\id 2CO \id 2CO
\h 2 Corintios
\mt Yetsi nu berupa udhelha Pabluha ge ka benne ria leke Jesucristuha seꞌeke lheꞌesi Corinto
\c 1
\p
\v 1 Neti Pablo ankaa apóstol ge Jesucristuha kumu de Tata Do Yebáha chi bedá lebie ki akaa nuní. Neti lenia betsi to geriꞌi Timoteo‑ni ridhelhatu yetsi‑ni gele, lebiꞌi ka benne ritupale lheꞌesi Corinto‑na ki rulhale ge Tata Do Yebáha lhe anágaba ridhelhagabatu yetsi‑ni len adíle ka benne chi ankale gebie seꞌele itúba daka Acaya‑na.
\v 2 Xxudiriꞌi do yebáha lhe Jesucristu benne anke Xxanariꞌiha lhe, lake edá leke aka lenke le lhe useꞌeke le xen su lasi lhe.
\s Tata Do Yebáha rodú tsebie leriꞌi
\p
\v 3 Xxeniba ra le Tata Do Yebáha, delába Xxudi Jesucristu benne anke Xxanariꞌiha. Labie anke ttu xxudi ratua lasi lhe anke ttu Diosi satíaba rodú tsebie leriꞌi lhe.
\v 4 Labie nuha rodú tsebie letu lo iyába ka elha disa ruyútu, kini anáchu riꞌitu akagaba getu odú tsetu le ka benne rateke ttu bixa elha disa. Attiba ben Tata Do Yebáha bodú tsebie letu, aníha‑gaba uintu.
\v 5 Kumu anába attigaba gwate Cristuha biyúe elha disa, anágaba riꞌitu de rekitu rigixxiꞌatu gebie, de nuha nna ruyú xxattatu elha disa, anágaba nna de babatu lenie nna yalhá tse rodúbie letu.
\v 6 Ganna riꞌitu ruyútu elha disa, ratetu aní kini lebiꞌi lhaale lo ka tulha gele‑na lhe kini edú tse lele lhe. Kumu ganna rodú tse Tata Do Yebáha letu, rodú tsebie letu kini anágaba riꞌitu odú tsegabatu lele. Aníha kini lebiꞌi dhaale utto uchíale tti ratele luesi elha disa ratetu‑ni.
\v 7 Ruxxen tsitsiba letu gele, kumu yúbatu attiba lebiꞌi riselale len riꞌitu tti ratetu ttu bixa, anágaba nna tti redú tse letu nna riselagabale len riꞌitu redú tse lele.
\p
\v 8 Betsi to, raka letu unale ge elha disa biyútu daka Asia‑ni. Tsitsiba gwatetu nuha laꞌania. Chi tteba abí gwa dhaatu uchíatu lo nu ratetuha, abitturuba ruxxen letu eria bentu.
\v 9 Chiba rakintu laa debániba chiba bisia sá getu gattitu. Aníha gwatetu kini abitturu uxxen letu ge la kwinaba riꞌitu, sinuki uxxenla letu ge Tata Do Yebaa benne elhidha benbie ka benne chi uttiha.
\v 10 Benneha bodilábie riꞌitu lo elha disa xxeni gwatetu laꞌania, axtaba bexunnina getu gattitu. Anágaba nna godilárugabe riꞌitu lhe gegabe ruxxen letu deki godilaa chiettirugabe riꞌitu lo nu si daa.
\v 11 Lebiꞌi utegaba nále len riꞌitu innabale getu len Tata Do Yebáha, kini anáchu de ixe ka benne innabake getu lenie, de nuha nna ixegaba ka benne ugweke Tata Do Yebáha ixkixaru de unie nu tse len riꞌitu.
\s Pabluha rigixxiꞌabie beaka labí ugíe lheꞌesi Corinto
\p
\v 12 Kumu riꞌitu yu xeabatu, latsiruba ruintu arlo nuxaba benne, ttaka len lebiꞌi nuná ruinrutu latsiru. Labí ruintu ttu bixa nu udheana lotu. Lhixxa rába rinnetu, labí rukatsitu ttu bixa. Labí ruintu nu yuꞌuba ikitu, sinuki Tata Do Yebáha‑ba raka lenie riꞌitu. De nuha nna redeakintu ge nu ruintu.
\v 13 Lo ka yetsi ridhelhatu len lebiꞌi, labí ruintu lokani ttu bixa nu abittu rite denle o abittu aka gele ulabale. Neti ruxxenba lasia gwate dábinle nu ra lokani.
\v 14 Ttiba chi rite denle ttu latti ge nu rigixxiꞌatu, anágaba isia sá gwate dábinle iyá tte, kini ganna chi bisia sá esia Jesús benne anke Xxanariꞌiha, laꞌania nna riꞌitu utetu elha gwedaka lasi gele, anágaba lebiꞌi utegabale elha gwedaka lasi getu.
\p
\v 15-16 Ge nuníba bexxen lasia. Laxkala ukati, tti tsiaya daka Macedonia‑na, ladeꞌaxala ttea ata seꞌele‑na. Iki de chi bedáya Macedonia‑na nna edete adakabaa ata seꞌele‑na attu libe kini edú itta lele chupa libe, kini anáchu ganna chi eyaꞌaya daka Judea‑ni, laꞌania nna lebiꞌi utele ge neda kia.
\v 17 Tti bebeki lasia unia aní, bittu akinle deki ttu nnelaba botsea elha rulaba le kia o benia attiba ruin adí ka benne, ladeꞌaxa ria: “Gwakaba unia ttu bixa”, delo nna edenía: “Labíru aka.” ¡Koꞌo! ¡Labí ruin neti aníha!
\v 18 Kumu attiba Tata Do Yebáha anke ttu benne ruinbe nu chi rabie, anágaba riꞌitu labí ladeꞌaxa ratu le: “O”, delo nna edenátu: “Labí.”
\v 19 Kumu Jesucristu Xiꞌin Tata Do Yebaa benne rigixxiꞌatu gebie, neti lhe Timoteo‑ni lhe Silvano‑ni lhe, benne rigixxiꞌatu geeha labí anke benne ladeꞌaxa innábie: “O”, delo nna edennábie: “Labí.” Benneha labí rotsea elha rinne gebie, satíaba ree: “Gwakaba.”
\v 20 Kumu de Jesucristuha nna iyába nu ra Tata Do Yebáha unie, gwa rakaba nuha. Laxkala de Jesucristuha‑gaba nna tti rariꞌi: “Amén”, Tata Do Yebáha nuha ruinriꞌi kini ra xxeni lebie.
\v 21 Tata Do Yebáha‑gaba nuha ruseꞌe tsitsie riꞌitu lhe ruseꞌe tsitsigabe le de chi babariꞌi len Cristuha. Lagabe nuha chi bodhaꞌane kini uintu sina gebie.
\v 22 Anágaba chigaba bodhaꞌane ttu seña lheꞌe lastotu kini uleꞌe deki chi ankatu gebie, delába uluꞌubie Espíritu geeha lheꞌe lastotu kini benneha runna liibie deki guteba Tata Do Yebáha nu chi rabie utebie getu.
\p
\v 23 Tata Do Yebáha yu xeabe, de gwatuaba lasia le nna labí chi bitaa lheꞌesi Corinto‑na kini ka kisaa le.
\v 24 Kumu riꞌitu labí raka letu innabiatu le ki gatu le: “Aní teeki tsia lele”, kumu lebiꞌi tseba chi ria lele. Riꞌitu nu rakala letu, ute nátu len lebiꞌi kini tseꞌe ittarule.
\c 2
\p
\v 1 De nuha nna belaba lasia, labí itaa attu libe kini etedidú siꞌa lele.
\v 2 Kumu ganna ttixka neti udú siꞌa lele, nianna, ¿núla anka nu odú ittana lasia ganna? ¿Laaba ganna lebiꞌi ka nu udú siꞌa lele, lebiꞌi nuná odú ittale lasia?
\v 3 De nuha nna benia yetsi nu udhelhaa len lebiꞌiha, kini ganna chi isiaya ata seꞌele‑na lebiꞌi ka nu ralhale odú ittale lasia, abittu udú siꞌile lasia laꞌania. Kumu neti yu xeabaa deki tti edú itta lasia, anágaba lebiꞌi iyágabale edú itta lele.
\v 4 Tti benia yetsi nu udhelhaa len lebiꞌi laꞌania, yalhá bedúna neti lhe biyú xxattaa elha disa lhe axtaba ribesia. Labí benia yetsiha kini udú siꞌa lele. ¡Koꞌo! Benlaa yetsiha kini anáchu lebiꞌi yule deki raka xxattati gele.
\s Pabluha rabie: “Gwalidhí elha xen lasi ge nu betsetsi‑na”
\p
\v 5 Ganna nuxa ttúle nuná chi betsetsile, neti labí ritebiaya tti ria, nu betsetsi‑na, labí suna neti nuná bedú siꞌina lasia, sinuki iyágaba lebiꞌi nuná bedú siꞌina lele.
\v 6 Kumu ixebale chi begwele nu betsetsi‑na elha disa. Elha disa nu chi begwele na, ukareꞌa nuná.
\v 7 Nu uinlale, gwalidhíla elha xen lasi geni lhe gwalodúla itta leni lhe kini abittu udú siꞌi xxattana leni.
\v 8 De nuha nna rinnaba ditia len lebiꞌi gwaluni kini lana tte denna deki gwa rakabinle geni.
\v 9 Kumu neti benia yetsiha, kini unaa ganna gwa rudole tisa ge iyá tte nu chi ria uinle.
\v 10 Laxkala nu dhile elha xen lasi geni ge ttu bixa rutsetsina, neti gwadígabaa elha xen lasi ge nuha. Ganna tee ttu bixa teeki dhia elha xen lasi geni, de lebiꞌi nna chi uxía elha xen lasi ge nuha arlo Cristuha.
\v 11 Aníha kini abittu dhaa nu xxegwiha dhi yiena riꞌi, kumu chiba yuriꞌi nu rulha le nuha uinna.
\s Pabluha tti bisine lheꞌesi Troas‑ni, labí bedú tsena lebie
\p
\v 12 Neti tti bisinaa lheꞌesi Troas‑ni kini kixxiꞌaya ka tisa ge Cristuha, Tata Xisiha gwa udhalibe neda kia kini kixxiꞌaya ka tisa geeha.
\v 13 Ttaka labí udú tse lasia, kumu lanú betsi to geriꞌi Tito‑ni gwaxxakaa niha. Aníha uka nna uchú tisaa ka benne seꞌe niha nna udáya diaya daka Macedonia‑ni.
\s Pabluha rugwebie Tata Do Yebáha ixkixaru
\p
\v 14 Ttaka ixkixaru Tata Do Yebáha, kumu de babatu len Cristuha, de nuha nna runie kini riꞌitu satíaba ridaatu lo nu xxegwiha. Riꞌitu rixúnie kini gaxaba diatu rigixxiꞌentu ka benne ka tisa geeha, kini uinbiake bie. Nu rigixxiꞌatuha ankana attiba ttu nu rure ixixxi, gaxaba diatu radhina.
\v 15 De nuha nna riꞌitu ankatu ttiba ttu nu rure ixixxi rutso du Cristuha arlo Tata Do Yebáha. Ankagabatu ttiba ttu nu rure ixixxi arlo ka nu gwalákana lhe arlo ka nu tsia nnittikana lhe.
\v 16 Arlo ka nu tsia nnittikanaha, riꞌitu ankatu ttiba ttu nu rure ixixxi nu kilana elhutti gekani, nna arlo ka nu gwalákanaha nna ankagabatu ttiba ttu nu rure ixixxi nu uinna kini aka benkana ttu dia lii. Ttaka luesi sina ruintu‑ni lanú nu dhaana uinna nuní ganna abíba du lenna Cristuha.
\v 17 Kumu riꞌitu labí ruintu tti runi ixe ka nu reki naa. Ka nuná rekikana rigixxiꞌakana ge Cristuha kini ridíkana belhiu. Ttaka riꞌitu Tata Do Yebáha gwa yu xeabe labí danalhatu belhiu; lhixxa rába rekitu rigixxiꞌatu ka tisa geeha, ruintu atti galába ka benne chi udhelhe lhe atti galába runi ka benne chi babake len Cristuha lhe.
\c 3
\s Pabluha rabie: “Riꞌitu rigixxiꞌatu ka tisa kubi // ka nu chi bodhaꞌan Tata Do Yebáha”
\p
\v 1 Gwa rakabinle la labakana chi bededulokana redene tsekana ge nu ruinkana kini eyaꞌan tsekana arlotu. ¡Koꞌo, labí! Lebiꞌi gwalinnáruga, riꞌitu, ¿si riyasintu dhentu ttu yetsi ki utso dutu arlole ata rigixxiꞌa loni deki benne tseba ankatu kini lebiꞌi nna tsia lele getu? O, ¿si riyasintu uinle ttu yetsi dhentu ata rigixxiꞌa loni deki gwa ankabatu benne tse? ¿O, si riyasintu uintu tti runi adí ka benne rinnabake yetsi? ¡Koꞌo, labí!
\v 2 Kwinaba lebiꞌi nuná ankale ttiba ttu yetsi rutso dutu arlo ka benne. Ka benne rutso dutu le arloke, ka benneha tti rilákanie tseba anka elha ruin gele, laꞌania nuha rokinni ikike deki riꞌitu tseba beleꞌentu le ge Cristuha.
\v 3 Lebiꞌi rilá saaba deki ankale ttiba ttu yetsi ben Cristuha nu rutso dutu arlo ka benne ki ruleꞌe loo sina bentu len lebiꞌi. Labí benie na len letra nu dia lo yetsi, sinuki bixúlanie Espíritu ge Tata Do Yebaa benne anka baniha. Labí bodhaꞌane na lo ka íyya, sinuki bodhaꞌane na lheꞌe lasto ka benne.
\p
\v 4 De nuha nna ruxxen letu Tata Do Yebáha‑ba runie nuní de babatu len Cristuha.
\v 5 Labí riꞌitu ruintu aní, gwanka innátu deki nu anka gebatu nuní ruintu. ¡Koꞌo, labí! Sinuki iyába nu raka getu ruintu, Tata Do Yebáha‑ba runie ki raka nuní.
\v 6 Labe benie riꞌitu ki akatu nu dika kixxiꞌatu ka tisa kubi ka nu chi bodhaꞌan tsitsie len ka benne. Tisa kubi nu rigixxiꞌatu‑ni, nuní labí diana lo ttu bia bennabi, sinuki Espíritu ge Tata Do Yebáha‑ba rutebie na. Kumu ka tisa dia lo bia bennabiha rukinniba ka nuha riꞌi kini gattiriꞌi, ttaka Espíritu ge Tata Do Yebáha ruinlee kini aka benriꞌi arloe.
\p
\v 7 Ka tisa ka nu dia lo ka íyya bodhaꞌan Tata Do Yebáha len Moisés‑ni, delába ka nu rukinnikana riꞌi kini gattiriꞌi, ka nuha ukakana nu ra xxeni lekani. Laxkala tti besin Moisés‑ni len ka íyyaha, ka nu Israel‑ni labí uka ugíakana lo Moisés‑ni de raka galha xxatta loni, meskiba nu raka galha loniha, sattiruba bechía nuha nna benitti loobana.
\v 8 Ganna ka tisa dia lo ka íyyaha uná xxeni lekani, ¿laaba ganna adírula xxeni ra le nu ruin Espíritu ge Tata Do Yebáha lenriꞌi?
\v 9 Kumu ki ganna ka tisa ka nu dia lo ka íyyaha, ka nuha rukinnikana ka benne arlo Tata Do Yebáha, ki ganna ka nuha ra xxeni lekani, adírula xxeni ra le tisa kubi nu rigixxiꞌana deki Tata Do Yebáha riguabie yua kweꞌeriꞌi ge ka tulha ruinriꞌi.
\v 10 Ka tisa ka nu ra xxeni lekani laꞌania, nnanna labíru xxeni ra le ka nuha ganna rutsenriꞌi kana len tisa kubi nu tuttíruga ra xxeni leniha.
\v 11 Ki ganna ka tisa ka nu bechía ttu sattirubaha gwa ukakana nu ra xxeni lekani, adírula xxeni ra le ka tisa ka nu uchíakana ttu dia liiha.
\p
\v 12 Riꞌtu de ruxxen letu ge ka tisa‑ni, de nuha nna labí rasintu rinnetu.
\v 13 Labí ruintu tti ben Moisés‑ni. Nuha bedhea loni len ttu lari kini ka nu Israel‑ni abittu bilákinna tti deyya renitti loo nu raka galha loniha.
\v 14 Ttaka lakana yayaba ikikani labí ute dákinna, kumu axtaba nnanna tti rulabakana ka tisa ka nu bodhaꞌan Tata Do Yebáha lenkana ttuha, tti rulabakana ka tisaha ttisidiba lariha‑ba nuha rudheana lokani. Kumu sunruba ganna chi ibabakana len Cristuha nna gwatua lariha lokani.
\v 15 Axtaba nnanna tti rulabakana ka tisaha, delába ka tisa bodhaꞌan Tata Do Yebáha len Moisés‑ni, attisidiba lariha‑ba nuha abittu rugwelhana tte dákinna.
\v 16 Ttaka ganna chi rudaxxuriꞌi neda ge Tata Xisiha, laꞌania nuha chi ritua nu abittu rugwelhana utte dariꞌi.
\v 17 Kumu Tata Xisiha anke Espíritu nna ata chi do Espíritu ge Tata Xisiha lheꞌe lastoriꞌi, nna chiba beseꞌe lhaariꞌi, labíru xigariꞌi lo ttu bixa.
\v 18 De nuha nna iyábariꞌi labíru ankariꞌi ttiba ttu benne yaya loe ttu lari. Attiba lo ttu iyya gwana chiba rilá saabinriꞌi nu xxeni ra le Tata Xisiha. Kwa kwaba diariꞌi ruleꞌe looriꞌi nu xxeni ra leeha nna kwa kwagaba risinriꞌi rakariꞌi attiba labie. Tata Xisiha benne anke Espírituha, benneha runie kini raka aní.
\c 4
\s Ka tisa ge Jesucristuha ankake ka nu daka xxatta
\p
\v 1 Tata Do Yebáha gwatua lebie riꞌitu nna bedhaꞌane riꞌitu kini tsekitu kixxiꞌatu ka tisa geeha. De nuha nna labí redí liretu.
\v 2 Labí ruintu nu raka gatsi nu dika ugwena riꞌitu elhittu lo ka benne. Anágaba labí rotsiꞌinu letu tti rinnetu kini tsia le ka benne getu lhe nigaba labí rotseatu nu ra ka tisa ge Tata Do Yebáha. Nu ruinlatu, arloe rinnebatu nu ankaba gwalí. Aníha ruintu ki rodhaꞌantu lasi ná ka benne kini iyábake okinni ikike deki tseba anka nu ruintu.
\v 3 Ttaka ganna tee ttu bixa nu rudheana ki abittu rite dani ka benne ka tisa tse rigixxiꞌatu‑ni, suna ka nu tsia nnittibakana, sunruba ka nuha abittu rite dákinna.
\v 4 Kumu nu xxegwiha, delába nu anka diosi rinnabiana yiesi lo yu‑ni, lana nuha bedheana elha rieni ge ka nu abittu ria lekinna kini abittu ute dákinna xiani nu runna ka tisa tseha, delába ka tisa ka nu rigixxiꞌake ge nu xxeni ra le Cristuha. Labie nuní anke atti tteba Tata Do Yebáha.
\v 5 Riꞌitu labí getu rekitu rigixxiꞌatu. ¡Koꞌo! Riꞌitu rekilatu rigixxiꞌatu ge Jesucristuha. Rigixxiꞌatu deki labie anke Xxanariꞌi. Riꞌitu sunruba rixútu ki rigixxiꞌentu le ge Jesús‑ni de rakintu gebie.
\v 6 Kumu Tata Do Yebáha, delába benne rabie: “Galha xiani ata anka chulhaha”,\f + \fr 4:6 \ft Génesis 1:3\f* lagabe nuha chi rudenie lheꞌe lastotu kini tte dentu nu xxeni ra lebie. Nu xxeni ra leeha nuha rilenriꞌi lo Jesucristuha.
\p
\v 7 Ttaka ka tisa tse rigixxiꞌatuha ankake attiba ttu nu daka xxatta nna riꞌitu ka benne rigixxiꞌatu ka tisaha ankatu attiba ttu yedhu yu nu abittu ruchíana isá. Aníha kini uleꞌe deki Tata Do Yebáha‑ba nuha ra tsitsi xxatta lebie, labí riꞌitu nuní ra tsitsi letu.
\v 8 Laxkala meskiba bika ratetu tti ruyútu ttu bixa elha disa, labí reyadi gaatu lhe meskiba labí yutu bí uintu tti ratetu elha disaha, ttaka labí rudú xxattana riꞌitu,
\v 9 lhe meskiba ridú nookana riꞌitu, ttaka Tata Do Yebáha labí rudhá ikie riꞌitu. Meskiba ridaakana lotu, ttaka labí tuttíru rutseꞌe lookana riꞌitu.
\v 10 Gaxaba diatu ruxunnina getu uttikana riꞌitu attiba bettikana Jesús‑ni, kini aníha nna uleꞌegaba elha nabani geeha lentu.
\v 11 Kumu nnanna laka sa seꞌe bentu, satíaba daa elhutti lotu de rekitu rigixxiꞌatu ge Jesús‑ni, kini anágaba len latitu‑ni ruleꞌe lootu elha nabani gebie tti ratetu ruyútu ttu bixa elha disa, delába latiriꞌi nu rattina yiesi lo yu‑ni.
\v 12 Laxkala riꞌitu elhuttiha‑ba danalhana riꞌitu de rekitu ugixxiꞌa gebie, lebiꞌi nna elha nabanila ridíle arlo Tata Do Yebáha.
\p
\v 13 Lo ka yetsi ge Tata Do Yebáha dia ra: “Neti de ugía lasia Tata Do Yebáha, de nuha nna unnea.”\f + \fr 4:13 \ft Salmo 116:10\f* Anágaba riꞌitu de ugía letu benneha, de nuha‑gaba nna rinnetu.
\v 14 Kumu yúbatu deki Tata Do Yebáha belhidhe Jesús benne anke Xxanariꞌiha lo elhuttiha. Benneha‑gaba nuha elhidhe riꞌitu lo elhuttiha attiba belhidhe Jesús‑ni lo elhuttiha. Nianna echebie riꞌitu itupa len lebiꞌi ata doeha.
\v 15 Iyába nu ratetu‑ni rixúna len lebiꞌi kini tsaniru ka benne edí baake nu tse redá le Tata Do Yebáha rutebie lenke, kini anáchu ixeerugabake ugweke bie ixkixaru, kini inná xxeni lebie.
\p
\v 16 Laxkala labí redí liretu. Meskiba bela latitu‑ni diana raxxuna, ttaka espíritu getu‑ni, ttu ttu sába diabie rekubie.
\v 17 Kumu nnanna nu ratetu yiesi lo yu‑ni, lattiba nuní lhe sattiba ratetu nuní lhe, ttaka nu dhitu ge nu ratetu‑ni xxenirula anka nuha lhe ttu dia liiba edí baatu geni yebáha lhe.
\v 18 Riꞌitu labí rudo lotu ugíatu nu rilá, sinuki rudola lotu ugíatu nu abittu rilá. Kumu nu rilenriꞌi yiesi lo yu‑ni, nu tseꞌe looba anka nuní, ttaka ka nu abittu rilá, delába ka nu ankakana ge yebáha, ka nuha satíaba uchíakana.
\c 5
\s Riꞌi edíriꞌi attu lati kubi geriꞌi yebáha
\p
\v 1 Kumu yúbariꞌi bela latiriꞌi nu seꞌeriꞌi lheꞌeni satti yiesi lo yu‑ni, nuní ankana attiba ttu yoꞌo geriꞌi nu labí ruchíana isá. Ganna nuní tseꞌe loona, Tata Do Yebáha gweyonnabe attu yoꞌo tse geriꞌi nu labí ruin ttu benne len nábie, delába eyonie attu lati kubi geriꞌi nu uchíana ttu dia lii yebáha.
\v 2 De nuha nna nnanna laka sa seꞌeriꞌi lheꞌe bela latiriꞌi‑ni, ribesi gweriꞌi, kumu raka leriꞌi etaꞌariꞌi lheꞌe attu lati kubi geriꞌi nu tseꞌeriꞌi lheꞌeni yebáha.
\v 3 Kumu laꞌania teeki nuku lati kubi geriꞌi seꞌeriꞌi, labí suna anába ankariꞌi seꞌeriꞌi.
\v 4 Laka nnanna sa seꞌeriꞌi anka benriꞌi lheꞌe bela latiriꞌi‑ni, ribesi gweriꞌi ruyúriꞌi elha disa. Laa ribesi gwegariꞌi de raka leriꞌi eriariꞌi lheꞌe bela latiriꞌi‑ni. ¡Koꞌo! Sinuki nu rakala leriꞌi eyokuriꞌi attu lati kubi geriꞌi nu anka ge yebáha, kini latiriꞌi nu rattina yiesi lo yu‑ni eseana nna eyakana ttu nu uchíana ttu dia lii yebáha.
\v 5 Tata Do Yebáha‑ba chi benie riꞌi kini eyakariꞌi aní. De nuha‑la chi betebie Espíritu geeha lenriꞌi kini benneha unna liibie deki gwalíba aka nu chi rabie unie lenriꞌi.
\p
\v 6 De nuha nna satíaba xen leriꞌi lhe anágaba gwa yúgabariꞌi deki nnanna laka sa seꞌeriꞌi lheꞌe bela latiriꞌi‑ni, idittuba sa seꞌeriꞌi kweꞌe Tata Xisiha.
\v 7 Kumu riꞌi de gwa riaba leriꞌi deki gwalíba doe, de nuha nna ruxxen leriꞌi gebie, labí ruxxen leriꞌi gebie de chi rilenriꞌe.
\v 8 Ttaka xen su lasiba seꞌeriꞌi nna yalhá ladeakariꞌi eriariꞌi lheꞌe bela latiriꞌi‑ni kini esinriꞌi tseꞌeriꞌi kweꞌe Tata Xisiha.
\v 9 Laxkala nnanna sila sa seꞌeriꞌi lheꞌe bela latiriꞌi‑ni o sila abitturu, nnanna ruinrulariꞌi doelha uinriꞌi nu tsuꞌu lebie.
\v 10 Kumu iyábariꞌi teeki eso duriꞌi arlo Cristuha kini unie elhuxtisi geriꞌi nna kua ttu tturiꞌi dhiriꞌi nu ralhariꞌi ge nu benbariꞌi tti useꞌeriꞌi yiesi lo yu‑ni, sila benriꞌi nu tse o sila benriꞌi nu satsa.
\s Pabluha rigixxiꞌabie gasina eseꞌe tse ka benne // len Tata Do Yebáha
\p
\v 11 Riꞌitu de tee elha rasi ge Tata Do Yebáha lheꞌe lastotu, de nuha nna ruintu doelha rigixxiꞌatu gebie kini tsia le ka benne gebie. Labie gwa yube gasina ankatu, neti nna ruxxenba lasia lebiꞌi gwinbiagabale gasina ankatu.
\v 12 Bittu akinle deki chiba rededulotu redene tsetu ge nu ruintu kini eyaꞌan tsetu arlole. ¡Koꞌo! Suna rinnebatu aní kini lebiꞌi inná xxeni lele ge nu ruintu, kini aníha nna gwa tee roꞌole ekabile ge ka nu ruinkana ttaba, ruleꞌekana deki raka gekani nna labí rulannikana ttixa anka lheꞌe lastokani arlo Tata Do Yebáha.
\v 13 Ganna rale deki riꞌitu ruintu attiba ttu nu raka ikini, nu rale raka ikituha, ge Tata Do Yebáha‑ba rixú nuha nna ganna ruinbatu ge nu gwa do tseba ikini, nu ruintuha ixúna len lebiꞌi.
\v 14 Iyába nu ruintu, ruintu na kumu de rakin Cristuha geriꞌi. Kumu yu xeabatu deki Cristuha uttie kini utixe ge iyába ka benne. De nuha nna attisidiba iyábariꞌi nuha uttiriꞌi lenbie.
\v 15 Labie uttie ki utixe ge iyába ka benne, kini anáchu ka benne chi uxíke elha nabani rutebie lenkeha abitturu tseꞌeke uinke nu rakaba leke, sinuki tseꞌelake uinke nu ruꞌu le benne utti ki utixe geke, iki de nuha nna tti beyadhe lo elhuttiha.
\p
\v 16 Laxkala debá nnanna labíru tseꞌetu ulannitu ttu benne tti rulanni luesi ka benne seꞌe yiesi lo yu‑ni. Meskiba ganna Cristuha, tti udoe yiesi lo yu‑ni, belannitue ttiba rulannitu ttu benne, ttaka nnanna labíru rulannitu benneha aníha.
\v 17 Laxkala ttu benne chi babe len Cristuha, ttu benne kubiba chi beyaka benneha. Nu anke ttuha chiba bitua nuha, nnanna len benneha iyába chi beyaka kubi.
\p
\v 18 Iyá nuní ben Tata Do Yebáha. Benneha boseꞌe tsebie riꞌi lenie de nu ben Cristuha tti uttie utixe geriꞌiha, nna riꞌitu chi bodhaꞌane kini kixxiꞌatu gasina eseꞌe tse ka benne lenie.
\v 19 Kumu Cristuha nuha bixúni Tata Do Yebáha kini benneha botseꞌe tsebie ka benne len Tata Do Yebáha. Labíru bejuabie ke yua ge ka tulha ruinke nna riꞌitu nuní bodhaꞌane kini kixxiꞌatu gasina eseꞌe tse ka benne lenbie.
\p
\v 20 Laxkala riꞌitu ankatu benne udhelha Cristuha kini rutso dutu gebie. Tti rinnetu rulisatu le, laꞌania nuha attisidiba kwinaba Tata Do Yebáha nuha raxie le. Rinnetu kwenta ge Cristuha tti ratu le: “Gwaleseꞌe tse len Tata Do Yebáha.”
\v 21 Cristuha labí tulha ben benneha, ttaka de riꞌi nna bejua Tata Do Yebáha bie tulha geriꞌi kini de nu gwateeha nna utua Tata Do Yebáha yua kweꞌeriꞌi ge ka tulha ruinriꞌi.
\c 6
\p
\v 1 Riꞌitu ankatu benne ribentu len Tata Do Yebáha lo sina gebie. De nuha nna rulisatu le abittu udelha lattile nu tse redá le Tata Do Yebáha rutebie gele.
\v 2 Kumu lo ka yetsi geeha rinnebie ree:
\q Neti gwa bedoba nagaa gelu la sá tti chi gaꞌanati udo nagaa gelu,
\q lhe gwa beteba náya lenlu, la sá atti chi gaꞌanati odiláya ka benne.\f + \fr 6:2 \ft Isaías 49:8\f*
\m Gwaluyúruga, nnanna chi bisia sáha. Nnanna nuha chi bisia sá atti chi gaꞌanani Tata Do Yebáha odilábie ka benne.
\s Pabluha rigixxiꞌabie ge nu ratebie de rekie rigixxiꞌe // ka tisa ge Cristuha
\p
\v 3 Riꞌitu labí ruintu ttu bixa nu utsetsinna ka benne. Labí rutsetsintu ke ki abittu itua balaꞌana ge sina ruintu ge Tata Do Yebáha.
\v 4 Nu ruinlatu, bixaba ruintu latsiruba ruintu na. Ruinbatu atti galába ttu benne rixú lo sina ge Tata Do Yebáha. Gwa rutto ruchíabatu
\q ttixka ratetu ttu bixa,
\q lhe tti riyasintu ttu bixa lhe,
\q anágaba tti ruyútu ttu bixa elha disa,
\q
\v 5 lhe rutto ruchíagabatu tti raya ka benne riꞌitu,
\q lhe tti rattatu lisiyya lhe,
\q anágaba tti rebiꞌi nookana riꞌitu,
\q lhe tti ratú rebisiba letu de ribentu sina,
\q lhe anágaba tti rebeatu bisiela,
\q lhe tti rattitu ubina abí tee gotu lhe.
\q
\v 6 Ruinbatu nu anka tagaꞌa tse atti galába runi ttu benne rixú lo sina ge Tata Do Yebáha.
\q Ruleꞌe loobatu nu yutu gebie.
\q Anágaba ankagabatu benne re besi letu,
\q lhe re tse letu,
\q lhe ruleꞌetu deki gwalí yuꞌu Espíritu ge Tata Do Yebáha latitu.
\q Anágaba nna ankagabatu ka nu gwalígintu rakintu ge ka benne
\q
\v 7 lhe rinnegabatu nu ankaba gwalí,
\q lhe rixúgabintu nu tsitsi ra le Tata Do Yebáha.
\q Ruinbatu attiba runi ttu soldadu diana ritilhana denna iyába nu ixuinna.
\q Aníha‑gaba riꞌitu tti rinnetu lhe tti rekabitu ge ka benne, rigixxiꞌabatu ge nu dika oseꞌe tsena ke arlo Tata Do Yebáha.
\q
\v 8 Gwadú gwa ria lekani riꞌitu, gwadú nna riguꞌuba niꞌakani riꞌitu.
\q Gwadú nna rinnekana rákana deki tseba ruintu, gwadú nna rigualakana balaꞌana getu.
\q Riꞌitu rinnebatu nu ankaba gwalí, ttaka lakana rálakana deki nu gwen lasiba ankatu.
\q
\v 9 Gwadú meskiba gwa ankabiakinna riꞌitu nna rálakana deki labí ankabiakinna riꞌitu.
\q Gwadú nna rugwekana riꞌitu ttu bixa elha disa, ttaka labí ridaakana uttikana riꞌitu.
\q Ttiba ttu nu yatti rakakinna chi ankatu, ttaka sa reki benbatu.
\q
\v 10 Rákana deki riꞌitu ankatu benne du siꞌi letu, ttaka satíaba du itta letu.
\q Rákana deki ankatu benne dii, ttaka riꞌitu ruinlatu kini ixeba ka benne gatta elha tse geke arlo Tata Do Yebáha.
\q Rágabakana deki riꞌitu labí bi tee getu, ttaka arlo Tata Do Yebáha iyába gwa teeba getu.
\p
\v 11 Lhixxa rába rigixxiꞌentu le xa benne Corinto, labí bixa rudhea letu.
\v 12 Len lebiꞌi labí rudhea letu ttu bixa; lebiꞌila nuná rudhea lele.
\v 13 Rulisaa le attiba ttu xiꞌinia. Gwaluni attiba ruintu, abittu kuꞌu lele ttu bixa, gwalinneba na len riꞌitu.
\s Riꞌi ankariꞌi yotu ge Tata Do Yebáha
\p
\v 14 Abittu iyietile uinle tti runi ka nu abittu ria lekani Cristuha.
\q Kumu lebiꞌi gwa yu xeabale, nu anka tseha labí raxxína nuha len nu anka satsaha
\q lhe anágaba chulhaha labí raxxína nuha len xianiha.
\q
\v 15 Anágaba Cristuha labí raxxína benneha len nu xxegwiha,
\q lhe ttu benne ganna ria lebie Cristuha, labígaba raxxína benneha len nu abittu ria leni Cristuha,
\q
\v 16 lhe anágaba labí raxxína yotu ge Tata Do Yebáha len ka nu labí gwalí ankakana diosi.
\m Kumu riꞌi nuní chi do Tata Do Yebaa benne anka baniha lheꞌe lastoriꞌi, delába ankariꞌi attiba yotu gebie attiba chi ree lo ka yetsi geeha:
\q Neti dhoa lhe tsekia lagwi ge ka benne.
\q Akaa Diosi geke, lake nna akake benne kia.\f + \fr 6:16 \ft Levítico 26:12; Ezequiel 37:27\f*
\m
\v 17 Laxkala de nuha nna ra Tata Xisiha:
\q Gwaliria lagwi ge ka nu abittu ria lekinna, gwalukwitta kweꞌe ka nuná,
\q lhe abittu kanle nu anka tsiga lhe.
\q Neti nna gulabibaa le.\f + \fr 6:17 \ft Isaías 52:11\f*
\q
\v 18 Neti akaa xxudile nna,
\q lebiꞌi nna akale xiꞌin biyúa lhe xiꞌiniunnáya lhe.
\q Aníha ra Tata Xisiha benne ra tsitsi xxatta leeha.\f + \fr 6:18 \ft 2 Samuel 7:14; 1 Crónicas 17:13 \f*
\c 7
\p
\v 1 Laxkala xa betsi to kia, riꞌi chi yuriꞌi deki Tata Do Yebáha chiba begwebie tisa unie iyá nuní. De nuha nna chinka kuariꞌi abitturu uinriꞌi nu rutsigana riꞌi lhe nu rodhaꞌan satsana riꞌi arlobie lhe. Nu uinlariꞌi tsiarulariꞌi akariꞌi nari xú arloe de tee elha rasi geriꞌi lenbie.
\s Pabluha redú itta lebie ge nu ruin ka benne Corinto
\p
\v 2 Gwalugwelha etaꞌatu lheꞌe lastole attu libe. Lebiꞌi gwa yu xeabale, ni ttúle labí bixa chi bedhakatu le lhe labí chi bennittitu le lhe, anágaba labí chi utebiatu bixa bedhakatu le.
\v 3 Laa rigisagaa le tti ria aní, kumu chiba xpeya le, gwa rakabati gele meskiba bixa aka, sila gattia len lebiꞌi o sila sa dhoa aka bania len lebiꞌi.
\v 4 Neti rinnebaa attiba ankaba geni len lebiꞌi. De lebiꞌi nna ra xxeni lasia. Yalhá elha xen lasi redía gele. Meskiba ruyútu iyá looba elha disa, kumu de lebiꞌi nna yalháruba itta du lasia.
\p
\v 5 Kumu tti bisiatu Macedonia‑ni birula bedí letu. Gaxaba diatu biyútu elha disa, delába biyayatu lhe uxítu elha rasi lhe.
\v 6 Ttaka Tata Do Yebaa benne rodú tsebie le ka benne abittu du tse leke, lagabe nuha bodú tsebie letu tti chi besia Tito‑ni.
\v 7 Laa sunruga de besianaha nna bedú tse letu, sinuki bedú ittagaba letu kumu lana yalhá itta bedú leni gele, lhe rágabana deki lebiꞌi yalhá re lele ilenle neti, lhe yalhá ribesile de releninle ge nu ukaha lhe, anágaba yalhá ruchacha ikile kia. Tti binaa iyá nuní adírula itta bedú lasia.
\p
\v 8 Meskiba bedú siꞌa lele delo niꞌa ge yetsi udhelhaa len lebiꞌi laꞌania, nnanna labíru rudúna neti ge nuha. Gwalí galá bedúna neti laꞌania, kumu neti yua deki yetsiha bedú siꞌina lele ttu satti to.
\v 9 Nnanna yalhá itta du lasia. Laa du ittaga lasia de udú siꞌi lele ge yetsi udhelhaaha. ¡Koꞌo! Sinuki dula itta lasia kumu de nu gwateleha bixúna kini bodúna le nna bedhan le nu ruinleha. Lebiꞌi Tata Do Yebáha‑ba bedú siꞌe lele, de nuha nna labí gwatele ttu bixa delo niꞌa ge nu bentuha.
\v 10 Kumu ganna riꞌi rudú siꞌi Tata Do Yebáha leriꞌi, nu rudú siꞌina leriꞌiha rixúlana kini rodúna riꞌi ge nu abittu anka tse ruinriꞌi nna rudhanriꞌi abitturu ruinriꞌi na. Aníha kini odilábie riꞌi nna esinriꞌi arloe. Laxkala labí teeki eleninriꞌi tti rudú siꞌi Tata Do Yebáha leriꞌi. Ttaka ganna rudú siꞌina leriꞌi tti rudú siꞌina le ka benne seꞌe yiesi lo yu‑ni, tti rateriꞌi aníha, elhuttila rigila nuha geriꞌi arlo Tata Do Yebáha.
\v 11 ¡Gwaluyúruga! De bedú siꞌi Tata Do Yebáha lele, de bedú siꞌe lele nuha bixúna kini nnanna
\q gwalíga chi betabinle ge nu benleha,
\q lhe jeru tte chi utixxiꞌale bí lo niꞌa ge benle aníha,
\q lhe anágaba yalhá biseꞌenle ge nu ukaha,
\q lhe yalhá elha rasi chi tee gele nnanna,
\q lhe yalhá chi re lele ilenle neti lhe,
\q anágaba jeru tte chi rudona lele ruinle nu anka tse,
\q lhe jeru tte chi begwele nu betsetsiha elha disa lhe.
\m Iyá nu ruinle‑ni runna liina deki lebiꞌi labí bixa tulha daale ge nu ukaha.
\v 12 Laxkala yetsi nu benia udhelhaa len lebiꞌi laꞌania, laa bengaa nuha delo niꞌa ge nu betsetsiha, nigaba laa bengaa nuha ge benne bisetsinie ge nu ben nuha. Benlaa yetsiha kini lebiꞌi ute denle deki gwa retabibinle getu arlo Tata Do Yebáha.
\v 13 De nuha nna beyaka xen letu.
\p Laa sunruga de nuha beyaka xen letu, sinuki adírula itta bedú letu tti bilentu du itta le Tito‑ni tti besiana ata seꞌetu‑ni kumu de iyábale bodú tsele leni.
\v 14 Neti yalhá xxeni ra lasia gele arlo Tito‑ni. Labí retutti ge nu chi xpeya na gele deki lebiꞌi tseba anka nu ruinle. Kumu ttiba len lebiꞌi nu gwalíba anka iyá nu chi ratu leha, anágaba len Tito‑ni nu gwalíba anka iyá nu chi utixxiꞌentu na gele. De nuha nna tee roꞌotu ra xxeni letu gele.
\v 15 Laxkala nnanna rakarulinna gele tti radú leni gasina biyúle na laꞌania, iyábale gwa bedobale tisa geni lhe jeru tteba uxile na tti bisiana len lebiꞌiha.
\v 16 De nuha nna nnanna yalhá itta du lasia kumu de ruxxen lasia gele.
\c 8
\s Lebiꞌi edáru lele utele belhiu
\p
\v 1 Anágaba xa betsi to, rakagaba letu kixxiꞌentu le ge nu tse ruin Tata Do Yebáha len ka benne chi ria leke Cristuha, delába ka benne ritupake lheꞌe ka yiesi seꞌe daka Macedonia‑ni.
\v 2 Ka benneha tti rateke ruyú xxattake elha disa, laꞌaniala bedúru itta leke lhe meskiba ankake tuttíru benne dii, laꞌaniala bedáru leke bete chiettiruke nu tee geke.
\v 3 Kwinaba neti biyú loa betebake kua nu udaabake beteke, tiski bedárula leke beteke tti nu dika uteke.
\v 4 Ka benneha birula bedú siike unnaba ditibake lentu kini ugwelhatu ke iselake uteke belhiu ki dhi ka benne chi ankake ge Tata Do Yebáha seꞌe lheꞌesi Jerusalén‑ni.
\v 5 Riꞌitu ukintu ganna suna belhuha‑ba uteke, ttaka la kwinaba lake ladeꞌaxa ráke: “Uinbatu nu innaba Jesús benne anke Xxanariꞌiha. Nianna tti redenáke: Uingabatu nu innábale. Lake nna benbake attiba ruꞌu le Tata Do Yebáha.”
\p
\v 6 De nuha nna unnaba dititu len Tito‑ni ki uinna attiba chi udulona ruinna ttuha, anágaba uinna nnanna ulhuxa loona uttupana belhiu nu edá lele utele.
\v 7 Lebiꞌi nuná ankale ka nu rakaru gele ruinle iyá tti adí ka benne, delába
\q gwa ria tsitisiru lele ge Tata Do Yebáha,
\q lhe gwa rakaru gele rinnele,
\q lhe gwankarule benne yuu,
\q lhe anágaba gwankale benne jeru tte ruinle ttu bixa,
\q lhe gwankale benne rakaruinle getu lhe.
\m Ttiba ruinle‑na, anágaba nnanna gwaledáru lele gwalute belhiu nu ruttupatu‑ni.
\p
\v 8 Laa rigaa deki teeki ute chiettirule. Suna rigixxiꞌabaa ge nu riláti ruin adí ka benne, jeru tte redá leke ruteke. Rigixxiꞌaya nuní kini anágaba lebiꞌi uleꞌe ganna si gwalíginle rakinle ge ka benne.
\v 9 Lebiꞌi gwa yu xeabale, Jesucristu benne anke Xxanariꞌiha bedába lebie ben tsebie len lebiꞌi. Benneha meskiba uke benne tee xxatta elha tse gebie yebáha, ttaka de ukanie gele, de nuha nna bisiabie yiesi lo yu‑ni nna beyake ttu benne abittu gebie tee. Benneha beyake nu labí tee geni, kini lebiꞌi, de benneha nna chi bisinle ukale benne tee elha tse gele yebáha.
\p
\v 10 Neti utea ttu elha rieni len lebiꞌi: tserula saríana le ganna uinle attiba chi udulole benle usedaha. Laꞌania bebeki lele utele belhiu nna udulo ttebale bettupale na.
\v 11 Aníha‑gaba gwaluin nnanna. Gwalulhuxa gwaluttupa nu chi udulole ruttupale laꞌania, kini anáchu attichuba uleki lele utele belhuha, anágaba gwaluin nnanna. Gwalute kua dhaabale utele.
\v 12 Kumu ttixka ttu benne jeru tteba redá lebie rutebie, Tata Do Yebáha gwa ridíbe nu rute benneha, labí rinnabe nu labí dhaa benneha utebie.
\p
\v 13 Laa rinnabagaa nuní kini ka nu subila exxa tama gekani nna lebiꞌi nna iyasa gele. ¡Koꞌo! Runia kini tu tulapaba tseꞌe iyáriꞌi.
\v 14 Lebiꞌi, nnanna tee tama gele nna utele na ge ka nu riyasakinna, kini anágaba lakana, tti gatta tama gekani, laꞌania nna utegabakana gele tti iyasinle. Aníha kini anuttu nu iyasa geni,
\v 15 attiba ra lo ka yetsi ge Tata Do Yebáha ata dia ra: “Nu bediga ixeniha, labí bexxaru ge nuha, nigaba nu bediga ttu lattiha, labí biyasa ge nuha.”\f + \fr 8:15 \ft Éxodo 16:18\f*
\s Tito‑ni lhe a chupa ka benne diake lheꞌesi Corinto
\p
\v 16 Ttaka ixkixaru rugwea Tata Do Yebáha, kumu labie benie kini Tito‑ni ruchacha ikini gele attiba neti ruchacha ikia gele.
\v 17 Kumu lana, tti unnabaa lenna kini itana ata seꞌele‑na, labí tisa bedúna; daa ttebana, kumu chigaba re leni itana. De nuha nna kwinaba lana bedá leni dana gwelanni le.
\v 18 Ridhelhagabatu attu betsi to geriꞌi lenna. Benne‑ni, iyába ka benne ria leke Cristuha ritupake lheꞌe adí ka yiesi‑na, rinne tseke gebie de rigixxiꞌa tsebie ka tisa ge Jesús‑ni.
\v 19 Gwea nna la benne‑nigaba chi bekweke kini tsiabie len riꞌitu kini sadhaꞌantu belhiu ruttupatu‑ni. Nu ruintu‑ni uinna kini inná xxeni le Tata Xisiha lhe kini uleꞌe deki redába letu ruintu nuní.
\v 20 Benne‑ni dhabie len riꞌitu ganna chi diatu kini anuttu nu innena getu ttixa uintu len ixeni belhiu ruttupatu‑ni.
\v 21 Kumu riꞌitu ruintu doelha uintu latsiru, laa sunruga arlo Tata Do Yebáha uintu latsiru, anágaba ruingabatu doelha uintu latsiru arlo ka benne.
\p
\v 22 Ridhelhagabatu lenke attu betsi to geriꞌi. Benne‑ni ixe lidú chi bilentue jeru tteba rute nábie len ka benne, gwexunniba runie ttu bixa, adírula nnanna ruxxenrula lebie deki lebiꞌi gutebale belhiu.
\v 23 Tito‑ni nna ankana benne reki lenia turoꞌo rixúna len neti kini rute nátu len lebiꞌi. A chupa ka betsi to geriꞌi‑ni nna ankake ka benne udhelha ka benne chi ria leke ge Cristuha, delába ka benne ritupake lheꞌe adí ka yiesi‑na. Ka benne chupa‑ni ruinke nu dika inná xxeni le Cristuha.
\v 24 De nuha nna gwaledá lele gwalute belhiu. Gwaluleꞌe gasina ruinle kini iláni ka benne udhelhake ka benne‑ni deki lebiꞌi gwa rakabinle ge adí ka benne lhe anágaba kini uleꞌe deki neti labí kwentaba rinne tsea gele.
\c 9
\s Gwaluttupa belhiu kini tsia ge ka benne chi ria leke // ge Cristuha seꞌe Jerusalén‑ni
\p
\v 1 Neti labíru riyasati unia lo yetsi upeya le: “Gwalute nále len ka benne chi ankake ge Tata Do Yebáha”,
\v 2 kumu chiba yua lebiꞌi gwa redába lele rutele. Laxkala arlo ka benne ge Macedonia‑ni xxeniba ra lasia tti xpeya ke deki lebiꞌi ka benne seꞌele daka Acaya‑na, usedali chi seꞌe tsele ki utele belhiu. De nuní biyienikin benne‑ni nna ixeke ulekigaba leke uteke.
\v 3 Ttaka neti ridhelha gaaya ka betsi to geriꞌi‑ni ata seꞌele‑na kini abittu unnitti tisa kia de chi ria deki chiba seꞌe tsele utele belhiu. Aníha kini attiba chi unneaha, aníha‑gaba lebiꞌi chi seꞌe tsele utele,
\v 4 kini ni kina dha ttu chupa ka nu Macedonia‑ni len neti tti itaa ata seꞌele‑na, laꞌania nna etexxakakana le abí chi seꞌe tsele kini utele belhiu. Kumu ttu elhittuba nuha dhitu ganna abíba chi seꞌe tsele ki utele. Ria deki riꞌitu dhitu elhittu, kiniba abittu innía deki lebiꞌila nuná dhile elhittu ge nu chi ratu ka benne‑ni.
\v 5 De nuha nna uka doelha unnabaa len ka betsi to geriꞌi‑ni nneru gaake itake ata seꞌele‑na kini kixxiꞌakanie le ki uttupa gaale nu chi rale uteleha, kini chi tee tse nuha ganna chi isiatuha. Aníha kini uleꞌe deki gwalí redá lele rutele belhiu kini abittu ute ditibale na.
\p
\v 6 Neti ttu nu upeya le: Nu rada ttu lattiha, lattirugaba relapa nuha, nu rada ixeniha nna ixenigaba relapa nuha.
\v 7 Kua ttu ttule gwaluteba nu chiba uleki lele utele. Abittu itú elenibinle tti utele na o lhe itú dho doelhabale ki utele na, kumu Tata Do Yebáha rakanie ge ka benne du itta leke tti ruteke ttu bixa.
\v 8 Benneha xxeni ra lebie gute tamabe elha tse gele, kini satíaba gatta iyá nu iyasinle. Aníha kini edáru lele uinle bixaba nu anka tse len adí ka benne.
\v 9 Kumu attiba ra lo ka tisa geeha ata dia ra:
\q Benneha utidhi tame begwebie ka benne abittu geke tee;
\q nu tse benieha, ttu tsaba labí ixulhinriꞌi ge nuha.\f + \fr 9:9 \ft Salmo 112:9\f*
\m
\v 10 Tata Do Yebaa benne rutebie ninni lhe rugoe benne riguꞌubie lo yuha lhe, benneha‑gaba nuha uterue yani gele kini uinrule nu anka tse.
\v 11 Aníha ki gatta iyá gele nna edáru lele ute chiettirule, kini anáchu ganna chi sadhaꞌantu belhiu uteleha nna ka benne dhike nuha nna ugweke Tata Do Yebáha ixkixaru.
\v 12 Nu edá lele uteleha laa sunruga ixúna kini odilána ka benne chi ankake ge Tata Do Yebáha lo nu riyasakanie, sinuki ixúgabana kini ugweruke Tata Do Yebáha ixkixaru.
\v 13 Ganna chi uxíke nu edá lele uteleha, laꞌania nna uinke ki inná xxeni le Tata Do Yebáha de ilákanie gwa ruinbale nu ra ka tisa ria lele ge Cristuha lhe gwa redába lele rutele nu riyasakanie lhe rutele nu riyasani iyá ka benne lhe.
\v 14 Anágaba innabagabake gele len Tata Do Yebáha de raka xxattakanie gele de elha tse chi bete tama Tata Do Yebáha gele.
\v 15 Ixkixaru Tata Do Yebáha de nu tse redá lebie rutebie geriꞌi, delába nu tse labí raka geriꞌi kixxiꞌariꞌi geni.
\c 10
\s Pabluha rekabie ge ka nu riguꞌu niꞌakani sina runieha
\p
\v 1 Kwinaga neti Pablo, ttiba ben Cristuha, len tisa besiba lhe len elha siꞌi lasiba aníha‑ba rulisaa le, meskiba ganna rákana deki neti ttu nu rasibani ankaa tti dua arlole, ttaka tti rea idittu nna rákana deki yalhá idisa rinnea.
\v 2 Rinnabaa lole bittu uinle kini ka inne disaa ganna chi bisiaya ata seꞌele‑na, kini abittu unia attiba chi rulaba lasia udhakaa ka nu rákana deki riꞌitu ruinbatu attiba ruin ka benne seꞌe yiesi lo yu‑ni.
\v 3 Gwalí galá, meskiba ankatu ge yiesi lo yu‑ni, ttaka labí ruintu tti ruin ka nu seꞌe yiesi lo yu‑ni.
\v 4 Riꞌitu tti ritilhatu len nu xxegwiha, labí rixuintu luesi nu rixúni ka soldadu seꞌe yiesi lo yu‑ni tti ritilhakana, sinuki riꞌitu rixúlintu nu tsitsi ra le Tata Do Yebáha kini rutseꞌe lootu iyába nu ra tsitsi leni,
\v 5 delába rutseꞌe lootu iyába ka tisa rotsiꞌinu le ka benne tti rinneke lhe anágaba rutseꞌe loogabatu elha ttaba ruin ka nu rusunakana ki abittu uinbia ka benne Tata Do Yebáha lhe ruintu kini otsea ka benne nu rulaba leke nna udoke tisa ge Cristuha.
\v 6 Lebiꞌi ganna chi rudole tisa ge iyá tte, laꞌania nna riꞌitu chigaba seꞌe tsetu kini ugwetu elha disa iyá ka nu abittu rudokana tisa gebie.
\p
\v 7 Lebiꞌi bittu ulannile ttixa anka ka benne lo lia, gwalulannila ke attiba ankaba geni. Ganna nuxa ttúle chi xen tsitsi lele deki chi ankale ge Cristuha, anágaba nna tegaba ki okinni ikile deki riꞌitu chigaba ankatu ge benneha.
\v 8 Neti labí rettuti meskiba ganna ritebiaya de ra xxeni lasia tti ria: “Tata Xisiha‑ba betebie lo neda getu ki useꞌe tsitsitu le lo neda gebie, laa betege lo neda getu kini unnittitu le.”
\v 9 Bittu akinle deki runia uniasinia le len nu rinnea lo ka yetsi ridhelhaa ata seꞌele‑na.
\v 10 Kumu seꞌe ka nu rákana: “Yalhá idisa rinnena lo ka yetsi ridhelhana, ttaka atti duna arloriꞌi, ttu benne terissiba ankana lhe labí ruꞌu leriꞌi tti anka ixtisa‑ni.”
\v 11 Ka nu rinne aní, raka letu kixxiꞌentu kana deki atti tteba rinnetu lo yetsi‑ni seꞌetu idittu, anágaba innetu ganna chi seꞌetu len lebiꞌi.
\p
\v 12 Riꞌitu labí eyaxintu kuꞌu luesitu prueba len ttu chupa ka nu seꞌe naa, ka nu rákana deki yalhaba tse ruinkana. Bi ge ka nuná. Runi nu a re itá lebani ruin ka nuná, kumu la labakana riguꞌu luesikani prueba kini ruleꞌe nuxakana rakaru gekani.
\v 13 Riꞌitu labí ritebiatu inná xxeni letu ge nu ruintu, sinuki rekibatu rigixxiꞌatu ka tisa ge Tata Do Yebáha debá ataba chi bedhaꞌane tsekitu kixxiꞌatu ke, de nuha nna bisiatu ata seꞌele‑na.
\v 14 Riꞌitu labí ritebiatu tti ratu: “Chiba bitatu ata seꞌele‑na”, kumu gwalíba riꞌilatu ladeꞌa tte bisiatu ata seꞌele‑na ki utixxiꞌentu le ge Cristuha. Ttebia galátu innetu ganna ttixka abíba chi bitatu ata seꞌele‑na.
\v 15 Riꞌitu labí ra xxeni letu ge sina ben attu benne subi, labí innátu deki riꞌilatu bentu sinaha. Riꞌitu nu ruinlatu, xenba letu gele kua tsiaba lele ge Cristuha, aníha‑gaba nna tsani chiettirugaba sina getu daka ata seꞌele‑na,
\v 16 kini isilarutu tsiatu kixxiꞌatu ka tisa geeha len ka benne seꞌe iditturu. Aníha uintu ki abittu sattaꞌatu lo yu ata chi utixxiꞌa attu benne subi nna inná xxeni letu ge sina nu ben benneha.
\v 17 Laxkala nu raka leni inná xxeni leni ge nu ruinna, inná xxenila leni ge Tata Xisiha, kumu benneha nuha raka lenie na.
\v 18 Kumu nu titúbana ra xxeni leni ge nu ruinnaha, labí lana nuha eyaꞌan tsena arlo Tata Xisiha. ¡Koꞌo! Sinuki benne innála Tata Xisiha deki tseba runie, benneha‑la nuha eyaꞌan tsebie arlo Tata Xisiha.
\c 11
\s Pabluha rigixxiꞌabie ge ka nu labí gwalí ankakana // apóstol ge Cristuha
\p
\v 1 Gwalidhí elha xen lasi kia ge nu innea‑ni, neti bittiba ria. Runia attiba ttu nu raka ikini. Gwalutto gwaluchíaba a latti ge nu innea‑ni.
\v 2 Kumu Tata Do Yebáha‑ba runie kini rapa yiea le. Rapaa le yie kumu de chi nabati le kini akale ge ttúba nubiyú, delába ge Cristuha. Aníha kini neti gwaka kia utso dua le arloe attiba ttu nu rutso du ttu nuila ribani ankana nari xú, abittu bi chi benna.
\v 3 Ttaka neti rixxusati kini ka ixú yiele satele attiba gwate Eva‑ni. Nuha‑ruga bixú yiena bedo nagani ge nu botsiꞌinu le belhaha. Anágaba lebiꞌi ni kina ixú yiegabale nna udhanle abitturu itú iki itú lele udo lele Cristuha.
\v 4 Kumu lebiꞌi ttixka daa ttu nu rigixxiꞌenna le ge attu Jesús subi, nu labí raxxína na len Jesús benne chi utixxiꞌentu le geeha, lebiꞌi nna gwexxunniba rudo nagale ge nuha, lhe gwexxunnigaba rulabile attu espíritu subi, nu labí raxxína na len Espíritu ge Tata Do Yebáha, delába Espíritu nu chi uxíleha, lhe anágaba ttixka daa attu nu rigixxiꞌenna le attu tisa subi, nu labí raxxína na len ka tisa chi utixxiꞌentu le ge Cristuha, lebiꞌi nna gwexxunnigaba rulabile tisa ge nuha.
\v 5 Neti rakati labí rexxa gaaya arlo ka nu rudo nagale gekinna, ka nu rale deki ankakana ka apóstol ra xxeni xxatta lekani.
\v 6 Kumu meskiba neti labí tte tse rinnea tti rinne ka nuná, ttaka netila ankaa nu yurua. Ixe looba lhe ixe libeba chi beleꞌenia le nu yua.
\p
\v 7 Neti, ¿si satsaba nuha benia borexxa gaa lasia kini lebiꞌi uná xxeni lele tti labí bekixaa le tti utixxiꞌania le ka tisa ge Tata Do Yebáha?
\v 8 Ka benne ritupake ria leke ge Jesús‑ni seꞌeke lheꞌe adí ka yiesi‑na, ka benneha‑ba bedhaka siꞌa ulhia belhiu lenke kini bixúti tti ugwekia utixxiꞌania le ka tisaha.
\v 9 Atti udoa len lebiꞌiha, tti biyasati ttu bixa, ni ttúle labí betsetsinia le. Ka betsi to geriꞌi, ka benne daa daka Macedonia‑niba beteke nu biyasati. Doelha tsitsiba benia kini abittu betsetsinia le nna anába sa tsiaya unia.
\v 10 Cristuha gwa yu xeabe deki gwalíbati. Ni ttú benne do lo yu ge Acaya‑na labí aka gebie usune kini abittu inná xxeni lasia de abittu unnabaa belhiu tti ugwekia naa.
\v 11 ¿Beaka runia aní ganna? ¿Si de labí rakati gele? ¡Koꞌo! Tata Do Yebáha gwa yu xeabe gwa rakabati gele.
\p
\v 12 Ttaka neti sa tsiabaa unia aní, labí innabaa belhiu len lebiꞌi. Aníha unia kini udheaya roꞌo ka nu ra xxeni lekani ka nu rákana deki ruingabakana sina attigaba ruintu.
\v 13 Ka nuná ruinkana deki ankakana apóstol ge Cristuha, ttaka labí gwalíkinna. Nu gwen lasiba ankakana.
\v 14 Labí dika ebaninriꞌi ge nu ruin ka nuná kumu kila kwinaba nu xxegwiha ruinna deki ankana attiba ttu anjeli do lheꞌe xiani.
\v 15 Laxkala labí dika ebaninle ganna ka nu rixúkana lo sina ge nu xxegwiha, ruingabakana deki ankakana ka nu rigixxiꞌakinna ka benne nu anka tse. Ttaka ganna chi bisia sáha, dhiba ka nuná nu ralhakana ge nu ruinkana.
\s Pabluha rigixxiꞌabie ge nu ratebie
\p
\v 16 Rinnea rulisaa le attu libe: Ni ttúle abittu akinle deki rakaba ikia tti rinnea aní. Ttaka ganna si anába rulaba lele, gwalugwelhaba neti unia ge nu raka ikini kini aka kia inná xxeni lasia ttu latti ge nu runia.
\v 17 Laa Tata Do Yebáha‑ga ree neti aní beni. ¡Koꞌo! Nu anka kibaa nuní ra xxeni lasia, ruinbaa attiba nu raka ikini.
\v 18 Kumu ki ixeba ka nu ra xxeni lekani ge nu ruinkana, anágaba neti inná xxenigaba lasia ge nu runia.
\v 19 ¡Lebiꞌi ruleꞌele deki ankale nu yuu ttinka, ttaka delo nna gwexxunniba rudo nagale ge ka nu raka ikikinna!
\v 20 Lebiꞌi axtala ridielhale ge ka nu rudhakakana le attiba ttu nu toꞌo lo sina gekani,
\q lhe axtala ridielhale riguakana lo nále nu tee gele,
\q lhe rudhakakana le attiba rakaba lekani.
\q Anágaba nna ruchíagabale lo ka nu ra xxeni lekani, ka nu labí ria lekani le.
\q Ka nuná, atti rudhakakana le aní, ttisidiba rigapabakana roꞌole.
\m
\v 21 Elhittu‑ba nuní ridía tti ria yalhá ttela yusi ukatu len lebiꞌi, labí bedhakatu le tti rudhaka ka nuná le.
\p Ttaka ganna ka nuná ra xxeni lekani ge attu bixa, neti gwakagaba kia inná xxeni lasia. Rinnebaa attiba ttu nu raka ikini.
\v 22 Ganna ka nuná rákana ankakana ka nu rinne tisa hebreo, anágaba neti rinnegabaa tisa hebreo,
\q nna ganna rákana ankakana nu Israel, anágaba neti ankagabaa nu Israel,
\q lhe ganna rákana datiakana Abraham‑ni, anágaba neti datiagabaa benneha.
\q
\v 23 Ganna rákana ankakana ka nu rixúkana lo sina ge Cristuha, neti rixúrulaa lo sina ge benneha tti lakana.
\q Rinnebaa attiba ttu nu gwalíba raka ikini.
\q Kumu netila nu chi urenrua sina ge benneha attichula lakana,
\q lhe ixe lidúrula chi uttaa lisiyya,
\q lhe ixe lidúrula chi biyayaa,
\q lhe ixe lidúgaba chi uláya lo elhuttiha lhe.
\q
\v 24 Ka nu lheꞌesi kiaha, delába ka nu Israel‑ni, gayu lidú chi bekulhakana neti len yieti. Lheꞌe ttu ttu libeha rerua bixxi jaa (39) uxxuakana neti yietiha.
\q
\v 25 Tsunna lidú chi uxxuakana neti yaga,
\q lhe ttu lidú chi besiakana neti íyya lhe.
\q Anágaba tsunna lidúgaba chi bexunnina kia gannala uttia tti rixudi ka barcu diayaha lheꞌe indatooha.
\q Ttu ela ttu ságaba udaaya lo indatooha lhe.
\q
\v 26 Ixe lidú tti yuꞌa neda bexunnina kia tti rilháya lo ka yoo‑na,
\q lhe bexunnina kia ge ka ubana lhe.
\q Anágaba bexunnigabana kia ge ka nu lheꞌesi kiaha, delába ka nu Israel‑ni;
\q bexunnigabana kia ge ka nu abittu ankakana nu Israel.
\q Anágaba nna bexunnigabana kia uttikana neti lheꞌe ka yiesi‑na,
\q lhe bexunnigabana kia satea ttu bixa tti ritea ata lanú benne seꞌe,
\q lhe bexunnigabana kia lo indatooha lhe.
\q Anágaba bexunnigabana kia ge ka nu rákana deki ria lekani Tata Do Yebáha, ttaka labí liikinna.
\q
\v 27 Anágaba betú besábati uren xxattaa sina,
\q lhe ixe lidúgaba bebeaya bisiela, labí utaꞌadhia,
\q lhe gwadú uttia ubina lhe bebisia inda lhe.
\q Ixe lidú chi bette ubina lheꞌa, abittu roa,
\q lhe gwadú beyasaa idilha de labí gwadilo xoa tee.
\p
\v 28 Anna laa suna nuníruga ratea, anágaba ttu ttu ságaba ruchacha ikia ge iyá ka benne chi ria leke Cristuha gaxaba seꞌeke.
\v 29 Kumu ttixka nuxa ttúle ridakale ttu bixa, anágaba neti ruyúgabaa elha disa ge nu rateleha, lhe ttixka nuxa ttúle ridí yiekana le ki ruinle ttu bixa nu abittu anka tse, anágaba neti risaꞌagabati tti rudhakakana le aníha.
\p
\v 30 Ganna tee ttu bixa inná xxeni lasia geni, ge nu labí gwakaa unia, ge nuha‑ruba gwaná xxeni lasia.
\v 31 Tata Do Yebáha Xxudi Jesucristu benne anke Xxanariꞌiha, benneha satía uinriꞌi kini inná xxeni lebie. Benneha gwa yu xeabe, neti labí ruin lasia.
\v 32 Tti rinnabia Aretas‑ni ka yiesi seꞌe itúba daka Damasco‑ni, laꞌania rea lheꞌesi Damasco. Nu rinnabiana lheꞌesiha beseꞌena ka nu biyúkana roꞌo yiesiha kini udaxxukana neti ganna chi eriaya niha.
\v 33 Ttaka lheꞌe ttu sumiba beguꞌuke neti belhidake neti roꞌo ttu ventana do lheꞌe deꞌe rilhi abiꞌiba yiesiha. Aníha‑ruba nna chi uka uláya lokani kini abittu bedaxxukana neti.
\c 12
\s Pabluha rigixxiꞌabie ge nu belaꞌanie yebáha
\p
\v 1 Gwalí galá, bi teeki iriꞌenriꞌi inná xxeni leriꞌi ge nu ruinriꞌi, ttaka neti teeki kixxiꞌaya ge nu belaꞌati yebáha, delába nu ben Tata Xisiha kini neti biláti.
\v 2 Neti ankabiati ttu nubiyú ria leni Cristuha. Chi uka sitá ida nuha atti ttu nnelaba biyalhina kini ugíana nu beyonna yebáha. Bittuba yua si itupa len bela latini ugíana, o abittu. Sunruba Tata Do Yebáha gwa yubie.
\v 3 Nu yúrubaa, netiba nuha biyalhia kini ugíaya ata chi gaꞌanani Tata Do Yebáha tseꞌe tse ka benne, si itupa len bela latia ugíaya, o abittu. Sunruba Tata Do Yebáha gwa yubie.
\v 4 Iyába tsagwi anka ka tisa biyienti yebáha, ka tisa ka nu ni ttu benne dika innebie kana.
\v 5 Ge nu gwatealigaba nna gwaná xxeni lasia geni, ttaka ge nu ruin kwinaga neti labí inná xxeni lasia geni. Laruba ge nu abittu gwakaa unia, ge nuha‑ruba gwaná xxeni lasia.
\v 6 Ganna aka lasia inná xxeni lasia ge nu runia, labí ge nu raka ikini nuha unia, kumu inneba neti ge nu gwalíba runia. Ttaka labí raka lasia inná xxeni lasia kini aníha nna anuttu nu akinna deki neti xxenirula ra lasia attichula nu rilenna runia lhe attichula nu riyieninna rinnea lhe.
\v 7 Anágaba kini abittu inná xxeni lasia ge nu tse lhe ge nu xxeni belaꞌati yebáha, de nuha nna bete Tata Do Yebáha ttu nu rutsetsinna neti. Nu rutsetinna netiha attiba ttu yetsi ankana yadana latia. Nuní rixúni nu xxegwiha kini rugwena neti elha disa. Aníha kini abittu ttebiaya inná xxeni lasia ge nu belaꞌatiha.
\v 8 Tsunna lidú chi unnaba ditia lo Tata Xisiha kini kuabie nuní latia.
\v 9 Ttaka labie bekabilee kia ree: “Beyaka xen lelu, ukareꞌaba gwa rakaba lania lu, kumu len ka nu abittu re tsitsi lekinna, neti ruleꞌe loorulaa nu tsitsi ra lasia.” De nuha nna neti Pablo itú iki itú lasia inná xxeni lasia ge nu abittu gwakaa unia. Aníha kini satíaba uleꞌe looa nu xxeni ra le Cristuha.
\v 10 Laxkala neti ittala redú lasia atti labí gwakaa unia ttu bixa,
\q lhe tti rinnekana kia
\q lhe tti riyasa kia lhe.
\q Anágaba ittagaba redú lasia tti ridú nookana rudhaka disakana neti,
\q lhe ttixka bixa ratea lhe.
\m Iyá nuní ratea de rekia rigixxiꞌaya ge Cristuha. Kumu neti attila labí re tsitsi lasia, laꞌaniala ribeki tsitsi Cristuha lasia.
\s Pabluha ruchacha ikie ge ka benne ria leke Cristuha // seꞌe lheꞌesi Corinto
\p
\v 11 Neti ge nu raka ikibani runia tti ra xxeni lasia, ttaka lebiꞌiba nuná rudo doelhale neti ki runia aní; gwarrana lebiꞌila nuná inne tsele kia. Kumu meskiba neti lanú nu ankaa, ttaka labí rexxa gaaya arlo ka nu rale deki ankakana ka apóstol ra xxeni xxatta lekani.
\v 12 Tti udoa len lebiꞌiha, labí bedú siia a benia ka nu xxeni lagwi gele, delába ka milagru lhe ka nu bebaninle gekani lhe. Iyá nuní benia beleꞌe deki gwalí ankaa apóstol ge Jesús‑ni.
\v 13 Lebiꞌi, ¿si chi berexxa gaaya le arlo adí ka benne ria leke Cristuha, delába ka benne ritupa lheꞌe adí ka yiesi‑na? ¿Si laaba ga de abíba betsetsinia le innabaa le nu biyasati atti udoa len lebiꞌiha, si laaba ga de nuha‑ba nna risetsinle neti? ¡Gwalidhíchi elha xen lasi kia ge nu roseꞌa lole‑ni!
\p
\v 14 Nnanna chi du tsea ki itaa etelannia le. Nuní chi aka beyonna libe ritaa. Anágaba unia ganna chi bisiaya ata seꞌele‑na, labí raka lasia utsetsinia le ge nu iyasati, kumu laa nu tee gegale rulha lasia dhia, sinuki lebiꞌila nuná. Kumu attiba ttu xxudi len ka xiꞌinni, laa ka nuha‑ga nuha uchacha ikikani ge nu go xxudiha, ¿laaba ganna xxudiha‑la nuha uchacha ikini ge nu go ka xiꞌinniha?
\v 15 Laxkala neti de lebiꞌi nna eria iki eria lasia utea nu tee kia, meskila tuttíru etua de rulaꞌania le kini lebiꞌi nna saría tsena le. Meskila neti rakaruti gele, lebiꞌi nna lattiruba rakinle kia.
\p
\v 16 Ttu chupale rale: “Gwalí galá, laꞌania lana labí betsetsinna riꞌi ge nu biyasinna, ttaka ankana ttu nu rotsiꞌinu leni nna len gwen lasiba bedaxxuna ikiriꞌi.”
\v 17 Gwalinnáruga, ¿si ka benne ridhelhaa ata seꞌele‑na, si ka benne‑na nuná rixúti ke ki ralhia belhiu gele?
\v 18 ¡Koꞌo, labí! Neti, tti unnaba lo Tito‑na ki itana ata seꞌele‑na, udhelhagabaa attu betsi to geriꞌi lenna. Gwalinnáruga, ¿si utua Tito‑na gele tti bitana ata seꞌele‑na? ¡Koꞌo, labí! Riꞌitu labí ruin riꞌitu aná. Riꞌitu turoꞌoba rulaba letu lhe turoꞌogaba ruintu lhe.
\p
\v 19 Xa betsi to kia, ¿si rakinle deki rigí xúba nátu tti ratu le deki labí bi ruintu? ¡Koꞌo, labí! Riꞌitu rinnebatu arlo Tata Do Yebáha atti galába benne due len Cristuha. Iyába nu ruintu, ruinbatu na kini lebiꞌi tseꞌe tsitsirule lo neda geeha.
\v 20 Kumu neti rixxusati gele ni kina tti isiaya ata seꞌele‑na abíba etexxakaa le ruinle tti tte raka lasia uinle, anágaba neti ni kina abíba unia nu tsuꞌu lele tti isiaya naa. Kumu rixxusati ni kina etexxakaa le seꞌe tilhale,
\q lhe rutía di le luesile lhe.
\q Anágaba ni kina seꞌele risaꞌani len luesile,
\q lhe ni kina yuꞌule riguꞌu niꞌa ge luesile lhe.
\q Anágaba ni kina seꞌele rinne ge luesile,
\q lhe rinne kweꞌe luesile lhe.
\q Anágaba ni kina etexxakaa adíle seꞌele ruinle deki ankale nu ra xxeni lele,
\q lhe ni kina nu subi subiba ruinle yuꞌule lhe.
\m
\v 21 Anágaba rixxusagabati ni kina tti isiaya naa, ugwe Tata Do Yebaa kia neti elhittu tti dua lagwi gele. Laꞌania nna kwesia de elenti kumu de ixele axta ttuha dale ruinle tulha nna labí chi bodúna le ki udhanle iyá nu satsa ruinle, lhe labí chi bedhanle risále nu subi subi, lhe anágaba labí chi bedhanle ruinle nu retaba le latile ruinle lhe.
\c 13
\s Pabluha rulhuxe rinnebie len ka benne seꞌeke lheꞌesi Corinto
\p
\v 1 Nuní aka tsunna libe itaa ata seꞌele‑na nna iyába nu riyasa aka elhuxtisi geni teeki seꞌe chupa o tsunna ka benne biyú loke bixa uka. Aníha kini aka elhuxtisi ge nu ukaha.
\v 2 Chiba xpeya le tti bitaa ata seꞌele‑na nu berupa libeha, nnanna rea idittu redennea attu libe ria, ganna chi isiaya attuha ni ttúle labí satua lasia le: ni ka nu benkana tulha ttuha lhe nigaba nuxaru attu benne lhe.
\v 3 Aníha kini lebiꞌi ilenle deki Cristuha‑ba nuha rinnee tti rinnea. Benneha labí a eyaxanie bixa udhake le, sinuki tsitsi udhaka benneha le.
\v 4 Gwalí galá benneha beyake ttu benne labí tsitsi uná lebie tti utábie lo ya kurusiha, ttaka de Tata Do Yebáha ra tsitsi lebie, nu ra tsitsi leeha beni kini nnanna anka ben Cristuha. Anágaba riꞌitu nnanna ratetu ttiba gwate benneha, labí tsitsi re letu, ttaka de Tata Do Yebáha ra tsitsi lebie, de nuha nna runie kini riꞌitu tseꞌetu aka bentu de seꞌe lentu Cristuha. Aníha kini ixútu ki ute nátu len lebiꞌi.
\p
\v 5 La lebiꞌiba gwaltseꞌe gwalulanni gele ganna gwalínle ria lele Cristuha. Lebiꞌi gwa yúbale, benneha doe lheꞌe lastole. Ganna abíba doe lheꞌe lastole, laꞌania nna chiba binittile arlo Tata Do Yebáha.
\v 6 Neti ruxxenba lasia deki lebiꞌi gokinniba ikile deki riꞌitu labí binittitu arloe.
\v 7 Riꞌitu rinnabatu len Tata Do Yebáha kini lebiꞌi abittu uinle nu satsa. Laa ruingatu kini uleꞌe deki riꞌitu iria tsetu arlo Tata Do Yebáha. ¡Koꞌo! Sinuki ruinlatu kini lebiꞌi tseꞌele uinle latsiru, meskila riꞌitu uleꞌe deki rinittitu arloe.
\v 8 Kumu riꞌitu ruintu nu raxxína len nu gwalíga anka tisa ge Tata Do Yebáha, labí ruintu nu abittu raxxína len tisa geeha.
\v 9 Laxkala ittaba du letu de labí tsitsi re letu, lebiꞌi nna kwe tsitsila lele. Nuní rinnabatu gele len Tata Do Yebáha kini isinle akale benne tseꞌe tsitsirule lo neda geeha.
\v 10 De nuha nna nnanna rea idittu runia yetsi‑ni nna ridhelhaa na len lebiꞌi, kini ganna chi bisiaya ata seꞌele‑na abittu udhaka disaa le. Kumu Tata Xisiha labí betebie lo neda len neti kini utseꞌe looa le, sinuki betelee lo neda kia ki useꞌe tsitsia le.
\p
\v 11 Debá nuníba rigixxiꞌania le xa betsi to,
\q gwaltseꞌe itta,
\q lhe gwaluin doelha kini isinle akale benne tseꞌe tsitsile lo neda ge Tata Do Yebáha,
\q lhe anágaba gwaluseꞌe tsitsi luesile,
\q lhe ttúba gwalulaba lele,
\q lhe latsiru gwaltseꞌe len luesile lhe.
\m Aná nna Tata Do Yebáha gwadúgabe len lebiꞌi. Benneha rakanie geriꞌi lhe ruseꞌe tsebie riꞌi lhe.
\p
\v 12 Gwalugwe luesile ttu padiuxi lhe gwaligo ttu xxaga luesile lhe.
\v 13 Iyába ka benne seꞌe nii ka benne chi riesini Tata Do Yebáha ki akake gebie ridhelhake ttu padiuxi gele.
\p
\v 14 Jesucristu benne anke Xxanariꞌiha edá lebie aka lenie le lhe anágaba edí baale elha siꞌi lasi ge Tata Do Yebáha, lhe Espíritu geeha satía dhoe len lebiꞌi. Amén.