\id 1PE
\h 1 PEEO
\toc1 1 PEEO
\mt 1 Peeo
\c 1
\s Juꞌu Peeo, Krijtota sualeka, naꞌikimtulammeu jiꞌojte
\p
\v 1 Inepo, Peeoꞌ teame, yoꞌowe Jesukrijtota betana nee
yeu puꞌaritaka, yeteu bittuari. Jumeꞌ omot, ka bem bwiaarau
jiapsammeu, jumeꞌ ijraꞌeliitam teammeu, nee inikaꞌa jiꞌosiata
jiꞌojte. Bwiaaram inen teakaꞌpo, Pontoꞌ teaꞌpo intok
Kalaasiaꞌ teaꞌpo intok Kaparoosiaꞌ teaꞌpo intok Aasiaꞌ
teaꞌpo intok Bitiiniaꞌ teaꞌpo joꞌaakammeu.
\v 2 Jumeꞌe, achai Liojta, cheꞌa bat naataka, aapoꞌik junuen
aꞌ tuꞌurekaꞌ betchiꞌbo yeu aꞌ puꞌakaꞌummewi. Aapo aꞌ
tuꞌu jiapsie, enchim wepulsi ae betchiꞌbo jiba enchim
jiapsitua. Junuen enchim aꞌ nok jikkajineꞌ betchiꞌbo.
Intok ket junuen, Jesukrijtota, meꞌewaka, ojbota aꞌ woꞌotakaꞌue,
Liojta bichapo, kaita ka tuꞌik yaꞌarime benasi enchim
machineꞌ betchiꞌbo. Liojta betana, ama butti emou tuꞌik
intok enchim yanti elneeꞌuta, emot aune.
\s Chukula, itou tuꞌikut eaka jiapsiwame
\p
\v 3 Liojta, intok yoꞌowe Jesukrijtota yoꞌowata, itepo
aꞌ yoꞌoreka, aꞌ Lioj bwaniane. Aapoꞌik ama butti yee
aꞌ nak jiokoleꞌ betchiꞌbo, itom aniala. Jesukrijtota,
kokkoarim nasuk aꞌ jiabijtetuaka, junaen, bemelasi intok
taꞌabwisi itom jiapsituakai. Iniꞌi intok, chukula tuꞌik
itom bitneeꞌut eaka itom jiapsineeꞌut, itom ania.
\v 4 Intok aapo, aapoꞌik Liojta, teekau, chukula itom bitneeꞌuta
itoas aꞌ jipueꞌuta, enchim aꞌ bittuane. Jukaꞌ ka luꞌu
luꞌutineemta, intok jukaꞌ kaitaꞌpo nasontuneemta intok
kaibu taꞌabwisi ayuka moinemta.
\v 5 Intok Liojtat enchim eaꞌ betchiꞌbo, aapo, a jita
aꞌ joaꞌue, enchim jinneꞌula intok enchim ania sime, siꞌimeta
chupiꞌiseo, jukaꞌ aꞌ bit teboneeꞌuta, aman teekau enchim
aꞌ jajameꞌu tajtia.
\p
\v 6 Inia betchiꞌbo san, emeꞌe, enchim alleaꞌu emot aayuk.
Junuen, jiꞌobilaawakai, inim chuubaa enchim bettesi intok
jiokot emo bichaꞌ nasuk juniꞌi, watem emou am suaꞌ betchiꞌbo.
\v 7 Juꞌu, Liojta enchim sualeꞌu, sawai tomitau a tamachiatu.
Bweꞌituk juꞌu sawai tomi, a moyeka juniꞌi, inim tuꞌisi
bejeꞌewaek. Intok tua aꞌ junaꞌatukaꞌpo juꞌuneiyaꞌ betchiꞌbo,
tajie bwasaꞌanaa. Juꞌu, Liojtat eaka aꞌ sualeme, jiba
ka tuꞌikue aꞌ jiꞌobilaawaaꞌuta, kaachin eaka aꞌ inneꞌakame,
sawai tomi, luꞌu luꞌutemta bepa, cheꞌa juniꞌi eiyaawatchi.
Junuen san beja, Jesukrijtota junuen enchim sualeka jiapsaꞌuta,
junuen jiꞌobilaawaka, emeꞌe tuꞌisi ama yeu sajakai, Jesukrijtota
notteo, emeꞌe, alleewamta intok enchim yoꞌorinaaꞌuta emeꞌe
bitne.
\p
\v 8 Emeꞌe, jukaꞌ Jesukrijtota ka aꞌ bitlamtaka juniꞌi,
aꞌ nake. Intok junuen emeꞌe ka aꞌ bichaka juniꞌi, iꞌan
aet eakai, enchim alleaꞌu ama butti emot aayuk. Junakaꞌa
alleewamta kaachin intok aꞌ teuwaa machikai.
\v 9 Enchim jinneꞌuimtukaꞌuta jajamlamtakai, iniꞌi junaꞌa,
juꞌu, Jesukrijtota enchim sualeꞌ betchiꞌbo weyeme.
\p
\v 10 Cheꞌa bat naataka, jumeꞌ Liojta betana juꞌuneetuawaka,
chukula yeu weenemta teteuwaame, inia weemtat jiapseka,
emo aet temaek aꞌ juꞌuneiyaabaekai, iꞌan, jukaꞌ yee jinneꞌuwamta
betana. Intok junameꞌe aꞌ teuwaak, Liojta ama butti yee
aꞌ nakeꞌ betchiꞌbo, jukaꞌ emot aꞌ autuabaeꞌuta.
\v 11 Juꞌu Krijtota tuꞌu jiapsi, amet aneka, junameꞌe
Liojta betana nokame, junak am juꞌuneetuak, aapoꞌik Jesukrijtota
jiokot au aꞌ bitneeꞌu betana, intok chukula, jukaꞌ aꞌ
yoꞌori eiyaanaaꞌu betana. Junameꞌe intok junae tuꞌu
jiapsie juꞌuneetuawaka, emo utteꞌa joorian, jabetat aꞌ
nokaꞌut, intok jak weyeo aꞌ chupneꞌpo juꞌuneiyaabaekai.
\v 12 Taa juꞌu Lios, jukaꞌ bem aet jiapseka, machisi bem
juꞌuneiyaabaeꞌuta, ka bempoꞌim betchiꞌbo, taa junakaꞌa
ito betchiꞌbo weyeka aꞌ chupneeꞌut, iniat am juꞌuneetuak.
Junuen san iꞌani iniꞌi jiba junaꞌa juꞌu Krijtota betana
bemela nok lutuꞌuria enchim majtakame betana emou teuwaari.
Junameꞌe, Liojta tuꞌu jiapsie, teeka betana weyeka aniawaka,
emou aꞌ majtak. Inikaꞌa inien weyemta san, jiba jumeꞌ
ankelesim aet juꞌuneaꞌateko juniꞌi, tua alle ean.
\s Juꞌu Lios, tuꞌik ausuꞌlik joaka, itom jiapsi iꞌa
\p
\v 13 Junuen san, enchim joobaeꞌut, aet suaka aꞌ joone.
Intok emeꞌe ka jak waꞌam, taa suasi jiapsine. Liojta
ama butti yee aꞌ nakeꞌ betchiꞌbo, Jesukrijtota juchi
notteo, enchim aꞌ bittuaneeꞌut siꞌimeku junau waateka
jiapsine.
\v 14 Emeꞌe Liojta yoemiamtaka, aꞌ nok jikkajakai. Ka
intok, bat naataka, kee Liojta taꞌaaka, ka tuꞌisi enchim
jiapsaꞌa benasi enchim tuꞌureꞌuta joaka jiapsibaane.
\v 15 Taa ala emeꞌe, siꞌimeku, wepulsi Liojta betchiꞌbo
jiba jiapsine. Bweꞌituk juꞌu Lios, juꞌu enchim yoemia
betchiꞌbo enchim yeu puꞌakame, tuꞌik, tuꞌuwata wepulsi
ausuꞌlika aet aayuk.
\v 16 Bweꞌituk jum Liojta nok lutuꞌuriapo aꞌ jiꞌojtei:
“Emeꞌe, tuꞌik tuꞌuwata ausuꞌlika net ayukaꞌa benasia,
emeꞌe junuen ket emot aꞌ auneꞌ betchiꞌbo, aet jiapsine”,
ti jiia juꞌu achai Lios.
\p
\v 17 Emeꞌe intok, jukaꞌ Liojta, weꞌepulaim, siꞌimem juꞌu
bem jiapsakaꞌu betana am yaꞌuraa bittuanemta, intok kaabeta
cheꞌa eiyaakamta, junakaꞌa yoꞌowa rokakai, inim bwiapo
enchim jiapsaꞌpo tajtia aꞌ ee majjaune.
\v 18 Bweꞌituk juꞌu Lios, enchim yoꞌowasukaꞌum, kaitaꞌpo
tuꞌikut bem jiapsakaꞌu betana, enchim ket junau joiwalaꞌu
betana, enchim jinneꞌula. Emeꞌe intok jaibu tuꞌisi juꞌunea,
inikaꞌa enchim jinneꞌukaꞌuta bejeꞌewaꞌu, ka inim jitae,
sawai tomie oo tosai tomie, a luꞌutinemtae aꞌ bejeꞌetuawakaꞌu,
\v 19 ala, juꞌu aꞌ bejeꞌewa, eiyaawatchisi machika ojbo,
Jesukrijtota, meꞌewaka aꞌ woꞌotakaꞌue. Aapo juꞌu Jesukrijto,
bwalata wasuktemta, yeu puꞌarik intok kaachin maachik
benasia junuen jiokot yaꞌatuk.
\v 20 Juꞌu Jesukrijto, kee aniata juꞌunaktewao naateka,
inia betchiꞌbo yeu puꞌatuk. Taa aapo, inimeꞌe chukula
taewaimmetchi, enchim jinneꞌubaeka yeu machiak.
\v 21 Jiba aapoꞌik Krijtota betchiꞌbo emeꞌe Liojta suale.
Aapoꞌik jukaꞌa, kokkoarim nasuk aꞌ jiabijtetuakamta.
Intok jukaꞌa, aapoꞌik yoꞌori tebomta. Junuen san emeꞌe,
jukaꞌ Liojtat ea intok chukula enchim bitneeꞌuta, aet
mabet boꞌo bichakai.
\p
\v 22 Emeꞌe iꞌan, Liojta tuꞌu jiapsie aniawaka, Krijtota
nok lutuꞌuriata aꞌ jiaꞌapo aman, aꞌ boꞌo jooriakai, Liojta
bichapo kaita ka tuꞌik yaꞌari benasi bitwaka, junuen
emeꞌe, Krijtopo emomak werim, tua junen jiaka a am nakeꞌ
betchiꞌbo. Junuen san emeꞌe, tua junuen jiaka, naas emo
nakne, intok ka jispsita bepa jiba.
\v 23 Bweꞌituk emeꞌe, iꞌan bemelasi yeu yoemtulame benasi
maachi, ka inim enchim achaim benam yoꞌowakai, kokkoneeme.
Taa ala, juꞌu Liojta nok lutuꞌuriae, juꞌu jiapsamtae, intok
jiba yuu tawanemtae.
\v 24 Bweꞌituk jum Liojta nok lutuꞌuriapo inen jiꞌojtei:
\q Siꞌime juꞌu inim yoemra, juyata benasi maachi.
\q Juꞌu intok bem ujyoriaꞌu, juya sewata benasi maachi.
\q Juꞌu juya mukne, juꞌu sewa intok wakne.
\q
\v 25 Taa juꞌu Liojta nok lutuꞌuria, jiba betchiꞌbo tatawa.
\m Iniꞌi intok, juꞌu Krijtota betana nok lutuꞌuria emou
teuwaawakame junaꞌa.
\c 2
\p
\v 1 Junuen san emeꞌe, siꞌime ka tuꞌuwata betana, siꞌimeku
yee bai taꞌaawamta, woik boꞌo jooriawamta intok jita
nau emo nakwamta, intok siꞌimeku ka lutuꞌuriata yetet
nokwamta koptane.
\v 2 Ili usita, juꞌubwa yeu tomteꞌe benasia, emeꞌe, jukaꞌ
Liojta nok lutuꞌuriata, kawam benasi tua aꞌ eiyaaka aet
jiapsine, junae, emeꞌe cheꞌa tuꞌisi, Krijtota betana weyemtat
suatune. Intok junuen enchim jinneꞌuimtuneꞌ betchiꞌbo.
\v 3 Bweꞌituk emeꞌe, achai Liojta yee aꞌ nakeꞌpo, lutuꞌuriapo
aꞌ juꞌuneiyaa.
\s Krijto, juꞌu teta jiapsaꞌ teame
\p
\v 4 Junuen san emeꞌe, tetata tuꞌika eiyaawatchisi aꞌ
machiakaꞌa benasi, junuen, Jesukrijtotau bicha, juꞌu yee
jiapsituamtau bicha, aet emo temaine. Inim juꞌu yoemra,
yeu aꞌ tawaak jukaꞌ Krijtota. Taa Liojta betana, iniꞌi
yeu puꞌatuk, intok siꞌimek bepa eiyaawatchisi machikai.
\v 5 Emeꞌe ketchia, tetam jiapsame bebenakai, Liojtau
emo suꞌu tojine, aapoꞌik enchim sawaabaeꞌpo aman, enchim
aꞌ sawaneꞌ betchiꞌbo, karita, Liojta ama yoꞌorinaaꞌu benasi
enchim machineꞌ betchiꞌbo. Intok ket jum teꞌopopo cheꞌa
yoꞌotaka tekilta joame wepulsi naꞌikiatakai emeꞌe, Jesukrijtota
betana aniawaka, aapoꞌik yoꞌori betchiꞌbo, jukaꞌ tuꞌik
au bicha enchim joaꞌuta, junuen Liojta alleaka aꞌ mabetne.
\v 6 Junuen san ketchia, Liojta nok lutuꞌuriapo inen
jiꞌojtei:
\q Yuu, inepone, bweꞌu joꞌaraa Jerusalen teaꞌu, senuk, yeu
puꞌarita intok eiyaawatchisi maachik, ne aman bittuane.
\q Iniꞌi, tetata, karita ae naatewaꞌa benasi a teuwaatu.
\q Juꞌu intok, aꞌ sualeme, ka bai taꞌaatune.
\m
\v 7 Enchim, aꞌ sualeme betchiꞌbo ala, junaꞌa, tua eiyaawatchi.
Taa jumeꞌe, ka aꞌ sualeme betchiꞌbo, Liojta nok lutuꞌuriapo
ama aꞌ jiꞌojteiꞌi benasi ameu yeu weama:
\q Jumeꞌ kaateme, jukaꞌ tetata bem omola tawaakaꞌuta.
\q Chukula utteꞌatuk, junakaꞌa tetata, tua bat aꞌ sawanaꞌpo.
\m
\v 8 Intok ketchia juꞌu inen jiꞌojtei yeu yumaꞌala:
\q Teta, watem aet teꞌitinaaꞌu, intok yee tabeme.
\m Bempo aet jijiꞌobe, Krijtota nok lutuꞌuriata, ka bem
aꞌ jikkajaꞌ betchiꞌbo. Bempo ket, junuen jiꞌop betchiꞌbo
yeu puꞌatukan.
\s Jumeꞌe, Liojta betchiꞌbo jiapsame
\p
\v 9 Taa emeꞌe, yoemra, Liojta betana em yeu puꞌari. Liojta
betana emeꞌe tekilta jooa, juꞌu siꞌimem bepa yoꞌota betana
lutuꞌuriakai. Intok ket emeꞌe wepulsi Liojta betchiꞌbo,
aapoꞌik eaꞌpo amani, emeꞌe jiapsa. Intok naa buustia,
Liojta betana emeꞌe yoemratakai, tuꞌisi eiyaawa. Iniꞌi
intok inien weye, achai Liojta, jukaꞌ tuꞌik, kaitau a tamachiatuka
aꞌ yaakaꞌuta, enchim aꞌ teuwaaneꞌ betchiꞌbo. Juꞌu ka
tuꞌuwa betana enchim jinneꞌukamta betana intok aapoꞌik
lutuꞌuriata enchim juꞌuneiyaatuakamta betana.
\v 10 Emeꞌe cheꞌa bat naatakai, kia jeela juniꞌi ka senu
yoemrata benasi eiyaawan. Taa iꞌani emeꞌe, Liojta betana
yoemra. Bat naataka kaabe enchim nak jiokolisuk. Taa
iꞌani juꞌu achai Lios enchim nak jiokole.
\s Siꞌimeku emeꞌe Liojta betchiꞌbo jiapsinee
\p
\v 11 Krijtopo nemak werim, in nakeꞌum, tuꞌisi ne emou
ujbwana, ka inim jomemtaka benasi intok taꞌabwi bwiaraau
bichaa enchim kateꞌe benasia emo eiyaaka, jukaꞌ tuꞌiꞌeerita
bejeꞌeka weyemta, jukaꞌ inim ka tuꞌik weyemta joowamta,
ka enchim aꞌ jooneꞌ betchiꞌbo.
\v 12 Emeꞌe, tuꞌik boꞌo jooriaka jiapsine, jumeꞌ inim,
ka Liojta sual taꞌaame nasuk anekai. Intok junuen, iꞌan
bempo, enchim ka tuꞌi yoememtukaꞌa benasia, enchim bejeꞌeka
nokakai juniꞌi, jiba, jukaꞌ tuꞌik enchim yaꞌarita aꞌ bitne.
Intok junuen, bempo Liojta, aapoꞌik yee yaꞌuraa bittuaneeo
taewaita yumako, aapoꞌik Liojta lutuꞌuriakaꞌpo aꞌ taꞌaaka,
aꞌ yoꞌorine.
\p
\v 13 Achai Liojta enchim aꞌ yoꞌore betchiꞌbo, inim yoꞌo
yaꞌuraata emeꞌe jikkajaka jiapsine. Kia jukaꞌ cheꞌa
siꞌimem bepa yoꞌotaka nesawemta juniꞌi, aꞌ tekiawa betchiꞌbo.
\v 14 Intok kia jumeꞌ wate yoꞌo yaꞌarim emou aꞌ bittuaꞌum
juniꞌi. Bweꞌituk inimeꞌe, jumeꞌ ka tuꞌisi jiapsame, yaꞌuraau
am totoja. Jumeꞌ intok tuꞌisi jiapsame, alleaka, tuꞌisi
am bicha.
\v 15 Bweꞌituk juꞌu Lios, tuꞌik enchim boꞌo jooria iꞌa.
Junuen emeꞌe, jumeꞌe, ka lutuꞌuriata taꞌaame intok jumeꞌ
kaita mammateme, ka intok am noktuaꞌ betchiꞌbo.
\p
\v 16 Emeꞌe inim jukaꞌ nesauri jiꞌojteita betana ka
emou aꞌ utteꞌatukaꞌpo inien juꞌuneaka jiapsine. Taa
ka junaet emeꞌe jiaꞌawiteka ka tuꞌik joobaane. Ala emeꞌe,
aapoꞌik alleetuane, Liojta aapoꞌik tekokame benasi jiapsakai.
\v 17 Kaabem yeu beꞌaaka, emeꞌe, ameu aꞌ lutuꞌuriatukaꞌpo
aman, siꞌimem am yoꞌorine. Intok jumeꞌ Krijtopo emomak
werim am nakne. Liojta emeꞌe ee majjaune. Intok jukaꞌa,
inim cheꞌa siꞌimem bepa yoꞌotaka nesawemta aꞌ yoꞌorine.
\s Krijtota jiokot au bichakaꞌu, itom bitꞌeaꞌu
\p
\v 18 Tekoka tekipanoame, enchim tekom am yoꞌoreka am
nok jikkajine. Ka jumeꞌ tuꞌu jiapsekame jiba intok emomak
tuttuꞌim jiba, taa ket jumeꞌ ka emomak tuttuꞌim juniꞌi.
\v 19 Bweꞌituk junaꞌa tuꞌine, seenuk, tuꞌik joaka juniꞌi,
ka tuꞌik bichakai, Liojta bichapo tuꞌisi aꞌ tawabaeꞌ
betchiꞌbo.
\v 20 Bweꞌituk emeꞌe ka tuꞌik enchim joaꞌu betchiꞌbo,
intok junae betchiꞌbo koꞌokosi joowaꞌateko, jitasa emeꞌe
aet kobaꞌanee junuen, ka monteka, aꞌ ineꞌakai. Taa emeꞌe,
tuꞌik joaka junuen jiokot emo bichako, intok emeꞌe ka
jain eaka aꞌ ineꞌaꞌateko, iniꞌi, Liojta bichapo tua tuꞌine.
\v 21 Jiba inia betchiꞌbo juꞌu achai Lios enchim yeu
puꞌak. Bweꞌituk aapo juꞌu Jesukrijto, emo betchiꞌbo, jiokot
au bichak. Junuen enchim aꞌ mammateka, aapoꞌik benasi
enchim jiapsineꞌ betchiꞌbo.
\v 22 Aapo, tua kaita ka tuꞌik, jakwoo juniꞌi aꞌ yaak.
Intok kia jakwoo juniꞌi kaabeta bai taꞌaak.
\v 23 Ka tuꞌisi aꞌ jiawaawao, ka junaen am yoopnak. Koꞌokosi
joowakai, Lios emo betchiꞌbo juꞌunea, ti ka ameu jiiak.
Ala, Liojta mampo, juꞌu siꞌimem, ameu aꞌ lutuꞌuriatukaꞌpo
aman, yee yaꞌuraa bittuanemtau au suꞌu tottojan.
\v 24 Juꞌu Jesukrijto, aapo junaꞌa, juꞌu kuuset popontaka,
itom ka tuꞌuwa yaꞌarim aꞌ takaawapo am mabetaka, ito
betchiꞌbo mukukame. Junuen itom ka tuꞌik joowamta betana,
kokkolam benasi itom ito eiyaaka, siꞌimeku tuꞌisi itom
jiapsineꞌ betchiꞌbo. Aapo junuen, jiokot yaꞌatuk, junuen
jiba betchiꞌbo tuꞌik emou auneꞌ betchiꞌbo.
\v 25 Bweꞌituk emeꞌe, bat naataka, bwalam chiktulatukaꞌa
benasi jiapsan. Taa iꞌani emeꞌe, Jesukrijtotau emo suꞌu
tojiri, juꞌu kapyeota benasi, enchim suuaka intok enchim
jinneꞌukamtawi.
\c 3
\s Jumeꞌ jujubekame, jaisa bem jiapsiꞌeaꞌu
\p
\v 1 Junuen san ketchia emeꞌe, kukunakame, enchim kukunam
nakeka am nok jikkajine. Junuen junameꞌe betana, watem
Krijtota nok lutuꞌuriata ka am sualeo juniꞌi, jiba enchim,
jumeꞌ bem jubim junuen tuꞌisi emo ujuꞌuꞌuuta bichakai,
junameꞌe, Krijtota sualbaane, ka ameu montiwao juniꞌi.
\v 2 Junameꞌe, enchim tua ammaꞌali intok sua maisia jiapsaꞌuta
bichakai.
\v 3 Intok inimeꞌe, juꞌu bem tua tutuꞌuli jaamuchim tuneeꞌu,
ka ama butti maisi bem emo aꞌanaarineeꞌu junaꞌatune.
Ka unnaa maisi emo chon chi chikrikai. Intok ka sawai
tomie yaꞌarik sawakai.
\v 4 Ala iniꞌi tua ujyoisi am joame, juꞌu ka luꞌutineeme
iniꞌi junaꞌatune. Tua tuꞌulisi bem mamiachineeꞌu, intok
yee nakeka yanti maisi bem mamachineeꞌu junaꞌa, bem jiapsimpo
amet yeu machikai. Bweꞌituk iniꞌi inien machikai junaꞌa
juꞌu Liojta tua eiyaaka aꞌ bichaꞌu.
\v 5 Bweꞌituk cheꞌa bat naataka taewaimmet inen ket
bebenaekan wameꞌe jaamuchim, wepulsi Liojta betchiꞌbo
jiapsisukame. Juꞌu ae bem tutuꞌulisi mamachiakaꞌu, iniꞌi
junaꞌatukan, bempo, Liojtat ean intok bem kukunam yoꞌoreka,
am nok jikkajan.
\v 6 Inien jiapsisuk juꞌu Saratukaꞌu, jukaꞌ aꞌ kunawata,
Apraꞌamtukaꞌuta nok jikkajakai, aꞌ japchi rokak. Emeꞌe
intok, aapoꞌik jiapsisukaꞌa benasi maisi machine, tuꞌik
joaꞌateko, intok kaita majjaika jiapsaꞌateko.
\p
\v 7 Emeꞌe juniꞌi ketchia kukunawaim, enchim jujubimmak
tuttuꞌinee naksi am eiyaakai. Bem jaamuchimtukaꞌpo amani
am bichaka, am yoꞌorine. Taa ka jukaꞌ jamutta, cheꞌa ka
aꞌ utteꞌakaꞌ betchiꞌbo jiba, taa ketchia, bempoꞌim jiba
emo benasia Liojta yee aꞌ nak jiokoleꞌ betchiꞌbo, jiba
yuu jiapsiwamta nanancha emot autuari. Junuen emeꞌe
jiapsine, Liojtau bicha enchim teuwaaꞌuta jikkajituneꞌ
betchiꞌbo.
\s Jumeꞌe, tuꞌik bem joaꞌ betchiꞌbo, jiokot emo bichame
\p
\v 8 Chukula intok ket, siꞌime emeꞌe nau eaka jiapsine.
Intok nanancha naas emo jiokoleka jiapsine. Krijtopo
enchim nau weriakaꞌpo amani emo nakne. Siꞌimeku yeteu
tuꞌik jiapsine. Intok ka emo cheꞌewarine.
\v 9 Taa jita ka tuꞌik emou yaꞌawako juniꞌi, emeꞌe ka
junaen ameu aꞌ nottabaene. Intok jaana jiawaawaka juniꞌi,
emeꞌe ka junaen ameu jiubaane. Ala emeꞌe, Liojta betana,
tuꞌik am aꞌauriane. Bweꞌituk juꞌu Lios enchim yeu puꞌari
jiba yuu betchiꞌbo tuꞌik enchim aamak bitneꞌ betchiꞌbo.
\v 10 Bweꞌituk:
\q Juꞌu, alleaka intok binwa inim jiapsibaeme, ka tuꞌik
aꞌ teuwaaneeꞌu betana au suuane.
\q Intok kia ka aa nokiꞌichiata teuwaanee juniꞌi.
\q
\v 11 Junaꞌa, jukaꞌ ka tuꞌik, aꞌ koptane.
\q Intok jukaꞌ tuꞌik jiba joone.
\q Yanti elaka aꞌ jiapsineeꞌut au temaine.
\q
\v 12 Bweꞌituk juꞌu achai Lios, jumeꞌ tuꞌisi jiapsame, am
suua.
\q Intok aapoꞌiku bicha bem nokaꞌuta, aꞌ jikkaja.
\q Taa wameꞌe ka tuꞌik joame, am bejeꞌeka aane.
\p
\v 13 Kaabe, ka tuꞌik enchim jooriane, tuꞌik ausuꞌlik
jiba enchim boꞌo jooriao.
\v 14 Taa emeꞌe intok junuen, Liojta bichapo tuꞌisi enchim
jiapsaꞌ betchiꞌbo, jiokot emo bichakai juniꞌi, ama butti
emeꞌe alleene. Kaabeta emeꞌe majjaune, intok kateꞌem
emo wom womta.
\v 15 Ala emeꞌe, yoꞌowe Jesukrijtota enchim aꞌ yoꞌowakaꞌpo
aman, emeꞌe, tua junen jiaka, aꞌ yoꞌorine. Intok jumeꞌe,
chukula enchim bitneeꞌu betana juꞌuneebaeka, emou nattemaeme,
jiba emeꞌe aꞌ juꞌuneiyaanee junaet enchim am tejwaaneꞌ
betchiꞌbo. Taa ka emo cheꞌewarekai, intok am yoꞌori taꞌaakai.
\v 16 Intok tuꞌisi emeꞌe emo ujuꞌune, junuen, achai Liojta
bichapo tuꞌisi enchim jiapsaꞌpo juꞌunee betchiꞌbo. Junuen,
jumeꞌe, Jesukrijtota enchim sualeꞌ betchiꞌbo, juꞌu tuꞌisi
enchim jiapsaꞌut, ka tuꞌisi nokame, bem teuwaaꞌu betana,
tiusi bem tawaneꞌ betchiꞌbo.
\v 17 Bweꞌituk cheꞌa juniꞌi tuꞌi, itepo, tuꞌik itom joaꞌ
betchiꞌbo, jiokot ito bichakai, achai Liojta junuen aꞌ
waatao, intok kaa, juꞌu ka tuꞌik itom joaꞌ betchiꞌbo jiokot
ito bichakai.
\p
\v 18 Bweꞌituk jiba aapo juꞌu Jesukrijto, itom ka tuꞌuwa
yaꞌarim betchiꞌbo, sejtul jiba, siꞌimem betchiꞌbo, meꞌetuk.
Aapo tuꞌi yoemtukan, taa, itom jumeꞌ ka tuꞌi yoemem betchiꞌbo,
jiokot au bichak. Junuen, Liojtamak ito tuꞌuteka, intok
au bicha itom lutuꞌuriakaꞌ betchiꞌbo. Inim aꞌ yoemtukaꞌpo
aman, muukuk. Taa Liojta betana jiapsita aet ayukaꞌue,
jiabijtek.
\v 19 Intok junuen jiapsakai, ket, jumeꞌ bat naataka kokkolam
jiapsim jipuꞌuwaaꞌu sikaa, ameu nookak.
\v 20 Inimeꞌe junen, cheꞌa bat naataka taewaimmet, Noeꞌ
teamta jiapsao, ka Liojta nok jikkajakan. Ket jukaꞌ bweꞌu
kuta kanoata joowao, achai Liojta intok ket, ka seej chukti
eaka, binwa amet aꞌ boꞌo bichao. Junamaꞌasan, woj naikika
jiba, ama baꞌapo jinneꞌurimtaka yeu sajak.
\v 21 Junaꞌa baꞌa, jiba iꞌan yee batoꞌowaawamta iniae
iꞌan itom jinneꞌurimtukaꞌuta teuwaaka joowamta, teuwaa.
Juꞌu yee batoꞌowaawame, ka uꞌubawame, ala iniꞌi, Liojta
bichapo tuꞌisi jiapsipeewamta au bicha aꞌ aꞌawamta teuwaa.
Intok iniꞌi, Jesukrijtota kokkoarim nasuk aꞌ jiabijtekaꞌ
betchiꞌbo itom jinneꞌukai.
\v 22 Aapo, teekau jikau aꞌ sikaari, Liojta mak aꞌ batatana
katek. Aapoꞌiku intok, jumeꞌ ankelesim intok siꞌime teekau,
intok inim bwiapo yaꞌuraa au suꞌu tojirim.
\c 4
\s Liojta itom maki, itom au yumaka a joaꞌue, yee aniame
\p
\v 1 Junuen san, Jesukrijtota jiokot au aꞌ bichakaꞌa
benasia, emeꞌe juni ket junaen jiokot emo bit betchiꞌbo,
ka jain eene. Bweꞌituk juꞌu, inim jiapsaka, jiokot au
bichakame, jukaꞌ ka tuꞌuwata, ka intok aꞌ joopeene.
\v 2 Junuen, inim aꞌ jiapsaꞌu tajtia, Liojta eaꞌpo aman
jiapsibaekai, ka intok, inim juꞌu ka tuꞌikue emo alleetuawamta
aꞌ joobaekai.
\v 3 Ka iliiki juꞌu enchim yaꞌari, bat naatakai, jumeꞌ
ka Liojta sual taꞌammak, bem tuꞌureꞌuta, ka tuꞌik enchim
amemak yaꞌari. Junakriapo emeꞌe, ka tuꞌik joopeakai, enchim
naakoneeꞌuta, jaiti jiuwaka pajkoowamta, intok unnaa jita
jeꞌeekai. Intok jumeꞌ ka lutuꞌuriapo liosim, jumeꞌ ka
yoꞌori iꞌawame, yoꞌorekai.
\v 4 Junameꞌe enchim suumꞌeiyaaka, emou waate, enchim
ka intok bempoꞌim ka tuꞌisi jiapsaꞌpo ka amemak enchim
aneo. Intok junuen san, bempo, ka tuꞌisi emot nooka.
\v 5 Taa junameꞌe, bem yaꞌari, aet au emo yeu bwijne, juꞌu,
lauti, jumeꞌ kokkoarim intok kia jiapsame juniꞌi, yaꞌuraa
bittuanemtawi.
\v 6 Bweꞌituk jumeꞌ kokkoarimmeu ket teuwaari juꞌu Krijtota
nok lutuꞌuria. Junuen, bem aꞌ juꞌuneiyaaka, junameꞌe kokkokame
jiapsim, Liojta am jiapsi iꞌaꞌpo aman bem jiapsineꞌ betchiꞌbo.
Inim siꞌimem jiapsame benasi yaꞌuraa bittuanaaka juniꞌi.
\p
\v 7 Abe yuuma juꞌu taewai, siꞌimeta aet luꞌutineeꞌu.
Junuen san emeꞌe suasi jiapsine. Intok ket emeꞌe, tua
junen jiaka, Liojtau bicha enchim emo nokrianeeꞌut jiapsine.
\v 8 Taa jita bepa juniꞌi, enchim tuꞌisi emo nakneeꞌu
emo nasuk aune. Bweꞌituk juꞌu tua yee nakeme, juebenakut
a yee jiokoe.
\v 9 Kaachin jiaka, emeꞌe, enchim joꞌarampo tuꞌisi emo
mabbetne.
\v 10 Siꞌime, weꞌepulaka, watem am aniane, Liojta betana
aꞌ joaka aꞌ jipueꞌue. Liojta betana ka nanau machika
tuꞌik enchim mabetlaꞌuta a enchim aꞌ weetuaꞌa benasia.
\v 11 Senu nokbaeꞌeteko, Liojta nok lutuꞌuriapo aꞌ jiꞌojteitukaꞌpo
aman etejone. Senu intok jitaꞌpo juniꞌi yee aniaꞌateko,
Liojta betana aꞌ aniawaꞌpo aman aꞌ joone. Siꞌime juꞌu
enchim joaꞌu, achai Liojta yoꞌorinaꞌ betchiꞌbo weene,
Jesukrijtota, enchim aꞌ yaꞌariakaꞌu betchiꞌbo. Aapoꞌiku
intok lutuꞌuria aꞌ yoꞌorinaaꞌu, intok yoꞌotaka aꞌ nesauneeꞌu
jiba yuu wasuktiammeu tajtia. Tua junuentune.
\s Krijtota sualeka, jiokot emo bichakai
\p
\v 12 Krijtopo nemak werim, tuꞌisi in nakeꞌum, ka emeꞌe
suumꞌeene, jukaꞌ ama butti bettesi machika emou aꞌ yumaꞌataiteko,
jita ka enchim taꞌaaꞌuta enchim ineꞌaꞌa benasia.
\v 13 Ala emeꞌe alleene, junuen Jesukrijtota jiokot au
bichakaꞌa benasia, aamak jiokot emo bichakai. Junuen
ket emeꞌe, ama butti allee betchiꞌbo, Jesukrijtota, siꞌime
utteꞌata aet ayuka, ujyoisi juchi aꞌabo aꞌ notteo.
\v 14 Jesukrijtota betchiꞌbo emeꞌe jaana jiawaawaꞌateko,
ama butti emeꞌe alleene. Bweꞌituk juꞌu, ama butti eiyaawatchika,
Liojta tuꞌu jiapsiwa emot jiapsa. Bempo, jumeꞌ ka Krijtota
sualeme, ka tuꞌisi aet nooka. Taa emeꞌe, junakaꞌa aꞌ eiyaaka
aꞌ yoꞌore.
\v 15 Emo betana senu jiokot au bichaꞌateko, ka aꞌ jisuꞌalatukaꞌ
betchiꞌbo oo jita aꞌ eꞌetbwaꞌ betchiꞌbo oo ka aꞌ ka
tuꞌi yoemtukaꞌ betchiꞌbo. Intok kia, kaita aꞌ tuttuꞌuteꞌpo
aꞌ kikkibakkeꞌ betchiꞌbo, junuen junae betchiꞌbo jiokot
au bitne.
\v 16 Taa emo betana seenu, Krijtota aꞌ sualeka, aamak
aꞌ eaꞌ betchiꞌbo, jiokot au bichaꞌateko, ka junae betchiꞌbo
tiune. Ala Liojta yoꞌoreka aꞌ alleetuane, junuen Jesukrijtota
aꞌ sualeꞌ betchiꞌbo junuen taꞌeewakai.
\p
\v 17 Bweꞌituk yumaꞌasuk juꞌu taewai, Liojta betana jumeꞌ
aapoꞌik yoemiam, tuꞌisi bem jiapsineꞌ betchiꞌbo jiokot
maisi ameu aꞌ weeneꞌpo. Iniꞌi intok Liojta betana junuen
itou aꞌ weyeꞌeteko, jumeꞌ ka Liojta nok lutuꞌuriata jikkajibaeme,
unnaa ka tuꞌisi ameu chupne.
\v 18 Intok junuen: Jumeꞌ tuꞌisi jiapsame, bweeꞌanpo
jiba jinneꞌuimtuneekai, jiba tua, unnaa ka tuꞌisi ameu
chupne, jumeꞌ ka tuꞌi yoememmewi intok jumeꞌe, Liojta
bichapo ka tuꞌik boꞌo jooriammewi.
\v 19 Junuen san jumeꞌe, Liojta junen eaꞌ betchiꞌbo jiokot
emo bichame, junuen tuꞌik jiba boꞌo jooriaka jiapsine.
Intok Liojta, jukaꞌ am juꞌunaktekamta, mampo emo suꞌu
tojine, jiba am suuaneemta.
\c 5
\s Jumeꞌ Krijtota sualeme nok tejwaawaꞌu
\p
\v 1 Iꞌan ne, jumeꞌ Krijtota sualemmeu yoꞌowemmeu ne
ujbwana. Enchim nau yaajaꞌpo beꞌekatana, nejpo su ket
emo benasi junakaꞌa tekiak. Intok Jesukrijtota jiokot
au bichakaꞌa benasia ket aꞌ juꞌuneiyaakai. Intok ketchia,
jiba emo benasia ne ket ne aꞌ bitnee jukaꞌ chukula, jiba
betchiꞌbo itom aamak aneka, itom yoꞌorinaaꞌuta.
\v 2 Junuen ne emou ujbwana, emeꞌe, jumeꞌ Krijtota sualemmeu,
enchim ameu yoꞌotaka jaꞌabwekaꞌpo aman, bwalam benasi
am suuane. Intok aet jiapseka, emeꞌe aꞌ joone. Achai
Liojta junen aꞌ tuꞌureꞌpo amani. Intok ka utteꞌapo benampo,
intok kia ka ama butti tomibaekai juniꞌi aꞌ joone. Taa
enchim tekil, emeꞌe aet jiapseka aꞌ joone.
\v 3 Emeꞌe, jumeꞌ enchim ameu jaꞌabwekaꞌummeu, emeꞌe ka
enchim ameu yoꞌo yaaꞌuchimtukaꞌa benasi eene. Ala emeꞌe
ame bichapo tuꞌik joobaanee junuen enchim am mammateneꞌ
betchiꞌbo.
\v 4 Junuen, jukaꞌ yoꞌowe Jesukrijtota, siꞌimem bepa cheꞌa
yoꞌotaka itom suuamta, junakaꞌa juchi aꞌabo aꞌ notteo,
junak emeꞌe, jukaꞌ chukula, jiba yuu betchiꞌbo eiyaawatchika,
emou tuꞌik, emeꞌe aꞌ bitne. Intok ka inim, juya koonata,
lauti wakneemta benak.
\p
\v 5 Ket jiba junaensu juꞌubwa yoꞌotume, emeꞌe, jumeꞌ
Krijtota sualemmeu yoꞌowem, bem nesaupo aman jiapsine.
Siꞌime nanancha emeꞌe ka emo cheꞌewareka, emo jikkajine.
Bweꞌituk:
\q Juꞌu Lios, jumeꞌ emo cheꞌewareme, ka am eiyaa.
\q Taa jumeꞌ ka emo jabeleme, naksi am eiyaaka am ania.
\m
\v 6 Junuen san emeꞌe, Lios, siꞌime utteꞌata jipuemtau
emo suꞌu tojinee ka emo jabelekai. Junuen, taewaita aapoꞌik
yeu puꞌarita aꞌ yumako, aapo enchim eiyaa tebone.
\v 7 Siꞌimeta jukaꞌ betteka emou ayukamta, aapoꞌik Liojtau
bicha aꞌ teuwaane. Bweꞌituk aapo, emot jiapseka, emot
au temae.
\p
\v 8 Ket emeꞌe, ka jachin juniꞌi jiapsine. Taa jiba emo
suuaka jiapsine, intok suasi emeꞌe emo ujuꞌune. Bweꞌituk
juꞌu bebejeꞌeri, enchim bejeꞌeka aneme, emou suua, ouseita,
aꞌ tebaureka, jita aꞌ bwijbaeꞌe benasi anekai.
\v 9 Junau emeꞌe ka au emo suꞌu tojine. Ka taꞌabwisi
eaka, Krijtota jiba emeꞌe sualekai. Aꞌ utteꞌatukaꞌpo
juꞌuneakai, siꞌime jumeꞌ Krijtopo emomak werim, siꞌimekut
aniat jiapsame, emo benasi jiba junaet jiokot emo am
bichaꞌpo.
\v 10 Taa emeꞌe, junaen chuubaa inim jiokot emo bitchukai,
chukula, aapo juꞌu Lios, Jesukrijtota tuꞌisi jiapsisukaꞌa
benasia, enchim jiapsineꞌ betchiꞌbo enchim aniane, ka
omot bicha taꞌabwisi eakai, intok ket enchim aet suatuka,
aꞌ jajameꞌu tajtia. Jiba aapo junaꞌa juꞌu Lios, juꞌu
siꞌime jukaꞌ tuꞌik itot autuame. Intok ket itom yeu
puꞌari, yoꞌowe Jesukrijtotamak nau jiapsaka, jiba betchiꞌbo
tuꞌik itom aamak bitneꞌ betchiꞌbo.
\v 11 Aapoꞌiku lutuꞌuria, eiyaawaka aꞌ yoꞌorinaaꞌu intok
siꞌime yaꞌuraata bepa aꞌ nesaweꞌu, jiba yuu betchiꞌbo.
Tua junuentune.
\s Jiꞌojtesuka, juꞌu Peeo am tebotua
\p
\v 12 Silbaanoꞌ teame, juꞌu, Jesukrijtota, ka aꞌ koptaka,
tua aꞌ sualeꞌpo in juꞌuneiyaaꞌu, inikaꞌa iliikik in emou
jiꞌojteꞌuta, nee aꞌ yaꞌariaka nee aꞌ jiꞌojteriak, enchim
sua tejwaakai intok aꞌ lutuꞌuriatekai, jukaꞌ Liojta betana
tuꞌik enchim bitꞌiiaaꞌuta, tua Liojta yee aꞌ nakeꞌ betchiꞌbo
enchim aꞌ bitlatukaꞌpo. Inikaꞌa emeꞌe, ka aꞌ koptaka,
aꞌ sualne.
\p
\v 13 Jumeꞌe, bweꞌu joꞌara Babilooniaꞌ teaꞌpo, Krijtota
sualeme, ket emo benasi jumeꞌ Liojta yeu puꞌarim, emou
tebote. Intok ket juꞌu Maekoj teame, Krijtota aꞌ sualeꞌ
betchiꞌbo, in yoemia, aapo emou tebote.
\v 14 Emeꞌe juniꞌi ket, tua Krijtopo enchim nau weriakaꞌpo,
enchim emo nakeꞌuta nau teuwaaka, naas emo tebotuane.
\p Siꞌime emeꞌe, jumeꞌe, Jesukrijtota mak eaka aꞌ sualeme,
jiapsi yanti elwamta emeꞌe bitne. Tua junuentune.