\id 2PE
\h 2 PEEO
\toc1 2 PEEO
\mt 2 Peeo
\c 1
\s Juꞌu Peeo, jumeꞌ Krijtota sualemmeu jiꞌojte
\p
\v 1 Inepo, Simo Peeoꞌ teame, Jesukrijtota betana nee
sawaa. Intok ae betana nee yeteu bittuari. Inikaꞌa jiꞌosia
jiꞌojteita ne emou bittua, jumeꞌe, jiba ito benasi jukaꞌ
tua eiyaawatchik, Jesukrijtota ket aꞌ suallammeu. Bweꞌituk
juꞌu itom Lios, intok Jesukrijto, juꞌu yee jijinneꞌume,
tuꞌik lutuꞌuriakamta jiba yee jooria.
\v 2 Ama butti emeꞌe aꞌ bitnee jukaꞌ emou tuꞌik intok
yanti elaka jiapsiwamta. Itom yoꞌowe Jesukrijtota intok
itom achai Liojta betana weyemta enchim juꞌuneiyaaꞌutchi.
\s Jumeꞌ Krijtota sualeme, au yumaka, a bem joaꞌu
\p
\v 3 Aapo juꞌu Lios, a jita aꞌ joaꞌ betchiꞌbo, siꞌimeta
jukaꞌ inim jiapsi betchiꞌbo itou beꞌeemta, intok ka aꞌ
koptaka itom aꞌ nak yoꞌorineꞌ betchiꞌbo, itot aꞌ autuari.
Jukaꞌ ama butti, kaitau a tamachiatuka, tuꞌik aꞌ yaakaꞌue
intok aapo au bit teboka, itom aꞌ taꞌaatuaka itom juꞌuneiyaaꞌu
betchiꞌbo. Aapo intok, itom yoemiabaeka itom nunuk.
\v 4 Inia weyemtae san, aapo, ama butti tuꞌika intok tua
eiyaawachik, chukula itom bitneeꞌuta, itou aꞌ naꞌikiak.
Junuen beja, inia tuꞌika itom bitneeꞌue aman, emeꞌe, Liojta
betana, aꞌ tuꞌu jiapsie, aapoꞌik eaꞌpo aman, enchim aꞌ
jiapsi iꞌaꞌuta aꞌ taꞌaane. Intok, inim jiapsiwaka, siꞌime
ka tuꞌik joowaka, yee nanasontemta betana enchim ama
yoꞌeneꞌ betchiꞌbo.
\v 5 Intok jiba inia betchiꞌbo san, emeꞌe, emo utteꞌa
jooriane, Jesukrijtota enchim sualekai, tuꞌisi enchim
emo ujuꞌuneeꞌut aꞌ taꞌaꞌ betchiꞌbo. Intok iniat chaꞌaka
ket, Liojta betana weyemta tuꞌisi enchim aꞌ taꞌaaneeꞌut.
\v 6 Intok inia, Liojta betana lutuꞌuriata betana enchim
taꞌaaꞌut chaꞌaka intok ket, enchim emo yuꞌiineeꞌut. Iniat
chaꞌaka intok ket, ka seej chukti eaka, enchim a boꞌo
bitneeꞌut. Iniat chaꞌaka intok ket, achai Liojta jiba
enchim yoꞌorineeꞌut.
\v 7 Iniat chaꞌaka intok ket, Krijtota sualeme enchim
eiyaaneeꞌut. Iniat chaꞌaka intok ket, tua enchim yee
nak taꞌaaneeꞌut.
\p
\v 8 Bweꞌituk emeꞌe, inile benak taꞌaaka, intok tuꞌisi
aꞌ boꞌo jooriaꞌateko, ka kia beja tua, emeꞌe jiapsine.
Intok junuen, ka kia emo betchiꞌbo jiba tuꞌine, yoꞌowe
Jesukrijtota betana juꞌu enchim sual taꞌaaꞌu.
\v 9 Taa juꞌu, inile benak ka joo taꞌaame, junaꞌa ka bichame
benasi maachi. Krijtota nok lutuꞌuriata koptalataka
inim ayukamta jiba bichakai. Intok cheꞌa bat naataka
ka tuꞌuwa yaꞌari betana aꞌ jiokoiwakaꞌu beaj koptila.
\v 10 Junuen san, Krijtopo nemak werim, junuen juꞌuneakai,
cheꞌa juni san emeꞌe, achai Liojta enchim nunuka intok
enchim yeu aꞌ puꞌakaꞌu, tua junuen aꞌ lutuꞌuriatukaꞌpo
juꞌunee betchiꞌbo, tuꞌisi enchim jiapsineeꞌut emo temaine.
Bweꞌituk emeꞌe inikaꞌa joo taꞌaꞌateko, jakwoo juniꞌi
emeꞌe ka aet jiꞌopne.
\v 11 Junuen, kaita emoaj ayukai, emeꞌe tuꞌisi aman mabettune,
itom yoꞌowe Jesukrijtota, jukaꞌ itom jinneꞌukamta, jiba
betchiꞌbo siꞌimem bepa cheꞌa yoꞌo nesaweka aꞌ katekaꞌu.
\p
\v 12 Inia betchiꞌbo san, inepo, inia weemta betana, nee
jiba enchim au waatituane. Iniat jaibu enchim juꞌuneao
juniꞌi. Intok Krijtota betana nok lutuꞌuriata, iꞌan enchim
juꞌuneiyaaꞌuta, ka taꞌabwisi intok enchim aꞌ sualbaao
juniꞌi.
\v 13 Bweꞌituk ineponee aꞌ utteꞌatu machia, ket inim
jiapsaka, inile benakue jiba enchim in sua tejwaaneꞌpo.
\v 14 Bweꞌituk itom yoꞌowe Jesukrijtota betana nee aꞌ
juꞌuneiyaatuala, inim in jiapsaka, lauti in luꞌutineeꞌuta.
\v 15 Taa junuen taka juniꞌi, siꞌimeta in a jooneeꞌuta
ne aꞌ yaꞌane, junuen nee muksuko, chukula, inia weemtau
jiba enchim waatineꞌ betchiꞌbo.
\s Jumeꞌe, Jesukrijtota tua eiyaawatchisi machik yaakaꞌu bichakame
\p
\v 16 Bweꞌituk juꞌu lutuꞌuria, itom yoꞌowe Jesukrijtota
juchi aꞌabo aꞌ nottineeꞌu betana intok siꞌime utteꞌata
aet ayukaꞌu betana, itom enchim majtakaꞌu, ka inim jabeta
betana yeu simlataka weye. Bweꞌituk itom pusimmea itepo
aꞌ bichak, kaitau a tamachiatu machik aꞌ yaakaꞌuta.
\v 17 Bweꞌituk itepo aꞌ bichak, achai Liojta, ito bichapo,
eiyaawatchisia intok yoꞌorisi maisia aꞌ bit teboko.
Achai Liojta betana intok, jiawai, tua ujyoisi: “Iniꞌi
junaꞌa, juꞌu in yoemia, in nakeꞌu. Aapoꞌik betana juꞌu
tua in alleaꞌu”, ti jiakai.
\v 18 Jiba itepo tee aꞌ jikkajak junakaꞌa jiawaita, teeka
betana au nokakamta. Bweꞌituk itepo, Jesukrijtota mak
junamaꞌa kaupo, aapoꞌik yeu puakaꞌpo, tee aamak aanen.
\p
\v 19 Senu weemta ket, itepo, cheꞌa juniꞌi a eiyaatumta
te jipue, jukaꞌ cheꞌa bat naataka, jumeꞌ Liojta betana
aꞌ juꞌuneiyaatuawakame jiꞌojtekaꞌuta. Emeꞌe intok, tua
tuꞌisi anne, junakaꞌa Liojta betana nok lutuꞌuriata aꞌ
mammateꞌeteko. Tachiriata, ka machiku aꞌ beeteꞌe benasi
machikai. Jesukrijtota aꞌabo notteꞌu tajtia emou alleewametuneeꞌuta,
intok chokita, matchuu yeu weamamta benasi machika, emou
tuꞌik emou aꞌ yumaꞌapo tajtia.
\v 20 Taa inikaꞌa bat emeꞌe juꞌuneiyaane, jum Liojta
nok lutuꞌuriapo, jukaꞌ jiꞌojteita, kaabeta, aapo aꞌ eaꞌpo
aman, juꞌu aꞌ teuwaaꞌut juꞌuneene.
\v 21 Bweꞌituk junameꞌe, bat naataka, chukula yeu weenemta
teuwaakame, jukaꞌ bem teuwaaꞌuta, jakwoo juniꞌi, ka bempo
bem suawapo oo bem junen eaꞌ betchiꞌbo, bem eaꞌpo aman
aꞌ teuwaak. Ala bempo, wepulsi Liojta betchiꞌbo jiapsakai,
Liojta betana weyemta teuwaak, junuen Liojta betana, aꞌ
tuꞌu jiapsie aet juꞌuneetuawakai.
\c 2
\s Jumeꞌe, ka lutuꞌuriata yee majtame
\p
\v 1 Taa junakriapo ket, Ijraꞌel yoemrata nasuk aanen,
ka lutuꞌuriapo, jumeꞌe, Liojta betana emo yeteu noktuawaꞌati
jiaꞌum. Intok jiba junuen ketchia, emo nasuk annee, ka
lutuꞌuriapo, jumeꞌe, Liojta betana yee majtaneeme. Junameꞌe,
etbwa, bem eaꞌpo aman, yee nanasontemta yee majtane. Intok
junuen, yoꞌowe Jesukrijtota, jukaꞌ am jinneꞌukamta, ka
aꞌ sual tebokai. Iniꞌi intoko, seej chukti bem luꞌutineeꞌuta
ameu yaꞌane.
\v 2 Juebenaka intok, inime mak eene. Ame benasi siꞌimeku
ka tuꞌisi jiapsakai. Intok junameꞌ betchiꞌbo, jukaꞌ Liojta
nok lutuꞌuriata, ae yee jinneꞌuwamta, ka sualwaka, jaana
jiawaanaa.
\v 3 Inimeꞌe, tomit bem kopteꞌ betchiꞌbo, aa nokiꞌichiata
enchim majtaka, enchim attea enchim uꞌaane. Taa junameꞌe,
bempoꞌim, jiba betchiꞌbo bem kokkoneeꞌu, ameu yumaꞌane.
Bweꞌituk inimeꞌe binwatuk naateka, ka tuꞌisi tawalamtaka,
bem kokkoneeꞌuta ameu chupia.
\p
\v 4 Bweꞌituk juꞌu Lios, jumeꞌ ankelesim, ka tuꞌisi aukame,
ka am jiokoek. Ala, jiba betchiꞌbo taji beeteu, bem jiokot
emo bitneeꞌpo am suꞌu tojak. Intok junamaꞌa ka mamachiku,
eꞌetaꞌim benam am tawaak, Liojta yee yaꞌuraa bittuaneeꞌuta
taewaita yumaꞌu tajtia.
\v 5 Intok ket, kia jukaꞌ cheꞌa bat naataka yoemrata
jiapsisukaꞌum juniꞌi ka jiokoek juꞌu Lios. Ala, baꞌata
ameu bittuak, junae ka tuꞌi yoemratawi. Taa jukaꞌ Noe
tukaꞌuta jiba aꞌ jinneꞌuk. Jukaꞌ Liojta betana tuꞌik
yee majtakame. Junaemak intok ketchia, jumeꞌ woo busanim
aamak joꞌaakame.
\v 6 Ket juꞌu Lios, jumeꞌ bwere joꞌaram, Soroomaꞌ teamta
intok Komooraꞌ teamta, bem luꞌutineeꞌuta ameu chupak
am nappojtuꞌu tajtia am tayakai. Junakaꞌa junuen, chukula
yoemrata, ka tuꞌika jiapsinemta, aꞌ bichaka aꞌ mammateneꞌ
betchiꞌbo.
\v 7 Taa jukaꞌ Loot tukaꞌuta junamaꞌa aꞌ jinneꞌuk. Junaꞌa,
Liojta bichapo tuꞌi yoemtukan. Intok aapo, jukaꞌ yoemrata
ka tuꞌik boꞌo jooriamta bichaka, tua ka allean.
\v 8 Bweꞌituk chikti taꞌapo junaꞌa tuꞌi yoeme, junae
yoemratamak jiapsakai, ama butti ka allean, junamaꞌa, junameꞌe
ka tuꞌik joame bichaka, intok ka tuꞌik nokame jikkajakai.
\v 9 Junuen, juꞌu achai Lios, jumeꞌ wepulsi aapoꞌik betchiꞌbo
jiba jiapsibaeme, siꞌime ka tuꞌik betana am jinneꞌu betchiꞌbo
ama yumaꞌane. Jumeꞌ intok, ka tuꞌi yoemem, taewata, aapoꞌik
yee aet aꞌ yaꞌuraa bittuaneeꞌuta yumak, jiokot emo am
bittua betchiꞌbo utteꞌapo am sumaꞌalaa.
\p
\v 10 Juꞌu achai Lios intok, cheꞌa juniꞌi jiokot emo
am bittuane, wameꞌe siꞌimeta ka tuꞌik bem eiyaaꞌuta boꞌo
jooriaka jiapsame. Intok Jesukrijtota aꞌ nesaurita ka
yoꞌoreme. Jumeꞌ ka a yuutume intok kaita jain eiyaame.
Katim majjae, siꞌime yoꞌo yaꞌuraata jaana bem jiaawaaneꞌpo.
\v 11 Jumeꞌ ankelesim, siꞌimeku yumaka intok nesaweka
juniꞌi, ka inimeꞌe benasia junakaꞌa yaꞌuraata jaana jiaawaka
achai Liojta bichapo ka tuꞌisi am tawaa.
\p
\v 12 Taa inimeꞌe oꞌowim, jumeꞌ naikim wokekame, kia beja
jiapsaka intok ka suawakame benasi mamachi. Jumeꞌ junuen,
bwijwaka intok suꞌa betchiꞌbo jiba yeu tomtilame. Ka
bem aet juꞌuneaꞌut juniꞌi, ka tuꞌisi nooka. Taa junameꞌe,
jiba jumeꞌ juyapo jiapsame benasi kokkone,
\v 13 watem bem jiokot emo bittuakaꞌa benasia, jiokot
emo bichakai. Inimeꞌe, kia lautipo ka tuꞌikue emo alleetuaka,
tua emo alleaꞌa benasiꞌea. Inimeꞌe tua tiusi mamachi.
Intok enchim alleaka nau aneꞌepo bempo emomak aneka,
ka ammaꞌali aneka, enchim nasonte. Junuen bempo ka tuꞌik
joaka, junae alleewamtae emo alleetuakai.
\p
\v 14 Jabe jamutta juniꞌi bichaka, sep aꞌ waatane. Ka
tuꞌik bem jooneeꞌuta, inimeꞌe ka aawaj kop kopte. Jumeꞌ
kee tuꞌisi Krijtota betana lutuꞌuriat juꞌuneame, am bai
taꞌaaka, ka tuꞌik am jootua. Bempo, jain juniꞌi jita waatiawamta
eiyaaka aꞌ joo taꞌaa. Ka tuꞌu yoemrataka, ka tuꞌisi ameu
chupia.
\v 15 Junameꞌe ka tuꞌisi jiapsa. Jukaꞌ lutuꞌuriata, Liojta
betana weyemta suꞌu tojakai, chiktukame benasi maachi.
Bat naataka, senuk, Liojta betana yeteu noktuawakamta,
Balaam teamta, Beor teamta uꞌusi ayukaꞌa benasi anekai.
Junaꞌa, ka tuꞌik boꞌo jooriaka, yuꞌin tomibaen.
\v 16 Intok junaꞌa junuen ka tuꞌik aꞌ joaꞌu betana sua
tejwaatuk. Buuru, ka a nokaka juniꞌi, yoem jiawaipo au
noktuawakai, ka suasi aꞌ aneꞌuta aꞌ uꞌaakai.
\p
\v 17 Inimeꞌe oꞌowim, posom, ka baꞌaka benasi maachi.
Intok jumeꞌ naamum, ka baꞌakame, jekae weiyaawame bebena.
Inimeꞌe, ameu chupia, jum cheꞌa ka mamachikun, jiba betchiꞌbo
bem aman tawaaneeꞌuta.
\v 18 Bweꞌituk bempo, kia beja tua nokaka, tuꞌisi ujyoisi
emo etejo. Intok bempo, ka tuꞌik bem joaꞌue intok siꞌimeku
ka tuꞌisi bem jiapsaꞌue am bai taꞌaaka am utteꞌa jooria,
jumeꞌ lutuꞌuriapo juꞌubwa jeela ka lutuꞌuriata sualeme
betana jinneꞌurimtukaꞌum.
\v 19 Ka tuꞌika intok bettesi machik betana, ka bem aꞌ
bitneeꞌuta am majtaka juniꞌi, taa bempo su junameꞌem,
jumeꞌ ka tuꞌik bem joaꞌu emo suꞌu tojilam. Bweꞌituk
jabetaka juniꞌi jitau au suꞌu tojilataka jiapsame, junae
betana yuuꞌiritune.
\v 20 Bweꞌituk jumeꞌe, yoꞌowe Jesukrijtota, jukaꞌ itom
jinneꞌukamta aꞌ suallame, intok junuen, inim siꞌime ka
tuꞌik betana yeu sakaꞌalamtakai, intok chukula juchi
junakaꞌa tuꞌureka intok au emo suꞌu tojako, junameꞌe,
cheꞌa bat bepa, ka tuꞌisi tawalamtune.
\v 21 Bweꞌituk junameꞌ betchiꞌbo, cheꞌa juniꞌi tuꞌi ean,
jukaꞌ tuꞌik ausuꞌlika lutuꞌuriata, yee jinneꞌumta, ka
bem aꞌ taꞌaako. Intok ka junuen aꞌ taꞌaaka intok chukula
jukaꞌ Liojta betana nok lutuꞌuriata, yoꞌorisi machik
aapoꞌik betana bem majtawakaꞌuta, juchi aꞌ koptaneekai.
\v 22 Inimmeu tua yeu chupia waꞌa lutuꞌuria inen jiame:
“Juꞌu chuꞌu, yeu aꞌ tojakaꞌuta juchi bwaꞌaka.” Intok:
“Juꞌu koowi jamut, juꞌubwa uubaawaka juniꞌi, techoapo
boꞌotek”, ti jiame.
\c 3
\s Jesukrijtota jaisa aꞌ nottineeꞌu
\p
\v 1 Krijtopo nemak werim, in nakeꞌum, iniamak wooi jumeꞌ
jiꞌosiam in emou bittualaꞌum. Jum wooi jiꞌosia jiꞌojteimpo,
tua junen jiaka, ne enchim aꞌ mammate iꞌa, tuꞌikut enchim
nok tetejwaakai.
\v 2 Bat naataka, jumeꞌe, Liojta betana yeu puꞌawaka, yeteu
noktuawame teuwaakaꞌubeu waatine. Intok yoꞌowe Jesukrijto,
itom jinneꞌukamta betana nesaurita, jumeꞌ aapoꞌik betana
yeteu bittuarim, enchim majtakaꞌuwi waatine.
\p
\v 3 Inikaꞌa emeꞌe bat mammatene. Chukula taewaim luꞌutiseo,
jumeꞌ Liojta betana weyemta ka yoꞌoreka, jaana jiawaaneeme
anneeꞌpo. Inimeꞌe, bempo, ka tuꞌik bem joopeaꞌpo aman
junuen jiapsakai.
\v 4 Intok inen nattemainee: “Jaisa yeu siika, bat naataka
juꞌu Jesukrijtota aꞌ nottineꞌpo teuwaawakaꞌu. Bweꞌituk
bat naataka itom yoꞌowasukaꞌum kokkok naatekai, siꞌime
inim aꞌ juꞌunaktewakaꞌa benasi maachi”, ti jiunee junameꞌe.
\v 5 Bempo ka aꞌ juꞌuneiyaabaeka, ka juꞌunea, cheꞌa bat
naataka naatekai, jukaꞌ teekapo ayukamta jaibu aꞌ juꞌunakteitukaꞌpo.
Intok jukaꞌ bwiata, Liojta junuen aꞌ nesawekaꞌ betchiꞌbo,
baꞌapo yeu machiakamta. Intok junaꞌa bwia, baꞌae jiapsa.
\v 6 Taa intok, juꞌu bat naataka inim jiapsaꞌu, baꞌae
subimnek, intok luꞌutek.
\v 7 Taa intok, juꞌu teekapo ayukame intok iniꞌi bwia,
iꞌan ayukame, tajiae luꞌutine. Jiba achai Liojta junen
aꞌ nesawekaꞌ betchiꞌbo. Junaꞌa taji am tayaꞌane, taewai
yumak, Liojta yee yaꞌuraa bittuao, jumeꞌ ka tuꞌi yoemem
jiba betchiꞌbo, ka tuꞌisi tawarimtaka, am suꞌatuneeo.
\p
\v 8 Intok ketchia, Krijtopo nemak werim, tuꞌisi in nakeꞌum,
ka emeꞌe aꞌ koptane, achai Liojta, jukaꞌ senu taewaita,
senu miil wasuktiam benasi aꞌ bichaꞌpo. Intok kia jumeꞌ
senu miil wasuktiam, wepul taewaita benasi aꞌ bichaꞌpo.
\v 9 Kaachin lutuꞌuriapo juꞌu achai Lios, jukaꞌ aꞌ teuwaarita
yeu aꞌ machia betchiꞌbo, binwatu oꞌoben, watem junuen
aꞌ bichao juniꞌi. Ala binwa a itot boꞌo bicha. Bweꞌituk,
kaabem, jiba betchiꞌbo kokko iꞌa. Ala siꞌimem, aapoꞌiku
bicha emo am jiapsi kuakta iꞌa, bem jinneꞌuimtuneꞌ betchiꞌbo.
\p
\v 10 Taa juꞌu taewai, yoꞌowe Jesukrijtota aet aꞌabo
nottineeꞌu, ka tua aꞌ boꞌo bitwao su yumaꞌane. Senuk
jita etbwabaeka, ka boꞌo bitwaka aꞌ weyeꞌe benasia. Junak
san juꞌu teekapo ayukame, unnaa majjaiwatchisi jiaka
luꞌutine. Jumeꞌ chokim intok junammea yaꞌarimtukaꞌum
tajiae tokti luꞌutine. Juꞌu intok bwia, siꞌime juꞌu aet
ayukaꞌumak tayaꞌatune.
\p
\v 11 Junuen siꞌimeta luꞌutineeo san juꞌuneiyaakai, cheꞌa
juniꞌi san emeꞌe, eaka, Liojta bichapo tuꞌisi jiapsaka
intok jiba enchim aꞌ yoꞌorineeꞌuta ka koptaka jiapsine.
\v 12 Junakaꞌa taewaita, achai Liojta junuen yeu puꞌarita
yumaꞌanemta, emeꞌe aꞌ boꞌo bitne. Intok lauti aꞌ yumaꞌaneꞌ
betchiꞌbo, enchim a joaꞌut jiapsekai. Intok Liojtau bicha
jiba nokne. Junae taewaitchi, jumeꞌ chokim tajiae luꞌutine.
Intok junameꞌe, ae yaꞌaritukaꞌuta, taji beeteꞌpo kajjoꞌotine.
\v 13 Taa itepo ala, itom ama jiapsineeꞌuta, teekata bemelak,
taꞌabwik tee bit boꞌo bicha. Intok jukaꞌ bwiata, bemelak,
aapoꞌik Liojta itou naꞌikiakaꞌuta. Junamani, siꞌime tuꞌika
tuꞌuwa ausuꞌlitune.
\p
\v 14 Junuen san, Krijtopo nemak werim, tua in nakeꞌum,
inikaꞌa ket boꞌo bichakai, tua emeꞌe emo utteꞌa jooriane,
Liojta junuen, yanti elaka, intok jita ka tuꞌik juniꞌi,
kaita yaꞌarika, emou aꞌ yebijneꞌ betchiꞌbo.
\v 15 Inikaꞌa, emeꞌe ka aꞌ koptane, achai Liojta a itot
aꞌ boꞌo bichaꞌuta, itom jinneꞌubaeka aꞌ weyeꞌpo. Ket
jiba junaen emou jiꞌojtela juꞌu Krijtopo itomak weri,
tua itom nakeꞌu, Paploꞌ teame, Liojta, suawata aet autuakaꞌpo
amani.
\v 16 Intok siꞌimekut, aꞌ jiꞌosia jiꞌojteimpo inikaꞌa
weyemta teuwaa. Junae betana, waate aet juꞌunee betchiꞌbo
obiachi oꞌoben. Jumeꞌ intok, kaita taꞌaame, intok jumeꞌe,
ka wepulsi Krijtota sualeme, taꞌabwisi aꞌ taꞌaaka, yee
aꞌ majtaka aꞌ sual tebo. Jum Liojta nok lutuꞌuriapo,
watek, ka junama waꞌam aꞌ taꞌaaka, junaen bem yee aꞌ majtaꞌa
benasia. Junuen, junameꞌe, jiba betchiꞌbo aet kokkoneekai.
\p
\v 17 Junuen san, Krijtopo nemak werim in nakeꞌum, emeꞌe,
inia betana jaibu juꞌuneakai, emo suuane. Junuen, jumeꞌ
tua ka tuꞌik boꞌo jooriame, bem ae yee bai tattaꞌaꞌue,
ka enchim junae bai taꞌaatuneꞌ betchiꞌbo. Intok ka junuen
emeꞌe Liojta yumaꞌisi aꞌ sualeka intok chukula jiꞌobeka,
ka tua Liojtamak eaka jiapsine.
\p
\v 18 Taa itom yoꞌowe Jesukrijtota, jukaꞌ itom jinneꞌukamta
betana weyemta, emeꞌe tuꞌisi aet juꞌuneaka aꞌ taꞌaane.
Intok aapoꞌik tua yee aꞌ nakeꞌe benasia, junuen aꞌ taꞌaꞌ
betchiꞌbo, aet jiapsine. Aapoꞌiku, naksi eiyaawaka aꞌ
yoꞌorinaaꞌu, iꞌan, intok jiba betchiꞌbo, au lutuꞌuriatune.
Tua junuentune.