\id 1JN
\h 1 JOAN
\toc1 1 JOAN
\mt 1 Joan
\c 1
\s Juꞌu yee jinneꞌumta betana nok lutuꞌuria, yee majtawame
\p
\v 1 Cheꞌa bat naataka, kee jita ayuo, juꞌu jaibu jiapsamta
betana te emou jiꞌojte. Jukaꞌ itom jikkajakaꞌuta, intok
tua itom pusimmea itom bichakaꞌuta. Bweꞌituk itepo aꞌ
bichak, intok itom maammea te aet mammasuk. Iniꞌi weyeme,
Krijtota betana intok aꞌ nok lutuꞌuria, yee jiapsituamta
betana weye.
\v 2 Aapo ito nasuk jiapsak. Ite intoko aꞌ taꞌaak. Intok
aapoꞌik betana weyemta tee aꞌ teuwaa. Intok emou bicha
tee aꞌ teuwaa, inikaꞌa jiba yuu jiapsiwamta betana. Iniꞌi
san, achai Liojtamak jiapsan. Iꞌan intok itou au yeu
machiala.
\v 3 Junuen san, jukaꞌ itom bichakaꞌuta, intok itom jikkajakaꞌuta,
itepo emou bichaa aꞌ teuwaa, junuen, enchim junae betana
itomak eeneꞌ betchiꞌbo. Itom junuen lutuꞌuriapo, achai
Liojta mak, intok aꞌ uꞌusimak, Jesukrijtotamake itom eaꞌa
benasia.
\v 4 Junuen san inikaꞌa itepo emou jiꞌojte, junuen, siꞌimeku
enchim alleeneꞌ betchiꞌbo.
\s Juꞌu achai Lios, lutuꞌuria ausuꞌli
\p
\v 5 Iniꞌi intok junaꞌa, juꞌu lutuꞌuria, Jesukrijtota
betana, aapoꞌik itom majtakaꞌu. Intok ket juꞌu itom emou
teuwaaꞌu, achai Liojtat, siꞌimeku tuꞌik lutuꞌuriata aet
ayukaꞌpo. Intok aapoꞌikut, ka tuꞌuwata, kaita aet ayukaꞌpo,
machiku anemta benasi machikai.
\v 6 Itepo intoko, aapoꞌik sualeka aamak ito eaꞌati jiakai,
intok junuen ket, itepo ka tuꞌisi jiapsaꞌateko, itom teuwaaꞌu,
intok itom joaꞌu, ka lutuꞌuriatune.
\v 7 Taa itepo, aapoꞌik eaꞌpo aman, tuꞌisi jiapsaꞌateko,
aapoꞌik Liojta, tuꞌik boꞌo jooriaꞌa benasia, junak itepo,
siꞌime nanancha nau eaka jiapsine. Intok junuen, aꞌ uꞌusiwata,
Jesukrijtota, kuuset aꞌ mukukaꞌue, itepo, siꞌime itom ka
tuꞌuwa yaꞌarim betana te jiokoiri.
\p
\v 8 Itepo intoko, jukaꞌ ka tuꞌik, kaita itot aayuk ti
jiakai, itepote ito bai tattaꞌaane, intok kaita lutuꞌuria
itot aayuk.
\v 9 Taa itepo, itom ka tuꞌuwa yaꞌarim aapoꞌikuu bicha
nokaka yeu am bwisekai, aapo juꞌu Lios, aꞌ teuwaaꞌuta
chupaꞌ betchiꞌbo a yoemꞌeiyaatu intok Krijtota itom
yaꞌariakaꞌu betchiꞌbo, aapoꞌiku lutuꞌuria junuen jukaꞌ
ka tuꞌik itom yaꞌari aꞌ jiokoi betchiꞌbo, intok jukaꞌ
ka tuꞌika itot ayukamta, itom aꞌ koptaneꞌ betchiꞌbota
itom au yumaꞌatuane.
\v 10 Taa itepo, ka tuꞌik, ka ito yaꞌariꞌiti jiaꞌateko,
aapoꞌik Liojta, ka lutuꞌuriata aꞌ teuwaꞌa benasi aꞌ joone.
Intok aapoꞌik betana jukaꞌ nok lutuꞌuriata, ka lutuꞌuriapo
itot aayuk.
\c 2
\s Krijto, juꞌu Liojtau itom nokriame
\p
\v 1 In nakeꞌum, inikaꞌa ne emou jiꞌojte, ka tuꞌik, ka
enchim aꞌ jooneꞌ betchiꞌbo. Taa seenu, ka tuꞌisi aulatuko,
achai Liojta bichapo itom nokrianemta itepo aꞌ jipue,
Jesukrijtota. Aapo intoko aꞌ tuꞌureꞌpo aman tuꞌik yee
jooria.
\v 2 Aapo juꞌu Jesukrijto, itom ka tuꞌuwa yaꞌarim betchiꞌbo
jiokot yaꞌatuka, aꞌ bejeꞌewai tuk. Taa intok ka ito betchiꞌbo
jiba, taa ket siꞌime inim jiapsame ka tuꞌuwa yaꞌarim
betchiꞌbo ketchia.
\p
\v 3 Itepo intoko, Jesukrijtota nesaurita aꞌ sualeka
aꞌ boꞌo jooriaꞌateko, junak san ket, itepo juꞌuneene, aapoꞌik
itom aꞌ taꞌaaka itom aꞌ sualeꞌpo.
\v 4 Taa seenu, jaibu au aꞌ taꞌaꞌati jiakai, taa intok
ket aapoꞌik betana nesauri jiꞌojteita, ka aꞌ nok jikkajaꞌateko,
junaꞌa kia aa nokiꞌichi, intok kaita lutuꞌuria aet aayuk.
\v 5 Taa ala, juꞌu, aapoꞌik betana nesauta joame, junaꞌa,
achai Liojta tua lutuꞌuriapo, yumaꞌisi aꞌ nak taꞌaala.
Inien san, itepo a juꞌunea, aamak eaka itom aꞌ sualeꞌpo.
\v 6 Juꞌu junuen, achai Liojta mak eaka au jiapsaꞌa ti
jiame, junaꞌa Jesukrijtota jiapsisukaꞌa benasia jiapsine.
\s Juꞌu bemela nesauri
\p
\v 7 Krijtopo nemak werim, in nakeꞌum, kannee jita bemela
nesauta emou jiꞌojte. Jiba juꞌu nesauri, cheꞌa bat naataka
naateka enchim jipuꞌusukaꞌu. Iniꞌi nesauri, bat naataka
weeria junaꞌa, juꞌu jaibu enchim jikkajisukaꞌu.
\v 8 Taa junuentaka juniꞌi, juꞌu in emou jiꞌojteeꞌu, jiba
aꞌ bemela nesauritukaꞌa benasi yeu weama. Inikaꞌa, Jesukrijto,
lutuꞌuriapo aꞌ chupaꞌi. Intok kia emeꞌe juniꞌi ket aꞌ
yaꞌarikai. Bweꞌituk, bat naataka juꞌu aapoꞌik betana,
ka machisi, ka juꞌunakkiachiakaꞌu, iꞌan luꞌuti sime. Intok
iꞌan juꞌu tua lutuꞌuriapo, Liojta betana weyeme yeu maachi.
\p
\v 9 Taa seenu, Liojta betana lutuꞌuriata au aꞌ taꞌaꞌati
jiame, taa Krijtopo aamak werik omtakai, junaꞌa junuen,
ketuni ka lutuꞌuriapo Liojta betana weyemtat juꞌunea.
\v 10 Juꞌu, Krijtopo aamak werik aꞌ nakeme, Liojta betana
aꞌ nok lutuꞌuriata taꞌaaka jiapsa, machiku anemta benasi
machikai. Intok kaita tunee juꞌu ka tuꞌik aꞌ yaꞌatuaneeme.
\v 11 Taa juꞌu, Krijtopo aamak werik omtame, junaꞌa, Liojta
betana lutuꞌuriata ka taꞌaaka, ka tuꞌiku jiapsa. Intok
ka juꞌunea jakun bicha aꞌ weyeꞌpo. Bweꞌituk juꞌu ka
tuꞌuwa, ka mamachi benaka, ka aꞌ bittua.
\p
\v 12 In yoemiam benasi in eiyaaꞌum, inien ne emou jiꞌojte.
Bweꞌituk Jesukrijtota enchim sualeꞌ betchiꞌbo, juꞌu Lios
enchim ka tuꞌuwa yaꞌarimmet enchim jiokoiri.
\v 13 Emeꞌe uꞌusekame, emou ne jiꞌojte bweꞌituk emeꞌe
aꞌ taꞌaalam, wakaꞌa, kee jita ayuo, Liojta mak jaibu jiapsaꞌuta.
Emeꞌe, juꞌubwa yoꞌotume, emou ne ket jiꞌojte bweꞌituk
emeꞌe, jukaꞌ bebejeꞌerita aꞌ kobaꞌi.
\p Intok emeꞌe, ili uusim, emou ne jiꞌojtela bweꞌituk achai
Liojta emeꞌe aꞌ taꞌaalam.
\v 14 Emeꞌe uꞌusekame, emou ne jiꞌojtela bweꞌituk emeꞌe
aꞌ taꞌaalam, wakaꞌa, kee jita ayuo Liojta mak jaibu jiapsaꞌuta.
Emeꞌe, juꞌubwa yoꞌotume, emou ne jiꞌojtela, bweꞌituk emeꞌe
uꞌutteꞌakaꞌem intok emeꞌe Liojta betana nok lutuꞌuriata
aꞌ sualla. Intok jukaꞌ bebejeꞌerita aꞌ kobaꞌi.
\p
\v 15 Emeꞌe, inim ayukamta intok ka tuꞌik boꞌo jooriawamta
ka aꞌ eiyaane. Senu intoko, junuen, inim ka tuꞌik eiyaaka
aꞌ boꞌo jooriaꞌateko, achai Liojta tua ka aꞌ nak taꞌaane.
\v 16 Bweꞌituk kaita waꞌa ka tuꞌika inim weyeme, achai
Liojta betana weye. Ala jiba inim yeu simlaa. Senuk,
ka tuꞌik aꞌ tuꞌureka aꞌ joopeaꞌuta, senuk aꞌ tuꞌureka
aꞌ bichaꞌuta, aꞌ waatiawame intok inim ayukamtae aꞌ eiyaanaaꞌuta
jariuwame, siꞌime iniꞌi weyeme, inim bwiapo ka tuꞌika
weye.
\v 17 Intok juꞌu inim ayuka jiapsame, luꞌuti sime. Siꞌime
juꞌu tua ka tuꞌika boꞌo jooriapeewamta mak nau. Taa
juꞌu, Liojta eaꞌpo aman jiapsame, jiba yuu betchiꞌbo jiapsine.
\s Juꞌu lutuꞌuria, intok juꞌu ka lutuꞌuria
\p
\v 18 Emeꞌe, tuꞌisi in nakeꞌum, yumaꞌasuk juꞌu taewai.
Emeꞌe jaibu aꞌ juꞌuneiyaa, senuk, Jesukrijtota bejeꞌeka
aꞌ yebijneꞌpo. Iꞌan intoko, junameꞌe Krijtota bejeꞌeka
aneme juebena oꞌoben. Jiba inia betchiꞌbo san itepo
juꞌunea, taewaita aꞌ yumaꞌasukaꞌpo.
\v 19 Junameꞌe, ito nasuk yeu sakaꞌalam. Taa lutuꞌuriapo
ka itomak ean. Bweꞌituk inimeꞌe, lutuꞌuriapo ito benasi
eaꞌateko, itomak tawa ean. Taa junuen yeu siika, junuen,
ka siꞌimem ito benasi eaꞌpo aꞌ juꞌuneiyaanaꞌ betchiꞌbo.
\p
\v 20 Taa emeꞌe, Jesukrijtota betana tuꞌu jiapsiwata
emot jiapsituari. Intok siꞌime emeꞌe lutuꞌuriapo Liojta
nok lutuꞌuriat juꞌunea.
\v 21 Junuen ne emou jiꞌojte, bweꞌituk ne juꞌunea, lutuꞌuriata
enchim aꞌ taꞌaaꞌpo. Intok ka emou aꞌ beꞌeꞌ betchiꞌbo.
Intok emeꞌe juꞌunea, jita aa nokiꞌichiata juniꞌi, Liojta
betana lutuꞌuriata mak, ka aꞌ weyeꞌpo.
\p
\v 22 Inikaꞌa em juꞌuneiyaaꞌem, juꞌu ka lutuꞌuriata teuwaame,
iniꞌi san junaꞌa, jiba juꞌu Jesuj teamta, ka aꞌ Krijtoꞌo
ti jiame. Iniꞌi ket junaꞌa, juꞌu, Jesukrijtota bejeꞌeka
aneme. Bweꞌituk iniꞌi, achai Liojta, intok kia jukaꞌ aꞌ
uꞌusiwata juniꞌi, ka teuwaaka, ka am sual tebo.
\v 23 Juꞌu, jabetaka juniꞌi, Liojta uꞌusita, ka aꞌ sualeka,
ka aꞌ junaꞌa ti jiame, junaꞌa, achai Liojta juniꞌi ka
aꞌ taꞌaane. Taa juꞌu, Liojta uꞌusiwata, au sualeꞌeti jiaka,
watem bichapo aꞌ teuwaame, junaꞌa ket, achai Liojta aꞌ
sual taꞌaa.
\p
\v 24 Junuen san beja, jukaꞌ Liojta nok lutuꞌuriata, cheꞌa
bat naataka enchim jikkajakaꞌuta, ka aꞌ koptaka aꞌ juꞌuneiyaane.
Intok junuen emeꞌe, enchim jikkajakaꞌu waateꞌeteko, ket
emeꞌe, jiba betchiꞌbo Liojta uꞌusi mak intok achai Liojta
mak eaka tawane.
\v 25 Intok aapo juꞌu Jesukrijto, jukaꞌ jiba yuu jiapsiwamta
itom bitneꞌeti jiaka, itou aꞌ naꞌikiala.
\p
\v 26 Inikaꞌa ne emou jiꞌojtei, jumeꞌ enchim bai tattaꞌaame
betana emou nokakai.
\v 27 Taa emeꞌe, Jesukrijtota betana, jukaꞌ Liojta tuꞌu
jiapsita emot jiapsatuari. Intok junuen ka utteꞌa, senuk
enchim aꞌ majtaneꞌpo. Bweꞌituk jiba aapo, juꞌu Liojta
tuꞌu jiapsiwata, siꞌimeta enchim majta. Inikaꞌa intok,
juꞌu enchim majtaꞌu, tua lutuꞌuria. Intok ka aa nokiꞌichia.
Junuen san emeꞌe, jiba Jesukrijtotamak eaka jiapsine,
Liojta tuꞌu jiapsita junuen enchim aꞌ majtaꞌapo amani.
\p
\v 28 Iꞌan intoko in nakeꞌum, Jesukrijtota ka koptaka
aamak eaka jiapsine. Junuen, kaachin itepo tiweka aꞌ
majjaune, aapoꞌik inim itou aꞌ yepsako.
\v 29 Emeꞌe su intok jaibu juꞌuneakai, Jesukrijtota, siꞌimeku
lutuꞌuriakamta aꞌ joaꞌapo, ket emeꞌe juꞌuneene, siꞌimem
wameꞌe tuꞌik boꞌo jooriame, Liojta betana am yoemiamtukaꞌpo.
\c 3
\s Jumeꞌ Liojta yoemiam
\p
\v 1 Emeꞌe aꞌ juꞌuneiyaane, achai Liojta, tua itom aꞌ
nakeꞌpo. Junuen san, itepo te Liojta yoemiam benasi taꞌeewa.
Intok tua junuen lutuꞌuria. Inia betchiꞌbo san, jumeꞌ
inim ka tuꞌisi jiapsame, ka junuen itom taꞌaa, bweꞌituk
inimeꞌe, aapoꞌik Liojta juniꞌi ka aꞌ taꞌaa.
\v 2 Krijtopo nemak werim, in nakeꞌum, iꞌan itepo Liojta
yoemiam. Intok itepo kee aꞌ juꞌuneiyaatuawa, chukula
juꞌu itom bittuneeꞌut, taa itepo juꞌunea, Jesukrijtota
aꞌabo aꞌ notteo, aapoꞌik benasi itom bittuneꞌpo. Bweꞌituk
junak itepo, aapoꞌik tua aꞌ machiakaꞌa benasi te aꞌ bitne.
\v 3 Intok jabetaka juniꞌi, inien aapoꞌik bit boꞌo bichame,
Liojta bichapo siꞌimeku tuꞌisi jiapsine, Jesukrijtota,
ka tuꞌik, kaita aet ayukaꞌa benasia.
\p
\v 4 Taa jabetaka juniꞌi, ka tuꞌik yaakame, Liojta nesauri
bejeꞌeka aune. Bweꞌituk juꞌu ka tuꞌik joowame, Liojta
nesauri bejeꞌewame junaꞌa.
\v 5 Emeꞌe jaibu em juꞌunea, Jesukrijtota, itom ka tuꞌuwa
yaꞌarimmet itom jiokoibaeka, inim yeu aꞌ machiakaꞌpo.
Intok aapoꞌik, kaita ka tuꞌik aꞌ yaꞌariakaꞌpo.
\v 6 Junuen san, jabetaka juniꞌi, Jesukrijtota mak eaka
jiapsame, ka tuꞌik ka aꞌ joone. Taa jabetaka juniꞌi, ka
tuꞌik boꞌo joaka jiapsame, junaꞌa, ka aꞌ sual taꞌaa, intok
kia ae betana weyemtat juniꞌi, ka juꞌunea.
\v 7 Tuꞌisi in nakeꞌum, ka emeꞌe emo bai tattaꞌaa tebone.
Juꞌu tuꞌik boꞌo jooriaka jiapsame, tuꞌi yoemtune. Aapoꞌik
Jesukrijtota tuꞌik aꞌ joaꞌa benasia.
\v 8 Taa juꞌu ka tuꞌik joame, bebejeꞌerita mak ea. Bweꞌituk
juꞌu bebejeꞌeri junaꞌa, juꞌu cheꞌa bat ka tuꞌik yaaka,
iꞌan tajtia aꞌ joame. Junae betchiꞌbo juꞌu Liojta uꞌusi,
jiba inikaꞌa bebejeꞌerita yaꞌari, aꞌ luꞌutabaeka aꞌabo
yepsak.
\p
\v 9 Kaabe, Liojta betana yoemiataka, ka tuꞌik joo sisimne.
Bweꞌituk junuen, achai Liojta betana taꞌabwi jiapsita,
bemelak aet jiapsatuari, intok junuen kaachin jiba ka
tuꞌik joaka a jiapsine. Bweꞌituk junuen Liojta yoemiatakai.
\v 10 Juꞌunakkiachi jabem Liojta yoemiamtukaꞌpo, intok
jabem bebejeꞌerita betana yoemiamtukaꞌpo. Bweꞌituk jabetaka
juniꞌi, ka tuꞌik boꞌo jooriame oo aamak werik ka aꞌ nakeme,
junaꞌa ka Liojta betana weye.
\s Siꞌime te naas ito nakpo yumaꞌi
\p
\v 11 Bweꞌituk juꞌu, Liojta betana nok lutuꞌuria, cheꞌa
bat naataka enchim jikkajisukaꞌu, iniꞌi junaꞌa: Juꞌu
naas itom ito nakneeꞌu.
\v 12 Ka itepo, juꞌu Kain tukaꞌuta benasi mamachine.
Junaꞌa, bebejeꞌerita betana weyen. Intok aꞌ sailawata
meꞌaak. Junaꞌa intok, jaisa betchiꞌbo aꞌ meꞌaak. Bweꞌituk
juꞌu Kain tukaꞌu ka tuꞌik jooan. Juꞌu intok aꞌ sailawata
joaꞌu, tuꞌireakan.
\p
\v 13 Krijtopo nemak werim, kaachin emeꞌe eene, jumeꞌ
inim ka tuꞌisi jiapsame betana omtawakai.
\v 14 Itepo ka nappat, ka tuꞌisi tawarimtaka, Liojta bichapo
kokkolame benaka iꞌan te jiapsa. Intok bemelak itom
jiapsituawaꞌpo te ito juꞌuneiyaa. Inikaꞌa intok te juꞌuneiyaa,
Krijtopo itomak werim itom am nakeꞌ betchiꞌbo. Juꞌu,
aamak werik ka nakeme, ketuni Liojta bichapo ka jiapsamta
benasi maachi.
\v 15 Jabetaka juniꞌi, aamak werik omtame, Liojta bichapo
yee suꞌari benasi machine. Emeꞌe intok juꞌunea, jabeta
juniꞌi yee suꞌarik, jiba yuu aꞌ jiapsineeꞌu, kaita aet
ayukaꞌpo.
\v 16 Jiba juꞌu Jesukrijtota ito betchiꞌbo aꞌ mukukaꞌue,
itepo aꞌ taꞌaa, jukaꞌ tua yee nakwamta. Intok junuen
san itepo ketchia, Krijtopo itomak werim ania betchiꞌbo
itepo suꞌatuneeka juniꞌi te ito nenkine.
\v 17 Bweꞌituk seenu, kaitaꞌpo jiokot eaka jiapsakai,
intok jukaꞌa, Krijtopo aamak werik, tua jiokot eamta juꞌuneiyaaka,
intok ka ae tana jiokotꞌeaꞌateko, junuen, tua kaachin
Liojta yee nakeꞌe benasi a yee nakne.
\v 18 In nakeꞌum, juꞌu itom yee nakneeꞌuta, ka juꞌu senuk
teuwaaꞌue lutuꞌuriatune. Ala, lutuꞌuriapo itom yee nakneeꞌu,
itom joaꞌue juꞌuneiyaanaa.
\s Achai Liojta bichapo, ka ee majjaeka itom anneeꞌu
\p
\v 19 Inien san itepo a juꞌuneene, Liojta betana lutuꞌuriata
itom sualeꞌu aꞌ lutuꞌuriatukaꞌpo. Intok junuen itepo,
Liojta mak nau tuꞌutelamtaka, aapoꞌik bichapo ka ae tana
jainꞌeene.
\v 20 Bweꞌituk ito nasuk seenu, Liojta bichapo ka tuꞌisi
aꞌ aneꞌuta au juꞌuneiyaꞌateko, aapo juꞌu Lios junuen
itom ito juꞌuneiyaꞌabepa cheꞌa itot juꞌunea. Intok aapo
siꞌimeta juꞌuneiyaakai.
\v 21 Junuen san tuꞌisi in nakeꞌum, itepo, Liojta bichapo
tuꞌisi itom jiapsaꞌuta ito juꞌuneiyaꞌateko, junak ae
bichapo itepo ka jain eaka te au bicha nokne.
\v 22 Aapo intoko, siꞌimeta jukaꞌ itom au bichaa aꞌawaꞌuta,
itou aꞌ autua simne. Bweꞌituk itepo, aapoꞌik betana jukaꞌ
nesauta te aꞌ boꞌo jooria. Intok itepo, itom joaꞌue aapoꞌik
te alleetua.
\v 23 Juꞌu intok, aapoꞌik nesauri, jukaꞌ aꞌ yoemiawata,
Jesukrijtota itom sualneeꞌu, junaꞌa. Intok ket, naas itom
ito nakneeꞌu, aapoꞌik itom aet sawekaꞌpo amani.
\v 24 Jumeꞌe, aapoꞌik betana nesauta boꞌo jooriame, inimeꞌe,
aapoꞌiku mak eaka jiapsa. Itepo te juꞌunea, aapoꞌik itomaktukaꞌpo,
aapoꞌik tuꞌu jiapsiwata itot aꞌ autuari betchiꞌbo.
\c 4
\s Liojta betana juꞌu tuꞌu jiapsi, intok juꞌu jiapsi, Krijtota bejeꞌeme
\p
\v 1 Tuꞌisi in nakeꞌum, ka emeꞌe siꞌimem jumeꞌ Liojta
betana emo juꞌuneetuawaꞌati jiame sualbaane. Ala emeꞌe,
amet juꞌuneebaane, junameꞌe, Liojta tuꞌu jiapsi amet aneꞌepo
oo ka aꞌ junaꞌatukaꞌpo. Bweꞌituk jumeꞌ ka lutuꞌuriata
teuwaame inim juebena, Liojta betana emo noktuawaꞌati
jiame.
\v 2 Taa inen emeꞌe aꞌ juꞌuneiyaanee jukaꞌ Liojta betana
tuꞌu jiapsita aet anemta. Juꞌu, Jesukrijtota lutuꞌuriapo
ito benasi inim yoemtaka yeu aꞌ machiakaꞌpo aꞌ teuwaame,
iniꞌi, Liojta betana tuꞌu jiapsi aet jiapsa.
\v 3 Taa juꞌu, Jesukrijtota, ka inien aꞌ sualeka aꞌ teuwaame,
Liojta tuꞌu jiapsi ka aet jiapsa. Ala iniꞌi, Jesukrijtota
bejeꞌeka jiapsi aet aane. Emeꞌe aꞌ juꞌuneiyaa, junakaꞌa
Krijtota bejeꞌeka, ka tuꞌik jiapsekamta aꞌ yebijneꞌpo.
Iꞌan intoko jaibu inim aane.
\p
\v 4 Tuꞌisi in nakeꞌum, emeꞌe, achai Liojta yoemiampo
taꞌeewa. Intok emeꞌe, junameꞌe ka lutuꞌuriata teuwaame,
am kobaꞌi. Bweꞌituk juꞌu Liojta betana weyeka, enchim
aniame, cheꞌa juniꞌi utteꞌak, juꞌu bebejeꞌeri, jumeꞌ inim
ka tuꞌisi jiapsame aniamta bepa.
\v 5 Junameꞌe, inim ka tuꞌikut eaka jiapsa. Intok junuen
san, inim weyemta betana jiba yee majta. Jumeꞌ wate intoko
inim weyemtat jiapsekame, jukaꞌ bem teuwaaꞌuta jikkaja.
\v 6 Taa itepo, achai Liojta yoemiam te. Juꞌu intok, achai
Liojta sual taꞌaame, itom jikkajine. Taa juꞌu, ka achai
Liojta sual taꞌaame, ka itom jikkajine. Inien san itepo
a amet juꞌuneene, jabeta Liojta betana tuꞌu jiapsita
lutuꞌuriata yee juꞌuneetuamta aet anneꞌpo. Intok jabeta,
bebejeꞌerita betana ka tuꞌik jiapsita aet anneꞌpo.
\s Lios aapo junaꞌa yee nakeme
\p
\v 7 Tuꞌisi in nakeꞌum, a itepo ito naas nakne. Bweꞌituk
juꞌu yee nakwame, Liojta betana weye. Jabetaka juniꞌi,
yee nak taꞌaame, junaꞌa, Liojta betana yoemiari, intok
Liojta sual taꞌaa.
\v 8 Jabetaka juniꞌi, juꞌu ka yee nakeme, achai Liojta
kee aꞌ sual taꞌaa. Bweꞌituk aapo juꞌu Lios junaꞌa, yee
nakeme.
\v 9 Juꞌu Lios, itom aꞌ nak taꞌaaꞌu inim aꞌ juꞌuneiyaa
tebok junuen, jiba aapoꞌik betana jukaꞌ aꞌ wepul yoemiata
aꞌabo inim aꞌ bittuakai. Junuen jiba aapoꞌik betana
jukaꞌ jiba yuu jiapsiwamta itom bitneꞌ betchiꞌbo.
\v 10 Inen weyeka junaꞌa, juꞌu yee nakwame. Ka itepo
bat aapoꞌik Liojta nakekai. Ala aapo junuen bat itom
nakekai. Intok aapo, aꞌ yoemiawata itou bittuak, itom
ka tuꞌuwa yaꞌarim betchiꞌbo, jiokot au aꞌ bitneꞌ betchiꞌbo.
\p
\v 11 Tuꞌisi in nakeꞌum, achai Liojta junuen tuꞌisi itom
aꞌ nakekaꞌpo juꞌuneakai, itepo juniꞌi ket te a ito naas
nakne.
\v 12 Aapoꞌik Liojta, jakwoo juniꞌi, kee jabe aꞌ bicha.
Taa itepo naas ito nakekai, aapoꞌik Liojta, itepo aꞌ mabetlatune.
Intok juꞌu, aapoꞌik tua yee nakeꞌuta, itepo cheꞌa yumaꞌisi
aꞌ taꞌaa sakanee.
\v 13 Iniae te a juꞌunea, Liojta mabetlamtakai itom jiapsaꞌpo
intok aapoꞌik betana itom mabetrimtukaꞌpo, aapo aꞌ tuꞌu
jiapsiwata itot aꞌ jiapsituarikai.
\v 14 Intok jiba itepo tee aꞌ bitlaa, intok tee aꞌ lutuꞌuriatukaꞌpo
aꞌ teuwaa, achai Liojta aꞌ uꞌusiwata aꞌabo aꞌ bittuakaꞌpo,
inim yoemrata jinneꞌubaekai.
\v 15 Jabetaka juniꞌi, Jesukrijtota, Liojta betana aꞌ
yoemiatukaꞌpo au aꞌ sualeꞌe ti jiame, Liojta betana yoemiaritune,
intok Liojta mak eaka jiapsine.
\p
\v 16 Inien itepo aꞌ juꞌuneiyaala intok ket, achai Liojta
itom nakeꞌpo itepo aꞌ suale. Aapo juꞌu Lios junaꞌa, juꞌu
yee nakeme. Juꞌu intok yee nak taꞌaaka jiapsame, Liojta
betana yoemiaritaka, Liojtamak eaka jiapsine.
\v 17 Junuen itepo, tua lutuꞌuriapo itom yee nakneeꞌuta
taꞌaane. Intok junuen, taewaita yumako, achai Liojta yee
yaꞌuraa bittuao, Liojta bichapo te ka ae tana jain eene.
Bweꞌituk itepo inim jiapsakai, Jesukrijtota benasi Liojta
betana te eiyaawa.
\v 18 Juꞌu, Liojta nak taꞌaame, majjawamta ka taꞌaane.
Taa ala, juꞌu, tua yumaꞌisi Liojta nak taꞌaawame, jukaꞌ
majjaiwamta kokoba. Bweꞌituk juꞌu majjawame, ka tuꞌik
yee bittua. Junuen san, juꞌu majjaime kee yumaꞌisi tua
Liojta nak taꞌaa.
\p
\v 19 Itepote achai Liojta nak taꞌaa, aapoꞌik cheꞌa bat
itom aꞌ nakekaꞌ betchiꞌbo.
\v 20 Taa seenu: “Liojta ne aꞌ nak taꞌaa”, ti jiakai,
intok junuen ket Krijtopo aamak werik omtaꞌateko, ka
lutuꞌuriata teuwaane. Bweꞌituk seenu, Krijtopo aamak
werik, inim aꞌ bichaꞌuta, ka aꞌ nakeꞌeteko, junuen, kaachin,
Liojta aꞌ nak taꞌaane, jukaꞌ ka aꞌ bichaꞌuta.
\v 21 Aapo juꞌu Jesukrijto, inen itom nesawek: “Juꞌu,
Liojta nak taꞌaame, ket, Krijtopo aamak werik aꞌ nakne”,
ti jiaka.
\c 5
\s Inim bwiapo, jukaꞌ ka tuꞌik itom aꞌ kokobaꞌu
\p
\v 1 Inim jabetaka juniꞌi, waꞌa, jukaꞌ Jesujta, lutuꞌuriapo
aꞌ Krijto tukaꞌpo aꞌ sualeme, iniꞌi Liojta betana yoemiari.
Juꞌu intoko, jukaꞌ achaiwaita nakeme, iniꞌi ketchia, jiba
jumeꞌ junae yoemiam nakeme tune.
\v 2 Achai Liojta, itepo te aꞌ nak taꞌaakai intok aapoꞌik
nesauri aꞌ joakai, junak juꞌuneenee itepo, ket jumeꞌ Liojta
yoemiam, itom am nakeꞌepo.
\v 3 Bweꞌituk achai Liojta aꞌ nak taꞌaawame, aapoꞌik
betana nesauta aꞌ boꞌo jooriawame junaꞌa. Juꞌu Liojta
nesauri intok, ka bettesi maisi maachi.
\v 4 Bweꞌituk jabetaka juniꞌi, Liojta betana yoemiatakai,
inim ka tuꞌik kokoba. Intok inim, jukaꞌ Jesukrijtota
itepo aꞌ sualekai, junaen tee ka aꞌ joaka aꞌ kokoba, jukaꞌ
inim ka tuꞌik.
\v 5 Juꞌu, Jesukrijtota, Liojta aꞌ uꞌusekaꞌpo aꞌ sualeme,
junaꞌa jiba, inim jukaꞌ ka tuꞌik weyemta, ka aꞌ joaka
aꞌ kobaꞌine.
\s Jesukrijtota betana, juꞌu lutuꞌuria teuwaawame
\p
\v 6 Jesukrijtota inim yeu machiakaꞌuta, baꞌae intok
ojboe juꞌuneiyaatuk. Ka baꞌae jiba, taa ala baꞌae intok
ojboe. Baꞌapo batoꞌowaawaka, intok kuuset popontaka, aꞌ
ojbowata woꞌotekai. Intok jiba juꞌu Liojta tuꞌu jiapsi
junaꞌa, juꞌu iniet itom juꞌuneetuame.
\v 7 Inikaꞌa lutuꞌuriateme, teekau aane, bajikai. Juꞌu
achai Lios intok juꞌu Jesukrijto, juꞌu nokipo taꞌeewame,
intok ketchia juꞌu Liojta tuꞌu jiapsiwa. Inimeꞌe bajika
intok, wepuꞌulai oꞌoben.
\v 8 Inikaꞌa lutuꞌuriateme inim bwiapo ket aane, bajikai.
Juꞌu Liojta tuꞌu jiapsi intok jumeꞌ baꞌam, intok juꞌu
aꞌ ojbowa. Intok inimeꞌe bajikai, wepuꞌulaik teuwaa oꞌoben.
\v 9 Inim watem tuꞌik teuwaame, itepo junaet tuꞌisi am
yoemꞌeaka am jijikkaja. Taa juꞌu achai Liojta itou teuwaaꞌu,
cheꞌa eiyaawatchi. Bweꞌituk juꞌu Liojta lutuꞌuria yaꞌatei,
aapoꞌik yoemia betana lutuꞌuria junaꞌa.
\v 10 Waꞌa, jukaꞌ Liojta yoemiata aꞌ sual taꞌaame, junaꞌa,
inikaꞌa aapoꞌik betana lutuꞌuriataka teuwaarita aꞌ sualeꞌuta
aꞌ lutuꞌuriatukaꞌpo, Liojta betana aet juꞌuneetuanaa.
Juꞌu intok, ka Liojta sualeme, ka lutuꞌuriata aꞌ teuwaꞌa
benasi aꞌ joone. Bweꞌituk junuen, achai Liojta, aꞌ yoemia
betana aꞌ lutuꞌuriatekaꞌuta, ka aꞌ sualekai.
\v 11 Iniꞌi, Liojta betana teuwaari intok, achai Liojta,
jiba yuu jiapsiwamta itot aꞌ autuakaꞌuta junaꞌa. Intok
inikaꞌa jiba yuu jiapsiwamta, aꞌ yoemiawa betana aꞌ weyeꞌpo.
\v 12 Juꞌu, Liojta yoemiata sual taꞌaaka aꞌ mabetlame,
junaꞌa ket, jiba yuu jiapsine. Taa juꞌu, Liojta yoemiata,
ka aꞌ sual taꞌaame, iniꞌi, jukaꞌ jiba yuu jiapsiwamta
ka aꞌ bitne.
\s Jiꞌojtesuka intok am sua tejwaa
\p
\v 13 Inikaꞌa ne emou jiꞌojte, emeꞌe, Liojta yoemiata
aꞌ sualemmeu, jiba yuu jiapsiwamta emot aꞌ ayukaꞌpo enchim
aꞌ juꞌuneiyaaneꞌ betchiꞌbo.
\p
\v 14 Iniat itepo Liojtat ea, jita juniꞌi, jukaꞌ aapoꞌik
junen aꞌ tuꞌureꞌpo aman au bicha itom aꞌawaꞌuta, aapoꞌik
itom aꞌ bittuaneeꞌuta juꞌuneakai.
\v 15 Intok junuen itepo, aapoꞌiku bicha itom aꞌawaꞌut,
itom aet aꞌ jikkajaꞌpo juꞌuneakai, ket te juꞌunea, jukaꞌ
au bicha itom aꞌawakaꞌuta, jaibu itom aꞌ bichaꞌpo.
\p
\v 16 Seenu, jukaꞌ aamak werik, ka tuꞌik, ka aet aꞌ muk
machik joamta aꞌ bichaꞌateko, Liojtau bicha aꞌ nokriane.
Intok junuen, juꞌu Lios, junakaꞌa, jiba yuu jiapsiwamta
aet autuane. Taa junakaꞌa ka tuꞌik joaꞌuta, ka ae aꞌ
muk machiako. Ka tuꞌika joowame aet kokkowaka aayuk.
Junale benak joamta betchiꞌbo ne kaabem aꞌ nokria nesae.
\v 17 Siꞌime juꞌu ka tuꞌisi weyeme, Liojta bichapo ka
tuꞌi oꞌoben, taa ka siꞌime ka tuꞌuwa aet kokkowa.
\v 18 Juꞌuneate wakaꞌa Liojta, achai yoꞌowakamta, ka tuꞌik
ka aꞌ jooneꞌpo. Bweꞌituk juꞌu Liojta yoemia, aamaktuka
aꞌ aniane, juꞌu bebejeꞌeri intok, kaachin aꞌ yaꞌane.
\p
\v 19 Juꞌuneate, achai Liojta betana itom yoemiam tukaꞌpo.
Taa jukaꞌ intok, inim siꞌime yoemrata, ka tuꞌik joopeamta,
bebejeꞌerita betana aꞌ kobaꞌitukaꞌpo.
\p
\v 20 Intok ketchia, itepo juꞌunea, jukaꞌ Liojta uꞌusita,
aꞌabo aꞌ yepsakaꞌpo. Intok junakaꞌa, koba suawata itot
aꞌ autuakaꞌpo, junuen, tua jukaꞌ lutuꞌuriapo, achai Liojta
itom aꞌ taꞌaaneꞌ betchiꞌbo. Aapoꞌik yoemiata, Jesukrijtota
sualeka, lutuꞌuriapo Liojtamak eaka te jiapsa. Iniꞌi
junaꞌa, juꞌu tua lutuꞌuriapo Lios, intok juꞌu jiba yuu
jiapsiwamta yetet autuame.
\v 21 Tuꞌisi in nakeꞌum, jumeꞌ ka lutuꞌuriapo liosimtaka
yoꞌoriwame, emeꞌe ka am yoꞌoribaane. Intok tua junuentune.