\id JON
\mt Nu gwate Jonás
\c 1
\s Jonás‑ni ruxunnina ge Tata Do Yebáha
\p
\v 1 Ttu sá unne Tata Do Yebáha belise Jonás xiꞌini benne lábie Amitai, nianna ree na: 
\p
\v 2 ―Bedú tse nna ugia lheꞌe yiesi ra xxeni leni lána Nínive.  Nia tsekilu kixxiꞌienlu ka benne ge nu satsa sateke, kumu axtaba neti chi biláti nu satsa ruinke.
\p
\v 3 Ttaka Jonás‑ni nna birialana bexunnina ge Tata Do Yebáha, diana daka Tarsis, tti ugwadina dianaha, bisinna lheꞌesi Jope.  Yiesiha rena roꞌo indatooha. Nia gwaxxakana ttu barku, chi du nuha iriana tsiana Tarsis.  Nianna utixa geni nna utaꞌana lheꞌe nuha ki tsia lenna ka benne dia lheꞌe barkuha.  Ania benna ki iruꞌunnana tsiana idittu, rakinna ki abitturu saxxaka Tata Do Yebáha na.
\v 4 Ttaka Tata Do Yebáha nna benie ki biria ttu be idí nna uyuꞌuna lo indatoo ata dianaha nna udú lii xxatta lo nuha. Ka nu dia lo barkuha rakakinna chitteba ixá nuha.
\v 5 Ka nu ribeni sina lhe'e barkuha nna yalhá usikinna. Nianna udulokana kua ttu ttubakana unnabakana len ka diosi gekaniha ki odilá ka benneha kana; lhe udulokana bedelhakana lheꞌe indaha nu sia lo barkuha ki abitturu aka nuha idiꞌi.  Jonás‑ni nna lhiꞌu lheꞌe barkuha‑la chi utaꞌana tena riluelaba rakinna.
\v 6 Tti gwataꞌa nu rinnabiana lhe'e barkuha ata tenaha, nianna rana na:
\p ―¿Beaka telu na, xa nu lo ribisiela? ¡Kanna ugwadda nna unnaba leni diosi geluha, ni kina gaa gwasatuaba lebie riꞌi ki abittu lhuxariꞌi!
\p
\v 7 Ka nu ribeni sina lheꞌe barkuha nna ra luesi ttu ttukani:
\p ―Gwaltá nna udelhariꞌi suerti ki unna liina nuxariꞌi nuni daa tulha, de nuha nna rateriꞌi aní. 
\p Nianna bedelhakana suertiha nna kweꞌe Jonás‑niba gwa re nuha.
\v 8 Nianna rákana Jonás‑ni: 
\p ―Utixxiꞌien riꞌitu, ¿bí ge nna rateriꞌi aní? ¿Bí ge dalu ni, lhe gá dalu, lhe bí lá ata daluha lhe nú benne lu?
\p
\v 9 Lana nna bekabina rana:
\p ―Neti ankaa benne hebreo nna ria lasia Tata Do Yebáha, benne anke Diosi rinnabie yebáha lhe benie indatooha lhe benie yu bisi lhe.
\p
\v 10 Nianna utixxiꞌienna kana rana deki rekibana rukatsi loni ge Tata Do Yebáha.  Ka nuha nna yalhá usikinna tti binakana deki rekina ruxunnina ge benneha. Nianna rákana na: 
\p ―¿Beaka benlu aná?
\v 11 ¿Bíla anka nu uddakatu lu ki ebe sii lo indatoo‑ni? ―Ania rákana na kumu adíla chi ridú lii lo indatooha.
\p
\v 12 Lana nna bekabina rana kana: 
\p ―Gwaludaxxu neti nna gwaludelha neti lheꞌe inda‑ni ki ebe sii loni. Kumu neti yu xeabaa de netiba nna ruyúle elha disa tsitsi‑ni.
\p
\v 13 Ttaka ka nu ribeni sina lheꞌe barkuha nna gwa benrubakana doelha tsitsi ki odekikana lo barkuha ki ebeakana na roꞌo indaha, ttaka labí udákana, kumu adírula dia indaha radda xxatta loni.
\v 14 Nianna unnabakana len Tata Do Yebáha rákane: 
\p ―¡Tata Do Yebáha, rinnabatu lo kwinalu bittu utseꞌe lolu riꞌitu de lo niꞌa ge nubiyú‑ni lhe anágaba ganna ttixka abittuba bixa benna, bittugaba udelhalu kweꞌetu elhutti geni, kumu kwinalu, xa tata, ruinbalu attiba rakaba lelu!
\p
\v 15 Nianna tti bedaxxukana Jonás‑ni nna bedelhakana na lheꞌe indaha nna bebe sítteba lo nuha.
\v 16 Tti bilákin nu ribeni sina lheꞌe barkuha nu ukaha, nianna utta chietiru elha rasi gekani len Tata Do Yebáha nna tti bettikana ka nimala nna betekana úna gee lhe begwekane nu chi rákana deki utekana.
\p
\v 17 Ttaka Tata Do Yebáha chila gaꞌananie ttu belha barto ki utabina Jonás‑ni, nna tsunna ubisa nna tsunna ela uyuꞌu Jonás‑ni lheꞌe belhaha.

\c 2
\s Jonás‑ni rilhapina tisa len Tata Do Yebáha
\p
\v 1 Lheꞌe belhaha‑ba yuꞌu Jonás‑ni tti ulhapina tisa len Tata Do Yebáha, benne anka Diosi geniha, 
\v 2 rane:
\b 
\q Neti tti lo ruyúa elha disaha unnea belisaa lu, xa Tata Do Yebáha kia; 
\q lu nna gwa biyienbinlu kia. 
\q Roꞌo elhuttiha‑ba chi yuꞌa uresiꞌaya nna gwa biyienbinlu tsiꞌa.
\q
\v 3 Lhiꞌu lheꞌe indatooha‑li bedelhalu neti,
\q bedekiba indaha ikia;
\q benbalu ki beguku nu radda loniha ikia.
\q
\v 4 Laꞌania nna belaba lasia rakati: “Gaxa labíru raka uyúlu neti,
\q uxí loti laa biruga iláti yotu leꞌa geluha.” 
\q
\v 5 Ttu ttíruba beguku indaha itúbaa, 
\q axtaba ata anka chulhaha ubinnia. 
\q Ka tubaa daa lheꞌe indaha birilhibakana bega ikia.
\q
\v 6 Ataliba ridú lii xan ka iꞌiya‑na lhiꞌu lheꞌe indatooha, nialiba ubinnia.
\q Uxí loti ttu tsaba chi beto yiesi lo yu‑ni ikia, rakati laa biruga eriaya.
\q Ttaka lu, xa Tata Do Yebáha benne anka Diosi kia, roꞌo elhuttiha‑ba chi yuꞌa nna betelealu neti.
\q
\v 7 Atti chi ranniti deki chi daa elhuttiha kia, 
\q laꞌania nna bexxa lasia lu, xa Tata Do Yebáha kia, nna unnabaa lenlu 
\q nna gwa bisinba ka tisa kiaha axta ata dolu lheꞌe yotu leꞌa geluha.
\q
\v 8 Ka nu ria lekani ka diosi abí dika ixú, 
\q ruddába ikikani nu tse redá lelu rutelu, xa Tata Do Yebáha kia.
\q
\v 9 Ttaka neti nna ugwenia lu ixkixaru atti uttia ka kuꞌunaha utea úna lenlu;
\q utebaa nu chi begwea tisa deki utea,
\q kumu lu, xa Tata Do Yebáha kia, rodilálu ka benne.
\p
\v 10 Nianna beni Tata Do Yebáha ki betelea roꞌo belhaha Jonás‑ni roꞌo indaha.

\c 3
\s Jonás‑ni rekina uguixxiꞌa lheꞌe yiesi Nínive
\p
\v 1 Nu berupa libeha nna unne Tata Do Yebáha len Jonás‑ni, ree na:
\p
\v 2 ―Bedú tse nna ugia Nínive. Lheꞌe yiesi ra xxeni leniha nna nia kixxiꞌalu nu upeya lu.
\p
\v 3 Nianna bedú tse Jonás‑ni nna uluꞌuna neda diana Nínive, benbana nu ra Tata Do Yebáha. Yiesiha yalhá xxeni anka nuha, tsunna ubisa tteba isá ttu benne tsekie itú lheꞌeni.
\v 4 Nianna utaꞌa Jonás‑ni lheꞌe yiesiha, udána ttu sá nna riguixxiꞌana rana:
\p ―Iki de a chua (40) ubisaha, Nínive‑ni utseꞌe loba Tata Do Yebáha na.
\p
\v 5 Ka nu lheꞌesi Nínive‑ni nna ugiaba lekani ge nu uni Tata Do Yebáha, nna unnekana rákana deki utte ubina lheꞌekani. Iyába ka nu ra xxeni lekani lhe ka nu abittu ra xxeni lekani bikukana ttu xo ttipa gekani kini belaꞌa deki gwalíbakinna deki roduna kana ge nu ruinkanaha.
\v 6 Tti bina nu rinnabia ge lheꞌesi Nínive nu ra Jonás‑ni, nianna udú lína lo xxila dona ata rinnabianaha nna uleana xo tse nukunaha nna bikugabana ttu xo ttipa nna udona lo te ge guiha.
\v 7 Lana itupa lenna ka nu riseꞌe kweꞌeniha uddelhakana ki iria ka nu tsekikana itúba lheꞌesi Nínive kixxiꞌakana innákana:
\p ―Lebiꞌi, ka benne, bittu bi gole lhe nigaba iꞌiyale inda lhe. Anágaba ka kuꞌuna bia gele‑na bittugaba ugole kana lhe nigaba ugiꞌale kana inda.
\v 8 Nu uinlale, gwalukula xo ttipa gele, itupa lenle ka nimala‑na, nna itú lele gwalinnaba len Tata Do Yebáha lhe kua ttu ttule gwaluddana nu satsa ruinle‑na, lhe gwalikua nu rutti luesile‑na lhe,
\v 9 kini ni kina gaa gweyalhaba le Tata Do Yebáha nna satua lebie riꞌi, abittuba utseꞌe loe riꞌi.
\p
\v 10 Tti bilani Tata Do Yebáha nu benkanaha, beddankana nu satsa ruinkanaha, laꞌania nna bodúne ge nu ree deki uddake kana, laꞌania nna labí bixa benie.
\c 4
\s Jonás‑ni riseꞌenna len Tata Do Yebáha
\p
\v 1 Ttaka Jonás‑ni labí uyuꞌu leni nu beni Tata Do Yebáha, yalhá bisaꞌa xxattinna.
\v 2 Nianna ulhapina tisa lenie rane:
\p ―Tata Do Yebáha kia, kaxa gwalíbati nu ria tti doa lheꞌesi kiaha. De nuha nna benia bexunnia diaya daka Tarsis, kumu yubaa lu ankalu ttu Diosi re tse lelu, lhe ratua lelu ka benne lhe anágaba labí nnela riseꞌenlu. Lu ankalu ttu benne raka xxattinlu ge ka benne. Rodúbana lu ge nu satsa rulaba lelu uddakalu ke, de nuha nna labí ruinlu na.
\v 3 Laxkala nnanna rinnabaa lolu, xa Tata Do Yebaa kiaha, bettittu neti kumu tserula gattia läkila aka benrua.
\p
\v 4 Tata Do Yebáha nna ree na:
\p ―¿Si rakinlu deki tseba nuna ruinlu risaꞌa xxattinlu?
\p
\v 5 Nianna beriaba Jonás‑ni roꞌesiha nna udona daka ta riria ubisaha. Nia bedona ttu yoꞌo lhaga nna udona lheꞌe nuha ata xulaha, axtaliba ki ilenna bixa aka lheꞌesiha.
\v 6 Tata Do Yebáha, benne anka Diosiha nna benie ki beꞌeyu ttiba ttu tteddapa ata do Jonás‑ni ki aka xula ikini nna edú tse leni. Jonás‑ni nna yalhá itta bedú leni de udona ata xula ge ttedduha.
\v 7 Ttaka attu dilaha atti chi utsa yetsi ge tatubisaha, Tata Do Yebáha benttebe ki utaꞌa ttu belha to xan ttedduha nna utona lhu nuha nna ubisibana.
\v 8 Tti chi do tatubisa gwetsá to nna uddelhattebe tu be saꞌa tuu, dana daka ta riria ubisa nna bekeꞌeba tatubisaha iki Jonás‑ni nna bechulhinna, tuttíruba ruinna gattina, nianna rana:
\p ―Tserula gattia lä kila aka bania.
\p
\v 9 Nianna ra Tata Do Yebáha Jonás‑ni:
\p ―¿Si análi riseꞌenlu de ubisi ttedduha?
\p Lana nna rana:
\p ―Yalhá galá risaꞌati axtaba rakati tserula gattia.
\p
\v 10 Tata Do Yebáha nna ree na:
\p ―Ki lu, ttedduha delo ttu elaba beꞌeyuna nna delo ttu elaba ubisina nna lu nna gwatua lelu na de ubisina, ki läga lu udalu nuha, nigaba lä luga bodixenlu na.
\v 11 Neti nna ¿laaba ganna gwasatuagaba lasia yiesi Nínive nu ra xxeni leniha? Lheꞌe yiesiha seꞌe gwate ttu gayua galhia mili (120,000) ka benne ka nu labí rite dakinna si ruinkana nu satsa lhe o si ruinkana nu tse lhe. Anágaba nna ixegaba ka nimala seꞌe nia.