\id 3JN
\h 3 JOAN
\toc1 3 JOAN
\mt 3 Joan
\c 1
\s Kaayoꞌ teamta betana, tuꞌika ae tana teuwaawa
\p
\v 1 Inepo, Joan teame, yoꞌotakai, ikaꞌa jiꞌojteita, juꞌu
Krijtopo nemak werik, juꞌu tua lutuꞌuriapo in nakeꞌu,
Kaayoꞌ teamtau ne aꞌ jiꞌojte.
\p
\v 2 Krijtopo nemak weri, tuꞌisi in nakeꞌum, Liojtau bicha
ne enchi nokria, iꞌan, tuꞌisi Krijtota sualeka, tuꞌik em
bichaꞌa benasia, ket junuen, siꞌimekut tuꞌik em bitneꞌ
betchiꞌbo, intok ka em koꞌokoineꞌ betchiꞌbo.
\v 3 Tua ne alleak, waatem, Krijtopo itomak werim, aꞌabo
noiteka, intok ee betana tuꞌisi Krijtota em sualeꞌut
neu am etejoko. Empo junuen, Liojta betana lutuꞌuriata
aꞌ boꞌo jooriakai.
\v 4 Kaita intoko, cheꞌa nee alleetua, jumeꞌ Krijtota
nok lutuꞌuriata in majtakaꞌum, junuen lutuꞌuriata bem
boꞌo jooriaꞌpo in juꞌuneiyaaꞌu bepa.
\p
\v 5 Krijtopo nemak weri, tuꞌisi in nakeꞌu, jumeꞌ Krijtopo
itomak werim, empo tuꞌisi em am aniaꞌuta, empo ka aꞌ kopta.
Intok cheꞌa juniꞌi, jumeꞌe, omot, mekka joꞌaakame, tuꞌikue
am aniakai.
\v 6 Teꞌopopo, Krijtota nau sualeme, nau aneꞌepo, bempo
tua em am aniaꞌpo aꞌ teuwaa. Eu ne ujbwana, junameꞌe,
bichau bicha bem katneꞌ betchiꞌbo, ameu aꞌ beꞌeeꞌpo amani,
am aniane. Junuen, Liojta aꞌ tuꞌuriꞌeaꞌpo amani.
\v 7 Bweꞌituk bempo, Jesukrijtota betana tekilta aꞌ joo
betchiꞌbo yeu sakaꞌalam. Intok jumeꞌ ka Liojta sual
taꞌaame betana, kaitaꞌpo am ania tebo.
\v 8 Junuen san beja, itepo, junameꞌe ania betchiꞌbo, ito
aꞌ tekil makne. Junuen, Liojta nok lutuꞌuriata bem yee
majtaꞌut, am ania betchiꞌbo.
\s Riootrepej teamta, ka ammaꞌali aꞌ aneꞌu
\p
\v 9 Jumeꞌe, ama Krijtota nau sualemmeu, inepo, jiꞌosiata
bittuak. Taa juꞌu Riootrepej teame, itom amet nesawekaꞌuta,
ka aꞌ nok jikkajibaek. Bweꞌituk aapo, junamaꞌa ame nasuk
yoꞌotubae.
\v 10 Junuen san, inepo aman aneꞌeteko, junakaꞌa, itom
bejeꞌeka, aa nokiꞌichiata intok ka lutuꞌuriata, ka tuꞌik
ito tana aꞌ teuwaaꞌu betchiꞌbo, junaet ne siꞌimem bichapo
aꞌ nok tejwaane. Intok aapo ka jatteakai, jumeꞌ Krijtopo
itomak werim ka am mabbeta. Intok jumeꞌ am aniabaeme,
ka junuen am an iꞌa, intok Krijtota sualemmak ka intok
am tuꞌurekai.
\p
\v 11 Krijtopo nemak weri, in nakeꞌu, ka empo, ka tuꞌik
joowamta aꞌ joobaane. Ala jukaꞌ tuꞌik aꞌ joone. Juꞌu
tuꞌik boꞌo jooriame, Lios aꞌ yoemiak. Taa juꞌu, ka tuꞌik
boꞌo jooriame, achai Liojta betana weyemta ka aꞌ taꞌaa.
\s Lemeetrioꞌ teamta, juꞌu tuꞌisi aꞌ jiapsaꞌu
\p
\v 12 Siꞌime, juꞌu Lemeetrioꞌ teamta betana, tuꞌisi tuꞌuwata
jiba ae tana teuwaa. Intok kia juꞌu lutuꞌuria, Liojta
betana aꞌ boꞌo jooriaꞌu aꞌ lutuꞌuriate. Itepo juniꞌi,
inikaꞌa aꞌ lutuꞌuriatukaꞌpo aꞌ juꞌuneiyaa. Intok emeꞌe
juꞌunea, lutuꞌuriata itom teuwaaꞌpo.
\s Juꞌu, jiꞌojtesuka aꞌ teuwaaꞌu
\p
\v 13 Juebenak ne eu teuwaabaen, taa nee ka inim jiꞌosiapo
eu aꞌ jiꞌojtebae.
\v 14 Bweꞌituk lauti ne enchi bitbaekaꞌea, intok junuen
itepo ito bichaka, nau etejone.
\p
\v 15 Yanti elaka em jiapsineeꞌuta, ne e tana waata.
Jumeꞌ em taꞌaaꞌum inim joꞌaakame, eu tebote. Nee betana,
jumeꞌ aman itom taꞌaaꞌum, ameu noiteka, ne am tebotuariane.