\id JUD
\h JUURAS
\toc1 JUURAS
\mt Juuras
\c 1
\s Juuras, jumeꞌ Liojta yeu puꞌarimmeu jiꞌojte
\p
\v 1 Inepo, Juuraj teame, Jesukrijtota betana tekilta
joame. Intok inepo, Jakooboꞌ teamtamak tua weri. Inikaꞌa
jiꞌojteita ne ameu bittua, jumeꞌe, achai Liojta yeu puꞌarimmeu,
intok wepulsi ae betchiꞌbo jiba jiapsineꞌ betchiꞌbo
aniawammeu. Jumeꞌe, Jesukrijtotamak bem eaꞌ betchiꞌbo
suuawame.
\v 2 Liojta betana enchim nak jiokolinaaꞌuta intok enchim
yanti elnaaꞌuta intok enchim naknaaꞌuta jiba ne emo
tana waata.
\s Jumeꞌe, ka lutuꞌuriata yee majtame
\p
\v 3 Krijtopo nemak werim, tuꞌisi in nakeꞌum, juꞌu itom
jinneꞌuritukaꞌu betana ne tua ama butti emou jiꞌojtepeaka,
juꞌu itom juꞌuneiyaaka itom nau bichaꞌu betana juniꞌi,
taa iꞌani in emou jiꞌojteneꞌpo, tua neu utteꞌa, junuen,
Jesukrijtota tuꞌisi enchim sualeꞌuta, enchim aꞌ nokrianeꞌ
betchiꞌbo, enchim tejwaabaekai. Juꞌu sejtul jiba, jiba
betchiꞌbo, jumeꞌ Liojtamak eame, bem junuen aꞌ majtawakaꞌuta.
\v 4 Bweꞌituk waate, ka lutuꞌuriae enchim bai taꞌaalamtaka
emomak aane. Jumeꞌe, jum Liojta nok lutuꞌuriapo, binwatuk
naateka juꞌuneiyaawame. Junameꞌe junuen, ka tuꞌisi tawaka,
bem kokkoneeꞌut nokakai. Liojta bichapo ka tuꞌi yoemem.
Intok Liojta ama butti yee aꞌ nakeꞌuta, aꞌ sualemcha
aneka juniꞌi, ka tuꞌisi jiapsa. Intok achai Liojta ka
teuwaaka, ka aꞌ sual tebo, jukaꞌ aapolaika, siꞌimemmeu
cheꞌa yoꞌotaka nesaweme, intok jukaꞌ itom yoꞌowe Jesukrijtota
ketchia.
\p
\v 5 Enchim, inikaꞌa jaibu enchim aꞌ juꞌuneiyaao juniꞌi,
juchi ne emou aꞌ teuwaabae, jukaꞌ achai Liojta, Ijraꞌel
yoemrata, bwiaraa Ejiiptoꞌ teaꞌa betana am jinneꞌuka
juniꞌi, chukula, jumeꞌ junameꞌ nasuk ka aꞌ sualekame, bem
luꞌutineeꞌuta ameu chupak.
\v 6 Jumeꞌ intok ankelesim, Liojta saweꞌum, ka jum bem
tekiakaꞌpo tawakame, ala teekau bem jiapsaꞌpo yeu sajakame,
juꞌu Lios, jiba betchiꞌbo ka tuꞌisi am tawaaka, jum ka
mamachiku am jipue, yee aet yaꞌuraa bittuaneeꞌuta taewaita
yumaꞌapo tajtia.
\v 7 Jumeꞌ bwere joꞌarampo Sorooma intok Komooraꞌ teaꞌpo
joꞌaakame ketchia, intok jumeꞌ ameu jeela, wate joꞌarampo,
joꞌaakame, ket, ama butti ka tuꞌik joaka jiapsan. Ka joowamta,
tiusi maachik jooan. Junuen, siꞌime yoemrata aꞌ juꞌuneiyaaka
intok aꞌ majjaeka aꞌ mammateneꞌ betchiꞌbo, junameꞌe, Liojta
betana, jiba betchiꞌbo tajiae im jiokot emo bichak.
\p
\v 8 Taa junuentaka juniꞌi, inimeꞌe oꞌowim, juꞌu bem jiapsaꞌut,
tenkume benasi, ka lutuꞌuriata suale. Ka tuꞌik joaka,
tiusi machikue bem takaam nanasonte. Jesukrijtota nok
nesauri ka aꞌ mabbeta. Inim jita yoꞌo yaꞌuraata juniꞌi,
ka yoꞌoreka, jaana am jiaawa.
\v 9 Jiba juꞌu ankel, Liojta saweꞌu, Mikel teame, yaꞌuttakai
juniꞌi, bebejeꞌeritamak nassuakai, Moiseejtukaꞌuta takaawa
betana weyemtatchi, junakaꞌa, bebejeꞌerita, kaita au teuwaak
ka tuꞌisi aꞌ tawaa betchiꞌbo, ka junuen aꞌ tuꞌurekai.
Inen jiba au jiiak ala: “Aapo achai Lios, enchi nok
tejwaane”, ti au jiiak juꞌu ankel.
\v 10 Taa inimeꞌe oꞌowim, ka bem taꞌaaꞌut juniꞌi, ka tuꞌisi
nonoka. Juꞌu intok bem taꞌaaꞌu betana, jumeꞌ naikim wokekame,
ka suawakame benasi, jiba betchiꞌbo aet kokkoneeka aꞌ
jooa.
\p
\v 11 Tua jiokot maisia ameu chupne. Bweꞌituk junameꞌe,
Kaintukaꞌuta ayukaꞌa benasi aane. Intok tomita yuꞌin
waatakai, Balaamtukaꞌuta ayukaꞌa benasia emo taꞌaruk.
Intok kokkone, Koreꞌetukaꞌuta, yoꞌooraata bejeꞌeka ayuka,
aꞌ mukukaꞌa benasia.
\v 12 Intok enchim, Krijtota sualeme, alleaka jiꞌibwa
betchiꞌbo enchim nau aneꞌepo, inimeꞌe tiusi enchim tatawa.
Junamaꞌa bempo alleaka intok ka weelaꞌpo jiꞌibwaka intok
jita jeꞌeeka, kaita yoꞌorekai. Intok bempo jiba emo suuakai.
Kaitaꞌpo enchim ania. Naamum, ka baꞌakame, jekae weiyawame
bebena. Juyam, takaꞌeao, ka tatakame bebena. Tokti wawakiamtaka
intok nawamak poponrim bebena.
\v 13 Bawepo, jantiachisi, jumeꞌ biaktiam benasi mamachi.
Jaiti somoꞌochiata benasi machika, jukaꞌ ka tuꞌik tiusi
machik jooa. Chokim, ka bem katꞌeaꞌu bicha kateme bebena.
Junameꞌe, jiba betchiꞌbo ka tuꞌisi tawalamtaka, jum cheꞌa
ka mamachiku bem tawaneeꞌuta ameu yeu puꞌari.
\p
\v 14 Ket juꞌu Enooktukaꞌu, Adamtukaꞌutat chukula, woo
busanisi yoemrata nat chaꞌaka kateꞌu weyeme, junaꞌa, Liojta
betana juꞌuneetuawaka, inimeꞌe betana inen jiiak: “Achai
Liojta, juebena miilim, jumeꞌ aꞌ ankelesimmak, aꞌabo weyemta
ne bichak.
\v 15 Junuen siꞌimem yaꞌuraa bittua betchiꞌbo intok
siꞌimem jumeꞌ ka tuꞌi yoemem, ka tuꞌisi am tawaa betchiꞌbo.
Siꞌime juꞌu ka tuꞌik ka tuꞌisi jiapsaka bem yaakaꞌu
betchiꞌbo. Intok siꞌimeta jukaꞌa, junameꞌe ka tuꞌik boꞌo
jooriame, aapoꞌik bejeꞌeka, intok ka aꞌ yoꞌoreka, bem teuwaakaꞌu
betchiꞌbo”, ti jiakai.
\v 16 Inimeꞌe junen, siꞌimeta bejeꞌeka, kaita tuꞌute.
Intok ka ammaꞌali yetet nonoka. Bempo, ka tuꞌik bem joopeaꞌuta
joaka jiapsa. Inimeꞌe, ujyoisi emo eꞌetejo. Intok watem
betana tuꞌik tetteuwaa, taa kia, tuꞌik bem jipueꞌuta ameu
waatakai.
\s Juꞌu, jumeꞌ Krijtota sualeme, tuꞌikut nok tejwaawaꞌu
\p
\v 17 Taa emeꞌe, Krijtopo nemak werim, tuꞌisi in nakeꞌum,
au emeꞌe waatine, cheꞌa bat naatekai, jumeꞌ yoꞌowe Jesukrijtota
majtim yeu puꞌarim, jaibu emou aꞌ teuwaꞌariakaꞌpo.
\v 18 Jumeꞌ taewaim chukula aꞌabo weyemmetchi, wate anne,
Liojta betana weyemta jaana aꞌ jiaawaaneeme. Intok ka
tuꞌik bem joopeaꞌuta joaka jiapsineeme, Liojta ka tuꞌureꞌuta
joakai.
\v 19 Inimeꞌe junameꞌem, jumeꞌe, nattepola emo eiyaawamta
joame. Inim weyemta jiba tuꞌureka jiapsa. Intok inimeꞌe,
Liojta betana tuꞌu jiapsita, ka amet jiapsa.
\p
\v 20 Taa emeꞌe, in nakeꞌum, Krijtopo nemak werim, enchim
sualeka, Liojta betana enchim majtawaꞌuta, cheꞌa juniꞌi
aet jiapseka aꞌ sualne. Liojta tuꞌu jiapsie aniawaka,
jiba Liojtau bicha emo nokriane.
\v 21 Achai Liojta jiba enchim aꞌ nak taꞌaaneeꞌuta, emeꞌe
ka aꞌ koptane, aapoꞌik tuꞌisi enchim jiapsi iꞌaꞌpo aman,
jiapsakai. Intok emeꞌe aꞌ boꞌo bitne, jukaꞌ taewaita,
itom yoꞌowe Jesukrijtota, tua yee aꞌ nak jiokoleꞌ betchiꞌbo,
jiba yuu jiapsiwamta aet itom aꞌ bittuaneeꞌuta.
\p
\v 22 Jumeꞌe, kee tuꞌisi Krijtota sualeme, am jiokoleka,
junaet am aniane.
\v 23 Watem, bem jinneꞌuituneꞌ betchiꞌbo, ameu nokaka
am aniane. Tajiu woꞌotabaawame jinneꞌukame benasia.
Jumeꞌ watem intoko, emeꞌe nak jiokoline. Taa tuꞌisi aet
emo suuane, jukaꞌ ka tuꞌisi jiapsaka, ka tuꞌik bem joaꞌuta,
ka enchim aꞌ jooneꞌ betchiꞌbo.
\s Jiꞌojtesuka, achai Liojta aꞌ yoꞌoreꞌu teuwaa
\p
\v 24,25 Aapolaika Lios intok, siꞌime suawakame, juꞌu itom
jinneꞌukame, siꞌime utteꞌak, ka tuꞌikut ka enchim jiꞌopneeꞌut
enchim aniaꞌ betchiꞌbo. Intok junuen, chukula, kaita ka
tuꞌik yaꞌarika, intok alleaka enchim mabet teboneekai.
Aꞌ yoꞌorinaaꞌu intok cheꞌa aꞌ eiyaanaaꞌu, intok siꞌime
yaꞌuraata bepa yoꞌotaka utteꞌata aꞌ jipuꞌuneeꞌu, itom
yoꞌowe Jesukrijtota yaakaꞌu betchiꞌbo au lutuꞌuriatune,
cheꞌa bat naatakai, iꞌani, intok jiba yuu betchiꞌbo. Tua
junuentune.