\id REV
\h APOKALIPSIS
\toc1 APOKALIPSIS
\mt Apokalipsis
\c 1
\s Yoꞌowe Jesukrijtota, juꞌu aapoꞌik juꞌuneiyaa tebokaꞌu
\p
\v 1 Iniꞌi junaꞌa, juꞌu, Liojta, Jesukrijtota juꞌuneiyaatuakaꞌu.
Junuen, aapoꞌik, jumeꞌ nesauta joammeu, aet am tejwaaneꞌ
betchiꞌbo. Jukaꞌ chukula, baa yeu weenemta. Aapo Jesukrijto
intok, inikaꞌa bitnaamta aꞌ juꞌuneiyaa tebok, ankelejta
aꞌ nesaureowata, Joan teamtau aꞌ bittuakai.
\v 2 Aapo juꞌu Joan teame intoko, siꞌimeta aꞌ bichakaꞌu
betana, lutuꞌuriata teuwaala. Intok aapo, achai Liojta
betana nok lutuꞌuriata aꞌ juꞌuneiyaa, jukaꞌa, Jesukrijtota
betana lutuꞌuriateita.
\p
\v 3 Tua alleenee juꞌu aꞌ nokame, intok tua alleenee
ketchia, wameꞌe, Liojta betana weyeka, inim jiꞌojteita
nokamta aꞌ jikkajame. Intok inim jiꞌojteita aꞌ teuwaaꞌpo
aman jiapsame. Bweꞌituk juꞌu taewai yumaꞌaseka weye.
\s Juꞌu Joan, woo busan teꞌopommet, Krijtota sualemmeu jiꞌojte
\p
\v 4 Inepo, Joan teame, bwiaraa Aasiaꞌ teaꞌpo, woo busanika
jumeꞌ teꞌopommet, Krijtota sualemmeu ne jiꞌojte. Achai
Liojta betana, yanti elaka jiapsiwamta intok tuꞌikue
enchim alleeneeꞌuta emot aune. Juꞌu iꞌan jiapsamta betana,
intok cheꞌa bat naatekai, intok ket chukula, jiba betchiꞌbo
tuneemta betana. Intok woo busanika, jumeꞌ ama yoꞌo nesaweka
aꞌ katekaꞌabichapo, jiapsaka ama aneka, aꞌ tuꞌu jiapsiwata,
yumaꞌisi aet aꞌ ayukaꞌuta aꞌ teuwaame betana.
\v 5 Intok ketchia, Jesukrijtota betana, juꞌu, Liojta betana
siꞌimeta jukaꞌ lutuꞌuriata yeu aꞌ machiaka aꞌ teuwaame.
Intok cheꞌa bat, juꞌu, mukuka, juchi jiabijtekame. Intok
aapo, inim siꞌime yoꞌo nesaweme bepa yoꞌo nesawe.
\p Jesukrijto, aapo itom nake, intok itom ka tuꞌuwa yaꞌarimmet
itom jiokoeka, ame betana itom jinneꞌuk, kuuset mukuka,
aꞌ ojbowata woꞌotakai.
\v 6 Intok aapo, aapoꞌik benasi, siꞌimemmeu itom yoꞌo
yaꞌari, intok yoemrata, aapoꞌiku bicha aꞌ nokria betchiꞌbo,
itom yoꞌo yaꞌari. Junuen, aapoꞌik, achai Liojta betana
aꞌ tekilta jooneꞌ betchiꞌbo. Aapoꞌik eiyaawaka aꞌ yoꞌorinaaꞌu,
intok siꞌime yaꞌuraata bepa aꞌ nesauneeꞌu, jiba yuu betchiꞌbo
au lutuꞌuriatune. Tua junuentune.
\p
\v 7 Akeꞌem aꞌ mammate, juꞌu Krijto, namupo aꞌabo koꞌom
weene. Kaabe yeu beꞌeeka aꞌ bitne. Kia jumeꞌe, jiokot
aꞌ yaꞌa tebokame juniꞌi. Intok siꞌime juꞌu inim, ka nanau
machi yoemra, junak aꞌ bichaka, bwanne. Jeewi. Tua junuentune.
\p
\v 8 “Inepo nee junaꞌa, cheꞌa bat, kee jita ayuo, jiba
jiapsame. Intok juꞌu, siꞌimekut chukula, jiba yuu jiapsineeme.
Jumeꞌ leetam, Alpa intok Omeka teame benasia”, ti jiia
juꞌu achai Lios, juꞌu siꞌimeku yumaka utteꞌakame. Juꞌu
iꞌan jiapsame, intok cheꞌa bat naataka intok ket chukula
jibapo betchiꞌbo tuneeme.
\s Krijtota teekau, yoꞌorisi katekamta, aꞌ bichakaꞌu
\p
\v 9 Inepo Joan teame, Krijtopo ne emo mak weri. Intok
emo benasia ne ae betchiꞌbo jiokot ino bicha. Intok,
yoꞌotaka itom anneeꞌuta ne aꞌ bitbae. Intok Jesukrijtota
betana aniawaka, a itom boꞌo bichaꞌpo. Inepo, bawepo ili
bwiata yeu katekaꞌpo, Patmoj teaꞌpo nee tojiritukan, achai
Liojta betana nok lutuꞌuriata, jukaꞌ Jesukrijtota betana
lutuꞌuriateita, yeteu in aꞌ teuwaꞌ betchiꞌbo.
\v 10 Junamaꞌa intok, senu lominko taewait inen yeu siika.
Liojta tuꞌu jiapsie aniawaka ne ama aanen. Junak intok,
in amapo, jiawaita utteꞌakamta ne jikkajak, sisiꞌiwook
kusiata jiawaita benak,
\v 11 inen neu jiamta:
\p ―Ineponee junaꞌa, juꞌu cheꞌa bat, kee jita ayuuo, jiba
jiapsame. Intok juꞌu, siꞌimekut chukula, jiba yuu jiapsineeme.
Jumeꞌ leetam Alpa intok Omeka teame benasia. Lipropo
aꞌ jiꞌojte, jukaꞌ em bittuawaꞌuta. Junakaꞌa intok, jumeꞌe,
bwiaraa Aasiaꞌ teaꞌu woo busani, jumeꞌ teꞌopom beꞌeka
tana aꞌ bittuane. Jumeꞌ bwere joꞌaram, Eepesoꞌ teaꞌu,
intok Ejmiirnaꞌ teaꞌu, intok Perkamoꞌ teaꞌu, intok Tiatiiraꞌ
teaꞌu, intok Saartij teaꞌu, intok Pilareelpiaꞌ teaꞌu, intok
Laoriseaꞌ teaꞌu jokammewi.
\p
\v 12 Ne intok, au bicha kuaktek, juꞌuneebaekai, jabeta
junuen jiaka neu aꞌ nokaꞌapo. Junak intoko, amau kuakteka,
woo busanika jumeꞌ kanteelam ama jajaꞌabwawaaꞌum, sawai
tomie yaꞌarim ne bichak.
\v 13 Junameꞌe woo busan kanteelam ama jajaꞌabwawaꞌum
nasuku intok, senuk, inim yoemta benak ne bichak. Wokimmeu
koꞌom tajtia, tebem supekamta, intok tawiu jikat, wikosa,
sawai tomie yaꞌarikue au sumaꞌik ne bichak.
\v 14 Jumeꞌ tettebe aꞌ choniwam, tosali, bwala boata benaekan.
Tosai sapam benasia. Jumeꞌ intoko, aꞌ pusiwam, tajim mamachiakaꞌabenaekan.
\v 15 Aapoꞌik jumeꞌ aꞌ wokim, kopreta, tajipo tuꞌu yaꞌarita
benasi mekka bebeojkoekan. Juꞌu intok, nokaka aꞌ jiawai,
bawe baꞌa biaktiam mayoau yumaka, kusisi am jiaꞌa benasi
jiian.
\v 16 Batatana aꞌ mampo, woo busanim chokekan. Aꞌ tenpo
betana intoko, teebe kuchiꞌim, nau bicha bwawiaka yeu
weyen. Juꞌu aꞌ pujbawa intoko, taꞌata, unnaa aꞌ utteꞌakaꞌa
benasi machiakan.
\p
\v 17 Inepo aꞌ bichakai, aꞌ wokiwammeu, mukiata benasi
ne wechek. Taa aapo, aꞌ batatana aꞌ mamammea net mamteka
intok inen neu jiiak:
\p ―Kat majjae. Ineponee junaꞌa juꞌu cheꞌa bat, kee jita
ayuuo, jiba jiapsame, intok juꞌu, siꞌimekut chukula, jiba
yuu jiapsineeme ―ti neu jiiak―.
\v 18 Inepone junaꞌa, juꞌu jiapsame. Mukukan ne. Taa
iꞌani, jiba betchiꞌbo ne jiapsa. Inepo utteꞌak, intok
neu lutuꞌuria, jumeꞌ kokkoneeme in am jinneꞌuneꞌ betchiꞌbo.
Intok jumeꞌ kokkosukame, jiabijtetuaꞌ betchiꞌbo.
\v 19 Aꞌ jiꞌojtenee jukaꞌ em bichakaꞌuta, jukaꞌ iꞌan
ayukamta, intok ket, jukaꞌ cheꞌa chukula auneemta.
\v 20 Iniꞌi junaꞌa juꞌu ka em aet juꞌuneaꞌu, jumeꞌ woo
busanika chokim in batatana mampo, em bichakaꞌum intok
jumeꞌ woo busanik kanteelam ama jajaꞌabwawaꞌum, sawai
tomie yaꞌarim betana. Jumeꞌ woo busan chokim, woo busanika
teꞌopom beꞌekatana, Liojta nok lutuꞌuriata weiyaaneeme
teuwaa. Jumeꞌ woo busan kanteelam ama jajaꞌabwawame
intok, jumeꞌ woo busan teꞌopom teuwaa.
\c 2
\s Liojta betana nooki, woo busan teꞌopommeu weyeme: Juꞌu Eepesoꞌ teamtau weyeme
\p
\v 1 ’Bweꞌu joꞌara Eepesoꞌ teaꞌpo, Krijtota sualemmeu
weyekamtau jiꞌojtene. Junuen jiia, juꞌu, batatana mampo
jumeꞌ woo busani chokim jipueme, intok woo busan kanteelam
ama jajaꞌabwawaꞌum sawai tomie yaꞌarim jaꞌabwekaꞌ nasuk
naj weyeme.
\v 2 Siꞌimeta jukaꞌ em boꞌo jooriaꞌuta nee aꞌ juꞌuneiyaa.
Intok jukaꞌ bettesi machika tekilta em joaꞌuta. Intok
ka jain eaka a em boꞌo bichaꞌuta. Intok ne juꞌunea, jumeꞌ
ka tuꞌik boꞌo jooriame, tua ka em am bibitpeaꞌpo. Juꞌuneane,
jumeꞌ Krijtota betana emo yeteu bittuarim ti jiame, intok
em am juꞌuneiyaabaekaꞌpo. Taa ka lutuꞌuriapo junameꞌem.
Intok empo am juꞌuneiyaala, ka lutuꞌuriata bem teuwaaꞌpo.
\v 3 Ka seej chukti eaka, empo binwa a boꞌo bichak. Intok
jiokot empo emo bitlaa. Intok ka aꞌ rojiktakai, empo
tekilta yuꞌin yaꞌala em nemak eaka, nee betchiꞌbo aꞌ
joakai.
\v 4 Taa senu weyemta ne e tana juꞌuneiyaa ka tuꞌik.
Iꞌan ka bat naataka em nee nakeꞌu benasi em nee nakeꞌuta.
\v 5 Junuen san empo, bat naataka juꞌu tua em nee nak
taꞌaaka jiapsisuka intok iꞌan ka junuen em nee nakeꞌu
waateka, iniat emo temaine, intok bat naataka benasia
jukaꞌ em boꞌo jooriaꞌuta aꞌ joonee nee nakekai. Bweꞌituk
ka inien tuko, ineponee lauti enchi bejeꞌeka eu sikaa,
jumeꞌ Liojta yoemiam nasuk jukaꞌ tuꞌika et ayuka em
a joaꞌuta, ka intok et aꞌ bittuane. Ala iniꞌi ka inien
tune, ka tuꞌik betana taꞌabwisi enchi eao.
\v 6 Junuentaka juniꞌi, ikaꞌa ne tuꞌik ne e tana juꞌuneiyaa.
Jukaꞌa, jumeꞌ nikolaitam ti teuwaawame joaꞌuta, ka em
bibitpeaꞌu. Ket jukaꞌ in ka tuꞌureꞌuta.
\v 7 Juꞌu aꞌ mammatebaeme aꞌ jikkajine, Liojta tuꞌu jiapsi
betana, Krijtota sualemmeu teuwaawamta. Jumeꞌe, ka tuꞌik
kobaꞌika, tuꞌisi yeu sajakame, juya, jiba yuu jiapsiwamta
yetet autuame, jumeꞌ aꞌ takawam, jum ujyoika, achai Liojta
jiapsaꞌpo ayukame, ne am bwaꞌatuane.
\s Juꞌu nooki, Ejmiirnaꞌ teamtau weyeme
\p
\v 8 ’Bweꞌu joꞌara Ejmiirnaꞌ teaꞌpo, jumeꞌ Krijtota sualemmeu
weyekamtau ket jiꞌojtene. Junuen jiia juꞌu, cheꞌa bat
kee jita ayuuo jiba jiapsame, intok juꞌu, siꞌimekut chukula,
jiba yuu jiapsineeme, juꞌu, mukuka intok juchi jiabijtekame.
\v 9 Siꞌimeta jukaꞌ em boꞌo jooriaꞌuta ne aꞌ juꞌuneiyaa.
Intok juꞌu em jiokot emo bitlaꞌuta juniꞌi, intok tua
em kaita atteasukaꞌuta. Taa lutula weeꞌpo empo, ne tana
weyemtat, kaitaꞌpo jiokot eakai. Intok jumeꞌ emo juriom
ti jiame, jukaꞌ ka tuꞌisi bem et nokaꞌuta ne juꞌuneiyaa.
Taa junameꞌe, bebejeꞌerita mak eaka jiba nau emo totoja.
\v 10 Em ae jiokot emo bitneeꞌu betana, ka majjaune.
Bweꞌituk juꞌu bebejeꞌeri, emo betana watem jiokot emo
bittuanee am etaꞌateboka, junuen enchim siꞌimem juꞌuneiyaanaꞌ
betchiꞌbo. Intok emeꞌe, ili juebena taꞌapo jiokot eene.
Taa empo, nee betchiꞌbo meꞌenaaka juniꞌi, inim em jiapsaꞌpo
tajtia net eaka jiapsine. Inepo intoko, jiba yuu jiapsiwamta
ne enchi bittuane, jita ujyoik em yoꞌoneeꞌu benasia.
\v 11 Juꞌu, aꞌ mammatebaeme aꞌ jikkajine, Liojta tuꞌu
jiapsiwa betana, Krijtota sualemmeu teuwaawamta. Jumeꞌe,
ka tuꞌik kaita yaꞌarika, tuꞌisi yeu sajakame, jiabijtetuawaka,
intok inia mak woisi, jukaꞌ jiba betchiꞌbo kokkowamta,
kaachin aꞌ bitne.
\s Nooki, Perkamoꞌ teamtau weyeme
\p
\v 12 ’Bweꞌu joꞌara Perkamoꞌ teaꞌpo jumeꞌe, Krijtota
sualemmeu weyekamtau ket jiꞌojtene. Junuen jiia juꞌu,
tebem, nau bicha bwawim kucheꞌekame.
\v 13 Siꞌimeta jukaꞌ em boꞌo jooriaꞌuta ne aꞌ juꞌuneiyaa.
Intok ne juꞌunea, bebejeꞌerita, yoꞌotaka aneꞌepo em joꞌaakaꞌpo.
Intok junuentaka juniꞌi, empo, nee betana weyemta ka koptaka
aꞌ boꞌo jooria. Kia jukaꞌ Antipaj teamta aꞌ jiapsao,
jukaꞌa, ka aꞌ koptaka, nee betana weyemta teuwaamta, jum
emo nasuk jum bebejeꞌerita aꞌ aneꞌepo, nee betchiꞌbo
aꞌ meꞌewako juniꞌi.
\v 14 Taa ne ili jaikik weyemta ne ka tuꞌik e tana juꞌuneiyaa.
Junamaꞌa bweꞌu joꞌara Perkamoꞌ teaꞌpo, waatem jumeꞌe,
Balaam tukaꞌuta yee majtakaꞌuta ka suꞌu tojibaeme em
ama am jipueꞌuta. Junaꞌa, juꞌu seenuk, Balak tukaꞌuta
aꞌ nok tejwaak jukaꞌ Ijraꞌeel yoemrata jukaꞌ ka tuꞌik
yaꞌatuaꞌ betchiꞌbo. Junameꞌe, wakajta, jumeꞌ ka tua liosimtaka
yoꞌoriwame betchiꞌbo suꞌarita, am bwaꞌatuaꞌ betchiꞌbo.
Intok junameꞌe, ka am jubeka juniꞌi, jaamuchimmak emo
am tuꞌurituakai.
\v 15 Ketchia, empo, junamaꞌa waatem jumeꞌ Nikolaitam
teame bem yee majtaꞌuta ka aꞌ suꞌu tojibaeme ama am
jipue. Ket jukaꞌ tua ka in tuꞌureꞌuta.
\v 16 Junuen san empo emo temaine. Bweꞌituk ka junuentuko,
lauti ne eu sikaa, intok junameꞌe ne bejeꞌeka nassuane,
jumeꞌ tebe kuchiꞌim in tenpo yeu weyemmea.
\v 17 Juꞌu aꞌ mammatebaeme aꞌ jikkajine, Liojta tuꞌu
jiapsiwa betana, Krijtota sualemmeu teuwaawamta. Jukaꞌa,
ka tuꞌik kobaꞌika, tuꞌisi yeu sikamta, Liojta betana manaꞌ
teaka, bwaꞌamta ka juꞌuneiyaawamta ne aꞌ bwaꞌatuane.
Intok junakaꞌa, ili tossaalai tetata ne aꞌ makne. Junamaꞌa
tetapo, bemelaka team weene. Kaabe am taꞌaane. Juꞌu, junameꞌe
mabetakame, aapo jiba am taꞌaane.
\s Juꞌu nok lutuꞌuria, Tiatiiraꞌ teamtau weyeme
\p
\v 18 ’Bweꞌu joꞌara Tiatiiraꞌ teaꞌpo, jumeꞌ Krijtota
sualemmeu weyekamtau ket jiꞌojtene. Junuen jiia juꞌu
Liojta yoemia, juꞌu, tajim benam pusekame. Intok kopreta,
tajipo tuꞌu yaꞌaritukaꞌabenam wokekame.
\v 19 Siꞌimeta jukaꞌ em boꞌo jooriaꞌuta ne aꞌ juꞌuneiyaa,
em nee nak taꞌaaꞌuta. Intok tuꞌisi em nee sual taꞌaaꞌuta.
Intok nee betana tekilta em joaꞌapo. Intok ka jain eaka
a em boꞌo bichaꞌuta. Intok ket ne aꞌ juꞌuneiyaa, bat
naataka bepa nee betana weyemta, iꞌan, cheꞌa juniꞌi em
aꞌ joaꞌapo.
\v 20 Taa ne senu weyemta e tana juꞌuneiyaa ka tuꞌik.
Jukaꞌ jamutta, Jesabel teamta em ama aꞌ tuꞌureꞌuta. Jukaꞌ
Liojta betana juꞌuneetuawaka, aapo yeteu au nokaꞌati
jiamta. Taa junaꞌa, yee aꞌ majtaꞌue, jumeꞌ nee betana
tekilta joame, am bai tattaꞌaa. Junuen, jumeꞌ ka lutuꞌuriapo
liosimtakai yoꞌoriwame betchiꞌbo ayukamta, am bwaꞌatuakai
intok jaamuchimmak emo am tuꞌuritua.
\v 21 Inepo, junae jamuttat binwa ne aet boꞌo bichak,
junuen au aꞌ temaineꞌ betchiꞌbo. Taa aapo ka junuen
aubae. Intok ka aꞌ suꞌu tojila jukaꞌ tua ka tuꞌik aꞌ
joaꞌuta.
\v 22 Iꞌan intoko inepo ne junakaꞌa jamutta, ne aꞌ koꞌokoi
tatapne. Intok jumeꞌ junuen aamak ka tuꞌisi aneme, jiokot
ne emo am bittuane, ka emo am temaeko. Intok iꞌan junakaꞌa
joaꞌuta, ka am suꞌu tojako.
\v 23 Intok jumeꞌe, junae jamutta yeu puꞌarim ne am suꞌane.
Intok junuen siꞌime jumeꞌ Krijtota sualeme aꞌ juꞌuneiyaane,
eerita yumaꞌisia in aꞌ juꞌuneiyaaꞌpo, intok jukaꞌ jiapsita
juniꞌi. Enchim intoko weꞌepulaim ne, emou aꞌ lutuꞌuriatukaꞌpo
aman, aꞌ naꞌikiane.
\v 24 Taa emo betana jumeꞌ waatem, bweꞌu joꞌara Tiatiiraꞌ
teaꞌpo joꞌaakammeu, wameꞌe, ka junakaꞌa yee majtawamta
aꞌ jikkajibaeme intok kia jukaꞌa, junameꞌe, bebejeꞌerita
betana weyeka, obiachika, kaabeta aet juꞌuneaꞌati bem
aꞌ teuwaaꞌuta, ka aꞌ juꞌuneiyaame, kaita intok ne jukaꞌ
bettesi maisi machik ne enchim bittuane.
\v 25 Taa emeꞌe, jukaꞌ enchim juꞌuneiyaaka enchim taꞌaaꞌuta,
ka aawas kopteka, aet jiapsine, in aman notteꞌu tajtia.
\v 26 Jumeꞌe, ka tuꞌik kobaꞌika, tuꞌisi yeu sajakame, intok
bem jiapsaꞌu tajtia, bichau bicha jukaꞌ in am joo iꞌaꞌuta
aꞌ joame, junameꞌe ne utteꞌata amet autuane, inim yoemratau
bem yoꞌotuneꞌ betchiꞌbo.
\v 27 Junuen, jukaꞌa, in achai Liojta in yoꞌotuneꞌ betchiꞌbo,
utteꞌata net aꞌ autuaꞌa benasia. Intok junameꞌe, inim
siꞌime jukaꞌ ka nanau machika yoemratau yoꞌotaka nesaune.
Sisiꞌiwook barata jipueme benakai. Junameꞌ nasuk jumeꞌ
ka tuꞌisi jiapsame, am babu sotoꞌim tukaꞌa benasia, am
jamtane.
\v 28 Intok ketchia, inepo ne, ketwoo jukaꞌ chokita yeu
weamamta ne am makne.
\v 29 Juꞌu aꞌ mammatebaeme, aꞌ jikkajine, jukaꞌ Liojta
tuꞌu jiapsiwa betana, Krijtota sualemmeu teuwaawamta.
\c 3
\s Juꞌu nok lutuꞌuria, Sartij teamtau weyeme
\p
\v 1 ’Bweꞌu joꞌara Sartij teaꞌpo jumeꞌ Krijtota sualemmeu
weyekamtau ket jiꞌojtene. Junuen jiia juꞌu, Liojta betana
tuꞌisi jiapsita, yumaꞌisi yetet aꞌ autuame. Intok jumeꞌ
woo busan chokim jipueme. Siꞌimeta jukaꞌ em boꞌo jooriaꞌuta,
ne aꞌ juꞌuneiyaa. Intok ka wepulsi nee betchiꞌbo jiapsaka,
ka tua nemak eaka, mukiata benasi em machiakaꞌpo ne juꞌunea.
Watem betana nee betchiꞌbo jiba em jiapsaꞌpo juꞌuneiyaawaka
juniꞌi.
\v 2 Aet emo suuane, intok jukaꞌ watek emo nasuku, luꞌutiseka
weyeꞌuta, aꞌ jinneꞌune. Bweꞌituk jukaꞌ em boꞌo jooriaꞌuta,
in achai Liojta bichapo ka junama waꞌam em aꞌ joaꞌapo
nee aꞌ juꞌuneiyaala.
\v 3 Junuen san au waatine, jukaꞌ em majtawaka em mabetriu.
Ka aꞌ koptanee intok aet emo temaine. Bweꞌituk ka junuen
enchi aet emo suuao, senuk, jita etbwaabaeka aꞌ weyeꞌe
benasia ne eu yebijne, empo ka juꞌuneenee jak weyeo junuen
in auneꞌpo.
\v 4 Junuentaka juniꞌi, empo, junamaꞌa bweꞌu joꞌara Sartij
teaꞌpo, waatem, ka jaikika ama jipue, tuꞌisi jiapsaka, ka
tuꞌik ka joame. Junameꞌe intok, tossassaalai tajoꞌoreka
nemak rejtine. Bweꞌituk junuen junammeu lutuꞌuria.
\v 5 Jumeꞌe, ka tuꞌik kobaꞌika, tuꞌisi yeu sajakame, tossassaalaik
tajoꞌota atteatuanaa. Intok inimeꞌe team, jumeꞌ jiba
yuu jiapsineeme jiꞌojteipo, ne ka am tuchaꞌariane. Ala,
inepo, achai Liojta bichapo intok jumeꞌ aapoꞌik ankelesim
bichapo, nemak bem eaꞌpo ne ama aꞌ teuwaane.
\v 6 Juꞌu aꞌ mammatebaeme aꞌ jikkajine, Liojta tuꞌu jiapsiwa
betana Krijtota sualemmeu teuwaawamta.
\s Liojta betana nooki, Pilareelpiaꞌ teaꞌu weyeme
\p
\v 7 ’Bweꞌu joꞌara Pilareelpiaꞌ teaꞌpo, jumeꞌ Krijtota
sualemmeu weyekamtau ket jiꞌojtene. Junuen jiia juꞌu
a aet yoemꞌeetuka tuꞌik joame, Lios. Juꞌu, Labiitukaꞌuta
benasi yoꞌo nesaweme. Jukaꞌ aapoꞌik yaꞌabaeꞌuta, kaabe
aꞌ wiutane. Intok jukaꞌ aapoꞌik ka yaa iꞌaꞌuta, kaabe
aꞌ yaꞌane.
\v 8 Siꞌimeta jukaꞌ em boꞌo jooriaꞌuta ne aꞌ juꞌuneiyaa.
Junuen san, senu lutuꞌuriata enchim aꞌ maki, junakaꞌa
kaabe a enchim aꞌ uꞌaane. Empo ka jaikik utteꞌawakai
juniꞌi, nee betana jukaꞌ nok lutuꞌuriata, empo aꞌ nok
jikkaja. Intok em nee sualeꞌuta, aꞌ teuwaa.
\v 9 Junuen san, inepo, jumeꞌ bebejeꞌeritamak eaka nau
yaajame, jumeꞌ ka lutuꞌuriata teuwaame, jumeꞌ emo juriom
ti jiame, taa ka lutuꞌuriapo junameꞌem. Intok inepo, bempoꞌim,
em katekaꞌu ne am tojine, bem eu bwanneꞌ betchiꞌbo, junuen
in enchi nak taꞌaaꞌpo, bem juꞌuneeneꞌ betchiꞌbo.
\v 10 Nee betana, empo jukaꞌ nesaurita aꞌ yaꞌari, ka seej
chukti eaka a boꞌo bichakai. Intok inia betchiꞌbo san
inepo, siꞌime inim yoemrata, jiokot au aꞌ bitneeo taewaita
aꞌ yumako, junae, siꞌime jumeꞌ inim jiapsame jiꞌobilaaka
am juꞌuneiyaakai, junak ne enchi anianee tuꞌisi em ama
yeu weeneꞌ betchiꞌbo.
\v 11 Lauti ne aꞌabo weene. Jukaꞌ em mabetrika em juꞌuneiyaaꞌuta,
ka aꞌ koptaka, aet jiapsine. Junuen jukaꞌ tuꞌika nee
betana em mabetneeꞌuta, kaabeta, em jooꞌeaꞌuta joaka, enchi
kobaka, aꞌ mabetneꞌ betchiꞌbo.
\v 12 Juꞌu, jukaꞌ ka tuꞌik kobaꞌika, tuꞌisi yeu weyeme,
achai Liojta jiapsaꞌpo, ne cheꞌa aꞌ eiyaa tebone. Intok
junamaꞌa jiba betchiꞌbo, ama tawane. Intok inepo, junameꞌe,
Liojta betana jumeꞌ team ne aꞌ teatuane. Intok ketchia,
jumeꞌ in bemela team, intok achai Liojta bweꞌu joꞌara
Jerusalen teamta, teekapo, Liojta katekaꞌa betana aꞌabo
koꞌom weyemta, junameꞌe team ne aꞌ teatuane.
\v 13 Juꞌu aꞌ mammatebaeme aꞌ jikkajine, Liojta tuꞌu
jiapsiwa betana, Krijtota sualemmeu teuwaawamta.
\s Liojta betana nooki, Laoriseaꞌ teaꞌu weyeme
\p
\v 14 ’Bweꞌu joꞌara Laoriseaꞌ teaꞌpo jumeꞌ Krijtota
sualemmeu weyekamtau ket jiꞌojtene. Junuen jiia juꞌu
lutuꞌuriapo a aet yoemꞌeetume, juꞌu, yumaꞌisi, Liojta betana
lutuꞌuriata teuwaame. Juꞌu, lutuꞌuriata jiba aꞌ nokame.
Juꞌu, siꞌimeta jukaꞌ Liojta juꞌunaktekaꞌuta aet yeu sikaꞌu.
\v 15 Siꞌimeta jukaꞌ em boꞌo jooriaꞌuta nee aꞌ juꞌuneiyaa.
Juꞌuneane, nee betana weyemta, ka tokti em aꞌ suꞌu tojilatukaꞌpo,
intok kia ka tokti siꞌimeku em aet jiapsekaꞌpo. Cheꞌa
tuꞌi ean, wepulsi jiba empo aet jiapseko, oo kia tokti
em aꞌ koptako.
\v 16 Taa empo, baꞌam sukaekaꞌa benasi maachi. Intok
junuen, ka unnaa sebekai, intok kia ka unnaa tatakai juniꞌi,
tenpo ne enchi yeu toꞌone.
\v 17 Bweꞌituk empo, yuꞌin emo tomek ti jiia. Siꞌimeta
tuꞌisi eu weyeꞌeti jiia. Intok kaitaꞌpo emo jiokot eaꞌati
jiakai. Taa empo tua kaitaꞌpo alleewamta et ayuꞌupo
ka juꞌunea. Jiokot maisiꞌee maachi. Intok empo, nee bichapo,
tua kaitae emo ania machika intok kaitae emo aꞌanaa
maachi. Intok ket ka bichamta bena siꞌee maachi.
\v 18 Junuen san ne enchi tejwaa, sawai tomita, tajipo
tuꞌuteita em neu jinuneꞌ betchiꞌbo. Junuen lutula weeꞌpo,
nee betana weyemtat ka jiokot em eeneꞌ betchiꞌbo. Intok
ket, tosai tajoꞌota neu em jinuneꞌ betchiꞌbo, em aꞌ tajoꞌoteneꞌ
betchiꞌbo, intok ka ausuꞌlika em jiapsineꞌ betchiꞌbo.
Intok jukaꞌ puj jittoata neu aꞌ jinune, pujpo em et aꞌ
yaaka, juchi em bitneꞌ betchiꞌbo.
\v 19 Inepo siꞌimem jumeꞌ in nakeꞌum, am nok tejwaa.
Intok tuꞌisi bem jiapsineꞌ betchiꞌbo, ne jiokot emo am
bittua. Junuen san beja, empo nee betana weyemtat jiapsine.
Intok ka tuꞌik betana emo temaine.
\v 20 Akeꞌem aꞌ mammate. Inepo, karita bichapo weyeka,
aꞌ ponamta benasi ne maachi. Senuk intoko, nee jikkajaka,
intok nee kibachako, junamaꞌa ne tawane. Intok junamaꞌa,
itepo nau jiꞌibwane.
\v 21 Jumeꞌe, ka tuꞌik kobaꞌika, tuꞌisi yeu sajakame, yoꞌotaka
in anneeꞌpo, nemak bem jooneeꞌuta, ne ameu aꞌ naꞌikiane.
Inepoꞌik, ka tuꞌik kobaka, intok achai Liojtamak, yoꞌotaka
aꞌ katekaꞌpo in aamak yejtekaꞌa benasia.
\v 22 Juꞌu aꞌ mammatebaeme aꞌ jikkajine, Liojta tuꞌu
jiapsiwa betana, Krijtota sualemmeu teuwaawamta.
\c 4
\s Teekau, Liojta aꞌ yoꞌoriwaꞌu
\p
\v 1 Iniet chukula intok, teekata au etapolaata benak
ne bichak. Juꞌu intoko jiawai, sisiꞌiwooki kusiata benakai,
cheꞌa bat ket neu nokakaꞌu, inen neu jiiak:
\p ―Aꞌabo jaꞌamu, intok iniat chukula, jukaꞌ yeu weenemta
ne enchi aꞌ juꞌuneiyaatuane.
\p
\v 2 Sep su, Liojta tuꞌu jiapsi betana aniawaka, ne ama
aanen. Junaman teekau jikat intok, siꞌimem bepa yoꞌo
nesawemta ama aet yeyesaꞌuta ne bichak, junamaꞌa intok
senu ama katekan.
\v 3 Juꞌu intoko junamaꞌa yoꞌoweta yeyesaꞌpo katekame,
tetata jajpeꞌ teamta, ujyoisi aꞌ machiakaꞌa benasi ket
senu teta, kornaliinaꞌ teame, ujyoisi aꞌ machiakaꞌa benasi
machiakan. Intok aapoꞌik katekaꞌpo bepa, koꞌoi, siari
teta ejmeraallaꞌ teamta benaka weyekan.
\v 4 Junae ama yeyesaꞌu konila, juchi watem, senu taka
ama naikim, yoꞌowem ama jojoyeꞌum ne bichak. Junamaꞌa
yoꞌowem jojoyeꞌpo, senu taka ama naikika ama jookan, tossassaalaik
atteakai. Intok sawai tomie yaꞌarim, kobat amet joꞌarikai.
\v 5 Junae yoꞌo yaꞌarita katekaꞌa betana, beꞌoktiam benaka
yeu rejten. Jiawaim intok, yukuta jimmaꞌa benasia. Intok
junae bichapo, woo busani tachiriam beeten. Inimeꞌe, Liojta,
jukaꞌ aapoꞌik tuꞌu jiapsiwata, yumaꞌisi aet ayukaꞌuta
aꞌ teuwaa.
\v 6 Ketchia, junae yoꞌota katekaꞌabichapo, baweta benaka,
intok bikriota benak naj mamachik ne bichak.
\p Junae katekaꞌ nasuku intok ae konila, juꞌunakteim naikika
ama jiapsaka, jak chukti pupusekai ama aanen.
\v 7 Seenu, inimeꞌe aman jiapsame betana, ouseita benaekan.
Juꞌu intok iniat chaꞌaka weyeme, iniamak wooi, beseota
benaekan. Juꞌu intok iniat chaꞌaka weyeme, iniamak baji,
inim yoem pujbakamta benaekan. Juꞌu intoko, iniat chaꞌaka
weyeme, iniamak naikikai, bweꞌu juchajita neꞌeꞌebenaekan.
\v 8 Junameꞌe naikika ama jiapsame, weꞌepulaka, bubusanim
masakan. Intok jak chukti pupusekai. Junameꞌe intok,
tukaariat naa buusti ka yaateka: “Yoꞌorisi maachi, yoꞌorisi
maachi, yoꞌorisi maachi, Lios, juꞌu siꞌime utteꞌakame.
Juꞌu cheꞌa bat naataka weyeme, iꞌani, intok chukula jiba
yuu jiapsineeme”, ti jiakai.
\p
\v 9 Intok jumeꞌ junamaꞌa jiapsame, junuen Liojta junamaꞌa
yoꞌotaka katekamta, jukaꞌ jiba yuu jiapsamta yoꞌorisi
aꞌ eiyaaka intok aꞌ bai saeꞌebeleki,
\v 10 jumeꞌ senu taka ama naikika yoꞌowe, ae bichapo
tonommea jajapte. Intok jukaꞌ jiba yuu jiapsamta, aꞌ
yoꞌore. Intok sawai tomie yaꞌarim, kobat bem joꞌarim,
yoꞌo katekamta bichapo jojoa inen jiakai:
\q
\v 11 Achai, intok itom Lios, empo tua au lutuꞌuriak, em
yoꞌoriwaka em eiyaanaaꞌu.
\q Intok juꞌu em yoꞌo nesaweeꞌu.
\q Bweꞌituk empo siꞌimeta juꞌunaktek.
\q Intok em junen eaꞌ betchiꞌbo juꞌunakteitaka aayuk.
\c 5
\s Jumeꞌ jiꞌosia jiꞌojteim intok juꞌu Bwala
\p
\v 1 Junak intoko, junamaꞌa yoꞌoweta yeyesaꞌpo katekamta,
batatana aꞌ mampo, jiꞌosia jiꞌojteim, nat biijtim ne bichak.
Junaꞌa, nau bicha amet jiꞌojteitukan. Junameꞌe jiꞌosiam
intok, woo busanisi sumaꞌitukan.
\v 2 Intok senu ankelejta, ama butti utteꞌakamta ne bichak,
kusisi nokaka inen nattemaemta:
\p ―Jabesa tua au chaꞌaka, jumeꞌ jiꞌosia jiꞌojteim etapo
betchiꞌbo, intok ammea am sumaꞌim buttaa betchiꞌbo ―ti
jiakai.
\p
\v 3 Taa kia teekapo intok inim bwiapo intok kia betuk
juniꞌi, kaabe junameꞌe liprom am etaponeeme aanen. Intok
kia am bitneeme juniꞌi, kaabe ama yuuman.
\v 4 Ne intok, tuꞌisi ne bwaanan. Bweꞌituk tua kaabe
aanen, junameꞌe jiꞌojteim etaponeeme. Kia junameꞌe am
nokneeme intok am bitneeme juniꞌi, kaabe.
\v 5 Junak san, jumeꞌ junamaꞌa yoꞌotaka jokame betana,
senu inen neu jiiak:
\p ―Kat intoko bwaana. Bweꞌituk juꞌu Juraaꞌ teamtat yeu
sakaꞌariam betana, seenu, ouseipo taꞌeewame, ket, jukaꞌ
cheꞌa yoꞌo yaꞌari, Labiitukaꞌutat yeu simria, junaꞌa, junameꞌe
jiꞌosiam a am etapo betchiꞌbo, intok jumeꞌ woo busanisi
ammea sumaꞌim, chukta betchiꞌbo, yoꞌolataka yeu simlaa
―ti neu jiiak.
\p
\v 6 Junak intok san, jum, yoꞌota yeyesaꞌpo, intok jumeꞌ
naikika ama jiapsame intok jumeꞌ junae konila, yoꞌotaka
jokame nasuku, Bwalata ama weyekamta ne aꞌ bichak. Junaꞌa,
sejtul meꞌerita benaka juniꞌi. Woo busanim awakan. Intok
woo busanim pusekai. Jumeꞌ intok, puusim, achai Liojta,
jukaꞌ aapoꞌik tuꞌu jiapsiwata yumaꞌisi aet ayuka, aniat
yeu tajtia siꞌimekut naas aꞌ bittualaaꞌuta, aꞌ teuwaa.
\v 7 Junaꞌa Bwala, jum jojoowaaꞌpo, yoꞌotaka katekamtau
sikaa, batatana mampo jumeꞌ liprom aꞌ jipueꞌum nuꞌuka.
\v 8 Junakaꞌa, jumeꞌ liprom aꞌ nuꞌuko, jumeꞌ naikika jumeꞌ
junamaꞌa aneka jiapsame, intok jumeꞌ senu taka ama naikika
yoꞌotaka ama jokaꞌum, Bwalata bichapo tonommea japtek.
Junameꞌe yoꞌowe, weꞌepulaka, aapam jipuen intok kopaalim
ama totoꞌowaꞌum, sawai tomie yaꞌarim, tapunim weiyaan.
Inimeꞌe intok, Liojta yoemiam, au bicha bem emo nokriaꞌuta
teuwaan.
\v 9 Inimeꞌe, bemela bwiikim bwiikan:
\q Empo au lutuꞌuriak, jumeꞌ liprom em am nuꞌuka intok
jumeꞌ nat bepa, ammea am sumaꞌim, am chukta betchiꞌbo.
\q Bweꞌituk empo jiokot yaꞌatuk, intok empo junuen meꞌetuka
ojbota woꞌotakai.
\q Junae, achai Liojta itom yoemianeꞌ betchiꞌbo itom aꞌ
tuꞌu yaꞌariak.
\q Siꞌime yoemrata nasuku, ka nanau maisi machik nokame,
aniat yeu tajtia jiapsame betana itom jinneꞌulaꞌe.
\q
\v 10 Intok empo, achai Liojta betana, tekilta itom aꞌ yaꞌaneꞌ
betchiꞌbo,
\q Itom yoꞌo yaꞌari, intok yoemrata itom nokrianeꞌ betchiꞌbo.
\q Intok itepo, Jesukrijtotamak inim yoemratau yoꞌotune.
\p
\v 11 Sep, junamaꞌa ne naas bitchukai, juebena ankelesim
ne bichak intok bem jiawaita ne aꞌ jikkajak. Junamaꞌa
yoꞌota katekamta konila intok jumeꞌe, naikika jiapsaka,
jumeꞌ ama aneme intok jumeꞌ senu taka ama naiki yoꞌowem
konila jokame, nape konila. Junameꞌe ankelesim ka a naꞌikiatu
maisi juebenaekan.
\v 12 Intok junameꞌe, unnaa kusisi inen jiian:
\q Juꞌu Bwala, meꞌetukame, siꞌimek bepa eiyaawatchisi maachik,
\q Intok aꞌ nesauneeꞌu, suawa intok juꞌu siꞌimeku aꞌ yumaꞌaneeꞌu,
\q Intok juꞌu, siꞌimem betana aꞌ eiyaanaaꞌu,
\q Intok yoꞌoriwaka aꞌ eiyaanaaꞌu, aapoꞌiku lutuꞌuria,
\m ti jiian.
\p
\v 13 Intok ketchia, siꞌimeta jiapsaka, Liojta juꞌunaktei
ne jikkajak, teekapo jiapsame, inim bwiapo intok inia
bwiata betuk jiapsame, intok jumeꞌ bawepo intok junamaꞌa
siꞌimeta anemta, inen jiame ne jikkajak:
\q Juꞌu bem bwikrianaaꞌu, intok eiyaawaka bem yoꞌorinaaꞌu,
intok juꞌu bem nesauneeꞌu,
\q Juꞌu cheꞌa yoꞌotaka katekamtau intok juꞌu Bwalatau,
jiba yuu betchiꞌbo ameu lutuꞌuriatune,
\m ti jiakai.
\p
\v 14 Jumeꞌ naikika ama jiapsame:
\p ―Junuentune ―tim jiian.
\p Jumeꞌ intoko, senu taka ama naikikai yoꞌotaka ama jokame
tonommea japtek, intok jukaꞌ jiba yuu betchiꞌbo jiapsamta,
aꞌ yoꞌorek.
\c 6
\s Jumeꞌ woo busanika, jiꞌosiam, ammea sumaꞌim
\p
\v 1 Junak intoko, jukaꞌ Bwalata ne bichak, jiꞌosia jiꞌojteim
woo busanikai ammea am sumaꞌim, jukaꞌ wepuꞌulaik bat
aꞌ chuktako. Intok jumeꞌe, naikika ama jiapsame betana,
senuk kusisi, yukuta ruꞌuti jiaꞌa benasi:
\p ―Aꞌabo weye ―ti jiamta ne jikkajak.
\p
\v 2 Junak intok, kabaꞌita, tossaalaik ne bichak. Juꞌu
intok aet yes simeme, mampo, kuta wikoꞌita benak weiyaan.
Kobat intok, sawai tomie yaꞌaritaka aet yechaꞌawak. Junaꞌa
intok, junuen yoꞌolataka yeu siika. Intok junuen naa
buusti, juchi wateku yoꞌobaekai.
\p
\v 3 Jukaꞌ Bwalata, inia mak woika, juchi jukaꞌ senuk,
ammea am sumaꞌim aꞌ chuktako, juchi jukaꞌ seenuk junama
jiapsamta, inen jiamta ne jikkajak:
\p ―Aꞌabo weye ―ti jiamta.
\p
\v 4 Junak intok, juchi senu kabaꞌi sikiika ama yeu siika.
Juꞌu intoko aet yes simeme, inim yanti eewaka jiapsinaamta,
aꞌ luꞌuta betchiꞌbo, lutuꞌuriatuawak. Intok inim jiapsame
yoemrata, emo am suꞌaa tuaneꞌ betchiꞌbo. Intok tebe kuchiꞌim
intok makwak.
\p
\v 5 Jukaꞌ Bwalata, iniamak bajika, juchi jukaꞌ senuk,
ammea am sumaꞌim aꞌ chuktako, juchi jukaꞌ seenuk, junama
jiapsame betana inen jiamta ne jikkajak:
\p ―Aꞌabo weye ―ti jiamta.
\p Junak intok, juchi senu kabaꞌita, chukuik ne aꞌ bichak,
ama yeu sikamta. Juꞌu intoko aet yes simeme, sisiꞌiwookta,
betteawata ae juꞌuneiyaawaꞌuta, mampo weiyaan.
\v 6 Intok jumeꞌe, junamaꞌa jiapsaka, aneme nasukun luula,
senu jiawaita inen jiamta ne jikkajak:
\p ―Wepul kiilo tiikota, woj mamni tosai tomim, intok sebaarata,
baji kiilom, woj mamin tosai tomim bejeꞌewaine. Taa jukaꞌ
ochokok, intok kia jukaꞌ paꞌasi baꞌawata juniꞌi, tuꞌisi
aꞌ suuane ―ti jiian.
\p
\v 7 Jukaꞌ Bwalata, juchi jukaꞌ senuk, inia mak naikika,
ammea am sumaꞌim aꞌ chuktako, juchi jukaꞌ seenuk junama
junuen jiapsaka anemta, inen jiamta ne jikkajak:
\p ―Aꞌabo weye ―ti jiamta.
\p
\v 8 Junak intok, kabaꞌita sia sawaik ne aꞌ bichak. Juꞌu
intok aet yes simeme, Kokkowamta joame, ti teakan. Junaet
chaꞌaka intok, kokkoarim aneꞌu aꞌ teuwaame, weyen. Inimeꞌe,
siꞌime jumeꞌ inim jiapsame, naikisia naꞌikimteitaka, junameꞌe
betana wepuꞌulaik luꞌuta betchiꞌbo, utteꞌata mabetak.
Junuen nassuawakai, intok tebaae intok koꞌokoae, intok
jumeꞌ inim juyapo jujuꞌenaka, naikim wokekammea yee suꞌa
betchiꞌbo.
\p
\v 9 Jukaꞌ Bwalata, iniamak mamnika, juchi jukaꞌ senuk,
ammea am sumaꞌim, aꞌ chuktako, Liojta yoꞌori betchiꞌbo,
mesa katekamta betukun, jumeꞌe, Liojta betana nok lutuꞌuriata
bem lutuꞌuriateka bem aꞌ teuwaakaꞌ betchiꞌbo suꞌawakame
ne ama bichak.
\v 10 Intok inimeꞌe, kusisi nokaka inen jiiak:
\p ―Achai Lios, yoꞌo nesaweme, tuꞌik ausuꞌlik tuꞌureka intok
aꞌ joame. Intok em teuwaakaꞌuta, aꞌ chuchupame, jakwoosa
beja empo am yaꞌuraa bittuanee intok itom ameu jujutne,
jumeꞌ bwiau itom suꞌakame ―ti jiian.
\p
\v 11 Junak intok, junameꞌe, tajoꞌota tossaalaik atteatuawak.
Intok junameꞌe, juchi chuubaa bem yum joꞌeneꞌ betchiꞌbo
tejwaawakan. Jumeꞌ amemak werim, Krijtota betana tekilta
joame, am yumaꞌu tajtia. Jumeꞌ ket bempoꞌim benasi suꞌanaame.
\p
\v 12 Jukaꞌ Bwalata, iniamak busanika, juchi jukaꞌ senuk,
ammea am sumaꞌim aꞌ chuktako, bweꞌuusi bwiata au yoamta
ne bichak. Juꞌu taꞌa, tajoꞌota, chukuik benasi taawak.
Juꞌu intoko meecha, siꞌime, ojbota beansi taawak.
\v 13 Jumeꞌ intok teekau chokim, bwiau koꞌom yojtek.
Chuna ouwota, jekae utteꞌakamtae, siarim aꞌ taka yojtekaꞌa
benasia.
\v 14 Juꞌu teeka, bweꞌu jiꞌosiata, au nat biijtekaꞌa benasi,
kaitatuk. Jumeꞌ intoko, kawim siꞌime intok jum bawepo,
ili bwiam yeu jokame, omot jootek.
\v 15 Jumeꞌ intoko, inim bwiapo cheꞌa yoꞌotaka, jumeꞌ
reim teame, kau tesompo eusek. Intok junamaꞌa kaupo bwere
tetam nasuku. Jumeꞌe, siꞌimekut yoemratau yoꞌo jaꞌabwaimmak,
intok jumeꞌ totomekamemake, intok jumeꞌ watemmeu yoꞌo
yaꞌarim, jumeꞌ jitat juꞌuneaka utteꞌakame. Intok siꞌime
jumeꞌ tekokame, intok jumeꞌ ka tekokammak juniꞌi, junama
eusek.
\v 16 Junameꞌe intok, kawimmeu intok jumeꞌ bwere tetammeu
inen jiian:
\p ―Itot koꞌom watteka, intok itom essone, jukaꞌ cheꞌa yoꞌotaka
katekamta, ka itom aꞌ bitneꞌ betchiꞌbo, intok jukaꞌ Bwalata,
ama butti jiokot yee aꞌ tawaaneeꞌuta, ka itou aꞌ yumaꞌaneꞌ
betchiꞌbo.
\p
\v 17 Bweꞌituk tua suum watchisi machika juꞌu taewai
yumaꞌasuk. Liojta aet yee jiokot aꞌ tawaaneeꞌu. Junamaꞌa
intok kaabe, Liojta bejeꞌeka aꞌ yoꞌolataka ama yeu weene.
\c 7
\s Ijraꞌel yoemratat yeu katriam betana, jumeꞌ machilaakame
\p
\v 1 Iniat chukula intok, naiki ankelesim ne bichak, inim
bwiapo, jumeꞌ naiki jeekam tenneꞌe betana jaꞌabwekame.
Junameꞌe, naiki jumeꞌ jeeka junuen, bwiat intok kia bawet
juniꞌi, intok kia jita juyat juniꞌi, ka am tennineꞌ betchiꞌbo.
\v 2 Ket juchi senuk ankelejta ne aꞌ bichak, taꞌata yeu
weꞌe betana jikau weyemta. Intok junaꞌa, juꞌu Lios, jiba
yuu jiapsamta betana, yee juꞌuneiyaanaꞌ betchiꞌbo, machilaata
weiyaan. Iniꞌi ankeles intok, tuꞌisi utteꞌaka amet chaaek,
naikika jumeꞌ ankelesim, bwiapo jiapsame intok bawepo
jiapsame suꞌa betchiꞌbo utteꞌata mabetlammeu, inen jiakai:
\p
\v 3 ―Ka ameu suuane, jumeꞌ bwiapo jiapsammewi intok kia
jumeꞌ bawepo jiapsammeu juniꞌi, intok kia jumeꞌ juyammeu
juniꞌi. Jumeꞌe, achai Liojta betana tekilta joame, machilaata
bem taꞌaanaaꞌuta, koba mejeꞌeku kee itom amet aꞌ yaako.
\p
\v 4 Ne intok, junuen jumeꞌ bem koba mejeꞌeku machilaatuawakame,
bem jaikiakaꞌuta ne aꞌ jikkajak. Woo busan taka miilim
ama naiki miil. Inimeꞌe junuen, woj mamni ama woika, jumeꞌ
Ijraꞌeltukaꞌuta yoemiam betana yeu katriam, weꞌepulaim
beꞌekatana, bem koba mejeꞌeku machilaatuawakame.
\v 5 Juꞌu Juraa tukaꞌutat yeu katriam betana, woj mamni
ama wooi miil, jumeꞌ koba mejeꞌeku machilaatuawakame.
Juꞌu Ruben tukaꞌutat yeu katriam betana intok woj mamni
ama wooi miil. Juꞌu Gat tukaꞌutat yeu katriam betana
intok woj mamni ama wooi miil.
\v 6 Juꞌu Aser tukaꞌutat yeu katriam betana intok woj
mamni ama wooi miil. Juꞌu Naptali tukaꞌutat yeu katriam
betana intok woj mamni ama wooi miil. Juꞌu Manasej tukaꞌutat
yeu katriam betana intok, woj mamni ama wooi miil.
\v 7 Juꞌu Simeon tukaꞌutat yeu katriam betana intok,
woj mamni ama wooi miil. Juꞌu Lebii tukaꞌutat yeu katriam
betana intok, woj mamni ama wooi miil. Juꞌu Isakar tukaꞌutat
yeu katriam betana intok, woj mamni ama wooi miil.
\v 8 Juꞌu Sabulon tukaꞌutat yeu katriam betana intok,
woj mamni ama wooi miil. Juꞌu Jose tukaꞌutat yeu katriam
betana intok, woj mamni ama wooi miil. Juꞌu Benjamin
tukaꞌutat yeu katriam betana intok, woj mamni ama wooi
miil.
\s Juꞌu buꞌuura, tosaik ausuꞌlik atteakame
\p
\v 9 Iniat chukula ne, unnaa juebena yoemrata ne bichak.
Siꞌime ka nanau machika yoemrata intok ka nanau maisi
machik nokame. Junameꞌe, juꞌu cheꞌa siꞌimem bepa yoꞌota
katekaꞌpo, intok juꞌu Bwalata bichapo jaꞌabwekame. Unnaa
juebenaka, kaabe a am naꞌikian. Intok junameꞌe ket, tojsassaalaik
atteakan tako sawata intok ket nuk jaꞌabwekai.
\v 10 Siꞌime kusisi inen jiian:
\q Juꞌu yee jinneꞌuwame, itom achai Lios,
\q Cheꞌa yoꞌotaka katekamta betana,
\q Intok juꞌu Bwalata betana weye,
\m ti jiakai.
\p
\v 11 Jumeꞌ ankelesim intok, siꞌime, juꞌu cheꞌa yoꞌota
katekaꞌakonila jaꞌabwekan. Intok ket, yoꞌotaka ama jokame
konila, intok ket, naikika, jumeꞌ ama jiapsaka aneme konila.
Inimeꞌe intok, juꞌu cheꞌa yoꞌota yeyesaꞌabichapo, tonommea
jaꞌabweka, bwiau tajti koꞌom chaꞌaka, Liojta yoꞌoren,
\v 12 inen jiakai:
\q Inientune.
\q Aꞌ yoꞌoriwaka aꞌ bwikrianaaꞌu, suawata aꞌ jipueꞌu,
\q Intok itom aꞌ bai saeꞌu alleaka au bicha teuwaanaaꞌu,
\q Intok aꞌ eiyaanaaꞌu, cheꞌa aꞌ yoꞌo nesaweka utteꞌata
aet ayukaꞌu,
\q Junaꞌa, itom achai Liojtau lutuꞌuriatune, jiba yuu betchiꞌbo.
\q Tua inientune.
\p
\v 13 Junak intok, yoꞌotaka jumeꞌ ama jokame betana, senu
neu nattemaek:
\p ―Jabemsa inimeꞌe, tojsassaalaik tajoꞌorekame, intok jakuꞌubosa
yajilam ―ti jiakai.
\p
\v 14 Ne intok inen au jiiak:
\p ―Achai, inimmet empo juꞌunea, nee tejwaane.
\p Aapo intok, inen neu jiiak:
\p ―Inimeꞌe junameꞌem, wameꞌe, unnaa jiokot yee bittuawakaꞌpo
yeu sajakame. Jumeꞌe, Jesukrijtota, Bwalapo taꞌeewamta,
ame betchiꞌbo kuuset aꞌ ojbowata woꞌotekamta, aꞌ sualeka
junae Liojtamak emo tuꞌuteka intok ka tuꞌik kaita yaꞌari
benasi bem mabetrimtuneeꞌuta aꞌ jajamekame.
\v 15 Junae betchiꞌbo, achai Liojta yoꞌotaka aꞌ katekaꞌabichapo
aane. Tukaariat naa buustia junamaꞌa teꞌopopo bem joo
iꞌawaꞌuta joakai. Juꞌu intok, yoꞌotaka ama katekame, aapo,
siꞌimeku amemaktuka amet jekkaneeme tu benane.
\v 16 Kaibu intok tebae intok kia baꞌae juniꞌi, jiokot
emo bitne. Intok juꞌu taꞌa ka jiokot am joone. Intok
kia tatariata juniꞌi, ka aꞌ ineꞌene.
\v 17 Bweꞌituk juꞌu Bwala, junamaꞌa cheꞌa yoꞌotaka katekamta
mak aneme, aapo, bwalam suuamta benasi amemak annee. Intok
jiba yuu jiapsi betchiꞌbo, baꞌam am jiꞌituane. Juꞌu intok
achai Lios, jakwoo juniꞌi ka intok bem jiokot eeneꞌ betchiꞌbo
amemaktune.
\c 8
\s Woo busanika juꞌu machilaa, intok juꞌu sawai tomie yaꞌari kopaalim aꞌ tattaawaaꞌum
\p
\v 1 Jukaꞌ bwalata juchi jukaꞌ senuk, iniamak woo busanik,
ammea am sumaꞌim, aꞌ chuktako, junaman teekau, chuubaa,
kopala taawak.
\v 2 Junama lautipo jumeꞌ woo busan ankelesim, jiba Liojta
bichapo jaꞌabwekame ne bichak. Junameꞌe, woo busan sisiꞌiwok
kusiam makwak.
\v 3 Chukula intok ket, juchi senu ankeles ama yepsak,
sawai tomie yaꞌarita, kopaalim ama tattaawaꞌuta weiyaakai.
Intok Liojta ama yoꞌori betchiꞌbo, mesata bichapo kiktek.
Junaꞌa intok, kopaalim benam juebenam makwak. Junuen
siꞌime jumeꞌ Liojta yoemiam, aapoꞌiku bicha bem teuwaaꞌu
mak nau am kuutaꞌ betchiꞌbo. Intok junamaꞌa, cheꞌa yoꞌota
yeyesaꞌabichapo, mesaa, sawai tomie yaꞌarita, Liojta ama
yoꞌoriwaꞌpo am joak.
\v 4 Juꞌu intok, kopaal bwichia, junae ankelejta mam betana,
achai Liojta katekaꞌu jikau yuumak. Jumeꞌ Liojta yoemiam,
aapoꞌiku bicha bem yee nokriaꞌu mak weyekai.
\v 5 Junak intok juꞌu ankeles, jukaꞌa, kopaalim ama tattaawaꞌuta
nuꞌuka, junamaꞌa mesapo, oubammea aꞌ tapuniak. Intok junamaꞌa,
bwiapo koꞌom aꞌ jimmaak. Junak intok unnaa kusisi jiiak.
Intok yukuta ruꞌuti jiaꞌa benasia, intok yuku beoktia.
Juꞌu intoko bwia au yoyoak.
\s Jumeꞌ sisiꞌiwook kusiam
\p
\v 6 Junak intok, jumeꞌ ankelesim, woo busanika, woo busanim
sisiꞌiwook kusiam, am jiutua betchiꞌbo ama yeu japtek.
\p
\v 7 Senuk, bat junameꞌe ankelesim betana, aꞌ kusiawata
jiutuak. Junak intok tejam bwiau yojtek. Intok ketchia
juꞌu taji, ojbo kuraika bwiau koꞌom yojtituawak. Ka tua,
taa batte nasuk aman, jum bwiapo juꞌu ayukame beetek.
Junae beekika juꞌu juya intok juꞌu basso siarika beetek
ketchia.
\p
\v 8 Iniamak woika, juchi juꞌu senu ankeles, aꞌ kusiawata
jiutuak. Junak intok, senu bweꞌu kauta benakai, beeteka
baweu koꞌom jimmaatuk. Juꞌu baawe intok, ka tua, taa batte
nasuk aman, ojbota benasi taawak.
\v 9 Intok ka tua, batte nasuk aman, siꞌime juꞌu bawepo
jiapsame kokkok. Jumeꞌ intok ama bwere kari bebenam
kanoam, ket jiba junae beekika ama mojaktek.
\p
\v 10 Iniamak bajika, juchi juꞌu senu ankeles aꞌ kusiawata
jiutuak. Junak intok, choki, unnaa bweꞌuuka, teeka betana
koꞌom wechek. Tachiriata beeteꞌe benasia. Ka tua, taa
batte nasuk aman batwem intok jumeꞌ senneꞌekam amet
koꞌom wecheka.
\v 11 Junaꞌa choki intok, Ajenjoꞌ tean aꞌ chibuekaꞌ betchiꞌbo.
Ka tua, taa batte nasuk aman, jumeꞌ baꞌam juꞌu chokita
betchiꞌbo chibusi aayuk. Juebenaka intok junameꞌe baꞌammea
kokkok. Bweꞌituk junameꞌe chibusi ayukai.
\p
\v 12 Iniamak naikika, juchi juꞌu senu ankeles aꞌ kusiawata
jiutuak. Junak intok, ka tua taa batte nasuk aman, juꞌu
taꞌa, juꞌu meecha intok jumeꞌ chokim nasontuk. Junuen
san, junameꞌe siꞌime, ka machisi taawak. Intok junuen,
ka tua taa batte nasuk aman, junameꞌe taewaimmet intok
tukaariammet, kaita tachiriatuk.
\p
\v 13 Intok ket sepia, bweꞌu juchajita benaka, senu ankelejta
ne aꞌ bichak intok aꞌ jikkajak, mekka betana, teekapo
nasuk luula neꞌeeka. Intok tuꞌisi kusisi chaaemta:
\p ―Tua jiokot ameu yeu weene, jumeꞌ bwiau jiapsammewi.
Juchi wate jumeꞌ baji ankelesim, kusiam bem jiutuaneeꞌum
betchiꞌbo ―ti jiakai.
\c 9
\p
\v 1 Iniamak mamnika, juchi juꞌu senu ankeles aꞌ kusiawata
jiutuak. Ne intok, teeka betana, chokita bwiau koꞌom wechiata
ne aꞌ bichak. Junaꞌa choki intok, ankelejtakai, mekka
koꞌom wojoꞌoriata aꞌ etapo betchiꞌbo, lutuꞌuriakai.
\v 2 Junaꞌa sep su, junakaꞌa koꞌom wojoꞌoriata, aꞌ etapok.
Bweꞌu bwichia intok junama yeu kiktek. Unnaa bweꞌuuka,
tajipo jitaa tattaawaꞌabenaku. Juꞌu bwichia intok, junamaꞌa
wojoꞌoriapo yeu sikame, taꞌata ka machisi tawaak. Intok
jukaꞌ jekata juniꞌi.
\v 3 Junamaꞌa bwichiapo intok, bwere waka woꞌochim benaka
ama yeu sajak. Inim bwiapo siꞌimekut neꞌekai. Jumeꞌ
waka woꞌochim intok ket, utteꞌakan, inim, jumeꞌ machilim
benasia.
\v 4 Junameꞌe, bwiapo juyata oo basota siulata intok
kia jitaa ouwota juniꞌi, intok kia jumeꞌ bwere juyam,
ka bem nasonteneꞌ betchiꞌbo tejwaatuk. Alla jukaꞌ yoemrata,
koba mejeꞌeku, achai Liojta betana machilaata ka aꞌ jipueme
jiba tejwaawak.
\v 5 Taa junameꞌe, jukaꞌ yoemrata ka bem aꞌ suꞌaneꞌ betchiꞌbo
au bittuawak. Ala, mamni mechammeu tajtia, koꞌokosi bem
am jooneꞌ betchiꞌbo jiba. Junameꞌe intok, yee jujjako,
machilta senuk aꞌ jujjakaꞌa benasia koꞌokoekan.
\v 6 Junameꞌe taewaimmetchi, juꞌu yoemra kokopeene. Taa
ka kokkone. Intok junuen kokopeaka juniꞌi, kokkowame
kaita tune.
\p
\v 7 Junameꞌe woꞌochim, kabaꞌim nassuawaꞌu bicha kateme
bebenaekan. Bem kobammet, sawai tomie yaꞌarita bebenam
amet joꞌariakan. Intok yoem pujbakame benaekan.
\v 8 Jamutta tettebem aꞌ chonekaꞌa benasia, chonekan.
Intok jumeꞌe, bem tamim, ousei tamim bebenaekan.
\v 9 Junameꞌe, siꞌime bem takaa, sisiꞌiwookie bem emo
ania benasia machiakan. Juꞌu intok, junameꞌe masam jiawai,
juebena kabaꞌi kaarom, nassuawaꞌu bicha tenneꞌe benasi
jiian.
\v 10 Jumeꞌ bem bwasiam, machil bwasia benaekan. Junaen
wichakai. Intok junameꞌe, mamni mechammeu tajtia yoemrata
bem koꞌokosi jooneꞌ betchiꞌbo, bem bwasiampo utteꞌakan.
\v 11 Junameꞌe woꞌochim, ameu yoꞌota jipuen, bwiapo koꞌom
wojoꞌoriapo ankeles. Iniꞌi ankeles, ebreo nokpo Abbaron
tean. Rieeko nokpo intok, Apolyon tea, juꞌu jita luꞌu
luꞌutame, ti teuwaa.
\p
\v 12 Wepulaka jaibu simsuk juꞌu ama butti jiokot emo
bitwame. Taa ketuni juchi woika beꞌee.
\p
\v 13 Iniamak busanika, juchi juꞌu senu ankeles, aꞌ kusiawata
jiutuak. Junak intok jiawaita ne jikkajak, achai Liojta
bichapo, mesa sawai tomie yaꞌarita betana yeu weyemta.
\v 14 Junaꞌa jiawai intok, juchi inia mak busanika, juꞌu
ankelejtau, juꞌu sisiꞌiwook kusiata jipuemtawi inen jiiak:
\p ―Naikika, jumeꞌ ankelesim suꞌu tojine, jumeꞌe, bweꞌu batwee
Eupraatej teaꞌanaapo sumaꞌim ―ti jiiak.
\p
\v 15 Junuen jumeꞌ naiki ankelesim suꞌu tojituk, ka tua,
taa batte nasuk aman, yoemrata aꞌ suꞌa betchiꞌbo. Bweꞌituk
inimeꞌe, jiba junama lauti betchiꞌbo intok junae taewaita
intok junae mechata intok junae wasuktiata betchiꞌbo
yeu puꞌarimtukan.
\v 16 Junameꞌe betana jumeꞌ sontaom kakabaꞌekame, bem
jaikiakaꞌuta ne aꞌ jikkajak. Junameꞌe intok, wooi sien
miiyon tukan.
\p
\v 17 Junuen san ne, junameꞌe kabaꞌim am bittuawak tenkupo
benasia. Jumeꞌ intok amet kateme, tawit, sisiꞌiwookie
emo pattalamtukan, sikiisia, teweesia intok sawaisi yokaꞌimmea.
Jumeꞌ intoko bem kabaꞌim, ouseim benam kokobakan. Intok
inimeꞌe, bem tenpo, taji, bwichia intok asupreta beeteꞌe
benasi yeu weaman.
\v 18 Ka tua, taa batte nasuk aman, juꞌu yoemra iniae
baji weemtae kokkok. Kabaꞌim betana tenpo yeu weyemtae.
Tajie, bwichiae, intok asupretae.
\v 19 Bweꞌituk junameꞌe kabaꞌim, tenpo intok bwasiapo
junuen utteꞌakan. Bweꞌituk junameꞌe, bem bwasiam, bakotchim
bebenaekan, kokobakai. Intok junammea yee koꞌokosi jooan.
\p
\v 20 Taa juꞌu wate yoemra, tawakame, jumeꞌ inimeꞌe bajika
jiokot yee joammea ka kokokame, ka tuꞌik bem boꞌo jooriaꞌu
betana, ka aꞌ suꞌu tojak. Intok kia jumeꞌ ka tuꞌi jiapsim
juniꞌi, jiba am yoꞌorekai. Intok kia jumeꞌ ka lutuꞌuriapo
liosim yoꞌoriwame, sawai tomie oo tosai tomie oo sisiꞌiwookie,
intok tetae intok kia kutae yaꞌarim, ka bichame intok
ka jikkajame intok kia ka rejteme juniꞌi, jiba am yoꞌorekai.
\v 21 Intok kia bem yee suꞌaneeꞌu betana juniꞌi, ka emo
temaek. Intok kia yee sibowamta betana, intok jaamuchim,
ka am jujubeka, bem amemak emo tuꞌureeꞌuta, intok kia
jukaꞌ bem jita eꞌetbwaꞌu betana juniꞌi, ka aꞌ suꞌu tojak.
\c 10
\s Juꞌu ankel, jumeꞌ ili liprom jipueme
\p
\v 1 Junak intoko, juchi senu ankelejta, tuꞌisi utteꞌakamta,
teeka betana, namupo koꞌom weyemta ne bichak. Intok aꞌ
kobawa bepa, teweika, sawaika intok sikiika, koꞌoi, ae bepa
jipuen. Aꞌ pujbawa intok, taꞌata benasi tachiriakan.
Jumeꞌ intok, aꞌ wokiwam, taji buaktiam jaꞌabwekaꞌa benaekan.
\v 2 Aꞌ mampo, ili jiꞌosiam etapoim jipuen. Intok batatana
aꞌ wokimmea, bawepo weyekan. Mikoꞌotana intok bwiapo
wokekan.
\v 3 Junak intok, utteꞌaka chaaek, ouseita aꞌ jijiaꞌa
benasia. Junakaꞌa intoko junuen aꞌ jijiako, woo busanika
yuku jimaarim benaka, bem teuwaari jikkajituk.
\v 4 Woo busanika junameꞌe jiusuko, junakaꞌa bem teuwaaꞌuta
ne aꞌ jiꞌojtebaen, taa teeka betana jiawaita inen neu
jiamta ne aꞌ jikkajak:
\p ―Junameꞌe woo busanika junuen kusisi jiakame teuwaakaꞌuta,
empola aꞌ juꞌuneiyaane. Intok ka aꞌ jiꞌojtene ―ti jiiak.
\p
\v 5 Chukula ket juꞌu ankeles, baweta bepa intok bwiata
bepa weyeka, in bichakaꞌu, batatana teekau jikau mamtek.
\v 6 Intok jukaꞌ jiba yuu jiapsamta, jukaꞌ teekata, bwiata
intok jukaꞌ baweta, intok siꞌimeta wakaꞌa junamaꞌa ayukamta
juꞌunaktemta, aꞌ teuwaaka aꞌ lutuꞌuriatekai:
\p ―Kaita intoko boꞌo bitwame tune ―ti jiakai―.
\v 7 Bweꞌituk jukaꞌ taewaita yumako, junak iniamak woo
busanika, jukaꞌ ankelejta sisiꞌiwook kusiata aꞌ jiutua
taiteko, junak jukaꞌ achai Liojta, aapoꞌik jiba juꞌuneiyaaka
yeu weenemta, jaibu aꞌ yumaꞌasukaꞌuta juꞌuneiyaanaa.
Aapoꞌik jiba inia betana jaibu jumeꞌ aapoꞌik yeu puꞌarim
chukula yeu weenemta teteuwaame, bempoꞌim aꞌ juꞌuneiyaatuariakaꞌa
benasia.
\p
\v 8 Juꞌu jiawai, cheꞌa bat in jikkajakaꞌu, juꞌu teeka
betana weyeme, juchi weeꞌpo neu nokaka, intok inen neu
jiiak:
\p ―Noolia, juꞌu ankeles, baweta bepa, intok bwiapo weyekamtau
sikaa, intok jumeꞌ ili jiꞌosiam etapoim, mampo aꞌ jipueꞌum,
am nuꞌune ―ti neu jiakai.
\p
\v 9 Nejpo intoko junae ankelejtau ne siika, jumeꞌ ili
jiꞌosia jiꞌojteim intok ne au aꞌawak. Junak intok aapo
inen neu jiiak:
\p ―Jiba, am nuꞌee, am bwaꞌane ―ti neu jiaka―, em tenpo mumu
baꞌawam benasi kakane, taa am bwaꞌasuko, chukula chibusi
aune ―ti jiiak.
\p
\v 10 Junak intoko, jumeꞌ jiꞌosiam, juꞌu ankelejta mampo
ne am nuꞌuka. Junameꞌe intok ne am bwaꞌaka. Intok in
tenpo kakaekan. Taa chukula nee am bwaꞌasuko, chibusi
aayuk.
\v 11 Sep ket inen neu jiuwak:
\p ―Utteꞌa, juchi em aꞌ teuwaaneꞌpo jukaꞌ achai Liojta
siꞌime, ka nanau machi yoemrata betana intok ka nanau
maisi machik nokame betana intok jumeꞌ cheꞌa yoꞌo yaꞌarim
betana, jukaꞌ aꞌ teuwaaꞌuta.
\c 11
\s Jumeꞌe, woika, Liojta betana bittuarim
\p
\v 1 Junak intok, bakata benak nee makwak, jitaa ae tammachiawaꞌu
benak. Intok inen neu jiuwaak:
\p ―Kikteka, sikaa, intok achai Liojta teꞌopota aꞌ jai beetchiakaꞌuta
intok jukaꞌa, Liojta ama yoꞌoriwaꞌuta, mesata, jai beetchiakaꞌuta
aꞌ juꞌuneiyaane. Intok jumeꞌ junamaꞌa aneka, Liojta yoꞌoreme
am naꞌikiane.
\v 2 Taa junamaꞌa teꞌopopo paꞌaria tana tebata mayoata,
ka aꞌ tamachiane. Bweꞌituk junaꞌa, jumeꞌ ka inim jomemmeu
suꞌu tojiri. Junameꞌesan, woi taka intok ama wooi mechammeu
tajtia, Liojta bweꞌu joꞌaraꞌ teaꞌpo, bempo, bem eaꞌuta
joaka ama anne.
\v 3 Inepo intoko ―ti jiia juꞌu achai Lios―, wooim jumeꞌ
nee betana nokneeme, ne aman bittuane. Junameꞌe intok,
miil intok ama wooi siento, intok ama baji taka taewaimmeu
tajtia ama annee, chuchukuik atteakai.
\p
\v 4 Inimeꞌe woika Liojta betana yeteu nokneeme, junameꞌem,
wameꞌe wooi oliibo ouwom teuwaaꞌu, intok jumeꞌ woika
kanteelam ama jajaꞌabwawaꞌum, achai Lios, bwiata juꞌunaktekamta
bichapo jaꞌabwaim.
\v 5 Senuk, inimmeu aꞌ suabaao, bempo, tenpo tajita yeu
rejtitua. Jumeꞌ am bejeꞌeka aneme, tokti am tattaa. Intok
junuen mukne, jabetaka juniꞌi, am bejeꞌeka aneme.
\v 6 Inimeꞌe, Liojta betana kateme, junuen utteꞌak, jukaꞌ
teekata, bem aꞌ chaꞌatutuaka, junuen ka yukneꞌ betchiꞌbo,
jumeꞌ taewaimmet, achai Liojta betana bem yeteu noksuꞌutajtia.
Intok ket utteꞌak, jumeꞌ baꞌam, ojbota benasi bem am yaꞌaneꞌ
betchiꞌbo. Intok jumeꞌ inim bwiapo jiapsame, jiokot bem
emo am bittuaneꞌ betchiꞌbo, jitae juniꞌi koꞌokoata bem
joaꞌue, jaikisi bem aubaeꞌebeekisia.
\v 7 Taa junameꞌe, jukaꞌ bem tekilta am chupaꞌasuko, juꞌu
bwia wojoꞌoku, mekka koꞌom betana, majjaiwatchika jita
ama yeu weeneeme, amemak nassuane, am kobaka intok am
suꞌane.
\v 8 Junameꞌe, jumeꞌ bem takaam, jum bweꞌu joꞌarapo naj
katwaꞌapo suꞌu tojinaa. Jukaꞌa, itom achai, kuuset aꞌ
poponwakaꞌpo. Iniꞌi inikaꞌa teuwaabaawaꞌpo, bweꞌu joꞌara
Sorooma, intok ket bwiaraa Ejiptoꞌ tea.
\v 9 Intok baji taewaim intok ama nasuk taewaita yumaꞌu
tajtia, siꞌimekut betana, juꞌu ka nanau machi yoemra, intok
taꞌabwik nokame, junameꞌe suꞌawakame, bem takaam ama bitne.
Intok junameꞌe, kaabem am maꞌaa iꞌane.
\v 10 Inim bwiapo jumeꞌ jiapsame, alleene, junameꞌe kokkokaꞌ
betchiꞌbo. Intok junuen, tua alleakai, bempo naas jita
emo mimikne. Bweꞌituk junameꞌe wooi oꞌowim, achai Liojta
betana yeteu nokaꞌum, ame betchiꞌbo jiokot emo bitwame
tukan.
\v 11 Taa chukula, jumeꞌ baji taewaim intok ama nasuk
taewaita simsuko, juꞌu Lios juchi am jiapsituak. Junameꞌe
intok juchi jootek. Intok siꞌime jumeꞌ am bichakame,
tuꞌisi womtek.
\v 12 Sep ketchia, junameꞌe woika, Liojta betana yeteu
nokame, teeka betana jiawaita utteꞌakamta jikkajak:
\p ―Aꞌabo em jikau jaꞌamu ―ti ameu jiamta.
\p Junameꞌe intok, namupo teekau sajak. Jumeꞌ intok am
bejeꞌeka aneme am bichak.
\v 13 Junamaꞌa lautipo, bwia tuꞌisi au yoyoak. Intok
rebbeika, junaꞌa bweꞌu joꞌaraa, koꞌom wechek. Intok woo
busan miiltaka, junakaꞌa au yoyoaꞌpo kokkok. Intoko juꞌu
wate yoemra, ka kokokame, ama butti majjaekai, Liojta, teekau
katekamta yoꞌorek.
\p
\v 14 Jaibu woika, jumeꞌ amet tua jiokot emo bitwame
sakaꞌasuk. Taa ket, inia mak bajika, jiokot emo bitnaame
lauti yumaꞌane.
\s Woo busanika juꞌu sisiꞌiwook kusia
\p
\v 15 Iniamak woo busanika, juchi juꞌu senu ankeles, aꞌ
kusiawata jiutuak. Junak intok, teekau jiawaim, tua utteꞌaka
jikkajituk:
\q Inim bwiapo, siꞌime jumeꞌ yaꞌuraam, itom achai Liojtau
intok juꞌu Krijto, aꞌ yoemiabeu emo suꞌu tojila.
\q Aapo intok, jiba yuu wasuktiammeu tajtia nesaune,
\m ti jiame.
\m
\v 16 Junak intoko, jumeꞌ senu taka ama naikika, yoꞌotaka,
achai Liojta bichapo ket jum yoꞌowem jojoyeꞌpo jokame,
tonommea jaꞌabweka, bwiau tajtia koꞌom pujbaka intok
junuen Liojta yoꞌorekai,
\v 17 inen jiakai:
\q Enchi te bai sae, achai Lios, siꞌime utteꞌakame.
\q Empo iꞌan jiapsame, bat naatakai juniꞌi.
\q Bweꞌituk empo aꞌ mabetla, siꞌimem bepa em yoꞌotuneeꞌuta.
\q Intok empo jaibu nesawe,
\m ti jiakai.
\q
\v 18 Jumeꞌ ka nanau machika yoemram, ka alleaka, omtemme.
\q Taa yumaꞌasuk juꞌu taewai, em aet yee jiokot emo bittuaneeꞌu.
\q Intok ketchia juꞌu taewai, jumeꞌ kokkoarim em am yaꞌuraa
bittuaneeꞌu.
\q Intok empo, jumeꞌ ee betana yeu puꞌarim, yeteu noktuawame,
intok jumeꞌ wepulsi eu emo suꞌu tojilame,
\q Intok jumeꞌe, enchi yoꞌori taꞌaaka jiapsame, empo, jukaꞌ
ameu tuꞌik am bittuane.
\q Kia jumeꞌ cheꞌa eiyaawame oo kia jumeꞌ ka eiyaawame
juniꞌi.
\q Intok ket, inim bwiapo, jumeꞌ siꞌimeta luꞌutame, em am
luꞌutaneeꞌu.
\p
\v 19 Junak intok, teekau, juꞌu achai Liojta teꞌopo etapowak.
Junamaꞌa wajiwa intok, aapoꞌik bemela lutuꞌuria aꞌ yaꞌariwa,
juꞌu kaaja, sawai tomie yaꞌari aꞌ teuwaame, ama bittuk.
Yuku beꞌoktiam intok yeu machiak. Intok jiawaim, kusisi
yuku ruꞌuti jiaꞌa benasi jiakai. Bwia intok tuꞌisi au
yooan. Intok tua utteꞌaka tejam yukuk.
\c 12
\s Juꞌu jamut intok juꞌu woo busanim kobakame
\p
\v 1 Junak intok, teekau, machilaa yeu machiak. Senu jamut,
taꞌata benasi beojkok tajoꞌorekai. Juꞌu intok meecha,
aꞌ wokim betuk katekan. Intok woj mamni ama wooi chokekamta
sawai tomie yaꞌarita, kobat aet yechaꞌikai.
\v 2 Iniꞌi jamut abe yeu kikten. Intok wantiriammea
tuꞌisi chaaen. Bweꞌituk baꞌasoabaekai, jiokot au bichan.
\v 3 Junamaꞌa lauti, juchi senu machilaa, teekapo yeu
machiak. Jitaa jiapsaka, unnaa bweꞌuuka, sikiika, woo busanim
kobakai. Intok woj mamnim awakai. Intok weꞌepul aꞌ kobammet,
jitae yaꞌarim aet joꞌariakan.
\v 4 Iniꞌi, aꞌ bwasiae, jumeꞌ chokim teekapo aukame, ka
tua, taa batte nasuk aman am biaktaka, bwiau koꞌom am
beebak. Junak intok iniꞌi, woo busanim kobakame, juꞌu
jamut, yeu kiktebaemta bichapo kiktek, junae uusi, yeu
aꞌ tomteko, sep aꞌ bwaꞌabaekai.
\v 5 Juꞌu jamut intok, oꞌouta asoak. Iniꞌi san, sisiꞌiwook
baarata jipueka, cheꞌa bepa yoꞌo yaꞌuraataka, siꞌime ka
nanau machi yoemratau yoꞌotuneekai. Sep intok junaꞌa,
jukaꞌ aꞌ asoawata uꞌaawak. Intok iniꞌi, achai Liojta
aapoꞌik cheꞌa yoꞌotaka aꞌ katekaꞌu tojituk.
\v 6 Juꞌu jamut intok, bamseka, bweka paꞌariau bicha yeu
siika, jumun, achai Liojta jaibu aꞌ yebij iꞌaꞌawi. Junuen
junamaꞌa aꞌ jiꞌibwatuanaꞌ betchiꞌbo, senu miil ama woi
siento intok ama baji taka taewaimmeu tajtia.
\p
\v 7 Chukula intok ket, teekapo nassuawame ama yeu siika.
Junamaꞌa juꞌu ankelesimmeu yoꞌowe, Mikel teame, intok
jumeꞌ aamak eame ankelesim, jukaꞌ sikiika woo busanim
kobakamta bejeꞌeka nassuak. Juꞌu intok, woo busanim kobakame
intok jumeꞌ aamak eame ankelesim, ket nassuak.
\v 8 Taa inimeꞌe ka yoꞌoka yeu sajak. Teekau intok, kaita
intok lutuꞌuria ame betchiꞌbo aukan.
\v 9 Junuen san beja, junaꞌa sikiika, woo busanim kobakame,
junamaꞌa yeu bepwak. Tua cheꞌa bat naatakai waꞌa au
bakot yaakame, juꞌu yee bai tattaꞌaame, intok bebejeꞌeri,
juꞌu ka tuꞌikut yee nanaꞌatejome. Iniꞌi intok jumeꞌ
aamak eame ket bwiau koꞌom woꞌotawak.
\p
\v 10 Junak intok, teekau, jiawaita utteꞌaka inen jiamta
ne jikkajak:
\p ―Juꞌu taewai aet yee jinneꞌunaaꞌu jaibu yumaꞌasuk, aapoꞌik
betana utteꞌawa intok jukaꞌ itom Lios, yoꞌotaka aꞌ nesauneo.
Intok aꞌ yoemiawata, Krijtota, cheꞌa aꞌ nesauneo. Bweꞌituk
juꞌu, jumeꞌ Krijtopo itomak werim, ka tuꞌikut am nanaꞌatejome
yeu beepri. Juꞌu, taewait intok tukaariat naa buustia
itom achai Liojtau am nanaꞌatejooꞌu.
\v 11 Jumeꞌe, Krijtopo ito mak werim aꞌ kobaꞌi, Bwalata
meꞌewakamta bem sualekaꞌ betchiꞌbo. Intok achai Liojta
betana jukaꞌ nok lutuꞌriata bem aꞌ lutuꞌuria yaꞌari
betchiꞌbo. Bweꞌituk suꞌanaaka juniꞌi, ka emo beutiak.
\v 12 Junuen san emeꞌe teekau jiapsame, tua alleene.
Taa tua jiokot machine, jumeꞌ inim bwiapo intok jumeꞌ
bawepo jiapsame betchiꞌbo. Bweꞌituk juꞌu bebejeꞌeri,
tuꞌisi oꞌomtilatakai emou koꞌom yebijlaa. Bweꞌituk juꞌunea
aꞌ bwijnaaꞌuta, abe aꞌ yumaꞌapo.
\p
\v 13 Juꞌu, sikiika woo busanim kobakame intok, juꞌuneakai,
bwiau koꞌom aꞌ jimmaatukaꞌpo, juꞌu jamut, oꞌouta asoakamtau
sua taitek.
\v 14 Taa junaꞌa jamut, bweꞌu juchaji masam benam makwak,
junuen, aꞌ yebijneeꞌu, bweka paꞌariau bicha aꞌ niꞌineꞌ
betchiꞌbo. Mekkaa, ka junae bebejeꞌerita beꞌemu. Jumun
aꞌ jiꞌibwatuanaꞌawi, baji wasuktiam intok ama nasuk wasuktiammeu
tajtia.
\v 15 Juꞌu, cheꞌa bat naataka au bakot yaakame, aꞌ tenpo,
baꞌam yeu simtuak, junuen batweta yaꞌabaekai, junakaꞌa
jamutta aꞌ nuk simneꞌ betchiꞌbo.
\v 16 Taa juꞌu bwia, jukaꞌ jamutta aniak. Bweꞌituk junaꞌa
bwia, jukaꞌ bebejeꞌerita, tenpo baꞌata yeu simtuakaꞌuta,
aꞌ nuꞌuka.
\v 17 Iniamak san juꞌu sikiika woo busanim kobakame,
tuꞌisi oꞌomtek junakaꞌa jamutta bejeꞌekai. Junak intok
sikaa, junae jamuttat yeu katriam tawalammak nassuabaekai.
Jumeꞌ achai Liojta betana nesaurim nok jikkajame. Intok
jumeꞌe, jukaꞌ lutuꞌuriata ka koptame, Jesukrijtota betana
lutuꞌuriateita.
\c 13
\s Wooika, jumeꞌ jita naikim wokekame
\p
\v 1 Bawe mayoat kikteka, ne intok junamaꞌa bawepo baꞌapo
betana jitaa, jikau weyemta ne bichak. Woo busanim kobaka,
intok woj mamnim awakamta. Intok weꞌepul aꞌ awammet,
jita, sawai tomie yaꞌarim aet joꞌariakan. Aꞌ kobawammet
intok, Liojta bejeꞌeka jaana nokame aet jiꞌojteitukan.
\v 2 Iniꞌi jita, naikim wokekamta in bichakaꞌu, juꞌu yookota
benaekan. Joosoꞌ teamta benam intok wokekan. Intok ouseita
benak tenekai. Juꞌu intok, sikiika, woo busanim kobakame,
junakaꞌa, aapoꞌik betana utteꞌata intok siꞌimem bepa
yoꞌotaka aꞌ nesauneeꞌuta aet autuak.
\v 3 Junae jita, naikim wokekamta, wepul aꞌ koba, muk maisi
koꞌokosi yaꞌatukan. Taa jum, muk maisi koꞌokosi aꞌ aulaꞌpo,
tuꞌireak. Intok siꞌime aniat, juꞌu yoemra aꞌ suumꞌeiyaaka
intok junau emo suꞌu tojak aꞌ yoemꞌeiyaakai.
\v 4 Intok jukaꞌ sikiika, woo busanim kobakamta, inimeꞌe
aꞌ yoꞌorek. Bweꞌituk, aapoꞌik jukaꞌ naikim wokekamta,
utteꞌata aet autuakaꞌ betchiꞌbo. Intok jukaꞌ naikim
wokekamta, ket bempo aꞌ yoꞌorek, inen jiakai:
\p ―Kaabe ale benaka machika aane. Intok kaabe aꞌ bejeꞌeka
nassuane ―ti jiakai.
\p
\v 5 Ketchia, iniꞌi naikim wokekame, suawakamta aꞌ teuwaa
betchiꞌbo, ujyoik intok Liojta bejeꞌeka, jaana aꞌ nokneꞌ
betchiꞌbo suawata aet autuak. Intok woi taka intok ama
wooi mechammeu tajtia aꞌ yoꞌotaka aꞌ nesauneꞌ betchiꞌbo
lutuꞌuriakan.
\v 6 Intok tua junuen aayuk, Liojta bejeꞌeka, jaana nookak.
Intok ka aꞌ yoꞌotukaꞌa benasia, ka aꞌ yoꞌorek. Liojta
teꞌopowata intok kia jumeꞌ teekau jiapsame juniꞌi, ka
yoꞌorek.
\v 7 Intok ketchia, jumeꞌ achai Liojta yoemiam bejeꞌeka
aꞌ nassuatuawak, junameꞌe aꞌ kobaꞌu tajtia. Intok siꞌime
aniat ka nanau machi yoemra, ka nanau machik nokammeu,
ameu aꞌ yoꞌotuneꞌ betchiꞌbo au lutuꞌuriatuawak.
\v 8 Junakaꞌa naikim wokekamta, siꞌime jumeꞌ inim bwiapo
jiapsame, aꞌ yoꞌorek. Jumeꞌe, bem team, Bwalata jiꞌosiam,
jiba yuu betchiꞌbo jiapsineeme jiꞌojteimpo, ka ama jiꞌojteim.
Juꞌu kee aniata juꞌunaktewao naateka, aꞌ meꞌetuneꞌe betchiꞌbo
yeu puꞌawakame.
\q
\v 9 Juꞌu aꞌ mammatebaeme aꞌ jikkajine.
\q
\v 10 Jumeꞌe, watem etaꞌ betchiꞌbo, am bwiseka am utteꞌa
jooriame,
\q Ket bempo jiba junaen yaꞌanaa.
\q Intok wameꞌe, tebe kuchiꞌimmea yee suꞌarime,
\q Ket bempo jiba junaen yaꞌanaa.
\p Inia betchiꞌbo san, jumeꞌ Liojta yoemiam, utteꞌa, yoꞌowe
Jesukrijtotat eaka, a bem boꞌo bitneꞌpo.
\p
\v 11 Chukula ket ne juchi seenuk, naikim wokekamta bichak,
bwiapo yeeu, jikau weyemta. Iniꞌi, bwalata benam wooim
awakan. Taa iniꞌi, juꞌu sikiika, woo busanim kobakamta
benasi nookan.
\v 12 Intok iniꞌi, cheꞌa bat naikim wokekamta, bawepo
yeu sikamta benasi, yoꞌo nesaweka, junae mak aane, intok
aamak eakai. Iniꞌi intok, inim bwiapo, siꞌime jiapsame,
jukaꞌ baꞌapo, cheꞌa bat yeu sikamta am yoꞌorituan, jukaꞌ
kobat muk maisi koꞌokosi aulataka tuꞌireakamta.
\v 13 Ketchia, iniꞌi, machilaata, ka a jootu maisi machik
jooan. Tajita juniꞌi, teeka betana koꞌom weamtuakai, juꞌu
yoemrata bichapo.
\v 14 Intok iniꞌi, machilaae, junae cheꞌa bat yeu sikamta
mak aneka, aꞌ jootuawaꞌue, junuen jumeꞌ inim jiapsame
am bai taꞌaak. Intok junamet nesawek, juꞌu muk maisi
koꞌokosi yaꞌaritaka, ka mukukamta benak, jitae bem aꞌ
yaꞌaneꞌ betchiꞌbo.
\v 15 Juꞌu intok, naikim wokeka, chukula yeu sikame, utteꞌatuawak,
jukaꞌ bat yeu sikamta benak, yaꞌarita, jiapsiwamta aet
autuaꞌ betchiꞌbo. Junuen, junakaꞌa yaꞌarita aꞌ nokneꞌ
betchiꞌbo. Intok siꞌime jumeꞌ ka aꞌ yoꞌoreme, am suꞌa
tebo betchiꞌbo.
\v 16 Intok ketchia, siꞌimem, jumeꞌ eiyaawame intok jumeꞌ
ka eiyaawame juniꞌi, totomekame intok kaita jipueme juniꞌi,
intok jumeꞌ tekokame, intok kia jumeꞌ ka tekokame juniꞌi,
batatana mampo oo koba mejeꞌeku, bem ae juꞌuneiyaatuneeꞌuta,
machilaata amet aꞌ yaꞌa tebok.
\v 17 Intok kaabe a jita jinunee oo a jita nenkinee
juniꞌi, juꞌu naikim wokekamta betana machilaata ka aet
yaꞌaritakai, oo junae naikim wokekamta team oo junae
team jumeꞌ nuumerom.
\v 18 Iniat juꞌunee betchiꞌbo koba suawata waata. Juꞌu
intoko suawaka juꞌuneame, jukaꞌ naikim wokekamta aꞌ team
juꞌuneiyaa betchiꞌbo tuꞌisi aꞌ bichaka, numerompo am
jariune. Bweꞌituk junaꞌa nuumero, jiba inim bwiapo jiapsamta
teuwaa. Juꞌu nuumero intok, busan siento ama baji taka
ama busani junaꞌa.
\c 14
\s Jumeꞌ woo busan taka miil intok ama naiki miil taka, bwikame
\p
\v 1 Chukula intok ket, jukaꞌ Bwalata, kawi Sion teaꞌpo
jikat weyekamta ne bichak. Inia mak intok, woo busan
taka miil intok ama naiki miil taka, waate aamak jaꞌabwekan.
Inimeꞌe, Bwalata intok aꞌ achai Liojta team, koba mejeꞌeku
amet jiꞌojteim tukan.
\v 2 Junamaꞌa lautipo, sep, jiawaita teeka betana weyemta
ne aꞌ jikkajak. Junaꞌa, jiawai, bawe baꞌa biaktiam mayoau
yumaka, kusisi am jiaꞌa benasi jiian. Intok yukuta, utteꞌaka,
binwa kusisi aꞌ jiaꞌa benasia. Watem juebenam, bem aapam
jiutuaꞌa benasia.
\v 3 Junameꞌe intok, bemela bwiikim bwiikan. Liojta cheꞌa
yoꞌotaka aꞌ katekaꞌabichapo. Intok naikika, jumeꞌ ama
jiapsame bichapo. Intok jumeꞌ yoꞌotaka ama jokame bichapo.
Junameꞌe bwiikim, kaabe a am suawaꞌun. Ala jumeꞌ woo
busan taka miil intok ama naiki miiltaka, jumeꞌ inim
jiapsame betana jinneꞌuwakame jiba.
\v 4 Inimeꞌe junameꞌe, jumeꞌ ka jaamuchimmak emo tuꞌurisukame.
Bweꞌituk bempo Liojta betchiꞌbo jiba jiapsa. Intok jukaꞌ
Bwalata, ka aꞌ koptaka, jakun aꞌ aneo juniꞌi, aamak rejte.
Inimeꞌe, achai Liojta intok juꞌu Bwalata betchiꞌbo, inim
yoemrata betana jinneꞌurimtuk, jumeꞌe, cheꞌa bat kateka
aꞌ mikwakaꞌum benasia.
\v 5 Aa nokiꞌichia tua kaita amet teuwak. Bweꞌituk inimeꞌe,
Liojta yoꞌotaka aꞌ katekaꞌabichapo, ka tuꞌuwata kaita
yaꞌarika aane.
\s Baji, jumeꞌ ankelesim teuwaakaꞌu
\p
\v 6 Junak intok, juchi senuk ankelejta, teekapo nasuk
luula neꞌemta ne bichak. Iniꞌi, Jesukrijtota betana nok
lutuꞌuriata intok weiyaan, tuꞌik intok jiba betchiꞌbo
tunemta. Junuen jumeꞌ bwiapo jiapsammeu, siꞌime juꞌu
ka nanau machi yoemratau, intok ka nanau maisi nokammeu
aꞌ teuwaa betchiꞌbo.
\v 7 Intok unnaa kusisi inen jiian:
\p ―Achai Liojta emeꞌe ee majjaune, intok au bicha enchim
aꞌ yoꞌoreeꞌuta, aꞌ teuwaane. Bweꞌituk yumaꞌasuk juꞌu
taewai, aapoꞌik yee aet yaꞌuraa bittuaneeꞌu. Emeꞌe jukaꞌ
teekata intok jukaꞌ bwiata intok baweta intok jumeꞌ
senneꞌekam yaakamta aꞌ yoꞌorine.
\p
\v 8 Iniet chaꞌakai intok, inia mak woika, juchi senu
ankeles yepsak inen jiakai:
\p ―Jaibu wetchuk, jaibu wetchuk juꞌu bweꞌu joꞌara Babiloonia,
inim tuꞌisi eiyaawame. Bweꞌituk junamaꞌa siꞌimeta jukaꞌ
ka nanau machi yoemrata, tiusi ama butti ka tuꞌikue aꞌ
nayyotek.
\p
\v 9 Sep ket, junaet chaꞌaka iniamak bajika, juchi senu
ankelej yepsak, intok unnaa kusisi nokaka inen jiakai:
\p ―Jabetaka juniꞌi, jukaꞌ naikim wokekamta intok kia jukaꞌ
ale benasi yaꞌarita juniꞌi, aꞌ yoꞌoreko, intok inia betana
koba mejeꞌeku oo aꞌ mampo jukaꞌ machilaata aet yaꞌa
teboko,
\v 10 iniꞌi ket, achai Liojta betana, tua ka tuꞌika jiokot
maachik bitne, aapoꞌik Liojta betana jukaꞌ tua ka aꞌ
alleaꞌuta. Intok junuen, ka jiokoliwaka tajiꞌasuprekaꞌpo,
jiokot au bitne, Liojta ankelesim intok juꞌu Bwalata
bichapo.
\v 11 Juꞌu bwichia, junameꞌe, jiokot emo bichaꞌpo, jiba
yuu betchiꞌbo ama jikau weene. Intok taewait intok kia
tukaariat juniꞌi, kaita yum joꞌeriatune, jumeꞌe, jukaꞌ
naikim wokekamta intok kia jukaꞌ ale benasi yaꞌarita
juniꞌi, aꞌ yoꞌoreme, oo kia junae betana jukaꞌ machilaata
mabetakame betchiꞌbo.
\v 12 Inia betchiꞌbo san jumeꞌ Liojta yoemiam intok
jumeꞌ Liojta betana nesaurim boꞌo jooriaka jiapsame,
intok Jesukrijtota, ka koptaka aꞌ sualeme, utteꞌa, bettek
ameu yumaꞌ nasuk, jiba a bem boꞌo bitneꞌpo.
\p
\v 13 Junak intoko, teeka betana jiawaita weyeka intok
inen neu jiamta nee jikkajak:
\p ―Inikaꞌa jiꞌojtenee ti neu jiiak: “Inim bichau bicha,
tua alleenee jumeꞌe, yoꞌowe Jesukrijtota sualeka kokoneeme.”
Jeewi ti jiia juꞌu Liojta tuꞌu jiapsiwa, bweꞌituk juꞌu
bem tekilta betana yum joꞌene. Juꞌu intok tuꞌika bem
yaꞌari, junaman ameu tuꞌineeka amet juꞌuneiyaanaa.
\s Inim bwiapo juꞌu jichupawakame
\p
\v 14 Junak intok tossaalaik namuta ne bichak. Junae
namuta bepa intok, Liojta usita benak ama katekamta.
Iniꞌi kobat, sawai tomie yaꞌarita aet yechaꞌikai. Bwaawi
oosam intok mampo jipuen.
\v 15 Teꞌopopo yeeu intok, juchi senu ankeles yeu siika.
Juꞌu namuta bepa katekamtat inen utteꞌaka aet chaekai:
\p ―Em osam nuꞌuka, jukaꞌ echita aꞌ toboktane. Bweꞌituk
jaibu yumaꞌasuk juꞌu taewai. Juꞌu intok bwiapo eechi,
tuꞌisuk.
\p
\v 16 Sep su juꞌu namupo bepa katekame, jumeꞌ aꞌ osawammea
echimuta chuktak. Intok jukaꞌ echita yeu sikamta aꞌ
toboktak.
\p
\v 17 Junak intoko juchi senu ankeles, teekau teꞌopota
katekaꞌpo yeu siika. Junaꞌa juniꞌi ketchia, osam bwaawim
weiyaakai.
\v 18 Intok mesaa, Liojta ama yoꞌoriwaꞌpo betana, juchi
senu ankeles ama yeu siika, tajita yaꞌa betchiꞌbo, lutuꞌuriakai.
Intok juꞌu bwawim osakamtau kusisi chaaek:
\p ―Jumeꞌ em bwawi osam nuꞌuka, bwiau, jumeꞌ paꞌasi takam
am toboktane. Bweꞌituk jaibu tuꞌi ―ti au jiiak.
\p
\v 19 Juꞌu ankeles intok sep su, jumeꞌ aꞌ osawammea, echimuta
chuktak. Intok jumeꞌ paꞌasim yeu sikame toboktak. Junaꞌa
intok, am baꞌawaꞌu betchiꞌbo jitaꞌpo bweꞌuuku am toꞌaak.
Iniꞌi san jukaꞌ Liojta, tua yee jiokot aꞌ bittuaneeꞌuta,
aꞌ teuwaa.
\v 20 Jumeꞌ paꞌasim, jum bweꞌu joꞌaraapo mayoau, paꞌakun
bicha baꞌawaꞌuwak. Intok jum bem toꞌaawakaꞌpo, ojbo ama
yeu siikan. Kabaꞌim tenimmeu jikau yumakai. Intok baji
sien kiloometrommeu tajtia buitekai.
\c 15
\s Woo busan jumeꞌ ankelesim, woo busan koꞌokoata weiyaaꞌu
\p
\v 1 Jum teekau, juchi senu machilaata bweꞌuuka intok
majjaiwatchik ne bichak. Woo busan ankelesim, woo busanika,
jukaꞌ luꞌutineeka, yee jiokot emo bittuawamta weiyaakai.
Junaemak luꞌutineekai juꞌu achai Liojta, tua ka aꞌ alleaꞌu.
\p
\v 2 Ketchia baweta, bikriota benasi naj mamachika intok
taji mak kurai benak ne bichak. Intok wameꞌe, jukaꞌ naikim
wokekamta intok jukaꞌ ale benasi jukaꞌ yaꞌarita intok
kia junae betana jukaꞌ machilaata kobaꞌika yeu sajakame,
inimeꞌe, junae baweta benaka naj mamachik naapo jaꞌabwekan.
Aapam intok achai Liojta betana bem makrim, nuk jaꞌabwekai.
\v 3 Inimeꞌe intoko, juꞌu, Liojta betana tekilta joame,
Moiseej tukaꞌuta betana weyeme, jumeꞌ bwikim bwiikan.
Intok juꞌu Bwalata betana weyeme, inen jiame:
\q Siꞌimek bepa eiyaawatchi intok kaitau a tamachiatu,
siꞌime juꞌu em yaꞌari, achai Lios, siꞌime utteꞌakame.
\q Wepulsi lutuꞌuria intok kaita ka tuꞌik aet aayuk em
boꞌo jooriaꞌut.
\q Siꞌime ka nanau machi yoemratau eiyaawatchika, siꞌimem
bepa cheꞌa yoꞌowe.
\q
\v 4 Achai Lios, eu lutuꞌuria, siꞌimem enchi ee majjauneꞌpo.
\q Intok siꞌimem enchim am yoꞌorineꞌpo.
\q Bweꞌituk empo jiba junaꞌa, juꞌu, kaita ka tuꞌik yaꞌarime.
\q Siꞌime juꞌu ka nanau machi yoemra, enchi bichaka enchi
yoꞌorine.
\q Bweꞌituk juꞌu em yaꞌari, wepulsi lutuꞌuriata ausuꞌlika
juꞌuneiyaawa.
\p
\v 5 Iniat chukula intok, teekapo, teꞌopopo, jum lutuꞌuriapo
Liojta ama aneꞌa benasi eiyaawaꞌpo au etapomta ne bichak,
Liojta nesaurim, teta beraimmet jiꞌojteim eꞌeriaripo.
\v 6 Jum teꞌopopo yeeu betana, wameꞌe woo busan ankelesim
yeu sajak, jukaꞌ woo busanika jiokot yee emo bittuawamta
aꞌ weiyaakai. Junameꞌe tajoꞌori, beojkoka, linoꞌ teamta
atteakan. Intok wikosam sawai tomie yaꞌarimmea tawiu
jikat emo sumaꞌireakan.
\v 7 Junak intok, naikika jumeꞌ junaman jiapsame betana,
seenu, jumeꞌ woo busani ankelesim, weꞌepulaim, bwejaꞌim
benam, sawai tomie yaꞌarim am makak. Inimeꞌe, sawai tomie
yaꞌarim achai Lios, jiba yuu jiapsamta betana, ama butti
ka aꞌ alleaꞌu betchiꞌbo, yee jiokot aꞌ bittuaneeꞌutae
tappuni benakai.
\v 8 Juꞌu teekapota teꞌopo intok, bwichiae tapunak. Achai
Liojta betana aꞌ eiyaawatchiakaꞌuta intok siꞌime utteꞌata
aet ayukaꞌuta aꞌ teuwaakai. Junamaꞌa teꞌopou intok, kaabe
a aman kibaken, jumeꞌ woo busan yee jiokot emo bittuawame,
woo busanika jumeꞌ ankelesim weiyaaꞌum, kee am luꞌuteo.
\c 16
\s Jumeꞌ bwejaꞌim benaka ka tuꞌik teuwaame
\p
\v 1 Junak intok jiawaita teꞌopo betana yeu jiamta ne
jikkajak. Jumeꞌ woo busan ankelesimmeu kusisi inen jiamta:
\p ―Aman emeꞌe sajaka, jumeꞌ woo busan bwejaꞌim benam, sawai
tomie yaꞌarim, achai Liojta betana ama butti ka aꞌ alleaꞌue
tappunim, bwiapo jiapsammet am woꞌotane ―ti jiakai.
\p
\v 2 Juꞌu bat senu ankeles, aman siika intok junaꞌa, bwejaꞌipo
aꞌ jipueꞌuta, bwiau jiapsammet koꞌom aꞌ woꞌotak. Intok
siꞌime jumeꞌe, juꞌu woo busan kobakamta betana machilaata
jipuemmetchi intok jukaꞌ junale benasi yaꞌarita aꞌ yoꞌoremmetchi,
junammet saꞌawam, ka tuꞌika intok koꞌokosi machika amet
yeu sajak.
\p
\v 3 Iniamak woika, juꞌu ankeles, jukaꞌ bwejaꞌita aꞌ weiyaaꞌuta
bawepo bepa aꞌ woꞌotak. Juꞌu intok baawe baꞌa, mukia
ojbota benasia taawak. Juꞌu intok bawepo siꞌime jiapsame,
kokok.
\p
\v 4 Iniamak bajika juꞌu ankeles ket, jukaꞌ bwejaꞌita
aꞌ weiyaaꞌuta, batwem intok jumeꞌ senneꞌekampo bepa aꞌ
woꞌotak. Junameꞌe baꞌam intok ojbota benasi aayuk.
\v 5 Sep ket ne jukaꞌ ankelejta, baꞌammeu bittuawakamta
ne jikkajak inen jiamta:
\p ―Empo junaꞌa wepulsi lutuꞌuriata jiba joame, yoemrata
junuen au aꞌ lutuꞌuriatukaꞌpo aman jiokot au aꞌ bittuakai,
achai Lios, kaita ka tuꞌik yaꞌarime. Empo iꞌani intok
cheꞌa bat naatakai juniꞌi juꞌu jiapsame.
\v 6 Bweꞌituk bempo, jumeꞌ em yoemiam, ee betchiꞌbo jiba
jiapsame, intok jumeꞌ ee betana yeteu noktuawakame, tebe
kuchiꞌimmea am suꞌak. Iꞌan intok, empo inimeꞌe, baꞌam
ojbota benasi yaꞌata am jiꞌituaka am sussuꞌa. Junuen
ameu lutuꞌuria.
\p
\v 7 Ketchia senuk, Liojta ama yoꞌori betchiꞌbo, mesata
katekaꞌa betana inen jiamta ne jikkajak:
\p ―Jeewi achai Lios, siꞌimeku intok siꞌimemmeu utteꞌakame.
Empo, lutuꞌuriaka intok junuen tua aꞌ lutuꞌuriatukaꞌpo
aman empo yee yaꞌuraa bittuala.
\p
\v 8 Iniamak naikika juꞌu senu ankeles ket jukaꞌ bwejaꞌita
aꞌ weiyaaꞌuta taꞌata bepa aꞌ woꞌotak. Juꞌu taꞌa intok
utteꞌatuawak aꞌ tajie jukaꞌ yoemrata aꞌ tayaꞌ betchiꞌbo.
\v 9 Siꞌime juꞌu yoemra intok, ka jiokoliwaka tayaꞌatuk.
Taa inimeꞌe, ka emo temaek. Intok kia Liojta juniꞌi ka
yoꞌorek. Ala bempo aapoꞌik bejeꞌeka ka tuꞌik teuwaak,
jukaꞌ wantiriata, ankelesim weiyaaꞌuta, luꞌuta betchiꞌbo
utteꞌakamta bejeꞌeka nokakai.
\p
\v 10 Iniamak mamnika, juꞌu ankeles ket jukaꞌ bwejaꞌita
aꞌ weiyaaꞌuta, juꞌu naikim wokekamta, yoꞌotaka aꞌ katekaꞌu
bepa aꞌ toꞌaak. Juꞌu intok, junakaꞌa yoꞌotaka aꞌ nesaweeꞌu,
amau taawak. Juꞌu intok yoemra koꞌokoleka, ninit emo
kekken.
\v 11 Taa kia junuentaka juniꞌi, jukaꞌ ka tuꞌik bem joaꞌuta
ka aꞌ suꞌu tojak. Ala bempo, Lios, teekau jiapsamta bejeꞌeka
ka tuꞌik teuwaak, koꞌokok bem ineꞌaaꞌuta intok jumeꞌ
bem koꞌokoata betchiꞌbo.
\p
\v 12 Iniamak busanika juꞌu ankeles ket jukaꞌ bwejaꞌita
aꞌ weiyaaꞌuta, bweꞌu batwee Eupraatej teamta bepa aꞌ
toꞌaak. Juꞌu intoko junamaꞌa baꞌa, waakek. Junuen jumeꞌe,
taꞌata yeu weꞌe betana kateme, jumeꞌ siꞌimem bepa cheꞌa
yoꞌotaka nesaweme, ama yeu katneꞌ betchiꞌbo.
\p
\v 13 Junak intok juꞌu sikiika woo busanim kobakamta
tenpo betana intok juꞌu naikim wokekamta tenpo betana,
intok juꞌu ka lutuꞌuriapo Liojta betana weyemta teuwaamta
tenpo yeeu betana, bajika, ka tuꞌi jiapsim batachim benasi
emo yaꞌarim, yeu kateme ne bichak.
\v 14 Inimeꞌe intok, juꞌu bebejeꞌerita betana ka tuꞌi
jiapsimtukan. Inimeꞌe, machilaata ka a jootu machik jooan.
Intok junameꞌe aniat, jumeꞌ siꞌimem bepa cheꞌa yoꞌowem
nau toji betchiꞌbo, yeu sajak. Junuen junameꞌe, achai
Liojta, siꞌime utteꞌakamta, taewaita aꞌ teuwaari yumaꞌaneeo,
am nassuaneꞌ betchiꞌbo.
\v 15 Akeꞌem aꞌ mammate. Inepone, ka in boꞌo bitwao su
yebijne, senuk, jita etbwabaeka aꞌ weyeꞌe benasia. Taa
tua alleenee waꞌa, Liojtat eaka intok iniꞌi, ka tuꞌik
betana au suuaka nee boꞌo bichaka jiapsame. Bweꞌituk
ka junuentuko, juꞌu ka tuꞌik joaka jiapsame, nee seej
chukti nee yepsao, tiusi aet machine, senuk ausuꞌlika
aꞌ bitwaꞌa benasia.
\v 16 Jumeꞌ intok, siꞌimem bepa cheꞌa yoꞌo yaꞌarim, ebreo
nokpo, bwiaraa Armajeroon teaꞌpo nau tojiwak.
\p
\v 17 Iniamak woo busanika, juꞌu ankeles ket, jukaꞌ bwejaꞌita
aꞌ weiyaaꞌuta, jekapo aꞌ woꞌotak. Intok jum teekau, teꞌopo
betana, jum Liojta yoꞌotaka katekaꞌpo, jiawai yeu siika,
kusisia:
\p ―Jaibu siꞌime chupia ―ti jiakai.
\p
\v 18 Junak intoko yuku beꞌoktiam bittuk, jiawaim intok
yuku ruꞌuti jiame. Intok juꞌu bwia cheꞌa juniꞌi utteꞌaka
au yoyoak. Yoemrata inim jiapsi taitekaꞌpo naateka ka
ayukai.
\v 19 Juꞌu bweꞌu joꞌara, bajisi naꞌikim wechek. Intok
aniat yeu tajtia, jumeꞌ bwere joꞌaram wattek. Juꞌu Lios
intok ket, bweꞌu joꞌaraa Babilooniaꞌ teamta ka aꞌ koptak,
junuen, jumeꞌ ama jiapsame, ka jiokoliwaka, jukaꞌ aapoꞌik
betana weyeka ama butti jiokot aapoꞌik am yaꞌaneeꞌuta
am bittua betchiꞌbo.
\v 20 Siꞌime jumeꞌ bawepo bwiam yeu jokame, intok jumeꞌ
kawim ama kaitatuk.
\v 21 Ketchia, teeka betana, teejam bwereka, yoemratat
koꞌom wattek. Junameꞌe woi taka kiilom betteakai. Jumeꞌ
intok inim jiapsame, Liojta bejeꞌeka, ka tuꞌik teuwaak,
jumeꞌ teejam betchiꞌbo. Bweꞌituk bempoꞌim betchiꞌbo
tua jiokot emo bitwame tuk.
\c 17
\s Ka tuꞌi jamutta, juꞌu ka tuꞌisi aꞌ tawaawakaꞌu
\p
\v 1 Junak intoko jumeꞌ woo busan ankelesim, woo busanika
jumeꞌ bwejaꞌim benam jipueme betana, senu neu sika intok
inen neu jiiak:
\p ―Aꞌabo weye intok inepo jukaꞌ ka tuꞌi jamutta, juebena
bawe baꞌam bepa katekamta benasi machik, jukaꞌ ka tuꞌisi
au aꞌ chupneeꞌuta, ne enchi juꞌuneiyaatuane.
\v 2 Jumeꞌ inim siꞌime yoemrata betana siꞌimem bepa
yoꞌo yaꞌarim, junaemak ka tuꞌisi jiapsak. Intok jumeꞌ
inim jiapsame, aamak jukaꞌ Liojta bejeꞌeka ka tuꞌik aꞌ
joaꞌuta, aꞌ joosuk.
\p
\v 3 Ket, Liojta tuꞌu jiapsie in bittuawaꞌpo, juꞌu ankeles,
bweꞌu bweka paꞌariau bicha nee nuk siika. Junamaꞌa intok,
jamutta, sikiikai naikim wokekamtat katekamta ne bichak.
Iniꞌi, aet aꞌ katekaꞌu ket siꞌimekut, achai Liojta bejeꞌeka
nokame aet jiꞌojteitukan. Intok woo busanim kobakan,
woj mamnim intok awakai.
\v 4 Iniꞌi jamut, kutkoka intok sikiik tajoꞌorekan. Intok
sawai tomie intok ujyooi tetammea intok bawepo tojsaalaim
tetam pejlaꞌ teame ujyoisi au yaꞌariakan. Mampo intok
sawai tomie yaꞌarita, bwejaꞌita benak, ka bibit machikue
tapunik jipuen. Intok juꞌu, aapoꞌik tua ka tuꞌik aꞌ joaꞌuta
teuwaamtae.
\v 5 Aꞌ koba mejeꞌeku intok, team weiyaan, kaabeta amet
juꞌuneaꞌum: “Bweꞌu joꞌaraa Babilooniaꞌ teame. Siꞌime
jumeꞌ ka tuꞌi jaamuchimmeu, intok inim siꞌimeta jukaꞌ
ka tuꞌika, ka bibit mamachik joowammeu malawai”, ti jiamta
weiyaan.
\v 6 Sep ne aet juꞌuneꞌeak, junakaꞌa jamutta, jumeꞌ Liojta
yoemiam intok Jesukrijtota betana nok tuawaka suꞌawakame,
bem ojboe aꞌ naamukiata benaekaꞌpo. Inepo intok, tua
ne aet suum eak, junakaꞌa bichakai.
\v 7 Junak intok juꞌu ankeles inen neu jiiak:
\p ―Ka aet suum eene. Inepo ne enchi aꞌ juꞌuneiyaatuanee
junae jamutta betana, jukaꞌ ka juꞌunakkiachik, kaabeta
aet juꞌuneaꞌuta. Intok juꞌu naikim wokekame aꞌ weiyaamta
betana, intok jukaꞌ woo busanim kobaka intok woj mamnim
awakai.
\v 8 Juꞌu naikim wokekame em bichakaꞌu, iniꞌi junaꞌa
juꞌu, cheꞌa bat naataka jiapsisukaꞌu. Taa iꞌan jaibu
ka jiapsa. Junuentaka juniꞌi, iniꞌi, bwiapo cheꞌa mekka
koꞌom wojoꞌoku jikau yeu weene, kee, jiba betchiꞌbo mukekai.
Jumeꞌ inim bwiapo jiapsame intok ka jum liprom, jiba
yuu jiapsineeme jiꞌojteimpo, siꞌimeta naatek naateka
ayukaꞌpo, ka ama jiꞌojteim, inimeꞌe junuen tua suum eenee
junakaꞌa naikim wokekamta, bat naataka jiapsaka intok
iꞌan ka jiapsamta, taa juchi jiabijtenemta aꞌ bichakai.
\p
\v 9 ’Iniat jumeꞌ jitat juꞌuneame a aet juꞌuneene. Jumeꞌ
woo busan kobam, woo busan kawim, jukaꞌ jamutta amet jikat
katekaꞌum teuwaa.
\v 10 Intok ketchia, jiba junameꞌe woo busan kobam, ket
jumeꞌ woo busan cheꞌa yoꞌo yaꞌarim teuwaa. Mamnika juname
betana, jaibu emo nenkila. Juname betana wepulaka iꞌan
nesawe. Juꞌu intok, juchi seenu, ketun kee yepsa. Juꞌu
intok, juname betana cheꞌa chukula yebijneeme, ka binwa
jiapsine.
\v 11 Juꞌu intok, naikim wokekame, juꞌu cheꞌa bat naataka
jiapsaꞌu intok iꞌan ka jiapsame, iniamak woj naiki jumeꞌ
nesaweme. Iniꞌi, wate jumeꞌ woo busanimmak weyeka juniꞌi,
chukula jiba betchiꞌbo luꞌutine.
\p
\v 12 ’Jumeꞌ intok woj mamni aawam, em bichakaꞌum, woj
mamnim, cheꞌa yoꞌo yaꞌarim, ketun kee nesau japteme teuwaa.
Taa inimeꞌe, chuuba, juꞌu naikim wokekamta betana aniawaka
yoꞌo nesaune.
\v 13 Inimeꞌe, woj mamnika yoꞌo yaꞌarim, nau ea. Intok
bempo, bem utteꞌawata intok bem nesaweeꞌuta, juꞌu naikim
wokekamtau aꞌ suꞌu tojine.
\v 14 Siꞌime inimeꞌe, jukaꞌ Bwalata bejeꞌeka nassuane.
Taa junaꞌa Bwala am kobaꞌane. Bweꞌituk aapo junaꞌa, juꞌu
siꞌimem bepa cheꞌa yoꞌowe. Intok siꞌimem bepa yoꞌo nesaweme.
Jumeꞌ intok, aamak eaka aamak aneme, achai Liojta betana
yeu puꞌarim intok nunurim, intok inimeꞌe, Liojta ka kopta.
\p
\v 15 Juꞌu ankeles ket inen neu jiiak:
\p ―Jumeꞌ baawem, jukaꞌ ka tuꞌi jamutta ame bepa kateka
em bichakaꞌum, jukaꞌ yoemrata, siꞌime ka nanau maisi machika
nokamta teuwaa.
\v 16 Jumeꞌ intok woj mamni aawam, intok jukaꞌ naikim
wokekamta em bichakaꞌum, inimeꞌe, jukaꞌ ka tuꞌi jamutta
aꞌ omtane. Intok aꞌ toꞌo sakaꞌane. Intok kaita aet beꞌaakai,
ausuꞌlik, jukaꞌ bejeꞌewakamta aꞌ jipueꞌuta, aꞌ uꞌuraaka,
aꞌ tayaꞌane.
\v 17 Juꞌu Lios, inimeꞌe juꞌuneetuak jukaꞌ aapoꞌik am
yaꞌa iꞌaꞌuta, bem aꞌ jooneꞌ betchiꞌbo. Bempo junuen nau
eaka intok bem yoꞌotukaꞌpo amani, bem nesaweeꞌuta, jukaꞌ
naikim wokekamtau aꞌ suꞌu tojakai, jukaꞌ Liojta aꞌ teuwaari
aꞌ chupsuꞌutajtia.
\v 18 Jukaꞌ jamutta em bichakaꞌuta, waꞌa beꞌu joꞌaraa,
aniat, siꞌime yoemratau yoꞌo yaꞌarim, kokobame oꞌoben.
\c 18
\s Bweꞌu joꞌaraa, Babilooniaꞌ teamta jiokot aꞌ tawaawakaꞌu
\p
\v 1 Iniet chukula intok juchi senu ankelejta, tuꞌisi
yoꞌo nesawekai, teeka betana koꞌom weyemta ne bichak.
Intok juꞌu, inim bwiapo ayukame, junae tachiriae, machiku
taawak.
\v 2 Junaꞌa intok ankeles, tuꞌisi kusisi jiaka, chaaen:
\p ―Jaibu wetchuk, jaibu wetchuk juꞌu unnaa bweꞌu joꞌaraa
Babilooniaꞌ teame. Intok iꞌan, jumeꞌ bebejeꞌerim ama
jiapsa. Intok jumeꞌ bebejeꞌeri ka tuꞌi jiapsim ama eꞌeuse.
Intok wikitchim, wiirum, tekoem, jaiti machik tuꞌureme
ama joꞌaak, jumeꞌ jaitawame.
\v 3 Bweꞌituk siꞌime juꞌu ka nanau machi yoemra, jukaꞌ
tua ka tuꞌik aꞌ joaꞌuta, au aꞌ taꞌaaka, aamak aꞌ tuꞌurisuk.
Jumeꞌ intok, aniat siꞌime yoemratau yoꞌo yaꞌarim, ka tuꞌik,
tiusi machik, aamak eaka aꞌ joosuk. Jumeꞌ intok aniat
yeu tajtia, jita nenkireom yuꞌin totomituk, jukaꞌ ujyooik
bem nenkakaꞌuta, aapoꞌik ama butti aꞌ tuꞌureꞌ betchiꞌbo.
\p
\v 4 Junak intok, juchi senu jiawaita, teeka betana weyemta
ne jikkajak, intok inen jiamta:
\p ―Junum bweꞌu joꞌaraa betana emeꞌe yeu kaate, in yoemiam.
Junuen, jukaꞌ ka tuꞌik bem joaꞌuta, ka amemak enchim aꞌ
yaꞌarineꞌ betchiꞌbo. Intok kia jukaꞌ koꞌokoata juniꞌi,
bem inneꞌeneeꞌuta ka enchim amemak aꞌ inneꞌeneꞌ betchiꞌbo.
\v 5 Bweꞌituk juꞌu ka tuꞌik bem yaꞌari, teekau nukisi
yeu yumaꞌala. Juꞌu achai Lios intok, unnaa ka tuꞌika
aet ayukamta ka koptaika, jaibu ae betchiꞌbo junꞌunea.
\v 6 Junuen aapoꞌik watem aꞌ bittuakaꞌuta, junaen aꞌ
bittuanaa. Intok aapoꞌik yaꞌari, woosa au aꞌ nottane.
Aapoꞌik waatem ka tuꞌik am yaꞌariakaꞌuta, junaen woosa
ae bepa cheꞌa ka tuꞌisi au aꞌ nottane.
\v 7 Aapoꞌik ka tuꞌikue, binwaa jiokot au aꞌ bitneeꞌuta
intok aꞌ bwanneeꞌuta, junaen au aꞌ nottane. Aapoꞌik au
cheꞌewareka, ujyoikue aꞌ alleesukaꞌa benasia. Bweꞌituk
aapo: “Siꞌimem bepa jamut yoꞌo yaꞌaritaka ne im katek.
Kannee jokoptui. Intok kia ne ka jiokot ino bitnee juniꞌi”,
ti jiia.
\v 8 Inia betchiꞌbo san, chubalapo, sejtul wechiapo siꞌime
koꞌokoa ka tuꞌika eu weene. Kokkowame, intok tebaa, ka
alleewame, intok tayaꞌatune. Bweꞌituk siꞌime utteꞌak
juꞌu achai Lios, juꞌu, ka tuꞌisi enchi tawaakame.
\p
\v 9 Jumeꞌ inim siꞌime yoemratau cheꞌa yoꞌo yaꞌarim,
jumeꞌ junaemak jukaꞌ tua ka tuꞌik aꞌ joosukaꞌuta, intok
juꞌu ujyoik aꞌ tuꞌurisukaꞌuta, aamak aꞌ tuꞌurisukame,
inimeꞌe ka alleaka bwanneemme aapoꞌik beetemta bichakai.
\v 10 Mekka tawane, tua jiokot aꞌ yaꞌanaaꞌuta aꞌ majjaekai.
Inen intok jiunee:
\p ―Tua jiokot eu maachi. Unnaa bweꞌu joꞌaraa Babilooniaꞌ
teame, juꞌu ka a kobaꞌatuꞌu. Bweꞌituk chubalaposu eu
yuumak juꞌu jiokot em emo bitneeꞌu.
\p
\v 11 Aniat, siꞌime jumeꞌ jita nenkireom ket bwanne.
Intok ka alleene, junae bweꞌu joꞌarata betchiꞌbo. Bweꞌituk
kaabe intoko jukaꞌ bem nunnuꞌubwaaꞌuta ameu jinu machine.
\v 12 Sawai tomie intok tosai tomie yaꞌarita, tetam ujyoyoim
bejeꞌewaekame, bawepo tetam pejlam teame, tajoꞌori bejeꞌewaeka,
linoꞌ teamtae yaꞌari, seeraꞌ teamtae yaꞌarik bejeꞌewaeka,
kutkoka intok sikiik. Ketchia siꞌime ka nanau machi
kutata win jubak. Intok otae tuꞌikue yaꞌarik, intok ujyoi
kutae, yeu puꞌaritae yaꞌarita, kopreae intok sisiꞌiwookie
intok ujyoi tetae yaꞌarita bem weiyaaꞌuta.
\v 13 Kaneelata intok bwaꞌamtamak weyemta ka nanau machik
win jubak, intok kopaalim benak tattaawamta. Intok ochokoka
win jubak. Paꞌasi baꞌawata, oliibommea aseite yaꞌarik.
Jumeꞌ cheꞌa tuꞌim ainam. Intok ket tiikom. Intok ketchia
jumeꞌ naikim wokeka, jumeꞌ puꞌa puꞌakteme, bwaaram, kabaꞌim
kaarom. Intok kia cheꞌa, jumeꞌ ito benasi yoemem, nenki
betchiꞌbo bem weiyaaꞌuta.
\v 14 Inimeꞌe, junae bweꞌu joꞌarat nokaka, inen jiunee:
\p ―Jaibu kaita, jumeꞌ taakam, kiawaekame, empo jipue. Jumeꞌ
em tuꞌureꞌum intok siꞌimeta wakaꞌa bejeꞌewaekamta em
aꞌ tuꞌu bwaꞌasukaꞌuta, jiba betchiꞌbo aꞌ taꞌarula. Intok
jukaꞌ ujyooik em jipuꞌusukaꞌuta kaibu intok ama bittune.
\p
\v 15 Jumeꞌe, inikaꞌa tekilta joame, intok junae bweꞌu
joꞌarata betchiꞌbo jita ama nenkakai, totomitukame, mekka
au tawane, jiokot aꞌ yaꞌanaaꞌuta bichaka aꞌ majjaekai
intok tua ka alleaka bwanne.
\v 16 Intok inen im jiunee:
\p ―Tua jiokot au machine, juꞌu bweꞌu joꞌaraatawi. Tajoꞌori
linoꞌ teamtae yaꞌaritae, bejeꞌemtae intok kutkooka intok
sikiikue, intok sawai tomie intok ujyoi tetammea, intok
bawepo tetammea ujyoisi emo yaꞌaritakai, jamutta au aꞌanaariakaꞌa
benasia.
\v 17 Intok senu chubalapo su luꞌutisuk juꞌu tua eiyaawatchiakaꞌu.
\p Intok siꞌime jumeꞌ bawe barkompo yoꞌotaka nesaweme,
bawepo naj katemmake, jumeꞌ barkompo tekipanoammake, intok
siꞌime jumeꞌ bawepo tekipanoaka emo aniame, inimeꞌe mekka
taawak.
\v 18 Intok inimeꞌe, jukaꞌ bweꞌu joꞌarata beetemta, junamaꞌa
bweꞌu bwichiata bichaka inen chaaen:
\p ―Kaita, inia bweꞌu joꞌaraata benaka eiyaawatchikai intok
ayukan.
\p
\v 19 Inimeꞌe, kobat emo bwiatuak, bwanakai, intok tua
siokakai. Intok inen chaaen:
\p ―Tua jiokot au maachi, juꞌu bweꞌu joꞌaraatawi. Ka iili
wameꞌe bawepo, jumeꞌ barkom jipueme, inia jipueꞌue totomitukan.
Bweꞌituk chubalapo su, kaitaꞌpo taawak.
\p
\v 20 Taa junae bweꞌu joꞌaraatau yeu sikamta betchiꞌbo
tua alleenee emeꞌe, teekapo jiapsame, intok emeꞌe Jesukrijtota
betana yeu puꞌawakame intok emeꞌe jumeꞌ achai Liojta
betana yeteu noktuawakame. Intok siꞌime wameꞌe aapoꞌiik
yoemiam. Bweꞌituk aapo juꞌu Lios, junuen jiokot aꞌ yaakai,
aapo enchim jujutriala.
\p
\v 21 Junak intok senu ankeles, tua utteꞌakai, bweꞌu teta
muina tetata benak aꞌ toboktaka intok baweu koꞌom aꞌ
jimaak inen jiakai:
\p ―Ket jiba inien su, ka jiokoliwaka, ousi wetnee juꞌu
bweꞌu joꞌaraa Babilooniaꞌ teame. Intok jakwoo juniꞌi
ka intok bittune ―ti jiakai―.
\v 22 Jakwoo juniꞌi ka intok aapa jiawai ama jikkajinaa.
Intok kusiam intok kia sisiꞌiwook kusiam juniꞌi. Intok
kia jita tekilta joame juniꞌi, kaabetune. Intok juꞌu
muinaꞌ teame ka intok ama jikkajinaa.
\v 23 Intok kia jita tachiria juniꞌi, ka intok ama bitnaa.
Intok jumeꞌ jujubeme pajko, juꞌu jiawai ka intok ama
jikkajinaa. Jumeꞌ ama jita nenkireeom, bat naatakai, aniat
yeu tajtia eiyaawaka taꞌeewan oꞌoben. Intok aniat, ka
nanau machi yoemrata, juꞌu ama yee sisiboꞌue, a jita em
joaꞌue am bai taꞌaak.
\p
\v 24 Bweꞌituk junamaꞌa bweꞌu joꞌarapo jumeꞌe, achai
Liojta betana yeteu noktuawakame, intok jumeꞌ aapoꞌik
yoemiawam juniꞌi, ama suꞌatuk. Intok siꞌimem jumeꞌ inim
bwiapo kokokame, ama suꞌawakame benakai.
\c 19
\p
\v 1 Iniat chukula, teekau, juebenam nau jiame benasi
ne jikkajak inen jiame:
\q Aleluuya. Juꞌu yee jinneꞌuwame intok juꞌu aapoꞌik eiyaawaka
yoꞌoriwaꞌu, intok juꞌu aꞌ nesaweeꞌu, siꞌime itom achai
Liojtau lutuꞌuria.
\q
\v 2 Bweꞌituk aapo junaen aꞌ lutuꞌuriatukaꞌpo aman, intok
lutuꞌuriakai, jiokot yee emo bittua.
\q Bweꞌituk aapo, jukaꞌ ka tuꞌi jamutta, ka tuꞌisi jiokot
aꞌ tawaala.
\q Jukaꞌa, jumeꞌ inim jiapsame, juꞌu tua ka tuꞌik aꞌ joaꞌue,
am nasontekamta.
\q Aapo, jumeꞌ aꞌ nesauri joame, ama suꞌawakame junuen am
jujutriala.
\p
\v 3 Ket juchi inen jiiak:
\p ―Aleluuya. Bweꞌituk juꞌu, junakaꞌa beeteꞌu, jiba betchiꞌbo
tune.
\p
\v 4 Jumeꞌ intok senu taka ama naikika yoꞌotaka ama
jokame, intok jumeꞌ naikika ama jiapsame, tonommea jaꞌabweka,
bwiau koꞌom chaꞌaka intok achai Liojta yoꞌorek. Jukaꞌa,
jum cheꞌa siꞌimem bepa yoꞌota yeyesaꞌpo katekamta. Intok
inen jiian:
\p ―Tua junuentune. Aleluuya.
\p
\v 5 Junak intok, aapoꞌik yoꞌotaka aꞌ katekaꞌa betana
yeeu jiawai jikkajituk inen jiakai:
\q Itom achai Liojta, aꞌ yoꞌorine, siꞌime emeꞌe, aꞌ nesaurita
joame.
\q Intok aꞌ yoꞌori taꞌaame, kia jumeꞌ ka eiyaawame intok
jumeꞌ eiyaawame juniꞌi.
\s Jukaꞌ Bwalata aꞌ jupneꞌ betchiꞌbo aꞌ pajkoriawaꞌu
\p
\v 6 Ketchia, jiawaita, watem juebenam nau jiaꞌa benasi,
intok ket nokaka aꞌ jiawai, bawe baꞌa biaktiam mayoau
yumaka, kusisi am jiaꞌa benasi jiian, intok kusisi yuku
jimaarim benasi ne jikkajak, inen jiakai:
\q Aleluuya. Bweꞌituk juꞌu itom achai Lios, siꞌime utteꞌakame,
iꞌan jaibu im bwiapo aꞌ nesaweeꞌuta aꞌ teuwaa.
\q
\v 7 Tua itom alleaꞌu nat bepaasi itot aune.
\q Intok itom aꞌ yoꞌoreka aꞌ baisaeꞌuta tee aꞌ teuwaane.
\q Bweꞌituk yumaꞌasuk juꞌu taewai, jukaꞌ Bwalata aꞌ jupneeꞌu.
\q Juꞌu intok aꞌ jubineeꞌu, jaibu tuꞌulisi au yaꞌari.
\q
\v 8 Aapo, iniꞌi tajoꞌori linoꞌ teamtae, tosaalaika intok
bejeꞌewaekamtae yaꞌarita atteatuawak.
\q Bweꞌituk juꞌu linoꞌ teame, jumeꞌ Liojta yoemiam, aapoꞌik
bichapo tuꞌisi am jiapsaꞌuta aꞌ teuwaa.
\p
\v 9 Junak intok juꞌu ankeles inen neu jiiak:
\p ―Aꞌ jiꞌojtenee: “Tua alleenee wameꞌe, jukaꞌ Bwalata
aꞌ jupneꞌ betchiꞌbo aꞌ pajkoriawaꞌu nunuwakame.”
\p Intok ket inen neu jiiak:
\p ―Iniꞌi teuwaawame, tua lutuꞌuriapo, achai Liojta betana
teuwaawaka weye.
\p
\v 10 Inepo, juꞌu ankelejtau ne tonommea kiktek aꞌ yoꞌoribaekai.
Taa aapo inen neu jiiak:
\p ―Kat junuen aane. Bweꞌituk inepo, jiba ele benasi ne
achai Liojta betana tekilta jooa. Intok wate, jumeꞌ Krijtopo
emak werim, jumeꞌ Jesukrijtota betana nok lutuꞌuriata,
ka aꞌ koptame benasia. Achai Liojta ala yoꞌorine.
\p Bweꞌituk juꞌu lutuꞌuria, Jesukrijtota betana teuwaawakame
junaꞌa, jumeꞌe, achai Liojta betana lutuꞌuriata yeteu
nokame, juꞌu am aniame.
\s Juꞌu tosaik kabaꞌi simeꞌu
\p
\v 11 Junak intok, teekata au etapolaata ne bichak. Kabaꞌi
intok, tossaalaika ama yeu machiak. Juꞌu intoko aet yej
simeme, a aet eetume intok Ka yee bai tattaꞌaame ti teakan.
Aapoꞌik, aꞌ yoꞌo nesaweꞌ betchiꞌbo intok lutuꞌuriaka
nassuawamta aꞌ joaꞌ betchiꞌbo junen teakan.
\v 12 Junae pusiwam tajim benasi tachiriakan. Aꞌ kobawat
intoko, jitae yaꞌarim buꞌuum aet joꞌariakan. Team intok
aet jiꞌojteitukan. Aapo jiba amet juꞌunean.
\v 13 Juꞌu aꞌ tajoꞌoriwa, sik saala, ojbopo yokaꞌita benaekan.
Intok iniae, jumeꞌ team, juꞌu Liojta betana nooki, ti teakan.
\v 14 Iniat chaꞌaka, jum teekau jumeꞌ sontaom kaaten,
linoꞌ teamta bejeꞌemta, tojsassaalaik tajoꞌorekai. Tojsassaalaim
intok kakkabaꞌekai.
\v 15 Inia tenpo, tebe kuchiꞌim, bwawika yeu weyen. Junuen
inimmea siꞌime ka nanau machi yoemrata jiokot yaꞌa betchiꞌbo.
Intok junammeu, sisiꞌiwook baarata jipuemta benasi machika,
junae am saweka ameu yoꞌotune. Intok achai Lios, siꞌime
utteꞌakamta betana, aapoꞌik amemak tua ka alleaꞌu betchiꞌbo,
ae betana weyemta, jiokot bem anneeꞌu am bittuane. Senuk,
paꞌasim baꞌawaꞌubaeka amet aꞌ chep chepteꞌe benasia.
\v 16 Intok iniꞌi, aꞌ tajoꞌoriwat intok aꞌ wokimmet, imeꞌe
team weiyaan: “Siꞌime cheꞌa yoꞌo yaꞌarim bepa intok
siꞌime yoꞌo yaaꞌuchim bepa yoꞌotaka nesaweme”, ti jiame.
\p
\v 17 Ankelejta intok ket, taꞌat weyekamta ne bichak.
Junaꞌa, siꞌime aniat naj kateme, wikitchimmeu kusisi amet
chaaek:
\p ―Aꞌabo em kaate intok achai Liojta, jum jiꞌibwa iꞌaꞌpo
nau yajine ―ti jiiak―.
\v 18 Junuen jumeꞌ cheꞌa yoꞌo yaꞌarim, jumeꞌ sontao yoꞌo
yaaꞌuchim intok jumeꞌ kaabeta majjaeme, kabaꞌim intok
jumeꞌ amet joo sasakame, wakajta enchim bwaꞌaneꞌ betchiꞌbo.
Intok kia siꞌimem, jumeꞌ tetekokame oo jumeꞌ ka tetekokame
juniꞌi, jumeꞌ eiyaawame oo jumeꞌ ka eiyaawame juniꞌi
bwaꞌ betchiꞌbo.
\p
\v 19 Junak intoko, jukaꞌ naikim wokekamta intok, aniat
siꞌime jumeꞌ cheꞌa yoꞌo yaꞌarim, bem sontaommake, nau
emo tojilame ne bichak. Junuen jukaꞌ kabaꞌekamta, intok
siꞌime jumeꞌ aamak kateme bejeꞌeka nassua betchiꞌbo
nau emo tojilamtakai.
\v 20 Juꞌu intok naikim wokekame bwijwak. Juꞌu ka lutuꞌuriapo
Liojta betana weyemta teuwaamta make. Juꞌu, aamak aneka,
ae bichapo machilaata, ka a jootu machik yaakame. Junae
machilaatae aꞌ yaakaꞌue, juꞌu ka lutuꞌuriapo Liojta betana
weyemta teuwaame, jumeꞌe, juꞌu naikim wokekamta betana
machilaata mabetakame intok jukaꞌ ale benasi yaꞌarita
aꞌ yoꞌorekame, am bai taꞌaalatukan. Intok junaꞌa naikim
wokekame intok kia juꞌu ka lutuꞌuriapo Liojta betana
weyemta teuwaame juniꞌi, jiapsaka, tajiu, asupreka beeteꞌu
koꞌom woꞌotawak.
\v 21 Juꞌu intoko wate yoemra, juꞌu kabaꞌit yej simemta
tenpo, jumeꞌ kuchiꞌimmea yeu sikammea, suꞌatuk. Intok
siꞌime jumeꞌ wikitchim, junameꞌe bwaꞌaka, joboak.
\c 20
\s Jumeꞌ senu miil wasuktiam teame
\p
\v 1 Iniat chukula intok, ket senu ankelejta, teeka betana
koꞌom weyemta ne bichak. Unnaa mekka koꞌom wojoꞌoriata,
jukaꞌ bweꞌuuk ae aꞌ pattita, aꞌ etapo betchiꞌbo, lutuꞌuriakamta.
Intok bweꞌu sisiꞌiwook wikiam mampo weiyaamta.
\v 2 Iniꞌi ankeles ket, jukaꞌ sikiika woo busanim kobakamta
bwisek. Wakaꞌa cheꞌa bat naataka bakottukaꞌuta, jukaꞌ
bebejeꞌerita intok yee bai tattaꞌaamta. Intok junakaꞌa
aꞌ sumak, senu miil wasuktiam am simsuꞌupo tajtia.
\v 3 Inikaꞌa, jum bwia wojoꞌoku koꞌom aꞌ jimaak, junamaꞌa
aꞌ pattakai. Intok juꞌu ae aꞌ pattakaꞌut, machilaata
yaak, junuen ka aꞌ etapotuneꞌ betchiꞌbo. Junuen, siꞌime
aniat jukaꞌ yoemrata, ka intok aꞌ bai tattaꞌaaneꞌ betchiꞌbo,
senu miil wasuktiam simsuꞌutajtia. Intok junameꞌe wasuktiam
simsuko, utteꞌa, juchi chuubaa aꞌ suꞌu tojineꞌpo.
\p
\v 4 Sep ket, yoꞌowem ama jojoyeꞌum ne bichak. Intok
junammet, jumeꞌ yee yaꞌuraa bittua betchiꞌbo lutuꞌuriatuawakame
ama jookan. Ketchia ne am bichak, wameꞌe, achai Liojta
nok lutuꞌuriata, jukaꞌ Jesukrijtota betana lutuꞌuriata
bem teuwaa betchiꞌbo, koba chuktawakame. Inimeꞌe, jukaꞌ
naikim wokekamta intok kia jukaꞌ ale benasi yaꞌarita
juniꞌi, ka aꞌ yoꞌorek. Intok kia mampo oo koba mejeꞌeku
juniꞌi junae betana machilaata ka aꞌ mabetakame. Inimeꞌe
jiabijtekame ne bichak. Intok Jesukrijtotamak, senu miil
wasuktiammeu tajtia, nesawekame.
\v 5 Iniꞌi junaꞌa, cheꞌa bat juꞌu yee jiabijtetuawakame.
Taa waate, jumeꞌ kokkoarim, ka jiabijtek. Chukula, junameꞌe
senu miil wasuktiam simsuk ala, jiabijtekai.
\v 6 Tua alleenee intok wepulsi, tua achai Liojta betana
yoemiarimtune, wameꞌe cheꞌa bat, yee jiabijtetuawakaꞌpo
jiabijteneeme. Junammeu, chukula jiba betchiꞌbo bem kokkoneeꞌu
kaachin ameu yumaꞌane. Ala bempo, Jesukrijto intok achai
Liojta betana, tekiaka, yee nokriane. Intok senu miil
wasuktiam simeꞌu tajti aamak nesaune.
\p
\v 7 Jumeꞌ senu miil wasuktiam simsuko, juꞌu bebejeꞌeri,
aꞌ etaꞌipo yeeu suꞌu tojinaa.
\v 8 Intok junaꞌa, aniat, siꞌime yoemrata, aꞌ bai taꞌaꞌ
betchiꞌbo yeu weene. Makook teamta intok jukaꞌ Kook
teamta am bai taꞌaabaekai. Intok juname betana jumeꞌ
sontaom am nassuaneꞌ betchiꞌbo. Bawepo juꞌu seꞌeta benasi,
ka a naꞌikiatu maisi juebenam.
\v 9 Junuen san junameꞌe siꞌime aniat betana aman jikau
nau yajak. Intok jukaꞌa, Liojta yoemiam ama jiapsaꞌuta,
intok ket jukaꞌ bweꞌu joꞌarata, aapoꞌik Liojta nakeꞌuta
nau kontak. Taa juꞌu achai Lios, teeka betana, tajita
koꞌom simtuak intok junaen, jumeꞌ aꞌ bejeꞌeme tokti siꞌimem
tayakai.
\v 10 Juꞌu intok bebejeꞌeri, junameꞌe bai taꞌaakame, tajiu,
asupreka jiba beeteꞌu koꞌom jimmaatuk. Jukaꞌ naikim
wokekamta intok jukaꞌa, ka lutuꞌuriapo Liojta betana
weyemta nokakamta mak nau bem koꞌom woꞌotawakaꞌpo. Junamaꞌa
jiokot yaꞌatune, tukaariat intok taewait naa buustia
jiba betchiꞌbo.
\s Tosaika, cheꞌa yoꞌota katekaꞌabichapo, yee yaꞌuraa bittuawame
\p
\v 11 Junak intoko, bweꞌuuka, jukaꞌ cheꞌa yoꞌota ama yeyesaꞌuta,
tossaalaik ne bichak. Junamaꞌa intok, jukaꞌ ama katekamta
ne bichak. Jum junae aneꞌebichapo, juꞌu bwia intok juꞌu
teeka, sejtul wechiapo ama kaitatuk. Intok junameꞌe ka
jak intok juꞌuneiyaatuk.
\v 12 Jumeꞌ kokkoarim intok ne bichak, jumeꞌ eiyaawame
intok kia jumeꞌ ka eiyaawame juniꞌi jiabijtelamtakai.
Intok achai Liojta bichapo jaꞌabwakame. Jumeꞌ liprom,
ammea bem yaꞌuraa bittuaneꞌ betchiꞌbo, etapowak. Intok
ketchia juchi senu lipro, jumeꞌ jiba yuu jiapsame ama
jiꞌojteim ket etapowak. Junameꞌe kokkoarim, yaꞌuraa bittuawak,
jita bem yaꞌariakaꞌpo amani, junamaꞌa liprompo ame tana
aꞌ jiꞌojteitukaꞌa benasia.
\v 13 Jumeꞌ kokkoarim, jum bawepo aneꞌum ama yeu sajak.
Intok jumeꞌ bwiapo maꞌarimtukaꞌum, ama yeu sajak. Intok
siꞌime yaꞌuraa bittuawak, weꞌepulaka, jita bem yaꞌariakaꞌpo
amani.
\v 14 Sep, jumeꞌ ka tuꞌisi tawaka kokokame, intok jumeꞌ
bwiapo mekka koꞌom jipuꞌuwaꞌum, jum tajita, jiba beeteꞌu
koꞌom woꞌotawak. Iniꞌi tajita jiba beeteꞌu junaꞌa, woisi
juꞌu jiba betchiꞌbo kokkowame.
\v 15 Junamaꞌa intok ket koꞌom woꞌotawak siꞌime jumeꞌe,
jum jiꞌosiam jiba yuu jiapsineeme jiꞌojteimpo, ka ama
teuwakame.
\c 21
\s Bemela teeka intok bemela bwia
\p
\v 1 Chukula ket, teekata intok bwiata bemelak ne bichak.
Bweꞌituk juꞌu teeka intok juꞌu bwiia, bat naataka juꞌunakteim,
jaibu kaita tukan. Intok kia juꞌu bawe juniꞌi kaita
tukan.
\v 2 Inepo, Joan teame, jukaꞌ Liojta betana atteari, bweꞌu
joꞌarata aapoꞌik eiyaaꞌuta, jukaꞌ bemela Jerusalen teamta
ne bichak. Inikaꞌa Liojta katekaꞌpo betana, teeka betana
koꞌom weyemta. Iniꞌi, siꞌimeku yumaꞌisi tuꞌuteitakai,
senu bemeta, kunabaeka, juꞌu aꞌ kunabaeꞌu betchiꞌbo tutuꞌulisi
au aꞌ aꞌaanaalaatukaꞌa benasia machikai.
\v 3 Teeka betana intok jiawaita utteꞌakamta ne jikkajak,
inen jiamta:
\p ―Aꞌ juꞌuneiyaane, juꞌu Lios, jumeꞌ bwiapo jomemmak jiapsa.
Junameꞌe intok aapoꞌik betana yoemratune. Intok jiba
Lios, aapo amemak anne. Junuen junammeu Liojtu betchiꞌbo.
\v 4 Juꞌu achai Lios, junameꞌe, ka intok am bwanneꞌ betchiꞌbo
am aniane. Intok juꞌu kokkowame kaita intoko tune. Intok
kia opoam woꞌotawame juniꞌi, jita betchiꞌbo ka yantelwame
intok kia jita koꞌokosi maachikai juniꞌi kaita intoko
tune. Bweꞌituk siꞌime juꞌu bat naataka ayukaꞌu, jaibu
simsuk.
\p
\v 5 Junak intok juꞌu, jum yoꞌo yaꞌarita yeyesaꞌpo katekame
inen jiiak:
\p ―Aꞌ juꞌuneiyaaꞌe, inepo ne siꞌimeta bemelasi aꞌ jooa.
\p Intok ket inen jiiak:
\p ―Aꞌ jiꞌojtene, bweꞌituk iniꞌi teuwaawame, tua lutuꞌuria,
intok a aet eetuwa ―ti jiiak.
\p
\v 6 Chukula ket inen neu jiiak:
\p ―Jaibu chupsuk. Inepone junaꞌa, juꞌu cheꞌa siꞌimeta
naatek naateka intok cheꞌa chukula juniꞌi, juꞌu jiapsineeme.
Jumeꞌ leetam Alpa intok juꞌu Omeka teame benasia. Jukaꞌ
nee betana tuꞌik waatamta, jiba betchiꞌbo au tuꞌuwatunemta
inepo ne aꞌ bittuane, kaita au waatakai.
\v 7 Juꞌu, jukaꞌ ka tuꞌik kobaꞌika yeu sikame, siꞌimeta
inikaꞌa au aꞌ naꞌikiatukaꞌa benasi aꞌ mabetne. Inepo
intoko, ae betchiꞌbo Liojtune, aapo intoko in yoemiatune
―ti jiiak―.
\v 8 Taa jumeꞌ nanawiam, jumeꞌ Liojta ka sual taꞌaame,
jumeꞌ ka tuꞌik tiusi machik joame, jumeꞌ yee sussuꞌame,
jumeꞌ tattaꞌabwi jaamuchimmak emo tuꞌureme, jumeꞌ yee
siboka yee jittowamta weetuame, jumeꞌ ka lutuꞌuriapo
liosim yoꞌoreme, intok siꞌime jumeꞌ ka lutuꞌuriata teuwaame,
inimmeu tajita, asupreka jiba yuu beeteꞌu bem yajineeꞌuta
ameu chupne. Iniamak woisi jiba betchiꞌbo kokkoneekai.
\s Juꞌu bemela bweꞌu joꞌaraa, Jerusalen teame
\p
\v 9 Junak intoko, woo busanika jumeꞌ ankelesim, luꞌutineeka,
chukula jukaꞌ koꞌokoata woo busan bwejaꞌim benampo tapunika
aꞌ weiyaame betana, senu neu siika intok inen neu jiiak:
\p ―Aꞌabo weye ―ti neu jiiak―, ineponee intok, jukaꞌ kunabaemta
ne enchi bittuane, jukaꞌ Bwalaꞌ teamta jubineeꞌuta.
\p
\v 10 Liojta tuꞌu jiapsi betana in bittuawakaꞌpo intok,
juꞌu ankeles, senu kawiu, mekka jikau nee nuk siika. Intok
bweꞌu joꞌaraa, Liojta betana Jerusalen teakai, teekau,
Liojta betana koꞌom weyemta nee aꞌ bittuak.
\v 11 Junaꞌa bweꞌu joꞌaraa, achai Liojta tachiriae mamachiakan.
Juꞌu intoko aꞌ beojkoekaꞌu, tetata tuꞌisi ujyoik benaekan,
teta jaspeꞌ teamta, naj mamachiakaꞌabenakai.
\v 12 Junae bweꞌu joꞌaraata konila, bweꞌu teta korata,
mekka jikatchika weyekan. Woj mamni ama wooim, intok,
aman yeu rejtiwaꞌum jipuen. Intok jum, ama yeu rejtiwaꞌabeꞌekatana,
ankelesim weꞌepulaka jaꞌabwekan. Intok junamaꞌa, Ijraꞌel
tukaꞌuta yoemrata betana, woj mamni ama wooi aꞌ yoemiam,
jumeꞌ bem team jiꞌojteimtukan.
\v 13 Taꞌata yeu weꞌe betana bajireakan jumeꞌ ama yeu
rejtiwame. Intok norte betana intok baji. Taꞌata ama
wecheꞌu betana intok baji. Sur betana intok bajikai.
\v 14 Junaꞌa bweꞌu joꞌaraata teta kora, woj mamni ama
wooi, tetam nawakan. Bwalaꞌ teamta betana, jumeꞌ woj mamni
ama wooi yeu puꞌarim, yeteu bittuarim, bem team junammet
jiꞌojteim.
\p
\v 15 Juꞌu ankeles, neu nokaꞌu, bakata benak, sawai tomie
yaꞌarita jipuen. Junuen jukaꞌ bweꞌu joꞌaraata, jumeꞌ
ama yeu rejtiwame intok ae konila jukaꞌ teta korata
ae am tamachia betchiꞌbo.
\v 16 Juꞌu bweꞌu joꞌaraa konila, naarekesi naikim tebeakan.
Juꞌu aꞌ tebea, jiba aꞌ bweka beepaniakan. Juꞌu ankeles,
junakaꞌa bweꞌu joꞌaraata juꞌu bakata benakue aꞌ tamachiak.
Junaꞌa intoko, wooi miil intok ama naiki siento kilometrom
jipuek. Aꞌ tebea, jikau bicha intok kia aꞌ bwekawa juniꞌi,
naarepaniakan.
\v 17 Chukula ket jukaꞌ teta korata, jikau bicha aꞌ tamachiak.
Junaꞌa intoko baji taka intok ama naiki metrokan juꞌu
tamachiawamta, jukaꞌ ankelejta sawaꞌuta, inim jaisa aꞌ
sawaawaꞌa benasi weyekai.
\p
\v 18 Junae, juꞌu bweꞌu teta kora ujyoi teta jajpeꞌ teamtae
benakue yaꞌaritukan. Juꞌu bweꞌu joꞌaraa intok, sawai
tomi ausuꞌliaka bikriota benasi naj mamachikai.
\v 19 Jumeꞌ tetam junae bweꞌu teta korata amet nawakaꞌum,
siꞌime ka nanau machika tutuꞌuli tetammea, ujyoisi yaꞌaritukan.
Cheꞌa bat juꞌu senu teta, jajpeꞌ teamtae. Intoko iniamak
woika, juꞌu teta, sappiiroꞌ teamtae. Intoko, iniamak bajika
teta aakataꞌ teamtae. Intok iniamak naikika, teta ejmerallaꞌ
teamtae.
\v 20 Intok iniamak mamnika, teta oniseꞌ teamtae. Intok
iniamak busanika, kornaliinaꞌ teamtae. Intok iniamak
woo busanika, krisoolitoꞌ teamtae. Intok iniamak woj
naikika, beriiloꞌ teamtae. Intok iniamak batanika, topaasioꞌ
teamtae. Intok iniamak woj mamnika, krisopraasaꞌ teamtae.
Intok iniamak woj mamni ama wepuꞌulaika, jasintoꞌ teamtae.
Intok iniamak woj mamni ama woika, amatiijtaꞌ teamtae.
\v 21 Woj mamni ama woika jumeꞌ ama yeu rejtiwame, woj
mamni ama woi, bawepo koyo tetamtukan. Weꞌepulaka junameꞌe
ama yeu rejtiwame, seej chukti, wepul koyo tetae yaꞌatukan.
Juꞌu intoko bweꞌu joꞌaraapo cheꞌa bweꞌuuk boꞌo, aet aman
kikkimuwame, sawai tomi ausuꞌlikue yaꞌatukan, bikriota
benasi naj mamachikai.
\p
\v 22 Junama bweꞌu joꞌaraapo, kaita teꞌopota ne bichak.
Bweꞌituk juꞌu achai Lios, siꞌime utteꞌakame, teꞌopota
yejꞌeaꞌpo ama katekan. Intok ket juꞌu Bwala.
\v 23 Junaꞌa bweꞌu joꞌaraa, taꞌata betana intok kia mala
mechaata betana juniꞌi, tachiriata ka aꞌ waata. Bweꞌituk
jiba aapoꞌik achai Liojta betana juꞌu tachiria aet mamachi,
intok juꞌu Bwala ket junaen tachiriatukan.
\v 24 Ka nanau machika juꞌu yoemra jinneꞌuwakame, junamaꞌa
bweꞌu joꞌaraapo aꞌ tachiria machiku naj katne. Intok
jumeꞌe, inim cheꞌa yoꞌo yaꞌarim junae cheꞌa yoꞌotau emo
suꞌu tojinee aꞌ yoꞌorekai.
\v 25 Junae, jumeꞌ ama yeu rejtiwame taewapo ka eꞌetanaa.
Intok junamaꞌa kaita tukaariatune.
\v 26 Junamaꞌa siꞌime ka nanau machi yoemrata betana,
eiyaawaka, bem yoꞌoriꞌeewaꞌuta, junamaꞌa yoꞌotau emo suꞌu
tojak, aꞌ yoꞌorekai.
\v 27 Taa jita juniꞌi, ka tuꞌika ka aman yumaꞌane. Intok
kia jabetaka juniꞌi, ka tuꞌika, ka bibit machik joame,
oo ka lutuꞌuriakamta boꞌo jooriame ka aman kibaktuanaa.
Ala jumeꞌe, liprom, Bwalata jipueꞌpo jumeꞌ jiba yuu jiapsineeme
jiꞌojteim jiba aman yajine.
\c 22
\p
\v 1 Junak intoko, juꞌu ankeles, batweta kalajkok nee
bittuak, jiba yuu jiapsi betchiꞌbo, baꞌakamta. Junaꞌa,
bikriota benasi naj mamachiakan. Intok juꞌu, achai Liojta
intok juꞌu Bwalata, yoꞌotaka aꞌ katekaꞌa betana yeu boꞌokan.
\v 2 Junamaꞌa, bweꞌu joꞌaraapo, bweꞌu boꞌot, aet aman kikkimuwaꞌut
nasuku intok jum batwepo, nau bicha aꞌ mayoammetchi, jumeꞌ
juyam jiba yuu jiapsiwamta yee makame ama yoꞌotun. Wasuktiapo,
woj mamni ama woisi tatakakai. Chikti metpo tatakan.
Jumeꞌ intoko, junae juya sawam, inim ka nanau machi yoemrata,
emo inneꞌetetua betchiꞌbo, jittoa.
\v 3 Junamaꞌa, kaita intok aunee juꞌu ka tuꞌiku chupiatuneeme.
Achai Lios intok juꞌu Bwala, bempo junamaꞌa bweꞌu joꞌaraapo,
cheꞌa yoꞌotaka ama joone. Intoko, jumeꞌ aapoꞌik yeu puꞌarim,
aꞌ tekilwata joaka aꞌ nak yoꞌorine.
\v 4 Junameꞌe, tua aamak aneka aꞌ bitnee jukaꞌ Lios achaita.
Intok junae team, bem koba mejeꞌeku aꞌ jipuꞌune.
\v 5 Junamaꞌa kaita intok tukaariatune. Jumeꞌ intoko,
junamaꞌa jiapsame, tajita amet tachirianemta ka waatane.
Intok kia taꞌata juniꞌi, bweꞌituk juꞌu achai Lios amet
tachiriane. Intok junameꞌe jiba yuu betchiꞌbo ama nesaune.
\s Ka buꞌuuka beꞌee, Jesukrijtota aꞌ nottineeꞌu
\p
\v 6 Chukula ket juꞌu ankeles inen neu jiiak:
\p ―Iniꞌi teuwaawame, tua lutuꞌuria intok a aet eetuwa.
Juꞌu intoko achai Lios, jiba aapo, jumeꞌ aapoꞌik betana
juꞌuneetuawaka yeteu noktuawame juꞌu amemaktuka am aniame,
aapo, jukaꞌ ankelejta yeu bittuala, junuen jukaꞌ lauti
yeu weenemta, jumeꞌ aapoꞌik betana yeteu noktuawame, aꞌ
juꞌuneiyaatuaꞌ betchiꞌbo.
\p
\v 7 ―Lauti ne aꞌabo weene.
\p Tua alleenee waꞌa, Liojta betana nok lutuꞌuriata nok
jikkajame. Jukaꞌ inim lipropo jiꞌojteita.
\p
\v 8 Inepo Joan teame inikaꞌa weemta ne jikkajak intok
ne aꞌ bichak. Chukula intoko inikaꞌa jikkajisuka intok
aꞌ bitchukai, junae juꞌu ankelejta junakaꞌa nee tejwaakamtau
ne au tonommea kiktek junuen aꞌ yoꞌoribaekai.
\v 9 Taa junaꞌa:
\p ―Kat junuen aane ―ti neu jiiak―. Bweꞌituk inepo, achai
Liojta betana ne tekilta jooa, jiba ele benasia intok
jumeꞌ Krijtopo emak werim, jumeꞌ achai Liojta betana
yeteu noktuawame, intok siꞌime jumeꞌe, inim lipropo jukaꞌ
jiꞌojteita aꞌ nok jikkajame benasia. Achai Liojta ala
yoꞌorine.
\p
\v 10 Inen ket neu jiiak:
\p ―Ka empola aꞌ juꞌuneiyaanee jukaꞌ Liojta nok lutuꞌuriata
inim lipropo jiꞌojteita. Bweꞌituk jaibu yumaꞌaseka weye
juꞌu taewai, inikaꞌa siꞌimeta aet chupneeꞌu.
\v 11 Junuen san, jukaꞌ ka tuꞌik joamta, ka tuꞌik aꞌ joaꞌu
betana ka au suuane. Juꞌu intoko, tiusi machik ka tuꞌik
joame, junakaꞌa ka aꞌ koptane. Taa juꞌu intoko, tuꞌik
boꞌo jooriame, junakaꞌa aꞌ joone. Juꞌu intoko, wepulsi,
achai Liojta betchiꞌbo jiapsame, junakaꞌa ka koptane.
\p
\v 12 ―Jeewi. Lauti ne aꞌabo weene. Intok inepo, ne aꞌ
weiyaa, weꞌepulaimmeu am mik betchiꞌbo, jita bem yaꞌariakaꞌpo
aman.
\v 13 Ineponee junaꞌa, siꞌimeta naatek naateka intok
juꞌu cheꞌa chukula juniꞌi, jiba jiapsineeme. Jumeꞌ leetam
Alpa intok juꞌu Omeka teame benasia.
\p
\v 14 Tua alleenee jumeꞌe, Liojta mak emo tuꞌuteka, ka
tuꞌika kaita joaka jiapsame. Junuen, juꞌu juya, jiba yuu
jiapsiwamta yetet autuamtau lutuꞌuria betchiꞌbo. Intok
ket, bweꞌu joꞌaraau, aman kikkimuwaꞌpo luula a aman bem
kimuneꞌ betchiꞌbo.
\v 15 Taa paꞌakun tawane, siꞌime jumeꞌ ka tuꞌika ka bibit
machik joame, intok jumeꞌ yee sibowamta boꞌo jooriame.
Intok jumeꞌe, tattaꞌabwi jaamuchimmak emo tuꞌureme. Intok
jumeꞌ yee sussuꞌame. Intok jumeꞌe, ka lutuꞌuriapo liosim
yoꞌoreme. Intok siꞌime jumeꞌe, jukaꞌ aa nokiꞌichiata
eiyaaka intok aꞌ boꞌo jooriame.
\p
\v 16 ―Inepo Jesuj teame, ne betana in saweꞌuta, ankelejta
aman bittuari. Junuen inikaꞌa siꞌimeta, jumeꞌ nee sualeka
nau emo totojame am juꞌuneiyaatuaneꞌ betchiꞌbo. Inepo
ne junaꞌa, juꞌu cheꞌa bat naataka yoꞌo yaꞌarita, Labiitukaꞌutat
yeu simria. Intok inepone junaꞌa juꞌu choki, mekka machika,
ketwoo yeu weamamta benasi maachime.
\p
\v 17 Juꞌu, Liojta betana tuꞌu jiapsi intok jumeꞌ aꞌ
sualeka jukaꞌ Bwalata aꞌ kunakame benakai:
\p ―Aꞌabo weye ―tim jiia.
\p Intok juꞌu aꞌ jikkajame:
\p ―Aꞌabo weye ―ti ket jiune.
\p Juꞌu intoko jiꞌipeame, intok am waatame, aꞌabo sikaa,
baꞌam, jiba yuu jiapsiwamta yee makame, kia beja am jiꞌine.
\p
\v 18 Siꞌimem jumeꞌe, jukaꞌ Liojta nok lutuꞌuriata, inim
lipropo jiꞌojteita aꞌ jikkajame, inikaꞌa ne am juꞌuneiyaa
iꞌa. Jabetaka juniꞌi, inia weyemtamak watek aamak aꞌ
kuutako, juꞌu achai Lios, jukaꞌ tua ka tuꞌika, koꞌokoata
inim lipropo jiꞌojteita, cheꞌa juniꞌi naa buusti aꞌ bittuane.
\v 19 Intok kia jabetaka juniꞌi, Liojta betana nok lutuꞌuria,
inim lipropo jukaꞌ jiꞌojteita, jita juniꞌi yeu tawaako,
juꞌu achai Lios, inikaꞌa inen anemta, jumeꞌ liprom, jum
jiba yuu jiapsineeme jiꞌojteimpo, intok kia jum bweꞌu
joꞌara, Liojta yeu puꞌaripo juniꞌi, yeu aꞌ tawaane. Inimeꞌe,
inim jiꞌojteipo juꞌu au naꞌikiaꞌeaꞌu betana.
\p
\v 20 Juꞌu, inika weyemta aꞌ juꞌuneiyaa tebome, inen jiia:
\p ―Jeewi, lauti ne aꞌabo weene ―ti jiia.
\p Inepo intok inen jiia:
\p ―Tua junuentune. Lauti aꞌabo weenee, yoꞌowe Jesukrijto.
\p
\v 21 Juꞌu itom yoꞌowe Jesukrijto, juꞌu aapoꞌik betana
tuꞌikue enchim siꞌimem alleetuane. Tua junuentune.