌuria nesaurita, yee
aet saweme. Intok ket aapo lutuꞌuriak, yee aꞌ yaꞌuraa
bittuaneꞌpo. Intok ket jiba aapo junaꞌa, juꞌu yee jinneꞌume
oo yee luꞌutaneeme. Taa empo, senuk ka tuꞌisi aꞌ tawaaneꞌpo,
ka eu lutuꞌuria.
\s Yoko yeu weenemta ka juꞌuneiyaame
\p
\v 13 Iꞌan intoko, emeꞌe, inikaꞌa em jikkaja: “Iꞌani,
oo yooko te aman senu bweꞌu joꞌarau katne, intok tee
junaman wasuktiapo aneka, tekipanoane, intok tee yuꞌin
tomita yoꞌone”, ti jiame,
\v 14 intok emeꞌe ka juꞌuneakai, yoko jachin emou aꞌ
machineꞌpo. Bweꞌituk juꞌu itom jiapsaꞌu, ka itepola aꞌ
jiapsa. Bajewata, chubala yeu machiaka intok sep aꞌ luꞌutekaꞌa
benasi maachi.
\v 15 Ala emeꞌe inen jiu ean: “Achai Liojta junen eao,
itepo jiapsine, intok ikaꞌa, oo wakaꞌa te aꞌ yaꞌane.”
\v 16 Taa iꞌan intok, emeꞌe, jiba jikat emo eiyaaka, emo
etejokai. Intok siꞌime iniꞌi, emo jikat eiyaaka emo etejowame
ka tuꞌi.
\v 17 Juꞌu, tuꞌik joo taꞌaaka, intok ka aꞌ joame, Liojta
bichapo junuen, junaet, ka tuꞌik yaꞌalatune.
\c 5
\s Jumeꞌ totomekame tejwaawaꞌu
\p
\v 1 Emeꞌe, yuꞌin totomekame, inikaꞌa em jikkaja, bwanaka
intok teꞌineꞌem, jiokot, kaitamak enchim tawaneeꞌu waatekai.
\v 2 Juꞌu enchim attea moila. Juꞌu intok enchim buꞌuu
tajoꞌori tuꞌikai, yoeria bwaꞌari.
\v 3 Juꞌu enchim sawai tomi intok juꞌu enchim tosai
tomi poposiula. Intok iniꞌi, enchim aꞌ juꞌuneiyaatua,
ka ammaꞌali enchim aukaꞌpo. Intok iniꞌi, tajita benasi
enchim takaam luꞌutane. Emeꞌe, inimeꞌe taewaim luꞌutisemmet,
enchim yuꞌin tomineeꞌuta emeꞌe jaiwa.
\v 4 Juꞌu tomi, jumeꞌ echimuta, emomak toboktakame, ka
enchim am makakaꞌu, enchim bejeꞌeka enchim naꞌatejo.
Juꞌu intok, teekau jiapsammeu, achai yoꞌowe, junameꞌe, jumeꞌ
emomak tekipanoakame, au bichaa am nokaꞌuta, aꞌ jikkajak.
\v 5 Inim bwiapo emeꞌe ujyoisi jiapsa. Intok emo alleetuakai,
wakasim benasi aꞌawikai. Juꞌu intok taewai, wakasim aet
suꞌanaaꞌu abe yuuma.
\v 6 Emeꞌe, jumeꞌ kaita ka tuꞌik yaꞌarim, ka tuꞌisi am
tawaala. Intok am suꞌala. Bempoꞌim ka emo aniao juniꞌi.
\s Juꞌu a boꞌo bitwame, intok Liojtau bwanwame
\p
\v 7 Junuen san, Krijtopo nemak werim, emeꞌe, yoꞌowe Jesukrijtota
notteꞌu tajtia, ka jain eaka a boꞌo bitne. Maa su, juꞌu
wajpo etbaeka, aꞌ tekipanoame, utteꞌa, yukuta bat yepsamta,
ka jain eaka aꞌ boꞌo bitneeꞌu. Intok chukula ket, yukuta
luꞌutemta simne. Junakaꞌa, jukaꞌ bejeꞌewakamta echimuta
kee aꞌ toboktao.
\v 8 Emeꞌe juniꞌi ket junaen, ka jain eaka a enchim boꞌo
bitneeꞌu emot aune. Intok ka koꞌom emo eetuane. Bweꞌituk
juꞌu taewai, yoꞌowe Jesukrijtota aet nottineeꞌu, abe yuuma.
\v 9 Krijtopo nemak werim, emeꞌe ka naas jitat emo nanaꞌatejobaane,
junuen, ka enchim yaꞌuraa bittuanaꞌ betchiꞌbo. Bweꞌituk
juꞌu Lios, lutuꞌuriapo yee yaꞌuraa bittuaneeme, jaibu
aꞌabo weye.
\v 10 Krijtopo nemak werim, emeꞌe, jumeꞌ bat naataka, chukula
yeu weenemta Liojta betana yeteu noktuawakame, juꞌu jiokot
bem jiapsakaꞌut intok bem a binwa boꞌo bichakaꞌutchi
mammatene.
\v 11 Bweꞌituk itepote, jumeꞌe, bem jiokot emo bichaꞌ
nasuk, ka jain eaka aꞌ ineꞌame, ama butti bem alleeneeꞌuta
am jipuꞌumachile. Emeꞌe, jukaꞌ Jop teamta betana aꞌ jikkajila,
aapoꞌik ka jain eaka, binwa a boꞌo bichakaꞌu betana.
Intok emeꞌe aꞌ juꞌuneiyaa, cheꞌa chukula, achai Liojta
aamak tukaꞌpo. Bweꞌituk juꞌu achai Lios ama butti yee
jiokoleka, yee nake.
\p
\v 12 Taa, Krijtopo nemak werim cheꞌa bat naataka, inikaꞌa
ka yaꞌane. Enchim lutuꞌuriateeꞌu: “Tua a Lios”, ti
ka jiaka aꞌ lutuꞌuriatene. Intok kia teekata juniꞌi,
intok kia bwiata juniꞌi, emeꞌe ka aꞌ teuwaaka, jita lutuꞌuriatene.
Emeꞌe, wepulsi: “Lutuꞌuria”, ti jiaꞌateko, junuen jiba
tune. Intok: “Ka lutuꞌuria”, ti jiaꞌatek juniꞌi, junuen
jiba tune. Junuen juꞌu Lios ka junae betchiꞌbo, ka tuꞌisi
enchim tawaane.
\p
\v 13 Emo nasuk seenu, jiokot au bichaꞌateko, Liojtau
bicha au nokriane. Senu intok alleaꞌateko, Liojta alleetuaꞌ
betchiꞌbo bwikne.
\v 14 Senu intok, koꞌokoeꞌeteko, teꞌopopo, Krijtota sualemmeu
yoꞌowemmeu chaaine, ae betchiꞌbo Liojtau bicha aꞌ nokrianeꞌ
betchiꞌbo. Intok junameꞌe, yoꞌowe Jesukrijtota betana
aniawaka, oliibo aseiteta aet yaꞌane.
\v 15 Junameꞌe intok, Liojtat eaka aꞌ sualeka, aꞌ nokriako,
juꞌu koꞌokoeme au ineꞌetene. Intok juꞌu yoꞌowe Jesukrijto,
utteꞌata aet autuane. Intok junaꞌa, ka tuꞌik yaꞌarialatuko,
junaet jiokoitune.
\v 16 Junuen san beja, emeꞌe, weꞌepulaka, jukaꞌ ka tuꞌik
enchim nau yaꞌarit yeu bwijne. Intok junuen emeꞌe, naas
Liojtau bicha emo nokriane, enchim emo ineꞌeteneꞌ betchiꞌbo.
Senuk, tuꞌisi jiapsamta, Liojtat eaka yee aꞌ nokriaꞌu,
junaꞌa, yee aꞌ nokriaꞌu, ama butti tuꞌik yee jooria.
\v 17 Juꞌu Eliajtukaꞌu, Liojta betana juꞌuneiyaatuawaka
yeteu nok tuawakame, ito benasi inim yoemtukan. Iniꞌi
intoko, Liojtau bicha nokaka, ka yukneꞌeti jiakai, intok
inim, ka intok yukuk, baji wasuktia aman busan metpo.
\v 18 Chukula intok juchi weeꞌpo, Liojtau bicha nokako,
juchi yuk taitek. Jum bwiapo juꞌu juya siwek. Intok
taakak.
\p
\v 19 Krijtopo nemak werim, emo betana seenuk, Liojta
betana lutuꞌuriata omola aꞌ tawaako, junakaꞌa intok senu,
juchi Liojta mak au aꞌ tuꞌute betchiꞌbo au nokaka aꞌ
aniako,
\v 20 inen emeꞌe aꞌ juꞌuneiyaane, jabe juniꞌi, jukaꞌ ka
tuꞌisi jiapsamta, au aꞌ temaeka intok juchi tuꞌisi aꞌ
jiapsineꞌ betchiꞌbo aꞌ aniakame, junakaꞌa, ka tuꞌisi jiapsamta
aꞌ jiapsi taꞌabwisi eamta, kokkowamta betana aꞌ jiapsi
jinneꞌune. Intok junakaꞌa, yuꞌin ka tuꞌik aꞌ yaꞌarit
aꞌ jiokoituneeꞌuta aꞌ yaꞌalatune.